Житие св. Леонтия, епископа Ростовского

Егда създаша црк҃вь каменꙋ в ростовѣ. на мѣстѣ погорѣвшїа҆ црк҃ве. повелениїе҆мь гнⷭ҇а бл҃гочтⷭ҇иваго цр҃ѧ и҆ кн҃зѧ нашего а҆ндрѣꙗ҆. В лѣⷮ҇, ҂ѕ҃. х҃. о҃. и҃_є҆. самъ҆ кн҃ѧзь приє҆хавъ в ростовъ и҆з володимерѧ. поклонисѧ бл҃жен̾н̾омꙋ и҆ ст҃мꙋ тѣлоу прп҃дбнаго ѡц҃а нашего леѡнт̾їа҆. гл҃ѧ, хвалю и҆ славлю тѧ г҃и б҃е мои҆. и҆ прчтⷭ҇ꙋю҆ и҆ пртⷭ҇ꙋю мт҃рь твою҆. ꙗ҆ко сподобил м̾ѧ є҆си сѷцево съкровище въ ѡ҆бласти мое҆го црⷭ҇твїа҆ ꙗ҆вити ми. ѹ҆же ничим ж̾е ѡ҆хꙋженъ є҆смь блгⷣ҇ти бж҃їа҆. и҆ дара млⷭ҇ти твое҆а̀ влⷣ҇ко. ѡ сем ст҃ѣмь мꙋжи. и҆ цѣлова ст҃оє҆ тѣло, и҆ вси мꙋжи єⷢ҇. и҆ по семь поставиша и в рацѣ на стенѣ. и҆деже и доны́нѣ лежи́т. и҆ ѹстрои҆ свѣщи великы ҆ гроба є҆го. и҆ по семъ ѹ҆бїенъ быⷭ҇ великыи҆ кнѧз а҆ндрѣи҆ сн҃ъ великого кн҃зѧ геѡ҆ргїа҆. внꙋкъ манамаха володимера. В лѣⷮ҇, ҂ѕ҃. х҃. п҃. в҃. мцⷭ҇ і҆҆нѧ .к҃ѳ. на памѧт ст҃ых а҆пⷭ҇лъ петра и҆ павла началник ж̾е ѹ҆бии҆цамъ петръ кꙋчк̾овъ зѧть. а҆нб̾алъ а҆синъ ключникъ. а҆кимъ кꙋчк̾овичь. а҆ всѣх ѹ҆бии҆ць, к҃. числомъ. бл҃женн̾ыи҆ же въскочи и҆ хотѣ в̾зѧти мечь. и҆ не бѣ тꙋ меча. бѣ бо̀ вынѧлъ а҆нб̾алъ томъ дн҃и ключникъ є҆го. тоꙵ бо бѧше мечь ст҃аго бориса. ѡкаꙗ҆н̾н̾ии҆ же силою҆ ѿломиша двери. и҆ всовавш̾есѧ в ложницꙋ. и҆зс̾ѣкоша є҆го саблѧми и҆ мечи. и҆ и҆доша прочь. ѡ҆н ж̾е в оторопѣ въскочивъ по нихъ. нача рыгати и҆ гл҃ати в б̾олезни срⷣ҇ца. ѡни же гл҃съ оу҆слышавш̾е. воротишасѧ ѡпѧт нан́ь. ѡ҆н ж̾е побѣже под̾ сѣни. и҆ наи҆доша е҆го и҆ сконч̾аша. петръ же є҆мѹ ѿтѧ рꙋкѹ деснꙋю҆. ѹ҆бїе҆н ж̾е быⷭ҇ в сꙋботꙋ на нощь. а҆ ѡ҆ свѣтѣ за҆тра к нелⷣ҇ю мр҃твъ. на памѧ́т. в҃і. а҆пⷭ҇лоу. и҆ вз̾емьше є҆го клирошане бг҃олюбьскыє҆. внесоша є҆го въ црк҃вь. и҆ положиша въ гробъ каменъ. и҆ кнѧ́ж лѣⷮ҇, к҃а. ѳедꙋлъ же и҆гꙋменъ володимерьскый с к̾лирошаны. с лꙋциною҆ чаⷣ҇ю҆ и҆ володимерц̾и ѣ҆хаша по кнѧзѧ в̾ бг҃любоє҆. вз̾ем̾ше тѣло е҆го. въ .е҃. дн҃ь в че^т҇. привезоша е҆го в в̾олодимерь и҆ положиша е҆го съ чтⷭ҇ью҆ въ ст҃ѣи҆ бцⷣ҇и зл́атоверьхои҆, ю҆же бѣ самъ создалъ. по семь представльшꙋсѧ леѡ҆нꙋ є҆ппⷭ҇ꙋ ростовьскомꙋ. и҆ поставленъ быⷭ҇ никола гречинъ е҆ппⷭ҇омъ ростовꙋ. никифоромъ митрополитомъ кїе҆вьским. вс̑еволодъ же ю҆рье҆вичь приꙗ҆ є҆го. но̑ посла кїе҆вꙋ къ ст҃осл́авꙋ всеволодичю и҆ к м̾итрополитꙋ ни́киѳорꙋ. рекъ не и҆зб̾раша сего, людїе҆ землѧ нашеꙗ҆. є҆же єси поставил. и҆но камо тебѣ годно, таможе и҆деши. а҆ мн́ѣ постави лꙋкѹ смиреннаⷢ҇ дх҃омъ и҆ кротк̾аго. и҆гꙋменомъ ѹ҆ ст҃ого сп҃аса на берестовомъ. ни́кифоръ же митрополитъ, не хотѧше поставити є҆го. но̑ неволею҆ постави. зане бѣ́ поставилъ на мздѣ николꙋ гречина. кн҃зю вс̑еволодꙋ не хотѧщю є҆го. паче же бг҃ови. не бо достои҆ть наскакати на ст҃льскыи҆ чинъ на мздѣ. є҆го же б҃ъ позовет и҆ ст҃аꙗ҆ бцⷣ҇а. то̀ кнѧз въсхощет и҆ людїе҆. тако и҆ сего и҆гꙋмена лꙋкѹ б҃ꙋ и҆зволъшꙋ и҆ ст҃ѣи҆ бцⷣ҇и. и҆ кн҃зю всеволодꙋ. за е҆го кротость и҆ смиренїє҆. митрополитъ же никиѳоръ повелѣ николѣ гречинѹ ѿписатисѧ землѧ рꙋськыꙗ҆. и҆ постави сего лꙋкѹ бл҃жен̾н̾аго и҆ смирен̾н̾аго є҆ппⷭ҇омъ ростовꙋ и҆ володимерю и҆ сꙋздалю. и҆ всеи҆ земли ростовьстѣꙵ. поставленъ же быⷭ҇. в лѣⷮ҇, ҂ѕ҃. х҃. ч҃. г҃_є҆. мцⷭ҇а марта въ .а҃і. дн҃ь. на памѧт ст҃аго ѡц҃а нашего соѳронїа҆ а҆рхїе҆ппⷭ҇а і҆е҆рлⷭ҇имьскаго. и҆ под̾писана быⷭ҇ цр҃кви ст҃аꙗ҆ бцⷣ҇а в ростовѣ є҆ппⷭ҇омъ лꙋкою҆ в лѣⷮ҇, ҂ѕ҃. х҃. ч҃. е҃_є҆. и҆ ѿ погорѣлыꙗ҆ цр҃кви дꙋбовыꙗ҆ до подписи лѣⷮ҇ .к҃з. и҆ пребы́въ въ ст҃льст̾вѣ лѣⷮ҇ .д҃. и҆ ѡ҆смь мцⷭ҇ъ. и҆ престависѧ лꙋка є҆ппⷭ҇ъ мцⷭ҇а ное҆брїа҆ въ .ї. а҆ положиша е҆го въ .а҃і. въ цр҃кви ст҃ыꙗ҆ бцⷣ҇а оу҆спенїа҆ въ градѣ володимерѣ. и҆ посла бл҃говѣрныи҆ великыи҆ кнѧз всеволодъ. сн҃ъ є҆горье҆въ внꙋкъ володимера манамаха кїє҆вꙋ. къ ст҃осл́авꙋ вс̑еволодичю. и҆ к м̾итрополитꙋ никиѳорꙋ ѡ҆ц҃а своє҆го дх҃овнаго і҆ѡа́нн̾а на є҆ппⷭ҇ьство. іа҆коже г҃ь гл҃еть, на кого призрю на крот̾каго, и҆ трепещꙋщаго моих словесъ. тако и҆ на сего бл҃жен̾н̾аго призрѣ б҃ъ и҆ ст҃аꙗ҆ бцⷣ҇а. хотѧщꙋ є҆го поставити слꙋжителѧ свое҆ѝ цр҃кви и҆ пастꙋха всеи҆ земли ростовьстѣи҆. и҆ сꙋздальстеи҆ и҆ володимерьскои҆. є҆же и҆ бысть. и҆ поставлен ж̾е бы́сть. в лѣⷮ҇, ҂ѕ҃. х҃. ч҃. и҃. мцⷭ҇а генꙋа҆рѧ .к҃г. дн҃ь. на памѧт ст҃го мчн҃ка климент̾а. а҆ в ростовъ прїи҆де на столъ свои҆ мцⷭ҇а февралѧ .к҃е. на памѧть ст҃го ѡц҃а нашего тарасїа҆ і҆ѡа҆нн̾ъ же є҆ппⷭ҇ъ празновати оу҆стави ст҃го ѡц҃а нашего леѡнтїа҆. мцⷭ҇а маі҆а́ въ .к҃г. дн҃ь. в лѣⷮ҇, ҂ѕ҃. х҃. ч҃. и҃. и҆ по семъ в лѣⷮ҇, ҂ѕ҃. ѱ҃. в҃_є҆. приспѣ праздникъ ст҃го. на вечерни празновавш̾е людїе҆ ѿи҆доша. вечерꙋ приспѣвш̾ꙋ. быⷭ҇ въ, д҃_ю҆ стражꙋ нощи. начаша пѣти а҆гг҃ли въ цр҃кви ст҃ыа҆ бцⷣ҇а и҆ вс̾та ст҃ыи҆ леѡ҆нт̾їи҆ и҆з г̾роба. и҆ въжг̾оша а҆гг҃ли свѣща ҆ гроба є҆го. и҆ ст҃ый вз̾емъ кадилницꙋ. нача кадити по всеи҆ цр҃кви. и҆ ѡ҆бонѧ бл҃гоѹ҆ханїе҆ церкⷪ҇вь и҆ весь град ростовъ. понамареви же рано възб̾нꙋвш̾ѫ. прїи҆де къ дверемъ цркⷪ҇внымъ. и҆ въсхотѣ ѡ҆тварити. и҆ видѣ свѣт пречюденъ и҆ пѣниꙗ҆ агг҃льскаѧ҆. и҆ ст҃аго стоꙗ҆ща пред ст҃ою҆ трапезою҆. рꙋцѣ свои҆ горѣ въздвигш̾а. ѡ҆н ж̾е ѿ страха паде на землю, не могыꙵ стоꙗ҆ти. на долз̾ѣ же лежащꙋ є҆мѹ. по семь възвед о҆ч̑и свои҆. и҆ никого же не видѣ. но̀ точїю҆ свѣща горѧща. и҆ шедъ сказа всꙗ си є҆ппⷭ҇ꙋ. є҆ппⷭ҇ъ же и҆де въ цркⷪ҇вь. и҆ нача ꙋ҆тренюѫ̀ пѣти. и҆ ѿ того о҆гн̑ѧ въжг̾оша прочаꙗ҆ свѣща. по ѿпѣнїи҆ же ѹ҆тренѧꙗ҆, нѣкт̾о ѿ клирикъ въсхотѣ ҆гасити свѣща оу҆ цѣлб̾оноснаго того гроба. ст҃го ѡ҆ц҃а нашего леѡ҆нтїа҆ и҆ шибе ѝ а҆гг҃лъ. и҆ быⷭ҇ разслабленъ рꙋкама и҆ ногама. глꙋх и҆ нѣмъ не могыи҆сѧ ни двигнꙋти. но̀ толико в п̾омыслѣ срⷣ҇ца гл҃аа҆ше. ѡ гжⷭ҇е влчⷣ҇це мт҃и х҃а б҃а нашеⷢ҇ помози мнѣ грешномѹ рабꙋ своє҆мꙋ. и҆ не погꙋби мене нечтⷭ҇ваго в б̾езакониих мои҆хъ погыбнꙋти. но̑ подаи҆ же ми гжⷭ҇е рꙋкѹ помощи. и҆ къ свѣтꙋ възведи мѧ на покаꙗ҆нїє҆. по семъ възвед о҆о́чи свои҆ къ гробꙋ. слезно на срⷣ҇ци молѧа҆ше ст҃го. и҆ призываше є҆го на помощь. и҆ по семъ нача и҆сповѣдати грѣхи своа҆. къ гробу зрѧ ст҃го. людїє҆ же видѣвш̾е ѿ ст̾раха чюдо се ѿи҆доша. є҆ппⷭ҇ъ же і҆ѡⷩ҇а́ повелѣ сего пꙋстити. и҆ ꙗ҆ко быⷭ҇ годъ литꙋргїи҆ начаше пѣти вс̑е по рѧдꙋ. ѡ҆номꙋ же грѣхы своꙗ҆ ѿ роженїа҆ всѧ по рѧдꙋ и҆сповѣдавш̾ꙋ. и҆ нача молитисѧ. ѡч҃е ст҃ыи҆ помилꙋи҆ мѧ греѣшнаго. вѣмъ млⷭ҇тве ꙗ҆ко не презрит б҃ъ твое҆а̀ ст҃ыꙗ҆ мл҃твы. и҆ прости моа҆ съгрѣшенїа҆. дръ̀знꙋв̾шѫ таковаѧ҆ сътворити ѹ҆ твое҆а̀ ст҃ыꙗ҆ ракы. помилꙋи҆ мѧ пастырю и҆ ҆чт҃лю наⷲ҇ великыи҆ гнⷭ҇е леѡ҆нтїє҆. сѝ е҆мꙋ мыслїю гл҃ющоу, и҆ и҆на болш̾а сих. и҆ є҆гда нача дьꙗ҆конъ чести ст҃ое҆ є҆ѵⷢ҇алїе҆. прии҆де є҆мꙋ гл҃с гл҃ющь. члⷪ҇че ѡ҆ставлѧют ти сѧ грѣси твои҆. и҆ вс̾та здравъ, и҆ поклонисѧ цѣлб̾оносномꙋ гробꙋ прпⷣ҇бнаго и҆ бг҃оноснаго ѡ҆ц҃а нашего леѡ҆нтїа҆. вс̾и же людїе҆ просл́авиша млⷭ҇рдаго б҃а и҆ прчⷭ҇тꙋю е҆го мт҃рь. даровавш̾аго таковꙋю҆ блгⷢ҇ть градѹ ростовꙋ. тѣм ж̾е и҆ мы браⷮ҇є҆, мꙋжи и҆ жены ю҆ни и҆ стари. и҆стинн̾оє҆ рождїе҆ винограда хвⷭ҇а. не лѣнимс̾ѧ съвръ̀шати заповѣдии҆ гнⷭ҇ихъ. ꙗ҆же реⷱ҇ ст҃ыми а҆пⷭ҇лы. здѣ бо а҆пⷭ҇лы не были. нъ̀ ѹ҆ченїа҆ и҆хъ протекоша конц̾а. ꙗ҆коже рече дв҃дъ. въ всю землю и҆зыдоша вещанїа҆ и҆хъ, и҆ в конц̾а вселен̾н̾ыꙗ҆ гл҃и и҆хъ. да дѣлатель и҆ пастꙋх и҆ стражь наⷲ҇ възвеселитсѧ ѡ насъ пред гмⷭ҇ь бг҃омъ гл҃ѧ. се̑ а҆зъ и҆ дѣти мои҆ ꙗ҆же ми е҆си предалъ г҃и. тѣм братїе҆ не ленитесѧ почт̾ити праздника сего. и҆ похвалите свое҆го оу҆чт҃лѧ, сѷце гл҃юще, рѹⷣ҇и҆сѧ свѣтозарнаѧ҆ звѣздо. ѡ҆мраченаа̀ просветивш̾и. и҆ мг̾лоу греховнꙋю҆ ѿгнав̾ши и҆дольскыꙗ҆ льсти. и просвѣтивъ ст҃мъ кр҃щенїе҆м. и҆ ѡ҆мывъ банею ст҃го дх҃а. и҆ наѹ҆чи вѣровати въ ст҃ꙋю҆ трⷪ҇цꙋ ѡ҆ц҃а и҆ сн҃а и҆ ст҃го дх҃а. рѹⷣ҇и҆сѧ ревн̾итель ст҃ых а҆пⷭ҇лъ. и҆скоренителю бѣсовьскыꙗ҆ льсти. хвалит бо̀ римскаꙗ҆ землѧ петра и҆ павл́а. гречьскаꙗ҆ землѧ констѧн̾тина цр҃ѧ. кие҆вьскаꙗ҆ землѧ володимера кн҃зѧ. ростовьскаꙗ ж землѧ вс̑ѧ тебе великыи҆ ст҃лю леѡнтїє҆ ѹ҆бл҃жает. сътворш̾аго дѣло равно а҆пⷭ҇ломъ. рѹⷣ҇и҆сѧ ꙗ҆ко ҆крѣпилс̾ѧ е҆си надежею҆ вѣчных бл҃гъ. с п̾режними почиваꙗ҆ ст҃ли. послѣдова бо ѹ҆ченїю҆ их и҆ н̾равꙋ. и҆ вс̑ему правилꙋ великаго і҆ѡа́н̾н̾а злⷮ҇ѹстаго. нестыдно предасѧ за вѣрꙋ. помоли же сѧ х҃ꙋ бѹ҃ нашемꙋ, є҆мꙋже предстои҆ши. за правовѣрныꙗ҆ и҆ хоⷭ҇любивыꙗ҆ кн҃зи наши. и҆ за вс̑ѧ люди твоѧ҆. и҆ намъ и҆сп̾роси милость ѿ б҃а, и҆ ѿпꙋщенїе҆ греховъ. сл́авѧщимъ ст҃ꙋю҆ трⷪ҇цꙋ, ѡц҃а и҆ сн҃а и҆ ст҃го дх҃а. г҃и і҆с҃ х҃е бж҃е нашь, мл҃твами пречтⷭ҇ыꙗ҆ ти мт҃ре. и прпⷣ҇бнаго ѡц҃а нашего. и҆же въ ст҃ых великаго лео҆н̾тїа҆ ѹгодника твоє҆го. и҆ всѣх ст҃ых твоих помилꙋи҆ наⷭ҇. и҆ сп҃си дш҃а наша. амиⷩ҇.

Пакы съзывает наⷭ҇ хоⷭ҇любци. свѣтлое҆ ѡ҆ц҃а нашего лео҆нт̾їа҆. в в̾еликыи҆ сеи҆ дх҃овныꙵ всесщ҃ен̾н̾ы храмъ. прчⷭ҇тыꙗ҆ бг҃омт҃ре влчⷣ҇це наша бцⷣ҇а прнⷭ҇одв҃ы мр҃їа҆. пакы и҆ присваꙗ҆ет себѣ молебныꙵ. и҆ вс̑епраздньст̾веныꙵ праздникъ. хоⷭ҇любива множьства. пакы ликоствꙋют цр҃кви. пакы прелесть оу҆пражнѧе҆тсѧ. пакы смꙋщаю҆тсѧ бѣси. пакы дьꙗ҆волъ ҆пражнѧе҆тсѧ. пакы нечьстїє҆ ѡцѣщае҆тсѧ. нб҃о намъ днⷭ҇ь цр҃ьковь леѡ҆нт̾їе҆ показа нб҃се видимаго всѧкого краснѣи҆шꙋ. и҆ толико е҆лико дх҃овнаꙗ҆ ѿ телесных сѫт. вс̑ечтнⷭ҇ѣи҆ши нб҃о сл҃нцꙋ чювьственомꙋ подл̾ежить. но̑ не заходимое҆ сл҃нце х҃а ѡ҆дѣꙗ҆сѧ. не звѣзды лестныꙗ҆ намъ предлагаꙗ҆. ни̑же лꙋнꙋ ѹ҆множаю҆щꙋ и҆ ѹ҆малѧю҆щꙋ. но̑ ѹ҆чителѧ бг҃ословц̾а. ни́ землю жестокꙋю҆. но̑ и҆ дш҃евнꙋю҆ врачевати могѹщихъ. не ѿ морѧ спочерп̾аю҆ть. но̑ бжⷭ҇твеных и҆сточникы воды. и҆сточникъ и҆сцѣленїа҆ показает. не пт̾ичиꙗ҆ гл́асованїа.҆ но агг҃льскыи҆ глаⷭ҇ бл҃оговѣст̾вꙋе҆т днⷭ҇ь. лѣпо ҆бо блгⷣ҇ти и҆стин̾н̾ѣ на новыꙗ҆ люди въсиꙗ҆ти. не вливае҆ть бо по сло́веси гнⷭ҇ю, вина новаго ѹ҆ченїа҆ блгⷣ҇тна в м̾ѣхы ветх̾ы ѡ҆бетш̾авш̾аꙗ҆. а҆ще ли просѧдꙋтсѧ мѣси. и҆ вино пролїе҆тсѧ. ново ѹ҆ченїе҆. новы мѣхы. новы ꙗ҆зыкы. но̑ ѡ҆бое съблюдаетсѧ. ꙗ҆коже є҆сть вѣра блгⷣ҇тнаꙗ҆ по всеи҆ земли простреⷭ҇. и҆ до нашего ꙗ҆зыка рⷭ҇скаго изиде. и҆ю҆дѣи҆скоє҆ е҆зеро и҆сш̾е. и҆ є҆ѵⷢ҇а҆льскыи҆ же и҆сточникъ наводни всѧ. и҆ всю землю покрывъ и҆ до наⷭ҇ и҆зиде. въ и҆стин̾н̾ꙋ ѹ҆бо великыи҆ си чюдоносныꙵ ѹ҆чт҃ль. ꙗ҆ко рѣкꙋ зл́атꙋ быст̾ринами и҆ ст̾рꙋꙗ҆ми и҆зливаше блгⷣ҇ти дх҃овных и҆сточникъ. по речен̾н̾омꙋ ѿ хаⷭ҇ влⷣ҇кы. и҆же вѣрꙋет в м̾ѧ. ꙗ҆ко рѣкы истекꙋт и҆з ч̾рева є҆го воды живы. азъ бо реⷱ҇ дамъ є҆му оу҆ста и҆ премдⷭ҇рть. є҆и҆ же не возмогѹт противитисѧ и҆ ѿвѣщати. вс́и противлѧю҆щисѧ вамъ. се̑ бо єⷭ҇ вода жива въ и҆стин̾н̾ѹ. ю҆же тои҆ ст҃ыи҆ преславныꙵ ѹ҆читель намъ и҆сточи. и҆ напои҆ всю ст̾рану нашꙋ. и҆ всѣмъ быти хрⷭ҇тїаном. сътвори малымъ и҆ великимъ. рабомъ и҆ свободнымъ. ѹ҆нотамъ и҆ старымъ. богатым и҆ оу҆богым. и҆ въ є҆дино времѧ оубо всѧ землѧ наша възсл́авит х҃а. съ о҆ц҃мь и҆ с п̾рест҃ым дх҃омъ. тогда нача мракъ и҆дольскыи҆ ѿ наⷭ҇ ѿтходити. и҆ свѣⷮ҇ бл҃говѣрїа҆ восїа҆. ѡ новых и҆ пресл́авных чюдеⷭ҇ и҆хж̾е чюднѣи҆ше. ꙗ҆ко и҆деже ҆множисѧ грѣх. преи҆зоѡбилꙋе҆ть блгⷣ҇ть твоа҆. и҆деже бѣсовьскыа҆ жръ̀твы. тамо хрⷭ҇тїа҆ньскїа҆ цр҃кви. и҆деже дьꙗ҆волъ ликоствоваше. тамо ꙗ҆висѧ влⷣ҇ка х҃с. и҆ гд̾ѣ дс҃и въгнѣждахꙋсѧ. ѿтꙋдꙋ нн҃ѣ ѿгонѧхѹсѧ. сам же всѣмъ по боѕѣ намъ виновенъ єⷭ҇. и҆стин̾н̾аго винограда во здѣлании є҆сть. и҆ превѣчнаго сл́ова ст҃ль. достовѣрнеи҆ши леѡнтїє҆. є҆лм̾а оу҆бо такова. паче же таковыи҆ предс̾татель. къ влⷣ҇цѣ и҆мамыи҆. празднꙋє҆мъ днⷭ҇ь не є҆ллиньскыи҆ но дх҃овнѣ. не чревꙋ но дш҃и. да бꙋдет праздникъ ст҃ымъ достои҆нъ. ѡ҆бновленїе҆ є҆сть праздникъ. ѡ҆бновлѧє҆тсѧ просвѣщенїю҆ просвѣтимс̾ѧ. и҆ ѿврь̀земь ѹ҆бо дѣла тм̾ы и҆ о҆блецемсѧ во ѡ҆ружїе҆ свѣта. ѡ҆бновимъ церкⷪ҇вь дш҃а нашїа҆. ꙗ҆ко дх҃овнѣ празднꙋе҆мъ. ꙗ҆ко да ветьхаго чл҃ка съвлецемсѧ. ꙗ҆ко да ꙗ҆вимсѧ паче снѣга бѣла. є҆лици в п̾итанїи҆ сластех ѡб҆ет̾шасте. днⷭ҇ь бо роди ѡ҆ бл҃гочтⷭ҇вых ѡ҆бновитесѧ дѣꙗ҆нїи҆. є҆лици памѧтозлобїа҆ ѿвръ̀госте. сих ѿвръ̀гьше. и҆ ст҃льствꙋе҆мъ. є҆лици вы́соци и҆ богатѣю҆ще є҆сть. ради млⷭ҇тынѧ и҆ смиренїа҆, ѡ҆бновлѧе҆тесѧ днⷭ҇ь. ꙗ҆ко дѣлы бл҃гыми бг҃ови ѹ҆годим. и҆змѣнимъ ѡ҆дежꙋ дш҃евнꙋю҆ с тѣломъ. б҃а похвалѧю҆ще, и҆ ѹ҆годника е҆го почитаю҆ще. такова оу҆бо сѫт под̾визанїа҆ ст҃го леѡнтїа҆. тако добра мл҃тва под̾визанїа.҆ тако сладко ѹ҆ченїе҆. тако добродѣтелно наказанїє҆. тако сладко чюдотворенїе҆. тако бо̀ намъ подобает архїє҆рѣи҆ прп҃добенъ. беск̾верненъ и҆ незл́обивъ. ѹ҆далѧꙗ҆сѧ ѿ всѧкыꙗ҆ злобы. съꙵ бо ростовскꙋю҆ землю просвѣти. но вс̑ѧ на свѣⷮ҇ и҆зведе. землю оу҆диви чюдесы ст̾рашными. цр҃кви просвѣти. бѣсы прогна. недꙋжныа҆ и҆сцѣли. не тъ̀км̾о в семъ житїи҆ сыи҆. но и҆ нн҃ѣ ащ̑е кт̾о в б̾едѣ сыи҆. и҆мѧ е҆го нарицаꙗ҆ помолить бг҃а. ѡ҆ставлѧꙗ҆ перв̾аꙗ҆ съгрѣшенїа҆. то̀ молб̾ами е҆го прїе҆мл̀ют простыню. а҆ще ли не ѡ҆станꙋщесѧ ѿ пръ̀вых грѣховъ свои҆хъ. но̀ и҆ дрꙋгїа҆ прилагае҆мъ. то не послꙋшают насъ ст҃ии҆ ни дае҆т ны б҃ъ прощенїа҆. но̑ и҆ здѣ томить ранами. и҆ по въскр҃сенїи҆ мꙋце вѣчнѣи҆ предасть. да се ведꙋще братїе҆, вс̑ѧкыꙗ злобы ѡ҆цѣщае҆мс̾ѧ. стꙋдом дѣꙗ҆нїа. и҆ всеꙗ҆ нечтⷭ҇оты. и҆ лихои҆манїа҆. и҆ клеветы. и҆ зависти. лꙋкавьствїа҆. татб̾ы. ѡ҆биды. чародѣи҆ст̾ва. волш̾ебы. плѧсаніа҆. и҆мж̾е бѣсомъ ѹ҆годиꙗ҆, творимъ такови. но̑ тыꙗ҆ всѧ зл́обы ѡ҆ставлѧю҆ще. приверзите ꙗ҆ томѹ бѣсꙋ. и҆ прїи҆мѣте сладост̾но хⷭ҇вꙋ заповѣд иже рече. не ѹ҆бии҆. не ѹ҆кради. лж̾и послꙋх не бꙋди. не прелюбодѣи҆. не восхити чюжаго ѡ҆бидою҆. чт̾и о҆ц҃а своє҆го и҆ мт҃рь. люби ближнѧго своє҆го ꙗ҆ко самъ себе. ст̾рахомъ и҆ трепетомъ почт̾и х҃а. ꙗ҆коже тѧ тои҆ почт̾е. ѿ небытїа҆ тѧ в б̾ытїе҆ приведе. и҆ тебе ради вс̑е сътвори. видимаꙗ҆ же и҆ невидимаꙗ҆. нб҃о и҆ землю. сл҃нце и҆ мцⷭ҇ь. и҆ звѣзды. море и҆ рекы и҆ киты. и҆сточьникы. зверїе҆ и҆ пт̾ици. и҆ всѧ четвероногїа҆ сътвори. да тѧ възведет, в п̾ервое҆ раи҆ское҆ мѣсто. но̑ ты́ того ѡставивъ. слꙋжиши твари бездꙋшнои҆ ꙗ҆ко б҃ꙋ. да того ради бывает. нб҃о затворено бездождиꙗ҆ плодомъ. пагѹба ѡ҆ва сланою҆. ѡва сланою҆. ѡва градом. ово ꙗ҆зѧми разл́ичными и҆х̾же да и҆збꙋдемъ. мл҃осрь̀дїе҆ бж҃їе҆ ѹтишаю҆ще. не воздаю҆ще зла за зл́о. нѝ клеветы за клеветꙋ. ѹ҆правлѧю҆ще ноѕѣ свои҆ право къ цр҃кви. и҆ слы́шанїа҆ в неи҆ не забываи҆, а҆лч̾ныꙗ҆ напитаи҆. и҆ жадныꙗ҆ напои҆. нагыꙗ҆ ѡ҆дѣваи҆. стран̾н̾ыꙗ҆ приє҆мли. болны́х присѣщаи҆. нищаꙗ҆ вв̾еди в дом свои҆. сиротамъ бꙋди во ѡ҆ц҃а мѣсто. а҆ще ли сїа҆ съблюдеши. тѣми бо̀ тѣсными пꙋтми. разширѧ́т ти сѧ нбⷭ҇ныꙗ҆ дв̾ери. и҆ причт̾ешисѧ къ ст҃мъ ликомъ. ꙗ҆коже сеи҆ ст҃ыи҆ о҆ц҃ъ нашь, и҆ чюдотворецъ леѡ҆нт̾їи҆. и҆же въ см҃рти мѣсто житїе҆ сътвори сѝ тѣмж̾е по лѣпотѣ почитаю҆ще памѧ́т твою҆. прилѣжно того ҆молимъ гл҃юще. ѡ хвⷭ҇ъ ст҃лю, и҆ слꙋжителю и҆ дрꙋже. многꙋю҆ ѿ него прїа҆тъ блгⷣ҇ть и҆ дръ̀зновенїе҆. ѡ҆бычно тѧ и҆ нн҃ѣ предлагае҆мъ. кꙋпно молимсѧ вси вѣрнии҆. пречтⷭ҇ꙋю҆ памѧт твою҆ празднꙋю҆ще по силѣ нашеи҆. и҆ к рацѣ мощеи҆ твои҆х пристꙋпаю҆ще молимъ слезно. ꙗ҆ко да мл҃твами твои҆ми, и҆бавимс̾ѧ ѿ гл́ада и҆ пагꙋбы. и҆ нахоженїа҆ и҆ноплемен̾н̾ыи҆хъ. и҆ всѧ́чьскых бѣдъ. и҆ здѣ бг҃оѹ҆годно. и҆ прв҃дно поживемъ. и҆ в б̾ꙋдꙋщемъ вѣцѣ со всѣми првⷣ҇ны́ми. б҃ꙋ ѹ҆гождьшими. да бꙋдем ѡбещници вѣчных бл҃гъ. славѧще г҃а б҃а спⷭ҇а нашего і҆с҃ х҃а. є҆мꙋже подобает всѧкаѧ сл́ава, чтⷭ҇ь и҆ держ̾ава и҆ велелѣпїе҆ ѿ а҆гг҃лъ и҆ чл҃къ. се̑ же ѿ него преже вѣкъ рожены. пречтⷭ҇ымъ сн҃омъ и҆ сбезначалны́м. и҆ сп̾рест҃ым и҆ бл҃гым, и животворѧщим и҆ є҆диносущным дх҃омъ. нн҃ѣ и҆ прнⷭ҇о и҆ в в̾ѣкы вѣкомъ. а҆минь.

Бл҃годаримъ оу҆бо братїе҆ чл҃колюбц̾а б҃а и҆ прчⷭ҇тꙋю҆ є҆го мт҃рь. даровавш̾аго намъ таковаго свѣтилника. ꙗ҆коже рече г҃ь, не может град ѹ҆крытисѧ верх̾у горы стоꙗ҆. ни вж̾изае҆ть свѣтилника и҆ полагает е҆го под съсꙋдом. но на свѣщницѣ. и҆ свѣтит и҆же въ храминѣ сѫт. и҆ пакы и҆же сътворить и҆ наѹ҆чить. се̑и҆ велии҆ наречетсѧ въ цр҃ьствїи҆ нбнⷭ҇ѣм. сїа҆ же да ѿкрыеть г҃ь. послꙋшаю҆щимъ и҆ желаю҆щимъ, добраго бисера и҆ чюдоносных чюдесъ слы́шати. бл҃жен̾н̾аго леѡнтїа҆. и҆ и҆же ҆бо по преставленїи҆ чюдныи҆ сеи҆ пастырь. не забываꙗ҆ свою҆ паст̾вꙋ. но́ вс̑егда в нощи и҆ въ дн҃е ꙗ҆коже рещи и҆ на всѧ часы́. бл҃гаꙗ҆ съдѣлованїа҆ своа҆ подаваꙗ҆ требꙋю҆щимъ. и҆ с в̾еликыми ѹ҆бо и҆ и҆зрѧдными чюдесы бл҃женнаго првⷣ҇но вс̾егда въспоминати сїа҆ великаꙗ҆ и҆ сл́авнаꙗ҆ чюдеса ст҃го. бывш̾аꙗ въ послѣднѧꙗ҆ лѣта.

Нѣкогда ѹ҆бо наи҆де болѣзнь о҆о́чнаꙗ҆, бл҃говѣрномѹ кн҃зю і҆ѡа́нн̾ꙋ. сн҃ꙋ а҆леѯандровꙋ. внꙋкѹ костѧнт̾ина ростовьскаго. вк̾ѹпѣ же ѹ҆бо съ ѡною҆ болѣзнїю҆ въскорѣ и҆ зракъ ѿ о҆ч̑ию҆ є҆го погибе. ѡц҃ь же є҆го бл҃говѣрныи҆ кнѧз алекс̾андръ скоро приходит къ ѳеѡдорꙋ а҆рхїе҆ппⷭ҇ꙋ. и҆ покланѧнїе҆ є҆мѹ сътварѧет. и҆ на мл҃твꙋ того подвизает къ чюдотворц̾ꙋ леѡ҆нт̾їю. приводит же и҆ сн҃а свое҆го съ великою҆ вѣрою҆, въ црк҃овь ст҃ыꙗ҆ бцⷣ҇а. и҆ къ гробꙋ чюдотворц̾а. ѳеѡдоръ же а҆рхїе҆ппⷭ҇ъ и҆ со всемъ клиросомъ вскорѣ мл҃тву начинает къ бг҃ꙋ. и҆ къ прчтⷭ҇ѣи҆ є҆го мт҃ери и҆ ѹ҆годникѹ их ст҃мꙋ леѡ҆нт̾їю҆. и҆ є҆ще же мл҃твѣ не скон̾чае҆мѣ бывш̾и. и҆ а́бїе҆ болныи҆ въскорѣ прозрѣ и҆ здравїе҆ полꙋчи. ѡц҃ь є҆го кн҃зь а҆леѯандръ в̾кꙋпѣ и҆ съ сн҃омъ своим ѿи҆де в дом свои҆ роⷣ҇ꙋꙗ҆сѧ и҆ славѧ б҃а и҆ е҆го прчтⷭ҇ꙋю҆ мт҃рь. и҆ ѹ҆годника чюдотворц̾а леѡ҆нтїа҆.

Не многим ж̾е лѣтом минꙋв̾шимъ. и҆ ѹ҆же по преставленїи҆ архїе҆ппⷭ҇а ѳеѡдора. той же кнѧз и҆ванъ, такою҆ же болѣзнию҆ о҆чною҆ ѡдеръ̀жимъ бывае҆ть. ѡ҆ц҃ь же є҆го въскорѣ приводить сн҃а свое҆го къ соборнѣи҆ цр҃кви ст҃ыꙗ҆ бцⷣ҇а. и҆ къ гробꙋ чюдотворц̾а леѡн̾тїа҆. и҆ подвизает на мл҃твꙋ григориꙗ҆ є҆ппⷭ҇а и҆ съ всѣм клиросомъ. и҆ ꙗ҆коже молитвꙋ сътвориша. и҆ ѿ часа того быⷭ҇ здравъ ѡ҆чима. чюдодѣи҆ст̾вом великаго леѡнт̾їа҆. и҆ непрестан̾н̾ою҆ є҆го мл҃твою҆ къ б҃ѫ и҆ пречистѣи҆ є҆го мт҃ери.

Нѣкогда ѹ҆бо̑ томꙋ же кнѧзю и҆ванꙋ болѣзнь ѡ҆гн̑енаꙗ҆ тѧжк̾а быⷭ҇. и҆ вси ҆же въ ѿчаꙗ҆нїи҆ быша. и҆ ничтоже ѡ҆ здравїи҆ є҆го помышлѧю҆щимъ. н̑о точию҆ є҆мѹ смр҃тнаꙗ҆ и҆ погребательнаѧ҆ готовлѧхꙋ. и҆ быⷭ҇ родителемъ є҆го плачь не ѹ҆тѣшимъ. и҆ подрꙋжию҆ є҆го и҆ сродникомъ скорб̾ь велика. ѡ҆ц҃ъ же є҆го ѹ҆тѣшивъсѧ мало ѿ слезъ. и҆ въспомѧнꙋвъ ѡ҆ чюдесѣх великаго леѡ҆нт̾їа҆. є҆же бывших прежде на сн҃ꙋ е҆го. и҆ посилае҆ть ѹ҆бо въскоре къ соборнѣи҆ цр҃кви ст҃ыꙗ҆ бцⷣ҇а. къ гробꙋ чюдотвор̾ца. и҆ повѣлевае҆ть всемꙋ съборꙋ мл҃твѹ сътворити ѡ҆ сн҃ꙋ своє҆мъ. над б̾олѧщим ж̾е сщ҃ен̾н̾ици такоже молебенъ ст҃ѣи҆ бцⷣ҇и начинают. и҆ чюдотвор̾цꙋ леѡ҆н̾тїю҆. и҆ ѿ того чаⷭ҇ болныи҆ на сонъ ѹ҆клонисѧ. и҆ бы́сть здравъ ѿ недꙋга. врачемъ и҆ чюдотворц̾ем леѡ҆нтїе҆мъ.

По сем ж̾е ѹ҆бо малꙋ времени минꙋвш̾ꙋ. нашего ради съгрѣшенїа҆ быⷭ҇ пожаръ великъ на град растовъ. и҆ погорѣ мало не вес́ь град̾. цр҃кв́и же съборнаꙗ҆ ст҃аꙗ҆ бцⷣ҇а бысть свинц̾емъ покрыта. и҆ растописѧ весь ѿ пожара. комары же великыꙗ҆ падоша. и҆ лобъ црк҃вныи҆ позлачен̾н̾ыи҆ паде внꙋтрь. и҆коны же погорѣша. и҆ съсꙋды и҆ кꙋзнь разлїа҆сѧ. множьст̾во же чл҃къ и҆зг̾орѣ ѿ о҆гнѧ. и҆нии҆ же въ е҆зерѣ и҆стапоша. и҆ многа бѣда быⷭ҇ за наше съгрешенїє҆. е҆ще же б҃ꙋ насъ наказаю҆щꙋ. и҆ на тꙋ же ѡ҆сень прии҆де поганыи҆ є҆дегеи҆ на рⷭ҇скꙋю҆ землю ратью҆. и҆ много зла сътвори хртⷭ҇їа҆ньскому родоꙋ. мы ѹ҆бо сами повинн̾и таковымъ наказанїе҆мь и҆ скорб̾емъ. въ безс̾трашьи҆ бж҃їи҆ живꙋще. и ꙗ҆коже скоти безсл́овеснии҆. препровожаю҆ще дн҃и своѧ. в сꙋє҆тѣ житїа҆ сего времен̾н̾аго и҆ прелест̾наго. питаю҆щесѧ и҆ веселѧщесѧ. и҆ злобꙋ дръ̀жаще дрꙋг на дрꙋга. и҆ гнѣвъ. не поминаю҆ще дн҃е см҃ртнаго и҆ час́а. и҆ дн҃е же сꙋднаго и҆ грознаго и҆ страшнаго а҆гг҃ломъ, и҆ члⷪ҇комъ. нѝ мꙋченїа҆ бꙋдѹщаго вѣка. не ложь бо єⷭ҇ гнⷭ҇ѧ сл́овеса въ еѵⷢ҇алїи҆ реченаꙗ҆. нб҃о и҆ землѧ мимои҆дет. словеса же моꙗ҆ не мимои҆дꙋт. то̀ ѹ҆бо є҆сть сл́ово гнⷭ҇е. ѡ ст̾рашнѣм и҆ вт̾орѣмъ пришест̾вии҆ е҆го. и҆ ѡ҆ сꙋдѣ грознѣмъ. и҆же въздасть комꙋждо по дѣлом е҆го. првⷣ҇ником цртⷭ҇во нб҃есноє в в̾ѣкы. а҆ грѣшником ж̾е мꙋченїе҆ бесконечноє҆. ѡ҆гн̑ь негасимыи҆. и҆ черв̾ь не ѹ҆сы́паю҆щии҆. и҆ тм̾а кромѣшнѧꙗ҆. и҆ и҆ныꙗ҆ мꙋкы комꙋждо противꙋ съгрѣшенїе҆мь. н̑о понеже ѹ҆бо в ж̾итїи҆ се́мь сꙋе҆тнѣм и҆ временьнѣм мало нѣчт̾о наказанїе ꙗ҆ви намъ г҃ь. ꙗ҆коже писанїе҆ гл҃еть, попꙋщаю҆щꙋ б҃ꙋ на хрт҃їаны грѣх ради нашихъ. ѡ҆во гладомъ. и҆ногда же пожаромъ. и҆ и҆ногда же поганых нашествїє҆мь. ѹ҆страшаꙗ҆ насъ ѿлꙋчити ѿ грѣх. и҆ наказаѧ҆ ꙗ҆коже о҆ц҃ь чад. сїа҆ же всѧ бы́ша на насъ. гл́ади и҆ пожари. и҆ поганых нашествїа҆. грѣх ради нашихъ. но̑ ꙗ҆коже дв҃дъ гл҃еть, не до конц̾а прогнѣвае҆тсѧ г҃ь ни в в̾ѣкъ враждꙋе҆ть. прчтⷭ҇ыа же єго мт҃ре мл҃твами. и҆ ст҃ых бг҃носных ѡць. и҆ ст҃аго чюдотворц̾а леѡ҆нтїа҆ моленїе҆мь. ѹ҆кроти г҃ь гнѣвъ свои҆. на наⷭ҇ смиренных людїи҆ своих. поганыа҆ ꙋбо възв̾рати. хртⷭ҇їа҆ньскыи҆ же род в̾есь собра по свои҆мъ мѣстомъ. и҆деж ст҃ыꙗ҆ цр҃кв́и. въ градѣх и҆ в̾ весех. и҆ тако ѹ҆бо братїе҆ поживемъ въ страсѣ гнⷭ҇и, и҆ наказанїи҆. любѧще дрꙋг др́ѹга. и҆ тако свер̾шимъ законъ хвⷭ҇ъ. мы же ѡбратимс̾ѧ на предлежащее҆ ѡ҆ чюдесѣх ст҃го леѡнтїа҆. на вт̾орое҆ лѣто по пожарѣ ростовьстѣмъ. и҆ по рати и҆ноплемен̾н̾ика є҆дегеꙗ҆ григорию҆ бг҃олюбивомꙋ е҆ппⷭ҇ꙋ попеченїе҆ велїе҆ и҆мѣю҆щꙋ ѡ҆ съборнѣи҆ цр҃ькв̾и ст҃ыꙗ҆ бцⷣ҇а. є҆же съделати комары великыꙗ҆ и҆ шию҆. и҆ лобъ. и҆згорѣвш̾ии҆ ѿ пожара. и҆ не пощаде и҆мѣнїа҆ своє҆го всего на созданїе҆ цр҃квное҆. г҃ь же въздасть є҆мꙋ вм̾ѣсто тлѣн̾н̾аго нетлѣньное҆ богатство. пртⷭ҇ыа҆ же бцⷣ҇а моленїе҆м. и҆ ѹ҆годника е҆ꙗ҆ леѡ҆нт̾їа҆. съделана быⷭ҇ цр҃кви вб̾орзѣ и҆ ꙗ҆коже быⷭ҇ и҆ прежде и҆ е҆ще же в неи҆ сътвори лѣсꙋ каменꙋ. и҆ и҆коны и҆списа на зл́атѣ. и҆ сꙋдохранилницꙋ такожде създа камен̾н̾ꙋ. и҆ церкⷪ҇вь всю҆ намости дъсками камеными. и҆ свин̾чатыми дъсками лобъ и҆ комары бол̾шаꙗ҆ покры. и҆ крⷭ҇тъ постави и҆. и зл́ата много приложи к немꙋ. и҆ сп̾роста ꙗ҆коже невѣстꙋ ѹ҆красї ю҆. и҆ сїа҆ет ѹ҆бо и҆ до нн҃ѣ пречюднаѧ҆ та цр҃кви сты҃а҆ бцⷣ҇а. ꙗ҆коже свѣтило велїє҆ в̾ рⷭ҇стеи҆ земли. в п̾равославномъ хрⷭ҇тїа҆ньствии҆. и҆ лꙋчь сл҃нчных превъсходѧщи. многыми и҆ пресл́авными чюдесы бж҃їа҆ мт҃ере. и҆ ҆годника и҆хъ леѡнтїа҆. людїе҆ же дивлѧхꙋсѧ пресл́авномꙋ томꙋ чюдеси бж҃їа҆ мт҃ре. ꙗ҆ко въбор̾зѣ тако съдѣлана быⷭ҇ цр҃кви. и҆ хвалу въздаа҆хꙋ ст҃ѣи҆ бцⷣ҇и. и҆ ѹ҆годникꙋ е҆а҆ чюдотворц̾ꙋ леѡ҆нт̾ию҆.

И е҆гдаже сщ҃ена быⷭ҇ цр҃кви та съборнаꙗ҆ ст҃ыа҆ бцⷣ҇а. бг҃олюбивымъ є҆ппⷭ҇омъ григорїе҆мъ. ѡ҆кт̾оврїа҆ .а҃. праздникъ покрова ст҃ыꙗ҆ бцⷣ҇а. въ .г҃_є҆ лѣⷮ҇ по пожарѣ. и҆ по рати є҆дегеꙗ҆. и҆ тогд̾а ѿкрышасѧ ѿ гроба ст҃го. чюдеса многа бы́вае҆ма великым чюдотворцем леѡ҆нтие҆мь. и҆ ѿ того праздника въ е҆динъ мцⷭ҇ь .м҃. чюдоносных и҆сцѣлени быша. слѣпым. хромымъ. нѣмымъ. сꙋхорꙋкымъ. недꙋжнымъ и҆ разслабленымъ. и҆ кт̾о кацѣмъ недꙋгомъ ѡдръ̀жимъ. вси вѣрнии҆ здравїе҆ полꙋчаа҆хꙋ. млⷭ҇тїю҆ бж҃їе҆ю҆, и҆ прчⷭ҇тыа҆ є҆го мт҃ре. и҆ ѹ҆годника их чюдотворц̾а леѡнтїа҆. моленїе҆мь и҆ чюдодѣи҆ст̾вомъ. и҆ быⷭ҇ радость велика родꙋ хртⷭ҇їа҆ньскомꙋ. бл҃говѣрнии҆ же ѹ҆бо кн҃зи. и҆ велм̾ожїе҆ и҆ вси православнии҆ хртⷭ҇їа҆не. мали и҆ велици. мꙋжескъ по́л и҆ женьскыи҆. вс́и течахꙋ въ церкⷪ҇вь ст҃ыꙗ҆ бцⷣ҇а. къ гробꙋ чюдотворц̾а. и҆ хвалꙋ въздаю҆ще б҃ѫ и҆ прчтⷭ҇ѣи҆ е҆го мт҃ери. и҆ ст҃мꙋ чюдотворц̾ꙋ леѡ҆нтїю҆. и҆ ѿхожахꙋ в д̾омы своꙗ҆ роⷣ҇ю҆щесѧ.

Ниже се̑, млъ̀чанїе҆мь ст҃ого чюдо да покрые҆тсѧ. б҃ꙋ попꙋщаю҆щꙋ грѣх ради наших. ѡ҆вогда оу҆бо гладомъ казнѧ насъ. и҆ное_жде нахожденїе҆мь и҆ноплеменных. ѡвогда же см҃ртносїе҆мь. ꙗ҆коже хощемъ вашеи҆ любв̾и чюднꙋю҆ повесть прост̾рети. паче же ѹ҆миленїа҆ достои̾нꙋ. по и҆зволенїю҆ бж҃їю҆ прии҆де нꙋжа велика на рⷭ҇скꙋю҆ землю. болѣзнь нарицае҆маꙗ҆ корс̾та. и҆ тако мꙋчаше члⷪ҇кы́ болѣзнь ѡна. и҆ см҃рти предаа҆ше. б҃ꙋ тако попꙋстивш̾ꙋ и҆ми же вѣсть сꙋдб̾ами приводѧ наⷭ҇. да поне симъ и҆сп̾равимсѧ. болѣзни же тои҆ ѹ҆множивш̾есѧ. и҆ разшед̾шисѧ по всеи҆ земли рⷭ҇стѣи҆. прии҆де же и҆ на славныи҆ град ростовъ. горк̾аꙗ҆ та болѣзнь, в н̾емж̾е лежи́т тѣло ст҃го леѡнтїа҆. людїе҆ же мнози великою҆ тою҆ болѣзнїю҆ ѡдръ̀жими. и҆ прихожахꙋ с вѣрою҆ къ гробу ст҃го леѡн̾тїа҆. и҆ въскорѣ и҆сцѣленїе прии҆маа҆хѹ. ѿ цѣлб̾оноснаго є҆го гроба. и҆ здрави ѿхожаа҆ху роⷣ҇ю҆щесѧ. и҆ ꙗ҆ко ничт̾оже тѣмь пост̾радав̾шимъ ѿ болѣзни тоꙗ҆. не токм̾о же и҆с того є҆диного града прихожаа҆хꙋ. н̑о и҆ и҆зо и҆ных и҆з дальних градовъ и҆ странъ людїе҆ слышахꙋ. таковоє҆ и҆сцѣленїе҆ ѿ гроба ст҃го леѡн̾тїа҆. ꙗ҆коже и҆сточник непрестан̾н̾о текѹщии҆. и прихожаа҆хꙋ с вѣрою҆ и҆ здравїе҆ прии҆маа҆хꙋ. толикꙋ же народꙋ сшед̾шꙋсѧ с̾ болѧщими. ꙗ҆ко и҆ въ церкⷪ҇в̾ь не можаа҆хꙋ вм̾ѣститисѧ. но̑ внѣ цр҃кви приношахꙋ болѧщихъ. и҆ противꙋ ст҃го гроба полагаа҆хꙋ. и҆ тако вси равно и҆сцѣленїе҆ прии҆махꙋ и҆ радꙋю҆щесѧ и҆ ликоствѹю҆ще ѿхожаа҆хꙋ в д̾омы своꙗ҆ прославлѧю҆ще б҃а. и҆ є҆го пречтⷭ҇ꙋю҆ мт҃рь. и҆ чюдотворц̾а леѡнтїа҆. прии҆мш̾аго таковꙋю҆ блгд҃ть и҆сцѣленїе҆мь.

Многымъ ѹ҆бо лѣтомъ прешедш̾мъ, и҆сцѣленїю҆ ѿ ст҃го гроба непрестан̾н̾о ꙗ҆коже и҆сточникꙋ текꙋщꙋ. и҆ быⷭ҇ ѹ҆бо в лѣта благочтⷭ҇иваго великаго кн҃зѧ и҆вана василье҆вича. а҆рхїе҆ппⷭ҇ꙋ же тогда триѳонꙋ, престолъ съдръ̀жащꙋ ростовьскыꙗ҆ цр҃кв́и. прии҆де ѹ҆бо предиречен̾н̾аꙗ та болѣзнь. ꙗ҆же корс̾та нарицае҆маꙗ҆. на родъ кртⷭ҇їа҆ньскый. на мнози же града и҆ села прии҆де на град̾ ростовъ. и҆ мнози чл҃ци тою҆ болѣзнью҆ ѡ҆дръ̀жими бѣа҆хꙋ. прихождаа҆хоꙋ же с вѣрою҆ къ гробꙋ ст҃го леѡн̾тїа҆. и҆ тако ѿ недꙋга и҆сцѣленїе҆ прїи҆махꙋ. сщ҃ен̾н̾ици же и҆ весь съборъ не престан̾н̾ое҆ моленїе҆ бг҃ꙋ възсилаа҆хꙋ. и чюдотворц̾ꙋ леѡн̾тїю҆. и҆ прищедшꙋ же предиречен̾н̾омꙋ а҆рхїе҆ппⷭ҇ꙋ на моск̾вѣ ѹ҆бо тогда е҆мꙋ бывш̾ꙋ. и҆ слы́шавъ преславнаꙗ҆ чюдеса ѿ гроба ст҃го лео҆нтїа҆. непрестан̾н̾о и҆стѣкаю҆ща. и҆ съзва весь народ. и҆ молебенъ нача пѣти съ сщ҃ен̾н̾икы ѹ҆ гроба ст҃го. и҆ се̑ жена нѣкаꙗ҆ в т̾омъ часѣ прощена быⷭ҇. тою҆ же болѣзнїю҆ ѡ҆дръ̀жима. и҆ быⷭ҇ здрава ꙗ҆ко и҆ прежде. и҆ ѿи҆де в дом свои҆ радꙋꙗ҆сѧ и славѧ б҃а. и҆ ст҃го леѡ҆н̾тїа҆. такожде и҆ вси въздаша хвалꙋ бвⷢ҇и и҆ пречтⷭ҇ѣи҆ є҆го мт҃ери. и҆ великомꙋ чюдотворц̾ꙋ леѡнтїю҆. и҆ ѿ того времени, преста болѣзнь та въ чл҃овѣцѣхъ. млтⷪ҇вю҆ ст҃го леѡ҆нт̾їа҆.

Бы́сть ѹ҆бо ѡ҆трокъ нѣкыꙵ, сѷмеѡ҆нъ и҆мѧ є҆мꙋ .г҃. лѣта ѹ҆бо разслабленъ лежаа҆ше. и҆ всѧ ѹ҆ди тѣла е҆го разсл́аблени бы́ша. нѝ рꙋкою҆ же ни ногою҆ можаа҆ше дв̾игнꙋти. и҆ влачахꙋт е҆го по градꙋ на санех. и҆ тако млтⷭ҇ню ѿ вѣрныхъ члⷪ҇къ прии҆маше. и҆ пакы привлекш̾е пред̾ церкⷪ҇вию҆ того пометаа҆хꙋ. рогозиною҆ и҆ли дъ̀скою҆ того накрыв̾ше. въ е҆динꙋ же ѹ҆бо ѿ нощи, ꙗ҆влѧе҆тсѧ томꙋ ѡ҆трокꙋ жена некаа҆ ст̾рашна и҆ пречюдна. багрѧнꙋ ризꙋ носѧщи. с̾ нею҆ же а҆рхїе҆рѣи҆ свѣтелъ въ бѣлахъ ризах хождаа҆ше. и҆ гл҃ющи к немꙋ, чт̾о ради ѡ´ ѡ҆троче. толико времѧ ст̾раждеши в сеи҆ болѣзни. и҆ не повелѣвае҆ши себе нести въ ст҃ꙋю҆ церкⷪ҇вь. и҆ не призовеши на помощь бж҃їа҆ мт҃ре. и҆ ѹгодника е҆а̀ чюдотворц̾а леѡ҆нт̾їа҆. и҆ сїе҆ є҆мꙋ рекш̾е невидима бы́ста. ѡ҆трокъ же в в̾елицѣ с̾трасѣ бы́въ. ѡ҆ нео҆бычнѣм видѣнїи҆. и҆ на ѹ҆трїе҆ повѣлеваєт себе нести въ церкⷪ҇вь къ гробꙋ леѡнтїа҆. и҆ ꙗ҆ко внесоша є҆го. и҆ видѣ разсл́абленыи҆ на и҆конѣ ѡ҆браз ст҃ыꙗ҆ бцⷣ҇а. и҆ чюдотворц̾а. леѡнт̾їа҆. и҆ всѣм ꙗ҆сно исповѣда. ꙗ҆ко сїа҆ ꙗ҆вистасѧ в нощи сеи҆. и҆ е҆гда начаша ст҃ꙋю҆ литѷргїю҆ разсл́абленыи҆ же молѧшесѧ пртⷭ҇ѣи҆ бцⷣ҇и. и҆ стⷪ҇мꙋ леѡн̾тїю҆. и҆сповѣдаꙗ҆ грѣхы своѧ҆. и҆ а́бїе҆ въскорѣ въста́въ болныи҆. и҆ гробꙋ поклонисѧ ст҃го. и҆ стоꙗ҆въ и҆ до ѿпѣнїа҆ литѷрг̾ии҆. и҆ въздавъ хвалѹ бвⷢ҇и. и҆ пречтⷭ҇ѣи҆ е҆го матери. и҆ ѹ҆годникꙋ и҆хъ и҆ ст҃лю леѡн̾тїю҆. и҆ тако здравъ и҆зыде и҆зъ цр҃кв́и. и҆ ꙗ҆ко ничт̾о же є҆мꙋ пострадавш̾ꙋ ѿ болѣзни ѡ҆ноꙗ҆.

Нѣкоего же ѹ҆бо кн҃зѧ слꙋга захариꙗ҆ и҆менемь, живѧше в с́елѣ свое҆мь. близъ се́лъ ст҃ыꙗ҆ бцⷣ҇а. и҆ ст҃го леѡн̾тїа҆. нѣкоторыи҆ же земли ст҃ыꙗ҆ бцⷣ҇а часть мала прии҆де къ захарїи҆ ѡ҆ного се́лꙋ. и҆ помышлѧше в с̾ебѣ бѣзꙋмныи҆ ꙗ҆ко да лꙋкавьст̾вом прио҆брѧще́т къ свое҆мꙋ селѹ. ѡну землю ст҃ыꙗ҆ бцⷣ҇а. не поминаꙗ҆ безꙋмныи҆ е҆же въ є҆ѵⷢ҇алїи гнⷭ҇ѧ сло́веса. каꙗ҆ ҆бо полз̾а чл҃кꙋ, а҆ще миръ весь прио҆́брѧщеть. дш҃ѫ же свою҆ ѿщетить. и҆ли чт̾о дасть чл҃къ и҆змѣнꙋ на дш҃и свое҆ѝ. ѡ҆н ж̾е є҆же ѹ҆мысли то̀ и҆ сътвори. называет ѹ҆бо часть земьли о҆ноꙗ҆ свое҆го се́ла. и҆ лж̾есвѣдѣтелеи҆ поставлѧет. гл҃ющих ꙗ҆ко мы памѧтꙋе҆мь за многа лѣта. ꙗ҆ко захарїи҆на се́ла сїа҆ землѧ. ѡ҆бычаи҆ же и҆здавна ҆бо и҆ ѹ҆ преднихъ є҆ппⷭ҇овъ. ꙗ҆ко є҆гда с кѣм бꙋдет спорно сл́ово ѡ земли то̀ сще҃н̾н̾ика с леѡ҆нтїе҆вым кртⷭ҇омъ на розвод п̾осилае҆ть. а҆ не ꙗ҆коже и҆ прочии҆. сꙋды и҆ тѧжб̾ы съставлѧа҆хꙋ. и҆ кровь проливаю҆ще. посилает же ѹ҆бо тогда а҆рхїе҆ппⷭ҇ъ. и҆ къ о҆номꙋ захарьи҆ сще҃н̾н̾ика съ животворѧщимъ кртⷭ҇омъ. сще҃н̾н̾икꙋ же тамо пришедшꙋ. и҆ по ѡ҆бычаю҆ на земли съ кртⷭ҇омъ ставшꙋ. захарьи҆ же съ лж̾ивыми свѣдѣтели пришедш̾ꙋ. лж̾есвѣдѣтели же преди пои҆доша ꙗ҆коже захарьи҆ ѹ҆годно. безстꙋдныи҆ же захарїа҆ за ними пои҆де. ни́ такоже чтⷭ҇наго кртⷭ҇а ѹ҆стыдѣвсѧ. сще҃н̾н̾икꙋ же за нимъ въ слѣд съ кртⷭ҇ом и҆дꙋщѹ. и҆ тако ѿведе землю ст҃ыа҆ бцⷣ҇а. захарїа҆ ѡ҆нъ несытыи҆, къ свое҆мꙋ селѹ. довлѣꙗ҆ше бо е҆мꙋ трилакотныꙵ ѡнъ гробъ. є҆гоже невъзможно всѣм и҆збѣжати. и҆ е҆дина горс̾ть перс̾ти на е҆го бестꙋднѣи҆ о҆ч̑и. ꙗ҆коже ѡ сих прⷪ҇ркꙋ гл҃ющꙋ. ѡ҆чи безꙋмнаго на краєх земли. сще҃н̾н̾ик же съ крестомъ ѿтшед̾шꙋ. захарїа҆ же рѹⷣ҇ꙗ҆сѧ на землю ѡ҆нꙋ и҆зыде. и҆ въскорѣ ѹ҆бо ѿмщ̾енїе҆ захарїа҆ прїе҆млет. пррⷪ҇чьскомꙋ словеси. ѡ҆братисѧ болѣзнь е҆го на гл́авꙋ ег̑о. и҆ на връ̀хъ е҆го непрвда є҆го снидет. и҆ е҆гда вз̾ыде захарїа҆ на землю ѡ҆нꙋ ст҃ыꙗ҆ бцⷣ҇а. тогда възопи велїи҆мъ гл҃сомъ захарїꙗ҆ и҆ іа҆ко бѣжати хотѧа҆ше. н̑о не можаа҆ше. и҆ гл҃ѧ горе мн̑ѣ ѡкаꙗ҆н̾н̾омꙋ. ꙗ҆ко землѧ сїа҆ надо мною҆ стоꙗ҆ше. и҆ хотѧше мѧ покрыти и҆ погꙋбити. и҆ пер̾сть ѹ҆бо земли ѡноꙗ ѡкаꙗ҆н̾н̾ии҆ мои҆ о҆ч̑и засы́паше. и҆ тако е҆дв̏а в д̾омъ е҆го нꙋжею҆ приведоша. ѡ҆номꙋ же є҆динако въпїю҆щѹ, горе мнѣ ꙗ҆ко землѧ ѡ҆на надо мною҆ бѣ ꙗ҆ко ѡ҆блакъ. и҆ пер̾сть земли о҆ч̑и мои҆ засыпаше. и҆ злѣ страждꙋ ѡ҆каꙗ҆н̾н̾ыи҆. и҆ никомꙋ же с́его видѧшꙋ но тъ̀км̾о е҆диномꙋ захарїи҆. срь̀доболѧ же є҆го ведоша въ град к̾ъ а҆рхїе҆ппⷭ҇ꙋ триѳонꙋ. тогда бывш̾ꙋ. захарїа҆ же в с̾ебе приходит. и҆ скоро покаꙗ҆нїе показꙋе҆ть. падает ѹ҆бо на ногꙋ а҆рхїе҆ппⷭ҇ꙋ, и҆ слезами нозѣ ѡ҆макаꙗ҆ гл҃ѧ, съгрѣших ѡ҆ чест̾ныи҆ о҆́ч҃е прости мѧ. и҆ землю ѡнꙋ и҆ с насѣꙗ҆ньною҆ нивою҆ възв̾ращає҆т. а҆рхїе҆ппⷭ҇ъ скоро и҆де въ цркⷪ҇в́ь, и҆ нача молебенъ ст҃ѣи҆ бцⷣ҇и и҆ чюдотворц̾ю леѡнт̾їю҆. болѧщии҆ же захарїа҆ ѿ грѣха ѹ҆бо прощенїе҆ вк̾ѫпѣ же и҆ ѿ болѣзни и҆сцѣленїе҆ прїе҆млет. ѿ цѣлб̾оноснаго гроба ст҃го леѡнтїа҆. и҆ здравъ ѹ҆бо в домъ свои҆ радꙋꙗ҆сѧ ѿходить. въздавъ хвалꙋ бг҃ꙋ и҆ пртⷭ҇ѣи҆ бцⷣ҇и творѧщимъ дивнаꙗ҆ чюдеса ѹ҆годникомъ свои҆мъ леѡнтїе҆мъ.

Добро єⷭ҇ въспомѧнꙋти ѿ многых чюдесъ ст҃го мало сїе҆. да незабв̾ению҆ предано бꙋдеть.

Жена нѣкаꙗ҆ сꙋхѹ рꙋкѹ и҆мꙋщи. и҆ та прии҆де къ цѣлбоносномꙋ гробꙋ ст҃го леѡ҆нтїа҆. и҆ и҆сцѣленїе҆ ѹ҆бо въскорѣ ѿ ст҃го приє҆мле́т. и быⷭ҇ рꙋка є҆ꙗ҆ здрава ꙗ҆коже и҆ дрꙋгаꙗ҆. и҆ радꙋꙗ҆сѧ и҆ славѧ б҃а ѿи҆де и҆ чюдотворц̾а леѡнт̾иꙗ҆.

Многа же и҆ и҆на повести достои҆на, ст҃го чюдеса преминꙋх. множества ради земли ѹ҆бо широта. морѧ же глꙋбина. и҆ ст҃ых чюдеса неи҆счетен̾н̾а сꙋть. но̑ ѡ пастырю добрыи҆ великыи҆ леѡн̾тїє҆. помѧни стадо є҆же събра мꙋдрѣ. и҆ съблюди бг҃одарован̾н̾ꙋю҆ ти паствꙋ. ꙗ҆ко чадолюбивыи҆ ѡ҆ц҃ь. и҆ не презри чт̾ꙋщих вѣрою҆ и҆ любовїю҆. прчⷭ҇тнꙋю҆ и҆ многорадостнꙋю҆ памѧт твою҆. и҆ защити наⷭ҇ и҆ съблюди ѿ находѧщих врагъ. да твои҆ми молитвами съблюдає҆ми и҆ нбⷭ҇наго црⷭ҇вїа҆ сподомимс̾ѧ. ѡ х҃ѣ і҆с҃ѣ гдⷭ҇ѣ нашемъ. є҆мꙋ же слава и҆ дръ̀жава съ безначалным є҆го ѡцемъ и҆ с прест҃ымъ и҆ бл҃гым и животворѧщимъ дх҃омъ. и҆ нн҃ѣ и҆ прⷭ҇но и҆ въ вѣкы вѣкомъ. а҆минь.

Попъ нѣкыи҆ жилище и҆мѣꙗ҆ше в ростовьстѣи҆ ѡбласти. и҆ тои҆ бѧше бѣсом мꙋчимъ лютѣ. сръ̀доболи же є҆го приведоша къ гробꙋ ст҃го леѡ҆нтїа҆. желѣзы ѡкована по рꙋкѹ и҆ по ногꙋ. и҆ єдв̏а ѿ многых ѹ҆дръ̀жимъ бываа҆ше. гл҃сы бо нѣкыꙗ҆ ст̾ран̾н̾ы и҆ ст̾рашны и҆спꙋщаа҆ше. и҆ногда же и҆ пенїа҆ нѣкаꙗ҆ страшна и҆ грозна поꙗ҆ше. очи же є҆го бѧхꙋ кровавы. ѹ҆ст̾рашаю҆щи всѣх. видѣнїе҆ же є҆го и҆змѣнисѧ. и҆ с́его ради ст̾раненъ, и҆ ст̾рашенъ позоръ всѣмъ бѧше. и҆ въ цр҃кви ѹ҆бо пѣнию҆ не слышатисѧ ѿ є҆го кричанїа҆ и҆ воплѧ и҆ лаꙗ҆нїа҆. не точїю҆ чл҃ком. но̑ и҆ на б҃а нѣкыѧ҆ гл҃ы хꙋлныꙗ҆ и҆зношаа҆ше. не тои҆ бо гл҃аше. но̑ живыи҆ в немъ бѣсъ ѹ҆сты е҆го гл҃аше. и҆ нощи ѹ҆бо приходѧщи. никт̾о же смѣꙗ҆ше є҆го к с̾ебѣ в д̾омъ вв̾ести всѣх бо бьꙗ҆ше. и҆ на многы же дн҃и првѧзанъ быⷭ҇ ѹ҆жемъ внѣ цр҃кв́и. противꙋ гроба ст҃го леонтїа҆. ни́ ꙗ҆дыи҆ ни пьꙗ҆ дн҃ь и҆ нощь тꙋ пребываа҆ше. н̑о и҆ тꙋ дѣ ст̾ражемъ црк҃вым въкрꙋгъ цр҃кве ходити не даа҆ше. ꙗ҆ко же ѡ҆бычаи҆ и҆мꙋт. и҆ ѿтолѣ ѹ҆бо преводѧт є҆го, и҆ привѧзают къ колокольниⷰ҇. никымж̾е ѹ҆бо небрегомъ за великꙋю҆ е҆го лютость. и҆ ѿ сръ̀добль ѡ҆ставленъ быⷭ҇. и҆ всѣмъ ѹ҆же ѿчаꙗ҆в̾шимсѧ живота є҆го. и҆ в т̾акои҆ нꙋжи многы дн҃и пребыⷭ҇. рꙋце ѹ҆бо и҆ ноѕѣ желѣзы ѡ҆кованы. мышц̾ѣ же ю҆жемъ свѧзани. не ѿ є҆диного же бѣса мꙋчимъ. но̑ ѿ многых. ꙗ҆коже послѣди самъ сказоваше. праздникꙋ же ѹ҆бо пришедш̾ꙋ. ст҃го і҆саїа́ є҆ппⷭ҇а ростовьскаго чюдотворц̾а. маі҆а́ въ .е҃і. и҆ по ѡбычаю҆ ѹбо пѣвш̾е вечернеє҆ пѣнїе҆, и҆ ѿи҆доша нощи же приспѣвш̾и. ѡ҆номꙋ же на ѡ҆бычнѣмъ є҆го мѣстѣ привѧзанꙋ сꙋщѹ. и҆ се ѹ҆бо по ѡ҆бычаю҆ в нощи тои҆ наи҆доша на него бѣси, и҆ начаша е҆го бити. гл҃ющи. ꙗ҆ко нашь є҆си и҆ кт̾о тѧ и҆зметь и҆з рꙋкъ наших. ѡ҆номꙋ же є҆дв̏а възмогш̾ꙋ рещи. къ дверемъ цркⷪ҇внымъ възрѣвш̾и. пртⷭ҇аꙗ҆ гжⷭ҇е бцⷣ҇а помози ми. и҆ ст҃їи҆ чюдотворц̾и. бѣси же є҆го горѣє҆ бьꙗ҆хѹ. и҆ се̑ внезапꙋ с полꙋдн҃евныꙗ҆ страны. на ѹ҆глѣ цркⷪ҇внѣм свѣтъ восїа҆ и҆ ꙗ҆влѧе҆тсѧ ѹ҆бо бѣснꙋющемꙋсѧ въ светѣ том на въздѫсѣ. ꙗ҆ко прчⷭ҇таꙗ҆ бцⷣ҇а. и҆ съ ст҃ыми чюдотворц̾и леѡнтїе҆мъ, и҆ і҆саїе҆мъ. бѣси же не трь̀пѧще свѣта. ѡ҆ставльше є҆го вси и҆щезоша. ѡ҆номꙋ же ѿ свѣта ѡ҆ного глаⷭ҇ сл҃ышашесѧ. повелѣваю҆щь на ҆тренюю҆ въ цркⷪ҇въ внити. и҆ съвръ̀шен̾н̾оє҆ и҆сцѣленїє҆ восп̾риꙗ҆ти. ключарю же цркⷪ҇вномѹ по ѡбычаю҆ къ цр҃кв́и съ свѣщею҆ и҆дѹщꙋ. є҆же ѹ҆тренѧꙗ҆ клепати. ѡ҆номꙋ же пригласив̾шꙋ е҆го и҆ вс̾е є҆мꙋ видѣнїе҆ и҆сповѣда́. ключарь же все є҆мꙋ ѹ҆зы разрѣши. на ѹ҆тренюю҆ же вниде самъ ѡ собѣ простъ въ цркⷪ҇в́ъ. и҆ припадаꙗ҆ къ ѡбразꙋ ст҃ыа҆ бцⷣ҇а. и҆ къ гробомъ ст҃ыхъ чюдотворець леѡ҆нтїа҆ и҆ і҆саїа́. на мнозѣ съ слезами молѧсѧ, и҆сповѣдаꙗ҆ грѣхы своꙗ҆. всѣм ж̾е намъ зрѧщимъ. и҆ дивѧщимс̾ѧ преславномꙋ чюдеси бж҃їа҆ мт҃ре, и҆ ст҃ых чюдотворець. и҆ по ѹ҆тренїи҆ же и҆зыде и҆зъ цр҃кви. и҆ к т̾омꙋ бѣси не смѣа҆хꙋ приближитисѧ к немꙋ. н̑о тоⷱ҇ю҆ и҆здалеча похвалѧа҆хѹсѧ. и҆ зꙋбы ск̾режч̾юще на неⷢ҇. ѡ҆н ж̾е не престаꙗ҆ше ѿ млⷪ҇тв́ы. и҆ е҆гда начаша божественꙋю҆ литѷрг̾ию҆. тогда пакы вниде въ церкⷪ҇вь. и҆ къ гробѹ притече ст҃го леѡнтїа҆. и҆ тꙋ въ храмѣ ст҃го и҆ на клиросѣ нача пѣ́ти и҆ ст҃ѣи҆ дорѣ причастисѧ и҆ и҆зыде здравъ, ꙗ҆ко ничтоже пострадавъ съврь̀шеноє҆ и҆сцѣленїе҆ въс̾прии҆мъ. бѣси бо̑ до конц̾а ѿ него прогнани бы́ша. мл҃тв́ами ст҃ыꙗ҆ бцⷣ҇а. и҆ ст҃ых чюдотворецъ леѡ҆н̾тїа҆ и і҆саі҆а́. и҆ тꙋ немало дн҃и пребывъ въ цркⷪ҇вь приходѧ ст҃ыꙗ҆ бцⷣ҇а. и҆ къ гробомъ ст҃ых чюдотворець. и҆ ѿи҆де в д̾омъ свои҆ радꙋꙗ҆сѧ и славѧ б҃а.

Інъ̀ ѹ҆бо чл҃къ а҆лександръ и҆менемъ, бѣсомъ о҆бладанъ бы́въ. и҆ с́его ради ҆ма своє҆го изстꙋпилъ бѧше и҆ бѣси многым ꙗ҆вленїе҆мь стран̾н̾ымъ и ст̾рашнымъ ꙗ҆влѧхꙋсѧ томѹ. и҆ см҃ртию҆ претѧще. и҆ сїе҆ ѹ҆бо на многы дн҃и бысть е҆мѹ. напаче же в нощи многым и҆ разл́ичным ст̾рашнымъ видѣнїе҆мъ ꙗ҆влѧа҆хꙋсѧ є҆мꙋ. и҆ ѹ҆же томꙋ посредѣ таковых ст̾ражѫщꙋ. и҆ ни мала ѿрадꙋ прїе҆млющи. привожахꙋ же є҆го на пѣнїе҆ по всѧ дн҃и, въ цркⷪ҇вь ст҃ыꙗ҆ бцⷣ҇а. и҆ къ гробꙋ ст҃го леѡ҆нтїа҆. но̑ и тамо ҆бо многа зла пострада ѿ бѣсовъ. и҆ ѹ҆же въ ѿчаꙗ҆нїи҆ всѣм бывшим ѡ҆ е҆го сп҃сенїи҆. и҆ въ е҆динъ ѹ҆бо ѿ дн҃и, приведоша е҆го на за҆тренюю҆ въ црк҃вь ст҃ого леѡ҆нтїа҆ къ гробꙋ. и҆ понꙋждахѹ є҆го е҆же приложитисѧ. и҆ цѣловати ст҃ого ѡ҆браз е҆же єⷭ҇ на гробѣ. ѡ҆н ж̾е не хотѧше. бѣсꙋ бо ꙗ҆вльшꙋсѧ є҆мꙋ стран̾н̾ымъ и҆ страшнымъ нѣкымъ о҆бразомъ. в ж̾енꙋ стр̾ашнꙋ прелождьсѧ. и҆ ѹст̾рашаше є҆го. ꙗ҆ко а҆ще точїю҆ приближитисѧ гробꙋ ст҃го. то̑ копїе҆мъ ѿ него прободенꙋ є҆мꙋ бы́ти. и҆ горк̾ою҆ см҃ртию҆ ѹ҆м́рети. и҆ с́е внезапꙋ и҆ст̾ръгъсѧ ѿ дръ̀жимых е҆го. и҆ прискочивъ напрасно рꙋкою҆ ѹ҆дари мнѣвъ бѣса ѡного ѹ҆страшаю҆щаго є҆го. ѡ҆нъ же ст҃го ѡ҆бразъ по гл́авѣ ѹ҆дари и҆же є҆сть на гробѣ. ѡ҆ чюдо, ѡ҆ дивьство. ст҃аго незлобїю҆ и҆ млрⷭ҇дїю҆. не прогнѣва бо сѧ на простръшаго рꙋкѹ. є҆же ѡ҆бесчестити е҆го ѡ҆бра́з. н̑о на бѣсы и҆же сїе҆ съдѣлавш̾ихъ. ѿтгна бо их и҆ без вѣсти сътвори. и҆ ѿтолѣ здравъ быⷭ҇ члⷪ҇къ ѡ҆нъ и҆ смысленъ. ꙗ҆коже и преже. блⷣ҇ть б҃ꙋ и҆сповѣдꙋꙗ҆, и҆ прчⷭ҇тѣи҆ бцⷣ҇и. и҆ тоꙗ҆ ѹ҆годникѹ ст҃мꙋ леѡ҆нт̾ию҆.

По сем ж̾е и҆нъ чл҃къ бѣсомъ позавидѣнъ бы́въ. и҆ ѹ҆ма изъстꙋпивъ. нѣкыꙗ҆ гл҃ы странн̾ы и҆ страшны и҆спꙋщаꙗ҆. и҆ приближаю҆щих̾сѧ є҆мꙋ ѡ҆вѣх бьꙗ҆ше. овогда же и҆нѣм молѧа҆шесѧ. є҆же и҆збавити е҆го ѿ о҆дръ̀жимыхъ золъ. бѣсом же ѹ҆страшаю҆щим є҆го ст̾рашным видѣнїе҆мь. и҆ є҆дв̏а нꙋждею҆ приведенъ быⷭ҇ въ цркⷪ҇вь ст҃ыꙗ҆ бцⷣ҇а. и҆ къ гробꙋ ст҃го леѡнтїа҆. сщ҃ен̾н̾икꙋ же приближивш̾ꙋсѧ к немѹ с кртⷭ҇ом. ꙗ҆ко блвⷭ҇ити є҆го. ѡ҆н̾ же велии҆мъ гл҃сомъ възопивъ. паче же живыи҆ в нем бѣсъ. ѡ҆ нꙋжа ми пламени се́го, ѡпалѧет бо мѧ. и҆ ѡ҆цепѣнѣвъ паде ꙗ҆ко мр҃твъ. сщ҃ен̾н̾икъ же знамена є҆го животворѧщимъ кртⷭ҇омъ чюдотворц̾евымъ. и҆ сщ҃авъ водꙋ напои҆ е҆го. и҆ тако ѿ часа того прогнаны быша бѣси ѿ него. мл҃твою҆ ст҃ыꙗ҆ бцⷣ҇а, и҆ тоꙗ҆ ѹ҆годника чюдотворц̾а леѡ҆нтїа҆. и҆ быⷭ҇ здравъ и҆ смысленъ. и҆ ѿи҆де в домъ свои҆ радꙋꙗ҆сѧ и сл́авѧ бг҃а.

Тако же и҆ жена нѣкаꙗ҆ ѿ простых, приведена быⷭ҇ къ гробꙋ ст҃го леѡ҆нт̾їа҆. и҆зъѹ҆млена, и҆ ѹма изстꙋпивш̾и. и҆ ничт̾оже смыслѧще. и҆ по малѣх дн҃ехъ здрава быⷭ҇ и҆ смыслена ꙗ҆коже и҆ преже. и҆ ѿи҆де в д̾омъ свои҆ радꙋꙗ҆сѧ, бл҃годарѧ б҃а. и҆ є҆го пречⷭ҇тꙋю҆ мт҃рь. и҆ ѹ҆годника их славнаго чюдотворц̾а леѡнт̾їа҆. б҃ꙋ нашемꙋ сл҃ва.

Оу҆ченїи҆ ѹ҆бо крепк̾ыми прем҃дрых сл́овесъ твоих. ꙗ҆ко ѡ҆ц҃ь чадолюбивъ незлобно дѣтеи҆ множьство ѹ҆свои҆въ цр҃кв́и ѹ҆вѣща вп̾ити. блⷭ҇венъ б҃ъ.

Тобою҆ ѡ҆ст҃илъ є҆сть г҃ь. град̾ великыи҆ славныꙵ ростов. вѣнч̾еносч̾е леѡнтїе҆. людїе҆ бо е҆го вразꙋмлени тобою҆ поют хѹⷭ҇. блⷭ҇венъ б҃ъ.

Гасѧщꙋ ѹ҆бо свѣщꙋ, ѹ҆ чест̾ныꙗ҆ ти ракы бл҃жене ѹ҆трапивъ и҆ не гл҃а ти сътворивъ. твое҆а̀ же ст҃ынѧ мл҃твою҆ и҆сцѣленїє҆ прїа҆тъ. с ним ж̾е и҆ мы веселѧщесѧ вопїе҆мъ хⷭ҇ꙋ. блⷭ҇венъ б҃ъ ѡц҃ь нашихъ.

Ѹ҆м҃ртвисѧ пресмыкаємыи҆ змїи҆. твои҆мъ прижитїе҆мь прчⷭ҇таꙗ҆ дв҃це порождьши невм̾ѣстимаго нб҃сы́. сп҃си ѿ бѣдъ хвалѧщаꙗ҆ тѧ. влⷭ҇венаꙗ҆ чтⷭ҇аꙗ҆ прнⷭ҇одв҃аꙗ҆.

Ликꙋю҆ть чинове а́гг҃льстиꙵ на нб҃сѣх. и҆ вѣрных сонм̾ища на земли. твою҆ памѧ́т похвалѧю҆ще. ст҃лю лео҆нт̾їє҆. хаⷭ҇ превъзносимъ.

Тлѣн̾н̾ыꙗ҆ вещи ѿрѧснꙋвъ. и҆ вп̾еривъ нбⷭ҇наꙗ҆ дш҃ꙋ си. ꙗ҆ко жер̾тва бл҃гопрїа҆тна в̾ воню принесесѧ х҃ꙋ, є҆гоже превъзносимъ.

Въспои҆мъ ѹ҆спѣшно пѣⷭ҇ми х҃а б҃а. прпⷣ҇наго тръ̀жество видѧще славно. всѧ бо дѣи҆ствѹет х҃с, є҆лико хощеть. є҆го же сл́авѧщаꙗ҆ просл́авлѧет въ вѣкы.

Изъ прчтⷭ҇аго ти чрева бг҃омати. нбⷭ҇наго дождѧ каплѧ намъ ҆канꙋша. ѡ҆мываю҆ща скв̾ернꙋ дш҃ь наших. тѣм т̾ѧ бл҃жимъ чтⷭ҇ѹю҆ въ вѣкы.

Ꙗко звѣзда свѣтоносива ꙗ҆висѧ, лꙋчами дх҃овнами. вѣрных срцⷣ҇а просвѣщаꙗ҆, свѣтомъ разꙋма бжⷭ҇твенаго бг҃омрⷣ҇е леѡнт̾їе҆. тѣмъ нн҃ѣ съ а҆гг҃лы въдв̾арѧꙗ҆сѧ. сп҃саи҆ хвалѧщаꙗ҆ твою҆ памѧть.

Дѣлы дх҃овнами ѹкрашеⷩ҇ в п̾ищи раи҆стѣи҆ веселѧсѧ. помѧни хвалѧщаꙗ҆ твою҆ памѧ́т. застꙋпаꙗ҆ ѿ бѣд и҆ скорбїи҆. пребл҃жен̾н̾е сще҃н̾н̾ост҃лю леѡ҆н̾тїе҆. да непрестан̾н̾о тѧ ѹблажає҆мъ.

Имѣꙗ҆и҆ цртⷭ҇во непремѣн̾н̾о. цр҃ю сыи҆ вышних силъ х҃е. десница твое҆а̀ крепостїю҆ врагъ нечт̾ивыхъ выю҆. низв̾ерзи под нозѣ правовѣрномꙋ. и҆ бл҃горазꙋномоу кн́ѧзю нашемꙋ.

Егда сꙋдиши млтⷭ҇ве, ꙗ҆ростию҆ не ѡбличи. ни́ гнѣва же сътвори противꙋ безаконии҆. а҆ще ли кт̾о постои҆ть. мл҃твами рождьшаꙗ҆ тѧ чтⷭ҇ыѧ҆ мт҃ре. ѡ҆гн̑ѧ геѡ҆ньскаго и҆збавитисѧ мꙋченїа҆. и҆ причаст̾ником бы́ти цртⷭ҇вїа҆ нбⷭ҇наго.

Славно краситсѧ днⷭ҇ь, свѣтозарное҆ тръ̀жество. въ свѣтѣ сл́авы лица бж҃їа҆ предс̾тоꙗ҆ ст҃лю. помѧни и҆ наⷭ҇ хвалѧщаꙗ҆ твою҆ памѧ́т.

Съ бг҃омъ ѹ҆повае҆мъ на тѧ прчтⷭ҇аꙗ҆. и҆же и҆с тебе прошедшемѹ. сраспинае҆ми х҃ꙋ. свои҆ми же к немꙋ молб̾ами. невредимы даждь до конц̾а насъ съхрани.

Прп҃добне о҆ч҃е леѡ҆нтїе҆, ты възшед̾ на лѣствицꙋ бжⷭ҇твенаго разꙋма. и҆ къ бг҃ꙋ приближаꙗ҆сѧ. ѹ҆сы́нениꙗ҆ ѿ него даръ прїи҆мъ. и҆сцѣлѧꙗ҆ недѹгы неи҆сцѣлныꙗ҆ и҆ ѿгонѧ дх҃ы ѡ҆мрачныꙗ҆ тѣмъ твое҆ ѹ҆спенїе҆ празднꙋє҆мъ. радостїю҆ срⷣ҇ца х҃а величаю҆ще. прославлѧю҆щаго своє҆го ѹ҆годника.

Прп҃добне ѡ҆ч҃е бг҃омрⷣ҇е леоѡ҆нтїе҆ ты́ въ и҆стин̾н̾ꙋ ꙗ҆висѧ дрꙋгыи҆ моѷсїи҆. свобождаꙗ҆ и҆ наставлѧꙗ҆ новаго и҆і҆л҃ѧ. ѿ прельсти лютаго фараѡ҆на. и҆ приводѧ на землю ѡбѣщанїа҆. въ нбⷭ҇ныꙗ҆ о҆грады. и҆деже нн҃ѣ ликує҆ши ѹ пртⷭ҇ла всѣх цр҃ѧ. за ны непрестан̾н̾о к немѹ ѡ҆ч҃е помолисѧ.

Радꙋи҆сѧ вс̑екрасне лео҆н̾тїе, ты́ и҆зм̾лада хⷭ҇а възл́юбилъ е҆си. кꙋмиръ гнꙋшавс́ѧ. и҆ мерз̾ских и҆долослꙋжении҆. црк҃вь се́бе ѡ҆ст҃илъ є҆си. ѡ҆бителище быⷭ҇ прест҃мꙋ дх҃ꙋ. є҆го же и҆сполнисѧ трои҆чнаго бжⷭ҇тва. є҆гѡж проповѣдалъ е҆си. за своа҆ и҆зчадїа҆, к немꙋ ѡ҆ч҃е помолисѧ.

Ст҃лю леѡнт̾їе҆. высота добродѣтели. бж҃їе҆ процвѣтенїе҆. мрⷣ҇ости а҆рг̾анъ. правовѣрнымъ сл́ава. зл́овѣрїа҆ ѡ҆бличитель. а҆ дв҃ьственомꙋ ликоꙋ. великое҆ сп҃сеноⷩ҇є҆. дивное҆ мрⷣ҇ованїе҆, молꙵ ѡ҆ дш҃ах наших. і҆ нн҃ боⷢ҇ слаⷡ҇сл́овїе҆ великое҆. и҆ ѿпⷭ҇.