Въ сꙋббѡ́тꙋ сы́рнꙋю
па́мѧть соверша́емъ всѣ́хъ преподо́бныхъ и҆ бг҃оно́сныхъ ѻ҆тє́цъ, въ по́двизѣ просїѧ́вшихъ.
Въ пѧто́къ ве́чера во свѣти́льничное по предначина́тельномъ ѻ҆бы́чное стїхосло́вїе: Ко гдⷭ҇ꙋ скорбѣ́ти мѝ:
На Гдⷭ҇и воззва́хъ, пое́мъ стїхи̑ры подѡ́бныѧ, поста́вльше стїхѡ́въ ѕ҃. Гла́съ и҃, повторѧ́юще ѧ҆̀:
Прїиди́те всѝ вѣ́рнїи, прпⷣбныхъ ѻ҆тє́цъ ли́ки воспои́мъ, а҆нтѡ́нїа верхо́внаго, свѣ́тлаго є҆ѵѳѵ́мїа, и҆ кого́ждо и҆ всѧ̑ вкꙋ́пѣ. и҆ си́хъ, ꙗ҆́коже дрꙋгі́й ра́й сла́дости, гражда̑нства мы́сленнѡ преходѧ́ще, краснѡ̀ воззове́мъ: сїѧ̑ древеса̀ ꙗ҆̀же насадѝ бг҃ъ на́шъ: сїѧ̑ плоды̀ нетлѣ́нныѧ жи́зни процвѣ̑тшаѧ, принесо́ша хрⷭ҇тꙋ̀, пита́юще на́шѧ дꙋ́шы. къ ни̑мже возопїи́мъ: бг҃оно́снїи бл҃же́ннїи, моли́те сп҃сти́сѧ на́мъ.
Подо́бенъ:
Ра́дꙋйсѧ є҆гѵ́пте вѣ́рный. ра́дꙋйсѧ лївѵ́е прпⷣбнаѧ. ра́дꙋйсѧ ѳѷваі́до и҆збра́ннаѧ. ра́дꙋйсѧ всѧ́кое мѣ́сто и҆ гра́де и҆ страно̀, гра́жданы воспита́вшаѧ ца́рства нбⷭ҇нагѡ, и҆ си́хъ въ воздержа́нїи и҆ болѣ́знехъ возрасти́вшаѧ, и҆ жела́нїй совершє́нныѧ мꙋ́жы бг҃ꙋ показа́вшаѧ. сі́и свѣти̑ла дꙋ́шъ на́шихъ ꙗ҆ви́шасѧ: са́ми чꙋде́съ заре́ю, и҆ дѣ́лъ зна́меньми, просїѧ́ша мы́сленнѡ во всѧ̑ концы̀. къ тѣ̑мъ возопїе́мъ: ѻ҆тцы̀ всебл҃же́ннїи, моли́те сп҃сти́сѧ на́мъ.
Подо́бенъ:
Кто̀ и҆зрече́тъ ѿ земноро́дныхъ чꙋ̑днаѧ ва̑ша житїѧ̑, ѻ҆тцы̀ всемі́рнїи; кі́й же ѧ҆зы́къ и҆зглаго́летъ сщ҃є́нныѧ въ дꙋ́сѣ по́двиги и҆ по́ты ва́шѧ; страда̑нїѧ добродѣ́телей, и҆змождє́нїѧ пло́ти, борє́нїѧ страсте́й, во бдѣ́нїихъ, въ мл҃твахъ и҆ слеза́хъ; вы̀ въ мі́рѣ ꙗ҆́коже а҆́гг҃ли вои́стиннꙋ ꙗ҆ви́стесѧ, са́ми бѣсѡ́вскїѧ си̑лы соверше́ннѡ низложи́сте, сотво́рше чꙋ̑днаѧ и҆ ди̑внаѧ зна́мєнїѧ. тѣ́мже моли́тесѧ съ на́ми пребл҃же́ннїи, ᲂу҆лꙋчи́ти на́мъ неконча́емꙋю ра́дость.
Сла́ва, гла́съ ѕ҃: Є҆́же по ѡ҆́бразꙋ соблю́дше невреди́мѡ, ᲂу҆ма̀ вожда̀ на стра̑сти па̑гꙋбныѧ по́стнически поста́вльше, во є҆́же по подо́бїю ꙗ҆́кѡ мо́щно возшлѝ є҆стѐ: мꙋ́жески бо є҆стество̀ понꙋ́дивше, потща́стесѧ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющымъ ꙗ҆ви́стесѧ ве́рхъ, жи́тели пꙋсты́ннїи, бл҃готекꙋ́щымъ подвиза́тели, пра̑вила добродѣ́тели и҆звѣ́стнѣйшаѧ. и҆ ны́нѣ на нб҃сѣ́хъ, зерца́лѡмъ разрѣши́вшымсѧ всепрпⷣбнїи, чи́стѡ зритѐ ст҃ꙋ́ю трⷪ҇цꙋ, молѧ́щесѧ непосре́дственнѡ, ѡ҆ вѣ́рою и҆ любо́вїю чтꙋ́щихъ ва́съ.
И҆ ны́нѣ, бг҃оро́диченъ а҃ гла́са, ѻ҆смогла́сника рѧдова́гѡ.
Свѣ́те ти́хїй:
Прокі́менъ, гла́съ з҃: Бж҃е застꙋ́пникъ мо́й є҆сѝ ты̀, и҆ млⷭ҇ть твоѧ̀ предвари́тъ мѧ̀. Сті́хъ: И҆зми́ мѧ ѿ вра̑гъ мои́хъ бж҃е, и҆ ѿ востаю́щихъ на мѧ̀ и҆зба́ви мѧ̀.
Проро́чества заха́рїина чте́нїе, [Глава̀ и҃, ст. ѳ҃і- к҃г].
Си́це глаго́летъ гдⷭ҇ь вседержи́тель: по́стъ четве́ртый, и҆ по́стъ пѧ́тый, и҆ по́стъ седмы́й, и҆ по́стъ десѧ́тый, бꙋ́дꙋтъ до́мꙋ і҆ꙋ́довꙋ въ ра́дость, и҆ въ весе́лїе, и҆ въ пра́здники бла́ги: и҆ возвесели́тесѧ, и҆ и҆́стинꙋ и҆ ми́ръ возлю́бите. Си́це глаго́летъ гдⷭ҇ь вседержи́тель: є҆щѐ лю́дїе мно́зи прїи́дꙋтъ, и҆ живꙋ́щїи во градѣ́хъ мно́гихъ. И҆ сни́дꙋтсѧ живꙋ́щїи въ пѧтѝ градѣ́хъ во є҆ди́нъ гра́дъ, глаго́люще: грѧди́мъ помоли́тисѧ лицꙋ̀ гдⷭ҇ню, и҆ взыска́ти лицѐ гдⷭ҇а вседержи́телѧ: и҆дꙋ̀ и҆ а҆́зъ. И҆ прїи́дꙋтъ лю́дїе мно́зи, и҆ ꙗ҆зы́цы мно́зи взыска́ти лица̀ гдⷭ҇а вседержи́телѧ во і҆ерⷭ҇ли́мѣ, и҆ ᲂу҆моли́ти лицѐ гдⷭ҇не. Си́це глаго́летъ гдⷭ҇ь вседержи́тель: во ѻ҆́ны дни̑ и҆мѣ́тсѧ де́сѧть мꙋже́й ѿ всѣ́хъ племе́нъ ꙗ҆зы́ческихъ, и҆ и҆мꙋ́тсѧ за ри́зꙋ мꙋ́жа і҆ꙋде́анина, глаго́люще: по́йдемъ съ тобо́ю, занѐ слы́шахомъ, ꙗ҆́кѡ бг҃ъ съ ва́ми є҆́сть.
Прокі́менъ, гла́съ ѕ҃: Да ᲂу҆пова́етъ і҆и҃ль на гдⷭ҇а ѿ ны́нѣ и҆ до вѣ́ка. Сті́хъ: Гдⷭ҇и не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ. Сподо́би гдⷭ҇и въ ве́черъ се́й:
На стїхо́внѣ самогла́сенъ, гла́съ в҃:
Ѡ҆чи́стимъ себѐ бра́тїе ѿ всѧ́кїѧ скве́рны пло́ти и҆ дꙋ́ха, свѣщы̀ дꙋ́шъ на́шихъ просвѣти́мъ нищелю́бїемъ, не снѣда́юще дрꙋ́гъ дрꙋ́га ѡ҆клевета́нїемъ: приспѣ́ бо вре́мѧ, є҆гда̀ жени́хъ прїи́детъ всѣ̑мъ возда́ти по дѣлѡ́мъ и҆́хъ. совни́демъ хрⷭ҇тꙋ̀ съ мꙋ́дрыми дѣ́вами, гла́съ ѻ҆́ный разбо́йника къ немꙋ̀ взыва́юще: помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.
И҆ глаго́лемъ сті́хъ: Къ тебѣ̀ возведо́хъ ѻ҆́чи моѝ:
И҆ па́ки то́йже самогла́сенъ.
Та́же сті́хъ: Поми́лꙋй на́съ гдⷭ҇и, поми́лꙋй на́съ.
И҆ мꙋ́чениченъ: Ст҃ы̑мъ мч҃нкѡмъ молѧ́щымсѧ ѡ҆ на́съ, и҆ хрⷭ҇та̀ пою́щымъ, всѧ́каѧ ле́сть преста̀, и҆ человѣ́ческїй ро́дъ вѣ́рою сп҃са́етсѧ.
Сла́ва, гла́съ и҃: Мона́хѡвъ мно́жєства, наста́вники ны́нѣ чти́мъ ѻ҆тцы̀ прпⷣбнїи: ва́ми бо стезе́ю вои́стиннꙋ пра́вою ходи́ти позна́хомъ. бл҃же́ни є҆стѐ хрⷭ҇тꙋ̀ рабо́тавшїи, и҆ вра́жїю низложи́вшїи си́лꙋ, а҆́гг҃лѡвъ собесѣ̑дницы, првⷣныхъ сожи́телє, и҆ ст҃ы́хъ: съ ни́миже моли́тесѧ гдⷭ҇ви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ. Подо́бенъ: Ѽ пресла́внагѡ чꙋдесѐ!
Ра́дꙋйсѧ, чистоты̀ сокро́вище. ра́дꙋйсѧ, невеще́ственнагѡ свѣ́та чи́стое жили́ще. ра́дꙋйсѧ, глави́зно сп҃се́нїѧ на́шегѡ. ра́дꙋйсѧ, а҆пⷭ҇лѡвъ проповѣ́данїе. ра́дꙋйсѧ, мч҃нкѡвъ похвало̀. ра́дꙋйсѧ, прⷪ҇ро́кѡвъ и҆сполне́нїе, всенепоро́чнаѧ. ра́дꙋйсѧ, подви́жникѡвъ и҆ мона́хѡвъ ᲂу҆краше́нїе, и҆ сп҃се́нїе вѣ́рныхъ.
Та́же, Ны́нѣ ѿпꙋща́еши:
И҆ по трист҃о́мъ глаго́лемъ тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ: но мл҃твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, бг҃оро́диченъ, гла́съ то́йже. Є҆́же ѿ вѣ́ка ᲂу҆тае́ное:
Ты́ѧжде и҆ на Бг҃ъ гдⷭ҇ь, и҆ на коне́цъ ᲂу҆́трени глаго́лемъ. Посе́мъ є҆ктенїа̀: Поми́лꙋй на́съ бж҃е: и҆ г҃ покло́ны вели̑кїѧ. Бꙋ́ди и҆́мѧ гдⷭ҇не: три́жды. Блгⷭ҇влю̀ гдⷭ҇а: Досто́йно є҆́сть: и҆ ѿпꙋ́стъ. И҆ быва́етъ трапе́за по ѻ҆бы́чаю, ꙗ҆́коже и҆ въ сре́дꙋ сы́рнꙋю ᲂу҆ка́зано є҆́сть. На повече́рїи же пое́мъ рѧдовы́й канѡ́нъ ме́ртвенъ гла́са: во ᲂу҆сопохрани́тельницѣ.