Текст молебного пения утвержден на заседании Священного Синода 16 мая 2023 года (журнал № 32).
Иерей начинает: Благословен Бог наш:
Чтец: Царю Небесный: Трисвятое по Отче наш: Господи, помилуй, 12 раз. Слава, и ныне: Приидите, поклонимся:
Псалом 127:
Блажени вси боящиися Господа, ходящии в путех Его. Труды плодов твоих снеси: блажен еси, и добро тебе будет. Жена твоя, яко лоза, плодовита во странах дому твоего, сынове твои, яко новосаждения масличная, окрест трапезы твоея. Се тако благословится человек, бояйся Господа. Благословит тя Господь от Сиона, и узриши благая Иерусалима вся дни живота твоего, и узриши сыны сынов твоих. Мир на Израиля.
Слава, и ныне: Аллилуиа, аллилуиа, аллилуиа, слава Тебе, Боже. (Трижды).
Таже, ектениа:
Миром Господу помолимся.
Лик: Господи, помилуй.
О свышнем мире:
О мире всего мира:
О святем храме сем:
О великом Господине:
О богохранимей стране нашей:
О рабе Божием, (имярек) взыскующем еже делание себе богоугодное обрести, Господу помолимся.
О еже обрести рабу сему делание свое и во славу Божию совершити е, Господу помолимся.
О еже прияти ему плоды благия дел своих, Господу помолимся.
О избавитися ему же и нам от всякия скорби:
Заступи, спаси, помилуй:
Пресвятyю, Пречиcтую, Преблагословeнную, слaвную Владычицу нaшу Богородицу и Приснодеву Марию со всеми святыми помянyвше, сaми себе и дрyг дрyга, и вeсь живот нaш Христу Богу предадим.
Возглaс: Яко подобает Тебе всякая слава:
Лик: Аминь.
Таже, Бог Господь: и тропaрь, глaс 2:
Творче и Создателю всяческих, Боже,/ дела рук наших, к славе Твоей начинаемая,/ Твоим благословением спешно исправи,/ и нас от всякаго зла избави,/ яко Един Всесилен и Человеколюбец.
Слава, и ныне, глас 6:
Все упование мое на Тя возлагаю,/ Мати Божия,/ сохрани мя под кровом Твоим.
Таже прокимен, глас 4: Изыдет человек на дело свое/ и на делание свое до вечера. Стих: Благослови, душе моя, Господа, Господи, Боже мой, возвеличился еси зело.
Соборнаго послания Иаковля чтение зачала 50, 56 (Главы 1:1-8, 5:7-8):
Братие, всяку радость имейте, егда во искушения впадаете различна, ведяще, яко искушение вашея веры соделовает терпение: терпение же дело совершено да имать, яко да будете совершени и всецели, ни в чемже лишени. Аще же кто от вас лишен есть премудрости, да просит от дающаго Бога всем вкупе и не поношающаго, и дастся ему. Да просит же верою, ничтоже сумняся: сумняй бо ся уподобися волнению морскому, ветры возметаему и развеваему. Да не мнит человек он, яко приимет что от Бога. Долготерпите убо, братие моя, до пришествия Господня. Се земледелец ждет честнаго плода от земли, долготерпя о нем, дондеже приимет дождь ран и позден. Долготерпите убо и вы, утвердите сердца ваша, яко пришествие Господне приближися.
Аллилуиа, глас 4: Боже мой, на Тя уповах, да не постыжуся во век. Стих: Буди ми в Бога Защитителя и в дом прибежища, еже спасти мя.
От Матфеа святаго Евангелиа чтение
зачало 20 (Мф. 7:7-11):
Рече Господь: просите, и дастся вам: ищите, и обрящете: толцыте, и отверзется вам: всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашым, кольми паче Отец ваш Небесный даст блага просящым у Него.
Таже ектениа: Помилуй нас, Боже, по велицей милости Твоей:
Лик: Господи, помилуй. (Трижды).
Еще молимся о Великом Господине:
Еще молимся о богохранимей стране нашей:
О еже услышати глас раба Твоего (имярек) и послати ему делание благо, во еже преспевати в заповедех Твоих, молимся Тебе, Всесильне Господи, услыши и помилуй.
О еже возвеселитися о делех рук своих, молимся Тебе, Милосерде Господи, услыши и помилуй.
Еще молимся за всю братию и за вся христианы.
Возглас: Услыши ны, Боже Спасителю наш, Упование всех концев земли и сущих в мори далече, и Милостив, Милостив буди, Владыко, о гресех наших и помилуй ны, Милостив бо и Человеколюбец Бог еси, и Тебе славу возсылаем, Отцу и Сыну и Святому Духу ныне и присно и во веки веков. Аминь.
Молитва
Господи, Иисусе Христе, Создателю мира и Творче наш, всех в нуждах приемляй воздыхания, ведый просимое прежде прошения, глубиною мудрости человеколюбно вся строяй и полезная всем подаваяй! Ныне смиренно молим Тя: даждь рабу Твоему сему (имярек) делание благо, во еже вся полезная творити ему во славу Твою и ко благу дома своего и прияти плод достоин трудов своих, да, преспевая в заповедех Твоих и в любви Твоей, воспоет и возблагодарит Тя со Безначальным Твоим Отцем, и Пресвятым и Благим и Животворящим Твоим Духом, ныне и присно, и во веки веков. Аминь.
Таже отпуст:
Христос, истинный Бог наш, молитвами Пречистыя Своея Матере, святых славных и всехвальных апостол, иже во святых отец наших святителей Николая, архиепископа Мир Ликийских Чудотворца, и Спиридона, епископа Тримифунтскаго Чудотворца, святаго мученика Трифона, (иных святых) и всех святых, помилует и спасет нас, яко Благ и Человеколюбец.