Минея, 12 Сентября, Кано́н пра́веднаго
Глас 3
Песнь 1
Ирмос: Во́ды дре́вле ма́нием Боже́ственным/ во еди́но со́нмище Совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,// Тому́ Еди́ному пои́м, я́ко просла́вися.
Припев: Святы́й пра́ведный Симео́не, моли́ Бо́га о на́с.
Омраче́нный грехми́, недоуме́ю, ка́ко по достоя́нию восхвали́ти тя, свя́те Симео́не,/ сия́юща по благода́ти Христо́вой по́двиг и чуде́с твои́х светлостьми́./ Ты ми, благосе́рде, помози́, возсиява́я в души́ мое́й свет, и́мже осиява́ешися,/ я́ко да поне́ ели́ко воспою́ в похвале́ние твое́ я́вльшаяся на тебе́ чу́дная дела́ Госпо́дня,/ воззыва́юща всех, пра́зднующих па́мять твою́, пе́ти Влады́це Христу́:/ Сей Бог наш, ди́вный и сла́вимый во святы́х Свои́х,/ препросла́влен есть, Тому́ Еди́ному пои́м, я́ко просла́вися.
Припев: Святы́й пра́ведный Симео́не, моли́ Бо́га о на́с.
Благоче́стия любо́вию и спасе́ния объя́т быв, избега́яй того́ ра́ди треволне́ний жите́йских,/ удали́лся еси́, блаже́нне Симео́не, от ро́да твоего́/ и ма́нием Боже́ственным изведе́н был еси́ в малонаселе́нную иногда́ страну́ Сиби́рскую,/ иде́же пресе́льник быв земли́ оте́ческия, подо́бник яви́лся еси́ пра́отцу Авраа́му,/ и стяжа́в нрав его́, в хи́жинах у́бо убо́гих вита́яй,/ я́коже он в ку́щах./ Ду́шу же впери́в к Небеси́, в го́рний Сио́н доброде́телей стезе́ю ходи́л еси́, веду́щею на Не́бо,/ всю жизнь твою́, во сла́ву Христа́, Спа́са всех, ти споспе́шествующа./ Ему́же вся сия́ науча́ют нас ра́достно днесь зва́ти:/ Сей Бог наш препросла́влен есть, Тому́ Еди́ному пои́м, я́ко просла́вися.
Припев: Святы́й пра́ведный Симео́не, моли́ Бо́га о на́с.
По рожде́нию твоему́, блаже́нне, быв о́трасль благонарочи́тых люде́й и сла́вных в наро́де свое́м,/ егда́ ма́нием Боже́ственным Сиби́ри доше́л еси́,/ а́бие отгна́л еси́ от себе́ самомне́ния пре́лесть,/ и смире́нию подклони́л еси́ вы́ю, себе́ вменя́яй после́днейша от всех,/ та́же труды́ мно́гими те́ло твое́ удручи́л еси́, и укроти́л свире́пое страсте́й мо́ре воздержа́нием,/ и та́ко возше́л еси́ на высоту́ доброде́телей, укрепля́ющу тя Христу́, прославля́емому твои́ми благи́ми де́лы./ Ему́же велегла́сно того́ ра́ди вопие́м: Сей Бог наш препросла́влен есть,/ Тому́ Еди́ному пои́м, я́ко просла́вися.
Припев: Святы́й пра́ведный Симео́не, моли́ Бо́га о на́с.
В нищете́ пожи́л еси́ в Сиби́рстей стране́, блаже́нне Симео́не,/ и, я́ко от ко́рене благопло́дна плод благоцвету́щ, доброде́тельми обогати́лся еси́./ Те́мже вельми́ украси́вша тя боже́ственными добро́тами, толи́ко нам вожделе́нными,/ и си́ми просла́вленна Влады́ку Христа́ пе́сньми славосло́вим, зову́ще:/ Сей Бог наш препросла́влен есть, Тому́ Еди́ному пои́м, я́ко просла́вися.
Сла́ва Отцу́ и Сы́ну и Свято́му Ду́ху.
Столп доброде́телей непрело́жен и благоче́стия жили́ще был еси́, блаже́нне,/ име́яй основа́ние у́бо тве́рдое, Правосла́вную ве́ру,/ посо́бие же непобеди́мо, соде́йствующую ти си́лу Христо́ву./ И ны́не, име́яй дерзнове́ние ко Христу́, Спаса́телю всех,/ моли́ Его́ дарова́ти к прославле́нию и́мени Его́/ всем нам утвержде́ние си́лою Его́ в сей толи́ко спаса́тельней ве́ре,/ я́ко да вси еди́ными усты́ согла́сно зове́м Ему́:/ Сей Бог наш препросла́влен есть, Тому́ Еди́ному пои́м, я́ко просла́вися.
И ны́не и при́сно и во ве́ки веко́в. Ами́нь.
Богородичен: Преблагослове́нна еси́, Богоро́дице Де́во, я́ко родила́ еси́ Христа́, Спа́са на́шего,/ Его́же славосло́вим, я́ко Единоро́днаго от Отца́,/ испо́лнь благода́ти и и́стины, и Ему́же вы́ну взыва́ем:/ Сей Бог наш препросла́влен есть, Тому́ Еди́ному пои́м, я́ко просла́вися.
Песнь 3
Ирмос: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,/ несть свят и несть пра́веден// па́че Тебе́, Го́споди.
Припев: Святы́й пра́ведный Симео́не, моли́ Бо́га о на́с.
Правосла́вною ве́рою утверди́вся, блаже́нне Симео́не,/ стяжа́л еси́ благосла́вный плод ея́, обогати́вый тя доброде́тельми,/ оба́че николи́же велему́дрствовал еси́ о себе́/ и не дал еси́ человекоуби́йце искони́ обуя́ти тя тщесла́вием./ Но вы́ну води́лся еси́ смиренному́дрием, я́ко ви́дети тя при́сно всем/ а́ки бы усво́ивша себе́ песнь еди́наго от богому́дрых:/ утверди́хся Тобо́ю, Бо́же, несть свят и несть пра́веден па́че Тебе́, Го́споди.
Припев: Святы́й пра́ведный Симео́не, моли́ Бо́га о на́с.
С нището́ю теле́сною соедини́в нищету́ духо́вную, я́ко ко́рень всех благи́х,/ молчали́во и благоче́стно твою́ жизнь соверши́л еси́, блаже́нне Симео́не,/ и яви́л еси́ в себе́ плод благосла́вный Правосла́вныя ве́ры,/ предукрепи́в пе́рвее те́ло твое́ посто́м неосла́бным,/ та́же ду́шу твою́ храм Бо́жий пресвя́т соде́лав, боже́ственным хра́мом приседя́,/ внегда́ пе́тися та́мо свяще́нным песнопе́нием, всем иму́щим еди́н сей ра́зум:/ несть свят и несть пра́веден па́че Тебе́, Го́споди.
Припев: Святы́й пра́ведный Симео́не, моли́ Бо́га о на́с.
Сугу́бо благоро́ден был еси́, блаже́нне Симео́не, и ро́дом, и нра́вы:/ души́ бо твоей благоро́дие благоро́дия свы́ше добро́тами уясни́л еси́,/ Правосла́вия све́том блиста́я, и по́стничеством, и целому́дрием, и смире́нием, и терпе́нием, и му́жеством на го́рдаго зми́я,/ его́же си́ми низложи́л еси́, соде́йствующу ти Христу́,/ и та́ко дости́гл еси́ блаже́нных селе́ний святы́х,/ и́хже во усте́х коего́ждо вы́ну бысть песнь Це́ркве:/ утверди́хся Тобо́ю, Бо́же,/ несть свят и несть пра́веден па́че Тебе́, Го́споди.
Сла́ва Отцу́ и Сы́ну и Свято́му Ду́ху.
Дре́во благосенноли́ственное, насажде́нное при исхо́дищих вод,/ е́же дае́т плоды́ во вре́мя свое́, был еси́, блаже́нне Симео́не./ Ты бо, измла́да напое́н быв вода́ми благоче́стия,/ израсти́л еси́ доброде́телей плоды́, благоприя́тны Бо́гу,/ дарова́вшему ти за та́я живо́т ве́чный,/ его́же и нас сподо́би моли́твами твои́ми ко Го́споду,/ я́ко да и в гряду́щем ве́це, я́коже днесь, воспева́ем Ему́:/ несть свят и несть пра́веден па́че Тебе́, Го́споди.
И ны́не и при́сно и во ве́ки веко́в. Ами́нь.
Богородичен: Те́рние и волчцы́ грехо́в непло́дны содева́ют ду́ши на́ша,/ милосе́рдая Ма́ти Христа́ Бо́га на́шего,/ моли́ с пра́ведным Симео́ном Сы́на Твоего́ сотвори́ти ни́ву душ на́ших,/ во е́же приноси́ти ей плод благосла́вный и́стинныя ве́ры,/ несумне́нныя наде́жды и нелицеме́рныя любве́,/ я́ко да вы́ну воспева́ем Ро́ждшемуся от Тебе́:/ утверди́хомся Тобо́ю, Бо́же,/ несть свят и несть пра́веден па́че Тебе́, Го́споди.
Седален, глас 4
Храм Бо́гу хотя́ яви́ти се́рдце твое́, блаже́нне Симео́не,/ изво́лил еси́ неле́ностно присеща́ти хра́мы Госпо́дни в часы́ песнопе́ний./ Отону́дуже и прия́л еси́ свет благода́ти Свята́го Ду́ха/ и яви́лся еси́ звезда́ многосве́тлая, све́тлаго ра́ди жития́ твоего́/ и чистоты́ душе́вныя же и теле́сныя, озаря́яй ве́рных собра́ния./ Те́мже пра́зднующе па́мять твою́, ра́достно восхваля́ем тя, блаже́нне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Храм Све́та Неизрече́ннаго была́ еси́, Всепе́тая Де́во,/ вме́щши во чре́ве Твое́м просвеща́юща и освеща́юща ми́ра концы́ Христа́ Бо́га на́шего./ И ны́не моли́твами Твои́ми с пра́ведным Симео́ном соде́лай прича́стники Того́ Све́та и нас,/ Богоро́дицу Тя вои́стину имену́ющих.
Песнь 4
Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.
Припев: Святы́й пра́ведный Симео́не, моли́ Бо́га о на́с.
Непосты́дно бысть твое́, блаже́нне, на си́лу и по́мощь Человеколю́бца Го́спода,/ преда́вша Сы́на Своего́ за ны на смерть, упова́ние,/ и́мже укре́пль ду́шу твою́, не ужа́слся еси́ вступи́ти в по́прище по́двиг твои́х./ Го́сподем бо помогаемь, пе́рвее удержа́л еси́ в посте́ чре́во твое́,/ та́же воздержа́ния росо́ю до́бльственне страсте́й пещь погаси́л еси́/ и, та́ко мра́ка их изба́влься, просия́л еси́ безстра́стия све́тлостию,/ се́ю же показа́л еси́ нам путь, веду́щий в жизнь и́стинную./ Те́мже, восхваля́юще тя, Го́споду, дарова́вшу ти си́лу и кре́пость, пое́м:/ сла́ва си́ле Твое́й, Го́споди.
Припев: Святы́й пра́ведный Симео́не, моли́ Бо́га о на́с.
Насажде́н быв при вода́х воздержа́ния, блаже́нне,/ лоза́ яви́лся еси́ благора́сленна, благоче́стия гро́здие предлага́ющая./ К сим же показа́лся еси́ всем и о́браз трудолю́бия,/ подо́бяся бо скинотво́рцу апо́столу,/ рука́ми свои́ми приобрета́вшему себе́ и су́щим с ним вся потре́бная к жи́зни вре́менней,/ упраждня́лся еси́ в шве́нии оде́жд други́м и в ловле́нии рыб на потре́бу к жи́зни,/ я́ко да не отяготи́ши коего́ ли́бо пропита́нием тебе́./ Те́мже укре́пльшу тя о сем Христу́ Бо́гу пое́м:/сла́ва си́ле Твое́й, Го́споди.
Припев: Святы́й пра́ведный Симео́не, моли́ Бо́га о на́с.
Тружда́яся в шве́нии оде́жд, блаже́нне, к смотре́нию мы́сленных твое́ худо́жество упра́вил еси́,/ помышля́я одея́ние души́ твоея́, в не́мже да вни́деши в черто́г Спа́сов./ Та́кожде у́дицею ры́бы ловя́й, вы́ну мысль к Бо́гу име́л еси́, блюды́й себе́,/ я́ко да не у́дицею греха́ уловле́н бу́деши от вселука́ваго врага́ спасе́ния на́шего./ И та́ко непрело́жен име́яй по́мысл благоче́стия,/ устро́ил еси́ жизнь твою́ по Бо́зе, Христу́ ти споспе́шествующу,/ Ему́же, све́дуще сия́, велегла́сно пое́м:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Тезоиме́нно услы́шанию, и́мже преднаре́клся еси́ в креще́нии, блаже́нне,/ поуча́яся свято́му послуша́нию, са́мым де́лом исполни́тель о́наго был еси́,/ нрав сообра́зный и́мени твоему́ стяжа́в./ Гото́в бо был еси́ всегда́ послужи́ти всем, тре́бовавшим твоея́, благосе́рде, по́мощи в житии́ твое́м,/ и служи́л еси́, ели́ко ти мо́щно бысть, со усе́рдием, уве́тлив ко всем весь явля́яся, и че́стен, и послушли́в./ Разуме́юще у́бо, я́ко и сие́ дарова́ние ти даде́ся от Христа́ Бо́га,/ пое́м Ему́:/ сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: И́маши вся мощи́, е́же а́ще хо́щеши, всеблага́я Ма́ти Христа́ Бо́га на́шего,/ употребля́ющи Ма́тернее дерзнове́ние к Нему́./ Те́мже мо́лим Тя, моли́ с пра́ведным Симео́ном Сы́на Твоего́/ дарова́ти нам си́лу и кре́пость ше́ствовати неукло́нно путе́м доброде́телей,/ я́ко да благода́рно вы́ну зове́м Ти:/ сла́ва, Влады́чице, всемо́щней си́ле Твое́й.
Песнь 5
Ирмос: На земли́, Неви́димый, яви́лся еси́/ и челове́ком во́лею сожи́л еси́, Непостижи́мый,/ и к Тебе́ у́тренююще,// воспева́ем Тя, Человеколю́бче.
Припев: Святы́й пра́ведный Симео́не, моли́ Бо́га о на́с.
Име́яй в се́рдцы свое́м о́браз восхи́щена до тре́тияго Небесе́ в рай апо́стола, ре́кша: мы юро́ди Христа́ ра́ди,/ ты, блаже́нне Симео́не, таково́е юро́дство во́лею восприя́л еси́ на ся,/ я́ко бо цветни́к благоуха́ннейший и доброде́телей рай одушевле́н,/ воздержа́нием процве́л еси́./ Оба́че хотя́ утаи́тися от челове́к, юро́д был еси́ ми́ру,/ сам ся неблагоро́ден сотво́рь, скудоу́мия притворе́нии,/ Христу́ же прему́др был еси́,/ соверша́я пресла́вная, безстра́стия дости́гл еси́ и́стиннаго./ Те́мже восхваля́юще тя, пе́сненно прославля́ем/ да́вшаго ти такову́ю му́дрость Христа́ Человеколю́бца.
Припев: Святы́й пра́ведный Симео́не, моли́ Бо́га о на́с.
Уму́ стра́сти твоя́ подчини́в, блаже́нне, духо́вную му́дрость стяжа́л еси́/ и, се́ю управля́емь, нищету́ возлюби́л еси́, и воздержа́ние, и чистоту́, и смиренному́дрие./ И та́ко, си́ле Христо́вой ти соде́йствующей, на высоту́ доброде́телей восте́кл еси́,/ и́миже зря тя Христо́с обогати́вшася, человеколю́бне призре́ на тя/ и сла́вы Ца́рства Небе́снаго показа́ тя прича́стника пресла́вна,/ Его́же моли́ и нас сподо́бити о́бщники бы́ти той,/ я́ко да во ве́ки воспева́ем Его́, Человеколю́бца.
Припев: Святы́й пра́ведный Симео́не, моли́ Бо́га о на́с.
Юро́дствуяй Христа́ ра́ди, блаже́нне,/ и та́ко би́сер многоце́нный доброде́телей в селе́ се́рдца твоего́ сокрове́нный име́вый,/ я́ко безпло́тен, на земли́ пожи́л еси́ и соде́лался еси́ уго́дник Христу́,/ Иже тя, в возме́здие того́, просла́ви нетле́нием и чудесы́ и поста́ви моли́твенника о лю́дех Свои́х./ Сего́ ра́ди, ублажа́юще тя, велича́ем просла́вльшаго тя, Го́спода Человеколю́бца.
Сла́ва Отцу́ и Сы́ну и Свято́му Ду́ху.
Ве́лию сотвори́л есть Госпо́дь ми́лость Свою́ с на́ми,/ дарова́в нам тебе́, блаже́нне, исто́чника чуде́с и моли́твенника о нас./ Те́мже ублажа́юще тя днесь в па́мяти твое́й,/ сла́вим Да́вшаго ти и нам такову́ю благода́ть, вопию́ще:/ к Тебе́ у́тренююще, Го́споди, воспева́ем Тя, Человеколю́бче.
И ны́не и при́сно и во ве́ки веко́в. Ами́нь.
Богородичен: Арха́нгельский глас вопие́м Ти, Чи́стая Присноде́во:/ ра́дуйся, Благода́тная,/ я́ко родила́ еси́ Спаси́теля ми́ру, Христа́ Человеколю́бца.
Песнь 6
Ирмос: Глубина́ страсте́й воста́ на мя/ и бу́ря проти́вных ве́тров,/ но, предвари́в мя, Ты спаси́, Спа́се,/ и изба́ви от тли,// я́ко спасл еси́ от зве́ря проро́ка.
Припев: Святы́й пра́ведный Симео́не, моли́ Бо́га о на́с.
Воздержа́ния ветри́лом управля́емь в житии́ твое́м, блаже́нне,/ дости́гл еси́ в безстра́стия сла́вная приста́нища/ и та́ко спа́слся еси́ от тли душепа́губных страсте́й./ Госпо́дь же по преставле́нии твое́м изба́ви и те́ло твое́ от тли/ и яви́ е нетле́нно, а́ще и мно́га ле́та пребы́сть в не́дрех земны́х./ И ны́не моли́, благосе́рде, Го́спода,/ я́ко да спасе́т и нас от вся́кия тли,/ я́коже спасл есть тебе́ от тли и от зве́ря проро́ка.
Припев: Святы́й пра́ведный Симео́не, моли́ Бо́га о на́с.
Враг спасе́ния, искуша́яй нас на грехи́, сластьми́ пали́т,/ но коль сия́ па́губна суть, су́щи тля сме́ртная,/ тлят бо добро́ту души́ на́шея, тлят и здра́вие те́ла/ и к сим гото́вят нам огнь неугаса́ющий и червь неумира́ющий./ Блаже́нне Симео́не, предстоя́ с ли́ки А́нгелов и святы́х Бо́жиих челове́ков Престо́лу Влады́ки,/ моли́ Его́ с ни́ми, я́ко да изба́вит от губи́тельства сласте́й и спасе́т нас, вопию́щих Ему́:/ спаси́, Спа́се, и изба́ви от тли, я́ко спасл еси́ от зверя проро́ка.
Припев: Святы́й пра́ведный Симео́не, моли́ Бо́га о на́с.
Мно́го согреша́юще на вся́кий час и грехми́ при́сно растлева́емии, та́ко сля́чени есмы́,/ я́ко не мощи́ нам восклони́ти главы́ и воззре́ти когда́ к Небе́сней добро́те,/ и бу́рею проти́вных ве́тров та́ко уноси́ми дале́че от пути́ доброде́телей и от стези́ покая́ния,/ я́ко колеба́тися в нас упова́нию спасе́ния./ Ты же, блаже́нне, предстоя́ ны́не Всесвято́му, к Нему́же и бога́тное стяжа́л еси́ дерзнове́ние,/ моли́ изба́вити ны от тли грехо́вныя и бу́рю тех проти́вных ве́тров утоли́ти, вопию́щия:/ спаси́, Спа́се, и изба́ви от тли, я́ко спасл еси́ от зве́ря проро́ка.
Сла́ва Отцу́ и Сы́ну и Свято́му Ду́ху.
Блаже́н еси́, свя́те Симео́не, и добро́ тебе́ есть,/ поне́же Госпо́дь, зря тя пра́ведна, вчини́ с ли́ки святы́х во оби́телех Небе́сных,/ изба́вль та́ко гее́нны, су́щия тли ве́чныя./ Ея́же изба́витися и нам моли́ Христа́ Бо́га, пою́щим Ему́:/ спаси́, Спа́се, и изба́ви от тли, я́ко спасл еси́ от зве́ря проро́ка.
И ны́не и при́сно и во ве́ки веко́в. Ами́нь.
Богородичен: Пречи́стая Влады́чице, Цари́це Небе́сная,/ стра́хом тли ве́чныя сме́рти содержи́мии, мо́лим Ти ся,/ моли́ с пра́ведным Симео́ном Сы́на Твоего́, Христа́ Бо́га на́шего,/ я́ко да изба́вит нас тоя́, вопию́щих:/ спаси́, Спа́се, и изба́ви от тли, я́ко спасл еси́ от зве́ря проро́ка.
Кондак, глас 2
Ми́ра су́етнаго отве́рглся еси́,/ да бла́га ве́чныя жи́зни насле́диши,/ возлюби́в незло́бие и чистоту́ души́ и те́ла./ Сниска́л еси́, е́же возлюби́л,/ свиде́тельствуют бо о сем гроб и нетле́ние моще́й твои́х/ и благода́ть чудотворе́ния наипа́че./ То́чиши бо цельбы́ всем притека́ющим к тебе́ и непросвеще́нным,/ Симео́не блаже́нне,/ чудотво́рче преди́вный.
Икос
Многоцеле́бнаго сокро́вища, чудотво́рных моще́й твои́х,/ не́дра подзе́мная не сокры́та, пра́ведный Симео́не,/ но в обогаще́ние изда́ша та́я притека́ющим ве́рным и неве́рным./ Те́мже прииди́те вси и приими́те бога́тый ток цельбы́,/ ще́драго бо Влады́ки раб ще́дрит и дае́т и есть в подая́нии неоску́ден./ Восхваля́юще у́бо в пе́снех сицева́го засту́пника и благоде́теля на́шего, да зове́м ему́:/ ра́дуйся, Сиби́рстей стране́ похвало́ и утвержде́ние гра́ду на́шему.
Песнь 7
Ирмос: Якоже дре́вле благочести́выя три о́троки/ ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.
Припев: Святы́й пра́ведный Симео́не, моли́ Бо́га о на́с.
Благоче́стие трие́х о́трок вавило́нских привлече́ к ним све́тлый Божества́ огнь,/ су́щую благода́ть Бо́жию, сохра́ньшую их в пла́мени халде́йстем невреди́мы./ То́ежде благоче́стие привлече́ и к твоему́, блаже́нне, те́лу благода́ть,/ сохра́ньшую е невреди́мо от тли в не́дрех земны́х./ И ны́не пребыва́яй с на́ми, Симео́не, я́ко прича́стник Боже́ственнаго огня́,/ возжзи́ в нас огнь ре́вности по благоче́стию,/ я́ко да и мы, сим сохра́ньшеся пла́мене страсте́й,/ восприи́мем песнь о́нех отроко́в, е́же взыва́ти Христу́ вы́ну:/ благослове́н еси́, Бо́же оте́ц на́ших.
Припев: Святы́й пра́ведный Симео́не, моли́ Бо́га о на́с.
Чу́дно бысть халде́ем виде́ние трие́х отроко́в, неопали́вшихся пла́менем огня́./ Та́кожде удиви́шася христоимени́тии лю́дие и умили́шася се́рдцем,/ ви́девше твой гроб, блаже́нне, восходя́щ от земли́./ Егда́ же узре́ша в нем нетле́нныя мо́щи твоя́/ и точа́ща чудесы́ пресла́вны Боже́ственною си́лою, в них обита́ющею,/ и па́че почуди́шася, и, стра́хом и ра́достию объя́ти бы́вше,/ со умиле́нием славосло́вяху Го́спода,/ ди́вная творя́щаго во святы́х Свои́х./ Те́мже и мы, торжеству́юще днесь па́мять твою́, свя́те,/ гла́сом трие́х о́нех отроко́в благода́рственно взыва́ем Христу́, Спа́су всех:/ благослове́н еси́, Бо́же оте́ц на́ших.
Припев: Святы́й пра́ведный Симео́не, моли́ Бо́га о на́с.
Вои́стину ве́лие, я́коже то трие́х отроко́в в Вавило́не, та́кожде и твое́, блаже́нне, бысть о́но чу́до,/ я́ко честны́я мо́щи твоя́ по толи́цех ле́тех обрето́шася це́лы и неразруши́мы,/ сохраня́емы в земли́ Боже́ственною благода́тию/ и изда́вшеся си́лою ея́ от недр земны́х, я́ко свети́льник,/ его́же Госпо́дь поста́ви не под спу́дом, но на све́щнице, да све́тит всем сия́нием чуде́с,/ озари́ша и обогати́ша правосла́вных разуме́нием боже́ственным./ Уцелому́дритеся ны́не, вопию́щии, и возлюби́те па́че всех Го́спода,/ да благода́ть обря́щете ве́чную, еще́ же и подаю́щу всем исцеле́ние, притека́ющим к тебе́./ Тебе́ же и мы покланя́ющеся, ра́достно пое́м песнь трие́х о́нех отроко́в/ Христу́, сподо́бившу нас таковы́я благода́ти:/ благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Яко фи́никс, процвете́ те́ло твое́ нетле́нием, блаже́нне,/ и, я́ко кедр, и́же в Лива́не, умно́жися чудесы́, принося́ще боже́ственную жизнь./ Сего́ ра́ди Сиби́рская страна́, иму́щи тя моли́твенника,/ я́ко боже́ственный зри́тся рай, цве́ты разли́чныя принося́ще чуде́с./ Имиже, я́ко дре́вле вавило́няне чу́дом трие́х отроко́в вразумля́еми бы́ша в и́стинней сих ве́ре,/ та́ко лю́дие спаса́емии при́сно утвержда́ются в и́стинней ве́ре Бо́жией,/ вводя́щей в живо́т ве́чный, его́же да́рует Госпо́дь Свои́м уго́дником,/ благослове́н сый Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Зри́ши, Пресвята́я Де́во, я́ко в пла́мени грехо́внем исчеза́ют дни́е на́ша./ Моли́твами Твои́ми с пра́ведным Симео́ном сотвори́,/ я́ко да не погуби́т сий пла́мень нас до конца́,/ но росо́ю све́тлаго Боже́ственнаго огня́ утуше́н бу́дет./ И мы та́ко, невреди́ми от пла́мене его́ яви́вшеся,/ Пода́телю того́ огня́, Сы́ну Твоему́, вы́ну взыва́ем:/ благослове́н еси́, Бо́же оте́ц на́ших.
Песнь 8
Ирмос: Нестерпи́мому огню́ соедини́вшеся,/ богоче́стия предстоя́ще ю́ноши,/ пла́менем же неврежде́ни,/ боже́ственную песнь поя́ху:/ благослови́те, вся дела́ Госпо́дня, Го́спода// и превозноси́те во вся ве́ки.
Припев: Святы́й пра́ведный Симео́не, моли́ Бо́га о на́с.
Я́коже благочести́вии о́троцы в пещи́ вавило́нстей/ пла́менем иногда́ неврежде́ни бы́ша Боже́ственною си́лою,/ та́ко сподо́бившимся по́мощи твоей, блаже́нне,/ спасе́ни бы́ша от многоразли́чных зол, я́ко пла́менем огня́ их обдержа́щих./ Те́мже обновля́ющаяся в душа́х ве́рных чудеса́ твоя́ днесь в па́мяти твое́й,/ я́коже чу́до в пещи́ вавило́нстей ю́ноши о́ны, пе́ти всех науча́ют:/ благослови́те, вся дела́ Госпо́дня, Го́спода и превозноси́те во вся ве́ки.
Припев: Святы́й пра́ведный Симео́не, моли́ Бо́га о на́с.
Богото́чный исто́чник, ороша́ющ стра́ждущих в пла́мени нестерпи́мых зол, Госпо́дь яви́ тя, блаже́нне,/ я́ко вои́стину сокро́вище дарова́ний,/ мы же моли́твами твои́ми сподобля́емся бы́ти невреди́ми от злых./ От незави́стных бо вод духо́вныя благода́ти/ всем с те́плою ве́рою прибега́ющим к тебе́ подае́ши благопотре́бная ко спасе́нию/ и та́ко твори́ши, я́ко да вси, ра́достно торжеству́юще па́мять твою́, согла́сно вопие́м:/ благослови́те, вся дела́ Госпо́дня, Го́спода и превозноси́те во вся ве́ки.
Припев: Святы́й пра́ведный Симео́не, моли́ Бо́га о на́с.
Чуде́с твои́х, блаже́нне, ре́ки излия́вшеся исцеле́ний,/ бе́здну тя яви́ша, точа́щу благода́ть Го́спода./ Ини́и бо стражда́ нестерпи́мою бо́лию во о́чию свое́ю,/ пе́рстию то́кмо от гро́ба твоего́ обложи́вше я и о сем укрепи́вшеся, прозре́ша,/ друзи́и же прикоснове́нием то́кмо к моще́м твои́м облегче́ние в боле́зни получи́ша;/ пре́жде су́щии неми́и глаго́лание прия́ша, печа́льнии кре́пкое утеше́ние,/ хроми́и благотече́ние, разсла́бленнии исправле́ние, боля́щии нога́ма здра́вие;/ та́кожде мно́ги утро́бы непло́дны соде́лашася многоча́дны,/ пию́ще то́кмо во́ду от ме́ста явле́ния твои́х моще́й,/ мно́зи же еле́ем от канди́ла твоего́ исцели́шася от неисце́льных боле́зней./ И всем вся́ко пролива́вши ту́чи врачева́ний, уставля́я пале́ние неду́гов,/ и лю́ди, сих свобо́ждшияся, устроя́еши песнопе́ти:/ благослови́те, вся дела́ Госпо́дня, Го́спода и превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Вельми́ тя просла́ви Госпо́дь, блаже́нне, в чудесе́х,/ от любве́ бо и ве́ры свято́е то́кмо и́мя твое́ призывающим/ а́бие услы́шани быва́ют, я́коже плене́ннии иногда́ пога́ными,/ и стра́ждущии от дух нечи́стых, и ини́и мно́зи боля́щии,/ и николи́же ску́дни по́мощи твоея́ оставля́ются./ И не то́чию тща́щимся и́мя твое́ нарица́ти, но и о́браз твой любо́вию, я́же к тебе́, напису́ющим, вели́к помо́щник явля́ешися./ К сим же и неве́дущим тя боля́щим,/ я́ко во мно́ги стра́ны и ве́си произы́де и слы́шана бысть сла́ва и́мене твоего́,/ в со́ниих явля́лся, врачу́юще я./ Те́мже па́мять твою́ пра́зднующе,/ в прославле́ние Го́спода, просла́вльшаго та́ко тя, велегла́сно взыва́ем:/ благослови́те, вся дела́ Госпо́дня, Го́спода и превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Образы нося́щи дре́вле Твоего́ Рождества́,/ ю́ноши не опаля́ет, Де́во, пещь,/ я́коже не опали́ утро́бу Твою́ Огнь Боже́ственный./ Вся бо твори́т Иису́с, Сын Твой, Бог и Челове́к,/ Его́же превозно́сим во вся ве́ки.
Песнь 9
Ирмос: Благослове́н Госпо́дь Бог Изра́илев,/ воздви́гнувый рог спасе́ния нам/ в дому́ Дави́да, о́трока Своего́,/ милосе́рдия ра́ди ми́лости,/ в ни́хже посети́ нас Восто́к с высоты́,// и напра́вил ны есть на путь ми́ра.
Припев: Святы́й пра́ведный Симео́не, моли́ Бо́га о на́с.
Благослове́н Госпо́дь Бог, яви́вый тя, блаже́нне,/ споспе́шника всем ко спасе́нию житие́м твои́м и наста́вника сло́вом./ Ле́ствица бо небовосхо́дная житие́ твое́ бысть, сло́во же твое́ благода́тию срастворе́но есть,/ науча́юще трезве́нию души́ и те́ла и воздержа́нию по благоче́стию и та́ко направля́юще всех на путь ми́ра.
Припев: Святы́й пра́ведный Симео́не, моли́ Бо́га о на́с.
Благослове́н Госпо́дь Бог, дарова́вый нам тебе́, блаже́нне, чудотво́рца преди́вна,/ ку́пно же и сте́ну, и предгра́дие от языкозло́бия и озлобле́ния заблу́ждших от и́стинныя ве́ры./ Ихже чудесы́ от моще́й твои́х/ дале́че отгна́л еси́ от о́бласти Верхоту́рския,/ не терпя́ рачи́телей ересе́й и хуле́ния испо́лненных на Правосла́вие/ бы́ти та́мо, иде́же яви́шася мо́щи твоя́:/ чу́дная бо зна́мения от сих, я́ко огнь паля́щ, яви́шася в посрамле́ние еретико́м,/ нам же всем во утвержде́ние на путь ми́ра.
Припев: Святы́й пра́ведный Симео́не, моли́ Бо́га о на́с.
Благослове́н Госпо́дь Бог, поста́вивый тя, блаже́нне,/ хода́тая на Небеси́ и моли́твенника о нас./ Аще бо и земля́ сокры́ла тя, но горе́ тя вси бога́тна и́мамы/ предста́теля и моли́твенника к Бо́гу, любо́вию чту́щим тя,/ я́коже иногда́ моли́твами твои́ми спасл еси́ ины́я от потопле́ния, ины́я от о́гненнаго запале́ния,/ призыва́ющия свято́е и́мя твое́ и моля́щияся тебе́ о по́мощи,/ и ины́я от неизбе́жныя сме́рти в боле́зни их/ и та́ко всех напра́вил еси́ на путь ми́ра.
Сла́ва Отцу́ и Сы́ну и Свято́му Ду́ху.
Благослове́н Госпо́дь Бог, сподо́бивый прославле́ние твое́, блаже́нне, светоза́рное/ и чудеса́ пресла́вная воспе́ти, ели́ко мо́щно есть нам./ Ты же, благосе́рде, не отста́ви по́мощи твоея́ от нас,/ со умиле́нием про́сим тя,/ и не помяни́ беззако́ний на́ших, но обрати́ся на ми́лость,/ и моли́ ми́лостиваго Бо́га дарова́ти мир ми́рови,/ и всем согреше́ний проще́ние, и душа́м и телесе́м здра́вие/ и напра́вити всех на путь ми́ра.
И ны́не и при́сно и во ве́ки веко́в. Ами́нь.
Богородичен: Благослове́н Госпо́дь Бог, Тобо́ю, Пресвята́я Де́во,/ посети́вый нас Восто́к свы́ше,/ просвети́ти во тьме и се́ни седя́щия/ и напра́вити но́ги на́ша на путь ми́ра.
Светилен
Све́тло возсия́ днесь па́мять твоя́, блаже́нне Симео́не,/ луча́ми мно́го облиста́ющи твои́х доброде́тельных дея́ний/ и озаря́ющи ве́рных ра́зумы све́том чуде́с твои́х./ Сию́ у́бо пра́зднующе, ра́достно сла́вим тя/ и любо́вию ублажа́ем, уго́дниче Христа́, Бо́га на́шего,/ Его́же моли́ изба́вити ны от мра́ка грехо́внаго, и просвети́ти све́том за́поведей,/ разори́ти же и всю мра́чную тьму напа́стей, нас облежа́щих,/ и облиста́ти весе́лием сердца́, и спасти́ ду́ши на́ша.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Све́та немерца́ющаго вмести́лище яви́лася еси́, Пречи́стая Де́во,/ носи́вши Христа́, Бо́га на́шего,/ И́же есть Свет присносу́щный, просвеща́яй вся́каго челове́ка, гряду́щаго в мир./ Те́мже Тя по до́лгу ублажа́ем.