Минея, 17 Апреля, Кано́н преподобнаго Симео́на, его́же краегране́сие: Венча́ю блаже́ннаго тя Симео́на песнопе́нии. Творе́ние Ио́сифово
Глас 5
Песнь 1
Ирмос: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.
Припев: Священному́чениче Симео́не, моли́ Бо́га о на́с.
Венце́м нетле́ния оде́явся и престо́лу Госпо́дню, всеблаже́нне, предстоя́,/ ве́рою чту́щия твое́ свято́е страда́ние/ моли́твами твои́ми при́сно спаса́й.
Припев: Священному́чениче Симео́не, моли́ Бо́га о на́с.
Че́стен сосу́д яви́лся еси́ Боже́ственнаго Ду́ха, Симео́не Богоно́се,/ И́мже пома́зався, упа́сл еси́ лю́ди бога́тны/ па́лицею Боже́ственных уче́ний, му́чениче, на воде́ разу́мней.
Сла́ва Отцу́ и Сы́ну и Свято́му Ду́ху.
Уста́вил еси́ пре́лести, му́дре, тече́ния сла́дких твои́х слове́с Боже́ственными тече́нии/ и кро́вными ка́плями, святи́телю сла́вне,/ сего́ ра́ди ве́рно пое́м тя.
И ны́не и при́сно и во ве́ки веко́в. Ами́нь.
Богородичен: Но́сиши рука́ми, Де́во, вся Нося́щаго/ и пита́еши я́ко Младе́нца Пода́теля млека́./ Того́ у́бо моли́ лю́ди Твоя́ вся уще́дрити, ве́рно пою́щия Тя.
Песнь 3
Ирмос: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, еди́не Бла́же и Человеколю́бче.
Припев: Священному́чениче Симео́не, моли́ Бо́га о на́с.
Красно́ души́ движе́ния творя́ и ходя́ стезе́ю, к Бо́гу веду́щею,/ вся́каго безпу́тия лука́ваго уклони́лся еси́/ и взя́лся еси́ к жи́зненней две́ри, сла́вне, ве́чнаго поко́я.
Припев: Священному́чениче Симео́не, моли́ Бо́га о на́с.
Удали́в по́мысл от страсте́й плотски́х,/ безкро́вны, о́тче, прине́сл еси́ же́ртвы Сло́ву, поже́ршемуся нас ра́ди,/ и, Сего́ возвеща́я па́че сло́ва Боже́ственное воплоще́ние,/ пожре́н был еси́, я́ко а́гнец незло́бив.
Сла́ва Отцу́ и Сы́ну и Свято́му Ду́ху.
Свя́то твое́ проводи́в житие́, пребога́те, со святы́ми ны́не всели́лся еси́,/ страда́ньми просвети́в твою́ ду́шу, и возсия́в со́лнца, блаже́нне, светле́е,/ и сын све́та быв.
И ны́не и при́сно и во ве́ки веко́в. Ами́нь.
Богородичен: Кля́твы прароди́тельныя нас свободи́ла еси́,/ благослове́ньми всех венча́вшаго Сло́ва вопло́щши,/ Чи́стая, при́сно благослове́нная,/ страстоте́рпцев удобре́ние и согреша́ющих очище́ние.
Седален, глас 1
Я́ко со́лнце, нам свята́я твоя́ возсия́ па́мять, му́дре Симео́не святи́телю,/ страда́вших с тобо́ю ве́рных озаря́ющи, ю́же днесь сотворя́юще, вопие́м:/ моли́те о нас, страстоте́рпцы, еди́наго Человеколю́бца.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Боже́ственнаго естества́ не отлу́чься, плоть быв во чре́ве Твое́м,/ но Бог вочелове́чься и пребы́сть, и́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чную, еди́н Госпо́дь./ Того́ приле́жно моли́ дарова́ти нам ве́лию ми́лость.
Песнь 4
Ирмос: Боже́ственное Твое́ разуме́в истоща́ние/ прозорли́во, Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.
Припев: Священному́чениче Симео́не, моли́ Бо́га о на́с.
Ведо́м свя́зан, разреши́л еси́ хи́трости лука́ваго, священнотаи́нниче пребога́те,/ пострада́в до́блественне, венцы́ нетле́ния восприя́л еси́.
Припев: Священному́чениче Симео́не, моли́ Бо́га о на́с.
Глаго́л твои́х стрела́ми/ уязви́л еси́, священному́чениче Симео́не, беззако́ннующих собо́ры/ и огне́м крове́й многобо́жную лесть попали́л еси́.
Сла́ва Отцу́ и Сы́ну и Свято́му Ду́ху.
Соста́вим ли́ки, блажа́ще Богоно́снаго Симео́на, и Ана́нию сла́внаго,/ и с ни́ми подо́бныя, му́жески пострада́вшия му́ченики.
И ны́не и при́сно и во ве́ки веко́в. Ами́нь.
Богородичен: Из Тебе́ Пра́вды Со́лнце возсия́в па́че ума́,/ вселе́нную просвети́, Богора́дованная Отрокови́це,/ и пре́лести зи́му разруши́.
Песнь 5
Ирмос: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко еди́н Благоутро́бен.
Припев: Священному́чениче Симео́не, моли́ Бо́га о на́с.
Столп и утвержде́ние Це́ркви Бо́жии я́влься, преблаже́нне,/ твои́м страда́нием непрекло́нну и непоколеби́му сию́ во ве́ки соблюди́/ хода́тайствы твои́ми.
Припев: Священному́чениче Симео́не, моли́ Бо́га о на́с.
Пе́сньми ублажа́ем житие́ твое́,/ гоне́ния же и сопротивле́ния, Симео́не пребога́те,/ и́хже ра́ди сподо́бился еси́ блаже́нныя кончи́ны.
Сла́ва Отцу́ и Сы́ну и Свято́му Ду́ху.
Ми́ром Боже́ственнаго пома́зания па́стырь бы́в,/ за ста́до пожре́н был еси́, блаже́нне, я́коже ове́н наро́чит,/ и перворо́дных Це́ркви возвесели́л еси́.
И ны́не и при́сно и во ве́ки веко́в. Ами́нь.
Богородичен: Да обря́щу Тя, Влады́чице,/ изыма́ющую мя в час Суда́ осужде́ния, ве́рно сла́вяй Тя,/ и мук изба́влюся, жду́щих мя.
Песнь 6
Ирмос: Неи́стовствующееся бу́рею душетле́нною,/ Влады́ко, Христе́, страсте́й мо́ре укроти́/ и от тли возведи́ мя,/ я́ко Благоутро́бен.
Припев: Священному́чениче Симео́не, моли́ Бо́га о на́с.
Яви́лся еси́ Боже́ственнаго испо́лнен утеше́ния, блаже́нне Симео́не,/ мече́м кончи́ну блаже́нную прие́м со святы́ми,/ све́тло пострада́вшими му́ченики.
Припев: Священному́чениче Симео́не, моли́ Бо́га о на́с.
Ю́нии и ста́рцы, мона́си и свяще́нницы,/ до́брым по́двигом подви́гшеся за Христа́,/ я́коже а́гницы, пожре́ни бы́ша.
Сла́ва Отцу́ и Сы́ну и Свято́му Ду́ху.
Блаже́нно житие́ пожи́вше, страда́льцы,/ кончи́ну от Христа́ прия́сте блаже́нную,/ мече́м сконча́стеся, ра́дующеся.
И ны́не и при́сно и во ве́ки веко́в. Ами́нь.
Богородичен: Из Тебе́ возсия́, Пресвята́я, Соде́тель,/ и заре́ю Боже́ственнаго ра́зума/ су́щия в нощи́ неразу́мия просвети́.
Песнь 7
Ирмос: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.
Припев: Священному́чениче Симео́не, моли́ Бо́га о на́с.
Све́щник явля́я ра́зум,/ свет позна́лся еси́, преподо́бне, во тьме спя́щим неве́дения/ и разори́л еси́ огнеслужи́телей тьму, пострада́в пресла́вно.
Припев: Священному́чениче Симео́не, моли́ Бо́га о на́с.
Яви́лся еси́ посреди́ му́ченик, водя́ сонм,/ с ни́миже, сконча́вся мече́м, взыва́л еси́, Симео́не Богоно́сне:/ Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Собо́р многочи́сленных му́ченик почти́м,/ че́стно совокупля́емь от разли́чных градо́в,/ священноде́йственник Боже́ственных и мона́хов Богоно́сных.
И ны́не и при́сно и во ве́ки веко́в. Ами́нь.
Богородичен: Исцели́, Пренепоро́чная, стра́сти се́рдца моего́,/ уста́ви смуще́ние ума́ моего́ обурева́емое, и спаси́ мя, пою́ща:/ Бо́же, благослове́н еси́.
Песнь 8
Ирмос: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.
Припев: Священному́чениче Симео́не, моли́ Бо́га о на́с.
Угль мы́сленный, Симео́не, показу́емь огню́ не послужи́л еси́, преблаже́нне,/ вещь же го́рьку многобо́жия попали́в,/ к незаходи́мому сия́нию, преподо́бне, преста́вился еси́.
Припев: Священному́чениче Симео́не, моли́ Бо́га о на́с.
Исцели́ на́ша не́мощи, му́чениче, мрак отжени́ серде́ц на́ших/ и ве́чныя жи́зни покажи́ прича́стники/ твои́ми ко Влады́це всех хода́тайствы.
Сла́ва Отцу́ и Сы́ну и Свято́му Ду́ху.
Во́инство че́стно, собо́р Бо́жий му́ченик воспое́м, сточи́сленное,/ и́мже нача́льник бя́ше Симео́н до́блий,/ я́ко па́стырь и вели́к Це́ркве столп.
И ны́не и при́сно и во ве́ки веко́в. Ами́нь.
Богородичен: Да честно́е Твое́ прояви́т рождество́ купина́,/ неопали́ма ви́дена бысть, Пречи́стая:/ Огнь бо Боже́ственный во утро́бе прие́мши, ника́коже опали́лася еси́./ Те́мже Тя пое́м.
Песнь 9
Ирмос: Иса́ие, лику́й, Де́ва име́ во чре́ве/ и роди́ Сы́на Емману́ила,/ Бо́га же и Челове́ка, Восто́к И́мя Ему́./ Его́же велича́юще, Де́ву ублажа́ем.
Припев: Священному́чениче Симео́не, моли́ Бо́га о на́с.
Я́ко прия́тно кади́ло, прине́слся еси́ всех Царю́,/ я́ко заколе́ние свяще́нно, я́ко предобра́ же́ртва прия́тная,/ я́ко ми́ро, я́ко приноше́ния, я́ко ши́пок благово́нен, святи́телю досточу́дне.
Припев: Священному́чениче Симео́не, моли́ Бо́га о на́с.
Утвержде́ние быв, святи́телю, всем ве́рным,/ поже́рлся еси́, я́коже ове́н, и к мы́сленным преста́вился еси́ ца́рством/ и Царю́ всех и Бо́гу, блаже́нне, предстои́ши,/ Боже́ственною сла́вою облиста́емь.
Сла́ва Отцу́ и Сы́ну и Свято́му Ду́ху.
Свята́я па́мять твоя́, я́коже вели́кое со́лнце,/ нам возсия́, Симео́не, днесь, му́дре, и и́же с тобо́ю му́ченик,/ с ни́миже нам проси́ от Христа́ благода́ти, и ми́лости,/ и согреше́ний избавле́ния.
И ны́не и при́сно и во ве́ки веко́в. Ами́нь.
Богородичен: Све́тлыми сия́ньми, Пречи́стая Ма́ти Бо́жия, озари́ мой ум,/ тьмо́ю лю́таго неразу́мия одержи́мый,/ я́ко да, улучи́в Боже́ственное просвеще́ние,/ вели́чия Твоя́ возвещу́, Присноде́во.