Воинский требник (гражданский шрифт)

Благослови́вшу иере́ю, начина́ем: Сла́ва Тебе́, Бо́же наш, сла́ва Тебе́. Царю́ Небе́сный: Трисвято́е. По О́тче наш: Иере́й глаго́лет: Я́ко Твое́ е́сть Ца́рство: Го́споди, поми́луй, 12. Сла́ва, и ны́не: Прииди́те поклони́мся: три́жды.

Чтец же, псало́м 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й: и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́: смири́л е́сть в зе́млю живо́т мой: посади́л мя е́сть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́ я́ко земля́ безво́дная Тебе́. Ско́ро услы́ши мя, Го́споди, исчезе́ дух мой: не отврати́ лица́ Твоего́ от мене́, и уподо́блюся низходя́щим в ров. Слы́шану сотвори́ мне зау́тра ми́лость Твою́, я́ко на Тя упова́х: скажи́ мне, Го́споди, пу́ть, во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой: дух Твой благи́й наста́вит мя на зе́млю пра́ву. И́мене твоего́ ра́ди, Го́споди, живи́ши мя пра́вдою Твое́ю: изведе́ши от печа́ли ду́шу мою́: и ми́лостию Твое́ю потреби́ши враги́ моя́ и погуби́ши вся стужа́ющия души́ мое́й: я́ко аз раб Твой е́смь.

Сла́ва, и ны́не: Аллилу́иа, три́жды.

Посе́м, Бог Госпо́дь, и яви́ся нам: со стихи́, на глас 1.

Тропа́рь:

Спаси́, Го́споди, лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я кресто́м Твои́м жи́тельство.

Сла́ва, и ны́не, Богоро́дичен:

Предста́тельство Христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы: но предвари́ я́ко блага́я на по́мощь нас, ве́рно зову́щих Ти: ускори́ на моли́тву, и потщи́ся на умоле́ние, предста́тельствующи при́сно Богоро́дице, чту́щих Тя.

Пе́снь 1.

Ирмо́с: Колесницегони́теля фарао́на погрузи́, чудотворя́й иногда́ моисе́йский жезл, крестообра́зно порази́в и раздели́в мо́ре: Изра́иля же беглеца́ пешехо́дца спасе́, пе́снь Бо́гови воспева́юща.

Припе́в: Многоми́лостиве Го́споди, сокруши́ враги́ под но́ги на́ша.

Грех ра́ди на́ших и беззако́ний попусти́л еси́, правосу́де, враго́м на́шим озло́бити нас: но милосе́рдия ра́ди Твоего́, Человеколю́бче, отврати́ от нас пра́ведный гнев Твой, и поми́луй нас.

Я́коже дре́вле на Амали́ка побе́ду уго́днику Твоему́ Моисе́ю дарова́л еси́, ми́лостиве Бо́же: та́ко и ны́не мо́лим Тя, побе́ду на враги́ нам да́руй.

Сла́ва: Крестообра́зно просте́ртыма рука́ма Моисе́овыма Амали́кову си́лу низложи́л еси́, Всеси́льне: и ны́не мо́лим Тя, пода́ждь нам си́лу на сокруше́ние и попра́ние возстаю́щих на ны.

И ны́не: Си́лою неизрече́нною Твое́ю многоми́лостиве Христе́, защити́ лю́ди Твоя́ от вся́кия напа́сти, побе́ду да́руя на враги́ правосла́вному наро́ду на́шему, ра́ди Пречи́стыя Ма́тере и всех святы́х.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Неизрече́нным милосе́рдием Твои́м защити́, Христе́, лю́ди Твоя́, и низложи́ де́рзость враго́в на́ших.

Я́коже дре́вле пре́дал еси́, Бо́же, иноплеме́нников ве́рному рабу́ Твоему́ Иису́су Нави́ну: та́ко ны́не, Многоми́лостиве, преда́ждь сопроти́вныя по́лчища в ру́ки на́ши.

Сла́ва: Не преда́ждь нас Влады́ко, грех ра́ди на́ших и беззако́ний в ру́ки враго́в, но преложи́ пра́ведный гнев Твой на ми́лость, и пода́ждь утеше́ние рабо́м Твои́м.

И ны́не: Ма́ти Бо́жия, сохрани́ под кро́вом Твои́м Христолюби́вое во́инство и Держа́ву Росси́йскую, и Свои́м предста́тельством у Сы́на Своего́, Христа́ Бо́га на́шего, испроси́ нам побе́ду на враги́ и супоста́ты на́ша.

Изба́ви от бед рабы́ Твоя́, Многоми́лостиве, я́ко мы усе́рдно к Тебе́ прибега́ем, ми́лостивому Изба́вителю, всех Влады́це, Го́споду Иису́су.

Ектениа́:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, три́жды.

Еще́ мо́лимся о вели́ком Господи́не и отце́ на́шем Святе́йшем Патриа́рхе [и́мярек], и о Господи́не на́шем преосвяще́ннейшем митрополи́те [или́ архиепи́скпе или́ епи́скпе] [и́мярек] и всей во Христе́ бра́тии на́шей.

Лик: Го́споди, поми́луй, три́жды.

Еще́ мо́лимся о богохрани́мей стране́ на́шей, власте́х, и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй, три́жды.

Не на лук наш упова́ем, ни ору́жие на́ше спасе́т нас, Го́споди, но Твоея́ всемогу́щия по́мощи про́сим, и на Твою́ си́лу дерза́юще, на враги́ на́ша ополча́емся, и и́мя Твое́ ве́рно призыва́ем: со умиле́нием мо́лим ти ся, всемоги́й Го́споди, ми́лостивно услы́ши и поми́луй.

Лик: Го́споди, поми́луй, три́жды.

Во ве́ки пребыва́яй, милосе́рде Го́споди, запрети́ язы́ком, в достоя́ние твое́ приходя́щим, и оскверня́ющим Це́рковь святу́ю Твою́, пожени́ их бу́рею Твое́ю, и гне́вом Твои́м смути́ их: испо́лни ли́ца их безче́стия, да постыдя́тся, и си́лою суде́б Твои́х го́рдость их да сокруши́тся, и́мя же Твое́ свято́е да просла́вится в нас, приле́жно мо́лим Ти ся, услы́ши и поми́луй.

Лик: Го́споди, поми́луй, три́жды.

О е́же непреобори́му и победи́тельну всегда́ над враги́ бы́ти правове́рному во́инству, и мир и сла́ву утверди́ти в земли́ на́шей, приле́жно мо́лим Ти ся, Го́споди, услы́ши и поми́луй.

Лик: Го́споди, поми́луй, три́жды.

О е́же услы́шати от Це́ркве Святы́я Своея́ во́пль и воздыха́ние единове́рных на́ших, и от враго́в и супоста́т порабоще́нных рабо́в Свои́х, в печа́ли и ско́рби Свое́й к Тебе́ вопию́щих, и извести́ от тли живо́т их, приле́жно мо́лим Ти ся Го́споди, услы́ши и поми́луй.

Лик: Го́споди, поми́луй, три́жды.

Иере́й: Я́ко ми́лостив и человеколю́бец Бог еси́:

Седа́лен:

Це́рковь вопие́т Ти, Христе́ Бо́же: си́лою Креста́ Твоего́ укрепи́ ве́рных рабо́в Твои́х, и пода́ждь нам побе́ды на сопроти́вныя.

Богоро́дичен:

Богоро́дице Де́во, ско́рая ми́ру Помо́щнице, Твоего́ предста́тельства и заступле́ния про́сим: умоли́ ми́лостиваго Сы́на Твоего́ и Бо́га, от належа́щих бед изба́вити ны.

Пе́снь 4.

Ирмо́с: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра О́тча, и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.

Влады́ко Бо́же, милосе́рдием щадя́й лю́ди Твоя́, напа́стьми же и скорбьми́ обраща́яй их па́ки к Себе́, отврати́ гнев Твой, и преложи́ ско́рбь на́шу на ра́дость, побе́ду на сопроти́вныя да́руя.

Не вни́ди в суд с рабы́ твои́ми, Правосу́де, зане́ никто́же постои́т пред Тобо́ю: но призира́я ми́лостивно на смире́ние на́ше, поми́луй нас, и пода́ждь нам утеше́ние.

Сла́ва: Влады́ко Го́споди, руко́ю Твое́ю всеси́льною во глубине́ погрузи́вый фарао́на, Ты и ны́не де́рзость супоста́тов на́ших си́лою Креста́ Твоего́ низложи́, презира́я согреше́ния на́ша, я́ко Еди́н благоутро́бен.

И ны́не: Вели́кое дерзнове́ние и́маши к ро́ждшемуся из Тебе́, я́ко никто́же ин: те́мже, Влады́чице, моли́ся о рабе́х Твои́х, изба́витися нам от наше́ствия иноплеме́нников.

Пе́снь 5.

Ирмо́с: Вску́ю мя отри́нул еси́ от лица́ Твоего́, Све́те незаходи́мый, и покры́ла мя е́сть чужда́я тьма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Не помина́й, Влады́ко, безчи́сленныя собла́зны на́ша: но вско́ре преложи́в гнев Твой на милосе́рдие, низложи́ враги́ на́ша, и лю́ди Твоя́ сохрани́ ми́лостию Твое́ю.

При́зри, ми́лостиве, на лю́ди Твоя́, су́щия в ско́рбех, и пода́ждь нам свы́ше по́мощь Твою́ на одоле́ние враго́в на́ших.

Сла́ва: Укрепи́вый дре́вле на го́рдаго Голиа́фа мы́шцу кро́ткаго Дави́да, и ны́не, Влады́ко, укрепи́ нас, побе́ду дая́ нам на супоста́ты.

И ны́не: Тя Еди́ну Пречи́стую Засту́пницу и́мамы непобеди́мую, и на Тя упова́юще вопие́м Ти: изба́ви нас, Влады́чице, от всех бед и зол.

Пе́снь 6.

Ирмо́с: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, услы́ши мя, Бо́же спасе́ния моего́.

Избавле́й, Влады́ко, в ско́рби су́щия лю́ди евре́йския, и Сампсо́ну пода́вый кре́пость Твое́ю си́лою: ты и ны́не, Ми́лостиве, изба́ви лю́ди Твоя́ от сопроти́вных, и побори́ борю́щия ны.

Ди́вен еси́, Бо́же, твое́ю всеси́льною десни́цею спаса́яй упова́ющия на тя: вся бо рука́ Твоя́ мо́жет. Те́мже и ны́не мо́лим Тя, изба́ви нас от враг на́ших.

Сла́ва: О́ком Твои́м всеви́дящим, ви́дя насле́дие Твое́, Бо́же, от сопроти́вных озлобля́емо, умилосе́рдися, Влады́ко, на лю́ди Твоя́, и низложи́ вра́жию де́рзость.

И ны́не: Под Твое́ благоутро́бие прибега́ем, Богоро́дице Де́во, моле́ния на́ша не пре́зри во обстоя́нии: но от бед изба́ви ны, Еди́на Чи́стая и Благослове́нная.

Конда́к, глас 4.

Вознесы́йся на Крест во́лею, тезоимени́тому Твоему́ но́вому жи́тельству щедро́ты твоя́ да́руй, Христе́ Бо́же: возвесели́ нас си́лою Твое́ю, побе́ды дая́ нам на супоста́ты, посо́бие иму́щим Твое́ ору́жие ми́ра, непобеди́мую побе́ду.

Проки́мен, глас 7.

Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Стих: Принеси́те Го́сподеви, сы́нове Бо́жии, принеси́те Го́сподеви сы́ны о́вни.

Посе́м Апо́стол ко евре́ем, [зача́ло 329 от полу́, 330 и 331].

Бра́тие, не доста́нет бо ми повеству́ющу вре́мене о Гедео́не, Вара́це же и Сампсо́не и Иеффа́и, о Дави́де же и Самуи́ле, и о (други́х) проро́цех, и́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ льво́в, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужди́х: прия́ша жены́ от воскресе́ния ме́ртвых свои́х: ини́и же избие́ни бы́ша, не прие́мше избавле́ния, да лу́чшее воскре́сние улуча́т: друзи́и же руга́нием и ра́нами искуше́ние прия́ша, еще́ же и у́зами и темни́цею, ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех (и) в ко́зиях ко́жах, лише́ни, скорбя́ще, озло́блени: и́хже не бе досто́ин (ве́сь) мир, в пусты́нех скита́ющеся и в гора́х и в верте́пах и в про́пастех земны́х. И си́и вси послу́шествани бы́вше ве́рою, неприя́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку бре́мя вся́ко отло́жше и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и Соверши́теля Иису́са.

Иере́й: Мир ти.

Чтец: И ду́хови твоему́.

Диа́кон: Прему́дрость, про́сти, услы́шим свята́го Ева́нглиа.

Иере́й: Мир всем.

Лик: И ду́хови твоему́.

Иере́й: От Матфе́а свята́го Ева́нгелиа чте́ние.

Лик: Сла́ва Тебе́, Го́споди, сла́ва Тебе́.

Диа́кон: Во́нмем.

Иере́й чтет Ева́нглие от Матфе́а, [зача́ло 20 от полу́.]

Рече́ Госпо́дь: проси́те, и да́стся вам: ищи́те, и обря́щете: толцы́те, и отве́рзется вам: Всяк бо прося́й прие́млет, и ищя́й обрета́ет, и толку́щему отве́рзется. Или́ кто е́сть от вас челове́к, его́же а́ще воспро́сит сын его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы, лука́ви су́ще, уме́ете дая́ния бла́га дая́ти ча́дом ва́шим, кольми́ па́че Оте́ц ваш Небе́сный даст бла́га прося́щим у Него́.

Лик: Сла́ва Тебе́, Го́споди, сла́ва Тебе́.

Сла́ва, глас 6: О́тче, Сло́ве, и Ду́ше, Тро́ице Свята́я, очи́сти мно́жества согреше́ний на́ших.

И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.

Поми́луй мя, Бо́же, по вели́цей ми́лости Твое́й и по мно́жеству щедро́т Твои́х, очи́сти беззако́ние мое́.

Стихи́ра, глас 4:

Пособи́вый, Го́споди, кро́ткому Дави́ду победи́ти иноплеме́нника, и ве́рным рабо́м Твои́м спосо́бствуй ору́жием Креста́ низложи́ти враги́ на́ша: покажи́, Милосе́рдие, на нас дре́вния Твоя́ ми́лости, да разуме́ют вои́стинну, я́ко Ты еси́ Бог наш, и Тя призыва́юще побежда́ем.

Иере́й: Спаси́, Бо́же, лю́ди Твоя́, и благослови́ достоя́ние Твое́:

Возгла́с: Ми́лостию и щедро́тами:

Пе́снь 7:

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Преста́ни от гне́ва, и при́зри ми́лостивно на ско́рбь на́шу, и не преда́ждь нас враго́м на́шим, отце́в Бо́же.

Согреши́хом, Го́споди, пред тобо́ю: но ве́мы, я́ко не́сть грех побежда́ющь милосе́рдие Твое́, и сего́ ра́ди во умиле́нии взыва́ем к Тебе́: поми́луй нас, отце́в Бо́же.

Сла́ва: Ве́мы Го́споди, я́ко наказу́еши нас, я́ко Оте́ц сы́ны, да скорбьми́ обрати́ши ны к Тебе́, те́мже в покая́нии зове́м Ти: оста́ви нам до́лги на́ша, и изба́ви нас от враг на́ших, отце́в Бо́же.

И ны́не: Подви́гни, Влады́чице, А́нгелы и Арха́нгелы, ли́ки же проро́ков, апо́стол и му́ченик, согла́сно умоли́ти Сы́на Твоего́ и Бо́га, да изба́вит ны от всех вра́жеских наве́тов и нахожде́ний.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Кто изочте́т, Христе́, неизрече́нныя Твоя́ ми́лости? Презира́еши бо грехи́ ка́ющихся, боле́зни же исцеля́еши, и бра́ни вся отвраща́еши, и безу́мныя укроща́еши стра́сти? Те́мже мо́лимся Тебе́: человеколю́бче Го́споди, обрати́ гнев Твой на милосе́рдие к нам.

Разжени́ враги́ на́ша руко́ю Твое́ю, Го́споди, и защити́ нас лю́ди Твоя́: побе́ду, я́коже дре́вле Дави́ду и Иису́су Нави́ну на иноплеме́нники, подая́ ны́не нам, на вся возстаю́щия на ны супоста́ты.

Сла́ва: Проро́цы со апо́столы, му́ченицы со святи́тели, и преподо́бнии отцы́ со все́ми святы́ми, моли́тву твори́те ко Христу́ за ны приле́жно: да преложи́т гнев на ми́лость, побе́ду подая́ на сопроти́вныя враги́.

И ны́не: Богоро́дице всепе́тая, Ты вся мо́жеши у преве́чнаго Сы́на Твоего́: моли́ у́бо Его́, я́ко Милосе́рдая Ма́ти, изба́вити ны от всех зол, да Тя непреста́нно велича́ем.

Пе́снь 9:

Ирмо́с: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во твое́ бы́сть простра́ннейшее небе́с: тем Тя Богоро́дицу, А́нгелов и челове́к чинонача́лия велича́ют.

Удиви́шася, Христе́, щедро́ты Твоя́, я́же на согре́шшия Тебе́ показа́л еси́ испе́рва оби́льно: на ня́же упова́юще, и мы гре́шнии припа́даем Ти и мо́лимся: и нам ны́не яви́ благоутро́бие и щедро́ты Твоя́, да Тя непреста́нно велича́ем.

При́зри ми́лостивно, Го́споди, на смире́нныя рабы́ Твоя́ ко Твоему́ благоутро́бию припа́дающия, и на Тя Еди́наго все упова́ние возлага́ющия, и пода́ждь нам си́лу и кре́пость на одоле́ние всех враго́в на́ших, да Тя, Всеси́льнаго Помо́щника, непреста́нно велича́ем.

Сла́ва: Я́ко о́чи рабо́в в руку́ госпо́дий свои́х: та́ко всегда́ о́чи на́ши к Тебе́, многоми́лостиве Го́споди Бо́же наш: при́зри у́бо ми́лостивно на ны, и низложи́ си́лою Твое́ю горды́ню враго́в на́ших, и под но́зе нам тех покори́, да Тя непреста́нно велича́ем.

И ны́не: Ма́ти Бо́жия, принеси́ усе́рдныя моли́твы на́ши Сы́ну Твоему́ и Бо́гу на́шему, да спасе́т ны Тобо́ю от всех враго́в на́ших.

Досто́йно е́сть: Трисвято́е. По О́тче наш: Иере́й: Я́ко Твое́ е́сть Ца́рство:

Тропари́:

Поми́луй нас, Го́споди, поми́луй нас: вся́каго бо отве́та недоуме́юще, сию́ Ти моли́тву, я́ко Влады́це гре́шнии прино́сим: поми́луй нас.

Сла́ва: Го́споди, поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враг на́ших: Ты бо еси́ Бог наш, и мы лю́дие Твои́, вси дела́ руку́ Твое́ю, и и́мя Твое́ призыва́ем.

И ны́не: Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Ектениа́:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, три́жды.

Еще́ мо́лимся, о е́же сохрани́тися Держа́ве Росси́йской от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни: о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния, и поми́ловати ны.

Лик: Го́споди, поми́луй, три́жды.

Еще́ мо́лимся, и о е́же услы́шати Го́споду Бо́гу глас моле́ния нас гре́шных, и поми́ловати нас.

Лик: Го́споди, поми́луй, три́жды.

Иере́й: услы́ши ны, Бо́же Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны: ми́лостив бо и человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диа́кон:

Во́нмем, и во умиле́нии се́рдца коле́на душ и теле́с на́ших прекло́ньше, Го́споду помо́лимся.

Иере́й чтет моли́тву:

Го́споди Бо́же сил, Бо́же спасе́ния на́шего, Бо́же, творя́й чудеса́ еди́н, при́зри в ми́лости и щедро́тах на смире́нныя рабы́ твоя́, и человеколю́бно услы́ши и поми́луй нас: се бо врази́ на́ши собра́шася на ны, во е́же погуби́ти нас и разори́ти святы́ни на́ша. Ты же, вся ве́дый, ве́си, я́ко непра́ведно воста́ша на ны, и я́ко не возмо́жем мы противоста́ти мно́жеству их, а́ще не ты яви́ши по́мощь нам. Те́мже гре́шнии и недосто́йнии в покая́нии со слеза́ми мо́лимся ти: помози́ нам, Бо́же спаси́телю наш, и изба́ви нас сла́вы ра́ди и́мене твоего́, да не когда́ реку́т врази́ на́ши: бог оста́вил е́сть их, и не́сть избавля́яй и спаса́яй их: но да уве́дят вси язы́цы, я́ко ты бог наш и мы лю́ди твои́, под держа́вою твое́ю всегда́ храни́мии. Яви́ нам, Го́споди, ми́лость твою́ и да приложа́тся к нам словеса́, рече́нная моисе́ем к лю́дем Изра́ильским: дерза́йте, сто́йте, и у́зрите спасе́ние от Го́спода, Госпо́дь бо побо́рет по нас. Сотвори́ с на́ми зна́мение во бла́го, я́ко да ви́дят ненави́дящии нас и Правосла́вную ве́ру на́шу, и посра́мятся и смиря́тся. Ей, Го́споди Бо́же Спаси́телю наш, кре́посте и упова́ние и заступле́ние на́ше, не помяни́ беззако́ний и непра́вд люде́й Твои́х, и не отврати́ся от нас гне́вом Свои́м, но в ми́лости и щедро́тах Твои́х посети́ смире́нныя рабы́ Твоя́, ко Твоему́ благоутро́бию припа́дающия: возвесели́ сердца́ на́ша о ми́лости Твое́й, и укрепи́ нас си́лою Твое́ю: воста́ни в по́мощь на́шу и разруши́ лука́выя сове́ты мы́слящих нам зла́я: суди́ оби́дящия и побори́ борю́щия ны, и обрати́ нечести́вое дерзнове́ние их в страх и бе́гство: правосла́вному же во́инству на́шему, на Тя упова́ющему, пода́ждь во мно́зем дерзнове́нии и му́жестве погна́ти и пости́гнути их, и о и́мени Твое́м победи́ти: а и́мже суди́л еси́, положи́ти на бра́ни ду́ши своя́ за ве́ру и Оте́чество, тем прости́ согреше́ния их, и в де́нь пра́веднаго возда́ния Твоего́ возда́й венцы́ нетле́ния. Ты бо еси́ заступле́ние и побе́да и спасе́ние упова́ющим на Тя, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Лик: Ами́нь.

Иере́й: Прему́дрость: Пресвята́я Богоро́дице, спаси́ нас.

Лик: Честне́йшую херуви́м:

Иере́й: Сла́ва тебе́, Христе́ Бо́же:

Лик: Сла́ва, и ны́не: Го́споди, поми́луй, [три́жды]. Благослови́.

Иере́й: Отпу́ст.

А́ще хо́щет святи́тель или́ иере́й соверши́ти вку́пе и моле́бен о побе́де на враги́: в пе́рвых соверша́ет моле́бен по чи́ну его́. По кано́не же, и по ектениа́х, начина́ется чин сей от: С на́ми Бог: А́ще же без моле́бна, соверша́ется си́це: Поста́вленным су́щим хору́гвям на амво́не распросте́ртым, святи́тель или́ иере́й, пред свято́ю трапе́зою стоя́, начина́ет обы́чно.

Благослове́н Бог наш:

Чтец: Царю́ Небе́сный: Трисвято́е. О́тче наш: Го́споди, поми́луй: 12 раз. Сла́ва, и ны́не: Прииди́те поклони́мся: три́жды.

И псало́м 143.

Благослове́н Госпо́дь Бог мой, науча́яй ру́це мои́ на ополче́ние, пе́рсты моя́ на бра́нь. Ми́лость моя́ и прибе́жище мое́, засту́пник мой и изба́витель мой, защи́титель мой, и на Него́ упова́х: повину́яй лю́ди моя́ под мя. Го́споди, что е́сть челове́к, я́ко позна́лся еси́ ему́? Или́ сын челове́чь, я́ко вменя́еши его́? Челове́к суете́ уподо́бися: дни́е его́ я́ко се́нь прехо́дят. Го́споди, преклони́ небеса́, и сни́ди: косни́ся гора́м, и воздымя́тся: блесни́ мо́лнию, и разжене́ши я: посли́ стре́лы Твоя́, и смяте́ши я. Посли́ ру́ку Твою́ с высоты́, изми́ мя и изба́ви мя от вод мно́гих, из руки́ сыно́в чужди́х, и́хже уста́ глаго́лаша суету́, и десни́ца их десни́ца непра́вды. Бо́же, пе́снь но́ву воспою́ Тебе́, во псалти́ри десятостру́ннем пою́ Тебе́: даю́щему спасе́ние царе́м, избавля́ющему Дави́да раба́ Своего́ от меча́ лю́та. Изба́ви мя и изми́ мя из руки́ сыно́в чужди́х, и́хже уста́ глаго́лаша суету́, и десни́ца их десни́ца непра́вды: и́хже сы́нове их я́ко новосажде́ния водруже́ная в ю́ности свое́й, дще́ри их удо́брены, преукра́шены я́ко подо́бие хра́ма: храни́лища их испо́лнена, отрыга́ющая от сего́ в сие́: о́вцы их многопло́дны, мно́жащияся во исхо́дищих свои́х: воло́ве их то́лсти: не́сть паде́ния опло́ту, ниже́ прохо́да, ниже́ во́пля в сто́гнах их. Ублажи́ша лю́ди, и́мже сия́ су́ть: блаже́ни лю́дие, и́мже Госпо́дь Бог их.

Посе́м пою́т или́ чтут на о́бе страны́ псало́м сей избра́нный, с припе́вом сим:

С на́ми бог, разуме́йте язы́цы и покаря́йтеся, я́ко с на́ми Бог.

Псало́м 17.

Возлюблю́ тя, Го́споди, кре́посте моя́. Госпо́дь утвержде́ние мое́, и прибе́жище мое́, и изба́витель мой, Бог мой, помо́щник мой, и упова́ю на Него́: защи́титель мой, и рог спасе́ния моего́, и засту́пник мой. Хваля́ призову́ Го́спода и от враг мои́х спасу́ся. Одержа́ша мя боле́зни сме́ртныя, и пото́цы беззако́ния смято́ша мя: боле́зни а́довы обыдо́ша мя, предвари́ша мя се́ти сме́ртныя. И внегда́ скорбе́ти ми, призва́х Го́спода и к Бо́гу моему́ воззва́х: услы́ша от хра́ма свята́го Своего́ глас мой, и во́пль мой пред Ним вни́дет во у́ши Его́. И подви́жеся и тре́петна бы́сть земля́, и основа́ния гор смято́шася и подвиго́шася, я́ко прогне́вася на ня Бог. Взы́де дым гне́вом Его́, и о́гнь от лица́ Его́ воспла́менится: у́глие возгоре́ся от Него́. И приклони́ Небеса́ и сни́де, и мрак под нога́ма Его́. И взы́де на херуви́мы и лете́, лете́ на крилу́ ве́треню. И положи́ тьму́ закро́в Свой: о́крест Его́ селе́ние Его́: темна́ вода́ во о́блацех возду́шных. От облиста́ния пред ним о́блацы проидо́ша, град и у́глие о́гненное. И возгреме́ с небесе́ Госпо́дь, и Вы́шний даде́ глас Свой. Низпосла́ стре́лы и разгна́ я, и мо́лнии умно́жи и смяте́ я. И яви́шася исто́чницы водни́и, и откры́шася основа́ния вселе́нныя от запреще́ния Твоего́, Го́споди, от дохнове́ния ду́ха гне́ва Твоего́. Низпосла́ с высоты́ и прия́т мя, восприя́т мя от вод мно́гих. Изба́вит мя от враго́в мои́х си́льных и от ненави́дящих мя: я́ко утверди́шася па́че мене́. Предвари́ша мя в де́нь озлобле́ния моего́: и бы́сть Госпо́дь утвержде́ние мое́. И изведе́ мя на широту́: изба́вит мя, я́ко восхоте́ мя. И возда́ст ми Госпо́дь по пра́вде мое́й, и по чистоте́ руку́ мое́ю возда́ст ми, я́ко сохрани́х пути́ Госпо́дни и не нече́ствовах от Бо́га моего́. Я́ко вся судьбы́ Его́ предо мно́ю, и оправда́ния Его́ не отступи́ша от мене́. И бу́ду непоро́чен с Ним и сохраню́ся от беззако́ния моего́. И возда́ст ми Госпо́дь по пра́вде мое́й и по чистоте́ руку́ мое́ю пред очи́ма Его́. С преподо́бным преподо́бен бу́деши, и с му́жем непови́нным непови́нен бу́деши, и со избра́нным избра́н бу́деши, и со стропти́вым разврати́шися. Я́ко Ты лю́ди смире́нныя спасе́ши и о́чи го́рдых смири́ши. Я́ко Ты просвети́ши свети́льник мой, Го́споди: Бо́же мой, просвети́ши тьму́ мою́. Я́ко Тобо́ю изба́влюся от искуше́ния, и Бо́гом мои́м прейду́ сте́ну. Бог мой, непоро́чен пу́ть Его́: словеса́ Госпо́дня разжже́на. Защи́титель е́сть всех упова́ющих на Него́. Я́ко кто Бог, ра́зве Го́спода? Или́ кто Бог, ра́зве Бо́га на́шего? Бог препоясу́яй мя си́лою, и положи́ непоро́чен пу́ть мой: соверша́яй но́зе мои́ я́ко еле́ни, и на высо́ких поставля́яй мя: науча́яй ру́це мои́ на бра́нь, и положи́л еси́ лук ме́дян мы́шца моя́: и дал ми еси́ защище́ние спасе́ния, и десни́ца Твоя́ восприя́т мя: и наказа́ние Твое́ испра́вит мя в коне́ц, и наказа́ние Твое́ то мя научи́т. Ушири́л еси́ стопы́ моя́ подо мно́ю, и не изнемого́сте плесне́ мои́. Пожену́ враги́ моя́, и пости́гну я, и не возвращу́ся, до́ндеже сконча́ются: оскорблю́ их, и не возмо́гут ста́ти, паду́т под нога́ма мои́ма. И препоя́сал мя еси́ си́лою на бра́нь, спял еси́ вся востаю́щия на мя под мя. И враго́в мои́х дал ми еси́ хребе́т и ненави́дящия мя потреби́л еси́. Воззва́ша, и не бе спаса́яй: ко Го́споду, и не услы́ша их. И истню́ я я́ко прах пред лице́м ве́тра, я́ко бре́ние пути́й погла́жду я. Изба́виши мя от пререка́ния люди́й: поста́виши мя во главу́ язы́ков: лю́дие, и́хже не ве́дех, рабо́таша ми, в слух у́ха послу́шаша мя. Сы́нове чужди́и солга́ша ми, сы́нове чужди́и обетша́ша и охромо́ша от сте́зь свои́х. Жив Госпо́дь, и благослове́н Бог, и да вознесе́тся Бог спасе́ния моего́, Бог дая́й отмще́ние мне и покори́вый лю́ди под мя, Изба́витель мой от враг мои́х гневли́вых: от востаю́щих на мя вознесе́ши мя, от му́жа непра́ведна изба́виши мя. Препоя́ши ме́чь твой по бедре́ твое́й, си́льне, красото́ю твое́ю и добро́тою твое́ю: и наляцы́, и успева́й, и ца́рствуй и́стины ра́ди и кро́тости и пра́вды: и наста́вит тя ди́вно десни́ца Твоя́. Стре́лы Твоя́ изощре́ны, си́льне: лю́дие под Тобо́ю паду́т в се́рдцы враг Царе́вых. Сего́ ра́ди испове́мся Тебе́ во язы́цех, Го́споди, и и́мени Твоему́ пою́: велича́яй спасе́ния Царе́ва. Госпо́дь помо́щник мой и защи́титель мой: на Него́ упова́ се́рдце мое́, и помо́же ми, и процвете́ пло́ть моя́: и во́лею мое́ю испове́мся Ему́. Госпо́дь утвержде́ние люди́й Свои́х и защи́титель спасе́ний Христа́ Своего́ е́сть. Спаси́ лю́ди Твоя́, и благослови́ достоя́ние Твое́, и упаси́ я, и возми́ и вознеси́ я до ве́ка.

Сла́ва, и ны́не: С на́ми Бог, разуме́йте язы́цы: Аллилу́иа, три́жды.

Диа́кон глаго́лет ектении́ сия́:

Ми́ром Го́споду помо́лимся.

Лик: Го́споди, поми́луй.

И про́чая да́же до: О пла́вающих:

О е́же не помяну́ти грехо́в и беззако́ний на́ших, но я́ко благосе́рду, и ми́лостиву нам бы́ти недосто́йным рабо́м Твои́м в беда́х су́щим, и изба́вити нас от враго́в на́ших, Го́споду помо́лимся.

О е́же благослови́ти зна́мение сие́ во́инское благослове́нием свои́м небе́сным, стра́шно же и ужа́сно всем враго́м на́шим сие́ сотвори́ти, Го́споду помо́лимся.

О е́же ве́рному своему́ во́инству, зна́мение сие́ нося́щему, и на сие́ взира́ющему, дерзнове́ние, си́лу и кре́пость, на сотре́ние и попра́ние кре́пости супоста́т на́ших, ми́лостивно пода́ти, Го́споду помо́лимся.

О е́же всех враго́в на́ших на зна́мение сие́ взира́ющих, дерзнове́ние в страх, си́лу во осла́бу, и му́жество в малоду́шие и бе́гство претвори́ти, Го́споду помо́лимся.

О е́же пода́ти си́лу и кре́пость Христолюби́вому во́инству, и му́жественное и хра́брое сопроти́в вся́каго врага́ и супоста́та всегда́ показа́ти, и рабо́м Свои́м мир, и утвержде́ние, и от всех бед и нужд, и вра́жиих наве́тов ско́рое свобожде́ние дарова́ти, Го́споду помо́лимся.

О е́же мир и сла́ву всели́ти в земли́ на́шей, и изба́вити нас от всех вра́жиих наве́тов и бе́дных нахожде́ний, Го́споду помо́лимся.

О е́же не преда́ти нас в попра́ние, и разоре́ние враго́м, и супоста́том на́шим: но в бе́гство все дерзнове́ние их претвори́ти, и мы́шцу их сокруши́ти, и под но́ги ве́рных Свои́х покори́ти, Го́споду помо́лимся.

О е́же студа́ и безче́стия ли́ца сопроти́вных испо́лнити, сердца́ же их стра́ха и у́жаса: и А́нгел Госпо́день да бу́дет погоня́яй, и поража́яй их, Го́споду помо́лимся.

О е́же лук ме́дян положи́ти мы́шцы ве́рных Свои́х, и укрепи́ти десни́цу их си́лою кре́пости Своея́ в побежде́ние и попра́ние враго́в и супоста́тов востаю́щих на ны, Го́споду помо́лимся.

О е́же премени́ти всю ско́рбь и се́тование на́ше на ра́дость и весе́лие, и бе́дствование в тве́рдый мир, и непреобори́мых от всех вра́жиих наве́тов всегда́ сотвори́ти, Го́споду помо́лимся.

О е́же сокруши́ти щит, ору́жие и бра́нь всех борю́щихся с на́ми, и под но́ги Христолюби́вому во́инству тех покори́ти, Го́споду помо́лимся.

О е́же неосла́бну, непреобори́му, победи́тельну же си́лу, кре́пость и му́жество с хра́бростию, Христоимени́тому, во́инству на́шему на сокруше́ние враго́в на́ших пода́ти, Го́споду помо́лимся.

О е́же пода́ти изба́ву ве́рным рабо́м свои́м от наше́ствия иноплеме́нник, и от всех бра́нем хотя́щих челове́ков, и ра́тных нахожде́ний, и в ми́ре глубо́це це́рковь и лю́ди своя́ соблюсти́, побе́ду им на враги́ всегда́ да́руя, Го́споду помо́лимся.

О изба́витися нам от вся́кия ско́рби: Заступи́, спаси́: Пресвяту́ю, Пречи́стую:

Святи́тель же, или́ иере́й сие́ де́йствуяй, возглаша́ет:

Я́ко Ты еси́ кре́пость и утвержде́ние лю́дем Свои́м, и Тебе́ подоба́ет вся́кая сла́ва, че́сть, и поклоне́ние, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Лик: Ами́нь.

Посе́м пою́т: Бог Госпо́дь, и яви́ся нам: на глас 1.

И тропари́ сия́:

Спаси́ Го́споди, лю́ди Твоя́:

Сла́ва, то́йже: И ны́не, глас 6:

Предста́тельство Христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы: но предвари́ я́ко Блага́я на по́мощь нас, ве́рно зову́щих Ти: ускори́ на моли́тву, и потщи́ся на умоле́ние, предста́тельствующи при́сно Богоро́дице, чту́щих Тя.

Посе́м конда́к, глас 4:

Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же: возвесели́ нас си́лою Твое́ю побе́ды дая́ нам на супоста́ты, посо́бие иму́щим Твое́ ору́жие ми́ра, непобеди́мую побе́ду.

Та́же святи́телю [или́ иере́ю] изше́дшу из олтаря́, и ста́вшу над хору́гвами за амво́ном к восто́ку лице́м, и диа́кону ре́кшу:

Го́споду помо́лимся.

Лик: Го́споди, поми́луй.

И чтет моли́тву сию́ велегла́сно:

Всеси́льный и Преве́чный Бо́же наш, О́тче Го́спода Бо́га и Спа́са на́шего Иису́са Христа́, Сам сый всему́ ми́ру Творе́ц, и всея́ тва́ри благослове́ние, и побежда́ющим кре́пость, при́зри милосе́рдым Свои́м о́ком на нас смире́нных и недосто́йных рабо́в Твои́х, и на моли́тву на́шу, и сию́ хору́гвь, ю́же на де́ло бра́ни приугото́вихом, небе́сным Твои́м благослове́нием присети́, благослови́ и освяти́, я́ко да бу́дет ве́рному Твоему́ во́инству, на сопроти́вныя язы́ки одоле́ние и изве́стная побе́да: и храни́тельством Твои́м огражде́нна су́щи, в бе́гство да претвори́т всех супоста́тов на́ших полки́, и враго́м Христиа́нскаго ро́да стра́шна всегда́ и ужа́сна да яви́тся: ве́рным же Твои́м на Тя упова́ющим, изве́стное упова́ние побе́ды, дерзнове́ние же и кре́пость да бу́дет. Моли́твами же святы́х Твои́х укрепле́на, и А́нгел Твои́х ополче́нием огражде́нна су́щи, да яви́тся рабо́м Твои́м зна́мение побе́ды и серде́чныя кре́пости и му́жества на супоста́ты. Ты бо еси́ Ца́рь ми́ра, и Бог сокруша́яй бра́ни, и кре́пость дая́й упова́ющим на Тя, и Тебе́ сла́ву возсыла́ем со единоро́дным Твои́м Сы́ном, и с Пресвяты́м, и Благи́м, и животворя́щим Твои́м Ду́хом, ны́не и в безконе́чныя ве́ки веко́в.

Лик: Ами́нь.

Святи́тель же [или́ иере́й] обра́щься к предстоя́щим во́ином, десни́цею благословля́я их, глаго́лет:

Мир всем.

Диа́кон: Главы́ ва́ша Го́сподеви приклони́те.

Святи́тель [или́ иере́й] чтет велегла́сно моли́тву сию́, зря к за́падом:

Го́споди Бо́же наш, послу́шавый моисе́а просте́ршаго к тебе́ ру́це свои́, и лю́ди Изра́илевы укрепи́вый на амали́ка, и Иису́су нави́ну ополчи́вшуся, попусти́л еси́ со́лнцу ста́ти во о́браз победи́тельный, ты и ны́не услы́ши нас моля́щих ти ся о собра́вшихся во́ех сих, и благослови́, и укрепи́ их: и да́ждь им се́рдце му́жественно на сопроти́вныя враги́, А́нгела све́тла посли́ им, враго́м же стра́шна и ужа́сна, запина́юща же и погоня́юща, и се́рдце их разслабля́юща, и дерзнове́ние в бе́гство претворя́юща. Отими́ же от рабо́в Твои́х на бра́нь ны́не исходя́щих, и от всех нас вся́кий глад и губи́тельство, и изба́ви нас от огня́, и меча́, и наше́ствия враго́в, и от вся́каго воста́ния проти́внаго. Спутеше́ственник им бу́ди, и пода́ждь им вся, я́же ко спасе́нию проше́ния: научи́ их и вразуми́, спаси́, защити́, сохрани́, очи́сти, и ра́дости духо́вныя испо́лни: души́ и те́лу их засту́пник и защи́тник бу́ди, и я́ко Благ и Милосе́рд и Человеколю́бец проще́ние грехо́в пода́ждь им в де́нь су́дный. Поми́луй их и нас всех, и благослови́ во вся дни живота́ на́шего: да от Тебе́ по́мощь и заступле́ние, и изба́ву прии́мше, сла́ву и благодаре́ние без вся́каго препя́тия всегда́ возсыла́ем. Ты бо еси́ Кре́пость и Утвержде́ние лю́дем твои́м, и Тебе́ сла́ву возсыла́ем со Единоро́дным Твои́м Сы́ном, и с Пресвяты́м, и Благи́м, и Животворя́щим Твои́м Ду́хом, ны́не и при́сно, в ве́ки веко́в.

Лик: Ами́нь.

Посе́м взем святи́тель [или́ иере́й] свяще́нную во́ду, кропи́т е́ю хору́гвь, глаго́ля:

Благословля́ется и освяща́ется зна́мение сие́ во́инское в кре́пость, и утвержде́ние Христоимени́тому во́инству, и в побе́ду на вся враги́ окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, Ами́нь.

Посе́м а́ще епи́скп сие́ де́йствует, взем ми́тру, и сед на ме́сте свое́м, (а́ще же иере́й, не ся́дет, но стоя́) взе́млет хору́гвь, и дае́т ю, ему́же прили́чествует, в ру́це, коле́на тому́ прикло́ньшу, глаго́ля:

Приими́ хору́гвь сию́, небе́сным благослове́нием освяще́нную: бу́ди же та враго́м Христиа́нскаго ро́да стра́шна и ужа́сна: и да даст ти Госпо́дь благода́ть, я́ко да к сла́ве и́мени Его́ Пресвята́го то́ю про́йдеши му́жественно вра́жия ополче́ния невреди́мь, во и́мя Отца́, и Сы́на, и Свята́го Ду́ха, Ами́нь.

И благословля́ет его́, глаго́ля:

Мир ти.

Он же прие́мля хору́гвь, лобза́ет десни́цу пода́вшаго ю.

А́ще же су́ть та́мо ко́нни, благословля́ет их, глаго́ля:

Благослове́ние Госпо́дне бу́ди на всех вас: вы же мужа́йтеся, и да крепи́тся се́рдце ва́ше, и упова́йте на Го́спода, я́ко Той победи́т враги́ на́ша, ами́нь.

И кропи́т всех свяще́нною водо́ю, зна́менуя их кресто́м, певце́м пою́щим стихи́ру сию́, глас 4:

Пособи́вый Го́споди, кро́ткому Дави́ду, победи́ти иноплеме́нника, нам спосо́бствуй, и ору́жием Креста́ низложи́ враги́ на́ша: покажи́ благоутро́бие на нас дре́вния ми́лости Твоея́, и да разуме́ют вои́стинну, я́ко Ты еси́ Бог и на Тя наде́ющеся побежда́ем, моля́щися обы́чно Пречи́стей Твое́й Ма́тери, дарова́ти нам ве́лию ми́лость.

По сих твори́т отпу́ст.

Певцы́ же пою́т: При́зри на моле́ния Твои́х раб Всенепоро́чная, утоля́ющи лю́тая на ны воста́ния ско́рби нас измена́ющи: тя бо Еди́ну тве́рдое и изве́стное утвержде́ние и́мамы, и Твое́ предста́тельство стяжа́хом, да не постыди́мся Влады́чице, Тя призыва́ющии. Потщи́ся на умоле́ние Тебе́, ве́рно вопию́щих: ра́дуйся, Влады́чице, всех По́мощь, Ра́досте и Покро́ве, и Спасе́ние душ на́ших.

И сконча́вше сие́, отхо́дят во своя́ си с ми́ром, в сла́ву Бо́жию.

Святи́тель оде́ян во епитрахи́ль и омофо́р и ми́тру, или́ иере́й во епитрахи́ль и фело́нь, повеле́в поста́вити ору́жия пред амво́ном на стольце́ покрове́ном, исхо́дит из олтаря́, и покади́в я крестообра́зно, начина́ет обы́чно:

Благослове́н Бог наш: Чтец: Царю́ Небе́сный: Трисвято́е. О́тче наш: Го́споди, поми́луй, 12. Сла́ва, и ны́не: Прииди́те, поклони́мся: три́жды.

И псало́м 34.

Суди́, Го́споди, оби́дящия мя, побори́ борю́щия мя. Приими́ ору́жие и щит и воста́ни в по́мощь мою́: изсу́ни ме́чь и заключи́ сопроти́в гоня́щих мя: рцы души́ мое́й: спасе́ние твое́ е́смь Аз. Да постыдя́тся и посра́мятся и́щущии ду́шу мою́, да возвратя́тся вспя́ть и постыдя́тся мы́слящии ми зла́я. Да бу́дут я́ко прах пред лице́м ве́тра, и А́нгел Госпо́день оскорбля́я их: да бу́дет пу́ть их тьма́ и по́лзок, и а́нгел Госпо́день погоня́яй их: я́ко ту́не скры́ша ми па́губу се́ти своея́, всу́е поноси́ша души́ мое́й. Да прии́дет ему́ се́ть, ю́же не ве́сть, и лови́тва, ю́же скры, да обы́мет и́, и в се́ть да впаде́т в ню. Душа́ же моя́ возра́дуется о Го́споде, возвесели́тся о спасе́нии его́. Вся ко́сти моя́ реку́т: Го́споди, Го́споди, кто подо́бен Тебе́? Избавля́яй ни́ща из руки́ кре́пльших его́, и ни́ща, и убо́га от расхища́ющих его́. Воста́вше на мя свиде́теле непра́веднии, я́же не ве́дях, вопроша́ху мя. Возда́ша ми лука́вая воз блага́я, и безча́дие души́ мое́й. Аз же, внегда́ они́ стужа́ху ми, облача́хся во вре́тище и смиря́х посто́м ду́шу мою́, и моли́тва моя́ в не́дро мое́ возврати́тся. Я́ко бли́жнему, я́ко бра́ту на́шему, та́ко угожда́х: я́ко пла́чя и се́туя, та́ко смиря́хся. И на мя возвесели́шася и собра́шася: собра́шася на мя ра́ны, и не позна́х: раздели́шася, и не умили́шася. Искуси́ша мя, подражни́ша мя подражне́нием, поскрежета́ша на мя зубы́ свои́ми. Го́споди, когда́ у́зриши? устро́й ду́шу мою́ от злоде́йства их, от лев единоро́дную мою́. Испове́мся Тебе́ в Це́ркви мно́зе, в лю́дех тя́жцех восхвалю́ Тя. Да не возра́дуются о мне вражду́ющии ми непра́ведно, ненави́дящии мя ту́не и помиза́ющии очи́ма: я́ко мне у́бо ми́рная глаго́лаху, и на гнев ле́сти помышля́ху. Разшири́ша на мя уста́ своя́, ре́ша: бла́гоже, бла́гоже, ви́деша о́чи на́ши. Ви́дел еси́, Го́споди, да не премолчи́ши: Го́споди, не отступи́ от мене́. Воста́ни, Го́споди, и вонми́ суду́ моему́, Бо́же мой и Го́споди мой, на прю мою́. Суди́ ми, Го́споди, по пра́вде твое́й, Го́споди Бо́же мой, и да не возра́дуются о мне. Да не реку́т в сердца́х свои́х: бла́гоже, бла́гоже души́ на́шей: ниже́ да реку́т: пожро́хом его́. Да постыдя́тся и посра́мятся вку́пе ра́дующиися злом мои́м: да облеку́тся в студ и срам велере́чующии на мя. Да возра́дуются и возвеселя́тся хотя́щии пра́вды моея́: и да реку́т вы́ну, да возвели́чится Госпо́дь, хотя́щии ми́ра рабу́ Его́. И язы́к мой поучи́тся пра́вде Твое́й, ве́сь де́нь хвале́ твое́й.

Ре́кшу же диа́кону: Го́споду помо́лимся.

Святи́тель, или́ иере́й чтет моли́тву сию́ над ору́жиями:

Го́споди Бо́же наш, Бо́же сил, си́льный в кре́пости, и кре́пкий в бра́нех, о́троку твоему́ дре́вле Дави́ду преди́вную си́лу к побежде́нию проти́внаго ху́льника голиа́фа дарова́вый, ты и ны́не ми́лостивно приими́ смире́нныя мольбы́ на́ша: на ору́жия сия́ небе́сное твое́ благослове́ние низпосли́ и рабу́ твоему́ сему́, и́мⷬк: сия́ носи́ти ко укрепле́нию и заступле́нию це́ркви твоея́ святы́я, си́рых же и вдови́ц, и на земли́ су́щаго свята́го достоя́ния твоего́ жела́ющаго, си́лу и кре́пость пода́ждь, и сопроти́в вся́кому вра́жию ополче́нию си́ми гро́зна и стра́шна сотвори́, и победоно́сна всегда́ в сла́ву твою́ яви́. Ты бо еси́ кре́пость и утвержде́ние на́ше и тебе́ сла́ву возсыла́ем, отцу́ и Сы́ну и свято́му ду́ху, ны́не и при́сно, и во ве́ки веко́в.

Лик: Ами́нь.

Посе́м взем свяще́нную во́ду, кропи́т е́ю ору́жие, глаго́ля:

Благослове́ние Бо́га в Тро́ице Святе́й сла́вимаго, Отца́, и Сы́на, и Свята́го Ду́ха, окропле́нием воды́ сея́ свяще́нныя, да сни́дет и пребу́дет на ору́жие сие́, и на нося́щих я к защище́нию и заступле́нию и́стины Христо́вы, ами́нь.

Окропи́в же и во́ина, его́же су́ть ору́жия, глаго́лет:

Мужа́йся и да крепи́тся се́рдце Твое́, и побежда́й враги́ Твоя́, упова́я на Го́спода, во и́мя Отца́, и Сы́на, и Свята́го Ду́ха, ами́нь.

Дав же ему́ лобза́ти честны́й Крест, твори́т обы́чный дневны́й отпу́ст, и отхо́дят с ми́ром во своя́ си.

Нача́ло обы́чное: Царю́ Небе́сный и про́чая. Прииди́те поклони́мся:

Псало́м 90:

Живы́й в по́мощи вы́шняго, в кро́ве Бо́га Небе́снаго водвори́тся, рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна: плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма́ одесну́ю тебе́, к тебе́ же не прибли́жится: оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́: Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́: я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́: на а́спида и васили́ска насту́пиши, и попере́ши льва́ и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его́: с ним е́смь в ско́рби, изму́ его́ и просла́влю его́: долгото́ю дний испо́лню его́ и явлю́ ему́ спасе́ние Мое́.

Моли́тва: Го́споди Бо́же наш, седя́й на Серафи́мех и е́здяй на Херуви́мех, му́дростию украси́вый челове́ка, и благи́м Твои́м про́мыслом вся ко бла́гу направля́яй, ниспосли́ благослове́ние Твое́ на колесни́цу сию́ и А́нгела Твоего́ к ней приста́ви, да ше́ствующии в ней им храни́ми и наставля́еми, в ми́ре и благополу́чии пу́ть свой соверши́вше, Тебе́ сла́ву и благодаре́ние возсыла́ют, хва́ляще Отца́ и Сы́на, и Свята́го Ду́ха. Ами́нь.

Иере́й кропи́т свяще́нною водо́ю колесни́цу вовне́ и внутри́, глаго́ля: Благословля́ется и освяща́ется колесни́ца сия́ во и́мя Отца́, и Сы́на, и Свята́го Ду́ха, ами́нь.

Иере́й оде́ян во епитрахи́ль и фело́нь, а́ще кроме́ литурги́и, начина́ет обы́чно: Благослове́н Бог наш:

Чтец: Царю́ Небе́сный: Трисвято́е. О́тче наш: Го́споди поми́луй, 12. Сла́ва, и ны́не: Прииди́те поклони́мся: три́жды, и псало́м 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й: и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́: смири́л е́сть в зе́млю живо́т мой: посади́л мя е́сть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́ я́ко земля́ безво́дная Тебе́. Ско́ро услы́ши мя, Го́споди, исчезе́ дух мой: не отврати́ лица́ Твоего́ от мене́, и уподо́блюся низходя́щим в ров. Слы́шану сотвори́ мне зау́тра ми́лость Твою́, я́ко на Тя упова́х: скажи́ мне, Го́споди, пу́ть, во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой: Дух Твой благи́й наста́вит мя на зе́млю пра́ву. И́мене твоего́ ра́ди, Го́споди, живи́ши мя пра́вдою Твое́ю: изведе́ши от печа́ли ду́шу мою́: и ми́лостию Твое́ю потреби́ши враги́ моя́ и погуби́ши вся стужа́ющия души́ мое́й: я́ко аз раб Твой е́смь.

Сла́ва, и ны́не: Аллилу́иа, три́жды.

Диа́кон же, а́ще е́сть, или́ сам иере́й, чтет ектении́ сия́:

Ми́ром Го́споду помо́лимся.

Лик: Го́споди поми́луй. И про́чая, да́же до О пла́вающих: Та́же:

О е́же поми́ловати рабо́в свои́х [или́ раба́ своего́, и́мярек,] и прости́ти им вся́кое прегреше́ние, во́льное же и нево́льное, и благослови́ти путеше́ствие их, Го́споду помо́лимся.

О е́же посла́ти им А́нгела ми́рна, спу́тника и наста́вника, сохраня́юща, защища́юща, заступа́юща, и невреди́мо соблюда́юща от вся́каго зла́го обстоя́ния, Го́споду помо́лимся.

О е́же покры́ти их, и невреди́мых соблюсти́ от всех вра́жиих наве́тов и обстоя́ний, и безпа́костных препроводи́ти и возврати́ти, Го́споду помо́лимся.

О е́же безгре́шное и ми́рное путеше́ствие и благополу́чное во здра́вии возвраще́ние, во вся́ком благоче́стии и че́стности пода́ти им, Го́споду помо́лимся.

О е́же сохрани́ти их невреди́мых и непребори́мых от всех ви́димых и неви́димых враго́в, и лука́вых челове́к озлобле́ния, Го́споду помо́лимся.

О е́же благослови́ти благо́е их наме́рение, и благополу́чно к по́льзе душе́вной и теле́сной сотвори́ти свое́ю благода́тию, Го́споду помо́лимся.

Заступи́, спаси́, поми́луй: И про́чая.

Иере́й: Я́ко подоба́ет Тебе́ вся́кая сла́ва, че́сть и поклоне́ние:

Бог Госпо́дь, и яви́ся нам: глас 2, И тропа́рь сей:

Пу́ть и и́стина сый Христе́ спу́тника А́нгела Твоего́ рабо́м Твои́м, ны́не, я́коже Тови́и иногда́, посли́ сохраня́юща, и невреди́мых к сла́ве Свое́й, от вся́каго зла во вся́ком благополу́чии соблюда́юща: моли́твами Богоро́дицы, Еди́не Человеколю́бче.

Сла́ва, глас то́йже:

Луце́ и Клео́пе во Еммау́с спутьше́ствовавый Спа́се, соше́ствуй и ны́не рабо́м Твои́м, путьше́ствовати хотя́щим, от вся́каго избавля́я их зла́го обстоя́ния: вся бо Ты я́ко Человеколю́бец мо́жеши хотя́й.

И ны́не:

Предста́тельство Христиа́н непосты́дное:

Диа́кон: Во́нмем.

Иере́й. Мир всем.

Диа́кон: Прему́дрость, во́нмем.

Проки́мен, глас 4:

Скажи́ ми Го́споди пу́ть, в о́ньже пойду́, я́ко к Тебе́ взях ду́шу мою́.

Стих: Изми́ мя от враг мои́х, Го́споди, к Тебе́ прибего́х.

Апо́стол в дея́ниих, глава́ 8, зача́ло 20.

Во дни о́ны, А́нгел Госпо́день рече́ к Фили́ппу, глаго́ля: воста́ни и иди́ на полу́дне, на пу́ть сходя́щий от Иерусали́ма в Га́зу, и той е́сть пуст. И воста́в по́йде, и се муж му́рин, евну́х, си́лен Кандаки́и цари́цы Му́ринския, и́же бе над все́ми сокро́вищи ея́: и́же прии́де поклони́тися во Иерусали́м. Бе же возвраща́яся, и седя́ на колесни́це свое́й, чтя́ше проро́ка Иса́ию. Рече́ же Дух к Фили́ппу: приступи́, и прилепи́ся колесни́це сей. Прите́к же Фили́пп, услы́ша его́ чту́ща проро́ка Иса́ию и рече́: у́бо разуме́еши ли, я́же чте́ши? Он же рече́: ка́ко у́бо могу́ [разуме́ти,] а́ще не кто наста́вит мя? Умоли́ же Фили́ппа возше́дша се́сти с ним. Сло́во же писа́ния, е́же чтя́ше, бе сие́: я́ко овча́ на заколе́ние веде́ся, и я́ко а́гнец пря́мо стригу́щему его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся: род же Его́ кто испове́сть? Я́ко взе́млется от земли́ живо́т Его́. Отвеща́в же ка́женик к Фили́ппу, рече́: молю́ тя, о ком проро́к глаго́лет сие́: о себе́ ли? Или́ о ино́м не́коем? Отве́рз же Фили́пп уста́ своя́, и наче́н от писа́ния сего́, благовести́ ему́ Иису́са. Я́коже идя́ху путе́м, приидо́ша на не́кую во́ду, и рече́ ка́женик: се вода́, что возбраня́ет ми крести́тися? Рече́ же ему́ Фили́пп: а́ще ве́руеши от всего́ се́рдца твоего́, мо́щно ти е́сть. Отвеща́в же рече́: ве́рую Сы́на Бо́жия бы́ти Иису́са Христа́. И повеле́ ста́ти колесни́це: и снидо́ста о́ба на во́ду, Фили́пп же и ка́женик: и крести́ его́. Егда́ же изыдо́ста от воды́, Дух Святы́й нападе́ на ка́женика. А́нгел же Госпо́день восхи́ти Фили́ппа, и не ви́де его́ ктому́ ка́женик: идя́ше бо в пу́ть свой ра́дуяся.

Аллилу́иа, по гла́су.

Стих 1: От Го́спода стопы́ челове́ку испра́вятся, и пути́ Его́ восхо́щет зело́.

Стих 2: Откры́й ко Го́споду пу́ть твой, и упова́й на Него́, и Той сотвори́т.

Ева́нглие от Иоа́нна, зача́ло 47.

Рече́ Госпо́дь свои́м ученико́м: да не смуща́ется се́рдце ва́ше: ве́руйте в Бо́га, и в Мя ве́руйте. В дому́ Отца́ Моего́ оби́тели мно́ги су́ть: а́ще ли же ни́, рекл бых вам: иду́ угото́вати ме́сто вам. И а́ще угото́влю ме́сто вам, па́ки прииду́ и поиму́ вы к Себе́: да иде́же е́смь Аз, и вы бу́дете: И а́може Аз иду́, ве́сте, и пу́ть ве́сте. Глаго́ла ему́ Фома́: Го́споди: не ве́мы, ка́мо и́деши? И ка́ко мо́жем пу́ть ве́дети? Глаго́ла ему́ Иису́с: Аз е́смь пу́ть, и и́стина, и живо́т: никто́же прии́дет ко Отцу́, то́кмо Мно́ю. А́ще Мя бы́сте зна́ли, и Отца́ Моего́ зна́ли бы́сте у́бо: и отсе́ле позна́сте Его́, и ви́десте Его́. Глаго́ла ему́ Фили́пп: Го́споди, покажи́ нам Отца́, и довле́ет нам. Глаго́ла ему́ Иису́с: толи́ко вре́мя с ва́ми е́смь, и не позна́л еси́ Мене́, Фили́ппе? Ви́девый Мене́ ви́де Отца́, и ка́ко ты глаго́леши, покажи́ нам Отца́? Не ве́руеши ли, я́ко Аз во Отце́, и Оте́ц во Мне е́сть?

Посе́м ектении́ сия́:

Стопы́ челове́ческия исправля́яй Го́споди, при́зри ми́лостивно на рабы́ Твоя́ [или́ на раба́ Твоего́, и́мярек,] и прости́в им вся́кое прегреше́ние, во́льное же и нево́льное, благослови́ благо́е наме́рение сове́та их, и исхо́ды и вхо́ды со путьше́ствием испра́ви, приле́жно мо́лим Ти ся, услы́ши и поми́луй.

Ио́сифа от озлобле́ния бра́тий его́ пресла́вно свободи́вый Го́споди, и во Еги́пет того́ наста́вивый, и благослове́нием Твоея́ бла́гости во всем благополу́чна сотвори́вый: и сих рабо́в Твои́х путеше́ствовати хотя́щих благослови́, и ше́ствие их безмяте́жно и благополу́чно сотвори́, мо́лим Ти ся, услы́ши и поми́луй.

Исаа́ку и Тови́и А́нгела спу́тника посла́вый, и тем путеше́ствие и возвраще́ние их ми́рное и благополу́чное сотвори́вый: и ны́не пребла́же А́нгела ми́рна рабо́м Твои́м на́ми Тебе́ моля́щимся посли́, во е́же наста́вити их на вся́кое де́ло благо́е, и изба́вити от враг ви́димых и неви́димых, и от вся́каго зла́го обстоя́ния: здра́во же, ми́рно и благополу́чно к сла́ве Твое́й возврати́ти, усе́рдно мо́лим Ти ся, услы́ши и поми́луй.

Луце́ и Клео́пе во Еммау́с спутьше́ствовавый, и ве́село во Иерусали́м возврати́тися Твои́м пресла́вным позна́нием сотвори́вый, спутьше́ствуй Твое́ю благода́тию, и Боже́ственным благослове́нием, и ны́не рабо́м Твои́м сим на́ми Тебе́ приле́жно моля́щимся и во вся́ком де́ле бла́зе, к сла́ве Пресвята́го Твоего́ и́мене благопоспеши́, во здра́вии и благополу́чии соблюда́я и возвраща́я во вре́мя благоподо́бно, я́ко всеще́дрому благоде́телю мо́лим Ти ся, ско́ро услы́ши и ми́лостивно поми́луй.

Иере́й: услы́ши ны, Бо́же спаси́телю наш: и про́чая.

Диа́кон: Со умиле́нием главы́ и коле́на ва́ша Го́сподеви прекло́ньше, Го́споду помо́лимся.

Лик: Го́споди поми́луй, три́жды.

О́нем же всем коле́на прекло́ньшим, иере́й обра́щься к ним, и став в Ца́рския две́ри, чтет моли́тву сию́ велегла́сно:

Го́споди Иису́се Христе́ Бо́же наш, и́стинный и живы́й Путю́, состра́нствовати мни́мому Твоему́ отцу́ Ио́сифу, и Пречи́стой Ти Де́ве Ма́тери, во Еги́пет изво́ливый, и Луце́ и Клео́пе во Еммау́с спутьше́ствовавый: и ны́не смире́нно мо́лим Тя, Влады́ко Пресвяты́й, и рабо́м Твои́м сим Твое́ю благода́тию спутьше́ствуй. И я́коже рабу́ Твоему́ Тови́и, А́нгела Храни́теля и наста́вника посли́, сохраня́юща и избавля́юща их от вся́каго зла́го обстоя́ния ви́димых и неви́димых враго́в, и ко исполне́нию за́поведей Твои́х наставля́юща, ми́рно же и благополу́чно и здра́во препровожда́юща, и па́ки це́ло и безмяте́жно возвраща́юща: и да́ждь им все благо́е свое́ наме́рение ко благоугожде́нию Твоему́, благополу́чно в сла́ву Твою́ испо́лнити. Твое́ бо е́сть, е́же ми́ловати и спаса́ти нас, и Тебе́ сла́ву возсыла́ем со безнача́льным Твои́м Отце́м, и со Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Взем же иере́й святы́й крест, дае́т им лобза́ти, и кропи́т их свяще́нною водо́ю, глаго́ля:

Да благослови́т вас Госпо́дь от Сио́на, и у́зрите блага́я Иерусали́ма во вся дни живота́ ва́шего, и да испра́вит пу́ть ваш в ми́ре, в сла́ву свята́го Своего́ и́мене, ами́нь.

И а́бие твори́т обы́чный дневны́й отпу́ст.

Ве́стно же бу́ди, я́ко а́ще литурги́а быва́ет, тогда́ вся сия́ ектении́ на литурги́и соверша́ются, и тропари́ на свое́м ме́сте, и проки́мен, и апо́стол и ева́нглие, и по ева́нглии ектениа́, по дневно́м же прича́стне, сей прича́стен вторы́й пою́т:

Ве́сть Госпо́дь пути́ непоро́чных, и достоя́ние их в век бу́дет, аллилу́иа.

По заамво́нней же моли́тве став в Ца́рских две́рех, в пу́ть иду́щим коле́не прекло́ньшим, чтет предположе́нную моли́тву и анти́дор раздава́я, дае́т им крест лобза́ти, и свяще́нною водо́ю кропи́т их, и благослови́в, твори́т обы́чный литурги́йный отпу́ст.

Взем иере́й епитрахи́ль на себе́, и обы́чное нача́ло сотвори́в.

Чтец: Царю́ Небе́сный: Трисвято́е. О́тче наш: Го́споди, поми́луй, 12. Сла́ва, и ны́не: Прииди́те, поклони́мся: три́жды.

И псало́м 106.

Испове́дайтеся Го́сподеви, я́ко благ, я́ко в век ми́лость Его́. Да реку́т изба́вленнии Го́сподем, и́хже изба́ви из руки́ врага́, и от стран собра́ их, от восто́к и за́пад, и се́вера и мо́ря: заблуди́ша в пусты́ни безво́дней, пути́ гра́да оби́тельнаго не обрето́ша: а́лчуще и жа́ждуще, душа́ их в них исчезе́. И воззва́ша ко Го́споду, внегда́ скорбе́ти им, и от нужд их изба́ви я: и наста́ви я на пу́ть прав, вни́ти во град оби́тельный. Да испове́дятся да испове́дят Го́сподеви ми́лости Его́ и чудеса́ его́ сыново́м челове́ческим: я́ко насы́тил е́сть ду́шу тщу, и ду́шу а́лчущу испо́лни благ: седя́щия во тьме́ и се́ни сме́ртней, окова́нныя нището́ю и желе́зом, я́ко преогорчи́ша словеса́ Бо́жия, и сове́т Вы́шняго раздражи́ша. И смири́ся в труде́х се́рдце их, и изнемого́ша, и не бе помага́яй. И воззва́ша ко Го́споду, внегда́ скорбе́ти им, и от нужд их спасе́ я: и изведе́ я из тьмы́ и се́ни сме́ртныя, и у́зы их растерза́. Да испове́дятся да испове́дят Го́сподеви ми́лости Его́ и чудеса́ Его́ сыново́м челове́ческим: я́ко сокруши́ врата́ ме́дная, и вереи́ желе́зныя сломи́. Восприя́т я от пути́ беззако́ния их: беззако́ний бо ра́ди Свои́х смири́шася. Вся́каго бра́шна возгнуша́ся душа́ их, и прибли́жишася до врат сме́ртных. И воззва́ша ко Го́споду, внегда́ скорбе́ти им, и от нужд их спасе́ я: посла́ сло́во Свое́, и исцели́ я, и изба́ви я от растле́ний их. Да испове́дятся да испове́дят Го́сподеви ми́лости Его́ и чудеса́ Его́ сыново́м челове́ческим: и да пожру́т Ему́ же́ртву хвалы́ и да возвестя́т дела́ Его́ в ра́дости. Сходя́щии в мо́ре в корабле́х, творя́щии де́лания в вода́х мно́гих, ти́и ви́деша дела́ Госпо́дня и чудеса́ Его́ во глубине́. Рече́, и ста дух бу́рен, и вознесо́шася во́лны его́: восхо́дят до небе́с и низхо́дят до бездн: душа́ их в злых та́яше: смято́шася, подвиго́шася я́ко пия́ный, и вся му́дрость их поглощена́ бы́сть. И воззва́ша ко Го́споду, внегда́ скорбе́ти им, и от нужд их изведе́ я: и повеле́ бу́ри, и ста в тишину́, и умолко́ша во́лны его́. И возвесели́шася, я́ко умолко́ша, и наста́ви я в приста́нище хоте́ния Своего́. Да испове́дятся да испове́дят Го́сподеви ми́лости Его́ и чудеса́ Его́ сыново́м челове́ческим: да вознесу́т Его́ в це́ркви людсте́й, и на седа́лищи ста́рец восхва́лят Его́. Положи́л е́сть ре́ки в пусты́ню и исхо́дища водна́я в жа́жду, зе́млю плодоно́сную в сла́ность, от зло́бы живу́щих на ней. Положи́л е́сть пусты́ню во езе́ра водна́я и зе́млю безво́дную во исхо́дища водна́я. И насели́ та́мо а́лчущия, и соста́виша гра́ды оби́тельны: и насе́яша се́ла, и насади́ша виногра́ды, и сотвори́ша плод жи́тен. И благослови́ я, и умно́жишася зело́: и скоты́ их не ума́ли. И ума́лишася и озло́бишася от ско́рби зол и боле́зни: излия́ся уничиже́ние на кня́зи их, и облазни́ заблужда́ти сотвори́ я по непрохо́дней, а не по пути́. И помо́же убо́гу от нищеты́ и положи́ я́ко о́вцы оте́чествия. У́зрят пра́вии и возвеселя́тся, и вся́кое беззако́ние загради́т уста́ своя́. Кто прему́др и сохрани́т сия́? И уразуме́ют ми́лости Госпо́дни.

Посе́м рек: Го́споду помо́лимся.

Го́споди, поми́луй.

И чтет моли́тву сию́:

Го́споди Бо́же оте́ц на́ших, запове́давый Но́ю рабу́ Твоему́ устро́ити киво́т ко спасе́нию ми́ра, от мно́гих древе́с благоволи́вый ему́ еди́но дре́во бы́ти и сочини́тися: сам у́бо Влады́ко всех, благоволи́вый безду́шными древесы́ пра́вити, и кре́пкою Твое́ю руко́ю род челове́ческий спаса́яй, Сам и ны́не Влады́ко, и сей кора́бль соблюди́, и да́ждь ему́ А́нгела бла́га, ми́рна: хотя́щия плы́ти в нем сохрани́, да́ждь им во вся отити́ здра́вым, моли́твами Пресвяты́я Влады́чицы на́шея Богоро́дицы, и Присноде́вы Мари́и: си́лою честна́го и животворя́щаго Креста́, честны́х, Небе́сных, у́мных сил безпло́тных: свята́го сла́внаго проро́ка, Предте́чи и Крести́теля Иоа́нна: святы́х сла́вных и всехва́льных апо́стол, и свята́го и́мярек, и всех святы́х. Я́ко Ты еси́ окормля́яй и освяща́яй вся́ческая, Бо́же наш, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Взем же иере́й свяще́нную во́ду, кропи́т е́ю кора́бль, или́ лодию́, глаго́ля:

Благословля́ется кора́бль, (или́ лодиа́ сия́,) окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь.

И а́бие пою́т стихи́ру, глас 4: При́зри на моле́ния:

И быва́ет обы́чный отпу́ст.

Соверши́в иере́й [а́ще изво́лит], моле́бен о побе́де на враги́, и́дет на брег мо́ря или́ реки́, иде́же су́дны стоя́т, имы́й с собо́ю свяще́нную во́ду. Взем же на себе́ епитрахи́ль, начина́ет обы́чно: Благослове́н Бог наш: Чтец: Царю́ Небе́сный: Трисвято́е. О́тче наш: Го́споди, поми́луй, 12. Сла́ва, и ны́не: Прииди́те, поклони́мся: три́жды.

И псало́м 45.

Бог нам прибе́жище и си́ла, помо́щник в ско́рбех обре́тших ны зело́. Сего́ ра́ди не убои́мся, внегда́ смуща́ется земля́, и прелага́ются го́ры в сердца́ морска́я. Возшуме́ша и смято́шася во́ды их, смято́шася го́ры кре́постию Его́. Ре́чная устремле́ния веселя́т град Бо́жий: освяти́л е́сть селе́ние Свое́ Вы́шний. Бог посреде́ его́, и не подви́жится: помо́жет ему́ Бог у́тро зау́тра. Смято́шася язы́цы, уклони́шася ца́рствия: даде́ глас Свой Вы́шний, подви́жеся земля́. Госпо́дь сил с на́ми, засту́пник наш Бог Иа́ковль. Прииди́те и ви́дите дела́ Бо́жия, я́же положи́ чудеса́ на земли́: оте́мля бра́ни до коне́ц земли́, лук сокруши́т и сло́мит ору́жие, и щиты́ сожже́т огне́м. Упраздни́теся и разуме́йте, я́ко Аз е́смь Бог: вознесу́ся во язы́цех, вознесу́ся на земли́. Госпо́дь сил с на́ми, засту́пник наш Бог Иа́ковль.

Сла́ва, и ны́не: Аллилу́иа, три́жды.

И а́бие чтет ектении́ сия́:

Ми́ром Го́споду помо́лимся.

Лик: Го́споди, поми́луй.

И про́чая да́же до: О пла́вающих:

А́бие же прилага́ет сия́:

О е́же не помяну́ти грехо́в и беззако́ний на́ших, но ми́лостивно услы́шати глас моле́ния на́шего, и я́ко благосе́рду и ми́лостиву бы́ти к нам недосто́йным рабо́м свои́м, и изба́вити нас от враг на́ших, Го́споду помо́лимся.

О е́же благослови́ти су́дна сия́ ра́тная, (или́ су́дно сие́ ра́тное) небе́сным Свои́м благослове́нием, стра́шна же и ужа́сна всем враго́м на́шим сотвори́ти я, Го́споду помо́лимся.

О е́же ве́рному своему́ рабу́, и́мярек, и всему́ во́инству на су́днах сих плы́ти хотя́щему, а́нгела кре́пости своея́ приста́вити, укрепля́юща и му́жественна сердца́ их творя́ща, и кре́пость им в бра́нех подава́юща, на сотре́ние и попра́ние кре́пости супоста́т на́ших, от бу́ри же бе́дныя и истопле́ния, и вся́каго зла избавля́юща их, Го́споду помо́лимся.

О е́же пода́ти им благополе́зны, и благовре́менны ве́тры к безбе́дному, и спе́шному пла́ванию, Го́споду помо́лимся.

О е́же всех враго́в на́ших на су́дна сия́ взира́ющих, дерзнове́ние в страх, си́лу во осла́бу, и му́жество в малоду́шие и в бе́гство претвори́ти, Го́споду помо́лимся.

О е́же пода́ти си́лу и кре́пость Свою́ небе́сную Христолюби́вому сему́ во́инству, и му́жественно то и хра́бро сопроти́в вся́каго врага́ и супоста́та всегда́ показа́ти, Го́споду помо́лимся.

О е́же всем нам ве́рным рабо́м свои́м мир и утвержде́ние, и от всех бед и нужд, и от всех вра́жиих наве́тов ско́рое свобожде́ние пода́ти, Го́споду помо́лимся.

О е́же студа́ и безче́стия ли́ца сопроти́вных враго́в на́ших, се́рдце же их стра́ха и у́жаса испо́лнити, и А́нгел Госпо́день да бу́дет погоня́яй и поража́яй их, Го́споду помо́лимся.

О е́же неосла́бну, непребори́му, победи́тельну же си́лу, кре́пость и му́жество с хра́бростию Христоимени́тому сему́ во́инству на́шему, на сокруше́ние луко́в си́льных враго́в на́ших пода́ти, Го́споду помо́лимся.

О е́же сокруши́ти щит, ору́жие и бра́нь всех борю́щихся с на́ми, и под но́ги Христолюби́вому во́инству тех покори́ти, Го́споду помо́лимся.

О изба́витися нам:

Заступи́, спаси́, поми́луй:

Пресвяту́ю, Пречи́стую:

Иере́й: Я́ко ты еси́ кре́пость и утвержде́ние лю́дем Твои́м, и Тебе́ вся́кая сла́ва, че́сть и поклоне́ние подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

По сих же пою́т: Бог Госпо́дь, и яви́ся нам: Глас 2:

Стих 1: Возлюблю́ тя, Го́споди, кре́посте моя́.

Стих 2: Бог мой помо́щник мой, и упова́ю на Него́.

Стих 3: Пожену́ враги́ моя́, и пости́гну я, и не возвращу́ся, до́ндеже сконча́ются.

Стих 4: Жив Госпо́дь и благослове́н Бог, и да вознесе́тся Бог спасе́ния моего́.

И тропари́ сия́, глас то́йже:

К тебе́, Спа́се, ны́не прибега́ющих, и от Твоея́ всеси́льныя десни́цы по́мощи и благослове́ния, я́ко от Творца́ и Влады́ки, и́щущих не пре́зри: но я́коже иногда́ на мо́ри сло́вом тишину́ апо́столом Свои́м по́дал еси́, и ны́не ти́хое и безмяте́жное во благополу́чии, со здра́вием и побе́дою пла́вание тем да́руй, моли́твами Богоро́дицы, Еди́не Человеколю́бче.

Сла́ва, глас 5:

Всю наде́жду и упова́ние свое́ на Тя, Христе́, возло́жшим, помо́щник и защи́титель бу́ди, и побе́ду да́руя им на враги́, путеше́ствие их благослови́, и благополу́чно сотвори́: да вси сла́вим Тя еди́наго засту́пника и благода́теля на́шего.

И ны́не, Богоро́дичен:

Под Твой покро́в прибега́ем Богоро́дице Де́во, моли́тв на́ших не пре́зри в ско́рбех: но от бед изба́ви нас Еди́на Чи́стая и Благослове́нная.

А́бие же чтет псало́м 120:

Возведо́х о́чи мои́ в го́ры, отню́дуже прии́дет по́мощь моя́. По́мощь моя́ от Го́спода, сотво́ршаго не́бо и зе́млю. Не да́ждь во смяте́ние ноги́ твоея́, ниже́ воздре́млет храня́й тя: се, не воздре́млет, ниже́ у́снет храня́й Изра́иля. Госпо́дь сохрани́т тя, Госпо́дь покро́в твой на руку́ десну́ю твою́. Во дни со́лнце не ожже́т тебе́, ниже́ луна́ но́щию. Госпо́дь сохрани́т тя от вся́каго зла, сохрани́т ду́шу твою́ Госпо́дь: Госпо́дь сохрани́т вхожде́ние твое́ и исхожде́ние твое́, отны́не и до ве́ка.

Посе́м рече́т иере́й: Го́споду помо́лимся.

И Лик: Го́споди, поми́луй.

Иере́й чтет моли́тву сию́:

Го́споди Иису́се Христе́ Бо́же наш, по мо́рю я́ко по су́ху ходи́вый, и святы́я Своя́ ученики́ от смуще́ния и волне́ния того́ прише́ствием Свои́м свободи́вый: Сам и ны́не, смире́нно мо́лим Тя, при́зри ми́лостивно на су́дна сия́ ра́тная, и всеси́льною Твое́ю десни́цею, небе́сным Твои́м благослове́нием благослови́ я, и плы́ти в них хотя́щему во́инству сопла́вай, и благоути́шны ве́тры им посли́, и приста́ви им А́нгела бла́га всеси́льныя Твоея́ кре́пости. Е́же сохрани́ти и изба́вити их от вся́ких зе́льных ве́тров, бу́рей же и изли́шних волн и истопле́ния и вся́ких вра́жиих наве́тов и наше́ствий: и да́ждь им си́лу, и кре́пость, и му́жество, и побе́ду на враги́ Креста́ Твоего́, и на вся супоста́ты: здра́вых же и благополу́чных с побе́дою во сла́ву Твою́ ми́рно возврати́. Ей Го́споди Бо́же наш, удиви́ и ны́не дре́вния ми́лости Твоя́ на нас, и сам воево́дствуй во́инству сему́: и засту́пник и помо́щник кре́пок бу́ди тем и нам на Тя упова́ющим и Твоея́ всеси́льныя по́мощи ве́рно ча́ющим. Ты бо еси́ кре́пость, и утвержде́ние, и мир наш, и Тебе́ сла́ву возсыла́ем со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Иере́й: Мир всем.

Лик: И ду́хови твоему́.

Иере́й: Главы́ ва́ша Го́сподеви приклони́те.

Лик: Тебе́, Го́споди.

Иере́й же чтет моли́тву сию́, воево́де и во́ем на бра́нь иду́щим, велегла́сно:

Влады́ко Го́споди Бо́же оте́ц на́ших, Тебе́ про́сим, и Тебе́ смире́нно ми́ли ся де́ем, при́зри ми́лостивно на моли́тву нас недосто́йных раб Твои́х, и я́коже иногда́ Сам благоизво́лил еси́ взы́ти со уго́дником Твои́м Моисе́ом, изводя́ лю́ди Своя́ Изра́иля из Еги́пта в зе́млю обетова́ния: та́ко и ны́не Сам иди́ с рабо́м Твои́м сим, и́мярек, и с во́и си́ми, и сам бу́ди им помо́щник и засту́пник, и сохрани́ их и во дни и в нощи́ неприкоснове́нных и неврежде́нных от вся́каго зла́го обстоя́ния, неду́га же, гла́да и истопле́ния, и вся́каго стра́ха. И я́коже укрепи́л еси́ Иису́са Нави́на крестообра́зным воздви́жением рук Моисе́овых на Амали́ка, и на ца́рствия Ханаа́нска бра́вшаяся с ним, е́же одоле́ти им: и тем Зи́ва, и Зеве́а, и Салма́на, и вся кня́зи их погуби́вый. И я́коже помо́гл еси́ Гедео́ну с тремя́ сты избра́нных муже́й победи́ти мно́жество мадиа́мское: та́ко и сим ве́рным рабо́м Твои́м кре́пость, си́лу и му́жественное се́рдце, по́мощь же и заступле́ние да́руй. И я́коже явле́нием небе́сным пе́рвому во христиа́нских царе́х Константи́ну пособи́л еси́ проти́вныя супоста́ты Твоя́ победи́ти: си́це и сим Христоимени́тым рабо́м Твои́м ны́не, побе́ду и кре́пкое одоле́ние на вся враги́, [и безбо́жныя пога́ны,] ми́лостивно пода́ждь: и отвсю́ду А́нгел твои́х ополче́нием огради́ их, и вооружи́ их си́лою и защище́нием честна́го и животворя́щаго Креста́, во и́мя Тебе́ Бо́га Отца́, и возлю́бленнаго Единоро́днаго Сы́на Твоего́, Го́спода на́шего Иису́са Христа́, и всесвята́го и животворя́щаго Твоего́ Ду́ха, ны́не и при́сно, и во ве́ки веко́в.

Лик: Ами́нь.

Взем же иере́й свяще́нную во́ду, кропи́т е́ю су́дна, глаго́ля:

Благословля́ются су́дна сия́ окропле́нием воды́ сея́ свяще́нныя, во благополу́чное ше́ствие, и в побе́ду на враги́ Христолюби́вому во́инству, во и́мя Отца́, и Сы́на, и Свята́го Ду́ха, ами́нь.

(А́ще у́бо еди́но то́чию су́дно е́сть, еди́нственне глаго́ли: Благословля́ется су́дно сие́: и про́чая.)

Посе́м кропи́т воево́ду и во́инство, глаго́ля:

Да благослови́т вас Госпо́дь от Сио́на, и да преда́ст враги́ ва́ша под ру́ки вам, и да покори́т я под но́ги ва́ша во сла́ву Свою́: вы же мужа́йтеся, и да крепи́тся се́рдце ва́ше, и упова́юще на Го́спода, побежда́йте враги́ ва́ша, во и́мя Отца́, и Сы́на, и Свята́го Ду́ха, ами́нь.

А́бие же твори́т отпу́ст сей:

Христо́с и́стинный Бог наш, моли́твами пречи́стыя Своея́ Ма́тере, си́лою честна́го и животворя́щаго Креста́, заступле́нием святы́х вели́ких Архистрати́г, Михаи́ла и Гаврии́ла, и всех Небе́сных безпло́тных сил, и святы́х великому́ченик: Гео́ргиа, Дими́триа, Проко́пиа, Фео́доров Стратила́та и Ти́рона, и всех святы́х Свои́х, поми́лует и укрепи́т вас в де́нь бра́ни, и спасе́т, я́ко благ и человеколю́бец.

Лик же пое́т догма́тик 4 гла́са:

При́зри на моле́ния Твои́х раб всенепоро́чная, утоля́ющи лю́тая на ны воста́ния ско́рби нас измена́ющи: Тя бо еди́ну тве́рдое и изве́стное утвержде́ние и́мамы, и Твое́ предста́тельство стяжа́хом, да не постыди́мся Влады́чице, Тя призыва́ющии. Потщи́ся на умоле́ние Тебе́, ве́рно вопию́щих: ра́дуйся, Влады́чице, всех по́мощь, ра́досте и покро́ве, и спасе́ние душ на́ших.

Иере́й же, десни́цею благословля́я во́инство, глаго́лет:

Благослове́ние Госпо́дне бу́ди на всех вас, всегда́, ны́не и при́сно, и во ве́ки веко́в.

Снем же с себе́ епитрахи́ль и́дет с ми́ром во своя́ си: во́инство же устремля́ется к пла́ванию, во и́мя Госпо́дне.

Нача́ло обы́чное:

Царю́ Небе́сный и про́чая.

Прииди́те поклони́мся:

Псало́м 138.

Го́споди, искуси́л мя еси́ и позна́л мя еси́: Ты позна́л еси́ седа́ние мое́ и воста́ние мое́. Ты разуме́л еси́ помышле́ния моя́ издале́ча: стезю́ мою́ и у́же мое́ Ты еси́ изсле́довал и вся пути́ моя́ прови́дел еси́. Я́ко не́сть льсти́ в язы́це мое́м: се, Го́споди, Ты позна́л еси́ вся после́дняя и дре́вняя: Ты созда́л еси́ мя и положи́л еси́ на мне ру́ку Твою́. удиви́ся ра́зум Твой от мене́, утверди́ся, не возмогу́ к нему́. Ка́мо пойду́ от ду́ха Твоего́? И от лица́ Твоего́ ка́мо бежу́? А́ще взы́ду на не́бо, Ты та́мо еси́: а́ще сни́ду во ад, та́мо еси́. А́ще возму́ криле́ мои́ ра́но и вселю́ся в после́дних мо́ря, и та́мо бо рука́ Твоя́ наста́вит мя, и удержи́т мя десни́ца Твоя́. И рех: еда́ тьма́ попере́т мя? И но́щь просвеще́ние в сла́дости мое́й. Я́ко тьма́ не помрачи́тся от Тебе́, и но́щь я́ко де́нь просвети́тся: я́ко тьма́ ея́, та́ко и свет ея́. Я́ко Ты созда́л еси́ утро́бы моя́, восприя́л мя еси́ из чре́ва ма́тере моея́. Испове́мся Тебе́, я́ко стра́шно удиви́лся еси́: чу́дна дела́ Твоя́, и душа́ моя́ зна́ет зело́. Не утаи́ся ко́сть моя́ от Тебе́, ю́же сотвори́л еси́ в та́йне, и соста́в мой в преиспо́дних земли́. Несоде́ланное мое́ ви́десте о́чи Твои́, и в кни́зе Твое́й вси напи́шутся: во днех сози́ждутся, и никто́же в них. Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их: изочту́ их, и па́че песка́ умно́жатся: воста́х, и еще́ е́смь с Тобо́ю. А́ще избие́ши гре́шники, Бо́же: му́жие крове́й, уклони́теся от мене́. Я́ко ревни́ви есте́ в помышле́ниих, прии́мут в суету́ гра́ды Твоя́. Не ненави́дящия ли Тя, Го́споди, возненави́дех, и о вразе́х Твои́х иста́ях? Соверше́нною не́навистию возненави́дех я: во враги́ бы́ша ми. Искуси́ мя, Бо́же, и уве́ждь се́рдце мое́: истяжи́ мя и разуме́й стези́ моя́: и ви́ждь, а́ще пу́ть беззако́ния во мне, и наста́ви мя на пу́ть ве́чен.

Моли́тва:

Го́споди Бо́же, на Херуви́мех носи́мый и о́гненною колесни́цею Илию́ на Небеса́ взе́мый, А́нгелы же Твои́ми Авваку́ма и Фили́ппа диа́кона по возду́ху пренесы́й и на успе́ние Твоея́ Ма́тере апо́столы собра́вый, сам кора́бль сей возду́шный освяти́ и путеше́ствующия в нем благослови́, от вся́каго зла соблюда́я, я́ко Ты еси́ еди́н всеси́лен и Тебе́ сла́ву возсыла́ем Отцу́ и Сы́ну и Свято́му Ду́ху ны́не и при́сно и во ве́ки веко́в. Ами́нь.

Иере́й же окропля́ет свято́ю водо́ю самоле́т вовне́ и внутри́, глаго́ля:

Благословля́ется и освяща́ется самоле́т сей благода́тию Пресвята́го Ду́ха, окропле́нием воды́ сея́ свяще́нныя, во и́мя Отца́, и Сы́на, и Свята́го Ду́ха, ами́нь. Три́жды.

Иере́й начина́ет: Благослове́н Бог наш:

Лик: Царю́ Небе́сный:

Чтец: Трисвято́е и про́чая по чи́ну. Сла́ва, и ны́не: Прииди́те поклони́мся: три́жды. Та́же псало́м 138: Го́споди, искуси́л мя еси́, и позна́л мя еси́:

Сла́ва, и ны́не: Аллилу́иа, три́жды.

Ектениа́ вели́кая, да́же до О пла́вающих:

О е́же ми́лостиву, благоуве́тливу и благопремени́тельну бы́ти к рабо́м Свои́м (или́ рабу́ Своему́), на́ми ны́не моля́щимся, и прости́в им вся согреше́ния во́льная и нево́льная, и благослови́ти возду́шное путеше́ствие их, Го́споду помо́лимся.

О е́же утоли́ти вся́кую бу́рю, уста́вити ве́тры проти́вныя и тишину́ к безмяте́жному по возду́ху провожде́нию их пода́ти им, Го́споду помо́лимся.

О е́же посла́ти им А́нгела Своего́ Храни́теля наставля́юща их, и от вся́каго зла и всех ко́зней кня́зя возду́шнаго покрыва́юща, от паде́ния же, сокруше́ния и вся́кия неча́янныя беды́ и обстоя́ния избавля́юща, Го́споду помо́лимся.

О е́же ми́рно и благополу́чно препроводи́ти, здра́во же и безмяте́жно возврати́ти их, Го́споду помо́лимся.

О е́же благослови́ти наме́рение сове́та и де́ла их, к поле́зному соверше́нию, в сла́ву пресвята́го и́мене Своего́, в душе́вную же и теле́сную по́льзу, Го́споду помо́лимся.

О е́же изба́вити их си́лою благода́ти Своея́, от вся́ких бед и нужд душе́вных и теле́сных, от неду́га же и от напра́сныя сме́рти, и вся́кия смертоно́сныя ра́ны: здра́вие же с благополу́чием, и благовре́менным во своя́ си возвраще́нием, ми́лостивно пода́ти, Го́споду помо́лимся.

Заступи́, спаси́, поми́луй и сохрани́ нас Бо́же, твое́ю благода́тию.

Пресвяту́ю, Пречи́стую, Преблагослове́нную, сла́вную:

Иере́й: Я́ко подоба́ет Тебе́ вся́кая сла́ва:

Бог Госпо́дь, и яви́ся нам: и тропари́ сия́, глас 2:

К тебе́, Спа́се, прибега́ющих, и от Твоея́ всеси́льныя десни́цы по́мощи и благослове́ния, я́ко от Творца́ и Влады́ки, и́щущих не пре́зри, но я́коже апо́столы Твоя́ дре́вле на погребе́ние Пречи́стыя Ма́тере Твоея́ от коне́ц о́блаки принесы́й, си́це и ны́не рабо́м твои́м сим ско́рое и безмяте́жное по возду́ху превожде́ние со здра́вием да́руй, моли́твами Преблагослове́нныя Богоро́дицы, Еди́не Человеколю́бче.

Сла́ва, глас 5: Всю наде́жду на Тя возложи́вшим, Спа́се, бу́ди помо́щник и изба́витель, и благо́е наме́рение де́ла с возду́шным путьше́ствием их благослови́, да вси сла́вим Тя еди́наго всех благ пода́теля.

И ны́не: Под Твой покро́в прибега́ем Богоро́дице Де́во, моли́тв на́ших не пре́зри в ско́рбех, но от бед изба́ви нас, еди́на чи́стая и благослове́нная.

Диа́кон: Во́нмем.

Иере́й: Мир всем.

Чтец: И ду́хови твоему́.

Диа́кон: Прему́дрость, во́нмем.

Проки́мен глас 4:

Я́ко а́нгелом свои́м запове́сть о тебе́, сохрани́ти тя во всех путе́х твои́х.

Стих: На рука́х во́змут тя, да не когда́ преткне́ши о ка́мень но́гу твою́.

Апо́стол в дея́ниих, зача́ло 20:

Во дни о́ны, А́нгел Госпо́день рече́ к Фили́ппу, глаго́ля: воста́ни и иди́ на полу́дне, на пу́ть сходя́щий от Иерусали́ма в Га́зу, и той е́сть пуст. И воста́в по́йде, и се муж му́рин, евну́х, си́лен Кандаки́и цари́цы Му́ринския, и́же бе над все́ми сокро́вищи ея́: и́же прии́де поклони́тися во Иерусали́м. Бе же возвраща́яся, и седя́ на колесни́це свое́й, чтя́ше проро́ка Иса́ию. Рече́ же Дух к Фили́ппу: приступи́, и прилепи́ся колесни́це сей. Прите́к же Фили́пп, услы́ша его́ чту́ща проро́ка Иса́ию и рече́: у́бо разуме́еши ли, я́же чте́ши? Он же рече́: ка́ко у́бо могу́ [разуме́ти,] а́ще не кто наста́вит мя? Умоли́ же Фили́ппа возше́дша се́сти с ним. Сло́во же писа́ния, е́же чтя́ше, бе сие́: я́ко овча́ на заколе́ние веде́ся, и я́ко а́гнец пря́мо стригу́щему его́ безгла́сен, та́ко не отверза́ет уст Свои́х. Во смире́нии Его́ суд Его́ взя́тся: род же Его́ кто испове́сть? Я́ко взе́млется от земли́ живо́т Его́. Отвеща́в же ка́женик к Фили́ппу, рече́: молю́ тя, о ком проро́к глаго́лет сие́: о себе́ ли? Или́ о ино́м не́коем? Отве́рз же Фили́пп уста́ своя́, и наче́н от писа́ния сего́, благовести́ ему́ Иису́са. Я́коже идя́ху путе́м, приидо́ша на не́кую во́ду, и рече́ ка́женик: се вода́, что возбраня́ет ми крести́тися? Рече́ же ему́ Фили́пп: а́ще ве́руеши от всего́ се́рдца твоего́, мо́щно ти е́сть. Отвеща́в же рече́: ве́рую Сы́на Бо́жия бы́ти Иису́са Христа́. И повеле́ ста́ти колесни́це: и снидо́ста о́ба на во́ду, Фили́пп же и ка́женик: и крести́ его́. Егда́ же изыдо́ста от воды́, Дух Святы́й нападе́ на ка́женика. А́нгел же Госпо́день восхи́ти Фили́ппа, и не ви́де его́ ктому́ ка́женик: идя́ше бо в пу́ть свой ра́дуяся.

Аллилу́иа, Глас 4:

Стих 1: И взы́де на Херуви́мы и лете́, лете́ на крилу́ ве́треню.

Стих 2: Плещма́ Свои́ма осени́т тя и под крыле́ Его́ наде́ешися.

Ева́нглие от Иоа́нна, зача́ло 47:

Рече́ Госпо́дь свои́м ученико́м: да не смуща́ется се́рдце ва́ше: ве́руйте в Бо́га, и в Мя ве́руйте. В дому́ Отца́ Моего́ оби́тели мно́ги су́ть: а́ще ли же ни́, рекл бых вам: иду́ угото́вати ме́сто вам. И а́ще угото́влю ме́сто вам, па́ки прииду́ и поиму́ вы к Себе́: да иде́же е́смь Аз, и вы бу́дете: И а́може Аз иду́, ве́сте, и пу́ть ве́сте. Глаго́ла ему́ Фома́: Го́споди: не ве́мы, ка́мо и́деши? И ка́ко мо́жем пу́ть ве́дети? Глаго́ла ему́ Иису́с: Аз е́смь пу́ть, и и́стина, и живо́т: никто́же прии́дет ко Отцу́, то́кмо Мно́ю. А́ще Мя бы́сте зна́ли, и Отца́ Моего́ зна́ли бы́сте у́бо: и отсе́ле позна́сте Его́, и ви́десте Его́. Глаго́ла ему́ Фили́пп: Го́споди, покажи́ нам Отца́, и довле́ет нам. Глаго́ла ему́ Иису́с: толи́ко вре́мя с ва́ми е́смь, и не позна́л еси́ Мене́, Фили́ппе? Ви́девый Мене́ ви́де Отца́, и ка́ко ты глаго́леши, покажи́ нам Отца́? Не ве́руеши ли, я́ко Аз во Отце́, и Оте́ц во Мне е́сть?

По Ева́нглии глаго́лет диа́кон или́ иере́й ектению́ сугу́бую:

Поми́луй нас Бо́же:

Та́же прилага́ет и сия́:

Небоше́ственника проро́ка Твоего́, Го́споди, дре́вле показа́вый и апо́столы Твоя́ о́блаки от коне́ц земли́ и во святы́й град пренесы́й, при́зри и ны́не на моли́тву рабо́в Твои́х, к Тебе́ приле́жно припа́дающих и благослови́ возду́шное путеше́ствие их, ти́ху же и ми́рну и безмяте́жну сему́ бы́ти сотвори́, мо́лим Ти ся, всеблаги́й, услы́ши и поми́луй.

А́нгелом Твои́м повели́, Влады́ко, сохрани́ти сия́, рабы́ Твоя́ по возду́ху ше́ствовати хотя́щия, я́ко да крило́ма свои́ма осеня́т я, возду́шнаго же кня́зя под но́зе их сокруша́т, мо́лимся всеми́лостивый Спа́се, услы́ши и поми́луй.

Благо́е наме́рение, Спа́се, рабо́в Твои́х благослови́ и моли́тву их приими́, ско́рое и безбе́дное по возду́ху превожде́ние им устроя́я и благополу́чное во Своя́ си возвраще́ние ми́лостиво да́руя, всеще́дрый Го́споди, услы́ши и поми́луй.

Пресла́вным вознесе́нием Твои́м возду́х освяти́вый Го́споди, и Илию́ огнеколесни́чника пе́рваго небоше́ственника показа́вый, того́ моли́твами рабо́м Твои́м сим (и́мярек) безмяте́жное возду́шное ше́ствие, здра́вие же и от вся́кия ско́рби и смертоно́сныя ра́ны избавле́ние да́руй, мо́лим Ти ся всеми́лостивый Го́споди, услы́ши и поми́луй.

Вся срахова́ния бесо́вская дале́че от рабо́в Твои́х отжени́, я́ко да на крыле́х жела́ния Боже́ственнаго при́сно носи́ми, на Тя же Творца́ и Промысли́теля всея́ тва́ри упова́ние несумне́нное возлага́юще, ми́рно, и ра́достно, я́ко на о́блаце ле́гце, пу́ть возду́шный пре́йдут, ко сла́ве и́мене Твоего́ Пресвята́го и во вре́мя благопотре́бно во своя́ си возвратя́тся, мо́лим Ти ся всемоги́й Влады́ко, услы́ши и ми́лостивно поми́луй.

Та́же: услы́ши ны, Бо́же спаси́телю наш:

Та́же: Со умиле́нием коле́на и главы́ прекло́нше, Го́споду помо́лимся.

Лик: Го́споди поми́луй.

Моли́тва:

Влады́ко Го́споди Иису́се Христе́ Бо́же наш, стихи́ям повелева́яй и вся го́рстию содержа́й, Его́же бе́здны трепе́щут и Ему́же зве́зды прису́тствуют. Вся тва́рь Тебе́ слу́жит, вся послу́шают, вся Тебе́ повину́ются. Вся мо́жеши: сего́ ра́ди вся ми́луеши, преблаги́й Го́споди. Та́ко и ны́не у́бо, Влады́ко, рабо́в Твои́х сих (и́мярек) моле́ния те́плыя прие́мля, благослови́ пу́ть их и возду́шное ше́ствие, запреща́я бу́рям же и ве́тром проти́вным и лодию́ возду́шную це́лу и невреди́му соблюда́я. Спаси́тельное и небу́рное по возду́ху превожде́ние им да́руй и благо́е наме́рение соверши́вшим им, ве́село во здра́вие и в ми́ре возврати́тися благоизво́ли. Ты бо еси́ Спас и Изба́витель и всех благи́х небе́сных и земны́х пода́тель и Тебе́ сла́ву возсыла́ем со безнача́льным Твои́м Отце́м и Пресвяты́м и благи́м и животворя́щим Твои́м Ду́хом, ны́не и при́сно и во ве́ки веко́в. Ами́нь.

И твори́т иере́й обы́чный отпу́ст, и взем честны́й крест, дае́т путьше́ствующим лобза́ти, и кропи́т свяще́нною водо́ю, глаго́ля:

Да благослови́т вас Госпо́дь от Сио́на, и у́зрите блага́я Иерусали́ма во вся дни живота́ ва́шего, и да испра́вит путеше́ствие ва́ше в ми́ре, в сла́ву Свята́го Своего́ и́мене, ами́нь.

Прише́дшу иере́ю в дом, его́же благослови́ти и́мать, подоба́ет ему́ име́ти с собо́ю свяще́нную в сосу́де во́ду и кропи́льце, и еле́й в ма́лом сосу́де: к сему́же на ко́йждо от четыре́х стен да бу́дет крест напи́сан: взем же на себе́ епитрахи́ль, (а́ще хо́щет и фело́нь) начина́ет:

Иере́й: Благослове́н Бог наш:

Лик: Царю́ Небе́сный: Чтец: Трисвято́е и про́чая по чи́ну. Прииди́те, поклони́мся: три́жды, и псало́м 90:

Живы́й в по́мощи вы́шняго, в кро́ве Бо́га Небе́снаго водвори́тся, рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна: плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма́ одесну́ю тебе́, к тебе́ же не прибли́жится: оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́: Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́: я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́: на а́спида и васили́ска насту́пиши, и попере́ши льва́ и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его́: с ним е́смь в ско́рби, изму́ его́ и просла́влю его́: долгото́ю дний испо́лню его́ и явлю́ ему́ спасе́ние Мое́.

По псалме́ же пою́т тропа́рь, глас 8:

Я́коже Закхе́еву до́му Твои́м, Христе́, вхо́дом спасе́ние бы́сть, си́це и ны́не вхо́дом свяще́нных служи́телей Твои́х, и с ни́ми Святы́х А́нгел Твои́х, мир Твой пода́ждь до́му сему́, и ми́лостивно благослови́ его́, спаса́я и просвеща́я всех жи́ти хотя́щих в нем.

Су́щей же трапе́зе убру́сом покры́той, и Кресту́ на ней, и свеща́м горя́щим, и воде́ свяще́нной и еле́ю, став иере́й к восто́ку лице́м и ре́кшу:

Го́споду помо́лимся.

Лик: Го́споди поми́луй.

Чтет во услы́шание всех моли́тву сию́:

Го́споди Иису́се Христе́ Бо́же наш, изво́ливый под се́нь Закхе́а мытаря́ вни́ти, и спасе́ние тому́ и всему́ до́му его́ бы́вый: Сам и ны́не зде жи́ти восхоте́вшия и на́ми недосто́йными мольбы́ Тебе́ и моле́ния принося́щия, от вся́каго зла невреди́мы соблюди́, благословля́я их и обита́лище сие́, и ненаве́тен тех живо́т вы́ну сохраня́й, изоби́льно вся блага́я Твоя́ им Твои́м благослове́нием на по́льзу подава́яй. Я́ко подоба́ет Тебе́ вся́кая сла́ва, че́сть и поклоне́ние, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Свяще́нник: Мир всем.

Лик: И ду́хови твоему́.

Свяще́нник: Главы́ ва́ша Го́сподеви приклони́те.

Лик: Тебе́ Го́споди.

И чтет иере́й та́йно моли́тву сию́:

Влады́ко Го́споди Бо́же наш, на высо́ких живы́й и на смире́нныя призира́яй, благослови́вый дом Лава́нов при́ вхо́де Иа́кова, и дом Пенте́фриев прихо́дом Ио́сифовым: благослови́вый дом Аведда́риин внесе́нием киво́та, и во дни прише́ствия во пло́ти Христа́ Бо́га на́шего, спасе́ние до́му Закхе́ову дарова́вый: сам благослови́ и дом сей, и в нем жи́ти хотя́щих стра́хом Твои́м огради́, и невреди́мых от сопроти́вных сохрани́, и благослове́ние Твое́ с высоты́ жили́ща Твоего́ низпосли́ им, и благослови́ и умно́жи вся блага́я в до́ме сем.

Возгла́с: Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

А́бие же посе́м зна́менав три́жды еле́й, глаго́лет:

Во и́мя Отца́, и Сы́на, и Свята́го Ду́ха, ами́нь.

И чтет над ним моли́тву сию́:

Го́споди Бо́же наш, при́зри ны́не ми́лостивно на моли́тву мене́ смире́ннаго и недосто́йнаго раба́ Твоего́, и низпосли́ благода́ть Пресвята́го Твоего́ Ду́ха на еле́й сей, и освяти́ его́, я́ко да бу́дет во освяще́ние ме́сту сему́ и на нем сооруже́нну до́му, и на прогна́ние вся́кия сопроти́вныя си́лы и сатани́нских наве́тов. Ты бо еси́ благословля́яй и освяща́яй вся́ческая, Христе́ Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

По моли́тве же взе́млет свяще́нную во́ду, и кропи́т е́ю вся сте́ны до́му о́крест и вся кле́ти его́, глаго́ля:

Во и́мя Отца́, и Сы́на, и Свята́го Ду́ха, окропле́нием воды́ сея́ свяще́нныя, в бе́гство да претвори́тся все лука́вое бесо́вское де́йство, ами́нь.

Окропи́вше же все, взем еле́й, помазу́ет им сте́ны до́ма, иде́же е́сть крест напи́сан, в среди́не его́, наче́н от восто́чныя стены́ до́ма, посе́м и за́падную, и по сих се́верную, в коне́ц же ю́жную сте́ну, над ко́емждо глаго́ля:

Благословля́ется дом сей пома́занием свята́го еле́а сего́, во и́мя Отца́, и Сы́на, и Свята́го Ду́ха, ами́нь.

По соверше́нии пома́зания еле́ем, возжига́ют свещи́ пред ки́имждо кресто́м, на ко́ейждо стене́. Сему́ же быва́ющу, певцы́ пою́т стихи́ру сию́, глас 5:

Благослови́, Го́споди, дом сей, и испо́лни его́ земны́х Твои́х благ, и в нем благоче́стно жи́ти хотя́щих от вся́каго зла́го обстоя́ния неврежде́нных сохрани́, и вся́кое изоби́лие небе́снаго и земна́го Твоего́ благослове́ния тем да́руй, и я́ко щедр поми́луй, по вели́цей твое́й ми́лости.

Сконча́ну же пома́занию, ста́нет иере́й к восто́ку, и а́ще хо́щет мо́жет и чести́ Ева́нглие от Луки́ зача́ло 94.

Во вре́мя о́но прии́де Иису́с во Иерихо́н. И се, муж нарица́емый Закхе́й, и сей бе ста́рей мытаре́м, и той бе бога́т: и иска́ше ви́дети Иису́са, кто е́сть, и не можа́ше от наро́да, я́ко во́зрастом мал бе: и предите́к, возле́зе на я́годичину, да ви́дит, я́ко хотя́ше ми́мо ея́ проити́. И я́ко прии́де на ме́сто, воззре́в Иису́с ви́де его́ и рече́ к нему́: Закхе́е, потща́вся сле́зи: дне́сь бо в дому́ твое́м подоба́ет ми бы́ти. И потща́вся сле́зе и прия́т Его́ ра́дуяся. И ви́девше вси ропта́ху, глаго́люще, я́ко ко гре́шну му́жу вни́де вита́ти. Став же Закхе́й рече́ ко Го́споду: се, пол име́ния моего́, Го́споди, дам ни́щим: и а́ще кого́ чим оби́дех, возвращу́ четвери́цею. Рече́ же к нему́ Иису́с, я́ко дне́сь спасе́ние до́му сему́ бы́сть, зане́ и сей сын Авраа́мль е́сть: прии́де бо Сын Челове́чь взыска́ти и спасти́ поги́бшаго.

Псало́м 100:

Ми́лость и суд воспою́ Тебе́, Го́споди: пою́ и разуме́ю в пути́ непоро́чне: когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма ве́щь законопресту́пную: творя́щия преступле́ние возненави́дех: не прильпе́ мне се́рдце стропти́во: уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком и несы́тым се́рдцем, с сим не ядя́х. О́чи мои́ на ве́рныя земли́, посажда́ти я со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню: глаго́ляй непра́ведная не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающия беззако́ние.

Сла́ва и ны́не: Аллилу́иа, три́жды.

Иере́й кади́т ве́сь дом. По сем глаго́лет ектению́ сию́:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Прилага́ет и сия́:

Еще́ мо́лимся о е́же низпосла́ти благослове́ние Свое́ на дом сей и на раба́ Своего́ (или́ рабу́), и́мярек, и на всех в нем благоче́стно жи́ти хотя́щих, и посла́ти им А́нгела Своего́ ми́лостива, соблюда́юща и сохраня́юща их от вся́каго зла, и наставля́юща к де́ланию всех доброде́телей, и ко исполне́нию святы́х Христо́вых за́поведей: и о е́же сохрани́ти их от гла́да, губи́тельства, тру́са, пото́па, огня́, меча́ и наше́ствия иноплеме́нник. И вся́кия смертоно́сныя ра́ны, и дарова́ти им здра́вие, и долгоде́нствием огради́ти их. И во всем угобзи́ти, рцем вси: Го́споди, услы́ши и поми́луй.

Еще́ мо́лимся за всю бра́тию и за вся христиа́ны.

Возгла́с: услы́ши ны, Бо́же спаси́телю наш, упова́ние всех конце́в земли́:

Лик: Ами́нь.

И твори́т обы́чный дневны́й отпу́ст: многоле́тствовав же до́му влады́це, отхо́дит во своя́ си, благодаря́ Бо́га.

Архиере́й или́ свяще́нник глаго́лет: Благослове́н Бог наш: Чтец: Трисвято́е, по О́тче наш: архиере́й, или́ иере́й, возгла́с: Я́ко Твое́ е́сть Ца́рство:

Та́же, Го́споди, поми́луй, 12. Сла́ва, и ны́не: Прииди́те, поклони́мся, три́жды.

Псало́м 90:

Живы́й в по́мощи вы́шняго, в кро́ве Бо́га Небе́снаго водвори́тся, рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна: плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма́ одесну́ю тебе́, к тебе́ же не прибли́жится: оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́: Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́: я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́: на а́спида и васили́ска насту́пиши, и попере́ши льва́ и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его́: с ним е́смь в ско́рби, изму́ его́ и просла́влю его́: долгото́ю дний испо́лню его́ и явлю́ ему́ спасе́ние Мое́.

Сла́ва, и ны́не: Аллилу́иа, три́жды.

Посе́м ектениа́:

Ми́ром Го́споду помо́лимся.

Лик: Го́споди, поми́луй.

О свы́шнем ми́ре, и о спасе́нии душ на́ших, Го́споду помо́лимся.

О оставле́нии согреше́ний, во блаже́нней па́мяти преста́вльшихся, Го́споду помо́лимся.

О приснопа́мятных рабе́х Бо́жиих правосла́вных во́инех, му́жественно подвиза́вшихся, и о всех за ве́ру и оте́чество на бра́ни живо́т свой положи́вших, поко́я, тишины́, блаже́нныя па́мяти их, Го́споду помо́лимся.

О прости́ти им вся́кое прегреше́ние во́льное и нево́льное, Го́споду помо́лимся.

О неосужде́нным предста́ти у стра́шнаго Престо́ла Го́спода сла́вы, Го́споду помо́лимся.

О пла́чущих и боле́знующих, ча́ющих Христо́ва утеше́ния, Го́споду помо́лимся.

О отпусти́тися им от вся́кия боле́зни, печа́ли, и воздыха́ния, и всели́ти их, иде́же присеща́ет свет лица́ Бо́жия, Го́споду помо́лимся.

О я́ко да Госпо́дь Бог наш учини́т ду́ши их в ме́сте све́тле, в ме́сте зла́чне, в ме́сте поко́йне, иде́же вси пра́веднии пребыва́ют, Го́споду помо́лимся.

О причте́нии их в не́дрех Авраа́ма, и Исаа́ка, и Иа́кова, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас, Бо́же, твое́ю благода́тию.

Ми́лости Бо́жия, Ца́рства Небе́снаго и оставле́ния грехо́в испроси́вше тем и са́ми себе́, друг дру́га и ве́сь живо́т наш Христу́ Бо́гу предади́м.

Лик: Тебе́, Го́споди.

Архиере́й или́ иере́й, возгла́с:

Я́ко ты еси́ воскре́сние, и живо́т и поко́й усо́пших раб Твои́х, приснопомина́емых правосла́вных во́инов, и всех за ве́ру и оте́чество на бра́ни живо́т свой положи́вших, Христе́ Бо́же наш: и Тебе́ сла́ву возсыла́ем со безнача́льным Твои́м Отце́м, и со Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Аллилу́иа, три́жды, на глас 8.

Глаго́лем стихи́ сия́:

Стих 1: Блаже́ни, я́же избра́л и прия́л еси́ Го́споди.

Стих 2: Па́мять их в род и род.

Стих 3: Ду́ши их во благи́х водворя́тся.

Та́же тропа́рь, глас 8:

Глубино́ю му́дрости человеколю́бно вся стро́яй, и поле́зное всем подава́яй, еди́не соде́телю, упоко́й Го́споди ду́ши раб Твои́х: на Тя бо упова́ние возложи́ша, Творца́ и Зижди́теля и Бо́га на́шего. [Два́жды.]

Сла́ва, и ны́не, Богоро́дичен:

Тебе́ и сте́ну и приста́нище и́мамы, и моли́твенницу благоприя́тную к Бо́гу, Его́же родила́ еси́ Богоро́дице Безневе́стная, ве́рных спасе́ние.

Та́же тропари́, на глас 5:

Припе́в: Благослове́н еси́ Го́споди, научи́ мя оправда́нием Твои́м.

Святы́х лик обре́те исто́чник жи́зни, и две́рь ра́йскую, да обря́щу и аз пу́ть покая́нием: поги́бшее овча́ аз е́смь, воззови́ мя, Спа́се, и спаси́ мя.

Благослове́н еси́ Го́споди, научи́ мя оправда́нием Твои́м.

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и, и присносу́щней преста́вльшеся, Того́ приле́жно му́ченицы моли́те, долго́в разреше́ние нам дарова́ти.

Благослове́н еси́ Го́споди, научи́ мя оправда́нием Твои́м.

В пу́ть у́зкий хо́ждшии приско́рбный, вси в житии́ крест я́ко яре́м взе́мшии, и Мне после́довавшии ве́рою, прииди́те, наслади́теся, и́хже угото́вах вам по́честей, и венце́в Небе́сных.

Благослове́н еси́ Го́споди, научи́ мя оправда́нием Твои́м.

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний: уще́дри Твое́ созда́ние Влады́ко, и очи́сти Твои́м благоутро́бием, и вожделе́нное оте́чество пода́ждь ми, рая́ па́ки жи́теля мя сотворя́я.

Благослове́н еси́ Го́споди, научи́ мя оправда́нием Твои́м.

Дре́вле у́бо от не су́щих созда́вый мя и о́бразом Твои́м Боже́ственным почты́й, преступле́нием же за́поведи, па́ки мя возврати́вый в зе́млю, от нея́же взят бых, на е́же по подо́бию возведи́, дре́внею добро́тою возобрази́тися.

Благослове́н еси́ Го́споди, научи́ мя оправда́нием Твои́м.

Упоко́й Бо́же рабы́ Твоя́, и учини́ я в раи́, иде́же ли́цы святы́х Го́споди, и пра́ведницы сия́ют я́ко свети́ла: усо́пшия рабы́ Твоя́ упоко́й, презира́я их вся согреше́ния.

Сла́ва, Тро́ичен:

Трисия́тельное еди́наго Божества́ благоче́стно пое́м, вопию́ще: Свят еси́ О́тче безнача́льный, собезнача́льный Сы́не, и Боже́ственный Ду́ше, просвети́ нас ве́рою Тебе́ служа́щих, и ве́чнаго огня́ исхити́.

И ны́не, Богоро́дичен:

Ра́дуйся Чи́стая, Бо́га пло́тию ро́ждшая во спасе́ние всех, е́юже род челове́ческий обре́те спасе́ние: Тобо́ю да обря́щем рай, Богоро́дице чи́стая, благослове́нная.

Аллилу́иа, три́жды. Посе́м ектениа́.

Па́ки и па́ки ми́ром Го́споду помо́лимся.

Лик: Го́споди, поми́луй.

Еще́ мо́лимся о упокое́нии душ усо́пших рабо́в Бо́жиих, правосла́вных во́инов, и всех за ве́ру и оте́чество на бра́ни убие́нных, и о е́же прости́тися им вся́кому прегреше́нию во́льному же и нево́льному.

Лик: Го́споди, поми́луй.

Я́ко да Госпо́дь Бог учини́т ду́ши их, иде́же пра́веднии упокоя́ются.

Лик: Го́споди, поми́луй.

Ми́лости Бо́жия, Ца́рства Небе́снаго, и оставле́ния грехо́в их, у Христа́ безсме́ртнаго Царя́ и Бо́га на́шего про́сим.

Лик: Пода́й, Го́споди.

Диа́кон: Го́споду помо́лимся.

Лик: Го́споди, поми́луй.

Архиере́й, или́ свяще́нник, глаго́лет моли́тву сию́ та́йно:

Бо́же духо́в и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, сам Го́споди упоко́й ду́ши усо́пших рабо́в Твои́х, правосла́вных во́инов, и всех за ве́ру и оте́чество на бра́ни убие́нных, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние соде́янное и́ми, сло́вом или́ де́лом, или́ помышле́нием, я́ко благи́й человеколю́бец Бог прости́: я́ко не́сть челове́к, и́же жив бу́дет, и не согреши́т: Ты бо еди́н кроме́ греха́, пра́вда Твоя́, пра́вда во ве́ки, и сло́во Твое́ и́стина.

Возгла́с:

Я́ко ты еси́ воскресе́ние, и живо́т, и поко́й усо́пших раб твои́х, правосла́вных во́инов, и всех, за ве́ру и оте́чество на бра́ни убие́нных, Христе́ Бо́же наш: и Тебе́ сла́ву возсыла́ем со безнача́льным Твои́м Отце́м, и со Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

И глаго́лем седа́лен, глас 5:

Поко́й Спа́се наш с пра́ведными рабы́ Твоя́, и сия́ всели́ во дворы́ Твоя́, я́коже е́сть пи́сано, презира́я я́ко благ прегреше́ния их, во́льная и нево́льная, и вся я́же в ве́дении и не в ве́дении, человеколю́бче.

Сла́ва, и ны́не, Богоро́дичен:

От Де́вы возсия́вый ми́ру Христе́ Бо́же, сы́ны све́та То́ю показа́вый, поми́луй нас.

Та́же псало́м 50: Поми́луй мя Бо́же:

И а́бие кано́н, глас 8:

Пе́снь 1:

Ирмо́с: Во́ду проше́д я́ко су́шу:

Стих: упоко́й, Го́споди, ду́ши усо́пших раб Твои́х.

Отве́рз уста́ моя́ Спа́се, сло́во ми пода́ждь моли́тися, Милосе́рде, о подвиза́вшихся за ве́ру и оте́чество му́жественно, да поко́иши ду́ши их Влады́ко.

Мертв быв пло́тию Спа́се, и во гро́бе положе́н с ме́ртвыми, ду́ши раб Твои́х поко́й в ме́сте зла́чне, я́ко милосе́рд.

Сла́ва: Моле́бный глас наш услы́ши, Бо́же Триипоста́сне, и учини́ ду́ши рабо́в Твои́х в не́дрех Авраа́млих, Изба́вителю.

И ны́не: Ты пречи́стая Богоро́дице, Его́же без иску́са му́жеска заче́нши родила́ еси́, моли́ Сы́на Твоего́, пода́ти поко́й приснопомина́емым рабо́м Твои́м.

Пе́снь 3:

Ирмо́с: Небе́снаго кру́га верхотво́рче Го́споди:

В ме́сте зла́чне, в ме́сте поко́йне, иде́же ли́цы святы́х веселя́тся, поко́й Христе́ ду́ши раб Твои́х, за Це́рковь Святу́ю и Оте́чество му́жественно подвиза́вшихся, Еди́не Ми́лостиве.

Иде́же ли́цы святы́х, та́мо вчини́ Влады́ко, послужи́вших Тебе́ за Це́рковь Святу́ю Твою́ всем се́рдцем, и воздви́гших и́го Твое́ на ра́мо свое́, я́ко еди́н Влады́ка живота́ и сме́рти.

Сла́ва: Небе́сный О́тче Вседержи́телю, и Сы́не Единоро́дный, и Ду́ше Святы́й исхо́дный, пре́зри уме́рших согреше́ния, и в це́ркви пе́рвенец всели́ их сла́вити Тя, со все́ми угоди́вшими Тебе́.

И ны́не: Я́ко Ма́ти Свята́я Пресвята́го Бо́га, Влады́це вся́ческих, Мари́е Богоро́дице, со все́ми святы́ми Сего́ моли́, ду́ши поко́ити раб Твои́х в Небе́сных селе́ниих.

Ирмо́с: Небе́снаго кру́га верхотво́рче Го́споди:

Ектениа́ и возгла́с.

Пе́снь 4:

Ирмо́с: услы́шах, Го́споди:

Соше́дый в преиспо́дняя Христе́, совоздви́гл еси́ уме́ршия вся, и преста́вльшихся от нас поко́й Спа́се, я́ко щедр.

Никто́же без греха́ е́сть, то́кмо Ты Еди́н Влады́ко: сего́ ра́ди пострада́вшим за Це́рковь Твою́ Святу́ю и Оте́чество, и грехи́ оста́ви, и в рай тех всели́.

Сла́ва: услы́ши, Тро́ице Свята́я, гла́сы моле́бныя, приноси́мыя Тебе́ в це́ркви о пострада́вших в во́инстве за Це́рковь Твою́ Святу́ю, и Богонача́льным Твои́м све́том озари́ ду́ши омраче́нныя су́етными приверже́нии.

И ны́не: Родила́ еси́ Пречи́стая без му́жеска се́мене, Бо́га соверше́нна, и челове́ка соверше́нна, взе́млющаго грехи́ на́ша, Де́во: Того́ моли́ Госпоже́, пострада́вшим рабо́м Твои́м пода́ти поко́й.

Пе́снь 5:

Ирмо́с: Просвети́ нас повеле́нии Твои́ми, Го́споди:

Имы́й живота́ и сме́рти вла́сть, преста́вленных от нас поко́й Христе́ Бо́же: Ты бо еси́ всех Спа́се, поко́й и живо́т.

На тя Спа́се наде́жду возложи́ша пострада́вший за Це́рковь Твою́ Святу́ю и Оте́чество, и отше́дшии от нас: Ты же Го́споди уще́дри их, я́ко Бог Многоми́лостив.

Сла́ва: Просвети́ нас Христе́, воспева́емый Влады́ко, моля́щихся Тебе́, мир Небе́сный прия́ти: и в ми́рных се́лех ду́ши вчини́, отше́дших от вре́менных в наде́жде безконе́чныя жи́зни.

И ны́не: Шу́яго стоя́ния пречи́стая, изба́витися сконча́вшимся, умоли́ Сы́на Твоего́ Госпоже́, я́ко Спа́са и Бо́га на́шего Ма́ти су́щая.

Пе́снь 6:

Ирмо́с: Моли́тву пролию́ ко Го́споду:

А́да испрове́рг Влады́ко, воскреси́л еси́ уме́ршия от ве́ка: пострада́вших за Це́рковь Твою́ Святу́ю, в не́дро Авраа́мле ты Бо́же всели́, прегреше́ния их вся отпусти́в, я́ко милосе́рд.

А́ще и за́поведь, ю́же дал еси́ нам, Бо́же, преступи́хом, и сме́ртни бы́хом: но Ты Бо́же соше́дый во гроб, и ду́ши я́же от ве́ка воскреси́вый, не возста́ви нас Влады́ко на муче́ние, но на поко́й: пострада́вшии за Це́рковь Твою́ Святу́ю и Оте́чество вопию́т Тебе́ на́ми, многоми́лостиве.

Сла́ва: Мо́лим Тя Безнача́льный О́тче и Сы́не, и Ду́ше Святы́й, зло́бою душезло́бнаго ми́ра озло́бленных, и к Тебе́ Зижди́телю преше́дших ду́ши, во а́дово дно не отри́ни, Бо́же спа́се наш.

И ны́не: С Небесе́ Христо́с Бог наш, я́ко до́ждь на руно́ Пречи́стая, сни́де на Тя напоя́я ве́сь мир, и изсуша́я вся безбо́жныя пото́ки, наводня́яй всю зе́млю ра́зумом Свои́м, Присноде́во: Того́ моли́ да́ти поко́й пострада́вшим рабо́м Твои́м.

Ирмо́с: Моли́тву пролию́ ко Го́споду:

Ектениа́ и возгла́с.

Конда́к, глас 8:

Со святы́ми упоко́й Христе́, ду́ши раб Твои́х, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос:

Сам Еди́н еси́ безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя и реки́й ми: я́ко земля́ еси́ и в зе́млю оти́деши, а́може вси челове́цы по́йдем, надгро́бное рыда́ние творя́ще пе́снь: аллилу́иа, аллилу́иа, аллилу́иа.

Пе́снь 7:

Ирмо́с: От иуде́и доше́дше о́троцы:

Влады́ко Христе́ Бо́же, егда́ хо́щеши суди́ти ми́ру, пощади́ ду́ши раб Твои́х за Це́рковь Твою́ Святу́ю и Оте́чество пострада́вших, и́хже от нас прия́л еси́, вопию́щих: оте́ц на́ших Бо́же благослове́н еси́.

В пи́щи ра́йстей, иде́же пра́ведных ду́ши веселя́тся, послужи́вших Тебе́, причти́ с ни́ми Христе́ ду́ши раб Твои́х, воспе́вших Ти ве́рно: оте́ц на́ших Бо́же благослове́н еси́.

Сла́ва: Иуде́йския три о́троки спасы́й во огни́, в Трие́х Ли́цех воспе́тый, изба́ви огня́ ве́чнаго усо́пших, воспе́вших Ти ве́рно: оте́ц на́ших Бо́же, благослове́н еси́.

И ны́не: Иса́иа Тя жезл нарече́, Чи́стая: Дании́л же Го́ру несеко́мую: Иезеки́иль же Две́рь, из Нея́же про́йде Христо́с: мы же Тя и́стинную Богоро́дицу имену́юще велича́ем.

Пе́снь 8:

Ирмо́с: Седмери́цею пе́щь:

Сконча́вше тече́ние, и к Тебе́ прибе́гше Го́споди, пострада́вшии за Це́рковь Твою́ Святу́ю вопию́т ны́не: прегреше́ния на́ша оста́ви, Христе́ и не осуди́ нас, егда́ хо́щеши суди́ти всем, ве́рно бо Тебе́ взыва́хом: вся де́ла Госпо́дня Го́спода по́йте, и превозноси́те Его́ во ве́ки.

Поне́сших, Влады́ко, и́го Твое́ на ра́менах свои́х и бре́мя Твое́ ле́гкое, а́ще и не всегда́: оба́че в ме́сте преподо́бных Твои́х всели́ ду́ши их, воспе́вших Тебе́, Христе́ Бо́же: о́троцы благослови́те, свяще́нницы воспо́йте, лю́дие превозноси́те Его́ во ве́ки.

Благослови́м отца́, и Сы́на, и свята́го ду́ха, Го́спода.

Безнача́льная Тро́ице Свята́я, Бо́же О́тче, и Сы́не, и Ду́ше Святы́й, в ли́це святы́х причти́ ду́ши пострада́вших рабо́в Твои́х, и огня́ ве́чнаго изба́ви, да Тя хва́лят воспева́юще во ве́ки: о́троцы благослови́те, свяще́нницы воспо́йте, лю́дие превозноси́те Его́ во ве́ки.

И ны́не и при́сно, и во ве́ки веко́в, ами́нь.

Тя Де́во, проро́честии ли́цы прореко́ша: прозря́ще бо Тя прозорли́выма очи́ма, ов у́бо жезл нарече́ тя, ин же две́рь восто́чную, ов же го́ру челове́ки несеко́мую, мы же испове́дуем Тя, вои́стинну Богоро́дицу, Бо́га вся́ческих ро́ждшую: Его́же моли́ упоко́ити пострада́вшия, во ве́ки вся.

Пе́снь 9:

Ирмо́с: ужасе́ся о сем не́бо:

Иису́се Бо́же спа́се, Ада́мле Ты взял еси́ преступле́ние, и сме́рти вкуси́л еси́, да челове́ки от нея́ свободи́ши, Милосе́рде: те́мже мо́лим Тя Ми́лостиве, пострада́вших поко́й, я́ко Еди́н всеблаги́й и милосе́рдый.

Не́сть никто́же, Милосе́рде, и́же не согреши́ в челове́цех, то́кмо Ты Еди́н Иису́се Христе́, взе́мляй грехи́ всего́ ми́ра. Те́мже очи́стив раб Твои́х от прегреше́ний, вчини́ во святы́х Твои́х дво́рех: Ты бо живо́т еси́ и поко́й, и свет, и весе́лие всех Тебе́ благоугоди́вших.

Сла́ва: Удиви́ся все естество́ челове́ческое, ка́ко безнача́льнаго Отца́ Сын сый Единоро́дный, пло́ть от Де́вы де́йством Свята́го Ду́ха прия́л еси́, и пострада́л еси́, я́ко челове́к, да уме́ршия оживи́ши: тем и пострада́вших за Це́рковь Твою́ Святу́ю и Оте́чество, приле́жно мо́лим Тя, во стране́ живы́х, я́ко благ, всели́.

И ны́не: Неве́сту Тя нарица́ем Пречи́стая, Отца́ неви́димаго, и Ма́терь Сы́на из Тебе́ Ду́хом Святы́м воплоще́ннаго, и моле́бницу Тя о пострада́вших за Це́рковь Сы́на Твоего́ и свое́ Оте́чество предлага́ем: Тебе́ бо помо́щницу и́мамы земни́и, и любо́вию пою́ще Тя велича́ем.

Та́же глаго́лет архиере́й, или́ иере́й:

Богоро́дицу и Ма́терь Све́та в пе́снех возвели́чим.

Лик: Ду́си и ду́ши пра́ведных восхва́лят Тя, Го́споди.

И пою́т ирмо́с: ужасе́ся о сем Не́бо: Трисвято́е, по О́тче наш:

Глаго́лем тропари́ сия́, глас 4:

Со ду́хи пра́ведных сконча́вшихся, ду́ши раб Твои́х, Спа́се, упоко́й, сохраня́я их во блаже́нной жи́зни, я́же у Тебе́ Человеколю́бче.

В поко́ищи Твое́м Го́споди, иде́же вси Святи́и Твои́ упокоева́ются, упоко́й и ду́ши раб Твои́х, я́ко еди́н еси́ человеколю́бец.

Сла́ва: Ты еси́ Бог, соше́дый во ад, и у́зы окова́нных разреши́вый, сам и ду́ши раб Твои́х упоко́й.

И ны́не, Богоро́дичен: Еди́на чи́стая и непоро́чная Де́во, Бо́га без се́мене ро́ждшая, моли́ спасти́ся душа́м их.

Посе́м ектениа́:

Поми́луй нас Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, три́жды.

Еще́ мо́лимся о упокое́нии душ усо́пших рабо́в Бо́жиих, правосла́вных во́инов, и всех за ве́ру и Оте́чество на бра́ни убие́нных, и о е́же прости́тися им вся́кому прегреше́нию, во́льному же и нево́льному.

Лик: Го́споди, поми́луй, три́жды.

Я́ко да Госпо́дь Бог учини́т ду́ши их, иде́же пра́веднии упокоя́ются.

Лик: Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в их, у Христа́ безсме́ртнаго Царя́ и Бо́га на́шего про́сим.

Лик: Пода́й, Го́споди.

Диа́кон: Го́споду помо́лимся.

Лик: Го́споди, поми́луй.

Архиере́й, или́ свяще́нник: Бо́же духо́в:

Та́же возгла́с:

Я́ко Ты еси́ Воскресе́ние, и Живо́т, и Поко́й усо́пших раб Твои́х, правосла́вных во́инов, и всех за ве́ру и Оте́чество на бра́ни убие́нных, Христе́ Бо́же наш: и Тебе́ сла́ву возсыла́ем со Безнача́льным Твои́м Отце́м, и со Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Посе́м глаго́лет диа́кон:

Прему́дрость.

Лик: Честне́йшую Херуви́м:

Архиере́й, или́ иере́й: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва и ны́не: Го́споди, поми́луй, три́жды. Благослови́.

Архиере́й, или́ иере́й отпу́ст:

Живы́ми и ме́ртвыми облада́яй, воскресы́й из ме́ртвых Христо́с и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, преподо́бных и богоно́сных оте́ц на́ших, и всех святы́х, ду́ши от нас преста́вльшихся раб Свои́х, правосла́вных во́инов, и всех за ве́ру и оте́чество на бра́ни убие́нных, в селе́ниих пра́ведных учини́т, в не́дрех Авраа́ма упоко́ит, и с пра́ведными причте́т, и нас поми́лует, я́ко благ и человеколю́бец.

И по отпу́сте глаша́ет диа́кон:

Во блаже́нном успе́нии ве́чный поко́й пода́ждь Го́споди, усо́пшим рабо́м Твои́м, правосла́вным во́ином, и всем за ве́ру и оте́чество на бра́ни убие́нным, и сотвори́ им ве́чную па́мять.

И певцы́ пою́т: Ве́чная па́мять, три́жды.