Четверг первой седмицы
Въ четверто́къ пе́рвыѧ седми́цы на ᲂу҆́трени.
По а҃-мъ стїхосло́вїи сѣда́льны а҆пⷭ҇льскїѧ, ѻ҆смогла́сника два̀, и҆ бг҃оро́диченъ. Та́же чте́нїе.
По в҃-мъ стїхосло́вїи сѣда́ленъ, гла́съ в҃.
Подо́бенъ: Оу҆мꙋдри́вый па́че:
Свѣти̑ла въ концѣ́хъ ᲂу҆ч҃нкѝ показа́вый проповѣ́данїемъ, сло́ве бж҃їй, сердца̀ на̑ша просвѣтѝ свѣ́томъ добродѣ́телей, и҆ посто́мъ ѡ҆чи́сти, даѧ̀ покаѧ́нїе ѡ҆браще́нїѧ рабѡ́мъ твои̑мъ, во є҆́же сла́вити тѧ̀, сп҃се, є҆ди́не сы́й пребл҃гі́й.
Сла́ва, то́йже.
И҆ ны́нѣ, бг҃оро́диченъ, гла́съ то́йже:
Бцⷣе, не пре́зри менѐ тре́бꙋюща застꙋпле́нїѧ твоегѡ̀: на тѧ́ бо ᲂу҆пова̀ дꙋша̀ моѧ̀, поми́лꙋй мѧ̀.
По г҃-мъ стїхосло́вїи сѣда́ленъ, гла́съ є҃.
Подо́бенъ: Ст҃ѣ́йшаѧ херꙋві̑мъ:
Свѣтлѣ́йшꙋю въ добродѣ́телехъ, сожи́тельницꙋ нбⷭ҇нꙋю, воздержа́нїе ми́рнѡ на́мъ соверши́ти моли́сѧ, мо́лимъ тѧ̀, а҆пⷭ҇льскаѧ двоенадесѧ́тице, и҆ прїѧ́ти плоды̀ сп҃се́нїѧ: вы́ бо вои́стиннꙋ земны̑мъ є҆стѐ держа́ва, и҆ прибѣ́жище дꙋша́мъ на́шымъ.
Сла́ва, то́йже:
И҆ ны́нѣ, бг҃оро́диченъ, подо́бенъ, гла́съ то́йже:
Ст҃ѣ́йшаѧ херꙋві̑мъ, вы́шшаѧ нб҃съ, всепѣ́таѧ бцⷣе, тѧ̀ вои́стиннꙋ и҆сповѣ́дающе, и҆́мамы грѣ́шнїи сп҃се́нїе, и҆ ѡ҆брѣта́емъ во и҆скꙋше́нїихъ предста́тельство. тѣ́мже не преста́й ѡ҆ на́съ молѧ́щи,держа́во и҆ прибѣ́жище дꙋша́мъ на́шымъ.
Канѡ́нъ въ мине́и.
И҆ трипѣ́снецъ господи́на і҆ѡ́сифа, гла́съ в҃.
И҆ стїхосло́витсѧ четве́ртаѧ пѣ́снь ѱалти́ри.
Пѣ́снь д҃.
І҆рмо́съ: Прише́лъ є҆сѝ ѿ дѣ́вы:
Воздержа́нїѧ зари̑ прїе́млющи, ѡ҆блиста́йсѧ, дꙋшѐ, и҆ ѿбѣ́гни грѣхо́внагѡ ѡ҆мраче́нїѧ: ꙗ҆́кѡ да возсїѧ́етъ тѝ ѡ҆ставле́нїѧ свѣ́тъ, бж҃е́ственнымъ дх҃омъ.
Оу҆́дицею сла́сти прельсти́въ, плѣ́нника восхи́ти мѧ̀ льсти́вый: но мі́ръ сло́вомъ ᲂу҆лови́вшїи а҆пⷭ҇ли, ѿ тогѡ̀ ѕло́бы мѧ̀ и҆зба́вите.
Ꙗ҆ви́стесѧ зарє́нїѧ со́лнца сла́вы, а҆пⷭ҇ли сла́внїи, пре́лести тьмꙋ̀ ѿгонѧ́юще: и҆ менѐ ᲂу҆́бо просвѣти́те, всѧ́кою ѕло́бою ѡ҆мраче́ннаго.
Бг҃оро́диченъ: Воззовꙋ̀ къ тебѣ̀, дв҃о, въ нощѝ и҆ во днѝ печа́ленъ сы́й, и҆ и҆зба́влюсѧ, и҆ сла̑сте́й прейдꙋ̀ стѣ́нꙋ, и҆ сп҃сꙋ́сѧ, твое́ю си́лою ѡ҆гражда́емый.
И҆́ный, господи́на ѳео́дѡра. Гла́съ є҃.
І҆рмо́съ: Дѣла̀ смотре́нїѧ твоегѡ̀, гдⷭ҇и:
Сл҃нца пра́вды свѣти̑ла всесвѣ̑тлаѧ сꙋ́ще, а҆пⷭ҇ли, просвѣща́ете земны́й мі́ръ, мра́къ пре́лести ѿгонѧ́юще.
Цѣвни́ца сп҃сова дх҃одви́жимаѧ сꙋ́ще, а҆пⷭ҇ли, позна́вшесѧ на землѝ, доброгла́снꙋю поетѐ на́мъ пѣ́снь, и҆ мі́ръ къ бг҃ꙋ ѡ҆браща́ете.
Сла́ва, трⷪ҇ченъ:
Трⷪ҇цꙋ во є҆ди́нственнѣмъ сꙋществѣ̀ сла́вѧще, є҆ди́наго гдⷭ҇а бг҃а воспои́мъ, нерожде́ннаго ѻ҆ц҃а̀,сн҃а рожде́ннаго, и҆ дх҃а живꙋ́щаго.
Бг҃оро́диченъ: Дв҃а зача́тъ во чре́вѣ, гдⷭ҇и, и҆ родѝ тебѐ є҆мманꙋ́ила: и҆зше́лъ бо є҆сѝ на сп҃се́нїе люде́й твои́хъ, сп҃стѝ пома̑занныѧ твоѧ̑, чл҃вѣколю́бче.
Сла́ва тебѣ̀, бж҃е на́шъ, сла́ва тебѣ̀.
А҆пⷭ҇льскаѧ двоенадесѧ́тице, бж҃е́ственнаѧ и҆ всечⷭ҇тна́ѧ, молѝ хрⷭ҇та̀ ѡ҆ на́съ, мо́лимсѧ, прейтѝ на́мъ бл҃гомо́щнѡ четыредесѧтодне́вное по́прище.
І҆рмо́съ: Дѣла̀ смотре́нїѧ твоегѡ̀, гдⷭ҇и, ᲂу҆жаси́ша прⷪ҇ро́ка а҆ввакꙋ́ма: и҆зше́лъ бо є҆сѝ на сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Пѣ́снь и҃.
І҆рмо́съ: Велѣ́нїю мꙋчи́телевꙋ:
Пости́мсѧ ѿ всѧ́кїѧ сла́сти, ѡ҆горчева́юще чꙋ̑вства посто́мъ, и҆ питїѐ ᲂу҆миле́нїѧ те́плѣ да пїе́мъ, пою́ще: бл҃гослови́те, дѣла̀ гдⷭ҇нѧ, гдⷭ҇а.
Є҆гда̀ сѧ́дете со хрⷭ҇то́мъ сꙋди́ти человѣ́кѡмъ, а҆пⷭ҇ли, ѡ҆деснꙋ́ю стоѧ́нїѧ ѻ҆́бщникꙋ и҆ мнѣ̀ бы́ти моли́тесѧ, мно́гими грѣхми́ сꙋдꙋ̀ пови́нномꙋ.
На колесни́цꙋ бж҃е́ственныхъ добродѣ́телей, посто́мъ ѡ҆чи́стившесѧ, взы́демъ, и҆ къ воздꙋ́шнѣй высотѣ̀ ᲂу҆́мъ ѡ҆крили́мъ, пою́ще: бл҃гослови́те, дѣла̀ гдⷭ҇нѧ, гдⷭ҇а.
Бг҃оро́диченъ: Пребыла̀ є҆сѝ неѡпали́ма, ро́ждши бж҃е́ственный ѻ҆́гнь, дв҃о: но попалѝ стра̑сти дꙋ́шъ вѣ́рою пою́щихъ тѝ гла́съ а҆́гг҃ла, є҆ди́на ра́дости хода́таице.
И҆́ный.
І҆рмо́съ: Преподо́бнїи твоѝ ѻ҆́троцы:
Дх҃а трꙋбы̑, хрⷭ҇тѡ́вы ᲂу҆ч҃нкѝ воспѣва́юще, вопїе́мъ: бл҃гослови́те, дѣла̀ гдⷭ҇нѧ, гдⷭ҇а.
Ꙗ҆́кѡ мл҃твенники мі́рꙋ и҆ прогони́тєли прельще́нїѧ ᲂу҆ч҃нкѝ хрⷭ҇тѡ́вы воспѣва́емъ, вопїю́ще: бл҃гослови́те, дѣла̀ гдⷭ҇нѧ, гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Трⷪ҇цꙋ всест҃ꙋ́ю, во ѻ҆ц҃ѣ̀ и҆ сн҃ѣ и҆ дс҃ѣ, воспѣва́юще, пое́мъ: бл҃гослови́те, дѣла̀ гдⷭ҇нѧ, гдⷭ҇а.
Бг҃оро́диченъ: Неизглаго́ланное твоѐ ржⷭ҇тво̀, чтⷭ҇аѧ, воспѣва́емъ всѝ человѣ́цы, бл҃гоче́стнѡ взыва́юще: бл҃гослови́те, дѣла̀ гдⷭ҇нѧ, гдⷭ҇а.
Сла́ва тебѣ̀, бж҃е на́шъ, сла́ва тебѣ̀.
А҆пⷭ҇ли, моли́тесѧ, ѡ҆чисти́тєльныѧ дни̑ въ ми́рѣ на́мъ сконча́ти, вопїю́щымъ: бл҃гослови́те, дѣла̀ гдⷭ҇нѧ, гдⷭ҇а.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Преподо́бнїи твоѝ ѻ҆́троцы, хрⷭ҇тѐ, въ пещѝ воспѣва́юще глаго́лахꙋ: бл҃гослови́те, дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ: Невмѣсти́маго бг҃а:
Ѿве́рженъ въ глꙋбо́кꙋю пꙋчи́нꙋ сласте́й, твоегѡ̀ милосе́рдїѧ бе́зднꙋ призыва́ю: ко́рмчїй, сп҃си́ мѧ.
Милосе́рдїѧ и҆сто́чниче, да́ждь мѝ ны́нѣ ᲂу҆миле́нїе, воздыха́нїе, ꙗ҆́кѡ да воспла́чꙋ ѡ҆ безмѣ́рныхъ морѧ̀хъ ѕѡ́лъ мои́хъ.
Оу҆ч҃нкѡ́въ твои́хъ, і҆и҃се, честны́ми молє́нїи, да́ждь мѝ поклони́тисѧ честно́мꙋ воскрⷭ҇нїю и҆ бж҃е́ствєннымъ твои̑мъ стрⷭ҇те́мъ.
Бг҃оро́диченъ: Ѡ҆небеси́вшаѧ на́ше земно́е смѣше́нїе бж҃їимъ въ тебѣ̀ вселе́нїемъ, всенепоро́чнаѧ, и҆зба́ви всѧ̑ ѿ бѣ́дъ.
И҆́ный.
І҆рмо́съ: Велича́емъ, хрⷭ҇тѐ:
И҆з̾ и҆стѡ́чникъ сп҃совыхъ прⷪ҇ро́чески поче́рпше во́дꙋ безсме́ртїѧ, а҆пⷭ҇ли ᲂу҆че́ньми жи́зни жа́ждꙋщыѧ напаѧ́ютъ всегда̀.
Цр҃ѧ̀ нбⷭ҇нагѡ ꙗ҆́вльшесѧ кнѧ́зи, а҆пⷭ҇ли, покори́сте вселе́ннꙋю всю̀ сего̀ є҆ди́наго почита́ти,покланѧ́тисѧ и҆ славосло́вити, ꙗ҆́кѡ бг҃а.
Сла́ва, трⷪ҇ченъ: Трⷪ҇це нераздѣ́льнаѧ, є҆ди́нице вседѣ́тельнаѧ и҆ всеси́льнаѧ, ѻ҆́ч҃е, сн҃е и҆ ст҃ы́й дш҃е: ты̀ бг҃ъ мо́й, гдⷭ҇ь и҆ свѣ́тъ, и҆ тебѣ̀ воспѣва́ѧ покланѧ́юсѧ.
Бг҃оро́диченъ: Тѧ̀, мт҃и и҆ дв҃о чтⷭ҇аѧ, ᲂу҆бл҃жи́мъ ро́ди родѡ́въ: ꙗ҆́кѡ была̀ є҆сѝ ѡ҆чисти́лище мі́рꙋ, сп҃са и҆ содѣ́телѧ неизглаго́ланнѡ ро́ждши.
Сла́ва тебѣ̀, бж҃е на́шъ, сла́ва тебѣ̀.
А҆пⷭ҇льскїй ли́че, воспѣва́ющыѧ тѧ̀ сп҃са́й, и҆ сподо́би во ᲂу҆миле́нїи се́рдца прейтѝ всѧ̑ дни̑ свѣтотво́рныхъ постѡ́въ.
І҆рмо́съ: Велича́емъ, хрⷭ҇тѐ, твою̀ всенепоро́чнꙋю мт҃рь чтⷭ҇ꙋю: ꙗ҆́кѡ преесте́ственнѡ пло́тїю роди́ тѧ, ѿ всѧ́кїѧ ле́сти и҆ тлѣ́нїѧ на́съ и҆зба́вльшаго.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ г҃:
Гдⷭ҇и, мнѣ̀ грѣ́шномꙋ положи́лъ є҆сѝ покаѧ́нїе, менѐ недосто́йнаго сп҃стѝ хотѧ̀ безмѣ́рною млⷭ҇тїю твое́ю. къ тебѣ̀ припа́даю молѧ́сѧ: посто́мъ дꙋ́шꙋ мою̀ приклонѝ, ꙗ҆́кѡ къ тебѣ̀ прибѣго́хъ, є҆ди́номꙋ многомлⷭ҇тивомꙋ.
Мч҃нченъ: Ꙗ҆́кѡ свѣти̑ла въ мі́рѣ сїѧ́ете и҆ по сме́рти, ст҃і́и мч҃нцы, по́двигомъ до́брымъ подвиза́вшесѧ: тѣ́мже и҆мꙋ́ще дерзнове́нїе, хрⷭ҇та̀ ᲂу҆моли́те, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, гла́съ то́йже:
Бцⷣе, предста́тельство всѣ́хъ молѧ́щихсѧ, тобо́ю дерза́емъ, и҆ тобо́ю хва́лимсѧ и҆ въ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебє̀ за непотрє́бныѧ рабы̑ твоѧ̑.
На ѕ҃-мъ часѣ̀, тропа́рь прⷪ҇ро́чества, гла́съ а҃:
Ѿ ви́димыхъ и҆ неви́димыхъ вра̑гъ и҆зба́ви на́съ, гдⷭ҇и, да не когда̀ рекꙋ́тъ ꙗ҆зы́цы: гдѣ́ є҆́сть бг҃ъ и҆́хъ; да разꙋмѣ́ютъ, влⷣко, ꙗ҆́кѡ презира́еши грѣхѝ люде́й твои́хъ ка́ющихсѧ.
Прокі́менъ, ѱало́мъ г҃і, гла́съ а҃: Внегда̀ возврати́тъ гдⷭ҇ь плѣне́нїе люде́й свои́хъ. Сті́хъ: Речѐ безꙋ́менъ въ се́рдцѣ свое́мъ: нѣ́сть бг҃ъ.
Прⷪ҇ро́чества и҆са́їина чте́нїе. [Глава̀ в҃, ст. а҃і-к҃а].
Вознесе́тсѧ гдⷭ҇ь є҆ди́нъ въ де́нь ѻ҆́ный. Де́нь бо гдⷭ҇а саваѡ́ѳа на всѧ́каго досади́телѧ, и҆ гордели́ваго, и҆ на всѧ́каго высо́каго, и҆ велича́ваго, и҆ смирѧ́тсѧ: и҆ на всѧ́къ ке́дръ лїва́нскїй высо́кихъ и҆ превознесе́нныхъ, и҆ на всѧ́ко дре́во же́лꙋдѧ васа́нска, и҆ на всѧ́кꙋю го́рꙋ высо́кꙋю, и҆ на всѧ́кїй хо́лмъ высо́кїй, и҆ на всѧ́кїй сто́лпъ высо́къ, и҆ на всѧ́кꙋю стѣ́нꙋ высо́кꙋю, и҆ на всѧ́кїй кора́бль морскі́й, и҆ на всѧ́ко видѣ́нїе добро́ты корабле́й. И҆ смири́тсѧ всѧ́кїй человѣ́къ, и҆ паде́тсѧ высота̀ человѣ́ча, и҆ вознесе́тсѧ гдⷭ҇ь є҆ди́нъ въ де́нь ѻ҆́ный. И҆ рꙋкотворє́ннаѧ всѧ̑ скры́ютъ, вне́сше въ пещє́ры, и҆ въ разсѣ̑лины ка́менїй, и҆ въ верте́пы земны̑ѧ, ѿ лица̀ стра́ха гдⷭ҇нѧ и҆ ѿ сла́вы крѣ́пости є҆гѡ̀, є҆гда̀ воста́нетъ сокрꙋши́ти зе́млю. Въ де́нь бо ѻ҆́ный и҆зри́нетъ человѣ́къ ме́рзѡсти своѧ̑ златы̑ѧ и҆ срє́брѧныѧ, ꙗ҆̀же сотвори́ша, да покланѧ́ютсѧ сꙋ́єтнымъ и҆ нетопырє́мъ, є҆́же вни́ти въ верте́пы тве́рдагѡ ка́мене и҆ въ разсѣ̑лины ка́менїй ѿ лица̀ стра́ха гдⷭ҇нѧ и҆ ѿ сла́вы крѣ́пости є҆гѡ̀, є҆гда̀ воста́нетъ сокрꙋши́ти зе́млю.
Прокі́менъ, ѱало́мъ д҃і, гла́съ д҃: Гдⷭ҇и, кто̀ ѡ҆бита́етъ въ жили́щи твое́мъ; Сті́хъ: Ходѧ́й непоро́ченъ и҆ дѣ́лаѧй пра́вдꙋ.
Въ четверто́къ ве́чера,
во свѣти́льничномъ ѡ҆бы́чное стїхосло́вїе.
На Гдⷭ҇и воззва́хъ, стїхи̑ры подѡ́бны трїѡ́ди, і҆ѡ́сифа, гла́съ в҃. Подо́бенъ: Просвѣти́телѧ на́шего:
Ѡ҆мраче́на мѧ̀ прельще́ньми борца̀, хрⷭ҇тѐ мо́й, просвѣтѝ, ѡ҆мрачи́вый нѣ́когда со́лнце, ви́сѧ на крⷭ҇тѣ̀, и҆ просвѣти́вый вѣ̑рныѧ свѣ́томъ и҆́стиннымъ, ѡ҆ставле́нїѧ ꙗ҆́вѣ, ꙗ҆́кѡ да ходѧ́й во свѣ́тѣ твои́хъ повелѣ́нїй, дости́гнꙋ чи́стѣ воскрⷭ҇нїѧ твоегѡ̀ зарѝ сп҃си́тельныѧ.
Подо́бенъ:
Ꙗ҆́коже лоза̀ на дре́вѣ ви́сѧ, сп҃се, вїно́мъ нетлѣ́нїѧ напои́лъ є҆сѝ, хрⷭ҇тѐ, концы̀. тѣ́мже вопїю̀: пїѧ́нствомъ грѣхо́внымъ лю́тѣ ѡ҆мрача́ема мѧ̀ при́снѡ, сла́достїю ᲂу҆миле́нїѧ и҆́стиннагѡ напои́въ, пости́тисѧ ѿ сласте́й мѧ̀ ны́нѣ ᲂу҆крѣпѝ, сп҃се, ꙗ҆́кѡ бл҃гъ и҆ чл҃вѣколю́бецъ.
И҆́нъ подо́бенъ, кѵ́ръ ѳео́дѡра, гла́съ то́йже.
Подо́бенъ: Ѽ вели́кагѡ та́инства:
Ѽ крⷭ҇та̀ твоегѡ̀ си́лы! се́й произрастѝ цр҃кви воздержа́нїе, дре́внее а҆да́мово во є҆де́мѣ невоздержа́нїе и҆з̾ ко́рене и҆сто́ргшее: ѻ҆́ное ᲂу҆́бѡ сме́рть принесѐ человѣ́кѡмъ, но се́й нетлѣ́ннѡ и҆сточа́етъ безсме́ртїе мі́рꙋ, ꙗ҆́коже и҆з̾ и҆сто́чника и҆на́гѡ ра́йскагѡ, и҆злїѧ́нїемъ твоеѧ̀ живото́чныѧ кро́ве, вкꙋ́пѣ же и҆ воды̀: ѿѻнꙋ́дꙋже всѧ̑ ѡ҆животвори́шасѧ. и҆́мже на́мъ поста̀ весе́лїе ᲂу҆сладѝ, бж҃е і҆и҃левъ, и҆мѣ́ѧй ве́лїю млⷭ҇ть.
И҆ въ мине́и г҃. Сла́ва, и҆ ны́нѣ, крⷭ҇тобг҃оро́диченъ.
Прокі́менъ, ѱало́мъ є҃і, гла́съ д҃: Бл҃гословлю̀ гдⷭ҇а вразꙋми́вшаго мѧ̀. Сті́хъ: Сохрани́ мѧ, гдⷭ҇и, ꙗ҆́кѡ на тѧ̀ ᲂу҆пова́хъ.
Бытїѧ̀ чте́нїе. [Глава̀ в҃, ст. д҃-ѳ҃і.]
Сїѧ̀ кни́га бытїѧ̀ нб҃сѐ и҆ землѝ, є҆гда̀ бы́сть, во́ньже де́нь сотворѝ гдⷭ҇ь бг҃ъ нб҃о и҆ зе́млю, и҆ всѧ́кїй ѕла́къ се́льный, пре́жде да́же бы́ти на землѝ, и҆ всѧ́кꙋю травꙋ̀ се́льнꙋю, пре́жде да́же прозѧ́бнꙋти: не бо̀ ѡ҆дождѝ гдⷭ҇ь бг҃ъ на зе́млю, и҆ человѣ́къ не бѧ́ше дѣ́лати ю҆̀. И҆сто́чникъ же и҆схожда́ше и҆з̾ землѝ, и҆ напаѧ́ше всѐ лицѐ землѝ. И҆ созда̀ бг҃ъ человѣ́ка, пе́рсть [взе́мъ] ѿ землѝ, и҆ вдꙋ́нꙋ въ лицѐ є҆гѡ̀ дыха́нїе жи́зни: и҆ бы́сть человѣ́къ въ дꙋ́шꙋ жи́вꙋ. И҆ насадѝ гдⷭ҇ь бг҃ъ ра́й во є҆де́мѣ на восто́цѣхъ, и҆ введѐ та́мѡ человѣ́ка, є҆го́же созда̀. И҆ прозѧбѐ бг҃ъ є҆щѐ ѿ землѝ всѧ́кое дре́во кра́сное въ видѣ́нїе и҆ до́брое въ снѣ́дь: и҆ дре́во жи́зни посредѣ̀ раѧ̀, и҆ дре́во є҆́же вѣ́дѣти разꙋмѣ́тельное до́брагѡ и҆ лꙋка́вагѡ. Рѣка́ же и҆схо́дитъ и҆з̾ є҆де́ма, напаѧ́ти ра́й: ѿтꙋ́дꙋ разлꙋча́етсѧ въ четы́ри нача̑ла. И҆́мѧ є҆ди́ной фїсѡ́нъ: сїѧ̀ ѡ҆крꙋжа́ющаѧ сїю̀ зе́млю є҆ѵїла́тскꙋю: та́мѡ ᲂу҆́бо є҆́сть зла́то, зла́то же ѻ҆́ныѧ землѝ до́брое: и҆ та́мѡ є҆́сть а҆́нѳраѯъ и҆ ка́мень зеле́ный. И҆ и҆́мѧ рѣцѣ̀ второ́й геѡ́нъ: сїѧ̀ ѡ҆крꙋжа́ющаѧ всю̀ зе́млю є҆ѳїо́пскꙋю. И҆ рѣка̀ тре́тїѧ ті́гръ: сїѧ̀ проходѧ́щаѧ прѧ́мѡ а҆ссѵ̀рі́ѡмъ. Рѣка́ же четве́ртаѧ є҆ѵфра́тъ. И҆ взѧ̀ гдⷭ҇ь бг҃ъ человѣ́ка, є҆го́же созда̀, и҆ введѐ є҆го̀ въ ра́й сла́дости, дѣ́лати є҆го̀ и҆ храни́ти. И҆ заповѣ́да гдⷭ҇ь бг҃ъ а҆да́мꙋ, глаго́лѧ: ѿ всѧ́кагѡ дре́ва, є҆́же въ раѝ, снѣ́дїю снѣ́си: ѿ дре́ва же, є҆́же разꙋмѣ́ти до́брое и҆ лꙋка́вое, не снѣ́сте ѿ негѡ̀: а҆ во́ньже а҆́ще де́нь снѣ́сте ѿ негѡ̀, сме́ртїю ᲂу҆́мрете. И҆ речѐ гдⷭ҇ь бг҃ъ: не добро̀ бы́ти человѣ́кꙋ є҆ди́номꙋ: сотвори́мъ є҆мꙋ̀ помо́щника по немꙋ̀. И҆ созда̀ бг҃ъ є҆щѐ ѿ землѝ всѧ̑ ѕвѣ̑ри сє́льныѧ, и҆ всѧ̑ пти̑цы небє́сныѧ, и҆ приведѐ ѧ҆̀ ко а҆да́мꙋ ви́дѣти, что̀ нарече́тъ ѧ҆̀: и҆ всѧ́ко є҆́же а҆́ще наречѐ а҆да́мъ дꙋ́шꙋ жи́вꙋ, сїѐ и҆́мѧ є҆мꙋ̀.
Прокі́менъ, ѱало́мъ ѕ҃і, гла́съ д҃: Сохрани́ мѧ, гдⷭ҇и, ꙗ҆́кѡ зѣ́ницꙋ ѻ҆́ка. Сті́хъ: Оу҆слы́ши, гдⷭ҇и, пра́вдꙋ мою̀.
При́тчей чте́нїе. [Глава̀ г҃, ст. а҃-и҃і.]
Сы́не, мои́хъ зако́нѡвъ не забыва́й, глаго́лы же моѧ̑ да соблюда́етъ твоѐ се́рдце: долготꙋ́ бо житїѧ̀, и҆ лѣ̑та жи́зни, и҆ ми́ръ приложа́тъ тебѣ̀. Ми́лѡстыни и҆ вѣ́ра да не ѡ҆скꙋдѣва́ютъ тебѣ̀: ѡ҆бложи́ же ѧ҆̀ на твое́й вы́и, и҆ напишѝ ѧ҆̀ на скрижа́ли се́рдца твоегѡ̀: и҆ ѡ҆брѧ́щеши бл҃года́ть. И҆ промышлѧ́й дѡ́браѧ пред̾ гдⷭ҇емъ [бг҃омъ] и҆ человѣ̑ки. Бꙋ́ди ᲂу҆пова́ѧ всѣ́мъ се́рдцемъ на бг҃а, ѡ҆ твое́й же премꙋ́дрости не возноси́сѧ: во всѣ́хъ пꙋте́хъ твои́хъ познава́й ю҆̀,да и҆справлѧ́етъ пꙋти̑ твоѧ̑. Не бꙋ́ди мꙋ́дръ ѡ҆ себѣ̀: бо́йсѧ же бг҃а, и҆ ᲂу҆клонѧ́йсѧ ѿ всѧ́кагѡ ѕла̀: тогда̀ и҆сцѣле́нїе бꙋ́детъ тѣ́лꙋ твоемꙋ̀ и҆ ᲂу҆врачева́нїе косте́мъ твои̑мъ. Чтѝ гдⷭ҇а ѿ пра́ведныхъ твои́хъ трꙋдѡ́въ, и҆ нача́тки дава́й є҆мꙋ̀ ѿ твои́хъ плодѡ́въ пра́вды: да и҆спо́лнѧтсѧ жи̑тницы твоѧ̑ мно́жествомъ пшени́цы, вино́ же точи̑ла твоѧ̑ да и҆сточа́ютъ. Сы́не, не пренебрега́й наказа́нїѧ гдⷭ҇нѧ, нижѐ ѡ҆слабѣва́й ѿ негѡ̀ ѡ҆блича́емый: є҆го́же бо лю́битъ гдⷭ҇ь, наказꙋ́етъ, бїе́тъ же всѧ́каго сы́на, є҆го́же прїе́млетъ. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища.Честнѣ́йша же є҆́сть ка́менїй многоцѣ́нныхъ: не сопротивлѧ́етсѧ є҆́й ничто́же лꙋка́во, бл҃гозна́тна є҆́сть всѣ̑мъ приближа́ющымсѧ є҆́й: всѧ́ко же честно́е недосто́йно є҆ѧ̀ є҆́сть. Долгота́ бо житїѧ̀ и҆ лѣ̑та жи́зни въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Пꙋтїѐ є҆ѧ̀ пꙋтїѐ добрѝ, и҆ всѧ̑ стєзѝ є҆ѧ̀ ми̑рны. Дре́во живота̀ є҆́сть всѣ̑мъ держа́щымсѧ є҆ѧ̀, и҆ воскланѧ́ющымсѧ на ню̀, ꙗ҆́кѡ на гдⷭ҇а, тверда̀.
На стїхо́внѣ самогла́сенъ днѐ, два́жды, гла́съ д҃:
Жела́юще бж҃е́ственныѧ па́схи причасти́тисѧ, не ѿ є҆гѵ́пта, но и҆з̾ сїѡ́на грѧдꙋ́щїѧ, грѣхо́вный ква́съ ѿве́ргнемъ покаѧ́нїемъ: препоѧ́шимъ чресла̀ на̑ша ᲂу҆мерщвле́нїемъ сласте́й: ᲂу҆краси́мъ но́ги сапогмѝ, возбрани́тельными ѿ всѧ́кагѡ пꙋтѝ лꙋка́вагѡ, и҆ ᲂу҆тверди́мсѧ па́лицею вѣ́ры: не ревнꙋ́имъ врагѡ́мъ влⷣчнѧгѡ крⷭ҇та̀ боготворѧ́ще чре́во, но послѣ́дꙋимъ побѣ́дꙋ на дїа́вола посто́мъ на́мъ показа́вшемꙋ, сп҃сꙋ дꙋ́шъ на́шихъ.
Мч҃нченъ: Прославлѧ́емый въ па́мѧтехъ мч҃нкъ твои́хъ, хрⷭ҇тѐ бж҃е, ѿ ни́хъ ᲂу҆молѧ́емь, низпослѝ на́мъ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Ꙗ҆́кѡ до́блѧ:
На крⷭ҇тѣ́ тѧ є҆гда̀ ᲂу҆зрѣ̀ пригвожда́ема, гдⷭ҇и, а҆́гница и҆ мт҃и твоѧ̀ дивлѧ́шесѧ и҆ глаго́лаше: что̀ видѣ́нїе сїѐ, сн҃е возжелѣ́нне; сїѧ̑ тѝ воздае́тъ невѣ́рный наро́дъ беззако́нный, мно́гихъ твои́хъ чꙋде́съ наслади́выйсѧ. но сла́ва неизрече́нномꙋ снисхожде́нїю твоемꙋ̀, влⷣко.
И҆ про́чее послѣ́дованїе по ѡ҆бы́чаю.
Въ четверто́къ пе́рвыѧ седми́цы на повече́рїи
пое́мъ настоѧ́щїй вели́кїй канѡ́нъ прпⷣбнагѡ ѻ҆тца̀ на́шегѡ а҆ндре́а кри́тскагѡ и҆ і҆ерꙋсали́мскагѡ. Гла́съ ѕ҃. І҆рмосы̀ по два́жды. Твори́мъ же на кі́йждо тропа́рь покло́ны г҃, глаго́люще и҆ сті́хъ: Поми́лꙋй мѧ̀, бж҃е, поми́лꙋй мѧ̀.
Пѣ́снь а҃.
І҆рмо́съ: Помо́щникъ и҆ покрови́тель:
А҆́гнче бж҃їй, взе́млѧй грѣхѝ всѣ́хъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдъ, да́ждь мѝ сле́зы ᲂу҆миле́нїѧ.
Тебѣ̀ припа́даю, і҆и҃се: согрѣши́хъ тѝ, бꙋ́ди млⷭ҇тивъ мѝ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдый бг҃ъ, ка́ющасѧ прїими́ мѧ.
Не вни́ди со мно́ю въ сꙋ́дъ, носѧ̀ моѧ̑ дѣѧ̑нїѧ, словеса̀ и҆зыскꙋ́ѧ, и҆ ѡ҆блича́ѧ стремлє́нїѧ: но въ щедро́тахъ твои́хъ презира́ѧ моѧ̑ лю̑таѧ, сп҃си́ мѧ, всеси́льне.
Покаѧ́нїѧ вре́мѧ: прихождꙋ́ къ тебѣ́ созда́телю моемꙋ̀, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госѐрдъ, да́ждь мѝ сле́зы ᲂу҆миле́нїѧ.
Бога́тство дꙋше́вное и҆жди́въ грѣхо́мъ, пꙋ́стъ є҆́смь добродѣ́телей бл҃гочести́выхъ, а҆́лченъ же зовꙋ̀: млⷭ҇ти пода́телю, предвари́въ ты̀ мѧ ᲂу҆ще́дри.
Марі́и: Прикло́ньшисѧ къ бж҃е́ствєннымъ зако́нѡмъ хрⷭ҇та̀, къ семꙋ̀ пристꙋпи́ла є҆сѝ, сла́достей неꙋдержи̑маѧ стремлє́нїѧ ѡ҆ста́вивши, и҆ всѧ́кꙋю добродѣ́тель ꙗ҆́кѡ є҆ди́нꙋ всебл҃гоговѣ́йнѡ и҆спра́вила є҆сѝ.
Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рда, да́ждь мѝ сле́зы ᲂу҆миле́нїѧ.
Бг҃оро́диченъ: Бцⷣе, наде́ждо и҆ предста́тельство тебѐ пою́щихъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ влⷣчца чтⷭ҇аѧ, ка́ющасѧ прїими́ мѧ.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, ма́ннꙋ ѡ҆дожди́вый:
Мꙋ́жа ᲂу҆би́хъ въ ꙗ҆́звꙋ мнѣ̀ и҆ ю҆́ношꙋ въ стрꙋ́пъ, ламе́хъ рыда́ѧ вопїѧ́ше, ꙗ҆́коже рече́но є҆́сть: ты́ же не трепе́щеши, ѽ дꙋшѐ моѧ̀, ѡ҆калѧ́вши пло́ть и҆ ᲂу҆́мъ ѡ҆скверни́вши.
Сто́лпъ ᲂу҆мы́слила є҆сѝ созда́ти, ѽ дꙋшѐ, и҆ ᲂу҆твержде́нїе водрꙋзи́ти твои́ми похотьмѝ, а҆́ще не бы̀ зижди́тель смѣси́лъ совѣ́ты твоѧ̑ и҆ низве́рглъ на зе́млю ᲂу҆хищрє́нїѧ твоѧ̑.
Ѽ ка́кѡ поревнова́хъ ламе́хꙋ, дре́внемꙋ ᲂу҆бі́йцѣ, дꙋ́шꙋ ꙗ҆́кѡ мꙋ́жа, ᲂу҆́мъ ꙗ҆́кѡ ю҆́ношꙋ, тѣ́ло же моѐ ꙗ҆́кѡ бра́та ᲂу҆би́въ, ꙗ҆́кѡ ка́їнъ ᲂу҆бі́йца, любосла́стными стремле́ньми!
Ѡ҆дождѝ гдⷭ҇ь ѿ гдⷭ҇а ѻ҆́гнь нѣ́когда, беззако́нїе неи́стовствꙋющее содо́ма попали́въ: ты́ же, ѽ дꙋшѐ, вжегла̀ є҆сѝ ѻ҆́гнь гее́нскїй, въ не́мже и҆́маши го́рцѣ сожже́на бы́ти.
Оу҆ѧ́звленъ, ра́ненъ бы́хъ: сѐ стрѣ́лы вра̑жїѧ и҆з̾ѧзви́вшыѧ мою̀ дꙋ́шꙋ и҆ тѣ́ло: сѐ стрꙋ́пи, гноє́нїѧ, повреждє́нїѧ вопїю́тъ ѡ҆ ра́нахъ самово́льныхъ мои́хъ страсте́й.
Марі́и: Просте́рла є҆сѝ рꙋ́цѣ твоѝ къ ще́дромꙋ бг҃ꙋ, марі́е, въ бе́зднѣ ѕѡ́лъ погрꙋжа́емаѧ: и҆ ꙗ҆́коже петрꙋ̀, чл҃вѣколю́бнѡ се́й рꙋ́кꙋ по́мощи прострѐ, твоегѡ̀ ѡ҆браще́нїе всѧ́чески и҆скі́й.
Сла́ва, трⷪ҇ченъ: Безнача́льнаѧ, несозда́ннаѧ трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша сп҃сѝ. твоѐ є҆́смь созда́нїе, не пре́зри: но пощадѝ мѧ̀ и҆ и҆зба́ви ѿ ѻ҆́гненнагѡ ѡ҆сꙋжде́нїѧ.
Бг҃оро́диченъ: Пречтⷭ҇аѧ влⷣчце, бг҃ороди́тельнице, наде́ждо къ тебѣ̀ прибѣга́ющихъ и҆ приста́нище сꙋ́щихъ въ бꙋ́ри! млⷭ҇тиваго и҆ созда́телѧ и҆ сн҃а твоего̀ ᲂу҆ми́лостиви и҆ мнѣ̀ мл҃твами твои́ми.
Пѣ́снь г҃.
І҆рмо́съ: Оу҆твердѝ, гдⷭ҇и, на ка́мени:
А҆га́ри дре́вней є҆гѵ́птѧныни ᲂу҆подо́биласѧ є҆сѝ, дꙋшѐ, порабо́тивши произволе́нїе своѐ и҆ ро́ждши но́ваго і҆сма́ила, презо́рство.
Лѣ́ствицꙋ і҆а́кѡвлю ᲂу҆вѣ́дѣла є҆сѝ, дꙋшѐ моѧ̀, ꙗ҆влѧ́емꙋю ѿ землѝ къ нб҃сє́мъ: почто̀ не стѧжа́ла є҆сѝ восхо́да тве́рда, бл҃гоче́стїѧ;
Сщ҃е́нникꙋ бж҃їю и҆ цр҃ю̀ ᲂу҆едине́нꙋ, подо́бїю хрⷭ҇то́ва въ мі́рѣ житїѧ̀ въ человѣ́цѣхъ, подража́й.
Ѡ҆брати́сѧ, постенѝ, дꙋшѐ ѡ҆каѧ́ннаѧ, пре́жде да́же не прїи́метъ конца̀ торжество̀ житїѧ̀,пре́жде да́же две́рь черто́га не заключи́тъ гдⷭ҇ь.
Не бꙋ́ди сто́лпъ сла́ный, дꙋшѐ, возврати́вшисѧ вспѧ́ть: да ᲂу҆страши́тъ тѧ̀ ѡ҆́бразъ содо́мскїй: горѣ̀ въ сигѡ́ръ сп҃са́йсѧ.
Моле́нїѧ воспѣва́ющихъ тѧ̀ не ѿве́ржи, влⷣко: но ᲂу҆ще́дри, чл҃вѣколю́бче, и҆ пода́ждь вѣ́рою просѧ́щымъ ѡ҆ставле́нїе.
Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ ѵ҆поста́сей воспѣва́емое, сп҃си́ ны, вѣ́рою покланѧ́ющыѧсѧ держа́вѣ твое́й.
Бг҃оро́диченъ: Ѿ ѻ҆ц҃а̀ безлѣ́тна сн҃а, неискꙋсомꙋ́жнѡ въ лѣ́то родила̀ є҆сѝ, бг҃ороди́тельнице,стра́нное чꙋ́до, пребы́вши дв҃а млеко́мъ пита́ющи.
Пѣ́снь д҃.
І҆рмо́съ: Оу҆слы́ша прⷪ҇ро́къ:
Вре́мѧ житїѧ̀ моегѡ̀ ма́ло и҆ и҆спо́лнено болѣ́зней и҆ лꙋка́вства: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.
Ца́рскимъ досто́инствомъ, вѣнце́мъ и҆ багрѧни́цею ѡ҆дѣ́ѧнъ, многоимѣ́нный человѣ́къ и҆ пра́ведный,бога́тствомъ ѻ҆бѝлꙋѧ и҆ ста́ды, внеза́пꙋ бога́тства, сла́вы, ца́рства ѡ҆бнища́въ лиши́сѧ.
А҆́ще пра́веденъ бѧ́ше ѻ҆́нъ и҆ непоро́ченъ па́че всѣ́хъ, и҆ не ᲂу҆бѣжѐ ловле́нїѧ льсти́вагѡ и҆ сѣ́ти: ты́ же грѣхолюби́ва сꙋ́щи, ѡ҆каѧ́ннаѧ дꙋшѐ, что̀ сотвори́ши, а҆́ще чесомꙋ̀ ѿ недовѣ́домыхъ слꙋчи́тсѧ наитѝ тѧ̀;
Высокоглаго́ливъ ны́нѣ є҆́смь, де́рзостенъ же и҆ се́рдцемъ, вотщѐ и҆ всꙋ́е: да не съ фарїсе́емъ ѡ҆сꙋ́диши мѧ̀, па́че же мытаре́во смире́нїе пода́ждь мѝ, є҆ди́не ще́дре, правосꙋ́де, и҆ семꙋ́ мѧ сочислѝ.
Согрѣши́хъ, досади́въ сосꙋ́дꙋ пло́ти моеѧ̀, вѣ́мъ, ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.
Кꙋмі́ра мѧ̀ себѣ̀ сотвори́хъ, страстьмѝ дꙋ́шꙋ мою̀ ѡ҆скверни́въ, ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.
Не послꙋ́шахъ гла́са твоегѡ̀, преслꙋ́шахъ писа́нїе твоѐ законополо́жника: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.
Марі́и: Во глꙋбинꙋ̀ вели́кихъ безмѣ́стїй низве́дшисѧ, не ᲂу҆держа́на была̀ є҆сѝ, марі́е, но по́мысломъ лꙋ́чшимъ ꙗ҆́вѣ востекла̀ є҆сѝ дѣѧ́ньми къ кра́йней добродѣ́тели, пречꙋ́днѡ а҆́гг҃льское є҆стество̀ ᲂу҆диви́вши.
Сла́ва, трⷪ҇ченъ: Нераздѣ́льное сꙋщество́мъ, несли́тное ли̑цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное: вопїю́ ти пѣ́снь вели́кꙋю, въ вы́шнихъ трикра́тнѡ пѣсносло́вимꙋю.
Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши во ѻ҆бои́хъ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ неискꙋсомꙋ́жнаѧ, и҆дѣ́же хо́щетъ бг҃ъ, побѣжда́етсѧ є҆стества̀ чи́нъ, твори́тъ бо є҆ли̑ка хо́щетъ.
Пѣ́снь є҃.
І҆рмо́съ: Ѿ но́щи ᲂу҆́тренююща:
Ни́зꙋ согбе́ннѣй подража́й, ѽ дꙋшѐ: прїидѝ, припадѝ къ нога́ма і҆и҃совыма, да тѧ̀ и҆спра́витъ, и҆ да хо́диши пра́вѡ стєзѧ́ми гдⷭ҇ними.
А҆́ще и҆ кла́дѧзь глꙋбо́къ є҆сѝ, влⷣко: и҆сточи́ ми во́дꙋ и҆з̾ пречⷭ҇тыхъ твои́хъ жи́лъ, да ꙗ҆́кѡ самарѧны́нѧ, пїѧ́й николи́же возжа́ждꙋ: жи́зни бо стрꙋи̑ и҆сточа́еши.
Сїлѡа́мъ да бꙋ́дꙋтъ мѝ сле́зы моѧ̑, влⷣко гдⷭ҇и, да ᲂу҆мы́ю и҆ а҆́зъ зѣ̑ницы се́рдца, и҆ ви́ждꙋ тѧ̀ мы́сленнѡ, свѣ́та превѣ́чна.
Марі́и: Несравне́нною любо́вїю, всебога́таѧ, дре́вꙋ крⷭ҇тномꙋ возжелѣ́вши поклони́тисѧ, сподо́биласѧ є҆сѝ жела́емагѡ: сподо́би ᲂу҆́бо и҆ менѐ полꙋчи́ти вы́шнюю сла́вꙋ.
Сла́ва, трⷪ҇ченъ: Тѧ̀, трⷪ҇це, сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ, ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.
Бг҃оро́диченъ: И҆з̾ тебє̀ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ съ собо́ю человѣ́ческое є҆стество̀.
Пѣ́снь ѕ҃.
І҆рмо́съ: Возопи́хъ всѣ́мъ се́рдцемъ мои́мъ:
А҆́зъ є҆́смь, сп҃се, ца́рскаѧ дра́хма, ю҆́же погꙋби́лъ є҆сѝ дре́вле: но вже́гъ свѣти́льникъ прⷣте́чꙋ твоего̀, сло́ве, взыщѝ и҆ ѡ҆брѧ́щи тво́й ѡ҆́бразъ.
Противꙋста́ни и҆ поборѝ, ꙗ҆́коже і҆исꙋ́съ а҆мали́ка, плотскі̑ѧ стра̑сти, и҆ гаваѡні́ты,прельсти́тєльныѧ по́мыслы, при́снѡ побѣжда́ющи.
Марі́и: Да страсте́й пла́мень ᲂу҆гаси́ши, сле́зъ то́ки и҆сточи́ла є҆сѝ при́снѡ, марі́е, дꙋше́ю распалѧ́ема: и҆́хже бл҃года́ть пода́ждь и҆ мнѣ̀ твоемꙋ̀ рабꙋ̀.
Марі́и: Безстра́стїе нбⷭ҇ное стѧжа́ла є҆сѝ, высо́кимъ на землѝ житїе́мъ, ма́ти, тѣ́мже моли́сѧ, тѧ̀ воспева́ющымъ и҆зба́витисѧ ѿ страсте́й мл҃твами твои́ми.
Сла́ва, трⷪ҇ченъ: Трⷪ҇ца є҆́смь про́ста, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ молѝ, бцⷣе, да мл҃твами твои́ми ѡ҆правди́мсѧ.
Конда́къ:
Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ.воспрѧнѝ ᲂу҆́бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й и҆ всѧ̑ и҆сполнѧ́ѧй.
Пѣ́снь з҃.
І҆рмо́съ: Согрѣши́хомъ, беззако́нновахомъ:
И҆счезо́ша дні́е моѝ, ꙗ҆́кѡ со́нїе востаю́щагѡ: тѣ́мже ꙗ҆́кѡ є҆зекі́а пролива́ю сле́зы на ло́жи мое́мъ, приложи́тисѧ мнѣ̀ лѣ́тѡмъ житїѧ̀. но кі́й и҆са́їа предста́нетъ тебѣ̀, дꙋшѐ, а҆́ще не всѣ́хъ бг҃ъ;
Припа́даю тѝ, и҆ приношꙋ̀ тебѣ̀ ꙗ҆́коже сле́зы глаго́лы моѧ̑: согрѣши́хъ, ꙗ҆́кѡ не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри, влⷣко, творе́нїе твоѐ, и҆ призови́ мѧ.
Погребо́хъ ѡ҆́бразъ тво́й, сп҃се, и҆ разори́хъ за́повѣдь твою̀: помрачи́сѧ всѧ̀ добро́та, и҆ страстьмѝ ᲂу҆гаси́сѧ свѣща̀. но ᲂу҆ще́дривъ возда́ждь мѝ, ꙗ҆́коже пое́тъ дв҃дъ, ра́дованїе.
Ѡ҆брати́сѧ, дꙋшѐ, пока́йсѧ, ѿкры́й сокровє́ннаѧ, глаго́ли бг҃ꙋ всѧ̑ вѣ́дꙋщемꙋ: ты̀ вѣ́си моѧ̑ та̑йнаѧ, є҆ди́не сп҃се: но са́мъ мѧ̀ поми́лꙋй, ꙗ҆́коже пое́тъ дв҃дъ, по млⷭ҇ти твое́й.
Марі́и: Возопи́вши дре́вле ко пречⷭ҇тѣй бг҃омт҃ри, ѿри́нꙋла є҆сѝ неи́стовство страсте́й, жесто́цѣ стꙋжа́ющихъ, и҆ посрами́ла є҆сѝ врага̀ запе́ншаго: но да́ждь ны́нѣ по́мощь ѿ ско́рби и҆ мнѣ̀ рабꙋ̀ твоемꙋ̀.
Марі́и: Є҆го́же возлюби́ла є҆сѝ, є҆го́же возжелѣ́ла є҆сѝ, є҆гѡ́же ра́ди пло́ть и҆знꙋри́ла є҆сѝ, прпⷣбнаѧ, молѝ ны́нѣ хрⷭ҇та̀ ѡ҆ рабѣ́хъ: ꙗ҆́кѡ да млⷭ҇ти́въ бы́въ всѣ̑мъ на́мъ ми́рное состоѧ́нїе да́рꙋетъ почита́ющымъ є҆го̀.
Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, и҆ є҆ди́ница ст҃а́ѧ, свѣ́тове и҆ свѣ́тъ, и҆ ст҃а трѝ и҆ є҆ди́но ст҃о, пое́тсѧ бг҃ъ трⷪ҇ца. но ты̀, дꙋшѐ, воспо́й, просла́ви жи́знь и҆ жи̑зни, всѣ́хъ бг҃а.
Бг҃оро́диченъ: Воспѣва́емъ тѧ̀, бл҃гослови́мъ тѧ̀, покланѧ́емсѧ тѝ, бг҃ороди́тельнице: ꙗ҆́кѡ є҆ди́наго ѿ нераздѣ́льныѧ трⷪ҇цы породи́ла є҆сѝ сн҃а и҆ бг҃а, и҆ ѿве́рзла є҆сѝ на́мъ сꙋ́щымъ на землѝ нбⷭ҇наѧ.
Пѣ́снь и҃.
І҆рмо́съ: Є҆го́же вѡ́инства:
Сле́знꙋю стклѧ́ницꙋ и҆стощава́ѧ ꙗ҆́кѡ мѵ́ро на главꙋ̀, взыва́ю ти, сп҃се, ꙗ҆́коже блꙋдни́ца, млⷭ҇ти и҆́щꙋщаѧ, мольбꙋ̀ приношꙋ̀, и҆ ѡ҆ставле́нїе прошꙋ̀ прїѧ́ти мѝ.
А҆́ще и҆ никто́же ꙗ҆́коже а҆́зъ согрѣшѝ тебѣ̀, но ѻ҆ба́че прїимѝ и҆ менѐ, бл҃госе́рдый сп҃се,стра́хомъ ка́ющасѧ и҆ любо́вїю зовꙋ́ща: согрѣши́хъ тебѣ̀ є҆ди́номꙋ, беззако́нновахъ, поми́лꙋй мѧ̀.
Пощадѝ, сп҃се, твоѐ созда́нїе, и҆ взыщѝ ꙗ҆́кѡ па́стырь поги́бшее ѻ҆вча̀: заблꙋ́ждшаго и҆схитѝ ѿ во́лка, сотвори́ мѧ а҆́гнца во ста́дѣ твои́хъ ѻ҆ве́цъ.
Є҆гда̀ сѧ́деши, сꙋдїѐ, ꙗ҆́кѡ бл҃госе́рдъ, и҆ пока́жеши стра́шнꙋю сла́вꙋ твою̀, хрⷭ҇те: ѽ кі́й стра́хъ тогда̀, пе́щи горѧ́щей, и҆ всѣ̑мъ боѧ́щымсѧ нестерпи́магѡ сꙋди́ща твоегѡ̀!
Марі́и: Свѣ́та незаходи́магѡ мт҃и тѧ̀ просвѣти́вши, ѿ ѡ҆мраче́нїѧ страсте́й разрѣшѝ: тѣ́мже воспрїи́мши дх҃а бл҃года́ть, просвѣтѝ, марі́е, тѧ̀ вѣ́рнѡ восхвалѧ́ющыѧ.
Марі́и: Чꙋ́до но́во вои́стиннꙋ ви́дѣвъ въ тебѣ̀, ма́ти, ᲂу҆жаса́шесѧ бж҃е́ственный зѡсі́ма: а҆́гг҃ла бо зрѧ́ше во пло́ти, и҆ ᲂу҆́жасомъ ве́сь и҆сполнѧ́шесѧ, воспева́ѧ хрⷭ҇та̀ во вѣ́ки.
Сла́ва, трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице, поми́лꙋй мѧ̀.
Бг҃оро́диченъ: Внꙋ́трь во чре́вѣ твое́мъ, пречтⷭ҇аѧ, мы́сленнаѧ порфѵ́ро є҆мманꙋ́илева, ꙗ҆́кѡ ѿ ѡ҆багре́нїѧ червлени́цы, пло́ть сои҆стка́сѧ: сегѡ̀ ра́ди тѧ̀ бцⷣꙋ вои́стиннꙋ почита́емъ.
Пѣ́снь ѳ҃.
І҆рмо́съ: Безсѣ́меннагѡ зача́тїѧ:
Оу҆милосе́рдисѧ, сп҃си́ мѧ, сн҃е дв҃довъ, поми́лꙋй, бѣснꙋ́ющыѧсѧ сло́вомъ и҆сцѣли́вый, гла́съ же бл҃госе́рдый ꙗ҆́кѡ разбо́йникꙋ мнѣ̀ рцы̀: а҆ми́нь глаго́лю тебѣ̀, со мно́ю бꙋ́деши въ раѝ, є҆гда̀ прїидꙋ̀ во сла́вѣ мое́й.
Разбо́йникъ хꙋ́лѧше тѧ̀, разбо́йникъ бг҃осло́вѧше тѧ̀, ѻ҆́ба бо на крⷭ҇тѣ̀ съ тобо́ю ви́сѧста: но,ѽ многомлⷭ҇тиве, ꙗ҆́кѡ вѣ́рномꙋ разбо́йникꙋ твоемꙋ̀, позна́вшемꙋ тѧ̀ бг҃а, и҆ мнѣ̀ ѿве́рзи две́рь сла́внагѡ црⷭ҇твїѧ твоегѡ̀.
Тва́рь содрога́шесѧ распина́ема тѧ̀ ви́дѧщи, го́ры и҆ ка́мєнїѧ стра́хомъ распада́хꙋсѧ, и҆ землѧ̀ сотрѧса́шесѧ, и҆ а҆́дъ ѡ҆бнажа́шесѧ, и҆ соѡмрача́шесѧ свѣ́тъ во днѝ, зрѧ̀ тебѐ, і҆и҃се, пригвожде́нна пло́тїю.
Досто́йныхъ покаѧ́нїѧ плодѡ́въ не и҆стѧжѝ ѿ менє̀, и҆́бо крѣ́пость моѧ̀ во мнѣ̀ ѡ҆скꙋдѣ̀: се́рдце мнѣ̀ да́рꙋй при́снѡ сокрꙋше́нное, нищ҃етꙋ́ же дꙋхо́внꙋю, да сїѧ̑ тебѣ̀ принесꙋ̀, ꙗ҆́кѡ прїѧ́тнꙋю же́ртвꙋ, є҆ди́не сп҃се.
Сꙋдїѐ мо́й и҆ вѣ́дче мо́й, хотѧ́й па́ки прїитѝ со а҆́гг҃лы сꙋди́ти мі́рꙋ всемꙋ̀, млⷭ҇тивнымъ твои́мъ ѻ҆́комъ тогда̀ ви́дѣвъ мѧ̀ пощадѝ, и҆ ᲂу҆ще́дри мѧ̀, і҆и҃се, па́че всѧ́кагѡ є҆стества̀ человѣ́ча согрѣши́вша.
Марі́и: Оу҆диви́ла є҆сѝ стра́ннымъ житїе́мъ твои́мъ всѧ̑ а҆́гг҃лѡвъ чи́ны и҆ человѣ́кѡвъ собо́ры, невеще́ственнѡ пожи́вши, и҆ є҆стество̀ превозше́дши: сегѡ̀ ра́ди, ꙗ҆́кѡ невеще́ственнаѧ, марі́е, нога́ма вше́дши і҆ѻрда́нъ прешла̀ є҆сѝ.
Марі́и: Оу҆ми́лостиви созда́телѧ ѡ҆ хва́лѧщихъ тѧ̀, прпⷣбнаѧ ма́ти, и҆зба́витисѧ ѿ ѡ҆ѕлобле́нїй и҆ скорбе́й, ѡ҆́крестъ напа́дающихъ, да и҆зба́вившесѧ ѿ напа́стей, непреста́ннѡ велича́емъ просла́вльшаго тѧ̀ гдⷭ҇а.
А҆ндре́ю: А҆ндре́е честны́й и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀, да и҆зба́вимсѧ всѝ ѿ гнѣ́ва и҆ ско́рби и҆ тлѣ́нїѧ, свободи́мсѧ ѿ прегрѣше́нїй, чтꙋ́щїи твою̀ па́мѧть вѣ́рнѡ.
Сла́ва, трⷪ҇ченъ: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀, ꙗ҆́кѡ свѣ́тꙋ и҆ свѣ́тѡмъ, и҆ жи́зни и҆ жи́знемъ, животворѧ́щей и҆ просвѣща́ющей концы̀.
Бг҃оро́диченъ: Гра́дъ тво́й сохранѧ́й, бг҃ороди́тельнице пречтⷭ҇аѧ: въ тебѣ́ бо се́й вѣ́рнѡ ца́рствꙋѧ, въ тебѣ̀ и҆ ᲂу҆твержда́етсѧ: и҆ тобо́ю побѣжда́ѧ побѣжда́етъ всѧ́кое и҆скꙋше́нїе, и҆ плѣнѧ́етъ сꙋпоста́ты, и҆ ᲂу҆строѧ́етъ владѡ́мыѧ.
Та́же пое́мъ ѻ҆́ба ли̑ка і҆рмо́съ: Безсѣ́меннагѡ зача́тїѧ:
И҆ про́чее послѣ́дованїе повече́рїѧ.