Акафист Святому и Животворящему Духу
Празднование на следующий день после Пятидесятницы
Кондак 1
Прииди́те, ве́рнии, Духа Святаго прославим сошествие, И́же от отеческих недр на апостоли излия́вся, яко вода́ми, богове́дением покры́ землю, и живоносныя благодати богоусыновления и горния славы сподобля́ет чи́сте притекающих к Нему, освящает же и обожает зовущих: Прииди́, Уте́шителю, Ду́ше Святы́й, и вселися в ны.
Икос 1
Ангели на небеси́ светлыми лики Духу Святому немо́лчно славу воспевают, яко Источнику жизни и Свету невещественному. С ними же и мы прославляем Тя, Ду́ше непостижимый, за вся я́вныя и тайныя милости Твоя и смиренно просим блаженнаго осене́ния Твоего: Прииди́, Свете истинный и радосте духовная; прииди́, росоно́сный о́блаче и красото́ неизрече́нная. Прииди́ и приими́, яко куре́ние благовонное, хвалу́ нашу; прииди́ и даждь нам вкуси́ти радость излия́ния Твоего. Прииди́ и возвесели ны обилием даров Твоих; прииди́, вечное Солнце незаходи́мое, и обитель в нас сотвори. Прииди́, Уте́шителю, Ду́ше Святы́й, и вселися в ны.
Кондак 2
Видом огненных язык, во свете и дыхании бурном и радостотво́рном, сни́де Дух Святы́й на апостолы. Тем же пламенем Его объяты бы́вше, ры́бари мир весь в Церковь Христову призва́ша. Бе́ды на суше и на вода́х радостно терпя́ще, лютых смерте́й не убоя́шася. И во всю землю изы́де веща́ние богокрасныя песни их: Аллилуиа.
Икос 2
Чаше дождеро́дная и огнеточи́вая, изли́вшаяся на апостолы в горнице Сио́нстей, Тебе пое́м, Тебе благословим, Тебе благодарим, Боже Ду́ше Святы́й: Прииди́, Освятителю и Хранителю Це́ркве; прииди́ и даждь едино сердце и едину ду́шу верным Твоим. Прииди́ и воспла́мени наше хла́дное и безплодное благочестие; прииди́ и разжени́ огустевающий над земле́ю мрак безбожия и нечестия. Прииди́ и веди́ всех на путь праведныя жизни; прииди́ и настави нас на всяку истину. Прииди́, мудросте непостижимая и имиже ве́си судьба́ми спаси нас; Прииди́, Уте́шителю, Ду́ше Святы́й, и вселися в ны.
Кондак 3
Тайна глубочайшая! Боже Ду́ше непостижиме, со Отце́м и Словом Создателю всех! Ты украси́л еси горния чи́ны ангелов во храме неприступнаго света! Ты воззвал еси к бытию лики огненных светил с великолепием славы. Ты, плоть и дух в чудное единство согласу́я, сотворил еси род человеческий. Темже всякое дыхание пое́т Тебе хвалу́: Аллилуиа.
Икос 3
Альфа и Омега, начало и конец, Ты, Ду́ше вечный, необъятною силою паре́ния над вода́ми и страшным кругообстоя́нием оживотворил еси всех и вся: от живоноснаго дыхания Твоего из безвидныя бездны возсия́ла есть неизрече́нная красота первозданнаго мира. Сего ра́ди взываем Ти: Прииди́ к нам, Премудрый Художниче мира; прииди́, Великий и в ма́лом крине, и в небесной звезде. Прииди́, многообразие неизрече́нное и красото́ вечная; прииди́ и озари мрачный хао́с души моея́. Прииди́ и яви́ нас новою тва́рию во Христе; прииди́, Уте́шителю, Ду́ше Святы́й, и вселися в ны.
Кондак 4
Непостижимый и всеблаги́й Ду́ше, освящения Источниче! Ты оде́ял еси Пречистую Деву Марию в ослепительный и неприступный блеск Твоего Божества, соделав Ю Матерь Бога Слова, Царицу ангелов, спасением людей. Силою премирною Ты осеня́еши пророки и апостолы. Ты возно́сиши их до тре́тияго небесе́. Ты уязвля́еши их сердца́ красотою небесною, влагая в их речи пламенное стремление, влекущее людей к Богу. Ты обращаеши последних грешников, и они, полнии горячаго восторга, пою́т: Аллилуиа.
Икос 4
Святым Духом всяка душа живи́тся, Его силою возстано́вятся к общению воскресения вся создания в последний час нынешняго века и в первый будущаго. Тогда воздвигни нас, Уте́шителю Благи́й, из гробо́в наших не к осужде́нию, но к богосветлому блаженству со всеми святыми, близкими и сро́дными нам! Прииди́ же и изба́ви нас от смерти духовныя; прииди́ и пред кончиною нашею насыти нас Телом и Кровию Спаса Христа. Прииди́ и даждь нам успение тихое с чистою совестию; прииди́ и сотвори светлым наше пробуждение от смертнаго сна. Прииди́ и сподо́би нас узре́ти с радостию утро вечности; прииди́ и сотвори ны сыны́ нетления. Прииди́ и, яко солнце, просвети тогда безсмертная тела наша; прииди́, Уте́шителю, Ду́ше Святы́й, и вселися в ны.
Кондак 5
Услышав глас Твой: «Аще кто жаждет, да гряде́т ко Мне и да пие́т», молим Тя, Сыне Божий, утоли нашу жажду духовныя жизни, даждь нам воду живую. Излей нам струю́ благодати от срасле́ннаго Ти Духа Святаго, да не возжаждем во веки, с умилением пою́ще: Аллилуиа.
Икос 5
Нетленный и несотворе́нный, вечный и щедрый Ду́ше, праведных Хранителю и грешных очищение. Свободи́ нас от всяких нечистых дел, да не погаснет в нас сияние благодатнаго света Твоего, вопиющих Ти: Прииди́, Всеблаги́й, и даждь нам умиление и источник слез; прииди́ и научи нас поклонятися Тебе духом и истиною. Прииди́, Истино высочайшая, и уясни́ сомнения скуднаго разума; прииди́, жизне нестареемая, и приими́ нас с краткостию века земнаго. Прииди́, Свете вечный, и разсеются призраки и страхи; прииди́, вечно иная сила, освежи изнемо́гших чад Твоих. Прииди́, безконечная радосте, и забу́дутся невзгоды вре́менныя; прииди́, Уте́шителю, Ду́ше Святы́й, и вселися в ны.
Кондак 6
Ликуй, дщерь света, святая мати Сио́н! Украшайся, великая неве́сто, небеси́ подобная, светлоблистающая Вселенская Церковь Христова! На тебе́ почивает Дух Святы́й, немощна́я врачу́я, оскудевающая восполня́я, мертвыя оживляя и к вечной жизни приводя́ всех, достойно и праведно зовущих: Аллилуиа.
Икос 6
«В мире ско́рбни будете», – рече́ Господь. Где обря́щем отраду, и кто утешит нас? Ду́ше Уте́шителю, Ты утоли наша печали! Хода́тайствуй о нас воздыханиями неизрече́нными и облегчи́ сердца́ моля́щихся Тебе: Прииди́, сладкая прохладо тружда́ющихся и обремене́нных; прииди́, Собеседниче узников и опо́ро гони́мых. Прииди́, уще́дри изнуре́нных нищетою и гла́дом; прииди́ и уврачу́й страсти наших душ и телес. Прииди́ и посети всех жаждущих Твоего озарения; прииди́ и осмысли наша скорби надеждою вечныя радости. Прииди́, Уте́шителю, Ду́ше Святы́й, и вселися в ны.
Кондак 7
«На Святаго Духа хули́вшему, не простится ни в сем веке, ни в будущем», – рече́ Господь. Слышаще сие́ страшное изрече́ние, трепещем, да не осудимся с непослушными Тебе и богоборными. Не даждь уклонятися, Ду́ше Святы́й, сердцам нашим в словеса́ лукавствия. Обрати от расколов, ересе́й и безбожия всех заблуждших, и всех с Це́рковию первенцев Твоих сподо́би во веки веков воспевати: Аллилуиа.
Икос 7
Егда отступи Дух Святы́й от Сау́ла, тогда страх и уныние пости́же его, и тьма отчаяния низве́рже его в преисподнюю. Та́ко и аз в день уныния и ожесточения моего разумею, яко удале́н есмь от Твоего света. Но даждь мне неослабно звати Тя, души́ моея́ ограду, до́ндеже свет Твой озарит мя малодушнаго: Прииди́ убо и не отве́ржи мене́ за ропта́ние и нетерпение мое; прииди́ и умиротвори́ лютую бурю смятения и раздражения. Прииди́ и успокой озло́бленных житейскими невзгодами; прииди́ и смягчи́ сердца́ в день ожесточения и гнева. Прииди́ и сокруши козни смущения и устрашения духов тьмы; прииди́ и вдохни в ны дух сокруше́н, да терпением спасе́м ду́ши наша. Прииди́, Уте́шителю, Ду́ше Святы́й, и вселися в ны.
Кондак 8
Спаси ны, Отче Небесный! Мы убоги и не́мощны, и сле́пы, и на́ги духовно! Да́руй нам зла́то Твое, огне́м очище́нное, покры́й нас от срама одеждою белою, исцели́ пома́занием Твоим очи наша. Благодать Животворящаго Твоего Духа да сни́дет в нечистыя сосуды душ наших и возроди́т нас, пою́щих: Аллилуиа.
Икос 8
Яко Вавилонская башня, разру́шится счастие земное. Жа́лки вся начинания человеческая. Благо мне, яко смири́л мя еси, яко открыл еси мне в согрешениих и падениих моих всю слабость и ничтожество мое. Без Тебе не можем творити ничесо́же, но благодатию Твое́ю уповаем спастися: Прииди́ убо, единый мудрый Строи́телю жизни; прииди́ и уясни́ нам непостижимыя пути Твоя. Прииди́, яко молния, и освети конец нашего земнаго бытия; прииди́ и благослови всякое благо́е начинание наше. Прииди́ и бу́ди помощник в добрых делах; прииди́ и озари ум наш в час недоуме́ний. Прииди́, да́руя дух покая́ния, да отвратя́тся тем грядущия на мир скорби; прииди́, Уте́шителю, Ду́ше Святы́й, и вселися в ны.
Кондак 9
Та́ко возлюби́ Бог, яко и Сына Своего Единороднаго дал есть, И́же от Духа Святаго и Марии Девы вочеловечився, на Кресте простре́ зижди́тельнеи Свои ру́це, Кровию же Свое́ю весь мир от греха и смерти искупи́! Темже вся тварь, свободы славы чад Божиих ча́я, Отцу возлюбившему, Сыну искупившему и Духу освящающему пое́т: Аллилуиа.
Икос 9
Дух Животворящий, яко голубь, сошедший на Христа на Иордане, и на мне опочи́л есть при купе́ли крещения. Но помрачи́ся действие добро́ты Его от тьмы грехопаде́ний моих. Темже, яко путник, заблуждшийся в лесу но́щию, ожидает зари, та́ко и аз жажду лучей Твоих, Бла́же, да не погибну до конца: Прииди́ убо к запечатленному страшным Именем Твоим; прииди́ и облегчи́ совесть му́чимую, нещадно пали́мую. Прииди́ и обнови́ во мне омраче́нный Твой образ; прииди́ и разсей греховная виде́ния. Прииди́ и научи сострадати чужде́му горю; прииди́ и подвигни мя любити всякое создание Твое. Прииди́ и возда́ждь ми радость спасения Твоего; прииди́, Уте́шителю, Ду́ше Святы́й, и вселися в ны.
Кондак 10
Дух Святы́й возражда́ет в жизнь вечную, Дух Святы́й вдохновляет мучеников, освящает священников, венчает праведников, хлеб и вино совершает Телом и Кровию Божественными. О, глубино́ богатства и премудрости Божия! Да́руй нам венец Твоих даров – всепрощающую вечную любовь, скорбя́щую за врагов, хотя́щую всем спасти́ся, да озаре́ннии ею, яко чада света, пое́м: Аллилуиа.
Икос 10
Кто ны отлучи́т от любве́ Божия; скорбь ли или́ теснота, или́ гоне́ние, или́ глад, или́ нагота́, или́ беда, или́ меч? Аще и всего лишимся на земли́, и́мамы наследие неувядаемо на небеси́. Но да́руй нам, Господи, любити Тя не словом или́ язы́ком, а истинным делом и подвигом всея́ жизни: Прииди́ же, Ду́ше Всесильный, и умножи нам всепобеждающую веру; прииди́ и даждь нам дерзновение молитвенное. Прииди́ и согрей сердца наша, да не охладеет любовь наша в сердце за преумноже́ние беззаконий; прииди́ и не даждь нам отпа́сти во дни гоне́ний и осмея́ния веры. Прииди́ и сохрани́ нас от непосильных искушений и соблазнов; прииди́ и оживи́ сердца́ наша кропле́нием ро́сы Твоея́. Прииди́, уврачу́й, освяти́ и возста́ви нас, Бла́же, Твое́ю благодатию; прииди́, Уте́шителю, Ду́ше Святы́й, и вселися в ны.
Кондак 11
Та́ко глаго́лет Господь: «Излию́ от Духа Моего на всяку плоть, и прореку́т сы́нове ваша и дщери ваша, и юноши ваша виде́ния у́зрят, и старцы ваши со́ния увидят». Ду́ше всежеланный, даждь то́кмо едину от крупи́ц с трапезы избра́нных сыно́в утешения Твоего и нам, умильно зовущим: Аллилуиа.
Икос 11
Аще и на краткое мгновение, яко блистание молнии, Ты возсия́еши в тайне души́, но незабвенно есть светоли́тие откровения Твоего, от негоже страшным и боголе́пным изменением преображается бренное естество́. Сподо́би убо, Уте́шителю Благи́й, и нас еще в земне́м житии чистым сердцем узре́ти Тя, вопиющих Ти: Прииди́, светопода́тельная Молние вечности; прииди́ и озари нас невечерним сиянием. Прииди́, Сокровище смиренномудрия и веселие кротких; прииди́, водо́ живая и прохлади́ нас среди́ зноя страсте́й. Прииди́, ибо вдали от Тебе несть радости и покоя; прииди́, яко с Тобою всюду Небесное Царство. Прииди́ и напечатле́й в душе солнцевидный лик Твой; прииди́, Уте́шителю, Ду́ше Святы́й, и вселися в ны.
Кондак 12
Благодати реко́ неистощимая, Ду́ше Святы́й, грехов разрешителю! Приими́ моления наша о всем мире, о верующих и неверующих, и о сынах противле́ния, и всех приведи к вечному Царствию Святы́я Троицы; да упраздни́тся Тобою и последний враг – смерть, и мир, возрожде́нный очистительным огне́м, воспое́т новую песнь безсмертия: Аллилуиа.
Икос 12
Зрю духом град Божий – Иерусалим небесный, яко неве́ста, укра́шенный, солнцевидный, торжествующий. Слышу ликования праведных на трапе́зе Господней и гла́сы ангелов и пресветлаго Господа посреде́ избра́нных Своих, и отбеже́ болезнь и печаль и воздыхание. Царю Небесный, Ду́ше Святы́й, седмери́цею даров Твоих сподо́би и нас причастниками быти сия́ вечныя радости, в Бозе зовущих Ти си́це: Прииди́, Бла́же, и возбуди́ в нас жажду загробнаго бытия; прииди́ и зате́пли в душе ча́яние жизни истиннаго века. Прииди́ и открый нам радости грядущаго Царствия; прииди́ и даждь нам снегосветлую ризу чистоты. Прииди́ и исполни нас блистанием Божества; прииди́ и возми́ нас на брак Агнчий. Прииди́ и сподо́би в вечной славе Твоей царствовати; прииди́, Уте́шителю, Ду́ше Святы́й, и вселися в ны.
Кондак 13
О, светоно́сная пучи́но спасающей любве́, Ду́ше Животворящий! Согрей дыханием наи́тия Твоего оледеневший в беззакониих род человеческий, силою непостижимых суде́б Твоих ускори́ погибель зла и яви́ вечное торжество Божественныя правды. Да будет Бог всяческая и во всех, и всяко колено небесных и земных и преисподних да воспое́т: Аллилуиа.
Этот кондак читается трижды, затем 1-й икос «Ангели на небеси...» и 1-й кондак «Приидите, верни...».
Молитва
Ду́ше Святы́й! Всю вселенную Собою наполня́яй и всем жизнь подаваяй, от скве́рных же человек удаля́яйся, смиренно молю Тя: Не гнушайся нечистоты́ души моея́, но прииди́ и вселися в мя и очисти мя от всякия греховныя скве́рны. Да помощию Твое́ю прочее время живота моего поживу́ в покая́нии и творении дел благи́х, и та́ко прославлю Тя со Отце́м и Сыном во веки веков. Аминь.