Текст акафиста одобрен для употребления за богослужением и в домашней молитве на заседании Священного Синода 26 декабря 2025 года (журнал № 133).
Кондак 1
Возбра́нному победи́телю песнь пое́м благодаре́ния, я́ко вели́чия правосла́вныя ве́ры побо́рнику, прави́телей росси́йских воево́де изря́дному, пра́вды меч нося́щему и ми́лости сокро́вищницу нескудева́ющую ще́дре раздава́ющему, и та́ко, похва́л вене́ц плету́ще, зове́м ти: Ра́дуйся, святы́й благове́рный кня́же Дими́трие, Оте́чества на́шего утвержде́ние.
Икос 1
А́нгел душе́ю и во́ин о́бразом поста́влен был еси́ пра́во пра́вити в кня́жестве Моско́вском, благове́рный Дими́трие, благоче́стия тве́рдый побо́рниче, лю́дие же, ви́дяще тя, о́трока, честны́х роди́телей свои́х Иоа́нна и Алекса́ндры ра́но лиши́вшася, но за́поведи Бо́жия послу́шающа, возопи́ша та́ко:
Ра́дуйся, ко́рене до́браго о́трасле благопло́дная;
ра́дуйся, кня́зя Влади́мира свята́го цве́те прекра́сный.
Ра́дуйся, страстоте́рпцев Бори́са и Гле́ба почита́телю преи́скренний;
ра́дуйся, благове́рнаго Алекса́ндра Не́вскаго подража́телю досто́йный.
Ра́дуйся, мно́гими доброде́тельми христиа́нскими измла́да украше́нный;
ра́дуйся, венце́м кня́жеским от Бо́га одаре́нный.
Ра́дуйся, сове́ты благи́я восприе́мый;
ра́дуйся, разсужде́нию доброрассу́дному после́довавый.
Ра́дуйся, Бо́гу Небе́сному всыновле́нный де́лы благи́ми;
ра́дуйся, Святу́ю Тро́ицу пропове́давый послуша́нием и́скренним.
Ра́дуйся, я́ко Сын Бо́жий возвы́си мы́шцу твою́;
ра́дуйся, я́ко Дух Святы́й удержа́ви правле́ние твое́.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 2
Ви́дя твое́ о ве́ре тща́ние, возра́довася святи́тель Алекси́й со благодаре́нием, храня́ тя от наве́та властолю́бцев я́ко зе́ницу о́ка, ты же сего́ благослове́ние улучи́в твори́ти дела́ любве́ ко Оте́честву и Це́ркви Правосла́вней, Бо́гу возопи́: Аллилу́иа.
Икос 2
Ра́зум в послуша́ние Бо́гу приведы́й, соу́з любве́ прия́л еси́ неразруши́мый во о́браз супру́жества ве́рнаго с благонра́вною княжно́ю Су́ждальскою Евдоки́ею, те́мже и забо́тник яви́лся еси́ не о сы́нех и дще́рех то́чию, но и о всех лю́дех Руси́ Святы́я, и́же восхваля́ху тя си́це:
Ра́дуйся, святи́теля Алекси́я чудотво́рца сы́не духо́вный;
ра́дуйся, дарова́нный гра́ду Москве́ ко́рмчий кре́пкий.
Ра́дуйся, со вся́ким науче́нием Ева́нгельским воспита́нный;
ра́дуйся, Человеколю́бца Спа́са Христа́ возлюби́вый.
Ра́дуйся, николи́же Бо́гом в сиро́тстве оста́вленный;
ра́дуйся, Писа́нию Свяще́нному всегда́ прилежа́вый.
Ра́дуйся, в посте́ и жа́жде живы́й я́ко дре́вний подви́жник;
ра́дуйся, под багряни́цею власяни́цу нося́й я́ко та́йный уго́дник.
Ра́дуйся, супру́жницу Евдоки́ю избра́вый, цвет благоче́стия;
ра́дуйся, дома́шнюю це́рковь упра́вивый по пути́ спасе́ния.
Ра́дуйся, я́ко умно́жися вели́чие твое́ а́ки кедр в Лива́не;
ра́дуйся, я́ко процвете́ смире́ние твое́ а́ки фи́никс в древесе́х.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 3
Си́лу Бо́жию, в не́мощи соверша́ющуюся, в Руси́, печа́лующейся под вековы́м и́гом Баты́евым, узре́вый, мысль прия́т о е́же свободи́ти Оте́чествие свое́, с ве́рою вопия́ Бо́гу: Аллилу́иа.
Икос 3
Име́яй тща́ние Це́рковь Правосла́вную на Руси́ в едине́нии сохрани́ти, пове́дал еси́ души́ помышле́ние свято́му Алекси́ю, митрополи́ту Моско́вскому, и святи́тель пра́ведный, слы́ша сие́, возра́довася, и словесы́ утвержде́ния тебе́ глаго́лаше:
Ра́дуйся, ты бо терпе́нию и му́жеству навы́кл еси́ тве́рдо;
ра́дуйся, ты бо свя́тость и му́дрость возлюби́л еси́ те́пле.
Ра́дуйся, труды́ ко трудо́м прилага́яй ра́достною душе́ю;
ра́дуйся, от си́лы в си́лу восходя́й Бо́жиею си́лою.
Ра́дуйся, орды́ безбо́жныя преще́нием не покори́выйся;
ра́дуйся, угро́з сме́ртных от челове́к не убоя́выйся.
Ра́дуйся, водо́ю живо́ю от усте́н пра́ведничих ду́шу напои́вый;
ра́дуйся, рог пра́ведный на мучи́теля лю́таго воздви́гнувый.
Ра́дуйся, ре́вность о свобо́де яви́вый я́ко полу́дне све́тлое;
ра́дуйся, се́рдце по́двигом угото́вивый на де́ло ра́тное.
Ра́дуйся, руко́ю кре́пкою Бо́га А́нгельских сил возставля́емый;
ра́дуйся, мы́шцею высо́кою Царя́ Небе́сных во́инств воздвиза́емый.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 4
Бу́рю треволне́ний прие́мый в княже́нии твое́м и напа́стей вра́жиих, беды́ от сро́дник, беды́ от лжебра́тий, беды́ от люде́й заблу́ждших, а наипа́че от гони́телей ве́ры Правосла́вныя мно́гажды отража́л еси́, и вси бли́жнии и дру́зи твои́, ви́дяще таково́е му́жество и ве́рность, возопи́ша: Аллилу́иа.
Икос 4
Слы́шаша едино́мысленнии тебе́ кня́зи сопреде́льнии весть о до́брых де́лех твои́х, стека́хуся на по́мощь ти одоле́ти зе́млю Бо́лгарскую и при Во́же реце́ во́и орды́нския, ра́тную же сла́ву твою́, ве́ру кре́пкую и братолю́бие уве́девше, принесо́ша тебе́ похвалы́ сицева́я:
Ра́дуйся, ты бо Це́ркве Ру́сския сын ве́рный яви́лся еси;
ра́дуйся, ты бо уго́дников святы́х почита́тель досто́йный показа́лся еси́.
Ра́дуйся, о мно́гих хра́мах Бо́жиих попече́ние усе́рдное сотвори́вый;
ра́дуйся, святы́й храм Госпо́день в кле́ти се́рдца созда́вый.
Ра́дуйся, могу́тством во́инским в ра́тех возблиста́вый;
ра́дуйся, кро́тости Христо́вой подража́ти возжела́вый.
Ра́дуйся, мно́гажды яви́вый в правле́нии великоду́шие и долготерпе́ние;
ра́дуйся, му́дре в княже́нии сочета́вый си́лу и милосе́рдие.
Ра́дуйся, непокори́выя зе́мли во еди́ный соу́з кроме́ меча́ совокупи́вый;
радуйся, све́тлую судьбу́ любе́зней отчи́зне у Бо́га испроси́вый.
Ра́дуйся, сла́вный град Москву́ стена́ми чу́дно огради́вый;
ра́дуйся, тем от ра́ти го́рдаго Ольге́рда град сохрани́вый.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 5
Богодарова́нныя побе́ды у Се́ргия преподо́бнаго, игу́мена оби́тели Тро́ицкия, я́ко у хода́тая пред Бо́гом, проси́л еси́, кня́же Дими́трие, глаго́ля: приспе́ ли у́бо вре́мя свобожде́ния Оте́чества от и́га орды́нскаго? Прия́в же свята́го му́жа благослове́ние, возра́довался еси́, вопи́я Бо́гу: Аллилу́иа.
Икос 5
Ви́деша лю́дие попече́ние твое́ о свобожде́нии земли́ Ру́сския от рабо́ты супоста́том неве́рным, потща́шася вве́ритися во́ли Бо́жией и благослове́нию ста́рца преподо́бнаго, те́мже стеко́шася вку́пе о́вии на по́ле бра́нное, о́вии же на моли́тву церко́вную, и возгласи́ша тебе́ со упова́нием:
Ра́дуйся, Бо́га Помо́щника и Засту́пника имы́й;
ра́дуйся, ле́потою до́блести и храбо́рства сия́яй.
Ра́дуйся, я́ко уготовля́ется тебе́ вене́ц побе́ды нетле́нный;
ра́дуйся, я́ко воздвиза́ются с тобо́ю ве́рнии на по́двиг пресла́вный.
Ра́дуйся, похвале́нию самонаде́янному броню́ ве́ры противуста́вивый;
ра́дуйся, во́ина Пересве́та ве́рнаго в по́мощь стяжа́вый.
Ра́дуйся, во́ина Осля́би глас утвержде́ния послу́шавый;
ра́дуйся, кня́зя Влади́мира Хра́браго со во́ины почти́вый.
Ра́дуйся, губи́теля самозва́ннаго устраше́ние;
ра́дуйся, супоста́т злому́дрых отгна́ние.
Ра́дуйся, пла́менную ре́вность о земли́ свое́й нося́й;
ра́дуйся, сле́зныя моли́твы о Отече́стве свое́м излива́яй.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 6
Пропове́дает Це́рковь чудеса́ от зако́на Бо́жия, я́ко пра́дед твой, свя́те Дими́трие, князь Алекса́ндр благове́рный по моли́твам святи́телей Моско́вских посла́ свет от моще́й свои́х, те́мже и уве́ри по́мощь ти свою́ в сраже́нии Донско́м, да пое́т вся Русь Правосла́вная: Аллилу́иа.
Икос 6
Возсия́л еси́ на све́щнице церко́внем, я́ко свети́льник, и стал еси́ верху́ горы́, я́ко град, свой град Москву́ зело́ возвыша́я, кня́же благове́рне Дими́трие, я́ко не восхоте́л еси́ назади́ во́йска хорони́тися от стрел вра́жиих, но всем о́браз и́стиннаго во́ина бысть, вопию́щим ти си́це:
Ра́дуйся, си́лы Мама́евы и де́рзости Яга́йловы победи́телю;
ра́дуйся, люде́й ру́сских от рабо́ты исма́ильския изба́вителю.
Ра́дуйся, сло́вом преподо́бнаго Се́ргия се́рдце укрепи́вый;
ра́дуйся, Рождество́ Пресвяты́я Богоро́дицы по́двиги просла́вивый.
Ра́дуйся, а́лчность, горды́ню и ко́вы враго́в одоле́вый;
ра́дуйся, Кресто́м, поще́нием и моли́твою гро́зно повоева́вый.
Ра́дуйся, А́нгельскаго ли́ка и му́ченическаго полка́ по́мощь прие́мый;
ра́дуйся, святы́ми во́ины Гео́ргием и Дими́трием на брань ведо́мый.
Ра́дуйся, честна́го Бори́са явле́нием обра́дованный;
ра́дуйся, кро́ткаго Гле́ба по́мощию уте́шенный.
Ра́дуйся, полки́ чужди́х мече́м огнеобра́зным ско́ро посека́яй;
ра́дуйся, во́и кре́пкия стре́лы молниеви́дными в бе́гство обраща́яй.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 7
Хотя́й в пре́дняя, благове́рне Дими́трие, при́сно помина́ти тьмы во́ев ру́сских, главы́ своя́ между́ До́ном и Непря́двою за зе́млю Ру́сскую и за ве́ру христиа́нскую положи́вших, день их в Це́ркви учреди́, да не забве́ни пребу́дут во ве́ки, и пе́ние воспе́ о них надгро́бное: Аллилу́иа.
Икос 7
Но́вый показа́лся еси́ Иису́с Нави́н, кня́же Дими́трие, зе́млю Ру́сскую, я́коже о́ный обетова́нную, мече́м возврати́вый, те́мже возвесели́шася вси лю́дие о пресла́вных вели́чиях Бо́га на́шего, списа́телие же по́двиг твои́х и све́тлаго жития́ воспе́ша тебе́ словесы́ си́ми:
Ра́дуйся, в свобо́ду я́коже Моисе́й лю́ди приведы́й;
ра́дуйся, Мама́я иноплеме́нника я́коже Дави́д победи́вый.
Ра́дуйся, от Гедео́на научи́выйся ве́лий храбо́рниче;
ра́дуйся, Езеки́и подража́вый сле́зный моли́твенниче.
Ра́дуйся, Влади́мира, я́ко Константи́на но́ваго, ору́жие Крест восприе́мый;
ра́дуйся, Яросла́ва Му́драго побе́дою на Святопо́лка вдохновле́нный.
Ра́дуйся, град Москву́ соблюды́й, Дании́лов удел избра́нный;
ра́дуйся, Русь Святу́ю сбереги́й, воево́д опло́т заве́тный.
Ра́дуйся, до́блестию, возста́в на по́лчище Мама́ево, возсия́вый;
ра́дуйся, рать Лито́вскую от Руси́ отгна́вый.
Ра́дуйся, на по́ли Кулико́ве, на До́не реце́ побе́дою увенча́нный;
ра́дуйся, до́блестию побе́ду и сми́рением ми́лость от Бо́га улучи́вый.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 8
Стра́нницы и прише́льцы есмы́ на земли́, сие́ воспомяну́л еси́, воево́до пресла́вный, святы́й Дими́трие, глаго́ля: а́ще живе́м, Го́сподеви живе́м, а́ще же умира́ем, Госпо́дни есмы́; я́ко раб неключи́мый повеле́нное сотвори́х от Бо́га, Ему́же вопию́: Аллилу́иа.
Икос 8
Вся Русь христиа́нская возра́довася зело́ о пресла́внем вели́чии по́двиг твои́х, благове́рный кня́же, благослове́нием Це́ркве укрепле́нный, о сем же тебе́ ма́ли и вели́цы ра́достию вопию́т песнь сицеву́ю:
Ра́дуйся, щи́те Руси́ правосла́вныя тве́рдый;
ра́дуйся, мечу́ за ве́ру христиа́нскую пресла́вный.
Ра́дуйся, я́ко покро́в кре́пкий во́ином ца́рство утвержда́еши;
ра́дуйся, я́ко сокро́вище духо́вное лю́дем утеше́ние источа́еши.
Ра́дуйся, рыда́ние Руси́ на ра́дость преложи́вый;
ра́дуйся, у́зы Оте́чества в свобо́ду претвори́вый.
Ра́дуйся, я́ко на Го́спода упова́яй, не постыди́лся еси́;
ра́дуйся, я́ко враги́ побежда́яй, не превозне́слся еси́.
Ра́дуйся, да́же до сме́рти за ве́ру пострада́ти возжеле́вый;
ра́дуйся, е́же во Ева́нгелии обетова́ние живота́ ве́чнаго уве́девый.
Ра́дуйся, до́блесть Авраа́ма пра́отца восприе́мый, ве́ру пра́ведную;
ра́дуйся, ски́птр Царя́ Небе́снаго взе́мляй, побе́ду непобеди́мую.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 9
Вся́кое похвале́ние тебе́, отцу́ люде́й моско́вских, подоба́ет, я́ко ми́лостиву и сострада́тельну, и на по́мощь ско́ру, призыва́емь бо те́пле, спаса́еши вопию́щих на всяк день Христу́ Бо́гу: Аллилу́иа.
Икос 9
Вети́и подвиго́в князе́й Руси́ Правосла́вныя мно́гими словесы́ красоту́ жития́ твоего́ воспе́ша, хвале́бныя же по́вести соста́виша лю́дем ру́сским на па́мятование, да вси чту́щия благодаря́т Бо́га и тебе́, слугу́ Его́, похваля́ют та́ко:
Ра́дуйся, град Москву́ опло́т правосла́вия во ве́ки сотвори́вый;
ра́дуйся, честь и и́мя сла́вное ей побе́ды ра́ди добы́вый.
Ра́дуйся, грех оставле́ние улучи́вый трудо́м и смире́нием;
ра́дуйся, смиренному́дрия о́браз яви́вый ве́рою и благогове́нием.
Ра́дуйся, я́ко отри́нул еси́ земна́я, небе́сная возлюби́вый;
ра́дуйся, я́ко стяжа́л еси́ преми́рная, лука́вая возненави́девый.
Ра́дуйся, путе́м многоско́рбным в Ца́рство Бо́жие ше́ствовавый;
ра́дуйся, боле́зньми многотру́дными се́рдце чи́сто стяжа́вый.
Ра́дуйся, единоду́шие в ру́сских кня́зех насади́вый;
ра́дуйся, единонача́лие в Ру́сской земли́ утверди́вый.
Ра́дуйся, побе́дою твое́ю от кра́я и до кра́я зе́млю на́шу обра́довавый;
ра́дуйся, лю́дем твоим от мла́да до ста́ра о́браз жития́ показа́вый.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 10
Спасти́ся всем жела́я преи́скренним твои́м, мно́ги хра́мы в земли́ свое́й устро́ил еси́, свя́те Дими́трие, еще́ же и оби́тели святы́я во сла́ву ве́ры Тро́ическия созда́л еси́, да пою́т в них и́ноцы Бо́гу, и Пречи́стей Богоро́дице, и всем святы́м непреста́нно: Аллилу́иа.
Икос 10
Стена́ и подпо́ра еси́ ста́рцем и младе́нцем, жена́м и мужа́м благочести́вым, свя́те Дими́трие, к твоему́ бо заступле́нию прибега́ющии никогда́же посра́млени отхо́дят, но ру́ку спасе́ния улучи́вше, ра́достно вопию́т:
Ра́дуйся, заве́ту кня́зя Влади́мира после́довавый;
ра́дуйся, ве́ру христиа́нскую кре́пко содержа́вый.
Ра́дуйся, сию́ ве́ру апо́стольскую храни́ти обеща́вый;
ра́дуйся, сию́ ве́ру отече́скую соблюда́ти потща́выйся.
Ра́дуйся, святи́теля Никола́я Чудотво́рца кре́пце возлю́бивый;
ра́дуйся, во и́мя его́ оби́тель Угре́шскую му́дре сотвори́вый.
Ра́дуйся, Де́ве Богоро́дице до́мы созда́ти обеща́вый;
ра́дуйся, во сла́ву и́мени Ея́ оби́тели устро́ити повеле́вый.
Ра́дуйся, с Бо́гом, в Тро́ице сла́вимым, вся творя́й и о Нем побора́яй;
ра́дуйся, Креста́ Животворя́щаго ча́стицу на пе́рсех нося́й, Сим побежда́яй.
Ра́дуйся, Русь еди́ную и от и́га свобожде́нную оста́вивый в достоя́ние на́ше;
ра́дуйся, жизнь пресла́вную и ве́ры испо́лненную яви́вый в назда́ние на́ше.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 11
Пе́ние вся́кое не возмо́жет досто́йно похвали́ти ре́вность о богоугожде́нии, тобо́ю явле́нную, ско́рби же и боле́зни твоя́ кто изочте́т, песка́ равночи́сленныя, разоре́ние бо гра́да твоего́ от наше́ствия Тохтамы́шева, князе́й же не́киих противле́ние претерпе́л еси́, но во всех сих воспева́л Спаси́телю Бо́гу: Аллилу́иа.
Икос 11
Светоприе́мный свети́льник возже́гл еси́, исходя́ душе́ю в сре́тение Христо́во, те́мже в Черто́зе Небе́снем водвори́лся еси́, отню́дуже назира́еши град твой и всю зе́млю Ру́сскую, мы же тебе́ благода́рно прино́сим похвалы́ сицевы́я:
Ра́дуйся, земли́ Ру́сския цве́те прекра́сный;
ра́дуйся, кня́жества Моско́вскаго виногра́де многопло́дный.
Ра́дуйся, и́стины христиа́нския рачи́телю;
ра́дуйся, Оте́чества правосла́внаго попечи́телю.
Ра́дуйся, Со́лнца пра́вды Христа́ луче́ светоза́рная;
ра́дуйся, О́блака ле́гкаго, Богоро́дицы, моли́твенниче те́плый.
Ра́дуйся, во́инов святы́х в по́мощь всегда́ призыва́вый;
ра́дуйся, уго́дников Бо́жиих па́мять до́бре почита́вый.
Ра́дуйся, уде́л твой, зе́млю Ру́сскую, предержа́вый кре́постию ра́зума;
ра́дуйся, в насле́дие твое́, Ца́рство Небе́сное, дости́гнувый чистото́ю со́вести.
Ра́дуйся, свеще́ю, на гро́бе о себе́ возгоре́вшеюся, Бо́гом просла́вленный;
ра́дуйся, чудесы́, от моще́й твоих явле́нными, лю́ди уте́шивый.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 12
Благода́ть прия́ти восхоте́в Це́ркве Бо́жия пре́жде отше́ствия в путь всея́ земли́, призва́л еси́ Се́ргия преподо́бнаго, с ни́мже в едине́нии духо́внем и ны́не пребыва́еши, нам же завещава́еши, я́коже пре́жде и боля́ром свои́м: Бог ми́ра да бу́дет с ва́ми, пою́щими Ему́: Аллилу́иа.
Икос 12
Пою́ще твое́ е́же о бли́жних раче́ние, восхваля́ем такова́го усе́рднаго засту́пника ро́да на́шего, живо́т свой за лю́ди положи́ти никогда́же сомня́щагося, но за́поведь Христо́ву о любви́ соблю́дшаго. Те́мже приими́ от нас, кня́же благове́рне Дими́трие, похвалы́ сицевы́я:
Ра́дуйся, в послуша́нии Це́ркви обреты́й тишину́ душе́вную;
ра́дуйся, в черто́зе Воскресе́ния улучи́вый упокое́ние ве́чное.
Ра́дуйся, от жития́ своего́ све́тлости прие́мый украше́ние;
ра́дуйся, по преставле́нии свое́м о Руси́ имы́й попече́ние.
Ра́дуйся, в Кремли́ Моско́вском погребе́нный, мощьми́ с на́ми пребыва́яй;
ра́дуйся, в земли́ Ру́сской ду́хом от чад Бо́жиих никогда́же отступа́яй.
Ра́дуйся, в гро́зных испыта́ниих Руси́ при́сный засту́пниче;
ра́дуйся, в пра́вых сраже́ниих во́инов ди́вный помо́щниче.
Ра́дуйся, я́ко со святы́ми ру́сскими у Престо́ла Бо́жия предстои́ши;
ра́дуйся, я́ко с прави́тели благочести́выми в ли́це пра́ведных пребыва́еши.
Ра́дуйся, всели́выйся в зе́млю кро́тких, Ца́рство Небе́сное;
ра́дуйся, нареки́йся сын послуша́ния и князь благове́рный.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 13
О пресла́вный во́ине Христа́ Бо́га на́шего, благове́рный кня́же Дими́трие, приими́ от нас похвалу́ чуде́с твои́х, жития́ пресла́внаго и кончи́ны непосты́дныя, и назира́я град твой Москву́ с высоты́ Небе́сныя, моли́ сохрани́тися Руси́ Правосла́вней от наше́ствия иноплеме́нных и междоусо́бныя бра́ни, да не преста́нет в Це́ркви никогда́же песнь побе́дная: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
А́нгел душе́ю и во́ин о́бразом поста́влен был еси́ пра́во пра́вити в кня́жестве Моско́вском, благове́рный Дими́трие, благоче́стия тве́рдый побо́рниче, лю́дие же, ви́дяще тя, о́трока, честны́х роди́телей свои́х Иоа́нна и Алекса́ндры ра́но лиши́вшася, но за́поведи Бо́жия послу́шающа, возопи́ша та́ко:
Ра́дуйся, ко́рене до́браго о́трасле благопло́дная;
ра́дуйся, кня́зя Влади́мира свята́го цве́те прекра́сный.
Ра́дуйся, страстоте́рпцев Бори́са и Гле́ба почита́телю преи́скренний;
ра́дуйся, благове́рнаго Алекса́ндра Не́вскаго подража́телю досто́йный.
Ра́дуйся, мно́гими доброде́тельми христиа́нскими измла́да украше́нный;
ра́дуйся, венце́м кня́жеским от Бо́га одаре́нный.
Ра́дуйся, сове́ты благи́я восприе́мый;
ра́дуйся, разсужде́нию доброрассу́дному после́довавый.
Ра́дуйся, Бо́гу Небе́сному всыновле́нный де́лы благи́ми;
ра́дуйся, Святу́ю Тро́ицу пропове́давый послуша́нием и́скренним.
Ра́дуйся, я́ко Сын Бо́жий возвы́си мы́шцу твою́;
ра́дуйся, я́ко Дух Святы́й удержа́ви правле́ние твое́.
Ра́дуйся, святы́й благове́рный кня́же Дими́трие, Оте́чества на́шего утвержде́ние.
Кондак 1
Возбра́нному победи́телю песнь пое́м благодаре́ния, я́ко вели́чия правосла́вныя ве́ры побо́рнику, прави́телей росси́йских воево́де изря́дному, пра́вды меч нося́щему и ми́лости сокро́вищницу нескудева́ющую ще́дре раздава́ющему, и та́ко, похва́л вене́ц плету́ще, зове́м ти: Ра́дуйся, святы́й благове́рный кня́же Дими́трие, Оте́чества на́шего утвержде́ние.
Моли́тва
О вели́кий засту́пниче и моли́твенниче земли́ Ру́сския, святы́й благове́рный кня́же Дими́трие! Приими́ моле́ние на́ше о сохране́нии Руси́ Правосла́вныя, за ню́же ты ве́рно подвиза́лся еси́ во всем житии́ твое́м, от вы́шняго Про́мысла власть получи́в над ро́дом люде́й ея́! Ты бо, от А́нгельских лико́в по́мощь прие́мый и от сро́дник же святы́х и му́ченик пресла́вных подкрепле́ние, победи́л еси́ полки́ чужди́х на по́ли Кулико́ве при До́не реце́, го́рдаго Мама́я изгна́в до́блестию во́инскою, еще́ же моли́твою и посто́м, я́коже Моисе́й иногда́ Амали́ка. Отоню́дуже и зва́ние Донска́го воево́ды прия́л еси́, враго́м стра́шна, мяте́жником гро́зна, ве́рным же лю́дем бла́га и ми́лостива. Ве́мы вои́стинну тя в земли́ на́шей ми́ра и тишины́ вели́каго побо́рника, гре́шником же и лени́вым богогла́сную трубу́, тружда́ющимся о Христе́ орла́ высокопа́рнаго, и всем христиа́ном опо́ру, и защи́ту, и о́браз. Те́мже чтим тя я́ко прави́теля прему́драго, безви́нных лю́бящаго, вино́вных проща́ющаго, заблужда́ющихся исправля́ющаго, умо́м све́тлаго, ра́зумом глубо́каго, в по́мыслах смире́ннаго, с Бо́гом вся творя́щаго и за Него́ побора́ющаго. Кня́жеским же зва́нием облече́н, а́нгельски пожи́л еси́, зе́млю же Ру́сскую управля́я, о пусты́ннем житии́ помышля́л еси́, и отвсю́ду прославля́емь, сла́ву Креста́ Христо́ва предпоче́л еси́. И я́коже свободи́л еси́ люде́й твои́х от и́га орды́нскаго и по преставле́нии свое́м во мно́гих испыта́ниях с Небесе́ по́мощь земли́ твое́й подава́л еси́, та́ко и ны́не мно́гих бед ю́ изба́ви, да, благоче́стно пожи́вше, дости́гнем рая́, нам вожделе́ннаго, и та́мо с тобо́ю просла́вим Отца́ и Сы́на и Свята́го Ду́ха, Тро́ицу Единосу́щную во ве́ки веко́в. Ами́нь.
Комментировать