Октоих, Глас 2.7, Неделя, Канон воскресный
Глас 2
Песнь 1
Ирмос: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.
Припев: Сла́ва, Го́споди, свято́му воскресе́нию Твоему́.
Мирски́й кня́зь, Бла́же, ему́же написа́хомся, за́поведи Твоея́ не послу́шавше, кресто́м Твои́м осуди́ся: прирази́ся бо Ти́ я́ко сме́ртну: отпаде́ же вла́сти Твоея́ держа́вою, и немощны́й обличи́ся.
Сла́ва Отцу́ и Сы́ну и Свято́му Ду́ху.
Изба́витель ро́да челове́ческаго, и нетле́нному животу́ Нача́льник в ми́р прише́л еси́: Воскресе́нием бо Твои́м раздра́л еси́ сме́ртныя пелены́, Е́же славосло́вим вси́: сла́вно бо просла́вися.
И ны́не и при́сно и во ве́ки веко́в. Ами́нь.
Богородичен: Превы́шши яви́лася еси́, Чи́стая Присноде́во, вся́кия неви́димыя же и ви́димыя тва́ри: Зижди́теля бо родила́ еси́, я́ко благоволи́ воплоти́тися во утро́бе Твое́й, Его́же со дерзнове́нием моли́, спасти́ ду́шы на́шя.
Песнь 3
Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.
Припев: Сла́ва, Го́споди, свято́му воскресе́нию Твоему́.
Тва́рь в стра́сти Твое́й изменя́шеся, зря́щи Тя́ в нище́тне о́бразе от беззако́нных поруга́ема, основа́вшаго вся́ Боже́ственным манове́нием.
Сла́ва Отцу́ и Сы́ну и Свято́му Ду́ху.
От пе́рсти по о́бразу мя́ руко́ю Твое́ю созда́л еси́: и сокруше́нна па́ки в пе́рсть сме́ртную за гре́х, Христе́, соше́д во а́д, совоскреси́л еси́.
И ны́не и при́сно и во ве́ки веко́в. Ами́нь.
Богородичен: Чи́ни удиви́шася а́нгельстии, Пречи́стая, и челове́ческая устраши́шася сердца́ о Рождестве́ Твое́м: те́мже Тя́, Богоро́дицу, ве́рою чти́м.
Седален, глас 2
Благообра́зный Ио́сиф, с дре́ва сне́м Пречи́стое Твое́ те́ло, плащани́цею чи́стою обви́в, и благоуха́ньми во гро́бе но́ве закры́в положи́: но тридне́вен воскре́сл еси́, Го́споди, подая́ ми́рови ве́лию ми́лость. Стих: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Мироно́сицам жена́м при гро́бе предста́в а́нгел вопия́ше: ми́ра ме́ртвым су́ть прили́чна, Христо́с же истле́ния яви́ся чу́ждь. Но возопи́йте: воскре́се Госпо́дь, подая́ ми́рови ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Препросла́вленна еси́, Богоро́дице Де́во, пое́м Тя́: Кресто́м бо Сы́на Твоего́ низложи́ся а́д, и сме́рть умертви́ся, умерщвле́ннии воста́хом, и живота́ сподо́бихомся: ра́й восприя́хом дре́внее наслажде́ние. Те́м благодаря́ще, славосло́вим я́ко Держа́внаго Христа́ Бо́га на́шего, и Еди́наго Многоми́лостиваго.
Песнь 4
Ирмос: Прише́л еси́ от Де́вы, не хода́тай, ни а́нгел, но Са́м, Го́споди, вопло́щься, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.
Припев: Сла́ва, Го́споди, свято́му воскресе́нию Твоему́.
Предстои́ши суди́щу я́ко суди́мь, Бо́же мо́й, не вопия́, Влады́ко, су́д износя́ язы́ком: и́мже стра́стию Твое́ю, Христе́, вселе́нней соде́лал еси́ спасе́ние.
Сла́ва Отцу́ и Сы́ну и Свято́му Ду́ху.
Стра́стию Твое́ю, Христе́, врагу́ оскуде́ша ору́жия, проти́вным же е́же во а́д схожде́нием Твои́м, гра́ды разруши́шася, и мучи́телева де́рзость низложе́на бы́сть.
И ны́не и при́сно и во ве́ки веко́в. Ами́нь.
Богородичен: Тя́, приста́нище спасе́ния, и сте́ну недви́жиму, Богоро́дице Влады́чице, вси́ ве́рнии све́мы: Ты́ бо моли́твами Твои́ми избавля́еши от бе́д ду́шы на́шя.
Песнь 5
Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́, от но́щи неве́дения, приведе́ние и́мамы.
Припев: Сла́ва, Го́споди, свято́му воскресе́нию Твоему́.
Я́ко ке́дры, Христе́, язы́ков шата́ние сокруши́л еси́ во́лею, Влады́ко: я́ко изво́лил еси́ на кипари́се, и на пе́вке, и ке́дре, пло́тию совозвыша́ем.
Сла́ва Отцу́ и Сы́ну и Свято́му Ду́ху.
В ро́ве, Христе́, преиспо́днем положи́ша Тя́ бездыха́нна ме́ртва: но Твое́ю я́звою забве́нныя ме́ртвыя, и́же во гробе́х спя́щыя, уя́звен с Собо́ю воскреси́л еси́.
И ны́не и при́сно и во ве́ки веко́в. Ами́нь.
Богородичен: Моли́ Сы́на Твоего́ и Го́спода, Де́во Чи́стая, на Тя́ упова́ющым ми́р дарова́ти, плене́нным избавле́ние, от сопроти́вных настоя́ний.
Песнь 6
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припев: Сла́ва, Го́споди, свято́му воскресе́нию Твоему́.
Я́ко злоде́й Пра́ведник осуди́ся и со беззако́нными на дре́ве пригвозди́ся, пови́нным оставле́ние Свое́ю да́руя кро́вию.
Сла́ва Отцу́ и Сы́ну и Свято́му Ду́ху.
Еди́нем у́бо челове́ком, пе́рвым Ада́мом дре́вле в ми́р вни́де сме́рть, и Еди́нем Воскресе́ние Сы́ном Бо́жиим яви́ся.
И ны́не и при́сно и во ве́ки веко́в. Ами́нь.
Богородичен: Неискусому́жно, Де́во, родила́ еси́, и ве́чнуеши Де́ва, явля́ющи И́стиннаго Божества́, Сы́на и Бо́га Твоего́ о́бразы.
Кондак, глас 2
Воскре́сл еси́ от гро́ба, Всеси́льне Спа́се, и а́д ви́дев чу́до, ужасе́ся, и ме́ртвии воста́ша: тва́рь же ви́дящи сра́дуется Тебе́, и Ада́м свесели́тся, и ми́р, Спа́се мо́й, воспева́ет Тя́ при́сно.
Икос
Ты́ еси́ Све́т омраче́нным, Ты́ еси́ Воскресе́ние все́х, и Живо́т челове́ков, и все́х совоскреси́л еси́, сме́ртную держа́ву, Спа́се, разо́рь, и а́дова врата́ сокруши́вый, Сло́ве: и ме́ртвии ви́девше чу́до чудя́хуся, и вся́ка тва́рь сра́дуется о Воскресе́нии Твое́м, Человеколю́бче. Те́мже и вси́ сла́вим и пое́м Твое́ снизхожде́ние, и ми́р, Спа́се мо́й, воспева́ет Тя́ при́сно.
Песнь 7
Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й благослове́н, и препросла́влен.
Припев: Сла́ва, Го́споди, свято́му воскресе́нию Твоему́.
Не терпе́л еси́, Влады́ко, за благоутро́бие сме́ртию челове́ка зре́ти му́чима, но прише́л и спа́сл еси́ Твое́ю кро́вию, челове́к бы́в: Сы́й благослове́н, и Препросла́влен Бо́г оте́ц на́ших.
Сла́ва Отцу́ и Сы́ну и Свято́му Ду́ху.
Ви́девше Тя́, Христе́, оболче́на во оде́жду отмще́ния, ужасо́шася вра́тницы а́довы: безу́мнаго бо мучи́теля раба́, Влады́ко, прише́л еси́ уби́ти: Сы́й благослове́н и Препросла́вен Бо́г оте́ц на́ших.
И ны́не и при́сно и во ве́ки веко́в. Ами́нь.
Богородичен: Святы́х Святе́йшую Тя́ разуме́ем, я́ко Еди́ну ро́ждшую Бо́га Непреме́ннаго, Де́во Нескве́рная, Ма́ти Безневе́стная: все́м бо ве́рным источи́ла еси́ нетле́ние, Боже́ственным Рождество́м Твои́м.
Песнь 8
Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щыя: благослови́те вся́ дела́ Госпо́дня Го́спода.
Припев: Сла́ва, Го́споди, свято́му воскресе́нию Твоему́.
Кро́вию Твое́ю, Христе́, очервле́но пло́ти Твоея́ зря́ще одея́ние тре́петом ужаса́хуся мно́гому Твоему́ долготерпе́нию, а́нгельстии чи́ни, зову́ще: благослови́те вся́ дела́ Госпо́дня Го́спода.
Сла́ва Отцу́ и Сы́ну и Свято́му Ду́ху.
Ты́ мое́ сме́ртное оде́ял еси́, Ще́дре, в безсме́ртие воста́нием Твои́м. Те́мже веселя́щеся благода́рственно воспева́ют Тя́ избра́ннии лю́дие, Христе́, зову́ще Тебе́: поже́рта бы́сть вои́стинну сме́рть побе́дою.
И ны́не и при́сно и во ве́ки веко́в. Ами́нь.
Богородичен: Ты́ И́же Отцу́ неразлу́чнаго, во утро́бе богому́жно пожи́вша безсе́менно зачала́ еси́, и неизрече́нно родила́ еси́, Богороди́тельнице Пречи́стая: те́мже Тя́ спасе́ние все́х на́с све́мы.
Песнь 9
Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы на́м яви́ся, омраче́нная просвети́ти, собра́ти расточе́нная: те́м Всепе́тую Богоро́дицу велича́ем.
Припев: Сла́ва, Го́споди, свято́му воскресе́нию Твоему́.
Я́ко в раи́ насажде́но на ло́бнем, Спа́се, требога́тое дре́во Твоего́ пречи́стаго Креста́, кро́вию и водо́ю Боже́ственною, я́ко от исто́чника Боже́ственнаго, ребра́ Твоего́, Христе́, напоя́емо, живо́т на́м прозябло́ е́сть.
Сла́ва Отцу́ и Сы́ну и Свято́му Ду́ху.
Низложи́л еси́ си́льныя, распны́йся, Всеси́льне, и е́же ни́зу лежа́щее во а́дове тверды́ни, естество́ челове́ческое возне́с, на О́тчем посади́л еси́ престо́ле. С Ни́мже Тебе́ гряду́щу покланя́ющеся, велича́ем.
И ны́не и при́сно и во ве́ки веко́в. Ами́нь.
Троичен: Еди́ницу Тричи́сленную, Тро́ицу Единосу́щную правосла́вно пою́ще ве́рнии, сла́вим: непресеко́мо Пребоже́ственное естество́, Трисве́тлую, Невече́рнюю Зарю́, Еди́ну нетле́нную на́м све́т Возсия́вшую.
Комментировать