Во ст҃ы́й и҆ вели́кїй вто́рникъ повече́рїе вели́кое,

на не́мже пое́мъ трипѣ́снецъ, творе́нїе господи́на а҆ндре́а кри́тскагѡ. Гла́съ в҃.

Пѣ́снь г҃.

І҆рмо́съ: Непло́дствовавшїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.

Кончи́ны вре́мѧ, ѡ҆брати́мсѧ про́чее, хрⷭ҇то́съ ᲂу҆чи́тъ: прїи́детъ бо во мгнове́нїи, прїи́детъ и҆ не ᲂу҆ме́длитъ, сꙋди́ти мі́рꙋ всемꙋ̀.

Внеза́пное своегѡ̀ прише́ствїѧ хрⷭ҇то́съ ꙗ҆влѧ́ѧ, речѐ, нѡ́ево дре́вле ненаде́жное тлѣ́нїе, навести́сѧ хотѧ́щее землѝ.

Ѿве́рзесѧ черто́гъ, ᲂу҆краси́сѧ съ ни́мъ бж҃е́ственный бра́къ, жени́хъ бли́зъ призыва́ѧй на́съ, ᲂу҆гото́вимсѧ про́чее.

Сі́мѡновъ до́мъ, невмѣсти́маго вездѣ̀, вмѣсти́ тѧ і҆и҃се цр҃ю̀, и҆ жена̀ грѣ́шнаѧ мѵ́ромъ тѧ̀ пома́за.

Бл҃гово́нїѧ та́инственнагѡ и҆спо́лнена жена̀, пе́рвагѡ и҆зба́висѧ ѕлово́нїѧ сп҃се, мно́гихъ грѣхѡ́въ. мѵ́ро бо и҆сточа́еши жи́зни.

Нбⷭ҇наѧ пи́ще а҆́лчꙋщымъ, животѐ са́мъ сы́й, ꙗ҆́лъ є҆сѝ хрⷭ҇тѐ съ человѣ́ки, проѧвлѧ́ѧ снисхожде́нїе твоѐ.

Неблагода́рный ᲂу҆чени́къ, ѿве́ргсѧ тебѐ хрⷭ҇тѐ, собо́рище всебеззако́нныхъ люде́й сподвиза́ше на тѧ̀, на преда́нїе ѡ҆бра́щьсѧ.

Сла́ва: Со ѻ҆ц҃е́мъ тебѣ̀ сн҃ꙋ, и҆ дх҃ꙋ пра́вомꙋ, є҆ди́номꙋ є҆стествꙋ̀ покланѧ́юсѧ и҆ воспѣва́ю, ли́цы раздѣлѧ́ѧ, и҆ сꙋщество́мъ соединѧ́ѧ.

И҆ ны́нѣ, бг҃оро́диченъ: Ро́ждшаѧ тѧ̀ а҆́гница, па́стырѧ и҆ а҆́гнца, при́снѡ мо́литъ і҆и҃се бж҃е, ѡ҆ всѣ́хъ лю́дехъ вѣ́рꙋющихъ въ тѧ̀.

Сѣда́ленъ, гла́съ а҃. Подо́бенъ: Ли́къ а҆́гг҃льскїй:

Сѐ лꙋка́вый совѣ́тъ вои́стиннꙋ собра́сѧ неи́стовнѡ, ꙗ҆́кѡ ѡ҆сꙋ́жденника ѡ҆сꙋди́ти, горѣ̀ сѣдѧ́щаго, ꙗ҆́кѡ сꙋдїю̀ всѣ́хъ гдⷭ҇а: ны́нѣ собира́етсѧ съ пїла́томъ и҆́рѡдъ, а҆́нна, вкꙋ́пѣ же и҆ каїа́фа, и҆спыта́ти є҆ди́наго долготерпѣли́ваго.

Пѣ́снь и҃.

І҆рмо́съ: Въ кꙋпинѣ̀ мѡѷсе́ю дв҃ы чꙋ́до. на сїна́йстѣй горѣ̀ проѡбрази́вшаго и҆ногда̀. по́йте, бл҃гослови́те, и҆ превозноси́те во всѧ̑ вѣ́ки.

Не невѣ́дый вре́мѧ на́шегѡ сконча́нїѧ, держа́й вѣ́ки, де́нь ѻ҆́ный не вѣ́дѣти предречѐ: но предѣ́лы всѣ̑мъ положѝ къ смиреномꙋ́дрїю.

Є҆гда̀ сѧ́деши сꙋдїѐ, разлꙋча́ѧй, ꙗ҆́коже ре́клъ є҆сѝ, па́стырь ѿ ѻ҆ве́цъ кѡ́злища сп҃се, стоѧ́нїѧ ѻ҆́нагѡ и҆зба́ви на́съ, не лиши́ же на́съ бж҃е́ственныѧ десни́цы твоеѧ̀.

Ты̀ є҆сѝ па́сха на́ша, пожре́ный за всѣ́хъ, ꙗ҆́кѡ а҆́гнецъ и҆ же́ртва, и҆ прегрѣше́нїй ѡ҆чище́нїе, и҆ твоѧ̑ бж҃є́ственныѧ стрⷭ҇ти превозно́симъ хрⷭ҇тѐ, во всѧ̑ вѣ́ки.

Дре́вꙋ ᲂу҆подо́бисѧ, и҆ селꙋ̀, и҆ хра́минѣ, всѐ житїѐ дꙋшѐ моѧ̀: тѣ́мже стѧжѝ къ бг҃ꙋ гото́во се́рдце, да не что̀ тлѣ́нїемъ пло́ти ѡ҆ста́виши.

Не къ фарїсе́ѡмъ сп҃се, ни къ сі́мѡнꙋ то́кмѡ и҆зво́лилъ є҆сѝ во хра́мъ на снѣ́дь вни́ти: но ᲂу҆жѐ и҆ мытарѝ вкꙋ́пѣ и҆ блꙋдни̑цы, твоѐ почерпа́ютъ милосе́рдїе.

Сребролю́бїе рачи́тельствꙋѧй преда́тель і҆ꙋ́да, ѡ҆ и҆стощи́вшемсѧ мѵ́рѣ печа́шесѧ: про́чее же ѡ҆ прода́нїи влⷣки, къ беззакѡ́ннымъ прише́дъ ѡ҆ цѣнѣ̀ согласова́ше.

Ѽ бл҃же́нныхъ рꙋ́къ! ѽ власѡ́въ и҆ ᲂу҆сте́нъ цѣломꙋ́дренныѧ блꙋдни́цы! и҆́миже возлїѧ̀, сп҃се, мѵ́ро на но́зѣ твоѝ, ѡ҆тира́ющи ѧ҆̀, и҆ ча́стѡ ѡ҆блобыза́ющи.

Возлежа́щꙋ тебѣ̀ сло́ве, жена̀ предста́вши, и҆ ᲂу҆ но́гъ рыда́ющи, стклѧ́ницꙋ сп҃се и҆стощѝ мѵ́ра на главꙋ̀ тебѐ безсме́ртнагѡ мѵ́ра.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Со ѻ҆ц҃е́мъ сн҃а и҆ ст҃а́го дх҃а, ст҃ꙋ́ю трⷪ҇цꙋ въ бж҃ествѣ̀ є҆ди́номъ сла́вимъ, вопїю́ще: ст҃ъ, ст҃ъ, ст҃ъ є҆сѝ во вѣ́ки.

И҆ ны́нѣ, бг҃оро́диченъ: Мл҃твами сп҃се, пречⷭ҇тыѧ твоеѧ̀ мт҃ре, и҆ твои́хъ а҆пⷭ҇лъ, млⷭ҇ти твоѧ̑ на́мъ низпослѝ бога́тнѡ, и҆ ми́ръ тво́й пода́ждь лю́демъ твои̑мъ.

Та́же: Хва́лимъ, бл҃гослови́мъ, покланѧ́емсѧ гдⷭ҇ви:

І҆рмо́съ: Въ кꙋпинѣ̀ мѡѷсе́ю дв҃ы чꙋ́до:

Пѣ́снь ѳ҃.

І҆рмо́съ: Преесте́ственнѡ пло́тїю заче́ншꙋю во чре́вѣ, ѿ ѻ҆ц҃а̀ безлѣ́тнѡ предвозсїѧ́вшее сло́во, въ пѣ́снехъ немо́лчныхъ велича́емъ вѣ́рнїи.

Дѣ́ланїѧ вре́мѧ, сп҃се́нїѧ намѣ́ренїе: тала́нтъ взе́мши, дре́внїй ѡ҆́бразъ, дꙋшѐ моѧ̀, кꙋпѝ вѣ́чнꙋю жи́знь.

Ꙗ҆́кѡ свѣщы̀ свѣ̑тлыѧ ᲂу҆краси́вше дꙋ́шы, женихꙋ̀ приходѧ́щꙋ къ нетлѣ́нномꙋ бра́кꙋ, пре́жде заключе́нїѧ двере́й, вни́демъ съ ни́мъ.

Показа́ти хотѧ̀ і҆и҃се, преесте́ственное твоегѡ̀ смире́нїѧ всѣ̑мъ, ꙗ҆́лъ є҆сѝ въ домꙋ̀ сі́мѡновѣ вечерѧ́въ, а҆́лчꙋщихъ пи́ще.

Хлѣ́бъ сы́й животворѧ́щїй, снѣ́лъ є҆сѝ і҆исꙋ́се съ сі́мѡномъ фарїсе́емъ, да блꙋдни́ца прїѡбрѧ́щетъ некꙋпи́мꙋю бл҃года́ть твою̀, и҆стоща́нїемъ мѵ́ра.

Рꙋ́цѣ моѝ скверна́вѣ, ᲂу҆стнѣ̀ блꙋдни́чи во мнѣ̀, нечи́сто моѐ житїѐ, растлѣ́нны ᲂу҆́ды: но ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Пристꙋ́пльши жена̀ къ нога́ма твои́ма сп҃се, возлива́ше мѵ́ро, бл҃гоꙋха́нїѧ и҆сполнѧ́ющи, и҆ мѵ́ра и҆сполнѧ́ема дѣ́лъ ѡ҆чище́нїѧ.

А҆рѡма́ты богатѣ́ю, добродѣ́тельми же нище́тствꙋю, ꙗ҆̀же и҆́мамъ, тебѣ̀ приношꙋ̀: да́ждь са́мъ, ꙗ҆̀же и҆́маши, и҆ ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Мѵ́ро ᲂу҆ менѐ тлѣ́нное, мѵ́ро ᲂу҆ тебѐ жи́зни, мѵ́ро бо тебѣ̀ и҆́мѧ и҆злїѧ́нное на достѡ́йныѧ: но ѡ҆сла́би мѝ, и҆ ѡ҆ста́ви, вопїе́тъ блꙋдни́ца хрⷭ҇тꙋ̀.

Сла́ва: Безнача́ленъ є҆сѝ ѻ҆́ч҃е, несозда́ненъ є҆сѝ сн҃е, сопресто́ленъ и҆ дш҃е, є҆ди́но трѝ є҆стество́мъ, и҆ трѝ ли́цами, є҆ди́нъ бг҃ъ и҆́стинный.

И҆ ны́нѣ, бг҃оро́диченъ: Бцⷣе, ᲂу҆пова́нїе чтꙋ́щихъ тѧ̀ при́снѡ, не преста́й молѧ́щи и҆з̾ тебѐ роди́вшагосѧ, и҆зба́вити мѧ̀ бѣ́дъ, и҆ всѧ́кихъ и҆скꙋше́нїй.