Кондак 1
Избраннии чудотворцы и велицыи угодницы Господни, градов Смоленска и Ярославля небеснии заступницы и усерднии о душах наших молитвенницы, святии благовернии князи Феодоре, Давиде и Константине, похвальное пение приносим вам с верою и любовию: вы же, яко имущии дерзновение ко Господу, от всяких нас бед молитвами вашими присно избавите, да с умилением зовем вам:
Радуйтеся, святии благовернии князе Феодоре, Давиде и Константине, преславнии чудотворцы.
Икос 1
Ангели земнии и человецы небеснии бысте, Феодоре, Давиде и Константине преблаженнии, вся заповеди Господни верно сохраншии и в добродетелех преуспевшии, яко быти вам еще во плоти, подражатели сил безплотных, жития чистотою и святостию. Темже и мы грешнии со благоговением приносим благохваления таковая:
Радуйтеся, светильницы трисияннии Божия благодати;
Радуйтеся, столпи крепцыи святыя Православныя Церкве.
Радуйтеся, во благоверии утвержденнии;
Радуйтеся, в добродетелях благоискуснии.
Радуйтеся, вернии Христовы угодницы;
Радуйтеся, многоцелебных даров независтнии подателие.
Радуйтеся, нетления цвети благоуханнии;
Радуйтеся, Рая Иисусова крини неувядаемии.
Радуйтеся, князей Российских светлая похвало;
Радуйтеся, любящих и чтущих вас присное радование.
Радуйтеся, во благоухании святости почивающии;
Радуйтеся, недужныя безмездно исцеляющии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 2
Видя княже Феодор, яко братия его неправедно восприяша удел княжения его, не восхоте бранию идти на них, но мир любяй, малым княжением можайским удовлися, праведно и свято княжение свое исправляше, храмы Божия созидая, благочестие христианское утверждая, суды правосудны людем своим являя и присно зовый в молитвах усердных к Богу: Аллилуиа.
Икос 2
Разумом Божественным преисполненнии, святии благовернии князе Феодоре, Давиде и Константине, не прельститеся суетною славою княжения земнаго, но сие мудро сочеташе со всегдашним благоугождением Богу, яко быти вам воистину праведником, достойным похвал сицевых:
Радуйтеся, молитвенницы усерднии;
Радуйтеся, подвижницы неленостнии.
Радуйтеся, целомудрия хранителие;
Радуйтеся, Православия поборницы.
Радуйтеся, незлобивии в обидах;
Радуйтеся, благодушнии во искушениих.
Радуйтеся, милосердия преисполненнии;
Радуйтеся, кротостию злобу побеждавшии.
Радуйтеся, дивно о Господе сочетаннии, отец со чады во святых;
Радуйтеся, Троицы равночисленнии избранницы, сыны с родителем в селениих райских.
Радуйтеся, от горних высот к земнородным милостивно приникающия;
Радуйтеся, исцеления благодатныя неоскудно источающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 3
Силою Божиею осененный, княже Феодоре, княжение ярославское восприял еси, и в нем благочестно о Христе потрудился еси, яко добрый воин Иисусе Христов, готовый душу твою положити за люди твоя. Темже и к агарянскому хану шествовати не убоялся еси, и пред ним веру Христову ясно исповедал еси, вопия сердцем и усты ко Господу: Аллилуиа.
Икос 3
Имуще едино попечение в триех телесех, о еже Единому Богу благоугождати, святии благовернии князе Феодоре, Давиде и Константине, образ жития праведнаго в себе нам являете, сим подвизающе нас, в похвалах достодолжных вопити вам сице:
Радуйтеся, Богомудрия преисполненнии;
Радуйтеся, лучами Святаго Духа озареннии.
Радуйтеся, свети умнии, нощь грехов наших пресекающии;
Радуйтеся, звезды путеводныя, ко Христу путь верным ясно указующия.
Радуйтеся, бисере драгоценнии, в небесней сокровищнице Христовой сохраняемии;
Радуйтеся, адаманты, сияющии Божиею благодатию.
Радуйтеся, диадиму княжения земнаго с венцем Царствия Небеснаго сочетавшии;
Радуйтеся, Рая жители порфироноснии.
Радуйтеся, в Бозе упокоение блаженнее обретшии;
Радуйтеся, по трудех и подвизех земных сладце на лоне Авраамли опочившии.
Радуйтеся, древних святых церквей вернии поборницы;
Радуйтеся, Царя царей приснии друзи.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 4
Буря искушений приразися к тебе, княже Феодоре, пребывающу ти при дворе хана агарянскаго, иже восхоте имети тя супруга дщери своея: обаче ты союза супружества христианскаго нарушити не восхотев, небоязненно от брака с неверною уклонился еси, дондеже скончася супруга твоя законная: по ея же кончине, дщерь ханскую, во Христа уверовавшую, крещением святым просветив, бракосочетася с нею, зовый ко Господу: Аллилуиа.
Икос 4
Слышавше людие ярославстии о великих добродетелех ваших, святии благовернии князе Феодоре, Давиде и Константине, зело почитаху вас, яко избранников Божиих: вы же, блажении, милостивно над ними княживше, отцы им по Бозе бысте, учители благочестия и наставницы во всех добрых делех. Сего ради доднесь подвиги ваши незабвенны во градах Смоленске и Ярославле, и воспеваются немолчными гласы сицевыми:
Радуйтеся, благодетели нищих и убогих;
Радуйтеся, покровители вдов и сирот.
Радуйтеся, нелицеприятнаго суда рачители;
Радуйтеся, милосердия Христова подражатели.
Радуйтеся, суды ваши с милостию соединившии;
Радуйтеся, правосудие христианское возлюбившии.
Радуйтеся, добрии оружницы Всевышняго Царя;
Радуйтеся, вернии раби Небеснаго Домовладыки.
Радуйтеся, верою православною воодушевленнии;
Радуйтеся, надеждою спасения укрепленнии.
Радуйтеся, любовию Божественною преисполненнии;
Радуйтеся, Богом и людьми возлюбленнии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 5
Боготечной звезде подобствовав, княже Феодоре, от хана агарянскаго отпущенный, княжити во град Ярославль пришел еси, с супругою твоею и чады Давидом и Константином, яже быша благаго древа благия отрасли, плод мног о Христе отечествию своему принесшии, с нимиже ныне во светлостех святых водворяяся, сладце поеши святых Святейшему Христу Богу: Аллилуиа.
Икос 5
Видим вас святии благовернии князе Феодоре, Давиде и Константине, яко звезды богосветлыя, во граде Ярославли святостию и чудесы сияющия, и сиянием славы вашея озаряеми, прославляем прославльшаго вас Царя славы Христа, вам же со усердием и любовию вопием таковая:
Радуйтеся, блаженнии и триблаженнии, целомудрие сохранившии;
Радуйтеся, благовернии и богоноснии, в законе Господни непорочно ходившии.
Радуйтеся, заповеди Христовы свете стезям вашим имевшии;
Радуйтеся, во всех оправданиих Владычних неуклонно пребывшии.
Радуйтеся, всю жизнь вашу на Богоугождение непрестанное посвятившии;
Радуйтеся, до смерти верность Господеви соблюдшии.
Радуйтеся, во всем волю Божию творившии;
Радуйтеся, искушения и скорби мужески терпевшии.
Радуйтеся, во искушениих победоноснии;
Радуйтеся, в скорбех не унывавшии.
Радуйтеся, на Бога все упование ваше возложившии;
Радуйтеся, от Бога в уповании вашем непосрамленнии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 6
Проповедник благочестия явился еси княже Феодоре, егда узрев приближение кончины живота твоего, княжение земное оставль, в обитель Преображения Господня удалился еси, и тамо во иночество постриженный, схиму святую на ся возложил еси, со всеми прощаяся, всех благословляя и назидая, в молитве усердней душу твою в руце Божии предал еси, яко истинный угодник Христа Бога, Емуже со ангелы поеши ныне: Аллилуиа.
Икос 6
Возсиясте многими добродетельми вашими во граде Ярославли, и всю страну Российскую благодатно озаристе преславными чудесы вашими, Феодоре, Давиде и Константине благовернии. Темже память ваша с похвалами от верных почитается, и честная имена ваша молитвенно призываются, от ближних и дальних, к вам вопиющих и глаголющих:
Радуйтеся, мрак душ наших чудесы вашими благодатно просвещающии;
Радуйтеся, недужных безмезднии врачеве.
Радуйтеся, больных цельбоподательнии посетители;
Радуйтеся, туне приявшии и туне подающии.
Радуйтеся, в милости к страждущим никогдаже оскудевающии;
Радуйтеся, сосуди златии миро многоцелебнаго.
Радуйтеся, сокровищницы драгия, на всяк недуг врачевство содержащия;
Радуйтеся, радости печальным податели.
Радуйтеся, скорбящих блазии утешителие;
Радуйтеся, бедствующих скории помощницы.
Радуйтеся, градов Смоленска и Ярославля небеснии покровители;
Радуйтеся, святии благовернии князе Феодоре, Давиде и Константине, преславнии чудотворцы.
Кондак 7
Хотяй во всем подражати отцу твоему преподобному, преблаженне княже Давиде, свято и богоугодно в Ярославли по нем княжил еси, и толико Богу угодил еси, яко миром и благоплодием княжение твое Господь благослови и славна тя в князех российских показа, Емуже ты в преподобии и святости добре послужил еси до смерти, взывая к нему: Аллилуиа.
Икос 7
Новых вас чудотворцев яви Господь в стране российстей, святии благовернии князе Феодоре, Давиде и Константине, чудесы вашими святую православную веру крепко утверди во граде вашем, иже светло красуется, имея вас небесных заступников и предстателей ко Господу, и с любовию к вам взывает:
Радуйтеся, хладную страну теплотою веры вашея согревшии;
Радуйтеся, благочестие во граде вашем возрастившии.
Радуйтеся, добрии делатели винограда небеснаго;
Радуйтеся, мзду приемшии от Христа: чудотворения дар.
Радуйтеся, дары милости вашея верных обогащающии;
Радуйтеся, Божия благодати сосуди избраннии.
Радуйтеся, сияющии, яко солнце во Царствии Небеснем;
Радуйтеся, яко звезды всю Россию чудесы вашими освещающии.
Радуйтеся, трисияннии лучи, Троический несозданный свет нам возсияющии;
Радуйтеся, тричисленнии подвижницы добродетелей Христианских.
Радуйтеся, на враги видимыя и невидимыя нам всегдашнии споборницы;
Радуйтеся, Царя Небеснаго Христа известнии умилостивители.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 8
Странника и пришельца в мире сем помышляя себе быти, благоверный княже Константине, от юности твоея девственное житие возлюбил еси, в посте и молитвах пребывая, и угождая Богу благоугождением всяческим, во еже быти тебе освященному сосуду Духа Святаго, всельшагося в непорочное сердце твое, и воздыхании неизглаголанными научившаго тя благоприятно пети Пресвятей Троице: Аллилуиа.
Икос 8
Весь град Ярославль радостию духовною подвижеся, егда святыя и нетленныя мощи ваша, благовернии князе Феодоре, Давиде и Константине, чудес благодатию просияша во обителе Преображения Господня. Тако бо благоволи Господь, да по летех мнозех, нетление ваших телес святых всем явлено будет, и чудесы многими ознаменуется, во еже всем верным вопити вам сице:
Радуйтеся, во умерщвленных телесех жизнь благодатную проявившии;
Радуйтеся, во летех мнозех нетленнии в составех ваших пребывшии.
Радуйтеся, во едином гробе благолепно мирно почивающии;
Радуйтеся, вси трие вкупе чудодействующии.
Радуйтеся, во уверении святости вашея чудес множество от мощей ваших сотворившии;
Радуйтеся, неверовавших в святость вашу грозно наказавшии.
Радуйтеся, слепим зрение даруяй;
Радуйтеся, хромым право ходити устрояй.
Радуйтеся, глухим слух отверзаяй;
Радуйтеся, немым язык разрешаяй.
Радуйтеся, бесноватых от насилия демонскаго свобождаяй;
Радуйтеся, разслабленных благодатно укрепляяй.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 9
Со всеми небожители ныне сликовствуете горе, во славе Царствия Христова, благовернии чудотворцы Феодоре, Давиде и Константине, в нейже пребывающе, помяните и нас смиренных в молитвах ваших к Триипостасному Богу, да при помощи вашей небесней, сподобимся во вся дни, достойно и праведно возглашати Ему: Аллилуиа.
Икос 9
Витийство человеческое не может восхвалити по достоянию, многая и преславная чудотворения ваша, святии благовернии чудотворцы Феодоре, Давиде и Константине. Обаче мы, любовию к вам подвизаемии, дерзаем благохвалити вас, заступников наших, сими нехитростными, но усердными словесы:
Радуйтеся, две жены слепыя у мощей ваших прозрети сотворшии;
Радуйтеся, бесноватаго и слепаго мужа таможде исцелившии.
Радуйтеся, слепую отроковицу видети устроившии;
Радуйтеся, бесноватих мужа и жену от насилия демонскаго избавившии.
Радуйтеся, четыре немощныя зело жены здравы возставившии;
Радуйтеся, ину жену, терзавшую неистовно все тело свое, от недуга сего свободившии.
Радуйтеся, неверовавшаго в святость вашу пресвитера Константина, разслаблением тела наказавшии;
Радуйтеся, святителя Трифона в томже благодатно обличившии.
Радуйтеся, покаяние его милостивно приемшии;
Радуйтеся, во обители вашей почити ему о Господе удостоившии.
Радуйтеся, благоверную царицу Анастасию в недузе уврачевавшии;
Радуйтеся, ближним и дальним милость многоцелебную показавшии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 10
Спастися нам молите милостиваго Бога, чудотворцы святии и благовернии Феодоре, Давиде и Константине: к вам бо по Бозе и Пресвятей Богородице, яко присным нашим предстателем и ходатаем мы грешнии усердно прибегаем и молитвенно просим вас о еже молитися за нас к прославльшему вас Господу, да и мы сподобимся вкупе с вами на земли живых пети Ему: Аллилуиа.
Икос 10
Царя Небеснаго Христа вернии раби и угодницы, святии благовернии князе Феодоре, Давиде и Константине, покажите на нас недостойных молитв ваших благодатное действо, и якоже многих недужных уврачевали есте, с верою приходящих к святым и многоцелебным мощем вашим, тако и нас, с любовию к ним припадающих, не лишите небеснаго вашего заступления, в жизни, в смерти и по смерти, да зовем вам хвалебно:
Радуйтеся, отечествия вашего земнаго неотступнии хранители;
Радуйтеся, ко отечествию Горнему вернии нам руководителие.
Радуйтеся, источницы многоводнии благодатных исцелений;
Радуйтеся, кладези неистощимыя воды живыя.
Радуйтеся, Воскресения Христова силу в телесех ваших нетленних дивно проявившии;
Радуйтеся, зарю общаго воскресения нам от раки вашея возсиявающии.
Радуйтеся, росу Божия благодати в сердца верных одождевающии;
Радуйтеся, благая прошения наша во блага исполняющии.
Радуйтеся, с верою просящих у вас исцеления скоро врачующии;
Радуйтеся, любящим и чтущим вы, любовию сугубою воздающии.
Радуйтеся, в простоте душевней на помощь призывающих милостивии услышатели;
Радуйтеся, безнадежных страдальцев Божественнии целители.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 11
Пение молебное наше и похвалу сию смиренную благоутробно приимите, святии благовернии князе Феодоре, Давиде и Константине: се бо аще и многогрешни есмы, но веруем несумненно, яко вы, святии предстатели наши, много можете пред лицем всеблагаго Бога и яко молитвы ваша святыя сильны спасти нас от погибели вечныя. Темже молим вы: не посрамите веры нашея во всесильное пред Богом ходатайство ваше, но сподобите нас молитвами вашими Царствие Небесное улучити, и со всеми святыми возглашати Триединому Богу: Аллилуиа.
Икос 11
Светоподательнии светильницы и предивнии чудотворцы, святии благовернии князе Феодоре, Давиде и Константине, к вам от лет древних отцы наши верно приходяще, милость многу от вас получаху, их же путем и мы к вам шествуем и припадающе к святым мощем вашим, молим и просим вы: да якоже отцем нашим, тако и нам убозем милость вашу присно являете, да благодарственно вам всегда вопием:
Радуйтеся, чада благословенная Отца Небеснаго;
Радуйтеся, братия по благодати Христа, Сына Божия.
Радуйтеся, светлыя обители Духа Святаго;
Радуйтеся, хвалебницы чудотворнии Пресвятыя Троицы.
Радуйтеся, во свете Лица Божия присно пребывающии;
Радуйтеся, по Бозе вся потребная нам взыскующии.
Радуйтеся, от Горних высот на помощь к нам ускоряющии;
Радуйтеся, грешники к покаянию невидимо направляющии.
Радуйтеся, окамененная сердца прикосновением к мощем вашим умягчающии;
Радуйтеся, плоды покаяния верным приносити помогающии.
Радуйтеся, о спасении нашем усердно Бога умоляющии;
Радуйтеся, во всяком деле блазе нам по вере нашей благопоспешающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 12
Благодать и милость от Господа испросите нам, святии князе Феодоре преподобне, Давиде и Константине преблаженнии, и в час кончины нашея предстаните в помощь нам, требующим вашего заступления, насилия диавольскаго нас избавляюще, святыми и благомощными молитвами вашими: да при помощи их безбедно прейдем трудный путь мытарств воздушных, и сподобимся в селениих святых пети Создателю нашему: Аллилуиа.
Икос 12
Поюще многая и преславная ваша чудеса, святии благовернии князе и чудотворцы Феодоре, Давиде и Константине, славим Господа, прославльшаго вас на Небеси и на земли, и от любве душевныя совершающе святую и всерадостную память вашу, умильно к вам глаголем:
Радуйтеся, Пресвятыя Троицы вернии раби;
Радуйтеся, Пресвятыя Богородицы органе хвалебнии.
Радуйтеся, Ангельских воинств собеседницы;
Радуйтеся, всех святых сожители.
Радуйтеся, страны Российския духовная лепото;
Радуйтеся, града Ярославля светлая красото.
Радуйтеся, князей Российских к благочестию предводители;
Радуйтеся, княжения вашего земнаго неусыпнии блюстители.
Радуйтеся, обители вашея святыя забрала несокрушимая;
Радуйтеся, подвизающимся в ней спасения душевнаго ходатаи.
Радуйтеся, на поклонение к мощем вашим приходящих любвеобильно приемлющии;
Радуйтеся, благословение ваше святое от раки вашея всем верным подающии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 13
О, святии чудотворцы, тричисленнии Пресвятыя Троицы угодницы, благовернии князе Феодоре, Давиде и Константине, милостивно приимите сие малое моление наше, в похвалу вам приносимое, и умолите триипостаснаго Господа и Владыку нашего, избавити нас мучений вечных, грешником уготованных, и сподобити нас в покаянии Ему благоугодити, и Царствие Небесное наследовати, да с вами вопием ему во веки: Аллилуиа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
Ангели земнии и человецы небеснии бысте, Феодоре, Давиде и Константине преблаженнии, вся заповеди Господни верно сохраншии и в добродетелех преуспевшии, яко быти вам еще во плоти, подражатели сил безплотных, жития чистотою и святостию. Темже и мы грешнии со благоговением приносим благохваления таковая:
Радуйтеся, светильницы трисияннии Божия благодати;
Радуйтеся, столпи крепцыи святыя Православныя Церкве.
Радуйтеся, во благоверии утвержденнии;
Радуйтеся, в добродетелях благоискуснии.
Радуйтеся, вернии Христовы угодницы;
Радуйтеся, многоцелебных даров независтнии подателие.
Радуйтеся, нетления цвети благоуханнии;
Радуйтеся, Рая Иисусова крини неувядаемии.
Радуйтеся, князей Российских светлая похвало;
Радуйтеся, любящих и чтущих вас присное радование.
Радуйтеся, во благоухании святости почивающии;
Радуйтеся, недужныя безмездно исцеляющии.
Радуйтеся, святии благовернии князе Феодоре, Давиде и Константине, преславнии чудотворцы.
Кондак 1
Избраннии чудотворцы и велицыи угодницы Господни, градов Смоленска и Ярославля небеснии заступницы и усерднии о душах наших молитвенницы, святии благовернии князи Феодоре, Давиде и Константине, похвальное пение приносим вам с верою и любовию: вы же, яко имущии дерзновение ко Господу, от всяких нас бед молитвами вашими присно избавите, да с умилением зовем вам:
Радуйтеся, святии благовернии князе Феодоре, Давиде и Константине, преславнии чудотворцы.
Молитва
О, велиции угодницы Божии и чудотворцы, святии и благовернии князе Феодоре, Давиде и Константине, припадающе к святым и многоцелебным мощем вашим, молим вы со смирением, верою и любовию: прострите благоприятные молитвы ваша ко Господу и Создателю нашему, и умолите Его благость, даровати нам вся нужная к житию сему временному, и потребная к вечному спасению нашему: веруем бо несумненно, яко вся возможна вам, яко истинным Его угодником. Сего ради просим вы: испросите нам у Царя царствующих и Господа господствующих страждущую страну Российскую от лютых безбожник и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите престольным градом, граду нашему и всем градом Российским благополучие, изобилие и от злых сохранение, всем же правоверным людем, почитающим вас, и на поклонение мощем вашим святым приходящим, милость Божию и благих прошений скорое исполнение. Ей, чудотворцы святии, не посрамите упования нашего, но молитвами вашими сотворите нас наследники быти Царствия Христова: да прославляем человеколюбие в Троице славимаго и поклоняемаго Бога, Отца и Сына, и Святаго Духа, и ваше святое заступление во веки веков. Аминь.
Комментировать