Суббота сыропустная
Въ сꙋббѡ́тꙋ сы́рнꙋю
па́мѧть соверша́емъ всѣ́хъ прпⷣбныхъ и҆ бг҃оно́сныхъ ѻ҆тє́цъ, въ по́двизѣ просїѧ́вшихъ.
Въ пѧто́къ ве́чера во свѣти́льничное по предначина́тельнѣмъ ѡ҆бы́чное стїхосло́вїе: Ко гдⷭ҇ꙋ внегда̀ скорбѣ́ти мѝ:
На Гдⷭ҇и воззва́хъ пое́мъ стїхи̑ры подѡ́бны, поста́вльше стїхѡ́въ ѕ҃. Гла́съ и҃, повторѧ́юще ѧ҆̀:
Прїиди́те, всѝ вѣ́рнїи, прпⷣбныхъ ѻ҆тє́цъ ли́ки воспои́мъ, а҆нтѡ́нїа верхо́внаго, свѣ́тлаго є҆ѵѳѵ́мїа, и҆ кого́ждо и҆ всѧ̑ вкꙋ́пѣ. и҆ си́хъ, жи́тєльства ꙗ҆́коже дрꙋгі́й ра́й сла́дости, мы́сленнѡ преходѧ́ще, краснѡ̀ воззове́мъ: сїѧ̑ древеса̀, ꙗ҆̀же насадѝ бг҃ъ на́шъ, сїѧ̑ плоды̀ нетлѣ̑нныѧ жи́зни процвѣ̑тшаѧ, принесо́ша хрⷭ҇тꙋ̀, пита́ющыѧ дꙋ́шы на́шѧ. къ ни̑мже возопїи́мъ: бг҃оно́снїи бл҃же́ннїи, моли́те сп҃сти́сѧ на́мъ.
Подо́бенъ:
Ра́дꙋйсѧ, є҆гѵ́пте вѣ́рный: ра́дꙋйсѧ, лївѵ́е прпⷣбнаѧ: ра́дꙋйсѧ, ѳиваі́до и҆збра́ннаѧ. ра́дꙋйсѧ, всѧ́кое мѣ́сто и҆ гра́де и҆ страно̀, воспита́вшаѧ гра́жданы црⷭ҇тва нбⷭ҇нагѡ, и҆ си́хъ въ воздержа́нїи и҆ трꙋдѣ́хъ возрасти́вшаѧ, и҆ совершє́нныѧ мꙋ́жы жела́нїй бг҃ꙋ показа́вшаѧ. сі́и свѣти̑ла дꙋ́шъ на́шихъ ꙗ҆ви́шасѧ: са́ми, чꙋде́съ заре́ю и҆ дѣ́лъ зна́меньми, просїѧ́ша мы́сленнѡ во всѧ̑ концы̀. къ тѣ̑мъ возопїи́мъ: ѻ҆тцы̀ всебл҃же́ннїи, моли́те сп҃сти́сѧ на́мъ.
Подо́бенъ:
Кто̀ ѿ земноро́дныхъ и҆зрече́тъ чꙋ̑днаѧ ва̑ша житїѧ̑, ѻ҆тцы̀ всемі́рнїи; кі́й же ѧ҆зы́къ и҆зглаго́летъ сщ҃є́нныѧ въ дꙋ́сѣ по́двиги и҆ по́ты ва́шѧ, страда̑нїѧ добродѣ́телей, и҆зможде́нїе пло́ти, борє́нїѧ страсте́й, во бдѣ́нїихъ и҆ мл҃твахъ и҆ слеза́хъ; вы̀ въ мі́рѣ ꙗ҆́коже а҆́гг҃ли вои́стиннꙋ ꙗ҆ви́стесѧ, са́ми бѣсѡ́вскїѧ си̑лы соверше́ннѡ низложи́сте, сотво́рше чꙋ̑днаѧ и҆ ди̑внаѧ зна́мєнїѧ. тѣ́мже моли́тесѧ съ на́ми, пребл҃же́ннїи, ᲂу҆лꙋчи́ти на́мъ неконча́емꙋю ра́дость.
Сла́ва, гла́съ ѕ҃: Є҆́же по ѡ҆́бразꙋ соблю́дше невреди́мѡ, ᲂу҆́мъ вожда̀ на стра̑сти па̑гꙋбныѧ по́стнически поста́вльше, на є҆́же по подо́бїю ꙗ҆́кѡ мо́щно возшлѝ є҆стѐ: мꙋ́жески бо є҆стество̀ понꙋ́дивше, потща́стесѧ хꙋ́ждшее покори́ти лꙋ́чшемꙋ и҆ пло́ть порабо́тити дꙋ́хꙋ. тѣ́мже мона́шествꙋющымъ ꙗ҆ви́стесѧ ве́рхъ: гра́ждане пꙋсты́ннїи, бл҃готекꙋ́щымъ подвиза́тєли, пра̑вила добродѣ́тели и҆звѣ̑стнѣйшаѧ. и҆ ны́нѣ зерца́лѡмъ разрѣши́вшымсѧ, всепрпⷣбнїи, чи́стѡ зритѐ на нб҃сѣ́хъ ст҃ꙋ́ю трⷪ҇цꙋ, молѧ́щесѧ непосре́дственнѡ ѡ҆ вѣ́рою и҆ любо́вїю чтꙋ́щихъ ва́съ.
И҆ ны́нѣ, бг҃оро́диченъ а҃-й рѧдова́гѡ гла́са ѻ҆смогла́сника.
Свѣ́те ти́хїй:
Прокі́менъ, гла́съ з҃, ѱсало́мъ н҃и: Бж҃е, застꙋ́пникъ мо́й є҆сѝ ты̀, и҆ млⷭ҇ть твоѧ̀ предвари́тъ мѧ̀. Сті́хъ: И҆зьми́ мѧ ѿ вра̑гъ мои́хъ, бж҃е, и҆ ѿ востаю́щихъ на мѧ̀ и҆зба́ви мѧ̀.
Прⷭ҇ро́чества заха́рїина чте́нїе. [Глава̀ и҃, ст. ѳ҃і-к҃г].
Си́це глаго́летъ гдⷭ҇ь вседержи́тель: по́стъ четве́ртый, и҆ по́стъ пѧ́тый, и҆ по́стъ седмы́й,по́стъ десѧ́тый, бꙋ́дꙋтъ до́мꙋ і҆ꙋ́довꙋ въ ра́дость и҆ въ весе́лїе и҆ въ пра́здники бла̑ги: и҆ возвесели́тесѧ, и҆ и҆́стинꙋ и҆ ми́ръ возлю́бите. Си́це глаго́летъ гдⷭ҇ь вседержи́тель: є҆щѐ лю́дїе мно́зи прїи́дꙋтъ, и҆ живꙋ́щїи во градѣ́хъ мно́гихъ. И҆ сни́дꙋтсѧ живꙋ́щїи въ пѧтѝ градѣ́хъ во є҆ди́нъ гра́дъ, глаго́люще: грѧди́мъ помоли́тисѧ лицꙋ̀ гдⷭ҇ню и҆ взыска́ти лицѐ гдⷭ҇а вседержи́телѧ, и҆дꙋ̀ и҆ а҆́зъ. И҆ прїи́дꙋтъ лю́дїе мно́зи и҆ ꙗ҆зы́цы мно́зи, взыска́ти лица̀ гдⷭ҇а вседержи́телѧ во і҆ерⷭ҇ли́мѣ и҆ ᲂу҆моли́ти лицѐ гдⷭ҇не. Си́це глаго́летъ гдⷭ҇ь вседержи́тель: во ѻ҆́ны дни̑ и҆́метсѧ де́сѧть мꙋже́й ѿ всѣ́хъ племе́нъ ꙗ҆зы́ческихъ, и҆ и҆́мꙋтсѧ за ри́зꙋ мꙋ́жа і҆ꙋде́анина, глаго́люще: по́йдемъ съ тобо́ю, занѐ слы́шахомъ, ꙗ҆́кѡ бг҃ъ съ ва́ми є҆́сть.
Прокі́менъ, гла́съ ѕ, ѱало́мъ р҃л: Да ᲂу҆пова́етъ і҆и҃ль на гдⷭ҇а ѿны́нѣ и҆ до вѣ́ка. Сті́хъ: Гдⷭ҇и, не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ. Сподо́би, гдⷭ҇и, въ ве́черъ се́й:
На стїхо́внѣ самогла́сенъ, гла́съ в҃:
Ѡ҆чи́стимъ себѐ, бра́тїе, ѿ всѧ́кїѧ скве́рны пло́ти и҆ дꙋ́ха: свѣти́льники дꙋ́шъ на́шихъ просвѣти́мъ нищелю́бїемъ, не снѣда́юще дрꙋ́гъ дрꙋ́га ѡ҆клевета́нїемъ, приспѣ́ бо вре́мѧ, є҆гда̀ жени́хъ прїи́детъ всѣ̑мъ возда́ти по дѣлѡ́мъ и҆́хъ. совни́демъ хрⷭ҇тꙋ̀ съ мꙋ́дрыми дѣ́вами, гла́съ ѻ҆́ный разбо́йника къ немꙋ̀ взыва́юще: помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.
И҆ глаго́лемъ сті́хъ: Къ тебѣ̀ возведо́хъ ѻ҆́чи моѝ:
И҆ па́ки то́йже самогла́сенъ.
Та́же сті́хъ: Поми́лꙋй на́съ, гдⷭ҇и, поми́лꙋй на́съ:
И҆ мч҃нченъ: Ст҃ы̑мъ мч҃нкѡмъ молѧ́щымсѧ ѡ҆ на́съ, и҆ хрⷭ҇та̀ пою́щымъ, всѧ́каѧ ле́сть преста̀, и҆ человѣ́ческїй ро́дъ вѣ́рою сп҃са́етсѧ.
Сла́ва, гла́съ и҃: Мона́хѡвъ мно́жєства наста́вники ны́нѣ ва́съ почита́емъ, ѻ҆тцы̀ прпⷣбнїи: ва́ми бо стезе́ю вои́стиннꙋ пра́вою ходи́ти позна́хомъ. бл҃же́ни є҆стѐ хрⷭ҇тꙋ̀ рабо́тавше и҆ вра́жїю низложи́вше си́лꙋ, а҆́гг҃лѡвъ собесѣ̑дницы, првⷣныхъ и҆ ст҃ы́хъ сожи́телє: съ ни́миже моли́тесѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ.
Подо́бенъ: Ѽ пресла́внагѡ чꙋдесѐ!
Ра́дꙋйсѧ, чистоты̀ сокро́вище. ра́дꙋйсѧ, невеще́ственнагѡ свѣ́та чи́стое жили́ще. ра́дꙋйсѧ, глави́зно сп҃се́нїѧ на́шегѡ. ра́дꙋйсѧ, а҆пⷭ҇лѡвъ проповѣ́данїе. ра́дꙋйсѧ, мч҃нкѡвъ похвало̀. ра́дꙋйсѧ, прⷪ҇ро́кѡвъ и҆сполне́нїе, всенепоро́чнаѧ. ра́дꙋйсѧ, подви́жникѡвъ и҆ мона́хѡвъ ᲂу҆краше́нїе, и҆ сп҃се́нїе вѣ́рныхъ.
Та́же, Ны́нѣ ѿпꙋща́еши:
И҆ по трист҃о́мъ глаго́лемъ тропа́рь, гла́съ д҃:
Бж҃е ѻ҆те́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ти твоеѧ̀ ѿ на́съ, но мл҃твами и҆́хъ въ ми́рѣ ᲂу҆пра́ви жи́знь на́шꙋ.
Сла́ва, и҆ ны́нѣ, бг҃оро́диченъ, гла́съ то́йже. Є҆́же ѿ вѣ́ка ᲂу҆тае́ное:
Ты̑ѧжде и҆ на Бг҃ъ гдⷭ҇ь, и҆ на коне́цъ ᲂу҆́трени глаго́лемъ. Посе́мъ є҆ктенїа̀: Поми́лꙋй на́съ, бж҃е: и҆ г҃ покло́ны вели̑кїѧ. Бꙋ́ди и҆́мѧ гдⷭ҇не: три́жды. Блгⷭ҇влю̀ гдⷭ҇а: Досто́йно є҆́сть: и҆ ѿпꙋ́стъ. И҆ быва́етъ трапе́за по ѡ҆бы́чаю, ꙗ҆́коже и҆ въ сре́дꙋ сы́рнꙋю ᲂу҆ка́зано є҆́сть. На повече́рїи же пое́мъ рѧдовы́й канѡ́нъ ме́ртвенъ гла́са, во ᲂу҆сопохрани́тельницѣ.
Въ сꙋббѡ́тꙋ сы́рнꙋю на ᲂу҆́трени,
по шестоѱа́лмїи и҆ пе́рвомъ стїхосло́вїи, сѣда́льны, гла́съ и҃:
Подо́бенъ: Повелѣ́нное та́йнѡ:
Ѻ҆те́ческими мо́лнїѧми ѡ҆зари́вшесѧ, ꙗ҆́кѡ въ ра́й кра́сный ны́нѣ входѧ́ще, сла́дости пото́ка наслади́мсѧ, и҆ си́хъ до́блєсти чꙋ́днѡ смотрѧ́юще, поревнꙋ́имъ добродѣ́телемъ, сп҃сꙋ взыва́юще: мл҃твами и҆́хъ бж҃е, црⷭ҇твїѧ твоегѡ̀ нбⷭ҇нагѡ прича́стники ны̀ сотворѝ.
Сла́ва, подо́бенъ:
Нача́льника мона́шествꙋющихъ па́ѵла, со а҆нтѡ́нїемъ мꙋ́дрымъ и҆ є҆ѵѳѵ́мїемъ и҆ съ про́чими ѻ҆тцы̑, согла́снѡ воспои́мъ всѝ: и҆ си́хъ ᲂу҆мо́лимъ, ꙗ҆́кѡ да хрⷭ҇тꙋ̀ непреста́ннѡ мо́лѧтсѧ ѡ҆ на́съ, соверша́ющихъ бж҃е́ственнꙋю и҆ всесвѣ́тлꙋю па́мѧть и҆́хъ, въ пѣ́снехъ сла́вѧще сп҃са и҆ гдⷭ҇а.
И҆ ны́нѣ, бг҃оро́диченъ. подо́бенъ:
Бл҃годари́мъ тѧ̀, приснодв҃о, и҆ велича́емъ, чтⷭ҇аѧ, и҆ покланѧ́емсѧ тѝ, воспѣва́юще ржⷭ҇тво̀ твоѐ, бл҃года́тнаѧ, зовꙋ́ще непреста́ннѡ: сп҃сѝ на́съ, дв҃о всемлⷭ҇тиваѧ, ꙗ҆́кѡ бл҃га́ѧ, и҆ де́мѡнскагѡ словопре́нїѧ стра́шнагѡ и҆схитѝ въ ча́съ и҆спыта́нїѧ, да не посрами́мсѧ рабѝ твоѝ.
По в҃-мъ стїхосло́вїи сѣда́ленъ, гла́съ и҃.
Подо́бенъ: Свирѣ́лей па́стырскихъ:
А҆нтѡ́нїа кꙋ́пнѡ и҆ є҆ѵѳѵ́мїа, со всѣ́ми про́чими бг҃оно́сными ѻ҆тцы̑, всѝ восхва́лимъ пѣ́сньми, па́мѧть и҆́хъ торжествꙋ́юще: сі́и бо гдⷭ҇еви ѡ҆ все́мъ мі́рѣ мо́лѧтсѧ, да и҆зба́вимсѧ ѿ дре́внїѧ клѧ́твы, свобо́ждшесѧ ѿ мꙋче́нїѧ.
Сла́ва:
И҆́ный сѣда́ленъ, гла́съ и҃.
Подо́бенъ: Повелѣ́нное та́йнѡ:
Ꙗ҆́коже въ лꙋ́зѣ цвѣтꙋ́щемъ добродѣ́тельми бг҃оно́сныхъ по́стникѡвъ ѡ҆бходѧ́ще, вонѝ и҆сполнѧ́емсѧ сладкоꙋха́нныѧ: боре́ньми бо со и҆скꙋшє́нїи наѻстри́вшесѧ, тѣ́ло воздержа́нїемъ раболѣ́пнѡ покори́ша дх҃ꙋ, а҆́гг҃льское на землѝ житїѐ пожи́вше. тѣ́мже сла́вы сподо́бишасѧ.
И҆ ны́нѣ, бг҃оро́диченъ: Безпло́тныхъ твои́хъ, хрⷭ҇тѐ, и҆ прⷣте́чи, ᲂу҆ч҃нкѡ́въ, прⷪ҇ро́кѡвъ и҆ мч҃нкѡвъ, ст҃ы́хъ всѣ́хъ и҆ прпⷣбныхъ, неискꙋсомꙋ́жныѧ и҆ бл҃гі́ѧ мт҃ре твоеѧ̀ мл҃твами ᲂу҆молѧ́емь, да́ждь на́мъ во свѣ́тѣ твое́мъ ходи́ти, и҆ сподо́би на́съ ᲂу҆лꙋчи́ти црⷭ҇твїе твоѐ, ра́ди щедро́тъ млⷭ҇ти твоеѧ̀.
Та́же чте́мъ во ст҃ѣ́мъ є҆фре́мѣ словеса̀ ѡ҆ сконча́вшихсѧ ѻ҆тцѣ́хъ, на даѧ̑нїѧ трѝ. Ѱало́мъ н҃. Канѡ́нъ ст҃а́гѡ ѡ҆би́тели на ѕ҃, и҆ ст҃ы́хъ на и҃. Стїхосло́вимъ же и҆ Пои́мъ гдⷭ҇еви. Гла́съ и҃:
Пѣ́снь а҃.
І҆рмо́съ: Пѣ́снь возсле́мъ, лю́дїе:
Всѝ въ пѣ́снехъ дꙋхо́вныхъ воспои́мъ согла́снѡ, въ по́двизѣхъ просїѧ́вшыѧ, бж҃е́ствєнныѧ ѻ҆тцы̀ на́шѧ, ꙗ҆̀же и҆знесѐ є҆гѵ́петъ, ѳиваі́да и҆ лївѵ́а, всѧ́кое мѣ́сто и҆ гра́дъ и҆ страна̀.
[А] Ра́дꙋйсѧ, мона́хѡвъ первонаста́вниче, а҆нтѡ́нїе пресла́вне, а҆ммꙋ́не бг҃оно́сне, нитрі́йскаѧ сла́во: а҆рсе́нїе а҆́гг҃ле, держа́во безмо́лвїѧ, и҆ а҆ммѡ́не дх҃оно́сне.
Красꙋ́йсѧ, вои́стиннꙋ сосꙋ́де бж҃їй, а҆гаѳѡ́не сщ҃еннодꙋ́шне: а҆хїлла̀ и҆ а҆ммѡ́иъ цвѣ́ти пꙋсты́ннїи: а҆нꙋ́ве и҆ а҆лѡ́нїе, а҆ммѡнаѳа̀ и҆ а҆нѳі́ме, добродѣ́телей свѣ́тлїи би́сери.
Свѣти́льницы разсꙋжде́нїѧ на́мъ, пѣ́тъ бꙋ́ди а҆́рисъ дне́сь, и҆ а҆поллѡ́съ вели́кїй, послꙋша́нїѧ же свѣ́ти а҆ѳрѐ и҆ а҆ка́кїй: съ си́ми и҆ а҆ввакѵ́ръ просїѧва́етъ, ꙗ҆́коже нѣ́каѧ денни́ца.
Гора̀ жи́тельства высо́кагѡ ꙗ҆ви́сѧ а҆ѵѯе́нтїй, подви́жникъ же чистоты̀ а҆вра́мїй вели́кїй: съ ни́миже а҆фроді́сїй сто́лпъ воздержа́нїѧ ꙗ҆ви́сѧ, со а҆ѳинодѡ́ромъ.
Сїѧ́етъ ꙗ҆́кѡ ѕвѣзда̀ на нб҃сѝ въ по́стницѣхъ а҆ммѡ́нїй и҆ бж҃е́ственный а҆ні́на: свѣ́титсѧ же съ си́ми и҆ вели́кїй а҆нтїо́хъ, и҆ а҆га́питъ и҆зрѧ́дный, а҆́ще кто̀ и҆́ный съ си́ми блиста́етъ.
Пѣ́сньми сщ҃е́нными восхва́лимъ вели́каго а҆ѳана́сїа, въ горѣ̀ а҆ѳѡ́нстѣй свѣ́тлѡ подвиза́вшагосѧ,свѣти́льника превели́каго всеѧ̀ вселе́нныѧ, є҆гѡ́же мл҃твами всѝ спаса́емсѧ.
Житїи̑ бг҃одꙋхнове́нными вои́стиннꙋ ра́й ꙗ҆ви́стесѧ цр҃кве, премꙋ́дрїи бл҃же́ннїи ѻ҆тцы̀: всѝ вы̀ по и҆́мени, ѡ҆ на́съ мл҃твꙋ гдⷭ҇ви твори́те непреста́ннѡ.
Прїиди́те, мч҃нколю́бцы вѣ́рнїи, почти́мъ мч҃ники є҆желѣ́тными пѣ́сньми и҆ пѣ̑нїи, вѣ́рою хрⷭ҇тꙋ̀ бг҃ꙋ на́шемꙋ пою́ще и҆ вопїю́ще: воспои́мъ тебѣ̀ є҆ди́номꙋ влⷣцѣ.
Сла́ва: трⷪ҇ченъ: Трѝ є҆ди́нагѡ є҆стества̀ пою̀, ли̑ца самоѷпоста́сна: нерожде́нна ѻ҆ц҃а̀, сн҃а рожде́нна, и҆ дх҃а ст҃а́го: безнача́льное црⷭ҇тво, вла́сть, бж҃ество̀ є҆ди́но.
Бг҃оро́диченъ: Ра́дꙋйсѧ, прест҃ы́й хра́ме, рꙋно̀ бг҃оро́сное, запечатлѣ́нный и҆сто́чниче безсме́ртныѧ стрꙋѝ: гра́дъ тво́й, влⷣчце, сохранѝ ѿ разли́чныхъ сꙋпоста̑тъ невоева́нный.
І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ ѿ ра́бства і҆и҃лѧ,пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Вторы́ѧ же пѣ́сни во ѱалти́ри не глаго́лемъ, но припѣва́емъ: Прпⷣбнїи ѻ҆тцы̀, моли́те бг҃а ѡ҆ на́съ.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ ва́шъ, пре́жде вѣ̑къ рожде́нный ѿ ѻ҆ц҃а̀ и҆ ѿ дв҃ы въ послѣ̑днѧѧ без̾ мꙋ́жа зачны́йсѧ, и҆ разрꙋши́вый грѣ́хъ пра́ѻтца а҆да́ма, ꙗ҆́кѡ чл҃вѣколю́бецъ.
Бл҃гоꙋха́нїѧ ны́нѣ и҆сполнѧ́емсѧ, ꙗ҆́кѡ въ ра́й дрꙋгі́й текꙋ́ще бг҃онасажде́нныхъ добродѣ́телей по́стническихъ: ꙗ҆̀же въ воздержа́нїи и҆ слеза́хъ процвѣто́ша, разли́чнѡ плодоносѧ́ще жи́тельство бг҃ꙋ прпⷣбнѣйшїи.
[В] Вели́кїй виссарїѡ́нъ, пти́чее житїѐ пожи́вый, дрꙋгі́й а҆́гг҃лъ, но́вый і҆́ѡвъ па́ки,тве́рдый венїамі́нъ: та́кожде и҆ вїта́лїй свѣти́льникъ, блꙋдни̑цы спаса́ѧй бг҃ꙋ: вѷті́мїй же бж҃е́ственный, и҆ сла́вный вавѵ́ла, съ си́ми да воспою́тсѧ.
Высото́ю жи́тельства нб҃е́сенъ бы́лъ є҆сѝ, ѽ венеді́кте! до́мъ же премꙋ́дрости, па́стырь васїа́нъ: та́кожде и҆ васі́лїй нѣ́кїй прїѧ́тъ вѣне́цъ послꙋша́нїѧ: во гро́бѣ бо живы́й всели́всѧ, показꙋ́етъ на́мъ послꙋша́нїѧ свѣ́тлость.
[Г] Пѣ́снь гела́сїю: се́й приснопа́мѧтный ца́рь страсте́й. хвала̀ гера́сїмꙋ, є҆мꙋ́же порабо́та ѕвѣ́рь: прїи́де бо къ немꙋ̀ за соверше́нство добродѣ́тели. сла́ва и҆ ге́рманꙋ ѻ҆тцꙋ̀, съ га́їемъ мꙋ́дрымъ ᲂу҆го́дникомъ хрⷭ҇то́вымъ.
[Д] Дв҃дъ ѳессалоні́кскаѧ сла́ва и҆ похвала̀, бг҃опрїѧ́тный данїи́лъ да похва́литсѧ: въ чꙋдесѣ́хъ мно́гїй: дѣ́ломъ же и҆ сло́вомъ, данїи́лъ ски́тскїй: ді́й же и҆ далма́тъ, нача̑льницы мона́хѡвъ, ᲂу҆твержде́нїе вѣ́ры.
Ѕвѣ́зднагѡ блиста́нїѧ мно́гѡ лꙋ́чшыѧ послꙋша́нїе показа̀ дометїа́на и҆ доме́тїа бг҃омꙋ̑дрыѧ, ꙗ҆́кѡ два̀ свѣти̑льника сїѧ́юща на́мъ: съ си́ми же и҆ без̾имени́тїи сла́внѡ да воспою́тсѧ.
Бога́тство неистощи́мое вѣ́рныхъ, гдⷭ҇а ра́ди страда́льчество-вавшихъ бл҃гоче́стнѡ, къ ра́цѣ предварѝ: прїиди́те, вѣ́рнїи, мч҃нчески сїѧ̑ воспои́мъ, плодопрїе́млюще и҆сцѣлє́нїѧ дꙋша́мъ и҆ тѣлесє́мъ вѣ́рою.
Сла́ва, трⷪ҇ченъ: Пресоверше́ннаѧ є҆ди́нице, пребж҃е́ственнаѧ, трїѷпоста́снаѧ, нерожде́нне ѻ҆́ч҃е и҆ сн҃е є҆диноро́дне, дш҃е ѿ ѻ҆ц҃а̀ и҆сходѧ́й, сн҃омъ же ꙗ҆влѧ́ѧйсѧ, сꙋщество̀ є҆ди́но и҆ є҆стество̀, гдⷭ҇ство, црⷭ҇тво сп҃сѝ всѣ́хъ на́съ.
Бг҃оро́диченъ: Є҆ди́на ввела̀ є҆сѝ человѣ́чествꙋ стра́нное рожде́нїе: є҆ди́на не под̾ѧ́ла є҆сѝ ѿ є҆стества̀ тлѣ́нїѧ, безсѣ́менное рождество̀ нетлѣ́ннѡ поне́сши: тѣ́мъ тѧ̀, чтⷭ҇аѧ, ꙗ҆́кѡ бцⷣꙋ, по до́лгꙋ вѣ́рнїи прославлѧ́емъ.
Катава́сїа: Ви́дите, ви́дите:
Пѣ́снь г҃.
І҆рмо́съ: Нѣ́сть ст҃ъ, ꙗ҆́кѡ гдⷭ҇ь:
Въ дрꙋгі́й ра́й входѧ́ще добродѣ́телей ди́вныхъ ѻ҆тє́цъ, сегѡ̀ вкꙋ́симъ ѡ҆дꙋшевле́ннагѡ наслажде́нїѧ, при́снꙋю жи́знь подаю́щагѡ, вѣ́рнѡ восхвалѧ́юще ѧ҆̀.
[Е] Да почти́тсѧ є҆ѵѳѵ́мїй пресвѣ́тлаѧ ѕвѣзда̀, денни́ца є҆лла́дїй, є҆фре́мъ бг҃одꙋхнове́нный, со є҆ѵло́гїемъ и҆зрѧ́днымъ, дѣ́лы и҆ чꙋдесы̀ ѡ҆блиста́вшїи концы̀.
[З] [И] Пѣ́тъ ди бꙋ́детъ пѣ́сньми зѡсі́ма чꙋ́дный, и҆ заха́рїа всечестны́й, и҆ зинѡ́нъ, и҆ зѡі́лъ, и҆са́їа вели́кїй и҆ и҆лїа̀ сла́вный съ си́ми да почтꙋ́тсѧ.
[Ѳ] Фермі́йскаго ѳео́дѡра всесла́внагѡ пою̀, и҆ є҆нна́та всепѣ́таго: съ си́ми же и҆ ѳеодꙋ́ла со ѳеѡ́ною воспѣва́ю: почита́ю ди́внаго и҆ вели́каго ѳеодо́сїа.
Хвали́мь да бꙋ́детъ ѳеокті́стъ всеизрѧ́дный па́стырь, и҆ высо́кїй ᲂу҆мо́мъ ѳала́ссїй, вели́кїй ѳео́дѡръ нарече́нный сѷкеѡ́тъ, зна́меньми и҆ чꙋдесы̀ ꙗ҆вле́йсѧ на землѝ высо́кїй.
[І] Ѕвѣ́зды сїѧ́ютъ дрꙋгі̑ѧ, и҆здре́вле пресвѣ̑тлыѧ, ко́ловъ і҆ѡа́ннъ, съ тремѝ свѣтоно́сными въ лѣ́ствицѣ, и҆ съ мно́жайшими и҆ны́ми, сла́внѡ блиста́ющесѧ.
Почти́мъ пѣ́сньми и҆ пѣ́ньми дꙋхо́вными, соше́дшесѧ, празднолю́бцы, мч҃нкъ всечⷭ҇тнꙋ́ю и҆ є҆желѣ́тнꙋю па́мѧть: при́снѡ бо мо́лѧтсѧ хрⷭ҇тꙋ̀ ѡ҆ ро́дѣ на́шемъ.
Сла́ва, трⷪ҇ченъ: Трⷪ҇це є҆диносꙋ́щнаѧ, и҆ пребж҃е́ственнаѧ є҆ди́нице, въ раздѣле́нїи є҆ди́нство и҆ вопроти́въ ли́цамъ є҆стество̀ и҆мꙋ́щаѧ, совокꙋпѝ на́съ во є҆ди́но хотѣ́нїе твои́хъ за́повѣдей.
Бг҃оро́диченъ: Ски́нїю бг҃одѣ́ланнꙋю преднаписа̀ тѧ̀ мѡѷсе́й съ серафі̑мы покрыва́ющꙋю ст҃а̑ѧ ст҃ы́хъ, проѡбразꙋ́ѧ чтⷭ҇омꙋ твоѐмꙋ, дв҃о, ржⷭ҇твꙋ̀ хрⷭ҇тꙋ̀ пло́тїю написа́тисѧ.
Катава́сїа: Нѣ́сть ст҃ъ, ꙗ҆́кѡ гдⷭ҇ь, и҆ нѣ́сть првⷣнъ, ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: и҆ нѣ́сть ст҃ъ ра́зве тебє̀, гдⷭ҇и чл҃вѣколю́бче.
Сѣда́ленъ, гла́съ д҃.
Подо́бенъ: Ско́рѡ предварѝ:
Со́лнце пра́вды хрⷭ҇то́съ ꙗ҆́коже лꙋчы̀ ва́съ посла̀, просвѣща́ющыѧ зе́млю, ᲂу҆чи́телїе ст҃і́и: тѣ́мже ѕло́бою помраче́ннꙋю дꙋ́шꙋ мою̀, бж҃е́ственными ва́шими моли́твами, ѡ҆сїѧ́йте бж҃е́ственнымъ свѣ́томъ бг҃оразꙋ́мїѧ, бг҃обл҃же́ннїи.
И҆́ный сѣда́ленъ, гла́съ и҃.
Подо́бенъ: Премꙋ́дрость и҆ сло́во:
А҆нтѡ́нїевꙋ кро́тость и҆ чистотꙋ̀, є҆ѵѳѵ́мїево вели́чїе и҆ досточꙋ́дность, па́ѵловꙋ и҆ а҆рсе́нїевꙋ простотꙋ́ и҆ безмо́лвїе, ѳеокті́стовꙋ сла́вꙋ, и҆ про́чихъ прпⷣбныхъ всѣ́хъ чи́ны,вѣ́рнїи просла́вимъ и҆ совосхва́лимъ пѣ́сньми, съ ни́миже воспои́мъ є҆ѵпраѯі́ю дѣ́вꙋ со всѣ́ми жена́ми бг҃омꙋ́дрыми, и҆ согла́снѡ возопїи́мъ: моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть ва́шꙋ.
Сла́ва, подо́бенъ:
Оу҆́зы разрѣ́шше страсте́й, прилѣпи́стесѧ любвѝ бл҃ги́хъ, и҆ въ сла́вꙋ премі́рнꙋю во хрⷭ҇тѣ̀ ѡ҆блеко́стесѧ, ѿ свои́хъ трꙋдѡ́въ ѡ҆брѣ́тше ᲂу҆покое́нїе, воздержа́нїѧ трꙋды̑ полꙋчи́вше вы́шнюю жи́знь: тѣ́мже досто́йнѡ веселите́сѧ кꙋ́пнѡ съ го́рними си́лами, ра́достнѡ въ пѣ́нїихъ бг҃ꙋ предстоѧ́ще. бг҃оно́снїи ѻ҆тцы̀ на́ши, прегрѣше́нїй ѡ҆ставле́нїе и҆спроси́те пра́зднꙋющымъ любо́вїю ст҃ꙋ́ю па́мѧть ва́шꙋ.
И҆ ны́нѣ, бг҃оро́диченъ. Подо́бенъ:
Оу҆глѣбо́хъ въ ти́нѣ грѣхѡ́внѣй, и҆ нѣ́сть постоѧ́нїѧ во мнѣ̀, лю́тѣ потопи́ мѧ бꙋ́рѧ прегрѣше́нїй мои́хъ: но ꙗ҆́кѡ ро́ждшаѧ сло́во, є҆ди́наго человѣколю́бца, на мѧ̀ раба̀ твоего̀ при́зри, молю́сѧ, и҆зба́ви ѿ грѣха̀ и҆ страсте́й дꙋшетлѣ́нныхъ и҆ ѿ всѧ́кагѡ ѡ҆ѕлобле́нїѧ ме́стника, влⷣчце, да пою̀ ра́дꙋѧсѧ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мѝ, тѧ́ бо и҆́мамъ наде́ждꙋ ра́бъ тво́й.
Пѣ́снь д҃.
І҆рмо́съ: И҆з̾ горы̀ прїѡсѣне́нныѧ, є҆ди́ныѧ бцⷣы:
Свѣти́льникъ мїроѧвле́нный бж҃е́ственный і҆ларїѡ́нъ, гора̀ разꙋ́мнаѧ вели́кїй і҆ꙋсті́нъ: съ ни́миже і҆ера́ѯъ со і҆сі́дѡромъ да почти́тсѧ, и҆ і҆вистїѡ́нъ, и҆зрѧдносла́внїи, со і҆ѡ́сифомъ.
[К] И҆ і҆еремі́а ѡ҆блиста̀ житїе́мъ: ꙗ҆ви́сѧ же и҆ крѣ́пость ве́лїѧ і҆схѵ̀рїѡ́нъ, съ ни́миже свѣ́титъ карїѡ́нъ, ко́прїй, ка́стѡръ, кассїа́нъ вкꙋ́пѣ, предо́брїи.
[Л] Дивлю́сѧ каллі́стѡвымъ бл҃гослове́сїємъ, хвалю̀ лаѵре́нтїєва добродѣѧ̑нїѧ, бл҃готворе́нїе же ло́ггїново восхвалѧ́ю, почита́ю лѡ́товы добродѣ́тєли.
[М] Лео́нтїа пою̀ глꙋбинꙋ̀ бг҃осло́вїѧ, маѯі́ма же воспѣва́ю пꙋчи́нꙋ ᲂу҆че́нїй, маркїа́на же ᲂу҆добре́нїе, и҆ ма́рка бл҃гопокори́ваго и҆ бг҃опослꙋ́шнаго.
Че́сть добродѣ́телей мака́рїй вели́кїй: гра́дскїй же мака́рїй бл҃гоче́стїѧ сокро́вище.проповѣ́даетсѧ съ си́ми ма́ркъ и҆зрѧдный, съ матѡ́емъ же мꙋ́рїнъ мѡѷсе́й.
Мартїнїа́нѡвы, и҆ ма́лхѡвы велича́ю ѡ҆ чистотѣ̀ течє́нїѧ и҆ по́двиги, добродѣѧ̑нїѧ же марке́лла пастыренача́льника, почита́ю и҆ мі́лла мертвецевоскреси́телѧ.
Мч҃нцы хрⷭ҇тѡ́вы, содѣ́телю и҆ созда́телю непреста̑нныѧ мл҃твы принеси́те ѡ҆ ми́рѣ мі́ра и҆ ѡ҆ чтꙋ́щихъ па́мѧть ва́шꙋ въ пѣ́снехъ.
Сла́ва, трⷪ҇ченъ: Стра́нно, ꙗ҆́кѡ є҆ди́но и҆ трѝ бж҃ество̀ всѐ въ трїе́хъ ли́цахъ нераздѣ́льно: ѻ҆ц҃ъ бо, сн҃ъ и҆ дх҃ъ ст҃ы́й є҆́сть, покланѧ́емїи во є҆стествѣ̀ є҆ди́нѣмъ.
Бг҃оро́диченъ: Ра́дꙋйсѧ, простра́нное бж҃їе вмѣсти́лище: ра́дꙋйсѧ, ковче́же но́вагѡ завѣ́та: ра́дꙋйсѧ, ста́мно, и҆з̾ неѧ́же ма́нна даде́сѧ всѣ̑мъ человѣ́кѡмъ пренбⷭ҇наѧ.
Катава́сїа: И҆з̾ горы̀ прїѡсѣне́нныѧ, є҆ди́ныѧ бцⷣы, хотѧ́ща тѧ, сло́ве, воплоти́тисѧ,прⷪ҇ро́къ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Пѣ́снь є҃.
І҆рмо́съ: Ѿ мглы̀ страсте́й:
Є҆де́мскагѡ раѧ̀, прїиди́те, ви́димъ цвѣ́ты присножи́знєнныѧ, бг҃опрозѧблє́ннаѧ ѻ҆тцє́въ тща̑нїѧ,и҆́хже є҆́сть є҆ди́нъ дѣ́латель гдⷭ҇ь.
[Н] Ні́ловыхъ слове́съ стрꙋѧ́ми напаѧ́етсѧ всѧ́ка дꙋша̀ мы́сленнаѧ, наѵкра́тїа, ні́кѡна житїи̑ просвѣща́етсѧ, съ наѳана́иломъ же и҆ нїсѳе́нѡръ ᲂу҆слажда́етъ сїю̀.
[Ѯ] [Ѻ] Ѯенофѡ́нтъ съ сыно́ма, добродѣ́тельми блиста́ѧсѧ, просвѣща́етъ на́съ, вели́кїй же ѻ҆рси́сїй, па́че же ѻ҆нꙋ́фрїй: пі́мена же кто̀ достойносло́витъ ѿ земны́хъ;
[П] Па́мвѡ да ᲂу҆блажи́тсѧ досто́йнѡ, ꙗ҆́кѡ и҆ дѣѧ́нїемъ и҆ сло́вомъ высо́кїй. возбранѧ́ѧй же де́монѡмъ пꙋ́плїй всесла́вный да сла́витсѧ, ра́внѡ свѣ́тлый пїннꙋ́фрїй.
Достодо́лжнѡ да почти́тсѧ пресла́вный вои́стиннꙋ пафнꙋ́тїй, пі́ѡръ, патермꙋ́ѳїй, па́ѵелъ препро́стый, пїтѷрꙋ́нъ вели́кїй и҆ ѻ҆тцє́въ нача́льникъ.
Свѣ́тлѡ да похва́литсѧ свѣти́ло свѣти̑лъ пахѡ́мїй, пала́мѡнъ сподви́жникъ, бж҃е́ственный петрѡ́нїй, пассарїѡ́нъ съ си́ми, бж҃е́ственными да воспое́тсѧ пѣ́сньми.
Сла́ва, трⷪ҇ченъ: Ѵ҆поста́сьми трѝ, а҆́ще и҆ є҆ди́но є҆стество́мъ бж҃ество̀ є҆́сть, въ нѧ́же крести́хомсѧ и҆ въ нѧ́же вѣ́рꙋемъ, ѻ҆ц҃ъ, сло́во и҆ дх҃ъ соесте́ственный.
Бг҃оро́диченъ: Сло́вомъ сло́во па́че сло́ва ро́ждшаѧ, пречтⷭ҇аѧ, того̀ молѧ́щи не преста́й, мо́лимсѧ, ѿ бѣ́дъ при́снѡ и҆зба́витисѧ ста́дꙋ твоемꙋ̀.
Катава́сїа: Ѿ мглы̀ страсте́й, ꙗ҆́кѡ ѿ глꙋбо́кїѧ но́щи, мѧ̀ и҆збавлѧ́ѧй, ᲂу҆́треневати сподо́би дꙋ́хъ мо́й, молю́сѧ, во свѣ́тѣ днѐ повелѣ́нїй твои́хъ, хрⷭ҇тѐ.
Пѣ́снь ѕ҃.
І҆рмо́съ: Содержи́ма мѧ̀ грѣхи̑ мно́гими:
Ди́вни всечтⷭ҇ні́и ѻ҆тцы̀ на́ши, и҆́хже бж҃е́ственнїи по́двизи, и҆́хже борє́нїѧ, и҆́хже и҆сцѣлє́нїѧ: кто́ бо па́че си́хъ показа̀ чꙋде́съ крѣ́пость;
[Р][С] Равꙋла̀ ди́вный, и҆ рꙋ́фъ вкꙋ́пѣ, и҆ сїсѡ́й кꙋ́пнѡ равноа́гг҃льный да восхва́литсѧ, съ ни́миже бж҃е́ственный сері́дъ и҆ селꙋа́нъ.
Не́бо четверосвѣти́льное ꙗ҆ви́сѧ на землѝ, два́жды дво́е сїѐ сѷмеѡ́нское є҆диноиме́нїе: и҆̀же на столпѣ́хъ трїѐ сꙋ́ть, и҆ є҆ди́нъ ю҆ро́дивый.
Ꙗ҆́кѡ со́лнце посредѣ̀ ѕвѣ́здъ, и҆̀мже бѣ̀ нача́льникъ, ѡ҆сщ҃е́нный са́вва ѡ҆блиста̀, съ ни́мже ѡ҆зарѧ́етъ и҆ серапїѡ́нъ дѣѧ́ньми съ сїлва́номъ.
[Т][Ѵ][Ф][Х][Ѱ][Ѡ] Сарма́тъ и҆ тїмоѳе́й, тїѳо́й кꙋ́пнѡ со ѵ҆пере́хїемъ, и҆ фармꙋ́фїй, фѡ́ка, харїтѡ́нъ, херимѡ́нъ, ѱо́й да пое́тсѧ, и҆ ѡ҆́ръ премꙋ́дрый.
Ст҃о́е и҆ сла́вное ѻ҆тє́цъ мно́жество, помѧнꙋ́тое и҆ не и҆менова́нное, и҆зба́вите ѿ бѣ́дъ любо́вїю па́мѧть ва́шꙋ соверша́ющыѧ.
Сла́ва, трⷪ҇ченъ: Тѧ̀, трⷪ҇це пренача́льнаѧ и҆ бж҃е́ственнаѧ є҆ди́нице, свѣ́тъ и҆ свѣ́ты пою̀,жи́знь и҆ жи̑зни, ᲂу҆́мъ, сло́во и҆ дх҃а, ст҃а́го и҆ ст҃ы̑ѧ, є҆ди́наго бг҃а.
Бг҃оро́диченъ: І҆ессе́е пра́ѻтче, взыгра́й: занѐ ѿ ко́рене твоегѡ̀ возсїѧ̀ цвѣ́тъ жи́зни, ѿ чтⷭ҇ыѧ ѻ҆трокови́цы хрⷭ҇то́съ бг҃ъ, сп҃са́ѧй мі́ръ.
Катава́сїа: Содержи́ма мѧ̀ грѣхи̑ мно́гими, и҆ припа́дающа щедро́тамъ твои̑мъ: прїимѝ ꙗ҆́кѡ прⷪ҇ро́ка, чл҃вѣколю́бче гдⷭ҇и, и҆ сп҃си́ мѧ.
Конда́къ, гла́съ и҃.
Подо́бенъ: Ꙗ҆́кѡ нача́тки:
Ꙗ҆́кѡ бл҃гоче́стїѧ проповѣ́дники и҆ нече́стїѧ ѡ҆бꙋзда́тєли, бг҃оно́сныхъ собо́ръ просвѣти́лъ є҆сѝ, гдⷭ҇и, подсо́лнечнꙋю ѡ҆сїѧва́ющыѧ: тѣ́хъ мл҃твами, въ ми́рѣ соверше́ннѣмъ тебѐ сла́вѧщыѧ и҆ велича́ющыѧ сохранѝ, воспѣва́ти тебѣ̀: а҆ллилꙋ́їа.
І҆́косъ: На жите́йскꙋю красотꙋ̀ воззрѣ́хъ, помышле́ньми зрѧ̀ быва́ємаѧ, и҆ и҆змѣ́ривъ тѣ́хъ болѣ̑зни, жи́знь человѣ́кѡвъ ѡ҆ка́ѧхъ: ва́съ же є҆ди́нѣхъ ᲂу҆блажи́хъ, до́брꙋю ча́сть и҆збра́вшихъ, пострада́ти хрⷭ҇тꙋ, и҆ пребыва́ти съ ни́мъ, и҆ пѣ́ти при́снѡ со прⷪ҇ро́комъ дв҃домъ: а҆ллилꙋ́їа.
Сѷнаѯа́рїй.
Стїхѝ: Дꙋша́мъ првⷣныхъ, и҆́хже па́мѧть при́снѡ пребыва́етъ,
Ꙗ҆́кѡ жє́ртвы при́снѡ пребыва́ющыѧ приношꙋ̀ словеса̀.
Въ се́й де́нь па́мѧть соверша́емъ всѣ́хъ въ по́стничествѣ просїѧ́вшихъ ст҃ы́хъ, мꙋже́й же и҆ же́нъ. Бг҃оно́снїи ѻ҆тцы̀, предше́ствꙋющими пра̑здники пома́лꙋ на́съ наста́вивше, и҆ пред̾ꙋстро́ивше гото́выхъ къ по́прищꙋ, и҆ ѿ сластолю́бїѧ и҆ ѡ҆б̾ѧде́нїѧ ѿве́дше, и҆ стра́хомъ бꙋ́дꙋщагѡ сꙋда̀ на́съ наꙋчи́вше, сы́рною же седми́цею ꙗ҆́кѡ до́лжно пред̾ѡчи́стивше, пра́вѡ и҆ два̀ пощє́нїѧ положи́ша посредѣ̀, да пома́лꙋ на́съ къ постꙋ̀ возбꙋ́дѧтъ. Сѐ предлага́ютъ на́мъ и҆ преподо́бнѡ всѧ̀ пожи́вшыѧ, и҆ и҆́накѡ, въ болѣ́знехъ мно́гихъ и҆ трꙋдѣ́хъ, мꙋ́жы же вкꙋ́пѣ и҆ жєны̀: ꙗ҆́кѡ да па́мѧтїю подвигѡ́въ и҆́хъ сотворѧ́тъ на́съ си́льнѣйшихъ къ по́прищꙋ, да и҆́мамы въ житїѝ ѻ҆́нѣхъ себѣ̀ ѡ҆́бразъ нѣ́кїй и҆ пꙋтево́дство, и҆ ѿ ѻ҆́нѣхъ посо́бїе и҆ по́мощь прїе́млюще, къ дꙋхѡ́внымъ подвигѡ́мъ да привлече́мсѧ, помышлѧ́юще, ꙗ҆́кѡ и҆ ті́и тогѡ́жде съ на́ми є҆стества̀. Ꙗ҆́коже бо воевѡ́ды, во́инствѡмъ ѡ҆полчє́ннымъ и҆ ᲂу҆жѐ по чинѡ́мъ стоѧ́щымъ, словесы̀ и҆ ѡ҆бразы̀ и҆ помина̑нїи дре́внихъ мꙋже́й, и҆зрѧ́днѡ воева́вшихъ и҆ хра́бровавшихъ: своѧ̑ вѡ́и ѡ҆б̾ѻщрѧ́ютъ, и҆ ѿсю́дꙋ ѻ҆нѝ ᲂу҆крѣплѧ́еми, наде́ждою побѣ́ды вседꙋ́шнѡ ѡ҆полча́ютсѧ: та́кѡ и҆ ны́нѣ бг҃оно́снїи ѻ҆тцы̀ мꙋ́дрѣ содѣва́ютъ. Преподо́бнѣ бо пожи́вшими къ дꙋхѡ́внымъ подвигѡ́мъ ᲂу҆крѣ́пльше мꙋ́жескїй по́лъ и҆ же́нскїй, си́це къ по́стномꙋ предво́дѧтъ по́прищꙋ, да мы̀ взира́юще на до́брое ѻ҆́нѣхъ житїѐ, ꙗ҆́кѡ на первоѡ́бразъ, дѣ́лаемъ, ꙗ҆́коже комꙋ́ждо си́ла є҆́сть, многови̑дныѧ и҆ разли̑чныѧ добродѣ́тели: пе́рвѣе ᲂу҆́бѡ всѣ́хъ любо́вь, и҆ со ᲂу҆мо́мъ быва́емое ѿреше́нїе ѿ безче́стныхъ дѣ́лъ и҆ дѣѧ́нїй, и҆ по́стъ се́й, не снѣ́дїй то́чїю, но и҆ ѧ҆зы́ка, и҆ ꙗ҆́рости, и҆ ѻ҆́чїю, и҆ про́стѡ рещѝ, всѧ́кагѡ ѕла̀ прекраще́нїе и҆ ѿчꙋжде́нїе. Тоѧ̀ ра́ди вины̀ ст҃і́и ѻ҆тцы̀ настоѧ́щꙋю па́мѧть ст҃ы́хъ всѣ́хъ, посто́мъ и҆ и҆ны́ми бл҃ги́ми до́брыми дѣ́лы бг҃ꙋ ᲂу҆го́ждшихъ, здѣ̀ ᲂу҆чини́ша, ѡ҆́бразомъ си́хъ поꙋща́юще на́съ къ по́прищꙋ добродѣ́телей, и҆ до́блественнѣ воѡрꙋжи́тисѧ на стра̑сти и҆ на де́моны, и҆ нѣ́кїй ѡ҆́бразъ предлага́юще: ꙗ҆́кѡ а҆́ще и҆ мы̀ ра́вное и҆̀мъ тща́нїе приложи́мъ, ничто́же воспрепѧ́тствꙋетъ и҆ на́мъ содѣ́ѧти, є҆ли̑ка и҆ ѻ҆нѝ содѣ́ѧша, и҆ тѣ́хже сподо́битисѧ че́стей: и҆ сі́и бо тогѡ́жде съ на́ми є҆стества̀.
Ѡ҆ сы́рнѣй же седми́цѣ глаго́лютъ нѣ́цыи, ꙗ҆́кѡ ца́рь и҆ра́клїй сїю̀ вчини́, пре́жде же бѧ́ше мѧсоѧ́стна: на хоздро́а бо и҆ пе́рсы ше́сть лѣ́тъ воева́въ, ѡ҆бѣща́сѧ бг҃ꙋ, а҆́ще на ѻ҆́нѣхъ ᲂу҆крѣпи́тсѧ, сїю̀ посредѣ̀ мѧсоѧ́стїѧ и҆ поста̀ ᲂу҆ста́вити, є҆́же и҆ сотворѝ. И҆ сїѐ возмо́жно є҆́сть. но а҆́зъ мню̀, ꙗ҆́ко ст҃ы́ми ѻ҆тцы̑ ᲂу҆ста́влена бы́сть пред̾ѡчище́нїѧ ра́ди нѣ́коегѡ: ꙗ҆́кѡ да ѿ мѧ́съ и҆ многоѧде́нїѧ а҆́бїе въ кра́йнее неснѣде́нїе ведо́ми, не тꙋ́жимъ, и҆ и҆́накѡ да тѣле́снѣ не вреди́мсѧ: но ти́хѡ и҆ пома́лꙋ ѿходѧ́ще ѿ ᲂу҆тꙋчнѧ́ющихъ и҆ ᲂу҆слажда́ющихъ снѣ́дей, ꙗ҆́коже ко́ни некрѣпкоꙋ́зднїи, ᲂу҆мале́нною снѣ́дїю и҆ броздꙋ̀ поста̀ воспрїи́мемъ. Ꙗ҆́кѡ бо ѡ҆ дꙋшѝ при́тчами сотвори́ша, та́кожде и҆ ѡ҆ тѣлесѝ ᲂу҆мы́слиша, претыка̑нїѧ къ постꙋ̀ пома́лꙋ ѿсѣка́юще.
Прпⷣбныхъ твои́хъ всѣ́хъ мл҃твами, хрⷭ҇тѐ бж҃е на́шъ, поми́лꙋй на́съ. А҆ми́нь.
Пѣ́снь з҃.
І҆рмо́съ: Ѻ҆́троки ѡ҆роси́вый:
Прїиди́те, принесе́мъ пѣ̑сни по до́лгꙋ жена́мъ, преподо́бнѡ пожи́вшымъ и҆ равноа́гг҃льнѡ, и҆́хже мл҃твами воззове́мъ: бж҃е, сп҃сѝ всѧ̑ ны̀.
Хрⷭ҇тоно́сица врѷе́на съ бж҃е́ственною феврѡ́нїею да почти́тсѧ, и҆ ѳѡмаі́дою и҆ і҆ері́ею, и҆ платѡні́да да пое́тсѧ, съ ни́миже и҆ меланѳі́а вѣ́рнѡ.
А҆гг҃ломꙋ́дрєннымъ хвала̀ є҆ѵпраѯі́амъ, со двѣма̀ ѳеодѡ́рами и҆ а҆настасі́ами всебога́тыми, пѣ́нїе и҆ сла́ва непреста́ннаѧ, чꙋ́днѡ послꙋжи́вшымъ бг҃ꙋ.
Є҆гѵ́птѧнынѧ марі́а свѣ́тъ въ мі́рѣ ꙗ҆ви́сѧ, и҆ марі́нъ наре́кшаѧсѧ ѕвѣзда̀ вселе́ннѣй, є҆ѵфросѵ́нїа же со́лнце, добродѣ́тельми ѡ҆блистава́ющаѧ.
Ѻ҆гнесвѣ́тла въ житїѝ ѳеодꙋ́лїа, и҆ блиста́етъ въ поще́нїи ѳеодо́тїа и҆ і҆ꙋлі́тта, и҆ спросїѧ́ваетъ дѣѧ́ньми і҆сїдѡ́ра пребога́таѧ.
Нб҃омꙋ́дреннаѧ марі́на ны́нѣ да почти́тсѧ съ вели́кою матрѡ́ною, сѷгклитїкі́а же и҆ са́рра, со і҆ꙋ́стою, пѣ́сньми ꙗ҆́кѡ мꙋ́дрыѧ да восхва́лѧтсѧ.
Пелагі́а а҆́гг҃лъ гдⷭ҇нь, таі́сїа свѣти́льникъ покаѧ́нїѧ да воспое́тсѧ, и҆ а҆́ще ка́ѧ дрꙋга́ѧ просїѧ̀ ѿ же́нъ въ по́двизѣхъ.
Сла́ва, трⷪ҇ченъ: Съ сн҃омъ ѻ҆ц҃ꙋ̀ покланѧ́емсѧ, и҆ дх҃ꙋ ст҃о́мꙋ, є҆диномꙋ́дреннѡ славосло́вѧще, вѣ́рнѡ вопїе́мъ: сла́ва тебѣ̀, трⷪ҇це є҆ди́нице, бж҃е на́шъ.
Бг҃оро́диченъ: Бцⷣе дв҃о, ро́ждшаѧ сп҃са и҆ влⷣкꙋ мі́ра, бл҃гослове́ннаѧ, того̀ молѝ всегда̀ ᲂу҆ще́дрити дꙋ́шы на́шѧ.
Катава́сїа: Ѻ҆́троки ѡ҆роси́вый въ пещѝ и҆ по ржⷭ҇твѣ̀ дв҃ꙋ сохрани́вый ро́ждшꙋю тѧ̀, бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃.
І҆рмо́съ: На горѣ̀ ст҃ѣ́й:
Па́стыри и҆ мꙋ̑дрыѧ ᲂу҆чи́тєли, ст҃и́тєли хрⷭ҇то́вы цр҃кве, съ прпⷣбными всѝ воспои́мъ, гдⷭ҇а пою́ще и҆ превозносѧ́ще во всѧ̑ вѣ́ки.
По до́лгꙋ васі́лїй вели́кїй да пое́тсѧ пѣ́сньми, и҆ съ ни́мъ многострада́льный вои́стиннꙋ а҆ѳана́сїй со григо́рїемъ въ бг҃осло́вїи нача́льствꙋющимъ над̾ всѣ́ми.
І҆ѡа́нна златоглагѡ́ливаѧ ᲂу҆ста̀, съ кѵ̀рі́ллы бг҃омꙋ́дрыми столпы̑ просла́вимъ: та́коже и҆ и҆сѵ́хїа дрꙋга́го бг҃осло́ва, съ бг҃оглаго́ливымъ и҆ бж҃е́ственнымъ меле́тїемъ.
Григо́рїю сла́ва нѵ́сскомꙋ со двѣма̀ чꙋдотво́рцема ѻ҆тце́ма: и҆ премꙋ́дрый въ бж҃е́ственныхъ є҆пїфа́нїй, со а҆мфїло́хїемъ свѣ́тлымъ свѣти́льникомъ, да пое́тсѧ во вѣ́ки.
Митрофа́на сщ҃е́нникѡвъ сла́вꙋ, съ некта́рїемъ, а҆тті́комъ, генна́дїемъ, съ ни́миже и҆ а҆нато́лїа пои́мъ, жи́зни свѣти́льники, кꙋ́пнѡ со є҆ѵсе́вїемъ и҆ про́кломъ премꙋ́дрыми.
Нїкола́а сщ҃еннопроповѣ́дника, сѡфро́нїа вои́стиннꙋ медоѧзы́чнаго со є҆ѵла́лїемъ пою̀, и҆ дїадо́ха кꙋ́пнѡ со є҆ѵста́ѳїемъ и҆ і҆ꙋвена́лїемъ ѻ҆тцеверхо́вными.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ꙗ҆́кѡ є҆ди́ницꙋ сꙋщество́мъ пою̀ тѧ̀, ꙗ҆́кѡ трⷪ҇цꙋ ли̑цы тѧ̀ чтꙋ̀: ѻ҆́ч҃е, и҆ сн҃е, и҆ дш҃е прест҃ы́й, безнача́льнꙋю держа́вꙋ твоегѡ̀ црⷭ҇твїѧ сла́влю во вѣ́ки.
Бг҃оро́диченъ: Ты̀ гора̀ бж҃їѧ ꙗ҆ви́ласѧ є҆сѝ, бцⷣе, въ ню́же хрⷭ҇то́съ всели́всѧ, бж҃е́ствєнны хра́мы содѣ́ла пою́щыѧ: гдⷭ҇а по́йте и҆ превозноси́те во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви.
Катава́сїа: На горѣ̀ ст҃ѣ́й просла́вльшасѧ, и҆ въ кꙋпинѣ̀ та́йнꙋ приснодв҃ы ѻ҆гне́мъ мѡѷсе́ови ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.
И҆ стїхосло́витсѧ Чтⷭ҇нѣ́йшꙋю:
Пѣ́снь ѳ҃.
І҆рмо́съ: Проѧвле́нное на горѣ̀:
Кто̀ дерзнове́нїе и҆зрече́тъ а҆мвро́сїево; і҆ероѳе́евꙋ же ка́кѡ премꙋ́дрость и҆зглаго́летъ, и҆ а҆леѯа́ндрѡвъ бг҃омꙋ́дрыхъ ѻ҆тє́цъ ѡ҆ вѣ́рѣ тве́рдость;
Феді́мъ бж҃е́ственный, спѷрїдѡ́нъ бг҃оно́сный, со а҆нтїпа́тромъ, па́мвомъ, палла́дїемъ и҆ но́нномъ, і҆ерѡнѵ́момъ и҆ ге́рманомъ всечестны́мъ, ꙗ҆́кѡ бг҃освѣти́льницы да воспою́тсѧ.
Вели́кїй въ бж҃е́ственныхъ дїонѵ́сїй да почти́тсѧ, ꙗ҆́кѡ нбⷭ҇ныхъ таи́нникъ, многострада́льный кли́ментъ, флавїа́нъ и҆ па́ѵелъ вели́кїй, и҆сповѣ́данїѧ первопроповѣ̑дницы.
Мїхаи́лъ сѷна́дскїй да пое́тсѧ съ тара́сїемъ, нїки́форъ па́ки съ ѳео́дѡромъ и҆зрѧ́днымъ, и҆ ѳеофа́нъ сщ҃енноиме́нный вои́стиннꙋ, защи̑тницы і҆кѡ́нъ хрⷭ҇то́выхъ.
Пе́тръ и҆ і҆гна́тїй вои́стиннꙋ бг҃оно́сцы, ꙗ҆́кѡ хрⷭ҇тѡ́вы а҆пⷭ҇ли и҆ сщ҃еннострада́льцы сꙋ́ще, да воспою́тсѧ кꙋ́пнѡ съ полѷка́рпомъ и҆ кѷпрїа́номъ хрⷭ҇то́вымъ мч҃нкомъ.
Прпⷣбнїи ѻ҆тцы̀ и҆ ст҃и́телїе гдⷭ҇ни, со сщ҃енномч҃нки и҆ жена́ми ст҃ы́ми, и҆менова́ннїи и҆ не и҆менова́ннїи всѝ, моли́те сп҃сти́сѧ дꙋша́мъ на́шымъ.
Сла́ва, трⷪ҇ченъ: Є҆ди́ный въ трⷪ҇цѣ бж҃е, сла́ва тебѣ̀ непреста́ннѡ: а҆́ще бо и҆ бг҃ъ кі́йждо, но є҆ди́нъ є҆стество́мъ є҆сѝ, ѻ҆ц҃ъ, и҆ сн҃ъ, и҆ дх҃ъ, трисвѣ́тлыми сво́йствы.
Бг҃оро́диченъ: Кꙋпинꙋ̀ горѧ́щꙋю ѻ҆гне́мъ и҆ неѡпали́мꙋю, предзрѧ́ше дре́вле мѡѷсе́й на сїна́йстѣй горѣ̀, бг҃опрїѧ́тное твоѐ чре́во, дв҃о, под̾е́млющее нетлѣ́нный ѻ҆́гнь.
Катава́сїѧ: Проѧвле́нное на горѣ̀ законополо́жникꙋ, во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ.
Є҆ѯапостїла́рїй.
Подо́бенъ: Жєны̀ ᲂу҆слы́шите:
Мі́ра ѿве́ргшїисѧ и҆ крⷭ҇тъ взе́мшїи, мно́жество прпⷣбныхъ ѻ҆тє́цъ, съ ли̑ки мч҃нкъ, ст҃и́телей со́нме и҆ же́нъ собра́нїе, на́съ возвесели́те, є҆́же воспѣ́ти досто́йнѡ ва́шꙋ всесвѣ́тлꙋю па́мѧть.
Сла́ва, и҆ ны́нѣ:
Подо́бенъ: Со ᲂу҆ч҃нки̑ взы́демъ:
Въ по́стничествѣ просїѧ́вшыѧ бг҃онѡ́сныѧ ѻ҆тцы̀, и҆ ст҃и́тєли, кꙋ́пнѡ же ѿ же́нъ прпⷣбныѧ, и҆ сщ҃енномч҃никѡвъ ли́ки, въ пѣ́снехъ свѣ́тлѡ восхва́лимъ: ꙗ҆́кѡ да ѡ҆ст҃и́мсѧ, и҆ моле́ньми си́хъ и҆ мл҃твами бцⷣы ᲂу҆до́бнѡ соверши́мъ тече́нїе поста̀.
На хвали́техъ поста́вимъ стїхѝ д҃, и҆ пое́мъ стїхи̑ры, гла́съ и҃.
Подо́бенъ: Во є҆де́мѣ ра́й:
Ѻ҆тцє́въ мно́жество, преподо́бнѡ по́стничествовавшее, въ пѣ́снехъ возвели́чимъ всѝ, вѣ́рнїи,ст҃и́телей же хрⷭ҇то́выхъ восхва́лимъ пѣ́сньми бг҃омꙋ́дреннѡ є҆динодꙋ́шнѡ, бра́тїе: въ воздержа́нїи бо пожи́ша и҆ въ постѣ̀ чи́стомъ, и҆ хрⷭ҇то́во на́мъ є҆ѵⷢ҇лїе и҆з̾ѧсни́ша. съ ни́миже воспои́мъ жєны̀ бг҃онѡ́сныѧ и҆ свѣ̑тлыѧ, жи́тельствꙋ и҆́хъ бг҃олѣ́пнѡ ревнꙋ́юще въ дꙋшѝ: да ѡ҆брѧ́щемъ та́мѡ согрѣше́нїй проще́нїе.
Въ по́стничествѣ просїѧ́вшыѧ свѣ́тлѡ, преподо́бнѡ же пожи́вшыѧ, похва́лимъ пресла́внѡ, бра́тїе,ꙗ҆́кѡ жи́тельствовавшыѧ до́брѣ и҆ къ жи́зни вѣ́чнѣй бл҃гоче́стнѡ пресели́вшыѧсѧ въ ра́дости: ко ᲂу҆покое́нїю же та́мошнемꙋ неги́блемомꙋ и҆ бл҃же́нномꙋ добродѣ́телїю и҆ че́стностїю пра́вѡ поте́кшыѧ, сѐ досто́йнѡ почти́мъ, ꙗ҆́кѡ да полꙋчи́мъ млⷭ҇ть ѿ бг҃а, и҆́хъ моле́нїемъ, и҆ вѣ́чнꙋю сла́вꙋ и҆ ра́дость: и҆ и҆зба́вимсѧ ѿ та́мѡшнихъ неꙋмоли́мыхъ мꙋче́нїй.
Ст҃и́телей всѣ́хъ ли́че, првⷣныхъ собра́нїе, по́стникѡвъ же и҆ прпⷣбныхъ же́нъ, пожи́вшихъ бл҃гоче́стнѡ, ᲂу҆моле́ни бл҃года́тїю, моли́те є҆ди́наго бл҃га́го и҆ всеще́драго гдⷭ҇а, ᲂу҆ще́дрити и҆ на́съ: да и҆ мы ѿ та́мошнѧгѡ ѡ҆сꙋжде́нїѧ и҆зба́вимсѧ навсегда̀ мл҃твами ва́шими, мꙋ́дрїи, и҆ бꙋ́дꙋщїѧ сла́дости вкꙋ́симъ, непреста́ннѡ во вѣ́ки вѣкѡ́въ веселѧ́щесѧ и҆ похва́льнꙋю пѣ́снь непреста́ннѡ жизнода́вцꙋ взыва́юще.
Бг҃олѣ́пное торжество̀, вѣ́рнїи, воспле́щимъ дне́сь въ па́мѧти ст҃ы́хъ ѻ҆би́льнѡ, ст҃и́телей, и҆ по́стникѡвъ, и҆ сщ҃енномч҃нкѡвъ, и҆ прпⷣбныхъ же́нъ, и҆ бл҃гочести́выхъ: тлѣ̑ннаѧ бо и҆ привре́мєннаѧ и҆́стиннѡ презрѣ́ша, и҆ а҆́ки паꙋчи́нꙋ и҆ а҆́ки ᲂу҆ме́ты сїѧ̑ вмѣни́ша, да прїѡбрѧ́щꙋтъ хрⷭ҇та̀, и҆ црⷭ҇твїе є҆гѡ̀, и҆ бж҃е́ствєннаѧ ѻ҆́наѧ, и҆́хже ѻ҆́ко не ви́дѣ, нижѐ ᲂу҆́хо когда̀ слы́ша. тѣ́хъ мл҃твами, бж҃е, и҆зба́ви ѿ тлѣ́нїѧ дꙋ́шы на́шѧ.
Сла́ва, самогла́сенъ, гла́съ ѕ҃:
Прпⷣбнїи ѻ҆тцы̀, во всю̀ зе́млю и҆зы́де вѣща́нїе и҆справле́нїй ва́шихъ: тѣ́мже на нб҃сѣ́хъ ѡ҆брѣто́сте мздꙋ̀ трꙋдѡ́въ ва́шихъ: де́монѡвъ разрꙋши́сте пѡ́лчища, а҆́гг҃лѡвъ постиго́сте чи́ны, и҆́хже житїю̀ непоро́чнѡ поревнова́сте. дерзнове́нїе и҆мꙋ́ще ко гдⷭ҇ꙋ, ми́ръ и҆спроси́те дꙋша́мъ на́шымъ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое. И҆ ѿпꙋ́стъ.
На лїтꙋргі́и и҆з̾ѡбрази́тєльнаѧ. И҆ ѿ канѡ́на пѣ́снь г҃-ѧ и҆ ѕ҃-ѧ.
Прокі́менъ а҆пⷭ҇ла, гла́съ д҃: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Возношє́нїѧ бж҃їѧ въ горта́ни и҆́хъ.
А҆пⷭ҇лъ днѐ: къ ри́млѧнѡмъ, зача́ло рє҃і. Дрꙋгі́й прпⷣбныхъ, къ гала́тѡмъ, зача́ло сг҃і.
А҆ллилꙋ́їа, гла́съ в҃: Насажде́ни въ домꙋ̀ гдⷭ҇ни: Сті́хъ: Весели́тесѧ ѡ҆ гдⷭ҇ѣ и҆ ра́дꙋйтесѧ, првⷣнїи.
Є҆ѵⷢ҇лїе ѿ матѳе́а, зача́ло ѕ҃і. И҆ прпⷣбныхъ, зача́ло м҃г. Кїнѡні́къ: Ра́дꙋйтесѧ: А҆ллилꙋ́їа, три́жды.