По окончании 9-го часа священник произносит начальный возглас:
Благослове́н Бог наш всегда́, ны́не и при́сно, и во ве́ки веко́в.
Чтец: Ами́нь.
Если вечерне не предшествовал девятый час, начальные молитвы читаются полностью.
Чтец: Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, Иже везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас (трижды). Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже имы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Священник: Яко Твое́ есть Ца́рство и сила, и слава, Отца, и Сына, и Святаго Духа, ныне и присно, и во веки веков.
Лик: Ами́нь.
Го́споди, поми́луй (12 раз).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́ Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 103
Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода. Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же (Трижды).
Во время чтения 103 псалма священник тайно перед царскими вратами с непокрытой головой читает светильничные молитвы.
Светильничные молитвы
Молитва первая:
Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу, и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на путь Твой, е́же ходи́ти во и́стине Твое́й, возвесели́ сердца́ на́ша, во е́же боя́тися и́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и несть подо́бен Тебе́ в бозе́х, Го́споди: си́лен в ми́лости и благ в кре́пости, во е́же помога́ти, и утеша́ти, и спаса́ти вся упова́ющия во и́мя свято́е Твое́.
Молитва вторая:
Го́споди, да не я́ростию Твое́ю обличи́ши нас, ниже́ гне́вом Твои́м нака́жеши нас, но сотвори́ с на́ми по ми́лости Твое́й, Врачу́ и Исцели́телю душ на́ших. Наста́ви нас ко Приста́нищу хоте́ния Твоего́, просвети́ о́чи серде́ц на́ших в позна́ние Твоея́ и́стины; и да́руй нам про́чее настоя́щаго дне ми́рное и безгре́шное, и все вре́мя живота́ на́шего, моли́твами святы́я Богоро́дицы и всех святы́х.
Молитва третия:
Го́споди Бо́же наш, помяни́ нас, гре́шных и непотре́бных раб Твои́х, внегда́ призыва́ти нам свято́е и́мя Твое́, и не посрами́ нас от ча́яния ми́лости Твоея́, но да́руй нам, Го́споди, вся я́же ко спасе́нию проше́ния, и сподо́би нас люби́ти, и боя́тися Тебе́ от всего́ се́рдца на́шего, и твори́ти во всех во́лю Твою́.
Молитва четвертая:
Немо́лчными пе́сньми и непреста́нными славословле́ньми от святы́х Си́л воспева́емый, испо́лни уста́ на́ша хвале́ния Твоего́, е́же пода́ти вели́чествие и́мени Твоему́ свято́му. И да́ждь нам уча́стие и насле́дие со все́ми боя́щимися Тебе́ и́стиною, и храня́щими за́поведи Твоя́, моли́твами святы́я Богоро́дицы и всех святы́х Твои́х.
Молитва пятая:
Го́споди, Го́споди, пречи́стою Твое́ю дла́нию содержа́й вся́ческая, долготерпя́й на всех нас, и ка́яйся о зло́бах на́ших, помяни́ щедро́ты Твоя́, и ми́лость Твою́, посети́ ны Твое́ю бла́гостию и да́ждь нам избежа́ти и про́чее настоя́щаго дне Твое́ю благода́тию от разли́чных ко́зней лука́ваго, и ненаве́тну жизнь на́шу соблюди́ благода́тию всесвята́го Твоего́ Ду́ха.
Молитва шестая:
Бо́же вели́кий и ди́вный, неисповеди́мою бла́гостию и бога́тым про́мыслом управля́яй вся́ческая, и мирска́я нам блага́я дарова́вый, и поручи́вый нам обеща́нное Ца́рство, обеща́нными благи́ми; путесотвори́вый нам и дне преше́дшую ча́сть от вся́каго уклони́тися зла: да́руй нам и про́чее непоро́чно соверши́ти, пред свято́ю сла́вою Твое́ю, пе́ти Тя, Еди́наго блага́го и человеколюби́ваго Бо́га на́шего.
Молитва седмая:
Бо́же вели́кий и вы́шний, Еди́н име́яй безсме́ртие, во све́те живы́й непристу́пнем, всю́ тварь прему́дростию созда́вый, раздели́вый между́ све́том и между́ тьмо́ю, и со́лнце положи́вый во о́бласть дне, луну́ же и зве́зды во о́бласть но́щи, сподо́бивый нас, гре́шных, и в настоя́щий ча́с предвари́ти лице́ Твое́ испове́данием, и вече́рнее Тебе́ славосло́вие принести́. Сам,Человеколю́бче, испра́ви моли́тву на́шу я́ко кади́ло пред Тобо́ю, и приими́ ю́ в воню́ благоуха́ния, пода́ждь же нам настоя́щий ве́чер, и приходя́щую но́щь ми́рну, облецы́ ны во ору́жие све́та, изба́ви ны от стра́ха нощна́го и вся́кия ве́щи, во тьме́ преходя́щия, и да́ждь со́н, его́же во упокое́ние не́мощи на́шей дарова́л еси́, вся́каго мечта́ния диа́воля отчужде́нный. Ей Влады́ко, благи́х пода́телю, да и на ло́жах на́ших умиля́ющеся, помина́ем в нощи́ и́мя Твое́, и поуче́нием Твои́х за́поведей просвеща́еми, в ра́дости душе́вней воста́нем ко славосло́вию Твоея́ бла́гости, моле́ния и молитвы Твоему́ благоутро́бию принося́ще, о свои́х согреше́ниих и всех люде́й Твои́х, я́же моли́твами святы́я Богоро́дицы, ми́лостию посети́.
По окончании предначинательного псалма диакон, выйдя северными вратами и став, как обычно на амвоне, произносит великую ектению.
Ектения великая
Диакон: Ми́ром Го́споду помо́лимся.
Лик: Го́споди, поми́луй.
Диакон: О свы́шнем ми́ре и спасе́нии душ на́ших, Го́споду помо́лимся.
Лик: Го́споди, поми́луй.
Диакон: О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
Диакон: О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
Лик: Го́споди, поми́луй.
Диакон: О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
Лик: Го́споди, поми́луй.
Диакон: О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
Лик: Го́споди, поми́луй.
Диакон: О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.
Лик: Го́споди, поми́луй.
Диакон: О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Диакон: Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
И священник возглашает: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Кафизма 10
Псалом 70
Дави́ду псало́м, сыно́в Ионада́вовых и пе́рвых пле́ншихся, не надпи́сан у Евре́й. На Тя́, Го́споди, упова́х, да не постыжу́ся в ве́к. Пра́вдою Твое́ю изба́ви мя́ и изми́ мя: приклони́ ко мне́ у́хо Твое́ и спаси́ мя. Бу́ди ми́ в Бо́га защи́тителя и в ме́сто кре́пко спасти́ мя: я́ко утвержде́ние мое́ и прибе́жище мое́ еси́ Ты́. Бо́же мо́й, изба́ви мя́ из руки́ гре́шнаго, из руки́ законопресту́пнаго и оби́дящаго: я́ко Ты́ еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты́ еси́ мо́й покрови́тель: о Тебе́ пе́ние мое́ вы́ну. Я́ко чу́до бы́х мно́гим: и Ты́ помо́щник мо́й кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, ве́сь де́нь великоле́пие Твое́. Не отве́ржи мене́ во вре́мя ста́рости: внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне́, и стрегу́щии ду́шу мою́ совеща́ша вку́пе, глаго́люще: Бо́г оста́вил е́сть его́, пожени́те и ими́те его́, я́ко не́сть избавля́яй. Бо́же мо́й, не удали́ся от мене́: Бо́же мо́й, в по́мощь мою́ вонми́. Да постыдя́тся и изче́знут оклевета́ющии ду́шу мою́, да облеку́тся в сту́д и сра́м и́щущии зла́я мне́. А́з же всегда́ возупова́ю на Тя́, и приложу́ на вся́ку похвалу́ Твою́. Уста́ моя́ возвестя́т пра́вду Твою́, ве́сь де́нь спасе́ние Твое́, я́ко не позна́х кни́жная. Вни́ду в си́ле Госпо́дни: Го́споди, помяну́ пра́вду Тебе́ еди́наго. Бо́же мо́й, и́мже научи́л мя́ еси́ от ю́ности моея́, и доны́не возвещу́ чудеса́ Твоя́. И да́же до ста́рости и престаре́ния, Бо́же мо́й, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми́ еси́ вели́чия: Бо́же, кто́ подо́бен Тебе́? Ели́ки яви́л ми́ еси́ ско́рби мно́ги и злы́? И обра́щься оживотвори́л мя́ еси́ и от бе́здн земли́ возве́л мя́ еси́. Умно́жил еси́ на мне́ вели́чествие твое́, и обра́щься уте́шил мя́ еси́, и от бе́здн земли́ па́ки возве́л мя́ еси́. И́бо а́з испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же: воспою́ Тебе́ в гу́слех, Святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил: еще́ же и язы́к мо́й ве́сь де́нь поучи́тся пра́вде Твое́й, егда́ постыдя́тся и посра́мятся и́щущии зла́я мне́.
Псалом 71
О Соломо́не, псало́м Дави́ду. Бо́же, су́д Тво́й царе́ви да́ждь, и пра́вду Твою́ сы́ну царе́ву: суди́ти лю́дем Твои́м в пра́вде и ни́щым Твои́м в суде́. Да восприи́мут го́ры ми́р лю́дем и хо́лми пра́вду. Су́дит ни́щым людски́м, и спасе́т сы́ны убо́гих, и смири́т клеветника́. И пребу́дет с со́лнцем, и пре́жде луны́ ро́да родо́в. Сни́дет я́ко до́ждь на руно́, и я́ко ка́пля ка́плющая на зе́млю. Возсия́ет во дне́х его́ пра́вда и мно́жество ми́ра, до́ндеже отъи́мется луна́. И облада́ет от мо́ря до мо́ря, и от ре́к до коне́ц вселе́нныя. Пред ни́м припаду́т ефио́пляне, и врази́ его́ пе́рсть поли́жут. Ца́рие Фарси́йстии и о́строви да́ры принесу́т, ца́рие Ара́встии и Сава́ да́ры приведу́т: и покло́нятся ему́ вси́ ца́рие зе́мстии, вси́ язы́цы порабо́тают ему́. Я́ко изба́ви ни́ща от си́льна, и убо́га, ему́же не бе́ помо́щника. Пощади́т ни́ща и убо́га, и ду́шы убо́гих спасе́т: от ли́хвы и от непра́вды изба́вит ду́шы и́х, и че́стно и́мя его́ пред ни́ми. И жи́в бу́дет, и да́стся ему́ от зла́та Арави́йска: и помо́лятся о не́м вы́ну, ве́сь де́нь благословя́т его́. Бу́дет утвержде́ние на земли́ на версе́х го́р: превознесе́тся па́че Лива́на пло́д его́, и процвету́т от гра́да я́ко трава́ земна́я. Бу́дет и́мя его́ благослове́но во ве́ки, пре́жде со́лнца пребыва́ет и́мя его́: и благословя́тся в не́м вся́ коле́на земна́я, вси́ язы́цы ублажа́т его́. Благослове́н Госпо́дь Бо́г Изра́илев, творя́й чудеса́ еди́н, и благослове́но и́мя сла́вы Его́ во ве́к и в ве́к ве́ка: и испо́лнится сла́вы Его́ вся́ земля́: бу́ди, бу́ди.
Чтец: Сла́ва Отцу́ и Сы́ну и Свято́му Ду́ху.
Лик: И ны́не и при́сно, и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же. (Трижды)
Лик: Го́споди, поми́луй. (Трижды)
Лик: Сла́ва Отцу́ и Сы́ну и Свято́му Ду́ху.
Чтец: И ны́не и при́сно, и во ве́ки веко́в. Ами́нь.
Псалом 72
Оконча́шася пе́сни Дави́да, сы́на Иессе́ова. Псало́м Аса́фу. Ко́ль бла́г Бо́г Изра́илев пра́вым се́рдцем. Мои́ же вма́ле не подвижа́стеся но́зе: вма́ле не пролия́шася стопы́ моя́: я́ко возревнова́х на беззако́нныя, ми́р гре́шников зря́: я́ко не́сть восклоне́ния в сме́рти и́х и утвержде́ния в ра́не и́х: в труде́х челове́ческих не су́ть, и с челове́ки не прии́мут ра́н. Сего́ ра́ди удержа́ я́ горды́ня и́х до конца́: оде́яшася непра́вдою и нече́стием свои́м. Изы́дет я́ко из ту́ка непра́вда и́х: преидо́ша в любо́вь се́рдца. Помы́слиша и глаго́лаша в лука́встве, непра́вду в высоту́ глаго́лаша: положи́ша на небеси́ уста́ своя́, и язы́к и́х пре́йде по земли́. Сего́ ра́ди обратя́тся лю́дие Мои́ се́мо, и дни́е испо́лнени обря́щутся в ни́х. И ре́ша: ка́ко уве́де Бо́г? И а́ще е́сть ра́зум в Вы́шнем? Се́, си́и гре́шницы и гобзу́ющии в ве́к удержа́ша бога́тство. И ре́х: еда́ всу́е оправди́х се́рдце мое́ и умы́х в непови́нных ру́це мои́, и бы́х я́звен ве́сь де́нь, и обличе́ние мое́ на у́трених? А́ще глаго́лах, пове́м та́ко: се́, ро́ду сыно́в Твои́х, ему́же обеща́хся: и непщева́х разуме́ти: сие́ тру́д е́сть предо мно́ю, до́ндеже вни́ду во святи́ло Бо́жие и разуме́ю в после́дняя и́х. Оба́че за льще́ния и́х положи́л еси́ и́м зла́я, низложи́л еси́ я́, внегда́ разгорде́шася. Ка́ко бы́ша в запусте́ние? Внеза́пу изчезо́ша, погибо́ша за беззако́ние свое́. Я́ко со́ние востаю́щаго, Го́споди, во гра́де Твое́м о́браз и́х уничижи́ши. Я́ко разжже́ся се́рдце мое́, и утро́бы моя́ измени́шася: и а́з уничиже́н, и не разуме́х, ско́тен бы́х у Тебе́. И а́з вы́ну с Тобо́ю: удержа́л еси́ ру́ку десну́ю мою́, и сове́том Твои́м наста́вил мя́ еси́, и со сла́вою прия́л мя́ еси́. Что́ бо ми́ е́сть на небеси́? И от Тебе́ что́ восхоте́х на земли́? Изчезе́ се́рдце мое́ и пло́ть моя́, Бо́же се́рдца моего́, и ча́сть моя́, Бо́же, во ве́к. Я́ко се́, удаля́ющии себе́ от Тебе́ поги́бнут: потреби́л еси́ вся́каго любоде́ющаго от Тебе́. Мне́ же прилепля́тися Богови бла́го е́сть, полага́ти на Го́спода упова́ние мое́, возвести́ти ми́ вся́ хвалы́ Твоя́, во врате́х дще́ре Сио́ни.
Псалом 73
Ра́зума Аса́фу. Вску́ю, Бо́же, отри́нул еси́ до конца́? Разгне́вася я́рость Твоя́ на о́вцы па́жити Твоея́? Помяни́ со́нм Тво́й, его́же стяжа́л еси́ испе́рва, изба́вил еси́ жезло́м достоя́ния Твоего́, гора́ Сио́н сия́, в не́йже всели́лся еси́. Воздви́гни ру́це Твои́ на горды́ни и́х в коне́ц, ели́ка лука́внова вра́г во святе́м Твое́м. И восхвали́шася ненави́дящии Тя́ посреде́ пра́здника Твоего́: положи́ша зна́мения своя́ зна́мения, и не позна́ша, я́ко во исхо́де превы́ше: я́ко в дубра́ве дре́вяне секи́рами разсеко́ша две́ри его́ вку́пе, се́чивом и оско́рдом разруши́ша и́. Возжго́ша огне́м святи́ло Твое́: на земли́ оскверни́ша жили́ще и́мене Твоего́. Ре́ша в се́рдцы свое́м ю́жики и́х вку́пе: прииди́те, и отста́вим вся́ пра́здники Бо́жия от земли́. Зна́мения и́х не ви́дехом: не́сть ктому́ проро́ка, и на́с не позна́ет ктому́. Доко́ле, Бо́же, поно́сит вра́г? Раздражи́т проти́вный и́мя Твое́ до конца́? Вску́ю отвраща́еши ру́ку Твою́ и десни́цу Твою́ от среды́ не́дра Твоего́ в коне́ц? Бо́г же, Ца́рь на́ш, пре́жде ве́ка соде́ла спасе́ние посреде́ земли́. Ты́ утверди́л еси́ си́лою Твое́ю мо́ре: Ты́ сте́рл еси́ главы́ змие́в в воде́: Ты́ сокруши́л еси́ главу́ зми́еву, да́л еси́ того́ бра́шно лю́дем ефио́пским. Ты́ расто́ргл еси́ исто́чники и пото́ки: Ты́ изсуши́л еси́ ре́ки ифа́мския. Тво́й е́сть де́нь, и Твоя́ е́сть но́щь: Ты́ соверши́л еси́ зарю́ и со́лнце. Ты́ сотвори́л еси́ вся́ преде́лы земли́: жа́тву и ве́сну Ты́ созда́л еси́ я́. Помяни́ сия́: вра́г поноси́ Го́сподеви, и лю́дие безу́мнии раздражи́ша и́мя Твое́. Не преда́ждь звере́м ду́шу испове́дающуюся Тебе́: ду́ш убо́гих Твои́х не забу́ди до конца́. При́зри на заве́т Тво́й: я́ко испо́лнишася помраче́ннии земли́ домо́в беззако́ний. Да не возврати́тся смире́нный посра́млен: ни́щ и убо́г восхвали́та и́мя Твое́. Воста́ни, Бо́же, суди́ прю́ Твою́: помяни́ поноше́ние Твое́, е́же от безу́мнаго ве́сь де́нь. Не забу́ди гла́са моли́твенник Твои́х: горды́ня ненави́дящих Тя́ взы́де вы́ну.
Чтец: Сла́ва Отцу́ и Сы́ну и Свято́му Ду́ху.
Лик: И ны́не и при́сно, и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же. (Трижды)
Лик: Го́споди, поми́луй. (Трижды)
Лик: Сла́ва Отцу́ и Сы́ну и Свято́му Ду́ху.
Чтец: И ны́не и при́сно, и во ве́ки веко́в. Ами́нь.
Псалом 74
В коне́ц, да не растли́ши, псало́м пе́сни Аса́фу. Испове́мыся Тебе́, Бо́же, испове́мыся Тебе́ и призове́м и́мя Твое́: пове́м вся́ чудеса́ Твоя́. Егда́ прииму́ вре́мя, А́з правоты́ возсужду́. Раста́яся земля́ и вси́ живу́щии на не́й, А́з утверди́х столпы́ ея́. Ре́х беззако́ннующым, не беззако́ннуйте: и согреша́ющым, не возноси́те ро́га. Не воздвиза́йте на высоту́ ро́га ва́шего и не глаго́лите на Бо́га непра́вду: я́ко ниже́ от исхо́д, ниже́ и за́пад, ниже́ от пусты́х го́р. Я́ко Бо́г судия́ е́сть: сего́ смиря́ет, и сего́ возно́сит. Я́ко ча́ша в руце́ Госпо́дни, вина́ нерастворе́на испо́лнь растворе́ния, и уклони́ от сея́ в сию́: оба́че дро́ждие его́ не истощи́ся, испию́т вси́ гре́шнии земли́. А́з же возра́дуюся в ве́к, воспою́ Бо́гу Иа́ковлю: и вся́ ро́ги гре́шных сломлю́, и вознесе́тся ро́г пра́веднаго.
Псалом 75
В коне́ц, в пе́снех, псало́м Аса́фу, пе́снь ко Ассири́анину. Ве́дом во Иуде́и Бо́г: во Изра́или ве́лие и́мя Его́. И бы́сть в ми́ре ме́сто Его́, и жили́ще Его́ в Сио́не. Та́мо сокруши́ кре́пости луко́в, ору́жие и ме́чь и бра́нь. Просвеща́еши ты́ ди́вно от го́р ве́чных. Смято́шася вси́ неразу́мнии се́рдцем: усну́ша сно́м свои́м, и ничто́же обрето́ша вси́ му́жие бога́тства в рука́х свои́х. От запреще́ния Твоего́, Бо́же Иа́ковль, воздрема́ша все́дшии на ко́ни. Ты́ стра́шен еси́, и кто́ противоста́нет Тебе́? Отто́ле гне́в Тво́й. С небесе́ слы́шан сотвори́л еси́ су́д: земля́ убоя́ся и умолча́, внегда́ воста́ти на су́д Бо́гу, спасти́ вся́ кро́ткия земли́. Я́ко помышле́ние челове́ческое испове́стся Тебе́, и оста́нок помышле́ния пра́зднует Ти́. Помоли́теся и воздади́те Го́сподеви Бо́гу на́шему: вси́, и́же о́крест Его́, принесу́т да́ры Стра́шному и отъе́млющему ду́хи князе́й, стра́шному па́че царе́й земны́х.
Псалом 76
В коне́ц, о Идифу́ме, псало́м Аса́фу. Гла́сом мои́м ко Го́споду воззва́х, гла́сом мои́м к Бо́гу, и вня́т ми́. В де́нь ско́рби моея́ Бо́га взыска́х рука́ма мои́ма, но́щию пред ни́м, и не прельще́н бы́х: отве́ржеся уте́шитися душа́ моя́. Помяну́х Бо́га и возвесели́хся, поглумля́хся, и малоду́шствоваше ду́х мо́й. Предвари́сте стражбы́ о́чи мои́: смято́хся и не глаго́лах. Помы́слих дни́ пе́рвыя, и ле́та ве́чная помяну́х, и поуча́хся: но́щию се́рдцем мои́м глумля́хся, и тужа́ше ду́х мо́й: еда́ во ве́ки отри́нет Госпо́дь и не приложи́т благоволи́ти па́ки? Или́ до конца́ ми́лость Свою́ отсече́т, сконча́ глаго́л от ро́да в ро́д? Еда́ забу́дет уще́дрити Бо́г? Или́ удержи́т во гне́ве Свое́м щедро́ты Своя́? И ре́х: ны́не нача́х, сия́ изме́на десни́цы Вы́шняго. Помяну́х дела́ Госпо́дня: я́ко помяну́ от нача́ла чудеса́ Твоя́, и поучу́ся во все́х де́лех Твои́х, и в начина́ниих Твои́х поглумлю́ся. Бо́же, во святе́м пу́ть Тво́й: кто́ Бо́г ве́лий, я́ко Бо́г на́ш? Ты́ еси́ Бо́г творя́й чудеса́: сказа́л еси́ в лю́дех си́лу Твою́, изба́вил еси́ мы́шцею Твое́ю лю́ди Твоя́, сы́ны Иа́ковли и Ио́сифовы. Ви́деша Тя́ во́ды, Бо́же, ви́деша Тя́ во́ды и убоя́шася: смято́шася бе́здны. Мно́жество шу́ма во́д: гла́с да́ша о́блацы, и́бо стре́лы Твоя́ прехо́дят. Гла́с гро́ма Твоего́ в колеси́, освети́ша мо́лния Твоя́ вселе́нную: подви́жеся и тре́петна бы́сть земля́. В мо́ри путие́ Твои́, и стези́ Твоя́ в вода́х мно́гих, и следы́ Твои́ не позна́ются. Наста́вил еси́ я́ко о́вцы лю́ди Твоя́ руко́ю Моисе́овою и Ааро́нею.
Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.
Аллилу́иа, аллилу́иа, аллилу́иа, сла́ва Тебе́ Бо́же. (Трижды)
Ектения малая
Диакон: Па́ки и па́ки, ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Возглашение: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.
Лик: Ами́нь.
«Господи, воззвах»
Поются псалмы 140, 141, 129, 116 со стихирами на “Господи, воззвах”; в это время диакон совершает полное каждение храма
Первый лик: Го́споди, воззва́х к Тебе́, услы́ши мя. / Услы́ши мя, Го́споди.
Го́споди, воззва́х к Тебе́, услы́ши мя: / вонми́ гла́су моле́ния моего́, / внегда́ воззва́ти ми к Тебе́. / Услы́ши мя, Го́споди.
Второй лик: Да испра́вится моли́тва моя́, / я́ко кади́ло пред Тобо́ю, / воздея́ние руку́ мое́ю / – же́ртва вече́рняя. / Услы́ши мя, Го́споди.
И по чину стихи: Положи́, Го́споди, хране́ние усто́м мои́м, и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́, я́ко еще́ и моли́тва моя́ во благоволе́ниих их. Поже́рты бы́ша при ка́мени судии́ их: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти их при а́де. Я́ко к Тебе́, Го́споди, Го́споди, о́чи мои́: на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́.
Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от мене́ ду́ху моему́: и Ты позна́л еси́ стези́ моя́: на пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́: поги́бе бе́гство от мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя от гоня́щих мя, я́ко укрепи́шася па́че мене́.
На 10, стихиры: Изведи́ из темни́цы ду́шу мою́, / испове́датися и́мени Твоему́.
Сти́х: Мене́ ждут пра́ведницы / до́ндеже возда́си Мне.
На 8, cти́х: Из глубины́ воззва́х к Тебе́ Го́споди, / Го́споди, услы́ши глас мой.
Сти́х: Да бу́дут у́ши Твои́ / вне́млюще гла́су моле́ния моего́.
На 6, cти́х: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.
Глас 3: Да́вый на́м поще́ния вре́мя обрати́тися и живы́м бы́ти, и ника́коже поги́бнути, Сло́ве Бо́жий, сподо́би все́х благоугоди́ти Тебе́ до́бре, и те́плым умиле́нием послужи́ти Тебе́ Христе́, я́коже блудни́ца о́ная целому́дренная и честна́я, иногда́ ми́ром и излия́ньми те́плых сле́з, прегреше́ний прии́мши оставле́ние.
Сти́х: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.
Глас 3: Я́коже слепы́й от се́рдца зову́ Ти: Сы́не Бо́жий, просвети́ мои́ о́чи серде́чныя. Я́коже ве́рная ханане́а вопию́ Ти: поми́луй мя́ Ще́дре, и́бо ду́шу бесну́ющуюся и́мам в сласте́х: ю́же премени́в от тьмы́ страсте́й, про́чее жи́ти чи́сте сотвори́, да сла́влю Твою́ мно́гую благосты́ню.
На 4, cти́х: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.
Глас 8: Богосве́тлая благода́ть воздержа́ния, возсия́вши на́м дне́сь со́лнца светле́е, ду́шы на́шя просвеща́ет, я́коже о́блаки стра́сти грехо́вныя отгоня́ющи. Сего́ ра́ди вси́ притеце́м, благоду́шно сию́ лобыза́юще: ра́дующеся соверша́ем боже́ственное по́прище того́, его́же в весе́лиих учрежда́ющеся возопии́м Христу́: освяти́ бла́же, сие́ соверша́ющыя ве́рно.
Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.
Глас 2: Сло́вом управля́я ду́ши,/ Боже́ственный строи́тель показа́лся еси́,/ тайново́ждь же ве́рен,/ се́мена спаси́тельная влага́я/ и жня многого́бзенный плод, Богоно́се,/ сей Влады́це твоему́ прино́сиши, ра́дуяся,/ Ему́же ны́не предстоя́, блаже́нне,/ помяни́ ста́до твое́ сие́,/ при́сно чту́щее тя, Богодухнове́нне.
На 2, cти́х: Хвали́те Го́спода вси́ язы́цы, похвали́те Его́ вси́ лю́дие.
Глас 2: Кро́ток быв и прост,/ правосла́вия ре́вностию яви́лся еси́, ра́туя,/ ве́рою бо, я́ко броня́ми, обложе́н/ и, я́ко копие́м, воздержа́нием, Ники́то Богому́дре,/ вся́кую ху́льную е́ресь обличи́л еси́,/ Боже́ственный Спа́са о́браз почита́я/ и служа́, Богоно́се,/ уста́вом оте́ческим я́ве после́дуя.
Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.
Глас 2: Егда́ во изгна́ниих тя го́рьких/ и в темне́йших ме́стех/ темне́йший мучи́тель заключи́ зве́рским суровство́м,/ ра́йское селе́ние во уме́ обнося́,/ ра́дуяся же ду́хом, о́тче, претерпе́л еси́,/ Его́же ны́не благоле́пие ви́дети/ вои́стинну сподо́бился еси́, блаже́нне,/ боле́зней воздая́ния прие́мля.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен, глас 2: Еди́на Невмести́маго Бо́га/ нетесноме́стно во чре́ве носи́ла еси́,/ Челове́ка бы́вша за бла́гость, Пресвята́я Богоневе́сто./ Те́мже молю́ Тя:/ утесня́ющих мя страсте́й измени́,/ я́ко да, те́сную и пра́вую стезю́, ше́ствовав,/ дости́гну, я́же к жи́зни, Де́во, водя́щую.
Вечерняя песнь Сыну Божию
Све́те Ти́хий святы́я сла́вы, / Безсме́ртнаго, Отца́ Небе́снаго, / Свята́го Блаже́ннаго, Иису́се Христе́. / Прише́дше на за́пад со́лнца, / ви́девше свет вече́рний, / пое́м Отца́, Сы́на и Свята́го Ду́ха, Бо́га. / Досто́ин еси́ во вся времена́ / пе́т бы́ти гла́сы преподо́бными, / Сы́не Бо́жий, живо́т дая́й, / те́мже мiр Тя сла́вит.
Диакон: Во́нмем.
Священник: Мир всем.
Лик: И ду́хови твоему́.
Чтение Святого Писания
Вторник пятой седмицы Великого поста. Вечерня
Диакон: Во́нмем.
Чтец: Проки́мен, глас 4
Наста́ви мя, Го́споди, на путь Твой, / и пойду́ во и́стине Твое́й.
Лик: Наста́ви мя, Го́споди, на путь Твой, / и пойду́ во и́стине Твое́й.
Чтец: Стих: Приклони́, Го́споди, у́хо Твое́.
Лик: Наста́ви мя, Го́споди, на путь Твой, / и пойду́ во и́стине Твое́й.
Чтец: Наста́ви мя, Го́споди, на путь Твой,
Лик: и пойду́ во и́стине Твое́й.
Диакон: Прему́дрость.
Чтец: Бытия́ чте́ние.
Диакон: Во́нмем.
Чтец: Авра́м же всели́ся в земли́ Ханаа́нстей, Лот же всели́ся во гра́де окре́стных стран, и всели́ся в Содо́ме. Челове́цы же су́щии в Содо́ме зли и гре́шни пред Бо́гом зело́. Бог же рече́ Авра́му, повнегда́ разлучи́тися Ло́ту от него́: воззри́ очи́ма твои́ма, и виждь от ме́ста, иде́же ты ны́не еси́, к се́веру, и ли́ве, и к восто́ку, и мо́рю. Я́ко всю зе́млю, ю́же ты ви́диши, тебе́ дам ю́, и се́мени твоему́ во ве́ки. И сотворю́ се́мя твое́ я́ко песо́к земны́й, а́ще кто мо́жет исчести́ песо́к земны́й, то и се́мя твое́ изочте́т. Воста́в пройди́ зе́млю в долготу́ ея́ и в широту́, я́ко тебе́ дам ю́ и се́мени твоему́ во век. И отсели́вся Авра́м, прише́д всели́ся у ду́ба Мамври́йскаго, и́же бя́ше в Хевро́не, и созда́ ту же́ртвенник Го́споду.
Диакон: Во́нмем.
Чтец: Проки́мен, глас 4
Лю́бит Госпо́дь врата́ Сио́ня, / па́че всех селе́ний Иа́ковлих.
Лик: Лю́бит Госпо́дь врата́ Сио́ня, / па́че всех селе́ний Иа́ковлих.
Чтец: Стих: Основа́ния его́ на гора́х святы́х.
Лик: Лю́бит Госпо́дь врата́ Сио́ня, / па́че всех селе́ний Иа́ковлих.
Чтец: Лю́бит Госпо́дь врата́ Сио́ня,
Лик: па́че всех селе́ний Иа́ковлих.
Диакон: Прему́дрость.
Чтец: При́тчей чте́ние.
Диакон: Во́нмем.
Чтец: Страх Госпо́день исто́чник жи́зни, твори́т же уклоня́тися от се́ти сме́ртныя. Во мно́зе язы́це сла́ва царю́, во оскуде́нии же лю́дсте сокруше́ние си́льному. Долготерпели́в муж, мног в ра́зуме, малоду́шный же кре́пко безу́мен. Кро́ткий муж се́рдцу врач, моль же косте́м се́рдце чу́вственно. Оклевета́яй убо́гаго, раздража́ет Сотво́ршаго и́, почита́яй же Его́, ми́лует ни́щаго. Во зло́бе свое́й отри́нется нечести́вый, наде́яй же ся на Го́спода, свои́м преподо́бием пра́веден. В се́рдце бла́зе му́жа почи́ет прему́дрость, в се́рдцы же безу́мных не познава́ется. Пра́вда возвыша́ет язы́к, умаля́ют же племена́ греси́. Прия́тен царе́ви слуга́ разу́мный, свои́м же благообраще́нием отъе́млет безче́стие. Гнев губи́т и разу́мныя, отве́т же смире́н отвраща́ет я́рость, а сло́во же́стоко воздвиза́ет гне́вы. Язы́к му́дрых до́брая свесть, уста́ же безу́мных возвеща́ют зла́я. На вся́ком ме́сте о́чи Госпо́дни сматря́ют злы́я же и благи́я. Исцеле́ние язы́ка дре́во жи́зни, храня́й же его́, испо́лнится ду́ха.
Молитва при наступлении вечера
Лик: Сподо́би, Го́споди, в ве́чер сей без греха́ сохрани́тися нам. / Благослове́н еси́, Го́споди Бо́же оте́ц на́ших, / и хва́льно и просла́влено и́мя Твое́ во ве́ки, ами́нь. /
Бу́ди, Го́споди, ми́лость Твоя́ на нас, я́коже упова́хом на Тя. / Благослове́н еси́, Го́споди, научи́ мя оправда́нием Твои́м. / Благослове́н еси́, Влады́ко, вразуми́ мя оправда́нием Твои́м. / Благослове́н еси́, Святы́й, просвети́ мя оправда́нии Твои́ми. /
Го́споди, ми́лость Твоя́ во век, дел руку́ Твое́ю не пре́зри. / Тебе́ подоба́ет хвала́. Тебе́ подоба́ет пе́ние, / Тебе́ сла́ва подоба́ет, Отцу́ и Сы́ну и Свято́му Ду́ху, / ны́не и при́сно и во ве́ки веко́в. Ами́нь.
Ектения просительная
Диакон: Испо́лним вече́рнюю моли́тву на́шу Го́сподеви.
Лик: Го́споди, поми́луй.
Диакон: Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Ве́чера всего́ соверше́нна, свя́та, ми́рна и безгре́шна у Го́спода про́сим.
Лик: Пода́й, Го́споди.
Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.
Лик: Пода́й, Го́споди.
Диакон: Проще́ния и оставле́ния грехо́в и прегреше́ний на́ших у Го́спода про́сим.
Лик: Пода́й, Го́споди.
Диакон: До́брых и поле́зных душа́м нашим, и ми́ра мiрови у Го́спода про́сим.
Лик: Пода́й, Го́споди.
Диакон: Про́чее вре́мя живота́ на́шего в ми́ре и покая́нии сконча́ти у Го́спода про́сим.
Лик: Пода́й, Го́споди.
Диакон: Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.
Лик: Пода́й, Го́споди.
Диакон: Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
И священник возглашает: Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Священник: Ми́р всем.
Лик: И ду́хови твоему́.
Диакон: Главы́ на́ша Го́сподеви прикло́ним.
Лик: Тебе́, Го́споди.
В алтаре
Молитва главопреклонения
Священник: Го́споди Бо́же наш, приклони́вый небеса́ и соше́дый на спасе́ние ро́да челове́ческаго, при́зри на рабы́ Твоя́ и на достоя́ние Твое́. Тебе́ бо стра́шному и человеколю́бцу судии́, Твои́ раби́ подклони́ша главы́, своя́ же покори́ша вы́я, не от челове́к ожида́юще по́мощи, но Твоея́ ожида́юще ми́лости и Твоего́ ча́юще спасе́ния, я́же сохрани́ на вся́кое вре́мя и по настоя́щем ве́чере, и в приходя́щую но́щь, от вся́каго врага́, от вся́каго проти́внаго де́йства диа́вольскаго и от помышле́ний су́етных, и воспомина́ний лука́вых.
И возглашает священник: Бу́ди держа́ва Ца́рствия Твоего́ благослове́на и препросла́влена, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Стихиры на стиховне
Глас 7: Я́коже впады́й в разбо́йники и уя́звен, та́ко и а́з впадо́х от мои́х грехо́в, и уя́звена е́сть душа́ моя́: к кому́ прибе́гну исцели́тися? то́кмо к Тебе́ ду́ш же и теле́с врачу́: изле́й на мя́ Бо́же вели́кую Твою́ ми́лость.
Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.
Глас 4: Прегреши́вше от преступле́ния пе́рваго, от ра́йския сла́дости и наслажде́ния веде́ни бы́хом в безче́стнейшую жи́знь: доброде́телей бо подоба́ющаго и хва́льнаго жития́ совле́кшеся прегреше́ньми, я́ко в разбо́йники впадо́хом: и́сполу же ме́ртвы есмы́, прегреши́вше от спаси́тельных уче́ний Твои́х, но мо́лим Тя́ от Мари́и яви́вшагося, и безстра́стно страсте́м прибли́жившагося Влады́ку: обяжи́ на́шя я́же от греха́ прибы́вшыя стру́пы, и безме́рное Твое́ милосе́рдие излива́й на ны́, Твое́ исцели́тельное попече́ние, я́ко Человеколю́бец.
Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.
Глас 4: Святы́х му́ченик прие́мый терпе́ние, и от на́с приими́ пе́ние Человеколю́бче, да́руя на́м те́х моли́твами ве́лию ми́лость.
Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.
Глас 4: От все́х бе́д рабы́ Твоя́ сохраня́й, благослове́нная Богоро́дице: да Тя́ сла́вим наде́жду ду́ш на́ших.
Молитва святаго Симеона Богоприимца
Ны́не отпуща́еши раба́ Твоего́, Влады́ко, / по глаго́лу Твоему́ с ми́ром: / я́ко ви́деста о́чи мои́ спасе́ние Твое́, / е́же еси́ угото́вал пред лице́м всех люде́й, / свет во открове́ние язы́ков, / и сла́ву люде́й Твои́х Изра́иля.
Трисвятое по Отче наш:
Священник: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Тропари великопостные
И поет во глас 4:
Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́на Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших. (Поклон великий.)
Сла́ва Отцу́ и Сы́ну и Свято́му Ду́ху.
Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны. (Поклон великий.)
И ны́не и при́сно и во ве́ки веко́в. Ами́нь.
Моли́те за ны, святи́и апо́столи, святи́и вси, да изба́вимся от бед и скорбе́й, вас бо те́плыя предста́тели ко Спа́су стяжа́хом. (Поклон великий.)
Под Твое́ благоутро́бие прибега́ем, Богоро́дице, моле́ния на́ша не пре́зри во обстоя́нии: но от бед изба́ви ны, еди́на Чи́стая, еди́на Благослове́нная. (Без поклона.)
Чтец: Го́споди, поми́луй. (40 раз.)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
И́менем Госпо́дним благослови́, о́тче.
Священник: Сый благослове́н Христо́с Бог наш, все́гда, ны́не и при́сно и во ве́ки веко́в.
Лик: Ами́нь.
Чтец: Небе́сный Царю́, ве́ру утверди́, язы́ки укроти́, мир умири́, святы́й храм сей до́бре сохрани́, пре́жде отше́дшия отцы́ и бра́тию на́шу в селе́ниих пра́ведных учини́ и нас в покая́нии и испове́дании приими́, я́ко Благи́й и Человеколю́бец.
И аще есть Четыредесятница, творим три великия поклоны, глаголюще предписанную молитву:
Молитва Ефрема Сирина
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон)
12 поясных поклонов с молитвой:
Бо́же, очи́сти мя гре́шнаго.
И повторяется вся молитва полностью:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми.
Дух же целому́дрия, смиренному́дрия, терпе́ния, и любве́, да́руй ми рабу́ Твоему́.
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И один земной поклон).
Чтец: Трисвятое по Отче наш:
Священник: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Чтец: Ами́нь. Го́споди, поми́луй (12 раз).
Чтец: Ами́нь. Всесвята́я Тро́ице, Единосу́щная Держа́во, неразде́льное Ца́рство, всех благи́х вина́, благоволи́ же и о мне, гре́шнем, утверди́, вразуми́ се́рдце мое и всю мою отыми́ скве́рну. Просвети́ мою мысль, да вы́ну сла́влю, пою́, и покланя́юся, и глаго́лю: еди́н Свят, еди́н Госпо́дь, Иису́с Христо́с, в сла́ву Бо́га Отца́. Ами́нь.
Лик: Бу́ди и́мя Госпо́дне благослове́но от ны́не и до ве́ка. (Трижды)
Чтец: Сла́ва, и ны́не:
Псалом 33
Благословлю́ Го́спода на вся́кое вре́мя, / вы́ну хвала́ Его́ во усте́х мои́х. / О Го́споде похва́лится душа́ моя́, / да услы́шат кро́тцыи и возвеселя́тся. / Возвели́чите Го́спода со мно́ю / и вознесе́м и́мя Его́ вку́пе. / Взыска́х Го́спода и услы́ша мя, / и от всех скорбе́й мои́х изба́ви мя. / Приступи́те к Нему́ и просвети́теся, / и ли́ца ва́ша не постыдя́тся. / Сей ни́щий воззва́, и Госпо́дь услы́ша и́, / и от всех скорбе́й eго́ спасе́ и́. / Ополчи́тся А́нгел Госпо́день о́крест боя́щихся Его́, / и изба́вит их. / Вкуси́те и ви́дите, я́ко благ Госпо́дь; / блаже́н муж, и́же упова́ет Нань. / Бо́йтеся Го́спода, вси святи́и Его́, / я́ко несть лише́ния боя́щимся Его́. / Бога́тии обнища́ша и взалка́ша, / взыска́ющии же Го́спода не лиша́тся вся́каго бла́га. / Прииди́те, ча́да, послу́шайте мене́, / стра́ху Госпо́дню научу́ вас. / Кто́ есть челове́к хотя́й живо́т, / любя́й дни ви́дети бла́ги? / Удержи́ язы́к твой от зла, / и устне́ твои́, е́же не глаго́лати льсти. / Уклони́ся от зла, и сотвори́ бла́го. / Взыщи́ ми́ра, и пожени́ и́. / О́чи Госпо́дни на пра́ведныя, / и у́ши Его́ в моли́тву их. / Лице́ же Госпо́дне на творя́щия зла́я, / е́же потреби́ти от земли́ па́мять их. / Воззва́ша пра́веднии, и Госпо́дь услы́ша их, / и от всех скорбе́й их изба́ви их. / Близ Госпо́дь сокруше́нных се́рдцем, / и смире́нныя ду́хом спасе́т. / Мно́ги ско́рби пра́ведным, / и от всех их изба́вит я́ Госпо́дь. / Храни́т Госпо́дь вся ко́сти их, / ни еди́на от них сокруши́тся. / Смерть гре́шников люта́, / и ненави́дящии пра́веднаго прегре́шат. / Изба́вит Госпо́дь ду́шы раб Свои́х, / и не прегреша́т вси, упова́ющии на Него́.
Диакон: Прему́дрость.
Лик: Досто́йно есть я́ко вои́стинну, блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего.
Священник: Пресвята́я Богоро́дице, спаси́ нас.
Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва, и ны́не:
Го́споди, поми́луй (трижды). Благослови́.
Священник стоя у Царских врат, обращается на запад к народу и произносит отпуст.