Минея, 12 Апреля, Кано́н
Глас 8
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Преподо́бне о́тче Васи́лие, моли́ Бо́га о на́с.
Несказа́нный Свет тебе́ и трисия́нен/ в неподви́жимем Ца́рствии Небе́снем возсия́, о́тче,/ и пра́ведных весе́лие досто́йно тя прия́т.
Припев: Преподо́бне о́тче Васи́лие, моли́ Бо́га о на́с.
Отверзо́шася врата́ тебе́ еде́мская,/ и к святи́телем приложи́лся еси́ святи́тель,/ и перворо́дных Це́ркви сочета́лся, достосла́вне.
Сла́ва Отцу́ и Сы́ну и Свято́му Ду́ху.
Зако́нно пострада́в и чи́сто свяще́нство до конца́ соблю́д,/ с Небе́сными ликова́ти свяще́нники сподо́бился еси́.
И ны́не и при́сно и во ве́ки веко́в. Ами́нь.
Богородичен: Пло́ти по ипоста́си соедини́вся И́же от Тебе́ прия́тием,/ всех Зижди́тель про́йде несказа́нно, Богома́ти,/ и челове́ком приближи́тися благоизво́ли.
Песнь 3
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Припев: Преподо́бне о́тче Васи́лие, моли́ Бо́га о на́с.
Досточу́дная и пресла́вная па́мять твоя́/ ра́достно правосла́вных увеселя́ет собо́ры.
Припев: Преподо́бне о́тче Васи́лие, моли́ Бо́га о на́с.
О́блак телесе́ совле́к, преподо́бне,/ и, сою́зов разреши́вся, к Бо́гу прибли́жился еси́.
Сла́ва Отцу́ и Сы́ну и Свято́му Ду́ху.
Кончи́ну блаже́нную и наслажде́ние, преподо́бне, избра́нных,/ я́ко избра́нен, досто́йно прия́л еси́.
И ны́не и при́сно и во ве́ки веко́в. Ами́нь.
Богородичен: Имея́ Тя Помо́щницу, не постыжду́ся, Пречи́стая Ма́ти Бо́жия,/ име́я Тя Предста́тельницу, враг мои́х изба́влюся.
Седален, глас 3
Вели́кое со́лнце вселе́нней возсия́л еси́ доброде́тельми твои́ми:/ сия́ньми и чуде́с светлостьми́ просвети́л еси́ ве́рных составле́ния/ и потреби́л еси́ страсте́й омраче́ние,/ о́тче Васи́лие, Христа́ Бо́га моли́ дарова́ти нам ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Преподо́бне о́тче Васи́лие, моли́ Бо́га о на́с.
Моли́твы творя́ к Бо́гу, вознесе́нную мысль низложи́л еси́ злому́дренныя е́реси/ и Це́рковь, о́тче, возвесели́л еси́.
Припев: Преподо́бне о́тче Васи́лие, моли́ Бо́га о на́с.
В ски́ниях Небе́сных тя Подвигополо́жник, о́тче, всели́,/ неосла́бное твое́ противле́ние к противобо́рцем прие́м.
Сла́ва Отцу́ и Сы́ну и Свято́му Ду́ху.
Преда́ний ра́ди храни́мых Це́ркве Бо́жия отгна́ния претерпе́л еси́/ и, побе́ды прие́мля, сконча́лся еси́.
И ны́не и при́сно и во ве́ки веко́в. Ами́нь.
Богородичен: Бо́га, Его́же родила́ еси́, Чи́стая Де́во, Сего́ моли́/ рабо́м Твои́м дарова́ти согреше́ний проще́ние.
Песнь 5
Ирмос: У́тренююще, вопие́м Ти,/ Го́споди, спаси́ ны:/ Ты бо еси́ Бог наш,/ ра́зве Тебе́, ино́го не ве́мы.
Припев: Преподо́бне о́тче Васи́лие, моли́ Бо́га о на́с.
Боже́ственная все́льшися благода́ть в тя, Богоно́се,/ па́стыря ве́рнейша Це́ркве тя показа́.
Припев: Преподо́бне о́тче Васи́лие, моли́ Бо́га о на́с.
Умертви́в пло́ти твоея́ мудрова́ние и стра́сти,/ жи́зни ду́ху после́довал еси́, сла́вне.
Сла́ва Отцу́ и Сы́ну и Свято́му Ду́ху.
Целому́дренно и пра́ведно житие́ твое́ соверши́в, Богому́дре,/ прия́л еси́ доброде́телей воздая́ние.
И ны́не и при́сно и во ве́ки веко́в. Ами́нь.
Богородичен: Су́щи Пресвяты́й храм,/ безстра́стия исто́чника родила́ еси́, Де́во Ма́ти Всенепоро́чная.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глуби́ны зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.
Припев: Преподо́бне о́тче Васи́лие, моли́ Бо́га о на́с.
Просвеща́емь красото́ю Небе́сных сия́ний,/ престо́л, и́же на земли́, остави́л еси́, преподо́бне,/ и насле́дие нетле́нно в земли́ кро́тких, я́ко кротча́йший, восприя́л еси́.
Припев: Преподо́бне о́тче Васи́лие, моли́ Бо́га о на́с.
Пре́лести смея́ся ху́льных ерети́к,/ Боже́ственному и благоче́стному правосла́вных ра́зуму преусе́рдно научи́л еси́,/ ико́ну чествова́ти Спа́сову, досточу́дне.
Сла́ва Отцу́ и Сы́ну и Свято́му Ду́ху.
Жела́ние твое́ к Бо́гу испо́лнися, пресла́вне:/ преста́вися бо к Нему́, бо́жественно ра́дуяся,/ и ны́не све́тлости святы́х, о́тче, зри́ши и красоты́.
И ны́не и при́сно и во ве́ки веко́в. Ами́нь.
Богородичен: Ме́ртвости и тли изба́вися челове́чество/ естество́м бо Жизнода́вца безсе́менно родила́ еси́, Де́во Всенепоро́чная,/ на благодея́ние восхваля́ющих Тя ве́рно.
Кондак, глас 2
Вы́шняго све́том озари́вся, блаже́нне,/ просвеща́еши вся,/ и́же любо́вию честву́ющия твое́, о́тче, честно́е страда́ние./ Васи́лие священнострада́льне,/ моли́ Христа́ Бо́га/ непреста́нно о всех нас.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Преподо́бне о́тче Васи́лие, моли́ Бо́га о на́с.
О, несказа́ннаго весе́лия, его́же сподо́бился еси́, всеблаже́нне, прия́ти,/ в невеще́ственнем Све́те живы́й, и поя́:/ благослове́н еси́, Го́споди Бо́же, во ве́ки.
Припев: Преподо́бне о́тче Васи́лие, моли́ Бо́га о на́с.
Венце́м Боже́ственнаго благоле́пия, всеблаже́нне, красно́ удобря́емь,/ лику́еши, вопи́я с Вы́шними вои́нствы:/ благослове́н еси́, Го́споди Бо́же, во ве́ки.
Сла́ва Отцу́ и Сы́ну и Свято́му Ду́ху.
Таи́нник сый Тро́ицы, та́йнам служи́тель Небе́сным,/ Влады́ку нам ми́лостива сотвори́, вопию́щим:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Е́вы дре́внюю кля́тву преложи́ла еси́, Чи́стая,/ на благослове́ние, Сы́на Бо́жия ро́ждши./ Ему́же вси, благослове́н еси́, – зове́м, – во ве́ки вся.
Песнь 8
Ирмос: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зе́ло прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.
Припев: Преподо́бне о́тче Васи́лие, моли́ Бо́га о на́с.
Ско́рбных жития́ и лю́таго слия́ния изба́влен,/ ра́дость, всеблаже́нне, и весе́лие е́же па́че сло́ва прия́л еси́, поя́:/ благослови́те, вся дела́, Го́спода и превозноси́те Его́ во ве́ки.
Припев: Преподо́бне о́тче Васи́лие, моли́ Бо́га о на́с.
Духо́вными уче́нии те́пле противля́яся,/ языковре́дия ху́льников, о́тче, удо́бне разреши́л еси́, священнотаи́нниче,/ благослови́те, – поя́, – вся дела́, Го́спода и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Я́ко красно́ ме́сто, в не́же всели́лся еси́, священноявле́нне,/ я́ко красно́, о́тче, селе́ние, иде́же пребыва́еши, поя́:/ благослови́те, вся дела́, Го́спода и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Предста́тельницу, вси ве́рнии, стяжа́хом Тя, Пречи́стая,/ и, Твои́ми моли́твами лю́тых изба́вльшеся, Христу́ вопие́м:/ благослови́те, вся дела́, Го́спода и превозноси́те Его́ во ве́ки.
Песнь 9
Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Преподо́бне о́тче Васи́лие, моли́ Бо́га о на́с.
Свя́то твое́ житие́, о́тче, препроводи́л еси́/ и, Бо́гу угоди́в де́лы твои́ми,/ Небе́сное Ца́рство прия́л еси́, му́дре.
Припев: Преподо́бне о́тче Васи́лие, моли́ Бо́га о на́с.
Тече́ние сконча́в,/ ве́ру же соблю́д и по́двиг соверши́в, Васи́лие,/ пра́вды прия́л еси́, ра́дуяся, вене́ц.
Сла́ва Отцу́ и Сы́ну и Свято́му Ду́ху.
Зва́ние, преблаже́нне, получи́л еси́ Боже́ственное/ и соверше́нное жела́ний исполне́ние,/ ныне у́бо моли́ не преста́й о ста́де твое́м.
И ны́не и при́сно и во ве́ки веко́в. Ами́нь.
Богородичен: То́ка слез мои́х не отврати́ся,/ Я́же от вся́каго лица́ вся́ку сле́зу отъе́мшаго,/ Де́во, Христа́ ро́ждшая.