Текст акафиста одобрен для употребления за богослужением и в домашней молитве на заседании Священного Синода 26 декабря 2025 года (журнал № 133).
Конда́к 1
Избра́нный уго́дниче Христо́в, сла́вный подви́жниче, преподобному́чениче Евфроси́не, приими́ похва́льное пе́ние, тебе́ от нас с любо́вию приноси́мое и, предстоя́ на Небеси́ Престо́лу Пресвяты́я Тро́ицы, моли́ о спасе́нии всех нас, с ве́рою зову́щих ти: Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
И́кос 1
Равноа́нгельнаго жития́ взыску́я, до́ма роди́тельскаго и всего́ мирска́го любве́ ра́ди Бо́жия удали́вся, блаже́нне, Христу́ после́довал еси́, во оби́тель Валаа́мскую всели́лся еси́ и та́мо до́бре подвиза́лся еси́, рабо́тая Го́сподеви день и нощь труды́, посты́ и моли́твами. Мы же, по́двиги твоя́ зря́ще, со благогове́нием пое́м ти:
Ра́дуйся, пусты́ннаго жития́ ревни́телю;
ра́дуйся, боголю́бия учи́телю.
Ра́дуйся, Бо́гом дарова́нная нам кре́посте;
ра́дуйся, земли́ Устюже́нския украше́ние.
Ра́дуйся, всем прибега́ющим помога́яй;
ра́дуйся, свои́м оте́ческим заступле́нием не оставля́яй.
Ра́дуйся, подви́жников пресве́тлая похвало́;
ра́дуйся, му́чеников преди́вная сла́во.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 2
Ви́дя тя сосу́д избра́н и предуве́дев тя побо́рника ве́ры в гряду́щая времена́ тя́жкая для земли́ Ру́сския, Влады́ка всех тя к бу́дущему вели́кому служе́нию в Вели́ком Нове́граде уготовля́ше. Ты же, в доброде́телех возраста́я, с любо́вию воспева́ше Ему́: Аллилу́иа.
И́кос 2
Ра́зум благи́й стяжа́в, моли́твеннаго уедине́ния ища́, собла́знов многолю́днаго гра́да устраня́яся, убежа́л еси́ в весь Доло́сскую, да́ в простоте́ и тишине́ богоуго́дно поживе́ши и чтеце́м во хра́ме Бо́жии послу́жиши. Мы же, зря́ще тя не о земны́х ве́щех, но о Небе́снем непреста́нно помышля́юща, глаго́лем ти си́це:
Ра́дуйся, Бо́га па́че всех красо́т ми́ра сего́ возлюби́вый;
ра́дуйся, смире́нием кра́йним Бо́гу угоди́вый.
Ра́дуйся, веле́нием Бо́жиим в ве́си Доло́сской труди́выйся;
ра́дуйся, пре́лестем су́етнаго ми́ра не покори́выйся.
Ра́дуйся, жития́ по́стническаго вожделе́вый;
ра́дуйся, на Го́спода упова́ние вы́ну име́вый.
Ра́дуйся, нищету́ ду́ха усво́ивый;
ра́дуйся, Ца́рствия Небе́снаго сподо́бивыйся.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 3
Си́ла Бо́жия укрепи́ тя, егда́, житию́ преподо́бных отце́в ревну́я, подвиго́в и́ноческаго по́прища вожделева́я, во оби́тель Ти́хвинскую стопы́ своя́ напра́ви, иде́же и по́стриг прия́т. Научи́ и нас Еди́ному Бо́гу все́ю си́лою служи́ти, непреста́нно взыва́я Ему́: Аллилу́иа.
И́кос 3
Име́яй вы́ну во уме́ свое́м Го́спода и мы́сль, ка́ко Ему́ угоди́ти, посто́м, смире́нным послуша́нием, усе́рдными труды́ с любо́вию Бо́гу служа́ше в простоте́ серде́чней. Мы же, подвиго́м твои́м дивя́щеся, ублажа́ем тя та́ко:
Ра́дуйся, на крыле́х моли́твы к Бо́гу возлете́вый;
ра́дуйся, ве́тхаго челове́ка с себе́ совлеки́й.
Ра́дуйся, непреста́нно свою́ земну́ю кончи́ну пред очи́ма име́вый;
ра́дуйся, обе́ты целому́дрия, послуша́ния и нищеты́ испо́лнивый.
Ра́дуйся, чте́нием Сло́ва Бо́жия ум на ка́мени ве́ры утверди́вый;
ра́дуйся, от Бо́га дар прозорли́вости прия́вый.
Ра́дуйся, стра́сти укроти́вый;
ра́дуйся, сла́дость смире́ния позна́вый.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 4
Бу́ри грехо́вныя тебе́ не потопи́ша, пресла́вне о́тче Евфроси́не, ты бо все житие́ твое́ служе́нию Бо́гу посвяти́л еси́, себе́ в храм Бо́жий уготовля́я. Те́мже благослови́ Христо́с устро́ити святу́ю оби́тель на ме́сте, иде́же ты непреста́нно, моля́ся Го́споду, взыва́л еси́: Аллилу́иа.
И́кос 4
Слы́шав о суро́вем пусты́нничестем житии́ дре́вних отце́в, возжела́л еси́ отыти́ в пусты́ню спаси́тельную, и, игу́мена благослове́ние получи́в, из Ти́хвинския оби́тели в ме́сто пусты́нное притече́, руко́ю Госпо́днею направля́ем, и зде, во бла́тех непроходи́мых всели́ся, соверша́я по́стническия труды́ твоя́, по сих же и страда́ния Христа́ ра́ди прия́л еси́. Сего́ ра́ди велича́ем тя си́це:
Ра́дуйся, безмо́лвия люби́телю;
ра́дуйся, Бо́гом да́нный нам покрови́телю.
Ра́дуйся, посто́м плоть ду́хови покори́вый;
ра́дуйся, бде́нными моли́твами горды́ню сокруши́вый.
Ра́дуйся, тво́рче се́тей ры́барских, иску́сно бе́гавый се́тей лука́ваго;
ра́дуйся, ископа́вый пеще́ру и пруд в пусты́ни, нарече́нней Ста́рая.
Ра́дуйся, у бре́га е́зера Сини́чия оби́тель основа́вый;
ра́дуйся, в любви́ и кро́тости Христу́ подража́вый.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 5
Богосия́нней звезде́ среди́ блат и де́брей подо́бна бысть пусты́ня Синозе́рская, преподо́бне, егда́ ру́це твои́ и бра́тий твои́х сотвори́ша в ней храм Бо́жий, Благове́щения Пресвяты́я Богоро́дицы имену́емый. И вси приходя́щии во оби́тель сию́ от тебе́, я́ко от исто́чника оби́льнаго, почерпа́ху наставле́ния спаси́тельная, ра́зум бо духо́вен име́л еси́, непреста́нно ко Го́споду взыва́я: Аллилу́иа.
И́кос 5
Ви́дяще лю́дие свято́е житие́ твое́, прихожда́ху к тебе́, да спаси́тельныя глаго́лы услы́шат. Ты же, до́брый па́стырю, любо́вию свое́ю и моли́твами слове́сное ста́до собра́л еси́. «Го́споди, при́зри на ме́сто сие́ и благослови́ его́», — си́це к Бо́гу взыва́л еси, преподо́бне, в труде́х непреста́нных пребыва́я; мы же, в ле́ности и во гресе́х все житие́ ижди́вшии, восхваля́юще любо́вь твою́ ко Го́споду, вопие́м ти:
Ра́дуйся, преподо́бных Гу́рия и Филаре́та соприча́стниче;
ра́дуйся, о во гресе́х пребыва́ющих пред Бо́гом печа́льниче.
Ра́дуйся, сил Небе́сных хвале́ние;
ра́дуйся, оби́тели Синозе́рския сла́во и удобре́ние.
Ра́дуйся, прило́ги вра́жия попра́вый;
ра́дуйся, убе́жище мно́гим дарова́вый.
Ра́дуйся, ду́шу твою́ храм Свята́го Ду́ха соде́лавый;
ра́дуйся, любо́вию Христо́вою хла́дныя сердца́ согре́вый.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 6
Пропове́дник Бо́га И́стиннаго яви́лся еси́, преподобному́чениче Евфроси́не, егда́ в годи́ну сму́тную супоста́ты злы́я покры́ша зе́млю Ру́сскую, и на Голго́фу свою́ смире́нно возше́л еси́, воспева́я Спаси́телю всех: Аллилу́иа.
И́кос 6
Возсия́л еси́ па́че со́лнца, егда́, прозре́в кончи́ну твою́ и истоща́ние оби́тели твоея́, ве́рным Бо́гови был еси́ до сме́рти, па́мятствуя, я́ко прише́л еси́ сю́ду умре́ти Христа́ ра́ди, оба́че под угро́зою ги́бели от ра́тных супоста́т свята́го ме́ста пусты́ннаго не оста́ви. «Егда́ прии́дет брань, тогда́ и ну́ждно есть яви́ти по́двиг му́жества», — си́це и́нока Ио́ну, бежа́ти помы́слившаго, увещева́ше. Мы же, неустраши́мость ду́ха твоего́ зря́ще, воспева́ем тя в пе́снех таковы́х:
Ра́дуйся, прозорли́вче пресла́вный;
ра́дуйся, засту́пниче, нам Бо́гом да́нный.
Ра́дуйся, моли́твы свеще́ неугаси́мая;
ра́дуйся, Ду́ха Свята́го кре́посте необори́мая.
Ра́дуйся, малоду́шных ободре́ние;
ра́дуйся, от ско́рбей ско́рое избавле́ние.
Ра́дуйся, до́брый ко́рмчий, на путь и́стины наставля́яй;
ра́дуйся, злы́я по́мыслы на́ша искореня́яй.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 7
Хотя́ обе́ты свои́ испо́лнити и ра́ди Христа́ во оби́тели умре́ти, ме́чное посече́ние от руки́ разбо́йническия смире́нно прия́л еси́, нас любле́нию Бо́га поуча́я. Мы же, си́лу Бо́жию, в тебе́ явле́нную, зря́ще, пое́м Влады́ке всех: Аллилу́иа.
И́кос 7
Но́ваго му́ченика яви́ тя нам Госпо́дь, свя́те Евфроси́не, егда́ со преподо́бным Ио́ною у Креста́ сре́тив супоста́ты, мече́м их усече́н был еси́, и та́може честну́ю главу́ твою́ злый враг раздроби́. Та́ко преда́л еси́ ду́шу свою́ в ру́це Го́сподеви, мы же, му́ченичество твое́ почита́юще, тя похвала́ми ублажа́ем си́ми:
Ра́дуйся, пребыва́я те́лом на земли́, мы́сльми к Го́рним возлете́вый;
ра́дуйся, му́жественне Гефсима́нию свою́ претерпе́вый.
Ра́дуйся, стра́ха вре́меннаго любве́ ра́ди Бо́жия не устраши́выйся;
ра́дуйся, вы́ну славосло́вити Бо́га внутрь се́рдца научи́выйся.
Ра́дуйся, восле́д Христу́ смире́нно на Голго́фу свою́ возше́дый;
ра́дуйся, си́лою Бо́жиею одержа́вый незри́мую побе́ду.
Ра́дуйся, И́мене Госпо́дня ра́ди пострада́вый;
ра́дуйся, от Бо́га вене́ц му́ченический прия́вый.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 8
Стра́нником на земли́ поживе́, преподо́бне, о часе́ кончи́ны твое́я непреста́нно помышля́я, те́мже и смерть сре́тил еси́, моли́твы Го́сподеви возсыла́я, с любо́вию поя́ Ему́: Аллилу́иа.
И́кос 8
Вси лю́дие, рыда́юще о кончи́не па́стыря, стеко́шася ко гро́бу твоему́ и, собо́рне пе́вше, погребо́ша святы́я мо́щи твоя́ в наро́читом ме́сте оби́тели, ю́же основа́л еси́, преподо́бне. Ны́не же в Небе́сных селе́ниях пребыва́я, не оста́ви моли́твами твои́ми нас, вопию́щих ти:
Ра́дуйся, во́ли Бо́жия исполни́тель бы́ти вожделе́вый;
ра́дуйся, ме́чное усече́ние любве́ ра́ди ко Го́споду претерпе́вый.
Ра́дуйся, му́жески к му́ке устреми́выйся;
ра́дуйся, пе́рвым христиа́нским му́чеником уподо́бивыйся.
Ра́дуйся, заблужда́ющим до́брое вразумле́ние;
ра́дуйся, бе́дствующим благо́е и ско́рое вспоможе́ние.
Ра́дуйся, я́ко твои́ми моли́твами злы́я лю́бящия быва́ют;
ра́дуйся, я́ко по́мощь и заступле́ния твоя́ и по сме́рти не оскудева́ют.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 9
Вся А́нгельская во́инства удиви́шася свято́му житию́ и во́льным страда́нием твои́м, преподобному́чениче Евфроси́не. Мы же, побе́ду твою́ над лука́вым восхваля́юще, про́сим тя: научи́ и нас вы́ну пе́ти Христу́ Бо́гу: Аллилу́иа.
И́кос 9
Вети́и велере́чивии не возмо́гут изрещи́ вся по́двиги твоя́ и страда́ния о Христе́, я́же претерпе́л еси́. О сих свиде́тельствует Сам Госпо́дь мно́гими чудесы́, от моще́й святы́х твои́х источа́емыми. Мо́лим тя о вразумле́нии нас, заблу́ждших, и зове́м ти:
Ра́дуйся, бед на́ших прогони́телю;
ра́дуйся, о спасе́нии душ ре́вностный рачи́телю.
Ра́дуйся, серде́ц малове́рных в ве́ре укрепле́ние;
ра́дуйся, сла́вяй Бо́га немо́лчными песнопе́ньми.
Ра́дуйся, мирски́я лю́ди храни́ти себе́ ра́ди чад наставля́яй;
ра́дуйся, Бо́гу рабо́тающих не оставля́яй.
Ра́дуйся, ко́зней бесо́вских разруши́телю;
ра́дуйся, ко исполне́нию во́ли Бо́жией путеводи́телю.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 10
Спасти́ хотя́ всех, Человеколю́бец Госпо́дь яви́ нам тя, преподо́бне, да́ мы, зря́ще богоуго́дное житие́ твое́, благоче́стию поучи́мся. Помози́ же нам, свя́те, немощны́м, моли́твами твои́ми, бога́тство и сла́ву ми́ра сего́ тле́ннаго презре́ти и Го́сподеви с любо́вию и тре́петом рабо́тати, пою́ще Ему́: Аллилу́иа.
И́кос 10
Стена́ми непрохо́дными сокры́ лука́вый чудотво́рныя мо́щи твоя́ в годи́ну лю́тых гоне́ний на Це́рковь Христо́ву; оба́че не поставля́ют вже́гше свети́льника под спу́дом, но на све́щнице, да све́тит всем, та́ко и сию́ свещу́ негаси́мую чрез ле́та мно́га ве́рнии обрето́ша па́ки. Сла́вим Го́спода, возвра́щшаго нам чудотво́рныя мо́щи твоя́, и с любо́вию пое́м ти:
Ра́дуйся, Бо́гови ве́рный служи́телю;
ра́дуйся, стра́ха сме́рти искорени́телю.
Ра́дуйся, все бога́тство твое́ в Бо́зе положи́вый;
ра́дуйся, по́двиги подо́бен дре́вним отце́м бы́вый.
Ра́дуйся, помо́щниче обездо́ленным и убо́гим;
ра́дуйся, к други́м ми́лостивый, к себе́ стро́гий.
Ра́дуйся, пресве́тлое слепы́м прозре́ние;
ра́дуйся, от серде́ц на́ших самолю́бия и льсти отгна́ние.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 11
Пе́ние похва́льное приими́ от нас, преподобному́чениче сла́вный, и я́ко засту́пник усе́рдный моли́ Бо́га, да не у́мрем безпокая́нны, да, непреста́нно па́мятствовавше о сме́рти, сря́щем чи́стым се́рдцем час кончи́ны своея́ и сподо́бимся с тобо́ю пе́ти Бо́гу: Аллилу́иа.
И́кос 11
Свеща́ светоза́рная был еси́, преподо́бне, в земли́ Устюже́нской тьму́ неве́рия озаря́яй, ны́не же просвети́ умы́ и сердца́ на́ша, грехо́м омраче́нныя, да зове́м ти:
Ра́дуйся, ра́достию непреста́нною испо́лнивыйся;
ра́дуйся, чистото́ю жития́ А́нгелом уподо́бивыйся.
Ра́дуйся, о́браз жи́зни непоро́чныя показа́вый;
ра́дуйся, любо́вь к Бо́гу и бли́жнему стяжа́вый.
Ра́дуйся, звездо́, путь ко спасе́нию указу́ющая;
ра́дуйся, кончи́ны му́ченическия сре́тение лику́ющее.
Ра́дуйся, от оби́д свобожда́яй;
ра́дуйся, проще́нию и терпе́нию нас наставля́яй.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 12
Благода́ть, да́нную ти от Бо́га, ве́дуще, припа́даем ти, свя́те о́тче, и про́сим приле́жно: моли́ Го́спода Вседержи́теля, да храни́т Це́рковь Свою́ от раско́лов и нестрое́ний, да да́рует стране́ на́шей мир и огради́т ю́ от вся́каго зла, да пода́ст нам вся, я́же ко спасе́нию поле́зная, да воспои́м благода́рственне Бо́гу: Аллилу́иа.
И́кос 12
Пою́ще Бо́га, просла́вльшаго тя, восхваля́ем чи́стое житие́, по́двиги и чудеса́ твоя́, Евфроси́не богому́дре; ты бо всем се́рдцем Бо́га возлюби́в, предаде́ся Ему́, кончи́ны му́ченическия не отри́нув, за Христа́ во́льно пострада́л еси́ и вене́ц сла́вы от Бо́га прия́л еси́. Ны́не же пред лице́м Царя́ ца́рствующих предстоя́, моли́ о нас приле́жно, да мы в исправле́ние прии́дем и тя воспое́м си́це:
Ра́дуйся, преда́ния святы́х оте́ц храни́телю;
ра́дуйся, любому́дрия учи́телю.
Ра́дуйся, от озлобле́ния сердца́ на́ша избавля́яй;
ра́дуйся, слепоту́ неве́дения отыма́яй.
Ра́дуйся, свети́льниче светоза́рный, ко Христу́ люде́й мно́жества приведы́й;
ра́дуйся, ста́рче любоще́дрый.
Ра́дуйся, всем смире́нным мольба́м внима́яй;
ра́дуйся, никого́же без по́мощи оставля́яй.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 13
О пресла́вный уго́дниче Христо́в и преди́вный чудотво́рче, преподобному́чениче Евфроси́не, приими́ сие́ ма́лое моле́ние на́ше и умоли́ Всеми́лостиваго Бо́га покая́ние соверше́нное нам дарова́ти, ко пра́ведному житию́ нас напра́вити. Бу́ди нам в час сме́ртный предста́тель кре́пкий, да сподо́бимся в Небе́снем Ца́рствии ку́пно с тобо́ю пе́ти Бо́гу Спаси́телю на́шему: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1
Равноа́нгельнаго жития́ взыску́я, до́ма роди́тельскаго и всего́ мирска́го любве́ ра́ди Бо́жия удали́вся, блаже́нне, Христу́ после́довал еси́, во оби́тель Валаа́мскую всели́лся еси́ и та́мо до́бре подвиза́лся еси́, рабо́тая Го́сподеви день и нощь труды́, посты́ и моли́твами. Мы же, по́двиги твоя́ зря́ще, со благогове́нием пое́м ти:
Ра́дуйся, пусты́ннаго жития́ ревни́телю;
ра́дуйся, боголю́бия учи́телю.
Ра́дуйся, Бо́гом дарова́нная нам кре́посте;
ра́дуйся, земли́ Устюже́нския украше́ние.
Ра́дуйся, всем прибега́ющим помога́яй;
ра́дуйся, свои́м оте́ческим заступле́нием не оставля́яй.
Ра́дуйся, подви́жников пресве́тлая похвало́;
ра́дуйся, му́чеников преди́вная сла́во.
Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Конда́к 1
Избра́нный уго́дниче Христо́в, сла́вный подви́жниче, преподобному́чениче Евфроси́не, приими́ похва́льное пе́ние, тебе́ от нас с любо́вию приноси́мое и, предстоя́ на Небеси́ Престо́лу Пресвяты́я Тро́ицы, моли́ о спасе́нии всех нас, с ве́рою зову́щих ти: Ра́дуйся, преподобному́чениче Евфроси́не, пустыннолю́бче и те́плый о нас моли́твенниче.
Моли́тва
(утверждена Св. Синодом см.: «Зелёная» Минея-март, т. II, стр. 110, см. тж. «Молитвы, чтомыя на молебнех…», л. 158)
О святы́й преподо́бному́чениче Евфроси́не! Услы́ши усе́рдное на́ше, приноси́мое тебе́ моле́ние. Огради́ и сохрани́ святы́ми моли́твами твои́ми [ве́сь сию́ и] вся ве́си и гра́ды правосла́внаго Оте́чества на́шего от гла́да, трясе́ния, пото́па, огня́, меча́, наше́ствия иноплеме́нников, междоусо́бныя бра́ни и смертоно́сныя я́звы, от вся́кия беды́, ско́рби и зла. Умоли́ Го́спода Бо́га и Спа́са на́шего дарова́ти мир Це́ркви Его́, под зна́мением Креста́ во́инствующей, архипа́стырем и па́стырем на́шим пра́во пра́вити сло́во и́стины Ева́нгельския хода́тайством твои́м помози́ и всем правосла́вным христиа́ном проще́ние согреше́ний их во́льных и нево́льных испроси́, в неду́зех же пребыва́ющим пода́ждь предста́тельством твои́м от неду́гов исцеле́ние, да тебе́ ра́ди сла́вится пречестно́е и великоле́пое И́мя Пресвяты́я Тро́ицы, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.
Комментировать