Въ сре́дꙋ ва́їй, на ᲂу҆́трени трⷪ҇чны гла́са.
По а҃-мъ стїхосло́вїи сѣда́льны кре́стны ѻ҆смогла́сника два̀, съ крⷭ҇тобг҃оро́дичнымъ. По в҃-мъ же стїхосло́вїи сѣда́ленъ господи́на і҆ѡ́сифа. Гла́съ в҃. Подо́бенъ: Ка́мень гро́бный:
Ꙗ҆́кѡ ка́менемъ ѡ҆тѧгче́нъ мно́гими грѣха́ми, во гро́бѣ лежꙋ̀ небреже́нїѧ ще́дре: ѿ негѡ́же мѧ̀ возведѝ, бл҃гоꙋтро́бне гдⷭ҇и. [Два́жды.]
Крⷭ҇тобг҃оро́диченъ.
Подо́бенъ: Милосе́рдїѧ:
Чⷭ҇тны́мъ крⷭ҇то́мъ сн҃а твоегѡ̀ соблюда́еми влⷣчце чⷭ҇таѧ бцⷣе, всѧ́кїй прило́гъ бори́телѧ, всѝ ᲂу҆до́бь ѿража́емъ. тѣ́мже тѧ̀ по до́лгꙋ прославлѧ́емъ ꙗ҆́кѡ мт҃рь свѣ́та, и҆ є҆ди́нꙋ наде́ждꙋ дꙋ́шъ на́шихъ.
По г҃-мъ стїхосло́вїи сѣда́ленъ, господи́на ѳео́дѡра. Гла́съ г҃.
Подо́бенъ: Красотѣ̀ дѣ́вства:
Дне́сь ла́зарь ᲂу҆ме́рый погреба́етсѧ, и҆ рыда́нїе пою́тъ сегѡ̀ срѡ́дницы, ꙗ҆́коже прови́децъ и҆ бг҃ъ, стрⷭ҇ть предре́клъ є҆сѝ: ла́зарь ᲂу҆́спе, ᲂу҆ч҃нкѡ́мъ провѣща́ѧ, но ны́нѣ и҆дꙋ̀ воскреси́ти є҆го́же созда́хъ. сегѡ̀ ра́ди тебѣ̀ всѝ вопїе́мъ: сла́ва держа́вѣ крѣ́пости твоеѧ̀. [Два́жды.]
Крⷭ҇тобг҃оро́диченъ: Неискꙋсобра́чнаѧ чⷭ҇таѧ, и҆ мт҃и твоѧ̀ хрⷭ҇тѐ, зрѧ́щи тѧ̀ ме́ртва ви́сѧща на дре́вѣ, мт҃рски рыда́ющи глаго́лаше: что́ ти воздадѐ є҆вре́йскїй беззако́нный собо́ръ безбл҃года́тный, мно́гихъ и҆ вели́кихъ твои́хъ дарѡ́въ, сн҃е мо́й, наслажде́йсѧ; пою̀ твоѐ бж҃е́ственное снизхожде́нїе.
Канѡ́нъ въ мине́и: и҆ трипѣ́снецъ, господи́на і҆ѡ́сифа, гла́съ в҃.
Пѣ́снь г҃.
І҆рмо́съ: Непло́дствовавшїй мо́й ᲂу҆́мъ:
Си́лою крⷭ҇та̀ твоегѡ̀ ᲂу҆крѣпи́въ ᲂу҆́мъ мо́й, и҆знемо́гшїй прило́гми лꙋка́выми, къ хотѣ́нїю твоемꙋ̀ напра́ви гдⷭ҇и.
Оу҆ны́нїѧ дрема́нїемъ, на ѻ҆дрѣ̀ спѧ́ща мѧ̀ сласте́й воздви́гни гдⷭ҇и, и҆ твои̑мъ стрⷭ҇те́мъ покло́нника покажѝ.
Просвѣти́вшесѧ дꙋша́ми, посто́мъ чи́сты ᲂу҆срѣ́сти по́йдемъ хрⷭ҇та̀, ко і҆ерⷭ҇ли́мꙋ грѧдꙋ́щаго пло́тїю.
Бг҃оро́диченъ: Неѡпали́вшаѧсѧ ѻ҆гне́мъ бж҃ества̀ чⷭ҇таѧ, попалѝ моѧ̑ вє́щнаѧ стремлє́нїѧ страсте́й, ꙗ҆́кѡ да вѣ́рнѡ чⷭ҇таѧ сла́влю тѧ̀.
И҆́ный. Гла́съ г҃. І҆рмо́съ: Непло́днаѧ дꙋшѐ:
Дне́сь ла́зарь ᲂу҆ме́рый, не ᲂу҆таи́сѧ всеви́дѧщагѡ ѻ҆́ка і҆и҃сова. тѣ́мже сказꙋ́етъ сїѐ ᲂу҆ч҃нкѡ́мъ, вопїѧ̀: ла́зарь дрꙋ́гъ на́шъ ᲂу҆́спе, воскреси́ти є҆го̀ и҆дꙋ̀.
Во і҆ꙋде́ю гдⷭ҇и па́ки и҆тѝ ре́къ, ᲂу҆ч҃нкѝ ᲂу҆страши́лъ є҆сѝ, но де́рзостнѡ вопїѧ́ше ѳѡма̀: живо́тъ є҆́сть, и҆́демъ, а҆́ще ᲂу҆́бѡ и҆ ᲂу҆́мремъ, а҆́бїе ѡ҆живе́мъ.
Трⷪ҇ченъ: Трⷪ҇це є҆диносꙋ́щнаѧ, вседержи́телю ѻ҆́ч҃е, сн҃е собезнача́льный, съ сопресто́льнымъ бж҃е́ственнымъ дх҃омъ, є҆ди́но поклоне́нїе, бж҃ество̀ несозда́нное, тебѐ пое́мъ всѝ человѣ́цы.
Бг҃оро́диченъ: Дв҃о мт҃и пречⷭ҇таѧ, ко́реню і҆ессе́овъ, ѿ негѡ́же хрⷭ҇то́съ возсїѧ̀, живоно́сный цвѣ́тъ земноро́дныхъ, є҆́юже и҆зба́вихомсѧ тлѝ и҆ сме́рти, тѧ̀ пое́мъ всѝ чⷭ҇таѧ.
Сла́ва тебѣ̀ бж҃е на́шъ, сла́ва тебѣ̀.
Ра́дꙋйсѧ сїѡ́не, ны́нѣ грѧде́тъ цр҃ь тво́й кро́токъ, ꙗ҆́коже прⷪ҇ро́къ возопѝ, и҆ но́ситъ жребѧ̀ сего̀ пло́тски, рꙋко́ю свое́ю всѧ̑ содержа́щаго: пое́мъ держа́вꙋ є҆гѡ̀.
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть пра́веденъ, па́че тебѐ гдⷭ҇и.
Пѣ́снь и҃.
І҆рмо́съ: Въ кꙋпинѣ̀ мѡѷсе́ю:
Смире́нныѧ моеѧ̀ дꙋшѝ тѧ́жкїй ка́мень лю́тагѡ ᲂу҆ны́нїѧ ѿвалѝ хрⷭ҇тѐ, и҆ воздви́гни мѧ̀ ѿ гро́ба нечꙋ́вствїѧ въ сла́вꙋ твою̀ сло́ве.
Сме́рть дрꙋ́га твоегѡ̀ предсказа́лъ є҆сѝ дрꙋгѡ́мъ, за млⷭ҇рдїе млⷭ҇ти, прови́дче и҆ бж҃е: є҆го́же и҆мѣ́лъ є҆сѝ воздви́гнꙋти и҆з̾ гро́ба четверодне́вна, къ твоемꙋ̀ славосло́вїю.
Во і҆ꙋде́ю па́ки хрⷭ҇тѐ грѧде́ши, и҆́щꙋщꙋю жи́зни тѧ̀ дре́во, дре́вомъ ᲂу҆би́ти, жела́ѧ ѡ҆безсме́ртвити ᲂу҆мерщвлє́нныѧ дре́ва снѣ́дїю.
Бг҃оро́диченъ: Въ тебѣ̀ дв҃о чⷭ҇таѧ, ви̑дѣна бы́ша всѧ̑ шє́ствїѧ бг҃а, сохра́ншагѡ твою̀ чистотꙋ̀ по ржⷭ҇твѣ̀, запечатлѣ́ннꙋ ꙗ҆́вѣ во всѧ̑ вѣ́ки.
И҆́ный. І҆рмо́съ: И҆з̾ безнача́льнагѡ ѻ҆ц҃а̀:
Ла́зарь дне́сь ᲂу҆ме́рый и҆зно́ситсѧ, дрꙋ́гъ хрⷭ҇то́въ, и҆ рыда́ютъ сꙋ́щїи съ марі́ею и҆ ма́рѳою всѝ: хрⷭ҇то́съ же ра́достїю прихо́дитъ къ немꙋ̀, показа́ти лю́демъ, ꙗ҆́кѡ то́й є҆́сть живо́тъ всѣ́хъ.
Ꙗ҆́кѡ и҆з̾ горы̀ є҆леѡ́нскїѧ, ѿ высоты̀ ми́лостыней, добродѣ́телей вѣ́твїе лю́дїе сѣкꙋ́ще, прїиди́те ᲂу҆гото́вимъ къ на́мъ мы́сленнѡ прише́ствїе хрⷭ҇то́во, пою́ще, бл҃гословѧ́ще є҆го̀, и҆ превозносѧ́ще во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Трїѷпоста́снаѧ є҆ди́нице, ѻ҆́ч҃е, сн҃е и҆ дш҃е живы́й, є҆ди́но бж҃ество̀, є҆ди́но црⷭ҇тво, тѧ̀ хва́лѧтъ незаходи́маго свѣ́та а҆́гг҃льскаѧ вѡ́инства, и҆ мы̀ земні́и пое́мъ, бл҃гослови́мъ, и҆ превозно́симъ во всѧ̑ вѣ́ки.
Бг҃оро́диченъ: Сѐ всѝ ро́дове бл҃жи́мъ тѧ̀ пречⷭ҇таѧ, вели̑чїѧ твоѧ̑ зрѧ́ще: ты́ бо ражда́еши преесте́ственнѡ всѣ́хъ творца̀ бг҃а сꙋ́ща и҆ человѣ́ка. тѣ́мже тѧ̀ бл҃гослови́мъ, и҆ превозно́симъ во вѣ́ки.
Сла́ва тебѣ̀ бж҃е на́шъ, сла́ва тебѣ̀.
Со ѻ҆́троки и҆ мы̀ ᲂу҆срѧ́щимъ хрⷭ҇та̀ бг҃а, вмѣ́стѡ ва́їй приносѧ́ще ми́лостыню, въ мл҃твѣ серде́чнѣй, съ вѣ́твьми ѡ҆са́нна вопїю́ще: бл҃гослови́те, и҆ превозноси́те є҆го̀ во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: И҆з̾ безнача́льнагѡ ѻ҆ц҃а̀ рожде́ннаго пре́жде вѣ̑къ бг҃а, и҆ въ послѣ̑днѧѧ ѿ бцⷣы въ пло́ть ѡ҆бле́кшасѧ, ꙗ҆́кѡ соверше́нна человѣ́ка, и҆ бг҃а и҆́стинна, по́йте, бл҃гослови́те, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ѿ земноро́дныхъ кто̀:
Данїи́лъ посто́мъ ѡ҆гражде́нъ, заградѝ ᲂу҆ста̀ ѕвѣре́й: семꙋ̀ ревнꙋ́ющи дꙋшѐ моѧ̀, рыка́ющаго ꙗ҆́коже льва̀ ѕмі́ѧ, и҆ и҆́щꙋщаго бра́шно сотвори́ти всѧ́кꙋю дꙋ́шꙋ, крⷭ҇тною по́мощїю ѿженѝ.
Сло́ве бж҃їй, ᲂу҆мерщвле́ннꙋю грѣха́ми дꙋ́шꙋ мою̀, и҆ затворе́ннꙋю во гро́бѣ престꙋпле́нїѧ, животода́тельнымъ твои́мъ сло́вомъ воскреси́въ, принестѝ тебѣ̀ вѣ̑тви добродѣ́телей, побѣди́телю сме́рти, сподо́би.
Нб҃о ꙗ҆́кѡ прⷭ҇то́лъ и҆мѣ́ѧй, и҆ подно́жїе зе́млю: бг҃а ѻ҆ц҃а̀ сло́во, на жребѧ́ти носи́мь, во гра́дъ вхо́дитъ ст҃ы́й и҆з̾ ᲂу҆́стъ младе́нєцъ хвалꙋ̀ кра́снꙋю, ꙗ҆́кѡ цр҃ь всѣ́хъ соверши́ти.
Бг҃оро́диченъ: Въ жена́хъ ты̀ є҆ди́на ᲂу҆краси́ласѧ є҆сѝ, ѽ пречꙋ́днаѧ чⷭ҇таѧ! краснѣ́йшее сло́во роди́вши, па́че всѣ́хъ человѣ̑къ ꙗ҆́вльшагосѧ краснѣ́йша: того̀ ᲂу҆̀бо молѝ, скве́рнꙋ ѡ҆чи́стити, дв҃о, се́рдца моегѡ̀.
И҆́ный. І҆рмо́съ: На сїна́йстѣй горѣ̀:
Надгрѡ́бныѧ сле́зы и҆злива́ютъ ла́зарєвы сєстры̀, зрѧ́щыѧ сро́дника дне́сь под̾ ка́менемъ го́рькимъ: хрⷭ҇то́съ же мо́й и҆здале́ча сїѐ сказꙋ́ѧ, глаго́лаше а҆пⷭ҇лѡмъ свои̑мъ, ра́дꙋюсѧ ва́съ ра́ди, не бѣ́хъ бо пло́тїю та́мѡ.
Па́ки грѧде́тъ къ тебѣ̀, ᲂу҆бі́йце і҆ꙋде́е, хрⷭ҇то́съ, сп҃си́тельнꙋю стрⷭ҇ть жела́ѧ и҆спо́лнити ꙗ҆́кѡ бг҃ъ: є҆го́же и҆ска́ла є҆сѝ ка́менїемъ ᲂу҆би́ти, сѐ къ тебѣ̀ самозва́нъ хотѧ̀ прихо́дитъ ко ᲂу҆бі́йствꙋ твоемꙋ̀, во є҆́же сп҃стѝ на́съ.
Трⷪ҇ченъ: Бж҃ество̀ є҆ди́ница, и҆ трⷪ҇ца є҆́сть: ѽ пресла́внагѡ ѡ҆браще́нїѧ! соединѧ́емаѧ є҆стество́мъ, дѣли́тсѧ ли́цы, сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ: сїѧ̀ ѻ҆ц҃ъ є҆́сть, сн҃ъ, и҆ дх҃ъ живы́й, соблюда́ющаѧ всѐ.
Бг҃оро́диченъ: Дѣторо́днꙋю дв҃ꙋ кто̀ слы́ша, и҆ мт҃рь без̾ мꙋ́жа; мр҃і́е соверша́еши чꙋ́до: но скажи́ ми, ка́кѡ; не и҆спытꙋ́й глꙋбины̀ бг҃орожде́нїѧ моегѡ̀: сїѐ всеи́стинное, па́че человѣ́ча ᲂу҆ма̀ постиже́нїе.
Сла́ва тебѣ̀ бж҃е на́шъ, сла́ва тебѣ̀.
Ѿ фі̑нїкъ ва̑їа спле́тше мы́сленнѡ, и҆ чꙋ́вственнѡ срѣ́тенїе влⷣцѣ сотвори́мъ, грѧдꙋ́щемꙋ къ на́мъ: и҆́бо бл҃гослове́нъ грѧды́й во и҆́мѧ гдⷭ҇а же и҆ ѻ҆ц҃а̀, ꙗ҆́кѡ сн҃ъ и҆́стинный.
І҆рмо́съ: На сїна́йстѣй горѣ̀, ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.
Свѣти́ленъ гла́са.
На стїхо́внѣ стїхи́ра самогла́сна днѐ, два́жды. Гла́съ а҃:
І҆и҃ль въ порфѵ́рꙋ и҆ червлени́цꙋ ѡ҆блача́шесѧ, ѻ҆де́ждами сщ҃е́нными и҆ црⷭ҇кими сїѧ́ѧ: зако́номъ же и҆ прⷪ҇ро́ки богатѣ́ѧ, зако́нными слꙋ́жбами веселѧ́шесѧ: но тебѐ ѡ҆бнища́вшаго распе́нъ внѣ̀ вра́тъ бл҃годѣ́телю, и҆ жи́ва по распѧ́тїи ѿмета́ѧсѧ, въ нѣ́драхъ бг҃а ѻ҆ц҃а̀ присносꙋ́щнагѡ, жа́ждетъ ка́пли бл҃года́ти: ꙗ҆́коже бога́тый неми́лостивый ѿ ла́зарѧ ᲂу҆бо́гагѡ, и҆́же въ порфѵ́рѣ и҆ червлени́цѣ, въ негаси́мый ѻ҆́гнь вше́дъ: и҆ ви́дѧ болѣ́знꙋетъ, пе́рвѣе крꙋпи́цъ и҆́стины скꙋ̑дныѧ лю́ди ꙗ҆зы́чєскїѧ, ны́нѣ въ нѣ́дрѣхъ вѣ́ры а҆враа́ма грѣ́ющыѧсѧ, твоеѧ̀ кро́ве багрѧни́цꙋ съ червлени́цею кр҃ще́нїѧ носѧ́щыѧ, и҆ твои́ми ѡ҆би́лꙋющыѧ и҆ наслажда́ющыѧсѧ дарова́нїи, и҆ глаго́лющыѧ: хрⷭ҇тѐ бж҃е на́шъ сла́ва тебѣ̀.
Мꙋ́чениченъ: Ва́съ прехва́льнїи мч҃нцы, ни ско́рбь, ни тѣснота̀, ни гла́дъ, ни гоне́нїе нижѐ ра̑ны, ни ꙗ҆́рость ѕвѣре́й, ни ме́чь, нижѐ ѻ҆́гнь претѧ́й, разлꙋчи́ти ѿ бг҃а возмого́ша: любо́вїю же па́че къ немꙋ̀, ꙗ҆́кѡ въ чꙋжди́хъ подви́гшесѧ тѣлесѣ́хъ є҆стество̀ забы́сте, сме́рть презрѣ́вше. тѣ́мже и҆ по достоѧ́нїю болѣ́зней ва́шихъ мздꙋ̀ прїѧ́сте, нбⷭ҇нагѡ црⷭ҇твїѧ наслѣ̑дницы бы́сте, моли́тесѧ ѡ҆ дꙋша́хъ на́шихъ.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Всехва́льнїи мч҃нцы:
Ви́дѧщи ви́сима хрⷭ҇тѐ, чи́стѡ ро́ждшаѧ тѧ̀, повѣ́сившаго на вода́хъ зе́млю чл҃вѣколю́бче, взыва́ше: ᲂу҆вы̀ мнѣ̀, что̀ стра́нное видѣ́нїе, ка́кѡ за́йде добро́та твоѧ̀, сладча́йшїй сн҃е, безмѣ́рнаѧ, велича́ю твою̀ млⷭ҇ть, ꙗ҆́кѡ стра́ждеши во́лею за всѣ́хъ.
На ѕ҃-мъ часѣ̀ тропа́рь прⷪ҇ро́чества. Гла́съ є҃:
Млⷭ҇ти твоѧ̑ гдⷭ҇и сотворѝ съ на́ми, и҆ не преда́ждь на́съ беззако́нїемъ на́шымъ, ст҃ы́й влⷣко вседержи́телю, тебѣ̀ мо́лимсѧ.
Прокі́менъ,ѱало́мъ рв҃і. Гла́съ д҃: Хвали́те ѻ҆́троцы гдⷭ҇а, хвали́те и҆́мѧ гдⷭ҇не. Сті́хъ: Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка.
Прⷪ҇ро́чества и҆са́їина чте́нїе. [Глава̀ н҃и, ст. а҃- а҃і.]
Та́кѡ глаго́летъ гдⷭ҇ь: возопі́й крѣ́постїю и҆ не пощадѝ: ꙗ҆́кѡ трꙋбꙋ̀ возвы́си гла́съ тво́й и҆ возвѣстѝ лю́демъ мои̑мъ грѣхѝ и҆́хъ и҆ до́мꙋ і҆а́кѡвлю беззакѡ́нїѧ и҆́хъ. Менѐ де́нь ѿ днѐ и҆́щꙋтъ и҆ разꙋмѣ́ти пꙋти̑ моѧ̑ жела́ютъ, ꙗ҆́кѡ лю́дїе пра́вдꙋ сотвори́вшїи и҆ сꙋда̀ бг҃а своегѡ̀ не ѡ҆ста́вившїи: про́сѧтъ ны́нѣ ᲂу҆ менє̀ сꙋда̀ пра́ведна, и҆ прибли́житисѧ ко гдⷭ҇ꙋ жела́ютъ, глаго́люще: Что̀ ꙗ҆́кѡ пости́хомсѧ, и҆ не ᲂу҆ви́дѣлъ є҆сѝ; смири́хомъ дꙋ́шы на́шѧ, и҆ не ᲂу҆вѣ́дѣлъ є҆сѝ; во дни̑ бо поще́нїй ва́шихъ ѡ҆брѣта́ете вѡ́ли ва́шѧ, и҆ всѧ̑ подрꙋ̑чныѧ ва́шѧ томитѐ. А҆́ще въ сꙋдѣ́хъ и҆ сва́рѣхъ постите́сѧ, и҆ бїе́те пѧстьмѝ смире́ннаго, вскꙋ́ю мнѣ̀ постите́сѧ ꙗ҆́коже дне́сь, є҆́же ᲂу҆слы́шанꙋ бы́ти съ во́племъ гла́сꙋ ва́шемꙋ; Не сицева́гѡ поста̀ а҆́зъ и҆збра́хъ, и҆ днѐ, є҆́же смири́ти человѣ́кꙋ дꙋ́шꙋ свою̀, нижѐ а҆́ще слѧче́ши ꙗ҆́кѡ се́рпъ вы́ю твою̀, и҆ вре́тище и҆ пе́пелъ посте́леши, нижѐ та́кѡ нарече́те по́стъ прїѧ́тенъ. Не такова́гѡ [бо] поста̀ а҆́зъ и҆збра́хъ, глаго́летъ гдⷭ҇ь: но разрѣша́й всѧ́къ соꙋ́зъ непра́вды, разрꙋша́й ѡ҆бдолжє́нїѧ наси́льныхъ писа́нїй, ѿпꙋстѝ сокрꙋшє́нныѧ въ свобо́дꙋ, и҆ всѧ́кое писа́нїе непра́ведное раздерѝ. Раздроблѧ́й а҆́лчꙋщымъ хлѣ́бъ тво́й, и҆ ни́щыѧ безкрѡ́вныѧ введѝ въ до́мъ тво́й: а҆́ще ви́диши на́га, ѡ҆дѣ́й, и҆ ѿ сво́йственныхъ пле́мене твоегѡ̀ не пре́зри. Тогда̀ разве́рзетсѧ ра́нѡ свѣ́тъ тво́й, и҆ и҆сцѣлє́нїѧ твоѧ̑ ско́рѡ возсїѧ́ютъ: и҆ пред̾и́детъ пред̾ тобо́ю пра́вда твоѧ̀, и҆ сла́ва бж҃їѧ ѡ҆б̾и́метъ тѧ̀. Тогда̀ воззове́ши, и҆ бг҃ъ ᲂу҆слы́шитъ тѧ̀, и҆ є҆щѐ глаго́лющꙋ тѝ, рече́тъ: сѐ прїидо́хъ. а҆́ще ѿи́меши ѿ себѐ соꙋ́зъ, и҆ рꙋкобїе́нїе, и҆ глаго́лъ ропта́нїѧ, И҆ да́си а҆́лчꙋщемꙋ хлѣ́бъ ѿ дꙋшѝ твоеѧ̀, и҆ дꙋ́шꙋ смире́ннꙋю насы́тиши: тогда̀ возсїѧ́етъ во тьмѣ̀ свѣ́тъ тво́й, и҆ тьма̀ твоѧ̀ бꙋ́детъ ꙗ҆́кѡ полꙋ́дне. И҆ бꙋ́детъ бг҃ъ тво́й съ тобо́ю при́снѡ.
Прокі́менъ ѱало́мъ рг҃і. Гла́съ ѕ҃. Бл҃гослове́ни вы̀ гдⷭ҇ви сотво́ршемꙋ нб҃о и҆ зе́млю. Сті́хъ: Нб҃о нб҃сѐ гдⷭ҇ви, зе́млю же дадѐ сыновѡ́мъ человѣ́чєскимъ.