Троицкая Родительская суббота

в нюже память совершаем всех от века усопших православных христиан, отец и братий наших.

Предначинательный псалом и обычное стихословие.

На Го́споди, воззва́х: поставим стихов 6. И поем стихиры мученичны 3, осмогласника.

Глас 6.

Стих: А́ще беззако́ния на́зриши, Го́споди, Го́споди, кто́ постои́т?/ Я́ко у тебе́ очище́ние есть.

Му́ченицы Твои́, Го́споди,/ не отверго́шася Тебе́,/ ни отступи́ша от за́поведей Твои́х:// те́х моли́твами поми́луй на́с.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Му́чившиися Тебе́ ра́ди, Христе́,/ мно́гия му́ки претерпе́ша:/ моли́твами, Го́споди, и моле́нием их// всех нас сохрани́.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Страстоте́рпцы му́ченицы и Небе́снии гра́ждане,/ на земли́ пострада́вшии,/ мно́гия му́ки претерпе́ша/ и соверше́нный прия́ша вене́ц на Небесе́х,// да мо́лятся о душа́х на́ших.

И усопших 3. Глас 8.

Подобен: И́же во Еде́ме:

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

От ве́ка ме́ртвых днесь всех по и́мени,/ с ве́рою пожи́вших благоче́стно,/ па́мять соверша́юще, ве́рнии,/ Спа́са и Го́спода воспои́м,/ прося́ще приле́жно сим в час Суда́ отве́т благи́й да́ти Тому́,/ Самому́ Бо́гу на́шему,/ всей судя́щему земли́,/ десна́го Его́ предстоя́ния получи́ти в ра́дости,/ в ча́сти пра́ведных и во святы́х жре́бии све́тлем,// и досто́йным бы́ти Небе́снаго Ца́рствия Его́.

Стих: Хвали́те Го́спода, вси́ язы́цы,/ похвали́те Его́, вси́ лю́дие.

Свое́ю Кро́вию челове́ки, Спа́се, искупи́вый,/ и сме́ртию Твое́ю от сме́рти го́рькия изба́вивый на́с,/ и жи́знь ве́чную подая́й на́м Воскресе́нием Твои́м,/ вся́ упоко́й, Го́споди, усо́пшия благоче́стно/ или́ в пусты́нях, или́ во граде́х, или́ в мо́ри, или́ на земли́,/ или́ на вся́ком ме́сте:/ цари́ же, свяще́нники, архиере́и, мона́хи и бельцы́,/ в возрасте́ вся́ком всеро́дном,// и сподо́би я́ Небе́снаго Ца́рствия Твоего́.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Из ме́ртвых воста́нием Твои́м, Христе́,/ не ктому́ смерть облада́ет уме́ршими благоче́стно;/ те́мже мо́лимся приле́жно:/ рабы́ Твоя́ упоко́й во дво́рех Твои́х/ и в не́дрех Авраа́ма,/ от Ада́ма да́же до днесь послужи́вшия Тебе́ чи́сто/ отцы́ и бра́тию на́шу,/ дру́ги, вку́пе и сро́дники,/ вся́каго челове́ка, в житии́ послужи́вша ве́рно/ и к Тебе́ преста́вльшася многови́дно и многообра́зно, Бо́же,// и сподо́би я получи́ти Небе́снаго Ца́рствия Твоего́.

Слава, глас 8:

Пла́чу и рыда́ю,/ егда́ помышля́ю сме́рть/ и ви́жду во гробе́х лежа́щую/ по о́бразу Бо́жию созда́нную на́шу красоту́,/ безобра́зну, безсла́вну,/ не иму́щую ви́да./ О, чудесе́!/ Что е́же о нас сие́ бысть та́инство?/ Ка́ко преда́хомся тле́нию?/ Ка́ко сопряго́хомся сме́рти?/ Вои́стину Бо́га повеле́нием,/ я́коже есть пи́сано,// подаю́щаго преста́вленным поко́й.

И ныне, Богородичен, глас 6:

Кто́ Тебе́ не ублажи́т, Пресвята́я Де́во?/ Кто́ ли не воспое́т Твоего́ пречи́стаго Рождества́?/ Безле́тно бо от Отца́ возсия́вый Сы́н Единоро́дный,/ То́йже от Тебе́, Чи́стыя, про́йде,/ неизрече́нно вопло́щся,/ естество́м Бо́г сы́й/ и естество́м бы́в Челове́к на́с ра́ди,/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Входа не бывает. Све́те ти́хий:

Вместо же прокимна поем Аллилу́ия: на глас 8.

Стих: Блаже́ни, я́же избра́л и прия́л еси́, Го́споди,

Стих: И па́мять их в род и род.

Таже: Сподо́би, Го́споди: И ектения просительная: Испо́лним вече́рнюю моли́тву:

На стиховне стихира осмогласника, глас 6:

Мученичен: Кре́ст Тво́й, Го́споди,/ му́чеником бы́сть ору́жие непобеди́мое:/ ви́дяху бо предлежа́щую сме́рть/ и предзря́ще бу́дущую жи́знь,/ наде́ждею в Тя́ укрепля́хуся;// те́х моли́твами поми́луй на́с.

И за упокой:

Стих: Ду́ши их/ во благи́х водворя́тся.

Ты́ мя́ почти́л еси́ о́бразом Твои́м,/ руку́ Твое́ю, Спа́се, созда́ние,/ живописа́вый в веще́ственном зра́це/ у́мнаго существа́ подо́бие;/ его́же и о́бщника мя́ поста́вил еси́,/ положи́вый су́щими на земли́ облада́ти мне́ самовла́стием сло́ва./ Те́мже, Спа́се, рабы́ Твоя́/ во стране́ живу́щих,// в селе́ниих пра́ведных упоко́й.

Стих: Блаже́ни, я́же избра́л/ и прия́л еси́, Го́споди.

Да мне́ достоя́ние про́чих живота́ разсу́дится,/ вертогра́д во Еде́ме вся́кими укра́шен сады́,/ печа́ли и попече́ния свобо́дна мя́, прича́стника боже́ственныя жи́зни,/ равноа́нгельна на земли́, сме́шена учини́вый:/ те́мже, Спа́се, рабы́ Твоя́ во стране́ живы́х,// в селе́ниих пра́ведных упоко́й.

Слава, глас 6:

Нача́ток ми и соста́в зижди́тельное Твое́ бысть повеле́ние:/ восхоте́в бо от неви́димаго же и ви́димаго жи́ва мя соста́вити естества́,/ от земли́ у́бо те́ло созда́л еси́,/ дал же ми еси́ ду́шу/ боже́ственным Твои́м и животворя́щим вдохнове́нием./ Те́мже, Спа́се, рабы́ Твоя́ во стране́ живу́щих// и в селе́ниих пра́ведных упоко́й.

И ныне, Богородичен, глас тойже:

Моли́твами Ро́ждшия Тя́, Христе́,/ и му́ченик Твои́х, апо́стол, проро́к, иера́рхов,/ преподо́бных, и пра́ведных, и все́х святы́х,// усо́пшия рабы́ Твоя́ упоко́й.

Ны́не отпуща́еши: от чтеца глаголемое.

Трисвятое. По Отче наш:

Тропарь, глас 8:

Глубино́ю му́дрости человеколю́бно вся́ стро́яй/ и поле́зное все́м подава́яй,/ Еди́не Соде́телю, упоко́й, Го́споди, ду́ши ра́б Твои́х:/ на Тя́ бо упова́ние возложи́ша,// Творца́ и Зижди́теля и Бо́га на́шего.

Слава, и ныне, Богородичен, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных Спасе́ние.

Ектения сугубая и отпуст.

По отпущении же вечерни, творим в притворе панихиду за усопших.

По шестопсалмии, Аллилу́ия: на глас 8, со стихи его.

Тропарь: Глубино́ю му́дрости: (Дважды.)

Слава, и ныне, Богородичен: Тебе́ и Сте́ну, и Приста́нище:

И обычное стихословие: Рече́ Госпо́дь Го́сподеви моему́:

На всех же ектениях стихословия и канона поминаются вси преждеотшедшии отцы и братия наша.

По первом стихословии глаголем седальны мертвенны и мученичны, глас 6:

Страда́льческая противле́ния в по́двизе, мучи́тельныя ра́ны на му́ченики: и стоя́ху ли́цы безпло́тных, по́чести держа́ще побе́ды; удиви́ша прему́дрии мучи́телей и царе́й, низложи́ша Велиа́ра испове́данием Христо́вым. Укрепи́вый их, Го́споди, сла́ва Тебе́.

Стих: Ди́вен Бог во святы́х Свои́х, Бог Изра́илев.

Страда́льческий по́двиг претерпе́вше святи́и и по́чести побе́ды от Тебе́ прии́мше, упраздни́ша кова́рства беззако́нных, прия́ша венцы́ нетле́ния: те́ми, Бо́же, спаси́ ду́ши на́ша.

Стих: Воззва́ша пра́веднии, и Госпо́дь услы́ша их.

Святы́х Твои́х па́мять, Го́споди, показа́ся я́коже рай, и́же во Еде́ме, в ней бо ра́дуется вся тварь: и пода́ждь нам тех моли́твами мир и ве́лию ми́лость.

Слава, покоин:

В селе́ниих избра́нных и во стране́ живу́щих, я́же прия́л еси́, Иису́се, благоче́стно усо́пшия учини́, я́ко Благоуве́тливый Бог, и испо́лни невече́рняго све́та, и Небе́сныя Твоея́ ра́дости сподо́би.

И ныне, Богородичен:

Благослове́нную нареки́й Твою́ Ма́терь, прише́л еси́ на Стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля А́нгелом: сра́дуйтеся Мне, я́ко обре́теся поги́бшая дра́хма. Вся му́дре устро́ивый Бо́же наш, сла́ва Тебе́.

Посем стихословим за упокой кафисму 17–ю: Блаже́ни непоро́чнии: на две статии.

Припеваем к первой статие: Благослове́н еси́, Го́споди:

По нейже ектения малая.

Ко второй статие припев: Спа́се, спаси́ нас:

По непорочнах тропари мертвеннии, глас 5:

Благослове́н еси́, Го́споди,/ научи́ мя́ оправда́нием Твои́м.

Святы́х лик обре́те исто́чник жи́зни и дверь ра́йскую,/ да обря́щу и аз путь покая́нием,/ поги́бшее овча́ аз есмь,// воззови́ мя, Спа́се, и спаси́ мя.

Благослове́н еси́, Го́споди,/ научи́ мя́ оправда́нием Твои́м.

А́гнца Бо́жия пропове́давше,/ и закла́ни бы́вше, я́коже а́гнцы,/ и к жи́зни нестаре́емей, святи́и,/ и присносу́щней преста́вльшеся,/ Того́ приле́жно, му́ченицы, моли́те// долго́в разреше́ние нам дарова́ти.

Благослове́н еси́, Го́споди,/ научи́ мя́ оправда́нием Твои́м.

В путь у́зкий хо́ждшии приско́рбный,/ вси в житии́ крест, я́ко яре́м, взе́мшии/ и Мне после́довавшии ве́рою,/ прииди́те наслади́теся,/ и́хже угото́вах вам по́честей // и венце́в Небе́сных.

Благослове́н еси́, Го́споди,/ научи́ мя́ оправда́нием Твои́м.

О́браз е́смь неизрече́нныя Твоея́ сла́вы,/ а́ще и я́звы ношу́ прегреше́ний:/ уще́дри Твое́ созда́ние, Влады́ко,/ и очи́сти Твои́м благоутро́бием,/ и возжеле́нное Оте́чество пода́ждь ми́,// рая́ па́ки жи́теля мя́ сотворя́я.

Благослове́н еси́, Го́споди,/ научи́ мя́ оправда́нием Твои́м.

Дре́вле у́бо от не су́щих Созда́вый мя/ и о́бразом Твои́м Боже́ственным Почты́й,/ преступле́нием же за́поведи/ па́ки мя Возврати́вый в зе́млю, от нея́же взят бых:/ на е́же по подо́бию возведи́// дре́внею добро́тою возобрази́тися.

Благослове́н еси́, Го́споди,/ научи́ мя́ оправда́нием Твои́м.

Упоко́й, Бо́же, рабы́ Твоя́/ и учини́ я в раи́,/ иде́же ли́цы святы́х, Го́споди,/ и пра́ведницы сия́ют, я́ко свети́ла,/ усо́пшия рабы́ Твоя́ упоко́й,// презира́я их вся согреше́ния.

Сла́ва Отцу́ и Сы́ну и Свято́му Ду́ху.

Трисия́тельное Еди́наго Божества́ благоче́стно пое́м, вопию́ще:/ Свя́т еси́, О́тче Безнача́льный,/ Собезнача́льный Сы́не и Боже́ственный Душе́,/ просвети́ на́с, ве́рою Тебе́ служа́щих,// и ве́чнаго огня́ исхити́.

И ны́не, и при́сно, и во ве́ки веко́в. Ами́нь.

Ра́дуйся, Чи́стая, Бо́га пло́тию ро́ждшая во спасе́ние всех,/ Е́юже род челове́ческий обре́те спасе́ние,/ Тобо́ю да обря́щем рай,// Богоро́дице Чи́стая, Благослове́нная.

Аллилу́ия, аллилу́ия, аллилу́ия, сла́ва Тебе́, Бо́же. (Трижды.)

Посем ектения о усопших: Па́ки и па́ки: Мы же: Го́споди, поми́луй (40).

И по возгласе седален, глас 5:

Поко́й, Спа́се наш,/ с пра́ведными рабы́ Твоя́/ и сия́ всели́ во дворы́ Твоя́,/ я́коже есть пи́сано:/ презира́я, я́ко Благ, прегреше́ния их/ во́льная и нево́льная// и вся я́же в ве́дении и не в ве́дении, Человеколю́бче.

Слава, и ныне, Богородичен: От Де́вы возсия́вый ми́ру, Христе́ Бо́же,// сы́ны све́та То́ю показа́вый, поми́луй нас.

Псалом 50.

Канон святаго обители, со ирмосом, на 6. И Триоди на 8, творение Студитово, глас 8. В Троичных и Богородичных тропарех краестрочие: Недостойнаго Феодора.

Песнь 1

Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́, Еди́ному Влады́це.

Стих (по обычаю): Поко́й, Го́споди, ду́ши усо́пших раб Твои́х.

Вси помо́лимся Христу́, творя́ще па́мять днесь от ве́ка ме́ртвых, да ве́чнаго огня́ изба́вит я, в ве́ре усо́пшия и наде́жде жи́зни ве́чныя.

Глубино́ю суде́б Твои́х, Христе́, всепрему́дре Ты предопредели́л еси́ коего́ждо кончи́ну жи́зни, преде́л и о́браз. Те́мже, я́же покры́ гроб во вся́кой стране́, на Суде́ спаси́, Всеще́дрый.

Преде́лы жи́зни на́шея Да́вый, те́мже усо́пшия от жите́йския но́щи дне невече́рняго сы́ны покажи́, Го́споди, свяще́нники правосла́вныя, цари́ же и вся ве́рныя лю́ди Твоя́.

Я́же покры́ вода́, и брань пожа́т, трус же я́же объя́т, и уби́йцы уби́ша, и огнь я́же попали́ ве́рныя, Ми́лостиве, в ча́сти учини́ пра́ведных.

Вся презира́яй плотски́я до́лги на́ша, Спа́се наш, во вся́ком во́зрасте всего́ ро́да челове́ча пред суди́щем Твои́м поста́ви неосужде́нны, Тебе́ Созда́телю отвеща́ющия.

Слава, Троичен: Три Еди́наго естества́ пою́ Ли́ца Самоипоста́сная, Нерожде́нна Отца́, Сы́на Ро́ждшагося и Ду́ха Свята́го: Безнача́льное Ца́рство, Власть, Божество́ Еди́но.

И ныне, Богородичен: Вои́стину Ты яви́лася еси́ Не́бо на земли́, бо́льшее вы́шняго Небесе́, Безневе́стная Де́во: из Тебе́ бо возсия́ Со́лнце в ми́ре, влады́чествуяй пра́вдою.

Катавасия: Песнь возсле́м:

Песнь 2

Ирмос: Ви́дите, ви́дите,/ я́ко Аз есмь Бог ваш,/ пре́жде век рожде́нный от Отца́,/ и от Де́вы в после́дняя без му́жа заче́ншийся,/ и разруши́вый грех пра́отца Ада́ма,// я́ко Человеколю́бец.

Ви́дите, ви́дите, я́ко Аз есмь Бог ваш, пра́ведным судо́м водрузи́вый преде́лы жи́зни и в нетле́ние от тли прие́мляй вся усо́пшия в наде́жди ве́чнаго воскресе́ния.

От четы́рех коне́ц, Го́споди, прие́мляй ве́рно усо́пшия в мо́ри, или́ на земли́, или́ в река́х, исто́чницех, или́ езе́рех, или́ в рове́нницех, снедь звере́м бы́вшия, и пти́цам, и гадо́м, вся упоко́й.

В Твое́й дла́ни вся́ческая, Го́споди, предразсуди́л еси́, разре́шшияся в соста́вы четы́ри, в прише́ствии Твое́м собра́в, воскреси́, вся, я́же в неве́дении и ра́зуме, проща́я тех прегреше́ния.

О, стра́шнаго Твоего́ втора́го, Го́споди, прише́ствия! Зане́ я́ко в ви́де мо́лнии на зе́млю прише́д, воздви́гнеши все созда́ние Твое́ суди́тися; в ве́ре Тебе́ тогда́ пожи́вших, сре́тших Тя, с Тобо́ю бы́ти сподо́би.

Слава, Троичен: Пресоверше́нная Еди́нице, Пребоже́ственная, Триипоста́сная, Нерожде́нне О́тче и Сы́не Единоро́дне, Ду́ше от Отца́ исходя́й, Сыно́м же явля́яйся, Существо́ Еди́но и Естество́, Госпо́дство, Ца́рство, спаси́ всех нас.

И ныне, Богородичен: Неизглаго́ланное чу́до Твоего́ Рождества́, Ма́ти Де́во: ка́ко бо и ражда́еши, и чиста́ еси́ в то́мже? Ка́ко Отроча́ ражда́еши, и не ве́си иску́са му́жеска отню́д? Я́коже ве́сть, па́че естества́ от Мене́ новоле́пно Сло́во Бо́жие ро́ждшееся.

Катавасия: Ви́дите, ви́дите, я́ко Аз:

Песнь 3

Ирмос: Утвержде́й руко́ю Твое́ю, Сло́ве Бо́жий, Небеса́,/ просвеще́нием Твоего́ и́стиннаго позна́ния// утверди́ и нас, на Тя наде́ющихся, сердца́.

Преше́дшия жития́ тече́ние, в сла́ве благоче́стной пра́ведным оде́ятися венце́м сподо́би, Бо́же, и ве́чных благ наслади́тися.

Напра́сно восхище́нныя, попаля́емыя от мо́лний, и изме́рзшия мра́зом, и вся́кою ра́ною, упоко́й, Бо́же, егда́ огне́м вся иску́сиши.

Присному́тное жития́ мо́ре преплы́вшия, Христе́, в нетле́нное Твоего́ жития́ сподо́би приста́нище притещи́, правосла́вным житие́м окормле́нныя.

И́хже вся́кое естество́ морски́х, и птиц небе́сных прия́т снеде́ние, Христе́, Твои́ми судьба́ми воскреси́, Бо́же, в после́дний день со сла́вою.

Слава, Троичен: У́мно Боже́ственную Еди́ницу, в три́ Лица́ про́сто, ку́пно е́же пресещи́, совокупля́ю несеко́мая: я́коже бо ско́рость мо́лнии, Трисия́ющая ви́дится во Еди́нстве.

И ныне, Богородичен: Недоуме́нное Твое́ чу́до: без му́жа бо ражда́еши и де́вство Твое́, Чи́стая, соблюда́еши, ро́ждши. Те́мже А́нгел мно́жество и челове́ческий род пое́т Тя во ве́ки.

Катавасия: Утвержде́й руко́ю Твое́ю:

Ектения малая.

Седален, глас 5:

Подобен: Собезнача́льное Сло́во:

Нас ра́ди претерпе́вый Крест и смерть, и умертви́вый а́да, и совоскреси́вый ме́ртвыя, преста́вльшияся от нас, Спа́се, упоко́й, я́ко

Человеколю́бец Бог, и в тре́петное и стра́шное прише́ствие Твое́, Жизнода́вче, я́ко име́яй мно́жество ми́лости, Ца́рствия Твоего́ сподо́би.

Слава, тойже. И ныне, Богородичен:

Ско́рый Твой покро́в, и по́мощь, и ми́лость покажи́ на рабе́х Твои́х, и во́лны, Чи́стая, укроти́ су́етных помышле́ний, и па́дшую ду́шу мою́ возста́ви, Богоро́дице: вем бо, вем, Де́во, я́ко мо́жеши, ели́ка и хо́щеши.

Песнь 4

Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ Хотя́ща воплоти́тися богови́дно усмотри́// и со стра́хом славосло́вяше си́лу Твою́.

Отцы́ и пра́отцы, де́ды и пра́деды, от пе́рвых и да́же до после́дних, во благозако́нии уме́ршия и благове́рии, вся помяни́, Спа́се наш.

В горе́, на пути́, на ме́стех пусты́х житие́ оста́вльшия в ве́ре, мона́хи же и бельцы́, ю́ноши и ста́рцы, со святы́ми, Христе́, всели́.

От печа́ли и ра́дости прише́дшия ненаде́жно, ве́рою а́бие премени́вшия житие́, в благоде́нствии пострада́вшия или́ злоде́нствии, вся упоко́й, Спа́се наш.

Я́же уби́ меч, и конь совосхи́ти, град, снег и ту́ча умно́женная, я́же удави́ пли́нфа, или́ персть посы́па, Христе́ Спа́се наш, упоко́й.

Слава, Троичен: Стра́нно, я́ко Еди́но и Три́, Божество́, все́ по еди́ному Лицу́ неразде́льно: Оте́ц бо, Сын и Дух Святы́й е́сть, покланя́ема я́ко Еди́н Бо́г.

И ныне, Богородичен: Напра́ви нас, Де́во, моли́твами Твои́ми, окормля́ющи обурева́емыя волно́ю греха́, во спаси́тельная приста́нища, Господороди́тельнице, избавля́ющи от вся́ких лю́тых.

Катавасия: Из горы́ приосене́нныя, Сло́ве, проро́к:

Песнь 5

Ирмос: У́тренюет ду́х мо́й к Тебе́, Бо́же,/ зане́ све́т повеле́ния прише́ствия Твоего́:/ и́миже у́бо озари́ у́м на́ш, Влады́ко,// и наста́ви на стезю́ жи́зни.

Коего́ждо па́мять уме́рших благоче́стно от ве́ка днесь творя́ще, Го́споди, приле́жно Ти вопие́м: вся упоко́й со святы́ми Твои́ми.

От вся́каго, я́же прия́л еси́, ро́да и ро́да, в царе́х, в князе́х или́ мона́шествующих правосла́вно, Ще́дре, ве́чнаго изба́ви муче́ния.

Всех, я́же созда́л еси́, поле́зная Ве́дый, и́мже попусти́л еси́, Го́споди, внеза́пными паде́жми ненаде́жно умре́ти, изба́ви му́ки вся́кия, Бо́же наш.

Огня́ приснопаля́щаго, и тьмы несвети́мыя, скре́жета зубна́го, и че́рвия безконе́чно му́чащаго, и вся́каго муче́ния изба́ви, Спа́се наш, вся ве́рно уме́ршия.

Слава, Троичен: Единопресто́льная, Безнача́льная, Триипоста́сная Еди́нице, разделе́нием Еди́нство и вопроти́в Ли́цы естество́ иму́щая, во еди́но нас совокупи́ хоте́ние Твои́х за́поведей.

И ныне, Богородичен: Па́че огнезра́чных Серафи́мов яви́лася еси́, Чи́стая, Честне́йшая, поро́ждши сим непристу́пнаго Иису́са Спа́са, воплоще́нием обожи́вшаго земноро́дных смеше́ние.

Катавасия: У́тренюет дух мой к Тебе́, Бо́же:

Песнь 6

Ирмос: Содержи́ма мя приими́, Человеколю́бче,/ грехи́ мно́гими/ и припа́дающа щедро́там Твои́м,// я́ко проро́ка, Го́споди, и спаси́ мя.

Сме́рти разреши́в боле́зни, пострада́в, Нача́льниче жи́зни, Бо́же наш, усо́пшия от ве́ка рабы́ Твоя́ упоко́й.

Неизглаго́ланными Твои́ми судьба́ми, я́же уби́ша чаро́вная напое́ния, отра́вы, ко́стная удавле́ния, со святы́ми, Го́споди, упоко́й.

Егда́ суди́ти бу́деши вся́ческим, стоя́щим наги́м и открове́нным пред лице́м Твои́м, тогда́, Ще́дре, пощади́ послужи́вшия Ти ве́рно, Бо́же.

После́днею у́бо трубо́ю воструби́вшу Твоему́ Арха́нгелу, в воскресе́ние жи́зни всех, тогда́, Христе́, рабы́ Твоя́ упоко́й.

От ве́ка я́же прия́л еси́ ве́рныя, Бо́же, род вся́кий челове́ческий, сподо́би во ве́ки со служа́щими Ти сла́вити Тя.

Слава, Троичен: Богонача́лие Трисвято́е, Единопресто́льное, О́тче, Сы́не со Святы́м Ду́хом, Ты еси́ Бог мой, вседержи́тельством Твои́м содержа́й все.

И ныне, Богородичен: От ко́рене твоего́ возсия́ Цвет жи́зни, Иессе́е пра́отче, взыгра́й: Спаса́яй мир, от Чи́стыя Отрокови́цы Христо́с Бо́г.

Катавасия: Содержи́ма мя приими́, Человеколю́бче:

Ектения малая.

Кондак, глас 8:

Со святы́ми упоко́й,/ Христе́, ду́ши раб Твои́х,/ иде́же несть боле́знь, ни печа́ль, ни воздыха́ние,// но жизнь безконе́чная.

Икос:

Сам Еди́н еси́ Безсме́ртный,/ Сотвори́вый и Созда́вый челове́ка:/ земни́и у́бо от земли́ созда́хомся,/ и в зе́млю ту́южде по́йдем,/ я́коже повеле́л еси́,/ Созда́вый мя и Реки́й ми:/ я́ко земля́ еси́ и в зе́млю оты́деши:/ а́може вси челове́цы по́йдем,/ надгро́бное рыда́ние творя́ще песнь:// Аллилу́ия.

Песнь 7

Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки,// Го́споди, Бо́же оте́ц на́ших.

Благоче́стно от ве́ка преста́вльшихся па́мять творя́ще, вопие́м: благослове́н еси́ во ве́ки, Го́споди, Бо́же оте́ц на́ших.

Внеза́пу благоче́стно уме́ршия и от стремни́ны вся́кия па́дшия, дре́ва, желе́за, вся́каго ка́мене, упоко́й, Бо́же, усо́пшия ве́рныя.

В стра́шное Твое́ прише́ствие, Ще́дре, одесну́ю ове́ц Твои́х поста́ви, правосла́вно Ти в житии́ послужи́вшия, Христе́, и преста́вльшияся к Тебе́.

В ли́це, Христе́, избра́нных Твои́х вчини́ Твоя́ рабы́, вопи́ти Тебе́: благослове́н еси́ во ве́ки, Го́споди, Бо́же оте́ц на́ших.

От земли́ персть соде́тельствовавый, плоть ду́хом оживотвори́вый, Спа́се Ще́дрый, я́же прия́л еси́, упоко́й, Бо́же, в нестаре́ющем животе́.

Слава, Троичен: Я́коже треми́ со́лнцы Божество́, еди́ным све́та срастворе́нием да воспое́тся Оте́ц и Сын и Боже́ственный Дух, Еди́н естество́м, но Три Ипоста́сьми.

И ныне, Богородичен: Дави́дское согла́сно воспева́ем Ти пе́ние, го́ру Тя Бо́жию нарица́юще, Де́во, в Не́йже всели́вся Пло́тию, Сло́во обоготвори́ нас духо́вно в Себе́.

Катавасия: В нача́ле зе́млю основа́вый:

Песнь 8

Ирмос: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго/ Го́спода по́йте// и превозноси́те во вся ве́ки.

Сокруши́вый пе́рвее се́нь сме́ртную, возсия́в, я́ко со́лнце, из гро́ба, сы́ны Воскресе́ния Твоего́ сотвори́, Го́споди сла́вы, вся́ уме́ршия в ве́ре, во ве́ки.

Безве́стных и сокрове́нных Све́детелю, егда́ и́маши откры́ти дела́ тьмы и сове́ты серде́ц на́ших, тогда́ не истяжи́ сло́ва со все́ми ве́рою усо́пшими.

Егда́ и́маши се́сти на Престо́ле и повели́ши на Суд предста́ти собра́нным трубо́ю от коне́ц земли́: тогда́ пощади́ всех, Христе́, я́ко Ми́лостивый.

Уме́ршим напра́сно от слу́чаев, от кли́ча же зе́льнаго и ско́раго тече́ния, зауше́ния, удавле́ния же и ляга́ния, Го́споди сла́вы, ве́рою усо́пшим осла́би во ве́ки.

Благослови́м Отца́ и Сы́на и Свята́го Ду́ха, Го́спода.

Троичен: Я́ко Еди́ницу существо́м пою́ Тя, я́ко Тро́ицу Ли́цы Тя чту, О́тче и Сы́не и Ду́ше Пресвяты́й, безнача́льную держа́ву Твоего́ Ца́рствия сла́влю во ве́ки.

И ныне, Богородичен: Струи́ живы́я исто́чник запеча́танный показа́лася еси́, Богоро́дице Де́во: без му́жа бо Го́спода ро́ждши, безсме́ртия ве́рныя напая́еши водо́ю во ве́ки.

Хва́лим, благослови́м:

Ирмос: На горе́ святе́й просла́вльшася:

Поем: Честне́йшую:

Песнь 9

Ирмос: Проявле́нное на горе́ законополо́жнику во огни́ и купине́/ Рождество́ Присноде́вы,/ в на́ше, ве́рных, спасе́ние,// пе́сньми немо́лчными велича́ем.

Иде́же есть веселя́щихся жили́ще святы́х Твои́х, Го́споди, вся от ве́ка усо́пшия, в ве́ре же и наде́жди ра́доватися сподо́би.

Уме́ршия Бо́жиим преще́нием, сме́ртных громо́в вся́ких, с небесе́ изнесе́нных, земли́ разсе́дшейся, мо́рю возшуме́вшуся, вся ве́рныя, Христе́, упоко́й.

Вся́кий во́зраст, ста́рцы, и ю́ныя младе́нцы, и де́ти, и ссу́щия млеко́, му́жеское естество́ и же́нское, упоко́й, Бо́же, я́же прия́л еси́ ве́рныя.

От ядови́тых угрызе́ний уме́ршия, от поглоще́ния змие́в, от попра́ния ко́ней, и от удавле́ния и обе́шения от и́скренняго, ве́рою Ти послужи́вшия упоко́й.

Коего́ждо по и́мени в ве́ре уме́ршия от ве́ка, и от ро́да родо́в, неосужде́нно предста́ти Тебе́, Христе́, тогда́ в прише́ствии Твое́м сподо́би.

Слава, Троичен: Еди́ный в Тро́ице Бо́же, сла́ва Тебе́ непреста́нно: а́ще бо и Бог Ки́йждо, но Еди́н естество́м есть, Оте́ц и Сын и Дух, трисве́тлыми сво́йствы.

И ныне, Богородичен: Па́че ума́ Рождество́ Твое́: ражда́еши бо пре́жде Су́щаго, и млеко́м пита́еши несказа́нно Пищеда́вца ми́ру, держи́ши же содержа́щаго вся, Христа́, Еди́наго Изба́вителя на́шего, Всенепоро́чная.

Катавасия: Проявле́нное на горе́:

Таже: Досто́йно есть:

Ектения малая.

Ексапостиларий.

Подобен: Не́бо звезда́ми:

Па́мять соверша́юще всех усо́пших во Христе́, и коне́чный день воспомя́нем, ве́рнии, о нас же и о о́ных Христа́ при́сно моля́ще.

Слава, и ныне, Богородичен:

Сла́досте А́нгелов, скорбя́щих Ра́досте, христиа́н Предста́тельнице, Де́во, Ма́ти Госпо́дня, заступи́ нас и изба́ви ве́чных мук.

На хвалитех: Вся́кое дыха́ние: во глас 6, поставим стихи 4, и поем настоящия стихиры.

Подобен: Отча́янная:

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Стра́шный коне́ц сме́рти/ и гро́зный Суд Влады́ки:/ огнь бо неугаси́мый угото́вися та́мо,/ червь неусыпа́емый му́чай и скре́жет зубо́в,/ тьма кроме́шная есть/ и ве́чное осужде́ние./ Те́мже зове́м ко Спа́су:/ я́же избра́л еси́ от привре́менных, упоко́й,// за ве́лию Твою́ ми́лость.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Вси в житии́ оста́вльшиися,/ прииди́те, во гробе́х ужаса́ющеся,/ прини́кните и ви́дите ми́ра пре́лесть:/ где ны́не те́ла добро́та и сла́ва бога́тства?/ Где же го́рдость жития́?/ Вои́стину су́етная вся./ Те́мже зове́м ко Спа́су:/ я́же избра́л еси́ от привре́менных, упоко́й,// за ве́лию Твою́ ми́лость.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ны́не во гроб, и́же на престо́ле,/ ны́не и́же в порфи́ре во тлю облече́ся:/ не ктому́ бо на престо́ле, но во гро́бе лежи́т:/ се исчезе́ ца́рская держа́ва./ Се я́ко со́ние челове́ческое прехо́дит житие́./ Те́мже зове́м ко Спа́су:/ я́же избра́л еси́, упоко́й,// за ве́лию Твою́ ми́лость.

Стих: Хвали́те Его́ в кимва́лех доброгла́сных, хвали́те Его́в кимва́лех восклица́ния./ Вся́кое дыха́ние да хва́лит Го́спода.

Вся отсе́ле преложи́вшияся/ в наде́жду жи́зни ве́чныя/ и житие́ измени́вшия вся́ким, Спа́се, о́бразом,/ вся́кий чин, и род, и вся́кий во́зраст,/ му́жи вку́пе и жены́,/ и новорожде́нныя младе́нцы,/ я́ко Человеколю́бец, в не́дрех учини́ Авраа́млих/ и в ме́стех осла́бы,// за ве́лию Твою́ ми́лость.

Слава, глас 2:

Я́ко цвет, увяда́ет/ и, я́ко сень, мимогряде́т,/ разруша́ется всяк челове́к:/ па́ки же, глася́щей трубе́,/ ме́ртвии, я́ко в тру́се, вси воста́нут/ ко Твоему́ сре́тению, Христе́ Бо́же./ Тогда́, Влады́ко, и́хже преста́вил еси́ от нас,/ во святы́х Твои́х учини́ кро́вех,// согреше́ния их, Благосе́рде, презира́я.

И ныне, Богородичен, глас 6:

Ты еси́ Бог наш,/ И́же Прему́дростию соде́лавый вся,/ И́же и проро́ки посла́вый нам/ проро́чествовати Твое́ прише́ствие/ и апо́столы пропове́дати Твоя́ вели́чия;/ и о́ви у́бо проро́чествоваху прише́ствие Твое́,/ о́ви же креще́нием просвети́ша язы́ки,/ му́ченицы же, пострада́вше, получи́ша сла́ву от сих/ и мо́лятся приле́жно Тебе́, Влады́це,/ с Ро́ждшею Тя Ма́терию:/ упоко́й, Бо́же, ду́ши, я́же прия́л еси́,/ и нас сподо́би Ца́рствия Твоего́,/ Крест претерпе́вый мене́ ра́ди, осужде́ннаго,// Изба́вителю мой и Бо́же.

И абие чтец: Сла́ва Тебе́, показа́вшему нам свет. И чтем славословие вседневное.

Ектения просительная: Испо́лним у́треннюю моли́тву на́шу:

На стиховне стихиры, глас 6.

Подобен: Всю отложи́вше:

Име́яй непости́жное к нам благоутро́бие/ и исто́чник неистоща́емый/ боже́ственныя бла́гости, Многоми́лостиве,/ к Тебе́, Влады́ко, преше́дшия/ в земли́ живы́х всели́,/ в селе́ниих возлю́бленных и вожделе́нных,/ одержа́ние да́руй вы́ну пребыва́ющее:/ Ты бо за всех пролия́л еси́ Кровь Твою́, Христе́,// и живоно́сною цено́ю мир искупи́л еси́.

Стих: Ду́ши их/ во благи́х водворя́тся.

Умерщвле́ние претерпе́л еси́ животво́рное во́лею,/ и жи́знь источи́л еси́,/ и сла́дость присносу́щную ве́рным дал еси́/ боже́ственным, Влады́ко, благоутро́бием,/ Еди́не Всеще́дре, Безгре́шне;/ в ню́же, мо́лимся, счини́ усо́пшия в наде́жди воскресе́ния,/ разреше́ние прегреше́ний Да́руяй:/ да все́ми пое́тся и́мя Твое́, Христе́,// и спасе́ни сла́вим человеколю́бие Твое́.

Стих: Блаже́ни, я́же избра́л/ и прия́л еси́, Го́споди.

Живы́ми госпо́дствующа богонача́льною вла́стию/ и ме́ртвыми влады́чествующа/ Тебе́, Христе́, ве́дуще, мо́лим:/ ве́рныя рабы́ Твоя́,/ к Тебе́, Еди́ному Благоде́телю, отше́дшия,/ Сам упоко́й со избра́нными Твои́ми, Человеколю́бче,/ в ме́стех прохлажде́ния,/ во святы́х све́тлостех:/ Воли́тель бо ми́лости еси́/ и спаса́еши, я́ко Бог,/ я́же по о́бразу Твоему́ созда́л еси́,// Еди́не Многоми́лостиве.

Слава, глас тойже:

Боле́знь Ада́му бы́сть дре́ва вкуше́нием/ дре́вле во Еде́ме,/ егда́ зми́й я́д изблева́./ Того́ бо ра́ди вни́де сме́рть всеро́дная,/ снеда́ющая челове́ка;/ но прише́д, Влады́ка низложи́ зми́я/ и воскресе́ние на́м дарова́./ К Нему́же у́бо возопии́м:/ пощади́, Спа́се, и́хже прия́л еси́,// и со святы́ми поко́й, я́ко Человеколю́бец.

И ныне, Богородичен, глас тойже:

Яви́лася еси́ пребыва́ние боголе́пное, Пресвята́я,/ и Бо́га вмести́ла еси́,/ и Бо́га родила́ еси́, Неискусобра́чная,/ во двою́ существу́,/ во еди́ной же Ипоста́си, Чи́стая./ Того́ моли́, Единоро́днаго и Перворожде́ннаго,/ Тя́, Де́во, непоро́чну и по Рождестве́ Сохра́ншаго,/ души́ упоко́ити ве́рою усо́пшия// во све́те нетле́нныя све́тлости и блаже́нстве.

Бла́го есть: Трисвятое. По Отче наш:

Тропарь, глас 8:

Глубино́ю му́дрости человеколю́бно вся́ стро́яй/ и поле́зное все́м подава́яй,/ Еди́не Соде́телю, упоко́й, Го́споди, ду́ши ра́б Твои́х:/ на Тя́ бо упова́ние возложи́ша,// Творца́ и Зижди́теля и Бо́га на́шего.

Слава, и ныне, Богородичен, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных Спасе́ние.

Ектения сугубая.

Посем: Прему́дрость: Сый благослове́н: Присовокупляем же и первый час.

И отпуст.

На часех тропарь и кондак за упокой.

Антифоны изобразительны.

Блаженны от канона Триоди, песнь 3–я и 6–я.

Блаже́ни ми́лостивии,/ я́ко ти́и поми́ловани бу́дут.

Преше́дшия жития́ тече́ние,/ в сла́ве благоче́стной/ пра́ведным оде́ятися венце́м сподо́би, Бо́же,/ и ве́чных благ наслади́тися.

Блаже́ни чи́стии се́рдцем,/ я́ко ти́и Бо́га у́зрят.

Напра́сно восхище́нныя,/ попаля́емыя от мо́лний, и изме́рзшия мра́зом, и вся́кою ра́ною,/ упоко́й, Бо́же,/ егда́ огне́м вся иску́сиши.

Блаже́ни миротво́рцы,/ я́ко ти́и сы́нове Бо́жии нареку́тся.

Присному́тное жития́ мо́ре преплы́вшия, Христе́,/ в нетле́нное Твоего́ жития́/ сподо́би приста́нище притещи́,/ правосла́вным житие́м окормле́нныя.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

И́хже вся́кое естество́ морски́х,/ и птиц небе́сных прия́т снеде́ние, Христе́,/ Твои́ми судьба́ми воскреси́, Бо́же,/ в после́дний день со сла́вою.

Блаже́ни есте́, егда́ поно́сят вам, и изжену́т,/ и реку́т всяк зол глаго́л на вы, лжу́ще, Мене́ ра́ди.

После́днею у́бо трубо́ю воструби́вшу/ Твоему́ Арха́нгелу,/ в воскресе́ние жи́зни всех,/ тогда́, Христе́, рабы́ Твоя́ упоко́й.

Ра́дуйтеся и весели́теся,/ я́ко мзда ва́ша мно́га на Небесе́х.

От ве́ка я́же прия́л еси́ ве́рныя, Бо́же,/ род вся́кий челове́ческий,/ сподо́би во ве́ки/ со служа́щими Ти сла́вити Тя.

Слава:

Богонача́лие Трисвято́е, Единопресто́льное,/ О́тче, Сы́не со Святы́м Ду́хом,/ Ты еси́ Бог мой,/ вседержи́тельством Твои́м содержа́й все.

И ныне:

От ко́рене твоего́/ возсия́ Цвет жи́зни,/ Иессе́е пра́отче, взыгра́й:/ Спаса́яй мир, от Чи́стыя Отрокови́цы Христо́с Бо́г.

На входе:

Прииди́те, поклони́мся: Спаси́ ны, Сы́не Бо́жий, во святы́х Ди́вен сый, пою́щия Ти: Аллилу́ия.

Тропарь, глас 8:

Глубино́ю му́дрости человеколю́бно вся стро́яй/ и поле́зное всем подава́яй,/ Еди́не Соде́телю, упоко́й, Го́споди, ду́ши раб Твои́х:/ на Тя бо упова́ние возложи́ша,// Творца́ и Зижди́теля и Бо́га на́шего.

Слава, кондак, глас 8:

Со святы́ми упоко́й,/ Христе́, ду́ши раб Твои́х,/ иде́же несть боле́знь, ни печа́ль, ни воздыха́ние,// но жизнь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных Спасе́ние.

Трисвятое.

Прокимен, глас 6:

Ду́ши их/ во благи́х водворя́тся.

Стих: К Тебе́, Го́споди, воздвиго́х ду́шу мою́:

Апостол в Деяниих, зачало 51. И мертвенный Апостол, зачало 163: Бра́тие, пе́рвый челове́к:

Аллилуия, глас 4: Блаже́ни, я́же избра́л и прия́л еси́, Го́споди.

Стих: И па́мять их в род и род.

Евангелие от Иоанна, зачало 67. И другое, за упокой, зачало 21.

И по чину Божественная Литургия Иоанна Златоустаго. Поем: Досто́йно есть:

Причастный стих: Блаже́ни, я́же избра́л, и прия́л еси́, Го́споди, и па́мять их в род и род. Аллилу́ия. (Трижды.)

По возгласе: Спаси́, Бо́же, лю́ди Твоя́: вместо: Ви́дехом: поем тропарь за упокой: Глубино́ю му́дрости:

По скончании Литургии по обычаю совершаем панихиду, на нейже поминаем всех от века усопших православных христиан.