Минея, 26 Апреля, Ин канон святителя
Глас 8
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Святи́телю, о́тче Стефа́не, моли́ Бо́га о на́с.
Пермь я́ко дости́гл еси́, святи́телю,/ и та́мо возвы́шенную пре́лесть, прему́дре Стефа́не, смири́л еси́,/ и лю́таго чароде́я прему́дрыми твои́ми уче́нии посрами́л еси́.
Припев: Святи́телю, о́тче Стефа́не, моли́ Бо́га о на́с.
Бесо́вская ору́жия кре́пко, святи́телю, притупи́л еси́, и, тех победи́в Бо́жиею си́лою,/ всем Хри́ста, и́стиннаго Бо́га, Того́ испове́дал еси́,/ те́мже и вене́ц от Него́ прия́л еси́, Стефа́не.
Сла́ва Отцу́ и Сы́ну и Свято́му Ду́ху.
Боже́ственною любо́вию, о́тче, распала́емь,/ не убоя́лся еси́ долготы́ пу́тныя, ниже́ та́мо нечести́вых челове́к сопротивле́ния,/ но вся претерпе́л еси́ и всех Бо́гу приве́л еси́.
И ны́не и при́сно и во ве́ки веко́в. Ами́нь.
Богородичен: Из ко́рене ца́рскаго прозябла́ еси́, Царя́ Христа́, Бо́жие Сло́во,/ па́че ума́ и смы́сла родила́ еси́ из чи́стых крове́й Твои́х,/ сугу́ба естество́м явля́ема и еди́нствующа Ипоста́сию.
Песнь 3
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.
Припев: Святи́телю, о́тче Стефа́не, моли́ Бо́га о на́с.
Я́ко мудр и смы́слен споспе́шник,/ душе́вное благоро́дие па́че плотски́х сласте́й предпоче́т,/ я́ко пре́мудрая уче́ния всем явля́еши/ и в Бо́жие позна́ние но́выя лю́ди, о́тче, приве́л еси́.
Припев: Святи́телю, о́тче Стефа́не, моли́ Бо́га о на́с.
Очи́стив твой ум от страстна́го треволне́ния,/ Христу́ подо́бяся, взыска́ти заблу́ждших прише́л еси́,/ и́хже обре́т, с ни́ми Тому́ пое́ши:/ несть свят, па́че Тебе́, Го́споди.
Сла́ва Отцу́ и Сы́ну и Свято́му Ду́ху.
Богоглаго́ливый язы́к я́ко стяжа́в, святи́телю,/ та́инством Богосло́вия научи́л еси́ лю́ди ве́ровати в Тро́ицу, Еди́но Божество́,/ Е́йже о нас, Стефа́не, моли́ся.
И ны́не и при́сно и во ве́ки веко́в. Ами́нь.
Богородичен: Жезл, прозя́бший Христа́, цвет нетле́нный,/ злату́ю кади́льницу, вси Тя ве́мы, Чи́стая,/ Боже́ственнаго Существа́ нося́щи на руку́ угль, Богоблаже́нная.
Седален, глас 4
Ума́ пречу́днаго и бо́дреннаго учи́теля, священноде́йствы Це́рковь украси́вша,/ и му́тным уче́нием волхва́, я́ко возбесне́вша во́лка, от Христо́вых ове́ц словесы́ свои́ми отгна́вша,/ и невре́дно духо́вная своя́ ча́да сохра́нша,/ восхва́лим, ве́рнии, Стефа́на прехва́льнаго, глаго́люще:/ моли́ Христа́ Бо́га спасти́ся душа́м на́шим.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Святи́телю, о́тче Стефа́не, моли́ Бо́га о на́с.
Спасти́ся моли́ лю́дем,/ и́хже уче́нием твои́м просвети́л еси́ и научи́л еси́ вопи́ти:/ сла́ва си́ле Твое́й, Человеколю́бче.
Сла́ва Отцу́ и Сы́ну и Свято́му Ду́ху.
От Бо́га прие́м свяще́нства избра́ние, Боже́ственною си́лою свы́ше оде́ян,/ апо́стольски лю́ди от тьмы и́дольския просвети́л еси́ и научи́л еси́ вопи́ти:/ си́ле Твое́й сла́ва, Человеколю́бче.
И ны́не и при́сно и во ве́ки веко́в. Ами́нь.
Богородичен: Ковче́г Тя издале́ча прообразова́ прие́мший зако́н Богонапи́санный,/ во чре́ве Сло́во Бо́жие заче́ншую несказа́нно, Всенепоро́чная,/ пита́ющее бога́тно ду́ши вопию́щих:/ сла́ва си́ле Твое́й, Го́споди.
Песнь 5
Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Припев: Святи́телю, о́тче Стефа́не, моли́ Бо́га о на́с.
Боже́ственною ре́вностию, святи́телю, разжиза́емь,/ су́етныя и́долы па́губы коне́чныя огню́ пре́дал еси́/ и, неве́рныя в ве́ру приве́д,/ всех научи́л еси́ в Трех Ли́цех Еди́но Божество́ ве́ровати.
Сла́ва Отцу́ и Сы́ну и Свято́му Ду́ху.
Постыде́ся окая́нный волхв,/ хотя́ Христо́вы лю́ди отврати́ти от ве́ры,/ Бо́гу, тя прославля́ющу, свяще́ннейший Стефа́не прему́дре.
И ны́не и при́сно и во ве́ки веко́в. Ами́нь.
Украси́лася еси́ де́вства добро́тами,/ Е́вин покры́ла еси́ студ злообра́зный, Христа́ ро́ждшая,/ одея́ние безсме́ртия да́рующаго Тебе́ чту́щим.
Песнь 6
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Припев: Святи́телю, о́тче Стефа́не, моли́ Бо́га о на́с.
Па́стырский жезл прие́м, святи́телю,/ но́вым лю́дем учи́тель был еси́, пресла́вне Стефа́не,/ по апо́столу, всем всяк быв, да всех ко Христу́ приведе́ши, пресла́вне.
Сла́ва Отцу́ и Сы́ну и Свято́му Ду́ху.
Меч обою́ду остр язы́к твой на лука́ваго волхва́ бысть, святи́телю,/ пресека́я того́ му́тное уче́ние;/ те́мже тя свяще́нными пе́сньми прославля́ем.
И ны́не и при́сно и во ве́ки веко́в. Ами́нь.
На́йде Вседе́тельный Дух на Тя, Всенепоро́чная,/ и Сло́во Бо́жие в Тя всели́ся,/ и плоть бысть неизрече́нно, и пребы́сть неизме́нен.
Кондак, глас 8
Самозва́нен не и́щущим тебе́, святи́телю, обре́лся еси́,/ лю́ди, от и́дольския ле́сти свободи́в, ко Христо́ве ве́ре приве́л еси́/ и волхва́ пансо́тника посрами́л еси́,/ те́мже и пе́рвый епи́скоп и учи́тель Пе́рми был еси́./ Сего́ ра́ди духо́вная твоя́ ча́да,/ я́ко тобо́ю изба́вльшся от и́дол, благода́рная тебе́ возопие́м:/ ра́дуйся, Стефа́не, учи́телю прему́дрый.
Икос
Вся́каго мирска́го пристра́стия кроме́, о́тче, быв,/ от ю́ности прилежа́л еси́ прему́дрости и де́тельное худо́жество дости́гл еси́ Богосло́вия./ И в да́льние страны́ прише́д,/ иде́же весьма́ Бог не познава́шеся, но пре́лесть бесо́вская почита́шеся,/ та́мо апо́стольски лю́ди научи́л еси́ ве́ровати во Христа́,/ и́долы сокруши́в и волхва́ посрами́в, святи́тель тем был еси́,/ Те́мже духо́вная твоя́ ча́да,/ я́ко тобо́ю изба́вльшеся от и́дол, благода́рная тебе́ зове́м:/ ра́дуйся, Стефа́не, учи́телю прему́дрый.
Песнь 7
Ирмос: От Иуде́и, доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Святи́телю, о́тче Стефа́не, моли́ Бо́га о на́с.
Бе́гает у́бо, побежде́н быв тобо́ю, преблаже́нне Стефа́не, злочести́вый волхв,/ его́же мудрова́ния и зло́бы вси избавля́емся, Христу́ вопию́ще:/ благослове́н Бог оте́ц на́ших.
Припев: Святи́телю, о́тче Стефа́не, моли́ Бо́га о на́с.
И́же тобо́ю дре́вле просвеще́ннии лю́дие,/ пречу́дне святи́телю Стефа́не, я́ко к жи́ву, глаго́лем:/ не оста́ви нас, твои́х чад, я́коже обеща́лся еси́,/ да вси с тобо́ю Христу́ зове́м:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху.
Еле́ем Боже́ственнаго ра́дования я́ко святи́тель пома́зан быв,/ но́выя лю́ди ко Христо́ву позна́нию приве́л еси́/ и всех научи́л еси́ Христу́ взыва́ти:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Ны́не вся испо́лнишася све́та Боже́ственнаго Тобо́ю, Пречи́стая,/ Ты бо дверь яви́лася еси́,/ е́юже ми́ру Бог бесе́дова, просвеща́я ве́рою зову́щия:/ благослове́н, Пречи́стая, Плод чре́ва Твоего́.
Песнь 8
Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Припев: Святи́телю, о́тче Стефа́не, моли́ Бо́га о на́с.
Я́коже не́кий хра́брый воево́да яви́лся еси́, преблаже́нне, и́дольския хра́мы искореня́я,/ и, лю́ди от тех пре́лести изба́вив,/ научи́л еси́ от ду́ши Христу́ вопи́ти: благослови́те, вся дела́, Го́спода и превозноси́те Его́ во ве́ки.
Припев: Святи́телю, о́тче Стефа́не, моли́ Бо́га о на́с.
Во глубину́ Ду́ха Свята́го прини́кнув, ра́зум Боже́ственный отту́ду поче́рпл еси́./ Те́мже и Це́рковь правосла́вием обогати́л еси́/ Творцу́ Изба́вителю вопи́ти:/ благослови́те, вся дела́, Го́спода и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Во Христо́во посо́бие обо́лкся, лука́выя бе́сы от челове́к отгна́л еси́./ Тем и Небе́сное насле́дие, о́тче, со святи́тели прия́л еси́/ и с ни́ми Христу́ вопие́ши:/ благослови́те, вся дела́, Го́спода и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Е́ва у́бо дре́ва живо́тнаго изгна́на бысть, возбраня́ема причаще́ния;/ Ты же, Де́во Богоро́дице, Живо́т ве́чный источи́ла еси́ ми́ру,/ живоно́сное де́йство да́рующий ве́рным.
Песнь 9
Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Святи́телю, о́тче Стефа́не, моли́ Бо́га о на́с.
Боже́ственным жела́нием всегда́ подвиза́емь,/ му́дрости и ра́зума извы́к, по апо́столу, люде́й от пре́лести отврати́л еси́,/ и Бо́гу Жи́ву ве́ровати научи́л еси́, святи́телю прехва́льне.
Припев: Святи́телю, о́тче Стефа́не, моли́ Бо́га о на́с.
Всем благи́м о́браз дово́лен был еси́,/ к Вы́шнему житию́ веду́щ, смире́нием и кро́тостию./ Те́мже отсю́ду Христо́с па́стыря тя люде́й Свои́х устроя́ет,/ Его́же моли́ спасти́ всех, пою́щих тя.
Сла́ва Отцу́ и Сы́ну и Свято́му Ду́ху.
И́же к Бо́гу жела́нием страсте́й успи́л еси́ воста́ние,/ всено́щным стоя́нием дарова́ния восприя́л еси́/ ви́дети су́щия та́мо неизрече́нныя добро́ты, Стефа́не.
И ны́не и при́сно и во ве́ки веко́в. Ами́нь.
Богородичен: Яви́лася еси́, Де́во, Ма́ти Бо́жия, па́че естества́ ро́ждшая Бо́жие Сло́во,/ Его́же Оте́ц отры́гну пре́жде всех век, я́ко Благ;/ Его́же ны́не и теле́с вы́шше разумева́ем,/ а́ще и в те́ло оде́яся.
Светилен
Ни челове́ком, ни от челове́к, но от Бо́га избра́ние святи́тельства прии́м,/ и́же пре́жде тьмы сы́ны, ны́не же ча́да и насле́дники Све́та,/ твои́м уче́нием сотвори́л еси́, прему́дре Стефа́не.
Комментировать