Во вто́рникъ сы́рный на ᲂу҆́трени.

По в҃-мъ стїхосло́вїи сѣда́ленъ, гла́съ и҃.

Подо́бенъ: Премꙋ́дрость, и҆ сло́во:

Пребл҃гі́й сло́ве, со ѻ҆ц҃е́мъ и҆ дх҃омъ созда́вый ви́димаѧ вкꙋ́пѣ и҆ неви́димаѧ, неизрече́нною мꙋ́дростїю твое́ю, свѣ́тлагѡ поста̀ вре́мѧ прейтѝ, въ ми́рѣ глꙋбо́цѣ бл҃говолѝ бл҃гоꙋтро́бне, разрѣша́ѧ пре́лесть го́рькагѡ грѣха̀, подаѧ̀ ᲂу҆миле́нїе и҆ и҆сцѣле́нїй сле́зы, и҆ прегрѣше́нїй проще́нїе, да несꙋмнѣ́нною дꙋше́ю, ᲂу҆се́рднымъ дх҃омъ постѧ́щесѧ, со а҆́гг҃лы пое́мъ держа́вꙋ твою̀.

Сла́ва, то́йже. И҆ ны́нѣ, бг҃оро́диченъ:

Премꙋ́дрость и҆ сло́во въ твое́мъ чре́вѣ, заче́ншаѧ неизрече́ннѡ мт҃и бж҃їѧ, мі́рꙋ родила̀ є҆сѝ мі́ръ содержа́щаго, и҆ на ѡ҆б̾ѧ́тїѧхъ держа́ла є҆сѝ всѧ̑ ѡ҆б̾е́млющаго пищеда́телѧ всѣ́хъ и҆ созда́телѧ, и҆ гдⷭ҇а, тѣ́мже молю́ тѧ всепѣ́таѧ дв҃о, и҆ вѣ́рою сла́влю тѧ̀, и҆зба́витисѧ прегрѣше́нїй мои́хъ, є҆гда̀ и҆́мамъ предста́ти пред̾ лице́мъ созда́телѧ моегѡ̀, влⷣчце дв҃о чⷭ҇таѧ, твою̀ по́мощь тогда́ ми да́рꙋй: и҆́бо мо́жеши, є҆ли́ка хо́щеши всенепоро́чнаѧ.

Чте́мъ же и҆ вели́кагѡ васі́лїа сло́во ѡ҆ бл҃годаре́нїи. Та́же ѱало́мъ н҃. Канѡ́ны пое́мъ ѻ҆смогла́сника и҆ мине́и, ꙗ҆́коже въ понедѣ́льникъ ᲂу҆каза́сѧ: та́кожде и҆ въ про́чее послѣ́дꙋй.

И҆ трипѣ́снецъ господи́на і҆ѡ́сифа. Гла́съ г҃.

Пѣ́снь в҃.

І҆рмо́съ: Ꙗ҆́кѡ тꙋ́ча на тро́скотъ, и҆ ꙗ҆́кѡ и҆́ней на сѣ́но, да сни́дꙋтъ на зе́млю, глаго́ли моѝ.

Ꙗ҆́кѡ ᲂу҆́тро возсїѧ̀ на́мъ, покаѧ́нїѧ зарѝ, преддве́рїѧ свѣ́тлѡ воздержа́нїѧ.

Тьмы́ мѧ и҆зба́ви хрⷭ҇тѐ внѣ́шнїѧ, мно́жествомъ млⷭ҇ти твоеѧ̀, ꙗ҆́кѡ є҆ди́нъ млⷭ҇тивъ.

Ѻ҆гнѧ́ мѧ и҆схи́ти, и҆ че́рвїѧ сп҃се неꙋсыпа́ющагѡ, покаѧ́нїѧ прилѣжа́нїемъ ѡ҆чище́нна.

Бг҃оро́диченъ: Дв҃о всепѣ́таѧ, бꙋ́ди на́мъ пꙋ́ть покаѧ́нїѧ, ко сп҃се́нїѧ ведꙋ́щїй две́ремъ.

И҆́ный. І҆рмо́съ, гла́съ в҃: Внемли́те лю́дїе моѝ:

Вре́мѧ покаѧ́нїѧ наста̀, потщи́мсѧ хрⷭ҇толю́бцы ѡ҆чи́ститисѧ всѣ́хъ прегрѣше́нїй, и҆ ꙗ҆ви́тисѧ влⷣцѣ бл҃же́нни.

По́стъ чи́стый, безгрѣ́шный потщи́мсѧ соверши́ти ны́нѣ непреста́ннѡ, да ѡ҆брѧ́щемъ прегрѣше́нїй ѡ҆ставле́нїе.

Є҆си́ бо хрⷭ҇тѐ многомлⷭ҇тивъ всѣ́хъ бл҃же, при́снѡ прїе́млѧй въ покаѧ́нїе: тѣ́мже вси́ тѧ при́снѡ сла́вимъ.

Сла́ва, трⷪ҇ченъ: Трⷪ҇цꙋ во є҆ди́ницѣ просла́вимъ, несѣко́мꙋю, неслїѧ́ннꙋ, нераздѣ́льнꙋ сꙋщество́мъ, раздѣ́льна же ли́цы бг҃а.

Бг҃оро́диченъ: Чⷭ҇таѧ дв҃о мт҃и, ᲂу҆молѝ, є҆го́же воплоти́ла є҆сѝ ꙗ҆́кѡ чл҃вѣ́ка дв҃о, и҆ сло́ва: да сп҃се́тъ ѿ бѣ́дъ рабы̑ твоѧ̑.

І҆рмо́съ: Внемли́те лю́дїе моѝ зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ: ꙗ҆́кѡ и҆́мѧ твоѐ гдⷭ҇и, призва́хъ.

Пѣ́снь и҃.

І҆рмо́съ: И҆з̾ безнача́льна ѻ҆ц҃а̀ рожде́ннаго:

Раска́ѧнїѧ вре́мѧ, покаѧ́нїѧ показа́ти плоды̀ досто́йны бг҃ꙋ, дꙋшѐ моѧ̀ потщи́сѧ, воста́ни, и҆ возопі́й прилѣ́жнѡ, въ поще́нїихъ и҆ мл҃твахъ: по́йте, бл҃гослови́те и҆ превозноси́те хрⷭ҇та̀ во вѣ́ки.

Пред̾ѡчи́стимъ бра́тїе дꙋшє́внаѧ чꙋ̑вства, и҆ гдⷭ҇ви ны́нѣ прилѣпи́мсѧ ѡ҆́бразы ᲂу҆миле́нїѧ, вопїю́ще чи́стѣ покаѧ́нїемъ чи́стымъ: по́йте, бл҃гослови́те и҆ превозноси́те хрⷭ҇та̀ во вѣ́ки.

Оу҆ловлѧ́ющаго врага̀ ласкосе́рдыми воспомина́ньми, и҆ невоздержа́нїемъ сла́сти кра́ткїѧ палѧ́ща чꙋ́вство, ᲂу҆мертви́ти потщи́мсѧ прилѣ́жною мл҃твою, пою́ще, бл҃гословѧ́ще и҆ превозносѧ́ще хрⷭ҇та̀ во вѣ́ки.

Бг҃оро́диченъ: Ѡ҆небеси́вшаѧ на́ше земно́е ѻ҆трокови́це смѣше́нїе, ѡ҆лѧдѣ́вшꙋю и҆ и҆стлѣ́вшꙋю дꙋшѝ моеѧ̀ браздꙋ̀, тꙋ́чами твои́хъ щедро́тъ, плодоно́снꙋ добродѣ́тельми покажѝ вопїю́щꙋ, и҆ превозносѧ́щꙋ хрⷭ҇та̀ во вѣ́ки.

И҆́ный. І҆рмо́съ: Въ кꙋпинѣ̀ мѡѷсе́ю:

Пред̾ѡчи́стимсѧ ны́нѣ, не бра́шны то́кмѡ, но и҆ дѣѧ́ньми, и҆ начне́мъ вѣ́рнїи те́плымъ помышле́нїемъ: да созда́телю свѣ́тли ꙗ҆ви́мсѧ во вѣ́ки.

Си́це на́мъ пости́тисѧ подоба́етъ, не во враждѣ̀ и҆ бра́ни, не въ за́висти и҆ рве́нїи, не во тщесла́вїи и҆ ле́сти сокрове́ннѣй, но ꙗ҆́коже хрⷭ҇то́съ, въ смиренномꙋ́дрїи.

Ми́лꙋющїи, речѐ ни́щыѧ, сп҃сꙋ взаи́мъ даю́тъ разꙋ́мнѡ. Ѽ ра́дости неꙋподоби́мыѧ! подае́тъ бо бога́тнѡ воздаѧ́нїѧ до́брыхъ, во всѧ̑ вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ: Є҆ди́нъ бо бг҃ъ, трѝ. со а҆́гг҃лы непреста́ннѡ человѣ́цы восхвалѧ́емъ тѧ̀, всест҃а́ѧ трⷪ҇це: во всѧ̑ вѣ́ки.

Бг҃оро́диченъ: Ра́дꙋйсѧ дв҃о чⷭ҇таѧ бцⷣе мр҃і́е, ѡ҆чисти́лище мі́ра, правосла́вныхъ ро́гъ, молѝ и҆зба́витисѧ ѿ негаси́магѡ ѻ҆гнѧ̀, тѧ̀ славосло́вѧщымъ во всѧ̑ вѣ́ки.

Хва́лимъ, бл҃гослови́мъ, покланѧ́емсѧ гдⷭ҇ви:

І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Тебѐ неѡпали́мꙋю кꙋпинꙋ̀:

Ѿве́рзи на́мъ млⷭ҇ти твоеѧ̀ пречⷭ҇тыѧ ᲂу҆трѡ́бы, покаѧ́нїе человѣ́кѡмъ во сп҃се́нїе дарова́вый є҆ди́не сп҃се многомлⷭ҇тиве.

Оу҆вы̀ мнѣ̀, ко́е стра́шное ѻ҆́ное неꙋмы́тное сꙋди́лище, на не́мже и҆́мамы на́зи твори́ти сло́во, и҆̀хже въ житїѝ ѕлѣ̀ содѣ́ѧхомъ;

Ѡ҆дождѝ на́мъ бл҃гоꙋтро́бїѧ бл҃годѣ́телю ка́плю, потоплѧ́ющꙋю на́шꙋ скве́рнꙋ всю̀, вины̑ покаѧ́нїѧ на́мъ подава́ѧ.

Всѝ ᲂу҆се́рднымъ се́рдцемъ, въ ст҃а́гѡ поста̀ преддвє́рїѧ свѣ́тлѡ совше́дше, бл҃года́рствєнныѧ пѣ̑сни хрⷭ҇тꙋ̀ принесе́мъ.

Бг҃оро́диченъ: Тѧ̀ крѣ́пкꙋю предста́тельницꙋ, и҆ и҆звѣ́стнꙋю наде́ждꙋ, воспѣва́юще бл҃гоче́стнѡ, мо́лимъ: сн҃а твоего̀ молѝ дв҃о сп҃сти́сѧ на́мъ.

И҆́ный. І҆рмо́съ: Двⷭ҇тво твоѐ бцⷣе нескве́рнаѧ:

Ны́нѣ пред̾ѡчи́стимсѧ въ постѣ̀ и҆ слеза́хъ, и҆ въ ве́лїихъ и҆справле́нїихъ, да ѡ҆брѧ́щемъ ве́лїю млⷭ҇ть.

Ны́нѣ подража́имъ мꙋ̑дрыѧ дѣ̑вы хрⷭ҇толю́бцы, и҆ потщи́мсѧ хрⷭ҇та̀ ᲂу҆срѣ́сти со свѣща́ми свѣ́тлыми.

Ны́нѣ подража́имъ и҆лїю̀ пости́вшасѧ, и҆ бѣжа́вша ѿ лꙋка́выѧ і҆езаве́ли, да та́кѡ вознесе́мсѧ ѿ землѝ.

Сла́ва, трⷪ҇ченъ: Ст҃ы́й, ст҃ы́й, ст҃ы́й, трист҃ы́й, ѻ҆́ч҃е вседержи́телю, и҆ сн҃е є҆диносꙋ́щне со дх҃омъ, є҆ди́но бж҃ество̀.

Бг҃оро́диченъ: Ѡ҆ тебѣ̀ хва́лимсѧ, и҆ къ тебѣ̀ прибѣга́емъ, чⷭ҇таѧ, приснодв҃о честна́ѧ, мꙋче́нїѧ и҆зба́ви всѧ̑ ны̀.

І҆рмо́съ: Дѣ́вство твоѐ бцⷣе нескве́рнаѧ, є҆́же не ѡ҆палѝ ѻ҆́гнь бж҃е́ственный, велича́емъ.

На стїхо́внѣ стїхи́ра самогла́сна, гла́съ г҃:

Любе́знѡ лю́дїе по́стъ ѡ҆блобыза́имъ: приспѣ́ бо дх҃о́вныхъ по́двигѡвъ нача́ло: ѡ҆ста́вимъ тѣле́сное сладостра́стїе, возрасти́мъ дꙋшє́внаѧ дарова̑нїѧ, спостра́ждемъ ꙗ҆́кѡ рабѝ хрⷭ҇то́ви, да и҆ спросла́вимсѧ ꙗ҆́кѡ ча̑да бж҃їѧ, и҆ дх҃ъ ст҃ы́й въ на́съ все́льсѧ, просвѣти́тъ дꙋ́шы на́шѧ.

Сті́хъ: И҆спо́лнихомсѧ заꙋ́тра млⷭ҇ти твоеѧ̀:

Па́ки тꙋ́же стїхи́рꙋ:

Сті́хъ: И҆ бꙋ́ди свѣ́тлость:

Мꙋ́чениченъ: Царе́й и҆ мꙋчи́телей стра́хъ ѿри́нꙋша хрⷭ҇тѡ́вы во́ини, и҆ бл҃годерзнове́ннѡ, и҆ мꙋ́жественнѡ того̀ и҆сповѣ́даша, всѣ́хъ гдⷭ҇а бг҃а, и҆ цр҃ѧ̀ на́шего: и҆ мо́лѧтсѧ ѡ҆ дꙋша́хъ на́шихъ.

Сла́ва, и҆ ны́нѣ, бг҃оро́диченъ: Бцⷣе, предста́тельство всѣ́хъ молѧ́щихсѧ, на тебѐ надѣ́емсѧ, и҆ тобо́ю хва́лимсѧ, въ тебѣ̀ всѐ ᲂу҆пова́нїе на́ше є҆́сть. молѝ и҆з̾ тебѐ роди́вшагосѧ ѡ҆ непотре́бныхъ рабѣ́хъ твои́хъ.