Минея, 26 Июля, Кано́н преподо́бному
Глас 2
Песнь 1
Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Припев: Преподо́бне о́тче Моисéе, моли́ Бо́га о на́с.
Гряди́те, лю́дие, принесе́м хвале́ние Бо́гу, прославля́ющему уго́дника Своего́/ и показа́вшему того́ во всех искуше́ниих непреодоле́нна,/ и воспои́м Ему́ песнь: сла́вно просла́вися.
Припев: Преподо́бне о́тче Моисéе, моли́ Бо́га о на́с.
Наве́д враг всезло́бный на господи́на твоего́, блаже́ннаго кня́зя Бори́са,/ смерть окая́нным братоуби́йцею,/ и тебе́ с ним восхо́те погуби́ти,/ но ты, спасе́н от злых, воспе́л еси́:/ сла́ва Бо́гу о всем, бу́ди И́мя Госпо́дне благослове́нно.
Припев: Преподо́бне о́тче Моисéе, моли́ Бо́га о на́с.
Руко́ю Бо́жиею спасе́н быв от сме́рти,/ прише́л еси́ в Ки́ев к Предисла́ве, сестре́ Яросла́вли,/ иде́же жа́лостию по господи́не свое́м одержи́м, сказа́л еси́ о нем вся, ели́ко пострада́,/ а́ки а́гнец безгла́сен, не проти́вяся предаде́ себе́ в ру́це и́щущих его́ кро́ве, и пел еси́:/ Бог наш сла́вно просла́вися.
Сла́ва Отцу́ и Сы́ну и Свято́му Ду́ху.
Вре́мя не́кое стра́ха ра́ди сокры́лся еси́, преподо́бне, челове́ческое по себе́ показу́я,/ до́ндеже откры́ тя Госпо́дь, а́ки свети́ло, всем те́сный путь теку́щим во о́браз,/ его́же мно́гими искуше́нии чист соблю́л еси́, поя́:/ Бо́же мой, в немощне́й пло́ти мое́й сла́вно просла́вися.
И ны́не и при́сно и во ве́ки веко́в. Ами́нь.
Богородичен: Вся могу́щая о Бо́зе, Цари́це,/ предста́ни ско́ро мольбу́ Тебе́ принося́щим и виждь,/ коли́ко воста́ша на ны душеуби́йцы,/ и́хже стрела́ми си́лы Твое́я до конца́ погуби́,/ да непреста́нно Тебе́ вопие́м:/ я́ко вели́ко и стра́шно враго́м на́шим и́мя Твое́, сла́вно просла́вися.
Песнь 3
Ирмос: На ка́мени мя ве́ры утверди́в,/ разшири́л еси уста́ моя́ на враги́ моя́,/ возвеселя́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.
Припев: Преподо́бне о́тче Моисéе, моли́ Бо́га о на́с.
На тве́рдем ка́мени ве́ры душе́вная чу́вства твоя́ утверди́в, шел еси́ в плен,/ упова́ние име́я на Еди́наго, тяжча́йшия ра́ны и крест претерпе́вшаго Иису́са,/ я́ко Той изба́вит тя от се́ти ловца́;/ те́мже на вся́ком ме́сте пел еси́:/ несть пра́веден, па́че Тебе́, Го́споди.
Припев: Преподо́бне о́тче Моисéе, моли́ Бо́га о на́с.
Тя́жкими по ру́ку и по но́гу обложе́н желе́зы/ и пятоле́тнюю пре́жде подъе́м тесноту́,/ не разби́лся еси́ умо́м, но, несвя́зан име́яй язы́к,/ о всех приклю́чшихся на ме́стех благодари́л еси́ Бо́га, поя́:/ пра́ведно вся сия́ наве́л еси́ на мя,/ несть бо пра́ведника, па́че Тебе́, Го́споди.
Припев: Преподо́бне о́тче Моисéе, моли́ Бо́га о на́с.
Кра́сна тя лице́м, светле́йша же душе́ю ви́дящи во у́зах,/ не́кая ю́на от благоро́дных жен вдови́ца/ стрело́ю любве́ твоея́ уязви́ся и прельща́ше тя мно́го, свя́те;/ ты же ей отвеща́л еси́:/ ника́коже во́ли твое́й повину́ся,/ я́ко Бог изво́ли та́ко, Ему́же пою́:/ несть пра́веден, па́че Тебе́, Го́споди.
Припев: Преподо́бне о́тче Моисéе, моли́ Бо́га о на́с.
Красоте́ твое́й теле́сней, наипа́че же целому́дренным словесе́м любоде́йца чудя́щися,/ мно́жицею покуша́шеся ласка́тельными свои́ми словесы́ улови́ти тя,/ но ты, блаже́нне, тверде́йший име́яй ра́зум, му́дре глаго́лал еси́:/ кто, когда́, послу́шав жены́, спасе́ся?/ И взыва́л еси́ к Бо́гу: спаси́ мя, Бо́же, от напа́сти сея́,/ несть бо пра́веден, па́че Тебе́, Го́споди.
Сла́ва Отцу́ и Сы́ну и Свято́му Ду́ху.
Мно́жицею прельще́нии належа́щей жене́ скве́рней, мно́жицею отвещава́л еси́:/ иску́плен сый кро́вию Христа́ моего́,/ ника́коже раб жене́ безсту́дней сотворю́ся,/ ея́же не позна́х от рожде́ния моего́, и не бу́ди ми погуби́ти труда́ во у́зах сих,/ и́хже ра́ди упова́ю избы́ти ве́чных уз, а́ще пребу́ду та́ко, терпя́ и благода́рне поя́:/ несть пра́веден, па́че Тебе́, Го́споди.
И ны́не и при́сно и во ве́ки веко́в. Ами́нь.
Богородичен: Плени́цами лю́тых грехопаде́ний от врага́ мя уловле́нна/ и в темни́це омраче́ния у́мнаго затворе́нна ви́дящи, Влады́чице,/ разреши́ вско́ре Твои́м предста́тельством,/ луча́ми же благосе́рдия Твоего́ просвети́ ум мой и обрати́ пе́ти:/ несть ины́я скоре́йшия в по́мощь, ра́зве Тебе́, Святе́йшая Мари́е Де́во.
Седален, глас 5
Огне́м красоты́ твоея́ любоде́йца вы́ну опаля́ющися, на лука́вый сове́т устреми́ся,/ помы́сли бо, а́ще тя цено́ю у плени́вшаго иску́пит,/ удо́бь во́ли свое́й преклони́ти возмо́жет;/ ты же, преподо́бне, имы́й страх Бо́жий в се́рдце, непреста́нно взыва́л еси́:/ спаси́ мя, Бо́же, от такова́го неи́стовства,/ к Тебе́ бо, Влады́це моему́, прибега́ю.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Огнь Боже́ственный неопа́льно в пречи́стое чре́во прие́мшая,/ огне́м мя страсте́й вы́ну пали́ма,/ ороси́ поне́ ка́плею благода́ти Твоея́, Госпоже́, да непреста́нно пою́:/ спаси́ мя, я́ко к Тебе́, Влады́чице моя́, прибега́ю.
Песнь 4
Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Припев: Преподо́бне о́тче Моисéе, моли́ Бо́га о на́с.
Прише́дши жена́, стра́стию плене́на, к плени́вшему тя, блаже́нне, даде́ це́ну за тя/ и, пое́мши, разреши́, хотя́щи грехо́вными у́зы связа́ти ду́шу твою́,/ но ты, кресто́м себе́ огради́в, шел еси́ в дом тоя́, псало́мски поя́:/ а́ще пойду́ посреде́ се́ни сме́ртныя, не убою́ся зла, я́ко со мно́ю Бог,/ Его́же си́ле сла́ва бу́ди.
Припев: Преподо́бне о́тче Моисéе, моли́ Бо́га о на́с.
Влады́це твоему́ уподо́бился еси́,/ я́коже бо Того́, купи́вше, иуде́е на страсть гото́вяху,/ та́ко и тебе́ скве́рная любоде́йца гото́вяше,/ а́ще души́ твоея́ не урани́т страстьми́, то те́ло страда́нием обложи́т./ Ты же лу́чше те́лом изво́лил еси́ страда́ти, не́жели душе́ю, поя́:/ сла́ва си́ле Твое́й, Го́споди.
Припев: Преподо́бне о́тче Моисéе, моли́ Бо́га о на́с.
Разжже́ния стра́стнаго в те́ле твое́м да не ощути́ши,/ вся́кую сла́стную пи́щу и мя́гкия ри́зы отри́нул еси́ от Тебе́,/ вме́сто же о́нех в пост и моли́тву обле́кл еси́ себе́,/ изволя́я хлеб сух и во́ду с чистото́ю,/ не́жели разли́чная бра́шна и вино́ со скве́рною я́сти,/ и, не побежде́н быв от врага́, пел еси́:/ сла́ва си́ле Твое́й, Го́споди.
Припев: Преподо́бне о́тче Моисéе, моли́ Бо́га о на́с.
Втора́го Ио́сифа ви́дите, бра́тие,/ я́коже бо той, оста́вль ри́зу в руку́ любоде́йцы, бежа́ греха́,/ та́ко и сей, красоты́ риз себе́ обнажи́в,/ избежа́ от руки́, влеку́щия его́ к скве́рному смеше́нию,/ и сим посрами́ неви́димаго врага́, хотя́щаго ду́шу и те́ло страда́льца оскверни́ти,/ но ничто́же успе́, поя́ше бо:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Втору́ю еги́птяныню обре́т, враг покуша́шеся блаже́ннаго улови́ти,/ не терпя́ше бо серде́чныя чистоты́, ни добро́ты лица́ зре́ти,/ е́йже и А́нгели дивля́хуся, зову́ще:/ сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Добро́ты Твоея́ вожделе́в, Царь Вы́шний,/ Сове́том О́тчим и осене́нием Пресвята́го Ду́ха,/ я́ко дождь на руно́, сни́де в пречи́стое чре́во Твое́, Де́во./ Па́дшую добро́ту ума́ моего́ возста́ви па́ки, Влады́чице, да пою́ Ти непреста́нно:/ сла́ва си́ле Твое́й, Госпоже́ Богоро́дице.
Песнь 5
Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го Бога не зна́ем.
Припев: Преподо́бне о́тче Моисéе, моли́ Бо́га о на́с.
Све́та мы́сленнаго лишити́ тя безу́мная не возмо́гши,/ чу́вственный покуси́ся отъя́ти, преподо́бне,/ те́мже вве́рже тя в мра́чную темни́цу, иде́же гла́дом и жа́ждею моря́ше тя, ты же взыва́л еси́:/ Бо́же мой, не оста́ви мене́, ра́зве бо Тебе́ ино́го не зна́ю.
Припев: Преподо́бне о́тче Моисéе, моли́ Бо́га о на́с.
И́же Илию́ и Па́вла Фиве́йскаго препита́вый иногда́ в пусты́ни,/ Той и на тебе́ удиви́ Свою́ ми́лость,/ преклони́ бо Он еди́наго раба́ жены́ тоя́ на милосе́рдие/ и повеле́ пита́ти тя та́йно,/ ты же, а́ки посеще́ние Бо́жие бы́ти вменя́я, взыва́л еси́:/ кроме́ Тебе́, ино́го Бо́га не зна́ю.
Припев: Преподо́бне о́тче Моисéе, моли́ Бо́га о на́с.
Мно́зи, неве́дуще в тебе́, свя́те, де́йствуемыя Бо́жия благода́ти,/ увещава́ху тя, да повине́шися во́ли госпожи́ твоея́/ и бу́деши господи́н той и всему́ име́нию ея́./ Ты же вся сия́ презре́л еси́, любве́ ра́ди Бо́жия, глаго́ля:/ кроме́ тоя́, не хощу́ ины́я позна́ти.
Припев: Преподо́бне о́тче Моисéе, моли́ Бо́га о на́с.
Не влады́чества тле́ннаго,/ но е́же над страстьми́ плотски́ми госпо́дствовати взыска́л еси́, преблаже́нне о́тче наш Моисе́е,/ те́мже дарова́ тебе́ Бог, я́ко не то́кмо твоя́ стра́сти порабо́тил еси́ ду́ху,/ но и про́чим во искуше́ниих посо́бствовати прия́л еси́ власть,/ сего́ ра́ди взыва́л еси́:/ ничто́же ина́го, кроме́ любве́ Бо́жия, не хощу́ позна́ти.
Сла́ва Отцу́ и Сы́ну и Свято́му Ду́ху.
Посмея́лся еси́ безу́мию любоде́йцы,/ я́ко повеле́ тя рабо́м со сла́вою гра́ды своя́ и ве́си обводи́ти/ и покланя́тися тебе́, а́ки своему́ господи́ну,/ но ты велегла́сно целому́дрия глаго́лы изре́кл еси́:/ всу́е тружда́етеся с повеле́вшею вам сие́ твори́ти,/ аз бо, ра́зве Бо́га, ничто́же хощу́ зна́ти.
И ны́не и при́сно и во ве́ки веко́в. Ами́нь.
Богородичен: Ра́дующагося врага́, я́ко улови́ ны грехолю́бия сластьми́, посрами́, Госпоже́,/ нас же, в бу́ри жите́йския молвы́ бе́дствующих, обвесели́/ и к ти́хому приста́нищу покро́ва Твоего́ дости́гнути по́мощь да́руй:/ ра́зве бо Тебе́ ины́я в печа́ли Помо́щницы не зна́ем.
Песнь 6
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподо́бне о́тче Моисéе, моли́ Бо́га о на́с.
В бе́здне страсте́й не погрузи́лся еси́,/ ни ри́зы твоея́ в скве́рны омочи́л еси́, преподо́бне,/ те́мже, жела́юща тя, Бо́гом наставля́емый чернори́зец та́йно облече́ во а́нгельскую оде́жду/ и научи́, ка́ко соблюсти́ ту непоро́чну, ниже́ убоя́тися стра́ха, ни врагу́ плещи́ да́ти:/ я́ко Бог есть, Иже рабы́ Своя́ от тли избавля́ет.
Припев: Преподо́бне о́тче Моисéе, моли́ Бо́га о на́с.
В бе́здне грехо́внаго разжже́ния погружа́ема любоде́йца,/ отча́явшися о тебе́ наде́жды своея́, ра́ны тя́жкия возложи́ на тя, преподо́бне,/ повеле́ бо, растя́гши тя, же́злием кре́пко би́ти,/ я́ко и земли́ напо́лнитися крове твоея́,/ ты же, благода́рственно сия́ терпя́, взыва́л еси́:/ от тли, Бо́же мой, возведи́ мя.
Припев: Преподо́бне о́тче Моисéе, моли́ Бо́га о на́с.
Устраши́ти тя неустраши́маго хотя́ще,/ изве́ствоваху, коли́ка муче́ния име́л еси́, блаже́нне, претерпе́ти,/ а́ще не сотвори́ши во́ли госпожи́ твоея́,/ ты же, на вся гото́в сый, отвеща́л еси́ дерзнове́нно:/ ни огнь, ни ра́ны возмо́гут мя разлучи́ти от любве́ Бо́жия,/ На́ньже упова́ю, я́ко от тли мя изба́вит.
Припев: Преподо́бне о́тче Моисéе, моли́ Бо́га о на́с.
Не покори́лся еси́ жене́, безсту́дством омраче́нней,/ но па́че обличи́л еси́ ту, преподо́бне, я́ко преоби́девшую страх Бо́жий,/ и безсту́дне к скве́рному смеше́нию ну́дившую поплева́л еси́, не боя́ся я́рости тоя́, ни гне́ва,/ име́л бо еси́, о́тче, наде́жду на Бо́га, я́ко Той тя от руки́ ея́ изба́вит.
Сла́ва Отцу́ и Сы́ну и Свято́му Ду́ху.
Ви́дящи жена́ себе́ тобо́ю, о́тче, посра́млену,/ предста́ви тя кня́зю, от него́же суд прия́ коне́чный,/ да, е́же хо́щет, на тебе́ твори́т,/ иму́щая власть по мно́гих му́ках и сме́рти преда́ти тя./ Но ты, проро́чески предви́дя о́ных поги́бель, отвеща́л еси́:/ са́ми ско́ро оты́дете в ве́чную поги́бель,/ мене́ же Христо́с, Бог мой, от тоя́ изба́вит.
И ны́не и при́сно и во ве́ки веко́в. Ами́нь.
Богородичен: Предстою́ миролю́бному кня́зю вы́ну/ и, а́ки пле́нник, слы́шу суд на ся,/ да е́же хо́щут любоде́йныя стра́сти, творя́т на мне,/ я́же, прие́мше о́бласть на мя, обнажа́ются в чу́вствех мои́х/ и ну́ждею влеку́т мя при́сно любоде́йствовати мы́слию с ни́ми./ Но до́ндеже в сем ми́ре сме́ртная секи́ра не посече́ мя,/ Ты, ми́рнаго Царя́ Небе́снаго су́щи Ма́ти,/ прожени́ ты́я и от тли, Богоро́дице, мя изба́ви.
Кондак, глас 3
В Вы́шних еди́наго Бо́га ища́,/ земна́я вся презре́л еси́,/ о телеси́ свое́м неради́в,/ на му́ки му́жески себе́ вдал еси́,/ глад, жа́жду, у́зы, в темни́це затворя́емь, до́блественно претерпе́л еси́,/ бие́ния, кро́ве излия́ние и удо́в отре́зание,/ чи́стаго ра́ди де́вства твоего́,/ му́жески поне́сл еси́./ И ны́не с де́вственными ли́ки предстоя́ Пресвяте́й Тро́ице,/ от всех искуше́ний моли́ изба́витися вопию́щим ти:/ ра́дуйся, Моисе́е, о́тче блаже́ннейший.
Песнь 7
Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.
Припев: Преподо́бне о́тче Моисéе, моли́ Бо́га о на́с.
Богопроти́вное веле́ние от кня́зя любоде́йца прие́мши,/ без студа́ влеча́ше тя к скве́рному смеше́нию,/ жела́ше бо насы́титися твоея́ красоты́, преиспещре́нныя чистото́ю,/ е́йже и А́нгели удивля́хуся, зову́ще ко устро́ившему в тебе́ сию́:/ Созда́телю Бо́же, благослове́н еси́.
Припев: Преподо́бне о́тче Моисéе, моли́ Бо́га о на́с.
Вся стре́лы стра́стныя враг пусти́ на тя, свя́те, хотя́ уязви́ти тя,/ но, сам уя́звен, стеня́ше, я́ко ви́де неодоле́нна тебе́ су́ща, но па́че зову́ща:/ Бо́же, благослове́н еси́.
Припев: Преподо́бне о́тче Моисéе, моли́ Бо́га о на́с.
Всу́е труди́шися, о же́но! – рекл еси́, преблаже́нне, –/ ника́коже нечистоте́ твое́й косну́ся, предзря́ одесну́ю мене́ вы́ну Бо́га,/ ниже́ взыгра́ется плоть моя́, я́ко страх Госпо́день ко́сти ми пояда́ет, тем зову́:/ Бо́же, благослове́н еси́.
Припев: Преподо́бне о́тче Моисéе, моли́ Бо́га о на́с.
Тве́рдость ума́ твоего́ любоде́йца хотя́щи умягчи́ти,/ повеле́ па́лицами би́ти тя и на всяк день по сто ран налага́ти,/ но ни та́ко поколеба́ся, я́ко одебеле́ плоть твоя́ в любо́вь Бо́жию,/ Ему́же стори́чествующий плод прине́сл еси́, зовы́й:/ Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Лю́тая бие́ния и удо́в отре́зание прие́м, свя́те,/ был еси́ а́ки мертв и ели́ жив лежа́,/ но стоя́щему врагу́ отре́зал еси́ главу́, ме́ртва же и неде́йственна того́ показа́в, взыва́л еси́:/ Бо́же мой, кре́пость моя́, благослове́н еси́.
И ны́не и при́сно и во ве́ки веко́в. Ами́нь.
Богородичен: В лю́тыя напа́сти впад, ника́коже восклони́тися могу́,/ Ты, Влады́чице моя́, пода́ждь ми кре́пкую Свою́ ру́ку и возста́ви мя па́ки на но́зе,/ да хожду́ в пути́ Госпо́дни пра́вы, зовы́й к Тебе́:/ от ро́да в род благослове́нно и́мя Твое́ бу́ди.
Песнь 8
Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.
Припев: Преподо́бне о́тче Моисéе, моли́ Бо́га о на́с.
В пещь о́гненную любостра́стнаго греха́ влеко́м,/ Бо́га еди́наго призва́л еси́, блаже́нне, дави́дски глаго́ля:/ Бо́же, в по́мощь мою́ вонми́,/ и, вшед на пла́мень, неопали́м пребы́л еси́,/ врага́ па́че опали́в многоко́зненную главу́, не хотя́щаго пе́ти Го́спода во ве́ки.
Припев: Преподо́бне о́тче Моисéе, моли́ Бо́га о на́с.
Огне́м любодея́ния не моги́й враг опали́ти чистоты́ твоея́,/ воздви́же лю́тое гоне́ние на и́ночествующих полки́,/ и изгна́ни бы́ша от о́бласти неми́лостиваго кня́зя вси,/ его́же пости́же ско́ро гнев Бо́жий, по проро́честву твоему́, свя́те,/ я́ко не хотя́ше во всей держа́ве свое́й име́ти пою́щих Го́спода во ве́ки.
Припев: Преподо́бне о́тче Моисéе, моли́ Бо́га о на́с.
Кня́зю внеза́пу зле ду́шу изве́ргшу, бысть мяте́ж и молва́ в лю́дех,/ воста́ша бо раби́ и изби́ша господе́й свои́х,/ с ни́миже и му́чившая тя любоде́йца поги́бе, и взы́де кровь на главу́ ея́./ Ты же, преподо́бне, воспе́л еси́:/ о всех де́лех благословлю́ Го́спода во ве́ки.
Припев: Преподо́бне о́тче Моисéе, моли́ Бо́га о на́с.
Возда́в хвалу́ свободи́вшему тя Бо́гу,/ прише́л еси́ в пеще́ру к преподо́бному Анто́нию,/ нося́ му́ченическия на те́ле свое́м я́звы, и́хже вси ви́девшии зва́ху:/ по́йте, вся дела́, Го́спода и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Скры́ти хотя́ светле́йшую па́че со́лнца чистоту́ твою́, о́тче,/ в те́мную всели́лся еси́ пеще́ру,/ в не́йже украси́л еси́ сию́ поще́нием и всено́щными стоя́нии,/ те́мже яви́ о тебе́ Бог, коли́ку и́маши благода́ть всем в искуше́ниих посо́бствовати,/ да сла́вится И́мя Его́ во ве́ки.
И ны́не и при́сно и во ве́ки веко́в. Ами́нь.
Богородичен: Скры́ти мня́йся пред О́ком Всеви́дящим студ греха́ моего́,/ на всяк день разжже́нием плотски́м пали́м, беззако́ние к беззако́нию прилага́ю./ Но пре́жде да́же не откры́ются пред а́нгельским и челове́ческим позо́ром дела́ моя́,/ помози́ ми, Чи́стая, избы́ти сицева́го неи́стовства,/ да сла́влю и́мя Твое́ во ве́ки.
Песнь 9
Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́риии, единому́дренно пе́сньми велича́ем.
Припев: Преподо́бне о́тче Моисéе, моли́ Бо́га о на́с.
От Бо́га Бог, соше́дшее Сло́во, просла́ви тя еще́ в жи́зни сей, свя́те, чудотво́рными да́ры:/ не́коему бо любодея́нием бори́му прикоснове́нием жезла́ твоего́ омертве́ша стра́сти,/ и, прие́м от Тебе́ за́поведь никогда́же бесе́довати с жено́ю,/ е́же сотвори́в, про́чая ле́та поживе́ ми́рно, тебе́ велича́я.
Припев: Преподо́бне о́тче Моисéе, моли́ Бо́га о на́с.
От ро́да в род чистота́ твоя́ сла́вится,/ ея́же ра́ди мно́го пострада́в, прия́л еси́ блаже́нство чи́стых се́рдцем,/ преста́вився же от вре́менныя жи́зни сея́, чи́сте зри́ши Пресвяту́ю Тро́ицу./ Помина́й и нас, преподо́бне, па́мять твою́ почита́ющих.
Припев: Преподо́бне о́тче Моисéе, моли́ Бо́га о на́с.
Мертвеца́ тя нарече́ Госпо́дь, я́ко умертви́л еси́ по́хоти плотски́я терпе́нием чу́дным,/ и и́маши си́лу прикаса́ющимся моще́м твои́м стра́сти умерщвля́ти,/ я́ко сотвори́л еси́ многотерпели́вому Иоа́нну,/ и́же, прие́м мир в косте́х свои́х, возвели́чи Бо́га,/ прославля́ющаго святы́х Свои́х.
Припев: Преподо́бне о́тче Моисéе, моли́ Бо́га о на́с.
Возвесели́ся, горо́, иму́щая в пеще́ре нетле́нныя мо́щи чу́днаго Моисе́я,/ воспо́йте хвала́ми, и́ночествующих собо́ри,/ се бо и́мате посо́бника и предста́теля в ско́рбех,/ кла́няйтеся ра́це его́, прикаса́ющеся устна́ми,/ и обря́щете поко́й во удесе́х ва́ших.
Сла́ва Отцу́ и Сы́ну и Свято́му Ду́ху.
Сла́вим Тро́ицу Пресвяту́ю,/ я́ко даде́ нам свети́льника ми́ра, отца́ на́шего Моисе́я,/ его́же пра́зднующе ле́тнюю па́мять,/ Отца́, и Сы́на, и Свята́го Ду́ха в Еди́ном Божестве́,/ ве́рнии, единому́дренно велича́ем.
И ны́не и при́сно и во ве́ки веко́в. Ами́нь.
Богородичен: Всегда́ сла́вим Тя, Чи́стая Де́во,/ я́ко собрала́ еси́ ве́рныя рабы́ Своя́ на ме́сто сие́,/ иде́же мно́зи прие́млют исцеле́ние, покланя́ющиися о́бразу Твоему́ несумне́нно/ и призыва́ющии в моли́тву оте́ц на́ших Пече́рских.
Светилен
Све́те Трисоста́вный, Соде́телю, И́стинный Бо́же,/ просвети́ мрак душ на́ших,/ се бо приво́дим Тебе́ в моли́тву уго́дника Твоего́ и с ним мо́лимся:/ ути́ши бу́рю грехо́в на́ших и от печа́ли всех нас изба́ви.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Светле́йшая па́че со́лнца Ма́рие Богоро́дице,/ просвети́ благода́тию всех, кла́няющихся пред Тобо́ю и призыва́ющих и́мя Твое́,/ и соблюди́ оби́тель сию́ от вся́каго зла,/ живу́щих же в ней присносу́щнаго весе́лия и ра́дости духо́вныя испо́лни,/ Ты бо еси́ Хода́таица ра́дости на́шея.
Комментировать