Минея, 5 Июля, Канон преподобномученицы Елисаветы
Глас 8
Песнь 1
Ирмос: Поим Господеви, / проведшему люди Своя сквозе Чермное море, / яко Един славно прославися.
Припев: Свята́я преподобному́ченице Елисаве́то, моли́ Бо́га о нас.
Подаждь, Господи, души моей просвещение / и уста моя недостойная отверзи, / да воспою угодницу Твою, преподобномученицу Елисавету, / в нейже имя Твое святое славно прославися.
Припев: Свята́я преподобному́ченице Елисаве́то, моли́ Бо́га о нас.
Чадо Господне возлюбленное, чудная Елисавето, / вкупе с телесною красотою и величием княжеским / духовною добротою украсилася еси приумноживши данный тебе от Бога талант / и себе яко дар Тому принесши.
Сла́ва Отцу́ и Сы́ну и Свято́му Ду́ху.
Отечество и сродников оставила еси / и в новом отечестве, светом православныя веры просветившися, / Богу и людем любовию и милосердием послужила еси / и мучение от безбожных претерпела еси. / Сего ради прослави тя Господь и Небеснаго Отечества наследницу показа.
И ны́не и при́сно и во ве́ки веко́в. Ами́нь.
Богородичен: Воспоим славу Пресвятей Деве Богородице, / приведошася бо Царю Христу вслед Ея девы и жены, / с ними же и святая преподобномученица Елисавета, / небеснаго чертога жительница / и Господни трапезы брачныя причастница.
Песнь 3
Ирмос: Ты еси утверждение / притекающих к Тебе, Господи, / Ты еси свет омраченных, / и поет Тя дух мой.
Припев: Свята́я преподобному́ченице Елисаве́то, моли́ Бо́га о нас.
Все упование твое на Господа возложила еси, / и Той утверждение тебе бысть, / Елисавето многострадальная, / егда честныя останки мужа твоего своима рукама собираше, / не ожесточила еси сердца твоего, / ниже отчаянию предалася еси, / но милостивно безбожнаго убийцу простила еси, / теплую молитву Господеви возносящи.
Припев: Свята́я преподобному́ченице Елисаве́то, моли́ Бо́га о нас.
Красоту мира сего и сладость презревши, Богомудрая, / постническаго жития восхотела еси, / и обитель основала еси, / в нейже себе от утех мира сокрывши, / милосердием твоим мира не оставила еси / и страждущим добре послужила еси.
Сла́ва Отцу́ и Сы́ну и Свято́му Ду́ху.
Христа Подвигоположника / пред мысленным взором всегда имевши, мученице, / Тому последовала еси не обинующися / и крест свой понесла еси, / себе отвергающися, ближним же послуживши, / и в послушании воле Господней пребыла еси даже до смерти, / юже мужественно приявши, / Господом укрепляемая, / за мучителей молилася еси.
И ны́не и при́сно и во ве́ки веко́в. Ами́нь.
Богородичен: О Пресвятая Мати Дево! / Светом Сына Твоего Божественнаго / омраченную грехми душу мою милостивно просвети / и теплотою молитв Твоих растопи лед жестокосердия моего / и укрепи мене, / да последую узким путем ко спасению, / наставницу имея преподобномученицу Елисавету.
Седален, глас 5
От юности Господа возлюбивши, / Тому поработала еси, блаженная Елисавето, / и явилася еси яко почва плодородная, / на нюже доброе семя Православия всеяно бывше, сторичный плод принесе. / Сего ради буди нам ходатаица / и умоли Создателя безплодие сердец наших разрешити, / да принесем и мы Ему службу трудом и молитвою, / наипаче же любовию и смирением. / Аще же призовет нас Господь на подвиг исповедничества / и страданий за веру, / помолися за нас, во еже не отринути нам чашу сию, / но все до конца претерпети, / и тако краткою стезею Царства Небеснаго достигнути.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Не замедли, Пресвятая Богородице, / молитву Твою Богу принести о Российстей земли и о людех ея. / Погибаем бо от множества прегрешений и вопием Ти: / Ты еси управительница и Споручница / всех, упование на Тя возложивших.
Песнь 4
Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.
Припев: Свята́я преподобному́ченице Елисаве́то, моли́ Бо́га о нас.
Якоже Марфа, послужила еси Господеви, / преподобномученице Елисавето, / в малых сих и убогих, и недужных, и падших образ Его прозревши. / Научи и мене в ближнем моем Владыку Христа почитати / и Ему послужити.
Припев: Свята́я преподобному́ченице Елисаве́то, моли́ Бо́га о нас.
Благую часть, о Елисавето, избрала еси, / уподобившися Марии, / и все помышление твое ко Господу простерла еси, / непрестанно молящися и во словесех Его поучающися, / и воле Его, сиречь промышлению благому, себе предала еси.
Сла́ва Отцу́ и Сы́ну и Свято́му Ду́ху.
Помолитеся Господеви о нас, / святыя жены Марфо и Марие / с преподобномученицею Елисаветою, / яже, яко добрая наставница, / не токмо сама стезею подвига сугубаго пройде / и земли кротких достиже, / но и иных на оный спасительный путь привлече. / О святая Елисавето, / приими и нас яко учеников твоих / и на стезю спасения настави.
И ны́не и при́сно и во ве́ки веко́в. Ами́нь.
Богородичен: Блажено чрево Твое, Пренепорочная, / носившее Зиждителя всех, / Тобою к нам снизшедшаго, / и блажени людие, Тобою к Нему притекшия. / Сего блаженства причастники и нас сотвори, / Тебе присно прославляющих.
Песнь 5
Ирмос: Утренююще вопием Ти, / Господи, спаси ны: / Ты бо еси Бог наш, / разве Тебе иного не вемы.
Припев: Свята́я преподобному́ченице Елисаве́то, моли́ Бо́га о нас.
Неизреченным смотрением Господним / горькия воды страдания причастившися, / сладость Духа Божественнаго в сердце своем обрела еси, / да не вжаждешися во веки / и да напоиши нас немощных водою живою любве и милости, / яже истече из твоего сердца.
Припев: Свята́я преподобному́ченице Елисаве́то, моли́ Бо́га о нас.
Воля Господня во святых Его совершается: / ходят бо неотступно по стопам заповедей Его. / Такожде и ты, о преподобномученице, / всю себе Господеви предавши, / радость, вкупе же и скорбь от Того с благодарением прияла еси / и послужила еси Ему, подвизающися благочестно. / Научи и мене достойно Господу послужити / и в послушании воле Его пребыти, / да не будет мне иго Его благое в скорбь / и бремя Его легкое в тягость, / но да утвердится и упокоится в Нем сердце мое.
Сла́ва Отцу́ и Сы́ну и Свято́му Ду́ху.
Помолися о мне, преподобномученице, / да будут молитвы твоя врачевством многоболезненной души моей, / недугующей грехми. / Никтоже бо просящий отыде от тебе без помощи и утешения.
И ны́не и при́сно и во ве́ки веко́в. Ами́нь.
Богородичен: Дерзновения не имам / просити у Господа отпущения грехов моих; / сего ради к Тебе, Владычице, припадаю, / преклонив колена души и телесе. / Тебе вверяю немощное моление мое, / да принесеши его ко престолу Всевышняго / и да приемлю Тобою от Него спасение, радость и мир.
Песнь 6
Ирмос: Ризу мне подаждъ светлу, / одеяйся светом яко ризою, / многомилостиве Христе Боже наш.
Припев: Свята́я преподобному́ченице Елисаве́то, моли́ Бо́га о нас.
К кому прибегну в нищете моей, / аще не к тебе, святая преподобномученице Елисавето? / Обнажися душа моя от всякия добродетели, / уязвися от прилогов вражиих. / Но вем нищелюбие твое, / яко николиже отринула еси просящаго: / аще ли убог, и аще и грешен, аще и злое сердце име. / Тако и мене недостойнаго и уничиженнаго не отжени, / но помолися Господеви о исправлении жития моего.
Припев: Свята́я преподобному́ченице Елисаве́то, моли́ Бо́га о нас.
Да не будет мне в осуждение молитвословие сие, / из глубины зол моих возносимое: / хотят бо сомкнутися надо мною волны моря житейскаго, / и пути благаго не вем. / Но ты помолися о мне, святая Елисавето, / хотящи мене спасти и на стезю правую наставити. / Ты бо и прежде, никем не гнушающися и к немощем грешных снисходящи, / многим путь ко спасению показа.
Сла́ва Отцу́ и Сы́ну и Свято́му Ду́ху.
Приими мене с любовию, милостивая Елисавето, / якоже и всегда принимала еси подобных мне больных и сирых, / и крепостию оскудевших. / Утоли глад и жажду, / исцели болезни души моея и, присно ко Христу молящися, / испроси мне у Него еже потребно ко спасению.
И ны́не и при́сно и во ве́ки веко́в. Ами́нь.
Богородичен: Богородице Дево, / радости Виновнаго рождшая, / просвети радостию Твоею сердце мое, / помраченное страстьми многими, / тьмою уныния плененное, / лютым разслаблением недугующее. / Омый скверну души моея и подаждь ми светлую одежду, / в нейже представ ко Господу, не изгнан буду из чертога брачнаго.
Кондак, глас 2
Величие подвига веры кто повесть: / во глубине земли, яко в раи светлости, / страстотерпица Великая княгиня Елисавета / со Ангелы во псалмех и пениих радовашеся / и, убиение претерпевающи, / о безбожных мучителех взываше: / Господи, прости им грех сей, / не ведят бо, что творят. / Тоя молитвами, Христе Боже, / помилуй и спаси души наша.
Икос
Прежде кончины убиение претерпела еси, Елисавето мученице, егда убийца мужа твоего порази неисцельною раною душу твою, и тако для радостей мира сего умерши, воскресла еси, якоже древле Тавифа, во еже немощным послужити. Сему же подвигу радости нескончаемыя причастившися, напитала еси душу свою светом Божественныя любве; сего ради не убоялася еси мучителей, убивающих тело, егоже разрешившися, душею востекла еси ко Господу, Егоже моли помиловати и спасти души наша.
Песнь 7
Ирмос: Отроцы еврейстии в пещи / попраша пламень дерзновенно, / и на росу огнь преложиша, вопиюще: / благословен еси, Господи Боже, во веки.
Припев: Свята́я преподобному́ченице Елисаве́то, моли́ Бо́га о нас.
Согрешихом, беззаконновахом, / — взывают ко Господу российстии народи, / — отступихом от Тебе, якоже древле Израиль. / Сего ради оставлени быхом ходити в воле нашей и ныне наказание терпим. / Но молитвами святыя преподобномученицы Елисаветы / и всех новомученик Твоих, / умилосердися, Господи, / пощади нас и вразуми, / да обратимся и покаемся от злых дел наших, / и хвалу Тебе воспоем во веки.
Припев: Свята́я преподобному́ченице Елисаве́то, моли́ Бо́га о нас.
Се суд Божий над отечеством нашим: / терние бо ненависти и волчцы безверия / произведе нам Русская земля; / еще же и плевелами ересей засеяна бысть от врага. / Сохрани, Господи, молитвами всехвальныя Елисаветы и всех новомучеников / благочестия добрыя злаки, / да не подавлени будут от терния, / ниже смесятся с плевелами, / но да возрастут и умножатся, / и да вопиют людие российстии: / благословен еси, Господи Боже, во веки.
Сла́ва Отцу́ и Сы́ну и Свято́му Ду́ху.
Имамы ли надежду на спасение, / рцы нам, о преподобномученице Елисавето? / Не всуе ли моление наше? / Не сынове ли есмы избивших пророки? / Ни, но твои чада по духу есмы. / Ты же мати наша еси и наставница, / на твои молитвы надеемся и с тобою воспеваем Господеви во веки.
И ны́не и при́сно и во ве́ки веко́в. Ами́нь.
Богородичен: Радуйся, многострадальная Русская земле: / Божия бо Матерь покров Свой святый над тобою распростре / и молится о тебе неусыпно / со всеми новомученики российскими, / во еже спастися всем чтущим Ю / и прославляющим во веки.
Песнь 8
Ирмос: Седмерицею пещь / халдейский мучитель / богочестивым неистовно разжже; / силою же лучшею спасены сия видев, / Творцу и Избавителю вопияше: / отроцы, благословите, / священницы, воспойте, / людие, превозносите во вся веки.
Припев: Свята́я преподобному́ченице Елисаве́то, моли́ Бо́га о нас.
Егда убиваема была еси, / о преподобномученице, / не поколебася вера твоя и милосердие не оскуде. / В час бо предсмертнаго твоего борения / не оставила еси служения страждущим / и к Богу взывала еси, вопиющи: / благословите, людие, Господа, / и превозносите Его во веки.
Припев: Свята́я преподобному́ченице Елисаве́то, моли́ Бо́га о нас.
Якоже древле, Господи, мученицы Твои / свидетелие веры в мире безбожном быша, / тако и святая преподобномученица Елисавета / веру свою от дел своих явила и смертию запечатлела есть, / и многия русския люди научила Тебе воспевати во веки.
Сла́ва Отцу́ и Сы́ну и Свято́му Ду́ху.
Покажи Мне веру твою и любовь от дел твоих, / — взывает ко мне Господь, / — и не имам, что отвещати, / есмь бо яко древо безплодное, и несть мне оправдания. / Но смирися пред Господем душа моя и волю Его творити восхоте. / Укрепи мене, Елисавето, на подвиг сей, / да не отступит от мене благое сие произволение. / и да вопию присно: / отроцы, благословите, / священницы, воспойте, / людие, превозносите во вся веки.
И ны́не и при́сно и во ве́ки веко́в. Ами́нь.
Богородичен: Аще не имам любве, / есмь, якоже рече Апостол, медь звенящая и кимвал звяцаяй. / Смутися сердце мое от слов сих, / зане о мне речени суть. / Еще мало, и погибну во оскудении моем. / Но покрый, Всебогатая Богородице, милосердием Твоим скудость мою, / и спаси мя, превозносящаго Господа во веки.
Песнь 9
Ирмос: Ужасеся о сем небо, / и земли удивишася концы, / яко Бог явися человеком плотски, / и чрево Твое бысть пространнейшее Небес: / тем Тя, Богородицу, / Ангелов и человек чиноначалия величают.
Припев: Свята́я преподобному́ченице Елисаве́то, моли́ Бо́га о нас.
Восплакася душа моя, / яко видех землю Русскую кровьми святых Божиих обагренную. / Господь мой благ есть: како попусти сие? / Не плачися, о душе, / молися святой преподобномученице Елисавете / и разумей смотрение Божие: / Той бо мучеников Своих зело возлюби / и дерзновение им дарова / молитися о нас грешных.
Припев: Свята́я преподобному́ченице Елисаве́то, моли́ Бо́га о нас.
Не ведомы нам судьбы Твоя, Боже: / что еще будет с нами в жизни сей, / киими путями хощеши нас ко спасению привести? / Но даждь нам волю Твою без смущения и ропота прияти / и добрым подвигом подвизатися, / и Царства Небеснаго достигнути, / идеже угодницы Твоя собраны суть, / с нимиже и преподобномученица Елисавета, / юже ныне прославляем.
Сла́ва Отцу́ и Сы́ну и Свято́му Ду́ху.
Мощи твоя святыя / во Святей земли почивают, Елисавето, / душею же присно Господу предстоиши в Горнем Царстве Его / и молишися дерзновенно о всех людех, / наипаче же о прославляющих тя и подвигу твоему подражающих, / к ним же сподобит приблизити Господь и нас недостойных.
И ны́не и при́сно и во ве́ки веко́в. Ами́нь.
Богородичен: Се суд близ есть; / не попусти, Господи, поползновения стопам нашим, / не даждь уклонитися во зло, ниже в леность, / отжени от душ наших смущение и сомнение, / да не погибнем яко беззаконнии, / но да спасемся со святыми, / молитвами Пречистыя Твоея Матере / и святыя угодницы Твоея княгини Елисаветы.
Светилен
Что сие бысть? / Лютая ли погибель или веры православныя торжество? / Иже херувимы образующе тайно, / Господа в сердцах своих носили есте, / святии мученицы алапаевстии, / к Немуже и преставилися есте, / имуще на устех Херувимскую песнь. / Како забуду воспети страданий ваших? / В род и род память ваша, Богоноснии, / и во веки благодарение наше ко Господу, / Иже дивен есть во святых Своих.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Премудрость Ипостасную / и Слово Пресущное, / и врача душ и телес Рождшая, / гноения и раны души моея исцели лютыя и временныя, / и сердца моего устави болезнь, Дево.