Минея, 15 Января, Кано́н свята́го Па́вла, творе́ние Иоа́нна мона́ха
Глас 8
Песнь 1
Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Припев: Преподо́бне о́тче Па́вле, моли́ Бо́га о на́с.
Па́вла Богоно́снаго, я́ко мона́шествующих удобре́ние,/ ве́рнии, соше́дшеся, пе́сньми по до́лгу почита́ем.
Припев: Преподо́бне о́тче Па́вле, моли́ Бо́га о на́с.
Был еси́ пусты́ни пе́рвый жи́тель, Па́вле сла́вне,/ и Небе́снаго Ца́рствия насле́дник показа́лся еси́ поще́нием.
Сла́ва Отцу́ и Сы́ну и Свято́му Ду́ху.
Всего́ себе́ воздержа́нием очи́стив, всеблаже́нне,/ жили́ще яви́лся еси́ Бо́жие и А́нгелов единосе́льник.
И ны́не и при́сно и во ве́ки веко́в. Ами́нь.
Богородичен: Пречи́стая Богоро́дице,/ яже воплоще́нно Присносущное и Пребожественное Сло́во/ па́че естества́ рождшая, пое́м Тя.
Песнь 3
Ирмос: Утвержде́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.
Припев: Преподо́бне о́тче Па́вле, моли́ Бо́га о на́с.
К Бо́гу о́ком твоея́ души́ взира́я, о́тче,/ Того́ возлюби́л еси́, возненави́дев земна́я/ и А́нгельскую соверши́в жизнь.
Припев: Преподо́бне о́тче Па́вле, моли́ Бо́га о на́с.
Луча́ми, о́тче, доброде́телей, страсте́й отгна́л еси́ мглу я́ве,/ просвеще́ние Ду́ха во твое́м се́рдцы прие́м.
Сла́ва Отцу́ и Сы́ну и Свято́му Ду́ху.
Небе́сным хле́бом пита́яся, я́ко Илия́ дре́вле вра́ном,/ мы́сленный отбе́гл еси́, о́тче, Иезаве́ли, к покро́ву Христо́ву.
И ны́не и при́сно и во ве́ки веко́в. Ами́нь.
Богородичен: Царь сла́вы и Творе́ц, обагри́в кровьми́, Богороди́тельнице,/ Свою́ багряни́цу омочи́в, таи́нственно очервлени́.
Седален, глас 1
Ми́ра кра́сная от се́рдца возненави́дев/ и Еди́наго Бо́га от души́ возлюби́в,/ пусты́ню, я́ко во обита́тельный град, Па́вле, пости́гл еси́./ В еди́нех то́кмо виде́ниих упражня́яся,/ яви́лся еси́, я́ко А́нгел, с пло́тию живы́й./ Тем тя почита́ем.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Я́ко невозде́ланная, Де́во, лоза́,/ красне́йший Грозд прозябла́ еси́, источа́ющ нам вино́ спаси́тельное,/ всех веселя́щее ду́ши и телеса́./ Те́мже, я́ко вину́ Тя до́брых блажа́ще при́сно,/ со А́нгелом вопие́м Тебе́:/ ра́дуйся, Благода́тная.
Песнь 4
Ирмос: Та́йно проро́к предзря́ от Де́вы Тя, Сло́ве, воплоща́ема,/ пе́сненно вопия́ше:/ сла́ва си́ле Твое́й, Го́споди.
Припев: Преподо́бне о́тче Па́вле, моли́ Бо́га о на́с.
Насажде́н в до́му Бо́жии, доброде́телей благопло́дие прозя́бл еси́/ и плотска́я увяди́л еси́ воста́ния по́стничеством твои́м.
Припев: Преподо́бне о́тче Па́вле, моли́ Бо́га о на́с.
Огне́м любве́ Бо́жия страсте́й те́рние попали́л еси́/ и тебе́ сама́го Ду́ха, о́тче, жили́ще показа́л еси́.
Сла́ва Отцу́ и Сы́ну и Свято́му Ду́ху.
Жезло́м доброде́тельныя твоея́ жи́зни, я́коже зве́ри, стра́сти отгна́л еси́,/ те́мже и твоя́ смерть зве́ри на погребе́ние твое́ собра́.
И ны́не и при́сно и во ве́ки веко́в. Ами́нь.
Богородичен: Багряни́ца истка́ся та́инственная из чи́стых крове́й Твои́х всех Бо́гу,/ в ню́же оде́явся, Богоро́дице, соедини́ нас Бо́гу и Отцу́.
Песнь 5
Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Припев: Преподо́бне о́тче Па́вле, моли́ Бо́га о на́с.
В пе́ниих и поще́ниих, моли́твах же и бде́ниих пожи́в, преподо́бне,/ к Бо́гу всели́лся еси́.
Припев: Преподо́бне о́тче Па́вле, моли́ Бо́га о на́с.
Житие́ твое́ всечестно́е бысть в Го́споде, Па́вле всеблаже́нне,/ и погребе́ние твое́ пресла́вно.
Сла́ва Отцу́ и Сы́ну и Свято́му Ду́ху.
Тече́ние поще́ния, преподо́бне, сконча́в,/ Вы́шним си́лам собесе́дник, о́тче, был еси́.
И ны́не и при́сно и во ве́ки веко́в. Ами́нь.
Богородичен: Де́ву по Рождестве́ пое́м Тя, Богоро́дице,/ Ты бо Бо́га Сло́ва пло́тию ми́ру родила́ еси́.
Песнь 6
Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Припев: Преподо́бне о́тче Па́вле, моли́ Бо́га о на́с.
Ру́ки просте́р к Бо́гу, ду́шу твою́, преподо́бне, Тому́ преложи́л еси́,/ во дни и нощи́ благоугожда́я Ему́.
Припев: Преподо́бне о́тче Па́вле, моли́ Бо́га о на́с.
Просла́виша успе́ние твое́ А́нгелов во́инства,/ проро́ков же чи́ни и святы́х апо́столов, о́тче преподо́бне.
Сла́ва Отцу́ и Сы́ну и Свято́му Ду́ху.
Бу́рю страсте́й пребе́г, ве́трилом, преподо́бне, кра́йняго по́стничества/ в небу́рное приста́нище устреми́лся еси́ Христо́во.
И ны́не и при́сно и во ве́ки веко́в. Ами́нь.
Богородичен: Еди́на сло́вом пло́тию Сло́во Ро́ждшая,/ изба́ви, мо́лимся, сете́й врага́ ду́ши на́ша.
Кондак, глас 3
Я́ко свети́ло незаходя́щее мы́сленнаго Со́лнца,/ соше́дшеся, днесь восхва́лим в пе́снех:/ возсия́л бо еси́ су́щим во тьме неразу́мия,/ вся возводя́ к Боже́ственней высоте́,/ фиве́ев украше́ние, Па́вле преподо́бне, отце́в и по́стников тве́рдое основа́ние.
Песнь 7
Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди Бо́же оте́ц на́ших.
Припев: Преподо́бне о́тче Па́вле, моли́ Бо́га о на́с.
Мудрова́ние плотско́е покори́в Ду́ху, преподо́бный вопия́ше:/ благослове́н еси́ во ве́ки, Го́споди Бо́же оте́ц на́ших.
Припев: Преподо́бне о́тче Па́вле, моли́ Бо́га о на́с.
Спасе́н быв от вра́жиих се́тей, преподо́бне, в ра́дости вопия́ше:/ благослове́н еси́ во ве́ки, Го́споди Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Страсте́й пла́мень весь попра́в по́стнически, преподо́бный вопия́ше:/ благослове́н еси́ во ве́ки, Го́споди Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Не́бо сотвори́вый Де́ву,/ и из Нея́, я́ко со́лнце, возсия́в,/ благослове́н еси́ во ве́ки, Го́споди Бо́же оте́ц на́ших.
Песнь 8
Ирмос: Безнача́льного Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.
Припев: Преподо́бне о́тче Па́вле, моли́ Бо́га о на́с.
Поревнова́л еси́ Иоа́нну Богому́дрому Предте́чи, в пусты́ни пости́вся,/ с ни́мже и жизнь получи́ти сподо́бился еси́ и́стинно присносу́щную.
Припев: Преподо́бне о́тче Па́вле, моли́ Бо́га о на́с.
Угаси́л еси́ страсте́й пе́щи, о́тче наш, воздержа́ния росо́ю, вопия́ всеблагоче́стно:/ лю́дие, превозноси́те Христа́ во ве́ки.
Сла́ва Отцу́ и Сы́ну и Свято́му Ду́ху.
Рай и́стинно соде́лал еси́ пусты́ню,/ в ней преизя́ществовав во вся́кой доброде́тели,/ те́мже и ра́я сла́дости сподо́бился еси́.
И ны́не и при́сно и во ве́ки веко́в. Ами́нь.
Богородичен: Я́ко иму́щи к Бо́гу дерзнове́ние,/ Всепе́тая Богома́ти Мари́е,/ умоли́ Его́ бед изба́вити ве́рою Тя пою́щия.
Песнь 9
Ирмос: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,/ пе́сньми Рождество́ Твое́ велича́ем.
Припев: Преподо́бне о́тче Па́вле, моли́ Бо́га о на́с.
Я́ко сокро́вище тя мы́сленное сокрове́нно, преподо́бне, откры́ Бог Анто́нию,/ нам же в сла́ву и ра́дование.
Припев: Преподо́бне о́тче Па́вле, моли́ Бо́га о на́с.
В страх Бо́жий себе́ сама́го пригвозди́в, о́тче преподо́бне,/ и сме́рти поуче́нием житие́ соверши́в, жи́зни сподо́бился еси́.
Сла́ва Отцу́ и Сы́ну и Свято́му Ду́ху.
Я́ко дерзнове́ние к Бо́гу стяжа́в,/ моли́ о и́же на земли́ соверша́ющих ве́рою па́мять твою́ сию́,/ Па́вле блаже́нне.
И ны́не и при́сно и во ве́ки веко́в. Ами́нь.
Богородичен: Собезнача́льнаго Отцу́ и Свято́му Ду́ху заче́нши Христа́/ и ро́ждши несказа́нно, Де́во, моли́, е́же спасти́ся нам.