Недѣ́лѧ, въ ню́же чте́тсѧ сщ҃е́нное и҆ ст҃о́е є҆ѵⷢ҇лїе, при́тчи мытарѧ̀ и҆ фарїсе́а

Въ сꙋббѡ́тꙋ ве́чера, по предначина́тельномъ ѱалмѣ̀, стїхосло́вимъ

Бл҃же́нъ мꙋ́жъ: а҃-ю каѳі́смꙋ всю̀.

На Гдⷭ҇и воззва́хъ, поста́вимъ стїхѡ́въ і҃: и҆ пое́мъ ѻ҆смогла́сника стїхи̑ры воскрⷭ҇ны г҃: и҆ а҆натѡ́лїевы д҃: и҆ трїѡ́ди самогла́сны двѣ̀, повторѧ́юще пе́рвꙋю. Гла́съ а҃.

Не помо́лимсѧ фарїсе́йски, бра́тїе: и҆́бо возносѧ́й себѐ смири́тсѧ. смири́мъ себѐ пред̾ бг҃омъ, мыта́рски поще́нїемъ зовꙋ́ще: ѡ҆чи́сти ны̀ бж҃е, грѣ̑шныѧ.

Фарїсе́й тщесла́вїемъ побѣжда́емь, и҆ мыта́рь покаѧ́нїемъ приклонѧ́емь, пристꙋпи́ста къ тебѣ̀ є҆ди́номꙋ влⷣцѣ: но ѻ҆́въ ᲂу҆́бѡ похвали́всѧ, лиши́сѧ бл҃ги́хъ: ѻ҆́въ же ничто́же вѣща́въ, сподо́бисѧ дарова́нїй. въ си́хъ воздыха́нїихъ ᲂу҆тверди́ мѧ хрⷭ҇тѐ бж҃е, ꙗ҆́кѡ чл҃вѣколю́бецъ.

Сла́ва, гла́съ и҃: Вседержи́телю гдⷭ҇и, вѣ́мъ, коли́кѡ мо́гꙋтъ сле́зы: є҆зекі́ю бо ѿ вра́тъ сме́ртныхъ возведо́ша, грѣ́шнꙋю ѿ многолѣ́тныхъ согрѣше́нїй и҆зба́виша, мытарѧ́ же па́че фарїсе́а ѡ҆правда́ша: и҆ молю́сѧ, съ ни́ми причта́въ, поми́лꙋй мѧ̀.

И҆ ны́нѣ, бг҃оро́диченъ а҃, рѧдова́гѡ гла́са.

На лїті́и стїхи́ра ст҃а́гѡ ѻ҆би́тели, по ѻ҆бы́чаю.

Сла́ва, гла́съ г҃: Мытарѧ̀ и҆ фарїсе́а разли́чїе разꙋмѣ́вши дꙋшѐ моѧ̀, ѻ҆́нагѡ ᲂу҆́бѡ возненави́ждь горды́нный гла́съ, ѻ҆́вагѡ же ревнꙋ́й благоꙋмиле́нной мл҃твѣ, и҆ возопі́й: бж҃е ѡ҆чи́сти мѧ̀ грѣ́шнаго, и҆ поми́лꙋй мѧ̀.

И҆ ны́нѣ, бг҃оро́диченъ воскрⷭ҇нъ, въ то́йже гла́съ.

На стїхо́внѣ стїхи̑ры ѻ҆смогла́сника по а҆лфави́тꙋ.

Сла́ва, гла́съ є҃: Ѡ҆тѧгче́нныма ѻ҆чи́ма мои́ма ѿ беззако́нїй мои́хъ, не могꙋ̀ воззрѣ́ти и҆ ви́дѣти высотꙋ̀ нбⷭ҇нꙋю: но прїими́ мѧ, ꙗ҆́кѡ мытарѧ̀ ка́ющасѧ, сп҃се, и҆ поми́лꙋй мѧ̀.

И҆ ны́нѣ, бг҃оро́диченъ, въ то́йже гла́съ: Хра́мъ и҆ две́рь є҆сѝ: Тропа́рь: Бцⷣе дв҃о, глаго́летсѧ три́жды. И҆ быва́етъ бл҃гослове́нїе хлѣ́бѡвъ, и҆ раздаѧ́нїе. И҆ чте́нїе ве́лїе въ посла́нїихъ а҆пⷭ҇льскихъ.

[зрѝ] Послѣ́дованїе прилꙋчи́вшагѡсѧ ст҃а́гѡ въ недѣ́лю сїю̀, и҆ въ блꙋ́днагѡ, пое́мъ въ пѧто́къ на повече́рїи, и҆лѝ є҆гда̀ є҆кклисїа́рхъ разсꙋ́дитъ: а҆́ще то́кмѡ не слꙋчи́тсѧ ко́егѡ вели́кагѡ ст҃а́гѡ, и҆лѝ ст҃а́гѡ хра́мꙋ: занѐ хра́мъ и҆ не вели́кагѡ ст҃а́гѡ, бо́льши вослѣ́дꙋетсѧ вели́кагѡ ст҃а́гѡ, на сво́й є҆мꙋ̀ хра́мный пра́здникъ, є҆́же до́лжно є҆́сть бдѣ́нїю быва́ти, и҆ ника́коже ѡ҆ставлѧ́ти въ па́мѧть є҆гѡ̀, нижѐ прелага́етсѧ на и҆́нъ де́нь. Но пое́мъ слꙋ́жбꙋ хра́мꙋ, ꙗ҆́коже и҆ срѣ́тенїю гдⷭ҇ню, во всѧ̑ дни̑, въ нѧ́же и҆ срѣ́тенїе гдⷭ҇не быва́етъ.