Въ сꙋббѡ́тꙋ пе́рвꙋю ст҃ы́хъ постѡ́въ,

на ᲂу҆́трени по шестоѱа́лмїи, пое́мъ Бг҃ъ гдⷭ҇ь, на гла́съ в҃, и҆ глаго́лемъ тропа́рь ст҃а́гѡ ѳео́дѡра, два́жды: Вє́лїѧ вѣ́ры: Сла́ва, и҆ ны́нѣ, бг҃оро́диченъ є҆ди́ножды: Всѧ̑ па́че смы́сла: И҆ ѻ҆бы́чное стїхосло́вїе. По а҃-мъ же стїхосло́вїи пое́мъ сѣда́льны мч҃ничны, ѻ҆смогла́сника, слꙋчи́вшагѡсѧ гла́са, съ бг҃оро́дичнымъ. По в҃-мъ же стїхосло́вїи пое́мъ настоѧ́щыѧ сѣда́льны ст҃а́гѡ ѳео́дѡра.

Гла́съ г҃.

Подо́бенъ: Бж҃їѧ вѣ́ры:

Кипѧ̀ вѣ́ры правосла́вїемъ, пре́лесть ᲂу҆гаси́лъ є҆сѝ ѕлосла́вїѧ, ᲂу҆праздни́въ і҆́дѡльское безбо́жїе: и҆ всесожже́нїе бж҃е́ственное бы́въ, чꙋдодѣ́йствїи ѡ҆роша́еши концы̀ мч҃ниче пресла́вне, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

Дрꙋгі́й сѣда́ленъ ст҃а́гѡ, подо́бенъ:

Бж҃е́ственный да́ръ, тѧ̀ ко сп҃се́нїю все́й дадѐ вселе́ннѣй, въ страда́льчествахъ ᲂу҆крѣпи́вый тѧ̀ гдⷭ҇ь, дꙋшє́вныѧ на́шѧ болѣ̑зни и҆сцѣлѧ́ѧ, и҆ тѣлє́сныѧ стра̑сти побѣжда́ѧ, мч҃нче ѳео́дѡре, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

Бг҃оро́диченъ, подо́бенъ: Невмѣсти́маго бг҃а, во ᲂу҆тро́бѣ твое́й дв҃о пречⷭ҇таѧ носи́вшаѧ, пре́жде вѣ̑къ ѿ ѻ҆ц҃а̀ нетлѣ́ннѡ возсїѧ́вшаго, сло́ва ѵ҆поста́снагѡ, и҆ сн҃а є҆диносꙋ́щнаго, сего̀ молѝ съ прⷪ҇ро́ки и҆ мч҃нки, прпⷣбными, по́стники и҆ првⷣными, дарова́ти на́мъ разрѣше́нїе прегрѣше́нїй.

Та́же чте́мъ мꙋче́нїе ст҃а́гѡ. Та́же ѱало́мъ н҃. И҆ канѡ́нъ ст҃а́гѡ ѻ҆би́тели со і҆рмосы̀ на ѕ҃. И҆ ст҃а́гѡ ѳео́дѡра на и҃: Стїхосло́вимъ же и҆ Гдⷭ҇ви пое́мъ.

Канѡ́нъ, є҆гѡ́же краестро́чїе: Тѵ́рѡнъ пресла́вный, сла́ва пе́рвѣй сꙋббѡ́тѣ. Въ пе́рвыхъ же тропарѣ́хъ канѡ́на, и҆́ное краегране́сїе. Канѡ́нъ, творе́нїе і҆ѡа́нна, митрополі́та є҆ѵхаі́тскагѡ, гла́съ д҃.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑:

Всѣ́хъ превы́шшїй, тѧ̀ неизрече́ннѡ роди́вшꙋю, всѣ́хъ предположѝ вы́шшꙋю свои́хъ и҆збра́нныхъ. тѣ́мже дне́сь сего̀ вѣне́чника пою́ще всепѣ́таѧ, тебѣ̀ предначина́емъ.

Вели́каго въ мч҃нцѣхъ, страда́льца пресвѣ́тлаго, и҆мени́таго, и҆ пресла́внаго въ чꙋдесѣ́хъ, ѿ конє́цъ землѝ и҆ до конє́цъ знамени́таго, пѣ́сньми воспою̀ ѳео́дѡра.

Де́нь весе́лый въ ско́рбехъ возсїѧ̀, и҆ сѣ́тованїе си́хъ ᲂу҆ѧснѝ, предпра́зднствєннаѧ предпꙋ̑тїѧ и҆здале́ча, просїѧ́вша бл҃года́тїю бж҃е́ственнагѡ мч҃нка.

Кропи́тъ ѡ҆чищє́нїѧ цр҃ковь, кровьмѝ ст҃о́е заколе́нїе, є҆́же прїѧ́тъ пожре́нный и҆ въ же́ртвꙋ прїѧ́тый, страда́льчествовавшаго бж҃е́ственныѧ ра́ди сла́вы є҆гѡ̀.

Бг҃оро́диченъ: Красно̀ а҆́ще и҆ незрѣ́ло, є҆́же пра́здновати ᲂу҆зако́нисѧ: ᲂу҆краси́вшаѧ бо всѧ̑ влⷣчца, и҆ ны́нѣ показа̀ сеѧ̀ па́мѧти прїѡбща́ющыѧсѧ предбѣ́дствꙋющемꙋ кро́вїю.

И҆́ный канѡ́нъ, тогѡ́же є҆ѵхаі́тскагѡ, гла́съ ѕ҃.

Пѣ́снь а҃.

І҆рмо́съ: Ꙗ҆́кѡ по сꙋ́хꙋ:

Чꙋ́дный во ст҃ы́хъ вои́стиннꙋ бж҃е, во мнѣ̀ ᲂу҆дивѝ млⷭ҇ти твоѧ̑ хрⷭ҇тѐ, сло́во мѝ да́рꙋѧ, ꙗ҆́кѡ да чꙋ̑днаѧ восхвалю̀ твоегѡ̀ мч҃нка.

Тве́рдое въ страда́льчествѣ, и҆ терпѣли́вое въ болѣ́знехъ показа́лъ є҆сѝ стрⷭ҇тоте́рпче хрⷭ҇то́въ: ско́рое же па́ки на на́съ по́мощи ꙗ҆влѧ́ѧ твоеѧ̀, ѳео́дѡре.

Сла́ва: Бл҃гочести́вꙋю ѻ҆тє́цъ вѣ́рꙋ, ѿ дꙋшѝ є҆гѡ̀ мꙋчи́тель ѿрѣва́ѧ ѕлѣ̀, нечести́вый совѣ́тъ бг҃ꙋ прирази́въ, восхотѣ̀ при́снѡ и҆тѝ.

Бг҃оро́диченъ: Бг҃орѣ́чивыхъ проречє́нїѧ дре́вле мꙋже́й, на тебѣ̀ и҆спо́лнишасѧ мт҃и дв҃о ꙗ҆́вѣ, ꙗ҆́кѡ бг҃а ро́ждшаѧ и҆́стиннаго, и҆ чл҃вѣ́ка и҆́стиннаго, па́че є҆стества̀ и҆ ᲂу҆жа́снѡ.

Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Пѣ́снь г҃.

І҆рмо́съ: Твоѧ̑ пѣсносло́вцы:

Ви́дѣти де́нь сн҃а твоегѡ̀, жела́юще хрⷭ҇тоимени́тїи лю́дїе, во ѡ҆́бразъ сегѡ̀ влⷣчце, томꙋ̀ ны́нѣ предпра́зднствꙋютъ, тебѐ носѧ́ще показа́нїе, и҆ сла́внаго стрⷭ҇тоте́рпца твоего̀.

Побѣжда́ютъ всѧ́кими ѡ҆́бразы лꙋ̑чшаѧ: вели́кїй бо во страда́льцѣхъ въ весе́лїе и҆змѣнѝ вре́меннꙋю ско́рбь, ст҃а́гѡ ѕѣ́льное поста̀ ѡ҆брати́въ во ѡ҆слабле́нїе.

Сво́йственный и҆ подо́бный тебѣ̀ да́ръ, и҆́бо ѿ свои́хъ страда́льче: и҆̀хже бо са́мъ всели́лъ є҆сѝ въ се́й ча́стицѣ твое́й, ѡ҆бра́дованнѡ да́ры тебѣ̀ похва́лъ прино́симъ.

Добрѣ́йшее ѡ҆снова́нїе положи́лъ є҆сѝ, твои́ми и҆зрѧ́дствы и҆зрѧ́дне, ѕвѣ́рѧ всегꙋби́тельна, ѻ҆гне́мъ и҆ ᲂу҆бі́йствомъ ды́шꙋща, низложи́въ ꙗ҆́кѡ бездѣ́льна преесте́ственною до́блестїю.

Неи́стовствовавъ но́вый ѿстꙋ́пникъ, по ра́вномꙋ лю́тѣ дре́внемꙋ, жє́ртвы бра́шномъ ꙗ҆́коже ꙗ҆́домъ смѣсѝ: но ло́жный ѻ҆каѧ́нникъ премꙋдри́сѧ мч҃нкомъ.

Бг҃оро́диченъ: И҆спо́лнисѧ ᲂу҆́бѡ всѧ̑ дв҃о, зна́ти гдⷭ҇а землѧ̀, и҆з̾ тебѐ мі́рꙋ ꙗ҆́вльшасѧ: но бж҃є́ственнымъ мч҃нкѡмъ бл҃года́ть мно́гаѧ, ᲂу҆тверди́вшымъ самѣ́ми собо́ю и҆́стинꙋ.

И҆́ный. І҆рмо́съ: Нѣ́сть ст҃ъ:

Пе́рвѣе въ є҆́ѵины ᲂу҆́ши пошепта́вый ле́стнѡ, и҆ а҆да́ма то́юже прельсти́вый ле́стнѡ, то́й и҆ ны́нѣ ꙗ҆́дъ ѕло́бы къ ле́сти и҆злїѧ̀.

Лестца̀ и҆мѧ́ше на него̀, пита́ше неи́стовство проти́вꙋ правоживꙋ́щымъ, вре́мѧ взыска́ше пра́вое, во́ньже ме́рзость сотвори́ти поꙋча́шесѧ пребеззако́ннѣйшїй.

Сла́ва: Дне́й нача́токъ ст҃ы́хъ наста̀ постѡ́въ: въ ни́хже всѧ́кїй хрⷭ҇тїа́нинъ самаго̀ себѐ воздержа́нїемъ мно́гимъ ѡ҆чи́стивъ, всѣ́хъ ѡ҆ша́ѧсѧ.

Бг҃оро́диченъ: Наде́ждо мі́рꙋ держа́внаѧ, покро́ве и҆ предста́тельство всест҃а́ѧ дв҃о, не пре́зри бл҃га́ѧ молє́нїѧ рабѡ́въ, ѿ любвѐ тѧ̀ при́снѡ ᲂу҆бл҃жа́ющихъ.

Катава́сїа: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.

Сѣда́ленъ, гла́съ и҃:

Подо́бенъ: Премꙋ́дрости сло́во:

Бж҃е́ственное всеѻрꙋ́жїе воспрїи́мъ, и҆ і҆́дѡлѡвъ ле́сть низложи́въ, а҆́гг҃лы воздви́глъ є҆сѝ восхвалѧ́ти по́двиги твоѧ̑: бж҃е́ственнымъ бо жела́нїемъ ᲂу҆́мъ распали́въ, сме́рть во ѻ҆гнѝ до́блественнѡ презрѣ́лъ є҆сѝ. тѣ́мже и҆меноно́снѡ просѧ́щымъ тѧ̀ да́рꙋй бж҃е́ствєнныѧ дары̀, и҆сцѣле́нїй подаѧ̑нїѧ стрⷭ҇тоте́рпче ѳео́дѡре: моли́сѧ хрⷭ҇тꙋ̀ бг҃ꙋ, согрѣше́нїй ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть твою̀.

Сла́ва, подо́бенъ:

Маѯїмїа́новыми ласка́ньми не ᲂу҆клони́всѧ, хрⷭ҇то́выми же словесы̀ мꙋ́жествовавъ, і҆́дѡльское ка́пище во ѻ҆гнѝ и҆спепели́лъ є҆сѝ, страда́льчески побѣди́въ до́брѣ сопроти́вника, прⷪ҇ро́чески преше́лъ є҆сѝ ѻ҆́гнь, ꙗ҆́коже въ водѣ̀. тѣ́мже досто́йнѡ воздаѧ́нїе подвигѡ́въ, и҆сточа́еши и҆сцѣлє́нїѧ, страстоте́рпче ѳео́дѡре: моли́сѧ хрⷭ҇тꙋ̀ бг҃ꙋ, прегрѣше́нїй ѡ҆ставле́нїю дарова́тисѧ, пра́зднꙋющымъ любо́вїю ст҃ꙋ́ю па́мѧть твою̀.

И҆ ны́нѣ, бг҃оро́диченъ, Подо́бенъ:

Ꙗ҆́кѡ всенепоро́чнаѧ невѣ́ста творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, ꙗ҆́кѡ прїѧ́телище сꙋ́щи вы́шнѧгѡ всепѣ́таѧ, беззако́нїѧ мѧ̀ сꙋ́ща скве́рное жили́ще, и҆ въ ра́зꙋмѣ бы́вша бѣсѡ́въ и҆гра́лище: потщи́сѧ и҆ си́хъ ѕлодѣ́йствїѧ мѧ̀ и҆зба́вити, свѣ́тлое жили́ще добродѣ́телїю стѧжа́вшаѧ, свѣтопрїе́мнице нетлѣ́ннаѧ: разженѝ ѻ҆́блакъ страсте́й, и҆ го́рнїѧ свѣ́тлости сподо́би, и҆ свѣ́та невече́рнѧгѡ мл҃твами твои́ми.

Пѣ́снь д҃.

І҆рмо́съ: сѣдѧ́й въ сла́вѣ:

Ѽ но́вагѡ и҆ пресла́внагѡ смѣше́нїѧ же и҆ растворе́нїѧ! двⷭ҇твꙋ ржⷭ҇тво̀ соединѝ роди́выйсѧ бг҃очеловѣ́къ: сѣ́тѡваннымъ же днє́мъ весе́лїе, своего̀ почита́ѧ страда́льца вмѣсѝ.

Ви́ждь, ка́кѡ хрⷭ҇та̀ любѧ́ше, хрⷭ҇то́ви во́инствꙋѧй, враги́ бо сегѡ̀ ре́вностїю и҆ ѻ҆гне́мъ погꙋбѝ, и҆ себѐ коне́чнѣ до́брꙋю и҆ прїѧ́тнꙋю є҆мꙋ̀ же́ртвꙋ ᲂу҆се́рднѡ ѿдадѐ.

Побѣдоно́сный ѿ страда́льчествъ до́блїй разрѣшѝ, дерзнове́ннѡ глаго́лѧ, и҆ презрѣ́нїемъ мꙋче́нїй зри́тели ᲂу҆диви́въ, и҆ бы́въ все́й тва́ри но́вое и҆ пресла́вное позо́рище.

Ко́сть ᲂу҆́бѡ не сокрꙋши́сѧ бг҃а и҆ влⷣки моегѡ̀, ѽ долготерпѣ́нїѧ, и҆ по ᲂу҆мерщвле́нїи стра́ждꙋща! во́ина же є҆гѡ̀ ѻ҆́гнь прїе́мъ, и҆ ко́ло ᲂу҆стыдѣ́сѧ, ᲂу҆ме́ршꙋ прикоснꙋ́тисѧ.

Бг҃оро́диченъ: Соꙋме́ршїи влⷣцѣ, живота̀ слꙋжи́тели, и҆ совоста́вшїи живꙋ́тъ ᲂу҆ негѡ̀ ны́нѣ вѣ́чнѡ: и҆ сн҃ꙋ мт҃рь спрославлѧ́ютъ бл҃гословѧ́ще ѻ҆ц҃а̀, сн҃а и҆ дх҃а ст҃а́го.

И҆́ный. І҆рмо́съ: Хрⷭ҇то́съ моѧ̀ си́ла:

Совѣ́тъ совѣщава́етъ нечести́вѣйшїй, зри́те, ꙗ҆́кѡ вои́стиннꙋ є҆́сть стра́шно: разꙋмѣ́ бо ѻ҆каѧ́нный ме́рзкими бра́шны, лю́ди хрⷭ҇тѡ́вы ѡ҆скверни́ти.

Въ дѣ́ло приведѐ совѣ́тъ беззако́нный: возбрани́ти бо повелѣ́въ чи́стыхъ ꙗ҆де́нїй бра́шно, и҆ предложи́ти, ꙗ҆̀же ѻ҆́нъ ѡ҆сквернѝ кровьмѝ.

Сла́ва: Бы́сть ꙗ҆́вственно и҆ ѡ҆глаше́нно беззако́нїе всѣ̑мъ хрⷭ҇тїа́нѡмъ: тѣ́мже ꙗ҆́коже ᲂу҆вѣ́дѣша, стеко́шасѧ всѝ кꙋ́пнѡ въ хра́мъ гдⷭ҇нь ст҃ы́й.

Бг҃оро́диченъ: Тѧ̀ ро́ждшꙋю предвѣ́чнаго ѿ ѻ҆ц҃а̀ рожде́ннаго, ны́нѣ вѣ́рнїи мл҃твенницꙋ предлага́емъ: тоѧ̀ мл҃твами хрⷭ҇тѐ преклоне́нъ, бл҃гоꙋвѣ́тливъ бꙋ́ди рабѡ́мъ твои̑мъ.

Катава́сїа: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃се зовꙋ́щыѧ: сла́ва хрⷭ҇тѐ си́лѣ твое́й.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ:

Ѿверза́ютсѧ дне́сь преддвє́рїѧ бл҃года́ти, и҆ ᲂу҆покое́нїе ны́нѣ са́мое проѡбража́етъ воскрⷭ҇нїе: си́це свѣтоно́снѣ свѣ́тлꙋю влⷣчцꙋ почита́юще, и҆ сла́внаго мч҃нка.

Да́рꙋетъ тезоимени́тый да́ръ, бг҃ъ, ѳео́дѡра, возлюби́вшымъ ꙗ҆́вльшаго возлю́бленнагѡ ꙗ҆вле́нїе, пресла́вныхъ дѣ́лъ творца̀, и҆ бж҃е́ственныхъ си́лъ самодѣ́телѧ содѣва́емагѡ.

Ничто́же къ мч҃нкꙋ лꙋ́цы и҆ стрѣ́лы твоѧ̑ вра́же человѣ́ческагѡ сп҃се́нїѧ: и҆ ᲂу҆ме́рый бо живе́тъ, и҆ возбнꙋ̀, и҆ ѕлодѣ́йствѡмъ твои́мъ противлѧ́ѧйсѧ, сп҃са́етъ всѧ́каго правосла́внаго.

Бг҃оро́диченъ: Стра́нное бѧ́ше пре́жде чꙋ́до бг҃оѻтрокови́це, страда́льческими же свидѣ́тельствы прїѧ́тъ вѣ́рꙋ несꙋмнѣ́ннꙋ, и҆ вѣ́рꙋемое при́снѡ пребыва́етъ чꙋди́мое, и҆ вѣ́рнѣ покланѧ́емое.

И҆́ный. І҆рмо́съ: Бж҃їимъ свѣ́томъ твои́мъ:

Тогда́шнїй ᲂу҆́бѡ а҆рхїере́й ве́сь ᲂу҆жаснꙋ́всѧ, нечести́вагѡ ꙗ҆́коже ᲂу҆вѣ́дѣ совѣ́тъ, пѣ́сньми всено́щными бг҃а молѧ́ше, не презрѣ́ти въ коне́цъ люде́й жре́бїѧ є҆гѡ̀.

Но ско́рый вои́стиннꙋ помо́щникъ, во и҆́стинѣ и҆ теплотѣ̀ призыва́ющихъ, моле́нїѧ и҆́хъ не презрѣ̀ всѧ́кагѡ: но скорѣ́йшее и҆́мъ содѣ́ловаетъ разрѣше́нїе начина́нїѧ.

Сла́ва: Ѿ вы́шнихъ помо́щникъ посыла́етсѧ ꙗ҆́кѡ скорѣ́е на зе́млю, страстоте́рпецъ ѳео́дѡръ, и҆ пастыренача́льникъ ꙗ҆влѧ́етсѧ, разрѣше́нїе наꙋча́ѧ беззако́ннагѡ совѣ́та.

Бг҃оро́диченъ: Никто́же притека́ѧ къ твоемꙋ̀ влⷣчце, застꙋпле́нїю те́плѣ, посрами́тсѧ когда̀, но про́ситъ бл҃года́ти, и҆ да́ръ прїе́млетъ къ поле́зномꙋ скорѣ́йшїй проше́нїѧ.

Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ.

Пѣ́снь ѕ҃.

І҆рмо́съ: Бж҃е́ственное сїѐ и҆ всечестно́е:

Пости́тисѧ, сп҃се, не мо́гꙋтъ дрꙋ́зи и҆ сы́нове черто́га твоегѡ̀: тебе́ бо жениха̀ съ ма́терїю и҆ съ дрꙋ́гомъ твои́мъ, ᲂу҆чрежда́ютъ предстоѧ́ща и҆ слꙋ́жатъ.

Ѿстꙋпѝ бг҃а сп҃са́ющагѡ, ѿстꙋпѝ и҆ ѿ ра́зꙋма ѕлоимени́тый, и҆ киче́нїемъ воста̀ на вѣ́рꙋ: но вмѣ́стѡ сегѡ̀ ѡ҆брѣ́те великоимени́таго.

Пострада́въ предста̀ мꙋ́дршїй, и҆ сотво́рь до́блїй те́пльшїй, къ мꙋчи́телємъ бо бра́нїю, и҆ побѣ́дою до́брѣ ѡ҆бꙋчи́всѧ, нижѐ ᲂу҆́меръ ѿстꙋпѝ и҆справле́нїѧ.

Бг҃оро́диченъ: И҆зба́вльшесѧ дне́сь, влⷣчце, бѣды̀ дꙋшетлѣ́нныѧ, чꙋдесе́мъ страстоте́рпца твоегѡ̀, по твоемꙋ̀ бж҃е́ственномꙋ промышле́нїю, бл҃года́ть ѻ҆бои́мъ возлага́емъ.

И҆́ный. І҆рмо́съ: Жите́йское мо́ре:

Стра́нномꙋ ᲂу҆жаса́ѧсѧ видѣ́нїѧ твоегѡ̀, а҆рхїере́й проти́вѡ речѐ: ты̀ кто̀ є҆сѝ гдⷭ҇и, глаго́лѧй мнѣ̀; вразꙋмѝ и҆ наꙋчѝ, ка́кѡ ѡ҆брѧ́щемъ скорѣ́йшꙋю по́мощь;

Ѳео́дѡръ речѐ: а҆́зъ є҆́смь ꙗ҆́вственнѡ страстоте́рпецъ, и҆ слы́ши: пшени́цꙋ свари́въ раздѣлѝ лю́демъ, и҆ та́кѡ сп҃сꙋ́тсѧ ѿ скве́рныхъ бра́шенъ преле́стника.

Сла́ва: Ко́ль ве́лїе чꙋ́до твоѐ, и҆ пресла́вное твоѐ застꙋпле́нїе ѳео́дѡре! тѣ́мже дерза́юще всѝ чи́стѡ къ тебѣ̀ прибѣга́емъ, и҆ мо́лимсѧ, сп҃сѝ рабы̑ твоѧ̑.

Бг҃оро́диченъ: Свѣ́та жили́ще, и҆ прїѧ́телище чи́стое сло́ва была̀ є҆сѝ, ѻ҆ц҃а̀ бл҃говоле́нїемъ, и҆ къ тебѣ̀ посѣще́нїемъ дх҃а ст҃а́гѡ: тѣ́мже мѧ̀ просвѣтѝ.

Катава́сїа: Бж҃е́ственное сїѐ и҆ всечестно́е, соверша́юще пра́зднество, бг҃омꙋ́дрїи бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Конда́къ, гла́съ и҃: Вѣ́рꙋ хрⷭ҇то́вꙋ ꙗ҆́кѡ щи́тъ внꙋ́трь прїе́мъ въ се́рдцѣ твое́мъ, проти̑вныѧ си̑лы попра́лъ є҆сѝ многострада́льче: и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ ѳео́дѡре, ꙗ҆́кѡ непобѣди́мый.

І҆́косъ: На прⷭ҇то́лѣ свѣ́та носи́маго, бл҃года́рственнѡ вѣ́рою воспѣва́емъ тѧ̀, ꙗ҆́кѡ дарова́нїе бж҃е́ственное дарова́лъ є҆сѝ, до́блѧго страда́ньми ѳео́дѡра, въ житїѝ требл҃же́ннаго, ꙗ҆́кѡ побо́рника сꙋ́ща и҆́стины: и҆́же бл҃гочести́вымъ помышле́нїемъ стѧжа́въ хрⷭ҇та̀, держа́вный, бы́сть побѣди́тель на ле́стнаго, ꙗ҆́кѡ непобѣди́мый.

Сѷнаѯа́рїй. Стїхѝ:

Пи́щею ко́лѷвъ пита́етъ тѵ́рѡнъ гра́дъ:

Пи́щꙋ ѡ҆скверне́нꙋю ᲂу҆чини́въ непотре́бнꙋ.

Въ сі́й де́нь въ сꙋббѡ́тꙋ пе́рвꙋю постѡ́въ, є҆́же ко́лѷвами пресла́вное чꙋ́до ст҃а́гѡ и҆ сла́внагѡ великомч҃нка ѳео́дѡра тѵ́рѡна пра́зднꙋемъ, є҆́же и҆мѣ̀ нача́ло бы́ти си́це: і҆ꙋлїа́нꙋ престꙋ́пникꙋ, по кѡнста́нтїи вели́кагѡ кѡнстанті́на сы́нѣ ски́птры ца́рствїѧ ᲂу҆держа́вшꙋ, и҆ ѿ хрⷭ҇та̀ во і҆дѡлослꙋже́нїе прело́жшꙋсѧ, гоне́нїе на хрⷭ҇тїа́ны воздвиза́етсѧ преве́лїе, ꙗ҆́вѣ же вкꙋ́пѣ и҆ не ꙗ҆вле́ннѣ. Ѿре́клъ ᲂу҆́бѡ ѕлочести́вый, є҆́же мꙋ́чити сꙋ́ровѣ, вкꙋ́пѣ же и҆ ѡ҆б̾ѧвле́ннѡ безчеловѣ́чнѣ, та́кѡ и҆скꙋша́ти хрⷭ҇тїа́ны: стыдѧ́сѧ же и҆ ѡ҆бзира́ѧ, да не прилага́ютсѧ мно́жайшїи, сокрове́ннѣ нѣ́какѡ ѡ҆скверни́ти сїѧ̑ льсти́вый и҆ скве́рный ᲂу҆мы́сли: ѿѻнꙋ́дꙋже и҆ соблю́дъ, ꙗ҆́коже на́шъ ꙗ҆зы́къ хрⷭ҇то́въ, пе́рвꙋю ст҃ы́хъ постѡ́въ седми́цꙋ наипа́че ѡ҆чища́етсѧ, и҆ внима́етъ бг҃ꙋ: є҆па́рха гра́да призва́въ, повелѣ̀ продає́мыѧ ѻ҆бы́чнѣ снѣ̑ди ѿ среды̀ ѿнестѝ, дрꙋгі̑ѧ же снѣ̑ди предложи́ти то́ржищꙋ, си́рѣчь хлѣ́бы и҆ питїѧ̑, ѿ же́ртвъ є҆гѡ̀ кровьмѝ сїѧ̑ пре́жде смѣси́вша, и҆ въ смѣше́нїи ѡ҆скверни́вша: ꙗ҆́кѡ да ᲂу҆́бѡ ѿ поста̀ сїѧ̑ кꙋпꙋ́ющїи па́че въ чистотѣ̀ ѡ҆скверни́лисѧ бы́ша. А҆́бїе ᲂу҆́бѡ є҆па́рхъ на дѣ́ло ведѐ повелѣ́ное, и҆ предлага́етъ ꙗ҆́же ѿ же́ртвъ и҆ крове́й ѡ҆сквернє́ннаѧ бра̑шна и҆ питїѧ̑ во все́мъ то́ржищи. Но всеви́дѧщее бж҃їе ѻ҆́ко, запина́ющее премꙋ́дрыѧ въ кова́рствѣ и҆́хъ, и҆ ѡ҆ на́съ рабѣ́хъ свои́хъ при́снѡ промышлѧ́ющее, и҆ гнꙋ̑снаѧ престꙋ́пника на на́съ кова̑рства разрꙋшѝ. Гра́дскомꙋ бо а҆рхїере́ю є҆ѵдоѯі́ю, а҆́ще и҆ непра́вомꙋ и҆ неправосла́вномꙋ быва́ющꙋ, посыла́етъ вели́каго своего̀ страстоте́рпца ѳео́дѡра, ѿ тѵ́рѡнскагѡ чи́на, тѵ́рѡна и҆менꙋ́ема. И҆ ᲂу҆́бѡ ꙗ҆́вѣ, а҆ не во снѣ̀ томꙋ̀ предста́въ, си́це нѣ́какѡ речѐ: є҆ли́кѡ ско́рѡ воста́въ хрⷭ҇то́во соберѝ ста́до, и҆ повелѣва́й тве́рдѣ, никомꙋ́же ничто́же на то́ржищѣ предложе́нныхъ кꙋпи́ти: же́ртвъ бо кровьмѝ сїѧ̑ ѡ҆скверни́шасѧ ѿ нечести́вагѡ царѧ̀. Семꙋ́ же недоꙋмѣва́ющꙋсѧ, и҆ вопроша́ющꙋ, и҆ ка́кѡ бы ᲂу҆до́бно бы́ло сїѐ, недоста́токъ въ домꙋ̀ и҆мꙋ́щымъ, не ѿ предложе́нныхъ въ то́ржищѣ кꙋпи́ти; ст҃ы́й, ко́лѷва да́въ, глаго́летъ и҆̀мъ, недоста́токъ ᲂу҆тѣ́ши. Семꙋ́ же недоꙋмѣва́ющꙋ, и҆ неразꙋмѣва́ющꙋ, и҆ что̀ была́ бы сїѧ̀ ко́лѷва, вопроша́ющꙋ, вели́кїй ѳео́дѡръ глаго́летъ: варе́нꙋю пшени́цꙋ: си́це бо мы̀ во є҆ѵхаи́тѣхъ глаго́лати ѡ҆быко́хомъ. И҆спыта́ѧ же патрїа́рхъ: кто̀ ᲂу҆́бѡ є҆́сть се́й ѡ҆ хрⷭ҇тоимени́тыхъ лю́дехъ промышлѧ́ѧй; Ст҃ы́й же па́ки, хрⷭ҇то́въ мч҃нкъ ѳео́дѡръ, речѐ: ѿ негѡ̀ помо́щникъ ва́мъ ны́нѣ по́сланъ є҆́смь. Воста́въ ᲂу҆́бѡ а҆́бїе патрїа́рхъ, и҆ мно́жествꙋ возвѣсти́въ ви̑дѣнаѧ, и҆ та́кѡ содѣ́ѧвъ, хрⷭ҇то́во ста́до соблюдѐ невреди́мо ѿ врага̀ и҆ престꙋ́пника кова́рства. Ѻ҆́нъ же своѐ лови́тельство ᲂу҆зрѣ́въ ѡ҆бличе́но бы́вшо, и҆ ничто́же соверши́вшо, и҆ дово́льнѣ постыди́всѧ, предложи́тисѧ и҆ па́ки ѻ҆бы̑чнымъ на то́ржищѣ прода̑жнымъ повелѣ̀. хрⷭ҇тѡ́вы ᲂу҆́бѡ лю́дїе, седми́цѣ ᲂу҆жѐ соверши́вшейсѧ бл҃годаре́нїе ѿдаю́ще бл҃годѣ́телю и҆ мч҃нкꙋ, въ сїю̀ сꙋббѡ́тꙋ ко́лѷвами є҆мꙋ̀ па́мѧть ра́дꙋющесѧ сотвори́ша. Ѿто́лѣ ᲂу҆́бѡ вѣ́рнїи да́же и҆ до ны́нѣ чꙋ́до ѡ҆бновлѧ́юще, да не забве́но толи́кое дѣ́ло мч҃нка вре́менемъ бꙋ́детъ, вели́каго ѳео́дѡра ко́лѷвами почита́емъ. Сего́ же вели́каго ѕлочести́вый врі́нга при маѯїмїа́нѣ ᲂу҆мꙋ́чи, и҆знꙋре́на пре́жде: та́же хра́мъ боги́ни ѻ҆́ныхъ сже́гша, и҆ ᲂу҆бѡ́гимъ красотꙋ̀ є҆ѧ̀ раздѣли́вша. Нѣ́кимъ же и҆ въ словеса̀ є҆мꙋ̀ прише́дшымъ, и҆ преложи́тисѧ хотѧ́щымъ є҆мꙋ̀, и҆ совѣ́тъ творѧ́щымъ не претерпѣ̀. Мно́гѡ ᲂу҆́бѡ пострада́въ, послѣдѝ пе́щи вели́цѣй разже́нѣ бы́вши, въ ню̀ вмета́етсѧ, ничто́же ѿ неѧ̀ пострада́въ, посредѣ̀ є҆ѧ̀ дꙋ́хъ бг҃ꙋ предадѐ. Тогѡ̀ мл҃твами хрⷭ҇тѐ бж҃е поми́лꙋй и҆ сп҃сѝ на́съ, а҆ми́нь.

Пѣ́снь з҃:

І҆рмо́съ: Не послꙋжи́ша тва́ри:

Зако́нꙋ ре́клъ є҆сѝ не лежа́ти првⷣникѡмъ твои̑мъ, првⷣный влⷣко: тѣ́мже мт҃и твоѧ̀, и҆ многочꙋ́дный се́й ра́бъ тво́й, свѣ́тлостїю па́мѧти си́хъ дне́сь зако́ны разорѧ́ютъ поще́нїѧ.

Ко́ль сла́дкое, и҆ вели́кое, и҆ ра́достное ны́нѣшнее торжество̀! є҆́же мч҃нкѡвъ на́мъ до́блѣйшїй и҆ преве́лїй ны́нѣ воѡбразѝ, є҆ди́нѣмъ чꙋдесе́мъ ѿ нечи́стыхъ чи̑стыѧ лю́ди хрⷭ҇тѡ́вы соверши́въ.

Къ ѕмїє́мъ лю̑тымъ сопроти́вльшагосѧ, и҆ возмо́гшаго на дꙋшетлѣ́ннаго же и҆ ѡ҆сквернѧ́ющаго ѡ҆дꙋшевлє́ннаѧ тѣлеса̀, вѣнча́имъ побѣ́дными пѣ́сньми, и҆ вѣнцє́въ похвала́ми.

Бг҃оро́диченъ: Родонача́льникъ ᲂу҆́бѡ проꙋвѣ́дѣвъ дꙋшетлѣ́нное бра́шно не ᲂу҆бѣжѐ: твои́ же вѣ́рнїи лю́дїе ѿ твоегѡ̀ мч҃нка преднаꙋчи́вшесѧ, и҆ и҆збѣ́гше всепа́гꙋбныѧ пи́щи, съ си́мъ влⷣчце, сп҃си́тєльнаѧ тебѣ̀ жрꙋ́тъ.

И҆́ный. І҆рмо́съ: Росода́тельнꙋ ᲂу҆́бѡ пе́щь:

Росода́вецъ печа́ли, и҆ распале́нїѧ ѻ҆́блакъ ꙗ҆ви́лсѧ є҆сѝ пресла́вне, и҆ сп҃слъ є҆сѝ ѿ пе́щи мꙋчи́тельскїѧ, зовꙋ́щыѧ всѧ̑ вѣ̑рныѧ: бл҃гослове́нъ є҆сѝ бж҃е ѻ҆тє́цъ на́шихъ.

Царю̀ пребеззако́ннѣйшїй посрами́сѧ, и҆ да заградѧ́тсѧ ᲂу҆ста̀ твоѧ̑, поꙋча́ющаѧсѧ на на́съ беззако́нномꙋ совѣ́тꙋ: разрꙋши́ бо твою̀ крѣ́пость црⷭ҇твꙋѧй цр҃ь и҆ всѣ́хъ гдⷭ҇ь.

Сла́ва: І҆ꙋлїа́не безꙋ́мне, се́рдце твоѐ всѐ ѕло́бы и҆спо́лнисѧ, ѡ҆бава́етсѧ же ѿ премꙋ́драгѡ бг҃а на́шегѡ, и҆злїѧ́вшеесѧ ле́стнѡ на на́съ, вопїю́щихъ къ немꙋ̀: бл҃года́ть подава́еши на́мъ.

Бг҃оро́диченъ: Па́че сло́ва твоѐ бы́сть зача́тїе, и҆ па́че ᲂу҆ма̀ ржⷭ҇тво̀ твоѐ всенепоро́чнаѧ: бг҃а бо родила̀ є҆сѝ пло́тїю, сп҃сшаго всѧ̑ ѿ тлѣ́нїѧ, бл҃гослове́ннаѧ. тѣ́мже ны́нѣ бцⷣе тѧ̀ сла́вимъ.

Катава́сїа: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Пѣ́снь и҃.

І҆рмо́съ: И҆зба́вителю всѣ́хъ:

Ра́дости ржⷭ҇тво́мъ и҆спо́лнившаѧ нбⷭ҇наѧ и҆ земна̑ѧ, вре́меннымъ сѣ́тованїемъ бл҃года́ть бл҃говре́меннꙋю подае́тъ вѣне́чникꙋ, спле́щꙋщи свѣ́тлѡ пра́зднствєннаѧ.

Сꙋббѡ́тствꙋимъ человѣ́цы дне́сь, ѿ трꙋдѡ́въ вчера́шнихъ почи́вше, за бл҃гослови́вшаго настоѧ́щїй де́нь ᲂу҆покое́нїемъ, и҆ ны́нѣ торжество́мъ мч҃нка.

Вои́стиннꙋ сїѧ̀ пе́рваѧ въ сꙋббѡ́тахъ, и҆ сꙋббѡ́тъ бы глаго́лаласѧ сꙋббѡ́та: мч҃нческїѧ же бл҃года́ти и҆ си́лы бж҃е́ственныѧ и҆спо́лнена, сп҃се́нїѧ вели́кагѡ воспомина́нїе.

Цр҃ѧ̀ бг҃а чи́стыми бра́шны, ца́рствїѧ беззако́ннагѡ скверне́нїѧ, чи́стый ᲂу҆празднѝ, и҆ пресла́внымъ ѡ҆́бразомъ чꙋдодѣ́йства ст҃ꙋ́ю седми́цꙋ ѡ҆ст҃ѝ.

Бг҃оро́диченъ: И҆звѣща́етъ твоѐ ѻ҆трокови́це та́инство, мч҃нкѡвъ ᲂу҆се́рднаѧ сме́рть: ꙗ҆́кѡ бо бг҃ꙋ вѣ́ровавше ро́ждшемꙋсѧ, а҆́ще и҆ стрⷭ҇ть во́лею претерпѣ̀, самѣ́хъ себѐ до́блїи пожро́ша.

И҆́ный. І҆рмо́съ: И҆з̾ пла́мене прпⷣбнымъ:

И҆з̾ пла́мене ꙗ҆́кѡ и҆зба́вилсѧ є҆сѝ мч҃нче ѳео́дѡре, бж҃е́ственною си́лою: си́це и҆ ны́нѣ на́съ сп҃слъ є҆сѝ са́мъ предста́тельствомъ бж҃е́ственнымъ твои́мъ, беззако́ннагѡ совѣ́та ѕлоко́зненнагѡ.

Ве́черъ водвори́сѧ пла́чь рабѡ́мъ твои̑мъ, ѿ лꙋка́вагѡ лови́тельства сꙋпоста́та на́шегѡ: но во ᲂу҆́трїе ра́дость возсїѧ̀, мч҃нче терпѣливоно́сче, те́плою твое́ю по́мощїю.

Сла́ва: И҆зба́вителѧ тѧ̀ ѡ҆брѣ́тше, въ бѣды̑ мы̀ впа́дше, и҆ и҆зба́вителѧ ко́зни вра́жїѧ, мч҃нче хрⷭ҇то́въ страстоте́рпче ѳео́дѡре, тѧ̀ славосло́вимъ во всѧ̑ вѣ́ки.

Бг҃оро́диченъ: Недоꙋмѣва́етъ ᲂу҆́мъ человѣ́ческїй твоегѡ̀ ржⷭ҇тва̀ чⷭ҇таѧ, та́инство и҆зрещѝ: и҆ сегѡ̀ ра́ди тѧ̀ вѣ́рою бл҃гоче́стнѡ, ꙗ҆́кѡ бцⷣꙋ почита́емъ, и҆ славосло́вимъ во всѧ̑ вѣ́ки.

Катава́сїа: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть, тогда̀ ᲂу҆́бѡ ѡ҆бразꙋ́емое: ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Ржⷭ҇тво̀ твоѐ нетлѣ́нно:

Стека́етсѧ мно́жество ѿвсю́дꙋ, въ сѣ́нь свѣдѣ́нїѧ, и҆ живꙋ́щꙋю бл҃года́ть, предпросїѧ́вшагѡ въ сла́вѣ всѣ́хъ мч҃нкѡвъ, со влⷣчцею всѣ́хъ велича́емъ.

Мꙋжа́йсѧ хрⷭ҇то́ва цр҃ковь, и҆ держа́вствꙋй всꙋ́е борю́щими: хрⷭ҇тѡ́вы бо дрꙋ́зи и҆ предстоѧ́щїи ѡ҆ тебѣ̀ пекꙋ́тсѧ и҆ ѿстоѧ́щїи ꙗ҆́коже до́блїи, є҆мꙋ́же соверша́еши бл҃года́рствєннаѧ.

Возмнѣ́вшасѧ дре́вле ᲂу҆мре́ти, вє́щи показꙋ́ютъ жи́ти и҆ по кончи́нѣ, и҆ вѣ́ры па́ки предста́тельствовати съ ра́вною ре́вностїю. є҆́юже богатѧ́щесѧ бл҃годѣ́телѧ велича́емъ.

Бг҃оро́диченъ: Ꙗ҆́кѡ бж҃е́ственнꙋю тѧ̀ печа́ть пѣ́сньми, запеча́таннꙋю бж҃їю кни́гꙋ налага́ю носѧ̀, и҆ собира́ю похвалы̑ въ тебѣ̀ дв҃о: си́це прославлѧ́ѧ наипа́че твоего̀ мч҃нка.

И҆́ный. І҆рмо́съ: Бг҃а человѣ́кѡмъ невозмо́жно:

До́брѣ ꙗ҆ви́лсѧ є҆сѝ побо́рникъ пресла́вне, и҆ держа́вное застꙋпле́нїе на́мъ чтꙋ́щымъ твою̀ честнꙋ́ю и҆ вѣ́чнꙋю па́мѧть ны́нѣ, и҆ твои́хъ страда́льчествъ и҆справлє́нїѧ, и҆ бы́вшее въ на́съ бж҃е́ственное застꙋпле́нїе.

Твоѐ всебл҃же́нне чꙋ́до ѳео́дѡре соверше́нное, ст҃ы́ми тꙋ́чами пое́тсѧ, на ве́сь мі́ръ бл҃же́нне: тѣ́мже и҆ лѣ́тнѡ собира́ющесѧ, сла́вꙋ возсыла́емъ хрⷭ҇тꙋ̀, тебѐ просла́вльшемꙋ.

Сла́ва: Зрѧ̀ любо́вь восхвалѧ́ющихъ тѧ̀ мч҃нче хрⷭ҇то́въ, бл҃года́ть возда́рствꙋй вѧ́щшꙋю: и҆ вѣ́рꙋ вѣ́дый є҆ли́ка є҆́сть пресла́вне, не преста́й мл҃твенниче теплѣ́йшїй мч҃нче, и҆ хода́тай къ бг҃ꙋ на́шемꙋ ꙗ҆влѧ́ѧсѧ.

Бг҃оро́диченъ: Пѣ́ти дв҃о, тѧ̀ не престае́мъ, помо́щницꙋ, покро́въ, ско́рое застꙋпле́нїе, и҆ предста́тельницꙋ на́шꙋ непосты́днꙋю: соблюдѝ твоѧ̑ рабы̑, всѧ́кагѡ ѡ҆ѕлобле́нїѧ, всѧ́кїѧ ко́зни лꙋка́вагѡ свобожда́ющи при́снѡ.

Катава́сїа: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.

Є҆ѯапостїла́рїй:

Подо́бенъ: Со ᲂу҆ч҃нкѝ:

Вѣнчено́сче ст҃е, предстоѧ́й со а҆́гг҃лы хрⷭ҇то́вꙋ ны́нѣ прⷭ҇то́лꙋ, и҆ свѣ́та ѿтꙋ́дꙋ и҆сполнѧ́ѧйсѧ страстоно́сче, ми́ръ мі́рови непреста́ннѡ и҆схода́тайствꙋй, и҆ на́мъ сп҃се́нїе, бл҃гоче́стнѡ свѣтоно́снꙋю па́мѧть твою̀ соверша́ющымъ, ѳео́дѡре всебога́те, мч҃нче преꙋкраше́нне.

Бг҃оро́диченъ: Во чре́вѣ твое́мъ гдⷭ҇ь, погиба́ющїй мі́ръ ѿ тлѣ́нїѧ призва́ти восхотѣ́въ, ꙗ҆́коже вѣ́дѧше, всели́сѧ бцⷣе. сп҃се́нїе ᲂу҆́бѡ всѝ ѡ҆брѣ́тше, возопїи́мъ тебѣ̀ а҆́гг҃лово, є҆́же ра́дꙋйсѧ всепѣ́таѧ, во всѣ́хъ жена́хъ бл҃гослове́ннаѧ: и҆́бо ра́дость породила̀ є҆сѝ все́й вселе́ннѣй.

На хвали́техъ поста́вимъ стїхѝ д҃, гла́съ а҃.

Подо́бенъ: Нбⷭ҇ныхъ чинѡ́въ:

Мꙋ́жа и҆зрѧ́дна вы́шнѧгѡ воинствосло́вїѧ вѣ́рнїи, ꙗ҆́кѡ терпѣли́ваго ѻ҆рꙋ́жника на́шегѡ бл҃гоче́стїѧ, согла́снѡ соше́дшесѧ, пѣ́сньми та́инственными восхва́лимъ, глаго́люще: досточꙋ́дне мч҃нче і҆и҃совъ, моли́сѧ ѡ҆ чтꙋ́щихъ тѧ̀.

Тезоимени́тымъ твои́мъ зва́нїемъ, да́ре бж҃їй вои́стиннꙋ, скорбѧ́щымъ всѣ̑мъ ᲂу҆тѣше́нїе пода́лсѧ є҆сѝ ѳео́дѡре требл҃же́нне, всѧ́кїй бо къ твоемꙋ̀ приближа́ѧсѧ хра́мꙋ вои́стиннꙋ, съ весе́лїемъ прїе́млѧ воздаѧ̑нїѧ чꙋде́съ твои́хъ, почита́етъ хрⷭ҇та̀.

Бл҃гоче́стїѧ бога́тство, и҆ свѣ́тлость, страда́льческими по́двиги, себѣ̀ сокро́виществовавъ, всю̀ крѣ́пость твою̀ да́ръ прїѧ́тный бг҃ꙋ прине́слъ є҆сѝ, и҆сполнѧ́ѧ въ по́двизѣхъ со тща́нїемъ бг҃одарова́нное твоѐ призыва́нїе.

Всесвѣ́тлымъ торжество́мъ бж҃е́ственнагѡ мч҃нка, напита́имсѧ всѝ, и҆ вѣ́рнѡ возвесели́мсѧ празднолю́бцы, почита́юще свѣ́тлое празднество̀ є҆гѡ̀ сконча́нїѧ, пѣ́сненнѡ воспѣва́юще і҆и҃са, просла́вившаго па́мѧть є҆гѡ̀.

Сла́ва, гла́съ ѕ҃: Сщ҃е́нїѧ да́ръ, и҆ бога́тство бж҃е́ственныѧ жи́зни, показа́лсѧ є҆сѝ мі́рꙋ ѳео́дѡре: хрⷭ҇то́съ бо мꙋ́дрѣ твою̀ па́мѧть просла́ви, въ ню́же согла́снѡ вѣ́рнїи ра́дꙋющесѧ, пое́мъ по́двиги болѣ́зней твои́хъ.

И҆ ны́нѣ: бг҃оро́диченъ, гла́съ то́йже: Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ влⷣчце, со страстоте́рпцемъ, и҆ всѣ́ми ст҃ы́ми, поми́ловатисѧ дꙋша́мъ на́шымъ.

На стїхо́внѣ стїхи̑ры ст҃а́гѡ, гла́съ д҃. Самогла́сны:

Ликꙋ́ютъ собо́ры мч҃нкѡвъ ра́достнѡ, ны́нѣ въ хра́мѣ твое́мъ, страстоте́рпче ѳео́дѡре, и҆ а҆́гг҃льстїи чи́нове, страда́льчєства пле́щꙋтъ терпѣ́нїѧ твоегѡ̀: и҆ са́мъ вѣнцеда́вецъ хрⷭ҇то́съ предстои́тъ, богатотво́рнаѧ дарова̑нїѧ твои̑мъ пѣвцє́мъ десни́цею подаѧ̀, є҆го́же возжелѣ́въ взыска́лъ є҆сѝ, и҆ ѡ҆брѣ́тъ бесѣ́довалъ є҆сѝ, є҆го́же жела́лъ є҆сѝ: є҆го́же молѝ, сп҃стѝ и҆ просвѣти́ти дꙋ́шы на́шѧ.

Сті́хъ: Првⷣникъ ꙗ҆́кѡ фі́нїѯъ процвѣте́тъ:

Чи́стый и҆ непоро́чный по́стъ прише́дый ны́нѣ къ на́мъ, мч҃нческихъ чꙋде́съ соверше́нство совведѐ: посто́мъ бо дꙋшє́вныѧ сквє́рны ѡ҆чи́стимъ, и҆ мч҃нческими зна́меньми, и҆ страдальчествы̀, до́блественнѡ на стра̑сти вмꙋжи́мсѧ: ѿѻнꙋ́дꙋже и҆ сщ҃е́ннагѡ воздержа́нїѧ бл҃года́тїю просвѣща́ющесѧ, и҆ чꙋдодѣ́йствы ѳео́дѡра мч҃нка, ко хрⷭ҇тꙋ̀ ᲂу҆твержда́емсѧ вѣ́рою, просѧ́ще є҆го̀, сп҃се́нїе пода́ти дꙋша́мъ на́шымъ.

Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ:

Мч҃нческимъ твои́мъ дерзнове́нїемъ къ бг҃ꙋ ѳео́дѡре, ѿстꙋ́пническꙋю на вѣ́рꙋ хрⷭ҇то́вꙋ ко́знь сꙋ́етнꙋ сотвори́лъ є҆сѝ, побо́рникъ бл҃гоче́ствꙋющымъ бы́лъ є҆сѝ лю́демъ, предста́нїемъ ᲂу҆жа́снымъ, скве́рныхъ бра́шенъ жє́ртвы і҆́дѡльскими и҆̀хъ и҆зба́вль. тѣ́мже тѧ̀ ꙗ҆́кѡ і҆́дѡлѡвъ потреби́телѧ, и҆ ꙗ҆́кѡ ста́да хрⷭ҇то́ва сп҃си́телѧ и҆ храни́телѧ, и҆ предста́телѧ на́шего бл҃гопослꙋшли́ваго, чтꙋ́ще въ пѣ́снехъ мо́лимъ, ѡ҆чище́нїю и҆ просвѣще́нїю тобо́ю дарова́тисѧ дꙋша́мъ на́шымъ.

Сла́ва, гла́съ и҃: Страда́льческимъ мꙋ́жествомъ бл҃гоче́стнѡ воѡрꙋжи́всѧ страстоте́рпче хрⷭ҇то́въ, и҆ слове́сное слꙋже́нїе та́йнѡ побора́ѧ си́лою є҆гѡ̀, і҆́дѡлѡвъ нече́стїе и҆ мꙋчи́телей преще́нїе не́мощно показа́лъ є҆сѝ, презира́ѧ мꙋчє́нїѧ и҆ вре́менный ѻ҆́гнь. но, ѽ бж҃е́ственныхъ дарѡ́въ и҆ ве́щь, и҆ и҆́мѧ! ѿ всѧ́кагѡ ѡ҆бстоѧ́нїѧ мл҃твою твое́ю сп҃са́й соверша́ющыѧ па́мѧть твою̀.

И҆ ны́нѣ, бг҃оро́диченъ: Влⷣчце, прїимѝ мл҃твы:

И҆ про́чее послѣ́дованїе ᲂу҆́трени. Совокꙋплѧ́емъ и҆ ча́съ а҃. На лїтꙋргі́и и҆з̾ѡбрази́тєльнаѧ, и҆ ѿ канѡ́на ст҃а́гѡ пѣ́снь г҃ и҆ ѕ҃.

Прокі́менъ гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀: Сті́хъ: Оу҆слы́ши бж҃е гла́съ мо́й, внегда̀ моли́ти ми́ сѧ къ тебѣ̀. А҆по́столъ днѐ, ко є҆вре́ємъ, зача́ло т҃г. Ст҃о́мꙋ а҆по́столъ, къ тїмоѳе́ю, зача́ло сч҃в. А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ до́мꙋ бг҃а на́шегѡ процвѣтꙋ́тъ. Є҆ѵⷢ҇лїе ѿ ма́рка, зача́ло і҃. И҆ ст҃а́гѡ, ѿ і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю: На трапе́зѣ чте́мъ сло́во похва́льное ѡ҆ ст҃ѣ́мъ ѳео́дѡрѣ, ст҃а́гѡ григо́рїа нѵ́сскагѡ. И҆ ꙗ҆ди́мъ бо́бъ ѡ҆бваре́нный, съ ма́слинами бѣ́лыми и҆ че́рными. Причаща́емсѧ же и҆ варе́нїѧ съ ма́сломъ прилꙋчи́вшагѡсѧ, и҆ ко́лѷва: вїна́ же и҆спива́емъ по красово́лю, ра́ди ст҃а́гѡ. Сїе́ же прїѧ́хомъ ѿ ла́ѵры прпⷣбнагѡ ѻ҆тца̀ на́шегѡ са́ввы, и҆ ѿ бг҃оно́снагѡ ѻ҆тца̀ на́шегѡ є҆ѵѳѵ́мїа.

Вѣ́дати подоба́етъ, ꙗ҆́кѡ два́жды прїѧ́хомъ ꙗ҆́сти ры̑бы въ се́й вели́кїй по́стъ, въ пра́здникъ бл҃говѣ́щенїѧ, и҆ цвѣтоно́сїѧ.