Конда́к 1
Избра́нная испове́днице Христо́ва, свята́я му́ченице Иу́лие, похва́льная пе́ния прино́сим ти́, чистоту́ жития́ твоего́ де́вственнаго и честна́я страда́ния твоя́ восхваля́юще; ты́ же, я́ко иму́щая дерзнове́ние ко Го́споду, бу́ди пред Ни́м те́плая моли́твенница о душа́х на́ших, да зове́м ти́:
Ра́дуйся, свята́я Иу́лие, неве́сто Христо́ва пресла́вная.
И́кос 1
А́нгелом Небе́сным еще́ на земли́ уподо́билася еси́, Иу́лие всесла́вная, в пламене́ющей ко Творцу́ любви́ пребыва́я и в а́нгельстей чистоте́ себе́ соблюда́я. Мы́ же, ви́дя добро́ту души́ твоея́, ея́же ра́ди Небе́сных черто́гов Влады́ка сподо́би тя́, воспева́ем ти́ си́це:
Ра́дуйся, блаже́нная Христо́ва после́довательнице.
Ра́дуйся, ве́ры христиа́нския небоя́зненная пропове́днице.
Ра́дуйся, роди́телей боголюби́вых благоче́стие восприя́вшая.
Ра́дуйся, Боже́ственное Писа́ние и за́поведи Госпо́дни возлюби́вшая.
Ра́дуйся, я́ко прия́вши Ду́ха Свята́го, измла́да идолослуже́ние отри́нула еси́.
Ра́дуйся, я́ко земна́го обру́чника па́че Небе́снаго зна́ти не восхоте́ла еси́.
Ра́дуйся, свята́я Иу́лие, неве́сто Христо́ва пресла́вная.
Конда́к 2
Ви́дя нечести́вый тво́й господи́н ангелоподо́бное житие́ твое́, и я́ко ни ле́сть, ни преще́ния, ни устраше́ния не возмого́ша к идолослуже́нию уклони́ти тя́, сего́ ра́ди я́ко святу́ю тя́ почита́ше, Иу́лие всехва́льная; ты́ же, благода́тию Спа́совою, я́ко броне́ю, укрепля́емая и защища́емая, непреста́нно воспева́ла еси́ Бо́гу: Аллилу́иа.
И́кос 2
Ра́зумом, свы́ше просвеще́нным, любо́вь к ми́ру и вся́, я́же в ми́ре, отве́ргла еси́, непоро́чная отрокови́це, и все́ю душе́ю твое́ю Иису́са Христа́ возлюби́в, да́же до сме́рти му́ченическия Ему́ послужи́ла еси́, среди́ неве́рных и́стиннаго Бо́га пропове́дуя. Сего́ ра́ди, таково́му твоему́ ра́зуму дивя́ся, глаго́лем:
Ра́дуйся, в моли́тве и посте́ непреста́нно пребыва́вшая.
Ра́дуйся, от страсте́й, я́ко щито́м, целому́дрием себе́ огражда́вшая.
Ра́дуйся, я́ко ско́рби мно́гия за и́мя Госпо́дне прия́ла еси́.
Ра́дуйся, я́ко сораспя́тися Христу́ вседу́шне вожделе́ла еси́.
Ра́дуйся, в вертогра́де Небе́снем присноцвету́щая.
Ра́дуйся, я́ко кри́н, воня́ми доброде́телей благоуха́ющая.
Ра́дуйся, свята́я Иу́лие, неве́сто Христо́ва пресла́вная.
Конда́к 3
Си́лою Бо́жиею свы́ше препоя́санная, благохва́льная де́во, не́мощь же́нскаго естества́ отложи́ла еси́, в броню́ испове́дания Христо́ва обле́кшися; о неве́рующих же во Христа́ Иису́са сле́зы пролива́ла еси́, я́ко о немогу́щих насле́довати жи́зни ве́чныя и в селе́ниих ра́йских воспе́ти Ему́: Аллилу́иа.
И́кос 3
Иму́щи кре́пкую наде́жду то́кмо на еди́наго Бо́га, неврежде́нна пребы́в, мучи́телей горды́ню победи́ла еси́, му́ченице многострада́льная, и вене́ц побе́ды от Вседержи́теля прия́ла еси́. Те́мже, му́жественное в же́нстей пло́ти души́ мудрова́ние нося́щей, удивля́емся си́ле ду́ха твоего́ и умиле́нно пое́м ти́:
Ра́дуйся, я́ко за ве́ру и́стинную со идолослужи́тели кре́пко ра́товала еси́.
Ра́дуйся, я́ко ра́ди Го́спода Иису́са мно́гажды пострада́ла еси́.
Ра́дуйся, я́ко устраши́ти тя́ муче́нии лю́тыми тща́щиися от Христа́ тя́ не отврати́ша.
Ра́дуйся, я́ко ни ра́ны, ни преще́ния от любве́ Его́ отлучи́ти тя́ не возмого́ша.
Ра́дуйся, терпе́нием твои́м ко́зни вра́жия победи́вшая.
Ра́дуйся, за испове́дание ве́ры жи́зни своея́ не пощади́вшая.
Ра́дуйся, свята́я Иу́лие, неве́сто Христо́ва пресла́вная.
Конда́к 4
Бу́ря я́рости мучи́телевы нападе́ на тя́, незло́бивая голуби́це, но не поколеба́ кре́пости души́ твоея́: основа́на бо бе́ на тве́рдем ве́ры Христо́вы ка́мени, на не́мже ты́ неподви́жно стоя́щи, воспева́ла еси́ Бо́гу: Аллилу́иа.
И́кос 4
Име́я всегда́ пред оча́ми свои́ми Го́спода, предста́ла еси́ на суди́щи му́жественно, и врага́ терпе́нием твои́м победи́ла еси́, всехва́льная Иу́лие. Те́мже, помина́юще честна́я твоя́ страда́ния, со умиле́нием зове́м ти́:
Ра́дуйся, повеле́ние нечести́вое му́жественно отве́ргшая.
Ра́дуйся, боле́зньми многообра́зными не устраше́нная, А́нгелы удиви́вшая.
Ра́дуйся, по лани́там деви́ческим неща́дно бие́нная.
Ра́дуйся, за власы́ мучи́телями терза́емая и влачи́мая.
Ра́дуйся, я́ко ра́ди любви́ ко Христу́ лю́тыя му́ки му́жественно переноси́ла еси́.
Ра́дуйся, я́ко страда́нием за Него́ несказа́нно ра́довалася еси́.
Ра́дуйся, свята́я Иу́лие, неве́сто Христо́ва пресла́вная.
Конда́к 5
Боготе́чней звезде́ уподо́билася еси́, прему́драя де́во, егда́ на кресте́ неве́рными ра́спятая, лику́ющи, славосло́вила еси́ Спаси́теля ми́ра, за ро́д челове́ческий на Кресте́ в же́ртву Себе́ прине́сшаго; те́мже дне́сь Тому́жде Го́сподеви предстои́ши, непреста́нно воспева́ющи а́нгельскую пе́снь: Аллилу́иа.
И́кос 5
Ви́девше лю́дие пресла́вное чу́до, по исхо́де святы́я души́ твоя́, я́ко из у́ст твои́х голуби́ца бе́лая к Небеси́ возлете́, удиви́шася зело́; мучи́телие же, узре́вше А́нгелов бли́з бездыха́ннаго те́ла твоего́, бежа́ша, стра́х бо ве́лий нападе́ на ня́. Мы́ же, твое́ до́блественное му́жество помина́юще, вопие́м ти́:
Ра́дуйся, Спаси́телю ми́ра, на Кресте́ ви́сящу, спострада́вшая.
Ра́дуйся, кре́стным страда́нием Его́ соприча́стницею бы́вшая.
Ра́дуйся, во страда́ниих твои́х благода́тную по́мощь от Христа́ Бо́га получи́вшая.
Ра́дуйся, от крове́й твои́х све́тлую ри́зу спасе́ния себе́ истка́вшая.
Ра́дуйся, я́ко неве́рных све́том ве́ры ева́нгельския просвети́ла еси́.
Ра́дуйся, я́ко любо́вию твое́ю ко Христу́ А́нгельская ликостоя́ния возвесели́ла еси́.
Ра́дуйся, свята́я Иу́лие, неве́сто Христо́ва пресла́вная.
Конда́к 6
Пропове́дница чуде́с и сла́вы Бо́жия яви́лася еси́, ла́стовице доброгла́сная, и́ноком оби́тели близлежа́щия, А́нгелом Госпо́дним о му́ченичестей кончи́не твое́й извеще́нным. Они́ же, взя́вше свято́е те́ло твое́, погребо́ша е́ во хра́ме, воспева́я Бо́гови: Аллилу́иа.
И́кос 6
Возсия́ла еси́, я́ко светоза́рная звезда́, и Боже́ственною благода́тию отгна́ла еси́ многобо́жия тьму́, смире́нная а́гнице, просвети́вши мно́гия лю́ди, и́же ви́деша чудеса́ Бо́жия и исцеле́ния мно́гая, от моще́й твои́х оби́льно проистека́ющия. Просвети́ у́бо и на́с, омраче́нных мгло́ю грехо́вною, и све́том невече́рним озари́ тя́ сла́вящих и пою́щих такова́я:
Ра́дуйся, Го́спода Иису́са страда́ньми и чудесы́ просла́вившая.
Ра́дуйся, мно́гая страда́ния за и́мя Его́ претерпе́вшая.
Ра́дуйся, ве́ры и́стинныя неустраши́мая пропове́днице.
Ра́дуйся, неду́гов челове́ческих ми́лостивая цели́тельнице.
Ра́дуйся, венце́м испове́дническим от Бо́га украше́нная.
Ра́дуйся, я́ко ма́слина, в дому́ Бо́жии насажде́нная.
Ра́дуйся, свята́я Иу́лие, неве́сто Христо́ва пресла́вная.
Конда́к 7
Хотя́ Влады́ка и Госпо́дь Сла́вы яви́ти тя́, ве́рную рабу́ Свою́, я́ко свети́льник, во тьме́ светя́щий и све́том Небе́сным все́х просвеща́ющий, призва́ тя́ на по́двиг страда́льческий, да ви́дящии му́жество и тве́рдую ве́ру твою́ пока́ются в заблужде́ниих свои́х и вку́пе со избра́нными да воспою́т Ему́: Аллилу́иа.
И́кос 7
Но́вый живо́т, ве́чный, прия́ла еси́, богохва́льная де́во, егда́ кре́стною кончи́ною от пло́ти своея́ многострада́льныя разреши́вшися, в черто́г Небе́снаго Жениха́ вошла́ еси́, Его́же моля́щи не преста́й за ны́, гре́шныя, любо́вию страда́ния твоя́ почита́ющия и глаго́лющия:
Ра́дуйся, добропобе́дная страстоте́рпице, сме́рти теле́сныя не устраши́вшаяся.
Ра́дуйся, до́блестная му́ченице, в страда́ниих, я́ко зла́то в горни́ле, очи́стившаяся.
Ра́дуйся, доброгла́сная цевни́це, си́лу Бо́жию пред нечести́выми пропове́давшая.
Ра́дуйся, богому́драя де́во, к и́стинней ве́ре мно́гия заблу́ждшия лю́ди приве́дшая.
Ра́дуйся, благово́нная сми́рно, я́звы Го́спода твоего́ на те́ле свое́м носи́вшая.
Ра́дуйся, страда́лице Христо́ва, му́ченический ли́к на Небесе́х возвесели́вшая.
Ра́дуйся, свята́я Иу́лие, неве́сто Христо́ва пресла́вная.
Конда́к 8
Стра́нныя и стра́шныя страда́ния святы́я му́ченицы ви́девше, ве́рнии удиви́шася, ка́ко мла́да отрокови́ца в ю́ностнем телеси́ таковы́я му́жественно за Христа́ терпи́т му́ки, да и мы́, испо́лншеся умиле́ния, благода́рно возопии́м Бо́гу: Аллилу́иа.
И́кос 8
Ве́сь Сладча́йший Иису́с сла́дость, ве́сь жела́ние тебе́ бы́сть, страстоте́рпице всехва́льная, Его́ бо ра́ди го́рькия му́ки и тя́жкия страда́ния да́же до му́ченическия кончи́ны ра́достно терпе́ла еси́. Те́мже и по сме́рти честно́е те́ло твое́ Бо́жиим изволе́нием нетле́нно сохрани́ся, да источа́ет оби́лие чуде́с с ве́рою к заступле́нию твоему́ прибега́ющим и моли́твенно тебе́ взыва́ющим:
Ра́дуйся, я́ко страда́нием твои́м Це́рковь Христо́ву украси́ла еси́.
Ра́дуйся, я́ко исцеле́ний неоскудева́емый исто́чник яви́лася еси́.
Ра́дуйся, нетле́нием моще́й твои́х сла́вно от Бо́га возвели́ченная.
Ра́дуйся, в ли́це де́в на Небеси́ просла́вленная.
Ра́дуйся, лозо́ многопло́дная, благода́тными да́ры ве́рных пита́ющая.
Ра́дуйся, кади́льнице злата́я, я́ко фимиа́м благоуха́нный, моли́твы Твоя́ за ны́ к Бо́гу принося́щая.
Ра́дуйся, свята́я Иу́лие, неве́сто Христо́ва пресла́вная.
Конда́к 9
Вси́ А́нгели и святы́х ли́цы ра́достно тя́ срето́ша, всехва́льная, егда́ во врата́ Ца́рствия Небе́снаго вошла́ еси́, во е́же побе́ды вене́ц от руки́ Христа́ Жизнода́вца прия́ти. У́бо и на́м, недосто́йным, насле́дие ве́чное со святы́ми испроси́, да возмо́жем ку́пно с тобо́ю воспева́ти Бо́гови во Ца́рствии Его́: Аллилу́иа.
И́кос 9
Вети́и многовеща́ннии не возмо́гут по достоя́нию восхвали́ти доброде́тели и страда́ния твоя́, преди́вная де́во, ка́ко благода́тию Бо́жиею победи́ла еси́ дре́вняго иско́ннаго врага́ и посрами́ла еси́ и́дольскую пре́лесть, мно́жество ду́ш ко Христу́ приве́дши. Те́мже, ублажа́юще му́ченическую кончи́ну твою́, пое́м со умиле́нием такова́я:
Ра́дуйся, во о́браз христиа́нским де́вам свы́ше пронарече́нная.
Ра́дуйся, свято́е целому́дрие и чистоту́ де́вства до́бре сохра́ншая.
Ра́дуйся, и́стинное богопочита́ние да́же до сме́рти возлюби́вшая.
Ра́дуйся, я́ко свети́льник златоле́пный посреде́ му́чениц возсия́вшая.
Ра́дуйся, Боже́ственным огне́м сердца́ на́ша возжига́ющая.
Ра́дуйся, в Небе́снем вертогра́де неизрече́нною ра́достию наслажда́ющаяся.
Ра́дуйся, свята́я Иу́лие, неве́сто Христо́ва пресла́вная.
Конда́к 10
Спасти́ся все́м хотя́щим споспешеству́й моли́твами твои́ми пред Го́сподем, му́ченице свята́я, и испроси́ разреше́ние грехо́в почита́ющим честна́я страда́ния твоя́, да вопие́м с тобо́ю: Аллилу́иа.
И́кос 10
Стено́ю моли́тв твои́х от вся́каго искуше́ния на́с огради́, испове́днице Христо́ва, и путе́м пра́вым в Ца́рствие Небе́сное руководи́, зане́ даде́ся тебе́ благода́ть моли́тися о лю́дех правосла́вных пред Престо́лом Го́спода Вседержи́теля. Мы́ же, помина́юще по́двиги и страда́ния твоя́, ублажа́ем тя́ си́це:
Ра́дуйся, му́чеников ра́дование и де́вственников сла́во.
Ра́дуйся, ве́рным христиа́ном кре́пкое заступле́ние.
Ра́дуйся, от го́рних высо́т к земноро́дным ми́лостиво приника́ющая.
Ра́дуйся, все́м тружда́ющимся по́мощь неви́димо подаю́щая.
Ра́дуйся, во благи́х проше́ния на́ша ско́ро исполня́ющая.
Ра́дуйся, в неду́зех стра́ждущих благода́тно посеща́ющая.
Ра́дуйся, свята́я Иу́лие, неве́сто Христо́ва пресла́вная.
Конда́к 11
Пе́ние всеумиле́нное прино́сим ти́, достохва́льная Иу́лие, прославля́юще твоя́ за Христа́ страда́ния, и мо́лим тя́: испроси́ у Ми́лостиваго Го́спода все́м на́м здра́вие, долгоде́нствие и на враги́ побе́ду и одоле́ние, а наипа́че – грехо́в проще́ние и ду́ш спасе́ние, да пое́м Ему́ во ве́ки: Аллилу́иа.
И́кос 11
Све́тлыми луча́ми чуде́с немерца́емо сия́еши, Иу́лие добронра́вная, просвеща́я сердца́ ве́рных, исцеля́я неду́жных, утеша́я бе́дствующих и моля́ся о все́х притека́ющих к тебе́ с любо́вию и вопию́щих ти́ та́ко:
Ра́дуйся, о спасе́нии гре́шных усе́рдная хода́таице.
Ра́дуйся, де́вам и жена́м христиа́нским ми́лостивая помо́щнице.
Ра́дуйся, ве́рных ча́д Це́ркве Правосла́вныя духо́вное услажде́ние.
Ра́дуйся, в го́рестех и страда́ниих при́сное утеше́ние.
Ра́дуйся, неду́ги теле́сныя и душе́вныя ско́ро исцеля́ющая.
Ра́дуйся, ше́ствующих путе́м Христо́вых за́поведей укрепля́ющая.
Ра́дуйся, свята́я Иу́лие, неве́сто Христо́ва пресла́вная.
Конда́к 12
Благода́ть Госпо́дня моли́твами твои́ми, свята́я му́ченице Иу́лие, дарова́ся исто́чнику целе́бныя воды́, из ка́мене исте́кшему; сего́ ра́ди и хра́му во и́мя твое́ созда́тися на ме́сте кре́стных страда́ний твои́х благоволи́ Бо́г. Те́мже, и на́с, па́мять твою́ све́тло пра́зднующих, благода́ти испо́лни моли́твами твои́ми, да воспое́м вку́пе с тобо́ю чуде́с Пода́телю Бо́гу: Аллилу́иа.
И́кос 12
Пою́ще Бо́га, ди́внаго во святы́х Свои́х, ублажа́ем тя́, страстоте́рпице Христо́ва, почита́я страда́ния твоя́, сла́вим долготерпе́ние и непобеди́мое му́жество, хва́лим му́ченическую кончи́ну и мо́лим тя́: простри́ с Небесе́ по́мощь твою́ и на на́с, вопию́щих ти́ такова́я:
Ра́дуйся, ча́ше даро́в Бо́жиих преизоби́льная.
Ра́дуйся, сокро́вищнице исцеле́ний неоску́дная.
Ра́дуйся, ра́дости несконча́емыя и сла́вы ве́чныя хода́таице.
Ра́дуйся, бла́г Небе́сных пода́тельнице.
Ра́дуйся, теле́с на́ших здра́вие и ду́ш спасе́ние.
Ра́дуйся, ве́рным христиа́ном кре́пкое заступле́ние.
Ра́дуйся, свята́я Иу́лие, неве́сто Христо́ва пресла́вная.
Конда́к 13
О пресла́вная и всехва́льная му́ченице Иу́лие! Приими́ ми́лостивно от на́с ма́лое моле́ние сие́ и не преста́ни моли́тися за ны́ ко Го́споду, да изба́вит на́с от вра́г ви́димых и неви́димых и твои́м богоприя́тным хода́тайством сподо́бит на́с Ца́рствия Небе́снаго, иде́же вку́пе с тобо́ю и все́ми святы́ми сподо́бимся воспева́ти Ему́ побе́дную пе́снь: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1
А́нгелом Небе́сным еще́ на земли́ уподо́билася еси́, Иу́лие всесла́вная, в пламене́ющей ко Творцу́ любви́ пребыва́я и в а́нгельстей чистоте́ себе́ соблюда́я. Мы́ же, ви́дя добро́ту души́ твоея́, ея́же ра́ди Небе́сных черто́гов Влады́ка сподо́би тя́, воспева́ем ти́ си́це:
Ра́дуйся, блаже́нная Христо́ва после́довательнице.
Ра́дуйся, ве́ры христиа́нския небоя́зненная пропове́днице.
Ра́дуйся, роди́телей боголюби́вых благоче́стие восприя́вшая.
Ра́дуйся, Боже́ственное Писа́ние и за́поведи Госпо́дни возлюби́вшая.
Ра́дуйся, я́ко прия́вши Ду́ха Свята́го, измла́да идолослуже́ние отри́нула еси́.
Ра́дуйся, я́ко земна́го обру́чника па́че Небе́снаго зна́ти не восхоте́ла еси́.
Ра́дуйся, свята́я Иу́лие, неве́сто Христо́ва пресла́вная.
Конда́к 1
Избра́нная испове́днице Христо́ва, свята́я му́ченице Иу́лие, похва́льная пе́ния прино́сим ти́, чистоту́ жития́ твоего́ де́вственнаго и честна́я страда́ния твоя́ восхваля́юще; ты́ же, я́ко иму́щая дерзнове́ние ко Го́споду, бу́ди пред Ни́м те́плая моли́твенница о душа́х на́ших, да зове́м ти́:
Ра́дуйся, свята́я Иу́лие, неве́сто Христо́ва пресла́вная.
Моли́тва
О свята́я де́во и му́ченице Иу́лие, и́стинная неве́сто Христо́ва! К тебе́, я́ко благонаде́жней пред Го́сподем предста́тельнице на́шей усе́рдно прибега́ем и во умиле́нии серде́ц на́ших мо́лимся: предстоя́щи у Престо́ла Пресвяты́я Тро́ицы и наслажда́ющися неизрече́ннаго блаже́нства Небе́снаго, при́зри у́бо ми́лостивно на на́с, принося́щих ти́ хвале́бное пе́ние сие́, и испроси́ у Преблага́го Го́спода дарова́ти на́м душе́вное и теле́сное здра́вие, во благоче́стии христиа́нстем преуспе́яние, к житию́ вре́менному ну́жная и дово́льная и вся́ я́же ко спасе́нию потре́бная, да ми́рно и благоче́стно пожи́вше, сподо́бимся благу́ю кончи́ну христиа́нскую улучи́ти и Ца́рствие Небе́сное насле́довати, сла́вяще ди́внаго во святы́х Свои́х Бо́га, Отца́ и Сы́на и Свята́го Ду́ха, во ве́ки веко́в. Ами́нь.