Минея, 1 Февраля, Кано́н предпра́зднства
Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Припев: Сла́ва Тебе́, Бо́же на́ш, сла́ва Тебе́.
Сердца́ я́коже ру́це вси предугото́вльше,/ приходя́ща днесь Христа́ чи́сте прии́мем/ и Того́ Ду́хом Боже́ственных дарова́ний наслади́мся.
Припев: Сла́ва Тебе́, Бо́же на́ш, сла́ва Тебе́.
Две́ри предотве́рзши днесь, и́же в зако́не храм,/ Законода́вцу и Соде́телю устроя́ет вхо́ды све́тлы/ и гото́вит честны́я да́ры Ему́ Боже́ственное хвале́ние.
Сла́ва Отцу́ и Сы́ну и Свято́му Ду́ху.
Воспою́ Тебе́, Го́споди Бо́же мой,/ младе́нствовавшему пло́тию, и зако́ну повину́вшемуся,/ и спа́сшему челове́ка, его́же ра́ди был еси́ Челове́к.
И ны́не и при́сно и во ве́ки веко́в. Ами́нь.
Богородичен: Разуме́в ве́тхий, Пречи́стая, храм Тя, Влады́чице,/ Влады́це всех и Бо́гу жили́ще чи́сто/ лик пропове́даше, велича́я сла́ву Твою́.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Припев: Сла́ва Тебе́, Бо́же на́ш, сла́ва Тебе́.
Взыгра́шася мы́сленно,/ я́же в дому́ Бо́жии ше́ствия,/ Царя́ Христа́ хотя́ща пло́тию прия́ти.
Припев: Сла́ва Тебе́, Бо́же на́ш, сла́ва Тебе́.
Я́ко честны́я/ Христу́ предъугото́вльше днесь, ве́рнии, да́ры прия́тны, хвалу́,/ Сего́ с ра́достию усря́щем.
Сла́ва Отцу́ и Сы́ну и Свято́му Ду́ху.
Ны́не пре́йде сень и преды́де и́стина, благода́ти прише́дши,/ ны́не подыми́ Христа́, Симео́не.
И ны́не и при́сно и во ве́ки веко́в. Ами́нь.
Богородичен: Преста́ е́же в се́нех и обра́зных начерта́ниих веща́ние:/ И́стина бо, Чи́стая, Тобо́ю яви́ся конце́м.
Седален, глас 1
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Сокро́вище ве́чное Жи́зни вся́ческих,/ мене́ ра́ди под зако́ном младе́нствовавый,/ дре́вле начерта́вый на скрижа́лех зако́н на горе́ Сина́йстей,/ да вся измени́ши от зако́нныя дре́вния рабо́ты,/ сла́ва благоутро́бию Твоему́, Спа́се,/ сла́ва соше́ствию Твоему́,/ сла́ва смотре́нию Твоему́, Еди́не Человеколю́бче.
Песнь 4
Ирмос: Вознесе́на́ Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Припев: Сла́ва Тебе́, Бо́же на́ш, сла́ва Тебе́.
На о́блаце носи́м светоно́снем пло́тски, я́ко Со́лнце Пра́вды,/ Боже́ственныя зари́ Своя́ предлага́ет днесь/ и предозаря́ет храм Свой.
Сла́ва Отцу́ и Сы́ну и Свято́му Ду́ху.
Предпра́зднственную хвалу́ Влады́це Це́рковь днесь привноша́ет,/ и Сего́, я́ко Жениха́, прия́ти све́тло гото́вится,/ и с Симео́ном ра́дуется;/ чи́ни А́нгельстии ужасо́шася,/ зря́ще на рука́х ста́рческих/ со Отце́м и Ду́хом хвали́маго, я́ко Сы́на и Бо́га на́шего.
И ны́не и при́сно и во ве́ки веко́в. Ами́нь.
Богородичен: Я́ко ски́нию,/ Тя, Пресла́вная Богоро́дице,/ хотя́щи прия́ти зако́нная сень,/ зако́ну Го́спода на рука́х нося́щую,/ Твое́ю осия́шеся благода́тию.
Песнь 5
Ирмос: Ты, Го́споди, мой Свет,/ в мир прише́л еси́,/ Свет Святый, обраща́яй из мра́чна неве́дения/ ве́рою воспева́ющия Тя.
Припев: Сла́ва Тебе́, Бо́же на́ш, сла́ва Тебе́.
Тя, Го́споди, пло́тию це́рковь хотя́щи прия́ти,/ Боже́ственною Твое́ю и неизрече́нною Божества́ заре́ю/ сла́вно просвеща́шеся.
Припев: Сла́ва Тебе́, Бо́же на́ш, сла́ва Тебе́.
Тя, Го́споди, рука́ми душе́вными сподо́би прия́ти хва́лящия Твое́ смотре́ние,/ и нас, ве́рою пою́щих Тя, приими́,/ я́ко Человеколю́бец.
Сла́ва Отцу́ и Сы́ну и Свято́му Ду́ху.
Тя, Го́споди, ра́достною душею прие́млющия,/ пло́тию нас ра́ди хотя́ща приити́,/ сподо́би с Симео́ном благодари́ти Тя.
И ны́не и при́сно и во ве́ки веко́в. Ами́нь.
Богородичен: Изба́вльшеся Тебе́ ра́ди сено́вныя слу́жбы, Чи́стая,/ ра́зумом и́стинным и ве́рою тве́рдою/ досто́йно Тя сла́вим.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию.
Припев: Сла́ва Тебе́, Бо́же на́ш, сла́ва Тебе́.
Пе́сни, я́коже цве́ты, испле́тше днесь,/ предугото́вим ве́рою благодаре́ния вене́ц Боже́ствен Влады́це,/ мы́сленно приити́ хотя́щему.
Припев: Сла́ва Тебе́, Бо́же на́ш, сла́ва Тебе́.
Ру́ки душе́вныя Бо́гу угото́вим, я́коже Симео́н ста́рец,/ и в храм Боже́ственныя сла́вы Его́ приходя́ща,/ Того́ с весе́лием восприи́мем.
Сла́ва Отцу́ и Сы́ну и Свято́му Ду́ху.
Творца́ веко́в ста́рец я́ко Младе́нца прие́м,/ Бо́га Преве́чнаго разуме́ и Све́та язы́ков/ во сла́ву Изра́иля, Христа́.
И ны́не и при́сно и во ве́ки веко́в. Ами́нь.
Богородичен: Пи́шуще Богови́дно тро́стию духо́вною Тя, проро́цы, Де́во,/ храм, и сень, и Боже́ственный дом Влады́це всех,/ о Тебе́ украша́хуся.
Кондак, глас 6
Со Отце́м Сло́во Сый неви́димо,/ ны́не у́бо ви́дим есть пло́тию:/ неизрече́нно от Де́вы роди́ся/ и на ру́ку ста́рчу дае́тся святи́телю./ Поклони́мся Тому́/ и́стинному Бо́гу на́шему.
Икос
Свяще́нная трапе́за предлага́ется,/ празднолю́бных собо́р днесь, предпра́зднственная нося́щи зна́мения,/ Го́спода четыредесятодне́вна, из Де́вы стра́шное рождество́,/ и ста́рца честна́го объя́тие,/ и че́стна страда́льца па́мять,/ предпра́зднственныя хвалы́ припева́юще/ и́стинному Бо́гу на́шему.
Песнь 7
Ирмос: В пещи́ Авраа́мстии о́троцы перси́дстей,/ любо́вю благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́й, Го́споди.
Припев: Сла́ва Тебе́, Бо́же на́ш, сла́ва Тебе́.
Це́рковь, предукра́шшися заре́ю мы́сленною,/ любо́вию Влады́ки всех и Творца́,/ восприя́ти Его́ гото́вится и ра́достная Сему́ плете́т восхожде́ния.
Припев: Сла́ва Тебе́, Бо́же на́ш, сла́ва Тебе́.
И́же в не́дрех неопи́санно су́ща Оте́ческих Сло́во,/ Сы́на Своего́ Единоро́днаго, Ма́терний ру́це нося́щии в це́рковь пло́тию/ по зако́ну я́ко Младе́нца вно́сят.
Сла́ва Отцу́ и Сы́ну и Свято́му Ду́ху.
Всели́выйся Бог во чре́во Де́вы/ на рука́х Симео́на,/ я́ко на престо́ле о́гненнем, днесь седи́т.
И ны́не и при́сно и во ве́ки веко́в. Ами́нь.
Богородичен: Ви́деша сла́ву Твою́ язы́цы вси, Еди́на Чи́стая,/ те́мже тва́рей всех Тя благоче́стно Цари́цу ублажа́ют/ и Богома́терь па́че естества́ непреста́нно сла́вят.
Песнь 8
Ирмос: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Припев: Сла́ва Тебе́, Бо́же на́ш, сла́ва Тебе́.
Руце распросте́р Симео́н/ и предочи́щ ду́шу Боже́ственными дея́ньми,/ младе́нствовавшаго Го́спода то́кмо за бла́гость прия́т,/ вопия́ с весе́лием Ему́:/ благослови́те, вся дела́ Госпо́дня, Го́спода.
Припев: Сла́ва Тебе́, Бо́же на́ш, сла́ва Тебе́.
Свет благода́ти Христо́вы просия́ нам,/ хотя́ ввести́ в храм Свой,/ всесено́вная начерта́ния претворя́я я́ко Обнови́тель/ вои́стинну вопию́щим:/ благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Предве́чнаго Бо́га, благоволи́вшаго нас ра́ди младе́нствовати/ и на рука́х прие́млема бы́ти ста́рца Симео́на,/ благослови́те, вся дела́ Госпо́дня, Го́спода.
И ны́не и при́сно и во ве́ки веко́в. Ами́нь.
Богородичен: И́же за благосты́ню мно́гую вочелове́чься Христо́с/ из Тебе́, Пречи́стая, нас ра́ди,/ прия́тна днесь Отцу́ приноша́ет очище́ния,/ Еди́н Сый Пречи́ст и Пренепоро́чен/ и Тя Едину Чисте́йшую соблюда́я Пресвяту́ю.
Песнь 9
Ирмос: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́;/ тем, веселя́щеся, Тя, Богоро́дице, велича́ем.
Припев: Сла́ва Тебе́, Бо́же на́ш, сла́ва Тебе́.
Душе́вными Тя рука́ми сподо́би мя, Благоде́телю,/ восприя́ти, я́коже дре́вле Симео́н,/ и наслади́тися Твоея́ бла́гости:/ Ты бо еси́ Еди́н жела́ние/ и сла́дость, Превозжеле́нный.
Припев: Сла́ва Тебе́, Бо́же на́ш, сла́ва Тебе́.
Мы́сленно вже́гше вси доброде́телей свещи́,/ любо́вию с Симео́ном и А́нною свещено́сцы предусря́щем,/ Христу́ хотя́щу приити́ освяти́ти пою́щия Его́.
Сла́ва Отцу́ и Сы́ну и Свято́му Ду́ху.
Днесь в хра́ме Симео́н ста́рец рука́ми прия́т Христа́, Бо́га на́шего,/ и возопи́, глаго́ля:/ ны́не отпуща́еши раба́ Твоего́, Влады́ко.
И ны́не и при́сно и во ве́ки веко́в. Ами́нь.
Богородичен: Па́че су́щих восприя́т из Тебе́ плоть Сло́во Вы́шняго,/ Чист Сый приноша́ет Безнача́льному Отцу́ очище́ние/ и очища́ет любо́вию Тя, Бо́жию Ма́терь, велича́ющия.
Светилен
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Отроча́ прине́сши Всенепоро́чная Отрокови́ца во святи́лище/ соверши́ти я́же по зако́ну,/ и Сие́ на ру́ки я́ко прия́т Симео́н пра́ведный,/ проти́ву изрече́ Деви́це:/ Сей лежи́т на паде́ние и на воста́ние мно́гим/ и во зна́мение в ми́ре.