Недѣ́лѧ, въ ню́же чте́тсѧ сщ҃е́нное и҆ ст҃о́е є҆ѵⷢ҇лїе, при́тчи блꙋ́днагѡ сы́на

Въ сꙋббѡ́тꙋ Ве́чера на бдѣ́нїи, по ѻ҆бы́чномъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры ѻ҆смогла́сника воскрⷭ҇ны г҃, и҆ а҆натѡ́лїевы г҃, и҆ трїѡ́ди д҃, повторѧ́юще сїѧ̑. Гла́съ а҃.

Въ безгрѣ́шнꙋю странꙋ̀ и҆ живо́тнꙋю ввѣ́рихсѧ, посѣ́ѧвъ грѣ́хъ, серпо́мъ пожа́въ кла́сы лѣ́ности, и҆ рꙋкоѧ́тїемъ свѧза́въ дѣѧ́нїй мои́хъ снопы̀, ꙗ҆̀же и҆ постла́хъ не на гꙋмнѣ̀ покаѧ́нїѧ: но молю́ тѧ превѣ́чнаго дѣ́лателѧ на́шего бг҃а, вѣ́тромъ твоегѡ̀ любобл҃гоꙋтро́бїѧ развѣ́й пле́вꙋ дѣ́лъ мои́хъ, и҆ пшени́цꙋ да́ждь дꙋшѝ мое́й ѡ҆ставле́нїе, въ нбⷭ҇нꙋю твою̀ затворѧ́ѧ мѧ̀ жи́тницꙋ, и҆ сп҃си́ мѧ.

Позна́имъ бра́тїе, та́инства си́лꙋ, ѿ грѣха́ бо ко ѻ҆ч҃ескомꙋ до́мꙋ восте́кшаго блꙋ́днаго сы́на пребл҃гі́й ѻ҆ц҃ъ пред̾ꙋстрѣ́тъ лобза́етъ, и҆ па́ки своеѧ̀ сла́вы позна́нїе да́рꙋетъ: и҆ та́инственное вы́шнимъ соверша́етъ весе́лїе, закала́ѧ тельца̀ ᲂу҆пита́ннаго, да мы̀ досто́йнѡ сожи́тельствꙋемъ, закла́вшемꙋ же чл҃вѣколю́бномꙋ ѻ҆ц҃ꙋ̀ и҆ сла́вномꙋ заколе́нїю, сп҃сꙋ дꙋ́шъ на́шихъ.

Сла́ва, гла́съ в҃: ѽ коли́кихъ бла̑гъ ѻ҆каѧ́нный себѐ лиши́хъ! ѽ какова̀ ца́рствїѧ ѿпадо́хъ стра́стный а҆́зъ! бога́тство и҆знꙋри́въ, є҆́же прїѧ́хъ за́повѣдь престꙋпи́хъ. ᲂу҆вы̀ мнѣ̀, стра́стнаѧ дꙋшѐ! ѻ҆гню̀ вѣ́чномꙋ про́чее ѡ҆сꙋ́дишисѧ. тѣ́мже пре́жде конца̀ возопі́й хрⷭ҇тꙋ̀ бг҃ꙋ ꙗ҆́кѡ блꙋ́днаго прїими́ мѧ сы́на, бж҃е, и҆ поми́лꙋй мѧ̀.

И҆ ны́нѣ: бг҃оро́диченъ а҃-й, гла́са.

Вхо́дъ. Свѣ́те ти́хїй: Прокі́менъ: Гдⷭ҇ь воцр҃и́сѧ:

На лїті́и по ѻ҆бы́чаю стїхи́ра хра́ма.

Сла́ва, гла́съ д҃: Ꙗ҆́кѡ блꙋ́дный сы́нъ прїидо́хъ и҆ а҆́зъ ще́дре, житїѐ всѐ и҆жди́вый во ѿше́ствїи. расточи́хъ бога́тство, є҆́же да́лъ є҆сѝ мнѣ̀ ѻ҆́ч҃е: прїими́ мѧ ка́ющасѧ бж҃е, и҆ поми́лꙋй мѧ̀.

И҆ ны́нѣ: бг҃оро́диченъ тогѡ́жде гла́са.

На стїхо́внѣ ѻ҆смогла́сника, по а҆лфави́тꙋ.

Сла́ва, самогла́сенъ, гла́съ ѕ҃:

Ѻ҆ч҃ескагѡ да́ра расточи́въ бога́тство, съ безслове́сными скоты̀ пасо́хсѧ ѻ҆каѧ́нный, и҆ тѣ́хъ жела́ѧ пи́щи, гла́домъ та́ѧхъ не насыща́ѧсѧ, но возврати́всѧ къ бл҃гоꙋтро́бномꙋ ѻ҆ц҃ꙋ̀, взыва́ю со слеза́ми: прїими́ мѧ ꙗ҆́кѡ нае́мника припа́дающа чл҃вѣколю́бїю твоемꙋ̀ и҆ сп҃си́ мѧ.

И҆ ны́нѣ, бг҃оро́диченъ: Творе́цъ и҆ и҆зба́витель мо́й:

Ѿпꙋсти́тельный: Бцⷣе дв҃о: три́жды. И҆ про́чее послѣ́дованїе бдѣ́нїѧ, ꙗ҆́кѡ ѻ҆бы́чно.