Житие и подвиги преподобной благоверной великой княгини инокини Анны Кашинской, новой чудотворицы

Содержание

Господу Богу и Спасу нашему Иисусу Христу, прежде вольныя и спасительныя Своея страсти и воскресения, сеющу слово спасения живущим на земле, и часто не токмо единем божественным своим учеником и апостолом беседоваше, но и ко всем народом учение свое простирая и подвизая ученики своя на проповедь, сице глаголаше: «Се Аз посылаю вас, яко овцы, посреде волков. Предадят бо вы на сонмы и на соборищи, и пред цари и владыки ведени будете имени Моего ради. И не убойтеся от убивающим тело, души же не могущих коснутися». И такового пресладкого и небесного и спасеного учения мнози явишася, яко звезды небесныя множеством, мученицы и исповедницы, и подобницы божественным и спасительным Его страстем показашася. Всяких виде учения доблественно претерпеша и победители врагу до конца явишася. Иногда же и народом беседоваше: «Возьмите иго Мое на себе и научитеся от Мене, яко кроток есмь и смирен сердцем, и обрящете покой душам вашим, иго бо Мое благо и бремя Мое легко есть». И паки: «Аще кто оставит отца или матерь, или жену, или чада, и села, и имения имени Моего ради, стократицею приимет и живот вечный наследит. И аще кто не возьмет креста своего и вслед Мене грядет, сей несть Мне ученик». И не просто учаше, но яко Бог и Владыка всех, ведый помышления человеческа и испытая сердца и утробы, яко не от слышания точию спасение бывает, но аще кто сотворит пречистую волю Его, сей спасен будет: «Аще кто слово Мое соблюдет, жив будет во веки». Такового евангельского проповедания приемше слово спасеное и развергше бразды сердец своих, вземше крест последоваша Христу, в пустынях скитающеся, и в горах, и в вертепах, и в пропастех земных живуще, отбегающе от прелести мира сего, и яко небо парнии орли приемше крила легкостию смысла своего возлетеша на небо. Понеже всем сердцем возлюбиша Господа Бога и Тому невозвратным путем шествоваша, и ничто же паче любве Его предпочтоша. Якоже и сия блаженная и великая княгиня Анна, о ней же нам ныне слово предлежит, от юности своея возлюбила божественныя и спасительныя заповеди Его и Тому невозвратным путем шествова, якоже напреди слово явит о сем.

Сея убо преподобныя отечество град Кашин. Дщи бяше благородных и благочестивых родителей от славных боляр. И добре има воспитана бывши во страсе Господни и наказана Того пресвятыя заповеди творити; научена же бывши и божественному писанию. И добре поучашеся страху Господню и от того поучения возгарашеся на любовь Божию. Не взираше бо на красоту века сего, яко прелесть бе; ниже уклоняшеся к сладости пищи и покоя, но пища бе ей молитва непрестанная, и желание ненасытно к Богу; ниже честь и слава возбрани когда ей от любве Божия; но присно прилежаше благим делом, како бы угодити Богу, и на Того пресвятую волю полагаше упование свое. И весьма поучашеся в законе Господни. И яко древо происходящих вод напояемо бяше божественных словес поучением; и от того навыче духовного веселия. Моляшеся часто Господеви, яко да не лишит ю небесного Своего чертога, но да сотворит о ней, якоже волит пресвятая воля Его. Нищим же и убогим довольну подаваше милостыню. И присно цветущи ей благими делы, в таковой юности и чести и славе и во всяком покои подвизающуся на божественную ревность.

Егда же прииде в совершенный возраст, подобна на сочетание брака, обручиша ю великому князю Михаилу Ярославичу, иже тогда ему господствующу во граде Твери. Такоже и той благоверный князь Михаил вельми благочестив и боголюбезен смирением и кротостию, и благотворением к нищим и к странным попремногу преспевая, иже последи скончася мученическим подвигом и венцом увязеся мучения от вседержительныя руки, якоже напреди пошед слово явить о сем. Живущима же има во благочестии и в законе Господни, поучающеся день и нощь, и преспевающе красотою делания своего, еже к нищим и ко убогим нищепитательством, и к странным, и к больным, якоже и древле Авраам праведный, и, по Иову терпеливому, всем всяка быста: нога хромым и око слепым. Вельми же любяста священнический чин, яко Божия слуги, и яко слово воздати хотяще ο данней им благодати. И попремногу почитаста иноков, яко присных Божиих заповедей делателей. Не зряще бо на красоту века сего суетного, яко прелесть бе и скоро преходит, и яко сень мимо течет. Ниже возвеличастася благородием и величеством господства своего, или гордостию превзимастася, якоже нецыи творят, взимают бо ся величеством благородства своего, и яко безсмертии творятся, дмением и кичением, тщеславием же и высокоумием, и гордостию превзимающеся еже друг на друга, не ведуще, яко гордости ради, иже иногда бывый денница, отпаде славы Божия, и вместо света тьма бысть, и диавол преименовася. И хотящим в смирении жити, вельми супостат душ наших запинает и в преисподняя с собою сводит. Сице и Адама праотца нашего высокоумия ради из породы изгна. И сице вспоминаста в себе благоверный и благочестивый великий князь Михаил со благоверною и великою княгинею своею Анною, вельми смирение любяста и любовь равну ко всем держаста. Ведуще от божественного писания, яко любви ради Сын Божий преклоне небеса и сниде с небес и воплотився нашего ради спасения от преблагословенныя Владычицы нашея Богородицы и Приснодевы Марии, и бысть совершен Бог и совершен человек, и толико смирив Себе, Творец и Зиждитель всея твари, и быв послушлив даже до креста и смерти, якоже апостол глаголет, да нас примирит Богу и Отцу Своему. И вся сия пострадав безгрешный, да нас свободит от клятвы законныя и наследники ны сотворит царства Своего небесного. Сия помышляеста в себе блаженная, како от толикия высоты сведе себе и премногия ради благости быв подобен нам, кроме греха, и яко не имеяше, где главы подклонити. Не паче ли нама глаголаше: смертныма сущима и тленныма, подобает Его ради смирятися и любити всех, не токмо своих и единоплеменных, но и врагов наших по евангельскому гласу. И сице видев Бог наше смирение, отпустит нам согрешения наши и наследники нас сотворит небесного своего царства. И еще рассуждал в себе блаженный и благочестивый князь Михаил с супружницею своею, великою княгинею Анною, присно поучающеся во псалмех и пениих, и песнех духовных, Богови молястася, о еже сохранитися отечеству и всей державе их от нашествия иноверных язык. И сице блаженныма цветущима благими делы, беззлобием и кроτοстию, и смирением, и благотворением во всей велицей России, яко некая два светила великая, озаряющи всюду своим житием и ничим же лишена быста Авраама, и Иова, и Давида, но во всем последоваста сродником своим, иже в России бывшим светилом: великому князю Михаилу Черниговскому и деду своему великому князю Александру Невскому. По сем же родистася има четыре сыны: первый князь Дмитрий, вторый князь Александр, третий князь Василий, четвертый князь Константин. И добре их воспитаста и наказаста в страсе Господни и боятися Бога и Того пресвятую волю творити.

Что же по сих видев враг и супостат душ наших блаженного и великого князя Михаила в таковей славе и чести, и яко царь почитаем, и ничим же от него побежден бывает, но присно побеждается, и в конец разрушися неприязненная его сила, и весьма попираем, яко птица худая, испрошает на него от Бога, яко же древле и на праведного Иова, изущает на него злыми своими ухищрении, своих има единоплеменных во плоти сродник. И коварствует льстивый диавол на великого по истинне во блаженных князя Михаила, хотя его доброму течению спону сотворити и великой княгини Анне. Ho он пояху: «Господь нам помощник и не убоимся; что сотворит нама смертный человек, аще бо и воздвизает диавол на святых брань, но по мале на его главу болезнь возвратится». Тогда многа зависть и крамола на блаженных воста, и многа брань от своих ему на его державу приидоша. Но Господь, видя своего угодника и непорочное житие, дарова ему победу велию на супостаты его, и на совостающая на него единородных ему братию.

To же видев враг, яко ничтоже усие сотворити великому князю, и яко попрана бысть неприязненная его сила, паки подвизает на него брань лютейши первого: взущает на него ординского царя Озбяка и советника его, паче же своего угодника беззаконного Колгу. Благочестивый же и великий князь Михаил, слышав беззаконного царя, яко хощет пленити его державу и пролити кровь христианскую неповинных сущих, вельми душею скорбя и плакася, глаголаше к супружнице своей великой княгини: «О, госпоже, яко слышу повеление злочестивого царя и востаящую на наю зависть, и яко хощет многа брань сотворитися между нами и кровь пролиятися стада Христова. Но аз хощу, аще Богу волящу, итти сам в орду к беззаконному царю и собою ответ сотворити и душу мою положити за овцы стада Христова по Христову словеси». Сие слышавши, блаженная и великая княгиня Анна оскорбевся душею и в себе глаголаше: «Что ми, благоверный мой князь, яко хощу итти в орду к нечестивому царю и душу свою положити за овцы стада Христова? Будет ли се истина, яко хощет за имя Христово пострадати?» И сице глаголаше к нему: «О, драгий мой, любимый, великий княже Михаиле! Почто боишеся злочестивого царя и его беззаконного повеления, аки немощен трепещеши? Еда не имаши бранных и сильных оруженосцев у себе, или тьмы тем окружающих тя храбрых воинов. Еда не можеши с толикою силою ратных людей, паче же с Божиею помощию сопротив стати беззаконного царя. Не ты ли приял еси искус Божия помощи пред малыми сими деньми, егда прииде на тя с ратию брат твой, великий князь Юрий, со окаянным Кавгадыем, варваром? И колико тогда побил еси пришедших на тя от их воинства, и самого варвара в руки твоя предал тебе Бог! И ныне ли, благочестивый мой княже, боишися злочестивого царя и хощеши предати себе самовольно, яко агнец злохищному волку!» Он же глагола к ней: «Аз, госпоже, от многа времени желаю пострадати за имя Христово и душу мою положити за порученное мне стадо: но не сущу такову времени. Ныне же, аще Бог восхощет, готов есмь пострадати за иже мене ради пострадавша. И мню, яко лучше есть мне единому умрети за стадо Христово, нежели мене ради мнозей крови христианстей от мучителя пролиятися». Сия слышавши по истине блаженная княгиня Анна, и яко истинно хощет пострадати за имя Господа Иисуса, и рече к нему с тихостию: «О, господи мой, благочестивый княже? Весть убо Господь наш Иисус Христос, яко несть неправды нашея пред беззаконным царем. Но понеже велегласный учитель вселенныя, божественный апостол Павел, пиша к Тимофею, глаголет, яко вси хотящи жити благочестно о Христе гоними будут, лукавии же человеци предуспеют на горшее. И Сам, беседуя, Сын Божий ко учеником своим глаголаше: «Аще бысте от мира были, мир убо своя любил бы. Но Аз избрах вы от мира, сего ради и мир вас ненавидит». Паки к иудеом глаголаше: «Сего ради ищете мя убити, яко слово Moe не вмещается в вас». И по сему Христову словеси, господи мой, аще быхом были мы подобни их житию и ласкание бы к ним творили, не бы убо на нас такова зависть когда возстала, или на нашу державу от братий твоих кто позавиде, но понеже Спас ко учеником своим глаголаше: «яко хощете, рече, скорбь имети, но дерзайте, яко Аз победих мира и прелесть его. И не убойтеся от убивающих тело, души же не могущих убити. Но паче подобает боятися могущего по убиении тело и душу воврещи в дебрь огненную. И смотри, благочестивый и драгий мой княже, яко сродницы твои, благовернии князи Борис и Глеб, от брата своего Святополка зависти ради убиена быста, и сего ради от Бога венчана быста. Такоже и благоверный и великий князь Михаил Черниговский с болярином своим Феодором, колико пострадаста за веру Христову от злочестивого Батыя и никакоже покористася беззаконному велению, но кровь свою излияша за Христа: сего ради и венцем мучения от вседержительныя руки венчастася и мученицы Христови нарекошася. И аще сице, господи мой, благоверный княже, пойдеши во орду к беззаконному царю, и самовольно хощещи пострадати за имя Господа Иисуса, никому же тя понуждающу, поистине тогда блажен будеши во вся роды, и память твоя во веки будет, токмо потщися усердно во звании своем стояти, и Господь тебе помощник будет». Блаженный же и великий князь Михаил рече к ней: «Что бо мне сладчайши сего или краснейши, еже за имя Господа моего Иисуса Христа пострадати! И уповаю на щедроты его, яко исполнит, желание сердца моего». Тогда блаженная к нему глагола: «Молю тя, господи мой, благоверный княже! Егда предстанеши нечестивому царю, яко добр воин Христов, и егда нанесут тебе злоковарныя своя муки, хотяще покорити тя своему умышлению, тогда, господи мой, никако да не убоишися от грядущих на тя зол, ниже огнь или колеса, или мечи, или сечива устрашать тя. Но буди терпеливно во звании своем, в неже еси хощеши самовольно итти. Ниже доброму твоему помышлению возбранит ти величество державы твоея; ниже ино что от земных и тлеемых да препнет самовольному твоему званию: вся бо она мимо ходят. Ниже терпения твоего ослабят друг твоих ласкания, и ниже да украдут твоея яже во Христа веры некоторыми лестными словесы и начинании. Отнюд ненавиди тех нечестивых советы, но токмо возлюби, господи мой, единого Господа Иисуса Христа, возлюбившего тя от младых ноготь и предавшего Себе за тя. Тогда аз буду блаженна тебе и ради во всех русских женах». Сия глаголаше блаженная и великая княгиня Анна супругу своему, благочестивому и великому князю Михаилу, бояшеся, да не како отбегнет доброго подвига, еже о Христове имени страдания.

Он же яко слышавши таковые глаголы, вельми дивляшеся премудрости словес ея и премудрому совету, и Бога похваляя, яко извещение приим Божия помощи, еже к подвигу желаемого ему пути, яко женою ему подаде таковый совет. Видите, братие, и почудитеся блаженныя и великия княгини Анны премудрому совету! Не восхоте бо супруга своего в мале времени славима быти, но во веки блажима и похваляема и от Бога прославляема доброго ради исповедания. И, не яко Ева советова Адаму древа вкушеним в раи, но, яко Ревекка советова о благословении сыну своему Иакову. Таже рече к ней обрадованным некако лицем: «О, госпоже моя, супружнице Анно! Мне бо еже жити Христос, и еже умрети приобретение жизни Его. И что ми сладчайши сего возжеленнейши, яко умрети за имя Господа моего Иисуса Христа». И сия рек умолче. Та же призвав дети своя, и поучив их страху Господню, и по всему наказоваше подобитися своему благому житию. «И матери, рече, своей покаряйтеся, и на ню взирайте, и непорочному деланию, и многим добродетелем ея последуйте». Конечное же прорек: «Якоже видесте, рече, наю творяща, сице и вы творите, и Бог мира да будет с вами». И разделив им наследие достояния своего, подав им благословение комуждо своя грады, и приим благословение у епископа своего, блаженного Варсонофия, и отъиде во орду, точию поим единого сына своего, князя Димитрия, да видит страдание его, много же плачущим всему народу, мужем, и женам, и детем. Хотяй иже уведети о сем, да прочтет житие и страдание блаженного и великого князя Михаила, како подвизався добрым своим самовольным званием, еже о имени Господа нашего Иисуса Христа, и колико от беззаконного и нечестивого царя и его боляр, паче же от треклятого и зверообразного варвара Кавгадыя приять поношения и уничижения, биения, и досады, и различных томлении, и озлоблении, последи же блаженную кончину приять: мечем усекновен бысть, и тако мучения венцем увязеся, добрым подвигом подвизався, течение скончав и веру соблюде в лето 6827-е, месяца ноембрия в 22 день. Тело же его пресвятое принесено бысть изо орды сыном его князем Димитрием в славный град Тверь и положено бысть честно со псалмы и песньми, и пеньми духовными, и с многими слезами от всего народа в соборней и апостольстей церкви, идеже и доныне безчисленныя чудеса источает с верою приходящим к пресвятому гробу его и прикасающимся многоцелебным мощем его.

Благоверная же и благочестивая и великая княгиня Aннa радовашеся душею и вельми Бога благодарствовавши, яко сподобил супружника ея, великого князя Михаила, пострадати за имя Его пресвятое и страшное и в добром исповедании блаженную кончину прияти. И нападши на перси его духовными слезами, яко к живу, сице глаголаше: «Блажен ecи, господи мой, великий княже, и по истинне во вся роды блажен будеши, яко пострадал еси по пострадавшем по нас, и се ныне отшел еси к возлюбившему тя Христу. И тамо божественную и неизреченную Его славу зриши и вкупе со ангелы воспеваеши Пресвятую и Живоначальную и Нераздельную Троицу. И ныне молю тя, ο, страдальче Христов! Да не оставиши мя погружену прелестьми жития сего, но помяни мя у престола Вседержителя Христа Бога нашего, яко да достойна и аз буду небесного чертога с мудрыми девами, и яко да не угаснет светильник души моея от доброго подвига. Тебе бо ныне стяжах о мне ходатая к Богу и молитвенника крепка». И сице довольно помолившися и целовавши любезно пресвятое тело его и, вместо многоразличных аромат, многими слезами облиявши тело его, отъиде в дом свой, славящи и благодарящи Христа Бога нашего и Его рождшую Деву, Владычицу нашу, Богородицу и Приснодеву Марию.

Что же по сем, благоверная княгиня Анна пребываше в дому своем с сыном своим благоверным князем Константином Михайловичем; тому бо юнейшему сыну его той славный град Тверь, отча достояния, в наследие достася. Яко горлица чадолюбавая вдовствующи, молитвами частыма и многим молением выну Бога молящи, яко, да и ту не лишит достояния святых лику и наследия небесного царствия. И многому посту и воздержанию себе вдавши, кротостию же и смирением украшашеся. Нищих питая, и странных и убогих повелеваше в дом свой вводити, и пищу им и одежду довольну подаваше, и сирот и вдовиц заступая, и насилующим возбраняше, наказуя и уча их не обидети нищих и сирот. И сице глаголаше, яко сиротам есть и вдовицам, и убогим Отец Небесный помощник и заступник, якоже и пророк глаголет: «Терпение убогих не погибнет до конца». И паки: «Сиру и убогу ты буди помощник». И всяку неправду ненавидя и всяко нечестие потребляя, учаше же и сына своего возлюбленного, благоверного князя Константина, еже любити Господа Бога всем сердцем и всею душею, и всею мыслию и Того выну пред собою имети, и святыя заповеди Его хранити, и суд праведен творити, и ласкания и лукавых словес от вельмож ненавидети, и любовь ко всем равну имети, и от насилующих сирот и убогих изымати. И таковыми благочестивая и великая княгиня Анна тогда плоды добродетелей цветяше и Богу угождающи, якоже и древнии святии. Помышляю же, како бы отврещися мира и единому Богу в молчании работати, и Toго доброты выну ненасытне насыщатися, понеже рече: «Уязвленна есмь Того любовию; и вслед Твоего человеколюбия потеку», глаголаше к Богу: «Прими мя, женише небесный, Иисусе Христе, Твоею любовию, и сопричти мя мудрым девам». И сице моляшеся Богу и исповедовашеся. Таже по сем блаженная, разсуждая в себе, глаголаше: «Аще пребуду аз в дому своем в таковей чести и славе и в покои, паче же в молве и суетии, яве отлучат мя от Божия любве и никогда же попустит мя в безмолвии единому Богу молитвою беседовати. И кая польза будет, аще человек и весь мир приобрящет, душу же свою отщетит. Ибо и Моисей, он Боговидец, никогда же бы сподобился славы Божия видети и в купине на горе Синайстей закон прияти, аще бы токмо не отлучился чести и покоя, и еже нарицатися сын дщери фараоновы. Сего ради подобает работающему Богу от всего усердия и на высоту добродетелей взыти, всякого покоя и славы мира сего бегати, и в дому Божии приметатися и без молвы Богу работати, се бо и Господь наш Иисус Христос учит нас глаголя: «Аще кто не отвержется себе, сиречь пристрастия земнаго, и не возьмет креста своего и в след мене грядет, не может мой быть ученик». Сему гласу святии отцы последоваша и святыя жены поревноваша, в пустынях вселишася и в горах, и в вертепах, и в пропастех земных, и еже чудо, яко и дневныя виши лишаемы бяху, и озлоблями от бесов; якоже и божественный апостол Павел глаголет: «Их же недостоин весь мир. Сего ради и Бог их воспрослави, понеже возлюбили Господа Бога всем сердцем». Что же успеет и мне мир сей, и слава его, богатство же и красоте века сего, и многая молва и мятеж бывающии! Невозможно бо единем оком зрети на небо, а другим на землю; невозможнейши же и весьма неудобно во многой молве от всего сердца Богу единому работати, понеже прелесть века сего помрачает очи душевныя и ослепляет мысли умныя и работающим Богу запинает во всякой добродетели. Что же пользова и рай праотца нашего Адама и Евы, егда бо видеста красоту древа, от него же заповедь прияста не вкусити. И что сотвориста, еда ли не прельстистася Ева очима ко древу, еда ли не поползеся Адам и не токмо испадение из рая пострадаста, но и от Бога отлучистася и смертию осудистася; еда ли аз крепчайшии онех буду, в таковей чести сый. И пред очима моима всяка честь и слава господства сего, и яко царица почитаема от боляр и от всех людей. И како могу аз избыти ловления и сети диаволи; понеже мнози от многих начаша в мире добродетели проходити, и малии обретошася сохрании. Сего ради девственный сосуд, возлюбленный ученик Христов Иоаин Богослов глаголет: «Не любите мира и яже в нем. Вся бо сущая видимаго сего мира похоть плотская, и похоть очная, и гордыня житейская». И сице разсуждая в себе блаженная, и поистине благочестивая великая княгиня Анна, вскоре и делу касается: весть бо, яко медление раскаяние обаче творити. Тогда блаженная оставляет мир и сраспинается Христу, оставляет дом, и господство века сего и изволи приметатися в дому Божии, паче и с понесшими тяготу и вар дневный водворитися, нежели жити в царских палатах, имети славу и господство мимотекущего, и яко сень преходящаго века сего. Се бо и Моисей Боговидец изволил страдати с людьми Божьими и имети поношение Христово, нежели имети временного греха сладость и жити в дому фараонове. Приходит убо в монастырь девичь, нарицаемый Софийский, в нем же храм Премудрости Слова Божия, и тамо поклоняется Богови, радостными слезами обливаяся, и на мног час Богу исповедовашеся, пометает же себе с великим смирением на нозе сущим тамо постницам и молит с кротостию, яко да и она от них тамо сочетана будет в лик. Оне же необычному пременению и великому смирению блаженныя дивляхуся. И яко раба моляше их, а госпожа всем сыи; сего ради бояхуся и ужасахуся

и в трепете велици послушаху словес ея, великия княгини Анны. Видяще же и сына ея, благоверного князя Константина, и всех боляр, и всего народа плачущихся, и дивляхуся, како толик плач не возможе блаженную отторгнути от любве Божия. Та же повелевает себе пострищи во святый ангельский образ. И сему бывшу, и приведе себе Богу жертву непорочну, и яко юница нескверная принесеся на всеплодие Вышнему Архиерею, Господу нашему Иисусу Христу. И исторжеся мирския прелести, яко птица от пругла и яко серна от тенета. И весьма радовашеся о Господе Бозе своем, яко получи желание сердца своего. От юности бо своея непрестанною молитвою Бога моляше, дабы сподобил благий свой ярем понести и того единого доброты выну наслаждатися. И тако благодатию Христовою нача подвизатися: постом и молитвами, и бдением всенощным, и слезы многия изливая, и непрестанно томляше себе алчбою и жаждою. Глаголаше бо, яко подобает плоть презирати, прилежати же паче о души вещи безсмертней, ведяше бо, яко мног труд иноческого жития и многими труды подобает внити в царство небесное. Нужно бо есть царство небесное, и нужницы восхищают е. Смирение же и кротость вельми любяше, ведяше бо, яко смирения ради вся коварства вражия растлеваются. Послушание же ко всем равно имеяше и всем постницам покоряшеся о Господе. Кто бо тоя слезы исповесть или труд, смирение же и кротость, и послушание, и терпение, и бдение, всенощное стояние, и любовь, яже к Богу? Како бо возможно словом постигнути или писанию предати. Выну бо пояше: «Прильпе душа моя по Тебе, Христе Боже, и возжада душа моя к Богу крепкому и живому. Когда прииду и явлюся лицу Божию». И тако помощию всесильного Бога, в мале времени превзыде добродетельми всех сущих тамо постниц. Егда же прихождаше ко преподобней сын ея, благоверный князь Константин, благословения ради и поучения с вельможами своими, она же учаше его, како Бога боятися и Тому угодная творити и ничто же от видимых, паче любве Его, предпочитати и на Того уповати. «Той бо есть, рече, царь царствующим и Господь господствующим; тем бо цари царствуют и сильнии держат землю, и ему же хощет подает царство. Той бо есть мертвит и живит, и низводит во ад, и возводит, убожит и богатит, смиряет и высит, возставляет от земля убога, и от гноища возносит нища, и посаждает с могущими людии, и престол земного царства подает ему. И несть кому мощно противитися величеству славы Его. Воли бо Его кто противитися может? Якоже и пророк Давид глаголет: «Ты страшен еси, и кто противустанет Ти. Яко Бог велий Господь и Царь велий по всей земли, яко в руце Его вси концы землении, и высоты гор того суть». Сего ради воспоминаше ему, да не величеством господства своего возгордится когда, но быти смирену и кротку и ненавидети неправду, поминати же смертный час и во всем последовати отцу своему великому князю Михаилу. И сице учаше его преподобная, отпущаше в дом свой. К прочим же никакоже беседоваше великая, но в молчании пребываше и единому Богу в молитве упражняшеся, поя Господеви в сердце своем: «Господь помощник мой и защититель мой, на Того упова сердце мое, и поможе ми, и процвете плоть моя, и волею моею исповемся Ему. И день от дне восхождение полагая в сердце своем, и душу свою просвещая божественным светопролитием, и ума зрительное очищая, и яко безплотна во плоти подвизаяся, и безплотных ликостоянию тщащися усердно постигнути, и разума духовного неспрестанно боговидения и разсуждения прияти. Имяше же во уме память смертную и сего часа поминаше, плакаше вельми, како по исхождении от тела испытание душам бывает на воздусе от лукавых бесов. И люто по истине тогда бывает душам, иже не имевшим тогда плода благих дел и во временней сей жизни не подвизавшимся, како бы угодити Богу и избыти вечного осуждения. Сего ради и божественный апостол Павел, уча нас, глаголет: «облецетеся, рече, во вся оружия Божия, яко возмощи вам стати противу кознем диавольским, яко несть наша брань к крови и плоти, но к началом, и ко властем, и к миродержителем тьмы века сего, к духовом злобы поднебесным. Сего ради возьмете вся оружия Божия, да возможете противитися в день лют, и вся содеявши стати. И якоже алчущему невозможно без хлеба быти, сице и хотящему спастися невозможно есть, аще не имать памяти смертныя».

Таже по неколицех летех, сыну ея, благоверному князю Константину, отшедшу ко Господу, тогда приходит во Тверь вторый сын ея из Кашина града, благоверный князь Василий Михайлович, но реклом Кашин, и молит матерь свою, преподобную и благочестивую и великую княгиню Анну, яко да прейдет от Твери града в господствущий его град Кашин и яко да посетит отечество свое, яко да он тамо выну зрит святое, ангелоподобное лице ея и сладкого учения присно да наслаждается. И сице моляше ю: «Елма убо, мати моя, преподобная и благоверная великая княгиня Анно! Сице Богу изволившу судьбами своими, яко скончавшуся брату моему, твоим пресладким учением присно наставляем, аще мне тогда и скорбно бе и весьма неутешно, яко лишен тогда сладкого твоего и частого учения, но не восхотех оскорбити брата моего и тебе молити, дабы пришла жити во град мой. Ныне же не могу терпети, еже быти ми от тебе в дальнем разстоянии и еже не насыщатися твоего божественного учения. И что живот мой и слава моя, и княжение мое, еже быти ми лишену твоего ангелоподобного зрения?» Преподобная же мати его отвеща к нему и рече: «Чадо мое возлюбленное, странно наше иноческое житие, и ложно никако ко Христу обещание, еже до последнего издыхания на единем месте, на нем же обещахомся, терпети всяку скорбь Христа ради, аще не времени некоему позывающу ли гонения ради, или частых наносимых ради скорбей бывающих, Христа ради понесшим тяготу и вар дневный; но и се подобает преобидети любве ради Божия. Или паки смотрения ради некоего подобает бегати в другое место, по Христову словеси: «аще гонят вы из града, бегайте в другий град». Ныне же помощию всесильного Бога, несть во граде сем ни гонения, ни иных скорбей находящих, якоже в прежнее время было при отце твоем, великом князе Михаиле Ярославиче, от поганых нашествия и своих сродник крамолы и зависти. И аще оставлю град сей и в твой град преселюся, буду подобна ищущим славы мира сего. «Никто же, рече Сын Божий, возложь руку на рало, зря вспять, управлен будет во царство небесное». He бо и Авраам, праотец наш, повелен бы был от Бога оставити отечество свое и преселитися в чужу землю, аще не бы возбранило ему отеческое издолобесие от Божия любве и познания. И како могу оставити град сей, в нем же дарова всещедрый Бог страстотерпца своего и моего супружника великого князя Михаила, его же в заступление и помощь имеет и к Богу ходатая весь град сей; и аз имею пред очима моима пресвятое и страстотерпческое тело его и, зря нань, усердно теку в добром сем подвизе; его же молитвами, аки некими крилы, вперяюся умом к Богу. Ни, чадо мое, ни, престани понуждати мя преселитися во град свой, и прочее нестужай ми». Он же со слезами моляше блаженную и не хотяше восклонитися от святою ногу ея. Паки рече к ней: «Веси, мати моя преподобная, яко от младых ноготь твоей любви привязан и тобою паче прочих братий моих любим бех, и никогда же бо твоего повеления преслушахся, и никогда же бо хотел отлучитеся твоего сопребывания. Но Божиих судеб несть кому возможно постигнути: зане по жребию и благословению святого отца моего и твоим достася мне в наследие град той. И есть ми любезен ради покорения и послушания боляр моих, и вельмож, и всего народа. И аще бы хотел оставити град той и преселитися семо по смерти брата моего, и твоего выну слышати медоточного языка учения, и зрения ангеловидного насыщатися, но никако же оставят мя вельможи мои и весь град, ради любве моея еже к ним, оттоле к тебе преселитися. Сего ради, по совету боляр моих и вельмож и всего града, приидох молити тя, весь бо град желает видети ангелоподобный твой зрак и в себе имети. И сице глаголют, яко да посетит преподобная и благоверная княгиня Анна отечество свое и да в нем пребывает. Того бо града, рекоша, таковая благочестивая и святая отрасль израсте от благоверну родителю, и есть нам печаль не мала належит, яко лишихомся пресладкого учения и святого лица ея зрения. Иди, благочестивый княже, во град Тверь и моли матерь свою, яко да преселится во град своего отечества, яко да будет граду нашему Кашину и всей области его вечная похвала тоя пришествием. Граду бо Твери дарова Бог молитвенника тепла и заступника скора, страстотерпца своего, отца твоего благоверного великого князя Михаила Ярославича, нашему же граду всяко дарует всещедрый Бог преподобную матерь твою, благоверную и великую княгиню Анну, в помощь и заступление во вся роды до века. Токмо потщися усердно дойти во град Тверь и умолити матерь свою, и Бог благий исполнит желание сердца твоего. Cегo ради, о святая и блаженная мати моя, да не остави мя тща, ради своего еже к нам преселения, да не презриши моления всего града, паче же мене возлюбленного сына своего, да не печалию снеден буду, еже лишену быти мне твоего медоточного языка учения; и лучше ми есть зде умрети, нежели возвратитися тщу во свой град». Таковые глаголы благоверный князь Василий ко преподобней матери своей со многими слезами изрече и в себе Бога моляше, яко да получит желание сердца своего. Блаженная же и преподобная княгиня Анна таковое моление от сына своего слышаше и веру его видевши, не без Божия промысла, разсуди, сему быти, но яко от Бога послан бысть к ней, преклоняется на моление и обещавается преселитися во свое отечество и тамо пребыти до дне исхода своего еже к Богу. И сице рече к нему: «Буди, сыну мой возлюбленный, по твоему молению и якоже Богу годе, тако и будет». Благоверный же князь, сын ея, слышав таковые глаголы, радости многи исполняшеся и всесильного Бога прославляше, яко не презре моления его. Тогда преподобная и великая княгиня Анна созва к себе постницы, иже в монастыре том, и поведает им свое еже от них отшествие. Оне же яко услышавше от преподобныя сицевые глаголы, слез исполнившеся, глаголаша к ней: «Камо грядеши, госпоже наше, и что ради разлучение твое от нас хощет быти? Еда в чем прогневахом тя, или неправдовахом пред тобою, или скорбь какую наведохом твоему непобедимому и терпеливому смиренномудрию? Еда граждане гонят тя от нашего сопребывания? Повеждь нам, госпоже преподобная мати, вину отшествия своего». Она же: «Не плачите, рече, сестры мои, видите, яко сын мой прииде из Кашина града, благоверный князь Василий, и той понуждает мя и молит со многими слезами еже преселятися отсюду во свой ему град. Аз же много отрицахся, дабы не отлучитимися от вашего постнического пребывания. Он же непрестанно моля мя, дабы пойти ми в Кашин град. Аз же разсудила в себе: не без Божия промысла сему быти, но яко от Бога послан прииде ко мне и моля мое смирение, дабы преселитимися отсюду, и Богу хотящу, и молитвам вашим поспешествующим мне во благое, хощу итти во град Кашин, к сыну моему, благоверному князю Василию. Вы же, сестры мои, оставайтеся зде с Богом и в молитвах своих поминайте мое смирение». Оне же реша к ней: «Аще, госпоже наша, отходиши от нас, на кого воззрим и кто нам путь смирения и кротости и безмолвия покажет? Кто же ли нам без тебе учение прострет, да яко возможем ловления диавола прейти?» Блаженная же рече и ним: «Бог благий благодатию своею да сохранит вы от многоплетенных сетей вражиих. Токмо молю вас, яко да имеете попечение о душах своих и красоту девства вашего храните без всякого вреда и свещу вашего течения доброго соблюдите неугасиму, дóндеже приидет небесный Жених, Христос Бог наш. И аще обрящет ны в первем нашем воздержании и добром течении иноческого жительства, тогда введет ны на браки своего небесного царства со всеми святыми. Аще ли не таковых нас обрящет, всяко и нам возглаголет, яко и буим девам: «Отыдите от Мене, яко не веде вас». И тогда плакати имамы во веки веком, яко погубихом труд чернечества нашего. Но подобает нам со всяким смиренномудрием и кротостию духа молити человеколюбивого Бога Господа нашего Иисуса Христа, дабы сподобил нас с мудрыми девами небесного своего чертога наследницами быти, и дабы доброе течение соблюл по своей ему благости цело и непорочно, яко Тому подобает всяка слава во веки, аминь». Оне же слышавше учение ея, вельми дивляхуся безмерному смирению и реша к ней: «О, госпоже наша, преподобная мати! Кто убо виде безмерное твое смирение и любовь, послушание же в терпение, кротость и незлобие, и милосердие ко всем, успех своему житию не приимаше и всемилостивого Бога не прославляше. Мы, видевше твое постническое житие, пост и воздержание, и непрестанную любовь, яже к Богу, зело успех своему житию приимахом. Ныне же, госпоже, отходиши от нас, како не сетование нам будет твое разлучение, и како нам не плакати: еже дарова Бог, сего лишаемся. Но молим тя, госпоже, не оставляй нас сирых, но пребуди с нами». И сицевыми словесы хотяще удержати неудержимую, мняще, аще послушает тех, паки пребудет с ними. Но блаженная и преподобная мати утешаше их сладкими учении: «Не скорбите, рече, сестры мои и госпожи, аще отхожу от вас, но и тамо вы со мною есте, и аз с вами буду духом. И аще всеблагий Бог союзом духовныя любве совокупил нас, кое тех разлучение или разстояние приимет?» И мир дав им, и лобза коюждо святым целованием, отходит в соборную церковь, и тамо на мног час Богу моляшеся, покрыти ю своим человеколюбием, идеже аще изволит ей быти. Паки же припадает со многими слезами и ко гробу супруга своего, страстотерпца Христова, благоверного и великого князя Михаила, яко да и тамо помогает ей молитвами своими. «Понеже, рече, велика стяжах тебе к Богу ходатая и молитвенника». И сице помольшися и приимши благословение от епископа, пути касается, всем людем плачущимся о отшествии преподобныя, яко мнети им тогда и глаголати, яко прогневася на нас Бог тоя ради отшествия и, аще не бы согрешихом пред Богом, не бы попустил когда отъити преподобней от града нашего. Благоверный же князь Василий многу милостыню подав сущим тамо постницам, и пищею удоволив, и всем нищим и убогим, яже во граде, такоже многу милостыню подав, и благословение приим от епископа, отходит во свой град, поим с собою и матерь свою, преподобную и благочестивую княгиню Анну, вельми прославляше в сердцы своем всемилостивого Бога и Пречистую Богородицу, яко получил желание своего благого хотения.

Егда же приближася ко граду, тогда изыдоша вси людие града Кашина, иереи и иноцы, мужи и жены, и старцы со юнотами, во сретение преподобныя и блаженныя Анны и, друг друга предваряюще, хотяще преподобную видети, и овии прикасахуся воскрилию риз ея, освящение приимаху, инии же зрением токмо ангелоподобного лица ея освящахуся и Бога прославляху и Того Пречистую Матерь Пресвятую Богородицу. И сице приглашаху: «Приими, славный граде Кашине, свою похвалу и славу неотъемлему и радость присноцветущую. Яже ты изведе от себе плод богоданен и ветвь благочестивую, паки преблагий Бог к тебе приведе, и радуйся радостию непобедимою во вся роды, и радости твоея никто же не отъимет от тебе». И тако Божиими судьбами и Того хотением преподобная и блаженная великая княгиня Aнна, супружница великого князя Михаила Тверского, преселися во свое отечество, в славный град Кашин, от града Твери. И начат ту подвизатися большими труды и подвиги, и пощении, и молитвою непрестанною вооружатися на невидимые враги, и стоянием всенощным победила бесовския брани. И толико истни себе блаженная постом и многим воздержанием, яко токмо познаватися составу человеческому, якоже глаголет пророк: «Прильпе кость моя плоти моей, и колена моя изнемогосте от поста и плоть моя изменися елея ради». И весьма плоть покорила духу, и жилище явися пресвято Пресвятыя и Единосущныя и Животворящия и Неразделимыя Троицы. Пришед бо Христос со Отцем и со Святым Духом, обитель сотворил себе в пресвятей души ея; и толико возлюбил красоту, благородие чистоты ея, яко и по смерти соблюде святое тело ея невредимо от тления, якоже и ныне всем видится воочию. Любляше же блаженная безмолвие и никому же беседование, но точию егда прихождаше к ней сын ея, благоверный князь Василий, и сего учаше и наказоваше, како любве ради Христовы видимая презирати и ни во что же красоту века сего вменяти, любити же и боятися и почитати страшного и славного всесвятого Бога, и того вечных благ искати милостынию и благотворением к нищим: «Ничто же бо, рече, тако просвещает человека и до престола душу доводит, якоже милостыня»; поминати же смертный час: «Понеже, рече, чадо мое возлюбленное, аще царь или князь, или богат, или нищ, раб или свободь, все смерти предаются, и никто же от них на земли во веки пребывает, но яко сень скоро преходит, и яко цвет скоро увядает, держати же ся правды, понеже правда же во веки пребывает». Праведный рече приточник: «От веры жив будет, вместо же его предается нечестивый». А еже смирену и кротку, и милостиву, и долготерпеливу, и «Аще, рече, тако поживеши, будеши долголетен на земли, и никто же на тя злое помыслить когда, и сопостатом твоим страшен будеши, и вечного блаженства от Господа нашего Иисуса Христа покой на небесех приимеши». И сими поученьми наказоваше сына своего, благоверного князя Василия, отпущаше его в дом свой. Сама же единому Богу беседоваше молитвою непрестанною и прочими богодухновенными делы просвещаше душу свою. Благоверный же князь Василий, таковыми ученьми от преподобныя матере своея наставляем и наказуем, яко древо при исходящих вод напаяемо, возращая сторичен плод, и никогда же преступаше наказания богоблаженныя, но тщашеся усердно последовати стопам ея. Поживе же преподобная княгиня Анна, по прешествии от Твери в Кашин, неколико лет во мнозех трудех и пощениих, и воздержании, и в молитвах.

Таже, уведавши свое отшествие к Богу, призывает к себе сына своего, благоверного князя Василия, и много поучив его о вере и о милостини, по сем же некако сказует ему и отшествие свое к Богу. Он же, яко услышав, вельми восплакася и рече ко блаженней: «О, мати моя преподобная! Кому нас оставляеши, и от кого по твоем отшествии учение восприиму, что же ли живот мой, кроме твоего пресладкого учения и наказания? Уне ми с тобою умрети, нежели по отшествии твоем лишену быти ми ангелоподобного твоего зрения». Великая же рече к нему: «Не плачи, чадо мое возлюбленное, и не скорби о сем: предаю бо тебе и весь град сей в руце всемилостивому Богу и Пречистей Богородицы. Той да наставит вас на всяку истину и исправит стопы ваша к деланию божественных заповедей Его. Токмо, чадо мое возлюбленное, держися, яже научен еси, и в их же пребываеши, и имей к Богу веру несумненну, и Бог мира да будет с тобою. И молитва отца твоего, великого князя и страстотерпца Христова Михаила, и мое благословение во веки на тебе пребудут». Тако же наказавши и вельмож его, како всем сердцем Бога боятися и угодная пред ним творити, и Того пресвятыя заповеди безленостно соблюдати, и послушание и покорение во всем имети к сыну своему, благоверному князю Василию, и суд в правду судити, и не насиловати немощным, воспоминати же им евангельских шесть заповедей, «Их же, рече, истязани будете от Бога. И аще тако сотворите, и того ради сподобитеся от Бога милости и небесного царствия наследия».

И сице поучив блаженная и преподобная и великая княгиня Анна и помолився за них и о всем граде, таже возлеже на одре и опрятавшися велелепие, и сице рече: «Владыко, Господи, Иисусе Христе мой, ненадеющимся надежда, источниче благоутробия, Тебе света пресладкого возжелех и Тебе душу мою предаю, приими ю и покой со всеми святыми». И тако предаде честную свою и ангелом говейную душу в руце Господеви, Его же возлюби от юности своея и непрестанно вслед Toго человеколюбия течаше, в лето 6846-е, месяца октоврия в 2-й день (т. е. 2 октября 1337 г).

Благоверный же князь Василий, сын ея, видев матери своея преподобныя и блаженныя и великия княгини Анны отшествие к Богу, и напад на перси ея, со слезами вопияше: «О, мати моя преподобная и преблаженная, свете очию моею, учительнице и наказательнице моего ума! Аще и скончала eси свою жизнь и прешла eси от временных на безконечная, и от многих трудов на вечный покой, но духом не отступай от нас, чад своих, и молися Христу Богу нашему о сохранении державы моея и о спасении всего града, в нем же изволила еси жити и душу свою предати Господеви, и избавитися нам от всех находящих нам видимых и невидимых враг и спастися душам нашим». Слышано же бысть по всему граду преставление преподобныя, скоро притекоша мужи и жены и со младенцы, нищии и убозии. Вельможи плачущеся, яко истинная им бе учительница и окормление животу их, нищие же и убозии, сироты и вдовицы рыдаху, яко питательницы своея и крепкия помощницы, и непобедимыя заступницы лишишася. И тако положиша на одре честное и трудолюбезное тело блаженныя и великия княгини Анны, понесоша честно со псалмы и песньми, и пеньми духовными сын ея и с вельможами своими в соборную церковь Пресвятыя Владычицы нашея

Богородицы честного и славного ея Успения, и отпеше надгробная пения, и погребоша тело преподобныя под соборною церковию со псалмы и песньми, и пеньми духовными; отдаша персть персти, много плачущеся и сетующе, яко лишишася добрыя учительницы и крепкия заступницы, обаче надеющеся, и по отшествии ея иже к Богу, незабвенно в молитвах своих память имети о отечествии своем. И тако разыдошася кождо в домы своя, славяще и благодаряще Бога.

Сицево житие преподобныя, таково иже во плоти равноангельное блаженныя и великия княгини Анны на земли пребывание, иже от младых ноготь нача Богу работати благими делы, всем сердцем любити. И ничто же от видимых сущих на земли, яже прелесть мира сего, хотящим Богу работати помрачает очи, паче любве Божия предпочте, и до конца гнушашеся славы века сего суетного, и якоже преже сопряжения добродетелей прилежа, тако и в сопряжении и наипаче божественным заповедем вседушно прилежа. И по скончании супруга своего, великого князя Михаила, чистоту своего благородия нескверну соблюде, и в постничестем тризнищи, иноческом пребывании добрым подвигом подвизася.

И ничто же возможе отлучити ю от любве Божия: ни слава мира сего, ни красота века сего, ни честь, ниже величество, но вся сия от юности преобидети нача, тако и сконча; и во уметы положи и до конца оплева, токмо единого Христа да приобрящет, и Того доброты выну и славы божественныя да насладится. Сице и Христос Сын Божий возлюби ю и венча святый верх главы ея светлым венцем правды, и достойну сотворил ю небесного своего чертога, и с мудрыми девами причте ю в царствии своем небеснем. Сын же ея, благоверный и великий князь Василий, такоже и той житие свое благочестно и мирно препроводил, и с миром ко Господу отъиде того же лета, месяца июля в 24 день. Бе бо смиренномудр и кроток, и милостив до конца, и во всем, ревнование житию родителема своима. О всем мире молятся и ходатайствуют о отечествии своем.

Сия тебе моих словес плетения, о преподобная мати и богоблаженная великая княгиня Анно, приими е, яко дар любочестен, и аще точно твоему равноангельному иже во плоти житию буди благодарение Богу, того бо есть дар и от еговых велелепному Божества славы Его вся сия приносим, якоже и оная вдовица убогая, иже две цать принесый Богу в дар и свидетельствована бывши паче множества принесших. Аще ли что и недостаточно явися твоему богоугодному пребыванию, обаче по силе принесохом тебе, елико подаде благодать Святаго Духа. Кто бо может по достоинству изрещи ваше иже во плоти ангельское пребывание и еже многие труды и поты, пощение и воздержание, и слезы непрестанныя, смирение же и кротость, и любовь нелицемерную, еже и сами ангели удивишася невещественному вашему житию! Ты же молися, преподобная и богоблаженная великая княгиня Анно, о мне недостойнем ко Христу Богу, и достойна мя сотвори небесныя породы наследника быти и избавитися вечного осуждения, и твоими молитвами в настоящем сим житии сохранену быти от многоплетенного коварства вражия. Благодатию и человеколюбием Господа нашего Иисуса Христа, с Ним же Отцу купно и Пресвятому и Животворящему Его Духу всяка слава и держава от всея твари, честь и поклонение, ныне и присно, и во веки веком. Аминь.

О явлении преподобной матери нашей благоверной великой княгини Анны, и чудо о пономаре, именем Герасиме

О обретении честных мощей преподобной и благоверной великой княгини Анны

Месяца июня, в 12 день. Слово о пренесении мощей святой преподобной благоверной великой княгини Анны в соборную церковь Воскресения Христова из древяные церкви Успения Пресвятой Богородицы, идеже обретены быша святыя мощи ея