Конда́к 1.
Избра́нный Бо́гом вели́кий пра́ведниче Ио́сифе, возлю́бленный сы́не отца́ твоего́ Иа́кова и ве́рный храни́телю заве́та пра́отцев Авраа́ма и Исаа́ка, вои́стинну бы́л еси́ проо́бразом во страда́нии Христа́ Спаси́теля. Мы́ же, восхваля́юще терпе́ние твое́ в злоключе́нии и му́жество во искуше́нии, ра́достно взыва́ем ти́:
Ра́дуйся, вели́кий пра́ведниче, Ио́сифе Прекра́сный.
И́кос 1.
А́нгели удиви́шася терпе́нию и незло́бию твоему́, смиренному́дрый Ио́сифе, ка́ко за́висти ра́ди бра́тий твои́х вве́ржен бы́в в ро́в, взыва́л еси́ люби́мому отцу́ твоему́: «о́тче Иа́кове! бра́тия навсегда́ разлучи́ша мя́ с тобо́ю и сего́ ра́ди не могу́ а́з бы́ти утеше́нием твое́й ста́рости, не узрю́ бо́лее седи́н твои́х». Мы́ же, ублажа́я сыно́внюю любо́вь твою́, со умиле́нием взыва́ем:
Ра́дуйся, люби́мый сы́не патриа́рха Иа́кова; ра́дуйся, избра́нный Бо́гом на спасе́ние Изра́иля.
Ра́дуйся, за́поведи Бо́жии в се́рдце носи́вый; ра́дуйся, до зако́на Бо́жия зако́н сохрани́вый.
Ра́дуйся, ве́ру Авраа́мову стяжа́вый; ра́дуйся, Исаа́кову послуша́нию подража́вый.
Ра́дуйся, вели́кий пра́ведниче, Ио́сифе прекра́сный.
Конда́к 2.
Ви́дя патриа́рх Иа́ков кро́ткий и незло́бивый нра́в тво́й, пра́ведней Ио́сифе, возлюби́ тя́ па́че бра́тий твои́х и облече́ в багря́ную ри́зу, зане́ име́л еси́ благоволе́ние Бо́жие, Ему́же во смире́нии взыва́л еси́: Аллилу́иа.
И́кос 2
Ра́зум, озаре́нный Ду́хом Святы́м, име́л еси́, Ио́сифе, открыва́я бу́дущее в сновиде́нии отцу́ и бра́тиям твои́м, глаго́ля: «се́, со́лнце, луна́ и оди́ннадцать зве́зд поклони́шася ми́». Оте́ц же тво́й Иа́ков, не разуме́в виде́ния сего́, со укоре́нием отвеща́ше ти́: «уже́ли а́з и ма́ти, и бра́тия твоя́ прии́дем и поклони́мся ти́ до земли́?» Мы́ же, восхваля́юще му́дрость твою́, вопие́м:
Ра́дуйся, сновиде́ний открове́ние; ра́дуйся, отцу́ твоему́ утеше́ние.
Ра́дуйся, трудо́в его́ упокое́ние; ра́дуйся, ста́рости его́ подкрепле́ние.
Ра́дуйся, пре́жде Моисе́а проро́чеством одаре́нный; ра́дуйся, са́ном патриа́рха почте́нный.
Ра́дуйся, вели́кий пра́ведниче, Ио́сифе прекра́сный.
Конда́к 3.
Си́лою за́висти испо́лнишася бра́тия твоя́, егда́ по повеле́нию ста́рца отца́ ше́л еси́ в доли́ну Хевро́н. Ре́ша бо не́ции от ни́х: «се́, гряде́т снови́дец, убие́м его́». Бра́т же Руви́м, хотя́ще спасти́ тя́ от сме́рти, рече́ и́м: «не пролива́йте кро́ви бра́та ва́шего, не налага́йте на́нь ру́к свои́х». Ты́ же, незло́биве, отдава́я лобза́ние и́м, воспева́л еси́ Бо́гу: Аллилу́иа.
И́кос 3
Име́я по́мысл чи́ст и непоро́чную ду́шу, блаже́нне Ио́сифе, умоля́л еси́ бра́тьев твои́х поми́ловати тя́, егда́ они́ вверго́ша тя́ в глубо́кий ро́в. Мы́ же, зело́ сострада́я тебе́, из глубины́ души́ взыва́ем:
Ра́дуйся, я́ко в ро́в вве́рженный, бра́тьев твои́х умоля́вый; ра́дуйся, я́ко ко отцу́ твоему́ ве́лиим гла́сом взыва́вый.
Ра́дуйся, я́ко в разлу́ке с люби́мым отце́м твои́м го́рько рыда́вый; ра́дуйся, я́ко от сто́нов и сле́з твои́х изнемога́вый.
Ра́дуйся, я́ко и ма́терь твою́ Рахи́ль на по́мощь призыва́вый; ра́дуйся, я́ко всю́ наде́жду твою́ на Бо́га отце́в полага́вый.
Ра́дуйся, вели́кий пра́ведниче, Ио́сифе прекра́сный.
Конда́к 4.
Бу́рею волне́ния смути́ся роди́тель тво́й и ви́дя окровавле́нную ри́зу твою́, Ио́сифе, глаго́ла: «ки́й зве́рь растерза́ сы́на моего́?» Посе́м прови́дя це́лость оде́жды твоея́, го́рестно взыва́ше: «о, ча́до! не зве́рь снеде́ те́ло твое́, но лю́дие уби́ша тя́». Тогда́ посы́пав пе́плом главу́ свою́ и оглаша́я возду́х рыда́ньми, вели́кий патриа́рх взыва́ше Бо́гу плаче́вную пе́снь: Аллилу́иа.
И́кос 4.
Слы́ша исма́ильтяне во́пли и рыда́ния твоя́, Ио́сифе, над моги́лою Рахи́ли, егда́ ведо́ша тя́ в да́льнюю страну́, вопроси́ша: «кто́ ты́, чи́й ра́б, и кто́ е́сть пастухи́, прода́вшии тя́ на́м?» Ты́ же, отвеща́в и́м, рече́: «ни ра́б, ни злоде́й, но люби́мый е́смь сы́н отца́ моего́, пастухи́ же е́сть бра́тия моя́, за́висти ра́ди прода́вшии мя́ ва́м». Мы́ же, воспомина́юще сле́зы и страда́ния твоя́, зове́м ти́:
Ра́дуйся, я́ко от бра́тий твои́х претерпе́вый озлобле́ние; ра́дуйся, я́ко ве́лие показа́вый смире́ние.
Ра́дуйся, А́нгелом удивле́ние; ра́дуйся, проро́ком Бо́жиим похвале́ние.
Ра́дуйся, му́чеником во страда́нии ра́дование; ра́дуйся, все́м пра́ведным весе́лие.
Ра́дуйся, вели́кий пра́ведниче, Ио́сифе прекра́сный.
Конда́к 5.
Бо́жиим про́мыслом введе́ тя́, му́дрый Ио́сифе, царедво́рец фарао́на в до́м сво́й и поста́ви управля́ти все́ми име́ниями свои́ми. Жена́ же господи́на прельсти́ся благоле́пием лица́ твоего́, ласка́ньми тща́шеся запя́ти тя́, не возмо́гши же одоле́ти тве́рдости целому́дрия твоего́, возглаго́ла зло́ во у́ши господи́на и то́й всади́ тя́ в темни́цу, иде́же пребыва́я возноси́л еси́ ско́рбную пе́снь Бо́гу: Аллилу́иа.
И́кос 5.
Ви́дя фарао́н, ца́рь Еги́петский, со́н, призва́ тя́, Ио́сифе, да разъясни́ши ви́денное. Удивля́яся му́дрости, исходя́щей из у́ст твои́х, возложи́ на тя́ злату́ю це́пь и пе́рстень на ру́ку твою́, и даде́ ти́ колесни́цу ца́рскую и вла́сть вели́кую над все́м Еги́птом. Мы́ же, зря́ще Бо́жие благоволе́ние, явле́нное на тебе́, вопие́м ти́ си́це:
Ра́дуйся, ца́рским досто́инством почте́нный; ра́дуйся, от Бо́га на вели́кое служе́ние возведе́нный.
Ра́дуйся, целому́дрием оде́янный; ра́дуйся, проро́чеством сновиде́ний просла́вленный.
Ра́дуйся, страда́ниями укра́шенный; ра́дуйся, любо́вию и че́стию от все́х превознесе́нный.
Ра́дуйся, вели́кий пра́ведниче, Ио́сифе прекра́сный.
Конда́к 6.
Пропове́дницы неви́нности твоея́, целому́дренне Ио́сифе, яви́шася царедво́рец Пенте́фрий вку́пе с жено́ю свое́ю, не́когда оклевета́вшии тя́; устраше́ннии же переме́ной зва́ния у́зника на власти́теля, и́стину вины́ своея́ открыва́ют ти́ и проще́ние от тебе́ про́сят. Ты́ же, незло́биве, вся́ в во́лю Бо́жию пре́дал еси́, ра́достно вопия́: Аллилу́иа.
И́кос 6.
Возсия́л еси́ вели́кою сла́вою в земли́ Еги́петстей, прему́дрый Ио́сифе. Де́лая пра́вду, собира́л еси́ пшени́цу на гла́дное вре́мя, о не́мже проре́кл еси́ царю́ в истолкова́нии его́ ди́внаго сна́. Егда́ же наста́ вре́мя исполне́ния твоего́ проро́чества, вси́ лю́дие притека́ху к тебе́, да напита́еши и́х. Мы́ же, воспомина́юще сия́, благода́рственно ти́ возглаша́ем:
Ра́дуйся, вся́ блага́я на мно́гая ле́та собра́вый; ра́дуйся, лю́ди избра́нныя препита́вый.
Ра́дуйся, я́ко в стране́ чужде́й зако́ны оте́ческия сохрани́вый; ра́дуйся, я́ко да́нный ти́ от Бо́га тала́нт умно́живый.
Ра́дуйся, я́ко в продолже́ние ро́да твоего́ даде́ ти́ фарао́н Асене́фу; ра́дуйся, я́ко во отра́ду дарова́л тебе́ Бо́г ча́да Манасси́ю и Ефре́ма.
Ра́дуйся, вели́кий пра́ведниче, Ио́сифе прекра́сный.
Конда́к 7.
Хотя́ Иа́ков спасти́ лю́ди от гла́да, посла́ сыны́ своя́ во Еги́пет, да ку́пят хле́ба: бе́ бо ве́лий гла́д по все́й земли́. Прише́дше сыны́ Изра́илевы во страну́ Еги́петскую, поклони́шася Ио́сифу до земли́: не позна́ша бо, я́ко бра́т и́м е́сть. О́н же а́бие позна́ и́х, вопроси́: «отку́ду есте́ вы́? приидо́ша согля́дати зе́млю сию́?» Тогда́ отвеща́ша ему́ бра́тия го́рестно: «ни, господи́не, мы́ раби́ твои́, лю́дие честни́и, приидо́ша купи́ти пи́щи. Мы́, двана́десять сыно́в еди́наго отца́, люби́маго же его́ сы́на растерза́ зве́рь, а ме́ньший бра́т вку́пе со отце́м взыва́ют непреста́нно Бо́гу отце́в плаче́вную пе́снь: Аллилу́иа».
И́кос 7.
Но́вая драга́я порфи́ра Ио́сифа омоча́ется слеза́ми, во́пль и рыда́ния его́ возно́сятся ко Творцу́: «О, Бо́же Всевы́шний, жи́в еще́ оте́ц мо́й Иа́ков!» Посе́м ве́лиим гла́сом к бра́тии восклица́ет: «а́з е́смь Ио́сиф, бра́т ва́ш, не бо́йтеся! вы́ прода́сте мя́, но Бо́г отце́в на́ших посла́ мя́ пред ва́ми, да сохраню́ вы́ и препита́ю от гла́да. Ше́дше, пове́дайте отцу́ моему́, да гряде́т со все́м домо́м свои́м и ви́дит сла́ву мою́». Мы́ же, чту́ще такову́ю любо́вь твою́ ко отцу́ и бра́тии твое́й, уми́льно зове́м ти́:
Ра́дуйся, му́дрый и сла́вный упра́вителю; ра́дуйся, чту́щих па́мять твою́ ди́вный покрови́телю.
Ра́дуйся, ве́лию любо́вь к бра́тии показа́вый; ра́дуйся, за оби́ды кро́тостию и незло́бием и́м отвеща́вый.
Ра́дуйся, победи́вый кова́рство дре́вняго зми́я; ра́дуйся, пресла́вный моли́твенниче о все́м ми́ре.
Ра́дуйся, вели́кий пра́ведниче, Ио́сифе прекра́сный.
Конда́к 8.
Стра́нно и ди́вно бе́ слы́шати Иа́кову: «жи́в сы́н тво́й Ио́сиф!» Ко́е се́рдце ста́рческое стерпи́т, ки́я о́чи сле́зы не излию́т, ки́й гла́с не возопие́т благи́х пода́телю Бо́гу благода́рственную пе́снь: Аллилу́иа.
И́кос 8.
Ве́сь до́м Изра́иля возра́довася прише́ствием бра́тии Ио́сифа, ви́девше ко́ни и колесни́цы фарао́новы, да ше́ствует ста́рец во Еги́пет к возлю́бленному сы́ну своему́. Паде́ пред Бо́гом Иа́ков моля́ся, да пока́жет во́лю святу́ю Свою́; и слы́шит в нощи́: «Иа́кове, Иа́кове! А́з, Бо́г отца́ твоего́, не бо́йся, иди́ во Еги́пет, и А́з та́мо бу́ду с тобо́ю, сы́н же тво́й Ио́сиф закро́ет ти́ о́чи свое́ю руко́ю». Мы́ же, мы́сленно зря́ще блаже́ннаго Ио́сифа во объя́тиях о́тчих, та́ко взыва́ем:
Ра́дуйся, сия́нием небе́снаго све́та озаре́нный; ра́дуйся, отце́м твои́м в ра́дости благослове́нный.
Ра́дуйся, я́ко в твое́м ца́рстве Христо́с младе́нствуя от И́рода скры́ся; ра́дуйся, я́ко Оте́ц Сла́вы воззва́ Сы́на Своего́ Единоро́днаго от Еги́пта возврати́тися.
Ра́дуйся, венча́нный от Бо́га венце́м нетле́ния; ра́дуйся, все́м на́м о́браз непоро́чнаго пред Бо́гом служе́ния.
Ра́дуйся, вели́кий пра́ведниче, Ио́сифе прекра́сный.
Конда́к 9.
Вси́ лю́дие ра́достно поклони́шася Ио́сифу, ви́девше гряду́ща его́ на встре́чу Изра́илю, отцу́ своему́, и на вы́и его́ сле́зы пролива́юща. И посели́ся Иа́ков в цвету́щей земли́ тоя́ страны́, воспева́я Бо́гу: Аллилу́иа.
И́кос 9.
Вити́и многовеща́ннии не возмо́гут досто́йно восхвали́ти чу́дное житие́ твое́, прекра́сне Ио́сифе. Отцы́ святи́и уподо́биша тя́ Сы́ну Бо́жию, Це́рковь же Христо́ва до ны́не пе́сньми кра́сными воспева́ет тя́ в дни́ страда́ний Искупи́теля ми́ра. Мы́ же, недосто́йнии, воспомина́юще сла́вную па́мять твою́, на рыда́ние приложи́м рыда́ние, зову́ще из глубины́ души́:
Ра́дуйся, из ро́ва, а́ки из гро́ба, возста́вый; ра́дуйся, на три́десяти сре́бреницех про́данный.
Ра́дуйся, во изгна́нии твое́м ве́лие целому́дрие показа́вый; ра́дуйся, в ско́рбех твои́х наде́жду на Бо́га полага́вый.
Ра́дуйся, отце́в святы́я Це́ркве чу́дное прославле́ние; ра́дуйся, непоро́чных пра́отцев ра́дость и весе́лие.
Ра́дуйся, вели́кий пра́ведниче, Ио́сифе прекра́сный.
Конда́к 10.
Спасе́ны бы́ша сы́ны Изра́иля и в изоби́лии хваля́ху Бо́га. Соста́рився же Иа́ков, призва́ де́ти твоя́, Ио́сифе, и ру́це пременя́я на глава́х и́х, изобража́ше кре́ст Христо́в, Ему́же мы́ поклоня́ющеся зове́м: Аллилу́иа.
И́кос 10
Ца́рствуеши ны́не, сла́вне Ио́сифе, не во Еги́пте, но в вы́шнем Иерусали́ме, и зри́ши сбытие́ проо́бразов. Пре́йде се́нь зако́нная, Благода́ти прише́дшей, о Не́йже проро́чествоваша отцы́ святи́и. Умира́я, Иа́ков благослови́ сы́ны твоя́, провеща́я и́м бу́дущее. Тебе́ же, блаже́нне Ио́сифе, бо́льша все́х бра́тий твои́х, ди́вная прорече́. Закры́в же о́чи отцу́ твоему́, ве́лий пла́ч сотвори́л еси́ по не́м. Мы́ же, восхваля́я такову́ю любо́вь твою́, благогове́йное прино́сим пе́ние:
Ра́дуйся, благослове́нный от отца́ благослове́ниями свы́ше; ра́дуйся, я́ко благослове́ния си́и превыша́ют го́ры и хо́лмы.
Ра́дуйся, я́ко святы́м Кресто́м благослови́шася твои́ де́ти; ра́дуйся, я́ко си́м благослове́нием достиго́ша они́ жи́зни ве́чныя.
Ра́дуйся, ди́вный проо́бразе Христо́ва воскресе́ния; ра́дуйся, избра́нниче Бо́жий и пра́ведных украше́ние.
Ра́дуйся, вели́кий пра́ведниче, Ио́сифе прекра́сный.
Конда́к 11.
Пе́сньми сла́дкими воспева́ют тя́ отцы́ Христо́вой Це́ркви, приснопа́мятне Ио́сифе. Наипа́че похвали́ тя́ вели́кий творе́ц кано́нов Андре́й Кри́тский. Приими́ же и от на́с недосто́йных, вели́кий пра́ведниче, смире́нное моле́ние, да подража́я твои́м доброде́телем, возмо́жем богоуго́дно пе́ти Созда́телю на́шему хвале́бную пе́снь: Аллилу́иа.
И́кос 11.
Свети́льник све́тлый угаса́ет: боголюбе́зный Ио́сиф во́лею Бо́жиею прилага́ется ко отце́м свои́м. С ми́ром и любо́вию благословля́я бра́тию свою́, о́н сле́зно умоля́ет и́х, глаго́ля: «а́з умира́ю, вы́ же изнеси́те ко́сти моя́, егда́ посети́т вы́ Бо́г и изведе́т из земли́ сея́ в зе́млю обетова́нную». Мы́ же, сла́вяще Го́спода, показа́вшаго тя́, ди́вным во святы́х Свои́х, уми́льным се́рдцем зове́м:
Ра́дуйся, я́ко, умира́я, бра́тию ми́ром и любо́вию благословля́еши; ра́дуйся, я́ко в зе́млю обетова́ния ко́сти своя́ изнести́ и́м завеща́еши.
Ра́дуйся, я́ко во све́тлостех святы́х ве́чно почива́еши; ра́дуйся, я́ко со а́нгелы и все́ми святы́ми за ве́сь ми́р Го́спода умоля́еши.
Ра́дуйся, я́ко клеветы́ и поноше́ния терпели́во переноси́ти на́м помога́еши; ра́дуйся, я́ко ле́ность и нераде́ние о де́ле Бо́жием в на́с искореня́еши.
Ра́дуйся, вели́кий пра́ведниче, Ио́сифе прекра́сный.
Конда́к 12.
Благода́ть от Го́спода испроси́ на́м, прося́щим твоея́ по́мощи, сла́вный Ио́сифе. Умоли́ Го́спода си́л о на́с гре́шных, да со стра́хом прохо́дим по́прище земна́го на́шего жития́ и, упова́я на твое́ предста́тельство, полу́чим от Всеще́драго Бо́га все́х на́ших грехо́в проще́ние и ми́рную христиа́нскую кончи́ну, да со все́ми благоугоди́вшими Бо́гу воспое́м, ра́дуяся, а́нгельскую пе́снь: Аллилу́иа.
И́кос 12.
Пою́ще свято́е житие́ твое́, достохва́льне Ио́сифе, ублажа́ем целому́дрие и по́двиги твоя́, велича́ем у́зы и страда́ния, чти́м непоро́чное преставле́ние, покланя́емся честны́м моще́м твои́м и усе́рдно мо́лим: не возгнуша́йся на́с, недосто́йных, но приими́ на́ше хвале́бное пе́ние, да прославля́я торжество́ твое́, в ра́дости взыва́ем:
Ра́дуйся, вели́кий пра́ведниче, ку́пно с возлю́бленными Бо́гом Авраа́мом, Исаа́ком и Иа́ковом; ра́дуйся, преди́вный моли́твенниче во святы́х Бо́га Изра́илева.
Ра́дуйся, носи́телей и́мени твоего́ неусы́пный храни́телю; ра́дуйся, все́м притека́ющим к тебе́ от бе́д изба́вителю.
Ра́дуйся, де́вственником и подви́жником наста́вниче и укрепле́ние; ра́дуйся, боля́щим и немощству́ющим ско́рое исцеле́ние.
Ра́дуйся, вели́кий пра́ведниче, Ио́сифе прекра́сный.
Конда́к 13
О,вели́кая сла́ва пра́отцев Христо́вых, преблаже́нный Ио́сифе! Приими́ на́ше благода́рственное пе́ние и вознеси́ о на́с гре́шных моле́ние ко Пресвяте́й Тро́ице, да изба́вимся вси́ ве́чнаго муче́ния и насле́дники Ца́рствия Небе́снаго бу́дем, в ра́дости пою́ще побе́дную пе́снь: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1.
А́нгели удиви́шася терпе́нию и незло́бию твоему́, смиренному́дрый Ио́сифе, ка́ко за́висти ра́ди бра́тий твои́х вве́ржен бы́в в ро́в, взыва́л еси́ люби́мому отцу́ твоему́: «о́тче Иа́кове! бра́тия навсегда́ разлучи́ша мя́ с тобо́ю и сего́ ра́ди не могу́ а́з бы́ти утеше́нием твое́й ста́рости, не узрю́ бо́лее седи́н твои́х». Мы́ же, ублажа́я сыно́внюю любо́вь твою́, со умиле́нием взыва́ем:
Ра́дуйся, люби́мый сы́не патриа́рха Иа́кова; ра́дуйся, избра́нный Бо́гом на спасе́ние Изра́иля.
Ра́дуйся, за́поведи Бо́жии в се́рдце носи́вый; ра́дуйся, до зако́на Бо́жия зако́н сохрани́вый.
Ра́дуйся, ве́ру Авраа́мову стяжа́вый; ра́дуйся, Исаа́кову послуша́нию подража́вый.
Ра́дуйся, вели́кий пра́ведниче, Ио́сифе прекра́сный.
Конда́к 1.
Избра́нный Бо́гом вели́кий пра́ведниче Ио́сифе, возлю́бленный сы́не отца́ твоего́ Иа́кова и ве́рный храни́телю заве́та пра́отцев Авраа́ма и Исаа́ка, вои́стинну бы́л еси́ проо́бразом во страда́нии Христа́ Спаси́теля. Мы́ же, восхваля́юще терпе́ние твое́ в злоключе́нии и му́жество во искуше́нии, ра́достно взыва́ем ти́:
Ра́дуйся, вели́кий пра́ведниче, Ио́сифе Прекра́сный.
Моли́тва.
О,святы́й пра́ведниче, целому́дренне Ио́сифе! Услы́ши на́с гре́шных, моля́щихся тебе́ и к твоему́ предста́тельству усе́рдно притека́ющих, прося́щих ми́лостиваго твоего́ заступле́ния. Помози́ на́м, свя́тче Бо́жий: ве́ру христиа́нскую до конца́ жития́ на́шего содержа́ти, за́поведи Бо́жия неле́ностно исполня́ти, оби́дящим проща́ти, чистоту́ и целому́дрие храни́ти и все́х бли́жних преи́скренне люби́ти. О, вели́кий пра́ведниче! во дни́ земна́го твоего́ жития́ ты́ са́м искуше́н бы́в, мо́жеши и на́м искуша́емым по́мощи, я́ко не́мощни есмы́ и неради́м о на́шем спасе́нии. Умоля́ем тя́, уго́дниче Бо́жий, воззови́ ко Творцу́ вся́ческих, да ниспо́слет О́н а́нгелов све́та, и́хже оте́ц тво́й Иа́ков ви́де восходя́щими и низходя́щими на зе́млю, да освятя́т они́ на́шу гре́шную зе́млю и лю́ди, погиба́ющия неве́рием, оскорбля́ющим вели́чие Бо́жие. Припади́ к Бо́жией Ма́тери, Засту́пнице ро́да христиа́нскаго, мно́го бо мо́жет моли́тва Ея́, да оста́ток дне́й на́ших поживе́м в покая́нии и творе́нии до́брых де́л. О, преди́вный засту́пниче! не забу́ди чту́щих пресве́тлую па́мять твою́ и приими́ на́ша те́плыя сле́зы, накропля́ющия страни́цы вели́кия кни́ги твоего́ бытия́. Подви́гни на моли́тву с собо́ю святы́х пра́отцев Авраа́ма, Исаа́ка и Иа́кова, не согреши́вших пред Бо́гом, да и мы́ со все́ми благоугоди́вшими Ему́ поклони́мся в Тро́ице Святе́й сла́вимому Бо́гу, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.