Прииди́те, поклони́мся и припаде́м Христу́ Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же (Трижды).

Во время чтения 103 псалма священник тайно перед царскими вратами с непокрытой головой читает светильничные молитвы.

Кафизма 19

Во время чтения первого антифона раскрывается антиминс, переносится на престол дискос и совершается поклонение; св. Агнец перекладывается на дискос и снова совершается поклонение.

Первая статия 19 кафисмы

Псалом 134

Хвали́те и́мя Госпо́дне, хвали́те, раби́ Го́спода, стоя́щии во хра́ме Госпо́дни, во дво́рех до́му Бо́га на́шего. Хвали́те Го́спода, я́ко благ Госпо́дь, по́йте и́мени Его́, я́ко добро́: я́ко Иа́кова избра́ Себе́ Госпо́дь, Изра́иля в достоя́ние Себе́. Я́ко аз позна́х, я́ко ве́лий Госпо́дь, и Госпо́дь наш над все́ми бо́ги. Вся ели́ка восхоте́ Госпо́дь, сотвори́ на небеси́ и на земли́, в моря́х и во всех бе́зднах. Возводя́ о́блаки от после́дних земли́, мо́лнии в дождь сотвори́, изводя́й ве́тры от сокро́вищ Свои́х. И́же порази́ пе́рвенцы Еги́петския, от челове́ка до скота́. Посла́ зна́мения и чудеса́ посреде́ Тебе́, Еги́пте, на фарао́на и на вся рабы́ eго́. И́же порази́ язы́ки мно́ги и изби́ цари́ кре́пки: Сио́на, царя́ Аморре́йска, и Ога, царя́ Васа́нска, и вся ца́рствия Ханаа́нска, и даде́ зе́млю их достоя́ние, достоя́ние Изра́илю, лю́дем Свои́м. Го́споди, и́мя Твое́ в век и па́мять Твоя́ в род и род: я́ко суди́ти и́мать Госпо́дь лю́дем Свои́м, и о рабе́х Свои́х умо́лится. И́доли язы́к, сребро́ и зла́то, дела́ рук челове́ческих. Уста́ и́мут, и не возлаго́лют, о́чи и́мут, и не у́зрят, у́ши и́мут, и не услы́шат, ниже́ бо есть дух во усте́х их. Подо́бни им да бу́дут творя́щии я́, и вси наде́ющиися на ня. До́ме Изра́илев, благослови́те Го́спода, до́ме Ааро́нь, благослови́те Го́спода, до́ме Леви́ин, благослови́те Го́спода. Боя́щиися Го́спода, благослови́те Го́спода. Благослове́н Госпо́дь от Сио́на, живы́й во Иерусали́ме.

Псалом 135

Испове́дайтеся Го́сподеви, я́ко благ, я́ко в век ми́лость Его́. Испове́дайтеся Бо́гу бого́в, я́ко в век ми́лость Его́. Испове́дайтеся Го́сподеви господе́й, я́ко в век ми́лость Его́. Сотво́ршему чудеса́ ве́лия еди́ному, я́ко в век ми́лость Его́. Сотво́ршему небеса́ ра́зумом, я́ко в век ми́лость Его́. Утверди́вшему зе́млю на вода́х, я́ко в век ми́лость Его́. Сотво́ршему свети́ла ве́лия еди́ному, я́ко в век ми́лость Его́. Со́лнце во о́бласть дне, я́ко в век ми́лость Его́. Луну́ и зве́зды во о́бласть но́щи, я́ко в век ми́лость Его́. Порази́вшему Еги́пта с пе́рвенцы eго́, я́ко в век ми́лость Его́, и изве́дшему Изра́иля от среды́ их, я́ко в век ми́лость Его́. Руко́ю кре́пкою и мы́шцею высо́кою, я́ко в век ми́лость Его́. Разде́льшему Чермно́е мо́ре в разделе́ния, я́ко в век ми́лость Его́. И прове́дшему Изра́иля посреде́ eго́, я́ко в век ми́лость Его́. И истря́сшему фарао́на и си́лу eго́ в мо́ре Чермно́е, я́ко в век ми́лость Его́. Прове́дшему лю́ди Своя́ в пусты́ни, я́ко в век ми́лость Его́. Порази́вшему цари́ ве́лия, я́ко в век ми́лость Его́, и уби́вшему цари́ кре́пкия, я́ко в век ми́лость Его́: Сио́на, царя́ Аморре́йска, я́ко в век ми́лость Его́, и Ога, царя́ Васа́нска, я́ко в век ми́лость Его́. И да́вшему зе́млю их достоя́ние, я́ко в век ми́лость Его́. Достоя́ние Изра́илю, рабу́ Своему́, я́ко в век ми́лость Его́. Я́ко во смире́нии на́шем помяну́ ны Госпо́дь, я́ко в век ми́лость Его́. И изба́вил ны есть от враго́в на́ших, я́ко в век ми́лость Его́. Дая́й пи́щу вся́кой пло́ти, я́ко в век ми́лость Его́. Испове́дайтеся Бо́гу небе́сному, я́ко в век ми́лость Его́.

Псалом 136

На река́х Вавило́нских, та́мо седо́хом и пла́кахом, внегда́ помяну́ти нам Сио́на. На ве́рбиих посреде́ eго́ обе́сихом орга́ны на́ша. Я́ко та́мо вопроси́ша ны пле́ншии нас о словесе́х пе́сней и ве́дшии нас о пе́нии: воспо́йте нам от пе́сней Сио́нских. Ка́ко воспое́м песнь Госпо́дню на земли́ чужде́й? А́ще забу́ду тебе́, Иерусали́ме, забве́на бу́ди десни́ца моя́. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Помяни́, Го́споди, сы́ны Едо́мския, в день Иерусали́мль глаго́лющыя: истоща́йте, истоща́йте до основа́ний eго́. Дщи Вавило́ня окая́нная, блаже́н и́же возда́ст тебе́ воздая́ние твое́, е́же воздала́ еси́ нам. Блаже́н и́же име́т и разбие́т младе́нцы твоя́ о ка́мень.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглашение: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Во время чтения второго антифона совершается поклонение, каждение со свечой вокруг престола и снова поклонение.

Вторая статия 19 кафисмы

Псалом 137

Испове́мся Тебе́, Го́споди, всем се́рдцем мои́м, и пред А́нгелы воспою́ Тебе́, я́ко услы́шал еси́ вся глаго́лы уст мои́х. Поклоню́ся ко хра́му свято́му Твоему́ и испове́мся и́мени Твоему́ о ми́лости Твое́й и и́стине Твое́й, я́ко возвели́чил еси́ над всем и́мя Твое́ свято́е. Во́ньже а́ще день призову́ Тя, ско́ро услы́ши мя: умно́жиши мя в души́ мое́й си́лою Твое́ю. Да испове́дятся Тебе́, Го́споди, вси ца́рие зе́мстии, я́ко услы́шаша вся глаго́лы уст Твои́х, и да воспою́т в путе́х Госпо́дних, я́ко ве́лия сла́ва Госпо́дня, я́ко высо́к Госпо́дь, и смире́нныя призира́ет, и высо́кая издале́ча весть. А́ще пойду́ посреде́ ско́рби, живи́ши мя, на гнев враг мои́х просте́рл еси́ руку́ Твою́, и спасе́ мя десни́ца Твоя́. Госпо́дь возда́ст за мя. Го́споди, ми́лость Твоя́ во век, дел руку́ Твое́ю не пре́зри.

Псалом 138

Го́споди, искуси́л мя еси́ и позна́л мя еси́. Ты позна́л еси́ седа́ние мое́ и воста́ние мое́. Ты разуме́л еси́ помышле́ния моя́ издале́ча: стезю́ мою́ и у́же мое́ Ты еси́ изсле́довал, и вся пути́ моя́ прови́дел еси́. Я́ко несть льсти в язы́це мое́м: се, Го́споди, Ты позна́л еси́. Вся после́дняя и дре́вняя: Ты созда́л еси́ мя, и положи́л еси́ на мне ру́ку Твою́. Удиви́ся ра́зум Твой от мене́, утверди́ся, не возмогу́ к нему́. Ка́мо пойду́ от Ду́ха Твоего́? И от лица́ Твоего́ ка́мо бежу́? А́ще взы́ду на не́бо – Ты та́мо еси́, а́ще сни́ду во ад – та́мо еси́. А́ще возму́ криле́ мои́ ра́но и вселю́ся в после́дних мо́ря – и та́мо бо рука́ Твоя́ наста́вит мя и удержи́т мя десни́ца Твоя́. И рех: еда́ тма попере́т мя, и нощь просвеще́ние в сла́дости мое́й? Я́ко тма не помрачи́тся от Тебе́, и нощь, я́ко день, просвети́тся, я́ко тма ея́, та́ко и свет ея́. Я́ко Ты созда́л еси́ утро́бы моя́, восприя́л мя еси́ из чре́ва ма́тере моея́. Испове́мся Тебе́, я́ко стра́шно удиви́лся еси́: чу́дна дела́ Твоя́, и душа́ моя́ зна́ет зело́. Не утаи́ся кость моя́ от Тебе́, ю́же сотвори́л еси́ в та́йне, и соста́в мой в преиспо́дних земли́. Несоде́ланное мое́ ви́десте о́чи Твои́, и в кни́зе Твое́й вси напи́шутся, во днех сози́ждутся и никто́же в них. Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их. Изочту́ их, и па́че песка́ умно́жатся; воста́х, и еще́ есмь с Тобо́ю. А́ще избие́ши гре́шники, Бо́же, му́жие крове́й, уклони́теся от мене́. Я́ко ревни́ви есте́ в помышле́ниих, прии́мут в суету́ гра́ды Твоя́. Не ненави́дящыя ли Тя, Го́споди, возненави́дех, и о вразе́х Твои́х иста́ях? Соверше́нною не́навистию возненави́дех я́, во враги́ бы́ша ми. Искуси́ мя, Бо́же, и уве́ждь се́рдце мое́, истяжи́ мя и разуме́й стези́ моя́, и виждь, а́ще путь беззако́ния во мне, и наста́ви мя на путь ве́чен.

Псалом 139

Изми́ мя, Го́споди, от челове́ка лука́ва, от му́жа непра́ведна изба́ви мя, и́же помы́слиша непра́вду в се́рдце, весь день ополча́ху бра́ни, изостри́ша язы́к свой, я́ко змии́н, яд а́спидов под устна́ми их. Сохрани́ мя, Го́споди, из руки́ гре́шничи, от челове́к непра́ведных изми́ мя, и́же помы́слиша запя́ти стопы́ моя́. Скры́ша го́рдии сеть мне, и у́жы препя́ша сеть нога́ма мои́ма. При стези́ собла́зны положи́ша ми. Рех Го́сподеви: Бог мой еси́ Ты, внуши́, Го́споди, глас моле́ния моего́. Го́споди, Го́споди, си́ло спасе́ния моего́, осени́л еси́ над главо́ю мое́ю в день бра́ни. Не преда́ждь мене́, Го́споди, от жела́ния моего́ гре́шнику: помы́слиша на мя, не оста́ви мене́, да не когда́ вознесу́тся. Глава́ окруже́ния их, труд усте́н их покры́ет я́. Паду́т на них у́глия о́гненная, низложи́ши я́ в страсте́х, и не постоя́т. Муж язы́чен не испра́вится на земли́: му́жа непра́ведна зла́я уловя́т во истле́ние. Позна́х, я́ко сотвори́т Госпо́дь суд ни́щым и месть убо́гим. Оба́че пра́веднии испове́дятся и́мени Твоему́, и вселя́тся пра́вии с лице́м Твои́м.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглашение: Я́ко благ и Человеколю́бец Бог еси́, и Тебе́ сла́ву возсылае́м, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Лик: Ами́нь.

Во время чтения третьего антифона совершается три поклона, св. Агнец переносится на жертвенник, – народ в это время простирается ниц; в чашу вливаются вино и вода, св. Дары покрываются, совершается каждение, перед св. Дарами ставится свеча и снова совершается поклонение.

Третья статия 19 кафисмы

Псалом 140

Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззва́ти ми к Тебе́. Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Положи́, Го́споди, хране́ние усто́м мои́м, и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́, я́ко еще́ и моли́тва моя́ во благоволе́ниих их. Поже́рты бы́ша при ка́мени судии́ их: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти их при а́де. Я́ко к Тебе́, Го́споди, Го́споди, о́чи мои́: на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́.

Псалом 141

Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от мене́ ду́ху моему́: и Ты позна́л еси́ стези́ моя́: на пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́: поги́бе бе́гство от мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя от гоня́щих мя, я́ко укрепи́шася па́че мене́. Изведи́ из темни́цы ду́шу мою́, испове́датися и́мени Твоему́. Мене́ ждут пра́ведницы, до́ндеже возда́си мне.

Псалом 142

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглашение: Я́ко Ты еси́ Бог наш, Бог ми́ловати и спаса́ти, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веков.

Лик: Ами́нь.

На 10, стихиры: Изведи́ из темни́цы ду́шу мою́, / испове́датися и́мени Твоему́.

Сти́х: Мене́ ждут пра́ведницы / до́ндеже возда́си Мне.

На 8, cти́х: Из глубины́ воззва́х к Тебе́ Го́споди, / Го́споди, услы́ши глас мой.

Сти́х: Да бу́дут у́ши Твои́ / вне́млюще гла́су моле́ния моего́.

На 6, cти́х: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Среда 5-й седмицы Великого поста на 3 Глас 8: Бра́шно любо́вь творя́ще, воздержа́нием стра́сти удержи́м ве́рнии, и Бо́гу на́с ра́ди возне́сшемуся на Кресте́, и копие́м пробо́дшемуся в ре́бра, пожи́ти благоуго́дно веде́мся, да пи́щи наслади́мся ве́чныя и лу́чшия, сла́вяще Спа́са ду́ш на́ших.

Сти́х: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Глас 8: Дре́вом дре́вле сме́рть обрето́хом, ны́не же па́ки жи́знь Дре́вом кре́стным: страсте́й у́бо стремле́ния умертви́м ве́рнии, и дости́гнути спаси́тельное Воскресе́ние все́х Благоде́теля мо́лим, дея́ньми боже́ственными сия́юще, и доброде́тельми украша́еми, сла́вяще Спа́са ду́ш на́ших.

На 4, cти́х: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Глас 2: Живоно́сный Тво́й Кре́ст похваля́ем Го́споди, и на́с ра́ди свяще́нная пло́ти Твоея́ страда́ния: копие́ же, заколе́ния, посмея́ния, оплева́ния, бие́ния и зауше́ния с багряни́цею, и вене́ц терноплете́нный, и́миже от кля́твы вся́ изба́вив спа́сл еси́ ны́. Те́мже мо́лим Тя́, посто́в вре́мя ми́рно сконча́ти пода́ждь на́м.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

прп. Ио́сифа Песнописца на 3 Глас 2: Взял еси́ на ра́мена крест,/ и распя́лся еси́ ми́ру,/ и после́довал еси́ стопа́м Созда́вшаго от небытия́ вся,/ Бо́жию Сло́ву, я́коже рече́,/ любо́вь же жите́йскую/ и вся́ко пристра́стие оттря́с;/ отону́дуже и доброде́тельми просия́в,/ де́тельми же Боже́ственными/ насле́дие ве́чное, о́тче, восприя́л еси́.

На 2, cти́х: Хвали́те Го́спода вси́ язы́цы, похвали́те Его́ вси́ лю́дие.

Глас 2: Труба́ яви́лся еси́ та́инственная,/ к духо́вному пе́нию вся воздви́жущи,/ цевни́ца же Богодви́жима,/ Боже́ственныя полки́ восхваля́ющи,/ сла́вящи вся святы́я/ и сих побе́ды пропове́дающи./ Ты бо от исто́чник спаси́тельных/ бе́здну поче́рпл еси́ слове́с,/ Бо́жий дом напоя́ющу.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Глас 2: Яви́лся еси́ сокро́вище доброде́телей,/ вся, я́же в житии́ Бо́гу благоугоди́вшия,/ любо́вию распала́емь, взыска́л еси́,/ поя́ свяще́нными пе́сньми,/ и сих ве́рою Боже́ственным исправле́нием подо́бяся;/ и́мже прича́стник быв Боже́ственным о́бразом,/ показа́лся еси́ и наслажде́ния соприча́стник.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Крестобогородичен, глас 2: У Креста́ предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаго́лаше, пла́чущи, Ма́ти Чи́стая:/ увы́ Мне, Ча́до сладча́йшее,/ что сия́ стра́ждеши непра́ведно, Сло́ве Бо́жий,/ да спасе́ши челове́чество?

Чтение Святого Писания

Вторник пятой седмицы Великого поста. Вечерня.

Диакон: Во́нмем.

Чтец: Проки́мен, глас 4

Го́споди, прибе́жище был еси́ нам / в род и род.

Лик: Го́споди, прибе́жище был еси́ нам / в род и род.

Чтец: Стих: Пре́жде да́же гора́м не бы́ти, и созда́тися земли́ и вселе́нней, и от ве́ка и до ве́ка Ты еси́.

Лик: Го́споди, прибе́жище был еси́ нам / в род и род.

Чтец: Го́споди, прибе́жище был еси́ нам

Лик: в род и род.

Диакон: Прему́дрость.

Чтец: Бытия́ чте́ние.

Диакон: Во́нмем.

Чтец: Бысть сло́во Госпо́дне ко Авра́му в виде́нии но́щию, глаго́ля: не бо́йся Авра́ме, Аз защища́ю тя, мзда твоя́ мно́га бу́дет зело́. Глаго́ла же Авра́м: Влады́ко Го́споди, что ми да́си? Аз же отпуща́юся безча́ден, сын же масе́к домоча́дицы моея́, сей Дама́ск Елие́зер. И рече́ Авра́м: поне́же мне не дал еси́ се́мене, домоча́дец же мой насле́дник мой бу́дет. И а́бие глас Госпо́день бысть к нему́, глаго́лющий: не бу́дет сей насле́дник твой, но и́же изы́дет из тебе́, той бу́дет насле́дник тебе́. Изведе́ же его́ вон и рече́ ему́: воззри́ на не́бо, и изочти́ зве́зды, а́ще возмо́жеши исчести́ я́. И рече́: та́ко бу́дет се́мя твое́. И ве́рова Авра́м Бо́гу, и вмени́ся ему́ в пра́вду. Рече́ же к нему́: Аз есмь Бог изведы́й тя от страны́ Халде́йския, я́ко да́ти тебе́ зе́млю сию́ насле́дствовати. И рече́: Влады́ко Го́споди, по чесому́ уразуме́ю, я́ко насле́дити ю́ и́мам? Рече́ же к нему́: возми́ Мне ю́ницу триле́тну, и ко́зу триле́тну, и овна́ триле́тна, и го́рлицу, и го́лубя. Взя же он вся сия́ и раздели́ я́ на по́лы, и положи́ я́ противоли́чна еди́на к друго́му, птиц же не раздели́. Слете́ша же пти́цы на телеса́ расте́саная их, и се́де бли́зу их Авра́м. Заходя́щу же со́лнцу, у́жас нападе́ на Авра́ма, и се страх те́мен ве́лий нападе́ нань. И рече́но бысть ко Авра́му: ве́дый уве́си, я́ко пресе́льно бу́дет се́мя твое́ в земли́ не свое́й, и порабо́тят я́, и озло́бят я́, и смиря́т я́ лет четы́реста. Язы́ку же, ему́же порабо́тают, сужду́ Аз; по сих же изы́дут се́мо со име́нием мно́гим. Ты же оты́деши ко отце́м твои́м в ми́ре, препита́н в ста́рости до́брей.

Диакон: Во́нмем.

Чтец: Проки́мен, глас 4

Живы́й в по́мощи Вы́шняго, / в кро́ве Бо́га Небе́снаго водвори́тся.

Лик: Живы́й в по́мощи Вы́шняго, / в кро́ве Бо́га Небе́снаго водвори́тся.

Чтец: Стих: Рече́т Го́сподеви: Засту́пник мой еси́.

Лик: Живы́й в по́мощи Вы́шняго, / в кро́ве Бо́га Небе́снаго водвори́тся.

Чтец: Живы́й в по́мощи Вы́шняго,

Лик: в кро́ве Бо́га Небе́снаго водвори́тся.

Диакон: Прему́дрость.

Чтец: При́тчей чте́ние.

Диакон: Во́нмем.

Чтец: Устне́ му́дрых связу́ются чу́вством, сердца́ же безу́мных не тве́рда. Же́ртвы нечести́вых ме́рзость Го́сподеви, обе́ты же правоходя́щих прия́тны Ему́. Ме́рзость Го́сподеви путие́ нечести́вых, гоня́щия же пра́вду лю́бит. Наказа́ние незло́биваго познава́ется от мимоходя́щих, ненави́дящии же обличе́ния скончава́ются сра́мно. Ад и па́губа я́вна пред Го́сподем, ка́ко не и сердца́ челове́ков? Не возлю́бит ненака́занный облича́ющих его́, с му́дрыми же не побесе́дует. Се́рдцу веселя́щуся, лице́ цвете́т, в печа́лех же су́щу, се́тует. Се́рдце пра́во и́щет чу́вства, уста́ же ненака́занных уразуме́ют зла́я. На вся́ко вре́мя о́чи злых прие́млют зла́я, до́брии же безмо́лвствуют при́сно. Лу́чше части́ца ма́лая со стра́хом Госпо́дним, не́жели сокро́вища ве́лия без боя́зни. Лу́чше учрежде́ние от зе́лий с любо́вию и благода́тию, не́жели представле́ние тельце́в со враждо́ю. Муж я́рый устроя́ет бра́ни, долготерпели́вый же и бу́дущую укроща́ет. Терпели́вый муж угаси́т суды́, нечести́вый же воздвиза́ет па́че. Путие́ пра́здных по́стлани те́рнием, му́жественных же угла́ждени.

Среда 5-й седмицы Великого поста на 3 Глас 5: Поползну́вся от пра́ваго пути́ Твоего́, от страсте́й окая́нный низпадо́хся в ро́в, леви́т же со свяще́нником ви́девше мя́, претеко́ша. Ты́ же Христе́ поми́ловал еси́ мя́, и ору́жием Креста́ грехо́вное рукописа́ние растерза́в, безстра́стием уясни́л еси́, и Отцу́ соседа́теля сотвори́л еси́. Те́мже зову́ Тебе́: непостижи́ме Го́споди сла́ва Тебе́.

Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Глас 8: Из Иерусали́ма снидо́х поползну́вся, от напи́санных в не́м язы́ком за́поведей Твои́х: во Иерихо́н же иды́й подража́тельным стремле́нием, в не́м дре́вле ра́ди зло́бы от Тебе́, ко уби́йству изда́вшихся лю́дем Твои́м преслуша́нием, душетле́нным прилучи́хся страсте́м, я́коже разбо́йником. от ни́х уя́звена и́сполу умерщвле́на, гвоздьми́ и копие́м пло́тию уязви́выйся во́лею, греха́ ра́ди челове́ча, и о́бщее соверши́вый Кресто́м спасе́ние во Иерусали́ме, исцели́ мя Го́споди, и спаси́ мя.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Глас 8: Му́ченицы Твои́ Го́споди, забы́вше су́щая в житии́, неради́вше и о му́ках бу́дущия ра́ди жи́зни, и сея́ насле́дницы яви́шася: те́мже и со А́нгелы ра́дуются, те́х моли́твами да́руй лю́дем Твои́м ве́лию ми́лость.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас 8: Го́споди, егда́ Тя́ со́лнце ви́де на Дре́ве ви́сима Со́лнца пра́вды, лучы́ сокры́, и луна́ све́т во тьму́ преложи́: Всенепоро́чная же Ма́ти Твоя́ утро́бою уязвля́шеся.

Тропари великопостные

И поет во глас 4:

Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́на Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших. (Поклон великий.)

Сла́ва Отцу́ и Сы́ну и Свято́му Ду́ху.

Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны. (Поклон великий.)

И ны́не и при́сно и во ве́ки веко́в. Ами́нь.

Моли́те за ны, святи́и апо́столи, святи́и вси, да изба́вимся от бед и скорбе́й, вас бо те́плыя предста́тели ко Спа́су стяжа́хом. (Поклон великий.)

Под Твое́ благоутро́бие прибега́ем, Богоро́дице, моле́ния на́ша не пре́зри во обстоя́нии: но от бед изба́ви ны, еди́на Чи́стая, еди́на Благослове́нная. (Без поклона.)

Чтец: Го́споди, поми́луй. (40 раз.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

И́менем Госпо́дним благослови́, о́тче.