Минея, 18 Мая, Кано́н му́ченика Феодота и семи святы́х дев
Глас 4
Песнь 1
Ирмос: Пои́м Го́сподеви,/ пресла́вно погрузи́вшему фарао́на в мо́ри, песнь побе́дную,/ я́ко просла́вися.
Припев: Святи́и му́ченицы, моли́те Бо́га о на́с.
Пое́м Го́сподеви, челове́ческую не́мощь на неви́димаго врага́ укре́пльшему/ и побе́дами венча́вшему.
Припев: Святи́и му́ченицы, моли́те Бо́га о на́с.
Богода́нную, страстоте́рпче, побе́ду прие́м,/ не побежде́н супоста́ты яви́лся еси́, Феодо́те сла́вне, тех побежда́я.
Сла́ва Отцу́ и Сы́ну и Свято́му Ду́ху.
Чистоты́ Боже́ственныя добро́тою укра́шени,/ в суди́лище, я́коже в неве́стник, де́вы внидо́сте,/ пою́ще Жениха́ Христа́.
И ны́не и при́сно и во ве́ки веко́в. Ами́нь.
Богородичен: Бы́хом, Богоро́дице, Твои́м Рождество́м вси о́бщницы Боже́ственныя сла́вы,/ и́же любо́вию сла́вяще Ма́терь Тя всех Бо́га.
Песнь 3
Ирмос: В Го́споде Бо́зе мое́м/ се́рдце мое́ утверди́ся,/ тем немощству́ющии препоя́сашася си́лою.
Припев: Святи́и му́ченицы, моли́те Бо́га о на́с.
О Го́споде Бо́зе твое́м укре́плься, му́чениче Феодо́те,/ враги́ супроти́вныя и́стиною уничижи́л еси́.
Припев: Святи́и му́ченицы, моли́те Бо́га о на́с.
Дебельство́ плотско́е воздержа́нием отло́жше,/ к высоте́, страстоте́рпцы, страда́ния впери́стеся.
Сла́ва Отцу́ и Сы́ну и Свято́му Ду́ху.
К ласка́нием враго́в слу́ха не прикло́ньше, пострада́сте зако́нно,/ зако́нов Боже́ственных послу́шавше.
И ны́не и при́сно и во ве́ки веко́в. Ами́нь.
Богородичен: На ка́мени, Де́во, Твое́ю наде́ждею утвержде́ни,/ ника́коже треволне́нием искуше́ний поколеби́мся.
Седален, глас 4
Всем служи́тель, Ду́хом Боже́ственным пома́зався, был еси́, сла́вне,/ и, пострада́в тве́рдо, вельми́ просла́вился еси́./ Те́мже тя, соше́дшеся, Феодо́те, почита́ем,/ ве́рою соверша́юще святу́ю твою́ па́мять,/ в не́йже моли́твами твои́ми вся спаса́й.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.
Песнь 4
Ирмос: Услы́шах слух Твоего́ смотре́ния,/ я́ко от Де́вы роди́лся еси́, ро́ждшую не опали́в:/ и просла́вих, Спа́се, снизхожде́ние Твое́.
Припев: Святи́и му́ченицы, моли́те Бо́га о на́с.
Ты, кровьми́ страда́льческими, я́коже в мо́ри, гони́теля, му́чениче, погру́жь,/ в нетле́ние наслажде́нии весели́шися, поя́ Христа́ Венцеда́вца.
Сла́ва Отцу́ и Сы́ну и Свято́му Ду́ху.
Просия́ благохва́льный лик страстоте́рпиц, седмь му́дрых дев,/ многосве́тлы свещи́ вже́гше, в Христо́ве Боже́ственнем черто́зе.
И ны́не и при́сно и во ве́ки веко́в. Ами́нь.
Богородичен: Я́ко вене́ц Тя мы́сленный, де́вы страстоте́рпицы иму́ще,/ о Тебе́, Де́во, хва́лятся,/ пою́ще Сы́на и Бо́га Твоего́, Жениха́ и Влады́ку.
Песнь 5
Ирмос: Возсия́вый Свет,/ и просвети́вый у́тро, и показа́вый день,/ сла́ва Тебе́, сла́ва Тебе́, Иису́се, Сы́не Бо́жий.
Припев: Святи́и му́ченицы, моли́те Бо́га о на́с.
От ча́ши, му́дре, души́ твоея́, пролива́я вино́ уче́ния,/ сердца́ возвесели́л еси́ благочести́вых, Феодо́те сла́вне.
Припев: Святи́и му́ченицы, моли́те Бо́га о на́с.
Воздержа́ния, честны́я, напи́вшеся росы́,/ цве́ты чистоты́ разу́мно израсти́сте/ и Христо́во благово́ние яви́стеся.
Сла́ва Отцу́ и Сы́ну и Свято́му Ду́ху.
Плотски́я боле́зни, я́ко наслажде́ние,/ де́вы Влады́чния ра́ди любве́ вменя́юще,/ Его́ ра́ди до́бле пострада́ша.
И ны́не и при́сно и во ве́ки веко́в. Ами́нь.
Богородичен: Изба́вльшеся пре́лести и́дольскаго беше́ния Рождество́м Твои́м Боже́ственным,/ Тя пое́м, Чи́стая, благи́х вину́ и Хода́таицу.
Песнь 6
Ирмос: Я́коже проро́ка Ио́ну от ки́та изба́вил еси́, Христе́ Бо́же,/ и мене́ из глубины́ прегреше́нии возведи́/ и спаси́ мя, еди́не Человеколю́бче.
Припев: Святи́и му́ченицы, моли́те Бо́га о на́с.
Я́коже приста́нище тя Боже́ственно ве́рнии, Феодо́те, обре́тше,/ злочести́вых треволне́ния уклони́шася, пою́ще ко́рмчию Христа́.
Припев: Святи́и му́ченицы, моли́те Бо́га о на́с.
Любле́нием Зижди́теля, есте́ственную укрепи́ша не́мощь,/ па́че есте́ственныя страстоте́рпицы по́двиги,/ и о сем до́бре претерпе́ша.
Сла́ва Отцу́ и Сы́ну и Свято́му Ду́ху.
Седмосве́тлаго свети́льника равночи́сленны свещы́ вже́гше,/ я́коже в черто́зе, де́вы, внидо́сте в по́двиг страда́ния.
И ны́не и при́сно и во ве́ки веко́в. Ами́нь.
Богородичен: Земля́ от кля́твы изба́вися дре́вния, Де́во,/ Рождество́м Твои́м со живу́щими на ней./ Вину́ благослове́ния, всегда́ сла́вим Тя.
Кондак, глас 2
Страда́льчески подвиза́вся до́бре, со сострада́льцы твои́ми, Феодо́те,/ и венцы́ по́чести прия́сте с честны́ми страстоте́рпицами де́вами./ Те́мже Христа́ Бо́га моли́те непреста́нно о всех нас.
Песнь 7
Ирмос: Глаго́лавый на горе́ с Моисе́ом/ и о́браз де́вства явле́й в купине́,/ благослове́н еси́, Бо́же оте́ц на́ших.
Припев: Святи́и му́ченицы, моли́те Бо́га о на́с.
Кова́рствия враго́в, страстоте́рпче, му́дростию духо́вною изоблича́я,/ от сих пре́лести спасл еси́ пострада́вшия с тобо́ю му́ченики.
Припев: Святи́и му́ченицы, моли́те Бо́га о на́с.
Нетле́нных благ любо́вию, де́вы, окрили́вше помышле́ния,/ по́двиги взыдо́сте к сим, воспева́юще Христа́.
Сла́ва Отцу́ и Сы́ну и Свято́му Ду́ху.
Зло́бы обрета́теля, страстоте́рпицы, ника́коже ле́стию прекло́ньшеся,/ це́лу Зижди́теля, сла́вныя, за́поведь соблюдо́сте.
И ны́не и при́сно и во ве́ки веко́в. Ами́нь.
Богородичен: Ви́дети сла́ву из Тебе́ Рожде́ннаго и сея́ наслади́тися с му́ченики,/ Тя, Пречи́стая, пою́щия, Сего́ при́сно умоли́.
Песнь 8
Ирмос: Царя́ Христа́,/ Его́же испове́даша плене́ннии о́троцы,/ в пещи́ глаго́люще ве́лиим гла́сом:/ вся дела́, по́йте Го́спода.
Припев: Святи́и му́ченицы, моли́те Бо́га о на́с.
Благоде́теля Христа́ име́я, Феодо́те, в боле́знех страда́ния,/ соблюда́юща и укрепля́юща при́сно тя во всем,/ пачеесте́ственныя по́двиги подъя́л еси́, поя́ Самого́ Бо́га и Царя́.
Припев: Святи́и му́ченицы, моли́те Бо́га о на́с.
Благоволе́нием Христа́ до́брыя де́вы, ду́ши услади́вше,/ во след Сего́ теча́ху, пострада́вше до́блественно, и в ра́дости вопия́ху:/ Тя превозноша́ем, Христе́, во веки.
Сла́ва Отцу́ и Сы́ну и Свято́му Ду́ху.
Соде́телю вся́ческих,/ Ты не́мощь укрепи́л еси́, Сло́ве, же́нскаго естества́ во страда́ниих, я́ко Бог,/ те́мже, до́бре страда́вше, поя́ху святы́я Тя, Бо́га и Царя́.
И ны́не и при́сно и во ве́ки веко́в. Ами́нь.
Богородичен: Новоде́тель челове́ча естества́, Чи́стая, из Тебе́ бо челове́ческое поне́сл,/ я́ко Человеколю́бец Бог и Творе́ц, естество́ созда́ на́ше,/ испове́дающих Тя, вои́стинну Богоро́дицу.
Песнь 9
Ирмос: Безсе́менное Рождество́ Твое́,/ Богоро́дице Чи́стая,/ Христа́ Бо́га на́шего пе́сньми немо́лчными велича́ем.
Припев: Святи́и му́ченицы, моли́те Бо́га о на́с.
Преле́стныя полки́ победи́, сла́вне, си́лою духо́вною/ и прия́т вене́ц побе́ды, Феодо́те.
Припев: Святи́и му́ченицы, моли́те Бо́га о на́с.
Я́ко ма́сти, чудеса́ дыха́я, всех благоуха́еши, Феодо́те,/ ве́рою и любо́вию тя сла́вящия.
Припев: Святи́и му́ченицы, моли́те Бо́га о на́с.
Заре́ю сия́юще чистоты́,/ красны́ показа́стеся добро́тою во страда́нии, доброде́вы.
Сла́ва Отцу́ и Сы́ну и Свято́му Ду́ху.
Мольбу́ седмосве́тлую, честны́я, вже́гше,/ нас наста́вите к незаходи́мому све́ту Христа́ Бо́га.
И ны́не и при́сно и во ве́ки веко́в. Ами́нь.
Богородичен: Па́че вся́кия любве́ Твое́ жела́ние, Пречи́стая, су́щи,/ привлачи́т мя вопи́ти Тебе́ непреста́нно:/ ра́дуйся, Влады́чице.