Въ недѣ́лю ве́чера,

на Гдⷭ҇и воззва́хъ поста́вимъ стїхѡ́въ і҃: и҆ пое́мъ д҃, ᲂу҆мили́тельны гла́са ѻ҆смогла́сника: и҆ трипѣ́снца подо́бны. Гла́съ а҃.

Подо́бенъ: Прехва́льнїи мч҃нцы:

Ѡ҆бнища́въ бога́тый хрⷭ҇тѐ, человѣ́ки ѡ҆богати́лъ є҆сѝ безсме́ртїемъ и҆ свѣ́тлостїю. тѣ́мже ѡ҆бнища́вшаго сластьмѝ житїѧ̀, добродѣ́тельми мѧ̀ ѡ҆богатѝ, и҆ ᲂу҆бо́гомꙋ ла́зарю сочинѝ, бога́тагѡ мѧ̀ мꙋче́нїѧ и҆збавлѧ́ѧ, и҆ гее́нны предлежа́щїѧ мнѣ̀.

Ѕло́бою ѡ҆богати́хсѧ лю́тѣ, и҆ сла́дость возлюби́хъ, и҆ сꙋ́щихъ въ житїѝ наслади́хсѧ сласте́й, гдⷭ҇и, и҆ ѻ҆гню̀ гее́нны подсꙋжде́нъ бы́хъ: гла́домъ та́юща ᲂу҆мо́мъ, ꙗ҆́кѡ ла́зарѧ презира́ема, пред̾ враты̀ бж҃е́ственныхъ дѣѧ́нїй пове́ржена, ᲂу҆ще́дри мѧ̀ влⷣко.

И҆́на стїхи́ра, гла́съ то́йже.

Подо́бенъ: Ѻ҆́блакъ тѧ̀:

Шестꙋ́ю ѿ честны́хъ постѡ́въ седми́цꙋ, ᲂу҆се́рднѡ начина́юще, гдⷭ҇ви предпра́зднственное пѣ́нїе ва́їй принесе́мъ вѣ́рнїи: грѧдꙋ́щемꙋ во сла́вѣ, си́лою бж҃ества̀ во і҆ерꙋсали́мъ, ᲂу҆мертви́ти сме́рть. тѣ́мже ᲂу҆гото́вимъ бл҃гоче́стнѡ побѣ̑дныѧ ѡ҆́бразы, вѣ̑тви добродѣ́тєльныѧ, ѻ҆са́нна вопїю́ще творцꙋ̀ всѣ́хъ.

И҆ мине́и г҃. Сла́ва, и҆ ны́нѣ, бг҃оро́диченъ: Вхо́дъ. Свѣ́те ти́хїй. Прокі́менъ, гла́съ и҃: Да́лъ є҆сѝ достоѧ́нїе: Со стїхѝ є҆гѡ̀: И҆щѝ въ недѣ́лю а҃ поста̀. И҆ прѡ́чаѧ, ꙗ҆́коже ѻ҆бы́чно.

На стїхо́внѣ самогла́сенъ днѐ, два́жды. Гла́съ а҃:

Чꙋ́денъ сп҃совъ на́съ ра́ди чл҃вѣколюби́вый нра́въ, хотѧ́щихъ ᲂу҆́бѡ бы́ти ра́зꙋмъ, ꙗ҆́кѡ настоѧ́щихъ стѧжа́въ, ла́зарево и҆ бога́тагѡ житїѐ ѡ҆бличѝ. ѻ҆бою̀ коне́цъ смотрѧ́юще: ѻ҆́вагѡ ᲂу҆́бѡ бѣжи́мъ немилосе́рдїѧ и҆ безчеловѣ́чїѧ, ѻ҆́вагѡ же поревнꙋ́имъ терпѣ́нїю и҆ веледꙋ́шїю, во є҆́же съ ни́мъ во а҆враа́млихъ нѣ́драхъ грѣ́ємымъ вопи́ти: правосꙋ́де гдⷭ҇и, сла́ва тебѣ̀.

Мꙋ́чениченъ: Мл҃твами гдⷭ҇и, всѣ́хъ ст҃ы́хъ и҆ бцⷣы, тво́й ми́ръ да́ждь на́мъ, и҆ поми́лꙋй на́съ, ꙗ҆́кѡ є҆ди́нъ ще́дръ.

Сла́ва, и҆ ны́нѣ, бг҃оро́диченъ: Нбⷭ҇ныхъ чинѡ́въ ра́дованїе, на землѝ человѣ́кѡвъ крѣ́пкое предста́тельство, пречⷭ҇таѧ дв҃о, сп҃си́ ны и҆̀же къ тебѣ̀ прибѣга́ющыѧ, ꙗ҆́кѡ на тѧ̀ ᲂу҆пова́нїе по бз҃ѣ бцⷣе возложи́хомъ.