Минея, 17 Декабря, Кано́н проро́ка
Глас 8
Песнь 1
Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це.
Припев: Святы́й проро́че Дании́ле, моли́ Бо́га о на́с.
Спа́се Благоде́телю, всех благи́х Вино́вный,/ светоно́сным Твои́м сия́нием ум мой просвети́, Человеколю́бче,/ я́ко да Твоего́ проро́ка восхвалю́ сла́вную па́мять.
Припев: Святы́й проро́че Дании́ле, моли́ Бо́га о на́с.
У́тро я́ко, возсия́л еси́, му́дро, целому́дрия,/ целому́дренную предбе́дствовавшую спасл еси́ Соса́нну:/ Бог бо тя воздви́же, Ве́детель та́йных,/ ста́рцы лю́тыя осуди́ти.
Сла́ва Отцу́ и Сы́ну и Свято́му Ду́ху.
Стра́хом укрепля́еми Бо́жиим, Авраа́мовы вну́цы/ пи́щу пребеззако́нную отри́нуша до́блественне/ и, Боже́ственным пита́ющеся жела́нием благоче́стия,/ к велича́йшей взя́шася сла́ве.
И ны́не и при́сно и во ве́ки веко́в. Ами́нь.
Богородичен: Го́ру ви́дел еси́ мы́сленную, Дании́ле свяще́ннейше,/ еди́ну Пречи́стую Присноде́ву Отрокови́цу,/ из Нея́же отсече́ся Ка́мень краеуго́льный и лесть сокруши́ всю.
Песнь 3
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Припев: Святы́й проро́че Дании́ле, моли́ Бо́га о на́с.
Ра́зум и му́дрость от Бо́га прие́м,/ сказа́л еси́ светоявле́нно сено́вная царе́м с́ония.
Сла́ва Отцу́ и Сы́ну и Свято́му Ду́ху.
Зми́я умертви́л еси́,/ пи́щу вверг, сла́вне, чу́вственнаго,/ пе́рвее бо неви́димыя победи́л еси́ де́моны.
И ны́не и при́сно и во ве́ки веко́в. Ами́нь.
Богородичен: Заре́ю просвеща́емь,/ явле́нную зри́ши, сла́вне, го́ру Бо́жию благослове́нную, челове́ков укра́шение.
Седален, глас 8
Проро́чествия благода́тию обогати́вся,/ Де́вы Рождество́ сеннопи́шеши/ и реши́ши со́ния царе́м я́вственне;/ вве́ржен же быв в ров,/ я́ко му́ченик научи́л еси́ пресла́вно, блаже́нне, пости́тися львы./ Тем разори́л еси́ безбо́жных служе́ние,/ зми́я уби́л еси́, до́бльствовав светле́йше, Дании́ле досточу́дне./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище Ца́рское,/ одре́ преиспещренноустла́нный, златопорфи́рный черто́же,/ хлами́до червленосве́тлая, укра́шенный хра́ме,/ мо́лниеносное ору́жие, свети́льниче многосве́тлый,/ ра́дуйся, Богоро́дице, дванадесятосте́нный гра́де,/ и две́ре златокова́нная, и черто́же светлообра́зный,/ светлопозлаще́нная трапе́зо, Богоукраше́нная ски́ние;/ ра́дуйся, сла́вная Неве́сто, Со́лнце ка́плющая;/ ра́дуйся, еди́на души́ мое́й благоле́пие.
Песнь 4
Ирмос: Из горы́ приосене́нныя, Сло́ве, проро́к,/ едины́я Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу твою́.
Припев: Святы́й проро́че Дании́ле, моли́ Бо́га о на́с.
Зако́н благоче́стно сохрани́в, о проро́че!/ вои́стинну му́дрости позна́л еси́ Да́теля,/ та́йным же науча́юща и глубо́ким/ и я́же во тьме тя просвеща́юща.
Припев: Святы́й проро́че Дании́ле, моли́ Бо́га о на́с.
Свяще́нну жи́знь пожи́в, Богоявле́нне,/ жела́ний муж наре́клся еси́,/ му́жественно бо стра́сти попра́в,/ к нестаре́ющейся преста́вился еси́ жи́зни.
Сла́ва Отцу́ и Сы́ну и Свято́му Ду́ху.
Все́льшаяся в тебе́ Уте́шителя благода́ть, Дании́ле,/ показу́ет тя светоно́сна,/ и победи́теля мучи́телей и царе́й, и прему́дрости жили́ще.
И ны́не и при́сно и во ве́ки веко́в. Ами́нь.
Богородичен: Ка́мень Тя, без руки́ отсе́чен, Сло́ве,/ от горы́ зрит, Де́вы Богоро́дицы,Дании́л проро́к,/ взыва́я и воспева́я Твое́ Божество́.
Песнь 5
Ирмос: От но́щи неве́дения/ Богове́дением просвети́вый концы́,/ просвети́ мя у́тром Человеколю́бия Твоего́, Го́споди.
Припев: Святы́й проро́че Дании́ле, моли́ Бо́га о на́с.
Страда́льческия по́двиги проро́чествия уясни́в пропове́данием,/ сия́еши обои́ми, Боже́ственнаго вдохнове́ния испо́лнен.
Сла́ва Отцу́ и Сы́ну и Свято́му Ду́ху.
Прему́др показа́лся еси́, блаже́нне,/ па́че ума́ прему́дрости сия́ньми, велича́йший Богоглаго́ливе Дани́иле,/ и вся просвети́л еси́.
И ны́не и при́сно и во ве́ки веко́в. Ами́нь.
Богородичен: Тайновождеству́ет о́бразы неизглаго́ланнаго воплоще́ния, Чи́стая,/ и́же из Тебе́ Высоча́йшаго Дании́л проро́к сла́вный.
Песнь 6
Ирмос: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.
Припев: Святы́й проро́че Дании́ле, моли́ Бо́га о на́с.
А́нгельския ты ли́ки во све́те светле́йшем зря,/ подража́тель всеизря́днейший сих был еси́,/ Всецаря́ наслажда́лся сия́ньми.
Сла́ва Отцу́ и Сы́ну и Свято́му Ду́ху.
Спаси́тельное Сло́ва прише́ствие возвеща́я,/ предвозвести́л еси́ и хра́ма разоре́ние, зако́на же исполне́ние/ и благода́ти па́че ума́ дарова́ния.
И ны́не и при́сно и во ве́ки веко́в. Ами́нь.
Богородичен: Се Де́ва во утро́бе я́ве зачина́ет Христа́ Бо́га, осия́вшися Ду́хом,/ Ея́же преображе́ние прови́дяше Дании́л сла́вный.
Кондак, глас 3
Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище:/ зри́ши бо, я́ко настоя́щая, дале́че су́щая./ Львы укроти́л еси́, вве́ржен в ров;/ сего́ ра́ди тя почита́ем, проро́че блаже́нне, Дани́иле сла́вне.
Икос
Иису́са Христа́, И́стиннаго Бо́га на́шего,/ Его́же Боже́ственное я́сно прише́ствие провозгласи́л еси́, моли́ непреста́нно/ с весе́лием Боже́ственную сию́ творя́щим па́мять твою́/ и ве́рою чту́щим тя/ искуше́ний вся́ких спасти́ся, и грехо́в, и обстоя́ний/ я́ко дерзнове́ние, Богому́дре, име́я./ И во отверзе́ние мои́м пода́ждь устна́м тя пе́ти незазо́рно сло́во./ И ника́коже мене́ гнуша́йся, проро́че блаже́нне Дани́иле сла́вне.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Святы́й проро́че Дании́ле, моли́ Бо́га о на́с.
Зако́ном, проро́че, огражде́н,/ не прия́л еси́ оскверни́тися пребеззако́нно,/ но, Боже́ственне умо́м просвеща́емь, вопия́л еси́:/ благослове́н еси́, Го́споди Бо́же, во ве́ки.
Припев: Святы́й проро́че Дании́ле, моли́ Бо́га о на́с.
Вся ужаса́ет твое́ чу́до,/ я́коже проро́ку бо проро́к тебе́ предста́, восхище́н, пи́щу нося́ тебе́ и поя́:/ благослове́н еси́, Го́споди Бо́же, во ве́ки.
Сла́ва Отцу́ и Сы́ну и Свято́му Ду́ху.
Внутрь ро́ва затворе́н и львом на снедь предложе́н,/ спа́слся еси́, Бо́гу, покры́вшу тя, блаже́нне,/ благослове́н еси́, зову́ща, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Струю незави́стно источа́еши врачева́ний, о Де́во Богома́ти!/ Дании́л бо я́сно узре́ Тя го́ру,/ из нея́же Спас возсия́, Бог оте́ц на́ших.
Песнь 8
Ирмос: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.
Припев: Святы́й проро́че Дании́ле, моли́ Бо́га о на́с.
Священноявле́н показа́лся еси́, о проро́че!/ и де́ятельным виде́нием со Безтеле́сными пел еси́:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Тя, всеблаже́нне, благохва́лим вси/ и, в честно́е торжество́ твое́ ра́дующеся, взыва́ем:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Пречу́дную Отрокови́цу Богоглаго́ливый/ образова́тельными о́бразы усмотри́в, взыва́л еси́:/ благослови́те, вся дела́ Госпо́дня, Го́спода.
Песнь 9
Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Святы́й проро́че Дании́ле, моли́ Бо́га о на́с.
Пожа́л еси́ твои́х боле́зней припло́дия,/ на Небесе́х со проро́ки лику́я при́сно,/ окре́ст высоча́йшаго престо́ла Вседержи́телева.
Сла́ва Отцу́ и Сы́ну и Свято́му Ду́ху.
Све́том трисо́лнечным ны́не венцено́сец жела́ний кра́йнейшему предстои́ши,/ с Безтеле́сными ли́ки веселя́ся.
И ны́не и при́сно и во ве́ки веко́в. Ами́нь.
Богородичен: Кра́сна сла́ва твоя́, ея́же ны́не наслажда́ешися:/ Всепе́тую бо Отрокови́цу, проро́че честны́й,/ о́бразы возвеща́ти всем сподо́бился еси́.
Светилен
И́же во проро́цех велича́йший Дании́л ны́не да почти́тся,/ Христа́ бо Бо́га на́шего ви́де,/ ка́мень отсе́чен кроме́ рук от горы́ –/ Чи́стыя Богоро́дицы./ С ним да восхва́лятся и трие́ о́троцы,/ я́же спасе́ от пе́щнаго огня́ неврежде́ны/ о́браз Де́вы Боже́ственный и неизрече́нный,/ и́мже ми́р спасе́ся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Тайнонауча́ет, Всечи́стая, Ду́хом Боже́ственным Дании́л прему́дрейший,/ и пропису́ют ве́рою Авраа́мстии трие́ о́троцы Твое́ безсе́менное Рождество́:/ Сый бо Божество́м неопи́санное Сло́во/ из Тебе́ пло́тию хотя́ опису́ется, Богоро́дице,/ в Вифлее́ме ражда́емь на спасе́ние челове́ков.