Минея, 3 Августа, Кано́н святы́х, его́же краегране́сие: Све́тлыя воспою́ мона́хов зве́зды
Глас 8
Песнь 1
Ирмос: Посече́нный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль,/ песнь же воспева́шеся:/ Го́сподеви пои́м, сла́вно бо просла́вися.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Све́ту Боже́ственному све́тло предстоя́ще, и трисо́лнечныя зари́ всегда́ наполня́еми,/ и прича́стием и́стинным обожа́еми, блаже́ннии,/ ве́рою пра́зднующие ва́шу па́мять всесвяще́нную,/ Го́сподеви пою́щия, боже́ственно озари́те.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Смотря́юще на еди́на пребыва́ющая, теку́щих стремле́ния вся́ко отри́нусте/ и, всем умо́м Го́сподеви прилепля́ющеся,/ оста́вивше плотски́я сла́сти, отцы́ всечестни́и,/ Те́мже к невече́рней зари́ преста́вистеся.
Сла́ва Отцу́ и Сы́ну и Свято́му Ду́ху.
Свяще́нными поуче́нии окриля́емь, Далма́те, о́тче му́дре,/ и украша́емь Боже́ственными уче́нии Боже́ственнаго Исаа́кия,/ я́ве восте́кл еси́ к высоте́ доброде́телей/ и столп и утвержде́ние мона́хов был,/ Те́мже тя убла́жаем.
И ны́не и при́сно и во ве́ки веко́в. Ами́нь.
Богородичен: Препросла́вленная, Бо́га ро́ждшая, безсла́вия мя страсте́й премени́,/ и даждь ми по́мысл, Де́во, умиле́ния,/ и возсия́й покая́ния просвеще́ние, Чи́стая, в мы́сли мое́й,/ я́ко да велича́ю Тя, всех возвели́чившую.
Песнь 3
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твоей,/ жела́ний кра́ю, ве́рных утвержде́ние,/ Еди́не Человеколю́бче.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Неле́стную тя звезду́ восто́ка, преподо́бне о́тче, устреми́вшася, Исаа́кие, вси позна́хом,/ го́рькую ересе́й потребля́юща тьму/ и ве́рныя твои́ми просвеща́юща.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Разу́мно возсия́в чи́стыми сия́ньми, Фа́всте, по́двиг твои́х, о́тче, свет был еси́,/ просвеща́я вся, зря́щия тя, блаже́нне,/ и ве́рно житию́ твоему́ после́дующия.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Пе́сньми непреста́нными и моли́твами, преподо́бнии, стра́сти теле́сныя вся успи́вше,/ благода́ть неусы́пну и неотъе́млемо бога́тство/ от Бо́га прия́сте, преблаже́ннии.
Сла́ва Отцу́ и Сы́ну и Свято́му Ду́ху.
До́лгим поще́нием, я́ко Моисе́й, преподо́бне, твое́ терпе́ние, Далма́те, всем показа́л еси́,/ украша́яся пресве́тлыми твои́ми боле́зньми и удобря́яся житие́м твои́м.
И ны́не и при́сно и во ве́ки веко́в. Ами́нь.
Богородичен: У́мный Тя све́щник и светоза́рен позна́хом,/ внутрь прие́мшую, Де́во, Огнь нетерпи́мый,/ Боже́ственную пала́ту и высо́кий престо́л,/ на не́мже почи́ Пресу́щественный.
Седален, глас
Све́том Трои́ческим све́тло осия́вшеся, отцы́, светови́дно,/ тьму оста́висте сласте́й глубо́кую/ и свети́льницы де́лы Боже́ственными, просвеща́юще ве́рных сердца́, блаже́ннии, яви́стеся./ Те́мже светоно́сную и честну́ю ва́шу па́мять почита́ем днесь и согла́сно взыва́ем:/ Богоно́снии пребога́тии, моли́те Христа́ Бо́га согреше́ний оставле́ние дарова́ти/ чту́щим любо́вию святу́ю па́мять ва́шу.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Я́ко многопло́дны ло́зы и́стиннаго виногра́да бы́вше,/ вино́ источи́ша преподо́бнии чи́стое всем умиле́ния.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Собо́ру согла́сника, преподо́бне Далма́те, вси тя позна́хом,/ благочести́выя утвержда́юща и го́рдыя отрева́юща.
Сла́ва Отцу́ и Сы́ну и Свято́му Ду́ху.
Я́ко па́че всех просия́вша, всех преиме́ти попече́ние тя, блаже́нне,/ Боже́ственный собо́р предповеле́,/ доброде́тельми Боже́ственными укра́шена.
И ны́не и при́сно и во ве́ки веко́в. Ами́нь.
Богородичен: Дрема́нием ле́ности мя сон грехо́вный, Чи́стая, пости́же,/ бде́ною моли́твою Твое́ю к покая́нию ны́не воздви́гни.
Песнь 5
Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Пресе́льник от восто́ка к Ца́рскому гра́ду был еси́/ и Боже́ственным се́менем жи́тницу, сего́ умно́жил еси́,/ искорени́в всяк лука́вый А́риев вред, свяще́нне о́тче Исаа́кие.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Учени́к Исаа́кию, я́коже Илии́ Елиссе́й, был еси́, свяще́нне Далма́те,/ ми́лотию дарова́ний Духа разделя́я воду лука́ваго де́монов вре́да/ и ве́рным управля́я путь.
Сла́ва Отцу́ и Сы́ну и Свято́му Ду́ху.
Зако́ном Боже́ственным повину́вся, зако́н грехо́вных до конца́ уклони́вся,/ и яви́лся еси́ столп предъиды́й Боже́ственнаго собо́ра, Богоно́се Фа́всте,/ и мона́хов пра́вило и о́браз,/ и ве́рных непоколеби́мое утвержде́ние.
И ны́не и при́сно и во ве́ки веко́в. Ами́нь.
Богородичен: И́стинную Богоро́дицу Тя вси ро́дове родо́в сла́вят,/ святе́йшу А́нгел я́ве бы́вшу, Пресвята́я Де́во./ Те́мже вопию́:/ освяти́ мою́ ду́шу, оскверни́вшуюся страстьми́.
Песнь 6
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Собесе́дник яви́лся еси́ А́нгелом,/ о́нех б́о поревнова́л еси́ житию́ на земли́,/ путь ше́ствуя, Далма́те, и воздержа́нием истнева́я те́ло твое́,/ наста́вниче мона́хов и пра́вило вои́стинну изве́стнейшее.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Ре́вностию Госпо́дни любве́, я́коже Илия́, распаля́емь, блаже́нне,/ я́ко Аха́ва, предста́теля тьмы со дерзнове́нием, Исаа́кие, обличи́л еси́,/ неду́говавша лука́вою А́рия безу́мнаго е́ресию.
Сла́ва Отцу́ и Сы́ну и Свято́му Ду́ху.
Яви́стеся наста́вницы заблу́ждшим и приста́нища ве́рно спаса́емым,/ чудотво́рцы, Богоно́снии отцы́ Фа́всте, и Далма́те, и Боже́ственный Исаа́кие,/ служи́тели Иису́совы, мона́шествующих свети́льницы присносве́тлии.
И ны́не и при́сно и во ве́ки веко́в. Ами́нь.
Богородичен: Неду́говавшую ду́шу мою́ грехми́ и вся́кими врага́ искуше́ньми,/ посеще́нием, Пресвята́я Де́во, спаси́тельным Твои́м поспеше́нием посети́/ и исцели́, я́ко Блага́, Богоро́дице, упова́ние мое́, Препе́тая.
Кондак, глас 2
Поще́нием возсия́вшия, я́ко свети́ла,/ и е́реси разврати́вшия ве́рою,/ пе́сньми Исаа́кия восхва́лим и с Далма́том Фа́вста,/ я́ко Христо́вы уго́дники,/ Того́ моля́щия о всех нас.
Икос
Кто доволе́н от челове́к изрещи́ преподо́бных оте́ц све́тлыя доброде́тели,/ и по́двиги, и труды́, ре́вность Боже́ственную,/ дерзнове́ние чи́стое жития́, Боже́ственная дея́ния,/ я́же на земли́ соверши́ша си́и, я́ко А́нгели?/ Но, оба́че сия́ чту́ще, Тро́ицу ве́рно воспое́м:/ ти́и бо, Той све́тло со а́нгельскими ли́ки предстоя́ще,/ при́сно мо́лят о всех нас.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
У́глие яви́стеся, Боже́ственным вжига́еми огне́м Уте́шителя,/ попаля́юще убо вещь зло́бную,/ ве́рныя же просвеща́юще, Богоно́снии, во ве́ки.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Те́ло умертви́в поще́нием, покори́л еси́ ду́ху. Далма́те,/ и зло́бу вра́жию потопи́л еси́/ ту́чами душе́вных слез твои́х, Богоно́се, во ве́ки.
Сла́ва Отцу́ и Сы́ну и Свято́му Ду́ху.
Кончи́ну блаже́нну обре́тше, в Небе́снем живете́ Ца́рствии/ и преподо́бным лико́м совокупи́стеся, отцы́, с ни́миже вопие́те:/ Го́споди Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Уста́вила еси́ ток сме́ртный, Безсме́ртнаго Бо́га ро́ждши,/ еди́на Богоро́дице Чи́стая, Ему́же ве́рою пое́м:/ благослове́н еси́, Го́споди Бо́же, во ве́ки.
Песнь 8
Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Жезло́м кре́стным мо́ре страсте́й расто́ргше,/ всю фарао́на мы́сленнаго си́лу погуби́сте, преподо́бнии,/ и мона́хов мно́жество свяще́нное к земли́ безстра́стия,/ пою́ще сего́ непреста́нно, спасо́сте, отцы́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Ерети́чествующих возвыше́ние проявле́нно смири́л еси́,/ издале́ча прови́дев тех разруше́ние,/ ни́щим помо́гл еси́ и вождь был еси́ слепы́х,/ ста́рости жезл и вдови́ц утеше́ние, Далма́те, взыва́я:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Ты ко трем четы́редесяте дний пости́лся еси́,/ а́бие толи́ки па́че естества́ усну́л еси́,/ бо́дренно твое́ серде́чное о́ко, му́дре, и Бо́жиею просвеща́емь заре́ю./ К Нему́же вопие́ши, Далма́те:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Всели́выйся Госпо́дь в нескве́рное чре́во твое́ всю чи́сту и светоза́рну Тя показа́./ Те́мже, оскверне́на мя го́рькими обы́чаи и вре́дными проти́вных нахо́ды,/ очи́сти, Де́во, и сподо́би пе́ти:/ лю́дие, превозноси́те Го́спода во ве́ки.
Песнь 9
Ирмос: Устраши́мся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Возмого́ша, си́лою Христо́вою укрепля́еми,/ немощно́е шата́ние борца́ победи́ти, небому́дреннии, мона́хов нача́льницы,/ и, ны́не крася́щеся, преидо́ша к дворо́м мы́сленным, ра́дующеся.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Яви́стеся трисве́тлыя свещи́, невече́рнюю зарю́ испуща́юще,/ цве́ти неувяда́емии ра́йстии, благоуха́юще мы́сли ве́рных, отцы́ требога́тии./ Те́мже па́мять ва́шу всепра́зднственную ве́рно пра́зднуем.
Припев: Преподо́бнии отцы́ Исаа́кие, Далма́те и Фа́всте, моли́те Бо́га о на́с.
Я́коже венце́м благоле́пным, обложе́ни, прему́дрии, безстра́стием/ и оде́яни Боже́ственныя любве́ исправле́ньми,/ в черто́г Христо́в, ра́дующеся, внидо́сте, почива́юще/ и боле́зней воздая́ния прие́млюще.
Сла́ва Отцу́ и Сы́ну и Свято́му Ду́ху.
Облиста́ сия́нием мы́сленным, озаря́ющи ве́рных соста́вы,/ Боже́ственная па́мять ва́ша, блаже́ннии,/ Далма́те, Фа́всте и Исаа́кие, мона́шествующих нача́льницы, свети́льницы всеми́рнии./ Те́мже просвети́те и на́ша душе́вная чу́вствия.
И ны́не и при́сно и во ве́ки веко́в. Ами́нь.
Богородичен: Просвети́, Две́ре Све́та, се́рдце мое́, зло́бою осле́пшее,/ и да не в смерть попусти́ши ны́не усну́ти ми, нечи́стыми по́мыслы при́сно помрача́емому,/ да сла́влю Тя благода́рно, Богоро́дице Всепе́тая.