Акафист собору святых Псково-Печерских
Празднование в 4-ю Неделю по Пятидесятнице
Кондак 1
Избра́ннии Христовы подвижницы и крепции к Богу молитвенницы, во святе́й горе́ усердно подвиза́вшиися и при потоце Ка́менце Богоматернюю обитель основавшии, преподобнии отцы наши Ма́рко, Ио́но, Корни́лие и мати Ва́ссо, восхваляем вы любовию смиренно; вы же, яко иму́щии дерзновенное предста́тельство ко Господу, поминайте ны, во скорбех и печалех сущих, да зовем вам: Радуйтеся, преподобнии отцы наши, обители Богоматерния преславнии устрои́телие.
Икос 1
Ангелоподобное житие возлюбившии и суету́ мира отвергшии, направилися есте́ в дебри лесныя при потоце Ка́менце, иде́же во святе́й горе́ при трие́х ка́менех вознесо́ша своя молитвы к Богу, да да́рует Он вечное житие в небесных обителех. Сего ра́ди зовем вам: Радуйтеся, нело́жнии молитвенницы пред Богом; радуйтеся, лесныя дебри молитвою облагоуха́вшии. Радуйтеся, о прощении грехов сле́зы проливавшии; радуйтеся, подвигами вашими струи́ потока Ка́менца удивившии. Радуйтеся, и всех верных ими возвеселившии; радуйтеся, не убоявшиися страха нощна́го. Радуйтеся, в нощи́ греха и от нас страх изымающии; радуйтеся, молитвенницы наши пречуднии. Радуйтеся, хода́таи наши предобрии; радуйтеся, возду́х молитвою вашею освятившии. Радуйтеся, сердца́ наша благоуханием веры напои́вшии; радуйтеся, преподобнии отцы наши, обители Богоматерния преславнии устрои́телие.
Кондак 2
Видяще Богоматернюю обитель, яко звезду сияющую и небесным сиянием освещающую путь земнаго жития нашего, прославляем труды и моления ваша, преславнии первоначальницы и старцы, в обители Псково-Пече́рстей потруди́вшиися, и Богу вопием: Аллилуиа.
Икос 2
Разумевше козни, от врага спасения нашего диа́вола содева́емыя, терпение, поще́ние и молитву Богу противупоста́вили есте́, и яко ни́щи телом и духом, в дебри лесныя сокры́лися есте́, до́ндеже звероло́ви пришедшии разгласиша людем о тайне подвигов ваших. Сего ра́ди умиляющеся зовем: Радуйтеся, в терпении и смирении своем Христу Богу подражавшии; радуйтеся, у трие́х камений молитвы возноси́вшии. Радуйтеся, греховное окамене́ние сердец молитвою удаляющии; радуйтеся, подобне Петру ка́менем веры ставшии. Радуйтеся, звероловами из тайн подвигов ваших изведе́ннии; радуйтеся, в сети добродетелей многия улови́вшии. Радуйтеся, теми и Христа возвеселившии; радуйтеся, устрои́телие тихия пристани спасения. Радуйтеся, нашего спасения непрестаннии хода́таи; радуйтеся, подвиги ваши ангелом ликование. Радуйтеся, житие ваше грешным опло́т; радуйтеся, преподобнии отцы наши, обители Богоматерния преславнии устрои́телие.
Кондак 3
Силою Божиею к пустынническому житию призва́нный, пустынножитель старец Марк подвиза́шеся и сонм подвижников в святе́й горе́ собраше, и тою силою спасо́шеся, тайною подвигов твоих Богу угодив, да потрудившуся тайно, воздаст Ти Господь я́ве, сего ра́ди зовем Ему: Аллилуиа.
Икос 3
Име́я помысл чист и душу непорочну, блаженный о́тче Ма́рко, уразуме́л еси су́етность мира сего и непостоянство, и вечных благ вожделе́в, отреклся еси от мира и и́ноческое житие восприи́м. Сего ра́ди и восхваляем тя, славяще е́же о тебе изволе́ние Божие: Радуйся, яко земное отринув, умом твоим в небесное воспари́л еси; радуйся, путь твой в небо подвигом украси́л еси. Радуйся, смирения теплый стяжа́телю; радуйся, молитвы кади́ло благоприятное. Радуйся, слез покая́нных неоскудный источниче; радуйся, благое иго Христово на себе возложи́вый. Радуйся, всего себе Богу преда́вый; радуйся, красоту селения Божия возлюби́вый. Радуйся, примета́тися в дому́ Божию изво́ливый; радуйся, яко странник и пришелец быв на земли́. Радуйся, и нас не оставля́яй твое́ю помощию; радуйтеся, преподобнии отцы наши, обители Богоматерния преславнии устрои́телие.
Кондак 4
Бурю искушений и бед веры ра́ди православныя и жития чистаго от лати́нян претерпе́вый и единаго то́чию на потре́бу иский, е́же ка́ко Богу угодити, покинул еси град Дерпт, иде́же ты па́стырствовал еси, блаже́нне Ио́но, и достигл еси Псковския страны́, при пото́це Ка́менце обитель Богородицы учредив, в нейже с лики и́ночествующих немо́лчно вопия́л еси Богу: Аллилуиа.
Икос 4
Слышавше христоименитии лю́дие града Пскова и ве́си, яко основание обители и́ноческия положил еси, преподобне Ио́но, возрадовашася радостию ве́лиею, и яко ангела Божия тя почита́ху, служа́ще от име́ний своих к устрое́нию оныя обители и вопия́ху тебе си́це: Радуйся, веле́ния Божия послушателю; радуйся, пастырю добрый Христова стада. Радуйся, злобою лати́нян за веру искуше́нный; радуйся, со скорбию па́ству свою де́рптскую поки́нувый. Радуйся, славный сподвижниче блаженнаго пресви́тера Иси́дора; радуйся, в страну Псковскую стопы́ своя напра́вивый. Радуйся, о пещерах, Богом зда́нных, от изборя́н услышавый; радуйся, Богоматерию возлюбленный и призва́нный. Радуйся, в горе́ церковь Успения ископа́вый; радуйся, две келлии на столпех проти́ву це́ркве устро́ивый. Радуйся, устрои́телю обители богомудрый; радуйтеся, преподобнии отцы наши, обители Богоматерния преславнии устрои́телие.
Кондак 5
Богоприятная жизнь источается от Тебе, о преподобне Ио́но! Ту́ю бо обре́тше, яко некое сокровище, супружница твоя и чада, и яко бисер многоценный слагающе в себе, на высоту добродетелей возшедше, восхвали́ша Бога песнию: Аллилуиа.
Икос 5
Видящи преславное житие и терпение мужа своего, не устрашилася еси трудов и подвигов, преподобная мати Ва́ссо, и подражающи житию его, поселилася еси близ обители, основанной у потока Ка́менца, и тамо пострижение и́ноческое и болезни телесе́ прияла́ еси, сочетавшеся Христу, сего ра́ди восхваляем тя похвалами си́ми: Радуйся, преславная сподви́жнице супруга твоего; радуйся, последовавшая за ним к пещере, Богом зда́нней. Радуйся, первая постри́женице Богородичныя обители; радуйся, чада твоя благоче́стию научившая. Радуйся, скорби па́стырския и гонения от лати́нян в Де́рпте с супругом твоим разделившая; радуйся, в волнении духа веры не угасившая. Радуйся, пожелавшая со Христом сочетатися; радуйся, Богоматернюю обитель возлюбившая. Радуйся, погребение прияти в ней возжелавшая; радуйся, первая чудотворице обители при Ка́менце. Радуйся, яко молитвами твоими в болезнех помогаеши; радуйтеся, преподобнии отцы наши, обители Богоматерния преславнии устрои́телие.
Кондак 6
Проповедуя слово Божие, преподобне отче Корни́лие, в стране Чу́дстей, многия неверныя ко Христу привел еси. Ревностию Божиею распаля́ем, храмы многи чу́ди построил еси и, пресви́теры им дарова́в, указал еси им путь ко спасению, поя́ Богу: Аллилуиа.
Икос 6
Возсия́л еси, яко звезда богосветлая, во обители Псково-Пече́рстей и стране Чу́дстей, преподобне блаже́нне Корни́лие! От юности бо Христа возлюбив, и еще млад лета́ми, но тверд разумом, поставлен был еси игу́меном обители сея́, иде́же четы́редесять и осмь лет па́стырствовал еси, храмы боголе́пны устроя́я и обитель вельми́ украшая, сего ра́ди зовем ти: Радуйся, юность свою Го́сподеви преда́вый; радуйся, совершенство духовное во обители получи́вый. Радуйся, игу́меном от братии достойно избра́нный; радуйся, жизнь святую и по́стническую проводи́вый. Радуйся, ревности ко благу обители и славе имене Христова неусыпный носи́телю бы́вый; радуйся, твердостию во искуше́нии и непреклонностию в терпении даже и до смерти обогати́выйся. Радуйся, многими храмы обитель украси́вый; радуйся, кре́пки сте́ны каменны воздвиги́й. Радуйся, и нам непрестанно помогающий воздвигати храм своея́ души́; радуйся, ограждаяй нас, яко стеною, от греха и соблазна. Радуйся, великий о и́ноцех попечителю; радуйтеся, преподобнии отцы наши, обители Богоматерния преславнии устрои́телие.
Кондак 7
Хотя пречестны́й игу́мен Дорофе́й зрети тайну пещеры погребальныя, уви́де, яко гроб, иде́же лежа́ша мо́щи преподобнаго первоначальника Марка, истле́ша и разсы́пашася, но глава и кости неврежде́ны бы́ша и то́кмо обви́ты, яко власяни́цею, коре́нием древе́сным, в радости восклица́ше Богу: Аллилуиа.
Икос 7
Дивно и непостижимо есть! Древо гроба тлению предаде́ся, кости же и глава, и куко́ль, и одежды преподобнаго старца Марка сохранишася. Нетление бо силу Божию проповедаша и праведность жития подтверди́ша, сего ра́ди и мы, су́ще во умилении, глаголем: Радуйся, преподобне Ма́рко, великий наш подвижниче; радуйся, нетлением костей твоих возсия́вый. Радуйся, и риз твоих бренных нетления удосто́ивыйся; радуйся, греховное тление молитвами твоими в нас устраня́яй. Радуйся, почитати тя нас наставля́яй; радуйся, благословением архиере́а Псковскаго Инноке́нтия по вре́менех в но́вы ризы облече́нный. Радуйся, то́яжде в но́ве гробе положе́нный; радуйся, добродетельное благоухание и́ночествующих. Радуйся, и доныне к обители любовию пламенея, охраняеши ю; радуйся, всяк бо, приходя́щий к тебе с верою, исцеления да́ры прие́млет. Радуйся, неисцельныя язвы молитвою твое́ю исцеляющий; радуйтеся, преподобнии отцы наши, обители Богоматерния преславнии устрои́телие.
Кондак 8
Странствие земное сконча́вшу ти, Ио́но приснопамятне, и́ноцы обители уготовл́яху тя ко погребению и на телеси́ твоем обрето́ша тайно носи́мыя тобою вери́ги; водрузи́ша их на стене проти́ву гроба твоего, да видевшия их у́зрят и по́двизи твоя, спасения ра́ди восприя́тыя на ся, и благодарне Богу воззовут: Аллилуиа.
Икос 8
Вся братия обители твоея́, преблаженне Ио́но, со священным собором и люди со слеза́ми и пении надгробными изнесо́ша, всече́стне, тело твое ко гробу и погребо́ша тя в пещере, Богом зда́нней, близ храма Пресвяты́я Богородицы Успения, тобою в горе́ ископа́ннаго и хода́тайствы и труды твоими освяще́ннаго от пско́вских пресви́тер Живоначальныя Троицы. Мы же у ра́ки с мощами твоими честны́ми вопием ти таковая: Радуйся, во благоухании святыни сном смертным опочи́вый; радуйся, смерть вкуси́вый, тления же не позна́вый. Радуйся, в ризу нетле́ния благодатию Божиею облече́нный; радуйся, честна́я ра́ка твоя бысть враче́бница всем боля́щим. Радуйся, яко всяк, с верою к тебе приходя́щий, утешение получает; радуйся, разслабленных духом крепосте и твердыня. Радуйся, христианския се́мии молитвою охраняющий; радуйся, и́ночествующим помощниче скорый. Радуйся, ку́пно с Марком труды обители восприя́вый на ся; радуйся, ку́пно с нимже в пещере почива́яй. Радуйся, твоим духом и нас не оставля́яй; радуйтеся, преподобнии отцы наши, обители Богоматерния преславнии устрои́телие.
Кондак 9
Ангели небеснии радостно прия́ша честну́ю душу твою, преподобная мати Ва́ссо! И вознесо́ша ю во обители небесныя, иде́же Царь славы Христос Господь венча́ тя венце́м праведничим, егоже угото́ва всем возлюбльшим Его, и дарова́ нам тебе, заступницу и молитвенницу благу́ю, да благодарне вопием Ему: Аллилуиа.
Икос 9
Вити́и многовеща́ннии не возмо́гут по достоянию воспети славу, от Господа угото́ванную святым Его во Царствии Небеснем, ея́же наследницею сподо́билася еси быти, преподобная мати Ва́ссо! Сея́ славы сопричастницы и нас сподо́би быти святыми твоими молитвами, да воспоем ти радостно: Радуйся, ликующая в чертоге Небеснаго Домовладыки; радуйся, с небесных высот и к нам милостивно приникающая. Радуйся, и́ночествующим обители молитвою помогающая; радуйся, в со́ниих и виде́ниих верным явля́ющаяся. Радуйся, кощу́нную руку, дерзостно коснувшуюся раќи мощей твоих, отмстившая скоро; радуйся, огне́м, от гроба изшедшим, того устраши́вшая. Радуйся, в огне добродетелей нас очищающая; радуйся, отце́м и ма́терем нашим в старости си́ло. Радуйся, ча́дом нашим благодатная по́моще; радуйся, всем, притекающим к тебе, скорое услышание. Радуйтеся, преподобнии отцы наши, обители Богоматерния преславнии устрои́телие.
Кондак 10
Спасти хотя и́ночествующих от мира, обитель твою оградою каменною с башнями и врата́ми железными обнесл еси, преподобне отче Корни́лие, чрез ограду от греха врата́ в Царствие Небесное открыл еси, иде́же со ангелы ныне ликуеши и песнопое́ши Бога песнею: Аллилуиа.
Икос 10
Царю Небесному себе угото́вивый еще на земли́, смерть от руки царя земнаго мужественне прия́л еси. Бысть предпосла́н им от жития земнаго в Царствие Небесное. Сего ра́ди удивляющеся твоим страданием за правду и мужественней кончине, со слеза́ми зовем: Радуйся, священномучениче Корни́лие преславный; радуйся, клеветы ра́ди невинно погубле́нный. Радуйся, яко молитвою твое́ю от клеветы нас защищаеши; радуйся, яко попечением твоим от злых недру́гов нас охраняеши. Радуйся, обитель твою при́сно зряй с небесных селений; радуйся, защищаяй ю непрестанно от бед и напастей. Радуйся, честно́ю кровию твое́ю путь от врат обители до храма Богоро́дичнаго Успения освяти́вый; радуйся, грознаго царя к покаянию обративый. Радуйся, многими дара́ми от него почтенный; радуйся, яко благодатных даров церковных и нас сподобля́еши. Радуйтеся, преподобнии отцы наши, обители Богоматерния преславнии устрои́телие.
Кондак 11
Пение всеумиле́нное приносим вам, преподобнии отцы наши: Ма́рко, Ио́но, преподобномучениче Корни́лие и преподобная мати Ва́ссо! Пред ра́кою мощей и святым образом вашим предстоя́ще и моля́щеся прилежно, яко сподо́билися есте́ небесных обителей, та́ко и нас доведите вашими молитвами Царствия Небеснаго, да воспоем Богу: Аллилуиа.
Икос 11
Светоприе́мны светильники вас ве́мы, Престолу Божию предстоя́ща и мрак страсте́й и грехов наших лучами молитв разгоняюща. Озарите убо от горних высот и наша сердца́, да достойно вопием вам си́це: Радуйтеся, Света Троическаго зрителие; радуйтеся, мира горняго блаженнии обитателие. Радуйтеся, земныя обители зве́зды небесныя; радуйся, Ма́рко, блаженный старче и первоначальниче. Радуйся, Ио́но, первый обители устрои́телю; радуйся, яко и доныне храм, тобою иско́панный, красуется. Радуйся, Корни́лие блаженный, игу́мене обители сея́ и славный преподобномучениче; радуйся, даже до смерти́ и мучения возлюби́вый обитель свою. Радуйся, яко и ныне посещаеши ю твоим духом праведным; радуйся, Ва́ссо, достойная сподвижнице супруга твоего и по смерти́. Радуйся, при погребении твоем гроб твой в земли́ оставити не восхотевшая, но верху́ земли́ их двакраты возноси́вшая; радуйся, тем указавшая оставити мощи твоя на земли́ в пещере, Богом зда́нней. Радуйтеся, преподобнии отцы наши, обители Богоматерния преславнии устрои́телие.
Кондак 12
Благодать и милость испроси́те нам у Бога, преподобнии, молитвами вашими, да утвердившеся в заповедех Его, получим спасение вечное и, при́сно величающе вы хвалами благодарными, воспои́м Богу: Аллилуиа.
Икос 12
Пою́ще подвиги предивнаго жития вашего и славяще чудеса, ублажаем вас, преподобнии, яко многомощных молитвенников о нас пред Господем. Вы же принесите моление те́плое о нас ко Владыце, да сподо́бит нас Небеснаго Царствия Своего́, вопиющих вам с любовию таковая: Радуйтеся, благодатию Пресвятаго Духа приосене́ннии; радуйтеся, Пресвяты́я Троицы служителие ве́рнии. Радуйтеся, ангелом собеседницы предивнии; радуйтеся, воспевающии вку́пе со архангелы и ангелы Бога. Радуйся, Ма́рко, жития нашего наставниче; радуйся, Ио́но, пастырю преи́скренний. Радуйся, Корни́лие, блаженный на небеси́ хода́таю; радуйся, Ва́ссо, училище благочестия, добродетельми сияющее. Радуйтеся, преславнии отцы наши, в обители Псково-Пече́рстей просиявшии; радуйтеся, немерцающим светом души наша озаряющии. Радуйтеся, преподобнии отцы наши, обители Богоматерния преславнии устрои́телие.
Кондак 13
О преподобнии угодницы и преславнии чудотворцы: Корни́лие, Ма́рко, Ио́но и Ва́ссо! Милостивно приими́те от нас сие́ ма́лое моление наше, в похвалу вам возноси́мое, и предстоя́ще Престолу Царя славы, умоли́те Его, да сохранит нас от враг видимых и невидимых, от смертоносных ран и неду́гов, от всяческия скорби и печали житейския, и вечнаго мучения изба́вит ны, вопиющих Ему усердно: Аллилуиа.
Этот кондак читается трижды, затем 1-й икос «Ангелоподобное житие возлюбившии...» и 1-й кондак «Избраннии Христовы подвижницы...».
Молитва
О преподобнии отцы наши и великии чудотворцы: Корни́лие, Марко, Ио́но и мати Ва́ссо! Смиренно припа́дающе к вам и коленопреклонше моля́щеся пред ра́кою мощей и пречистым образом вашим, просим: Не отврати́те лица́ вашего от моля́щихся с сердцем сокруше́нным и смиренным, умоли́те Господа сил, да сохранит мирну страну нашу, обитель же сию́ да укрепи́т и всем, подвиза́ющимся в ней, да́рует спасение вечное. Помози́те нам, угодницы Божии, создати храм благоле́пен в сердцах наших и украсити сей храм добродетельми, да жительствует в нем Господь! Оградите нас стеною молитв ваших от греховных стрел и искушений, да богоугодне зде на земли́ поживем и вечное Царство унаследим, хва́ляще Отца и Сына и Святаго Духа, ныне и в безконечныя ве́ки. Аминь.