Минея, 3 Февраля, Канон
Глас 4
Песнь 1
Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Припев: Святы́й благове́рный кня́же Ромáне, моли́ Бо́га о на́с.
А́гнче Бо́жий и Сло́ве, да́ждь ми́ сло́во ра́зума и косноязы́чная моя́ уста́ де́йством Свята́го Ду́ха благослове́сия испо́лни, да в ра́дости принесу́ пе́ние Твоему́ уго́днику, преблаже́нному Рома́ну, и воспою́, ра́дуяся, того́ чудеса́.
Припев: Святы́й благове́рный кня́же Ромáне, моли́ Бо́га о на́с.
Благода́ть испроси́ ми́ у Христа́, благове́рный кня́же Рома́не, в предначина́нии ма́лаго моего́ и недосто́йнаго, к тебе́ приноси́маго моле́ния, и просвеще́ние омраче́нному се́рдцу моему́ низпосли́, да, ра́дуяся, воспою́ твоя́ чудеса́.
Сла́ва Отцу́ и Сы́ну и Свято́му Ду́ху.
Все́х Влады́ки и Бо́га повеле́ния все́ю душе́ю исполня́я, ми́лостив, незло́бив и кро́ток на земли́ пожи́л еси́ и ны́не в земли́ кро́тких живе́ши, моля́ся о чту́щих тя́ и ра́достно сла́вящих твоя́ чудеса́.
И ны́не и при́сно и во ве́ки веко́в. Ами́нь.
Богородичен: Глаго́лы у́ст пророковеща́тельных коне́ц прия́ша, недоразумева́емым и непостижи́мым, на Тебе́ соде́янным стра́шным та́инством, Де́во Влады́чице, Его́же бо они́ я́ко Бо́га на зе́млю сни́ти прореко́ша, Того́ Ты́ я́ко Сы́на на пречи́стую Твое́ю руку́ ма́терски понесла́ еси́.
Песнь 3
Ирмос: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве, венце́в сла́вы сподо́би.
Припев: Святы́й благове́рный кня́же Ромáне, моли́ Бо́га о на́с.
Ди́вно на земли́ житие́ твое́ и сла́вна па́мять твоя́, чудесы́ же твои́ми, благове́рный кня́же Рома́не, удивля́еми есмы́, лю́дие твои́, пе́сненное благодаре́ние тебе́ приноша́ем.
Припев: Святы́й благове́рный кня́же Ромáне, моли́ Бо́га о на́с.
Ева́нгельский гла́с я́ко услы́шав, обеща́ющий ми́лостивым на земли́ ми́лость Небе́сную получи́ти, и сего́ ра́ди ми́лостив ты́, кня́же Рома́не, бы́л еси́, за ню́же ны́не восприе́млеши безконе́чное возме́здие.
Сла́ва Отцу́ и Сы́ну и Свято́му Ду́ху.
Живо́т нетле́нный и блаже́нство, не иму́щее конца́, на Небесе́х ны́не живе́ши по достоя́нию твоего́ благоче́стия и Богоуго́дных де́телей, я́же на земли́ соверши́л еси́.
И ны́не и при́сно и во ве́ки веко́в. Ами́нь.
Богородичен: Зми́й иногда́ излия́ я́д сво́й во Еде́ме во ушеса́ прама́тери на́шей Е́ве е́же сравни́тися Бо́гу яде́нием запове́даннаго бра́шна. Сему́ же злу́ сове́ту она́ повину́вшися, с родонача́льником изве́ржена Еде́ма бы́сть и рожде́нным от ни́х сме́рть исхода́тайствова. Тобо́ю же, Чи́стая Де́во, па́ки восприе́млем пе́рвое блаже́нство.
Седален, глас 8
Исто́чника чуде́с и ве́рных исцеле́ния, гра́да У́глеча сла́ву и живу́щим в не́м ра́дость, во благове́рных князе́х кня́зя Рома́на пречу́днаго пе́сненно вси́ восхва́лим. Пло́тию бо то́й а́ще и ме́ртв е́сть, но душе́ю живе́т во ве́ки и избавля́ет от неду́г разли́чных прири́чущих к нему́ и мо́лит Христа́ Бо́га прегреше́ний оставле́ние дарова́ти че́ствующим любо́вию святу́ю па́мять его́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Небе́сную две́рь и киво́т, пресвяту́ю го́ру, све́тлый о́блак воспои́м, неопали́мую купину́, слове́сный ра́й, Е́вы воззва́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́ру и оставле́ние дре́вних согреше́ний. Сего́ ра́ди вопие́м Е́й: моли́ся Сы́ну Твоему́ прегреше́ний оставле́ние дарова́ти благоче́стно покланя́ющимся всесвято́му Рождеству́ Твоему́.
Песнь 4
Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.
Припев: Святы́й благове́рный кня́же Ромáне, моли́ Бо́га о на́с.
Зна́меньми и чудесы́ просла́ви тя́ Бо́г, благове́рный кня́же Рома́не: вси́, и́же с ве́рою приходя́щии к моще́м твои́м, исцеле́ния да́ры оби́льно прие́млют и ко Просла́вльшему тя́ взыва́ют: сла́ва си́ле Твое́й, Го́споди.
Припев: Святы́й благове́рный кня́же Ромáне, моли́ Бо́га о на́с.
И́же пре́жде тебе́ бы́вшим и Богоуго́дно житие́ препрово́ждшим благове́рным князе́м, свя́те Рома́не, поревнова́л еси́, с ни́миже ны́не на Небесе́х ра́достно зове́ши: сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Иа́ковлю ле́ствицу разуме́в, благове́рный кня́же Рома́не, явля́емую от земли́ к Небесе́м, сея́ восхожде́ние стяжа́л еси́ благоче́стием и чи́стым твои́м взыва́нием: сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Кова́рством и ловле́нии льсти́ваго умертви́хся, Влады́чице Всенепоро́чная, оживи́ мя́, я́же Живо́т ро́ждшая Боже́ственный и Ипоста́сный, да к Тебе́ ве́рою воззову́: сла́ва де́вству Твоему́, Ма́ти Безневе́стная.
Песнь 5
Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.
Припев: Святы́й благове́рный кня́же Ромáне, моли́ Бо́га о на́с.
Люде́й твои́х, пою́щих тя́, блаже́нне Рома́не, свы́ше ми́лостию твое́ю озари́ и испроси́ у Бо́га все́х ве́рным на сопроти́вныя дарова́ти побе́ду, на́ше же приими́, требога́те кня́же, а́ще и ма́лое сие́, приноси́мое к тебе́ моле́ние.
Припев: Святы́й благове́рный кня́же Ромáне, моли́ Бо́га о на́с.
Многочуде́сне и пресла́вне благове́рный кня́же Рома́не, ве́мы, я́ко превосхо́дят твоя́ бы́вшая на земли́ исправле́ния ны́нешняго к тебе́ приноси́маго от на́с песноплете́ния, но па́ки сие́ ве́мы, я́ко не слове́с изви́тия зри́ши ты́, но ве́ры предложе́ние.
Сла́ва Отцу́ и Сы́ну и Свято́му Ду́ху.
Ны́не пра́зднующия лю́ди святу́ю па́мять твою́, о благочести́ве Рома́не, и святу́ю твою́ и чудото́чную обстоя́щия ико́ну ра́дости и весе́лия испо́лни и све́том за́поведей Бо́жиих озари́ душе́вная на́ша омраче́ния.
И ны́не и при́сно и во ве́ки веко́в. Ами́нь.
Богородичен: Окая́нную ду́шу мою́, волну́ющуюся в мо́ри жите́йских попече́ний, пре́жде да́же не погря́знути е́й с корабле́м те́ла моего́ ко дну поги́бели отча́янием, Ма́ти Бо́жия, простри́ ми́ ру́ку по́мощи и окорми́ живо́т мо́й во благооти́шное приста́нище, Боже́ственную во́лю Сы́на Твоего́ и Бо́га все́х.
Песнь 6
Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Припев: Святы́й благове́рный кня́же Ромáне, моли́ Бо́га о на́с.
Прехва́льному и ди́вному Росси́йскому свети́льнику, и́же от Христа́ да́р чудотворе́ния прие́мшему, благове́рному кня́зю Рома́ну пе́сненныя принесе́м глаго́лы, я́ко иму́щему дерзнове́ние ко Святе́й Тро́ице, Ю́же и мо́лит от бе́д спасти́ся на́м.
Припев: Святы́й благове́рный кня́же Ромáне, моли́ Бо́га о на́с.
Рома́не кня́же, а́ще и в после́дняя ле́та на земли́ пожи́л еси́, но пре́жде тебе́ бы́вших благове́рных князе́й че́сти от Христа́ ра́вны сподо́бился еси́, е́же Са́м О́н предрече́, я́ко бу́дут и после́днии пе́рвии.
Сла́ва Отцу́ и Сы́ну и Свято́му Ду́ху.
Све́тлостию де́л твои́х просия́л еси́, преподо́бне, а́ще гро́б и хода́тай забве́ния, но и то́й ника́коже мо́жет скры́ти зарю́ чуде́с твои́х. Та́ко просла́ви тя́ Бо́г, я́ко вои́стинну просла́вил еси́ Его́.
И ны́не и при́сно и во ве́ки веко́в. Ами́нь.
Богородичен: Та́йно Свяще́нная Писа́ния предзнаменова́ша Тя́, Пречи́стая: Иа́ков ле́ствицу пронарече́, Моисе́й купино́ю Тя́ предви́де, Дании́л же го́ру Тебе́ пронаписа́. Мы́ же с Гаврии́лом Тебе́ взыва́ем: ра́дуйся, Благода́тная, Госпо́дь с Тобо́ю.
Кондак, глас 8
Я́ко многосве́тлая звезда́, всепра́зднственная па́мять твоя́ возсия́ дне́сь, благове́рный кня́же Рома́не, созыва́ющи к похвале́нию лю́ди твоя́, пе́сньми славосло́вити честно́е житие́ твое́ и ве́рно торжествова́ти свято́е твое́ успе́ние, в не́мже моли́ся, свя́те, ко Христу́ Бо́гу на́шему, е́же изба́витися на́м от все́х наве́тов вра́жиих, да вси́ зове́м ти́: ра́дуйся, Рома́не пребога́те, но́вый Росси́йский чудотво́рче.
Икос
Со́н ле́ности души́ моея́ хода́тайствует му́ку, и сласте́й мои́х разжже́ние вжига́ет ми́ ве́чный пла́мень, но́щь же уны́ния моего́ уготовля́ет ми́ тьму́, не иму́щую конца́. Но я́ко скоропослу́шный моли́твенниче ко Христу́ Бо́гу, свя́те Рома́не, и вся́каго бла́га незави́стный да́телю, си́х вино́вных поги́бели бе́д изба́ви мя́ и научи́ мя́ воспе́ти святу́ю па́мять твою́, я́же свы́ше собира́ет мно́жество А́нгел и до́лу созыва́ет к похвале́нию челове́ки, да с ни́ми и а́з возглаго́лю, зовы́й тебе́ сицева́я: ра́дуйся, на похвалу́ от Бо́га оте́честву твоему́ да́нный; ра́дуйся, от младе́нства в сосу́д Ду́ха Свята́го произбра́нный; ра́дуйся, са́де при вода́х Ева́нгельских насажде́нный; ра́дуйся, Христо́вых повеле́ний после́дователю всеусе́рдный; ра́дуйся, апо́стольских преда́ний и́стинный храни́телю; ра́дуйся, святы́х жития́м до́брый ревни́телю; ра́дуйся, от Бо́га в кня́зя гра́ду У́глечу да́нный; ра́дуйся, от Него́ вся́кими благи́ми де́лы одаро́ванный; ра́дуйся, я́ко и по преставле́нии чудесы́ гра́д тво́й назира́еши; ра́дуйся, я́ко от неду́гов с ве́рою приходя́щих к тебе́ избавля́еши; ра́дуйся, гра́ду на́шему У́глечу хвало́; ра́дуйся, от враго́в ему́ необори́мое забра́ло; ра́дуйся, Рома́не о́тче, но́вый Росси́йский чудотво́рче.
Песнь 7
Ирмос: Не послужи́ша тва́ри Богому́дрии па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
Припев: Святы́й благове́рный кня́же Ромáне, моли́ Бо́га о на́с.
Ути́ши многомяте́жную ду́ш на́ших бу́рю, благове́рный кня́же Рома́не, и разжени́ но́щь уны́ния от мы́слей на́ших, да́ждь просвеще́ние душа́м рабо́в твои́х, хва́лящих свято́е успе́ние твое́.
Припев: Святы́й благове́рный кня́же Ромáне, моли́ Бо́га о на́с.
У́глеча похвало́ ты́ еси́, свя́те Рома́не: моли́ся о не́м ко Христу́ Бо́гу, сохрани́ти и спасти́ его́ от сыно́в ага́рянских, скреже́щут бо они́ на ны́, я́ко зве́рие, зубы́ свои́ми, но сокруши́ че́люсти и́х.
Сла́ва Отцу́ и Сы́ну и Свято́му Ду́ху.
Фарисе́ево отве́ржим от себе́ тщесла́вное зия́ние и мытаре́ву научи́мся се́рдца сокруше́нию, и, та́ко предочи́стивше ду́ши, со стра́хом воззове́м к Зижди́телю: О́тче Небе́сный, оста́ви на́м до́лги на́ша моли́тв ра́ди уго́дника Твоего́, Рома́на приснопа́мятнаго.
И ны́не и при́сно и во ве́ки веко́в. Ами́нь.
Богородичен: Херуви́мов честне́йшая и Серафи́мов превы́шшая, Предста́тельнице скорбя́щих, Де́во Пречи́стая, Всенепоро́чная Неве́сто Творца́ и Ма́ти благоволе́ния О́тча, простри́, Влады́чице, к Нему́ пречи́стыя Твои́ дла́ни и умоли́ Его́, Всенепоро́чная, я́ко Бо́га все́х, е́же получи́ти на́м ми́лость в де́нь стра́шнаго прише́ствия Его́.
Песнь 8
Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.
Припев: Святы́й благове́рный кня́же Ромáне, моли́ Бо́га о на́с.
От вся́ких прило́г сопроти́внаго сохрани́ лю́ди твоя́ Богоуго́дны, кня́же Рома́не, и изба́ви гра́д тво́й, свя́те, и вся́к гра́д и страну́ от все́х наве́т вра́жиих, в ни́хже пою́т от зо́л тобо́ю изба́вленнии: Го́спода по́йте вся́ дела́ и превозноси́те Его́ во ве́ки.
Припев: Святы́й благове́рный кня́же Ромáне, моли́ Бо́га о на́с.
Царю́ ца́рствующих и Бо́гу вся́ческих ны́не, кня́же Рома́не, в весе́лии предстои́ши и я́же отону́дными све́тлостьми Триипоста́снаго Божества́ озаря́ешися; моли́ся и о на́с, достоблаже́нне и приснопе́тый Богоуго́дниче, е́же получи́ти на́м селе́ния, иде́же в весе́лии воспева́ют: Го́спода по́йте дела́ и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Чесо́ ра́ди приско́рбна еси́, душе́ моя́, и вску́ю смуща́еши мя́? Упова́й на Бо́га и притецы́ к благове́рному кня́зю Рома́ну, да благода́ть полу́чиши и ско́рбных смуще́ний соверше́нное избавле́ние.
И ны́не и при́сно и во ве́ки веко́в. Ами́нь.
Богородичен: Ши́ршая Небе́с и простра́ннейшая земли́ утро́ба Твоя́ бы́сть, Де́во Влады́чице. О́ле чудесе́! И́же Невмести́мый все́ми вме́щся во чре́ве Твое́м и произы́де, я́ко Плотоно́сец, к Нему́же вся́ческая, я́же на Небеси́ и я́же на земли́, взыва́ют: Го́спода по́йте дела́ и превозноси́те Его́ во ве́ки.
Песнь 9
Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Припев: Святы́й благове́рный кня́же Ромáне, моли́ Бо́га о на́с.
Щито́м моли́тв твои́х, кня́же присносла́вне Рома́не, отжени́ летя́щия на ны́ стре́лы вра́жия, и сохрани́, свя́те, невреди́м гра́д, в не́мже похвала́ми пое́тся честна́я па́мять твоя́ и ве́рно сла́вится.
Припев: Святы́й благове́рный кня́же Ромáне, моли́ Бо́га о на́с.
Ю́же получи́л еси́ на Небесе́х ны́не сла́ву благочести́вым на земли́ житие́м твои́м, тоя́ и на́м получи́ти моли́ вся́ Могу́щаго и испроси́ у Бо́га та́яжде на́м зре́ти блага́я, и́хже ны́не ты́ смотря́еши.
Сла́ва Отцу́ и Сы́ну и Свято́му Ду́ху.
О присноблаже́нне, венцеувязе́нная главо́, пребога́те кня́же Рома́не, приими́ ма́лое сие́ от непотре́бных мои́х усте́н приноше́ние, и прие́м е́, осени́ ны́ светоно́сною твое́ю благода́тию, и испроси́ у Бо́га все́х на́м ми́рное и Богоуго́дное житие́ и спасе́ние, песнопою́щим тя́.
И ны́не и при́сно и во ве́ки веко́в. Ами́нь.
Богородичен: Я́ко прекра́сну пала́ту от все́х земны́х родо́в произбра́ Бо́г пречи́стую Твою́ утро́бу, Чи́стая, и, соше́д с Небесе́, всели́ся в Ню́, и исцели́ телотле́нный неду́га вре́д, препода́нный зми́ем во Еде́ме прама́тери Е́ве со Ада́мом и рожде́нным от ни́х.
Светилен
Сла́вно торжеству́ет гра́д У́глеч в благонаро́читый де́нь твоея́ па́мяти, благове́рный кня́же Рома́не, и све́тло красу́ется це́рковь, в не́йже лежи́т честна́я ра́ка твоя́, ве́дущи во све́те лица́ Бо́жия сла́вы предстоя́ща тя́, Ему́же предстоя́, и на́с помина́й.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: А́нгелов удивле́ние, апо́столов сла́во, похвало́ му́чеников, утро́бо пречи́стая, Бо́га ро́ждшая, кади́льнице чисте́йшая невеще́ственнаго у́гля, честно́е селе́ние Божества́, в Ню́же О́тчим благоволе́нием Сы́н всели́ся, и Ду́х Святы́й Богоро́дицу Тя́ соде́ла.