Текст акафиста одобрен для употребления за богослужением и в домашней молитве на заседании Священного Синода 26 декабря 2025 года (журнал № 133).
Конда́к 1
Возбра́нных во́инов Христо́вых терпе́ние и му́жество и доброде́телей их соцве́тие побе́дное воспои́м днесь любо́вию, мучениколю́бцы, исцеле́ний душа́м и телесе́м прося́ще, [пред мощми́ уго́дников Бо́жиих] с ве́рою взыва́юще: Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
И́кос 1
А́нгелов и небе́сных челове́ков собо́ру приобщи́вшихся ны́не восхва́лим, свяще́нника Па́вла и диа́кона Григо́рия му́чеников, земли́ Пе́рмския добро́ту, и житие́ их венце́м пра́вды увенча́нное воспомина́юще, возопии́м си́це:
Ра́дуйтеся, в правосла́вней Росси́и рожде́ннии;
ра́дуйтеся, в Христо́вой Це́ркви воспита́ннии.
Ра́дуйтеся, изде́тска примета́вшиися хра́му Бо́жию;
ра́дуйтеся, от ю́ности прилежа́вшии прему́дрости Госпо́дней.
Ра́дуйтеся, Па́вле, в псалмопе́нии усе́рдствовавый, и Григо́рие, в ги́мнах церко́вных поуча́выйся;
ра́дуйтеся, вели́ким та́инствам внима́вшии и к небесе́м благода́тными глаго́лы восперя́вшиися.
Ра́дуйтеся, проходи́вшии мно́гая богоуго́дная по́прища;
ра́дуйтеся, поспеша́вшии к коему́ждо тре́бующему по́мощи.
Ра́дуйтеся, Па́стыря до́браго избра́нницы;
ра́дуйтеся, Се́ятеля и́стины насле́дницы.
Ра́дуйтеся, Лозы́ небе́сныя ро́ждие плодоно́сное;
ра́дуйтеся, Исто́чника безсме́ртнаго о́бщницы досто́йнии.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 2
Ви́дяще святи́и на жа́тве Христо́ве де́латели усе́рдно тружда́ющияся, возревнова́ша сим после́довати и Го́споду порабо́тати на ни́ве Его́, сло́во уче́ния Ева́нгельскаго се́юще, и хва́ляще Бо́га: Аллилу́иа.
И́кос 2
Ра́зум незаблу́дный в по́двизе моли́твенном стяжа́вше, мно́гим бы́сте ко Христу́ путеводи́тели и во благоче́стии наста́вницы, уча́ще Та́инства Це́ркве кре́пце люби́ти и сло́ву Бо́жию внима́ти, его́же изъясня́ли есте́ лю́дем, благодаря́щим вас си́це:
Ра́дуйтеся, Ева́нгелием умы́ умудри́вшии;
ра́дуйтеся, моли́твами ду́ши озари́вшии.
Ра́дуйтеся, учи́тели люде́й свои́х благода́тнии;
ра́дуйтеся, ревни́тели преда́ний оте́ческих духоно́снии.
Ра́дуйтеся, Па́вле, Кунгу́ра воспита́ние, и Григо́рие, Вя́тския земли́ порожде́ние;
ра́дуйтеся, неду́г душе́вных врачева́ние и па́стве Христо́вых ове́ц утеше́ние.
Ра́дуйтеся, сомоли́твенницы све́тлии, прихо́жан хра́ма Нико́льскаго воспита́тели;
ра́дуйтеся, служи́тели ве́рнии, пути́ отце́в святы́х после́дователи.
Ра́дуйтеся, священноде́йствителей честна́я похвало́;
ра́дуйтеся, миря́ном благо́е поможе́ние.
Ра́дуйтеся, я́коже бо са́ми за́поведи твори́сте, та́кожде и лю́ди науча́ли есте́;
ра́дуйтеся, я́ко сего́ ра́ди Ца́рствия Небе́снаго дости́гли есте́.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 3
Си́ла Вы́шняго осени́ вас, восходя́щих на степе́ни свяще́нства, те́мже дар служе́ния у престо́ла Бо́жия досто́йно прии́мше, свяще́нными усты́ и очище́нным се́рдцем воспева́сте: Аллилу́иа.
И́кос 3
Иму́ще благоприя́тное вре́мя де́лания, Бо́гу усе́рдно послужи́сте, па́ству свою́ от волко́в мы́сленных охраня́юще, наипа́че же ю́ныя к доброде́телем наставля́юще, от всех благода́рно восхваля́емии си́це:
Ра́дуйтеся, свети́льницы благода́ти Христо́вы;
ра́дуйтеся, сосу́ди благоутро́бия Бо́жия.
Ра́дуйтеся, я́ко бы́сте му́жественнии ду́хом;
ра́дуйтеся, я́ко бы́сте бо́дрствующии се́рдцем.
Ра́дуйтеся, Па́вле, иере́ев красото́, и Григо́рие, диа́конов све́тлосте;
ра́дуйтеся, святоле́пныя слу́жбы рачи́телие и святы́х почита́телие.
Ра́дуйтеся, служе́нием у престо́ла Бо́жия просвети́вшиися, я́ко А́нгели;
ра́дуйтеся, по́двигом во броня́ ве́ры обо́лкшиися, я́ко апо́столи.
Ра́дуйтеся, дру́жества зако́ном связу́емии;
ра́дуйтеся, братолю́бия сою́зом почте́ннии.
Ра́дуйтеся, Та́ин Святы́х Христо́вых смире́ннии служи́телие;
ра́дуйтеся, та́инств седми́ церко́вных и́стовии соприча́стницы.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 4
Бу́рю внутрь иму́ще помышле́ний лю́тых, мно́зи лю́дие росси́йстии мяте́жу соедини́шася проти́ву Це́ркве и Царя́ правосла́внаго. Вы же, святи́и Па́вле и Григо́рие, возведе́ние в сию́ годи́ну тя́жкую тиша́йшаго святи́теля Ти́хона на престо́л Патриа́рший уве́дше, с наде́ждею воззва́сте Бо́гу: Аллилу́иа.
И́кос 4
Слыша́вше словеса́ о́гненная архипа́стыря Андрони́ка, суду́ Бо́жию гони́телей ве́ры предаю́щаго, призва́сте, отцы́ на́ши Па́вле и Григо́рие, лю́ди мо́кинския на защище́ние Це́ркве и земли́ Ру́сския, на моли́тву усе́рдную, на крестохожде́ние небоя́зненное в защи́ту святы́нь правосла́вных, и не по мно́зех днех за печа́льником земли́ Пе́рмския на му́ки и смерть после́довасте, те́мже воспева́ем вас си́це:
Ра́дуйтеся, в годи́ну лю́тую от слу́ха зла не убоя́вшиися;
ра́дуйтеся, ча́да Бо́жия на по́двиг ве́ры угото́вившии.
Ра́дуйтеся, в борьбе́ со грехо́м яви́вшиися му́жие соверше́ннии;
ра́дуйтеся, на брань с диа́волом изше́дшии во́ини духо́внии.
Ра́дуйтеся, пла́менныя ве́ры Андрони́ка, святи́теля Пе́рмскаго, насле́дницы;
ра́дуйтеся, о́гненныя ре́вности того́ о сла́ве Бо́жии подража́телие.
Ра́дуйтеся, лю́ди ве́си Мо́кинския во благоче́стии утвержда́вшии;
ра́дуйтеся, прихо́жан це́ркве Нико́льския пред страда́нии укрепи́вшии.
Ра́дуйтеся, я́ко хра́мы Ду́ха Свята́го себе́ соде́ласте;
ра́дуйтеся, я́ко сострада́льцы Страсте́м Христо́вым бы́ти возжела́сте.
Ра́дуйтеся, поруга́ние и муче́ние Росси́и раздели́вшии;
ра́дуйтеся, воскресе́ние Христа́ Распя́таго благовести́вшии.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 5
Боготе́чную звезду́ всем ве́рным Свои́м посла́ Госпо́дь в годи́ну страда́ний Крест Свой, и той я́ко свети́льник путь им озари́л есть на гору́ высоку́ му́ченичества. Вы же, святи́и Па́вле и Григо́рие, та́мо восходя́ще, воспева́сте: Аллилу́иа.
И́кос 5
Ви́девше о́троцы Вавило́нстии пещь о́гненную муче́ния, за зако́ны оте́ческия в ню вверго́шася, А́нгелом прохлажда́еми; вы же, святи́и Па́вле и Григо́рие, во огнь страда́ния входя́ще, слы́шасте от А́нгел сицева́я:
Ра́дуйтеся, на му́ки лю́тыя по́двигом ду́ши угото́вившии;
ра́дуйтеся, на Голго́фу Пе́рмскую десни́цею Бо́жиею возведе́ннии.
Ра́дуйтеся, святы́ни хра́ма пре́жде мук облобыза́вшии;
ра́́дуйтеся, моли́твы ве́ры посреде́ страда́ний возне́сшии.
Ра́дуйтеся, мраз лю́тый претерпе́вшии, я́ко четы́редесять му́ченик Севасти́йских;
ра́дуйтеся, коньми́ влаче́ние прии́мшии, я́ко Фео́дор, страда́лец Перги́йский.
Ра́дуйтеся, желе́зным о́стном прободе́ннии, я́ко Прокл, рожде́ние Ка́липтское;
ра́дуйтеся, мно́гими ра́нами уя́звленнии, я́ко Севастиа́н, похвала́ Медиола́нская.
Ра́дуйтеся, уничиже́ний и поноше́ний за Христа́ сподо́бльшиися, я́ко Три́фон, в Нике́и убие́нный;
ра́дуйтеся, ме́чному усече́нию во главу́ подве́ргшиися, я́ко Пантелеи́мон, целе́бник всеми́рный.
Ра́дуйтеся, огнем не́нависти мучи́тельския соже́гшиися, я́ко Фео́дор Ти́рон, хле́б сладкий, Тро́ице принесе́нный;
ра́дуйтеся, ро́су благода́ти му́ченическия ра́достно прия́вшии, я́коже о́троцы в пещи́ Вавило́нской.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 6
Пропове́дницы богоно́снии му́ченицы яви́шася, кровь за ве́ру излия́вше, с ни́миже и вы, о Па́вле и Григо́рие, небеса́ насле́довасте, мно́гия му́ки претерпе́вше. Те́мже дерзнове́ние ко Христу́ стяжа́сте всем ве́рным помога́ти, пою́щим Бо́гу: Аллилу́иа.
И́кос 6
Возсия́вше на тве́рди небе́сней, я́ко зве́зды, отгоня́ете безбо́жия мрак, и, к со́нму новому́ченик причте́ннии, хода́тайствуете о умноже́нии ве́ры в земли́ на́шей; те́мже и мы, ко святы́м моще́м ва́шим притека́ющии, вопие́м сицева́я:
Ра́дуйтеся, Пе́рмския страны́ утвержде́ние;
ра́дуйтеся, но́вых му́чеников украше́ние.
Ра́дуйтеся, терпели́вцы боже́ственнии;
ра́дуйтеся, страстоте́рпцы Христо́вы.
Ра́дуйтеся, всехва́льнии му́ченицы;
ра́дуйтеся, честни́и священнострада́льцы.
Ра́дуйтеся, Па́вле, немощны́х покрови́телю, и Григо́рие, оби́димых утеше́ние;
ра́дуйтеся, столпи́ подвиза́ющихся во и́стине и наста́вницы и́щущих просвеще́ния.
Ра́дуйтеся, я́ко в ро́ды родо́в пребыва́ет ва́ша па́мять;
ра́дуйтеся, я́ко во ве́ки веко́в прославля́ет вас Це́рковь.
Ра́дуйтеся, дерзнове́ннии моли́твенницы ко Отцу́ Небе́сному;
ра́дуйтеся, непосты́днии хода́таи за зе́млю Ру́сскую.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 7
Хотя́щия погребсти́ у олтаря́ хра́ма Нико́льскаго честна́я телеса́ ва́ша Ма́ти Бо́жия омофо́ром Свои́м от уби́йц и кощу́нник сохрани́, те́мже пе́ние надгро́бное невозбра́нно сотво́рше, со слеза́ми воспе́ша: Аллилу́иа.
И́кос 7
Но́вое показа́ чу́до в Тро́ице сла́вимый Госпо́дь, сохрани́в святы́я мо́щи ва́ша в ве́си Мо́кинской долголе́тно в земли́ неврежде́ни, а́ще и храм честны́й поруга́нию предаде́ся, и в разруше́ние прии́де; те́мже ве́рнии, на ме́сто упокое́ния ва́шего притека́юще, взыва́ху си́це:
Ра́дуйтеся, в по́двизе ва́шем путь спасе́ния лю́дем указа́вшии;
ра́дуйтеся, в погребе́нии ва́шем на по́двиг кре́стный па́ству вдохнови́вшии.
Ра́дуйтеся, я́ко в лихоле́тии сподо́бистеся надгро́бнаго пе́ния;
ра́дуйтеся, я́ко ны́не Бо́гу прино́сите на́ше моле́ние.
Ра́дуйтеся, Па́вле, ца́рствуяй со апо́столы, и Григо́рие, веселя́йся со му́ченики;
ра́дуйтеся, воспита́вшии и́стины побо́рники и доброде́телей небе́сных вене́чники.
Ра́дуйтеся, ве́рных скорбь о убие́нии ва́шем в ра́дость претвори́вшии;
ра́дуйтеся, до́брую весть о по́двизе свое́м Це́ркви яви́вшии.
Ра́дуйтеся, ве́ры ра́ди смерть му́ченическую прии́мшии;
ра́дуйтеся, му́ченичества ра́ди жизнь ве́чную обре́тшии.
Ра́дуйтеся, све́том воскресе́ния ду́ши своя́ украси́вшии;
ра́дуйтеся, еле́ем ра́дования свети́льники своя́ испо́лнившии.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 8
Стра́нное чу́до ви́девше, устрани́мся суеты́ мирски́я, и удиви́мся, уве́девше му́ченик па́мять жи́ву во обре́тении моще́й их, и́хже ме́сто погребе́ния жи́тели ве́си Мо́кинския огради́ша, и вся́кому приходя́щу кла́нятися повелева́ху, в се́рдце воспева́я: Аллилу́иа.
И́кос 8
Вси во огни́ любве́ Боже́ственныя су́ще, иере́ю Па́вле с единому́дренным собра́том диа́коном Григо́рием, на небеси́ престо́лу Бо́жию предста́ли есте́ во еди́нем ли́це с новому́ченики сла́вными, сего́ ра́ди пое́м вам си́це:
Ра́дуйтеся, я́ко па́мять ва́ша на земли́ с похвала́ми;
ра́дуйтеся, я́ко ра́дость ва́ша на небесе́х со святы́ми.
Ра́дуйтеся, престо́лу Бо́жию во све́те предстоя́щии;
ра́дуйтеся, Ма́терь Бо́жию во о́чию ви́дящии.
Ра́дуйтеся, Па́вле, моли́твенниче кре́пкий, и Григо́рие, помо́щниче ско́рый;
ра́дуйтеся, дерзнове́ние стяжа́вшии му́ченическое и моли́тве навы́кшии непреста́нней.
Ра́дуйтеся, печа́льницы на́ши и хода́таи;
ра́дуйтеся, сострада́тели на́ши и защи́тницы.
Ра́дуйтеся, самови́дцем жития́ ва́шего столпи́ светоно́снии;
ра́дуйтеся, новообраще́нным в ве́ру правосла́вную ко́рмчии до́брии.
Ра́дуйтеся, неве́дущим бо вас внеза́пу я́ко попечи́тели открыва́етеся;
ра́дуйтеся, от возлюби́вших вас ны́не я́ко благоде́тели ублажа́етеся.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 9
Вся́кое естество́ а́нгельское мучениколю́бцы воздвиза́ет усе́рдно уго́дников Бо́жиих почита́ти, моще́м же тех ве́рно покланя́тися, да вси, све́том благода́ти просвеща́еми, во едине́нии со святы́ми дре́вними и но́выми Бо́га прославля́ем, пою́ще: Аллилу́иа.
И́кос 9
Вети́и духо́внии воспева́ют ра́достно честно́е обре́тение моще́й ва́ших, не то́чию бо Пе́рмстей земли́ сие́ ми́лость бысть, но и вся́кому гра́ду и стране́, иде́же чтут новому́ченик па́мять; те́мже и мы, о Па́вле и Григо́рие, лик соста́вльше, согла́сно взыва́ем:
Ра́дуйтеся, весь Мо́кинскую телесы́ многострада́льными облагодати́вшии;
ра́дуйтеся, лю́дем, проше́ния возсыла́ющим, чудоде́йствующии.
Ра́дуйтеся, в ми́ре живу́щих по́мощию не оста́вльшии;
ра́дуйтеся, ми́ра стра́ждущаго ско́рби утоля́ющии.
Ра́дуйтеся, о лю́дех правосла́вных попечи́телие и скорбя́щим в беда́х уте́шителие;
ра́дуйтеся, церко́вных чад воспита́телие и заблужда́ющихся к све́ту путеводи́телие.
Ра́дуйтеся, помо́щницы ю́ным во избра́нии ни́вы церко́вныя;
ра́дуйтеся, наста́вницы ве́рных в труде́х во сла́ву Бо́жию.
Ра́дуйтеся, служи́телем престо́ла Бо́жия к соверше́нству путь показу́ющии;
ра́дуйтеся, моли́твенником в земли́ Пе́рмской к постоя́нству си́лу подаю́щии.
Ра́дуйтеся, подвиза́ющимся во хра́мех святы́х поможе́ние до́брое;
ра́дуйтеся, изнемога́ющим в печа́лех лю́тых подпо́ра кре́пкая.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 10
Спасти́ хотя́ мир, Госпо́дь наш и Влады́ка Це́рковь учреди́ со Святы́ми Та́инствы ея́, святы́ни же дарова́ ро́ду челове́ческому, чудотворя́ и в телесе́х усо́пших уго́дников Свои́х; мы же обре́тению моще́й священному́чеников Па́вла и Григо́рия ра́дующеся, вопие́м: Аллилу́иа.
И́кос 10
Столпостена́ есте́ нам, святи́и Па́вле и Григо́рие, вы бо, уго́дницы Христо́вы, телесы́ во гробе́х лежа́ще, ду́хи прогоня́ете, боле́зни исцеля́ете; мы же нетле́ние моще́й и риз ва́ших свяще́нных прославля́юще, воспева́ем сицева́я:
Ра́дуйтеся, сокро́вище, в земли́ сокры́тое, нам дарова́вшии;
ра́дуйтеся, благослове́ние, на Небесе́х раздае́мое, сим источи́вшии.
Ра́дуйтеся, я́ко о откры́тии гробо́в ва́ших возвесели́ся мучениколю́бцев сосло́вие;
ра́дуйтеся, я́ко о явле́нии моще́й ва́ших возра́довашася Небе́сная Во́инства.
Ра́дуйтеся, ве́си Мо́кинския благове́стницы и тоя́ благоуха́ние;
ра́дуйтеся, от А́нгелов воспева́емии и от челове́к похваля́емии.
Ра́дуйтеся, Пе́рмских святы́х пра́зднество явле́нием благода́тным свои́м украси́вшии;
ра́дуйтеся, Спаси́теля Возне́сшагося храм пренесе́нием святы́х мощей свои́х возвесели́вшии.
Ра́дуйтеся, Тро́ицы побо́рницы, в Пе́рми Вели́цей водвори́вшиися;
ра́дуйтеся, Ду́ха жили́ща, в лю́дех благогове́йных чудоде́йствовавшии.
Ра́дуйтеся, пра́зднество но́во лю́дем свои́м дарова́вшии;
ра́дуйтеся, святы́нею но́вою в кра́и на́шем возсия́вшии.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 11
Пе́ние моле́бное соверша́ется на всяк день усе́рдно во хра́ме Вознесе́ния Госпо́дня, в не́мже положе́ни суть цельбоно́сныя мо́щи ва́ша, священному́ченицы Па́вле и Григо́рие, ве́рным на утеше́ние, единогла́сно хва́лящим Бо́га: Аллилу́иа.
И́кос 11
Светопода́тельный свети́льник ра́ка моще́й ва́ших яви́ся гра́ду Пе́рми и всей земли́ на́шей, му́ченик бо свои́х почти́ти досто́йно ма́лии и вели́цыи притека́ют, и утеше́ние с просвеще́нием вку́пе прие́млюще, возглаша́ют си́це:
Ра́дуйтеся, не под спу́дом забве́ния сокрове́ннии;
ра́дуйтеся, на све́щнице сла́вы благода́тию сия́ющии.
Ра́дуйтеся, душ скорбя́щих животво́рное обновле́ние;
ра́дуйтеся, неду́гов тя́жких наде́жное исцеле́ние.
Ра́дуйтеся, Па́вле, святы́х сограждани́не, и Григо́рие, дру́же спасе́нных;
ра́дуйтеся, люде́й Пе́рмских святы́ня и всех ве́рных весе́лие.
Ра́дуйтеся, никто́же бо лиша́ется милости́внаго ва́шего посеще́ния;
ра́дуйтеся, николи́же бо пресеца́ется милосе́рдия ва́шего исто́чник.
Ра́дуйтеся, мощми́ свои́ми безсме́ртие пропове́дающии;
ра́дуйтеся, от ра́ки своея́ чудеса́ источа́ющии.
Ра́дуйтеся, пита́телие на́ши и моли́твенницы;
ра́дуйтеся, благоде́телие на́ши и защи́тницы.
Ра́дуйтеся, священному́ченицы Па́вле и Григо́рие, Пе́рмския земли благода́тнии засту́пницы.
Конда́к 12
Благода́ть прия́ти восхоте́вше, лю́дие Пе́рмстии со тща́нием к вам притека́ют на всяк день, мно́гих зна́мений и чуде́с сподобля́ющеся, и друго́в и бли́жних свои́х созыва́юще пе́ти Бо́гу: Аллилу́иа.
И́кос 12
Пою́ще обре́тение моще́й ва́ших, восхваля́ем вас я́ко Бо́жиих уго́дников, ва́ми бо неве́рующии ко Христу́ приво́дятся, боля́щии прие́млют здра́вие, гре́шницы обраща́ются ко благоче́стию и вси благода́рственно взыва́ют си́це:
Ра́дуйтеся, покая́ния спаси́тельнаго пропове́дницы;
ра́дуйтеся, сострада́ния Спаси́телева провозве́стницы.
Ра́дуйтеся, проще́ния на Кресте́ грехо́в на́ших возвести́телие;
ра́дуйтеся, избавле́ния от неду́г на́ших в Та́инствах указа́телие.
Ра́дуйтеся, Павле, ве́рных побо́рниче, и Григо́рие, вразумле́ние па́дшим;
ра́дуйтеся, кра́я Пе́рмскаго чудотво́рцы и свети́льницы душа́м на́шим.
Ра́дуйтеся, младе́нцем и отроко́м наста́вницы неле́ностнии;
радуйтеся, отце́м и ма́терем помо́щницы благопоспе́шнии.
Ра́дуйтеся, мона́хом и свяще́нником покрови́телие усе́рднии;
ра́дуйтеся, ста́рым и неду́жным уте́шителие и́стиннии.
Ра́дуйтеся, украше́ние но́вых му́ченик;
ра́дуйтеся, ра́дование всех мучениколю́бцев.
Ра́дуйтеся, священному́ченицы Па́вле и Григо́рие, Пе́рмския земли благода́тнии засту́пницы.
Конда́к 13
О святи́и сро́дницы на́ши, священному́ченицы Па́вле и Григо́рие, за ве́ру Христо́ву во дни гоне́ний пострада́вшии и мощми́ свои́ми нам возсия́вшии! Моле́ние на́ше ма́лое прие́млюще, всем поле́зное пода́йте е́же ко спасе́нию и в Ца́рствие Небе́сное восхо́д испроси́те любо́вию поющи́м Бо́гови: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1
А́нгелов и небе́сных челове́ков собо́ру приобщи́вшихся ны́не восхва́лим, свяще́нника Па́вла и диа́кона Григо́рия му́чеников, земли́ Пе́рмския добро́ту, и житие́ их венце́м пра́вды увенча́нное воспомина́юще, возопии́м си́це:
Ра́дуйтеся, в правосла́вней Росси́и рожде́ннии;
ра́дуйтеся, в Христо́вой Це́ркви воспита́ннии.
Ра́дуйтеся, изде́тска примета́вшиися хра́му Бо́жию;
ра́дуйтеся, от ю́ности прилежа́вшии прему́дрости Госпо́дней.
Ра́дуйтеся, Па́вле, в псалмопе́нии усе́рдствовавый, и Григо́рие, в ги́мнах церко́вных поуча́выйся;
ра́дуйтеся, вели́ким та́инствам внима́вшии и к небесе́м благода́тными глаго́лы восперя́вшиися.
Ра́дуйтеся, проходи́вшии мно́гая богоуго́дная по́прища;
ра́дуйтеся, поспеша́вшии к коему́ждо тре́бующему по́мощи.
Ра́дуйтеся, Па́стыря до́браго избра́нницы;
ра́дуйтеся, Се́ятеля и́стины насле́дницы.
Ра́дуйтеся, Лозы́ небе́сныя ро́ждие плодоно́сное;
ра́дуйтеся, Исто́чника безсме́ртнаго о́бщницы досто́йнии.
Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Конда́к 1
Возбра́нных во́инов Христо́вых терпе́ние и му́жество и доброде́телей их соцве́тие побе́дное воспои́м днесь любо́вию, мучениколю́бцы, исцеле́ний душа́м и телесе́м прося́ще, [пред мощми́ уго́дников Бо́жиих] с ве́рою взыва́юще: Ра́дуйтеся, священному́ченицы Па́вле и Григо́рие, Пе́рмския земли́ благода́тнии засту́пницы.
Молитва
О новому́ченицы сла́внии, иере́ю Па́вле и диа́коне Григо́рие! Днесь, ве́рно соше́дшеся, восхваля́ем честна́я страда́ния ва́ша, я́же в годи́ну тя́жкую гоне́ний на Це́рковь Ру́сскую претерпе́сте. Почита́ем и бра́тскую любо́вь ва́шу, ве́ры бо нра́вом связу́еми, я́ко единоду́шнии сослужи́телие, согла́сно и му́ки за Христа́ прия́сте. Ублажа́ем любо́вь ва́шу, псалмопе́вца бо глаго́лы в час испыта́ния воспомяну́сте, я́ко добро́ и красно́ жи́ти бра́тии вку́пе, бла́го же есть и в Ца́рствии Небе́снем вку́пе радоватися. Диви́мся долготерпе́нию ва́шему, ни мраз бо, ни ра́ны, ни ко́ньми истяза́ние от Бо́га вас разлучи́ша. Покланя́емся честны́м моще́м ва́шим, до вре́мене под спу́дом земны́м сокрове́нным, напосле́док же, я́ко не́кий дар светоно́сный, всей земли́ Пе́рмстей возсия́вшим. Ны́не моли́те Великодарови́таго Бо́га, явле́нием моще́й ва́ших нас недосто́йных почти́вшаго, да проба́вит моли́твами ва́шими ми́лость Свою́ ве́дущим ве́ру правосла́вную, да обрати́т к ней отпа́дшия, да укрепи́т ве́рныя в стоя́нии за пра́вду Бо́жию, да сподо́бит нас от моще́й ва́ших почерпну́ти исцеле́ний Боже́ственное де́йство, благода́ть и ми́лость, и да да́рует нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.