Минея, 23 Августа, Кано́н свята́го Лу́ппа
Глас 4
Песнь 1
Ирмос: Триста́ты кре́пкия,/ Рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/во умерщвле́нии телесе́/ побе́дное воспою́ пе́ние.
Припев: Святы́й му́чениче Лу́ппе, моли́ Бо́га о на́с.
Пою́щу све́тлую и светоно́сную твою́ па́мять, во́ине Христо́в, до́блий страда́льче,/ ду́шу мою́ озари́, сия́ньми невече́рними озаря́емь при́сно/ и Боже́ственному Све́ту предстоя́.
Припев: Святы́й му́чениче Лу́ппе, моли́ Бо́га о на́с.
В му́ченическия вшед му́жески по́двиги,/ испове́дал еси́ Бо́га, я́вльшася на земли́ и естество́ обожи́вша, прему́дре, челове́ческое,/ и бо́ги потре́би́л еси́ е́́ллинския си́лою духо́вною.
Сла́ва Отцу́ и Сы́ну и Свято́му Ду́ху.
Вод живо́тных испо́лнив се́рдце, я́коже Боже́ственная река,/ струи́, прему́дре, пре́лести изсуши́л еси́,/ ве́рою же мы́сли челове́ков напои́л еси́, прозяба́ющия плод Небе́сный.
И ны́не и при́сно и во ве́ки веко́в. Ами́нь.
Богородичен: Я́ко у́тро благоле́пно, от боку́ возсия́ла еси́ Иису́са,/ просвеще́ние всех и Бо́га, Неискусобра́чная Влады́чице,/ нощь многобо́жия потре́бльша и сия́нии невече́рними мир просвеща́юща.
Песнь 3
Ирмос: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.
Припев: Святы́й му́чениче Лу́ппе, моли́ Бо́га о на́с.
Утверди́вся Ду́ха непобеди́мою си́лою,/ к по́двигом, му́чениче, возше́л еси́ му́жески/ и пре́лести шата́ние упраздни́л еси́, Лу́ппе всеблаже́нне.
Припев: Святы́й му́чениче Лу́ппе, моли́ Бо́га о на́с.
Разуме́в тя свиде́теля Христо́вых страда́ний, свире́пый гони́тель/ ласка́нии твой по́мысл прельсти́ти наде́яшеся:/ солга́ся же оба́че вселука́вый.
Сла́ва Отцу́ и Сы́ну и Свято́му Ду́ху.
Я́коже цевни́ца, Ду́хом вседе́тельным ударя́ема,/ возглаша́л еси́ пред мучи́тели ра́достно песнь Боже́ственнаго ра́зума/ и услади́л еси́ ве́рою притека́ющия.
И ны́не и при́сно и во ве́ки веко́в. Ами́нь.
Богородичен: Бог, посреди́ Тебе́ все́лься, я́коже весть,/ де́вства ключа́ не поколеба́, Чи́стая,/ на недви́жимем же ка́мени ве́ры вся утверди́.
Седален, глас 1
Страда́нием просвети́вся, я́ко зла́то в пещи́,/ облиста́л еси́, му́дре, целе́ний зарю́ и тьму отгна́л еси́ де́монов благода́тию./ Те́мже вси святу́ю твою́ па́мять пра́зднуем,/ Богоблаже́нне Лу́ппе, му́чеников похвало́.
Песнь 4
Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.
Припев: Святы́й му́чениче Лу́ппе, моли́ Бо́га о на́с.
Превозше́д челове́ческия не́мощи, блаже́нне, земны́я преде́лы,/ терпе́л еси́ ра́ны, па́лицами бие́мь,/ жезл си́лы нося́ спаси́тельный, пресла́вный Лу́ппе, Крест Бо́га на́шего.
Припев: Святы́й му́чениче Лу́ппе, моли́ Бо́га о на́с.
Наде́явся, я́коже гора́, на Го́спода,/ пребы́л еси́, страстоте́рпче Лу́ппе, Боже́ственною по́мощию непоколеби́м:/ те́мже сокруше́ния удо́в твои́х претерпе́л еси́,/ возвыша́емь к Небеси́ Боже́ственным жела́нием.
Сла́ва Отцу́ и Сы́ну и Свято́му Ду́ху.
Испо́лнен ве́ры сый, и прему́дрости, и благода́ти,/ посреде́ беззако́ннующих Сло́во Бо́жие испове́дал еси́,/ пуща́емых же стрел небре́гл еси́,/ упраждня́емых си́лою Христо́вою прибли́житися тебе́.
И ны́не и при́сно и во ве́ки веко́в. Ами́нь.
Богородичен: На Тебе́, я́коже дождь, Прему́дрости бе́здна Иису́с сни́де,/ еди́ну чи́сту Тя обре́т, Богороди́тельнице Де́во,/ и потопи́ нече́стия пото́ки лю́тыя Боже́ственною благода́тию.
Песнь 5
Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/воспева́ем Тя, Человеколю́бче.
Припев: Святы́й му́чениче Лу́ппе, моли́ Бо́га о на́с.
На у́ды прети́ша ссещи́ тя врази́,/ сами же себе́ па́че, му́дре, Боже́ственными манове́ньми посека́юще,/ невреди́ма и не уя́звена смотря́ху сохраня́ема.
Припев: Святы́й му́чениче Лу́ппе, моли́ Бо́га о на́с.
Утверди́в, сла́вне, о́ко душе́вное на ка́мени неразсе́днем,/ ника́коже волна́ми, му́чениче, поколеба́лся еси́ го́рьких мук,/ Боже́ственною си́лою укрепля́емь.
Сла́ва Отцу́ и Сы́ну и Свято́му Ду́ху.
Кропле́ньми крове́й твои́х запале́ние и́дольское погаси́л еси́, страда́льче,/ и огне́м страда́ний твои́х всю попали́л еси́ лесть,/ Ду́хом Святы́м разжигаемь.
И ны́не и при́сно и во ве́ки веко́в. Ами́нь.
Богородичен: Чи́стую чи́стым умо́м почти́м, добро́ту Иа́ковлю,/ Боже́ственными дея́ньми удобря́еми,/ благоче́стно воспое́м, я́ко Ма́терь Бо́га на́шего.
Песнь 6
Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.
Припев: Святы́й му́чениче Лу́ппе, моли́ Бо́га о на́с.
Терпе́л еси́ плотски́я му́ки кре́пко,/ умуча́я беззако́ннующих мудрова́ния безбо́жная/ и го́рько ураня́я де́монов мно́жества, досточу́дне.
Припев: Святы́й му́чениче Лу́ппе, моли́ Бо́га о на́с.
Стрясл еси́, я́ко прах, бо́ги истни́в безбо́жных,/ тебе́ же сама́го возста́вил еси́ одушевле́н благоче́стия столп/ и му́жества о́браз, Богодохнове́нне.
Сла́ва Отцу́ и Сы́ну и Свято́му Ду́ху.
Ра́довашеся, пита́емь му́ками, сла́вный страстоно́сец,/ прови́дев венцы́ ду́хом и ве́чную бу́дущую му́чеником сла́ву.
И ны́не и при́сно и во ве́ки веко́в. Ами́нь.
Богородичен: Родила́ еси́, Его́же Оте́ц пре́жде век роди́ пребезнача́льно,/ и сосце́ма Пита́теля пита́ла еси́:/ па́че ума́ чу́до, и па́че сло́ва, Чи́стая, та́инство.
Песнь 7
Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.
Припев: Святы́й му́чениче Лу́ппе, моли́ Бо́га о на́с.
Просвеще́н добро́тами добро́творных страда́ний,/ на Кресте́ нас ра́ди Претерпе́вшему стра́сти, сла́вне, ра́дуяся, ны́не предстои́ши,/ озаря́емь Боже́ственными светоли́тии.
Припев: Святы́й му́чениче Лу́ппе, моли́ Бо́га о на́с.
С Небесе́ тебе́ я́ве вода́ излия́ся пресла́вно,/ просвеща́ет и укрепля́ет ду́шу твою́, вопи́ти повелева́ющи:/ препе́тый Го́споди, Бо́же оте́ц на́ших, благослове́н еси́.
Сла́ва Отцу́ и Сы́ну и Свято́му Ду́ху.
Стоя́л еси́ посреде́ враго́в, я́коже столп непревра́тен, непоколеби́м умо́м/ многообра́зных мук, сла́вный страда́льче, козньми́/ разори́л же еси́ лесть велему́дренно.
И ны́не и при́сно и во ве́ки веко́в. Ами́нь.
Богородичен: Тя, добро́ту Иа́ковлю, еди́ну избра́ Еди́ный, Живы́й на Небесе́х,/ и, всели́вся посреде́ Тебе́, Чи́стая,/ ника́коже поколеба́ де́вства Твоего́ ключи́, Благослове́нная.
Песнь 8
Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
Припев: Святы́й му́чениче Лу́ппе, моли́ Бо́га о на́с.
По мно́гих му́ках, блаже́нне, Бо́гу вы́ю преклони́л еси́,/ мече́м во главу́ усека́емь, главы́ же ссека́я, я́ко во у́жасе,/ беззако́нных враг ве́рою.
Припев: Святы́й му́чениче Лу́ппе, моли́ Бо́га о на́с.
Сам себе́ на заколе́ние во́льное, я́ко а́гня, даде́, непоро́чно,/ А́гнцу Бо́жию подо́бяся, взе́млющему грехи́ ми́ра,/ не вопию́щему, ни взыва́ющему.
Сла́ва Отцу́ и Сы́ну и Свято́му Ду́ху.
Неду́гов вся́ких цельба́/ и врачева́ние душ неиждива́емое твоя́ ра́ка бысть,/ от Бо́га бо благода́тию исцеле́ний обогати́ся, Лу́ппе прехва́льне.
И ны́не и при́сно и во ве́ки веко́в. Ами́нь.
Богородичен: Благослови́т вся тварь, Де́во, Рождество́ Твое́,/ благослове́ньми нас венча́вшего, и кля́тву отъе́мшаго:/ Всеблагослове́нная, еди́на Препросла́вленная, род наш облагода́тившая.
Песнь 9
Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.
Припев: Святы́й му́чениче Лу́ппе, моли́ Бо́га о на́с.
Возмо́гл еси́ си́лою Боже́ственною зми́я дре́вняго, пресла́вне, с пло́тию попра́ти/ и побе́дным венча́лся еси́ венце́м,/ те́мже, с му́ченики ра́дуяся, живе́ши на Небесе́х.
Припев: Святы́й му́чениче Лу́ппе, моли́ Бо́га о на́с.
Яви́лся еси́, я́ко многосве́тлая звезда́,/ Со́лнце возвеща́я седя́щим, му́чениче, во тьме поги́бели,/ И́мже озари́вшеся, яви́шася дне прича́стницы ве́рою невече́рняго, достосла́вне.
Припев: Святы́й му́чениче Лу́ппе, моли́ Бо́га о на́с.
Днесь па́мять твоя́ нам проси́я, со́лнца светле́йши,/ всю зе́млю просвеща́ющи, о́блаки душ отгоня́щи/ и мрак страсте́й отъе́млющи, ю́же моле́бно пра́зднуем.
Сла́ва Отцу́ и Сы́ну и Свято́му Ду́ху.
Вы́шний Сио́н, избра́нных град, твой дух но́сит, ра́дуяся,/ перворо́дных Це́рковь уясня́ется, ве́рнии же, почита́ем тя,/ прося́ще спасти́ся моли́твами твои́ми, Лу́ппе Богому́дре всеблаже́нне.
И ны́не и при́сно и во ве́ки веко́в. Ами́нь.
Богородичен: Све́та, и́же в Тебе́, луча́ми, Богоневе́сто, ду́шу мою́ просвети́,/ лежа́щую в ро́ве поги́бели возста́ви,/ враги́ низлага́ющи, оскорбля́ющия при́сно се́рдце мое́/ и к страсте́м порева́ющия мя.