Из предисловия к Служебнику, напечатанному в 1656 году⁵³⁹

Благочестивый государь царь и великий князь Алексий Михаилович всея великия и малыя россии самодержец. И великий христолюбивый государь святейший Никон патриарх московский и всея великия и малыя россии, богоизбранная сия и богомудрая двоица святый оный собор (1654-го года) совершивше, и духа святаго исполнешеся, исполнения ради на том святом соборе уставленных, повелеша древния святыя книги от греческаязыка на славенский прежде многих лет, яко 500 лет, и вящше преведенныя, и нахартии писанныя, во царствующий свой град москву собрати. И абие премудрым их повелением отвсюду из древних российских книгохранителниц, и из великаго нова града, и живоначальныя троицы из сергиева монастыря, и из юрьева монастыря, и из хутыня монастыря иже в великом нове граде, и из иосифова монастыря волоцкого, и из прочих градов, и честных монастырей, святыя оныя древния предмногими леты писанныя книги собрашася. Таже благочестивый царь и христолюбивый патриарх, богоизбранная сугубица, оными собранными книгами единеми не удовлившеся, умыслиша здраво да не едина их воля, но да и совет вселенских патриархов оных книг о исправлении будет вкупе. И усвоившее богобоязнива мужа, именем мануила грека, и сним грамоты своя, внихже и о погрешенных в книгах вопрошения написавше, ко вселенским патриархом послаша, в тоже 7172 е лето. Всесвятейший же вселенский патриарх Паисий, и сним священнии мужие, благовернаго царя, и благочестиваго патриарха писания приемше, собор о сих скоро сотвориша, и главизнами на нем содеянными о всех писанных к ним, благочестивому Царю, и христолюбивому Патриарху ответ давше, и деяние соборное прислаша, в лето, 7173 е. во всем повелевающе последовати, древних великих православных восточныя церкве учителей, писанием сущим в ветхих книгах, греческих же и славянских. Возписа же всесвятейший Паисий патриарх вселенский, ко всесвятейшему великому государю Никону патриарху московскому, и всея великия и малыя россии, и в грамоте своей сице. Преблаженнейший и святейший патриарше высочайшия москвы, и всея земли российския, господи Никоне, во святом дусе возлюбленный брате, и сослужебниче нашего смирения, о немже писасте нам, даем ответ о всех преблаженнейший брате, да исправятся якоже лепо: понеже бог просвети тя во времена ваша, да очистятся вся неудобная и да исправятся, о нем же радуются, жив господь бог, и имам тя писана в души моей, за достоинство и разум, его же дарова тебе бог, и о благом твоем здравии зело возрадовахомся, и прославихом бога. Еще же разумехом и вину церковных прошений, их же толкование просить от апостольския соборныя по нам великия церкве, и воистину зело похвалихом преблаженство твое, еже не перестает испытати и искати о душеполезных и спасительных вещех церковных, яко истеннен пастырь, и верный строитель божий, пекися устроити и питати духовне, словесное свое стадо, чистою и нелестною и твердою пищею. И тако по блаженному павлу, труждается и бдит о душах православных, яко имать воздати к богу слово о них. ихже ради преблаженнейший брате с великою радостию, и добрым сердцем потщахомся вскоре истолковати, и ответ дати. И собрахом священный собор, и узрехом я, и писахом на едином коемждо чистое и православное толкование, и се связахом я в книзе, и посылаем я с помощию в руце ваша. Да разумеет всяк толкование и смыслы, яже имут чинове церковных таинств, да предадите их всем священным лицам да свершат последование, и всякое священнодеяние по чину великия церкве: да ни едино разнество имамы, яко чада истинная единыя и тояжде монастыре, восточныя апостолския соборныя великия церкве христовы: и да ни едину вину обретают скверная еретическая уста оглаголати нас о некоем разнстве, но да стоим во истинном согласии тверди и непоступни, и прочая. Написа же всесвятейший вселенский патриарх паисий в тойже своей грамоте и сие, зело дивяся и глаголя тако: обаче преблаженнейший брате, со прошением зде речеся слово, яко бывают в церковных чинах некая, яже зрятся не стояти добре, зане не имут подобие чином великия церкве, и удивляюся како не воспросишася и сия. И первое, яко во святом символе святых отец никейскаго собора имате некая приложения, и некая словеса, яже мы не имамы. Посем и иная некая несогласия в церковных вещех. Сего ради мы от многия любве, и еже по богу желания, еже имамы быти во всех соединени, и подобии яко едино тело церковное, желаем да исправятся, да не пребудет некое слово у еретиков осудити нас, яко имамы разньства между нами: и прочая. К сим тойже всесвятейший Паисий патриарх вселенский, и символ православныя веры, еже есть верую во единаго бога, и прочая: греческим языком написанный, и во всем трехсот осминадесяти богоносных отец, в константине граде сошедшихся духом святым составленному сложению согласующийся, в царствующий град москву ко благоверному царю, и ко благочестивому патриарху присла. И тако благочестивый царь, и христолюбивый патриарх от вселенскаго паисия патриарха. О всех писанных ответ приемше, и соборное оно деяние прочетше, и сим к болшему благих желанию воздвигшеся, и сущыя в россии ветхия греческия же и славенския книги, на исправление не доволно мняще, изволиша со многою своею милостынею старца арсения суханова послати во афонскую гору, и во иныя святыя старожитныя места, к держащим и еще греческаго закона уставы непреложно, яко да и оттуду своея ради богатыя милостыни старописанныя книги притяжут. И сему сбывшуся, святые горы афона, боголюбивии начальницы, святых и честных монастырей лавры, ватопеда, хиландара, иверскаго, Дионисия, пантократора, ксиропотама, катулмуси, дохериа, симона петра, русскаго, филофеа, святаго павла, и прочих, изыскавше во своих книгохранителницах книги изрядны, и право писаны греческим языком, числом 500. В нихже тако суть книги древния, яко от того времене в неже они писани, прейде лет, евангелию 1050. Евангелию же, 650. Псалтири, яже писана при греческом царе алексии комнине, 600. Евангелие же, еже от грек епископ Иоаким принесе в великий нов град, внегда боговолением божиим первое крести й. Григориа богослова, 737. Служебнику, 600. Служебнику же, 455. И прочия, евангелия, апостолы, псалтири, пророческия, апокалипсисы, святыми отцы восточными изрядно истолкованныя. К сим святых, Дионисия ареопагита, Василиа великаго, Иоанна златоустаго, Иоанна дамаскинскаго, и многих святых. К сим же уставы, октоихи, триоди, минеи часословы, и прочыя святыя книги. Овым убо от них от того времене егда писаны, придоша, 700, лет. Овым же, 500, овым 400. И сия вся со оным арсением сухановым, в царствующий град москву прислаша. Еще же и от иерусалима патриарх святейший, евангелие прежде шестисот лет писанное присла. К сим святейший александрийский и антиохийский патриархи, и архиепископ пекский и патриарх сербский и халкидонский и ахридонский митрополити, и иныя мнози от православных стран, писанием из царствующего града москвы прошени, не мнее двою сот книг различных древних и святых внего прислаша. И тако благочестивая сия и богомудрая двойца, великий государь царь и великий кнезь Алексий Михайлович всея великия и малыя россии самодержец, и великий государь святейший Никон патриарх московский и всея великия и малыя россии, оныя священныя книги совокупивше вся во едино и довольно лежащая в них разсмотривше: и божиим вседержительным манием соединившем их в любовь движими, целости ради непорочных догмат. И еще к вящшему утверждению о томже паки в царствующем граде москве в патриархии собор сотвориша: и беша на том священном соборе: Никон божию милостию государь и святейший патриарх московский и всея великия и малыя россии. Макарий патриарх антиохийский. Гавриил патриарх сербский, с митрополиты и со архиепископы, со архимандриты, и игумены, и со всем освященным собором. Почетше же святое евангелие, и богодухновенная апостольская, и седми вселенских соборов правила, к сим и бывшее в лето 7162 е, при державе благочтиваго и христолюбиваго государя царя и великаго князя Алексия михаиловича всея великия и малыя россии самодержца, в царских его полатах соборное утвержение, и оное от всесвятейшаго вселенскаго Паисиа патриарха, присланное соборное деяние предся принесше, со усердием почтоша, и судиша е право, и от духа святаго составлено быти. Пренесе же Макарий патриарх антиохийский на собор, и своя православныя книги, служебник, и прочая. И тако вся старописанныя греческия и славенския книги разсмотривше, обретоша древния греческия с ветхими славенскими книгами во всем согласующася: в новых же московских печатных книгах, с греческими же и славенскими древними, многая несогласия и погрешения. Прочтенным же сим всем и разсужденным, судиша тако быти, якоже апостольская, и седми вселенских соборов, святая правила повелевают: и якоже на святых соборех, первое в царствующем граде москве, в царских полатах, потом же в константинополи, у всесвятейшего Паисия вселенскаго патриарха, и сним священных мужей уставлено бысть.