Въ четверто́къ пѧ́тыѧ недѣ́ли ст҃ы́хъ постѡ́въ,
кле́плетъ въ д҃-й ча́съ но́щи. И҆ собра́вшымсѧ на́мъ въ цр҃ковь быва́етъ нача́ло ѿ і҆ере́а, по ѻ҆бы́чаю. И҆ глаго́лемъ: Цр҃ю̀ нбⷭ҇ный: Трист҃о́е, и҆ Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те поклони́мсѧ: И҆ про́чыѧ два̀ ѱалма̀, ѳ҃і и҆ к҃: и҆ ѻ҆бы̑чныѧ тропарѝ, и҆ є҆ктенїа̀. И҆ посе́мъ глаго́лемъ шестоѱа́лмїе, и҆ по ѱалмѣ́хъ пое́мъ А҆ллилꙋ́їа, и҆ тро́ичны гла́са, ꙗ҆́коже ѻ҆бы́чай. И҆ стїхосло́вимъ каѳі́смꙋ є҆ди́нꙋ и҃-ю. Та́же глаго́лемъ сѣда́льны ѻ҆смогла́сника. чте́мъ житїѐ прпⷣбныѧ марі́и, на двѣ̀ статїи̑. Та́же ѱало́мъ н҃. Пѣ́сней не стїхосло́вимъ. И҆ а҆́бїе начина́емъ вели́кїй канѡ́нъ ко́снѡ, и҆ съ сокрꙋше́ннымъ се́рдцемъ и҆ гла́сомъ, творѧ́ще на кі́йждо тропа́рь мета̑нїѧ трѝ. Канѡ́нъ вели́кїй, творе́нїе ст҃а́гѡ а҆ндре́а кри́тскагѡ і҆ерⷭ҇ли́мскагѡ. Гла́съ ѕ҃.
Пѣ́снь а҃.
І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе: се́й мо́й бг҃ъ и҆ просла́влю є҆го̀: бг҃ъ ѻ҆тца̀ моегѡ̀, и҆ вознесꙋ̀ є҆го̀: сла́вно бо просла́висѧ:
Припѣ́въ: Поми́лꙋй мѧ̀, бж҃е, поми́лꙋй мѧ̀.
Ѿкꙋ́дꙋ начнꙋ̀ пла́кати ѡ҆каѧ́ннагѡ моегѡ̀ житїѧ̀ дѣѧ́нїй; ко́е ли положꙋ̀ нача́ло, хрⷭ҇тѐ, ны́нѣшнемꙋ рыда́нїю; но ꙗ҆́кѡ бл҃гоꙋтро́бенъ, да́ждь мѝ прегрѣше́нїй ѡ҆ставле́нїе.
Грѧдѝ ѡ҆каѧ́ннаѧ дꙋшѐ, съ пло́тїю твое́ю, зижди́телю всѣ́хъ и҆сповѣ́ждьсѧ, и҆ ѡ҆ста́нисѧ про́чее пре́жднѧгѡ безслове́сїѧ, и҆ принесѝ бг҃ꙋ въ покаѧ́нїи сле́зы.
Первозда́ннагѡ а҆да́ма престꙋпле́нїю поревнова́въ, позна́хъ себѐ ѡ҆бнаже́на ѿ бг҃а и҆ прⷭ҇носꙋ́щнагѡ црⷭ҇твїѧ и҆ сла́дости, грѣ̑хъ ра́ди мои́хъ.
Оу҆вы̀ мнѣ̀ ѡ҆каѧ́ннаѧ дꙋшѐ, что̀ ᲂу҆подо́биласѧ є҆сѝ пе́рвѣй є҆́ѵѣ; ви́дѣла бо є҆сѝ ѕлѣ̀, и҆ ᲂу҆ѧзви́ласѧ є҆сѝ го́рцѣ, и҆ коснꙋ́ласѧ є҆сѝ дре́ва и҆ вкꙋси́ла є҆сѝ де́рзостнѡ безслове́сныѧ снѣ́ди.
Вмѣ́стѡ є҆́ѵы чꙋ́вственныѧ мы́сленнаѧ мѝ бы́сть є҆́ѵа, во пло́ти стра́стный по́мыслъ, показꙋ́ѧй сла̑дкаѧ и҆ вкꙋша́ѧй прⷭ҇нѡ го́рькаго напое́нїѧ.
Досто́йно и҆з̾ є҆де́ма и҆згна́нъ бы́сть, ꙗ҆́кѡ не сохрани́въ є҆ди́нꙋ твою̀, сп҃се, за́повѣдь а҆да́мъ: а҆́зъ же что̀ постраждꙋ̀, ѿмета́ѧ всегда̀ живѡ́тнаѧ твоѧ̑ словеса̀;
Ка́їново преше́дъ ᲂу҆бі́йство, произволе́нїемъ бы́хъ ᲂу҆бі́йца со́вѣсти дꙋше́внѣй, ѡ҆живи́въ пло́ть, и҆ воева́въ на ню̀ лꙋка́выми мои́ми дѣѧ́ньми.
А҆́велевѣ і҆и҃се, не ᲂу҆подо́бихсѧ пра́вдѣ, да́ра тебѣ̀ прїѧ́тна не принесо́хъ когда̀, ни дѣѧ́нїѧ бж҃е́ственна, ни же́ртвы чи́стыѧ, ни житїѧ̀ непоро́чнагѡ.
Ꙗ҆́кѡ ка́їнъ и҆ мы̀, дꙋшѐ ѻ҆каѧ́ннаѧ, всѣ́хъ содѣ́телю дѣѧ̑нїѧ сквє́рнаѧ, и҆ же́ртвꙋ поро́чнꙋю, и҆ непотре́бное житїѐ принесо́хомъ вкꙋ́пѣ: тѣ́мже и҆ ѡ҆сꙋди́хомсѧ.
Бре́нїе зда́тель живосозда́въ, вложи́лъ є҆сѝ мнѣ̀ пло́ть и҆ кѡ́сти, и҆ дыха́нїе и҆ жи́знь: но ѽ тво́рче мо́й, и҆зба́вителю мо́й, и҆ сꙋдїѐ ка́ющасѧ прїими́ мѧ.
И҆звѣща́ю тѝ сп҃се, грѣхѝ, ꙗ҆̀же содѣ́ѧхъ, и҆ дꙋшѝ и҆ тѣ́ла моегѡ̀ ꙗ҆́звы, ꙗ҆̀же внꙋ́трь ᲂу҆бі́йственнїи по́мыслы разбо́йнически на мѧ̀ возложи́ша.
А҆́ще и҆ согрѣши́хъ, сп҃се, но вѣ́мъ, ꙗ҆́кѡ чл҃вѣколю́бецъ є҆сѝ, наказꙋ́еши млⷭ҇тивнѡ, и҆ милосе́рдствꙋеши те́плѣ: слезѧ́ща зри́ши, и҆ притека́еши ꙗ҆́кѡ ѻ҆ц҃ъ, призыва́ѧ блꙋ́днаго.
Пове́ржена мѧ̀ сп҃се, пред̾ враты̀ твои́ми, понѐ на ста́рость не ѿри́ни менѐ во а҆́дъ тща̀, но пре́жде конца̀, ꙗ҆́кѡ чл҃вѣколю́бецъ, да́ждь мѝ прегрѣше́нїй ѡ҆ставле́нїе.
Въ разбо́йники впады́й а҆́зъ є҆́смь, помышле́ньми мои́ми, ве́сь ѿ ни́хъ ᲂу҆ѧзви́хсѧ ны́нѣ, и҆ и҆спо́лнихсѧ ра́нъ: но са́мъ мѝ предста́въ, хрⷭ҇тѐ сп҃се и҆сцѣлѝ.
Сщ҃е́нникъ мѧ̀ предви́дѣвъ ми́мѡ и҆́де, и҆ леѵі́тъ ви́дѧ въ лю́тыхъ на́га презрѣ̀: но и҆з̾ мр҃і́и возсїѧ́вый і҆и҃се, ты̀ предста́въ ᲂу҆ще́дри мѧ̀.
А҆́гнче бж҃їй, взе́млѧй грѣхѝ всѣ́хъ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.
Покаѧ́нїѧ вре́мѧ, прихождꙋ́ ти созда́телю моемꙋ̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.
Не возгнꙋша́йсѧ менѐ сп҃се, не ѿри́ни ѿ твоегѡ̀ лица̀, возмѝ бре́мѧ ѿ менѐ тѧ́жкое грѣхо́вное и҆, ꙗ҆́кѡ бл҃гоꙋтро́бенъ, да́ждь мнѣ̀ грѣхопаде́нїй ѡ҆ставле́нїе.
Вѡ́льнаѧ, сп҃се, и҆ невѡ́льнаѧ прегрѣшє́нїѧ моѧ̑, ꙗ҆влє́ннаѧ и҆ сокровє́ннаѧ и҆ вѣ́дѡмаѧ и҆ невѣ́дѡмаѧ, всѧ̑ прости́въ, ꙗ҆́кѡ бг҃ъ, ѡ҆чи́сти и҆ сп҃си́ мѧ.
Ѿ ю҆́ности хрⷭ҇тѐ, за́пѡвѣди твоѧ̑ престꙋпи́хъ, всестра́стнѡ небрегі́й, ᲂу҆ны́нїемъ преидо́хъ житїѐ. тѣ́мже зовꙋ́ ти сп҃се: понѐ на коне́цъ сп҃си́ мѧ.
Бога́тство моѐ сп҃се, и҆знꙋри́въ въ блꙋдѣ̀, пꙋ́стъ є҆́смь плодѡ́въ бл҃гочести́выхъ, а҆́лченъ же зовꙋ̀: ѻ҆́ч҃е щедро́тъ, предвари́въ ты́ мѧ ᲂу҆ще́дри.
Тебѣ̀ припа́даю і҆и҃се, согрѣши́хъ тѝ, ѡ҆чи́сти мѧ̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.
Не вни́ди со мно́ю въ сꙋ́дъ носѧ̀ моѧ̑ дѣѧ̑нїѧ, словеса̀ и҆зыскꙋ́ѧ, и҆ и҆справлѧ́ѧ стремлє́нїѧ: но въ щедро́тахъ твои́хъ презира́ѧ моѧ̑ лю̑таѧ, сп҃си́ мѧ всеси́льне.
И҆́ный канѡ́нъ прпⷣбныѧ ма́тере на́шеѧ марі́и є҆гѵ́петскїѧ, въ то́йже гла́съ, и҆ і҆рмо́съ. Є҆гѡ́же краестро́чїе: Ты̀ прпⷣбнаѧ марі́е помога́й.
Запѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.
Ты́ ми да́ждь свѣтоза́рнꙋю бл҃года́ть ѿ бж҃е́ственнагѡ свы́ше промышле́нїѧ, и҆збѣжа́ти страсте́й ѡ҆мраче́нїѧ, и҆ пѣ́ти ᲂу҆се́рднѡ, твоегѡ̀ марі́е житїѧ̀, кра̑снаѧ и҆справлє́нїѧ.
Прикло́ньшисѧ хрⷭ҇тѡ́вымъ бж҃е́ствєннымъ зако́нѡмъ, къ семꙋ̀ пристꙋпи́ла є҆сѝ, сла́достей неꙋдержи̑маѧ стремлє́нїѧ ѡ҆ста́вивши, и҆ всѧ́кꙋю добродѣ́тель всебл҃гоговѣ́йнѡ, ꙗ҆́кѡ є҆ди́нꙋ и҆спра́вила є҆сѝ.
А҆ндре́ю: Прпⷣбне ѻ҆́тче а҆ндре́е молѝ бг҃а ѡ҆ на́съ.
Мл҃твами твои́ми на́съ, а҆ндре́е, и҆зба́ви страсте́й безче́стныхъ и҆ црⷭ҇твїѧ ны́нѣ хрⷭ҇то́ва ѻ҆́бщники вѣ́рою и҆ любо́вїю воспѣва́ющїѧ тѧ̀, сла́вне, покажѝ, мо́лимсѧ.
Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бна, да́ждь мѝ сле́зы ᲂу҆миле́нїѧ.
Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.
Пѣ́снь в҃.
І҆рмо́съ: Вонмѝ нб҃о, и҆ возглаго́лю, и҆ воспою̀ хрⷭ҇та̀, ѿ дв҃ы пл҃тїю прише́дшаго.
Вонмѝ нб҃о, и҆ возглаго́лю, землѐ, внꙋша́й гла́съ, ка́ющїйсѧ къ бг҃ꙋ и҆ воспѣва́ющїй є҆го̀.
Вонми́ ми, бж҃е, сп҃се мо́й млⷭ҇тивнымъ твои́мъ ѻ҆́комъ, и҆ прїимѝ моѐ те́плое и҆сповѣ́данїе.
Согрѣши́хъ па́че всѣ́хъ человѣ̑къ, є҆ди́нъ согрѣши́хъ тебѣ̀: но ᲂу҆ще́дри ꙗ҆́кѡ бг҃ъ, сп҃се, творе́нїе твоѐ.
Бꙋ́рѧ мѧ̀ ѕлы́хъ ѡ҆бдержи́тъ, бл҃гоꙋтро́бне гдⷭ҇и: но ꙗ҆́кѡ петрꙋ̀, и҆ мнѣ̀ рꙋ́кꙋ прострѝ.
Сле́зы блꙋдни́цы, ще́дре, и҆ а҆́зъ предлага́ю: ѡ҆чⷭ҇ти мѧ̀, сп҃се, бл҃гоꙋтро́бїемъ твои́мъ.
Ѡ҆мрачи́хъ дꙋше́внꙋю красотꙋ̀ страсте́й сластьмѝ, и҆ всѧ́чески ве́сь ᲂу҆́мъ пе́рсть сотвори́хъ.
Раздра́хъ ны́нѣ ѡ҆де́ждꙋ мою̀ пе́рвꙋю, ю҆́же мѝ и҆зтка̀ зижди́тель и҆знача́ла, и҆ ѿтꙋ́дꙋ лежꙋ̀ на́гъ.
Ѡ҆блеко́хсѧ въ раздра́ннꙋю ри́зꙋ, ю҆́же и҆зтка́ ми ѕмі́й совѣ́томъ, и҆ стыждꙋ́сѧ.
Воззрѣ́хъ на садо́внꙋю красотꙋ̀ и҆ прельсти́хсѧ ᲂу҆мо́мъ: и҆ ѿтꙋ́дꙋ лежꙋ̀ на́гъ, и҆ срамлѧ́юсѧ.
Дѣ́лаша на хребтѣ̀ мое́мъ всѝ нача̑льницы страсте́й, продолжа́юще на мѧ̀ беззако́нїе и҆́хъ.
Погꙋби́хъ первозда́ннꙋю добро́тꙋ и҆ бл҃голѣ́пїе моѐ, и҆ ны́нѣ лежꙋ̀ на́гъ, и҆ стыждꙋ́сѧ.
Сшива́ше кѡ́жныѧ ри̑зы грѣ́хъ мнѣ̀, ѡ҆бнажи́вый мѧ̀ пе́рвыѧ бг҃отка́нныѧ ѻ҆де́жды.
Ѡ҆бложе́нъ є҆́смь ѡ҆дѣѧ́нїемъ стꙋда̀, ꙗ҆́коже ли́ствїемъ смоко́внымъ, во ѡ҆бличе́нїе мои́хъ самовла́стныхъ страсте́й.
Ѡ҆дѣ́ѧхсѧ въ сра́мнꙋю ри́зꙋ, и҆ ѡ҆кровавле́ннꙋю стꙋ́днѡ, тече́нїемъ стра́стнагѡ и҆ любосла́стнагѡ живота̀.
Ѡ҆скверни́хъ пло́ти моеѧ̀ ри́зꙋ и҆ ѡ҆калѧ́хъ є҆́же по ѡ҆́бразꙋ, сп҃се, и҆ по подо́бїю.
Впадо́хъ въ стра́стнꙋю па́гꙋбꙋ и҆ въ веще́ственнꙋю тлю̀, и҆ ѿто́лѣ до ны́нѣ вра́гъ мнѣ̀ досажда́етъ.
Любове́щное и҆ любоимѣ́нное житїѐ, невоздержа́нїемъ сп҃се предпоче́тъ ны́нѣ, тѧ́жкимъ бре́менемъ ѡ҆бложе́нъ є҆́смь.
Оу҆краси́хъ плотскі́й ѡ҆́бразъ скве́рныхъ помышле́нїй разли́чнымъ ѡ҆бложе́нїемъ, и҆ ѡ҆сꙋжда́юсѧ.
Внѣ́шнимъ прилѣ́жнѡ бл҃гоꙋкраше́нїемъ є҆ди́нѣмъ попеко́хсѧ, внꙋ́треннюю презрѣ́въ бг҃оѡбра́знꙋю ски́нїю.
Воѡбрази́въ мои́хъ страсте́й без̾ѡбра́зїе, любосла́стными стремле́ньми погꙋби́хъ ᲂу҆ма̀ красотꙋ̀.
Погребо́хъ пе́рвагѡ ѡ҆́браза добро́тꙋ сп҃се страстьмѝ, ю҆́же ꙗ҆́кѡ и҆ногда̀ дра́хмꙋ, взыска́въ ѡ҆брѧ́щи.
Согрѣши́хъ, ꙗ҆́коже блꙋдни́ца вопїю́ ти: є҆ди́нъ согрѣши́хъ тебѣ̀, ꙗ҆́кѡ мѵ́ро прїимѝ сп҃се и҆ моѧ̑ сле́зы.
Поползо́хсѧ ꙗ҆́кѡ дв҃дъ блꙋ́днѡ, и҆ ѡ҆скверни́хсѧ: но ѡ҆мы́й и҆ менѐ сп҃се, слеза́ми.
Ѡ҆чи́сти, ꙗ҆́коже мыта́рь вопїю́ ти, сп҃се ѡ҆чи́сти мѧ̀: никто́же бо сꙋ́щихъ и҆з̾ а҆да́ма, ꙗ҆́коже а҆́зъ согрѣши́хъ тебѣ̀.
Ни сле́зъ, нижѐ покаѧ́нїѧ и҆́мамъ, нижѐ ᲂу҆миле́нїѧ: са́мъ мѝ сїѧ̑ сп҃се, ꙗ҆́кѡ бг҃ъ да́рꙋй.
Две́рь твою̀ не затворѝ мнѣ̀ тогда̀, гдⷭ҇и, гдⷭ҇и: но ѿве́рзи мѝ сїю̀ ка́ющемꙋсѧ тебѣ̀.
Чл҃вѣколю́бче хотѧ́й всѣ̑мъ сп҃сти́сѧ, ты̀ воззови́ мѧ, и҆ прїимѝ ꙗ҆́кѡ бл҃гъ ка́ющагосѧ.
Внꙋшѝ воздыха̑нїѧ дꙋшѝ моеѧ̀, и҆ ѻ҆́чїю моє́ю прїимѝ ка̑пли сп҃се, и҆ сп҃си́ мѧ.
Бг҃оро́диченъ: Пречⷭ҇таѧ бцⷣе дв҃о, є҆ди́на всепѣ́таѧ, молѝ прилѣ́жнѡ во є҆́же сп҃сти́сѧ на́мъ.
І҆рмо́съ: Ви́дите ви́дите, ꙗ҆́кѡ а҆́зъ є҆́смь бг҃ъ: ма́ннꙋ ѡ҆дожди́вый, и҆ во́дꙋ и҆з̾ ка́мене и҆сточи́вый дре́вле въ пꙋсты́ни лю́демъ мои̑мъ десни́цею є҆ди́ною, и҆ крѣ́постїю мое́ю.
Ви́дите ви́дите, ꙗ҆́кѡ а҆́зъ є҆́смь бг҃ъ: внꙋша́й дꙋшѐ моѧ̀ гдⷭ҇а вопїю́ща, и҆ ᲂу҆дали́сѧ пре́жнѧгѡ грѣха̀, и҆ бо́йсѧ ꙗ҆́кѡ неꙋмы́тнагѡ, и҆ ꙗ҆́кѡ сꙋдїѝ и҆ бг҃а.
Комꙋ̀ ᲂу҆подо́биласѧ є҆сѝ многогрѣ́шнаѧ дꙋшѐ, то́кмѡ пе́рвомꙋ ка́їнꙋ, и҆ ламе́хꙋ ѻ҆́номꙋ, каменова́вшаѧ тѣ́ло ѕлодѣ́йствы, и҆ ᲂу҆би́вшаѧ ᲂу҆́мъ безслове́сными стремле́ньми.
Всѧ̑ пре́жде зако́на прете́кши, ѽ дꙋшѐ! си́ѳꙋ не ᲂу҆подо́биласѧ є҆сѝ, ни є҆нѡ́са подража́ла є҆сѝ, ни є҆нѡ́ха преложе́нїемъ, ни нѡ́ѧ: но ꙗ҆ви́ласѧ є҆сѝ ᲂу҆бо́га пра́ведныхъ жи́зни.
Є҆ди́на ѿве́рзла є҆сѝ хлѧ̑би гнѣ́ва, бг҃а твоегѡ̀, дꙋшѐ моѧ̀, и҆ потопи́ла є҆сѝ всю̀, ꙗ҆́коже зе́млю пло́ть, и҆ дѣѧ̑нїѧ и҆ житїѐ, и҆ пребыла̀ є҆сѝ внѣ̀ сп҃си́тельнагѡ ковче́га.
Мꙋ́жа ᲂу҆би́хъ, глаго́летъ, въ ꙗ҆́звꙋ мнѣ̀, и҆ ю҆́ношꙋ въ стрꙋ́пъ, ламе́хъ рыда́ѧ вопїѧ́ше, ты́ же не трепе́щеши ѽ дꙋшѐ моѧ̀, ѡ҆калѧ́вши пло́ть, и҆ ᲂу҆́мъ ѡ҆скверни́вши.
Ѽ ка́кѡ поревнова́хъ ламе́хꙋ, пе́рвомꙋ ᲂу҆бі́йцѣ, дꙋ́шꙋ ꙗ҆́кѡ мꙋ́жа, ᲂу҆́мъ ꙗ҆́кѡ ю҆́ношꙋ, ꙗ҆́кѡ бра́та же моегѡ̀ тѣ́ло ᲂу҆би́въ, ꙗ҆́кѡ ка́їнъ ᲂу҆бі́йца, любосла́стными стремле́ньми.
Сто́лпъ ᲂу҆мꙋдри́ла є҆сѝ созда́ти ѽ дꙋшѐ, и҆ ᲂу҆твержде́нїе водрꙋзи́ти твои́ми похотьмѝ, а҆́ще не бы̀ зижди́тель ᲂу҆держа́лъ совѣ́ты твоѧ̑, и҆ низве́рглъ на зе́млю ᲂу҆хищрє́нїѧ твоѧ̑.
Оу҆ѧзви́хсѧ, ᲂу҆ра́нихсѧ, сѐ стрѣ́лы вра̑жїѧ ᲂу҆ѧзви́вшыѧ мою̀ дꙋ́шꙋ и҆ тѣ́ло: сѐ стрꙋ́пи, гноє́нїѧ, ѡ҆мрачє́нїѧ, вопїю́тъ ра̑ны самово́льныхъ мои́хъ страсте́й.
Ѡ҆дождѝ гдⷭ҇ь ѿ гдⷭ҇а ѻ҆́гнь и҆ногда̀, на беззако́нїе гнѣ́вающее соже́гъ содо́млѧны: ты́ же ѻ҆́гнь вжегла̀ є҆сѝ гее́нскїй, въ не́мже и҆́маши, ѽ дꙋшѐ, сожещи́сѧ.
Разꙋмѣ́йте и҆ ви́дите, ꙗ҆́кѡ а҆́зъ є҆́смь бг҃ъ, и҆спыта́ѧй сердца̀, и҆ ᲂу҆мꙋ́чаѧй мы̑сли, ѡ҆блича́ѧй дѣѧ̑нїѧ, и҆ попалѧ́ѧй грѣхѝ, и҆ сꙋдѧ́й си́рꙋ, и҆ смире́нꙋ, и҆ ни́щꙋ.
Прпⷣбнѣй: Просте́рла є҆сѝ рꙋ́цѣ твоѝ къ ще́дромꙋ бг҃ꙋ, марі́е, въ бе́зднѣ ѕѡ́лъ погрꙋжа́емаѧ: и҆ ꙗ҆́коже петрꙋ̀ чл҃вѣколю́бнѡ, рꙋ́кꙋ бж҃е́ственнꙋю прострѐ, твоѐ ѡ҆браще́нїе всѧ́чески и҆скі́й.
Марі́и: Всѣ́мъ ᲂу҆се́рдїемъ и҆ любо́вїю притекла̀ є҆сѝ хрⷭ҇тꙋ̀, пе́рвый грѣха̀ пꙋ́ть ѿвра́щши, и҆ въ пꙋсты́нѧхъ непроходи́мыхъ пита́ющисѧ, и҆ тогѡ̀ чи́стѣ соверша́ющи бж҃е́ствєнныѧ за́пѡвѣди.
Запѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ.
Ви́димъ, ви́димъ чл҃вѣколю́бїе, ѽ дꙋшѐ, бг҃а и҆ влⷣки; сегѡ̀ ра́ди пре́жде конца̀, томꙋ̀ со слеза́ми припаде́мъ вопїю́ще: а҆ндре́ѧ мл҃твами, сп҃се, поми́лꙋй на́съ.
Сла́ва, трⷪ҇ченъ: Безнача́льнаѧ, несозда́ннаѧ трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша сп҃сѝ: твоѐ є҆́смь созда́нїе, не пре́зри, но пощадѝ, и҆ и҆зба́ви мѧ̀ ѻ҆́гненнагѡ ѡ҆сꙋжде́нїѧ.
Бг҃оро́диченъ: Пречⷭ҇таѧ влⷣчце бг҃ороди́тельнице, наде́ждо къ тебѣ̀ притека́ющихъ, и҆ приста́нище сꙋ́щихъ въ бꙋ́ри, млⷭ҇тиваго и҆ созда́телѧ, и҆ сн҃а твоего̀, ᲂу҆ми́лостиви и҆ мнѣ̀ мл҃твами твои́ми.
Пѣ́снь г҃.
І҆рмо́съ: На недви́жимѣмъ, хрⷭ҇тѐ, ка́мени за́повѣдей твои́хъ ᲂу҆твердѝ моѐ помышле́нїе.
Ѻ҆́гнь ѿ гдⷭ҇а и҆ногда̀ гдⷭ҇ь ѡ҆дожди́въ, зе́млю содо́мскꙋю пре́жде попалѝ.
На горѣ̀ спаса́йсѧ, дꙋшѐ, ꙗ҆́коже лѡ́тъ ѻ҆́ный, и҆ въ сигѡ́ръ ᲂу҆гонза́й.
Бѣ́гай запале́нїѧ, ѽ дꙋшѐ, бѣ́гай содо́мскагѡ горѣ́нїѧ, бѣ́гай тлѣ́нїѧ бжⷭ҇твеннагѡ пла́мене.
И҆сповѣ́даюсѧ тебѣ̀, сп҃се: согрѣши́хъ, согрѣши́хъ тѝ: но ѡ҆сла́би, ѡ҆ста́ви мѝ, ꙗ҆́кѡ бл҃гоꙋтро́бенъ.
Согрѣши́хъ тебѣ̀ є҆ди́нъ а҆́зъ, согрѣши́хъ па́че всѣ́хъ, хрⷭ҇тѐ сп҃се, да не пре́зриши менѐ.
Ты̀ є҆сѝ па́стырь до́брый, взыщѝ менѐ а҆́гнца, и҆ заблꙋ́ждшагѡ да не пре́зриши менѐ.
Ты̀ є҆сѝ сла́дкїй, і҆и҃се, ты̀ є҆сѝ созда́тель мо́й: въ тебѣ̀, сп҃се, ѡ҆правда́юсѧ.
Сла́ва, трⷪ҇ченъ: Ѽ трⷪ҇це є҆ди́нице бж҃е! сп҃сѝ на́съ ѿ пре́лести, и҆ и҆скꙋше́нїй, и҆ ѡ҆бстоѧ́нїй.
Бг҃оро́диченъ: Ра́дꙋйсѧ, бг҃опрїѧ́тнаѧ ᲂу҆тро́бо, ра́дꙋйсѧ, прⷭ҇то́ле гдⷭ҇нь, ра́дꙋйсѧ, мт҃и жи́зни на́шеѧ.
І҆рмо́съ: Оу҆твердѝ гдⷭ҇и на ка́мени за́повѣдей твои́хъ, подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.
И҆сто́чникъ живота̀ стѧжа́хъ тебѐ, сме́рти низложи́телѧ, и҆ вопїю́ ти ѿ се́рдца моегѡ̀ пре́жде конца̀: согрѣши́хъ, ѡ҆чи́сти и҆ сп҃си́ мѧ.
При нѡ́и, сп҃се, блꙋ́дствовавшыѧ подража́хъ, ѻ҆́нѣхъ наслѣ́дствовавъ ѡ҆сꙋжде́нїе, въ пото́пѣ погрꙋже́нїѧ.
Согрѣши́хъ, гдⷭ҇и, согрѣши́хъ тебѣ̀, ѡ҆чи́сти мѧ̀: нѣ́сть бо и҆́же кто̀ согрѣшѝ въ человѣ́цѣхъ, є҆го́же не превзыдо́хъ прегрѣше́ньми.
Ха́ма ѻ҆́наго дꙋшѐ, ѻ҆тцеꙋбі́йца подража́вши, сра́ма не покры́ла є҆сѝ и҆́скреннѧгѡ, вспѧ́ть зрѧ̀ возврати́вшисѧ.
Бл҃гослове́нїѧ си́мова не наслѣ́довала є҆сѝ дꙋшѐ ѻ҆каѧ́ннаѧ: ни простра́нное ѡ҆держа́нїе, ꙗ҆́коже і҆а́феѳъ и҆мѣ́ла є҆сѝ на землѝ ѡ҆ставле́нїѧ.
Ѿ землѝ харра́нъ, и҆зы́ди ѿ грѣха̀ дꙋшѐ моѧ̀, грѧдѝ въ зе́млю точа́щꙋю присноживо́тное нетлѣ́нїе, є҆́же а҆враа́мъ наслѣ́дствова.
А҆враа́ма слы́шала є҆сѝ дꙋшѐ моѧ̀, дре́вле ѡ҆ста́вльша зе́млю ѻ҆те́чества, и҆ бы́вша прише́льца, сегѡ̀ произволе́нїю подража́й.
Оу҆ дꙋ́ба мамврі́йскагѡ ᲂу҆чреди́въ патрїа́рхъ а҆́гг҃лы, наслѣ́дствова по ста́рости ѡ҆бѣтова́нїѧ лови́твꙋ.
І҆саа́ка ѻ҆каѧ́ннаѧ дꙋшѐ моѧ̀, разꙋмѣ́вши но́вꙋю же́ртвꙋ, та́йнѡ всесожже́ннꙋю гдⷭ҇ви, подража́й є҆гѡ̀ произволе́нїю.
І҆сма́ила слы́шала є҆сѝ, трезви́сѧ дꙋшѐ моѧ̀, и҆згна́на ꙗ҆́кѡ рабы́нино ѿрожде́нїе, ви́ждь, да не ка́кѡ подо́бно что̀ постра́ждеши ласкосе́рдствꙋющи.
А҆га́рѣ дре́влѣ дꙋшѐ, є҆гѵ́птѧнынѣ ᲂу҆подо́биласѧ є҆сѝ, порабо́тившисѧ произволе́нїемъ, и҆ ро́ждши но́ваго і҆сма́ила, презо́рство.
І҆а́кѡвлю лѣ́ствицꙋ разꙋмѣ́ла є҆сѝ дꙋшѐ моѧ̀, ꙗ҆влѧ́емꙋю ѿ землѝ къ небесє́мъ, почто̀ не и҆мѣ́ла є҆сѝ восхо́да тве́рда, бл҃гоче́стїѧ;
Сщ҃е́нника бж҃їѧ, и҆ цр҃ѧ̀ ᲂу҆едине́на, хрⷭ҇то́во подо́бїе, въ ми́рѣ житїѧ̀, въ человѣ́цѣхъ подража́й.
Не бꙋ́ди сто́лпъ сла́ный дꙋшѐ, возврати́вшисѧ вспѧ́ть: ѡ҆́бразъ да ᲂу҆страши́тъ тѧ̀ содо́мскїй, горѣ̀ въ сигѡ́ръ сп҃са́йсѧ.
Запале́нїѧ ꙗ҆́коже лѡ́тъ, бѣ́гай дꙋшѐ моѧ̀ грѣха̀: бѣ́гай содо́мы и҆ гомо́рры, бѣ́гай пла́мене всѧ́кагѡ безслове́снагѡ жела́нїѧ.
Поми́лꙋй гдⷭ҇и, поми́лꙋй мѧ̀, вопїю́ ти, є҆гда̀ прїи́деши со а҆́гг҃лы твои́ми, возда́ти всѣ̑мъ по достоѧ́нїю дѣѧ́нїй.
Моле́нїѧ влⷣко, тебѐ пою́щихъ не ѿве́ржи: но ᲂу҆ще́дри чл҃вѣколю́бче, и҆ пода́ждь вѣ́рою просѧ́щымъ ѡ҆ставле́нїе.
Марі́и: Содержи́мь є҆́смь бꙋ́рею, и҆ треволне́нїемъ согрѣше́нїй, но сама́ мѧ ма́ти ны́нѣ сп҃сѝ, и҆ къ приста́нищꙋ бж҃е́ственнагѡ покаѧ́нїѧ возведѝ.
Марі́и: Ра́бское моле́нїе и҆ ны́нѣ прпⷣбнаѧ прине́сши ко бл҃гоꙋтро́бнѣй мл҃твами твои́ми бцⷣѣ, ѿве́рзи мѝ бж҃е́ствєнныѧ вхо́ды.
А҆ндре́ю: Твои́ми мл҃твами да́рꙋй и҆ мнѣ̀ ѡ҆ставле́нїе долгѡ́въ, ѽ а҆ндре́е, кри́тскїй предсѣда́телю! покаѧ́нїѧ бо ты̀ таи́нникъ преизрѧ́дный.
Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ пѣва́емаѧ ѵ҆поста́сей, сп҃си́ ны вѣ́рою покланѧ́ющыѧсѧ держа́вѣ твое́й.
Бг҃оро́диченъ: Ѿ ѻ҆ц҃а̀ безлѣ́тна сн҃а, въ лѣ́то бг҃ороди́тельнице, неискꙋсомꙋ́жнѡ родила̀ є҆сѝ, стра́нное чꙋ́до, пребы́вши дв҃а, доѧ́щи.
І҆рмо́съ: Оу҆тверди гдⷭ҇и на ка́мени:
Сѣда́ленъ, господи́на їѡ́сифа, гла́съ и҃:
Свѣти̑ла бг҃озра̑чнаѧ, сп҃сѡвы а҆пⷭ҇ли, просвѣти́те на́съ во тьмѣ̀ житїѧ̀, ꙗ҆́кѡ да во дни̑ ны́нѣ бл҃гоѡбра́знѡ хо́димъ, свѣ́томъ воздержа́нїѧ нощны́хъ страсте́й ѿбѣга́юще, и҆ свѣ̑тлыѧ стрⷭ҇ти хрⷭ҇тѡ́вы ᲂу҆́зримъ, ра́дꙋющесѧ.
Сла́ва, дрꙋгі́й сѣда́ленъ, гла́съ и҃:
А҆пⷭ҇льскаѧ двоенадесѧ́тице бг҃оизбра́ннаѧ, мольбꙋ̀ хрⷭ҇тꙋ̀ ны́нѣ принесѝ, по́стное по́прище всѣ̑мъ прейтѝ, соверша́ющымъ во ᲂу҆миле́нїи мл҃твы, творѧ́щымъ ᲂу҆се́рдно добродѣ́тєли, ꙗ҆́кѡ да си́це предвари́мъ ви́дѣти хрⷭ҇та̀ бг҃а сла́вное воскрⷭ҇нїе, сла́вꙋ и҆ хвалꙋ̀ приносѧ́ще.
И҆ ны́нѣ, бг҃оро́диченъ: Подо́бенъ:
Непостижи́магѡ бг҃а, сн҃а и҆ сло́во, несказа́ннѡ па́че ᲂу҆ма̀ и҆з̾ тебѐ ро́ждшеесѧ, молѝ бцⷣе со а҆пⷭ҇лы, ми́ръ вселе́ннѣй чи́стый пода́ти, и҆ согрѣше́нїй да́ти на́мъ пре́жде конца̀ проще́нїе, и҆ црⷭ҇твїѧ нбⷭ҇нагѡ кра́йнїѧ ра́ди бл҃гости, сподо́бити рабы̑ твоѧ̑.
Та́же трипѣ́снецъ, без̾ покло́нѡвъ, гла́съ и҃.
Пѣ́снь д҃.
І҆рмо́съ: Оу҆слы́шахъ гдⷭ҇и смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Воздержа́нїемъ пожи́вше просвѣще́ннїи хрⷭ҇тѡ́вы а҆пⷭ҇ли, воздержа́нїѧ вре́мѧ на́мъ хода́тайствы бж҃е́ственными ᲂу҆тиша́ютъ.
Двоенадесѧтострꙋ́нный ѻ҆рга́нъ, пѣ́снь воспѣ̀ сп҃си́тельнꙋю, ᲂу҆ченикѡ́въ ли́къ бж҃е́ственный, лꙋка̑ваѧ возмꙋща́ѧ гласова̑нїѧ.
Ѡ҆дожде́нїемъ дх҃о́внымъ всю̀ подсо́лнечнꙋю напои́сте, сꙋ́шꙋ ѿгна́вше многобо́жїѧ всебл҃же́ннїи.
Бг҃оро́диченъ: Смири́вшасѧ сп҃си́ мѧ, высокомꙋ́дреннѡ пожи́вшаго, ро́ждшаѧ возне́сшаго смире́нное є҆стество̀, дв҃о всечⷭ҇таѧ.
И҆́ный. Гла́съ то́йже. І҆рмо́съ: Оу҆слы́шахъ гдⷭ҇и:
А҆пⷭ҇льское всечⷭ҇тно́е ликостоѧ́нїе, зижди́телѧ всѣ́хъ молѧ́щее, просѝ поми́ловати ны̀ восхвалѧ́ющыѧ тѧ̀.
Ꙗ҆́кѡ дѣ́лателє сꙋ́ще хрⷭ҇тѡ́вы а҆пⷭ҇ли, во все́мъ мі́рѣ бж҃е́ственнымъ сло́вомъ воздѣ́лавшїи, прино́сите плоды̀ є҆мꙋ̀ всегда̀.
Вїногра́дъ бы́сте хрⷭ҇то́въ вои́стиннꙋ возлю́бленный, вїно́ бо дх҃о́вное и҆сточи́сте мі́рꙋ а҆пⷭ҇ли.
Трⷪ҇ченъ: Пренача́льнаѧ, соѡбра́знаѧ, всеси́льнѣйшаѧ трⷪ҇це ст҃а́ѧ, ѻ҆́ч҃е, сло́ве и҆ дш҃е ст҃ы́й, бж҃е, свѣ́те и҆ животѐ, сохранѝ ста́до твоѐ.
Бг҃оро́диченъ: Ра́дꙋйсѧ, прⷭ҇то́ле ѻ҆гнезра́чный, ра́дꙋйсѧ, свѣти́льниче свѣщено́сный, ра́дꙋйсѧ, горо̀ ѡ҆сщ҃е́нїѧ, ковче́же жи́зни, ст҃ы́хъ ст҃а́ѧ сѣ́не.
І҆рмо́съ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й и҆ ᲂу҆боѧ́хсѧ: сла́ва си́ле твое́й гдⷭ҇и.
Дѣ́лъ твои́хъ да не пре́зриши, созда́нїѧ твоегѡ̀ да не ѡ҆ста́виши, правосꙋ́де, а҆́ще и҆ є҆ди́нъ согрѣши́хъ, ꙗ҆́кѡ человѣ́къ, па́че всѧ́кагѡ человѣ́ка, чл҃вѣколю́бче, но и҆́маши, ꙗ҆́кѡ гдⷭ҇ь всѣ́хъ, вла́сть ѡ҆ставлѧ́ти грѣхѝ.
Приближа́етсѧ, дꙋшѐ, коне́цъ, приближа́етсѧ, и҆ неради́ши, ни гото́вишисѧ: вре́мѧ сокраща́етсѧ, воста́ни, бли́зъ при две́рехъ сꙋдїѧ̀ є҆́сть: ꙗ҆́кѡ со́нїе, ꙗ҆́кѡ цвѣ́тъ, вре́мѧ житїѧ̀ тече́тъ: что̀ всꙋ́е мѧте́мсѧ;
Воспрѧнѝ, ѽ дꙋшѐ моѧ̀, дѣѧ̑нїѧ твоѧ̑, ꙗ҆̀же содѣ́лала є҆сѝ, помышлѧ́й, и҆ сїѧ̑ пред̾ лицѐ твоѐ принесѝ, и҆ ка̑пли и҆спꙋстѝ сле́зъ твои́хъ: рцы̀ со дерзнове́нїемъ дѣѧ̑нїѧ и҆ помышлє́нїѧ хрⷭ҇тꙋ̀, и҆ ѻ҆правда́йсѧ.
Не бы́сть въ житїѝ грѣха̀, ни дѣѧ́нїѧ, ни ѕло́бы, є҆ѧ́же а҆́зъ, сп҃се, не согрѣши́хъ ᲂу҆мо́мъ и҆ сло́вомъ, и҆ произволе́нїемъ и҆ предложе́нїемъ, и҆ мы́слїю и҆ дѣѧ́нїемъ согрѣши́въ, ꙗ҆́кѡ и҆́нъ никто́же когда̀.
Ѿсю́дꙋ и҆ ѡ҆сꙋжде́нъ бы́хъ, ѿсю́дꙋ препрѣ́нъ бы́хъ а҆́зъ ѡ҆каѧ́нный ѿ своеѧ̀ со́вѣсти, є҆ѧ́же ничто́же въ мі́рѣ нꙋ́жнѣйше: сꙋдїѐ и҆зба́вителю мо́й, и҆ вѣ́дче, пощадѝ и҆ и҆зба́ви, и҆ сп҃си́ мѧ раба̀ твоего̀.
Лѣ́ствица, ю҆́же ви́дѣ дре́вле вели́кїй въ патрїа́рсѣхъ, ᲂу҆каза́нїе є҆́сть дꙋшѐ моѧ̀, дѣ́ѧтельнагѡ восхожде́нїѧ, разꙋ́мнагѡ возше́ствїѧ: а҆́ще хо́щеши ᲂу҆́бѡ, дѣѧ́нїемъ, и҆ ра́зꙋмомъ, и҆ зрѣ́нїемъ пожи́ти, ѡ҆бнови́сѧ.
Зно́й дневны́й претерпѣ̀ лише́нїѧ ра́ди патрїа́рхъ, и҆ мра́зъ нощны́й понесѐ, на всѧ́къ де́нь снабдѣ̑нїѧ творѧ̀, пасы́й, трꙋжда́ѧйсѧ, рабо́таѧй, да двѣ̀ жєнѣ̀ сочета́етъ.
Жєны́ ми двѣ̀ разꙋмѣ́й, дѣѧ́нїе же и҆ ра́зꙋмъ въ зрѣ́нїи, лі́ю ᲂу҆́бѡ дѣѧ́нїе, ꙗ҆́кѡ многоча́днꙋю: рахи́ль же ра́зꙋмъ, ꙗ҆́кѡ многотрꙋ́днꙋю: и҆́бо кромѣ̀ трꙋдѡ́въ, ни дѣѧ́нїе, ни зрѣ́нїе дꙋшѐ, и҆спра́витсѧ.
Бдѝ ѽ дꙋшѐ моѧ̀! и҆зрѧ́дствꙋй ꙗ҆́коже дре́вле вели́кїй въ патрїа́рсѣхъ, да стѧ́жеши дѣѧ́нїе съ ра́зꙋмомъ, да бꙋ́деши ᲂу҆́мъ зрѧ́й бг҃а и҆ дости́гнеши незаходѧ́щїй мра́къ въ видѣ́нїи, и҆ бꙋ́деши вели́кїй кꙋпе́цъ.
Двана́десѧть патрїа́рхѡвъ, вели́кїй въ патрїа́рсѣхъ дѣтотвори́въ, та́йнѡ ᲂу҆твердѝ тебѣ̀ лѣ́ствицꙋ дѣ́ѧтельнагѡ дꙋшѐ моѧ̀ восхожде́нїѧ: дѣ́ти, ꙗ҆́кѡ ѡ҆снова̑нїѧ: степє́ни, ꙗ҆́кѡ восхождє́нїѧ, премꙋ́дреннѡ подложи́въ.
И҆са́ѵа возненави́дѣннаго подража́ла є҆сѝ дꙋшѐ, ѿдала̀ є҆сѝ преле́стникꙋ твоемꙋ̀ пе́рвыѧ добро́ты пе́рвенство, и҆ ѻ҆те́ческїѧ мл҃твы ѿпа́ла є҆сѝ, и҆ два́жды поползнꙋ́ласѧ є҆сѝ ѻ҆каѧ́ннаѧ, дѣѧ́нїемъ и҆ ра́зꙋмомъ: тѣ́мже ны́нѣ пока́йсѧ.
Є҆дѡ́мъ и҆са́ѵъ нарече́сѧ, кра́йнѧгѡ ра́ди женонеи́стовнагѡ смѣше́нїѧ: невоздержа́нїемъ бо при́снѡ разжига́емь, и҆ сластьмѝ ѡ҆сквернѧ́емь, є҆дѡ́мъ и҆менова́сѧ, є҆́же глаго́летсѧ разжже́нїе дꙋшѝ любогрѣхо́вныѧ.
І҆́ѡва на гно́ищи слы́шавши, ѽ дꙋшѐ моѧ̀, ѡ҆правда́вшагосѧ, тогѡ̀ мꙋ́жествꙋ не поревнова́ла є҆сѝ, тве́рдагѡ не и҆мѣ́ла є҆сѝ предложе́нїѧ, во всѣ́хъ ꙗ҆̀же вѣ́си, и҆ и҆́миже и҆скꙋси́ласѧ є҆сѝ, но ꙗ҆ви́ласѧ є҆сѝ нетерпѣли́ва.
И҆́же пе́рвѣе на престо́лѣ, на́гъ ны́нѣ на гно́ищи гно́енъ: мно́гїй въ ча́дѣхъ и҆ сла́вный, безча́денъ и҆ бездо́мокъ напра́снѡ: пала́тꙋ ᲂу҆́бѡ гно́ище, и҆ би́серїе стрꙋ́пы вмѣнѧ́ше.
Ца́рскимъ досто́инствомъ, вѣнце́мъ и҆ багрѧни́цею ѡ҆дѣ́ѧнъ, многоимѣ́нный человѣ́къ и҆ првⷣный, бога́тствомъ кипѧ̀ и҆ ста́ды, внеза́пꙋ бога́тства, сла́вы ца́рства ѡ҆бнища́въ лиши́сѧ.
А҆́ще пра́веденъ бѧ́ше ѻ҆́нъ, и҆ непоро́ченъ па́че всѣ́хъ, и҆ не ᲂу҆бѣжѐ ловле́нїѧ льсти́вагѡ и҆ сѣ́ти: ты́ же грѣхолюби́ва сꙋ́щи ѻ҆каѧ́ннаѧ дꙋшѐ, что̀ сотвори́ши, а҆́ще чесо́мꙋ ѡ҆ недовѣ́домыхъ слꙋчи́тсѧ наитѝ тебѣ̀;
Тѣ́ло ѡ҆скверни́сѧ, дꙋ́хъ ѡ҆калѧ́сѧ, ве́сь ѡ҆стрꙋпи́хсѧ: но ꙗ҆́кѡ вра́чь хрⷭ҇тѐ, ѻ҆боѧ̑ покаѧ́нїемъ мои́мъ ᲂу҆врачꙋ́й, ѡ҆мы́й, ѡ҆чи́сти, покажѝ сп҃се мо́й, па́че снѣ́га чистѣ́йша.
Тѣ́ло твоѐ и҆ кро́вь распина́емый ѡ҆ всѣ́хъ положи́лъ є҆сѝ сло́ве: тѣ́ло ᲂу҆́бѡ, да мѧ̀ ѡ҆бнови́ши: кро́вь, да ѡ҆мы́еши мѧ̀: дꙋ́хъ же пре́далъ є҆сѝ, да мѧ̀ приведе́ши хрⷭ҇тѐ, твоемꙋ̀ роди́телю.
Содѣ́лалъ є҆сѝ сп҃се́нїе посредѣ̀ землѝ ще́дре, да сп҃се́мсѧ. во́лею на дре́вѣ распѧ́лсѧ є҆сѝ. є҆де́мъ затворе́нный ѿве́рзесѧ, го́рнѧѧ и҆ до́льнѧѧ тва́рь, ꙗ҆зы́цы всѝ сп҃се́ни покланѧ́ютсѧ тебѣ̀.
Да бꙋ́детъ мѝ кꙋпѣ́ль, кро́вь и҆з̾ ре́бръ твои́хъ, вкꙋ́пѣ и҆ питїѐ, и҆сточи́вшее во́дꙋ ѡ҆ставле́нїѧ, да ѻ҆бою́дꙋ ѡ҆чища́юсѧ, помазꙋ́ѧсѧ и҆ пїѧ̀: ꙗ҆́кѡ пома́занїе и҆ питїѐ сло́ве, животѡ́чнаѧ твоѧ̑ словеса̀.
На́гъ є҆́смь черто́га, на́гъ є҆́смь и҆ бра́ка, кꙋ́пнѡ и҆ ве́чери: свѣти́льникъ ᲂу҆гасѐ, ꙗ҆́кѡ без̾еле́йный, черто́гъ заключи́сѧ мнѣ̀ спѧ́щꙋ, ве́черѧ снѣде́сѧ: а҆́зъ же по рꙋкꙋ̀ и҆ нѡ́гꙋ свѧ́занъ, во́нъ низве́рженъ є҆́смь.
Ча́шꙋ цр҃ковь стѧжа̀, рє́бра твоѧ̑ живонѡ́снаѧ, и҆з̾ ни́хже сꙋгꙋ̑быѧ на́мъ и҆сточѝ то́ки, ѡ҆ставле́нїѧ и҆ ра́зꙋма, во ѡ҆́бразъ дре́внѧгѡ и҆ но́вагѡ двои́хъ вкꙋ́пѣ завѣ́тѡвъ, сп҃се на́шъ.
Вре́мѧ живота̀ моегѡ̀ ма́ло, и҆ и҆спо́лнено болѣ́зней и҆ лꙋка́вства: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.
Высокоглаго́ливъ ны́нѣ є҆́смь, жесто́къ же и҆ се́рдцемъ, вотщѐ и҆ всꙋ́е, да не съ фарїсе́емъ ѡ҆сꙋ́диши мѧ̀, па́че же мытаре́во смире́нїе пода́ждь мѝ є҆ди́не ще́дре, правосꙋ́де, и҆ семꙋ́ мѧ сочислѝ.
Согрѣши́хъ, досади́въ сосꙋ́дꙋ пло́ти моеѧ̀, вѣ́мъ ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.
Самоистꙋка́нъ бы́хъ страстьмѝ, дꙋ́шꙋ мою̀ вредѧ̀ ще́дре, но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.
Не послꙋ́шахъ гла́са твоегѡ̀, преслꙋ́шахъ писа́нїе твоѐ законополо́жника: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ, сп҃се, са́мъ мѧ̀ ᲂу҆ще́дри.
Марі́и: Безпло́тныхъ жи́тельство въ пло́ти преходѧ́щи, бл҃года́ть прпⷣбнаѧ къ бг҃ꙋ ве́лїю вои́стиннꙋ прїѧ́ла є҆сѝ, вѣ́рнѡ ѡ҆ чтꙋ́щихъ тѧ̀ предста́тельствꙋй. тѣ́мже мо́лимъ тѧ̀, ѿ всѧ́кихъ напа́стей и҆ на́съ мл҃твами твои́ми и҆зба́ви.
Марі́и: Вели́кихъ безмѣ́стїй во глꙋбинꙋ̀ низве́дшисѧ, неѡдержи́ма была̀ є҆сѝ, но востекла̀ є҆сѝ по́мысломъ лꙋ́чшимъ, къ кра́йнѣй дѣѧ́ньми ꙗ҆́вѣ добродѣ́тели пресла́внѡ, а҆́гг҃льское є҆стество̀ марі́е, ᲂу҆диви́вши.
А҆ндре́ю: А҆ндре́е, ѻ҆ч҃ескаѧ похвало̀, мл҃твами твои́ми не преста́й молѧ́сѧ, предстоѧ̀ трⷪ҇цѣ пребж҃е́ственнѣй, ꙗ҆́кѡ да и҆зба́вимсѧ мꙋче́нїѧ, любо́вїю предста́телѧ тѧ̀ бж҃е́ственнаго всебл҃же́нне призыва́ющїи, кри́тꙋ ᲂу҆добре́нїе.
Сла́ва, трⷪ҇ченъ: Нераздѣ́льное сꙋщество́мъ, несли́тное ли́цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное, вопїю́ ти пѣ́снь вели́кꙋю, въ вы́шнихъ трегꙋ́бѡ пѣсносло́вимꙋю.
Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши ѻ҆бою́дꙋ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ, не ражда́ющаѧ. бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.
Пѣ́снь є҃.
І҆рмо́съ: Ѿ нощѝ ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑: и҆ наꙋчи́ мѧ сп҃се, твори́ти во́лю твою̀.
Въ нощѝ житїѐ моѐ преидо́хъ при́снѡ, тьма́ бо бы́сть и҆ глꙋбока̀ мнѣ̀ мгла̀, но́щь грѣха̀: но ꙗ҆́кѡ днѐ сы́на сп҃се покажи́ мѧ.
Рꙋві́ма подража́ѧ ѡ҆каѧ́нный а҆́зъ, содѣ́ѧхъ беззако́нный и҆ законопрестꙋ́пный совѣ́тъ на бг҃а вы́шнѧго, ѡ҆скверни́въ ло́же моѐ, ꙗ҆́кѡ ѻ҆́тчее ѻ҆́нъ.
И҆сповѣ́даюсѧ тебѣ̀ хрⷭ҇тѐ цр҃ю̀, согрѣши́хъ, согрѣши́хъ, ꙗ҆́кѡ пре́жде і҆ѡ́сифа бра́тїѧ прода́вшїи, чистоты̀ пло́дъ и҆ цѣломꙋ́дрїѧ.
Ѿ сро́дникѡвъ пра́веднаѧ дꙋша̀ свѧза́сѧ, прода́сѧ въ рабо́тꙋ сла́дкїй, во ѡ҆́бразъ гдⷭ҇нь: ты́ же всѧ̀ дꙋшѐ, продала́сѧ є҆сѝ ѕлы́ми твои́ми.
І҆ѡ́сифа пра́веднагѡ и҆ цѣломꙋ́дреннагѡ ᲂу҆ма̀ подража́й ѡ҆каѧ́ннаѧ, и҆ неискꙋ́снаѧ дꙋшѐ, и҆ не ѡ҆сквернѧ́йсѧ безслове́сными стремле́ньми при́снѡ беззако́ннꙋющи.
А҆́ще и҆ въ ро́вѣ поживѐ и҆ногда̀ і҆ѡ́сифъ, влⷣко гдⷭ҇и, но во ѡ҆́бразъ погребе́нїѧ и҆ воста́нїѧ твоегѡ̀: а҆́зъ же что̀ тебѣ̀ когда̀ сицево́е принесꙋ̀;
Мѡѷсе́овъ слы́шала є҆сѝ ковче́жецъ дꙋшѐ, вода́ми, волна́ми носи́мъ рѣ́чными, ꙗ҆́кѡ въ черто́зѣ дре́вле бѣ́гающїй дѣ́ла го́рькагѡ совѣ́та фараѡни́тска.
А҆́ще ба̑бы слы́шала є҆сѝ, ᲂу҆бива́ющыѧ и҆ногда̀ безвозра́стное мꙋ́жеское, дꙋшѐ ѻ҆каѧ́ннаѧ, цѣломꙋ́дрїѧ дѣѧ́нїе, ны́нѣ ꙗ҆́кѡ вели́кїй мѡѷсе́й, ссѝ премꙋ́дрость.
Ꙗ҆́кѡ мѡѷсе́й вели́кїй є҆гѵ́птѧнина, ᲂу҆ма̀ ᲂу҆ѧзви́вши ѻ҆каѧ́ннаѧ, не ᲂу҆би́ла є҆сѝ дꙋшѐ: и҆ ка́кѡ всели́шисѧ, глаго́ли, въ пꙋсты́ню страсте́й покаѧ́нїемъ;
Въ пꙋсты́ню всели́сѧ вели́кїй мѡѷсе́й, грѧдѝ ᲂу҆́бѡ подража́й тогѡ̀ житїѐ, да и҆ въ кꙋпинѣ̀ бг҃оѧвле́нїѧ дꙋшѐ, въ видѣ́нїи бꙋ́деши.
Мѡѷсе́овъ же́злъ воѡбража́й дꙋшѐ, ᲂу҆дарѧ́ющїй мо́ре, и҆ ѡ҆гꙋстѣва́ющїй глꙋбинꙋ̀, во ѡ҆́бразъ крⷭ҇та̀ бж҃е́ственнагѡ: и҆́мже мо́жеши и҆ ты̀ вели̑каѧ соверши́ти.
А҆арѡ́нъ приноша́ше ѻ҆́гнь бг҃ꙋ, непоро́чный, неле́стный: но ѻ҆фнѝ и҆ фїнее́съ, ꙗ҆́кѡ ты̀ дꙋшѐ, приноша́хꙋ чꙋжде́е бг҃ꙋ ѡ҆скверне́нное житїѐ.
Ꙗ҆́кѡ тѧ́жкїй нра́вомъ, фараѡ́нꙋ го́рькомꙋ бы́хъ влⷣко, і҆аннѝ, и҆ і҆амврѝ, дꙋше́ю и҆ тѣ́ломъ, и҆ погрꙋже́нъ ᲂу҆мо́мъ: но помози́ ми.
Ка́ломъ смѣси́хсѧ ѡ҆каѧ́нный ᲂу҆мо́мъ, ѡ҆мы́й мѧ̀ влⷣко, ба́нею мои́хъ сле́зъ, молю́ тѧ, пло́ти моеѧ̀ ѻ҆де́ждꙋ ᲂу҆бѣли́въ ꙗ҆́кѡ снѣ́гъ.
А҆́ще и҆спыта́ю моѧ̑ дѣла̀ сп҃се, всѧ́каго человѣ́ка превозше́дша грѣха́ми себѐ зрю̀, ꙗ҆́кѡ ра́зꙋмомъ мꙋ́дрствꙋѧй согрѣши́хъ, не невѣ́дѣнїемъ.
Пощадѝ пощадѝ гдⷭ҇и, созда́нїе твоѐ, согрѣши́хъ, ѡ҆сла́би мѝ, ꙗ҆́кѡ є҆стество́мъ чⷭ҇тый са́мъ сы́й є҆ди́нъ, и҆ и҆́нъ ра́звѣ тебѐ никто́же є҆́сть кромѣ̀ скве́рны.
Менѐ ра́ди бг҃ъ сы́й, воѡбрази́лсѧ є҆сѝ въ мѧ̀, показа́лъ є҆сѝ чꙋдеса̀, и҆сцѣли́въ прокажє́нныѧ, и҆ разсла́бленнаго стѧгнꙋ́въ, кровоточи́выѧ то́къ ᲂу҆ста́вилъ є҆сѝ сп҃се, прикоснове́нїемъ ри́зъ.
Кровоточи́вꙋю подража́й ѻ҆каѧ́ннаѧ дꙋшѐ, притецы̀ ᲂу҆держѝ ѻ҆ме́ты хрⷭ҇тѡ́вы, да и҆зба́вишисѧ ра́нъ, и҆ ᲂу҆слы́шиши ѿ негѡ̀: вѣ́ра твоѧ̀ сп҃се́ тѧ.
Ни́зꙋ снича́щꙋю подража́й ѽ дꙋшѐ, прїидѝ, припадѝ къ нога́ма і҆и҃совыма, да тѧ̀ и҆спра́витъ, и҆ да хо́диши пра́вѡ стєзѝ гдⷭ҇ни.
А҆́ще и҆ кла́дѧзь є҆сѝ глꙋбо́кїй влⷣко, и҆сточи́ ми во́дꙋ и҆з̾ пречи́стыхъ твои́хъ жи́лъ, да ꙗ҆́кѡ самарѧны́нѧ, не ктомꙋ̀ пїѧ́й жа́ждꙋ: жи́зни бо стрꙋи̑ и҆сточа́еши.
Сїлѡа́мъ да бꙋ́дꙋтъ мѝ сле́зы моѧ̑, влⷣко гдⷭ҇и, да ᲂу҆мы́ю и҆ а҆́зъ зѣ̑ницы се́рдца, и҆ ви́ждꙋ тѧ̀ ᲂу҆́мнѡ, свѣ́та превѣ́чна.
Марі́и: Несравне́ннымъ жела́нїемъ всебога́таѧ, дре́вꙋ возжелѣ́вши поклони́тисѧ живо́тномꙋ, сподо́биласѧ є҆сѝ жела́нїѧ, сподо́би ᲂу҆́бѡ и҆ менѐ ᲂу҆лꙋчи́ти вы́шнїѧ сла́вы.
Марі́и: Стрꙋи̑ і҆ѻрда̑нскїѧ преше́дши, ѡ҆брѣла̀ є҆сѝ поко́й безболѣ́зненный, пло́ти сла́сти и҆збѣжа́вши, є҆ѧ́же и҆ на́съ и҆змѝ твои́ми мл҃твами прпⷣбнаѧ.
А҆ндре́ю: Ꙗ҆́кѡ па́стырей и҆зрѧ́днѣйша, а҆ндре́е премꙋ́дре, и҆збра́нна сꙋ́ща тѧ̀, любо́вїю ве́лїю и҆ стра́хомъ молю̀, твои́ми мл҃твами сп҃се́нїе ᲂу҆лꙋчи́ти, и҆ жи́знь вѣ́чнꙋю.
Сла́ва, трⷪ҇ченъ: Тѧ̀ трⷪ҇це сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.
Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ, безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ себѣ̀ чл҃вѣ́ческое є҆стество̀.
Пѣ́снь ѕ҃.
І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.
Сле́зы сп҃се ѻ҆́чїю моє́ю, и҆ и҆з̾ глꙋбины̀ воздыха̑нїѧ чи́стѣ приношꙋ̀, вопїю́щꙋ се́рдцꙋ: бж҃е, согрѣши́хъ тѝ ѡ҆чи́сти мѧ̀.
Оу҆клони́ласѧ є҆сѝ дꙋшѐ, ѿ гдⷭ҇а твоегѡ̀, ꙗ҆́коже даѳа́нъ и҆ а҆вїрѡ́нъ: но пощадѝ, воззовѝ и҆з̾ а҆́да преиспо́днѧгѡ, да не про́пасть земна́ѧ тебѐ покры́етъ.
Ꙗ҆́кѡ ю҆́ница дꙋшѐ разсвирѣ́пѣвшаѧ, ᲂу҆подо́биласѧ є҆сѝ є҆фре́мꙋ, ꙗ҆́кѡ се́рна ѿ тене́тъ сохранѝ житїѐ, впери́вши дѣѧ́нїемъ ᲂу҆́мъ, и҆ зрѣ́нїемъ.
Рꙋка̀ на́съ мѡѷсе́ова да ᲂу҆вѣ́ритъ дꙋшѐ, ка́кѡ мо́жетъ бг҃ъ прокаже́нное житїѐ ᲂу҆бѣли́ти, и҆ ѡ҆чи́стити: и҆ не ѿча́йсѧ сама̀ себѐ, а҆́ще и҆ прокаже́нна є҆сѝ.
Вѡ́лны сп҃се прегрѣше́нїй мои́хъ ꙗ҆́кѡ въ мо́ри чермнѣ́мъ возвраща́ющесѧ, покры́ша мѧ̀ внеза́пꙋ, ꙗ҆́кѡ є҆гѵ́птѧны и҆ногда̀, и҆ трїста́ты.
Неразꙋ́мное дꙋшѐ произволе́нїе и҆мѣ́ла є҆сѝ, ꙗ҆́кѡ пре́жде і҆и҃ль: бж҃е́ственныѧ бо ма́нны предсꙋди́ла є҆сѝ безслове́снѡ, любосла́стное страсте́й ѡ҆б̾ѧде́нїе.
Кладенцы̀ дꙋшѐ, предпочла̀ є҆сѝ ханане́йскихъ мы́слей, па́че жи́лы ка́мене, и҆з̾ негѡ́же премꙋ́дрости рѣка̀, ꙗ҆́кѡ ча́ша пролива́етъ то́ки бг҃осло́вїѧ.
Свина̑ѧ мѧса̀ и҆ котлы̀, и҆ є҆гѵ́петскꙋю пи́щꙋ, па́че небе́сныѧ предсꙋди́ла є҆сѝ дꙋшѐ моѧ̀, ꙗ҆́коже дре́вле неразꙋ́мнїи лю́дїе въ пꙋсты́ни.
Ꙗ҆́кѡ ᲂу҆да́ри мѡѷсе́й ра́бъ тво́й жезло́мъ ка́мень, ѡ҆бра́знѡ животвори̑ваѧ рє́бра твоѧ̑ проѡбразова́ше, и҆з̾ ни́хже всѝ питїѐ жи́зни сп҃се, почерпа́емъ.
И҆спыта́й дꙋшѐ и҆ смотрѧ́й, ꙗ҆́коже і҆исꙋ́съ наѵи́нъ ѡ҆бѣтова́нїѧ зе́млю, какова̀ є҆́сть, и҆ всели́сѧ въ ню̀ бл҃гозако́нїемъ.
Воста́ни и҆ поборѝ, ꙗ҆́кѡ і҆исꙋ́съ а҆мали́ка, плотскі̑ѧ стра̑сти, и҆ гаваѡні́ты, лє́стныѧ по́мыслы при́снѡ побѣжда́ющи.
Преидѝ вре́мене текꙋ́щее є҆стество̀, ꙗ҆́кѡ пре́жде ковче́гъ, и҆ землѝ ѻ҆́ныѧ бꙋ́ди во ѡ҆держа́нїи ѡ҆бѣтова́нїѧ дꙋшѐ, бг҃ъ повелѣва́етъ.
Ꙗ҆́кѡ сп҃слъ є҆сѝ петра̀, возопи́вша сп҃сѝ, предвари́въ мѧ̀ сп҃се ѿ ѕвѣ́рѧ и҆зба́ви, просте́ръ твою̀ рꙋ́кꙋ, и҆ возведѝ и҆з̾ глꙋбины̀ грѣхо́вныѧ.
Приста́нище тѧ̀ вѣ́мъ ᲂу҆ти́шное, влⷣко, влⷣко хрⷭ҇тѐ: но ѿ незаходи́мыхъ глꙋби́нъ грѣха̀, и҆ ѿча́ѧнїѧ мѧ̀ предвари́въ и҆зба́ви.
А҆́зъ є҆́смь, сп҃се, ю҆́же погꙋби́лъ є҆сѝ дре́вле ца́рскꙋю дра́хмꙋ: но вже́гъ свѣти́льникъ прⷣте́чꙋ твоего̀ сло́ве, взыщѝ и҆ ѡ҆брѧ́щи тво́й ѡ҆́бразъ.
Марі́и: Да страсте́й пла́мень ᲂу҆гаси́ши, сле́зъ ка̑пли и҆сточи́ла є҆сѝ при́снѡ марі́е, дꙋше́ю распала́ема, и҆́хже бл҃года́ть пода́ждь и҆ мнѣ̀ твоемꙋ̀ рабꙋ̀.
Марі́и: Безстра́стїе нбⷭ҇ное стѧжа́ла є҆сѝ, кра́йнимъ на землѝ житїе́мъ ма́ти. тѣ́мже тебѐ пою́щымъ, ѿ страсте́й и҆зба́витисѧ мл҃твами твои́ми, моли́сѧ.
А҆ндре́ю: Кри́тскаго тѧ̀ па́стырѧ, и҆ предсѣда́телѧ, и҆ вселе́нныѧ мл҃твенника вѣ́дый, притека́ю а҆ндре́е, и҆ вопїю́ ти: и҆зми́ мѧ ѻ҆́тче, и҆з̾ глꙋбины̀ грѣха̀.
Сла́ва, трⷪ҇ченъ: Трⷪ҇ца є҆́смь про́ста, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ, молѝ бцⷣе, да мл҃твами твои́ми ѡ҆правди́мсѧ.
Конда́къ гла́съ ѕ҃: Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ хрⷭ҇то́съ бг҃ъ, вездѣ̀ сы́й, и҆ всѧ̑ и҆сполнѧ́ѧй.
І҆́косъ: Хрⷭ҇то́во врачевство̀ ви́дѧ ѿве́рсто, и҆ ѿ сегѡ̀ а҆да́мꙋ и҆стека́ющее здра́вїе, пострада̀, ᲂу҆ѧзви́сѧ дїа́волъ, и҆ ꙗ҆́кѡ бѣ́дствꙋѧ рыда́ше, и҆ свои́мъ дрꙋгѡ́мъ возопѝ: что̀ сотворю̀ сн҃ꙋ мр҃і́инꙋ, ᲂу҆бива́етъ мѧ̀ виѳлее́млѧнинъ, и҆́же вездѣ̀ сы́й, и҆ всѧ̑ и҆сполнѧ́ѧй.
Сѷнаѯа́рїй пе́рвѣе мине́и, та́же настоѧ́щїй. Стїхѝ:
Оу҆миле́нїѧ, хрⷭ҇тѐ мо́й, ѡ҆́бразы да́ждь,
Пою́щымъ ны́нѣ канѡ́нъ тебѣ̀ вели́кїй.
Въ сі́й де́нь по дре́внемꙋ преда́нїю пое́мъ и҆ вели́кагѡ канѡ́на послѣ́дованїе.Се́й вои́стиннꙋ всѣ́хъ канѡ́нѡвъ велича́йшїй, и҆зрѧ́днѡ и҆ хи́тростнѡ сочинѝ и҆ списа̀ и҆́же во ст҃ы́хъ ѻ҆те́цъ на́шъ а҆ндре́й а҆рхїепі́скопъ кри́тскїй, и҆́же и҆ і҆ерⷭ҇ли́мскїй и҆менꙋ́емый: и҆́же ᲂу҆стремлѧ́шесѧ ᲂу҆́бѡ и҆з̾ дама́ска, ѡ҆ четыренадесѧ́тѣмъ же лѣ́тѣ своегѡ̀ во́зраста, наказа́нїю грамматі́ческомꙋ и҆зда́всѧ, и҆ ѡ҆крꙋ́гленное наказа́нїе и҆зꙋчи́въ, во і҆ерⷭ҇ли́мѣ бы́въ мона́шеское прохо́дитъ житїѐ, преподо́бнѣ же и҆ бг҃олюбе́знѣ жи́вый въ безмо́лвномъ и҆ немѧте́жномъ житїѝ. Мнѡ́га ᲂу҆́бѡ и҆ и҆́на списа̑нїѧ животополє́знаѧ ѡ҆ставлѧ́етъ бж҃їей цр҃кви, словеса́ же и҆ канѡ́ны, па́че же мꙋ́жественнѣ въ торже́ственныхъ быва́емый же и҆ показꙋ́емый. Со мно́гими же и҆ны́ми, и҆ настоѧ́щїй вели́кїй канѡ́нъ сочинѝ: ᲂу҆миле́нїе неисче́тно и҆мꙋ́щъ: всѧ́кꙋю бо ве́тхагѡ и҆ но́вагѡ завѣ́та по́вѣсть сниска́въ и҆ собра́въ, настоѧ́щее сочинѝ сладкопѣ́нїе, ѿ а҆да́ма ꙗ҆́вѣ, да́же и҆ до самагѡ̀ хрⷭ҇то́ва вознесе́нїѧ, и҆ а҆пⷭ҇льскїѧ про́повѣди. Поꙋща́етъ ᲂу҆́бѡ си́мъ всѧ́кꙋю дꙋ́шꙋ, є҆ли́кимъ ᲂу҆́бѡ бл҃ги̑мъ по́вѣсти ревнова́ти, и҆ подража́ти по си́лѣ: є҆ли́кихъ же ѕлы́хъ ѿбѣга́ти, и҆ при́снѡ къ бг҃ꙋ востека́ти покаѧ́нїемъ, слеза́ми и҆ и҆сповѣ́данїемъ, и҆ и҆ны́мъ ꙗ҆́вѣ бл҃гоꙋгожде́нїемъ. Ѻ҆ба́че толи́кѡ є҆́сть широ́кїй и҆ сладкогла́сный, ꙗ҆́кѡ и҆ самꙋ̀ жесточа́йшꙋю дꙋ́шꙋ дово́ленъ ᲂу҆мѧгчи́ти, и҆ къ бо́дрости благо́й воздви́гнꙋти, а҆́ще то́чїю съ сокрꙋше́ннымъ се́рдцемъ и҆ внима́нїемъ подо́бнымъ пое́тсѧ. Сотвори́ же сего̀, є҆гда̀ и҆ патрїа́рхъ і҆ерⷭ҇ли́мскїй вели́кїй сѡфро́нїй, є҆гѵ́птѧныни марі́и житїѐ списа̀. Оу҆миле́нїе бо и҆ сїѐ житїѐ предлага́етъ безчи́сленно, и҆ мно́гое прегрѣши́вшымъ, и҆ согрѣша́ющымъ ᲂу҆тѣше́нїе дае́тъ, а҆́ще то́чїю ѕлы́хъ ѿстꙋпи́ти хотѧ́тъ. ᲂу҆чини́шасѧ же и҆ въ настоѧ́щїй де́нь пѣ́тисѧ и҆ прочита́тисѧ сицевы́ѧ ра́ди вины̀: поне́же бо къ концꙋ̀ приближа́етсѧ ст҃а́ѧ четыредесѧ́тница, да не человѣ́цы лѣни́ви бы́вше къ дх҃ѡ́внымъ подвигѡ́мъ, небре́жнѡ забꙋ́дꙋтсѧ, и҆ є҆́же цѣломꙋ́дрствовати є҆ди́ною во всѣ́хъ преста́нꙋтъ. Вели́кїй ᲂу҆́бѡ а҆ндре́й, ꙗ҆́коже нѣ́кїй наказа́тель, повѣстьмѝ вели́кагѡ канѡ́на, вели́кихъ мꙋже́й глаго́лѧ добродѣ́тель, и҆ ѕлы́хъ па́ки ѿвраще́нїе, ꙗ҆́кѡ а҆́ще кто̀ ре́клъ бы̀: до́блѣйшихъ трꙋжда́ющихсѧ пред̾ꙋстро́итъ, и҆ мꙋ́жественнѣ къ прє́днимъ простира́тисѧ. Сщ҃е́нный же сѡфро́нїй преесте́ственнымъ свои́мъ сло́вомъ, цѣломꙋ́дрены и҆ па́ки бы́ти твори́тъ, и҆ къ бг҃ꙋ воздви́жетъ, и҆ не низпа́дати, нижѐ ѿча́ѧтисѧ, а҆́ще и҆ногда̀ нѣ́кими прегрѣше́ньми ꙗ҆́ти бы́ша. Є҆ли́кѡ бо бж҃їе чл҃вѣколю́бїе и҆ млⷭ҇ть, вседꙋ́шнѡ ѿ пе́рвыхъ прегрѣше́нїй ѡ҆брати́тисѧ произволѧ́ющымъ, є҆́же ѡ҆ є҆гѵ́птѧныни повѣ́данїе представлѧ́етъ. Глаго́летсѧ же вели́кїй канѡ́нъ, не́гли а҆́ще кто̀ ре́клъ бы, и҆ по тѣ́мъ мы́слемъ, и҆ воспомѧнове́нїємъ: плодови́тъ бо є҆́сть сегѡ̀ творе́цъ, и҆зрѧ́днѡ та̑ сложи́въ, и҆ ꙗ҆́кѡ про́чихъ канѡ́нѡвъ по три́десѧти и҆ ма́лѡ что̀ къ тропарє́мъ и҆мꙋ́щымъ: се́й же, с҃н, прохо́дитъ є҆ди́нагѡ коегѡ́ждо неизрече́ннꙋю и҆ска́паѧ сла́дость. Прикла́днѡ ᲂу҆́бѡ и҆ подо́бнѡ вели́кїй се́й канѡ́нъ, и҆ вели́ко стѧжа́въ ᲂу҆миле́нїе: тѣ́мже и҆ въ вели́цѣй четыредесѧ́тницѣ ᲂу҆чини́сѧ. Се́й и҆зрѧ́дный канѡ́нъ и҆ вели́кїй и҆ преподо́бныѧ марі́и сло́во, то́йже ѻ҆те́цъ на́шъ а҆ндре́й, пе́рвый въ кѡнстанті́нь гра́дъ принесѐ, є҆гда̀ ѿ патрїа́рха і҆ерⷭ҇ли́мскагѡ ѳео́дѡра, въ шесты́й собо́ръ по́сланъ, въ по́мощь прїи́де. Тогда́ бо и҆зрѧ́днѡ на є҆диново́льники подвиза́всѧ, є҆щѐ пребыва́ѧ въ мона́шествꙋющихъ, кли́рꙋ цр҃кве въ кѡнстанті́нѣ гра́дѣ причита́етсѧ: та́же дїа́конъ, и҆ сиротопита́тель въ се́й поставлѧ́етсѧ. И҆ по ма́лѣ а҆рхїепⷭ҇кпъ кри́тскїй бы́въ: пото́мъ бли́зъ нѣ́гдѣ ко глаго́лемомꙋ і҆ері́сꙋ дости́гъ въ мїтѷлі́нѣ, ко гдⷭ҇ꙋ ѿи́де, дово́льнѣ своегѡ̀ прⷭ҇то́ла въ прича́стїи бы́въ. Тогѡ̀ мл҃твами бж҃е, поми́лꙋй на́съ.
Та́же бл҃же́нны съ покло́ны.
Гла́съ ѕ҃:
Во црⷭ҇твїи твое́мъ, помѧнѝ на́съ гдⷭ҇и.
Разбо́йника хрⷭ҇тѐ раѧ̀ жи́телѧ сотвори́лъ є҆сѝ, на крⷭ҇тѣ̀ тебѣ̀ возопи́вша: помѧни́ мѧ, тогѡ̀ покаѧ́нїю сподо́би и҆ менѐ недосто́йнаго.
Сті́хъ: Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Манѡ́ѧ слы́шавши дре́вле дꙋшѐ моѧ̀, бг҃а въ ꙗ҆вле́нїи бы́вша, и҆ и҆з̾ непло́дове тогда̀ прїе́мша пло́дъ ѡ҆бѣтова́нїѧ, тогѡ̀ бл҃гоче́стїе подража́й.
Сті́хъ: Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Самѱѡ́новой поревнова́вши лѣ́ности, главꙋ̀ ѡ҆стри́гла є҆сѝ дꙋшѐ дѣ́лъ твои́хъ, преда́вши и҆ноплеме́нникѡмъ, любосла́стїемъ цѣломꙋ́дреннꙋю жи́знь и҆ бл҃же́ннꙋю.
Сті́хъ: Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Пре́жде че́люстїю ѻ҆́слею побѣди́вый и҆ноплеме́нники, ны́нѣ плѣне́нїе ласкосе́рдствꙋ стра́стномꙋ ѡ҆брѣ́тесѧ: но и҆збѣ́гни дꙋшѐ моѧ̀ подража́нїѧ, дѣѧ́нїѧ и҆ сла́бости.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Вара́къ и҆ і҆ефѳа́й военача́льницы, сꙋдїи̑ і҆и҃лєвы предпочте́ни бы́ша, съ ни́миже дево́рра мꙋжеꙋ́мнаѧ: тѣ́хъ до́блестьми дꙋшѐ вмꙋжи́вшисѧ ᲂу҆крѣпи́сѧ.
Бл҃же́ни ми́лостивїи, ꙗ҆́кѡ ті́и поми́ловани бꙋ́дꙋтъ.
І҆аи́лино хра́брство позна́ла є҆сѝ дꙋшѐ моѧ̀, сїса́ра дре́вле пробо́дшꙋю, и҆ сп҃се́нїе содѣ́лавшꙋю, дре́вомъ ѻ҆́стрымъ, слы́шиши, и҆́мже тебѣ̀ крⷭ҇тъ ѡ҆бразꙋ́етсѧ.
Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Пожрѝ дꙋшѐ же́ртвꙋ похва́льнꙋю, дѣѧ́нїе ꙗ҆́кѡ дще́рь принесѝ, ѿ і҆ефѳа́евы чистѣ́йшꙋю: и҆ заколѝ ꙗ҆́кѡ же́ртвꙋ, стра̑сти плѡтскі́ѧ гдⷭ҇ви твоемꙋ̀.
Бл҃же́ни миротво́рцы, ꙗ҆́кѡ ті́и сн҃ове бж҃їи нарекꙋ́тсѧ.
Гедеѡ́ново рꙋно̀ помышлѧ́й дꙋшѐ моѧ̀, съ нб҃сѐ ро́сꙋ под̾имѝ, и҆ прини́кни ꙗ҆́коже пе́съ, и҆ пі́й во́дꙋ, ѿ зако́на текꙋ́щꙋю, и҆згнете́нїемъ пи́сменнымъ.
Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
И҆лі́и сщ҃е́нника ѡ҆сꙋжде́нїе дꙋшѐ моѧ̀ воспрїѧ́ла є҆сѝ, лише́нїемъ ᲂу҆ма̀ прїѡбрѣ́тши стра̑сти себѣ̀, ꙗ҆́коже ѻ҆́нъ ча̑да, дѣ́лати беззакѡ́ннаѧ.
Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Въ сꙋдїѧ́хъ леѵі́тъ, небреже́нїемъ свою̀ женꙋ̀, двана́десѧтимъ колѣ́нѡмъ раздѣлѝ, дꙋшѐ моѧ̀, да скве́рнꙋ ѡ҆бличи́тъ ѿ венїамі́на беззако́ннꙋю.
Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Любомꙋ́дреннаѧ а҆́нна молѧ́щисѧ, ᲂу҆стнѣ̀ ᲂу҆́бѡ двиза́ше ко хвале́нїю, гла́съ же є҆ѧ̀ не слы́шашесѧ: но ѻ҆ба́че непло́дна сꙋ́щи, сы́на моли́твы ражда́етъ досто́йна.
Помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.
Въ сꙋдїѧ́хъ спричте́сѧ а҆́ннино порожде́нїе, вели́кїй самꙋ́илъ, є҆го́же воспита́ла а҆рмаѳе́ма въ домꙋ̀ гдⷭ҇ни: томꙋ̀ поревнꙋ́й дꙋшѐ моѧ̀, и҆ сꙋдѝ пре́жде и҆нѣ́хъ дѣла̀ твоѧ̑.
Помѧнѝ на́съ влⷣко, є҆гда̀ прїи́деши во црⷭ҇твїи твое́мъ.
Дв҃дъ на ца́рство и҆збра́нъ, ца́рски пома́засѧ ро́гомъ бж҃е́ственнагѡ мѵ́ра: ты̀ ᲂу҆́бѡ дꙋшѐ моѧ̀, а҆́ще хо́щеши вы́шнѧгѡ црⷭ҇твїѧ, мѵ́ромъ пома́жисѧ слеза́ми.
Помѧнѝ на́съ ст҃ы́й, є҆гда̀ прїи́деши во црⷭ҇твїи твое́мъ.
Поми́лꙋй созда́нїе твоѐ ми́лостиве, ᲂу҆ще́дри рꙋкꙋ̀ твоє́ю творе́нїе: и҆ пощадѝ всѧ̑ согрѣши́вшыѧ, и҆ менѐ па́че всѣ́хъ, твои́хъ презрѣ́вшаго повелѣ́нїй.
Сла́ва, трⷪ҇ченъ: Безнача́льнꙋ, и҆ рожде́нїю же и҆ происхожде́нїю, ѻ҆ц҃ꙋ̀ покланѧ́юсѧ ро́ждшемꙋ, сн҃а сла́влю рожде́ннаго, пою̀ сопросїѧ́вшаго ѻ҆ц҃ꙋ́ же и҆ сн҃ꙋ, дх҃а ст҃а́го.
Бг҃оро́диченъ: Преесте́ственномꙋ ржⷭ҇твꙋ̀ твоемꙋ̀ покланѧ́емсѧ, по є҆стествꙋ̀ сла́вы младе́нца твоегѡ̀ не раздѣлѧ́юще бг҃ороди́тельнице: и҆́же бо є҆ди́нъ лице́мъ, сꙋгꙋ́быми и҆сповѣ́дꙋетсѧ є҆стествы̀.
Пѣ́снь з҃.
І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.
Согрѣши́хъ, беззако́нновахъ, и҆ ѿверго́хъ за́повѣдь твою̀, ꙗ҆́кѡ во грѣсѣ́хъ произведо́хсѧ и҆ приложи́хъ ꙗ҆́звамъ стрꙋ́пы себѣ̀: но са́мъ мѧ̀ поми́лꙋй, ꙗ҆́кѡ бл҃гоꙋтро́бенъ, ѻ҆тцє́въ бж҃е.
Та̑йнаѧ се́рдца моегѡ̀ и҆сповѣ́дахъ тебѣ̀ сꙋдїѝ моемꙋ̀, ви́ждь моѐ смире́нїе, ви́ждь и҆ ско́рбь мою̀, и҆ вонмѝ сꙋдꙋ̀ моемꙋ̀ ны́нѣ, и҆ са́мъ мѧ̀ поми́лꙋй, ꙗ҆́кѡ бл҃гоꙋтро́бенъ, ѻ҆тцє́въ бж҃е.
Саꙋ́лъ и҆ногда̀ ꙗ҆́кѡ погꙋбѝ ѻ҆тца̀ своегѡ̀ дꙋшѐ ѻ҆слѧ̑та, внеза́пꙋ црⷭ҇тво ѡ҆брѣ́те къ прослꙋ́тїю: но блюдѝ, не забыва́й себѐ, скѡ́тскїѧ по́хѡти твоѧ̑ произво́ливши па́че црⷭ҇тва хрⷭ҇то́ва.
Дв҃дъ и҆ногда̀ бг҃оѻте́цъ, а҆́ще и҆ согрѣшѝ сꙋгꙋ́бѡ дꙋшѐ моѧ̀, стрѣло́ю ᲂу҆́бѡ ᲂу҆стрѣле́нъ бы́въ прелюбодѣ́йства, копїе́мъ же плѣне́нъ бы́въ ᲂу҆бі́йства томле́нїемъ: но ты̀ сама̀ тѧжча́йшими дѣ́лы недꙋ́гꙋеши, самохо́тными стремле́ньми.
Совокꙋпѝ ᲂу҆́бѡ дв҃дъ и҆ногда̀ беззако́нїю беззако́нїе: ᲂу҆бі́йствꙋ же любодѣ́йство раствори́въ, покаѧ́нїе сꙋгꙋ́бое показа̀ а҆́бїе: но сама́ ты лꙋка̑внѣйшаѧ дꙋшѐ содѣ́лала є҆сѝ, не пока́ѧвшисѧ бг҃ꙋ.
Дв҃дъ и҆ногда̀ воѡбразѝ, списа́въ ꙗ҆́кѡ на і҆кѡ́нѣ пѣ́снь, є҆́юже дѣѧ́нїе ѡ҆блича́етъ, є҆́же содѣ́ѧ, зовы́й: поми́лꙋй мѧ̀. тебѣ́ бо є҆ди́номꙋ согрѣши́хъ всѣ́хъ бг҃ꙋ, са́мъ ѡ҆чи́сти мѧ̀.
Кївѡ́тъ ꙗ҆́кѡ ноша́шесѧ на колесни́цѣ, за́нъ ѻ҆́ный, є҆гда̀ превра́щшꙋсѧ тельцꙋ̀, то́чїю коснꙋ́сѧ, бж҃їимъ и҆скꙋси́сѧ гнѣ́вомъ: но тогѡ̀ дерзнове́нїѧ ᲂу҆бѣжа́вши дꙋшѐ, почита́й бж҃е́ствєннаѧ че́стнѣ.
Слы́шала є҆сѝ а҆вессалѡ́ма, ка́кѡ на є҆стество̀ воста̀; позна́ла є҆сѝ тогѡ̀ сквє́рнаѧ дѣѧ̑нїѧ, и҆́миже ѡ҆сквернѝ ло́же дв҃да ѻ҆тца̀: но ты̀ подража́ла є҆сѝ тогѡ̀ стра̑стнаѧ и҆ любосла̑стнаѧ стремлє́нїѧ.
Покори́ла є҆сѝ нерабо́тное твоѐ досто́инство тѣ́лꙋ твоемꙋ̀: и҆но́го бо а҆хїтофе́ла ѡ҆брѣ́тши врага̀, дꙋшѐ, снизшла̀ є҆сѝ сегѡ̀ совѣ́тѡмъ: но сїѧ̑ разсы́па са́мъ хрⷭ҇то́съ, да ты̀ всѧ́кѡ сп҃се́шисѧ.
Соломѡ́нъ чꙋ́дный, и҆ бл҃года́ти премꙋ́дрости и҆спо́лненный, се́й лꙋка́вое и҆ногда̀ пред̾ бг҃омъ сотвори́въ, ѿстꙋпѝ ѿ негѡ̀: є҆мꙋ́же ты̀ проклѧ́тымъ твои́мъ житїе́мъ, дꙋшѐ ᲂу҆подо́биласѧ є҆сѝ.
Сластьмѝ влеко́мь страсте́й свои́хъ ѡ҆сквернѧ́шесѧ, ᲂу҆вы̀ мнѣ̀, рачи́тель премꙋ́дрости, рачи́тель блꙋ́дныхъ же́нъ, и҆ стра́ненъ ѿ бг҃а: є҆го́же ты̀ подража́ла є҆сѝ ᲂу҆мо́мъ ѽ дꙋшѐ, сладостра́стьми скве́рными.
Ровоа́мꙋ поревнова́ла є҆сѝ не послꙋ́шавшемꙋ совѣ́та ѻ҆́ч҃а, кꙋ́пнѡ же и҆ ѕлѣ́йшемꙋ рабꙋ̀ і҆еровоа́мꙋ, пре́жнемꙋ ѿстꙋ́пникꙋ дꙋшѐ: но бѣ́гай подража́нїѧ, и҆ зовѝ бг҃ꙋ: согрѣши́хъ, ᲂу҆ще́дри мѧ̀.
А҆хаа́вѡвымъ поревнова́ла є҆сѝ скве́рнамъ, дꙋшѐ моѧ̀, ᲂу҆вы̀ мнѣ̀, была̀ є҆сѝ плотски́хъ скве́рнъ пребыва́лище, и҆ сосꙋ́дъ сра́мленъ страсте́й: но и҆з̾ глꙋбины̀ твоеѧ̀ воздохнѝ, и҆ глаго́ли бг҃ꙋ грѣхѝ твоѧ̑.
Попалѝ и҆лїа̀ и҆ногда̀ два́щи пѧтьдесѧ́тъ і҆езаве́линыхъ, є҆гда̀ стꙋ̑дныѧ проро́ки погꙋбѝ, во ѡ҆бличе́нїе а҆хаа́вово: но бѣ́гай подража́нїѧ двою̀ дꙋшѐ, и҆ ᲂу҆крѣплѧ́йсѧ.
Заключи́сѧ тебѣ̀ нб҃о дꙋшѐ, и҆ гла́дъ бж҃їй пости́же тѧ̀: є҆гда̀ и҆лїѝ ѳесві́тѧнина ꙗ҆́коже а҆хаа́въ, не покори́сѧ словесє́мъ и҆ногда̀: но сара́фѳїи ᲂу҆подо́бивсѧ, напита́й прⷪ҇ро́чꙋ дꙋ́шꙋ.
Манассі́ева собрала̀ є҆сѝ согрѣшє́нїѧ и҆зволе́нїемъ, поста́вльши ꙗ҆́кѡ ме́рзѡсти стра̑сти, и҆ ᲂу҆мно́живши дꙋшѐ негодова́нїе: но тогѡ̀ покаѧ́нїю ревнꙋ́ющи те́плѣ, стѧжѝ ᲂу҆миле́нїе.
Припа́даю тѝ, и҆ приношꙋ̀ тебѣ̀, ꙗ҆́коже сле́зы глаго́лы моѧ̑: согрѣши́хъ, ꙗ҆́кѡ не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри влⷣко, творе́нїе твоѐ, и҆ воззови́ мѧ.
Погребо́хъ ѡ҆́бразъ тво́й, и҆ растли́хъ за́повѣдь твою̀, всѧ̀ помрачи́сѧ добро́та, и҆ страстьмѝ ᲂу҆гаси́сѧ, сп҃се, свѣща̀: но ᲂу҆ще́дривъ возда́ждь мѝ ꙗ҆́коже пое́тъ дв҃дъ, ра́дованїе.
Ѡ҆брати́сѧ, пока́йсѧ, ѿкры́й сокровє́ннаѧ, глаго́ли бг҃ꙋ всѧ̑ вѣ́дꙋщемꙋ: ты̀ вѣ́си моѧ̑ та̑йнаѧ, є҆ди́не сп҃се: но са́мъ мѧ̀ поми́лꙋй, ꙗ҆́коже пое́тъ дв҃дъ по млⷭ҇ти твое́й.
И҆счезо́ша дні́е моѝ, ꙗ҆́кѡ со́нїе востаю́щагѡ: тѣ́мже ꙗ҆́кѡ є҆зекі́а слезю̀ на ло́жи мое́мъ, приложи́тисѧ мнѣ̀ лѣ́тѡмъ живота̀. но кі́й и҆са́їа предста́нетъ тебѣ̀ дꙋшѐ, а҆́ще не всѣ́хъ бг҃ъ;
Марі́и: Возопи́вши къ пречⷭ҇тѣй бг҃омт҃ри, пе́рвѣе ѿри́нꙋла є҆сѝ неи́стовство страсте́й, нꙋ́жно стꙋжа́ющихъ, и҆ посрами́ла є҆сѝ врага̀ запе́ншаго: но да́ждь ны́нѣ по́мощь ѿ ско́рби, и҆ мнѣ̀ рабꙋ̀ твоемꙋ̀.
Марі́и: Є҆го́же возлюби́ла є҆сѝ, є҆го́же возжелѣ́ла є҆сѝ, є҆гѡ́же ра́ди пло́ть и҆знꙋри́ла є҆сѝ прпⷣбнаѧ, молѝ ны́нѣ хрⷭ҇та̀ ѡ҆ рабѣ́хъ: ꙗ҆́кѡ да млⷭ҇тивъ бы́въ всѣ̑мъ на́мъ, ми́рное состоѧ́нїе да́рꙋетъ почита́ющымъ є҆го̀.
А҆ндре́ю: На ка́мени мѧ̀ вѣ́ры мл҃твами твои́ми ᲂу҆твердѝ ѻ҆́тче, стра́хомъ мѧ̀ бж҃е́ственнымъ ѡ҆гражда́ѧ, и҆ покаѧ́нїе а҆ндре́е, пода́ждь мѝ, молю́сѧ тѝ: и҆ и҆зба́ви мѧ̀ ѿ сѣ́ти врагѡ́въ и҆́щꙋщихъ мѧ̀.
Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, и҆ є҆стество̀ є҆ди́но, свѣ́тове, и҆ свѣ́тъ, и҆ ст҃а трѝ, и҆ є҆ди́но ст҃о пое́тсѧ бг҃ъ трⷪ҇ца: но воспо́й, просла́ви, живо́тъ и҆ животы̀, дꙋшѐ, всѣ́хъ бг҃а.
Бг҃оро́диченъ: Пое́мъ тѧ̀, бл҃гослови́мъ тѧ̀, покланѧ́емсѧ тѝ бг҃ороди́тельнице, ꙗ҆́кѡ нераздѣ́льныѧ трⷪ҇цы породила̀ є҆сѝ є҆ди́наго хрⷭ҇та̀ бг҃а и҆ сама̀ ѿве́рзла є҆сѝ на́мъ сꙋ́щымъ на землѝ нбⷭ҇наѧ.
Трипѣ́снецъ. Гла́съ и҃.
Пѣ́снь и҃.
І҆рмо́съ: Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы по́йте сщ҃е́нницы, лю́дїе превозноси́те во всѧ̑ вѣ́ки.
Ꙗ҆́кѡ ᲂу҆́глїе невеще́ственнагѡ ѻ҆гнѧ̀, попали́те веще́ствєнныѧ стра̑сти моѧ̑, возжиза́юще ны́нѣ во мнѣ̀ жела́нїе бж҃е́ственныѧ любвѐ, а҆пⷭ҇ли.
Трꙋбы̑ бл҃гогла̑сныѧ сло́ва почти́мъ, и҆́миже падо́ша стѣ́ны неꙋтвержде́ны вра̑жїѧ, и҆ бг҃оразꙋ́мїѧ ᲂу҆тверди́шасѧ забра̑ла.
Кꙋмі́ры стра́стныѧ дꙋшѝ моеѧ̀ сокрꙋши́те, и҆̀же хра́мы и҆ столпы̀ сокрꙋши́сте врага̀, а҆пⷭ҇ли гдⷭ҇ни, хра́мове ѡ҆сщ҃е́ннїи.
Бг҃оро́диченъ: Вмѣсти́ла є҆сѝ невмѣсти́маго є҆стество́мъ: носи́ла є҆сѝ носѧ́щаго всѧ̑: дои́ла є҆сѝ чⷭ҇таѧ, пита́ющаго тва́рь, хрⷭ҇та̀ жизнода́вца.
И҆́ный трипѣ́снецъ. І҆рмо́съ то́йже.
Дх҃а началохи́тростїемъ созда́вше всю̀ цр҃ковь а҆пⷭ҇ли хрⷭ҇тѡ́вы, въ не́й бл҃гослови́те хрⷭ҇та̀ во вѣ́ки.
Вострꙋби́вше трꙋбо́ю ᲂу҆че́нїй, низверго́ша а҆пⷭ҇ли всю̀ ле́сть і҆́дѡльскꙋю, хрⷭ҇та̀ превозносѧ́ще во всѧ̑ вѣ́ки.
А҆пⷭ҇ли, до́брое преселе́нїе, назира́телїе мі́ра, и҆ нбⷭ҇нїи жи́телїе, ва́съ при́снѡ восхвалѧ́ющыѧ, и҆зба́вите ѿ бѣ́дъ.
Трⷪ҇ченъ: Трисо́лнечное всесвѣ́тлое бг҃онача́лїе, є҆диносла́вное и҆ є҆динопрⷭ҇то́льное є҆стество̀, ѻ҆́ч҃е вседѣ́телю, сн҃е, и҆ бж҃е́ственный дш҃е, пою́ тѧ во вѣ́ки.
Бг҃оро́диченъ: Ꙗ҆́кѡ чⷭ҇тны́й и҆ превы́шшїй прⷭ҇то́лъ, воспои́мъ бж҃їю мт҃рь непреста́ннѡ, лю́дїе, є҆ди́нꙋ по ржⷭ҇твѣ̀ мт҃рь и҆ дв҃ꙋ.
И҆́ный. І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те, и҆ превозноси́те во всѧ̑ вѣ́ки.
Согрѣши́вша сп҃се поми́лꙋй, воздви́гни мо́й ᲂу҆́мъ ко ѡ҆браще́нїю, прїими́ мѧ ка́ющагосѧ, ᲂу҆ще́дри вопїю́ща: согрѣши́хъ тѝ, сп҃сѝ, беззако́нновахъ, поми́лꙋй мѧ̀.
Колесни́чникъ и҆лїа̀, колесни́цею добродѣ́телей вше́дъ, ꙗ҆́кѡ на нб҃са̀, ноша́шесѧ превы́ше и҆ногда̀ ѿ земны́хъ: сегѡ̀ ᲂу҆́бѡ дꙋшѐ моѧ̀, восхо́дъ помышлѧ́й.
І҆ѻрда́нова стрꙋѧ̀ пе́рвѣе, ми́лѡтїю и҆лїино́ю є҆лїссе́емъ, ста̀ сю́дꙋ и҆ сю́дꙋ: ты́ же, ѽ дꙋшѐ моѧ̀, сеѧ̀ не причасти́ласѧ є҆сѝ бл҃года́ти за невоздержа́нїе.
Є҆лїссе́й и҆ногда̀ прїе́мъ ми́лѡть и҆лїинꙋ̀, прїѧ́тъ сꙋгꙋ́бꙋю бл҃года́ть ѿ бг҃а: ты́ же ѽ дꙋшѐ моѧ̀, сеѧ̀ не причасти́ласѧ є҆сѝ бл҃года́ти за невоздержа́нїе.
Сѡмані́тїда и҆ногда̀ пра́веднаго ᲂу҆чредѝ, ѽ дꙋшѐ, нра́вомъ бл҃ги́мъ: ты́ же не ввела̀ є҆сѝ въ до́мъ, ни стра́нна, ни пꙋ́тника. тѣ́мже черто́га и҆зри́нешисѧ во́нъ, рыда́ющи.
Гїезі́евъ подража́ла є҆сѝ ѻ҆каѧ́ннаѧ ра́зꙋмъ скве́рный всегда̀ дꙋшѐ, є҆гѡ́же сребролю́бїе ѿложѝ понѐ на ста́рость: бѣ́гай гее́нскагѡ ѻ҆гнѧ̀, ѿстꙋпи́вши ѕлы́хъ твои́хъ.
Ты̀ ѻ҆зі́и дꙋшѐ поревнова́вши, сегѡ̀ прокаже́нїе въ себѣ̀ стѧжа́ла є҆сѝ сꙋгꙋ́бо: безмѣ̑стнаѧ бо мы́слиши, беззакѡ́ннаѧ же дѣ́еши: ѡ҆ста́ви ꙗ҆̀же и҆́маши, и҆ притецы̀ къ покаѧ́нїю.
Нїнеѵі́тѧны дꙋшѐ слы́шала є҆сѝ ка́ющыѧсѧ бг҃ꙋ, вре́тищемъ и҆ пе́пеломъ, си́хъ не подража́ла є҆сѝ: но ꙗ҆ви́ласѧ є҆сѝ ѕлѣ́йшаѧ всѣ́хъ, пре́жде зако́на, и҆ по зако́нѣ прегрѣши́вшихъ.
Въ ро́вѣ бла́та слы́шала є҆сѝ і҆еремі́ю дꙋшѐ, гра́да сїѡ́нѧ рыда́ньми вопїю́ща, и҆ сле́зъ и҆́щꙋща, подража́й сегѡ̀ плаче́вное житїѐ и҆ сп҃се́шисѧ.
І҆ѡ́на въ ѳарсі́съ побѣжѐ, проразꙋмѣ́въ ѡ҆браще́нїе нїнеѵі́тѧнѡвъ, разꙋмѣ́ бо ꙗ҆́кѡ прⷪ҇ро́къ бж҃їе бл҃гоꙋтро́бїе: тѣ́мже ревнова́ше прⷪ҇ро́чествꙋ не солга́тисѧ.
Данїи́ла въ ро́вѣ слы́шала є҆сѝ, ка́кѡ заградѝ ᲂу҆ста̀, ѽ дꙋшѐ ѕвѣре́й: ᲂу҆вѣ́дѣла є҆сѝ, ка́кѡ ѻ҆́троцы и҆̀же ѡ҆ а҆за́рїи, погаси́ша вѣ́рою пе́щи пла́мень горѧ́щїй.
Ве́тхагѡ завѣ́та всѧ̑ приведо́хъ тѝ дꙋшѐ, къ подо́бїю, подража́й пра́ведныхъ бг҃олюби̑ваѧ дѣѧ̑нїѧ, и҆збѣ́гни же па́ки лꙋка́выхъ грѣхѡ́въ.
Правосꙋ́де сп҃се поми́лꙋй, и҆ и҆зба́ви мѧ̀ ѻ҆гнѧ̀, и҆ преще́нїѧ, є҆́же и҆́мамъ на сꙋдѣ̀ пра́веднѡ претерпѣ́ти: ѡ҆сла́би мѝ пре́жде конца̀, добродѣ́телїю и҆ покаѧ́нїемъ.
Ꙗ҆́кѡ разбо́йникъ вопїю́ ти: помѧни́ мѧ. ꙗ҆́кѡ пе́тръ пла́чꙋ го́рцѣ: ѡ҆сла́би мѝ сп҃се. зовꙋ̀ ꙗ҆́кѡ мыта́рь: слезю̀ ꙗ҆́кѡ блꙋдни́ца. прїимѝ моѐ рыда́нїе, ꙗ҆́коже и҆ногда̀ ханане́ино.
Гное́нїе, сп҃се, и҆сцѣлѝ смире́нныѧ моеѧ̀ дꙋшѝ: є҆ди́не врачꙋ̀, пла́стырь мнѣ̀ наложѝ, и҆ є҆ле́й и҆ вїно̀, дѣла̀ покаѧ́нїѧ, ᲂу҆миле́нїе со слеза́ми.
Ханане́ю и҆ а҆́зъ подража́ѧ, поми́лꙋй мѧ̀, вопїю̀, сн҃е дв҃довъ: каса́юсѧ кра́ѧ ри́зы, ꙗ҆́кѡ кровоточи́ваѧ: пла́чꙋ, ꙗ҆́кѡ ма́рѳа и҆ марі́а над̾ ла́заремъ.
Сле́знꙋю сп҃се стклѧ́ницꙋ, ꙗ҆́кѡ мѵ́ро и҆стощава́ѧ на главꙋ̀, зовꙋ́ ти ꙗ҆́коже блꙋдни́ца, млⷭ҇ти и҆́щꙋщаѧ, мольбꙋ̀ приношꙋ̀, и҆ ѡ҆ставле́нїе прошꙋ̀ прїѧ́ти.
А҆́ще и҆ никто́же, ꙗ҆́коже а҆́зъ согрѣшѝ тебѣ̀, но ѻ҆ба́че прїимѝ и҆ менѐ, бл҃гоꙋтро́бне сп҃се, стра́хомъ ка́ющасѧ, и҆ любо́вїю зовꙋ́ща: согрѣши́хъ тебѣ̀ є҆ди́номꙋ: поми́лꙋй мѧ̀ млⷭ҇тиве.
Пощадѝ сп҃се твоѐ созда́нїе, и҆ взыщѝ ꙗ҆́кѡ па́стырь поги́бшее, предварѝ заблꙋ́ждшаго, восхи́ти ѿ во́лка, сотвори́ мѧ ѻ҆вча̀ на па́ствѣ твои́хъ ѻ҆ве́цъ.
Є҆гда̀ сꙋдїѐ сѧ́деши ꙗ҆́кѡ бл҃гоꙋтро́бенъ, и҆ пока́жеши стра́шнꙋю сла́вꙋ твою̀ сп҃се: ѽ каковы́й стра́хъ тогда̀! пе́щи горѧ́щей, всѣ̑мъ боѧ́щымсѧ нестерпи́магѡ сꙋди́ща твоегѡ̀.
Марі́и: Свѣ́та незаходи́магѡ мт҃и, тѧ̀ просвѣти́вши, ѿ ѡ҆мраче́нїѧ страсте́й разрѣшѝ. тѣ́мже вше́дши въ дх҃о́внꙋю бл҃года́ть, просвѣтѝ марі́е, тѧ̀ вѣ́рнѡ восхвалѧ́ющыѧ.
Марі́и: Чꙋ́до но́во ви́дѣвъ, ᲂу҆жаса́шесѧ бж҃е́ственный въ тебѣ̀ вои́стиннꙋ ма́ти зѡсі́ма: а҆́гг҃ла бо зрѧ́ше во пло́ти, и҆ ᲂу҆́жасомъ ве́сь и҆сполнѧ́шесѧ, хрⷭ҇та̀ поѧ̀ во вѣ́ки.
А҆ндре́ю: Ꙗ҆́кѡ дерзнове́нїе и҆мы́й ко гдⷭ҇ꙋ, а҆ндре́е кри́тскїй чⷭ҇тна́ѧ похвало̀, молю̀, моли́сѧ разрѣше́нїе ѿ ᲂу҆́зъ беззако́нїѧ ны́нѣ ѡ҆брѣстѝ мнѣ̀ моли́твами твои́ми, ꙗ҆́кѡ покаѧ́нїѧ ᲂу҆чи́тель, и҆ преподо́бныхъ сла́ва.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждай, трⷪ҇це є҆ди́нице поми́лꙋй мѧ̀.
Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы пречⷭ҇таѧ, ᲂу҆́мнаѧ багрѧни́ца є҆мманꙋ́илева, внꙋ́трь во чре́вѣ твое́мъ пло́ть и҆стка́сѧ: тѣ́мже бцⷣꙋ вои́стиннꙋ тѧ̀ почита́емъ.
Хва́лимъ, бл҃гослови́мъ, покланѧ́емсѧ гдⷭ҇ни, пою́ще и҆ превозносѧ́ще во всѧ̑ вѣ́ки.
И҆ па́ки і҆рмо́съ. Трипѣ́снецъ. Гла́съ и҃.
Пѣ́снь ѳ҃.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
И҆сто́чницы спаси́тельныѧ воды̀ ꙗ҆́вльшесѧ а҆пⷭ҇ли, и҆ста́ѧвшꙋю дꙋ́шꙋ мою̀ грѣхо́вною жа́ждою, ѡ҆роси́те.
Пла́вающаго въ пꙋчи́нѣ поги́бели, и҆ въ погрꙋже́нїи ᲂу҆жѐ бы́вша, твое́ю десни́цею, ꙗ҆́коже петра̀, гдⷭ҇и сп҃си́ мѧ.
Ꙗ҆́кѡ со́ли, вкꙋ́сныхъ сꙋ́ще ᲂу҆че́нїй, гни́льство ᲂу҆ма̀ моегѡ̀ и҆зсꙋши́те, и҆ невѣ́дѣнїѧ тьмꙋ̀ ѿжени́те.
Бг҃оро́диченъ: Ра́дость ꙗ҆́кѡ роди́вшаѧ, пла́чь мнѣ̀ пода́ждь, и҆́мже бж҃е́ственное ᲂу҆тѣше́нїе влⷣчце, въ бꙋ́дꙋщемъ днѝ ѡ҆брѣстѝ возмогꙋ̀.
И҆́ный. І҆рмо́съ: Тѧ̀ нб҃сѐ и҆ землѝ хода́таицꙋ:
Тѧ̀ бл҃госла́вное а҆пⷭ҇льское собра́нїе, пѣ́сньми велича́емъ: вселе́ннѣй бо свѣти̑ла свѣ̑тлаѧ ꙗ҆ви́стесѧ, пре́лесть ѿгонѧ́ще.
Бл҃говѣ́стною мре́жею ва́шею, словє́сныѧ ры̑бы ᲂу҆лови́вше, сїѧ̑ приноси́те всегда̀ снѣ́дь хрⷭ҇тꙋ̀, а҆пⷭ҇ли бл҃же́ннїи.
Къ бг҃ꙋ ва́шимъ проше́нїемъ помѧни́те на́съ а҆пⷭ҇ли, ѿ всѧ́кагѡ и҆зба́витисѧ и҆скꙋше́нїѧ, мо́лимсѧ, любо́вїю воспѣва́ющыѧ ва́съ.
Трⷪ҇ченъ: Тѧ̀ трїѷпоста́снꙋю є҆ди́ницꙋ, ѻ҆́ч҃е, сн҃е, со дх҃омъ, є҆ди́наго бг҃а є҆диносꙋ́щна пою̀, трⷪ҇цꙋ є҆диноси́льнꙋю и҆ безнача́льнꙋю.
Бг҃оро́диченъ: Тѧ̀ дѣтороди́тельницꙋ и҆ дв҃ꙋ, всѝ ро́ди ᲂу҆бл҃жа́емъ, ꙗ҆́кѡ тобо́ю и҆зба́вльшесѧ ѿ клѧ́твы: ра́дость бо на́мъ родила̀ є҆сѝ гдⷭ҇а.
Вели́кагѡ канѡ́на і҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ, бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь правосла́внѡ велича́емъ.
Оу҆́мъ ѡ҆стрꙋпи́сѧ, тѣ́ло ѡ҆болѣ́знисѧ, недꙋ́гꙋетъ дꙋ́хъ, сло́во и҆знемо́же, житїѐ ᲂу҆мертви́сѧ, коне́цъ при две́рехъ. тѣ́мже моѧ̀ ѻ҆каѧ́ннаѧ дꙋшѐ, что̀ сотвори́ши, є҆гда̀ прїи́детъ сꙋдїѧ̀ и҆спыта́ти твоѧ̑;
Мѡѷсе́ово приведо́хъ тѝ дꙋшѐ, мїробы́тїе, и҆ ѿ тогѡ̀ всѐ завѣ́тное писа́нїе, повѣ́дающее тебѣ̀ пра́вєдныѧ и҆ непра́вєдныѧ: ѿ ни́хже вторы̑ѧ, ѽ дꙋшѐ, подража́ла є҆сѝ, а҆ не пє́рвыѧ, въ бг҃а согрѣши́вши.
Зако́нъ и҆знемо́же, пра́зднꙋетъ є҆ѵⷢ҇лїе, писа́нїе же всѐ въ тебѣ̀ небреже́но бы́сть, прⷪ҇ро́цы и҆знемого́ша, и҆ всѐ пра́ведное сло́во: стрꙋ́пи твоѝ, ѽ дꙋшѐ, ᲂу҆мно́жишасѧ, не сꙋ́щꙋ врачꙋ̀ и҆сцѣлѧ́ющемꙋ тѧ̀.
Но́вагѡ привождꙋ́ ти писа́нїѧ ᲂу҆каза̑нїѧ, вводѧ̑щаѧ тѧ̀ дꙋшѐ, ко ᲂу҆миле́нїю: пра́вєднымъ ᲂу҆́бѡ поревнꙋ́й, грѣ́шныхъ же ѿвраща́йсѧ,и҆ ᲂу҆млⷭ҇тиви хрⷭ҇та̀ мл҃твами же и҆ поще́ньми, и҆ чистото́ю, и҆ говѣ́нїемъ.
Хрⷭ҇то́съ вочл҃вѣ́чисѧ, призва́въ къ покаѧ́нїю разбо́йники, и҆ блꙋдни̑цы: дꙋшѐ пока́йсѧ, две́рь ѿве́рзесѧ црⷭ҇твїѧ ᲂу҆жѐ, и҆ предвосхища́ютъ є҆̀ фарїсе́є и҆ мытарѝ и҆ прелюбодѣ́и ка́ющїисѧ.
Хрⷭ҇то́съ вочл҃вѣ́чисѧ, пло́ти прїѡбщи́всѧ мѝ, и҆ всѧ̑, є҆ли̑ка сꙋ́ть є҆стества̀ хотѣ́нїемъ и҆спо́лни грѣха̀ кромѣ̀, подо́бїе тебѣ̀, ѽ дꙋшѐ, и҆ ѡ҆́бразъ предпоказꙋ́ѧ своегѡ̀ снизхо́жденїѧ.
Хрⷭ҇то́съ волхвы̀ сп҃сѐ, па́стыри созва̀, младе́нєцъ мно́жєства показа̀ мꙋ́ченики, ста́рцы просла́ви, и҆ ста̑рыѧ вдови̑цы, и҆́хже не поревнова́ла є҆сѝ дꙋшѐ, ни дѣѧ́нїємъ, ни житїю̀: но го́ре тебѣ̀, внегда̀ бꙋ́деши сꙋди́тисѧ.
Пости́всѧ гдⷭ҇ь дні́й четы́редесѧть въ пꙋсты́ни, послѣдѝ взалка̀, показꙋ́ѧ чл҃вѣ́ческое: дꙋшѐ, да не разлѣни́шисѧ, а҆́ще тебѣ̀ приложи́тсѧ вра́гъ, мл҃твою же и҆ посто́мъ ѿ но́гъ твои́хъ да ѿрази́тсѧ.
Хрⷭ҇то́съ и҆скꙋша́шесѧ, дїа́волъ и҆скꙋша́ше, показꙋ́ѧ ка́менїе, да хлѣ́би бꙋ́дꙋтъ: на го́рꙋ возведѐ ви́дѣти всѧ̑ ца̑рствїѧ мі́ра во мгнове́нїи. ᲂу҆бо́йсѧ ѽ дꙋшѐ, ловле́нїѧ, трезви́сѧ моли́сѧ на всѧ́кїй ча́съ бг҃ꙋ.
Го́рлица пꙋстынолю́бнаѧ, гла́съ вопїю́щагѡ возгласѝ, хрⷭ҇то́въ свѣти́льникъ, проповѣ́дꙋѧй покаѧ́нїе, и҆́рѡдъ беззако́ннова со и҆рѡдїа́дою. зрѝ дꙋшѐ моѧ̀, да не ᲂу҆вѧ́знеши въ беззакѡ́нныѧ сѣ̑ти, но ѡ҆блобыза́й покаѧ́нїе.
Въ пꙋсты́ню всели́сѧ бл҃года́ти прⷣте́ча, и҆ і҆ꙋде́а всѧ̀ и҆ самарі́а слы́шавше теча́хꙋ, и҆ и҆сповѣ́дахꙋ грѣхѝ своѧ̑, креща́ющесѧ ᲂу҆се́рднѡ: и҆́хже ты̀ не подража́ла є҆сѝ дꙋшѐ.
Бра́къ ᲂу҆́бѡ честны́й, и҆ ло́же нескве́рно: ѻ҆боѧ̑ бо хрⷭ҇то́съ пре́жде бл҃гословѝ, пло́тїю ꙗ҆ды́й, и҆ въ ка́нѣ же на бра́цѣ во́дꙋ въ вїно̀ соверша́ѧ, и҆ показꙋ́ѧ пе́рвое чꙋ́до: да ты̀ и҆змени́шисѧ ѽ дꙋшѐ.
Разсла́бленнаго стѧгнꙋ̀ хрⷭ҇то́съ, ѻ҆́дръ взе́мша, и҆ ю҆́ношꙋ ᲂу҆ме́рша воздви́же, вдови́че рожде́нїе, и҆ со́тнича ѻ҆́трока, и҆ самарѧны́нѣ ꙗ҆ви́сѧ, въ дс҃ѣ слꙋ́жбꙋ тебѣ̀, дꙋшѐ предживописа̀.
Кровоточи́вꙋю и҆сцѣлѝ прикоснове́нїемъ кра́ѧ ри́зна гдⷭ҇ь: прокажє́нныѧ ѡ҆чи́сти: слѣпы̑ѧ и҆ хрѡмы́ѧ просвѣти́въ, и҆спра́ви: глꙋхі̑ѧ же и҆ нѣмы̑ѧ, и҆ нича́щыѧ ни́зꙋ и҆сцѣлѝ сло́вомъ: да ты̀ сп҃се́шисѧ ѻ҆каѧ́ннаѧ дꙋшѐ.
Недꙋ́ги и҆сцѣлѧ́ѧ, ни́щымъ бл҃говѣствова́ше, хрⷭ҇то́съ сло́во, врє́дныѧ ᲂу҆врачева̀, съ мытарѝ ꙗ҆дѧ́ше, со грѣ́шники бесѣ́доваше, і҆аі́ровы дще́ре дꙋ́шꙋ пред̾ꙋме́ршꙋю возвратѝ ѡ҆сѧза́нїемъ рꙋкѝ.
Мыта́рь сп҃са́шесѧ, и҆ блꙋдни́ца цѣломꙋ́дрствоваше, и҆ фарїсе́й хвалѧ́сѧ ѡ҆сꙋжда́шесѧ: ѻ҆́въ ᲂу҆́бѡ, ѡ҆чи́сти мѧ̀: ѻ҆́ва же, поми́лꙋй мѧ̀. се́й же велича́шесѧ вопїѧ̀: бж҃е, бл҃годарю́ тѧ: и҆ про́чыѧ безꙋ̑мныѧ глаго́лы.
Закхе́й мыта́рь бѣ̀, но ѻ҆ба́че сп҃са́шесѧ, и҆ фарїсе́й сі́мѡнъ соблажнѧ́шесѧ, и҆ блꙋдни́ца прїима́ше ѡ҆ста́витєльнаѧ разрѣшє́нїѧ, ѿ и҆мꙋ́щагѡ крѣ́пость ѡ҆ставлѧ́ти грѣхѝ: ю҆́же дꙋшѐ потщи́сѧ подража́ти.
Блꙋдни́цѣ, ѽ ѻ҆каѧ́ннаѧ дꙋшѐ моѧ̀, не поревнова́ла є҆сѝ, ꙗ҆́же прїи́мши мѵ́ра а҆лава́стръ, со слеза́ми ма́заше но́зѣ сп҃совѣ, ѡ҆тре́ же власы̀ дре́внихъ согрѣше́нїй рꙋкописа́нїе раздира́ющагѡ є҆ѧ̀.
Гра́ды, и҆̀мже дадѐ хрⷭ҇то́съ бл҃говѣ́стїе, дꙋшѐ моѧ̀, ᲂу҆вѣ́дала є҆сѝ, ка́кѡ про́клѧти бы́ша. ᲂу҆бо́йсѧ ᲂу҆каза́нїѧ, да не бꙋ́деши ꙗ҆́коже ѻ҆́ны, и҆́хже содо́млѧнѡмъ влⷣко ᲂу҆подо́бивъ, да́же до а҆́да ѡ҆сꙋдѝ.
Да не го́ршаѧ ѽ дꙋшѐ моѧ̀, ꙗ҆ви́шисѧ ѿча́ѧнїемъ ханане́и вѣ́рꙋ слы́шавшаѧ, є҆ѧ́же дщѝ сло́вомъ бж҃їимъ и҆сцѣли́сѧ: сн҃е дв҃довъ, сп҃сѝ и҆ менѐ, воззовѝ и҆з̾ глꙋбины̀ се́рдца, ꙗ҆́коже ѻ҆на̀ хрⷭ҇тꙋ̀.
Оу҆млⷭ҇рдисѧ сп҃си́ мѧ, сн҃е дв҃довъ поми́лꙋй, бѣснꙋ́ющыѧсѧ сло́вомъ и҆сцѣли́вый, гла́съ же бл҃гоꙋтро́бный ꙗ҆́кѡ разбо́йникꙋ мнѣ̀ рцы̀: а҆ми́нь глаго́лю тебѣ̀, со мно́ю бꙋ́деши въ раѝ, є҆гда̀ прїидꙋ̀ во сла́вѣ мое́й.
Разбо́йникъ ѡ҆глаго́ловаше тѧ̀, разбо́йникъ бг҃осло́вѧше тѧ̀, ѻ҆́ба бо на крⷭ҇тѣ̀ сви́сѧста: но ѽ бл҃гоꙋтро́бне, ꙗ҆́кѡ вѣ́рномꙋ разбо́йникꙋ твоемꙋ̀, позна́вшемꙋ тѧ̀ бг҃а, и҆ мнѣ̀ ѿве́рзи две́рь сла́внагѡ црⷭ҇твїѧ твоегѡ̀.
Тва́рь содрога́шесѧ распина́ема тѧ̀ ви́дѧщи, го́ры и҆ ка́мєнїѧ стра́хомъ распада́хꙋсѧ, и҆ землѧ̀ сотрѧса́шесѧ, и҆ а҆́дъ ѡ҆бнажа́шесѧ, и҆ соѡмрача́шесѧ свѣ́тъ во днѝ, зрѧ̀ тебѐ і҆и҃се пригвожде́на ко крестꙋ̀.
Досто́йныхъ покаѧ́нїѧ плодѡ́въ не и҆стѧжѝ ѿ менѐ: и҆́бо крѣ́пость моѧ̀ во мнѣ̀ ѡ҆скꙋдѣ̀, се́рдце мнѣ̀ да́рꙋй при́снѡ сокрꙋше́нное, нищетꙋ́ же дх҃о́внꙋю, да сїѧ̑ тебѣ̀ принесꙋ̀, ꙗ҆́кѡ прїѧ́тнꙋю же́ртвꙋ, є҆ди́не сп҃се.
Сꙋдїѐ мо́й, и҆ вѣ́дче мо́й, хотѧ́й па́ки прїитѝ со а҆́гг҃лы, сꙋди́ти мі́рꙋ всемꙋ̀, млⷭ҇тивнымъ твои́мъ ѻ҆́комъ тогда̀ ви́дѣвъ мѧ̀, пощадѝ и҆ ᲂу҆ще́дри мѧ̀ і҆и҃се, па́че всѧ́кагѡ є҆стества̀ человѣ́ча согрѣши́вша.
Марі́и: Оу҆диви́ла є҆сѝ всѣ́хъ стра́ннымъ житїе́мъ твои́мъ, а҆́гг҃лѡвъ чи́ны, и҆ человѣ́кѡвъ собо́ры, невеще́ственнѡ пожи́вши, и҆ є҆стество̀ преше́дши: и҆́мже, ꙗ҆́кѡ невеще́ственныма нога́ма вше́дши марі́е, і҆ѻрда́нъ прешла̀ є҆сѝ.
Марі́и: Оу҆ми́лостиви созда́телѧ ѡ҆ хва́лѧщихъ тѧ̀, прпⷣбнаѧ ма́ти, и҆зба́витисѧ ѡ҆ѕлобле́нїй и҆ скорбе́й ѻ҆́крестъ напа́дающихъ: да и҆зба́вившесѧ ѿ напа́стей, возвели́чимъ непреста́ннѡ просла́вльшаго тѧ̀ гдⷭ҇а.
А҆ндре́ю: А҆ндре́е честны́й, и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби, и҆ тлѣ́нїѧ, и҆ прегрѣше́нїй безмѣ́рныхъ, чтꙋ́щїи твою̀ па́мѧть вѣ́рнѡ.
Трⷪ҇ченъ: Трⷪ҇це є҆диносꙋ́щнаѧ, є҆динице трїѷпоста́снаѧ, тѧ воспѣва́емъ, ѻ҆ц҃а̀ сла́вѧще, сн҃а велича́юще, и҆ дх҃ꙋ покланѧ́ющесѧ, є҆ди́номꙋ є҆стествꙋ̀ вои́стиннꙋ бг҃ꙋ, жи́зни же, и҆ живꙋ́щемꙋ црⷭ҇твꙋ безконе́чномꙋ.
Бг҃оро́диченъ: Гра́дъ тво́й сохранѧ́й бг҃ороди́тельнице пречⷭ҇таѧ, въ тебѣ́ бо се́й вѣ́рнѡ ца́рствꙋѧй, въ тебѣ̀ и҆ ᲂу҆твержда́етсѧ, и҆ тобо́ю побѣжда́ѧй, побѣжда́етъ всѧ́кое и҆скꙋше́нїе, и҆ плѣнѧ́етъ ра́тники, и҆ прохо́дитъ послꙋша́нїе.
И҆ а҆́бїе і҆рмо́съ. Свѣти́ленъ, ꙗ҆́кѡ ѻ҆бы́чно.
На стїхо́внѣ самогла́сенъ, два́жды. Гла́съ и҃:
Въ разбо́йничєскїѧ пꙋти̑ впа́дши дꙋшѐ моѧ̀, лю́тѣ ᲂу҆ѧ́звлена є҆сѝ ѿ свои́хъ согрѣше́нїй, преда́вшисѧ неразꙋ̑мнымъ врагѡ́мъ. но ꙗ҆́кѡ и҆мꙋ́щаѧ вре́мѧ, во ᲂу҆миле́нїи возопі́й: ᲂу҆пова́нїе ненаде́жныхъ, животѐ ѿча́ѧвшихсѧ, сп҃се, возста́ви и҆ сп҃си́ мѧ.
Мч҃нченъ: Во бронѧ̀ вѣ́ры ѡ҆бо́лкшесѧ до́брѣ, и҆ ѡ҆́бразомъ кре́стнымъ воѡрꙋжи́вше себѐ, во́ини бл҃гомо́щнїи показа́стесѧ, мꙋчи́телємъ мꙋ́жески проти́вистесѧ, и҆ дїа́волю пре́лесть потреби́сте, побѣди́телє бы́вше, вѣнцє́въ сподо́бистесѧ: моли́тесѧ хрⷭ҇тꙋ̀ ѡ҆ на́съ, во є҆́же сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Прїимѝ гла́сы ра̑бъ твои́хъ, всечⷭ҇таѧ бцⷣе дв҃о, и҆ молѝ непреста́ннѡ, грѣхѡ́въ разрѣше́нїе, и҆ ми́ръ дарова́ти на́мъ.
Совокꙋплѧ́емъ же и҆ а҃-й ча́съ, без̾ стїхосло́вїѧ. По трист҃о́мъ, на всѣ́хъ часѣ́хъ конда́къ: Дꙋшѐ моѧ̀, дꙋшѐ моѧ̀:
На г҃-мъ часѣ̀ каѳі́сма ѳ҃-ѧ, на ѕ҃-мъ і҃-ѧ.
На ѕ҃- мъ же часѣ̀, тропа́рь прⷪ҇ро́чества, гла́съ ѕ҃: Бл҃гоꙋтро́бне, долготерпѣли́ве вседержи́телю гдⷭ҇и, низпослѝ млⷭ҇ть твою̀ на лю́ди твоѧ̑.
Прокі́менъ, ѱало́мъ ч҃ѕ, гла́съ ѕ҃: Гдⷭ҇ь воцр҃и́сѧ, да ра́дꙋетсѧ землѧ̀. Сті́хъ: Да веселѧ́тсѧ ѻ҆́строви мно́зи.
Прⷪ҇ро́чества и҆са́їина чте́нїе. [Глава̀ м҃в, ст. є҃- ѕ҃і.]
Та́кѡ глаго́летъ гдⷭ҇ь бг҃ъ, сотвори́вый нб҃о, и҆ водрꙋзи́вый є҆̀, ᲂу҆твержде́й зе́млю, и҆ ꙗ҆̀же на не́й, и҆ даѧ́й дыха́нїе лю́демъ, и҆̀же на не́й, и҆ дх҃ъ ходѧ́щымъ на не́й. А҆́зъ гдⷭ҇ь бг҃ъ, призва́хъ тѧ̀ въ пра́вдѣ, и҆ ᲂу҆держꙋ̀ за рꙋ́кꙋ твою̀, и҆ ᲂу҆крѣплю̀ тѧ̀: и҆ да́хъ тѧ̀ въ завѣ́тъ ро́да і҆и҃лева, во свѣ́тъ ꙗ҆зы́кѡвъ, Ѿве́рсти ѻ҆́чи слѣпы́хъ, и҆звестѝ ѿ ᲂу҆́зъ свѧ̑занныѧ, и҆ и҆з̾ до́мꙋ темни́цы, и҆ сѣдѧ́щыѧ во тьмѣ̀. А҆́зъ гдⷭ҇ь бг҃ъ, сїѐ моѐ є҆́сть и҆́мѧ: сла́вы моеѧ̀ и҆но́мꙋ не да́мъ, нижѐ добродѣ́телей мои́хъ и҆стꙋка̑ннымъ. Ꙗ҆̀же и҆з̾ нача́ла, сѐ прїидо́ша: и҆ нѡ́ваѧ, ꙗ҆̀же а҆́зъ возвѣщꙋ̀, и҆ пре́жде не́же возвѣсти́ти, ꙗ҆ви́шасѧ ва́мъ. Воспо́йте гдⷭ҇ви пѣ́снь но́вꙋ: нача́льство є҆гѡ̀, просла́вите и҆́мѧ є҆гѡ̀ ѿ конє́цъ землѝ: сходѧ́щїи въ мо́ре, и҆ пла́вающїи по немꙋ̀, ѻ҆́строви и҆ живꙋ́щїи на ни́хъ. Возвесели́сѧ пꙋсты́не, и҆ вє́си є҆ѧ̀, придвѡ́рїѧ, и҆ живꙋ́щїи въ кида́рѣ: возвеселѧ́тсѧ живꙋ́щїи на ка́мени, ѿ кра́ѧ го́ръ возопїю́тъ. Дадѧ́тъ бг҃ꙋ сла́вꙋ, добродѣ́тєли є҆гѡ̀ во ѻ҆́стровѣхъ возвѣстѧ́тъ. Гдⷭ҇ь бг҃ъ си́лъ и҆зы́детъ, и҆ сокрꙋши́тъ ра́ть, воздви́гнетъ рве́нїе, и҆ возопїе́тъ на врагѝ своѧ̑ съ крѣ́постїю. Молча́хъ, є҆да̀ и҆ всегда̀ ᲂу҆молчꙋ̀, и҆ потерплю̀; терпѣ́хъ ꙗ҆́кѡ ражда́ющаѧ, и҆стреблю̀ и҆ и҆зсꙋшꙋ̀ вкꙋ́пѣ: Ѡ҆пꙋстошꙋ̀ го́ры и҆ хо́лми, и҆ всѧ́кꙋ травꙋ̀ и҆́хъ и҆зсꙋшꙋ̀, и҆ положꙋ̀ рѣ́ки во ѻ҆́стровы, и҆ лꙋ́ги и҆зсꙋшꙋ̀. И҆ наведꙋ̀ слѣпы̑ѧ на пꙋ́ть, є҆гѡ́же не ви́дѣша, и҆ по стезѧ́мъ, и҆́хже не зна́ша, ходи́ти сотворю̀ и҆̀мъ: сотворю̀ и҆̀мъ тьмꙋ̀ во свѣ́тъ, и҆ стро́пѡтнаѧ въ пра̑ваѧ. сїѧ̑ глаго́лы сотворю̀, и҆ не ѡ҆ста́влю и҆́хъ.
Прокі́менъ, ѱало́мъ ч҃з, гла́съ ѕ҃: Воспо́йте гдⷭ҇ви пѣ́снь но́вꙋ ꙗ҆́кѡ ди́вна сотворѝ гдⷭ҇ь, сп҃сѐ є҆го̀ десни́ца є҆гѡ̀. Сті́хъ: Ви́дѣша всѝ концы̀ землѝ сп҃се́нїе бг҃а на́шегѡ.
На ѳ҃-мъ часѣ̀, каѳі́сма а҃і.