Вторник первой седмицы
Во вто́рникъ пе́рвыѧ седми́цы на ᲂу҆́трени.
По в҃-мъ стїхосло́вїи сѣда́ленъ, гла́съ в҃.
Подо́бенъ: Пребл҃гослове́на:
Пребл҃гослове́на бл҃года́ть всечестна́гѡ поста̀: мѡѷсе́й бо тѣ́мъ просла́висѧ, и҆ зако́нъ въ пи́смени на скрижа́лехъ прїѧ́тъ: тѣ́мъ и҆ ѻ҆́троцы ю҆́нїи ѻ҆гнѧ̀ сильнѣ́йши ꙗ҆ви́шасѧ. въ то́мъ ᲂу҆́бо да погаси́мъ плотскі̑ѧ стра̑сти пламенѣ́ющыѧ, хрⷭ҇тꙋ̀ сп҃сꙋ вопїю́ще: ѡ҆браще́нїе на́мъ всѣ̑мъ да́рꙋй, и҆ и҆зба́ви гее́нны.
Сла́ва, и҆́ный, гла́съ то́йже.
Подо́бенъ: Милосе́рдїѧ сꙋ́щи:
Покаѧ́нїѧ вре́мѧ наста̀: воздержа́нїѧ плоды̀ покажѝ, ѽ дꙋшѐ моѧ̀! воззрѝ на преждепока́ѧвшыѧсѧ, воззовѝ хрⷭ҇тꙋ̀: согрѣши́хъ, сп҃си́ мѧ, влⷣко бл҃гі́й, ꙗ҆́коже сп҃слъ є҆сѝ мытарѧ̀, возстена́вша ѿ се́рдца, є҆ди́нъ сы́й многомлⷭ҇тивый.
И҆ ны́нѣ, бг҃оро́диченъ: Предста́тельство те́плое хрⷭ҇тїа́нъ, сн҃а твоего̀ молѝ при́снѡ, бцⷣе, и҆зба́вити на́съ ѿ всѧ́кагѡ ѕлодѣ́йства и҆ лю́тости бори́телѧ, и҆ да́ти на́мъ проще́нїе, на́шихъ согрѣше́нїй, бл҃госе́рдїѧ ра́ди щедро́тъ, твои́ми мл҃твами, мт҃и дв҃о.
По г҃-мъ стїхосло́вїи сѣда́ленъ, гла́съ є҃.
Подо́бенъ: Гдⷭ҇и, ча́шꙋ стрⷭ҇ти:
Гдⷭ҇и, сп҃си́тельнагѡ воздержа́нїѧ вторы́й де́нь начина́юще, вопїе́мъ тѝ: ᲂу҆милѝ сердца̀ на́съ ра̑бъ твои́хъ, и҆ прїимѝ приноси̑мыѧ со стра́хомъ мл҃твы на́шѧ, подаѧ̀ на́мъ бл҃готе́чное поста̀ по́прище, ѡ҆чище́нїе и҆ ве́лїю млⷭ҇ть.
Сла́ва, то́йже. И҆ ны́нѣ, бг҃оро́диченъ.
Подо́бенъ: Собезнача́льное сло́во:
Ко́реню, цвѣ́тъ бж҃е́ственный и҆зрасти́вый, кївѡ́те и҆ свѣ́щниче и҆ ста́мно всезлата́ѧ, ст҃а́ѧ трапе́зо, хлѣ́бъ жи́зни носѧ́щаѧ, ᲂу҆молѝ є҆го̀, ꙗ҆́кѡ сн҃а твоего̀ и҆ бг҃а, со ст҃ы́мъ прⷣте́чею, ᲂу҆ще́дрити и҆ сп҃стѝ и҆сповѣ́дающыѧ тѧ̀ бцⷣꙋ.
Канѡ́нъ мине́и: и҆ трїѡ́ди, гла́съ в҃.
И҆ стїхосло́витсѧ втора́ѧ пѣ́снь ѱалти́ри.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь въ мо́ри сп҃сы́й и҆ въ пꙋсты́ни насы́тивый і҆и҃льтєскїѧ лю́ди, и҆ во́дꙋ и҆з̾ ка́мене и҆сточи́вый человѣ́кѡмъ, да под̾е́млю па́дшаго дре́вле въ тлѣ́нїе, и҆ привлекꙋ̀ є҆го̀ къ себѣ̀, неизрече́нныѧ ра́ди млⷭ҇ти.
Трезви́сѧ, дꙋшѐ, бо́дрствꙋй, воздохнѝ, прослези́сѧ, посто́мъ всѐ бре́мѧ грѣха̀ ѿве́ргни, те́плымъ покаѧ́нїемъ и҆збѣ́гни ѻ҆гнѧ̀, и҆ пла́чемъ ри́зꙋ плаче́внꙋю страсте́й раздерѝ, ѡ҆де́ждꙋ бж҃е́ственнꙋю прїе́млющи.
Къ горѣ̀ и҆зрѧ́дныхъ дѣѧ́нїй пристꙋ́пимъ поще́нїемъ всѝ, ѡ҆ста́вльше долꙋвлекꙋ́щыѧ прило́ги сласте́й: и҆ въ сꙋмра́къ честны́хъ видѣ́нїй вше́дше, ᲂу҆́зримъ є҆ди́нꙋ хрⷭ҇то́вꙋ любе́знꙋю добро́тꙋ, ѡ҆божа́еми та́инственнѡ бж҃е́ственными восхождє́нїи.
Оу҆вы̀ мнѣ̀, кто̀ бꙋ́дꙋ; что̀ содѣ́ю, грѣ́хъ содѣ́ловаѧ и҆ влⷣки не ᲂу҆страша́ѧсѧ, безсо́вѣстный; сегѡ̀ ра́ди пре́жде сꙋда̀ ѡ҆сꙋжде́нъ є҆́смь: правосꙋ́де бл҃гі́й, ѡ҆брати́въ сп҃сѝ мѧ̀, па́че всѣ́хъ человѣ̑къ тебѐ преѡгорчи́вшаго.
Бг҃оро́диченъ: Неѡра́ннаѧ землѐ, и҆зрасти́вшаѧ всѣ́хъ пита́телѧ, ѿверза́ющаго рꙋ́кꙋ и҆ по бл҃говоле́нїю своемꙋ̀ насыща́ющаго всѧ́кое живо́тно крѣ́постїю бж҃е́ственною: ᲂу҆твердѝ хлѣ́бомъ жи́зненнымъ сердца̀, ѡ҆слабѣ̑вшаѧ сы́тостїю лю́тыхъ на́шихъ прегрѣше́нїй.
И҆́ный. Гла́съ є҃.
І҆рмо́съ: Ви́дите, ви́дите:
Прїиди́те, вни́демъ въ клѣ́ть дꙋше́внꙋю, гдⷭ҇еви мл҃твы воздаю́ще и҆ вопїю́ще: ѻ҆́ч҃е на́шъ, сы́й на нб҃сѣ́хъ, ѡ҆сла́би и҆ ѡ҆ста́ви до́лги на́шѧ, ꙗ҆́кѡ є҆ди́нъ бл҃госе́рдъ.
Дꙋшѝ на́шеѧ ти́хость въ постѣ̀ показꙋ́юще, не сѣ́тꙋимъ ѡ҆ прише́ствїи вожделѣ́нныхъ дне́й, ꙗ҆́кѡ просїѧ́вающемъ на́мъ по́двиги бл҃гоче́стїѧ.
Сла́ва, трⷪ҇ченъ: Безнача́льнаѧ, несозда́ннаѧ трїѷпоста́снаѧ є҆ди́нице, гпⷭ҇жѐ, црⷭ҇тво вѣкѡ́въ: тебѐ сла́витъ, ѻ҆ц҃а̀, и҆ сн҃а, и҆ ст҃а́го дх҃а, мно́жество а҆́гг҃лъ и҆ всѐ є҆стество̀ человѣ́ческое.
Бг҃оро́диченъ: Тебѐ вседобродѣ́тельнꙋю сла́вꙋ ро́да на́шегѡ пое́мъ, тобо́ю бо ѡ҆божи́хомсѧ, дв҃о: и҆́бо родила̀ є҆сѝ на́мъ сп҃са и҆ бг҃а хрⷭ҇та̀, свободи́вшаго на́съ ѿ проклѧ́тїѧ.
Сла́ва тебѣ̀, бж҃е на́шъ, сла́ва тебѣ̀.
Кто̀ ѻ҆́гнь ᲂу҆гасѝ; кто̀ заградѝ ᲂу҆ста̀ ѕвѣрє́мъ; по́стъ, и҆збавле́й ѻ҆́троки и҆з̾ пе́щи и҆ прⷪ҇ро́ка данїи́ла ѿ снѣ́де́нїѧ львѡ́въ: є҆го́же лобыза́имъ и҆ мы̀, бра́тїе.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, въ пло́ть ѡ҆блекі́йсѧ во́лею свое́ю, да сп҃сꙋ̀ а҆да́ма, ѿ ле́сти па́дшаго въ престꙋпле́нїе ѕмі́емъ.
Пѣ́снь и҃.
І҆рмо́съ: Въ кꙋпинѣ̀ на сїна́йстѣй горѣ̀:
Со́нъ лю́тыѧ лѣ́ности ѿложѝ, дꙋшѐ, и҆ ᲂу҆се́рднѡ бо́дрствꙋй къ бж҃е́ствєннымъ за́повѣдемъ. приближа́етсѧ жени́хъ: потщи́сѧ свѣщꙋ̀ носѧ́щи томꙋ̀ во срѣ́тенїе.
Оу҆ѧ́звленна мѧ лю́тѣ ѡ҆рꙋ́жїемъ сласте́й, лѣчбо́ю бл҃госе́рдагѡ твоегѡ̀ манове́нїѧ и҆сцѣли́, ще́дре, ꙗ҆́кѡ да тѧ̀, сло́ве, бл҃года́рнѡ сла́влю во вѣ́ки.
Ѿ страсте́й вре́дныхъ, ѿ за́висти и҆ не́нависти, ѿ всѧ́кїѧ ѕло́бы воздержи́сѧ, дꙋшѐ, пита́ющисѧ снѣ́дьми, сла́дость го́рнюю невеще́ственнѡ хода́тайствꙋющими.
Бг҃оро́диченъ: Бг҃ороди́тельнице чтⷭ҇аѧ, дꙋшѝ моеѧ̀ гноє́нїѧ, и҆ се́рдца стра̑сти, и҆ ᲂу҆ма̀ ᲂу҆клонє́нїѧ и҆сцѣлѝ, ꙗ҆́кѡ є҆ди́на грѣ́шныхъ помо́щница и҆ разорѧ́емыхъ стѣна̀.
И҆́ный.
І҆рмо́съ: Творца̀ тва́ри:
Воздержа́нїемъ дꙋ́шы ѡ҆крили́вше, на нб҃са̀ мл҃твы бл҃гопрїѧ̑тныѧ всѝ принесе́мъ гдⷭ҇еви.
Дх҃ъ ᲂу҆миле́нїѧ прїе́мше, пролїи́мъ сле́зы ко и҆збавле́нїю дꙋ́шъ, пѣсносло́вѧще хрⷭ҇та̀ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Трⷪ҇це є҆диносꙋ́щнаѧ, и҆ є҆ди́нице несозда́ннаѧ, и҆ всѣ́хъ бж҃е, тебѐ превозно́симъ во всѧ̑ вѣ́ки.
Бг҃оро́диченъ: Мл҃твꙋ сотворѝ ѡ҆ пою́щихъ тѧ̀, пречⷭ҇таѧ, и҆зба́вѧтсѧ ѿ всѧ́ческихъ и҆скꙋше́нїй и҆ бѣ́дъ.
Сла́ва тебѣ̀, бж҃е на́шъ, сла́ва тебѣ̀.
Наслажде́нїе бога́тагѡ ѡ҆плева́вше, прїиди́те, съ ла́заремъ пости́мсѧ, да и҆ на́съ согрѣ́етъ а҆враа́мово нѣ́дро.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте, лю́дїе, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ѿ земноро́дныхъ кто̀ слы́ша:
Кто̀ ѿ земноро́дныхъ та́кѡ поползнꙋ́всѧ, бг҃а прогнѣ́ва когда̀; кто̀ стремле́нїємъ ѕло́бы послѣ́дова, и҆ пребыва́лище грѣха̀ ꙗ҆ви́сѧ, ꙗ҆́коже а҆́зъ ѡ҆каѧ́нный; но, бж҃е, и҆зволи́телю млⷭ҇ти, ты́ мѧ ᲂу҆ще́дри.
Бг҃ови́дныхъ а҆́гг҃лъ си̑лы, бл҃гоꙋвѣ́тливаго бг҃а ᲂу҆моли́те, да спасе́тъ мою̀ дꙋ́шꙋ, въ пꙋчи́нѣ жите́йскихъ сласте́й и҆ треволне́нїихъ страсте́й ѡ҆бꙋрева́емꙋю, и҆ въ прило́зѣхъ сопроти́вныхъ дꙋхѡ́въ бѣ́дствꙋющꙋю.
Грѧдѝ, дꙋшѐ, кри́лы ѡ҆блегча́ема, добродѣ́тельми поста̀ ѿ до́лꙋ влекꙋ́щїѧ ѕло́бы воста́ни, и҆ наслади́сѧ видѣ́ньми свѣтлѣ́йшими, сла́дость добродѣ́телей хода́тайствꙋющими, бг҃ови́дна быва́ющи вѣ́рою.
Бг҃оро́диченъ: Кто̀ слы̑шаны сотвори́тъ хвалы̑ тебє̀, чтⷭ҇аѧ, па́че ᲂу҆ма̀ ро́ждшїѧ хвали́маго влⷣкꙋ и҆ гдⷭ҇а, є҆го́же хва́лѧтъ а҆́гг҃льскаѧ чинонача̑лїѧ; того̀ ᲂу҆̀бо молѝ ѡ҆ лю́дехъ согрѣши́вшихъ, дв҃о неискꙋсобра́чнаѧ.
И҆́ный.
І҆рмо́съ: И҆са́їе, ликꙋ́й:
Вре́мѧ бл҃гопрїѧ́тно, де́нь сп҃се́нїй, въ не́мже принесе́мъ бг҃ꙋ да́ры добродѣ́телей, бра́тїе, и҆ ѿложи́вше дѣла̀ тьмы̀, ѡ҆блеце́мсѧ во ѡ҆рꙋ̑жїѧ свѣ́та, ꙗ҆́коже па́ѵелъ вопїе́тъ.
Ꙗ҆́коже гдⷭ҇ь посто́мъ ᲂу҆бѝ врага̀, си́мъ и҆ мы̀, прїиди́те, сокрꙋши́мъ є҆гѡ̀ стрѣ́лы и҆ ловлє́нїѧ: за мѧ̀ и҆дѝ, сатано̀, кі́йждо глаго́люще, внегда̀ и҆́мать и҆скꙋша́ти на́съ.
Сла́ва, трⷪ҇ченъ: Воспѣва́ю тѧ̀, во є҆диносꙋ́щїи безнача́льнаѧ трⷪ҇це, чтⷭ҇на́ѧ, живонача́льнаѧ,несѣко́маѧ є҆ди́нице, ѻ҆́ч҃е нерожде́нне, и҆ рожде́нне сло́ве и҆ сн҃е, и҆ дш҃е ст҃ы́й: сп҃си́ ны пою́щыѧ тѧ̀.
Бг҃оро́диченъ: Превы́ше ᲂу҆ма̀ є҆́сть ржⷭ҇тво̀ твоѐ, бг҃омт҃и: без̾ мꙋ́жа бо зача́тїе въ тебѣ̀, и҆ дв҃и́чески рожде́нїе бы́сть: и҆́бо бг҃ъ є҆́сть роди́выйсѧ: є҆го́же велича́юще, тѧ̀, дв҃о, ᲂу҆бл҃жа́емъ.
Сла́ва тебѣ̀, бж҃е на́шъ, сла́ва тебѣ̀.
Посто́мъ прибли́жшесѧ къ горѣ̀ моли́твы, и҆ мы̀ се́рдцемъ чи́стымъ да ᲂу҆́зримъ бг҃а, прїе́млюще внꙋ́трь скрижа̑ли за́повѣдей, ꙗ҆́коже мѡѷсе́й, сла́вою ѡ҆блиста́ющесѧ лице́мъ любвѐ є҆гѡ̀.
І҆рмо́съ: И҆са́їе, ликꙋ́й: дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка,восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Свѣти́ленъ.
На стїхо́внѣ самогла́сенъ днѐ, гла́съ г҃:
Начне́мъ, лю́дїе, непоро́чный по́стъ, и҆́же є҆́сть дꙋша́мъ сп҃се́нїе: порабо́таимъ гдⷭ҇еви со стра́хомъ, є҆ле́емъ бл҃готворе́нїѧ главы̑ пома́жемъ, и҆ водо́ю чистоты̀ ли́ца ᲂу҆мы́имъ, не многоглаго́лемъ въ мл҃твахъ, но ꙗ҆́кѡ наꙋчи́хомсѧ, та́кѡ возопїи́мъ: ѻ҆́ч҃е на́шъ, и҆́же на нб҃сѣ́хъ, ѡ҆ста́ви на́мъ прегрѣшє́нїѧ на̑ша, ꙗ҆́кѡ чл҃вѣколю́бецъ.
Сті́хъ а҃: И҆спо́лнихомсѧ заꙋ́тра:
Па́ки то́йже самогла́сенъ.
Сті́хъ в҃: И҆ бꙋ́ди свѣ́тлость:
Та́же мч҃нченъ: Царе́й и҆ мꙋчи́телей стра́хъ ѿри́нꙋша хрⷭ҇тѡ́вы во́ини, и҆ бл҃годерзнове́ннѡ и҆ мꙋ́жественнѡ того̀ и҆сповѣ́даша, всѣ́хъ гдⷭ҇а бг҃а и҆ цр҃ѧ̀ на́шего: и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ:
Бцⷣе, предста́тельство всѣ́хъ молѧ́щихсѧ, тобо́ю дерза́емъ, тобо́ю хва́лимсѧ, въ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебє̀ за непотрє́бныѧ рабы̑ твоѧ̑.
На ѕ҃-мъ часѣ̀ тропа́рь прⷪ҇ро́чества, гла́съ а҃:
Ꙗ҆́кѡ прише́льцы є҆смы̀ на землѝ, ꙗ҆́коже всѝ ѻ҆тцы̀ на́ши, кра́ткое житїѐ на́ше без̾ грѣ́ха сохранѝ, сп҃се на́шъ, и҆ поми́лꙋй на́съ, ꙗ҆́кѡ чл҃вѣколю́бецъ.
Прокі́менъ, ѱало́мъ є҃, гла́съ д҃: Вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й. Сті́хъ: Глаго́лы моѧ̑ внꙋшѝ, гдⷭ҇и, разꙋмѣ́й зва́нїе моѐ.
Прⷪ҇ро́чества и҆са́їина чте́нїе. [Глава̀ а҃, ст. ѳ҃і-л҃а: глава̀ в҃, ст. а҃-г҃].
Та́кѡ глаго́летъ гдⷭ҇ь: а҆́ще хо́щете, и҆ послꙋ́шаете менѐ, бл҃га̑ѧ землѝ снѣ́сте: а҆́ще же не хо́щете, нижѐ послꙋ́шаете менѐ, ме́чь вы̀ поѧ́стъ: ᲂу҆ста́ бо гдⷭ҇нѧ глаго́лаша сїѧ̑. Ка́кѡ бы́сть блꙋдни́ца гра́дъ вѣ́рный сїѡ́нъ, по́лнъ сꙋда̀, въ не́мже пра́вда почива́ше, ны́нѣ же [въ не́мъ] ᲂу҆бі̑йцы: Сребро̀ ва́ше неискꙋше́но, корчє́мницы твоѝ мѣша́ютъ вїно̀ съ водо́ю. Кнѧ́зи твоѝ не покарѧ́ютсѧ, ѻ҆́бщницы татє́мъ, лю́бѧще да́ры, гонѧ́ще воздаѧ́нїе, си̑рымъ не сꙋдѧ́щїи, и҆ сꙋдꙋ̀ вдови́цъ не внима́ющїи. Сегѡ̀ ра́ди та́кѡ глаго́летъ влⷣка гдⷭ҇ь саваѡ́ѳъ: го́ре крѣ̑пкимъ во і҆и҃ли: не преста́нетъ бо ꙗ҆́рость моѧ̀ на проти̑вныѧ, и҆ сꙋ́дъ врагѡ́мъ мои̑мъ сотворю̀: и҆ наведꙋ̀ рꙋ́кꙋ мою̀ на тѧ̀, и҆ разжегꙋ̀ въ чистотꙋ̀, непокарѧ́ющихсѧ же погꙋблю̀, и҆ ѿимꙋ̀ всѣ́хъ беззако́нныхъ ѿ тебє̀, и҆ всѣ́хъ го́рдыхъ смирю̀. И҆ приста́влю сꙋдїи̑ твоѧ̑ ꙗ҆́коже пре́жде, и҆ совѣ́тники твоѧ̑ ꙗ҆́кѡ ѿ нача́ла: и҆ по си́хъ нарече́шисѧ гра́дъ пра́вды, ма́ти градовѡ́мъ, вѣ́рный сїѡ́нъ. Съ сꙋдо́мъ бо сп҃се́тсѧ плѣне́нїе є҆гѡ̀ и҆ съ ми́лостынею. И҆ сокрꙋша́тсѧ беззако́ннїи и҆ грѣ̑шницы вкꙋ́пѣ, и҆ ѡ҆ста́вившїи гдⷭ҇а сконча́ютсѧ: зане́же постыдѧ́тсѧ ѡ҆ і҆́дѡлѣхъ свои́хъ, и҆́хже са́ми восхотѣ́ша, и҆ посра́мѧтсѧ ѡ҆ садѣ́хъ свои́хъ, и҆́хже возжелѣ́ша. Бꙋ́дꙋтъ бо ꙗ҆́кѡ тереві́нѳъ ѿме́тнꙋвшїй ли̑ствїѧ [своѧ̑,] и҆ ꙗ҆́кѡ вертогра́дъ не и҆мы́й воды̀. И҆ бꙋ́детъ крѣ́пость и҆́хъ ꙗ҆́кѡ сте́бль и҆згре́бїѧ, и҆ дѣ̑ланїѧ и҆́хъ ꙗ҆́кѡ и҆́скры ѻ҆́гнєнныѧ: и҆ сожгꙋ́тсѧ беззакѡ́нницы и҆ грѣ̑шницы вкꙋ́пѣ, и҆ не бꙋ́детъ ᲂу҆гаша́ѧй. Сло́во бы́вшее ѿ гдⷭ҇а ко и҆са́їи сы́нꙋ а҆мѡ́совꙋ ѡ҆ і҆ꙋде́и и҆ ѡ҆ і҆ерⷭ҇ли́мѣ. Ꙗ҆́кѡ бꙋ́детъ въ послѣ̑днїѧ дни̑ ꙗ҆вле́на гора̀ гдⷭ҇нѧ, и҆ до́мъ бж҃їй на версѣ̀ го́ръ, и҆ возвы́ситсѧ превы́ше холмѡ́въ: и҆ прїи́дꙋтъ къ не́й всѝ ꙗ҆зы́цы. И҆ по́йдꙋтъ ꙗ҆зы́цы мно́зи и҆ рекꙋ́тъ: прїиди́те, и҆ взы́демъ на го́рꙋ гдⷭ҇ню и҆ въ до́мъ бг҃а і҆а́кѡвлѧ, и҆ возвести́тъ на́мъ пꙋ́ть сво́й, и҆ по́йдемъ по немꙋ̀.
Прокі́менъ, ѱало́мъ ѕ҃, гла́съ д҃: Гдⷭ҇и, да не ꙗ҆́ростїю твое́ю ѡ҆бличи́ши менѐ. Сті́хъ: Поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь.
Во вто́рникъ ве́чера.
На Гдⷭ҇и воззва́хъ, стїхи̑ры, гла́съ в҃.
Подо́бенъ: Ꙗ҆́кѡ ꙗ҆ви́лсѧ є҆сѝ, хрⷭ҇тѐ:
Снѣ́дїю го́рькою дре́вле и҆зринове́ни бы́вше и҆з̾ раѧ̀, воздержа́нїемъ страсте́й потщи́мсѧ всели́тисѧ, взыва́юще бг҃ꙋ на́шемꙋ: на крⷭ҇тѣ̀ простры́й дла̑ни твоѧ̑, ѻ҆́цетъ пи́вый и҆ же́лчь вкꙋси́вый и҆ бѡлѣ̑зни претерпѣ́вый ѿ гвозде́й, горча́йшыѧ сла̑сти всѧ̑ ѿ дꙋ́шъ на́шихъ и҆згвозди́вый, ра́ди бл҃госе́рдїѧ щедро́тъ, сп҃сѝ рабы̑ твоѧ̑.
Дре́ва снѣ́дїю нѣ́когда и҆згна́ни бы́вше и҆з̾ раѧ̀, крⷭ҇то́мъ твои́мъ во́нь всели́хомсѧ, є҆го́же въ мл҃твꙋ тебѣ̀ приво́димъ, многомлⷭ҇тиве, и҆ вѣ́рнѡ тѝ всѝ мо́лимсѧ: низпослѝ на́мъ ны́нѣ, во вре́мѧ воздержа́нїѧ, и҆сто́чники сле́зъ, ѡ҆чища́ющыѧ всю̀ скве́рнꙋ страсте́й и҆ прегрѣше́нїй на́шихъ, да вси́ ти вопїе́мъ прилѣ́жнѡ: гдⷭ҇и, сла́ва тебѣ̀.
И҆́на стїхи́ра, гла́съ то́йже
Подо́бенъ: Содѣ́ѧнныхъ мѝ.
Воздержа́нїѧ наслажде́нїе и҆ мнѣ̀, сло́ве, да́рꙋй, ꙗ҆́коже а҆да́мꙋ ра́й нѣ́когда: вкꙋша́ти ѿ всѧ́кїѧ твоеѧ̀ за́повѣди, бж҃е на́шъ, и҆ воздержава́тисѧ при́снѡ ѿ плода̀ грѣха̀, є҆го́же запрети́лъ є҆си:̀ да живоно́сныѧ стрⷭ҇ти твоеѧ̀̀ крⷭ҇тныѧ въ ра́дости дости́гнꙋ.
И҆ въ мине́и, г҃. Сла́ва, и҆ ны́нѣ, крⷭ҇тобг҃оро́диченъ.
Прокі́менъ, ѱало́мъ з҃: Гдⷭ҇и бж҃е мо́й, на тѧ̀ ᲂу҆пова́хъ, сп҃си́ мѧ. Сті́хъ: Ѿ всѣ́хъ гонѧ́щихъ мѧ̀ и҆зба́ви мѧ̀.
Бытїѧ̀ чте́нїе. [Глава̀ а҃, ст. д҃і-к҃г.]
Речѐ бг҃ъ: да бꙋ́дꙋтъ свѣти̑ла на тве́рди небе́снѣй, ѡ҆свѣща́ти зе́млю, и҆ разлꙋча́ти междꙋ̀ дне́мъ, и҆ междꙋ̀ но́щїю: и҆ да бꙋ́дꙋтъ въ зна́мєнїѧ, и҆ во времена̀, и҆ во дни̑, и҆ въ лѣ̑та: и҆ да бꙋ́дꙋтъ въ просвѣще́нїе на тве́рди нбⷭ҇нѣй, ꙗ҆́кѡ свѣти́ти по землѝ. И҆ бы́сть та́кѡ. И҆ сотворѝ бг҃ъ два̀ свѣти̑ла вели̑каѧ: свѣти́ло вели́кое въ нача̑ла днѐ, и҆ свѣти́ло ме́ньшее въ нача̑ла но́щи, и҆ ѕвѣ́зды. И҆ положѝ ѧ҆̀ бг҃ъ на тве́рди нбⷭ҇нѣй, ꙗ҆́кѡ свѣти́ти на зе́млю, и҆ владѣ́ти дне́мъ и҆ но́щїю, и҆ разлꙋча́ти междꙋ̀ свѣ́томъ и҆ междꙋ̀ тьмо́ю: и҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь четве́ртый. И҆ речѐ бг҃ъ: да и҆зведꙋ́тъ во́ды га́ды дꙋ́шъ живы́хъ, и҆ пти̑цы лета́ющыѧ по землѝ, по тве́рди небе́снѣй. И҆ бы́сть та́кѡ. И҆ сотворѝ бг҃ъ ки́ты вели̑кїѧ, и҆ всѧ́кꙋ дꙋ́шꙋ живо́тныхъ гадѡ́въ, ꙗ҆́же и҆зведо́ша во́ды по родѡ́мъ и҆́хъ, и҆ всѧ́кꙋ пти́цꙋ перна́тꙋ по ро́дꙋ: и҆ ви́дѣ бг҃ъ, ꙗ҆́кѡ дѡбра̀. И҆ бл҃гословѝ ѧ҆̀ бг҃ъ, глаго́лѧ: расти́тесѧ, и҆ мно́житесѧ, и҆ напо́лните во́ды, ꙗ҆̀же въ морѧ́хъ: и҆ пти̑цы да ᲂу҆мно́жатсѧ на землѝ. И҆ бы́сть ве́черъ, и҆ бы́сть ᲂу҆́тро, де́нь пѧ́тый.
Прокі́менъ, ѱало́мъ и҃, гла́съ є҃: Гдⷭ҇и, гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. Сті́хъ: Ꙗ҆́кѡ взѧ́тсѧ великолѣ́пїе твоѐ превы́ше нб҃съ.
При́тчей чте́нїе. [Глава̀ а҃, ст. к҃-л҃г.]
Премꙋ́дрость во и҆схо́дѣхъ пое́тсѧ, въ сто́гнахъ же дерзнове́нїе во́дитъ. На кра́ехъ же стѣ́нъ проповѣ́дꙋетсѧ, ᲂу҆ вра́тъ же си́льныхъ присѣди́тъ, во вратѣ́хъ же гра́да дерза́ющи глаго́летъ: Е҆ли́ко ᲂу҆́бѡ вре́мѧ неѕло́бивїи держа́тсѧ пра́вды, не постыдѧ́тсѧ: безꙋ́мнїи же доса́ды сꙋ́ще жела́телїе, нечести́вїи бы́вше, возненави́дѣша чꙋ́вство, и҆ пови́нни бы́ша ѡ҆бличе́нїємъ. Сѐ предложꙋ̀ ва́мъ моегѡ̀ дыха́нїѧ рече́нїе, наꙋчꙋ́ же ва́съ моемꙋ̀ словесѝ. Поне́же зва́хъ, и҆ не послꙋ́шасте, и҆ простира́хъ словеса̀, и҆ не внима́сте: но ѿмета́сте моѧ̑ совѣ́ты, и҆ мои̑мъ ѡ҆бличе́нїємъ не внима́сте: ᲂу҆̀бо и҆ а҆́зъ ва́шей поги́бели посмѣю́сѧ, пора́дꙋюсѧ же, є҆гда̀ прїи́детъ ва́мъ па́гꙋба. и҆ є҆гда̀ прїи́детъ на вы̀ внеза́пꙋ мѧте́жъ, низвраще́нїе же подо́бнѡ бꙋ́ри прїи́детъ, и҆лѝ є҆гда̀ прїи́детъ ва́мъ печа́ль и҆ градоразоре́нїе, и҆лѝ є҆гда̀ на́йдетъ на вы̀ па́гꙋба. Бꙋ́детъ бо, є҆гда̀ призове́те мѧ̀, а҆́зъ же не послꙋ́шаю ва́съ: взы́щꙋтъ менѐ ѕлі́и, и҆ не ѡ҆брѧ́щꙋтъ. Возненави́дѣша бо премꙋ́дрость, словесе́ же гдⷭ҇нѧ не прїѧ́ша: нижѐ хотѣ́ша внима́ти мои̑мъ совѣ́тѡмъ, рꙋга́хꙋсѧ же мои̑мъ ѡ҆бличе́нїємъ. Тѣ́мже снѣдѧ́тъ свои́хъ пꙋте́й плоды̀, и҆ своегѡ̀ нече́стїѧ насы́тѧтсѧ. И҆́бо, занѐ ѡ҆би́дѣша младе́нцєвъ, ᲂу҆бїе́ни бꙋ́дꙋтъ, и҆ и҆стѧза́нїе нечести̑выѧ погꙋби́тъ. Мене́ же слꙋ́шаѧй всели́тсѧ на ᲂу҆пова́нїе, и҆ почі́етъ без̾ стра́ха ѿ всѧ́кагѡ ѕла̀.
Та́же, Сподо́би, гдⷭ҇и:
На стїхо́внѣ стїхи́ра самогла́сна днѐ, гла́съ и҃.
По́стъ не воздержа́нїе ѿ бра́шенъ то́чїю соверши́мъ, но ѿ всѧ́кїѧ веще́ственныѧ стра́сти ѿчꙋжде́нїе: да царю́ющꙋю над̾ на́ми пло́ть порабо́тивше, досто́йни бꙋ́демъ прича́стїѧ а҆́гнца, во́лею за мі́ръ закла́ннагѡ, сн҃а бж҃їѧ, и҆ дх҃о́внѡ пра́зднꙋемъ сп҃сово и҆з̾ ме́ртвыхъ воскрⷭ҇нїе, на высотꙋ̀ добродѣ́телей возне́сшесѧ во свѣ́тлости и҆ наслажде́нїи и҆зрѧ́дныхъ дѣ́лъ, веселѧ́ще чл҃вѣколю́бца.
Сті́хъ: Къ тебѣ̀ возведо́хъ ѻ҆́чи моѝ:
Па́ки тꙋ́же стїхи́рꙋ.
Сті́хъ в҃: Поми́лꙋй на́съ, гдⷭ҇и:
Мч҃нченъ: Мч҃нцы твоѝ, гдⷭ҇и, забы́вше сꙋ̑щаѧ въ житїѝ, презрѣ́вше и҆ мꙋ̑ки, ра́ди бꙋ́дꙋщїѧ жи́зни, сеѧ̀ наслѣ̑дницы ꙗ҆ви́шасѧ: тѣ́мже и҆ со а҆́гг҃лы ра́дꙋютсѧ. тѣ́хъ мл҃твами, да́рꙋй лю́демъ твои̑мъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ:
Ѽ пресла́внагѡ чꙋдесѐ! ѽ та́инства но́вагѡ! ѽ ᲂу҆жа́снагѡ начина́нїѧ! дв҃а глаго́лаше, є҆гда̀ ви́дѣ на крⷭ҇тѣ́ посредѣ̀ двою̀ разбѡ́йникꙋ повѣ́шена, є҆го́же неболѣ́зненнѡ чꙋ́днѡ породѝ, и҆ пла́каше глаго́лющи: ᲂу҆вы̀ мнѣ̀, ча́до любе́знѣйшее! ка́кѡ лю́тый и҆ небл҃года́рный наро́дъ тѧ̀ ко крⷭ҇тꙋ̀ пригвоздѝ;
И҆ про́чее послѣ́дованїе, ꙗ҆́коже и҆з̾ѧви́сѧ.
Во вто́рникъ пе́рвыѧ седми́цы на повече́рїи,
по є҆́же рещѝ ѱало́мъ: Бж҃е, въ по́мощь мою̀:
пое́мъ вели́кїй канѡ́нъ. Гла́съ ѕ҃. І҆рмосы̀ по два́жды.
Пѣ́снь а҃.
І҆рмо́съ: Помо́щникъ и҆ покрови́тель:
Ка́їново преше́дъ ᲂу҆бі́йство, произволе́нїемъ бы́хъ ᲂу҆бі́йца со́вѣсти дꙋше́внѣй, ѡ҆живи́въ пло́ть и҆ воева́въ на ню̀ лꙋка́выми мои́ми дѣѧ́ньми.
А҆́велевѣ пра́вдѣ не ᲂу҆подо́бихсѧ, і҆и҃се, дарѡ́въ тебѣ̀ прїѧ́тныхъ не принесо́хъ когда̀, ни дѣѧ́нїй бж҃е́ственныхъ, ни же́ртвы чи́стыѧ, ни житїѧ̀ непоро́чнагѡ.
Ꙗ҆́кѡ ка́їнъ и҆ мы̀, дꙋшѐ ѡ҆каѧ́ннаѧ, всѣ́хъ содѣ́телю дѣѧ̑нїѧ сквє́рнаѧ и҆ же́ртвꙋ поро́чнꙋю и҆ непотре́бное житїѐ принесо́хомъ вкꙋ́пѣ: тѣ́мже и҆ ѡ҆сꙋди́хомсѧ.
Бре́нїе, ꙗ҆́кѡ скꙋде́льникъ, живосозда́въ, вложи́лъ є҆сѝ въ мѧ̀ пло́ть и҆ кѡ́сти, и҆ дыха́нїе и҆ жи́знь: но, ѽ тво́рче мо́й, и҆зба́вителю мо́й и҆ сꙋдїѐ, ка́ющасѧ прїими́ мѧ.
И҆сповѣ́даю тѝ, сп҃се, грѣхѝ, ꙗ҆̀же содѣ́ѧхъ, и҆ дꙋшѝ и҆ тѣ́ла моегѡ̀ ꙗ҆́звы, ꙗ҆̀же внꙋ́трь ᲂу҆бі́йственнїи по́мыслы разбо́йнически на мѧ̀ возложи́ша.
А҆́ще и҆ согрѣши́хъ, сп҃се, но вѣ́мъ, ꙗ҆́кѡ чл҃вѣколю́бецъ є҆сѝ, наказꙋ́еши ми́лостивнѡ, и҆ милосе́рдствꙋеши те́плѣ: слезѧ́ща зри́ши, и҆ притека́еши ꙗ҆́кѡже ѻ҆ц҃ъ, призыва́ѧ блꙋ́днаго.
Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возьмѝ ѿ менє̀ бре́мѧ тѧ́жкое грѣхо́вное: и҆ ꙗ҆́кѡ бл҃госе́рда, да́ждь мѝ сле́зы ᲂу҆миле́нїѧ.
Бг҃оро́диченъ: Бцⷣе, наде́ждо и҆ предста́тельство тебѐ пою́щихъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ влⷣчца чтⷭ҇аѧ, ка́ющасѧ прїими́ мѧ.
Пѣ́снь в҃.
І҆рмо́съ: Вонмѝ, нб҃о, и҆ возглаго́лю:
Сшива́ше кѡ́жныѧ ри̑зы грѣ́хъ и҆ мнѣ̀, ѡ҆бнажи́въ мѧ̀ ѿ пе́рвыѧ бг҃отка́нныѧ ѡ҆де́жды.
Ѡ҆бложе́нъ є҆́смь ѡ҆дѣѧ́нїемъ стꙋда̀, ꙗ҆́коже ли́ствїемъ смоко́внымъ, во ѡ҆бличе́нїе мои́хъ самовла́стныхъ страсте́й.
Ѡ҆дѣ́ѧхсѧ въ ри́зꙋ сра́мнꙋю и҆ ѡ҆кровавле́ннꙋю стꙋ́днѡ, тече́нїемъ стра́стнагѡ и҆ любосла́стнагѡ житїѧ̀.
Впадо́хъ въ па́гꙋбꙋ стра́стей и҆ въ веще́ственное тлѣ́нїе, и҆ ѿто́лѣ ны́нѣ вра́гъ мнѣ̀ досажда́етъ.
Любове́щное и҆ любостѧжа́тельное житїѐ нестѧжа́нїю предпоче́тъ, ны́нѣ, сп҃се, тѧ́жкимъ бре́менемъ ѡ҆бложе́нъ є҆́смь.
Оу҆краси́хъ пло́ти и҆стꙋка́нъ пе́стрымъ ѡ҆дѣѧ́нїемъ скве́рныхъ помышле́нїй, и҆ ѡ҆сꙋжда́юсѧ.
Ѡ҆ внѣ́шнемъ бл҃гоꙋкраше́нїи є҆ди́номъ прилѣ́жнѡ попеко́хсѧ, презрѣ́въ внꙋ́треннюю бг҃оѡбра́знꙋю ски́нїю.
Погребо́хъ страстьмѝ добро́тꙋ пе́рвагѡ ѡ҆́браза, ю҆́же, сп҃сѐ, ꙗ҆́кѡже нѣ́когда дра́хмꙋ, взыска́въ ѡ҆брѧ́щи.
Согрѣши́хъ, ꙗ҆́коже блꙋдни́ца вопїю́ ти: є҆ди́нъ согрѣши́хъ тебѣ̀: ꙗ҆́коже мѵ́ро прїимѝ, сп҃се, и҆ моѧ̑ сле́зы.
Млⷭ҇тивъ бꙋ́ди, ꙗ҆́коже мыта́рь вопїю́ ти, сп҃се: млⷭ҇тивъ бꙋ̀ди мѝ: никто́же бо ѿ сꙋ́щихъ и҆з̾ а҆да́ма, ꙗ҆́коже а҆́зъ, согрѣшѝ тебѣ̀.
Сла́ва, трⷪ҇ченъ: Є҆ди́наго тѧ̀ въ трїе́хъ ли́цахъ, бг҃а всѣ́хъ пою̀, ѻ҆ц҃а̀, и҆ сн҃а, и҆ дх҃а ст҃а́го.
Бг҃оро́диченъ: Пречⷭ҇таѧ бцⷣе дв҃о, є҆ди́на всепѣ́таѧ, молѝ прилѣ́жнѡ, сп҃сти́сѧ на́мъ.
Пѣ́снь г҃.
І҆рмо́съ: Оу҆твердѝ, гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.
И҆сто́чникъ жи́зни стѧжа́хъ тебѐ, сме́рти низложи́телѧ, и҆ вопїю́ ти ѿ се́рдца моегѡ̀ пре́жде конца̀: согрѣши́хъ, млⷭ҇тивъ бꙋ́ди и҆ сп҃си́ мѧ.
Согрѣши́хъ, гдⷭ҇и, согрѣши́хъ тебѣ̀, млⷭ҇тивъ бꙋ́ди мѝ: нѣ́сть бо и҆́же согрѣшѝ въ человѣ́цѣхъ, є҆гѡ́же не превзыдо́хъ прегрѣше́ньми.
При нѡ́и блꙋ́дствовавшымъ подража́хъ, сп҃се, ѻ҆́нѣхъ наслѣ́дствовавъ ѡ҆сꙋжде́нїе, въ пото́пѣ погрꙋже́нїѧ.
Ха́мꙋ ѻ҆́номꙋ ѻ҆тцеꙋбі́йцѣ подража́вши, дꙋшѐ, не покры́ла є҆сѝ сра́ма бли́жнѧгѡ, вспѧ́ть лице́мъ ѡ҆брати́вшисѧ.
Запале́нїѧ грѣхо́внагѡ, ꙗ҆́коже лѡ́тъ, бѣ́гай, дꙋшѐ моѧ̀: бѣ́гай содо́мы и҆ гомо́рры: бѣ́гай пла́мене всѧ́кагѡ безслове́снагѡ жела́нїѧ.
Поми́лꙋй, гдⷭ҇и, поми́лꙋй мѧ̀, вопїю́ ти, є҆гда̀ прїи́деши со а҆́гг҃лы твои́ми, возда́ти всѣ̑мъ по достоѧ́нїю дѣѧ́нїй.
Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ ѵ҆поста́сей воспѣва́емое, сп҃си́ ны, вѣ́рою покланѧ́ющыѧсѧ держа́вѣ твое́й.
Бг҃оро́диченъ: Ѿ ѻ҆ц҃а̀ безлѣ́тна сн҃а, неискꙋсомꙋ́жнѡ въ лѣ́то родила̀ є҆сѝ, бг҃ороди́тельнице, стра́нное чꙋ́до, пребы́вши дв҃а млеко́мъ пита́ющи.
Пѣ́снь д҃.
І҆рмо́съ: Оу҆слы́ша прⷪ҇ро́къ:
Бдѝ, ѽ дꙋшѐ моѧ̀! Подвиза́йсѧ ꙗ҆́коже дре́вле вели́кїй въ патрїа́рсѣхъ, да стѧ́жеши дѣѧ́нїе съ вѣ́дѣнїемъ, да бꙋ́деши ᲂу҆́мъ зрѧ́й бг҃а, и҆ дости́гнеши непристꙋ́пнагѡ мра́ка въ видѣ́нїи, и҆ бꙋ́деши вели́кїй кꙋпе́цъ.
Двана́десѧть патрїа́рхѡвъ породи́въ, вели́кїй въ патрїа́рсѣхъ та́инственнѡ ᲂу҆твердѝ тебѣ̀, дꙋшѐ моѧ̀, лѣ́ствицꙋ дѣ́ѧтельнагѡ восхожде́нїѧ: дѣ́ти ꙗ҆́кѡ степє́ни, шє́ствїѧ ꙗ҆́кѡ восхождє́нїѧ, премꙋ́дреннѡ подложи́въ.
И҆са́ѵꙋ возненави́дѣнномꙋ ревнꙋ́ющи, дꙋшѐ ѡ҆каѧ́ннаѧ, ѿдала̀ є҆сѝ запина́телю твоемꙋ̀ пе́рвыѧ добро́ты пе́рвенство, и҆ ѻ҆те́ческїѧ мл҃твы ѿпа́ла є҆сѝ, и҆ два́жды поползнꙋ́ласѧ є҆сѝ, дѣѧ́нїемъ и҆ вѣ́дѣнїемъ: тѣ́мже ны́нѣ пока́йсѧ.
Є҆дѡ́мъ и҆са́ѵъ нарече́сѧ, кра́йнѧгѡ ра́ди женонеи́стовнагѡ смѣше́нїѧ: невоздержа́нїемъ бо при́снѡ разжига́емь и҆ сластьмѝ ѡ҆сквернѧ́емь, є҆дѡ́мъ и҆менова́сѧ, є҆́же глаго́летсѧ разжже́нїе дꙋшѝ любогрѣхо́вныѧ.
І҆́ѡва на гно́ищи ѡ҆правда́на слы́шавши, ѽ дꙋшѐ моѧ̀, тогѡ̀ мꙋ́жествꙋ не поревнова́ла є҆сѝ, крѣ́пости и҆зволе́нїѧ не и҆мѣ́ла є҆сѝ во всѣ́хъ, ꙗ҆̀же позна́ла є҆сѝ, ꙗ҆́же вѣ́си, и҆ и҆́миже и҆скꙋси́ласѧ є҆сѝ, но ꙗ҆ви́ласѧ є҆сѝ не и҆мꙋ́щи терпѣ́нїѧ.
Пре́жде на престо́лѣ, ны́нѣ на́гъ на гно́ищи гно́енъ: мно́гїй въ ча́дѣхъ и҆ сла́вный, внеза́пꙋ безча́денъ и҆ бездо́мокъ гно́ище бо пала́тꙋ и҆ стрꙋ́пы би́серїе вмѣнѧ́ше.
Сла́ва, трⷪ҇ченъ: Нераздѣ́льное сꙋщество́мъ, несли́тное ли̑цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное: вопїю́ ти пѣ́снь вели́кꙋю, въ вы́шнихъ трикра́тнѡ пѣсносло́вимꙋю.
Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши во ѻ҆бои́хъ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ неискꙋсомꙋ́жнаѧ. и҆дѣ́же хо́щетъ бг҃ъ, побѣжда́етсѧ є҆стества̀ чи́нъ: твори́тъ бо, є҆ли́ка хо́щетъ.
Пѣ́снь є҃.
І҆рмо́съ: Ѿ но́щи ᲂу҆́тренююща:
Ѡ҆ мѡѷсе́овѣ ковче́жцѣ слы́шала є҆сѝ, дꙋшѐ, носи́мѣмъ вода́ми, волна́ми рѣ́чными, ꙗ҆́кѡ въ черто́зѣ дре́вле ᲂу҆бѣжа́вшемъ ѿ го́рькагѡ ловле́нїѧ совѣ́та фараѡні́тска.
А҆́ще слы́шала є҆сѝ, дꙋшѐ ѡ҆каѧ́ннаѧ, ѡ҆ ба́бахъ ᲂу҆бива́вшихъ нѣ́когда безвозра́стное мꙋ́жеское, цѣломꙋ́дрїѧ дѣѧ́нїе: ны́нѣ, ꙗ҆́кѡ вели́кїй мѡѷсе́й, ссѝ премꙋ́дрость.
Ꙗ҆́коже мѡѷсе́й вели́кїй, є҆гѵ́петскїй ᲂу҆́мъ порази́вши, не ᲂу҆би́ла є҆сѝ, дꙋшѐ ѡ҆каѧ́ннаѧ: и҆ ка́кѡ всели́шисѧ, глаго́ли, въ пꙋсты́ню страсте́й покаѧ́нїемъ;
Въ пꙋсты́ню всели́сѧ вели́кїй мѡѷсе́й: грѧдѝ ᲂу҆́бо, дꙋшѐ, подража́й тогѡ̀ житїю̀, да и҆ бг҃оѧвле́нїе въ кꙋпинѣ̀ ви́дѣти сподо́бишисѧ.
Мѡѷсе́овъ же́злъ, ᲂу҆дарѧ́ющь мо́ре и҆ ѡ҆гꙋстѣва́ющь глꙋбинꙋ̀, воѡбража́й, дꙋшѐ, во ѡ҆́бразъ крⷭ҇та̀ бж҃е́ственнагѡ: и҆́мже мо́жеши и҆ ты̀ вели̑каѧ соверши́ти.
А҆арѡ́нъ приноша́ше бг҃ꙋ ѻ҆́гнь непоро́чный, неле́стный: но ѻ҆фні̀ и҆ фїнее́съ, ꙗ҆́кѡже ты̀, дꙋшѐ, принесо́ша чꙋжде́е бг҃ꙋ, ѡ҆скверне́нное житїѐ.
Сла́ва, трⷪ҇ченъ: Тѧ̀, трⷪ҇це, сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ, ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.
Бг҃оро́диченъ: И҆з̾ тебє̀ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ со собо́ю человѣ́ческое є҆стество̀.
Пѣ́снь ѕ҃.
І҆рмо́съ: Возопи́хъ всѣ́мъ се́рдцемъ мои́мъ:
Во́лны прегрѣше́нїй мои́хъ, сп҃се, ꙗ҆́кѡ въ мо́ри чермнѣ́мъ возвра́щшѧсѧ, покры́ша мѧ̀ внеза́пꙋ, ꙗ҆́кѡже нѣ́когда є҆гѵ́птѧны и҆ трїста́ты.
Неразꙋ́мное произволе́нїе стѧжа́ла є҆сѝ, дꙋшѐ, ꙗ҆́кѡже пре́жде і҆и҃ль: бж҃е́ственнѣй бо ма́ннѣ несмы́сленнѡ предпочла̀ є҆сѝ любосла́стное страсте́й ѡ҆б̾ѧде́нїе.
Кла́дѧзи ханане́йскихъ мы́слей предпочла̀ є҆сѝ, дꙋшѐ, жи́лѣ ка́мене, и҆з̾ негѡ́же ꙗ҆́кѡ ча́ша премꙋ́дрости и҆злива́етъ то́ки бг҃осло́вїѧ.
Свина̑ѧ мѧса̀ и҆ котлы̀, и҆ є҆гѵ́петскꙋю пи́щꙋ предпочла̀ є҆сѝ нбⷭ҇нѣй, дꙋшѐ моѧ̀, ꙗ҆́коже дре́вле неразꙋ́мнїи лю́дїе въ пꙋсты́ни.
Є҆гда̀ ᲂу҆да́ри мѡѷсе́й ра́бъ тво́й жезло́мъ ка́мень, ѡ҆бра́знѡ животвори̑ваѧ ре́бра твоѧ̑, сп҃се, проѡбразова́ше, и҆з̾ ни́хже всѝ питїѐ жи́зни почерпа́емъ.
И҆спыта́й, дꙋшѐ, и҆ смотрѧ́й, ꙗ҆́коже і҆исꙋ́съ наѵи́нъ, ѡ҆бѣтова́нїѧ зе́млю, какова̀ є҆́сть, и҆ всели́сѧ въ ню̀ бл҃гозако́нїемъ.
Сла́ва, трⷪ҇ченъ: Трⷪ҇ца є҆́смь про́ста, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ молѝ, бцⷣе, да мл҃твами твои́ми ѡ҆правди́мсѧ.
Конда́къ:
Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ. воспрѧнѝ ᲂу҆́бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й и҆ всѧ̑ и҆сполнѧ́ѧй.
Пѣ́снь з҃.
І҆рмо́съ: Согрѣши́хомъ, беззако́нновахомъ:
Кївѡ́тъ внегда̀ ноша́шесѧ на колесни́цѣ, ѻ҆за̀ ѻ҆́ный, є҆гда̀, совра́щшꙋсѧ тельцꙋ̀, то́чїю коснꙋ́сѧ, и҆скꙋше́нъ бы́сть бж҃їимъ гнѣ́вомъ: но тогѡ̀ дерзнове́нїѧ ᲂу҆бѣжа́вши, дꙋшѐ, почита́й бж҃е́ствєннаѧ до́брѣ.
Слы́шала є҆сѝ ѡ҆ а҆вессалѡ́мѣ, ка́кѡ на є҆стество̀ воста̀: позна́ла є҆сѝ тогѡ̀ сквє́рнаѧ дѣѧ̑нїѧ, и҆́миже ѡ҆сквернѝ ло́же дв҃да ѻ҆тца̀. но ты̀ подража́ла є҆сѝ тогѡ̀ стра̑стнымъ и҆ любосла̑стнымъ стремле́нїємъ.
Покори́ла є҆сѝ непоработи́мое твоѐ досто́инство тѣ́лꙋ твоемꙋ̀: и҆но́го бо а҆хїтофе́ла ѡ҆брѣ́тши врага̀, дꙋшѐ, послꙋ́шала є҆сѝ тогѡ̀ совѣ́тѡвъ: но сїѧ̑ разсы́па са́мъ хрⷭ҇то́съ, да ты̀ всѧ́кѡ сп҃се́шисѧ.
Соломѡ́нъ чꙋ́дный и҆ бл҃года́ти премꙋ́дрости и҆спо́лненный, се́й лꙋка́вое нѣ́когда пред̾ бг҃омъ сотвори́въ, ѿстꙋпѝ ѿ негѡ̀: є҆мꙋ́же ты̀, дꙋшѐ, проклѧ́тымъ твои́мъ житїе́мъ ᲂу҆подо́биласѧ є҆сѝ.
Сластьмѝ страсте́й свои́хъ влеко́мь ѡ҆сквернѧ́шесѧ: ᲂу҆вы̀ мнѣ̀, рачи́тель премꙋ́дрости рачи́тель блꙋ́дныхъ же́нъ ꙗ҆ви́сѧ, и҆ чꙋ́ждь ѿ бг҃а: є҆мꙋ́же ты̀ подража́ла є҆сѝ ᲂу҆мо́мъ, ѽ дꙋшѐ, сладостра́стьми стꙋ́дными.
Ровоа́мꙋ поревнова́ла є҆сѝ, дꙋшѐ, не послꙋ́шавшемꙋ совѣ́та ѻ҆́тча, кꙋ́пнѡ же и҆ ѕлѣ́йшемꙋ рабꙋ̀ і҆еровоа́мꙋ, пре́жнемꙋ ѿстꙋ́пникꙋ. но бѣ́гай подража́нїѧ, и҆ зовѝ бг҃ꙋ: согрѣши́хъ, ᲂу҆ще́дри мѧ̀.
Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, є҆ди́ница ст҃а́ѧ, свѣ́тове и҆ свѣ́тъ, и҆ ст҃а трѝ и҆ є҆ди́но ст҃о, пое́тсѧ бг҃ъ трⷪ҇ца. но ты̀, дꙋшѐ, воспо́й, просла́ви жи́знь и҆ жи̑зни, всѣ́хъ бг҃а.
Бг҃оро́диченъ: Воспѣва́емъ тѧ̀, бл҃гослови́мъ тѧ̀, покланѧ́емсѧ тѝ, бг҃ороди́тельнице, ꙗ҆́кѡ є҆ди́наго ѿ нераздѣ́льныѧ трⷪ҇цы породила̀ є҆сѝ сн҃а и҆ бг҃а, и҆ ѿве́рзла є҆сѝ на́мъ сꙋ́щымъ на землѝ нбⷭ҇наѧ.
Пѣ́снь и҃.
І҆рмо́съ: Є҆го́же вѡ́инства:
Ты̀, дꙋшѐ, ѻ҆зі́и поревнова́вши, сегѡ̀ прокаже́нїе въ себѣ̀ стѧжа́ла є҆сѝ сꙋгꙋ́бѡ: безмѣ̑стнаѧ бо мы́слиши, беззакѡ́ннаѧ же дѣ́еши. ѡ҆ста́ви ꙗ҆̀же и҆́маши, и҆ притецы̀ къ покаѧ́нїю.
Ѡ҆ нїнеѵі́тѧнѣхъ, дꙋшѐ, слы́шала є҆сѝ, ка́ющихсѧ бг҃ꙋ во вре́тищи и҆ пе́пелѣ: си̑мъ не подража́ла є҆сѝ, но ꙗ҆ви́ласѧ є҆сѝ ѕлѣ́йши всѣ́хъ, пре́жде зако́на и҆ по зако́нѣ прегрѣши́вшихъ.
Слы́шала є҆сѝ ѡ҆ і҆еремі́и, дꙋшѐ, въ ро́вѣ ти́ннѣмъ ѡ҆ гра́дѣ сїѡ́нѣ рыда́ньми вопїю́щемъ и҆ сле́зъ и҆́щꙋщемъ: подража́й сегѡ̀ плаче́вномꙋ житїю̀, и҆ сп҃се́шисѧ.
І҆ѡ́на въ ѳарсі́съ ѿбѣжѐ, проразꙋмѣ́въ ѡ҆браще́нїе нїнеѵі́тѧнъ, разꙋмѣ́ бо ꙗ҆́кѡ прⷪ҇ро́къ бж҃їе бл҃госе́рдїе: тѣ́мже ревнова́ше прⷪ҇ро́чествꙋ не солга́тисѧ.
Ѡ҆ данїи́лѣ въ ро́вѣ слы́шала є҆сѝ, ѽ дꙋшѐ, ка́кѡ заградѝ ᲂу҆ста̀ ѕвѣре́й: ᲂу҆вѣ́дѣла є҆сѝ, ка́кѡ ѻ҆́троцы со а҆за́рїею погаси́ша вѣ́рою пла́мень пе́щи горѧ́щїй.
Ѿ ве́тхагѡ завѣ́та всѧ̑ приведо́хъ тѝ, дꙋшѐ, къ подо́бїю: подража́й бг҃олюби̑вымъ дѣѧ̑нїємъ првⷣныхъ, и҆збѣ́гни же па́ки грѣхѡ́въ лꙋка́выхъ.
Сла́ва, трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице, поми́лꙋй мѧ̀.
Бг҃оро́диченъ: Внꙋ́трь во чре́вѣ твое́мъ, пречтⷭ҇аѧ, мы́сленнаѧ порфѵ́ро є҆мманꙋ́илева, ꙗ҆́кѡ ѿ ѡ҆багре́нїѧ червлени́цы, пло́ть соистка́сѧ: сегѡ̀ ра́ди тѧ̀ бцⷣꙋ вои́стиннꙋ почита́емъ.
Пѣ́снь ѳ҃.
І҆рмо́съ: Безсѣ́меннагѡ зача́тїѧ:
Хрⷭ҇то́съ и҆скꙋша́емь быва́ше, дїа́волъ и҆скꙋша́ше, показꙋ́ѧ ка́менїе, да хлѣ́би бꙋ́дꙋтъ: на го́рꙋ возведѐ ви́дѣти всѧ̑ ца̑рствїѧ мі́ра во мгнове́нїи. бо́йсѧ, ѽ дꙋшѐ, ловле́нїѧ, трезви́сѧ, моли́сѧ на всѧ́кїй ча́съ бг҃ꙋ.
Го́рлица пꙋстынолю́бнаѧ возгласѝ, гла́съ вопїю́щагѡ, хрⷭ҇то́въ свѣти́льникъ, проповѣ́дꙋѧй покаѧ́нїе: но и҆́рѡдъ беззако́ннова со и҆рѡдїа́дою. блюдѝ, дꙋшѐ моѧ̀, да не ᲂу҆вѧ́знеши въ сѣ̑ти беззако́нныхъ, но ѡ҆блобыза́й покаѧ́нїе.
Въ пꙋсты́ню всели́сѧ прⷣте́ча бл҃года́ти, и҆ і҆ꙋде́а всѧ̀ и҆ самарі́а слы́шавше и҆дѧ́хꙋ и҆ и҆сповѣ́дахꙋ грѣхѝ своѧ̑, креща́ющесѧ ᲂу҆се́рднѡ: и҆̀мже ты̀ не подража́ла є҆сѝ, дꙋшѐ.
Бра́къ ᲂу҆́бѡ че́стенъ, и҆ ло́же нескве́рно: ѻ҆боѧ́ бо хрⷭ҇то́съ пре́жде бл҃гословѝ, пло́тїю ꙗ҆ды́й, и҆ въ ка́нѣ на бра́цѣ во́дꙋ вїно̀ соверша́ѧ, и҆ показꙋ́ѧ пе́рвое чꙋ́до: да ты̀ и҆змѣни́шисѧ, ѽ дꙋшѐ.
Разсла́бленнаго стѧгнꙋ̀ хрⷭ҇то́съ, ѻ҆́дръ взе́мша: и҆ ю҆́ношꙋ ᲂу҆ме́рша воздви́же, вдови́че рожде́нїе, и҆ со́тнича ѻ҆́трока: и҆ самарѧны́ни ꙗ҆вле́йсѧ, въ дꙋ́сѣ слꙋ́жбꙋ тебѣ̀, дꙋшѐ, предживописа̀.
Кровоточи́вꙋю и҆сцѣлѝ прикоснове́нїемъ кра́ѧ ри́зна гдⷭ҇ь: прокажє́нныѧ ѡ҆чи́сти: слѣпы̑ѧ и҆ хромы̑ѧ просвѣти́въ, и҆спра́ви: глꙋхі̑ѧ же и҆ нѣмы̑ѧ и҆ нича́щꙋю ни́зꙋ и҆сцѣлѝ сло́вомъ: да ты̀ сп҃се́шисѧ, ѡ҆каѧ́ннаѧ дꙋшѐ.
Сла́ва, трⷪ҇ченъ: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀, ꙗ҆́кѡ свѣ́тꙋ и҆ свѣ́тѡмъ, и҆ жи́зни и҆ жи́знемъ, животворѧ́щей и҆ просвѣща́ющей концы̀.
Бг҃оро́диченъ: Гра́дъ тво́й сохранѧ́й, бг҃ороди́тельнице пречⷭ҇таѧ: въ тебѣ́ бо се́й вѣ́рнѡ ца́рствꙋѧ, въ тебѣ̀ и҆ ᲂу҆твержда́етсѧ, и҆ тобо́ю побѣжда́ѧ, побѣжда́етъ всѧ́кое и҆скꙋше́нїе, и҆ плѣнѧ́етъ сꙋпоста́ты, и҆ ᲂу҆строѧ́етъ владѡ́мыѧ.
А҆ндре́ю: А҆ндре́е честны́й и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀, да и҆зба́вимсѧ всѝ ѿ гнѣ́ва и҆ ско́рби и҆ тлѣ́нїѧ, и҆ свободи́мсѧ ѿ прегрѣше́нїй, чтꙋ́щїи твою̀ па́мѧть вѣ́рнѡ.
Та́же пое́мъ ѻ҆́ба ли̑ка і҆рмо́съ: Безсѣ́меннагѡ зача́тїѧ:
И҆ про́чее послѣ́дованїе повече́рїѧ.