Повесть зело полезна, яже бысть во дни наша, како человеколюбец Бог являет неизреченное человеколюбие Свое над народом христианским. Хощу убо вам, братия, повесть предивную поведати, страха и ужаса достойную, како Господь долготерпелив и многомилостив, молитвами Пресвятыя Владычицы нашея Богородицы и Приснодевы Марии избавляет род христианский

Бысть убо во дни наша, в лето 7114-го (1605–1606) году, за умножение грехов наших попусти Бог на Московское государство многомерзского отступника и еретика Гришку Отрепьева, похити престол Российского государства, разбойнически, а не царски восприят. Тогда по всему Российскому государству умножися злочестивая литва, и много пакости и разорения народом российским на Москве и по градом творяху, и от того литовского разорения мнози домы своя оставляху, из града во град бежаху.

В то же время во граде Устюге некто был житель града того Фома, по прозванию Грудцын-Усов, ихже род и доднесь во граде том влечется. Той убо Фома, видя в России таковое нестроение и нестерпимыя пакости от нечестивых ляхов и не хотя жити, оставляет великий град Устюг и дом свой и переселяется с женою в понизовый славный град Казань, зане³⁰ не бысть в понизовых городех злочестивыя литвы. И живяше той Фома во граде Казани даже до лет благочестивого царя и великого князя Михаила Федоровича всея России.

Имея же той Фома Грудцын сына единородного именем Савву, двунадесятъ лет возраста. Обычай же имеяше той Фома куплю деяти, отъезжая вниз Волгою рекою, иногда к Соли Камской, иногда в Астрахань, иногда же в Персию в шахову область. Тому же и сына своего Савву поучаше и неленостно таковому делу прилежати повелеваше, дабы по смерти его наследник был имению его. По некоем же времени восхоте той Фома отплыти на куплю в шахову область, и обычныя суда с товаром устроиша по обычаю. Сыну же своему Савве устроив суда собственные с особливыми товары, и повелевает ему плыти к Соли Камской и тамо купечество деяти со всяким опасением и прилежати повелевает. И потом обычное³¹ целование жене своей и сыну подаде, пути касается в Персию. Мало же дней помедлив, и сын его Савва на устроенных судах по повелению отца своего к Соли Камской плавание творить начинает.

Достигшу же ему Усольского града Орла, абие³² пристает ко брегу, у некоего нарочита³³ мужа пребывает и обитает в гостиннице. Гостинник же той и жена его, помня любовь отца его, и не мало прилежание и великое ему благодеяние творяху, яко о сыне своем. Он же пребысть у гостинника того немало время.

В том же граде Орле некто бысть мещанин именем Бажен Вторый, уже стар в летех и знаем во многих градех, понеже богат зело, и попремногу дружен отцу Саввину Фоме Грудцыну. Уведав же Бажен Вторый, яко из Казани Фомы Грудцына сынъ во граде обретается, и помысли в себе «Отец его со мною многую любовь и дружбу имел, аз же ныне презрех³⁴ его, но убо возму сына его в дом свой, да обитается у меня и питается со мною от трапезы моея».

И сия помыслив, усмотря некогда того Савву путем идуща, призвав же его к себе и нача ему глаголати «Друже мой Савва! Или ты не веси³⁵, яко отец твой со мною многую дружбу и любовь имел, ты же почто презрел еси и не пристал в дом мой? Ныне не преслушай мя, прииди и обитай в дому моем и питайся общия трапезы моея. Аз убо за любовь отца твоего вселюбезно, яко сына своего, прииму тя».

Слышавше Савва от мужа такия глаголы, вельми рад бысть, яко от такового славного мужа любовь такую принял. И приятен хощет к нему быти, и низко поклон отдает, и немедленно от гостинника того отходит в дом Баженов. И живяше во всяком благодарствии, радуяся. Муж же Бажен стар бысть, имел у себя жену младу, третьим убо себе браком обрученну, и поятъ ея сущую девою.

Ненавиде же добра супостат диавол, виде мужа добродетельное житие, и хотя возмутити³⁶ дом его, и уязвляет³⁷ жену его на юношу оного Савву к скверному смешению блуда, растлити жену оную любовию к Савве. И начат уловляти юношу лстивыми³⁸ словесы к грехопадению, блудно весть бо женское естество, уловляет умы младых отроков к блудодеянию. И тако лестию той жены, паче же рещи от зависти диавольской, запят³⁹ бысть, паде⁴⁰ в сети к блудодеянию, с женою оною несытно творяше блуд и безвременно⁴¹ во оном деле скверно пребывающе с нею, ниже день воскресения, ниже праздника Господня знаша, но, забыв страх Божий и час смертный, всегда в блуде пребываше, яко свиния в кале валяшеся.

И некогда же приспевшу празднику Воскресения Господа Бога и Спаса нашего Иисуса Христа, в навечерии праздника той муж Бажен поим⁴² юношу оного Савву с собою, и поидоша до святыя церкви к вечернему пению. И по отпущении вечернего пения⁴³ паки⁴⁴ приидоша в дом свой, и каждой на ложи своем возлегати спати нача. И егда Бажен заспа крепко, жена же его, диаволом подстрекаема, воста от ложа своего, и прииде к постеле оного юноши Саввы и возбуди⁴⁵ его, понуждаше его к смешению блуда. Он же, аще и млад, но яко некою стрелою страха Божия уязвлен бысть и бояся суда Божия и часа смертного, помышляше в себе «Како в таковый Господский праздник аз таковое скверное дело сотворити похощу?». И, сия помыслив, начат отвращатися, с клятвою⁴⁶ глаголя, яко «не хощу всеконечно погубити душу свою и в такой торжественный праздник осквернити тело свое». Она же несытно распалилася похотию блуда, понуждаше его ово⁴⁷ ласками, ово прещением⁴⁸ неким, угрожая ему, дабы исполнил желание ея. И много увещевала его, никако его возможе приклонити к воли своей. Видя же оная лукавая жена то, яко не возможе прельстити юношу к себе, абие злою яростию на юношу распалися и, яко лютая змия, востонавше⁴⁹, отиде от ложа его помышляше волшебным зелием опоити его и злыя свои помыслы сотворити хотя на него. И елико⁵⁰ замысли, тако и сотвори.

Егда же начаша клепати ко утрени⁵¹, благолюбивы же оны муж Бажен Вторый скоро воста от ложа своего, возбудив же и оного юношу Савву к заутрени. И отслушавше со вниманием и страхом Божиим, и приидоша в дом свой. И егда же приспе время Божественней Литургии, поидоша паки к Литургии с радостию до святыя церкви. Проклятая же оная жена тщательно устроише волшебная зелия на юношу, яко лютая змия хотяще яд свой изблевати на него. По отпущении же Божественныя литургии Бажен и Савва изыдоша из церкви, хотяше идти в дом свой. Воевода же града того пригласи Бажена, да обедует с ним. Вопросил же и о Савве, чей есть и откуду он. Поведав же Бажен, яко из Казани, Фомы Грудцына сын. Воевода же пригласи и Савву в дом свой, зане добре знающа отца его. Бывшу же в дому воеводском, обычно трапезы причастившеся и возвратишася в дом свой.

Бажен же повеле принести вина жене, да испиют в дому своем чести ради праздника, ничтоже бо лукавого умышления жены своей знаяше. Она же, яко ехидна злая, скрывает злобу в сердце своем и подпадает⁵² лестию к юноше оному. И принесену бывшу вину, наливает чашу и подносит мужу своему. Он же, испив, благодаря Бога. И потом вливает сама себе, и потом, испив, наливает отравного зелия и подносит Савве. Он же, нимало помыслив, ниже бояся лукавствия жены оныя, чающе⁵³, яко никоего зла мыслитъ на него, и безо всякого размышления выпивает лютое оное вино зельное. И се начат яко огнь горети в сердце его. Он же помышляше в себе, яко «много различных питей пиях в доме у отца моего, такого пития николиже пивах, якоже ныне».

Егда же испив пития оного, начат сердцем болети и тужити по жене оной. Она же, яко лютая змия и львица, яростию погледеша на него и приветства не являше ему. Он же, сокрушаяся, по ней тужа. Она же начат мужу своему клеветати и нелепо⁵⁴ глаголати на него и изгнати его вон хотяше из дому своего. Богобоязливый же он муж, и жалея в сердце своем по юноше, обаче⁵⁵ уловлен бысть лестию женскою, повелевает юноше изыти из дому своего, сказа ему вину некую. Юноша же с великою жалостию отходит от него, тужа и сетуя о лукавой жене оной.

И прииде в дом гостинника, идеже сперва живяше и обитающе. Он же вопрошает его, каковыя ради вины изыде вон из дому Баженова. Он же сказа ему, яко сам не восхоте жити у него, а сердцем своим скорбя по той лукавой жене. И нача от великия жалости красота лица его изменятися и плоть его истончевати. Видев же гостинник юношу сетующа и скорбяща зело, недоумевающе, что ему бысть.

Бысть же во граде том некто врач, чарованием⁵⁶ своим сказуя, кому какая скорбь⁵⁷ прилучится, он же знает, кому жити или кому умрети. Гостинник же и жена его, благонравны суще, и немало попечение по юноше имеяху. И призвав тайно волхва оного, хотяще уведати, какова скорбь приключися к юноше. Волхв же оной посмотри в волшебныя своя книги, сказал им истину, яко он никакой скорби юноша не имать в себе, токмо скорбит по жене Баженовой, ибо в блудное дело впаде с нею, ныне же отстужен⁵⁸ от нея бысть, и по ней тужа, и сокрушается. Гостинник же и жена его, таковая от волхва слышаше, и не имеяше веры, занеже Бажен муж благочестив и бояся Бога, и ни во что же то дело вмени. Савва же, непрестанно скорбя и тужа по ней день от дне, и истончи плоть свою, якобы кто великую скорбь и болезнь имел.

И некогда той Савва изыде из града на поле един, и никого за собою или пред собою виде. И помышляше о разлучении своем от жены оной. И, помыслив такую злую мысль во уме своем, глаголя «Егда бы кто от человек или сам диавол сотворил бы сие, еже бы паки совокупитися с женою оною, аз бы послужил диаволу». И такую мысль положи во уме своем, аки бы ума иступлен бысть.

И идяше же един по пустыни⁵⁹ и, мало пошед, слыша за собою глас, зовуще его «Савва, Савва!» Он же, обратишася назад, зря за собою юношу к нему борзо текуще в нарочитом одеянии, махающе рукою, пождати себя повелевающе. Он же стоя, ожидающе, юноша же той пришед к нему, паче же рещи⁶⁰ супостат диавол, иже⁶¹ непрестанно рыщет и ищет человеческия погибели. И пришед к нему, по обычаю поклонишася между собою, и глаголя бес к Савве «Брате Савва, что убо яко чужд⁶² бегаеши от меня? Аз убо давно ожидал тя, да како бы пришел еси ко мне и сродственную любовь имел. Аз убо тя давно знаю, яко от рода ты Грудцын-Усов из града Казани. А о мне аще⁶³ хощеши уведати, и я того же града Казани и недавно здесь пребываю ради конной купли. И убо по плотскому рождению братья мы с тобою есмы, а ныне буди убо мне брат и друг и не отлучайся от меня. Аз убо вспоможения во всем тебе рад чинить». Савва же, слышав от мнимого брата, паче же рещи от диавола, обаче таковыя к себе лепыя глаголы, вмени в правду, и вельми о том возрадовашася, яко в такой дальней и незнаемой стране сродника к себе обрете. И поидоша оба вкупе по пустыни оной.

И рече бес к Савве «Брате Савва, какую ты скорбь имаши в себе, яко вельми исчезе юношеская красота твоя?» Он же всяко лукаво⁶⁴ сказывающе ему некую скорбь быти в себе. Бес же усмехнувся и рече ему «Что убо скрываешися от мене? Аз бо вем скорбь твою, аз убо помогу скорби твоей». Савва же рече «Аще убо истинно ведаеши скорбь мою, то поиму веры, яко можеши мне помощи подати». Бес же рече ему «Ты убо сокрушаешися по жене Баженовой, зане еси отлучен от любви ея. Да что мне даси⁶⁵, аз учиню ти с нею по-прежнему в любви быти». Савва же рече «Аз убо, елико⁶⁶ имам здесь товаров отца своего и прибытков, все тебе отдаю. Токмо прошу, братец, сотвори ми по-прежнему любовь имети с женою оною». Бес же, рассмеявся, рече ему: «Почто убо искушаеши мя? Аз убо вем, яко отец мой седмерицею богатее тебя и отца твоего, что ми будет в товарех твоих? Но даждь мне на себя рукописание малое некое, аз исполню желание твое».

Савва же рад бысть, яко «богатство отца моего все цело будет, и аз дам ему рукописание, что велит написать». А в какую пагубу хощет впасти, того не ведая, еще и писати и ниже слагати⁶⁷ совершенно⁶⁸ не умея. О, безумный юноша! Како уловлен женскою лестию, тоя ради хощет в такую пагубу пасти к диаволу! И егда бес рече к Савве словеса тои, он же с радостию обещася дати ему рукописание. Мнимы же его брат скоро взем изо чпага⁶⁹ свою хартию⁷⁰ и чернила, дает юноше и повелевает немедленно написати писание. Савва еще и совершенно не умеяше писати, и елико бес сказываше ему, Савва же тако и писаше, не слагая. И тем писанием отречеся от Христа, истинного Бога, и предадеся в служения диаволу, мнимому своему брату. И поидоша убо во град Орел.

Вопроси же Савва беса «Повеждь ми, брате, где обитаешися, да увем⁷¹ дом твой?». Бес же рече ему «Аз убо своего дому не имею, где мне прилучится, тамо и ночую. Аще ты хощеши видетися со мною часто, то ищи меня на конной площадке, яко зде живу для конной купли. Аз же сам не обленюся, часто стану тебя посещати. Ты же, Савва, иди к лавке Баженовой, вем бо, с радостию он призовет тя в дом свой». Савва же по глаголу брата своего диавола с радостию притече к лавке Баженовой.

Бажен же, егда увиде Савву, усердно приглашаше к себе, глагола «Господине Савва, какую злобу сотворил тебе я? Почто изшел еси из дому моего? Молю тя, прииди паки обитать в дому моем. Аз убо за любовь отца твоего яко присному своему сыну рад тебе всеусердно». Савва же, егда услыша от Бажена таковые речи, тече в дом Баженов. И жена его, увидев Савву, и диавольским жалом подстрекаема, радостно течаше и стречает его со всяким ласканием и лобызает его. Он же уловлен бысть женскою лестию, паче же диаволом, паки запинается в сети блуда с проклятою оною женою. Савва же не знаше ни праздника, ниже воскресного дне, ниже страха Божия помня. Непрестанно с нею в кале блуда, аки свиния в кале, валяшеся.

По многом же времени абие входит слух во граде Казань к матери Саввиной, яко сын ея живет неисправно и непорядочное житие имеет. Елико было с ним отеческих товаров, все изнурил⁷² в пьянстве и блуде. Мати же, о нем таковое слыша, и непостоянством зело огорчися, и пишет к нему писание, дабы оттуда возвратился во град Казань в дом отца своего. Егда же прииде к нему писание, он же, прочет, посмеялся и ни во что же вменил. Она же паки посылает второе письмо, и третье, ово с молением, ово и с клятвою⁷³, и заклинает его, дабы немедленно оттуду ехал во град Казань. Савва же нимало внят матернее моление, и клятву ни во что же вмени, токмо в несытстве блуда упражняшеся.

По некоем же времени поем⁷⁴ бес Савву, и поидоша оба из града. И глаголет бес Савве «Брате Савва, веси ли ты, кто есмь аз? Ты убо мниши мя совершенно быти от рода Грудцыных, но несть тако. Ныне за любовь твою повем ти всю истинную, ты же не убоися, ниже устыдися братом звати меня. Аз убо совершенно возлюбих тя во братство себе принять. Но аще хощеши о мне ведати, аз убо есмь сын царев. Поидем прочь, да покажу ти славу⁷⁵ и богатство отца моего».

И сия глаголя, прииде в пустое место на некой холм показа ему в некоей раздолине⁷⁶ град велик и вельми славен, стены и помост и покровы⁷⁷ от злата чиста блистаяся. И рече ему бес «Сей есть град творения отца моего. Поидем убо и поклонимся купно отцу моему. А еже ми дал еси писание, ныне взем, сам вручи его отцу моему, и великою честию будеши почтен от него». И сия изглагола, бес отдает Савве богоотметное писание.

Оле⁷⁸ безумия отрока! Ведый бо, яко некоторое царство прилежит в близости к Московскому государству, но все обладаемо царем московским. Аще бы тогда вообразил на себе образ креста честнаго, вся бы сия мечты⁷⁹ диавольския, яко сень⁸⁰, погибли бы. Но на предлежащее возвратимся.

Внегда же приидоша к привиденному оному граду и приближився им ко вратам града, сретают⁸¹ их юноши темнообразни в ризах и поясы украшены златыми, и тщанием⁸² покланяющеся, честь воздающе сыну цареву, паче же рещи бесу, такожде и Савве покланяющеся. Вшедшим же им во двор царев, паки сретают инии юноши, ризами блистающеся паче первых, такожде покланяющеся им. Егда же внидоша в палаты царевы, абие друзии⁸³ юноши сретают их с честию. И диаволом превозходящем⁸⁴, воздающе достойную честь сыну цареву и Савве. Вшедшим же в палату, глас бысть Савве «Брате Савво, пожди мя зде мало. Аз убо шед, возвещу о тебе отцу моему и веду тя к нему. Егда же будеши пред отцем моим, ничтоже размышляй или убоися, подаждь ему писание свое». И се рек, поиде бес во внутренную палату и оставил Савву единого. И, помедлив тамо мало, и приходит к Савве и поем его и приведоше пред лице царя.

Он же сидя на престоле велице, драгим камением и златом преукрашен, сам же той славою велицею и одеянием блисташеся. И около его стояща множество юношей крылатых, лица же их овых сини, овых багряны, иныя яко смола черная. Пришедши же Савва пред лице царя оного, пал на землю, поклонися ему. Вопроси же его царь: «Откуду пришел еси семо⁸⁵ и что есть твое дело?» Безумный же Савва подносит ему богоотметное письмо свое, глаголет, яко «приидох, великий царю, послужить тебе». Древний же змий Сатана приемлет писание и прочет его. Обозреся к темнообразным своим воинам, рече «Аще ли прииму сего отрока, не вем, крепок ли он будет нам или нет?» Призвав к себе сына своего, Саввина любимого брата, глаголя ему «Иди, прочая⁸⁶, и обедай с братом своим». И тако оба поклонишася царю, изыдоша в переднюю палату и начаша обедати.

Неизреченныя благовонныя яди⁸⁷ приношаху, такожде и питие, яко дивишася⁸⁸ Савва, глаголя, яко «никогда в дому отца моего таковых ядей не вкушах или пития испих». По ядении же поем бес Савву и поидоша паки из града царева и изыдоша вон. Вопроси же брата Савва своего, беса, глаголя «Что, брате, яко видех у отца твоего окрест престола множество юношей крылатых стояща?» Бес же, усмехнулся, рече ему «Или ты не веси, яко у отца моего мнози язы́цы⁸⁹ служат, персиды, турки, арапы и ины мнози? Ты же не дивися сему и не сумневайся братом звати меня. Аз убо тебе меньший брат. Токмо елико аще реку тебе, и ты во всем буди мне послушен. Аз же всякого добра рад тебе деяти и споможение во всем творити». Савва же во всем обещася послушен быти, и тако уверишася⁹⁰.

Паки приидоша во град Орел, и оставил бес Савву. Савва же паки прииде в дом Баженов и пребываше в прежнем скаредном деле. И в то время прииде во град Казань из Персиды со многими прибытки отец Саввин Фома Грудцын. И яко обычное целование подаде жене своей, и вопрошает о сыне своем, жив ли есть сын или нет. Она же поведа ему, глаголя, яко «от многих слышах⁹¹, что по отшествии твоем в Персиду отыде он к Соли Камской, тамо и доднесь живет житием неудобным⁹², и непорядочно все богатство избыл в пьянстве и блуде. Аз же много писав к нему, дабы возвратился в дом наш, он же ни единой отповеди⁹³ не даде мне. Жив ли есть ныне или нет, о сем не вем».

Фома же, слышав от жены таковые глаголы, зело смутися и скоро написав епистолию со многим молением, дабы безо всякого размышления оттуда ехал во град Казань, «да увижу, чадо мое, красоту лица твоего, понеже давно не видах тя». Савва же таковое писание принял и прочет, ни во что же вменив, ниже помыслил ехать ко отцу своему, токмо упражняшеся в ненасытном блудении. Видев же Фома, яко ни во что вменяет писание его, повелевает готовити суда с товары, и пути касается к Соли Камской, яко «сам поиму его в дом свой».

Бес же, егда уведа, что отец его, Саввин путешествие творит к Соли Камской, хотя Савву поимати, сына своего, и привести во град Казань, и абие бес к Савве рече «Брате Савва, доколе зде во едином граде малом нам жити будет? Пойдем во иный град и погуляем, и паки семо приидем».

Савва же нимало отречеся⁹⁴, глаголя ему «Брате, како идем, то пожди мало, да возму от богатства моего». Бес же возбранише⁹⁵ ему, глаголя: «О сем не веси ли ты славы отца моего, како слава его везде есть? Где приидем, тут и денег у нас много будет, елико потребно». И поидоша из града Орла никому же ведомы, ниже той и сам Бажен, и ни жена его уведавши.

Бес же Савву постави во единую нощь от Соли Камской на реке Волге во град, нарицаемый Козмодемьянск, а растояние имеюще от Соли Камской тысяча и больше поприщ⁹⁶. И глаголет бес к Савве «Аще кто тя узрит знаемый здесь, и откуду пришел еси спросят, ты же глаголи от Соли Камской в третью неделю приидохом». Савва же глагола, елико заповеда ему бес. Тако пребывавше в Козмодемьянском несколько дней.

И паки бес поем Савву, и об едину нощь оттуда приидоша на реку Оку в село, нарицаемое Павлов Перевоз, и бывшии тамо в день четверга. В той бо день в том селе торг бывше. Ходяще же они по торгу, узрев же Савва некоего старейша нища мужа стояще, зело худо одеяние на нем. И зряще на Савву вельми прилежно и плачуще горько. Савва же отиде мало от беса и притече к старцу оному, хотя уведати вину⁹⁷ плача его. И притече к старцу, рече «Кая ти, отче, вина плача твоего, яко тако неутешно плачешися?» Старец же глагола ему «Плачу, чадо, о погибели души твоея. Не веси бо, погубил еси ты душу свою и волею предался диаволу. Веси ли, человече, с кем ныне ходиши и кого себе братом называеши? Но сей не человек, но бес с тобою ходит, доводит тя до пропасти адския». Егда же изрече старец к Савве глаголы сия, он же обозревся на брата своего беса. Он же издалеча стояше, угрожая ему. Савва же оставил святого старца, скоро притече к бесу. Он же вельми начат поносити его и глаголати «Чего ради с таким душепагубцом сообщился еси? Не знаеши ли сего лукавого старца, яко многих погубляет, на тебе же, видя одеяние нарочито, и глаголы к тебе лестные испущает, хощет тебя от людей отлучити и до смерти удавити и содрать с тебя одеяние. И егда аще оставлю тя единого, то вскоре имаши погибнути». И сия изрече со гневом, и потом поем Савву, оттуда приходит во град, нарицаемый Шую, и тамо пребываху неколикое время.

Фома же Грудцын-Усов пришед во град Орел и вопрошает о сыне своем, и никто может поведати ему о нем. И вси дивляхуся, яко пред его приездом сын его во граде живяше и всем видимо. Егда же внезапу скрылся, никтоже весть. И глаголаху, яко «убоялся приезду твоего, зане все здесь избыл имения твое и богатство, и сего ради скрылся». Паче же всех Бажен и жена его дивишася, глаголаху «В сию ночь спаше у нас, заутра же пошед не вем куды, мы же ожидахом его обедати, он же от того часа нигде же не явишася во граде нашем. А куда поиде, аз и жена моя не вемы».

Фома же слезами облияся, ожидаше сына своего, и возвратися в дом свой, и нерадостной случай возвещает жене своей. И оба вкупе сетуя и скорбяше о лишении сына своего, и в таковом сетовании Фома, пожив неколикое время, ко Господу отиде. Жена же его остася вдовою.

Бес же и Савва живяше во граде Шуе, и в то время благочестивый великий государь, царь и великий князь Михаил Феодорович всея России изволил послать воинство свое против короля польского под град Смоленск. И по его, великого государя, указу во всей России набираху новобраных солдат. Во град Шую и для набору солдатского прислан был с Москвы стольник Тимофей Воронцов, и новобраных солдат по вся дни воинскому артикулу учаша. Савва же и бес поидоша для смотрения их. И рече бес к Савве «Брате Савва, хощеши ли ты послужить царю? Да запишемся в солдаты». Тако и записашася в солдаты, и нача ходити на учение. Бес же Савве в воинском учении такову мудрость дарова, яко и старых солдат лучше и начальников всех во учении происходит⁹⁸ лучше ж. Сам же бес слугою за Саввою ходяше и оружие носяше за ним.

Егда же всех новобраных солдат приведоша в Москву и отдаша их в научение немецкому полковнику, той же полковник, егда прииде к полку водити солдат на учении, и видя Савву млада суща, а в учении воинском зело изрядно поступающе и ни малого порока во всем артикуле не имеюще, и многих старых воинов и начальников превосходяще, и вельми удивися остроумию его. Савва же сказа ему всю истинную, какого рода он. Полковник же вельми его возлюби и назва его сыном своим, даде ему шляпу с главы своея и вручи ему три роты новобраных солдат, да вместо его устрояет и учит той Савва.

Бес же тайно припаде к Савве, рече ему «Брате Савва, егда недостаток денег будет ратным людем на жалованье, тогда повеждь мне. Аз тебе принесу, елико тебе потребно будет, дабы в команде твоей роптания и жалобы не было на тебя». И тако у оного Саввы все солдаты во всякой тишине и в покое пребываху, в прочих же ротах молва и мятеж бысть непрестанно, яко иногда от глада и наготы, не пожалованы, и по миру ходят. И вси дивляхуся остроумию Саввину.

По некоем же случае явственно учинися о нем и самому царю. В то же время в Москве и немалу власть имяше шурин царев боярин Семен Лукьянович Стрешнев. Уведа про оного Савву, и повеле его привесть пред себя, и рече ему «Хощеши ли, Савва, да прииму в дом мой и немалой чести сподоблю тя?» Он же поклонися, рече ему «Господине мой! Есть брат у меня, пойду и вопрошу его. Аще повелит, с радостию послужу тебе». Боярин же, нимале возбравнив⁹⁹ ему, отпусти его, да вопросит брата своего. Савва же, пришед, поведа сие мнимому брату своему бесу. Он же яростно рече ему «Почто убо хощеши презрети цареву службу и хощеши служити холопу его? Ты убо и сам ныне в том же порядке и чести, уже и самому царю знатен¹⁰⁰ учинился еси. Егда бо царь уведает верную твою службу, тогда и чином повыше будеши».

И по повелению цареву вси новобраныя солдаты розданы по стрелецким полкам в добавку. Той же Савва поставлен бысть на Устретенки в Земляном городе в Зимине приказе в доме сотника стрелецкого Якова Шилова. Сотник же той и жена его, благочестивы и благоразумны суще видя Саввина остроумия, зело почитаху его. Полки же в Москве во всякой готовности ко отшествию во град Смоленск бяху.

Во единый же день прииде бес к Савве и рече ему: «Брате Савва, пойдем прежде полков в Смоленск и увидим, что творят поляки, како град укрепляют и бранныя сосуды¹⁰¹ устрояют». И абие об едину нощь стали с Москвы в Смоленск, и пребываху в нем три дни, никому же видимы, а они всех видяху. И созирающе¹⁰², како поляки град укрепляют на приступных местах, всякия гарматы¹⁰³ поставляют. В четвертый же день обяви бес себя и Савву полякам. Поляки же, егда узреша их, зело возсмятошася и начаша гнати за ними, хотяху уловити их. Бес же и Савва скоро избегша из града и притекоша к реце Днепру, и абие раступишася вода, преидоша оную великую реку, аки посуху. Поляки же много стреляху по них, но ничем вредиша¹⁰⁴ их, глаголюще, яко «бесове суть во образе человека приидоша и бывше во граде нашем». Бес же и Савва паки возвратишася в Москву и сташа у того же сотника Якова Шилова.

И егда же по указу государеву полки с Москвы поидоша под Смоленск, тогда той Савва с братом своим поиде. А надо всеми полками тогда был командующим боярин Федор Иванович ШеИн.На пути же бес Савве рече «Брате Савва! Егда убо под Смоленским будем, тогда от поляков из града выедет един исполин и станет звати противника себе. Ты же не убоися ничего, изыди противу его. В другий же день паки выедет другий, ты же и того поразиши. В третий же день выедет из Смоленска третий поединщик¹⁰⁵, ты же ничего убоися против его, вем убо, что и того поразиши, но и сам уязвлен¹⁰⁶ будеши от него. Аз же твою рану скоро излечу». И тако уверив его, и приидоша под град Смоленск, ставше в удобное место.

По глаголу же бесову послан бысть из града некий воин страшен зело, на коне скакаша, из московских полков противника себе зваша, и никто же смеяше¹⁰⁷ противу его ехати. Савва же обявляет себя в полках и глаголя «Аще бы мне был добрый конь, аз бы пошел противу его на брань»¹⁰⁸. Другии же, его слышаше похваление, скоро возвестиша боярину о сем. Боярин же, услыша, повеле Савву привести пред себя и повеле ему коня нарочита¹⁰⁹ дати и оружие, и мнитъ, яко скоро имать погибнути от такого страшного воина. Савва же, по глаголу брата своего беса, ничтоже размышляя и ни бояся, выехал противу того богатыря и порази его, и приводит и с конем в полки свои, и от всех похваляем. Бес же ездяше по нем, служаше ему и оружие его носяще.

Во вторый же день паки выезжает славны некий воин, иска себе противника. И паки выезжает Савва противу его и скоро поражает его, и вси дивляхуся храбрости Саввиной. В третий же день еще выезжает из града Смоленска некий славны воин, паче первых в храбрости, и ищет себе сопротивника. Савва же уже того устрашишася, ехати противу того, однако же по словеси бесовскому немедленно выезжает, и абие поляк той яростно напусти на Савву и уязви его копием в лево стегно¹¹⁰. Савва же исправися, нападает на поляка оного и убивает его, но и с конем в таборы привлече и немал зазор¹¹¹ поляком учини. Потом же нача из града выходити и свалным¹¹² боем битися. Савва же с братом своим с которого крыла выезжаху, тамо поляки от них невозвратно бежаху. И многих убиваху, и тако от них бежаху, токмо след свой показываху, сами же ни от кого ни малого повреждения себе, вреды, не имеяху.

Слышав же боярин о храбрости Саввиной, не мог скрыти гнева своего в сердце своем, призва Савву к шатру своему и глагола ему: «Повеждь ми, Савва, какова ты роду и чей есть ты сын?» Он же поведа ему, яко из Казани, Фомы Грудцына сын. Боярин же нача его нелепыми словами поносити и глагола «Какая ти нужда в такой случай? Пришел еси к смерти! Аз убо знаю отца твоего и сродников твоих, яко бесчисленно богатство имеют. От какого гонения или скудости пришел еси ты семо? Сия глаголю ти поиди в дом родителей твоих и там благоденствуй, с родители своими пребывай. Аще же не послушаеши мене и услышу о тебе, яко зде имаши пребывати, то без всякого милосердия зде имаши погибнути, и главу твою скоро повелю мечем отсещи». И сия боярин изрече с яростию.

Он же отиде от него, печален бысть. И рече бес к Савве «Что убо, брате, печалуешися о сем? Аще неугодна наша служба, поидем в Москву и тамо пребываем». И тако скоро отидоша в Москву и нача обитати в доме того же вышереченного сотника. Бес же днем бываше у Саввы, в нощи же отхождаше до пропасти адския, идеже жилище их, искони обычай окаянному пребывати.

И немалу же времени минувшу, абие разболеся Савва, и бе болезнь его вельми тяжка зело, и быти ему к смерти. Жена же оного сотника, благоразумна суща и всякое попечение и прилежание имуща о Савве, и глагола ему многажды, дабы повелел призвати иерея исповедати грехи своя, и причастился бы Святых Христовых Тайн, да некако в такой тяжкой скорби без покаяния умретъ. Савва же отрицашеся и глагола «Аще и тяжко болезнъ, но несть моя болезнь к смерти». И день от дне болезнь еще тяжщая бяше.

Жена же оная неотступно принуждаше его, дабы покаялся, и едва принудише Савву оная благоразумная жена. И повеле Савва призвати священника. Жена же веле вскоре итти ко храму святого Николы чудотворца, и повелевает призвати тоя церкви иерея. Иерей же, нимало замедлив, притече к болящему, бе бо священник же той муж благочестив и бояся Бога. И, пришед, нача молитвы покаянные глаголати, якоже обычно. Егда же всем людем из храмины¹¹³ изшедшим, иерей же нача болного исповедати.

И се внезапу зрит больной в храмину тую вшедше множество бесов. Мнимый же его брат, паче же рещи диаволов, прииде с ними, – не якоже человеческим образом, но существенным¹¹⁴ своим звериным образом. И ста созади всех бесов и зубы на нем скрежеташе, показуя ему богоотметное письмо, еже даде Савва у Соли Камской, и глагола бес болящему Савве «Зриши ли, клятвопреступниче, что есть сие? Не ты ли писал еси? Или мниши, яко покаянием хощешь отбыти?¹¹⁵ Аз убо великою силою моею подвигнуся на тя, и более сих узриши».

Больной же, зря очевидно¹¹⁶ их, ово ужасаяся, ово же на силу Божию надеяся, и до конца все подробну исповеда священнику оному. Священник же он, муж свят, обаче убояся оного страха, зане людей во храмине единого несть, кроме больного. Глас же велик слышаше от бесовския оные силы, и с нуждою¹¹⁷ с великою исповеда больного и отиде в дом свой, ничтоже никомуже поведа. По исповеди же оной нападе на Савву дух нечисты и начат немилостивно мучити, ово об стену бияше, ово о мост¹¹⁸, с одра его меташе на пол, ово храплением¹¹⁹ и пеною давляше¹²⁰, и всякими различными томлении мучаше его.

Благочестивый же он муж сотник со благонравною и разумною женою видяше такое внезапное на него от диавола нападение и несносное мучение, вельми жалеюще по юноше оном, но никакой же ему могут помощи подати. Бес же день от дне на больного люте нападает и мучаше его, но и всем предстоящим тут ужас бывает. Господин же дому того, видя над собою такову необычную вещь, паче уведев¹²¹, яко юноша той Савва ведом и царю, но есть же у них сродница, в дому царском пребываше, и сия помыслив, немедленно посылает жену свою ко оной сроднице, повелевает ей, да все подробно возвестила бы царю, да «никако бы, – рече, – Савва в таком зле умрет, а мы за то истязаны¹²² будем от царя, за неизвещение наше».

Жена же его, нимало помедлив, скоро тече к сроднице своей, и вся повеленная от мужа по ряду сказа. Сродница же оная, яко слыша таковыя глаголы, умилися душею, ово бо болев по юноше, паче же скорбяше по сродниках своих, да некако и вправду от таковых случаев беду приимут. И нимало помедлив, скоро тече из дому своего до полат царевых. И внидох, по времени донесла царю о сем.

Царь же, слышав о Савве таковы глаголы, рече предстоящим, да бывает у оного сотника, у больного оного, повседневное изменение¹²³ караулщиков. И посылаются по два караульщика, да надзирают опасно¹²⁴ юношу оного от сонного бесовского мучения, да во огнь или в воду никако ввержется. Сам же благочестивый царь посылаше к болящему повседневную пищу. И егда здрав больной явится, повелевает возвестити себе.

И сему тако бывшу, больной немало время в таковом бесовском томлении пребысть. И месяца июля в 1 день Савва же необычно от беса мучен бысть. Заспа мало, и бысть во сне яко наяву глагола, изливая слезы из очей своих, сице рече «О Всемилостивая Госпоже Дево Владычице Богородице, помилуй мя! Не солгу в сердце, но исполню обещанием, якоже обещахся тебе». Дому же того людие, слыша таковые глаголы от больного, зело удивишася, глаголюще, яко видение некое видит.

Егда же больной возбудися, приступи к нему сотник и рече «Повеждь ми, господине Савва, что таковые глаголы во сне видев и кому рекл еси?» Он же, паки начат убо омывати лице свое слезами, глаголет «Видех ко одру моему пришедшу жену святолепну, светлостию сияющу и ризу багряну носяще, с нею же два мужа, сединами украшены, во одежде един в архиерейской, а другий во апостольской одеяны. И я мню быти жену оную Пресвятую Богородицу, мужей же единого же наперсника¹²⁵ Господня Иоанна Богослова, второго неусыпного града нашего Москвы архиерея Петра митрополита, их же подобия образ видел. И рече ми святолепная оная жена: «Что ти есть, Савва, и что скорбиши?» Аз же рекл ей «Скорблю, моя Владычица, прогневах Сына Твоего и Бога моего и Тебя, заступницу рода христианского, и за то бес мучит мя». Она же осклабися¹²⁶ и рече ми «Како ты можешь выручити писание свое, еже ты подал самому Диаволу?» И аз рек ей «Не могу, Владычице, аще не помощию Сына Твоего и Твоею милостию». Она же ми рече «Аз убо о тебе Сына Моего и Бога упрошу, токмо един мой глагол исполни аще избавлю тя от беды сея, хощеши ли инок быти?» Аз же молебные глаголы со слезами глаголах ей, якоже и вы слышавше. Она же паки рече «Слышиши ли, Савва? Егда убо приспеет¹²⁷ праздник явления образа Моего, еже в Казани, ты же прииди во храм Мой, иже на площади у Ветошного ряду, и аз пред всем народом покажу велие чудо». И сия изрече, невидимы бысть».

Сия же сотник от Саввы слышавше, паки повелевает и посылает жену свою к вышереченной сроднице, дабы возвестила паки царю о сем, и абие возвещено бысть видение царю. Царь же повелевает хранити его.

И егда же прииде праздник Казанския Богородицы, что в Китае, июля 8-го числа, и повеле царь привести болящего во храм ея, Пресвятыя Владычицы нашея Богородицы, нарицаемыя Казанския. Якоже николи¹²⁸ же болев, поиде ко образу и паде на землю и начат глаголати со слезами и сокрушением сердца, рече «О Преблагословенная и Преблагая, Честнейшая Мати Христа Бога нашего! Благодарю тя за неизреченное твое милосердие, яко избавила мя еси от погибели и настави мя, на путь покаяния обрати мя». Народу же зрящу на оного Савву и слышавше глаголы его, удивишася.

Царь же узрев его. И егда нача пети Божественную литургию, а Савве лежащу среди церкви на ковре, и видев Савва пришедшу жену, в белых ризах одеянну, всякими лепотами сияющу, глагола ему «Савва, отселе будеши здрав; к тому не согрешай и повеление мое да исполни буди инок». И с того часа получи Савва себе здравие, и се невидима бысть. И тако получи неизреченную славу Савва, и прииде во ум свой и не чающе болезни в себе, яко никогда боле, и воста на нози¹²⁹ свои.

Царь же рече «Не сей ли трудившийся¹³⁰, еже по повелению моему принесен бысть во храм?» Отвещав же некто боярин его, стояще, яко «той есть Савва». Царь же повеле его вопросити, како воста от таковыя тяжкия болезни. Вопрошенну же бывшу Савве, Савва же поведати о себе нача вся бывшая над ним, и о неизреченном чудеси явления образа Пресвятыя Владычицы нашея Богородицы, како избави его от тьмы греховныя.

Царь же, благодаря Бога (возвещено о чудеси над оным Саввою) и Пречистую Богородицу, и возрадовася радостию велиею. И как отпевше святую литургию, Савва же нача молебное пение пети Пресвятей Богородице и, немного дней помедливше, прииде в церковь святого архистратига Михаила и восприят монашеский чин и благодарив Пресвятую Богородицу. И пожив лет доволно, и преставися, ко Господу душу предаде. Богу нашему слава ныне6 присно, и во веки веков. Аминь.