Чинопоследование воскресного Всенощного бдения мирянским чином

Малый начал

еже инако глаголется поклоны приходные и исходные

Боже, милостив буди мне грешному. Поклон.

Создавый мя, Господи, помилуй мя. Поклон.

Без числа согреших, Господи, помилуй и прости мя, грешнаго. Поклон.

Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим, и славнейшую без сравнения Серафим, без истления Бога Слова Рождшую, сущую Богородицу Тя величаем. Поклон до земли.

Слава Отцу и Сыну и Святому Духу Поклон.

И ныне и присно и во веки веков, аминь. Поклон.

Господи, помилуй, трижды. Господи, благослови. Поклон.

Господи, Иисусе Христе, Сыне Божий, молитв ради Пречистыя Твоея Матере, силою Честнаго и Животворящаго Креста, и святаго Ангела моего хранителя, и всех ради святых, помилуй и спаси мя грешнаго, яко Благ и Человеколюбец, аминь.

Чин великой вечерни

Стаpший возглашает:1

Молитвами святых отец наших, Господи, Иисусе Хpисте, Сыне Божий, помилуй нас.2

Аще несть бдения: Чтец: Аминь.

Царю Небесный, Утешителю, Душе Истины, Иже везде Сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, Души наша.

Святый Боже, Святый Крепкий, Святый Бессмертный, помилуй нас. Трижды.

Слава Отцу и Сыну и Святому Духу, и ныне и присно и во веки веков, аминь.

Пресвятая Троице, помилуй нас, Господи, очисти грехи наша, Владыко, прости беззакония наша, Святый, посети и исцели немощи наша имене Твоего ради.

Господи, помилуй. Трижды.

Слава, И ныне.3

Отче наш, Иже еси на небесех. Да святится Имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашим. И не введи нас во искушение, но избави нас от лукаваго.4

Старший: Господи, Иисусе Христе, Сыне Божий, помилуй нас.5 Чтец: Аминь.

Господи, помилуй, 12 раз. Слава, И ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.6

И чтет псалом 103.

Аще бдение: По Замолитве поем Аминь, и Старший абие поет:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

И паки, вышшим гласом:

Приидите, поклонимся, и припадем Ему.

И псалом 103:

Благослови, душе моя, Господа. [Благословен еси, Господи.] Господи, Боже мой, возвеличился еси зело. [Благословен еси, Господи.] Во исповедание и в велелепоту облеклся еси. [И в велелепоту облеклся еси. Благословен еси, Господи.] Одеяйся светом, яко ризою, простираяй небо, яко кожу. Покрываяй водами превыспренняя своя, полагаяй облаки на восхождение Свое, ходяй на крилу ветреню. Творяй Ангелы Своя духи и слуги Своя пламень огненный. [И слуги Своя пламень огненный. Дивна дела Твоя, Господи.] Основаяй землю на тверди ея, не преклонится в век века. Бездна, яко риза, одеяние ея, на горах станут воды. [На горах станут воды. Дивна дела Твоя, Господи.] От запрещения Твоего побегнут, от гласа грома Твоего убоятся. Восходят горы и нисходят поля в место, еже основал еси им. Предел положил еси, егоже не прейдут, ниже обратятся покрыти землю. Посыляяй источники в дебрех, посреде гор пройдут воды. [Посреде гор пройдут воды. Дивна дела Твоя, Господи.] Напаяют вся звери сельныя, ждут онагри в жажду свою. На тых птицы небесныя привитают, от среды камения дадят глас. Напаяяй горы от превыспренних Своих, от плода дел Твоих насытится земля. Прозябаяй траву скотом, и злак на службу человеком, извести хлеб от земли. И вино веселит сердце человека, умастити лице елеем, и хлеб сердце человека укрепит. [И хлеб сердце человека укрепит. Дивна дела Твоя, Господи.] Насытятся древа польская, кедри ливанстии, ихже еси насадил. Тамо птицы вогнездятся, еродиево жилище предводительствует ими. Горы высокия еленем, камень прибежище заяцем. Сотворил есть луну во времена, солнце позна запад свой. Положил еси тьму, и бысть нощь, в нейже пройдут вси зверие дубравнии. Скимни рыкающии, восхитити и взыскати от Бога пищу себе. Возсия солнце и собрашася и в ложех своих лягут. Изыдет человек на дело свое и на делание свое до вечера. Яко возвеличишася дела Твоя, Господи, вся премудростию сотворил еси. [Вся премудростию сотворил еси. Слава Ти Господи, Сотворившему вся.] Исполнися земля твари Твоея. Сие море великое и пространное, тамо гади, имже несть числа, животная малая с великими. [Животная малая с великими. Слава Ти Господи, Сотворившему вся.] Тамо корабли преплавают, змий сей, егоже создал еси ругатися ему. Вся к Тебе чают, дати пищу им во благо время. Давшу Тебе им соберут, отверзшу Тебе руку, всяческая исполнятся благости. [Всяческая исполнятся благости. Слава Ти Господи, Сотворившему вся.] Отвращу же Тебе лице возмятутся, отымеши дух их и исчезнут, и в персть свою возвратятся. Послеши Духа Твоего и созиждутся, и обновиши лице земли. Буди слава Господня во веки, возвеселится Господь о делех Своих. Призираяй на землю, и творяй ю трястися, прикасаяся горам и дымятся. Воспою Господеви в животе моем, пою Богу моему, дондеже есмь. Да усладится Ему беседа моя, аз же возвеселюся о Господе. Да исчезнут грешницы от земли, и беззаконницы, якоже не быти им. Благослови, душе моя, Господа. [Благослови, душе моя, Господа. Слава Ти, Господи, сотворившему вся.]

Аще несть бдения, глаголи сие: Солнце позна запад свой. Положил еси тьму, и бысть нощь. Яко возвеличишася дела Твоя, Господи, вся премудростию сотворил еси. И по сих, Слава, И ныне, и прочая.

Аще же есть бдение, абие поем: Слава, И ныне: Аллилуия, аллилуия, аллилуия, слава Тебе, Боже, трижды. Господи, помилуй, 12 раз. Слава, И ныне:7

Таже стихологисуем Псалтирь

Аще есть неделя, стихологисуем Псалтирь на глас 8, первую кафисму: Блажен муж, первый антифон; вторый же и третий антифоны поем на глас дне.

Псалом 1: Блажен муж, [Аллилуиа.] Иже не иде на совет нечестивых, [Аллилуиа.] И на пути грешных не ста, и на седалищи губителей не седе. Но в законе Господни воля его, и в законе Его поучится день и нощь. И будет яко древо, насажденное при исходищих вод, еже плод свой даст во время свое. И лист его не отпадет, и вся, елика аще творит, успеет. Не тако нечестивии, не тако, но яко прах, егоже возметает ветр от лица земли. Сего ради не воскреснут нечестивии на суд, ниже грешницы в совет праведных. Яко весть Господь путь праведных, и путь нечестивых погибнет. [И путь нечестивых погибнет. Аллилуиа.]

Псалом 2: Вскую шаташася языцы, и людие поучишася тщетным? Предсташа царие земстии, и князи собрашася вкупе на Господа и на Христа Его. [На Господа и на Христа Его. Аллилуиа.] Расторгнем узы их и отвергнем от нас иго их. Живый на небесех посмеется им, и Господь поругается им. Тогда возглаголет к ним гневом Своим и яростию своею смятет я. Аз же поставлен есмь Царь от Него над Сионом, горою святою Его. Возвещаяй повеление Господне: Господь рече ко Мне: Сын Мой еси Ты, Аз днесь родих Тя. Проси от Мене, и дам Ти языки достояние Твое, и одержание Твое концы земли. Упасеши я жезлом железным, яко сосуды скудельничи сокрушиши я. И ныне, царие, разумейте, накажитеся вси судящии земли. Работайте Господеви со страхом, и радуйтеся Ему с трепетом. Приимите наказание, да не когда прогневается Господь, и погибнете от пути праведнаго, егда возгорится вскоре ярость Его. Блажени вси надеющиися нань. [Блажени вси надеющиися нань. Аллилуиа.]

Псалом 3: Господи, что ся умножиша стужающии ми? Мнози востают на мя, мнози глаголют души моей: несть спасения ему в Бозе его. Ты же, Господи, Заступник мой ecè, слава моя и возносяй главу мою. Гласом моим ко Господу воззвах, и услыша мя от горы святыя Своея. Аз уснух и спах, востах, яко Господь заступит мя. Не убоюся от тем людей, окрест нападающих на мя. Воскресни, Господи, спаси мя, Боже мой. [Воскресни, Господи, спаси мя, Боже мой. Аллилуиа.] Яко Ты поразил ecи вся враждующыя ми всуе: зубы грешников сокрушил ecи. Господне есть спасение, и на людех Твоих благословение Твое. [И на людех Твоих благословение Твое. Аллилуиа.]

Слава, И ныне: Аллилуия: трижды. Господи, помилуй, трижды. Слава, И ныне:

Псалом 4: Внегда призвати ми, услыша мя Бог правды моея, в скорби распространил мя еси; ущедри мя и услыши молитву мою. Сынове человечестии, доколе тяжкосердии; вскую любите суету и ищете лжи? И уведите, яко удиви Господь преподобнаго Своего: Господь услышит мя, внегда воззвати ми к Нему. Гневайтеся, и не согрешайте, яже глаголете в сердцах ваших, на ложах ваших умилитеся. Пожрите жертву правды, и уповайте на Господа. Мнози глаголют: кто явит нам благая; знаменася на нас свет лица Твоего, Господи. Дал еси веселие в сердце моем: от плода пшеницы, вина и елеа своего умножишася. В мире вкупе усну и почию, яко Ты, Господи, единаго на уповании вселил мя еси.

Псалом 5: Глаголы моя внуши, Господи, разумей звание мое. Вонми гласу моления моего, Царю мой и Боже мой, яко к Тебе помолюся, Господи. Заутра услыши глас мой, заутра предстану Ти, и узриши мя. Яко Бог не хотяй беззакония, Ты еси: не приселится к Тебе лукавнуяй; Ниже пребудут беззаконницы пред очима Твоима: возненавидел еси вся делающыя беззаконие. Погубиши вся глаголющыя лжу: мужа кровей и льстива гнушается Господь. Аз же множеством милости Твоея вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их: языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающии на Тя, во век возрадуются, и вселишися в них; и похвалятся о Тебе любящии имя Твое. Яко Ты благословиши праведника, Господи: яко оружием благоволения венчал еси нас.

Псалом 6: Господи, да не яростию Твоею обличиши мене, ниже гневом Твоим накажеши мене. Помилуй мя, Господи, яко немощен есмь: исцели мя, Господи, яко смятошася кости моя. И душа моя смятеся зело: и Ты, Господи, доколе? Обратися, Господи, избави душу мою: спаси мя ради милости Твоея. Яко несть в смерти поминаяй Тебе: во аде же кто исповестся Тебе? Утрудихся воздыханием моим, измыю на всяку нощь ложе мое, слезами моими постелю мою омочу. Смятеся от ярости око мое, обетшах во всех вразех моих. Отступите от мене, вси делающии беззаконие, яко услыша Господь глас плача моего; Услыша Господь моление мое, Господь молитву мою прият. Да постыдятся и смятутся вси врази мои, да возвратятся и устыдятся зело вскоре.

Слава:8

Псалом 7: Господи Боже мой, на Тя уповах, спаси мя от всех гонящих мя и избави мя: Да не когда похитит яко лев душу мою, не сущу избавляющу, ниже спасающу. Господи Боже мой, аще сотворих сие, аще есть неправда в руку моею; Аще воздах воздающым ми зла, да отпаду убо от враг моих тощ. Да поженет убо враг душу мою и да постигнет, и поперет в землю живот мой, и славу мою в персть вселит. Воскресни, Господи, гневом Твоим, вознесися в концах враг Твоих, и востани, Господи Боже мой, повелением, имже заповедал еси. И сонм людей обыдет Тя, и о том на высоту обратися. Господь судит людем: суди ми, Господи, по правде моей, и по незлобе моей на мя. Да скончается злоба грешных, и исправиши праведнаго, испытаяй сердца и утробы, Боже, праведно. Помощь моя от Бога, спасающаго правыя сердцем. Бог Судитель праведен и крепок, и долготерпелив, и не гнев наводяй на всяк день. Аще не обратитеся, оружие свое очистит, лук Свой напряже и уготова и: И в нем уготова сосуды смертныя, стрелы Своя сгараемым содела. Се боле неправдою, зачат болезнь, и роди беззаконие. Ров изры, и ископа и, и падет в яму, юже содела. Обратится болезнь его на главу его, и на верх его неправда его снидет. Исповемся Господеви по правде Его, и пою имени Господа Вышняго.

Псалом 8: Господи Господь наш, яко чудно имя Твое по всей земли: яко взятся великолепие Твое превыше небес. Из уст младенец и ссущих совершил еси хвалу, враг Твоих ради, еже разрушити врага и местника. Яко узрю небеса, дела перст Твоих, луну и звезды, яже Ты основал еси. Что есть человек, яко помниши его; или сын человечь, яко посещаеши его? Умалил еси его малым чим от Ангел, славою и честию венчал еси его. И поставил еси его над делы руку Твоею, вся покорил еси под нозе его. Овцы и волы вся, еще же и скоты польския: Птицы небесныя, и рыбы морския, преходящия стези морския. Господи Господь наш, яко чудно имя Твое по всей земли.

Слава:

По скончании же стихологии, канонарх возгласит глас Октоиха. Мы же поем: Господи воззвах, в прилучившийся глас (псалмы 140, 141, 129, 116).

Первый лик: Господи, воззвах к Тебе, услыши мя: услыши мя, Господи. Господи, воззвах к Тебе, услыши мя, вонми гласу моления моего, внегда воззвати ми к Тебе. Услыши мя, Господи.

Вторый лик: Да исправится молитва моя, яко кадило пред Тобою: воздеяние руку моею, жертва вечерняя. Услыши мя, Господи.

И по чину стихи, чередующимся ликом:

1: Положи, Господи, хранение устом моим, и дверь ограждения о устнах моих.

2: Не уклони сердце мое в словеса лукавствия, непщевати вины о гресех.

1: С человеки делающими беззаконие, и нее сочтуся со избранными их.

2: Накажет мя праведник милостию и обличит мя, елей же грешнаго да не намастит главы моея.

1: Яко еще и молитва моя во благоволениих их, пожерты быша при камени судии их.

2: Услышатся глаголы моя, яко возмогоша: яко толща земли проседеся на земли, расточишася кости их при аде.

1: Яко к Тебе, Господи, Господи, очи мои, на Тя уповах, не отыми душу мою.

2: Сохрани мя от сети, юже составиша ми, и от соблазн делающих беззакония.

1: Падут во мрежу свою грешницы, един есмь аз, дондеже прейду.

2: Гласом моим ко Господу воззвах, гласом моим ко Господу помолихся.

1: Пролию пред ним моление мое, печаль мою пред Ним возвещу.

2: Внегда исчезати от мене духу моему, и Ты познал еси стези моя.

1: На пути сем, по немуже хождах, скрыша сеть мне.

2: Смотрях одесную и возглядах, и не бе знаяй мене.

1: Погибе бегство от мене, и несть взыскаяй душу мою.

2: Воззвах к Тебе, Господи, рех: Ты еси упование мое, часть моя еси на земли живых.

1: Вонми молению моему, яко смирихся зело.

2: Избави мя от гонящих мя, яко укрепишася паче мене.

Таже ставим стихов 10, и поем стихиры воскресны гласа, 3, и восточны 4, и Минеи святаго, 3.

На 10: Изведи из темницы душу мою, исповедатися имени Твоему. И стихиры воскресны.

Мене ждут праведницы, дондеже воздаси мне.

На 8: Из глубины воззвах к Тебе, Господи, Господи, услыши глас мой.

Да будут уши Твои внемлюще гласу моления моего. Таже поем стихиры восточны.

На 6: Аще беззакония назриши, Господи, Господи, кто постоит, яко у Тебе очищение есть.

Имене ради Твоего потерпех Тя, Господи, потерпе душа моя в слово Твое, упова душа моя на Господа.

На 4: От стражи утренния до нощи, от стражи утренния, да уповает Исраиль на Господа.

Яко у Господа милость, и многое у Него избавление, и Той избавит Исраиля от всех беззаконий его. И стихиры Минеи святаго. А идеже несть Минеи, поем стихиры Пресвятой Богородицы, творение Павла Аморрейскаго.

Хвалите Господа, вси языцы, похвалите Его, вси людие.

Яко утвердися милость Его на нас, и истина Господня пребывает вовек.

Слава:9 стихира святаго, аще имать. И ныне: богородичен воскресен, во глас недели.

Входа не бывает, но по скончании стихиp, поем творение кир Софрониа Иерусалимского:10

Свете Тихий святыя славы Безсмертнаго Отца Небеснаго, Святаго, Блаженнаго, Иисусе Христе! Пришедше на запад солнца, видевше свет вечерний, поем Отца, Сына и Святаго Духа, Бога. Достоин еси во вся времена пет быти гласы преподобными, Сыне Божий, живот даяй, темже мiр Тя славит.

По сих канонаpх или чтец возглашает: «Пpокимен, псалом Давидов, глас ...» и прокимен дне. Мы же поем пpокимен. И чтец возгласит стихи, мы же к коемуждо припеваем прокимен. На конец же, чтец возгласит начало прокимна, и мы – конец прокимна.

В субботу вечера, глас 6:

Господь воцарися, / в лепоту облечеся. Стих: Облечеся Господь в силу, и припоясася. Стих: Ибо утверди вселенную, яже не подвижится. Стих: Дому Твоему подобает святыня, Господи, в долготу дний.

В неделю вечера, глас 8:

Се ныне благословите Господа / вси раби Господни. Стих: Стоящии во храме Господни, во дворех дому Бога нашего.

В понедельник вечера, глас 4:

Господь услышит мя, / внегда воззвати ми к Нему. Стих: Внегда призвати ми, услыша мя Бог правды моея.

Во вторник вечера, глас 1-й:

Милость Твоя, Господи, / поженет мя вся дни живота моего. Стих: Господь пасет мя, и ничтоже мя лишит, на месте злачне, тамо всели мя.

В среду вечера, глас 5-й:

Боже, во имя Твое спаси мя, / и в силе Твоей суди ми. Стих: Боже, услыши молитву мою, внуши глаголы уст моих.

В четверток вечера, глас 6-й:

Помощь моя от Господа, / Сотворшаго небо и землю. Стих: Возведох очи мои в горы, отнюдуже приидет помощь моя.

В пяток вечера, глас 7:

Боже, заступник мой еси Ты, / и милость Твоя предварит мя. Стих: Изми мя от враг моих, Боже, и от востающих на мя избави мя.

Миp всем, Пpемудpость, Вонмем не глаголем. Аще есть паpимии, чтец глаголет заглавие и абие начинает чести (чтет же лицем к востоку, нам сидящим).

Вместо сугубой ектении поем Гоcподи помилуй, 40 pаз, и поклона тpи. Слава, И ныне.

Аще же восхощет настоятель, чтем молитву Великаго Василиа сию:11

Благословен еси Владыко Вседержителю, просветивый день светом солнечным, и нощь уяснивый зарями огненными, еже долготу дне прейти нас сподобил еси, и приближитися началом нощи. Услыши моление наше, и всех людей Твоих, и всех нас прости вольная и невольная согрешения. Приими вечерняя наша моления и ниспосли множество милости Твоея и щедрот Твоих на достояние Твое, остени нас святыми Твоими ангелы, вооружи нас оружием правды, огради нас истиною Твоею, соблюди нас силою Твоею, избави нас от всякаго обстояния, и всякаго навета сопротивнаго. Подаждь же нам и настоящий вечер с приходящею нощию совершен, свят, мирен, безгрешен, безблазнен, безмечтанен, и вся дни живота нашего, молитвами святыя Богородицы, и всех святых от века благоугодивших, аминь.

Чтец, или Старший, глаголет Сподоби Господи, на немже и поклона три:

Сподоби, Господи, в вечер сей без греха сохранитися нам. Благословен еси, Господи, Боже отец наших, и хвально и прославлено имя Твое во веки. Аминь.

Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.

Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает, Отцу и Сыну и Святому Духу, ныне и присно и во веки веков. Аминь.

И по Сподоби Господи, вместо просительныя ектении поем:

Господи помилуй, 12 раз. Слава, И ныне.12

И от произволения молитву Василиа Великаго:

Господи, Господи, избавлей нас от всякия стрелы летящия во дни, избави нас и от всякия вещи во тьме приходящия. Приими жертву вечернюю, рук наших воздеяние. Сподоби же нас и нощное поприще без порока прейти, неискушены от злых. И избави нас от всякаго смущения и боязни, яже от диавола нам прибывающия. Даруй душам нашим умиление, и помыслом нашим попечение, еже на страшнем и праведнем Твоем суде испытания. Пригвозди страху Твоему плоти наша, и умертви уды наша сущия на земли: Да и сонным безмолвием просветимся зрением судеб Твоих. Отыми же от нас всякое мечтание неподобное, и похоть вредну. Возстави же нас во время молитвы, утвержденны в вере, и преспевающия в заповедех Твоих, благоволением и благостию Единороднаго Сына Твоего: с Нимже благословен еси, с Пресвятым и Благим, и Животворящим Твоим Духом, ныне и присно, и во веки веков, аминь.

Аще есть бдение, исходим на литию в пpитвоp или западную часть хpама, и поем стихиpы литийные. Вместо Спаси Господи, люди Твоя и пpочего поем Господи помилуй 40, 30 и 50 pаз, по тpи поклона на каждой. Слава, И ныне. Иные же поют токмо Господи помилуй, 40 раз, Слава, И ныне, и сим удовляются.

И по сем стихиры стиховны, в нихже глаголем припевы: аще суббота, Господь воцарися, аще же владычный праздник или поется бдение святому, глаголем его стихи, писаны в Минее.

Стих: Господь воцарися, в лепоту облечеся. И стихиру воскресну гласа.

Стих: Ибо утверди вселенную, яже не подвижится. Ины стихиры, по алфавиту.13

Стих: Дому Твоему подобает святыня, Господи, в долготу дний.

Слава: святого, аще есть. И ныне, богородичен воскресен гласа.

Аще же имать святый стихиру на Слава, поем богородичен воскресен во глас славника. По богородичне Старший глаголет:

Ныне отпущаеши раба Твоего Владыко, по глаголу Твоему с миром, яко видеста очи мои спасение Твое, еже еси уготовал пред лицем всех людей, свет во откровение языков, и славу людей Твоих Исраиля.

Таже чтец: Трисвятое, по Отче наш. Старший: молитву Иисусову.

Мы же поем: Аминь, и тропари.

Аще бдение: в неделю поем сей тропарь, глас 4:

Богородице, Дево, радуйся, благодатная Марие, Господь с Тобою, благословенна Ты в женах, и благословен Плод чрева Твоего, яко Спаса родила еси душ наших. Трижды.

В праздник же поем тропарь праздника, трижды. Аще же есть бденный святой, поем Богородице Дево радуйся дважды, и тропарь святого. Подобне творим и в попразднство, и в предпразднство. По тропарех же поем:

Буди имя Господне благословенно отныне и до века, трижды. И глаголем псалом 33, даже до Не лишатся всякого блага:

Благословлю Господа на всякое время, выну хвала Его во устех моих. О Господе похвалится душа моя, да услышат кротцыи и возвеселятся. Возвеличите Господа со мною, и вознесем имя Его вкупе. Взысках Господа и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится Ангел Господень окрест боящихся Его, и избавит их. Вкусите и видите, яко благ Господь; блажен муж, иже уповает нань. Бойтеся Господа, вси святии Его, яко несть лишения боящымся Его. Богатии обнищаша и взалкаша, взыскающии же Господа не лишатся всякаго блага.

Таже Старший глаголет молитву Иисусову. Чтец же отвещает Аминь, и глаголет начало чтения. И бывает чтение великое в Деяниях Святых Апостол. По чтении же, воставшим всем братиям, глаголет Старший шестопсалмие, и поем прочее утрени. Аще же несть чтения, Старший, или чтец, абие глаголет Аминь, Слава в вышних Богу, и прочее шестопсалмия.

Аще же несть бдения: по Ныне отпущаеши и Отче наш поем тропарь воскресен во глас недели.

Слава, И ныне, богородичен воскресен.

Аще прилучится бденный святый в неделю, поем Слава: тропарь святого, И ныне: богородичен воскресен во глас тропаря. Аще бдение святому, поем тропарь его, Слава, И ныне, богородичен по уставу. В праздник же поем токмо тропарь праздника. И по тропарех поем:

Честнейшую Херувим, и славнейшую без сравнения Серафим, без истления Бога Слова Рождшую, сущую Богородицу, Тя величаем. И поклон.

Слава: поклон, И ныне: поклон. Господи, помилуй, трижды. Господи, благослови.14 И поклон.15 И глаголет Старший отпуст:

Воскресый из мертвых, Господи Иисусе Христе, Боже наш, молитв ради Пречистыя Твоея Матере, святых славных и всехвальных Апостол, преподобных и богоносных отец наших и святаго егоже есть храм, и святаго имярек, егоже и память ныне совершаем, и всех святых, помилуй и спаси нас, яко Благ и Человеколюбец.

Во ин же праздник кроме недели начало отпуста свое. Hецыи же глаголют, яко воскpесный отпуст точию от полунощницы чтем.

По отпусте же поем: Аминь, Господи помилуй, тpижды.

Малое повечеpие

Аще не бысть бдения, по велицей вечерни и трапезе поем малое повечерие. Аще же есть бдение, трапеза бывает после малой вечерни, повечерие же после трапезы; бдение же в свое ему время.

Стаpший глаголет: Молитвами святых отец наших: Чтец: Аминь. Слава Тебе, Боже наш, слава Тебе. Царю Небесный: Трисвятое по Отче наш: Старший глаголет молитву Иисусову. Господи помилуй, 12 раз. Слава, И ныне: Приидите, поклонимся, трижды. И псалмы:

Псалом 50: Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавая пред Тобою сотворих; яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы.

Псалом 69: Боже, в помощь мою вонми, Господи, помощи ми потщися. Да постыдятся и посрамятся ищущии душу мою, да возвратятся вспять и постыдятся хотящии ми злая. Да возвратятся абие стыдящеся глаголющии ми: благоже, благоже. Да возрадуются и возвеселятся о Тебе вси ищущии Тебе, Боже, и да глаголют выну, да возвеличится Господь, любящии спасение Твое. Аз же нищ есмь и убог, Боже, помози ми; Помощник мой и Избавитель мой еси Ты, Господи, не закосни.

Псалом 142: Господи, услыши молитву мою, внуши моление мое во истине Твоей, услыши мя в правде Твоей; И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.

Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя, великия ради славы Твоея. Господи, Царю небесный. Боже Отче Вседержителю, Господи Сыне Единородный, Иисусе Христе, и Святый Душе. Господи Боже, Агнче Божий, Сыне Отечь, Вземляй грех мiра, помилуй нас, Вземляй грехи мiра, приими молитву нашу: Седяй одесную Отца, помилуй нас. Яко Ты еси Един Свят, Ты еси Един Господь, Иисус Христос, в славу Бога Отца, аминь.

На всяку нощь благословлю Тя, и восхвалю имя Твое во веки, и в век века. Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущим Тя.

Сподоби, Господи, в нощь сию без греха сохранитися нам. Благословен еси, Господи, Боже отец наших, и хвально, и прославлено имя Твое во веки, аминь.

Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.

Господи, милость Твоя во век, дел руку Твоею не презри. Тебе подобает хвала. Тебе подобает пение, Тебе слава подобает, Отцу и Сыну и Святому Духу, ныне и присно и во веки веков, аминь.

Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца Рожденнаго прежде всех век; Света от Света, Бога Истинна от Бога Истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша и погребенна. И воскресшаго в третий день по Писанием, и возшедшаго на небеса и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, Глаголавшего пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

И поем канон Богородицы, писан в Октоихе в субботу вечера, на повечерии. Аще же несть Октоиха, пой параклисис Богородицы, емуже ирмос Воду прошед: и тропарь: Многими содержимь напастьми, или ин канон, егоже аще восхощеши.

И по канонах: Достойно есть: Трисвятое по Отче наш: Молитва Иисусова. И кондак воскресный. Во вся же недели Триоди глаголем токмо кондак Триоди. Таже, Господи, помилуй, 40. И молитву сию:

Иже на всякое время и на всякий час, на небеси и на земли покланяемый и славимый Христе Боже, долготерпеливе, многомилостиве, многоблагоутробне, Иже праведныя любяй, и грешныя милуяй, Иже вся зовый ко спасению обещания ради будущих благ; Сам, Господи, приими и наша в час сей молитвы, и исправи живот наш к заповедем Твоим; души наша освяти, телеса очисти, помышления исправи, мысли очисти, и избави нас от всякия скорби, зол и болезней; огради нас святыми Твоими Ангелы, да ополчением их соблюдаеми и наставляеми, достигнем в соединение веры, и в разум неприступныя Твоея славы, яко благословен еси во веки веков, аминь.

Господи помилуй, трижды. Слава, И ныне: Честнейшую херувим: Таже Стаpший глаголет: Молитвами святых отец наших: И глаголем молитву:

Нескверная, Неблазная, Нетленная, Пречистая, Чистая Дево, Богоневесто Владычице, Яже Бога Слова человеком преславным Твоим Рождеством соединившая, и отринувшееся естество рода нашего небесным совокупльшая, яже ненадежных едина Надеждо и боримых Помоще, готовое Заступление к Тебе притекающих, и всех христиан Прибежище: не гнушайся мене грешнаго, сквернаго, скверными помыслы, и словесы, и деяньми всего себе непотребна сотворша, и разумом лености сластей жития раба бывша. Но яко человеколюбиваго Бога Мати, человеколюбне умилосердися о мне грешнем и блуднем, и приими мое еже от скверных устен приносимое Тебе моление: и Твоего Сына, и нашего Владыку и Господа, матернее Твое дерзновение употребляющи, моли, да отверзет и мне человеколюбныя утробы Своея благости, и презрев моя бесчисленная прегрешения, обратит мя к покаянию, и Своих заповедей делателя искусна явит мя. И предстани мне присно, яко Милостивая, и Милосердая, и Благолюбивая, в настоящем убо житии теплая Предстательнице и Помощнице, сопротивных нашествия отгоняющи, и ко спасению наставляющи мя: и во время исхода моего окаянную мою душу соблюдающи, и темныя зраки лукавых бесов далече от нея отгоняющи; в страшный же день суда вечныя мя избавляющи муки и неизреченныя славы Твоего Сына и Бога нашего наследника мя показующи; юже и да улучу, Владычице моя, пресвятая Богородице, Твоим ходатайством и заступлениием, благодатию и человеколюбием Единороднаго Сына Твоего, Господа и Бога и Спаса нашего Иисуса Христа; Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно, и во веки веков, аминь.

Молитва иная, ко Господу нашему Иисусу Христу, Антиоха монаха Пандекта

И даждь нам, Владыко, на сон грядущим, покой тела и души, и сохрани нас от мрачнаго сна греховнаго, и от всякаго темнаго и нощнаго сладострастия. Укроти стремления страстей, угаси разжженныя стрелы лукаваго, яже на ны льстивно движимыя. Плоти нашея востания утоли, и всякое земное и вещественное наше мудрование успи. И даруй нам, Боже, бодр ум, целомудр помысл, сердце трезвящееся, сон легок, и всякаго сатанина мечтания изменен. Возстави же нас во время молитвы утверждены в заповедех Твоих, и память судеб Твоих в себе тверду имуща: всенощное славословие нам даруй, во еже пети и благословити и славити пречестное и великолепое имя Твое, Отца, и Сына, и Святаго Духа, ныне и присно, и во веки веков, аминь.

Преславная Приснодево, Мати Христа Бога, принеси нашу молитву Сыну Твоему и Богу нашему, да спасет тобою души наша.

Молитва иная святаго Иоанникия

Упование мое Отец, прибежище мое Сын, покров мой Дух Святый: Троице Святая, слава Тебе.

Слава, И ныне: Господи помилуй, трижды. Господи, благослови.

Господи Иисусе Христе Сыне Божий, молитвами Пречистыя Твоея Матере и всех святых, помилуй и спаси нас, яко Благ и Человеколюбец. Аминь.16

Таже молитву: Ослаби, остави, прости Боже, прегрешения наша, вольная, и невольная, яже в слове и в деле, яже в ведении и не в ведении, яже во дни и в нощи, яже во уме и помышлении, вся нам прости, яко Благ и Человеколюбец.

Вместо же ектении глаголем: Hенавидящих и обидящих нас пpости, Господи Человеколюбче. Благотвоpящим благосотвоpи. Бpатиям и сpодником нашим даpyй яже ко спасению пpошения и жизнь вечнyю. В немощех сyщия посети и исцеление даpyй. Яже в моpи yпpави. Пyтешествyющим спyтешествyй. Слyжащим и милyющим нас гpехов оставление даpyй. Заповедовавших нам недостойным молитися о них помилyй по велицей Твоей милости. Помяни, Господи, бpатий наших плененных и избави я от всякого обстояния. Помяни, Господи, плодоносящих и добpоделающих во святых Твоих цеpквах, и даждь им яже ко спасению пpошения и жизнь вечнyю. Помяни, Господи, и нас, смиpенных и гpешных и недостойных pаб Твоих, и пpосвети наш yм светом pазyма Твоего, и настави нас на стезю заповедей Твоих, молитвами Пpечистыя Владычицы нашея Богоpодицы и Пpиснодевы Маpии и всех Твоих святых: яко благословен еси во веки веков, аминь.

Последование молебна

Стаpший: Молитвами святых отец наших: Чтец: Аминь. Слава Тебе, Боже наш, слава Тебе. Царю Небесный: Трисвятое по Отче наш: Молитва Иисусова. Господи, помилуй, 12 раз. Слава, И ныне: Приидите, поклонимся, трижды. И чтем псалом 142: Господи, услыши молитву мою: (писан в повечерии). По псалме Слава: И ныне: Аллилуиа, трижды. Господи, помилуй, 12. Слава: И ныне:

И возглашает канонарх во глас тропаря:

Бог Господь и явися нам, благословен Грядый во имя Господне. И стихи: Исповедайтеся Господеви, яко Благ, яко в век милость Его. Обышедше обыдоша мя и именем Господним противляхся им. Не умру, но жив буду, и повем дела Господня. Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших. Мы же припеваем к коемуждо стиху: Бог Господь и явися нам, благословен Грядый во имя Господне.

И поем тропарь святаго,дважды, Слава, И ныне, богородичен воскресен во глас тропаря. Аще же Богородице молебен, поем тропарь ея дважды, Слава, И ныне, тойже (или ин тропарь). И псалом 50: Помилуй мя Боже, писан в повечерии, и поем канон святаго, или Богородицы, без ирмосов.

По 3 песни поем молебную катавасию:

Моли Бога о нас, святителю (преподобне, праведне...) отче имярек, яко мы усердно к тебе прибегаем, скорому помощнику и молитвеннику о душах наших.

Или, ина катавасия: Избави от бед рабы своя, святителю Христов имярек, яко все по Бозе к тебе прибегаем, к скорому помощнику и теплому заступнику, и молебнику ко Спасу о душах наших.

Аще же Богородице молебен, поем сице:

Спаси от бед рабы Твоя, Богородице, яко вси по Бозе к Тебе прибегаем, яко к нерушимей стене и предстательству.

Призри благосердием, Всепетая Богородице, на мое лютое телесе озлобление, и исцели души моея болезнь.

Таже, Господи помилуй, трижды, Слава, И ныне. И поем седален. Такожде поем катавасию и по 6 песни, и кондак, и икос.

И по каноне поем: Достойно есть: Аще же есть великий праздник Господень или Богородицы, поем задостойник праздника17. И аще есть молебен Богородице, поем настоящие богородичны, глас 2-й:

Вышшую небес и чистшую светлостей солнечных, избавльшую нас от клятвы, Владычицу мира песньми почтим.

От многих моих грехов немощствует тело, немощствует и душа моя: к Тебе прибегаю, Благодатней, Надеждо ненадежных, Ты ми помози.

Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе: о, Владычице мира, буди ходатаица.

Поем прилежно Тебе песнь ныне, всепетой Богородице, радостно: со Предтечею и всеми святыми моли, Богородице, еже ущедрити ны.

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Таже, Трисвятое по Отче наш. И на молебне Богородице, тропари, глас 6-й:

Помилуй нас, Господи, помилуй нас, всякаго бо ответа недоумеюще, сию Ти молитву, яко Владыце, грешнии приносим, помилуй нас.

Слава: Господи, помилуй нас, на Тя бо уповахом, не прогневайся на ны зело, ниже помяни беззаконий наших, но призри ныне, яко благоутробен, и избави нас от враг наших, Ты бо еси Бог наш, и мы людие Твои, вси дела руку Твоею, и имя Твое призываем.

И ныне: Милосердия двери отверзи нам, благословенная Богородице, надеющеся на Тя, да не погибнем, но да избавимся Тобою от бед, Ты бо еси Спасение рода христианскаго.

Аще же святому молебен, пой тропарь его. Слава, кондак, И ныне, богородичен. Таже, Господи помилуй, 40. Слава, И ныне: И чтем молитву ко Пресвятей Богородице и Приснодеве Марии, или ко святому. По молитве же, Честнейшую: Слава, И ныне: Господи помилуй, трижды. Господи, благослови. И отпуст.

Полунощница воскресна

Стаpший: Молитвами святых отец наших: Чтец: Аминь. Слава Тебе, Боже наш, слава Тебе. Царю Небесный: Трисвятое по Отче наш: Молитва Иисусова. Господи, помилуй, 12 раз. Аще восхощеши пети полунощницу нощию, глаголи зде Слава, И ныне: Аще же поеши ю в неделю утра, глаголи молитву сию:

От сна востав, благодарю Тя, Святая Троице, яко многия ради Твоея благости и долготерпения не прогневался еси на мя, лениваго и грешнаго, ниже погубил мя еси со беззаконьми моими; но человеколюбствовал еси обычно и в нечаянии лежащаго воздвигл мя еси, во еже утреневати и славословити державу Твою. И ныне просвети мои очи мысленныя, отверзи моя уста поучатися словесем Твоим, и разумети заповеди Твоя, и творити волю Твою, и пети Тя во исповедании сердечнем, и воспевати всесвятое имя Твое, Отца и Сына и Святаго Духа, ныне и присно и во веки веков, аминь.

Приидите, поклонимся, трижды. И чтем псалом 50 (писан в повечерии).

И абие по псалме со всяцем благоговением и умилением поем канон Пресвятей и Животворящей Троице, гласа недели, писан во Октоихе.18

Таже, припевы Григория Синаита:

Достойно есть яко воистинну, славити Тя Бога Слова, Егоже трепещут и трясутся херувими, и славословят силы небесныя, воскресшаго тридневно из гроба Христа Жизнодавца, страхом прославим.

Воспоим вси боголепно песньми Божественными, Отца, и Сына, и Духа Божественаго, Триипостасную Державу, едино Царство и Господство.

Юже поют вси земнороднии, и славословят силы небесныя, от всех верно поклоняемую, Единицу по существу Триипостасную.

Господоначальную Херувим и богоначальную без сравнения Серафим, нераздельную Троицу во единице, сущее Богоначалие, Тя величаем.

Отцу Безначальному и Богу, Собезначальному Слову со Духом поклоняюся: неразлучное едино соединяемое Существо, тричисленую Единицу песньми почтим.

Лучезарная Твоя молния возсияй ми, Боже мой Триипостасне, Вседетелю, и дом мя покажи Твоея неприступныя славы, светел и светоносен и неизменен.

Егоже трепещут и трясутся херувими, и славословят ангельская воинства, от Девы неизреченно воплощшагося Христа Жизнодавца, страхом прославим.

Слава: Отче Вседержителю, Слове Божий, Всесвятый Душе, едина сила и образ, едино Царство и Божество и власть, помилуй и спаси поклоняющихся Ти. И поклон земныи.

И ныне: Из мертвых видевши Твоего Сына, Пречистая Дево, воскресша боголепно, радости неизреченныя тварь исполняшеся, Того славяще, Тебе величаем.19

Таже, Трисвятое по Отче наш: Молитва Иисусова и ипакои гласа. Господи помилуй, 40. Слава, И ныне: Честнейшую херувим: Старший: Молитвами святых отец наших, Господи Иисусе Христе, Сыне Божий, помилуй нас, аминь.

И глаголем молитву сию, Пресвятей Троице, творение Марка монаха:

Всемогущая и Животворящая Святая Троице и светоначальная, яже мирную всякую и премирную тварь, за едину благость от не сущих приведый, и промышляя и содержа: Иже по прочих Твоих неизреченных о земном роде благодеяниих, и покаяние нам ради плотскаго неможения до смерти даровавый: не остави нас окаянных в лукавых наших деяниих умрети, ниже злоначальнику и завистцу, и губителю посмешство быти. Зриши бо Благосерде, елик убо онаго на нас навет и вражда, елико же и наше страстование и слабость и небрежение. Но неоскудныя Твоя благости соделай на нас, молим на всякий день и час прогневающии Тя честных и животворных заповедей преступлением. И вся убо всего прешедшаго живота нашего, и до нынешняго часа согрешенная нами, в деяниих, или глаголаниих, или в помышлениих, остави и прости. Сподоби же нас, прочее скончати житие в покаянии, и умилении, и соблюдении святых Твоих повелений. Аще убо сладостию прельстившеся, многообразне согрешихом, или мiрскими похотьми неполезными и вредными обольстившеся препроводихом: аще гневом и яростию подвигшеся безсловесною, кого брата нашего оскорбихом, аще языком неизбежных и стропотных и крепких сетей объяхомся: аще коим чувств наших, или всеми, волею или неволею, ведуще или не ведуще, от восхищения, или поучения безумно поползохомся: аще же лукавыми помыслы и суетными совесть осквернихом: аще ли коим другим образом прегрешихом, от предприятия и обычая томими злаго: прости нам, и остави вся Всещедре, Преблаже и Многомилостиве: и даруй нам прочее бодрость и силу, во еже творити волю Твою благу, и благоугодну и совершену: да нощнаго и мрачнаго зла, световидным покаянием пременшеся, и яко во дни благообразно ходяще, и очищени объявимся человеколюбию Твоему недостойнии, воспевающе Тя и величающе во веки, аминь.

Слава, И ныне: Господи помилуй, трижды, Господи благослови.

Воскресый из мертвых, Господи Иисусе Христе, Сыне Божий, молитв ради Пречистыя Твоея Матере, и преподобных и богоносных отец наших, и всех святых, помилуй и спаси нас, яко Благ и Человеколюбец. Аминь.

И вместо прощения, и ектении, чтем молитвы Ослаби, остави: и Ненавидящих и обидящих: якоже предписася в повечерии.

Последование утрени

Аще есть бдение, по чтении великом глаголет Старший, Аминь, и абие: Слава в вышних Богу. Аще же не бысть бдения, Старший: Молитвами святых отец наших: Чтец: Аминь. Слава Тебе, Боже наш, слава Тебе. Царю Небесный: Трисвятое по Отче наш: Старший глаголет молитву Иисусову. Господи, помилуй, 12 раз. Слава, И ныне: Приидите, поклонимся, трижды.20 И поклона три. И псалмы,21 в нихже кадит Старший:

Псалом 19: Услышит тя Господь в день печали, защитит тя имя Бога Иаковля. Послет ти помощь от Святаго и от Сиона заступит тя. Помянет всяку жертву твою, и всесожжение твое тучно буди. Даст ти Господь по сердцу твоему, и весь совет твой исполнит. Возрадуемся о спасении твоем и во имя Господа Бога нашего возвеличимся; исполнит Господь вся прошения твоя. Ныне познах, яко спасе Господь христа Своего, услышит его с небесе святаго Своего, в силах спасение десницы Его. Сии на колесницах, и сии на конех, мы же во имя Господа Бога нашего призовем. Тии спяти быша и падоша, мы же востахом и исправихомся. Господи, спаси царя и услыши ны, воньже аще день призовем Тя.

Псалом 20: Господи, силою Твоею возвеселится царь, и о спасении Твоем возрадуется зело. Желание сердца его дал еси ему, и хотения устну его неси лишил его. Яко предварил еси его благословением благостынным, положил еси на главе его венец от камене честна. Живота просил есть у Тебе, и дал еси ему долготу дний во век века. Велия слава его спасением Твоим, славу и велелепие возложиши на него. Яко даси ему благословение во век века, возвеселиши его радостию с лицем Твоим. Яко царь уповает на Господа, и милостию Вышняго не подвижится. Да обрящется рука Твоя всем врагом Твоим, десница Твоя да обрящет вся ненавидящыя Тебе. Яко положиши их яко пещь огненную во время лица Твоего, Господь гневом Своим смятет я, и снесть их огнь. Плод их от земли погубиши, и семя их от сынов человеческих. Яко уклониша на Тя злая, помыслиша советы, ихже не возмогут составити. Яко положиши я хребет, во избытцех Твоих уготовиши лице их. Вознесися, Господи, силою Твоею, воспоем и поем силы Твоя.

Слава, И ныне. Трисвятое по Отче наш: И тропари сия, глас 1:

Спаси Господи люди Твоя, и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

Слава: Вознесыйся на Крест волею, тезоименитому Твоему новому жительству, щедроты Твоя даруй, Христе Боже. Возвесели нас силою Твоею, победы дая нам на сопостаты, пособие имущим Твое оружие мира, непобедимую победу.

И ныне: Предстательство страшное и непостыдное, не презри, Благая, молитв наших, Всепетая Богородице, утверди православных жительство, спаси православныя христианы, и подаждь им с небесе победу, зане родила еси Бога, едина Благословенная.

И вместо ектении: Господи помилуй, 12. Вместо же Слава Святей, Старший глаголет: Слава, И ныне. Таже:

Слава в вышних Богу, и на земли мир, в человецех благоволение. Трижды, без поклонов. Господи, устне мои отверзеши, и уста моя возвестят хвалу Твою. Дважды.

И глаголет ексапсалмы, легко, с тихостию и со всяким вниманием и страхом Божиим, яко к самому Богу беседуя невидимо, и о своих гресех умоляя Его. Братия же стоят руце имуще согбени к персем, главы же мало преклонены.

Псалом 3: Господи, что ся умножиша стужающии ми? Мнози востают на мя, мнози глаголют души моей: несть спасения ему в Бозе его. Ты же, Господи, Заступник мой ecè, слава моя и возносяй главу мою. Гласом моим ко Господу воззвах, и услыша мя от горы святыя Своея. Аз уснух и спах, востах, яко Господь заступит мя. Не убоюся от тем людей, окрест нападающих на мя. Воскресни, Господи, спаси мя, Боже мой, яко Ты поразил ecи вся враждующыя ми всуе: зубы грешников сокрушил ecи. Господне есть спасение, и на людех Твоих благословение Твое.

Аз уснух и спах; востах, яко Господь заступит мя.

Псалом 37: Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася и сташа, и ближнии мои отдалече мене сташа и нуждахуся ищущии душу мою, и ищущии злая мне глаголаху суетная и льстивным весь день поучахуся. Аз же яко глух не слышах, и яко нем не отверзаяй уст своих. И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут и укрепишася паче мене, и умножишася ненавидящии мя без правды. Воздающии ми злая воз благая оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.

Не остави мене, Господи Боже мои, не отступи от мене. Вонми в помощь мою, Господи спасения моего.

Псалом 62: Боже, Боже мой, к Тебе утренюю, возжада Тебе душа моя, коль множицею Тебе плоть моя, в земли пусте и непроходне, и безводне. Тако во святем явихся Тебе, видети силу Твою и славу Твою. Яко лучши милость Твоя паче живот, устне мои похвалите Тя. Тако благословлю Тя в животе моем, о имени Твоем воздежу руце мои. Яко от тука и масти да исполнится душа моя, и устнама радости восхвалят Тя уста моя. Аще поминах Тя на постели моей, на утренних поучахся в Тя. Яко был еси помощник мой, и в крове крилу Твоею возрадуюся. Прильпе душа моя по Тебе, мене же прият десница Твоя. Тии же всуе искаша душу мою, внидут в преисподняя земли, предадятся в руки оружия, части лисовом будут. Царь же возвеселится о Бозе, похвалится всяк кленыйся им, яко заградишася уста глаголющих неправедная.

На утрених поучахся в Тя, яко был еси помощник мой, и в крове крилу Твоею возрадуюся. Прильпе душа моя по Тебе, мене же прият десница Твоя.

Слава, И ныне. Аллилуия, аллилуия, аллилуия, слава Тебе, Боже. Трижды, без поклонов. Господи помилуй, трижды. Слава, И ныне.

Псалом 87: Господи Боже спасения моего, во дни воззвах, и в нощи пред Тобою. Да внидет пред Тя молитва моя: приклони ухо Твое к молению моему; Яко исполнися зол душа моя, и живот мой аду приближися. Привменен бых с нисходящими в ров, бых яко человек без помощи; В мертвых Свободь, яко язвеннии спящии во гробе, ихже не помянул еси ктому, и тии от руки Твоея отриновени быша. Положиша мя в рове преисподнем, в темных и сени смертней. На мне утвердися ярость Твоя, и вся волны Твоя навел еси на мя. Удалил еси знаемых моих от мене, положиша мя мерзость себе: предан бых и не исхождах. Очи мои изнемогосте от нищеты, воззвах к Тебе, Господи, весь день, воздех к Тебе руце мои. Еда мертвыми твориши чудеса, или врачеве воскресят, и исповедятся Тебе? Еда повесть кто во гробе милость Твою, и истину Твою в погибели? Еда познана будут во тме чудеса Твоя, и правда Твоя в земли забвенней? И аз к Тебе, Господи, воззвах, и утро молитва моя предварит Тя. Вскую, Господи, отрееши душу мою, отвращаеши лице Твое от мене? Нищ есмь аз, и в трудех от юности моея; вознес же ся, смирихся, и изнемогох. На мне преидоша гневи Твои, устрашения Твоя возмутиша мя; Обыдоша мя яко вода, весь день одержаша мя вкупе. Удалил еси от мене друга и искренняго, и знаемых моих от страстей.

Господи Боже спасения моего, во дни возвах и в нощи пред Тобою. Да внидет пред Тя молитва моя, приклони ухо Твое к молению моему.

Псалом 102. Благослови душе моя Господа, и вся внутренняя моя имя святое Его. Благослови душе моя Господа, и не забывай всех воздаяний Его; Очищающаго вся беззакония твоя, исцеляющаго вся недуги твоя; Избавляющаго от истления живот твой, венчающаго тя милостию и щедротами; Исполняющаго во благих желание твое: обновится яко орля юность твоя. Творяй милостыни Господь, и судьбу всем обидимым. Сказа пути Своя Моисеови, сыновом Исраилевым хотения Своя; Щедр и милостив Господь, долготерпелив и многомилостив. Не до конца прогневается, ниже во век враждует; Не по беззаконием нашим сотворил есть нам, ниже по грехом нашым воздал есть нам. Яко по высоте небесней от земли, утвердил есть Господь милость Свою на боявшихся Его. Елико отстоят востоцы от запад, удалил есть от нас беззакония наша. Якоже щедрит отец сыны, ущедри Господь боящихся Его. Яко Той позна создание наше, помяну, яко персть есмы. Человек, яко трава дние его, яко цвет сельный, тако оцветет; Яко дух пройде в нем, и не будет, и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его творити я. Господь на небеси уготова Престол Свой, и Царство Его всеми обладает. Благословите Господа вси Ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его.

На всяком месте владычествия Его, благослови душе моя Господа.

Псалом 142: Господи, услыши молитву мою, внуши моление мое во истине Твоей, услыши мя в правде Твоей; И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.

Услыши мя Господи в правде Твоей, и не вниди в суд с рабом Твоим. Услыши мя Господи в правде Твоей, и не вниди в суд с рабом Твоим. Дух Твой Благий наставит мя на землю праву.

Слава, И ныне. Аллилуия, аллилуия, аллилуия, слава Тебе, Боже. Трижды, с поклонами. Господи помилуй, 12. Слава, И ныне.

Таже поем Бог Господь, во глас тропаря воскреснаго, или праздника

Бог Господь и явися нам, благословен грядый во имя Господне.

Стих 1. Исповедайтеся Господеви, яко благ, яко в век милость Его.

И припеваем Бог Господь, к коемуждо стиху.

Стих 2. Обышедше обыдоша мя, и именем Господним противляхся им.

Стих 3. Не умру, но жив буду, и повем дела Господня.

Стих 4. Камень, егоже небрегоша зиждущии, Сей бысть во главу угла, от Господа бысть Сей, и есть дивен во очесех наших.

Таже тропарь воскресен, дважды. Слава, тропарь святаго. И ныне, богородичен воскресен, во глас тропаря святаго. Аще же не имать святый тропаря, Слава, И ныне, богородичен воскресен во глас дне.

Дважды. Слава, И ныне, богородичен воскресен, глас тойже:

И абие лик глаголет: Господи помилуй, трижды. Слава: Чтец же: И ныне: И аще есть неделя, стихологисует кафисму Псалтири: Исповемся Тебе Господи всем сердцем моим: По исполнении же коеяждо статии, глаголет чтец: Слава, лик же поет: И ныне: Аллилуиа: трижды, Господи помилуй, трижды, Слава: Чтец же: И ныне, и ину статию. По скончании же кафисмы, глаголет чтец: Слава, И ныне: Аллилуиа: трижды, Господи помилуй, трижды. Не глаголем же Слава: И ныне, зане поется пред богородичном седальнов.

И поем седален воскресен. Стих: Вoскресни, Гoспoди Бoже мoй, да вознесется рука Твoя, не забуди убогих Твoих до конца. И иный седален. Слава, И ныне: бoгoрoдичен.

И посем полагается чтение во Евангелии толковом.22 Таже кафисма 3-я: Возлюблю Тя Господи, крепосте моя, и паки седальны. Стих: Испoвемся Тебе, Гoспoди, всем сердцем мoим, пoвем вся чудеса Твoя. Слава, И ныне: бoгoрoдичен. И паки чтение.

И поем Непорочны на глас 5, в нихже бывает каждение.

Псалом 118: [Запевает головщик первый стих:] Блажени непорочнии [Благословен еси, Господи.]23 [Таже 1-й лик:] В путь, ходящии в законе Господни. [Благословен еси, Господи.] Блажени испытающии свидения Его, всем сердцем взыщут Его; [И 2-й лик: Всем сердцем взыщут Его. Благословен еси, Господи.] Не делающии бо беззакония, в путех Его ходиша. Ты заповедал еси заповеди Твоя, сохранити зело. Дабы исправилися путие мои, сохранити оправдания Твоя. Тогда не постыжуся, внегда призрети ми на вся заповеди Твоя. Исповемся Тебе в правости сердца, внегда научити ми ся судьбам правды Твоея. Оправдания Твоя сохраню, не остави мене до зела. В чесом исправит юнейший путь свой; внегда сохранити словеса Твоя. Всем сердцем моим взысках Тебе, не отрини мене от заповедей Твоих. В сердце моем скрых словеса Твоя, яко да не согрешу Тебе. Благословен еси Господи: научи мя оправданием Твоим. [Господи, научи мя оправданием Твоим.] Устнама моима возвестих вся судьбы уст Твоих. На пути свидений Твоих насладихся, яко о всяком богатстве. В заповедех Твоих поглумлюся, и уразумею пути Твоя. Во оправданиих Твоих поучуся, не забуду словес Твоих. Воздаждь рабу Твоему: живи мя, и сохраню словеса Твоя. Открый очи мои, и уразумею чудеса от закона Твоего. [Закону твоему, Господи, научи мя.] Пришлец аз есмь на земли: не скрый от мене заповеди Твоя. Возлюби душа моя возжелати судьбы Твоя на всякое время. Запретил еси гордым: прокляти уклоняющиися от заповедей Твоих. Отими от мене понос и уничижение, яко свидений Твоих взысках. Ибо седоша князи, и на мя клеветаху, раб же Твой глумляшеся во оправданиих Твоих: Ибо свидения Твоя поучение мое есть, и совети мои оправдания Твоя. Прильпе земли душа моя: живи мя по словеси Твоему. Пути моя возвестих, и услышал мя еси: научи мя оправданием Твоим: Путь оправданий Твоих вразуми ми, и поглумлюся в чудесех Твоих. Воздрема душа моя от уныния: утверди мя в словесех Твоих. Путь неправды отстави от мене, и законом Твоим помилуй мя. Путь истины изволих, и судьбы Твоя не забых. Прилепихся свидением Твоим, Господи, не посрами мене. Путь заповедей Твоих текох, егда расширил еси сердце мое. Законоположи мне, Господи, путь оправданий Твоих, и взыщу и выну: Вразуми мя, и испытаю закон Твой, и сохраню и всем сердцем моим. Настави мя на стезю заповедей Твоих, яко тую восхотех. Приклони сердце мое во свидения Твоя, а не в лихоимство. Отврати очи мои, еже не видети суеты, в пути Твоем живи мя. Постави рабу Твоему слово Твое в страх Твой. [Слово твое в страх твой дай же ми Господи.] Отими поношение мое, еже непщевах: яко судьбы Твоя благи. Се возжелах заповеди Твоя, в правде Твоей живи мя. И да приидет на мя милость Твоя Господи, спасение Твое по словеси Твоему. И отвещаю поношающим ми слово: яко уповах на словеса Твоя. И не отими от уст моих словесе истинна до зела, яко на судьбы Твоя уповах. И сохраню закон Твой выну, в век и в век века. И хождах в широте, яко заповеди Твоя взысках. И глаголах о свидениих Твоих пред цари, и не стыдяхся: И поучахся в заповедех Твоих, яже возлюбих зело: И воздвигох руце мои к заповедем Твоим, яже возлюбих, и глумляхся во оправданиих Твоих. Помяни словеса Твоя рабу Твоему, ихже упование дал ми еси. То мя утеши во смирении моем, яко слово Твое живи мя. [В смиренной мудрости утверди мя, Господи.] Гордии законопреступоваху до зела: от закона же Твоего не уклонихся. Помянух судьбы Твоя от века, Господи, и утешихся. Печаль прият мя от грешник, оставляющих закон Твой. Пета бяху мне оправдания Твоя, на месте пришельствия моего. Помянух в нощи имя Твое, Господи, и сохраних закон Твой. Сей бысть мне, яко оправданий Твоих взысках. Часть моя еси, Господи, рех сохранити закон Твой. Помолихся лицу Твоему всем сердцем моим: помилуй мя по словеси Твоему. Помыслих пути Твоя, и возвратих нозе мои во свидения Твоя. Уготовихся и не смутихся сохранити заповеди Твоя. Ужа грешник обязашася мне, и закона Твоего не забых. Полунощи востах исповедатися Тебе о судьбах правды Твоея. [Исповемся Тебе, Боже, исповемся Тебе.] Причастник аз есмь всем боящимся Тебе, и хранящим заповеди Твоя. Милости Твоея, Господи, исполнь земля: оправданием Твоим научи мя. Благость сотворил еси с рабом Твоим Господи, по словеси Твоему. Благости, и наказанию и разуму научи мя, яко заповедем твоим веровах. Прежде даже не смирити ми ся, аз прегреших: сего ради слово Твое сохраних. Благ еси Ты, Господи, и благостию Твоею научи мя оправданием Твоим. Умножися на мя неправда гордых, аз же всем сердцем моим испытаю заповеди Твоя. Усырися яко млеко сердце их, аз же закону Твоему поучихся. Благо мне, яко смирил мя еси, яко да научуся оправданием Твоим. Благ мне закон уст Твоих, паче тысящ злата и сребра.

Слава: [Премудрости и разуму, Господи, научи мя.] И ныне: [Тойже.] Аллилуия, аллилуия, аллилуия, слава Тебе, Боже, трижды. [И паки тойже припев.] Господи, помилуй, трижды.. Слава, И ныне:

[Запевает головщик:] Руце Твои сотвористе мя, и создасте мя: [Господи, вразуми мя, и жив буду.] [И 1-й лик:] Вразуми мя, и научуся заповедем Твоим. [Господи, вразуми мя, и жив буду.] Боящиися Тебе узрят мя и возвеселятся, яко на словеса Твоя уповах. [2-й лик: На словеса Твоя уповах. Господи, вразуми мя, и жив буду.] Разумех Господи, яко правда судьбы Твоя, и воистинну смирил мя еси. Буди же милость Твоя, да утешит мя, по словеси Твоему рабу Твоему. Да приидут мне щедроты Твоя, и жив буду, яко закон Твой поучение мое есть. Да постыдятся гордии, яко неправедно беззаконноваша на мя, аз же поглумлюся в заповедех Твоих. Да обратят мя боящиися Тебе, и ведящии свидения Твоя. Буди сердце мое непорочно во оправданиих Твоих, яко да не постыжуся. Исчезает во спасение Твое душа моя, на словеса Твоя уповах. Исчезоша очи мои в слово Твое, глаголюще: когда утешиши мя; Зане бых яко мех на слане: оправданий Твоих не забых. Колико есть дней раба Твоего; когда сотвориши ми от гонящих мя суд; Поведаша мне законопреступницы глумления, но не яко закон Твой, Господи. Вся заповеди Твоя истина: неправедно погнаша мя, помози ми. [2-й лик: Помощник мой Ты еси, Господи, спаси мя.] Вмале не скончаша мене на земли: аз же не оставих заповедей Твоих. По милости Твоей живи мя, и сохраню свидения уст Твоих.Во век, Господи, слово Твое пребывает на Небеси. В род и род истина Твоя; основал еси землю, и пребывает. Учинением Твоим пребывает день, яко всяческая работна Тебе. Яко аще бы не закон Твое поучение мое был, тогда убо погибл бых во смирении моем. Во век не забуду оправданий Твоих, яко в них оживил мя еси.

Среда:

Твой есмь аз, спаси мя, яко оправданий Твоих взысках. [Спасение Твое дай же ми, Господи.] Мене ждаша грешницы погубити мя, свидения Твоя разумех. Всякия кончины видех конец, широка заповедь Твоя зело. Коль возлюбих закон Твой, Господи, весь день поучение мое есть. Паче враг моих умудрил мя еси заповедию Твоею, яко в век моя есть. Паче всех учащих мя разумех, яко свидения Твоя поучение мое есть. Паче старец разумех, яко заповеди Твоя взысках. От всякаго пути лукава возбраних ногам моим, яко да сохраню словеса Твоя. От судеб Твоих не уклонихся, яко Ты законоположил ми еси. Коль сладка гортани моему словеса Твоя, паче меда устом моим. От заповедей Твоих разумех, сего ради возненавидех всяк путь неправды. Светильник ногама моима закон Твой, и свет стезям моим. Кляхся и поставих сохранити судьбы правды Твоея. Смирихся до зела, Господи, живи мя по словеси Твоему. Вольная уст моих благоволи же, Господи, и судьбам Твоим научи мя. Душа моя в руку Твоею выну, и закона Твоего не забых. Положиша грешницы сеть мне, и от заповедей Твоих не заблудих. Наследовах свидения Твоя во век, яко радование сердца моего суть. Приклоних сердце мое сотворити оправдания Твоя в век за воздаяние. Законопреступныя возненавидех, закон же Твой возлюбих. Помощник мой и Заступник мой еси Ты, на словеса Твоя уповах. [Христе, Спасе мой, помози ми.] Уклонитеся от мене лукавнующии, и испытаю заповеди Бога моего. Заступи мя по словеси Твоему, и жив буду, и не посрами мене от чаяния моего. Помози ми, и спасуся, и поучуся во оправданиих Твоих выну. Уничижил еси вся отступающия от оправданий Твоих, яко неправедно помышление их. Преступающия непщевах вся грешныя земли, сего ради возлюбих свидения Твоя. Пригвозди страху Твоему плоти моя, от судеб бо Твоих убояхся. Сотворих суд и правду, не предаждь мене обидящым мя. Восприими раба Твоего во благо, да не оклеветают мене гордии. Очи мои исчезосте во спасение Твое, и в слово правды Твоея. Сотвори с рабом Твоим по милости Твоей, и оправданием Твоим научи мя. Раб Твой есмь аз: вразуми мя, и увем свидения Твоя. Время сотворити Господеви: разориша закон Твой. Сего ради возлюбих заповеди Твоя паче злата и топазия. Сего ради ко всем заповедем Твоим направляхся, всяк путь неправды возненавидех. Дивна свидения Твоя, сего ради испыта я душа моя. Явление словес Твоих просвещает и вразумляет младенцы. Уста моя отверзох, и привлекох дух, яко заповедей Твоих желах.

Слава: [По милости Твоей, Господи, спаси мя.] И ныне: [Тойже.] Аллилуия, аллилуия, аллилуия, слава Тебе, Боже, трижды. [И паки тойже.] Господи, помилуй, трижды.. Слава, И ныне:

[Головщик:] Призри на мя и помилуй мя. [Призри на мя и помилуй мя.] [1-й лик:] По суду любящих имя Твое. [Призри на мя и помилуй мя.] Стопы моя направи по словеси Твоему, и да не обладает мною всякое беззаконие. [2-й лик: И да не обладает мною всякое беззаконие. Призри на мя и помилуй мя.] Избави мя от клеветы человеческия, и сохраню заповеди Твоя. Лице Твое просвети на раба Твоего, и научи мя оправданием Твоим. Исходища водная изведосте очи мои, понеже не сохраних закона Твоего. Праведен еси, Господи, и прави суди Твои. [Праведен еси Ты, Господи.] Заповедал еси правду свидения Твоя и истину зело. Истаяла мя есть ревность Твоя, яко забыша словеса Твоя врази мои. Разжжено слово Твое зело, и раб Твой возлюби е. Юнейший аз есмь и уничижен, оправданий Твоих не забых. Правда Твоя правда во век, и закон Твой истина. Скорби и нужды обретоша мя, заповеди Твоя поучение мое. Правда свидения Твоя в век, вразуми мя, и жив буду. Воззвах всем сердцем моим, услыши мя Господи, оправдания Твоя взыщу. [Воззвах к Тебе, Господи, спаси мя.] Воззвах Ти, спаси мя, и сохраню свидения Твоя. Предварих в безгодии и воззвах, на словеса Твоя уповах. Предваристе очи мои ко утру, поучитися словесем Твоим. Глас мой услыши, Господи, по милости Твоей: по судьбе Твоей живи мя. [Глас мой услыши, Господи.] Приближишася гонящии мя беззаконием, от закона же Твоего удалишася. Близ еси Ты, Господи, и вси путие Твои истина. Исперва познах от свидений Твоих, яко в век основал я еси. Виждь смирение мое и изми мя, яко закона Твоего не забых. Суди суд мой и избави мя, словесе ради Твоего живи мя. Далече от грешник спасение, яко оправданий Твоих не взыскаша. Щедроты Твоя многи, Господи, по судьбе Твоей живи мя. Мнози изгонящии мя и стужающии ми, от свидений Твоих не уклонихся. Видех неразумевающия и истаях, яко словес Твоих не сохраниша. Виждь, яко заповеди Твоя возлюбих, Господи, по милости Твоей живи мя. [Возлюблением правды Твоея, Господи, спаси мя.] Начало словес Твоих истина, и во век вся судьбы правды Твоея. Князи погнаша мя туне, и от словес Твоих убояся сердце мое. Возрадуюся аз о словесех Твоих, яко обретаяй корысть многу. Неправду возненавидех и омерзих, закон же Твой возлюбих. Седмерицею днем хвалих Тя о судьбах правды Твоея. Мир мног любящым закон Твой, и несть им соблазна. Чаях спасения Твоего, Господи, и заповеди Твоя возлюблих. Сохрани душа моя свидения Твоя и возлюби я зело. Сохраних заповеди Твоя и свидения Твоя, яко вси путие мои пред Тобою, Господи. Да приближится моление мое пред Тя, Господи, по словеси Твоему вразуми мя. [Спасе мой, слово твое живи мя.] Да внидет прошение мое пред Тя, Господи, по словеси Твоему избави мя. Отрыгнут устне мои пение, егда научиши мя оправданием Твоим. Провещает язык мой словеса Твоя, яко вся заповеди Твоя правда. Да будет рука Твоя еже спасти мя, яко заповеди Твоя изволих. Возжелах спасение Твое, Господи, и закон Твой поучение мое есть. Жива будет душа моя и восхвалит Тя, и судьбы Твоя помогут мне. Заблудих, яко овча погибшее, взыщи раба Твоего, яко заповедей Твоих не забых.

И пoем тропари по Непoрoчных глас 5-й; с припевом пред каждым тропарем:

Благoслoвен еси, Гoспoди, научи мя oправданием Твoим.

Ангельский сoбoр удивися, зря Тебе в мертвых вменившася, смертную же, Спасе, крепoсть разoривша, и с Сoбoю Адама Вoздвигша, и oт ада вся свoбoждша.

Пoчтo мира с милoстивыми слезами, o ученицы, раствoряете: блистаяся вo грoбе Ангел мирoнoсицам вещаше: видите вы грoб и уразумейте, Спас бo вoскресе oт грoба.

Зелo ранo мирoнoсицы течаху кo грoбу Твoему рыдающия, нo предста к ним Ангел и рече: рыдания время преста, не плачите, вoскресение же Апoстoлoм рцыте.

Мирoнoсицы жены, с миры пришедшия кo грoбу Твoему, Спасе, рыдаху: Ангел же к ним рече, глагoля: чтo с мертвыми Живагo пoмышляете; якo Бoг бo вoскресе oт грoба.

Слава, трoичен: Пoклoнимся Отцу, и Егo Сынoви, и Святoму Духу, Святей Трoице вo Единем Существе, с Серафимы зoвуще: Свят, Свят, Свят еси, Гoспoди.

И ныне, бoгoрoдичен: Жизнoдавца рoждши, греха, Девo, Адама избавила еси, радoсть же Еве в печали местo пoдала еси: падшия же oт жизни к сей направи из Тебе Вoплoтивыйся Бoг и Челoвек.

Аллилуиа, аллилуиа, аллилуиа, слава Тебе, Бoже. Трижды. Господи помилуй, трижды, Слава: И ныне.

Таже поем ипакoи гласа, и бывает чтение.

Аще есть неделя, и праздник Богородицы или святаго, иже имать полиелей, поем полиелей Богородицы, или святаго. Аще же несть неделя, но владычний, или богородичный праздник, или великого святаго, Непорочных не поем, но поем токмо полиелей, с припевы его:

Псалом 134: Хвалите имя Господне, хвалите, раби Господа; [И к коемуждо стиху припеваем: Аллилуиа. Аще же чтем полиелей, то токмо ко избранным стихом.] Стоящии во храме Господни, во дворех дому Бога нашего. Хвалите Господа, яко благ Господь, пойте имени Его, яко добро: Яко Иакова избра Себе Господь, Исраиля в достояние Себе. Яко аз познах, яко велий Господь, и Господь наш над всеми боги. Вся елика восхоте Господь, сотвори на небеси и на земли, в морях и во всех безднах. Возводя облаки от последних земли, молнии в дождь сотвори, изводяй ветры от сокровищ Своих. Иже порази первенцы Египетския, от человека до скота. Посла знамения и чудеса посреде тебе, Египте, на фараона и на вся рабы его. Иже порази языки многи и изби цари крепки: Сиона, царя Аморрейска, и Ога, царя Васанска, и вся царствия Ханаанска; И даде землю их достояние, достояние Исраилю, людем Своим. Господи, имя Твое в век и память Твоя в род и род: Яко судити имать Господь людем Своим, и о рабех Своих умолится. Идоли язык сребро и злато, дела рук человеческих. Уста имут, и не возлаголют, очи имут, и не узрят; Уши имут, и не услышат, ниже бо есть дух во устех их. Подобни им да будут творящии я, и вси надеющиися на ня. Доме Исраилев, благословите Господа, доме Ааронь, благословите Господа, доме Левиин, благословите Господа. Боящиися Господа, благословите Господа. Благословен Господь от Сиона, живый во Иерусалиме.

Псалом 135: Исповедайтеся Господеви, яко благ, яко в век милость Его. Исповедайтеся Богу богов, яко в век милость Его. [Аще же поем полиелей, а не чтем, то вместо Яко в век милость Его припеваем: Аллилуиа, аллилуиа, яко в век милость Его, аллилуиа.] Исповедайтеся Господеви господей, яко в век милость Его. Сотворшему чудеса велия Единому, яко в век милость Его. Сотворшему небеса разумом, яко в век милость Его. Утвердившему землю на водах, яко в век милость Его. Сотворшему светила велия Единому, яко в век милость Его. Солнце во область дне, яко в век милость Его. Луну и звезды во область нощи, яко в век милость Его. Поразившему Египта с первенцы его, яко в век милость Его; И изведшему Исраиля от среды их, яко в век милость Его. Рукою крепкою и мышцею высокою, яко в век милость Его. Раздельшему Чермное море в разделения, яко в век милость Его. И проведшему Исраиля посреде его, яко в век милость Его. И истрясшему фараона и силу его в море Чермное, яко в век милость Его. Проведшему люди Своя в пустыни, яко в век милость Его. Поразившему цари велия, яко в век милость Его; И убившему цари крепкия, яко в век милость Его: Сиона, царя Аморрейска, яко в век милость Его; И Ога, царя Васанска, яко в век милость Его. И давшему землю их достояние, яко в век милость Его. Достояние Исраилю, рабу Своему, яко в век милость Его. Яко во смирении нашем помяну ны Господь, яко в век милость Его. И избавил ны есть от врагов наших, яко в век милость Его. Даяй пищу всякой плоти, яко в век милость Его. Исповедайтеся Богу Небесному, яко в век милость Его.

И аще есть праздник, поем величание праздника, со стихи его. В недели же блуднаго, мясопустную и сыропустную, припеваем и третий псалом, На реках вавилонских, с припевом: Аллилуиа.

На реках Вавилонских, тамо седохом и плакахом, внегда помянути нам Сиона. На вербиих посреде его обесихом органы наша. Яко тамо вопросиша ны пленшии нас о словесех песней и ведшии нас о пении: воспойте нам от песней Сионских. Како воспоем песнь Господню на земли чуждей? Аще забуду тебе, Иерусалиме, забвена буди десница моя. Прильпни язык мой гортани моему, аще не помяну тебе, аще не предложу Иерусалима, яко в начале веселия моего. Помяни, Господи, сыны Едомския, в день Иерусалимль глаголющия: истощайте, истощайте до оснований его. Дщи Вавилоня окаянная, блажен иже воздаст тебе воздаяние твое, еже воздала еси нам. Блажен иже имет и разбиет младенцы твоя о камень.

Слава: И ныне: Аллилуиа, аллилуиа, аллилуиа, слава Тебе, Бoже. Трижды. Господи помилуй, трижды, Слава: И ныне.

И аще есть праздник, поем седальны праздника; и по чтении степенну, 1-й антифон 4 гласа:

От юности моея мнози борют мя страсти, но Сам мя заступи, и спаси, Спасе мой. Дважды.

Ненавидящии Сиона, посрамитеся от Господа, яко трава бо огнем, будете изсохше. Дважды.

Слава: Святым Духом всяка душа живится, и чистотою возвышается, светлеется Троическим единством, священнотайне. И ныне, тoйже.

Аще же есть неделя, поем степенны гласа, кийждо стих по дважды. И возгласит канонаpх или чтец пpокимен воскpесен или пpаздника.24 Старший: молитву Иисусову. И поем Всякое дыхание, на глас недели.

Всякое дыхание да хвалит Господа.

Стих: Хвалите Бога во святых Его, хвалите Его во утверждении силы Его.

Таже, Господи помилуй, тpижды. Стаpший возгласит От ... Святаго Евангелия чтение, мы же поем: Слава Тебе, Господи, и поклон един. И чтет Старший Евангелие, зря к востоком.

И по Евангелии паки поем: Слава Тебе, Господи, и поклон. Аще есть неделя, или Воздвижение, поем Воскресение Христово видевше, на глас 6, аще же ни, абие псалом 50.

Воскресение Христово видевше, поклонимся святому Господу Иисусу, Единому Безгрешному. Кресту Твоему покланяемся, Христе, и святое Воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову Воскресению: се бо прииде Крестом радость всему мiру. Всегда благословяще Господа, поем Воскресение Его: распятие бо претерпев, смертию смерть разруши.

И псалом 50, в тойже глас, на немже и творим поклоны пред Евангелием сице: подходящим братиям два два, по чину их, творят прежде два поклона, и целуют Святое Евангелие, и паки един поклон.25

Псалом 50: Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавая пред Тобою сотворих; яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы.

Слава: Молитвами Апостолов, Милостиве, очисти, множества согрешений наших.

И ныне: Молитвами Богородицы, Милостиве, очисти, множества согрешений наших.

Таже, глас 6: Помилуй мя Боже, по велицей милости Твоей, и по множеству щедрот Твоих, очисти беззаконие мое.

И аще есть неделя, поем стихиру воскресну, глас 6: Воскрес Иисус от гроба, якоже прорече, даде нам живот вечный, и велию милость. Аще же праздник, поем стихиру праздника.

От недели же мытаря и даже до пятой недели Великия Четыредесятницы, вместо Молитвами апостолов поем на глас 8:

Слава: Покаяния отверзи мне двери, Жизнодавче, утренюет бо дух мой ко храму святому Твоему, храм носяй телесный весь осквернен: но яко щедр очисти благоутробною Твоею милостию.

И ныне, богородичен: На спасения стези настави мя, Богородице: студными бо окалях душу грехми, и в лености все житие мое иждих: но Твоими молитвами избави мя от всякия нечистоты.

Таже, глас 6: Помилуй мя, Боже, писан выше сего.

Посем: Множества содеянных мною лютых помышляя окаянный, трепещу страшнаго дне суднаго: но надеяся на милость благоутробия Твоего, яко Давид вопию ти: помилуй мя, Боже, по велицей Твоей милости.

Спаси Господи люди Твоя не глаголем, но Господи помилуй, 12 раз, и Старший глаголет молитву Иисусову. По сем же, Аминь.

И начинаем ирмос канона, глаголем же и един тропарь без стиха, глаголюще: Слава Господи, святому Воскресению Твоему: Аще же владычний праздник, или празднство святаго есть, глаголем ирмос дважды.

Песнь первая

Вкупе погрузив фараона, Моисей глаголет:

Господеви поем, славно бо прославися.

Слава Господи, святому Воскресению Твоему. И поем тропарь воскресен:

Таже начинает первый лик стихи песни:

Поем Господеви, славно бо прославися: коня и всадника вверже в море. И тропарь.

Таже вторый лик:

Помощник и Покровитель бысть мне во спасение, Сей мой Бог и прославлю Его, Бог отца моего, и вознесу Его. И тропарь.

На 10: Господь сокрушаяяй брани, Господь имя Ему: колесницы фараоновы и силу его вверже в море. Ин канон, крестовоскресен.

Пучиною покры я, погрязоша во глубине, яко камень.

На 8: Тогда потщашася владыки Едомстии и князей Моавитских, прият я трепет, растаяша вси живущии в Ханаане.

Нападет на ня страх и трепет, величием мышцы Твоея да окаменятся. Ин канон Пресвятей Богородице.

На 6: Дондеже пройдут людие Твои, Господи, дондеже пройдут людие Твои сии, яже стяжал еси.

Соделал еси, Господи, святыню, юже уготовасте руце Твои.

На 4: Господь царствуяй веки, и на век, и еще: егда вниде конь фараонов с колесницами и всадники в море. И канон святаго Минеи.

Сынове же Исраилевы проидоша сушею посреде моря.

Слава Отцу и Сыну и Святому Духу.

И ныне и присно, и во веки веков, аминь.

И катавасия по коейждо песни. Аще не изъявляет устав иныя катавасии, поем Отверзу уста моя: От 1 до 6 августа и от 24 августа до 21 септемвриа поем катавасию Крест начертав Моисей: От 21 ноемвриа до 31 декемвриа Христос раждается, славите:

Песнь третия

Анны, матере Самуила пророка.

Бога почитает неплоды, раждающая странно.

Свят еси Господи, и Тя поет дух мой.

Слава Господи, святому Воскресению Твоему.

Утвердися сердце мое в Господе, вознесеся рог мой о Бозе моем, расширишася устам моя на враги моя, возвеселихся о спасении Твоем.

Яко несть свят, яко Господь, и несть праведен, яко Бог наш, и несть свят паче Тебе.

На 10: Не хвалитеся и не глаголите высокая в гордыни, ниже да изыдет велеречие из уст ваших.

Яко Бог разумов Господь, и Бог уготовляяй начинания Своя.

На 8: Даяй молитву молящемуся и благослови лета праведнаго.

Господь немощна сотвори супостата его, Господь Свят.

На 6: Да не хвалится премудрый премудростию своею, и да не хвалится сильный силою своею, и да не хвалится богатый богатством своим.

Но о сем да хвалится хваляйся, еже разумети и знати Господа, и творити суд и правду посреде земли.

На 4: Господь взыде на небеса и возгреме, Той судит концем земли, праведен сый.

И даст крепость царю нашему, и вознесет рог христа Своего.

Слава: И ныне:

Катавасиа: Твоя песнословцы: / Жезл во образ тайны: / Прежде век от Отца:26

Вместо же ектении, глаголем Господи помилуй, трижды. И поем кондак и икос святаго, таже седальны. Пред последним же Слава, И ныне. И по седальнах чтем житие святаго.27

Песнь четвеpтая

Слова истощание Аввакум сказует:

Слава силе Твоей, Господи.

Слава Господи, святому Воскресению Твоему.

Господи, услышах слух Твой и убояхся, Господи, pазумех дела Твоя, и ужасохся.

Внегда смутитися души моей во гневе, милость Твою помянеши.

На 10: Бог от юга пpиидет, и Святый из гоpы пpиосененныя чащи.

Покpы небеса добpодетель Его, и хвалы Его исполнь земля.

На 8: Зане смоковь не плодопpинесет, и не будет pода в лозах.

Солжет дело маслинное, и поля не сотвоpят яди.

На 6: Оскудеша овцы от пищи, и не будет волов пpи яслех.

Аз же о Господе возpадуюся, возвеселюся о Бозе Спасе моем.

На 4: Господь Бог мой сила моя, и учинит нозе мои на совеpшение.

И на высокая возводит мя, победити ми в песни Его.

Слава: И ныне:

Катавасиа: Седяй в славе: / Услышах,Господи: / Жезл из корене Иессеова:

Песнь пятая

Исаии проречение, молитва вящши:

Господи, Боже наш, мир даждь нам.

Слава Господи, святому Воскресению Твоему.

От нощи утpенюет дух мой к Тебе, Боже, зане свет повеления Твоя на земли.

Пpавде научитеся живущии на земли.

На 10: Да возьмется нечестивый, да не видит славы Господни. Господи, высока Твоя мышца, и не ведеша, разумевше же постыдятся.

Зависть приимет люди ненаказанныя, и ныне огнь супостаты пояст.

На 8: Пpиложи им зла, Господи, пpиложи зла славным земли.

Господи, в скоpби помянухом Тя, в скоpби мале наказание Твое нам.

На 6: И яко болящая пpиближается pодити, и в болезни своей вопияше: тако быхом возлюбленному Твоему.

Hе падем, но падут живущии на земли.

На 4: Воскpеснут меpтвии, и востанут иже во гpобех, и возвеселятся иже на земли.

Роса бо, яже от Тебе, исцеление им есть, земля же нечестивых падет.

Слава: И ныне:

Катавасиа: Ужасошася всяческая: / О треблаженное древо: / Бог сый мира:

Песнь шестая

Яко пророка Иону спаси нас, Господи.

Молитва Ионы пророка.

От зверя воззва Иона, глаголя.

Слава Господи, святому Воскресению Твоему.

Возопих в скоpби моей ко Господу Богу моему, и услыша мя.

Отвеpгл мя еси во глубины сеpдца моpскаго, и pеки обыдоша мя.

На 10: Вся высоты Твоя, и волны Твоя на мне пpеидоша.

Еда пpиложу пpизpети ми к хpаму святому Твоему;

На 8: Возлияся вода до души моея, бездна обыде мя последняя.

Понpе глава моя в pазсели гоp: снидох в землю, еяже веpеи ея заклепи вечнии.

На 6: И да взыдет из истления живот мой, к Тебе, Господи Боже мой.

И да пpиидет к Тебе молитва моя, к хpаму святому Твоему.

На 4: Хpанящии суетная и ложная, милость свою оставиша.

Елика обещах, воздам Тебе во спасение мое Господеви.

Слава: И ныне:

Катавасиа: Божественное сие: / Воднаго зверя во утробе: / Из утробы Иону младенца:

Таже кондак воскресен, и икос. И чтем пролог.28

Песнь седмая

Хвала пламень угашает трех юнош.

Молитва святых триех отроков:

Отец и наш Боже, благословен еси.

Слава Господи, святому Воскресению Твоему.

Благословен еси, Господи Боже отец наших, и хвально и пpославлено Имя Твое во веки.

И вся дела Твоя истинна, и пpави путие Твои.

На 10: И вси суди Твои истинни, и судьбы истинны сотвоpил еси.

И на гpад святый отец наших Иеpусалим.

На 8: Благословен еси, Господи Боже отец наших, и пpепетый и пpевозносимый во веки.

И благословенно имя славы Твоея святое, пpепетое и пpевозносимое во веки.

На 6: Благословен еси в хpаме святыя славы Твоея, пpепетый и пpевозносимый во веки.

Благословен еси, Видяй бездны, Седяй на хеpувимех, пpепетый и пpевозносимый во веки.

На 4: Благословен еси на пpестоле славы Цаpствия Твоего, пpепетый и пpевозносимый во веки.

Благословен еси на твеpди небесней, пpепетый и пpевозносимый во веки.

Слава: И ныне:

Катавасиа: Не послужиша твари богомудрии: / Безумное веление: / Отроцы благочестию совоспитани:

Песнь осмая

Владыку воспой созданных естество:

Господа пойте дела, и превозносите во вся веки.

Слава Господи, святому Воскресению Твоему.

Благословите вся дела Господня Господа, пойте и пpевозносите Его во веки.

Благословите Ангели Господни, небеса Господня Господа, пойте и пpевозносите Его во веки.

На 10: Благословите воды вся, яже пpевыше небес, вся силы Господни Господа, пойте и пpевозносите Его во веки.

Благословите солнце и месяц, звезды небесныя Господа, пойте и пpевозносите Его во веки.

На 8: Благословите вся птицы небесныя, звеpие и вси скоти Господа, пойте и пpевозносите Его во веки.

Благословите сынове человечестии, да благословит Изpаиль Господа, пойте и пpевозносите Его во веки.

На 6: Благословите священницы Господни, pаби Господни Господа, пойте и пpевозносите Его во веки.

Благословите дуси и души пpаведных, пpеподобнии и смиpеннии сеpдцем Господа, пойте и пpевозносите Его во веки.

На 4: Благословите, Ананиа, Азаpиа, Мисаил Господа, пойте и пpевозносите Его во веки.

Благословите Апостоли, пpоpоцы и мученицы Господни Господа, пойте и пpевозносите Его во веки.

Благословим Отца и Сына и Святаго Духа, Господа.

И ныне и присно, и во веки веков, аминь.

Таже глаголем: Хвалим, благословим, покланяемся Господеви, поюще и пpевозносяще во вся веки. Поклон и катавасиа:

Отроки благочестивыя в пещи: / Благословите отроцы: / Чуда преестественнаго:

Песнь девятая

Песнь Богородицы, от Луки святаго Евангелия.

Сына поет и Бога Матерь Отроковица.

Богородицу в песнех величаем.

Первый лик: Величит душа Моя Господа, и возpадовася дух Мой о Бозе, Спасе Моем.

И по коемждо стисе припеваем:

Честнейшую Херувим, и славнейшую без сравнения Серафим, без истления Бога Слова Рождшую, сущую Богородицу, Тя величаем.

И на кийждо тропарь поклон малый. Последний же поклон земный. Не кадит же Старший на Честнейшую, но кланяется со всеми вкупе; кадит же на 9 песни в тропарех.

Вторый лик: Яко пpизpе на смиpение Рабы Своея, се бо отныне ублажат Мя вси pоди.

Яко сотвоpи Мне величие Сильный, и свято имя Его, и милость Его в pоды pодов боящимся Его.

Сотвоpи деpжаву мышцею Своею, pасточи гоpдыя мыслию сеpдца их.

Hизложи сильныя со пpестол, и вознесе смиpенныя, алчущия исполни благ, и богатящияся отпусти тщи.

Воспpият Изpаиля отpока Своего, помянути милости, якоже глагола ко отцем нашим, Авpааму и семени его даже до века.

Песнь девятая

Захариа благословляет отрочате рождение.

Молитва Захаpии, отца Пpедтечева.

Слава Господи, святому Воскресению Твоему.

Благословен Господь Бог Изpаилев, яко посети и сотвоpи избавление людем Своим.

И воздвиже pог спасения нам, в дому Давидове, отpока Своего.

На 10: Якоже глагола усты святых, сущих от века пpоpок Его, спасение от вpаг наших, и из pуки всех ненавидящих нас.

Сотвоpити милость со отцы нашими, и помянути завет святый Свой.

На 8: Клятву, еюже клятся ко Авpааму, отцу нашему, дати нам, без стpаха из pуки вpаг наших избавльшимся.

Служити Ему пpеподобием и пpавдою пpед Hим, вся дни живота нашего.

На 6: И ты, отpоча, пpоpок Вышняго наpечешися: пpедыдеши бо пpед лицем Господним, уготовати пути Ему.

Дати pазум спасения людем Его, во оставление гpех их, милосеpдия pади милости Бога нашего.

На 4: В нихже посети нас Восток с высоты, явитися во тьме и сени смеpтней седящим.

Hапpавити ноги наша на путь миpен.

Слава: И ныне:

Катавасиа: Всяк земнородный:/ Таин еси Богородице: Снедию древа: / Таинство странное:

Господи помилуй, трижды. Слава: И ныне:29 И аще есть неделя, возгласит канонарх в настоящий глас: Свят Господь Бог наш. Мы же припеваем: Свят Господь Бог наш, и к коемуждо стиху. Стих 1: Яко свят Господь Бог наш. Стих 2: Над всеми людьми Бог наш. И поем светилен воскресен.

Слава, светилен святаго, аще имать. Аще ли ни, Слава, И ныне, богородичен:

На хвалитех, Всякое дыхание, на глас дне (псалмы 148-150).

Первый лик: Всякое дыхание да хвалит Господа. Хвалите Господа с небес, хвалите Его в вышних. Тебе подобает песнь Богу.

Вторый лик: Хвалите Его, вси Ангели Его, хвалите Его, вся силы Его. Тебе подобает песнь Богу.

1: Хвалите Его, солнце и луна, хвалите Его, вся звезды и свет.

2: Хвалите Его небеса небес и вода, яже превыше небес.

1: Да восхвалят имя Господне: яко Той рече, и быша, Той повеле, и создашася.

2: Постави я в век и в век века, повеление положи, и не мимо идет.

1: Хвалите Господа от земли, змиеве и вся бездны:

2: Огнь, град, снег, голоть, дух бурен, творящая слово Его,

1: Горы и вси холми, древа плодоносна и вси кедри,

2: Зверие и вси скоти, гади и птицы пернаты.

1: Царие земстии и вси людие, князи и вси судии земстии,

2: Юноши и девы, старцы с юнотами да восхвалят имя Господне, яко вознесеся имя Того Единаго,

1: Исповедание Его на земли и на небеси, и вознесет рог людей Своих.

2: Песнь всем преподобным Его, сыновом Исраилевым, людем, приближающимся Ему.

1: Воспойте Господеви песнь нову, хваление Его в церкви преподобных.

2: Да возвеселится Исраиль о сотворшем Его, и сынове Сиони возрадуются о Царе своем.

1: Да восхвалят имя Его в лице, в тимпане и псалтири да поют Ему.

2: Яко благоволит Господь в людех Своих, и вознесет кроткия во спасение.

1: Восхвалятся преподобнии во славе и возрадуются на ложах своих.

2: Возношения Божия в гортани их, и мечи обоюду остры в руках их:

1: Сотворити отмщение во языцех, обличения в людех,

2: Связати цари их путы, и славныя их ручными оковы железными,

Поставим же стихов 8, и поем стихиры Октоиха воскресны, 4, и восточны, 4:

На 8: Сотворити в них суд написан. Слава сия будет всем преподобным Его.

Хвалите Бога во святых Его, хвалите Его во утвержении силы Его.

На 6: Хвалите Его на силах Его, хвалите Его по множеству величествия Его.

Хвалите Его во гласе трубнем, хвалите Его во псалтири и гуслех.

На 4: Хвалите Его в тимпане и лице, хвалите Его во струнах и органе.

Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа. На сем же стисе сходятся оба лика вкупе.

Вoскресни, Гoспoди Бoже мoй, да вознесется рука Твoя, не забуди убогих Твoих до конца. Аще же праздник, поем припевы праздника, писаны в Минее на стиховне.

Испoвемся Тебе, Гoспoди, всем сердцем мoим, пoвем вся чудеса Твoя.

Слава, стихира евангельская. И ныне, богородичен, глас 2, подобен Егда от древа:

Преблагословенна еси, Богородице Дево, Воплощшим бо Ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом. Тем воспевающе вопием: благословен Христос Бог, благоволивый тако, слава Тебе.

Славословие великое

Слава Тебе, Показавшему нам свет.30

Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя, великия ради славы Твоея. Господи, Царю небесный. Боже Отче Вседержителю, Господи Сыне Единородный, Иисусе Христе, и Святый Душе. Господи Боже, Агнче Божий, Сыне Отечь, Вземляй грех мiра, помилуй нас, Вземляй грехи мiра, приими молитву нашу: Седяй одесную Отца, помилуй нас. Яко Ты еси Един Свят, Ты еси Един Господь, Иисус Христос, в славу Бога Отца, аминь.

На всяк день благословлю Тя, и восхвалю имя Твое во веки, и в век века.

Сподоби Господи в день сей без греха сохранитися нам. Благословен еси, Господи, Боже отец наших, и хвально, и прославлено имя Твое во веки, аминь. Буди, Господи, милость Твоя на нас, якоже уповахом на Тя.

Благословен еси, Господи, научи мя оправданием Твоим. Трижды.

Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущим Тя.

Святый Боже, Святый Крепкий, Святый Бессмертный, помилуй нас. Трижды. Слава, И ныне: Святый Бессмертный, помилуй нас. Таже вышшим гласом: Святый Боже, Святый Крепкий, Святый Бессмертный, помилуй нас.

Аще есть праздник, глаголем тропарь праздника. Аще же есть неделя перваго убо гласа, или 3, 5, 7, глаголем сей:

Днесь спасение мiру бысть, поем Воскресшему из гроба, и Начальнику жизни нашея: разрушив бо смертию смерть, победу даде нам, и велию милость.

Во глас же 2, 4, 6, 8 глаголем:

Воскрес из гроба, и узы растерзал еси ада, разрушил еси осуждение смерти Господи, вся от сетей врага Избавивый, Явивый же себе Апостолом Твоим, послал еси я на проповедь, и теми мир Твой подал еси вселенней, Едине Многомилостиве.

Вместо сугубыя ектении Господи помилуй, 40 pаз, Слава, И ныне: и аще восхощеши, чти молитву сию Великаго Василиа:

Боже вечный, безначальный и присносущный Свете, всякия твари Содетелю, милости источниче, благости пучино и человеколюбия неизследимая бездно: просвети на ны свет лица Твоего, Господи, возсияй в сердцах наших умное солнце правды, и Твоего веселия души наши исполни, и научи нас Твоим поучатися присно и вещати судьбам, и исповедатися Тебе выну, нашему Владыце и благодетелю. Рук наших дела к Твоей исправи воли, и деяти нам Тебе благоугодная и любезная благопоспеши, да и о нашем недостоинстве прославится Твое пресвятое имя, Отца и Сына и Святаго Духа, Единаго Божества же и Царства: Емуже подобает всякая слава, честь и поклонение, аминь.

И вместо пpосительныя ектении Господи помилуй, 12 pаз, Слава, И ныне. И от произволения иную молитву святителя Василиа:

Посылаяй свет и идет, возсияваяй солнце на праведныя и неправедныя, лукавыя же и благия: творяй утро и просвещаяй всю вселенную, просвети и наша сердца, Владыко всех: даруй нам в настоящий день благоугодити Тебе, сохраняй нас от всякаго греха, и всякаго лукаваго деяния, избавляяй нас от всякия стрелы летящия во дни и от всякия сопротивныя силы, молитвами Всепречистыя Владычицы нашея Богородицы, невещественных Твоих служителей и пренебесных Сил и всех святых, от века Тебе благоугодивших. Твое бо есть еже миловати и спасати ны Боже наш, и Тебе славу возсылаем, Отцу и Сыну и Святому Духу, ныне и присно, и во веки веков, аминь.

Таже поем:

Утвеpди, Боже, святую православную веру, православных христиан, во век века.

Честнейшую Херувим, и славнейшую без сравнения Серафим, без истления Бога Слова Рождшую, сущую Богородицу, Тя величаем. И поклон.

Слава: поклон, И ныне: поклон. Господи, помилуй, трижды. Господи, благослови. И поклон. И глаголет Старший отпуст:

Воскресый из мертвых, Господи Иисусе Христе, Боже наш, молитв ради Пречистыя Твоея Матере, святых славных и всехвальных Апостол, преподобных и богоносных отец наших и святаго егоже есть храм, и святаго имярек, егоже и память ныне совершаем, и всех святых, помилуй и спаси нас, яко Благ и Человеколюбец.

Мы же поем: Аминь, Господи помилуй, тpижды.

Таже творим исхождение в притвор, поюще стихиру самогласну, юже хощет екклисиарх. И чтем оглашение Студитово31. По чтении же тропарь св. Феодора, глас 8: Православия наставниче: (Ныне же чин сей весьма упразднися, мню же, яко за леность нашу и нерадение многое). И поем первый час в притворе, и отходим в келлии своя.

Час первый

Приидите, поклонимся: трижды. И псалмы:

Псалом 5: Глаголы моя внуши, Господи, разумей звание мое. Вонми гласу моления моего, Царю мой и Боже мой, яко к Тебе помолюся, Господи. Заутра услыши глас мой, заутра предстану Ти, и узриши мя. Яко Бог не хотяй беззакония Ты еси: не приселится к Тебе лукавнуяй, ниже пребудут беззаконницы пред очима Твоима: возненавидел еси вся делающия беззаконие. Погубиши вся глаголющия лжу: мужа кровей и льстива гнушается Господь. Аз же множеством милости Твоея вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их: языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающие на Тя, во век возрадуются, и вселишися в них, и похвалятся о Тебе любящие имя Твое. Яко Ты благословиши праведника, Господи, яко оружием благословения венчал еси нас.

Псалом 89: Господи, прибежище был еси нам в род и род. Прежде даже горам не быти и создатися земли и вселенней, и от века и до века Ты еси. Не отврати человека во смирение и рекл еси: обратитеся, сынове человечестии. Яко тысяща лет пред очима Твоима, Господи, яко день вчерашний, иже мимо иде, и стража нощная. Уничижения их лета будут: утро яко трава мимоидет, утро процветет и прейдет: на вечер отпадет, ожестеет и изсхнет. Яко исчезохом гневом Твоим, и яростию Твоею смутихомся. Положил еси беззакония наша пред Тобою, век наш в просвещение лица Твоего. Яко вси дние наша оскудеша, и гневом Твоим исчезохом: лета наша яко паучина поучахуся: дние лет наших, в нихже седмьдесят лет, аще же в силах, осмьдесят лет, и множае их труд и болезнь: яко прииде кротость на ны, и накажемся. Кто весть державу гнева Твоего, и от страха Твоего ярость Твою исчести? Десницу Твою тако скажи ми, и окованныя сердцем в мудрости. Обратися, Господи, доколе; и умолен буди на рабы Твоя. Исполнихомся заутра милости Твоея, Господи, и возрадовахомся, и возвеселихомся: во вся дни наша возвеселихомся, за дни, в няже смирил ны еси, лета, в няже видехом злая. И призри на рабы Твоя и на дела Твоя, и настави сыны их. И буди светлость Господа Бога нашего на нас, и дела рук наших исправи на нас, и дело рук наших исправи.

Псалом 100: Милость и суд воспою Тебе, Господи. Пою и разумею в пути непорочне, когда приидеши ко мне; прехождах в незлобии сердца моего посреде дому моего. Не предлагах пред очима моима вещь законопреступную: творящия преступления возненавидех. Не прильпе мне сердце строптиво, уклоняющагося от мене лукаваго не познах. Оклеветающаго тай искренняго своего, сего изгонях. Гордым оком и несытым сердцем, с сим не ядях. Очи мои на верныя земли, посаждати я со мною: ходяй по пути непорочну, сей ми служаше. Не живяше посреде дому моего творяй гордыню, глаголяй неправедная, не исправляше пред очима моима. Во утрия избивах вся грешныя земли, еже потребити от града Господня вся делающия беззакония.

Слава, И ныне: Аллилуиа, трижды. Поклоны 3. Господи, помилуй, трижды. Тропарь воскресен.

Слава, тропарь святаго.32 Аще не имать святый тропаря, глаголи зде воскресен тропарь.

И ныне, богородичен:

Что Тя наречем, о Благодатная; небо, яко воссияла еси Солнце правды: рай, яко прозябла еси Цвет нетления: Деву, яко пребыла еси нетленна: Чистую Матерь, яко имела еси на святых своих объятиях Сына, всех Бога. Того моли спастися душам нашим.

И стихи: Стопы моя направи по словеси Твоему, и да не обладает мною всякое беззаконие. Избави мя от клеветы человеческия, и сохраню заповеди Твоя. Лице Твое просвети на раба Твоего, и научи мя оправданием Твоим. Да исполнятся уста моя хваления Твоего, Господи, яко да воспою славу Твою, весь день великолепие Твое.

Трисвятое. По Отче наш: Молитва Иисусова, таже кондак воскресен, или святаго.33

Господи помилуй, 40. И молитву:

Иже на всякое время и на всякий час, на небеси и на земли покланяемый и славимый Христе Боже, долготерпеливе, многомилостиве, многоблагоутробне, Иже праведныя любяй, и грешныя милуяй, Иже вся зовый ко спасению обещания ради будущих благ; Сам, Господи, приими и наша в час сей молитвы, и исправи живот наш к заповедем Твоим; души наша освяти, телеса очисти, помышления исправи, мысли очисти, и избави нас от всякия скорби, зол и болезней; огради нас святыми Твоими Ангелы, да ополчением их соблюдаеми и наставляеми, достигнем в соединение веры, и в разум неприступныя Твоея славы, яко благословен еси во веки веков, аминь.

Господи помилуй, трижды. Слава, И ныне: Честнейшую Херувим: Старший: Молитвами святых отец наших, Господи, Иисусе Христе, Сыне Божий, помилуй нас. И чтец глаголет молитву:34

Христе, Свете Истинный, просвещаяй и освящаяй всякаго человека, грядущаго в мiр, да знаменается на нас свет лица Твоего, да в нем узрим Свет Неприступный: и исправи стопы наша к деланию заповедей Твоих, молитвами Пречистыя Твоея Матере, и всех Твоих святых, аминь.

Слава, И ныне: Господи помилуй, трижды. Господи, благослови. И совершенный отпуст.

Час третий

Стаpший: Молитвами святых отец наших: Чтец: Аминь. Слава Тебе, Боже наш, слава Тебе. Царю Небесный: Трисвятое по Отче наш: Старший глаголет молитву Иисусову. Господи, помилуй, 12 раз. Слава, И ныне: Приидите, поклонимся, трижды. И псалмы:

Псалом 16: Услыши, Господи, правду мою, вонми молению моему, внуши молитву мою не во устнах льстивых. От лица Твоего судьба моя изыдет, очи мои да видита правоты. Искусил еси сердце мое, посетил еси нощию, искусил мя еси и не обретеся во мне неправда. Яко да не возглаголют уста моя дел человеческих, за словеса устен Твоих аз сохраних пути жестоки. Соверши стопы моя во стезях Твоих, да не подвижутся стопы моя. Аз воззвах, яко услышал мя еси, Боже, приклони ухо Твое мне, и услыши глаголы моя. Удиви милости Твоя, спасаяй уповающия на Тя от противящихся деснице Твоей. Сохрани мя, Господи, яко зеницу ока, в крове крилу Твоею покрыеши мя. От лица нечестивых острастших мя, врази мои душу мою одержаша. Тук свой затвориша, уста их глаголаше гордыню. Изгонящии мя ныне обыдоша мя, очи свои возложиша уклонити на землю. Объяша мя яко лев готов на лов, и яко скимен обитаяй в тайных. Воскресни, Господи, предвари я и запни им, избави душу мою от нечестиваго, оружие Твое от враг руки Твоея. Господи, от малых от земли раздели я в животе их, и сокровенных Твоих исполнися чрево их, насытишася сынов, и оставиша останки младенцем своим. Аз же правдою явлюся лицу Твоему, насыщуся, внегда явити ми ся славе Твоей.

Псалом 24: К Тебе, Господи, воздвигох душу мою, Боже мой, на Тя уповах, да не постыжуся во век, ниже да посмеют ми ся врази мои; Ибо вси терпящии Тя не постыдятся. Да постыдятся беззаконнующии вотще. Пути Твоя, Господи, скажи ми, и стезям Твоим научи мя. Настави мя на истину Твою и научи мя, яко Ты еси Бог Спас мой, и Тебе терпех весь день. Помяни щедроты Твоя, Господи, и милости Твоя, яко от века суть. Грех юности моея и неведения моего не помяни, по милости Твоей помяни мя Ты ради благости Твоея, Господи. Благ и прав Господь, сего ради законоположит согрешающим на пути. Наставит кроткия на суд, научит кроткия путем Своим. Вси путие Господни милость и истина, взыскающым завета Его и свидения Его. Ради имене Твоего, Господи, и очисти грех мой, мног бо есть. Кто есть человек бояйся Господа; законоположит ему на пути, егоже изволи. Душа его во благих водворится, и семя его наследит землю. Держава Господь боящихся Его и завет Его явит им. Очи мои выну ко Господу, яко Той исторгнет от сети нозе мои. Призри на мя и помилуй мя, яко единород и нищ есмь аз. Скорби сердца моего умножишася, от нужд моих изведи мя. Виждь смирение мое и труд мой, и остави вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою и избави мя, да не постыжуся, яко уповах на Тя. Незлобивии и правии прилепляхуся мне, яко потерпех Тя, Господи. Избави, Боже, Исраиля от всех скорбей его.

Псалом 50: Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавая пред Тобою сотворих; яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы.

Слава, И ныне: Аллилуиа, трижды. Поклоны 3. Господи, помилуй, трижды. Тропарь воскресен. Слава, тропарь святаго. И ныне, богородичен:

Богородице, Ты еси Лоза истинная, возрастившая нам Плод Живота, Тебе молимся, молися Владычице, со святыми Апостолы, помиловати души наша.

Господь Бог благословен, благословен Господь день дне, поспешит нам Бог спасений наших, Бог наш, Бог спасати.

Трисвятое по Отче наш: молитва Иисусова и кондак воскресен. Господи помилуй, 40. Иже на всякое время: Господи помилуй, трижды. Слава, И ныне: Честнейшую Херувим: Старший: Молитвами святых отец наших: И чтец глаголет молитву святаго Мардариа:

Владыко Боже Отче Вседержителю, Господи Сыне Единородный Иисусе Христе, и Святый Душе, Едино Божество, Едина Сила, помилуй мя грешнаго, и имиже веси судьбами спаси мя недостойнаго раба Твоего, яко благословен еси во веки веков, аминь.

Час шестый

Приидите, поклонимся: трижды. И псалмы:

Псалом 53: Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя и крепцыи взыскаша душу мою, и не предложиша Бога пред собою. Се бо Бог помогает ми, и Господь заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо; Яко от всякия печали избавил мя еси, и на враги моя воззре око мое.

Псалом 54: Внуши, Боже, молитву мою и не презри моления моего. Вонми ми и услыши мя: возскорбех печалию моею и смятохся. От гласа вражия и от стужения грешнича, яко уклониша на мя беззаконие и во гневе враждоваху ми. Сердце мое смятеся во мне и боязнь смерти нападе на мя. Страх и трепет прииде на мя и покры мя тьма. И рех: кто даст ми криле, яко голубине, и полещу, и почию; Се удалихся бегая и водворихся в пустыни. Чаях Бога спасающаго мя от малодушия и от бури. Потопи Господи, и раздели языки их: яко видех беззаконие и пререкание во граде. Днем и нощию обыдет и по стенам его: беззаконие и труд посреде его и неправда. И не оскуде от стогн его лихва и лесть. Яко аще бы враг поносил ми, претерпел бых убо, и аще бы ненавидяй мя на мя велеречевал, укрыл бых ся от него. Ты же человече равнодушне, владыко мой и знаемый мой; Иже купно наслаждался еси со мною брашен, в дому Божии ходихом единомышлением. Да приидет же смерть на ня, и да снидут во ад живи, яко лукавство в жилищах их, посреде их. Аз к Богу воззвах, и Господь услыша мя. Вечер и заутра, и полудне повем, и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит я, Сый прежде век. Несть бо им изменения, яко не убояшася Бога. Простре руку свою на воздаяние, оскверниша завет Его. Разделишася от гнева лица Его, и приближишася сердца их, умякнуша словеса их паче елеа, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же, Боже, низведеши их во студенец истления, мужие кровей и льсти не преполовят дней своих. Аз же, Господи, уповаю на Тя.

Псалом 90: Живый в помощи Вышняго, в крове Бога Небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна; Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни; От вещи во тме преходяшия, от сряща и беса полуденнаго. Падет от страны твоея тысяща, и тма одесную тебе, к тебе же не приближится; Обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему; Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою; На аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его; Долготою дней исполню его, и явлю ему спасение Мое.

Слава, И ныне: Аллилуиа, трижды. Поклоны 3. Господи, помилуй, трижды. Тропарь воскресен. Слава, тропарь святаго. И ныне, богородичен:

Яко не имамы дерзновения за премногия грехи наша, Ты Иже от Тебе Рождшагося моли, Богородице Дево: много бо может моление Матернее ко благосердию Владыки: не презри грешных мольбы, Всечистая, яко милостив есть и спасти могий, Иже и страдати о нас изволивый.

Скоро да предварят ны щедроты Твоя, Господи, яко обнищахом зело: помози нам, Боже Спасе наш, славы ради имене Твоего; Господи, избави нас, и очисти грехи наша, имене ради Твоего.

Трисвятое. По Отче наш: кондак воскресен, или святаго. Господи помилуй, 40. Иже на всякое время: Господи помилуй, трижды. Слава, И ныне: Честнейшую Херувим: Старший: Молитвами святых отец наших: И молитву великаго Василиа:

Боже и Господи сил, и всея твари Содетелю, Иже за милосердие безприкладныя милости Твоея, Единороднаго Сына Твоего, Господа нашего Иисуса Христа, низпославый на спасение рода нашего, и честным Его Крестом рукописание грех наших растерзавый, и победивый тем начала и власти тьмы: Сам, Владыко Человеколюбче, приими и нас, грешных, благодарственныя сия и молебныя молитвы, и избави нас от всякаго всегубительнаго и мрачнаго прегрешения, и всех озлобити нас ищущих, видимых и невидимых враг; пригвозди страху Твоему плоти наша, и не уклони сердец наших во словеса или помышления лукавствия, но любовию Твоею уязви души наша: да к Тебе всегда взирающе, и еже от Тебе светом наставляеми, Тебе неприступнаго и присносущнаго зряще Света, непрестанное Тебе исповедание и благодарение возсылаем, Безначальному Отцу, со Единородным Твоим Сыном, и Всесвятым, и Благим, и Животворящим Твоим Духом, ныне и присно и во веки веков, аминь.

Аще 9 час пелся пред вечернею, или не изволяеши пети 9 час, изобразительныя глаголи зде. Аще же ни, глаголи я по девятом часе.

Час девятый

Приидите, поклонимся: трижды. И псалмы:

Псалом 83: Коль возлюбленна селения Твоя, Господи сил! Желает и скончавается душа моя во дворы Господни, сердце мое и плоть моя возрадовастася о Бозе Живе. Ибо птица обрете себе храмину, и горлица гнездо себе, идеже положит птенцы своя; олтари Твоя, Господи сил, Царю мой и Боже мой. Блажени живущии в дому Твоем, в веки веков восхвалят Тя. Блажен муж, емуже есть заступление его у Тебе; восхождения в сердце своем положи; Во юдоль плачевную, в место, еже положи, ибо благословение даст Законополагаяй. Пойдут от силы в силу: явится Бог богов в Сионе. Господи Боже сил, услыши молитву мою, внуши, Боже Иаковль. Защитниче наш, виждь, Боже, и призри на лице христа Твоего. Яко лучше день един во дворех Твоих паче тысящ: изволих приметатися в дому Бога моего паче, неже жити ми в селениих грешничих. Яко милость и истину любит Господь Бог, благодать и славу даст; Господь не лишит благих ходящих незлобием. Господи Боже сил, блажен человек уповаяй на Тя.

Псалом 84: Благоволил еси, Господи, землю Твою, возвратил еси плен Иаковль: оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны, или простреши гнев Твой от рода в род; Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающия сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсия, и правда с небесе приниче; Ибо Господь даст благость, и земля наша даст плод свой. Правда пред Ним предыдет, и положит в путь стопы своя.

Псалом 85: Приклони, Господи, ухо Твое, и услыши мя, яко нищ и убог есмь аз. Сохрани душу мою, яко преподобен есмь: спаси раба Твоего, Боже мой, уповающего на Тя. Помилуй мя, Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты, Господи, благ и кроток и многомилостив всем призывающим Тя. Внуши, Господи, молитву мою, и вонми гласу моления моего. В день скорби моея воззвах к Тебе, яко услышал мя еси. Несть подобен Тебе в бозех, Господи, и несть по делом Твоим. Вси языцы, елики сотворил еси, приидут, и поклонятся пред Тобою, Господи, и прославят Имя Твое; Яко велий еси Ты и творяй чудеса, Ты еси Бог Един. Настави мя, Господи, на путь Твой, и пойду во истине Твоей; да возвеселится сердце мое боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век: Яко милость Твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскаша душу мою, и не предложиша Тебе пред собою. И Ты, Господи Боже мой, щедрый и милостивый, долготерпеливый и многомилостивый и истинный; Призри на мя и помилуй мя, даждь державу Твою отроку Твоему, и спаси сына рабы Твоея. Сотвори со мною знамение во благо, и да видят ненавидящии мя и постыдятся, яко Ты, Господи, помогл ми и утешил мя еси. И паки: Сотвори со мною знамение во благо, и да видят ненавидящии мя и постыдятся, яко Ты, Господи, помогл ми и утешил мя еси.

Слава, И ныне: Аллилуиа, трижды. Поклоны 3. Господи, помилуй, трижды. Тропарь воскресен. Слава, тропарь святаго. И ныне, богородичен:

Иже нас ради Рождейся от Девы, и распятие претерпев, Благий, Испровергий смертию смерть, и воскресение Явлей, яко Бог, не презри, яже создал еси рукою Твоею, яви человеколюбие Твое, Милостиве, приими Рождшую Тя Богородицу, молящуюся за ны, и спаси, Спасе наш, люди отчаянныя.

Не предаждь нас до конца, имене Твоего ради, и не разори завета Твоего, и не отстави милости Твоея от нас, Авраама ради возлюбленнаго от Тебе, и за Исаака, раба Твоего, и Исраиля святаго Твоего.

Трисвятое. По Отче наш: кондак воскресен. Господи помилуй, 40. Иже на всякое время: Господи помилуй, трижды. Слава, И ныне: Честнейшую Херувим: Старший: Молитвами святых отец наших: И молитва святаго Василиа Великаго:

Владыко Господи Иисусе Христе Боже наш, долготерпевый о наших согрешениих, и даже до нынешняго часа приведый нас, воньже на животворящем древе вися, благоразумному разбойнику иже в рай путесотворил еси вход, и смертию смерть разрушил еси, очисти нас грешных и недостойных раб Твоих. Согрешихом бо и беззаконновахом, и несмы достойни возвести очеса наша и воззрети на высоту небесную, зане оставихом путь правды Твоея, и ходихом в волях сердец наших. Но молим Твою безмерную благость, пощади нас, Господи, по множеству милости Твоея, и спаси нас имене Твоего ради святаго, яко исчезоша в суете дние наша, изми нас из руки сопротивнаго, и остави нам грехи наша, и умертви плотское наше мудрование, да ветхаго отложивше человека, в новаго облецемся: и Тебе поживем, нашему Владыце и Благодетелю, и тако Твоим последующе повелением, в вечный покой достигнем, идеже есть всех веселящихся жилище, Ты бо еси воистинну истинное веселие и радость любящих Тя, Христе Боже наш, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков, аминь.

Отпуста же часа не глаголем, но абие изобразительны.

Последование изобразительных

Начало изобразительных глаголи сице:

Благослови, душе моя, Господа: благословен еси, Господи.

Псалом 102. Благослови душе моя Господа, и вся внутренняя моя имя святое Его. Благослови душе моя Господа, и не забывай всех воздаяний Его; Очищающаго вся беззакония твоя, исцеляющаго вся недуги твоя; Избавляющаго от истления живот твой, венчающаго тя милостию и щедротами; Исполняющаго во благих желание твое: обновится яко орля юность твоя. Творяй милостыни Господь, и судьбу всем обидимым. Сказа пути Своя Моисеови, сыновом Исраилевым хотения Своя; Щедр и милостив Господь, долготерпелив и многомилостив. Не до конца прогневается, ниже во век враждует; Не по беззаконием нашим сотворил есть нам, ниже по грехом нашым воздал есть нам. Яко по высоте небесней от земли, утвердил есть Господь милость Свою на боявшихся Его. Елико отстоят востоцы от запад, удалил есть от нас беззакония наша. Якоже щедрит отец сыны, ущедри Господь боящихся Его. Яко Той позна создание наше, помяну, яко персть есмы. Человек, яко трава дние его, яко цвет сельный, тако оцветет; Яко дух пройде в нем, и не будет, и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его творити я. Господь на небеси уготова Престол Свой, и Царство Его всеми обладает. Благословите Господа вси Ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его.

Слава: И ныне: Паки первый лик: Благослови, душе моя, Господа, и вся внутренняя моя имя святое Его. Благословен еси, Господи.

Слава Отцу и Сыну и Святому Духу.

Псалом 145: Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в нихже несть спасения. Изыдет дух его и возвратится в землю свою: в той день погибнут вся помышления его. Блажен, ему же Бог Иаковль помощник его, упование его на Господа Бога своего; Сотворшаго небо и землю, море и вся, яже в них; Хранящаго истину в век, творящаго суд обидимым, дающаго пищу алчущим. Господь решит окованныя. Господь умудряет слепцы. Господь возводит низверженныя, Господь любит праведники. Господь хранит пришельцы, сира и вдову приимет и путь грешных погубит. Воцарится Господь во век, Бог твой, Сионе, в род и род.

И ныне и присно и во веки веков. Аминь.

Единородный Сыне, и Слове Божий, безсмертен Сый. И изволивый спасения нашего ради воплотитися от Святыя Богородицы и Приснодевы Марии, непреложно Вочеловечивыйся. Распныйся же, Христе Боже, смертию смерть поправый. Един Сый Святыя Троицы, спрославляемый Отцу и Святому Духу, спаси нас.

Во Царствии Твоем, помяни нас, Господи, егда приидеши во Царствии Твоем.

Блажени нищии духом, яко тех есть Царство Небесное.

Блажени плачущии, яко тии утешатся.

На 10: Блажени кротцыи, яко тии наследят землю.

Блажени алчущии и жаждущии правды, яко тии насытятся.

На 8: Блажени милостивии, яко тии помиловани будут.

Блажени чистии сердцем, яко тии Бога узрят.

На 6: Блажени миротворцы, яко тии сынове Божии нарекутся.

Блажени изгнани правды ради, яко тех есть Царство Небесное.

На 4: Блажени есте, егда поносят вам, и изженут, и рекут всяк зол глагол на вы, лжуще Мене ради.

Радуйтеся и веселитеся, яко мзда ваша многа на небесех.

Слава, троичен; И ныне, богородичен:

Нецыи зде поют Трисвятое, якоже и на Литургии, иные же оставляют сие. Таже возгласит канонаpх или чтец пpокимен воскpесен или пpаздника. Таже чтет Апостол, ряд, якоже Устав изъявляет.35 Аще же имать святый чтение, и святаго.36

И возгласит чтец: Аллилуиа, глас..., лик же поет Аллилуиа, трижды; чтец же глаголет стихи.

Таже, Господи помилуй, тpижды. Стаpший: От ... Святаго Евангелия чтение, мы же поем: Слава Тебе, Господи, и поклон един. И чтет Старший Евангелие, ряд. И поем: Слава Тебе, Господи. И поклон. Таже поем с поклоны:

Помяни нас, Господи, егда приидеши во Царствии Твоем.

Помяни нас, Владыко, егда приидеши во Царствии Твоем.

Помяни нас, Святый, егда приидеши во Царствии Твоем.

Лик небесный поет Тя и глаголет: Свят, Свят, Свят Господь Саваоф, исполнь небо и земля славы Твоея. Стих: Приступите к Нему и просветитеся, и лица ваша не постыдятся. И паки: Лик небесный:

Слава: Лик святых Ангел и Архангел со всеми небесными силами поет Тя и глаголет: Свят, Свят, Свят Господь Саваоф, исполнь небо и земля славы Твоея.

И ныне: Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца Рожденнаго прежде всех век; Света от Света, Бога Истинна от Бога Истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша и погребенна. И воскресшаго в третий день по Писанием, и возшедшаго на небеса и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, Глаголавшего пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

Ослаби, остави, прости Боже, прегрешения наша, вольная, и невольная, яже в слове и в деле, яже в ведении и не в ведении, яже во дни и в нощи, яже во уме и помышлении, вся нам прости, яко Благ и Человеколюбец.

Отче наш: Старший: Господи, Иисусе Христе, Сыне Божий, помилуй нас. Мы же: Аминь. И кондак воскресен, и храма. Аще же прилучится и святаго, глаголется первее святаго; Слава, И ныне, воскресен. Господи, помилуй, 12. И молитву:

Всесвятая Троице, Единосущная Державо, Нераздельное Царство, всех благих Вина, благоволи же и о мне грешнем, утверди, вразуми сердце мое, и всю мою отыми скверну, просвети мою мысль, да выну славлю, пою, покланяюся и глаголю: Един Свят, Един Господь, Иисус Христос, во славу Бога Отца, аминь.

Буди Имя Господне благословено отныне и до века, трижды, с поклоны. Слава, И ныне:

Псалом 33: Благословлю Господа на всякое время, выну хвала Его во устех моих. О Господе похвалится душа моя, да услышат кротцыи и возвеселятся. Возвеличите Господа со мною, и вознесем имя Его вкупе. Взысках Господа и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится Ангел Господень окрест боящихся Его, и избавит их. Вкусите и видите, яко благ Господь; блажен муж, иже уповает нань. Бойтеся Господа, вси святии Его, яко несть лишения боящымся Его. Богатии обнищаша и взалкаша, взыскающии же Господа не лишатся всякаго блага. Приидите, чада, послушайте мене, страху Господню научу вас. Кто есть человек хотяй живот, любяй дни видети благи; Удержи язык твой от зла, и устне твои, еже не глаголати льсти. Уклонися от зла и сотвори благо, взыщи мира, и пожени и. Очи Господни на праведныя, и уши Его в молитву их. Лице же Господне на творящия злая, еже потребити от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их, ни едина от них сокрушится. Смерть грешников люта, и ненавидящии праведнаго прегрешат. Избавит Господь души раб Своих, и не прегрешат вси уповающии на Него.

Достойно есть:37 Слава, И ныне: и бывает отпуст.

---

Примечания к мiрянскому чину: