Минея, 4 Мая, Канон мученицы
Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Припев: Свята́я му́ченице Пелаги́е, моли́ Бо́га о на́с.
Пучи́ну твои́х чуде́с пла́вающу,/ хлад духо́вный ны́не ми пода́ждь, му́ченице Христо́ва Пелаги́е прехва́льная,/ и ко приста́нищу благоути́шному твои́х похвале́ний наста́ви.
Припев: Свята́я му́ченице Пелаги́е, моли́ Бо́га о на́с.
От младе́нства проразуме́нно Зижди́телю твоему́ возложи́вшися, честна́я,/ тле́нных отве́ргла еси́ любо́вь, Пелаги́е всесла́вная,/ му́жески же стра́сти Боже́ственною си́лою попра́ла еси́.
Сла́ва Отцу́ и Сы́ну и Свято́му Ду́ху.
Ба́ни Боже́ственныя жела́ющи, сла́вная, прия́ти Креще́ния,/ святи́теля обре́тши Христо́ва, Пелаги́е, притекла́ еси́/ и, приобщи́вшися, све́та Боже́ственнаго, му́ченице, испо́лнилася еси́.
И ны́не и при́сно и во ве́ки веко́в. Ами́нь.
Богородичен: Святы́х святе́йши была́ еси́, Де́во Чи́стая,/ святы́х Свята́го Христа́ на руку́ носи́вши,/ Боже́ственными си́лами всю тварь содержа́щаго.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Припев: Свята́я му́ченице Пелаги́е, моли́ Бо́га о на́с.
Я́коже земля́ блага́, прие́мши слове́сная се́мена, му́ченице Христо́ва всему́драя,/ сия́ бога́тно израсти́ла еси́.
Сла́ва Отцу́ и Сы́ну и Свято́му Ду́ху.
Упра́вилася еси́, я́ко избра́нна, ко Влады́це и Бо́гу тща́щися,/ му́ченице Христо́ва сла́вная,/ Боже́ственными укрепля́ема уче́нии.
И ны́не и при́сно и во ве́ки веко́в. Ами́нь.
Богородичен: Возста́вила еси́, о Чи́стая, па́дший мой о́браз,/ ро́ждши я́ве Вино́внаго па́че есте́ственнаго воскресе́ния.
Седален, глас 1
Любо́вию Христо́вою ду́шу распа́льши,/ вошла́ еси́ му́жески в зело́ разжже́нный, Богому́драя, коно́б, Пелаги́е,/ и была́ еси́ Влады́це твоему́ благово́нная же́ртва./ Те́мже днесь, всесвяту́ю твою́ па́мять творя́ще, воспева́ем тя.
Песнь 4
Ирмос: Вознесе́на Тя ви́девши Це́рковь на Кресте́/ Со́лнце пра́ведное/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Припев: Свята́я му́ченице Пелаги́е, моли́ Бо́га о на́с.
Влады́чнею багряни́цею оде́яна,/ ба́нею, пресла́вная, пакибытия́ всея́ жите́йския кра́сныя багряни́цы совлекла́ся еси́,/ му́ченице Пелаги́е всечестна́я.
Припев: Свята́я му́ченице Пелаги́е, моли́ Бо́га о на́с.
Жела́нием небе́сных красо́т, я́же на земли́ омрачи́вши жела́ния, страстоно́сице,/ те́мже окрили́лася еси́, Христу́ вопию́щи и глаго́лющи:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Оскверне́нную ве́ру оста́вльши,/ ко Христу́ притекла́ еси́ му́дре, Пелаги́е му́ченице всесла́вная,/ и́дольскую попра́вши вся́ку пре́лесть, Богоприя́тная.
И ны́не и при́сно и во ве́ки веко́в. Ами́нь.
Богородичен: Неискусобра́чно родила́ еси́, о Де́во,/ и по рождестве́ яви́лася еси́, де́вствующи па́ки./ Те́мже немо́лчными гла́сы,– ра́дуйся, Влады́чице,– Тебе́ ве́рою несумне́нною взыва́ем.
Песнь 5
Ирмос: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.
Припев: Свята́я му́ченице Пелаги́е, моли́ Бо́га о на́с.
Возмогла́ еси́ вра́жие разруши́ти свире́пство, прехва́льная Пелаги́е,/ кресто́м Влады́чним укре́пльшися и благода́тию.
Сла́ва Отцу́ и Сы́ну и Свято́му Ду́ху.
Ны́не ра́дуешися вои́стинну, сочета́вшися Жениху́ твоему́, пресве́тлая, муче́нием,/ твоего́ де́вства свещу́ иму́щи.
И ны́не и при́сно и во ве́ки веко́в. Ами́нь.
Богородичен: Госпо́дь в Тя, Богома́ти, всели́ся,/ челове́ка назида́я, в тле́ние па́дшаго пре́лестию змии́ною.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х исте́кшею кро́вию.
Припев: Свята́я му́ченице Пелаги́е, моли́ Бо́га о на́с.
Зако́нно Христу́ уневе́стившися, сконча́ла еси́ муче́ния тече́ние/ и, призыва́ющи твоего́ Жениха́, в приста́нище ти́хое Сего́ утверди́лася еси́.
Сла́ва Отцу́ и Сы́ну и Свято́му Ду́ху.
Изплете́ся твоему́ верху́ прекра́сен вене́ц пра́вды,/ Богому́драя Пелаги́е, му́ченице венцено́сице,/ ве́ру бо да́же до конца́ соблюла́ еси́ безпоро́чно.
И ны́не и при́сно и во ве́ки веко́в. Ами́нь.
Богородичен: Яд пе́рвее во у́ши Е́вы излия́ стропо́тный змий;/ Ты же сего́ еди́на оттрясла́ еси́, Богома́ти, губи́теля тому́ ро́ждши.
Кондак, глас 3
Вре́менная презре́вши/ и Небе́сных благ прича́стница бы́вши,/ вене́ц страда́ния ра́ди прии́мши,/ Пелаги́е всечестна́я,/ я́ко дар принесла́ еси́ кро́вныя пото́ки Влады́це Христу́./ Моли́ от бед изба́вити нас,/ твою́ па́мять почита́ющих.
Песнь 7
Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Припев: Свята́я му́ченице Пелаги́е, моли́ Бо́га о на́с.
Пе́щным о́бразом, сокрове́нным, му́ченице, орга́ном,/ Боже́ственною распала́ема любо́вию Христо́вою, терпя́щи, взыва́ла еси́:/ благослове́н еси́ в хра́ме сла́вы Твоея́, Го́споди.
Сла́ва Отцу́ и Сы́ну и Свято́му Ду́ху.
Одева́яй не́бо о́блаки, сла́вная му́ченице,/ обнаже́ну су́щу Боже́ственныя оде́жды, просвети́ тя, пою́щую:/ благослове́н еси́ в хра́ме сла́вы Твоея́, Го́споди.
И ны́не и при́сно и во ве́ки веко́в. Ами́нь.
Богородичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице.
Песнь 8
Ирмос: Ру́це распросте́р, Дании́л/ львов зия́ния в ро́ве затче́; о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.
Припев: Свята́я му́ченице Пелаги́е, моли́ Бо́га о на́с.
Я́ко му́ченица, я́ко зело́ нело́жна Христо́ва, прехва́льная,/ Сего́ си́лу богосло́вила еси́, всех богому́дренно науча́ющи,/ и к благоче́стию лю́ди привлекла́ еси́, пою́щия:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Я́ве уневе́стившися Христу́, мучи́теля стремле́ние все погаси́ла еси́,/ прему́дрости пучи́ну источа́ющи, Пелаги́е всечестна́я,/ и венцы́ треми́, му́ченице, украси́лася еси́, пою́щи:/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: Из Отца́ Безнача́льнаго Сы́на и Ду́ха Свята́го испове́дуем, ве́рнии,/ из Тебе́, Всенепоро́чная, глаго́люще воплоти́тися/ Собезнача́льное, Единоро́дное Сло́во Отцу́ и Боже́ственному Ду́ху,/ и вопие́м: благослови́те, вся дела́ Госпо́дня, Го́спода.
Песнь 9
Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Припев: Свята́я му́ченице Пелаги́е, моли́ Бо́га о на́с.
Сло́во изрещи́ не мо́жет твои́х похва́л, Пелаги́е,/ пучи́ну бо чуде́с источа́еши твоего́ Жениха́ си́лою и благода́тию,/ Его́же ны́не моли́ вся спасти́, пою́щия тя.
Припев: Свята́я му́ченице Пелаги́е, моли́ Бо́га о на́с.
Ста́вши на суди́щи, неве́сто, венцено́сице Пелаги́е,/ жела́нию кра́йнему сподо́билася еси́, му́ченице, предста́ти/ и пи́щу восприя́ла еси́ ве́чнаго наслажде́ния.
Сла́ва Отцу́ и Сы́ну и Свято́му Ду́ху.
Ми́ру мир пода́ти твоего́ Жениха́ умоли́, му́ченице Пелаги́е Богому́драя,/ Це́рковь сохрани́ти от напа́стей/ и благода́тию тя пою́щия озари́ти.
И ны́не и при́сно и во ве́ки веко́в. Ами́нь.
Богородичен: Яви́лася еси́ Де́ва и Ма́ти, па́че естества́, Богороди́тельнице,/ Сло́во, заче́ншая О́тчее, воплоще́нно Сие́ ро́ждши,/ И́мже ны́не спаса́еми, Тя, Богоро́дице, велича́ем.