Акафист Рождеству Пресвятой Богородицы

Празднование 8/21 сентября

Кондак 1

Избра́нной от всех родо́в Пресвятей Деве и Божией Матери похвальное приносим пение пред чудотворною иконою преславнаго Рождества Ея. Ты же, Пречистая, иму́щая о нас благо́е промышле́ние, от всяких бед, скорбе́й и постыдныя смерти соблюди, да во умилении зовем Ти: Радуйся, Пресвятая Дево, Рождеством Своим радость спасения миру возвести́вшая.

Икос 1

Ангел предста́тель Престолу Вседержи́теля по́слан бысть возвести́ти неплодным родителем о Рождестве Твоем, Владычице, и ангелов во́инство ныне на небеси́ славит Тя, Честне́йшую херувим, Матерь Бога нашего. Мы же, земнороднии, Рождеству Твоему и явле́нию икон радующеся, аще и бренными усты́ похвальная приносим Ти таковая: Радуйся, Непорочная, праведными родительми рожде́нная; радуйся, Дщерь земная, в Матерь Божию благословенная. Радуйся, родителем неплодство радостно разрешившая; радуйся, родителей-старцев великое утешение. Радуйся, молитвою у Бога испро́шенная; радуйся, Иоаки́ма и Анны чудное прозябе́ние. Радуйся, Святая, святыми воспитанная; радуйся, ми́рови верное спасение. Радуйся, силою Вышняго осене́нная; радуйся, славо небес превознесе́нная. Радуйся, Прия́телище, прама́тернюю клятву разрешившая; радуйся, Рождшимся из Тебе древняго зми́я победившая. Радуйся, Пресвятая Дево, Рождеством Своим радость спасения миру возвести́вшая.

Кондак 2

Видевше в Рождестве Твоем избавление поноше́ния безча́дства, праведнии родители Твои сла́виста Бога. Темже и мы, подражающе им, благонадежно готови носи́ти поноше́ние злословящих нас, Сына Твоего ра́ди, православно исповедающе и славяще святое имя Его, пою́ще: Аллилуиа.

Икос 2

Разум ангельский недоумева́ше о Рождестве Твоем, о тайне воплощения Сына Божия, ка́ко неискусобрачная Дева возможет имети зачатие. Ныне же верующии, дивя́щеся тайне Божественнаго смотре́ния о спасении рода человеческаго, славят девство Твое, Пречистая, усердно взывающе Тебе таковая: Радуйся, сбы́тие пророческих веща́ний; радуйся, Дево, исполне́ние благи́х желаний. Радуйся, Святая и Пренепорочная в де́вах; радуйся, Богом избра́нная в жена́х. Радуйся, от младенчества Богу посвященная; радуйся, Духом Святым приосене́нная. Радуйся, новый и живы́й киво́те, в небесе́х хранимый; радуйся, Неувядаемый Цве́те, достойно хвали́мый. Радуйся, архангелы и ангелы посещаемая; радуйся, небесною пищею питаемая. Радуйся, свя́тостию паче всех просиявшая; радуйся, в девственную утробу Господа прия́вшая. Радуйся, Пресвятая Дево, Рождеством Своим радость спасения миру возвести́вшая.

Кондак 3

Сила Вышняго, осени́вшая Иоаки́ма и Анну, разрешила заматоре́вшее их неплодие, помяну́ бо Господь смирение рабов Своих. Сего ра́ди почитающе праведных родителей Твоих, Пречистая, молимся, да разрешится их молитвами и Твоим заступлением неплодие добродетелей наших ко умноже́нию молитвы и смирения, терпения и воздержа́ния, благодатию всех благ Пода́теля Бога, Емуже пое́м: Аллилуиа.

Икос 3

Иму́щи великое служение, достойно избра́нна была еси, Пресвятая Дево, в Матерь Христу Богу, Спасителю нашему, ту́не явля́я нам многая благодея́ния, имиже наслаждающеся, благодарственное воспеваем пение: Радуйся, смиренная Рабо́ Господня, нас смирению научающая; радуйся, рабом Божиим помогающая. Радуйся, младенцев благодатное хранение; радуйся, юнош мудрое наставление. Радуйся, ма́терей радостное похваление; радуйся, сущим во браке любовное единомыслие. Радуйся, добрых к добру влечение; радуйся, злых сердец умягчение. Радуйся, Пода́тельнице Божественныя благости; радуйся, Виновнице всякия радости, Радуйся, Свое́ю помощию земнородных взыскавшая; радуйся, под кров Свой христиан прия́вшая. Радуйся, Пресвятая Дево, Рождеством Своим радость спасения миру возвести́вшая.

Кондак 4

Бу́ри неверия и житейских напастей наших Господь хотя утиши́ти, в честне́й иконе Рождества Твоего яви́л еси нам Тя, Богородице, Хода́таицу. Сего ра́ди ближних и дальних Твоя чудеса исповедати собрал есть, да вси Благодетелю Богу взывают: Аллилуиа.

Икос 4

Слышавше о иконе Твоей, Богородице, вси верующии притекают в надежде Твоего заступления, никто бо отходит от нея́ тощь. И не может по достоя́нию блажи́ти Тя, Владычице, оба́че приими́ благодарное хваление наше: Радуйся, Богоизбра́нная, Рождеством Своим возвеселившая родителей; радуйся, благое науче́ние детоводи́телей. Радуйся, скорбьми́ грехи́ очищающая; радуйся, в ско́рбех малодушных укрепляющая. Радуйся, ангельскому житию научающая; радуйся, бла́гами небесными от благ земных отвлекающая. Радуйся, борющихся с соблазнами верное укрепление; радуйся, изнемогающих в борьбе и по́двизех скорое поможе́ние. Радуйся, Благодатная, явле́нием иконы благодать нам яви́вшая; радуйся, е́юже чудеса ве́лия сотворившая. Радуйся, Пресвятая Дево, Рождеством Своим радость спасения миру возвести́вшая.

Кондак 5

Боготечная звезда бысть святая икона Твоя, Богородице, егда невидимо шествова вспять из градо́в на место явле́ния; таковому чудеси дивя́щеся, Господу Богу похвальная приносим: Аллилуиа.

Икос 5

Видя архиепископ Кирилл троекратное чудное возвращение иконы Твоея́ из града Севца на место явле́ния, познае́т, яко не удержит ю во граде своем, и в прославле́ние иконы Рождества Твоего абие создает храм и благоустроя́ет обитель. Таковому промышле́нию Твоему о нас радующеся, Тебе, Покровительнице нашей, гласом радования взываем: Радуйся, Владычице, человеческому самоволию не благоволи́вшая; радуйся, неугодное Тебе людское желание разорившая. Радуйся, ангелы носи́мая; радуйся, родом человеческим хвалимая. Радуйся, возду́ха благодатное освящение; радуйся, губи́тельных пове́трий очище́ние. Радуйся, дожди́ благовре́менныя к плодоноше́нию земли́ посыла́ющая; радуйся, вредное многодо́ждие прекращающая. Радуйся, па́жити наша от всякаго вреда́ сохраняющая; радуйся, и нас ко благу наставляющая. Радуйся, всю вселенную просветившая; радуйся, умерщвле́нных страстьми́ оживляющая. Радуйся, Пресвятая Дево, Рождеством Своим радость спасения миру возвести́вшая.

Кондак 6

Проповедуют чудеса богатство бла́гости Царицы Матере, от дивныя иконы бывшия, не оставляет бо Пречистая Богородица с верою притекающих к Ней и избавляет их от всякия напасти. Темже, Богородице Дево, благодарственная Тебе воспису́ем, Всещедрому Богу при́сно славу возсылаем: Аллилуиа.

Икос 6

Возсия́, яко крин в пусты́ни, явле́нная икона Твоя, Богородице, подающи всем благопотребную помощь, оба́че не благоволи́ла есть проти́вящимся воле Твоей: наказала бо смертию срубившаго древо, на немже икона Твоя яви́ся. Сего ра́ди со страхом и умилением рцем вси: Радуйся, Царице, непокорных воле Твоей наказу́ющая; радуйся, человеческое мудрова́ние отсекающая. Радуйся, человеческую злобу укрощающая; радуйся, Судию́ Праведнаго о гресе́х наших умоляющая. Радуйся, те́ла моего врачевание; радуйся, души́ моея́ спасение. Радуйся, упование в жизни сей; радуйся, надеждо по смерти моей. Радуйся, Тобою бо от вечныя смерти избавляемся; радуйся, Тобою бо блаженныя жизни сподобля́емся. Радуйся, и́ноческия обители имене Своего во отечестве нашем обильно насади́вшая; радуйся, благочестие в сердцах верных укрепившая. Радуйся, Пресвятая Дево, Рождеством Своим радость спасения миру возвести́вшая.

Кондак 7

Хотя́щи милость Свою яви́ти человеческому роду, дарова́ла еси нам пречудную икону Рождества Твоего, Богородице, да вси радующеся о Твоих благодея́ниих, аще и недостойни су́ще, ангельскую песнь пое́м Христу Спасителю нашему: Аллилуиа.

Икос 7

Новый источник благодати яви́ла еси нам, Владычице, егда изба́вила еси град Глу́хов от смертоносныя язвы, наставля́ющи нас прибегати к скорой благодатной Помощнице в беда́х и болезнех, во е́же звати Тебе: Радуйся, Богообрадованная, печальных и плачущих приятное утешение; радуйся, кающихся грешников ми́лование. Радуйся, исцелений неоскудеваемое сокровище; радуйся, тружда́ющихся тихое поко́ище. Радуйся, обидимых заступающая; радуйся, обидящих вразумляющая. Радуйся, погибающих Взыскание; радуйся, градо́в и ве́сей упование. Радуйся, наша непостыдная надеждо; радуйся, иконам Своим благодать дарова́вшая. Радуйся, верных Го́сподеви сочетавшая; радуйся, Пресвятая Дево, Рождеством Своим радость спасения миру возвести́вшая.

Кондак 8

Странно Рождество Твое от неплодных престарелых родителей; странно и явле́ние иконы Твоея́, Владычице, – Бог, иде́же хо́щет, побеждает естества́ чин, глаголет бо: «Невозможная у человек, возможна суть у Бога». Сего ра́ди чудодействующему нам Всемогущему Промыслителю возносим хвалу́: Аллилуиа.

Икос 8

Вся тварь о Тебе радуется, Благодатная, ангельский собор и человеческий род све́тло торжествует преславное Рождество Твое. Ты же, яко Царица небесе́ и земли́, приими́ моление рабов Твоих, покланяющихся честно́му образу Твоему и любовию вопиющих: Радуйся, Преблагословенная, ангелов честне́йшая; радуйся, без сравнения серафим сла́внейшая. Радуйся, по Бозе святейшая всех святых; радуйся, красне́йшая паче дще́рей земных. Радуйся, Царице, Престолу Царя Славы предстоя́щая; радуйся, молитвы Ему о нас принося́щая. Радуйся, храмов Божиих великолепное украшение; радуйся, притекающих к Тебе истинное утешение. Радуйся, во иконах Твоих ризами златы́ми одея́нная; радуйся, ка́меньми драги́ми испещре́нная. Радуйся, вся добродетели в Себе вместившая; радуйся, воплощению Сына Божия послужившая. Радуйся, Пресвятая Дево, Рождеством Своим радость спасения миру возвести́вшая.

Кондак 9

Вели́каго естества́ ангельскаго вышшая в горних обителех владычествуеши, Богородице, но и дольних не оставля́еши, защищаеши святою иконою обитель Свою и вся к Тебе прибегающия, темже Тя верховную Покровительницу нашу молим, облагодати́ нас умом и сердцем Источнику спасения усердно взывати: Аллилуиа.

Икос 9

Вити́и суему́дреннии недоумева́ют, ка́ко прибегающии к иконе Твоей ве́рнии приемлют Божественную благодать; мы же, извеще́ннии бывше глаго́лом Господним, яко вся возможна верующему, несумне́нно притекаем к чудотворней иконе Твоей в надежде Божественнаго благопотребнаго воздая́ния. Темже, теплое заступление Твое о нас ве́дуще, глаголем: Радуйся, Богородице, правоверующия вознося́щая; радуйся, неверующия наставляющая. Радуйся, суеве́рие и невежество отметающая; радуйся, заблуждших право ве́ровати научающая. Радуйся, к познанию истины приведе́ние; радуйся, нераскаянных грешников устраше́ние. Радуйся, никомуже погибели хотя́щая; радуйся, и отчаянных к упованию приводя́щая. Радуйся, невидимых врагов наших мучение; радуйся, видимых врагов наших посрамле́ние. Радуйся, веру нашу чудесами утвердившая; радуйся, гнев Божий, праведно дви́жимый на ны, всегда отвращающая. Радуйся, Пресвятая Дево, Рождеством Своим радость спасения миру возвести́вшая.

Кондак 10

Спасения нашего начало бысть славное Рождество Твое, Богородице, явле́нная же икона Твоя яви́ся источником благодатнаго умиления иноком обители ея, иде́же верующии притекают к Тебе, те́пле моля́щеся: «Не забу́ди нас, Богородице, вся полезная душа́м подающи, да спасаемии Тобою Подвигоположнику и Спасителю нашему пое́м: Аллилуиа».

Икос 10

Стена нерушимая еси всем, к Тебе и иконе Твоей прибегающим, не и́мамы бо инаго упования по Бозе, разве Тебе, Владычице, Ты нам прибежище и сила в ско́рбех, обретших ны зело́, избавляющи нас от всякия напасти, и Тебе, Радосте наша, взываем: Радуйся, Пречистая, с небесе́ христиан призирающая; радуйся, от бед обитель нашу избавляющая. Радуйся, по́стников не изнемогающее воздержа́ние; радуйся, добродетелей наших умноже́ние. Радуйся, искушений Победительнице; радуйся, падших востание. Радуйся, злосмра́дие грехов удаляющая; радуйся, благоуханием святости снабдевающая. Радуйся, основание обители нашея положи́вшая; радуйся, Пресвятая Дево, Рождеством Своим радость спасения миру возвести́вшая.

Кондак 11

Пение всеусердное приносим Ти, Владычице, о Твоих великих благодея́ниих. Сие́ пение приими́ от нас немощны́х и даждь нам благодать Сыну Твоему и Богу взывати: Аллилуиа.

Икос 11

Светоприе́мную свещу́ зрим цельбоно́сную икону Твою, Пречистая, благодатию нам возжженную, просвещающую вся концы на спасение всем, с верою прибегающим, сего ра́ди Тя, яви́вшую христианом многая зна́мения, зва́нии почитаем си́ми: Радуйся, Путеводи́тельнице, на путь спасения наставляющая; радуйся, Вратарнице, двери райския верным отверза́ющая. Радуйся, Благоуханный Цве́те, в горнем Сио́не благоухающий; радуйся, Живоносный Источниче, обильно благодать источающий. Радуйся, Нерушимая Стено́, от огненнаго запале́ния избавляющая; радуйся, Заступнице, Сыну Своему о нас вопиющая. Радуйся, Скоропослушнице, скорую помощь верным подающая; радуйся, всех скорбя́щих Радосте. Радуйся, жизни нашея духовная сладосте; радуйся, Милостивая, милость Свою многократно яви́вшая. Радуйся, многия от бед и мук свободи́вшая; радуйся, Пресвятая Дево, Рождеством Своим радость спасения миру возвести́вшая.

Кондак 12

Благодать Божия преисполни Тя в Рождестве Твоем, Благодатная, и́же иконою Свое́ю вы́ну изливаеши нам, с верою прибегающим к заступлению Твоему и благодарственная Милосердному Богу принося́щим: Аллилуиа.

Икос 12

Пою́ще Твое Рождество, почитаем чудотворную икону Твою, слави́м о нас вся чудеса Твоя и, научившеся за благодея́ния благодарственно блажи́ти святое имя Твое, взываем Благословенней в жена́х: Радуйся, Заре Царя славы, Божественною красотою сияющая; радуйся, вся концы вселенныя озаряющая. Радуйся, архангельский глас о воплощении Емману́ила прие́мшая; радуйся, невместимаго всеми Бога во утробе Своей вместившая. Радуйся, наи́тием Духа Святаго обетова́ннаго Месси́ю родившая; радуйся, Солнце правды миру яви́вшая. Радуйся, Богом данная христианом Предста́тельнице; радуйся, неусыпающая о нас Молитвеннице. Радуйся, на земли́ родом человеческим хвали́мая; радуйся, прародительский грех упраздни́вшая. Радуйся, благоплодие душевное обогатившая; радуйся, Пресвятая Дево, Рождеством Своим радость спасения миру возвести́вшая.

Кондак 13

О Всепетая Дево, всех святых Святейшая в жена́х, в похвалу Рождества Твоего приими́ ма́лое сие́ моление, Христа Бога о нас умоли изба́вити от всякия напасти, и вечныя муки нас свободи́, Богу о Тебе вопиющих: Аллилуиа.

Этот кондак читается трижды, затем 1-й икос «Ангел предстатель...» и 1-й кондак «Избранной от всех родов...».

Молитвы

О Пресвятая Владычице, Христа Спасителя нашего Богоизбра́нная Мати, у Бога святыми молитвами испро́шенная, Богу посвященная и Богом возлюбленная! Кто Тебе не ублажи́т или кто не воспое́т Твоего преславнаго Рождества. Рождество бо Твое бысть началом спасения человеков, и мы, седя́щии во тьме согрешений, зрим Тя, Неприступнаго Света жилище. Сего ра́ди вити́йствующий язык не может песнословити Тя по достоя́нию. Паче бо серафим возвысилася еси, Пречистая. Оба́че приими́ от недостойных раб Твоих нынешнее похвале́ние и не отрини мольбы нашея. Твое величие исповедуем, Тебе во умилении припа́даем и скорую в заступлении чадолюби́вую и благоусердную Матерь дерзновенно просим: Умоли Сына Твоего и Бога нашего дарова́ти нам, много согрешающим, искреннее покая́ние и благоче́стное житие, да возможем творити вся Богу угодная и душа́м нашим полезная. Возненавидим вся злая, укрепляемии Божественною благодатию во благо́м произволе́нии нашем. Ты непостыдная надежда наша в час смерти, да́руй нам христианскую кончину, безбедное шествие на страшных мыта́рствах воздушных и наследие вечных и неизрече́нных благ Царствия Небеснаго, да со всеми святыми немо́лчно исповедуем Твое о нас заступление и да славим Единаго Истиннаго Бога, во Святе́й Троице покланяемаго, Отца и Сына и Святаго Духа. Аминь.

Преблагословенная Дево Марие, Царице небесе́ и земли́, Твоему чудотворному образу припа́дающе, умиле́нно глаголем: При́зри милостиво на рабы́ Твоя и Твоим всесильным хода́тайством ниспосли́ коемуждо потребная. Вся ве́рныя чада Святы́я Це́ркве спаси, неверныя обрати, заблуждших на путь правый настави, старость и слабость сил поддержи́, юных в вере святой возрасти́, мужество ко благу направи, грешников к покая́нию приведи и всех христиан мольбы услыши, боля́щих уврачу́й, скорби утоли́, путешествующим спутешествуй. Ты ве́си, Всемилостивая, яко не́мощны, яко грешнии, яко озлобля́еми и достойни прощения Божия, оба́че бу́ди нам в помощь, да ни коим грехо́м самолюбия, соблазна и диа́вольскаго прельще́ния прогневляем Бога: Тя и́мамы Предста́тельницу, Ю́же не отринет Господь. Аще бо восхощеши, вся дарова́ти нам можеши яко благодатный источник, верно пою́щим Ти и превознося́щим преславное Твое Рождество. Изба́ви, Владычице, грехопадений и бед всех, благочестно призывающих святое имя Твое и покланяющихся честне́му образу Твоему. Ты бо молитвами беззакония наша ту́не очищаеши, темже Тебе припа́даем и паки вопием: Отжени́ от нас всякаго врага и супоста́та, всякия напасти и губительнаго неверия; молитвами Твоими, подающи дожди благовре́менны и земли́ обильное плодоносие, вложи́ в сердца́ наша страх Божественный ко исполне́нию заповедей Господних, да вси тихо и мирно поживе́м во спасение душ наших, во благо ближних и во славу Господа, Ему бо, яко Творцу, Промысли́телю и Спасителю нашему всякая подобает слава, честь и поклонение, ныне и при́сно и во веки веков. Аминь.