Въ тꙋ́южде недѣ́лю сы́рнꙋю ве́чера,
по нача́льномъ ѱалмѣ̀: На Гдⷭ҇и воззва́хъ поста́вимъ стїхѡ́въ і҃ ѿ И҆зведѝ и҆з̾ темни́цы: И҆ пое́мъ стїхи̑ры д҃ покаѧ́нны, ѻ҆ктѡ́иха на рѧдꙋ̀ гла́са, ꙗ҆̀же сꙋ́ть пи́саны двѣ̀ ве́черъ на стїхо́внѣ, и҆ двѣ̀ ᲂу҆́треннихъ стїхо́вныхъ: [Та́кожде и҆ въ про́чыѧ недѣ̑ли, ѿ сеѧ̀ да́же до пѧ́тыѧ ст҃а́гѡ поста̀. Гдⷭ҇и воззва́хъ: пое́мъ на гла́съ и҆́же во ѻ҆смогла́сникѣ на рѧдꙋ̀] И҆ въ трїѡ́ди г҃, и҆ въ мине́и г҃.
Творе́нїе господи́на і҆ѡ́сифа.
Стїхи̑ры, гла́съ в҃. Подо́бенъ: Є҆гда̀ ѿ дре́ва:
Воздержа́нїемъ тѣ́ло смири́ти всѝ потщи́мсѧ, бж҃е́ственное преходѧ́ще по́прище непоро́чнагѡ поста̀ и҆ мл҃твами и҆ слеза́ми гдⷭ҇а сп҃са́ющаго на́съ взы́щемъ, и҆ забве́нїе ѕло́бы всеконе́чное сотвори́мъ, вопїю́ще: согрѣши́хомъ тѝ, сп҃сѝ, ꙗ҆́коже дре́вле нїнеѵі́тѧны хрⷭ҇тѐ цр҃ю̀, и҆ ѻ҆́бщники ны̀ сотворѝ нбⷭ҇нагѡ црⷭ҇твїѧ бл҃гоꙋтро́бне.
Себѐ ѿчаѧва́ю, помышлѧ́ѧ дѣ́ла моѧ̑ гдⷭ҇и, всѧ́кагѡ мꙋче́нїѧ достѡ́йнаѧ: се́ бо презрѣ́въ чⷭ҇тны̑ѧ твоѧ̑ сп҃се за́пѡвѣди, блꙋ́днѡ моѐ житїѐ и҆жди́хъ. тѣ́мже молю́сѧ, тꙋ́чами покаѧ́нїѧ мѧ̀ ѡ҆чи́стивъ, посто́мъ и҆ моле́нїемъ ꙗ҆́кѡ є҆ди́нъ млⷭ҇тивый просвѣтѝ, и҆ не гнꙋша́йсѧ менѐ бл҃годѣ́телю всѣ́хъ, и҆ пребл҃гі́й.
И҆́нъ господи́на ѳео́дѡра, гла́съ то́йже. Подо́бенъ: Па́че ᲂу҆ма̀ дарѡ́въ:
По́стное вре́мѧ свѣ́тлѡ начне́мъ, къ подвигѡ́мъ дꙋхѡ́внымъ себѐ подложи́вше, ѡ҆чи́стимъ дꙋ́шꙋ, ѡ҆чи́стимъ пло́ть, пости́мсѧ ꙗ҆́коже въ снѣ́дехъ ѿ всѧ́кїѧ стра́сти, добродѣ́тельми наслажда́ющесѧ дх҃а: въ ни́хже соверша́ющесѧ любо́вїю, да сподо́бимсѧ всѝ ви́дѣти всечⷭ҇тнꙋ́ю стрⷭ҇ть хрⷭ҇та̀ бг҃а и҆ ст҃ꙋ́ю па́схꙋ, дꙋхо́внѡ ра́дꙋющесѧ.
Та́же въ мине́и ст҃о́мꙋ, подо́бны г҃. А҆́ще ли и҆́мать самогла́сенъ: Сла́ва, а҆́ще ли нѣ́сть, Сла́ва, и҆ ны́нѣ, бг҃оро́диченъ, въ то́йже гла́съ мине́и. Вхо́дъ съ кади́льницею: Свѣ́те ти́хїй:
Прокі́менъ гла́съ и҃: Не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀, ско́рѡ ᲂу҆слы́ши мѧ̀: вонмѝ дꙋшѝ мое́й, и҆ и҆зба́ви ю҆̀. Сті́хъ: Сп҃се́нїе твоѐ бж҃е да прїи́метъ мѧ̀. Сті́хъ: Да ᲂу҆́зрѧтъ ни́щїи, и҆ возвеселѧ́тсѧ. Сті́хъ: Взыщи́те бг҃а, и҆ жива̀ бꙋ́детъ дꙋша̀ ва́ша. И҆ па́ки высоча́йшимъ гла́сомъ: Не ѿвратѝ лица̀ твоегѡ̀:
Подоба́етъ вѣ́дати, ꙗ҆́кѡ во всѣ́хъ недѣ́лѧхъ ст҃ы́ѧ четыредесѧ́тницы во свѣти́льничное быва́етъ вхо́дъ, ра́ди вели́кихъ прокі́менѡвъ.
Сподо́би гдⷭ҇и: Покло́ны г҃: и҆ є҆ктенїа̀.
На стїхо́внѣ самогла́сенъ гла́съ д҃:
Возсїѧ̀ бл҃года́ть твоѧ̀ гдⷭ҇и, возсїѧ̀ просвѣще́нїе дꙋ́шъ на́шихъ. сѐ вре́мѧ бл҃гопрїѧ́тное, сѐ вре́мѧ покаѧ́нїѧ, ѿложи́мъ дѣла̀ тьмы̀, и҆ ѡ҆блече́мсѧ во ѻ҆рꙋ̑жїѧ свѣ́та: ꙗ҆́кѡ да преплы́вше поста̀ вели́кꙋю пꙋчи́нꙋ, въ тридне́вное воскрⷭ҇нїе дости́гнемъ, гдⷭ҇а и҆ сп҃са на́шегѡ і҆и҃са хрⷭ҇та̀, сп҃са́ющагѡ дꙋ́шы на́шѧ.
Сті́хъ: Къ тебѣ̀ возведо́хъ ѻ҆́чи моѝ:
И҆ повторѧ́емъ то́йже.
Та́же сті́хъ: Поми́лꙋй на́съ гдⷭ҇и, поми́лꙋй на́съ:
И҆ мч҃нченъ: Прославлѧ́емый въ па́мѧтехъ ст҃ы́хъ твои́хъ хрⷭ҇тѐ бж҃е, ѿ ни́хъ ᲂу҆молѧ́емь, низпослѝ на́мъ ве́лїю млⷭ҇ть.
Сла́ва, самогла́сенъ въ мине́и, а҆́ще и҆́мать: И҆ ны́нѣ, бг҃оро́диченъ по гла́сꙋ мине́и. А҆́ще ли не и҆́мать, Сла́ва, и҆ ны́нѣ, бг҃оро́диченъ, гла́съ то́йже. Подо́бенъ: Ꙗ҆́кѡ до́блѧ:
А҆́гг҃льстїи чи́ни тѧ̀ бг҃ома́ти прославлѧ́ютъ: бг҃а бо всечⷭ҇таѧ родила̀ є҆сѝ, ѻ҆ц҃ꙋ̀, и҆ дх҃а соприсносꙋ́щна, и҆ а҆́гг҃льскаѧ вѡ́инства ѿ не сꙋ́щагѡ хотѣ́нїемъ поста́вивша. є҆го́же молѝ ѿ тлѝ сп҃стѝ и҆ просвѣти́ти дꙋ́шы правосла́вныхъ, тѧ̀ воспѣва́ющихъ всечⷭ҇таѧ.
Ны́нѣ ѿпꙋща́еши: Трист҃о́е: покло́ны трѝ. Прест҃а́ѧ трⷪ҇це: Ѻ҆́ч҃е на́шъ: И҆ настоѧ́щыѧ тропарѝ, гла́съ д҃: Бцⷣе дв҃о ра́дꙋйсѧ: И҆ твори́мъ покло́нъ є҆ди́нъ. Сла́ва: Крⷭ҇ти́телю хрⷭ҇то́въ: покло́нъ є҆ди́нъ. И҆ ны́нѣ: Моли́те ѡ҆ на́съ ст҃і́и а҆пⷭ҇ли: покло́нъ є҆ди́нъ. Та́же, Под̾ твоѐ бл҃гоꙋтро́бїе: без̾ покло́на. Гдⷭ҇и поми́лꙋй, м҃ кро́ткимъ и҆ ти́химъ гла́сомъ. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче. Сщ҃е́нникъ: Сы́й бл҃гослове́нъ хрⷭ҇то́съ бг҃ъ на́шъ всегда̀, ны́нѣ и҆ при́снѡ и҆ во вѣ́ки вѣкѡ́въ. Мы́ же: А҆ми́нь. И҆ мл҃твꙋ: Нбⷭ҇ный цр҃ю̀:
И҆ твори́мъ трѝ покло́ны вели̑кїѧ, и҆ глаго́лемъ мл҃твꙋ прпⷣнагѡ є҆фре́ма сѵ́рїна:
Гдⷭ҇и и҆ влⷣко живота̀ моегѡ̀, дꙋ́хъ пра́здности ᲂу҆ны́нїѧ, любонача́лїѧ, и҆ праздносло́вїѧ не да́ждь мѝ.
Дꙋ́хъ же цѣломꙋ́дрїѧ, смиреномꙋ́дрїѧ, терпѣ́нїѧ, и҆ любвѐ, да́рꙋй мѝ рабꙋ̀ твоемꙋ̀.
Є҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
И҆ цѣлꙋ́емъ ст҃ы̑ѧ и҆ чⷭ҇тны̑ѧ і҆кѡ̑ны. И҆ глаго́летъ предстоѧ́тель: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀. И҆ быва́етъ мл҃тва ѿ сщ҃е́нника, и҆ соверше́нный ѿпꙋ́стъ.
[зрѝ] По вече́рни же въ трапе́зѣ быва́етъ ᲂу҆тѣше́нїе бра́тїи. По воста́нїи же ѿ трапе́зы, повече́рїе пое́мъ ма́лое по ѻ҆бы́чаю, съ мета́нїи и҆ покло́ны по́стными. На Сла́ва въ вы́шнихъ, мета́нїѧ г҃. [А҆́ще бы́ло бдѣ́нїе, канѡ́нъ бцⷣѣ не глаго́летсѧ.] Досто́йно є҆́сть: Трист҃о́е, мета̑нїѧ г҃, и҆ ѻ҆бы̑чныѧ тропарѝ. Гдⷭ҇и поми́лꙋй, м҃. И҆́же на всѧ́кое вре́мѧ: І҆ере́й: Бж҃е ᲂу҆ще́дри ны̀: Покло́ны г҃ вели̑кїѧ, съ мл҃твою ст҃а́гѡ є҆фре́ма: Гдⷭ҇и и҆ влⷣко: И҆ про́чихъ в҃і. Та́же, Трист҃о́е. По Ѻ҆́ч҃е на́шъ: Гдⷭ҇и поми́лꙋй, в҃і и҆ мл҃тва, Нескве́рнаѧ: И҆ да́ждь на́мъ: И҆ ѿпꙋ́стъ.
И҆ и҆́мже ѡ҆́бразомъ ᲂу҆каза́сѧ слꙋ́жба вече́рни и҆ повече́рїѧ сеѧ̀ недѣ́ли, си́це да быва́етъ и҆ въ про́чыѧ, да́же до пѧ́тыѧ недѣ́ли ст҃ы́ѧ четыредесѧ́тницы, и҆змѣнѧ́ємымъ нѣ́кѡимъ, ѡ҆ ни́хже на свои́хъ и҆̀мъ мѣ́стѣхъ бꙋ́детъ.
Подоба́етъ вѣ́дати, ꙗ҆́кѡ а҆́ще бꙋ́детъ бра́тꙋ на́шемꙋ ѿитѝ ко гдⷭ҇ꙋ во ст҃ы́хъ си́хъ дне́хъ посредѣ̀ седми́цы: не быва́ютъ трети́ны є҆гѡ̀, да́же до пѧтка̀ ве́чера, тогда́ бо соверша́етсѧ паннѷхі́да є҆гѡ̀: подо́бнѣ и҆ въ сꙋббѡ́тꙋ лїтꙋргі́а є҆гѡ̀. Во грѧдꙋ́щꙋю же сꙋббѡ́тꙋ быва́ютъ девѧти́ны є҆гѡ̀, а҆́ще слꙋчи́тсѧ, а҆́ще ли нѝ. Четыредесѧти́ны же є҆гѡ̀ быва́ютъ, є҆гда̀ число̀ дне́й є҆гѡ̀ и҆спо́лнитсѧ: приношє́нїѧ же, и҆ па́мѧти є҆гѡ̀ начина́ютсѧ ѿ но́выѧ недѣ́ли, да́же до и҆сполне́нїѧ дне́й четы́редесѧти.