Минея, 7 Мая, Канон
Глас 4
Песнь 1
Ирмос: Колесни́цы фарао́новы и си́лу его́/ вве́рже в мо́ре кре́пкий в бра́нех./ Воспое́м песнь но́вую, я́ко просла́вися.
Припев: Сла́ва, Го́споди, Кресту́ Твоему́ Честно́му.
Яви́л еси́ на земли́ зарю́ Креста́,/ и́мже, диа́вола низложи́в, челове́ческий род спасл еси́, Го́споди,/ те́мже поем славу Твою́.
Припев: Сла́ва, Го́споди, Кресту́ Твоему́ Честно́му.
Ра́зума непоко́рство Кресто́м Изба́витель разори́ вражду́ О́тчим благоволе́нием./ Пое́м Ему́ песнь но́ву, сла́вно бо просла́вися.
Сла́ва Отцу́ и Сы́ну и Свято́му Ду́ху.
Я́ко во Еде́ме живо́тное дре́во всади́л еси́, Христе́,/ та́ко ски́петр победотво́рный,/ Крест Твой светови́дно, возсия́л еси́ на го́ру святу́ю.
И ны́не и при́сно и во ве́ки веко́в. Ами́нь.
Богородичен: Ю́же проро́ческий прови́де лик,/ я́коже дверь Небе́сную и неопали́мую купину́,/ Тя, Де́во Ма́ти Чи́стая, Бо́га ро́ждшую, позна́хом.
Песнь 3
Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.
Припев: Сла́ва, Го́споди, Кресту́ Твоему́ Честно́му.
Я́ко щито́м, защища́еми непобеди́маго Креста́ зна́мением, Влады́ко,/ его́же не терпя́, ме́рзкий исчеза́ет с де́монским мно́жеством.
Сла́ва Отцу́ и Сы́ну и Свято́му Ду́ху.
Вся Крест Твой возвесели́, распя́таго Тя Бо́га испове́дающия,/ и я́ко пресве́тлою и непристу́пною красото́ю осия́.
И ны́не и при́сно и во ве́ки веко́в. Ами́нь.
Богородичен: Ра́дуйся, Ма́ти Неискусобра́чная,/ Бо́га Сло́ва во утро́бе Твое́й вмести́вшая,/ и ро́ждши воплоще́ннаго Бо́га ку́пно и Челове́ка.
Седален, глас 4
Показа́вый Креста́ Боже́ственный о́браз на Небеси́,/ су́щия на земли́ наста́вити к Твоему́ позна́нию, Христе́ Бо́же,/ днесь просия́ невече́рняя све́тлость, и свет лица́ Твоего́ на нас зна́менася./ Того́ у́бо вси и́мамы, ве́рнии, ору́жие ми́ра, непобеди́мую побе́ду.
Песнь 4
Ирмос: Услы́шах слух Твой, Го́споди,/ я́ко яви́лся еси́ на земли́,/ и просла́вих Твою́ си́лу.
Припев: Сла́ва, Го́споди, Кресту́ Твоему́ Честно́му.
Та́йно у́бо пе́рвее, чу́вственно же днесь,/ просия́л есть, Христе́, Пречи́стаго Креста́ Твоего́ о́браз.
Припев: Сла́ва, Го́споди, Кресту́ Твоему́ Честно́му.
Беззако́нных богоуби́йц де́рзость, Кре́стным о́бразом просвети́в,/ изобличи́л еси́, Спа́се Ще́дре.
Сла́ва Отцу́ и Сы́ну и Свято́му Ду́ху.
Утверди́л еси́ христиа́нскую ве́ру невеще́ственным Твои́м све́том,/ Крест нам, Христе́, начерта́в.
И ны́не и при́сно и во ве́ки веко́в. Ами́нь.
Богородичен: Ма́ти Чи́стая, Благослове́нная Влады́чице,/ Его́же родила́ еси́, Бо́га моли́твами Твои́ми ми́лостива сотвори́ нам.
Песнь 5
Ирмос: Возсия́вый свет,/ и просвети́вый утро,/ и показа́вый день,/ сла́ва Тебе́, сла́ва Тебе́,/ Иису́се Сы́не Бо́жий.
Припев: Сла́ва, Го́споди, Кресту́ Твоему́ Честно́му.
Смертоно́сное дре́во во Еде́ме Ада́му, дре́вле преступи́вшему, смерть принесе́;/ Крест же Живоно́сный, ны́не я́влься, ми́ра просвети́ концы́.
Припев: Сла́ва, Го́споди, Кресту́ Твоему́ Честно́му.
Соста́вивый сло́вом первозда́нное сия́ние, я́ко Сы́ну Оте́ц,/ Крест ны́не светоза́рен напису́ет,/ Распе́ншемуся свиде́тельствуя Божество́.
Сла́ва Отцу́ и Сы́ну и Свято́му Ду́ху.
Во све́те незаходи́ме превы́спренний свет,/ во Отце́ у́зрим ве́рою, Христе́, Тя, Сы́на, и Твой Дух,/ душа́м на́шим просия́н.
И ны́не и при́сно и во ве́ки веко́в. Ами́нь.
Богородичен: Боле́зней ма́терних, Отрокови́це, не позна́ла еси́,/ преесте́ственно заче́нши Бо́га и ро́ждши пло́тию,/ те́мже Тя вси досто́йно сла́вим.
Песнь 6
Ирмос: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.
Припев: Сла́ва, Го́споди, Кресту́ Твоему́ Честно́му.
Да покры́ются у́бо о́чи беззако́нных,/ Кре́стныя добро́ты блиста́ющия не могу́ще зре́ти.
Сла́ва Отцу́ и Сы́ну и Свято́му Ду́ху.
Да насладя́тся заре́ю Пречи́стаго Креста́/ Бо́га ве́дящии, на дре́ве распе́ншагося пло́тию.
И ны́не и при́сно и во ве́ки веко́в. Ами́нь.
Богородичен: Я́же Бо́га ро́ждшая, Де́во Неискусобра́чная,/ о нас не преста́й Сы́на Твоего́ моля́щи.
Кондак, глас 4
Отве́рзый Небеса́ заключе́нная, на Небеси́ пресве́тлыя лучи́,/ на земли́ возсия́ Пречи́стый Крест:/ те́мже, сия́ние его́ де́йства прие́мше, к незаходи́мому наставля́емся Све́ту/ и во бране́х и́мамы его́ ору́жие ми́ра,/ непобеди́мую побе́ду.
Икос
Зна́мение се стра́шное вели́каго Бо́га ви́де вели́кий Константи́н/ и слы́шаше глаго́лющу в нем Иису́су,/ пе́рвее глаго́лавшу царю́ христиа́н ве́рных самодержа́вному:/ да́же у́бо до втора́го прише́ствия/ сей, твоему́ гра́ду достоя́ние сохраня́я, пребу́дет и да́же до сконча́ния,/ и градо́м всем первоседа́ние./ Стена́ же тому́ бу́дет Крест, ору́жие ми́ра, непобеди́мая побе́да.
Песнь 7
Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше, препе́тый Го́споди,/ Бо́же оте́ц на́ших, благослове́н еси́.
Припев: Сла́ва, Го́споди, Кресту́ Твоему́ Честно́му.
Возне́сшееся на Крест Со́лнце в полу́дне,/ Его́же зря́щи чу́вственное со́лнце, лучи́ своя́ скры:/ препе́тый Го́споди, Бо́же оте́ц на́ших, благослове́н еси́.
Припев: Сла́ва, Го́споди, Кресту́ Твоему́ Честно́му.
Богови́дцу во огни́ дре́вле бесе́дова и мра́це,/ крестоявле́нным же блиста́нием я́ко Бог сла́вим днесь:/ препе́тый Го́споди, Бо́же оте́ц на́ших, благослове́н еси́.
Сла́ва Отцу́ и Сы́ну и Свято́му Ду́ху.
От Све́та и во све́те Свет соприсносу́щный сия́я/ и пречи́стым Твои́м све́том Креста́ Твоего́ побе́ду показа́л еси́:/ препе́тый Го́споди, Бо́же оте́ц на́ших, благослове́н еси́.
И ны́не и при́сно и во ве́ки веко́в. Ами́нь.
Богородичен: Несказа́нно во утро́бе и преесте́ственно прие́мшую Непреме́ннаго Бо́га,/ за милосе́рдие к челове́ком прише́дшаго,/ благоче́стно воспое́м я́ко Ма́терь Бо́га на́шего во ве́ки.
Песнь 8
Ирмос: Во о́бразе А́нгела,/ я́вльшагося в пещи́ о́гненней песносло́вцем,/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки.
Припев: Сла́ва, Го́споди, Кресту́ Твоему́ Честно́му.
На престо́ле сла́вы ви́дена бы́вша и на дре́ве Кре́стнем пригвожде́на существо́м пло́ти,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.
Припев: Сла́ва, Го́споди, Кресту́ Твоему́ Честно́му.
Све́том пречи́стым вообра́жшаго на кра́ниеве Крест, на горе́ святе́й,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Славосло́вяще Еди́наго от Тро́ицы, заре́ю Кре́стнаго вселе́нную просвеща́юща,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Неизрече́нно и без се́мене заче́ншую/ и ро́ждшую Ра́дость вселе́нныя, Христа́ Бо́га,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.
Песнь 9
Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.
Припев: Сла́ва, Го́споди, Кресту́ Твоему́ Честно́му.
Дре́вле во огни́ же и мра́це непокори́вым узако́нивый,/ ны́не же ве́рным Твои́м лю́дем Креста́ Твоего́ о́браз начерта́л еси́, па́че свети́л сия́ющ,/ его́же досто́йно велича́ем.
Припев: Сла́ва, Го́споди, Кресту́ Твоему́ Честно́му.
Пла́кася тьмо́ю тварь распе́нших Тя де́рзости,/ ны́не же благоле́пнейшим све́том Живоно́сный просия́ Крест Твой, Христе́,/ церко́вную показу́я сокрове́нную красоту́.
Сла́ва Отцу́ и Сы́ну и Свято́му Ду́ху.
О Тебе́ упова́ние возвы́сивше, бога́тии лю́дие Твои́/ Тебе́ на мольбу́ Крест и стра́шную кровь Твою́ предлага́ют,/ но благопребы́тно пода́ждь нам, Сло́ве Бо́жий, избавле́ние.
И ны́не и при́сно и во ве́ки веко́в. Ами́нь.
Богородичен: Просвети́ нас, ро́ждшая Свет непристу́пный, Де́во,/ и испо́лни нас весе́лия, и ра́дости, и Боже́ственнаго ра́зума,/ чи́стым се́рдцем Тя благоразу́мно велича́ющия.
Светилен
Крест – храни́тель всея́ вселе́нныя,/ Крест – красота́ Це́ркве,/ Крест – на́ша держа́ва,/ Крест – ве́рных утвержде́ние,/ Крест – А́нгелов сла́ва и де́монов я́зва.