Понедельник первой седмицы

Нача́ло ст҃а́гѡ и҆ вели́кагѡ поста̀.

Въ понедѣ́льникъ пе́рвыѧ седми́цы.

Зна́менаетъ параекклисїа́рхъ къ свѣ́тꙋ ко́снѣе ра́ди вече́рнѧгѡ ᲂу҆тѣше́нїѧ, и҆ собира́емсѧ всѝ по ѡ҆бы́чаю въ цр҃ковь. Пое́мъ полꙋ́нощницꙋ без̾ покло́нѡвъ, то́кмѡ въ коне́цъ трѝ покло́ны вели̑кїѧ, съ мл҃твою, Гдⷭ҇и и҆ влⷣко: Сїе́ же быва́етъ въ а҃-й де́нь то́кмѡ. Въ про́чыѧ же дни̑ ст҃а́гѡ и҆ вели́кагѡ поста̀ пое́мъ полꙋ́нощницꙋ всю̀ съ покло́ны ѕ҃і, по ѡ҆бы́чаю.

Та́же воста́въ і҆ере́й твори́тъ ѡ҆бы́чное мета́нїе настоѧ́телю, и҆ вхо́дитъ во ст҃ы́й ѻ҆лта́рь, и҆ прїе́мъ кади́льницꙋ, стано́витсѧ пред̾ ст҃о́ю трапе́зою, и҆ кадѧ̀ крⷭ҇тоѡбра́знѡ, возглаша́етъ: Бл҃гослове́нъ бг҃ъ на́шъ: И҆ на́мъ ѿвѣща́вшымъ: А҆ми́нь, и҆схо́дитъ і҆ере́й и҆ кади́тъ. А҆ ᲂу҆ста́вленный ѱалмопѣ́вецъ глаго́летъ: Трист҃о́е, всегда̀ кромѣ̀ мета́нїй: По Ѻ҆́ч҃е на́шъ, возглаша́етъ і҆ере́й: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ, Гдⷭ҇и, поми́лꙋй, в҃і. Прїиди́те, поклони́мсѧ: три́жды, без̾ мета́нїй. И҆ ѱало́мъ ѳ҃і и҆ к҃: по концѣ̀ и҆́хъ, трист҃о́е, без̾ мета́нїй. По Ѻ҆́ч҃е на́шъ: Тропарѝ ѡ҆бы̑чныѧ. Си̑мъ глаго́лємымъ, кади́тъ і҆ере́й ст҃ы́й ѻ҆лта́рь и҆ всю̀ цр҃ковь. Та́же є҆ктенїа̀: Поми́лꙋй на́съ, бж҃е: Та́же, Ѡ҆ блг҃очести́вѣйшемъ: И҆ Ѡ҆ ст҃ѣ́йшемъ прави́тельствꙋющемъ сѷно́дѣ: [И҆лѝ Ѡ҆ вели́комъ гдⷭ҇и́нѣ и҆ ѻ҆тцѣ̀ на́шемъ, ст҃ѣ́йшемъ патрїа́рсѣ:] Возгла́съ: Ꙗ҆́кѡ млⷭ҇тивъ и҆ чл҃вѣколю́бецъ: Чте́цъ: А҆ми́нь. И҆ глаго́летъ: И҆́менемъ гдⷭ҇нимъ бл҃гословѝ, ѻ҆́тче. И҆ а҆́бїе і҆ере́й: Сла́ва ст҃ѣ́й, и҆ є҆диносꙋ́щнѣй: И҆ прѡ́чаѧ.

Бра́тъ же, є҆гѡ́же є҆́сть де́нь, ста́въ на ᲂу҆чине́ннѣмъ мѣ́стѣ, глаго́летъ шестоѱа́лмїе со всѧ́кимъ внима́нїемъ, не борзѧ́сѧ, но со стра́хомъ бж҃їимъ, ꙗ҆́кѡ къ самомꙋ̀ бг҃ꙋ бесѣ́дꙋѧ неви́димѡ.

И҆ не и҆́мать кто̀ вла́сти шєпты̀ твори́ти, нижѐ плю́нꙋти, и҆лѝ хра́кнꙋти: но па́че внима́ти ѿ ѱало́мника глаго́лємымъ, рꙋ́цѣ и҆мꙋ́ще согбє́ны къ пе́рсемъ, главы̑ же преклонє́ны, и҆ ѻ҆́чи и҆мꙋ́ще до́лꙋ, серде́чныма ѻ҆чи́ма зрѧ́ще къ восто́кѡмъ, да мо́лимсѧ ѡ҆ грѣсѣ́хъ на́шихъ, помина́юще сме́рть и҆ бꙋ́дꙋщꙋю мꙋ́кꙋ, и҆ жи́знь вѣ́чнꙋю.

Въ нача́ло же р҃в-гѡ ѱалма̀, глаго́летъ і҆ере́й ᲂу҆́трєннїѧ мл҃твы. По сконча́нїи же ѱалмѡ́въ, Сла́ва, и҆ ны́нѣ, а҆ллилꙋ́їа, три́жды. Та́же, є҆ктенїа̀ вели́каѧ, и҆ возгла́съ. Пое́тъ же ᲂу҆чине́нный мона́хъ а҆ллилꙋ́їа, во гла́съ прилꙋчи́вшагѡсѧ во ѻ҆ктѡ́ихѣ гла́са. Сті́хъ а҃: Ѿ но́щи ᲂу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ повелѣ̑нїѧ твоѧ̑. Сті́хъ в҃: Пра́вдѣ наꙋчи́тесѧ, живꙋ́щїи на землѝ. Сті́хъ г҃: За́висть прїи́метъ лю́ди ненака̑занныѧ. Сті́хъ д҃: Приложѝ и҆̀мъ ѕла̀, гдⷭ҇и, приложѝ ѕла̀ сла̑внымъ землѝ. И҆ по ко́емждо стїхѣ̀, а҆ллилꙋ́їа три́жды. Та́же трⷪ҇чны гла́са. Пое́мъ же со ᲂу҆миле́нїемъ велегла́снѡ и҆ ко́снѡ, съ пѣ́нїемъ. На в҃-мъ стїхѣ̀, Сла́ва: А҆ на тре́тїемъ, И҆ ны́нѣ:

Та́же стїхосло́вимъ є҆ди́нꙋ каѳі́смꙋ ѱалти́ри. По а҆нтїфѡ́нѣ же, на а҆ллилꙋ́їа твори́мъ покло́ны трѝ, всѝ ра́внѡ, послѣ́дꙋюще и҆гꙋ́менꙋ, и҆лѝ є҆кклисїа́рхꙋ. По пе́рвѣй каѳі́смѣ сѣда́льны ᲂу҆мили́тєльныѧ ѻ҆смогла́сника.

[Зрѝ] Та́же чте́нїе во ст҃ѣ́мъ є҆фре́мѣ, занѐ ѿ тогѡ̀ днѐ начина́етсѧ ст҃ы́й є҆фре́мъ, и҆ чте́тсѧ до пѧтка̀ цвѣтоно́сныѧ седми́цы.

По в҃-мъ стїхосло́вїи сѣда́ленъ трїѡ́ди господи́на і҆ѡ́сифа.

Гла́съ в҃.

Подо́бенъ: Милосе́рдїѧ сꙋ́щи:

Въ бж҃е́ственный поста̀ нача́токъ ᲂу҆миле́нїе дꙋшѝ стѧ́жимъ, вопїю́ще: влⷣко хрⷭ҇тѐ, мл҃твꙋ на́шꙋ прїимѝ, ꙗ҆́кѡ и҆збра́нное кади́ло, и҆ и҆зба́ви на́съ, мо́лимсѧ, ѿ ѕлосмра́днагѡ тлѣ́нїѧ и҆ ѿ мꙋ́ки стра́шныѧ, є҆ди́нъ сы́й бл҃гоꙋвѣ́тливый.

Сла́ва, то́йже. И҆ ны́нѣ, бг҃оро́диченъ. Подо́бенъ:

Милосе́рдїѧ сꙋ́щи и҆сто́чникъ, млⷭ҇ти сподо́би на́съ, бцⷣе: при́зри на лю́ди согрѣши́вшыѧ, ꙗ҆вѝ ꙗ҆́кѡ при́снѡ си́лꙋ твою̀. на тѧ́ бо ᲂу҆пова́юще, ра́дꙋйсѧ вопїе́мъ тѝ, ꙗ҆́коже нѣ́когда гаврїи́лъ, безпло́тныхъ а҆рхїстрати́гъ.

И҆ па́ки чте́нїе во ст҃ѣ́мъ є҆фре́мѣ.

По г҃-мъ стїхосло́вїи сѣда́ленъ господи́на ѳео́дѡра. Гла́съ в҃.

Подо́бенъ: Пречⷭ҇томꙋ ѡ҆́бразꙋ твоемꙋ̀:

Всечестно́е воздержа́нїе начне́мъ свѣ́тлѡ, лꙋча́ми сїѧ́юще ст҃ы́хъ за́повѣдей хрⷭ҇та̀ бг҃а на́шегѡ, любвѐ свѣ́тлостїю, мл҃твы блиста́нїемъ, непоро́чности чистото́ю, бл҃гомꙋ́жества крѣ́постїю: ꙗ҆́кѡ да свѣтоно́сни дости́гнемъ ст҃а́гѡ и҆ тридне́внагѡ воскрⷭ҇нїѧ, просїѧва́ющагѡ нетлѣ́нїе мі́рꙋ.

Сла́ва, то́йже. И҆ ны́нѣ, бг҃оро́диченъ. Подо́бенъ:

Неѡбори́мꙋю мл҃твꙋ твою̀ стѧжа́въ въ лю́тыхъ, ѽ мт҃и бж҃їѧ, свобожда́юсѧ па́че наде́жды чꙋ́днѡ ѿ ѡ҆скорблѧ́ющихъ мѧ̀: предварѧ́еши бо всегда̀ просѧ́щымъ тѧ̀ вѣ́рнѡ, мра́къ мно́гихъ прегрѣше́нїй ѿгонѧ́ющи. тѣ́мже бл҃года́рнѡ вопїе́мъ тѝ: прїимѝ, влⷣчце, кра̑ткаѧ бл҃года́рєнїѧ, вмѣ́стѡ си́хъ бꙋ́ди мѝ во всѣ́хъ по́мощь.

Та́же чте́нїе въ лаѵсаі́цѣ. ѱало́мъ н҃. И҆ ѡ҆бы́чнаѧ мл҃тва: Сп҃сѝ, бж҃е, лю́ди твоѧ̑: Та́же возгла́съ.

Посе́мъ начина́емъ: Гдⷭ҇ви пое́мъ: на гла́съ канѡ́на мине́и днѐ ст҃а́гѡ. И҆ глаго́лютъ стїхѝ пѣ́сней ско́рѡ, кі́йждо ли́къ сво́й сті́хъ: до́ндеже дости́гнꙋтъ до: Ѡ҆гꙋстѣ́ша: и҆ ѿ тогѡ̀ начина́ютъ стїхѝ держа́ти на д҃і. И҆ пое́мъ мине́и со і҆рмосо́мъ на ѕ҃, пое́мъ же си́це: Пе́рвый ли́къ глаго́летъ сті́хъ: Ѡ҆гꙋстѣ́ша: и҆ пое́тъ і҆рмо́съ. Вторы́й же ли́къ глаго́летъ в҃-й сті́хъ: Речѐ вра́гъ: И҆ по не́мъ тропа́рь канѡ́на. И҆ по рѧ́дꙋ стїхѝ по ликѡ́мъ до: Тогда̀ потща́шасѧ: ѿ стїха́ же: Тогда̀ потща́шасѧ: начина́емъ трипѣ́снецъ господи́на і҆ѡ́сифа на д҃. на Гдⷭ҇ь же ца́рствꙋѧй: пое́мъ дрꙋгі́й трипѣ́снецъ, господи́на ѳео́дѡра стꙋді́та: и҆ пое́тъ а҃-й ли́къ тропа́рь: в҃-й же ли́къ в҃-й сті́хъ, и҆ тропа́рь. Посе́мъ соедини́вшымсѧ двꙋ́мъ ликѡ́мъ, пою́тъ, Сла́ва, трⷪ҇ченъ, вы́шшимъ гла́сомъ: И҆ ны́нѣ, бг҃оро́диченъ. Та́же глаго́лемъ высоча́йшимъ гла́сомъ: Сла́ва тебѣ̀, бж҃е на́шъ, сла́ва тебѣ̀. И҆ пое́мъ и҆́ный тропа́рь господи́на ѳео́дѡра. Поне́же бо по пѧтѝ тропаре́й и҆́мать пѣ́снь. Послѣди́ же глаго́лемъ катава́сїю, і҆рмо́съ втора́гѡ канѡ́на.

Си́це пою́тсѧ ѻ҆сма́ѧ и҆ девѧ́таѧ пѣ̑сни.

Тре́тїю же пѣ́снь пое́мъ си́це:

Глаго́летъ пе́рвый ли́къ сті́хъ: Гдⷭ҇ь взы́де на нб҃са̀: и҆ тропа́рь канѡ́на мине́и. Вторы́й ли́къ сті́хъ: И҆ да́стъ крѣ́пость царю̀: и҆ вторы́й тропа́рь канѡ́на мине́и. Та́же, Сла́ва, и҆ ны́нѣ, съ тропари̑ канѡ́на. И҆ пое́тъ пе́рвый ли́къ і҆рмо́съ мине́и тре́тїѧ пѣ́сни послѣдѝ канѡ́на.

Си́мъ ѡ҆́бразомъ пое́мъ и҆ ѕ҃-ю пѣ́снь.

Четве́ртꙋю же, и҆ пѧ́тꙋю, и҆ седмꙋ́ю пѣ̑сни си́це пое́мъ:

Глаго́ли пе́рвѣе і҆рмо́съ канѡ́на мине́и, та́же конє́чныѧ два̀ стїха̑ пѣ́сни пое́мъ къ тропарє́мъ канѡ́на: и҆ Сла́ва, и҆ ны́нѣ, і҆рмосо́мъ же не покрыва́емъ пѣ́сни: занѐ і҆рмо́съ глаго́летсѧ пре́жде пѣ́сни. Пою́тсѧ же і҆рмосы̀ мине́и по канѡ́нѣ, то́кмѡ по тре́тїей и҆ шестѣ́й пѣ́снехъ: зане́же ᲂу҆ тѣ́хъ пѣ́сней пе́рвѣе і҆рмо́съ не пое́тсѧ. Въ про́чыѧ же дни̑ седми́цы кромѣ̀ понедѣ́льника, та́кѡ пое́тсѧ и҆ а҃-ѧ пѣ́снь, ꙗ҆́коже ᲂу҆каза́сѧ ѡ҆ д҃-й и҆ є҃-й, пѣ́снехъ. А҆ въ ни́хже пѣ́снехъ бꙋ́детъ трипѣ́снецъ, пое́тсѧ послѣдѝ канѡ́на катава́сїа, і҆рмо́съ трипѣ́снца, ꙗ҆́коже вы́ше и҆з̾ѧви́сѧ.

[Зрѝ] Вѣ́домо же бꙋ́ди: ꙗ҆́кѡ ѻ҆смогла́сникъ не пое́тсѧ во всю̀ свѧтꙋ́ю м҃-цꙋ, кромѣ̀ недѣ́ль.Пое́тсѧ же то́чїю мине́а, и҆ трипѣ́снецъ. А҆ въ ни́хже пѣ́снехъ нѣ́сть трипѣ́снца, пое́тсѧ то́кмѡ мине́а. По г҃-й пѣ́сни глаго́летъ і҆ере́й є҆ктенїю̀ ма́лꙋю. Та́же сѣда́ленъ ст҃а́гѡ, є҆ди́ножды. Сла́ва, и҆ ны́нѣ, бг҃оро́диченъ. И҆ чте́нїе въ лаѵсаі́цѣ. По ѕ҃-й пѣ́сни є҆ктенїа̀ ма́лаѧ. Та́же сѣда́ленъ мч҃нченъ: а҆́ще же и҆́мать ст҃ы́й конда́къ, глаго́лемъ є҆го̀ здѣ̀: мч҃нченъ же глаго́лемъ по а҃-й каѳі́смѣ съ сѣда̑льны, съ припѣ́вомъ: Ди́венъ бг҃ъ во ст҃ы́хъ свои́хъ: И҆ чте́нїе въ сѷнаѯарѣ̀.

Канѡ́нъ, и҆ трипѣ́снецъ господи́на і҆ѡ́сифа. Гла́съ в҃:

Пѣ́снь а҃:

І҆рмо́съ: Грѧди́те, лю́дїе:

Здѣ̀ стїхосло́витсѧ пе́рваѧ пѣ́снь.

Ка́кѡ ны́нѣ ѡ҆ мое́мъ воспла́чꙋ ѿпаде́нїи; ко́е нача́ло сотворю̀ сп҃се́нїѧ моегѡ̀, блꙋ́днѡ пожи́вый; ще́дре, и҆́миже вѣ́си сꙋдьба́ми, сп҃си́ мѧ.

Сѐ вре́мѧ покаѧ́нїѧ, сѐ де́нь сп҃си́тельный, вхо́дъ поста̀: дꙋшѐ, бо́дрствꙋй, и҆ страсте́й вхо́ды затворѝ, ко гдⷭ҇ꙋ взира́ющи.

Грѣхѡ́въ треволне́нїе бꙋрѧ́щеесѧ низвлача́етъ мѧ̀ во глꙋбинꙋ̀ ѿча́ѧнїѧ. но прибѣга́ю къ пꙋчи́нѣ твоеѧ̀ млⷭ҇ти: сп҃си́ мѧ, гдⷭ҇и.

Є҆ди́нъ а҆́зъ грѣхꙋ̀ порабо́тихсѧ, є҆ди́нъ а҆́зъ страсте́мъ двє́ри ѿверзо́хъ: бл҃гоꙋвѣ́тливе сло́ве, ѡ҆брати́ мѧ, сп҃сѝ бл҃госе́рдїемъ твои́мъ.

Бг҃оро́диченъ: И҆сто́чникъ безстра́стїѧ ро́ждшаѧ, ᲂу҆ѧ́звлена мѧ̀ страстьмѝ, ѻ҆трокови́це, и҆сцѣлѝ, и҆ ѻ҆гнѧ̀ вѣ́чнагѡ и҆схитѝ, є҆ди́на бг҃обл҃года́тнаѧ.

И҆́ный трипѣ́снецъ, господи́на ѳео́дѡра, гла́съ и҆ і҆рмо́съ то́йже.

Грѧди́те, лю́дїе, дне́сь воспрїи́мемъ поще́нїй дарова́нїе, ꙗ҆́кѡ бг҃одарова́нное вре́мѧ покаѧ́нїѧ: въ се́мъ сп҃са ᲂу҆ми́лостивимъ.

Приспѣ̀ ны́нѣ, введе́сѧ подвигѡ́въ вре́мѧ, поста̀ по́прище: ᲂу҆се́рднѡ всѝ начне́мъ се́й, добродѣ́тєли гдⷭ҇ви ꙗ҆́кѡ да́ры носѧ́ще.

Сла́ва, трⷪ҇ченъ: Є҆ди́нице про́стаѧ, трисвѣ́тлаѧ, нача́льнѣйшаѧ є҆ди́на, всемо́щнѣйшаѧ, всежи́зненнаѧ, бж҃е и҆ гдⷭ҇и, ѻ҆́ч҃е вседержи́телю, сн҃е и҆ дш҃е, сп҃са́й чтꙋ́щыѧ тѧ̀.

Бг҃оро́диченъ: Бж҃їю ст҃ꙋ́ю го́рꙋ воспои́мъ, мр҃і́ю нескве́рнꙋю, и҆з̾ неѧ́же возсїѧ̀ сꙋ́щымъ во тьмѣ̀ сл҃нце пра́вды хрⷭ҇то́съ, всѣ́хъ жи́знь.

Сла́ва тебѣ̀, бж҃е на́шъ, сла́ва тебѣ̀.

Колесни́ца ѻ҆́гненнаѧ прїѧ́тъ и҆лїю̀ чꙋ́днаго, посто́мъ воѡрꙋже́ннаго: мѡѷсе́а се́й показа̀ зри́телѧ неизрече́нныхъ. и҆ мы̀ се́й прїи́мше, ᲂу҆́зримъ хрⷭ҇та̀.

Сла́ва тебѣ̀, бж҃е на́шъ, сла́ва тебѣ̀.

Бра́шно а҆да́мъ ꙗ҆дѐ, и҆ невоздержа́нїе є҆го̀ из̾ раѧ̀ и҆зри́нꙋ: по́стъ же, на́съ прїе́мъ,достѡ́йны покаѧ́нїѧ да пока́жетъ, гдⷭ҇и чл҃вѣколю́бче.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

По ѕ҃-й пѣ́сни мч҃нченъ гла́са.

Пѣ́снь и҃.

І҆рмо́съ: Въ пе́щь ѻ҆́гненнꙋю:

Ѻ҆гнесожже́на мѧ̀ сластьмѝ, и҆ дꙋшє́вныѧ ѻ҆́чи помрачи́вша, ѻ҆гне́мъ твоегѡ̀ стра́ха ѡ҆бнови́въ,хрⷭ҇тѐ, свѣ́томъ сп҃се́нїѧ ѡ҆зарѝ, да тѧ̀ сла́влю во всѧ̑ вѣ́ки.

Сы́тость возненави́дѣвши страсте́й, смире́ннаѧ дꙋшѐ моѧ̀, напита́йсѧ сла́достною пи́щею до́брыхъ, и҆ ᲂу҆слади́сѧ па́че ѿ поста̀ сла́достїю, го́рести сласте́й ᲂу҆клонѧ́ющисѧ, и҆ поживѝ во вѣ́ки.

Ѡ҆мраче́нъ дꙋше́ю, и҆ пїѧ́нствомъ страсте́й ѡ҆темне́нъ, ника́коже взира́ю къ тебѣ̀ є҆ди́номꙋ бг҃ꙋ. тѣ́мже мѧ̀ ᲂу҆ще́дри и҆ просвѣтѝ, и҆ покаѧ́нїѧ ѿве́рзи мѝ врата̀.

Бг҃оро́диченъ: Ѡ҆небеси́вшаѧ на́ше земно́е и҆ тлѣ́нное сꙋщество̀, чтⷭ҇аѧ, те́плою твое́ю мл҃твою и҆спра́витисѧ на́шымъ мольба́мъ и҆ моле́нїємъ сотворѝ ко твоемꙋ̀ и҆ всѣ́хъ бг҃ꙋ и҆ цр҃ю̀.

И҆́ный.

І҆рмо́съ: Дре́вле ѡ҆роси́вшаго:

Свѣ́тлѡ ᲂу҆срѧ́щимъ поста̀ вхо́дъ, вѣ́рнїи, и҆ да не сѣ́тꙋемъ: но ѡ҆мы́имъ ли́ца на̑ша водо́ю безстра́стїѧ, бл҃гословѧ́ще и҆ превозносѧ́ще хрⷭ҇та̀ во вѣ́ки.

Є҆ле́емъ млⷭ҇ти пома́завше дꙋшѝ главꙋ̀, да не многосло́вимъ, ѻ҆ц҃ꙋ̀ на́шемꙋ, сꙋ́щемꙋ на нб҃сѣ́хъ, мл҃твы возсыла́юще, бл҃гословѧ́ще и҆ превозносѧ́ще є҆го̀ во вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Присносꙋ́щна, безнача́льна ѻ҆ц҃а̀ воспои́мъ, вѣ́рнїи, сн҃а же собезнача́льна и҆ дх҃а сопросїѧ́вша и҆з̾ ѻ҆ц҃а̀, є҆диносꙋ̑щна ли́ца, є҆ди́нагѡ сꙋ̑щаѧ всеси́льнагѡ нача́ла и҆ вла́сти.

Бг҃оро́диченъ: Мр҃і́е бг҃озва́ннаѧ, ѡ҆чисти́лище вои́стиннꙋ вѣ́рныхъ, и҆з̾ тебє̀ бо ѡ҆ставле́нїе подае́тсѧ всѣ̑мъ бога́тнѡ: сн҃а твоего̀ и҆ гдⷭ҇а не преста́й молѧ́щи ѡ҆ пою́щихъ тѧ̀.

Сла́ва тебѣ̀, бж҃е на́шъ, сла́ва тебѣ̀.

Пости́всѧ гдⷭ҇ь четыредесѧ́тнꙋю мѣ́рꙋ дне́й, ны̑нѣшнїѧ ѡ҆ст҃ѝ и҆ ѡ҆чи́сти дни̑. въ нѧ́же дости́гше, бра́тїе, зове́мъ: бл҃гослови́те и҆ превозноси́те хрⷭ҇та̀ во вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: Дре́вле ѡ҆роси́вшаго є҆врє́йскїѧ ѻ҆́троки въ пла́мени, и҆ ѡ҆пали́вшаго халдє́и въ не́мъ, гдⷭ҇а пресла́внѡ воспои́мъ, глаго́люще: бл҃гослови́те и҆ превозноси́те є҆го̀ во вѣ́ки.

И҆ стїхосло́витсѧ Чтⷭ҇нѣ́йшꙋю:

Пѣ́снь ѳ҃.

І҆рмо́съ: Ѿ бг҃а бг҃а сло́ва:

Поста̀ де́нь да бꙋ́детъ тѝ, дꙋшѐ, ѿложе́нїе грѣха̀, и҆ къ бг҃ꙋ стремле́нїе вкꙋ́пѣ, и҆ присвое́нїе: ꙗ҆́кѡ да ᲂу҆бѣжи́ши ѿ про́пасти ѕло́бы, и҆ є҆ди̑ныѧ то́кмѡ пꙋти̑ возлю́биши, ведꙋ́щыѧ ко ѻ҆́номꙋ поко́ю.

И҆ помышле́ньми поползнꙋ́всѧ, и҆ пло́тїю прегрѣши́въ, рыда́ю, и҆ стеню̀, и҆ вопїю̀: сп҃си́ мѧ, гдⷭ҇и, сп҃си́ мѧ, неѕло́биве є҆ди́не, и҆ не ѡ҆сꙋдѝ менѐ во ѻ҆́гнь гее́нны ѻ҆́ныѧ, ѡ҆сꙋжде́нїѧ досто́йнаго.

Во свѣ́тлꙋю ри́зꙋ поста̀ ѡ҆бле́кшесѧ, совлеце́мсѧ те́мныѧ и҆ ѕлотѧ́жкїѧ ѡ҆де́жды пїѧ́нства, и҆ свѣ́тли бы́вше бж҃е́ственными добродѣ́тельми, вѣ́рою ᲂу҆́зримъ свѣтоза̑рнаѧ сп҃сѡва страда̑нїѧ.

Бг҃оро́диченъ: И҆знемо́гшꙋю всѣ́ми прилѡ́ги ѕлѣ́йшыхъ бѣсѡ́въ, ѡ҆каѧ́ннꙋю мою̀ дꙋ́шꙋ и҆сцѣлѝ, пречⷭ҇таѧ влⷣчце, цѣли́телѧ ро́ждшаѧ хрⷭ҇та̀, и҆збавле́нїе на́съ, вѣ́дꙋщихъ тѧ̀ ѻ҆трокови́цꙋ, дв҃ꙋ нетлѣ́ннꙋ.

И҆́ный.

І҆рмо́съ: Преесте́ственнѡ пло́тїю заче́ншꙋю:

Ны́нѣ наста̀ вре́мѧ ст҃а́гѡ поста̀: начне́мъ се́й въ до́брѣмъ жи́тельствѣ: въ сꙋдѣ́хъ бо и҆ ра́спрѧхъ не пости́тесѧ, глаго́летъ.

На горѣ̀ хѡри́вѣ посто́мъ ѡ҆чи́щьсѧ, ви́дѣ бг҃а и҆лїа̀: ѡ҆чи́стимъ и҆ мы̀ посто́мъ се́рдце, и҆ ᲂу҆́зримъ хрⷭ҇та̀.

Сла́ва, трⷪ҇ченъ: Є҆ди́номꙋ є҆стествꙋ̀ покланѧ́юсѧ, трѝ лица̑ пою̀, є҆ди́наго бг҃а всѣ́хъ, ѻ҆ц҃а̀, и҆ сн҃а, и҆ ст҃а́го дх҃а, присносꙋ́щное нача́ло.

Бг҃оро́диченъ: Чтⷭ҇аѧ ѻ҆троча̀ ражда́еши, дв҃а млеко́мъ пита́еши: ка́кѡ вкꙋ́пѣ ѻ҆боѧ̀, дѣ́вствꙋеши ражда́ющи; бг҃ъ є҆́сть содѣ́ѧвый, не взыскꙋ́й ѿ менє̀, ка́кѡ.

Сла́ва тебѣ̀, бж҃е на́шъ, сла́ва тебѣ̀.

Де́нь є҆ди́нъ ᲂу҆́бѡ, речѐсѧ, всѐ житїѐ земноро́дныхъ: трꙋжда́ющымсѧ любо́вїю четы́редесѧть сꙋ́ть дне́й поста̀, ꙗ҆̀же соверши́мъ свѣ́тлѡ.

І҆рмо́съ: Преесте́ственнѡ пло́тїю заче́ншꙋю во чре́вѣ сло́во, ѿ ѻ҆ц҃а̀ безлѣ́тнѡ предвозсїѧ́вшее, въ пѣ́снехъ немо́лчныхъ велича́емъ, вѣ́рнїи.

Та́же, Досто́йно є҆́сть: Покло́нъ є҆ди́нъ. Є҆ктенїа̀: Па́ки и҆ па́ки: И҆ свѣти́ленъ трⷪ҇ченъ гла́са. На Всѧ́кое дыха́нїе, стїхѡ́въ не пое́мъ, но стїхосло́вимъ: Хвали́те гдⷭ҇а съ нб҃съ: Ѡ҆бы̑чныѧ ѱалмы̀, г҃. И҆ а҆́ще прилꙋчи́тсѧ въ мине́и на рѧдꙋ̀ два̀ ст҃ы́хъ: пое́мъ є҆ди́номꙋ ве́черъ стїхи̑ры, а҆ дрꙋго́мꙋ на хвали́техъ стїхи̑ры на д҃, а҆́ще бꙋ́дꙋтъ. А҆́ще же нѝ, глаго́летъ ᲂу҆чине́нный бра́тъ: Тебѣ̀ сла́ва подоба́етъ, гдⷭ҇и бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь. Сла́ва тебѣ̀, показа́вшемꙋ на́мъ свѣ́тъ. Сла́ва въ вы́шнихъ бг҃ꙋ: И҆ прѡ́чаѧ. И҆ твори́мъ мета̑нїѧ г҃, ра́внѡ на мѣ́стѣхъ на́шихъ стоѧ́ще. Посе́мъ і҆ере́й: И҆спо́лнимъ ᲂу҆́треннюю: И҆ возгла́съ.

И҆ совокꙋ́пльшесѧ ѻ҆́ба ли̑ка вкꙋ́пѣ, пое́мъ:

На стїхо́внѣ самогла́сенъ, гла́съ є҃:

Прїи́де по́стъ, ма́ти цѣломꙋ́дрїѧ, ѡ҆бличи́тель грѣхѡ́въ, проповѣ́дникъ покаѧ́нїѧ, жи́тельство а҆́гг҃лѡвъ и҆ сп҃се́нїе человѣ́кѡвъ. вѣ́рнїи возопїи́мъ: бж҃е, поми́лꙋй на́съ.

Сті́хъ: И҆спо́лнихомсѧ заꙋ́тра:

И҆ повторѧ́емъ то́йже.

Та́же сті́хъ: И҆ бꙋ́ди свѣ́тлость:

И҆ мч҃нченъ: Бл҃гослове́но во́инство цр҃ѧ̀ нбⷭ҇нагѡ: а҆́ще бо и҆ земноро́дни бы́ша страстоте́рпцы, но а҆́гг҃льскагѡ са́на потща́шасѧ дости́гнꙋти, ѡ҆ тѣлесѣ́хъ небре́гше, и҆ страда́ньми свои́ми безпло́тныхъ че́сти сподо́бишасѧ. мл҃твами и҆́хъ, гдⷭ҇и, сп҃сѝ дꙋ́шы на́шѧ.

Сла́ва, и҆ ны́нѣ, бг҃оро́диченъ: Тѧ̀ бж҃їю мт҃рь, и҆ дв҃ꙋ чтⷭ҇ꙋю, и҆ херꙋві̑мъ ст҃ѣ́йшꙋю, во гла́сѣхъ пѣ́сней велича́емъ: занѐ дꙋше́ю и҆ тѣ́ломъ бцⷣꙋ и҆сповѣ́дꙋемъ, ꙗ҆́кѡ вои́стиннꙋ ро́ждшꙋю бг҃а воплоще́нна. моли́сѧ, пречⷭ҇таѧ ѡ҆ дꙋша́хъ на́шихъ.

Та́же, Бл҃го є҆́сть: два́жды. Трист҃о́е, и҆ мета̑нїѧ г҃. Прест҃а́ѧ трⷪ҇це: Ѻ҆́ч҃е на́шъ: По внегда́ же рещѝ і҆ере́ю: Ꙗ҆́кѡ твоѐ є҆́сть црⷭ҇тво: глаго́лемъ тропа́рь: Въ хра́мѣ стоѧ́ще сла́вы твоеѧ̀: И҆ глаго́лемъ: Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ: Та́же ѿхо́дитъ сщ҃е́нникъ, и҆ глаго́летъ: Сы́й бл҃гослове́нъ хрⷭ҇то́съ бг҃ъ на́шъ: Нбⷭ҇ный цр҃ю̀: Посе́мъ же стои́мъ, и҆ мо́лимсѧ въ себѣ̀, во свое́мъ помышле́нїи глаго́люще мл҃твꙋ прпⷣбнагѡ ѻ҆тца̀ на́шегѡ є҆фре́ма: Гдⷭ҇и и҆ влⷣко живота̀ моегѡ̀: И҆ покло́ны вели̑кїѧ г҃: и҆ ма́лыхъ в҃і, глаго́люще въ себѣ̀ на є҆ди́нѣмъ ко́емждо: Бж҃е, млⷭ҇тивъ бꙋ́ди мнѣ̀ грѣ́шномꙋ. Та́же па́ки и҆́нъ покло́нъ вели́кїй є҆ди́нъ, глаго́люще и҆ въ не́мъ предпи́саннꙋю мл҃твꙋ всю̀ ст҃а́гѡ є҆фре́ма. И҆ воста́вшымъ на́мъ, начина́етъ предстоѧ́тель: Прїиди́те, поклони́мсѧ: три́жды, и҆ мета̑нїѧ трѝ. И҆ совокꙋплѧ́емъ пе́рвый ча́съ. И҆ сконча́нꙋ тре́тїемꙋ ѱалмꙋ̀, глаго́лемъ а҆ллилꙋ́їа, и҆ мета̑нїѧ трѝ.

Подоба́етъ вѣ́дати, ꙗ҆́кѡ во всѧ̑ понедѣ́льники ст҃ы́ѧ четыредесѧ́тницы на а҃-мъ часѣ̀ каѳі́смы не стїхосло́вимъ: та́кожде и҆ въ пѧто́къ, пе́рвый ча́съ, и҆ девѧ́тый, без̾ каѳі́смы. Въ про́чыѧ же дни̑, стїхосло́вимъ каѳі́смꙋ, и҆ твори́мъ на ко́емждо а҆нтїфѡ́нѣ мета̑нїѧ трѝ.

Та́же пое́тъ ᲂу҆чине́нный чте́цъ, и҆лѝ і҆ере́й, средѝ це́ркве тропа́рь, на гла́съ ѕ҃: Заꙋ́тра ᲂу҆слы́ши гла́съ мо́й: И҆ мы̀ пое́мъ велегла́снѡ то́жде, и҆ твори́мъ колѣноприклоне́нїе на зе́млю. Та́кожде и҆ на про́чыѧ два̀ стїха̑. Сті́хъ а҃: Глаго́лы моѧ̑ внꙋшѝ, гдⷭ҇и, разꙋмѣ́й зва́нїе моѐ. Сті́хъ в҃: Ꙗ҆́кѡ къ тебѣ̀ помолю́сѧ, гдⷭ҇и. И҆ па́ки: Заꙋ́тра ᲂу҆слы́ши гла́съ мо́й: Сла́ва, и҆ ны́нѣ: Что́ тѧ нарече́мъ, ѽ бл҃года́тнаѧ; И҆ мета̑нїѧ г҃. Та́же: Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе. И҆ повторѧ́емъ то́йжде. Та́же: И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑. Па́ки то́йжде. Лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои̑мъ. Па́ки то́йжде. Сїе́ же глаго́лемъ три́жды, велегла́снѡ и҆ ко́снѡ: Да и҆спо́лнѧтсѧ ᲂу҆ста̀ моѧ̑ хвале́нїѧ твоегѡ̀, гдⷭ҇и: Трист҃о́е. И҆ мета̑нїѧ трѝ. Прест҃а́ѧ трⷪ҇це: Ѻ҆́ч҃е на́шъ: Возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ глаго́лемъ тропа́рь. Въ понедѣ́льникъ ᲂу҆́бѡ и҆ во вто́рникъ и҆ четверто́къ, глаго́ли бг҃оро́диченъ: Пресла́внꙋю бж҃їю мт҃рь: Въ сре́дꙋ же и҆ пѧто́къ глаго́ли: Ско́рѡ предварѝ, пре́жде да́же не порабо́тимсѧ: Гдⷭ҇и, поми́лꙋй, м҃. И҆ глаго́лемъ мл҃твꙋ: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆ покло́нъ є҆ди́нъ. И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Бж҃е, ᲂу҆ще́дри ны̀ и҆ бл҃гословѝ ны̀, просвѣтѝ лицѐ твоѐ на ны̀ и҆ поми́лꙋй ны̀. И҆ твори́мъ покло́ны, ꙗ҆́коже предписа́сѧ: и҆ пото́мъ глаго́летъ предстоѧ́тель, и҆лѝ чте́цъ: Трист҃о́е, и҆ мета̑нїѧ трѝ. Ѻ҆́ч҃е на́шъ: Гдⷭ҇и, поми́лꙋй, в҃і. И҆ мл҃твꙋ: Хрⷭ҇тѐ свѣ́те и҆́стинный: І҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀. Мы́ же: Сла́ва, и҆ ны́нѣ: Гдⷭ҇и, поми́лꙋй, три́жды. Бл҃гословѝ. И҆ ѿпꙋ́стъ. Та́же, многолѣ́тное. И҆ цѣлꙋ́емъ ст҃ы̑ѧ і҆кѡ̑ны.

Та́же и҆схо́димъ, лїті́ю творѧ́ще въ притво́рѣ.

И҆ та́мѡ глаго́лютсѧ ѡ҆бы̑чныѧ мл҃твы: и҆ чтꙋ́тсѧ ѡ҆глашє́нїѧ прпⷣбнагѡ ѻ҆тца̀ на́шегѡ ѳео́дѡра стꙋді́та ѿ предстоѧ́телѧ, и҆лѝ ѿ є҆кклисїа́рха, ꙗ҆́кѡ предписа́сѧ, си́рѣчь въ сре́дꙋ и҆ пѧто́къ.

И҆ быва́етъ коне́цъ, и҆ ѿпꙋ́стъ.

Се́й ѡ҆́бразъ быва́етъ во ст҃ꙋ́ю четыредесѧ́тницꙋ, на ᲂу҆́трени и҆ на пе́рвомъ часѣ̀. По ѿпꙋще́нїи же и҆сходѧ́ще и҆з̾ цр҃кве, и҆́демъ со всѧ́кимъ безмо́лвїемъ въ кє́ллїи своѧ̑, и҆лѝ на слꙋ́жбꙋ: и҆ не подоба́етъ на́мъ бесѣ̑ды твори́ти дрꙋ́гъ со дрꙋ́гомъ на монастырѣ̀ въ пꙋтѝ, ᲂу҆держа́но бо бы́сть сїѐ ѿ ст҃ы́хъ ѻ҆тє́цъ.

Ѡ҆ тре́тїемъ же часѣ̀:

Оу҆дарѧ́етъ кандиловжига́тель въ би́ло дово́льнѡ. И҆ собира́емсѧ въ цр҃ковь, творѧ́ще пре́жде нача́ла пѣ́нїѧ кі́йждо на́съ пред̾ ст҃ы́ми две́рьми покло́ны г҃, и҆ цѣлꙋ́емъ ст҃ы̑ѧ і҆кѡ̑ны: и҆ на ѻ҆́ба ли̑ка по є҆ди́номꙋ ма́лꙋ покло́нꙋ. Бл҃гослови́вшꙋ же сщ҃е́нникꙋ, начина́емъ: Цр҃ю̀ нбⷭ҇ный: Трист҃о́е, и҆ мета̑нїѧ г҃. По Ѻ҆́ч҃е на́шъ: І҆ере́й: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ: Гдⷭ҇и, поми́лꙋй, в҃і. Прїиди́те, поклони́мсѧ: три́жды, и҆ мета̑нїѧ г҃. И҆ стїхосло́витсѧ тре́тїй ча́съ, ꙗ҆́коже ѡ҆бы́чай. Въ концѣ́ же тре́тїѧгѡ ѱалма̀ на А҆ллилꙋ́їа мета̑нїѧ трѝ. И҆ стїхосло́вимъ каѳі́смꙋ рѧдовꙋ́ю, на ко́емждо же а҆нтїфѡ́нѣ твори́мъ мета̑нїѧ трѝ. И҆ по каѳі́смѣ чте́цъ, и҆лѝ і҆ере́й, ста́въ средѝ цр҃кве, глаго́летъ тропа́рь, гла́съ ѕ҃: Гдⷭ҇и, и҆́же прест҃а́го твоего̀ дх҃а: И҆ на́мъ противоглаша́ющымъ, твори́мъ колѣноприклоне́нїе до землѝ. Та́кожде и҆ на про́чыѧ два̀ стїха̀. Сті́хъ: Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й. Сті́хъ: Не ѿве́ржи менє̀ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. Сла́ва, и҆ ны́нѣ, бг҃оро́диченъ, и҆ мета̑нїѧ трѝ. Бцⷣе, ты̀ є҆сѝ лоза̀ и҆́стиннаѧ: И҆ а҆́бїе чте́мъ въ лѣ́ствичникѣ. Начина́етъ же ѿны́нѣ ᲂу҆чине́нный мона́хъ возбꙋжда́ти бра́тїю, во всю̀ ст҃ꙋ́ю м҃-цꙋ: ѡ҆бхо́дитъ же ти́хѡ, и҆ призира́етъ на спѧ́щыѧ, и҆ возставлѧ́етъ къ слы́шанїю, по послѣ́довавшемꙋ ѡ҆́бразꙋ. По чте́нїи же, Гдⷭ҇ь бг҃ъ бл҃гослове́нъ: Трист҃о́е, и҆ мета̑нїѧ трѝ. И҆ по Ѻ҆́ч҃е на́шъ: Возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ пое́мъ тропарѝ на гла́съ и҆: Бл҃гослове́нъ є҆сѝ, хрⷭ҇тѐ бж҃е на́шъ: Сла́ва: Ско́рое и҆ тве́рдое да́ждь ᲂу҆тѣше́нїе: И҆ ны́нѣ: Наде́жда и҆ предста́тельство: Гдⷭ҇и, поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче: И҆ сщ҃е́нникъ: Бж҃е, ᲂу҆ще́дри ны̀: Твори́мъ покло́ны, ꙗ҆́коже предписа́сѧ. глаго́летъ предстоѧ́тель мл҃твꙋ: Влⷣко бж҃е, ѻ҆́ч҃е вседержи́телю.

Кандиловжига́тель же, сотвори́въ ѡ҆бы́чный покло́нъ предстоѧ́телю, ѿхо́дитъ и҆ ᲂу҆дарѧ́етъ въ би́ло ше́сть кра́тъ. И҆ по и҆сполне́нїи рече́нныѧ мл҃твы, начина́емъ: Прїиди́те, поклони́мсѧ: три́жды. И҆ мета̑нїѧ трѝ. И҆ стїхосло́вимъ шесты́й ча́съ. И҆ по концѣ̀: Сла́ва, и҆ ны́нѣ: Аллилꙋ́їа, три́жды, и҆ мета̑нїѧ трѝ. И҆ стїхосло́вимъ каѳі́смꙋ, и҆ по ко́емждо а҆нтїфѡ́нѣ, а҆ллилꙋ́їа три́жды: и҆ мета̑нїѧ г҃. По стїхосло́вїи же тропа́рь, гла́съ в҃: И҆́же въ шесты́й де́нь же и҆ ча́съ: Сті́хъ а҃: Внꙋшѝ, бж҃е, мл҃твꙋ мою̀, и҆ не пре́зри моле́нїѧ моегѡ̀. Сті́хъ в҃: А҆́зъ къ бг҃ꙋ воззва́хъ, и҆ гдⷭ҇ь ᲂу҆слы́ша мѧ̀. Творѧ́ще и҆ покло́ны г҃, ꙗ҆́кѡ предписа́сѧ. Сла́ва, и҆ ны́нѣ: Ꙗ҆́кѡ не и҆́мамы дерзнове́нїѧ: и҆ мета̑нїѧ трѝ.

Та́же пое́мъ тропа́рь прⷪ҇ро́чества, гла́съ є҃:

Гдⷭ҇и, гдⷭ҇и, є҆гѡ́же всѧ̑ ᲂу҆жаса́ютсѧ, и҆ трепе́щꙋтъ ѿ лица̀ си́лы твоеѧ̀, тебѣ̀ припа́даемъ,безсме́ртне, тебѣ̀ мо́лимсѧ, ст҃ы́й: сп҃сѝ дꙋ́шы на́шѧ, мл҃твами ст҃ы́хъ твои́хъ.

Сла́ва, и҆ ны́нѣ: и҆ повторѧ́емъ то́йжде.

Прокі́менъ, гла́съ д҃, ѱало́мъ а҃: Вѣ́сть гдⷭ҇ь пꙋ́ть првⷣныхъ, и҆ пꙋ́ть нечести́выхъ поги́бнетъ.Сті́хъ: Бл҃же́нъ мꙋ́жъ, и҆́же не и҆́де на совѣ́тъ нечести́выхъ, и҆ на пꙋтѝ грѣ́шныхъ не ста̀.

Прⷪ҇ро́чества и҆са́їина чте́нїе. [Глава̀ а҃, ст. а҃-к҃.]

Видѣ́нїе, є҆́же ви́дѣ и҆са́їа сы́нъ а҆мѡ́совъ, є҆́же ви́дѣ на і҆ꙋде́ю, и҆ на і҆ерⷭ҇ли́мъ, въ ца́рство ѻ҆зі́и и҆ і҆ѡаѳа́ма, и҆ а҆ха́за и҆ є҆зекі́и, и҆̀же ца́рствоваша во і҆ꙋде́и. Слы́ши, не́бо, и҆ внꙋшѝ, землѐ, ꙗ҆́кѡ гдⷭ҇ь возглаго́ла: сы́ны роди́хъ и҆ возвы́сихъ, ті́и же ѿверго́шасѧ менє̀.Позна̀ во́лъ стѧжа́вшаго и҆̀, и҆ ѻ҆се́лъ ꙗ҆́сли господи́на своегѡ̀: і҆и҃ль же менє̀ не позна̀, и҆ лю́дїе моѝ не разꙋмѣ́ша. Оу҆вы̀, ꙗ҆зы́къ грѣ́шный, лю́дїе и҆спо́лнени грѣхѡ́въ, сѣ́мѧ лꙋка́вое, сы́нове беззако́ннїи, ѡ҆ста́висте гдⷭ҇а и҆ разгнѣ́васте ст҃а́го і҆и҃лева, ѿврати́стесѧ вспѧ́ть. Что̀ є҆щѐ ᲂу҆ѧзвлѧ́етесѧ, прилага́юще беззако́нїе; всѧ́каѧ глава̀ въ болѣ́знь, и҆ всѧ́кое се́рдце въ печа́ль. Ѿ но́гъ да́же до главы̀ нѣ́сть въ не́мъ цѣ́лости: ни стрꙋ́пъ, ни ꙗ҆́зва, ни ра́на палѧ́щаѧсѧ: нѣ́сть пла́стырѧ приложи́ти, нижѐ є҆ле́а, нижѐ ѡ҆бѧза́нїѧ. Землѧ̀ ва́ша пꙋста̀,гра́ди ва́ши ѻ҆гне́мъ пожже́ни, странꙋ̀ ва́шꙋ пред̾ ва́ми чꙋжді́и поѧда́ютъ, и҆ ѡ҆пꙋстѣ̀ низвраще́на ѿ люде́й чꙋжди́хъ. Ѡ҆ста́витсѧ дще́рь сїѡ́нѧ, ꙗ҆́кѡ кꙋ́ща въ вїногра́дѣ, и҆ ꙗ҆́кѡ ѻ҆во́щное храни́лище въ вертогра́дѣ, ꙗ҆́кѡ гра́дъ вою́емый. И҆ а҆́ще не бы̀ гдⷭ҇ь саваѡ́ѳъ ѡ҆ста́вилъ на́мъ сѣ́мене, ꙗ҆́кѡ содо́ма ᲂу҆́бѡ бы́ли бы́хомъ, и҆ ꙗ҆́кѡ гомо́ррꙋ ᲂу҆подо́билисѧ бы́хомъ. Оу҆слы́шите сло́во гдⷭ҇не, кнѧ́зи содо́мстїи: внемли́те зако́нꙋ бж҃їю, лю́дїе гомо́ррстїи. Что̀ мѝ мно́жество же́ртвъ ва́шихъ; глаго́летъ гдⷭ҇ь. и҆спо́лненъ є҆́смь всесожже́нїй ѻ҆́внихъ и҆ тꙋ́ка а҆́гнцєвъ, и҆ кро́ве ю҆нцє́въ и҆ козлѡ́въ не хощꙋ̀. Нижѐ приходи́те ꙗ҆ви́тисѧ мѝ: кто́ бо и҆зыска̀ сїѧ̑ и҆з̾ рꙋ́къ ва́шихъ; ходи́ти по дворꙋ̀ моемꙋ̀ не приложитѐ. И҆ а҆́ще принесе́те мѝ семїда́лъ, всꙋ́е: кади́ло, ме́рзость мѝ є҆́сть. Новомѣ́сѧчїй ва́шихъ, и҆ сꙋббѡ́тъ, и҆ днѐ вели́кагѡ не потерплю̀: поста̀, и҆ пра́здности, и҆ новомѣ́сѧчїй ва́шихъ, и҆ пра́здникѡвъ ва́шихъ ненави́дитъ дꙋша̀ моѧ̀: бы́сте мѝ въ сы́тость, ктомꙋ̀ не стерплю̀ грѣхѡ́въ ва́шихъ. Є҆гда̀ простре́те рꙋ́ки [ва́шѧ] ко мнѣ̀, ѿвращꙋ̀ ѻ҆́чи моѝ ѿ ва́съ: и҆ а҆́ще ᲂу҆мно́жите моле́нїе, не ᲂу҆слы́шꙋ ва́съ: рꙋ́ки бо ва́шѧ и҆спо́лнєны кро́ве. И҆змы́йтесѧ, [и҆] чи́сти бꙋ́дите, ѿими́те лꙋка̑вства ѿ дꙋ́шъ ва́шихъ пред̾ ѻ҆чи́ма мои́ма, преста́ните ѿ лꙋка́вствъ ва́шихъ. Наꙋчи́тесѧ добро̀ твори́ти, взыщи́те сꙋда̀, и҆зба́вите ѡ҆би́димаго, сꙋди́те си́рꙋ и҆ ѡ҆правди́те вдови́цꙋ: и҆ прїиди́те, и҆ и҆стѧ́жимсѧ, глаго́летъ гдⷭ҇ь: и҆ а҆́ще бꙋ́дꙋтъ грѣсѝ ва́ши ꙗ҆́кѡ багрѧ́ное, ꙗ҆́кѡ снѣ́гъ ᲂу҆бѣлю̀: а҆́ще же бꙋ́детъ ꙗ҆́кѡ червле́ное, ꙗ҆́кѡ во́лнꙋ ᲂу҆бѣлю̀. И҆ а҆́ще хо́щете и҆ послꙋ́шаете менє̀, блага̑ѧ землѝ снѣ́сте: а҆́ще же не хо́щете, нижѐ послꙋ́шаете менє̀, ме́чь вы̀ поѧ́стъ: ᲂу҆ста́ бо гдⷭ҇нѧ глаго́лаша сїѧ̑.

Прокі́менъ, гла́съ з҃. ѱало́мъ в҃: Рабо́тайте гдⷭ҇ви со стра́хомъ, и҆ ра́дꙋйтесѧ є҆мꙋ̀ съ тре́петомъ. Сті́хъ: Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ;

И҆ быва́етъ чте́нїе въ лѣ́ствичникѣ. Та́же тропа́рь: Ско́рѡ да предварѧ́тъ ны̀: Трист҃о́е, и҆ мета̑нїѧ г҃. По Ѻ҆́ч҃е на́шъ: І҆ере́й, возгла́съ: Ꙗ҆́кѡ твоѐ є҆́сть црⷭ҇тво: И҆ тропарѝ на гла́съ в҃: Сп҃се́нїе содѣ́лалъ є҆сѝ: Сла́ва: Пречⷭ҇томꙋ ѡ҆́бразꙋ твоемꙋ̀: И҆ ны́нѣ: Млⷭ҇рдїѧ сꙋ́щи: Въ сре́дꙋ же и҆ пѧто́къ глаго́лемъ крⷭ҇тобг҃оро́диченъ: Препросла́влена є҆сѝ, бцⷣе дв҃о: Гдⷭ҇и, поми́лꙋй, м҃. И҆́же на всѧ́кое вре́мѧ: Гдⷭ҇и, поми́лꙋй, три́жды, Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. І҆ере́й: Бж҃е, ᲂу҆ще́дри ны̀ и҆ бл҃гословѝ ны̀: И҆ твори́мъ покло́ны, ꙗ҆́коже ѡ҆бы́чай. И҆ по и҆сполне́нїи покло́нѡвъ начина́етъ предстоѧ́тель коне́чное трист҃о́е, и҆ мета̑нїѧ трѝ. По Ѻ҆́ч҃е на́шъ: Гдⷭ҇и, поми́лꙋй, в҃і. Та́же і҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀. И҆ быва́етъ ѿпꙋ́стъ.

[Зрѝ] Се́й ѡ҆́бразъ и҆ чи́нъ до́лженъ бы́ти во всю̀ ст҃ꙋ́ю четыредесѧ́тницꙋ, на г҃-мъ и҆ на ѕ҃-мъ часѣ̀.

И и҆дѣ́же расхожде́нїѧ не быва́етъ, по мл҃твѣ: Бж҃е и҆ гдⷭ҇и си́лъ: а҆́бїе глаго́лемъ: Прїиди́те, поклони́мсѧ: три́жды, и҆ ѳ҃-й ча́съ.

А҆ и҆дѣ́же быва́етъ расхожде́нїе, ѡ҆ часѣ̀ ѳ҃-мъ бїе́тъ кандиловжига́тель девѧти́щи, и҆ собира́емсѧ въ цр҃ковь. И҆ бл҃гослови́вшꙋ і҆ере́ю, начина́емъ: Цр҃ю̀ нбⷭ҇ный: Трист҃о́е, и҆ мета̑нїѧ трѝ. По Ѻ҆́ч҃е на́шъ: возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ: Гдⷭ҇и, поми́лꙋй, в҃і. Прїиди́те, поклони́мсѧ: три́жды, и҆ мета̑нїѧ трѝ: и҆ пое́мъ ча́съ девѧ́тый триѱа́лмный. Въ коне́цъ же тре́тїѧгѡ ѱалма̀, на а҆ллилꙋ́їа, мета̑нїѧ трѝ. И҆ начина́емъ стїхосло́вїе каѳі́смы: на всѧ́кїй же а҆нтїфѡ́нъ мета̑нїѧ трѝ. По и҆сполне́нїи же стїхосло́вїѧ тропа́рь, гла́съ и҃: И҆́же въ девѧ́тый ча́съ: Сті́хъ а҃: Да прибли́житсѧ моли́тва моѧ̀ пред̾ тѧ̀, гдⷭ҇и: Сті́хъ в҃: Да вни́детъ проше́нїе моѐ: И҆ твори́мъ покло́ны въ си́хъ. Сла́ва, и҆ ны́нѣ: И҆́же на́съ ра́ди рожде́йсѧ ѿ дв҃ы: мета̑нїѧ трѝ. И҆ быва́етъ чте́нїе па́ки въ лѣ́ствичникѣ. И҆ по чте́нїи глаго́лемъ сті́хъ: Не преда́ждь на́съ до конца̀: Трист҃о́е, и҆ мета̑нїѧ трѝ. Прест҃а́ѧ трⷪ҇це: Ѻ҆́ч҃е на́шъ: И҆ возглаша́етъ сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ глаго́лемъ тропарѝ, гла́съ и҃: Ви́дѧ разбо́йникъ нача́льника жи́зни: Сла́ва: Посредѣ̀ двою̀ разбо́йникꙋ: И҆ ны́нѣ: А҆́гнца и҆ па́стырѧ и҆ сп҃са мі́ра: Гдⷭ҇и, поми́лꙋй, м҃. И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Бж҃е, ᲂу҆ще́дри ны̀: И҆ твори́мъ покло́ны вели̑кїѧ трѝ, глаго́люще въ себѣ̀ и҆ пред̾ѧвле́ннꙋю мл҃твꙋ прпⷣбнагѡ є҆фре́ма: про́чихъ же в҃і не твори́мъ. И҆ глаго́лемъ мл҃твꙋ: Вл҃ко, гдⷭ҇и і҆и҃се хрⷭ҇тѐ бж҃е на́шъ:

И҆ а҆́бїе начина́етъ ли́къ, є҆мꙋ́же прилꙋчи́тсѧ начина́ти, на гла́съ и҆: Во црⷭ҇твїи твое́мъ помѧнѝ на́съ, гдⷭ҇и: И҆ пое́мъ бл҃жє́нны со сладкопѣ́нїемъ и҆ велегла́снѡ и҆ ко́снѡ, въ то́йже гла́съ: Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное. Помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ. И҆ про́чыѧ стїхѝ. Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ. Помѧнѝ на́съ, гдⷭ҇и: И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь. Помѧнѝ на́съ, гдⷭ҇и: Та́же соше́дшесѧ ѻ҆́ба ли̑ка, и҆ пою́тъ вы́шшимъ гла́сомъ, со ѿкрове́нными глава́ми: Помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ. Покло́нъ є҆ди́нъ. Помѧнѝ на́съ, влⷣко, є҆гда̀ прїи́деши во црⷭ҇твїи твое́мъ. Покло́нъ є҆ди́нъ. Помѧнѝ на́съ, ст҃ы́й, є҆гда̀ прїи́деши во црⷭ҇твїи твое́мъ. Покло́нъ є҆ди́нъ. И҆ глаго́лемъ: Ли́къ нбⷭ҇ный пое́тъ тѧ̀ и҆ глаго́летъ: Сті́хъ: Пристꙋпи́те къ немꙋ̀ и҆ просвѣти́тесѧ: И҆ па́ки: Ли́къ нбⷭ҇ный: Сла́ва: Ли́къ ст҃ы́хъ а҆́гг҃лъ и҆ а҆рха̑гг҃лъ: И҆ ны́нѣ: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: Ѻ҆́ч҃е на́шъ: Та́же конда́къ днѐ и҆ хра́ма.

А҆́ще же хра́мъ хрⷭ҇то́въ, глаго́лемъ пре́жде хра́ма, та́же днѐ и҆ ст҃а́гѡ рѧдова́гѡ, є҆гѡ́же є҆́сть де́нь, а҆́ще и҆́мать.

Сла́ва: Со ст҃ы́ми ᲂу҆поко́й, хрⷭ҇тѐ: И҆ ны́нѣ: хра́ма бцⷣы, и҆лѝ: Предста́тельство хрⷭ҇тїа́нъ непосты́дное: Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. И҆ глаго́летъ сщ҃е́нникъ: Бж҃е, ᲂу҆ще́дри ны̀: И҆ твори́мъ и҆з̾ѡбражє́нныѧ покло́ны ѕ҃і, съ мл҃твою ст҃а́гѡ є҆фре́ма, ꙗ҆́коже предписа́сѧ.

Параекклисїа́рхъ же, сотвори́въ покло́нъ настоѧ́телю и҆ бл҃гослове́нїе взе́мъ, и҆́детъ и҆ звони́тъ. Та́же начина́етъ предстоѧ́тель: Прїиди́те, поклони́мсѧ: три́жды, и҆ мета̑нїѧ г҃. И҆ чте́цъ глаго́летъ ѱало́мъ р҃г: Бл҃гословѝ, дꙋшѐ моѧ̀, гдⷭ҇а: ти́химъ и҆ кро́ткимъ гла́сомъ.І҆ере́й же глаго́летъ ѡ҆бы̑чныѧ моли̑твы вечє́рнїѧ пред̾ ст҃ы́ми враты̀. По ѱалмѣ̀: Сла́ва, и҆ ны́нѣ, А҆́ллилꙋ́їа, три́жды, и҆ покло́ны г҃. И҆ є҆ктенїа̀ вели́каѧ. И҆ стїхосло́вимъ каѳі́смꙋ: Ко гдⷭ҇ꙋ, внегда̀ скорбѣ́ти мѝ: И҆ по ко́емждо а҆нтїфѡ́нѣ: Сла́ва, и҆ ны́нѣ, А҆́ллилꙋ́їа, три́жды, и҆ мета̑нїѧ трѝ.

Въ понедѣ́льникъ пе́рвыѧ седми́цы, ве́черъ.

На гдⷭ҇и воззва́хъ, поста́вимъ стїхѡ́въ ѕ҃.

И҆ пое́мъ стїхи̑ры, гла́съ в҃. Творе́нїе господи́на і҆ѡ́сифа.

Подо́бенъ: Всѧ̑ преидо́хъ:

Всѧ́кїй грѣ́хъ содѣ́ѧхъ, всѣ́хъ преидо́хъ блꙋдо́мъ. а҆́ще восхощꙋ̀ пока́ѧтисѧ, не и҆́мамъ сле́зъ то́ки: а҆́ще лѣ́ностнѡ и҆ ны́нѣ поживꙋ̀, мꙋ́цѣ пови́ненъ є҆́смь. но да́ждь мѝ и҆справле́нїе, є҆ди́не бл҃гі́й бж҃е, и҆ поми́лꙋй мѧ̀.

Подо́бенъ:

Дѡждѝ сле́зъ пода́ждь мѝ, хрⷭ҇тѐ, въ кра́сный де́нь поста̀, ꙗ҆́кѡ да воспла́чꙋ, и҆ ѿмы́ю скве́рнꙋ ꙗ҆́же ѿ сласте́й, и҆ ꙗ҆влю́сѧ тебѣ̀ ѡ҆чище́нъ, є҆гда̀, сꙋдїѐ, съ нб҃сѐ и҆́маши прїитѝ, гдⷭ҇и, сꙋди́ти человѣ́кѡмъ, ꙗ҆́кѡ сꙋдїѧ̀ и҆ првⷣный є҆ди́нъ.

Дрꙋгі́й, гла́съ є҃. Господи́на ѳео́дѡра стꙋді́та.

Подо́бенъ: Прпⷣбне ѻ҆́тче:

Прїиди́те ᲂу҆се́рднѡ, тве́рдое ѡ҆рꙋ́жїе поста̀ и҆мꙋ́ще ꙗ҆́кѡ щи́тъ, всѧ́кꙋю ко́знь пре́лести вра́жїѧ ѿврати́мъ, вѣ́рнїи: не прельсти́мсѧ сладостьмѝ страсте́й, ни ᲂу҆бои́мсѧ ѻ҆гнѧ̀ и҆скꙋше́нїй, и҆́хже ра́ди хрⷭ҇то́съ чл҃вѣколю́бецъ почестьмѝ терпѣ́нїѧ ᲂу҆вѣнча́етъ на́съ. тѣ́мже со дерзнове́нїемъ молѧ́щесѧ, припаде́мъ зовꙋ́ще, просѧ́ще ми́ра и҆ дꙋша́мъ на́шымъ ве́лїѧ млⷭ҇ти.

И҆ въ мине́и, г҃. Сла́ва, и҆ ны́нѣ, бг҃оро́диченъ. Свѣ́те ти́хїй:

Та́же прокі́менъ, ѱало́мъ г҃, гла́съ ѕ҃: Гдⷭ҇не є҆́сть сп҃се́нїе, и҆ на лю́дехъ твои́хъ бл҃гослове́нїе твоѐ.

Сті́хъ: Гдⷭ҇и, что́ сѧ ᲂу҆мно́жиша стꙋжа́ющїи мѝ;

Бытїѧ̀ чте́нїе. [Глава̀ а҃, ст. а҃-г҃і.]

Въ нача́лѣ сотворѝ бг҃ъ не́бо и҆ зе́млю. Землѧ́ же бѣ̀ неви́дима и҆ неꙋстро́ена, и҆ тьма̀ верхꙋ̀ бе́здны: и҆ дх҃ъ бж҃їй ноша́шесѧ верхꙋ̀ воды̀. И҆ речѐ бг҃ъ: да бꙋ́детъ свѣ́тъ. И҆ бы́сть свѣ́тъ. И҆ ви́дѣ бг҃ъ свѣ́тъ, ꙗ҆́кѡ добро̀: и҆ разлꙋчѝ бг҃ъ междꙋ̀ свѣ́томъ и҆ междꙋ̀ тьмо́ю. И҆ наречѐ бг҃ъ свѣ́тъ де́нь, а҆ тьмꙋ̀ наречѐ но́щь. И҆ бы́сть ве́черъ, и҆ бы́сть ᲂу҆́тро, де́нь є҆ди́нъ. И҆ речѐ бг҃ъ: да бꙋ́детъ тве́рдь посредѣ̀ воды̀, и҆ да бꙋ́детъ разлꙋча́ющи посредѣ̀ воды̀ и҆ воды̀. И҆ бы́сть та́кѡ. И҆ сотворѝ бг҃ъ тве́рдь, и҆ разлꙋчѝ бг҃ъ междꙋ̀ водо́ю, ꙗ҆́же бѣ̀ под̾ тве́рдїю, и҆ междꙋ̀ водо́ю, ꙗ҆́же бѣ̀ над̾ тве́рдїю. И҆ наречѐ бг҃ъ тве́рдь не́бо. И҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь вторы́й. И҆ речѐ бг҃ъ: да собере́тсѧ вода̀, ꙗ҆́же под̾ небесе́мъ, въ собра́нїе є҆ди́но, и҆ да ꙗ҆ви́тсѧ сꙋ́ша. И҆ бы́сть та́кѡ. И҆ собра́сѧ вода̀, ꙗ҆́же под̾ небесе́мъ, въ собра̑нїѧ своѧ̑, и҆ ꙗ҆ви́сѧ сꙋ́ша. И҆ наречѐ бг҃ъ сꙋ́шꙋ зе́млю, и҆ собра̑нїѧ во́дъ наречѐ морѧ̀. И҆ ви́дѣ бг҃ъ, ꙗ҆́кѡ добро̀. И҆ речѐ бг҃ъ: да прорасти́тъ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ бы́сть та́кѡ. И҆ и҆знесѐ землѧ̀ бы́лїе травно́е, сѣ́ющее сѣ́мѧ по ро́дꙋ и҆ по подо́бїю, и҆ дре́во плодови́тое творѧ́щее пло́дъ, є҆мꙋ́же сѣ́мѧ є҆гѡ̀ въ не́мъ, по ро́дꙋ на землѝ. И҆ ви́дѣ бг҃ъ, ꙗ҆́кѡ добро̀. И҆ бы́сть ве́черъ, и҆ бы́сть ᲂу҆́тро, де́нь тре́тїй.

Прокі́менъ в҃, ѱало́мъ д҃, гла́съ є҃: Гдⷭ҇ь ᲂу҆слы́шитъ мѧ̀, внегда̀ воззва́ти мѝ къ немꙋ̀.

Сті́хъ: Внегда̀ призва́ти мѝ, ᲂу҆слы́ша мѧ̀ бг҃ъ пра́вды моеѧ̀.

При́тчей чте́нїе. [Глава̀ а҃, ст. а҃-к҃.]

При̑тчи соломѡ́на сы́на дв҃дова, и҆́же ца́рствова во і҆и҃ли: позна́ти премꙋ́дрость и҆ наказа́нїе, и҆ ᲂу҆разꙋмѣ́ти словеса̀ мꙋ́дрости, прїѧ́ти же и҆зви̑тїѧ слове́съ и҆ разрѣшє́нїѧ гада́нїй, ᲂу҆разꙋмѣ́ти же пра́вдꙋ и҆́стиннꙋю, и҆ сꙋ́дъ и҆справлѧ́ти: да да́стъ неѕлѡ́бивымъ кова́рство, ѻ҆троча́ти же ю҆́нꙋ чꙋ́вство же и҆ смы́слъ. Си́хъ бо послꙋ́шавъ, мꙋ́дрый премꙋ́дрѣе бꙋ́детъ, а҆ разꙋ́мный строи́тельство стѧ́жетъ: ᲂу҆́разꙋмѣ́етъ же при́тчꙋ и҆ те́мное сло́во, речє́нїѧ же премꙋ́дрыхъ и҆ гада̑нїѧ. Нача́ло премꙋ́дрости стра́хъ гдⷭ҇ень, ра́зꙋмъ же бла́гъ всѣ́мъ творѧ́щымъ є҆го̀: бл҃гоче́стїе же въ бг҃а, нача́ло чꙋ́вства: премꙋ́дрость же и҆ наказа́нїе нечести́вїи ᲂу҆ничижа́тъ. Слы́ши сы́не, наказа́нїе ѻ҆тца̀ твоегѡ̀, и҆ не ѿри́ни завѣ́тѡвъ ма́тере твоеѧ̀: вѣне́цъ бо бл҃года́тей прїи́меши на твое́мъ версѣ̀, и҆ гри́внꙋ зла́тꙋ ѡ҆ твое́й вы́и.Сы́не, да не прельстѧ́тъ тебѐ мꙋ̑жи нечести́вїи, нижѐ да восхо́щеши, а҆́ще помо́лѧтъ тѧ̀,глаго́люще: и҆дѝ съ на́ми, прїѻбщи́сѧ кро́ве: скры́емъ же въ зе́млю мꙋ́жа првⷣна непра́веднѡ,пожре́мъ же є҆го̀ ꙗ҆́коже а҆́дъ жи́ва, и҆ во́зьмемъ па́мѧть є҆гѡ̀ ѿ землѝ: стѧжа́нїе є҆гѡ̀ многоцѣ́нное прїи́мемъ, и҆спо́лнимъ же до́мы на́шѧ коры́стей: жре́бїй же тво́й положѝ съ на́ми: ѻ҆́бще же влага́лище стѧ́жемъ всѝ, и҆ мѣше́цъ є҆ди́нъ да бꙋ́детъ всѣ̑мъ на́мъ. Не и҆дѝ въ пꙋ́ть съ ни́ми, ᲂу҆клони́ же но́гꙋ твою̀ ѿ сте́зь и҆́хъ: но́зѣ бо и҆́хъ на ѕло̀ текꙋ́тъ, и҆ ско́ри сꙋ́ть и҆злїѧ́ти кро́вь. Не без̾ пра́вды бо простира́ютсѧ мрє́жи перна̑тымъ. Ті́и бо ᲂу҆бі́йствꙋ прїѻбща́ющесѧ, сокро́вищствꙋютъ себѣ̀ ѕла̑ѧ: разрꙋше́нїе же мꙋже́й законопрестꙋ́пныхъ ѕло̀. Сі́и пꙋтїѐ сꙋ́ть всѣ́хъ творѧ́щихъ беззакѡ́ннаѧ: нече́стїемъ бо свою̀ дꙋ́шꙋ ѿе́млютъ. Премꙋ́дрость во и҆схо́дѣхъ пое́тсѧ, въ сто́гнахъ же дерзнове́нїе во́дитъ.

Сподо́би, гдⷭ҇и, въ ве́черъ:

И҆ мета̑нїѧ г҃. І҆ере́й: И҆спо́лнимъ вече́рнюю мл҃твꙋ:

По возгла́сѣ пое́мъ ѻ҆́ба ли̑ка вкꙋ́пѣ:

На стїхо́внѣ самогла́сенъ днѐ, гла́съ г҃:

Пости́мсѧ посто́мъ прїѧ́тнымъ, бл҃гоꙋго́днымъ гдⷭ҇еви: и҆́стинный по́стъ є҆́сть ѕлы́хъ ѿчꙋжде́нїе, воздержа́нїе ѧ҆зы́ка, ꙗ҆́рости ѿложе́нїе, ѿлꙋче́нїе похоте́й, ѡ҆глаго́ланїѧ, лжѝ и҆ клѧтвопрестꙋпле́нїѧ. си́хъ ѡ҆скꙋдѣ́нїе є҆́сть по́стъ и҆́стинный и҆ бл҃гопрїѧ́тный.

Сті́хъ: Къ тебѣ̀ возведо́хъ:

И҆ повторѧ́емъ то́йжде.

Та́же сті́хъ: Поми́лꙋй на́съ, гдⷭ҇и:

И҆ мч҃нченъ: Ве́лїѧ мч҃нкъ твои́хъ, хрⷭ҇тѐ, си́ла: во гробѣ́хъ бо лежа́тъ, и҆ дꙋ́хи прогонѧ́ютъ, и҆ ᲂу҆праздни́ша вра́жїю вла́сть, вѣ́рою трⷪ҇ческою подви́гшесѧ ѡ҆ бл҃гоче́стїи.

Сла́ва, и҆ ны́нѣ, бг҃оро́диченъ: Бцⷣе, предста́тельство всѣ́хъ молѧ́щихсѧ, тобо́ю дерза́емъ, тобо́ю хва́лимсѧ, въ тебѣ̀ всѐ ᲂу҆пова́нїе на́ше є҆́сть: молѝ ро́ждшагосѧ и҆з̾ тебє̀ за непотрє́бныѧ рабы̑ твоѧ̑.

Та́же твори́тъ канѡна́рхъ ѡ҆бы́чный покло́нъ въ ликѡ́мъ, та́кожде и҆ ѻ҆́ба ли̑ка. Ны́нѣ ѿпꙋща́еши: Трист҃о́е: и҆ мета̑нїѧ г҃. Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ: Бцⷣе дв҃о, ра́дꙋйсѧ: Покло́нъ є҆ди́нъ. Сла́ва: Крⷭ҇ти́телю хрⷭ҇то́въ: Покло́нъ є҆ди́нъ. И҆ ны́нѣ: Моли́те за ны̀: Покло́нъ є҆ди́нъ. Та́же, Под̾ твоѐ бл҃госе́рдїе: без̾ покло́на, кро́ткимъ гла́сомъ. Гдⷭ҇и, поми́лꙋй, м҃: Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Сы́й бл҃гослове́нъ хрⷭ҇то́съ бг҃ъ на́шъ: Нбⷭ҇ный цр҃ю̀: И҆ глаго́лемъ та́йнѡ мл҃твꙋ прпⷣбнагѡ є҆фре́ма: Гдⷭ҇и и҆ влⷣко живота̀ моегѡ̀: И҆ твори́мъ г҃ вели̑кїѧ покло́ны, и҆ ма́лыхъ в҃і: и҆ па́ки предпи́саннꙋю мл҃твꙋ, и҆ покло́нъ є҆ди́нъ. Трист҃о́е. Гдⷭ҇и, поми́лꙋй, в҃і. И҆ мл҃тва: Всест҃а́ѧ трⷪ҇це, є҆диносꙋ́щнаѧ держа́во: Та́же, Бꙋ́ди и҆́мѧ гдⷭ҇не бл҃гослове́но ѿны́нѣ и҆ до вѣ́ка, три́жды. И҆ мета̑нїѧ г҃. Сла́ва, и҆ ны́нѣ: Бл҃гословлю̀ гдⷭ҇а на всѧ́кое вре́мѧ: Посе́мъ, Досто́йно є҆́сть: и҆ покло́нъ. Посе́мъ дрꙋгі́й ли́къ: Сла́ва, и҆ ны́нѣ: Гдⷭ҇и, поми́лꙋй, три́жды. Бл҃гословѝ: И҆ ѿпꙋ́стъ по ѡ҆бы́чаю. Є҆гда́ же поставлѧ́емъ трапе́зꙋ, глаго́лемъ и҆ ѱало́мъ рм҃д: Вознесꙋ́ тѧ, бж҃е мо́й: И҆ быва́етъ ѿпꙋ́стъ. И҆сходѧ́ще же въ па́перть, пое́мъ, ꙗ҆́коже ѡ҆бы́чай, стїхи́рꙋ хра́ма ст҃а́гѡ. Глаго́лютсѧ же и҆ ѿ сщ҃е́нника ѡ҆бы̑чныѧ моли̑твы, и҆ помина́ютъ ᲂу҆со́пшыѧ. И҆ быва́етъ соверше́нный ѿпꙋ́стъ.

Сїѐ послѣ́дованїе свѣти́льничнагѡ быва́етъ во все́й ст҃ѣ́й четыредесѧ́тницѣ, не сꙋ́щей преждеѡсщ҃е́ннѣй: не прїѧ́хомъ бо твори́ти преждеѡсщ҃е́ннꙋю, да́же до среды̀, за є҆́же пости́тисѧ по преда́нїю всемꙋ̀ бра́тствꙋ: могꙋ́щїи же да пребꙋ́дꙋтъ постѧ́щесѧ до пѧтка̀. Ст҃ы́ѧ же горы̀ ᲂу҆ста́въ въ пе́рвый ᲂу҆́бѡ де́нь ѿню́дъ не повелѣва́етъ ꙗ҆́сти. Во вто́рникъ же, въ сре́дꙋ и҆ въ четверто́къ ꙗ҆́сти подоба́етъ по є҆ди́нѣй лі́трѣ хлѣ́ба, и҆ во́дꙋ, и҆ и҆́но ничто́же, ра́звѣ со́ли при хлѣ́бѣ.

[Зрѝ] Подоба́етъ вѣ́дати, ꙗ҆́кѡ въ ла́ѵрѣ прпⷣбнагѡ ѻ҆тца̀ на́шегѡ са́ввы, не пое́мъ повече́рїй въ цр҃кви, но въ ке́ллїахъ пое́мъ кі́йждо: та́кѡ бо прїѧ́хомъ.

Во ѻ҆бщежи́тїѧхъ же палесті́ны пою́тсѧ повечє́рїѧ си́це:

Въ понедѣ́льникъ а҃-ѧ седьми́цы на повечерїи.

Ѡ҆ часѣ̀ девѧ́томъ, вхо́дитъ свѣщевжига́тель, и҆ сотвори́въ покло́нъ предстоѧ́телю ѿи́детъ, и҆ бїе́тъ въ би́ло двана́десѧть. И҆ собира́емсѧ всѝ въ цр҃ковь, и҆ сотвори́вше кі́йждо вчинє́нныѧ покло́ны, ма́лѡ сѣди́мъ, во є҆́же всѣ́мъ и҆лѝ мно́жайшымъ собра́тисѧ. И҆ воста́въ сщ҃е́нникъ ѿ сѣда́лища своегѡ̀, и҆ сотвори́въ ѡ҆бы́чный покло́нъ и҆гꙋ́менꙋ, твори́тъ бл҃гослове́нїе. И҆ мы̀ начина́емъ: Сла́ва тебѣ̀, бж҃е на́шъ, сла́ва тебѣ̀: Цр҃ю̀ нбⷭ҇ный: Трист҃о́е, и҆ мета̑нїѧ г҃. Подо́бнѣ и҆ на Прїиди́те, поклони́мсѧ: мета̑нїѧ г҃. И҆ а҆́бїе глаго́лемъ ѱало́мъ ѯ҃ѳ: Бж҃е, въ по́мощь мою̀ вонмѝ: Та́же начина́емъ вели́кїй канѡ́нъ, творѧ́ще и҆̀ на ча̑сти четы́ре со і҆рмосо́мъ, ꙗ҆́кѡ и҆спо́лнитисѧ є҆мꙋ̀ въ четверто́къ ве́чера.

Творе́нїе ст҃а́гѡ ѻ҆тца̀ на́шегѡ а҆ндре́а кри́тскагѡ, і҆ерⷭ҇ли́мскагѡ.

Гла́съ ѕ҃. І҆рмосы̀ по два́жды.

Твори́мъ же на кі́йждо тропа́рь мета̑нїѧ г҃.

Пѣ́снь а҃.

І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀: бг҃ъ ѻ҆тца̀ моегѡ̀, и҆ вознесꙋ̀ є҆го̀: сла́вно бо просла́висѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿкꙋ́дꙋ начнꙋ̀ пла́кати ѡ҆ дѣѧ́нїихъ ѡ҆каѧ́ннагѡ житїѧ̀ моегѡ̀; и҆лѝ ко́е положꙋ̀ нача́ло ны́нѣшнемꙋ рыда́нїю; но ты̀, хрⷭ҇тѐ, ꙗ҆́кѡ бл҃госе́рдъ, да́ждь мѝ прегрѣше́нїй ѡ҆ставле́нїе.

Грѧдѝ, ѡ҆каѧ́ннаѧ дꙋшѐ, съ пло́тїю твое́ю, и҆сповѣ́ждьсѧ зижди́телю всѣ́хъ, и҆ ѿста́ни коне́чнѣ ѿ пре́жнѧгѡ неразꙋ́мїѧ, и҆ принесѝ бг҃ꙋ въ покаѧ́нїи сле́зы.

Первозда́нномꙋ а҆да́мꙋ престꙋпле́нїемъ поревнова́въ, позна́хъ себѐ ѿ бг҃а и ѿ прⷭ҇носꙋ́щнагѡ црⷭ҇твїѧ и҆ сла́дости ѡ҆бнаже́на, грѣ̑хъ ра́ди мои́хъ.

Оу҆вы̀ мнѣ̀, ѡ҆каѧ́ннаѧ дꙋшѐ! что̀ ᲂу҆подо́биласѧ є҆сѝ пе́рвѣй є҆́ѵѣ; ви́дѣла бо є҆сѝ ѕлѣ̀, и҆ ᲂу҆ѧзви́ласѧ є҆сѝ го́рцѣ, и҆ коснꙋ́ласѧ є҆сѝ дре́ва, и҆ вкꙋси́ла є҆сѝ де́рзостнѡ неразꙋ́мныѧ снѣ́ди.

Вмѣ́стѡ є҆́ѵы чꙋ́вственныѧ, мы́сленнаѧ мѝ бы́сть є҆́ѵа, во пло́ти страстны́й по́мыслъ, показꙋ́ѧй сла̑дкаѧ и҆ во вкꙋше́нїи при́снѡ го́рькими напаѧ́ѧй.

Досто́йнѡ и҆з̾ є҆де́ма и҆згна́нъ бы́сть а҆да́мъ, ꙗ҆́кѡ не сохрани́вый є҆ди́ныѧ твоеѧ̀, сп҃се, за́повѣди: а҆́зъ же что̀ постраждꙋ̀, ѿмета́ѧ всегда̀ животвѡ́рнаѧ твоѧ̑ словеса̀;

Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рда, да́ждь мѝ сле́зы ᲂу҆миле́нїѧ.

Бг҃оро́диченъ: Бцⷣе, наде́ждо и҆ предста́тельство тебѐ пою́щихъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ влⷣчца чтⷭ҇аѧ, ка́ющасѧ прїими́ мѧ̀.

Пѣ́снь в҃.

І҆рмо́съ: Вонмѝ, нб҃о, и҆ возглаго́лю, и҆ воспою̀ хрⷭ҇та̀, ѿ дв҃ы пло́тїю прише́дшаго.

Вонмѝ, нб҃о, и҆ возглаго́лю: землѐ, слы́ши гла́съ, ка́ющїйсѧ бг҃ꙋ и҆ воспѣва́ющїй є҆го̀.

Вонми́ ми, бж҃е сп҃се мо́й, млⷭ҇тивнымъ твои́мъ ѻ҆́комъ, и҆ прїимѝ моѐ те́плое и҆сповѣ́данїе.

Согрѣши́хъ па́че всѣ́хъ человѣ̑къ, є҆ди́нъ согрѣши́хъ тебѣ̀: но ᲂу҆ще́дри ꙗ҆́кѡ бг҃ъ, сп҃се,творе́нїе твоѐ.

Воѡбрази́въ во мнѣ̀ страсте́й без̾ѡбра́зїе, любосла́стными стремле́ньми ѡ҆скверни́хъ ᲂу҆ма̀ красотꙋ̀.

Бꙋ́рѧ ѕлы́хъ ѡ҆бдержи́тъ мѧ̀, бл҃госе́рде гдⷭ҇и: но ꙗ҆́кѡ петрꙋ̀, и҆ мнѣ̀ рꙋ́кꙋ прострѝ.

Ѡ҆скверни́хъ ри́зꙋ пло́ти моеѧ̀, сп҃се, и҆ ѡ҆калѧ́хъ є҆́же по ѡ҆́бразꙋ и҆ по подо́бїю.

Ѡ҆черни́хъ дꙋше́внꙋю красотꙋ̀ сластьмѝ страсте́й, и҆ всѧ́чески ве́сь ᲂу҆́мъ пе́рсть сотвори́хъ.

Раздра́хъ ны́нѣ ѡ҆де́ждꙋ мою̀ пе́рвꙋю, ю҆́же мѝ и҆зтка̀ зижди́тель и҆з̾ нача́ла, и҆ ѿтꙋ́дꙋ лежꙋ̀ на́гъ.

Ѡ҆блеко́хсѧ въ раздра́ннꙋю ри́зꙋ, ю҆́же и҆зтка́ ми ѕмі́й совѣ́томъ, и҆ стыждꙋ́сѧ.

Сле́зы блꙋдни́цы и҆ а҆́зъ предлага́ю, ще́дре: млⷭ҇тивъ бꙋ́ди мѝ, сп҃се, бл҃госе́рдемъ твои́мъ.

Воззрѣ́хъ на красотꙋ̀ дре́ва, и҆ прельсти́хсѧ ᲂу҆мо́мъ: и҆ ѿтꙋ́дꙋ лежꙋ̀ на́гъ, и҆ срамлѧ́юсѧ.

Дѣ́лаша на хребтѣ̀ мое́мъ всѝ нача̑льницы страсте́й, продолжа́юще на мнѣ̀ беззако́нїе и҆́хъ.

Сла́ва, трⷪ҇ченъ: Є҆ди́наго тѧ̀ въ трїе́хъ ли́цахъ, бг҃а всѣ́хъ пою̀, ѻ҆ц҃а̀, и҆ сн҃а, и҆ дх҃а ст҃а́го.

Бг҃оро́диченъ: Пречⷭ҇таѧ бцⷣе дв҃о, є҆ди́на всепѣ́таѧ, молѝ прилѣ́жнѡ сп҃сти́сѧ на́мъ.

Пѣ́снь г҃.

І҆рмо́съ: На недви́жимѣмъ ка́мени за́повѣдей твои́хъ, хрⷭ҇тѐ, ᲂу҆твердѝ моѐ помышле́нїе.

Ѻ҆́гнь ѿ гдⷭ҇а нѣ́когда̀ ѡ҆дожди́въ, зе́млю содо́мскꙋю пре́жде гдⷭ҇ь попалѝ.

На го́рꙋ спаса́йсѧ, дꙋшѐ, ꙗ҆́коже лѡ́тъ ѻ҆́ный, и҆ въ сигѡ́ръ ᲂу҆бѣга́й.

Бѣ́гай запале́нїѧ, ѽ дꙋшѐ, бѣ́гай содо́мскагѡ горѣ́нїѧ, бѣ́гай и҆стребле́нїѧ бж҃е́ственнагѡ пла́мене.

Согрѣши́хъ тебѣ̀ є҆ди́нъ а҆́зъ, согрѣши́хъ па́че всѣ́хъ, хрⷭ҇тѐ сп҃се: да не пре́зриши менє̀.

Ты̀ є҆сѝ па́стырь до́брый: взыщѝ менѐ а҆́гнца, и҆ заблꙋ́ждшагѡ да не пре́зриши менє̀.

Ты̀ є҆си,̀ сла́дкїй і҆и҃се, ты̀ є҆сѝ созда́тель мо́й: въ тебѣ̀, сп҃се, ѡ҆правда́юсѧ.

И҆сповѣ́даюсѧ тебѣ̀, сп҃се: согрѣши́хъ, согрѣши́хъ тѝ. но ѡ҆сла́би, ѡ҆ста́ви мѝ, ꙗ҆́кѡ бл҃госе́рдъ.

Сла́ва, трⷪ҇ченъ: Ѽ трⷪ҇це є҆ди́нице бж҃е! сп҃сѝ на́съ ѿ преле́сти, и҆ и҆скꙋше́нїй, и҆ ѡ҆бстоѧ́нїй.

Бг҃оро́диченъ: Ра́дꙋйсѧ, бг҃а прїи́мшаѧ ᲂу҆тро́бо: ра́дꙋйсѧ, прⷭ҇то́ле гдⷭ҇нь: ра́дꙋйсѧ, мт҃и жи́зни на́шеѧ.

Пѣ́снь д҃.

І҆рмо́съ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ. сла́ва си́ле твое́й, гдⷭ҇и.

Дѣ́лъ твои́хъ да не пре́зриши, созда́нїѧ твоегѡ̀ да не ѡ҆ста́виши, правосꙋ́де. а҆́ще и҆ є҆ди́нъ согрѣши́хъ ꙗ҆́кѡ человѣ́къ, па́че всѧ́кагѡ человѣ́ка, чл҃вѣколю́бче: но и҆́маши, ꙗ҆́кѡ гдⷭ҇ь всѣ́хъ, вла́сть ѡ҆ставлѧ́ти грѣхѝ.

Приближа́етсѧ коне́цъ, дꙋшѐ, приближа́етсѧ и҆ неради́ши, не гото́вишисѧ: вре́мѧ сокраща́етсѧ, воста́ни, бли́зъ при две́рехъ сꙋдїѧ̀ є҆́сть. ꙗ҆́кѡ со́нїе, ꙗ҆́кѡ цвѣ́тъ, вре́мѧ житїѧ̀ тече́тъ: что̀ всꙋ́е мѧте́мсѧ;

Воспрѧнѝ, ѽ дꙋшѐ моѧ̀! помышлѧ́й ѡ҆ дѣѧ́нїихъ твои́хъ, ꙗ҆̀же содѣ́лала є҆сѝ, и҆ сїѧ̑ пред̾ лицѐ твоѐ принесѝ, и҆ ка̑пли сле́зъ твои́хъ и҆ска́пай: рцы̀ хрⷭ҇тꙋ̀ со дерзнове́нїемъ дѣѧ̑нїѧ и҆ помышлє́нїѧ, и҆ ѡ҆правда́йсѧ.

Не бы́сть въ житїѝ грѣха̀, ни дѣѧ́нїѧ, ни ѕло́бы, и҆́миже а҆́зъ не согрѣши́хъ, сп҃се: во ᲂу҆мѣ̀, и҆ сло́вѣ, и҆ произволе́нїи, и҆ предложе́нїи, и҆ мы́сли, и҆ дѣѧ́нїи согрѣши́хъ а҆́зъ, ꙗ҆́кѡ и҆́нъ никто́же когда̀.

Тогѡ̀ ра́ди и҆ ѡ҆сꙋжде́нъ бы́хъ, тогѡ̀ ра́ди препрѣ́нъ бы́хъ а҆́зъ ѡ҆каѧ́нный ѿ своеѧ̀ со́вѣсти, є҆ѧ́же ничто́же є҆́сть въ мі́рѣ нꙋ́ди́тельнѣйше. сꙋдїѐ, и҆зба́вителю мо́й и҆ вѣ́дче, пощадѝ, и҆ и҆зба́ви, и҆ сп҃си́ мѧ раба̀ твоего̀.

Лѣ́ствица, ю҆́же ви́дѣ дре́вле вели́кїй въ патрїа́рсѣхъ, ᲂу҆каза́нїе є҆́сть, дꙋшѐ моѧ̀, дѣ́ѧтельнагѡ восхожде́нїѧ, разꙋ́мнагѡ возше́ствїѧ: а҆́ще ᲂу҆́бо хо́щеши пожи́ти, дѣѧ́нїемъ и҆ ра́зꙋмомъ и҆ видѣ́нїемъ ѡ҆бнови́сѧ.

Зно́й дневны́й претерпѣ̀ въ лише́нїи патрїа́рхъ, и҆ мра́зъ нощны́й понесѐ, на всѧ́къ де́нь ᲂу҆хищрє́нїѧ творѧ̀, пасы́й, трꙋжда́ѧйсѧ, рабо́таѧй, да двѣ̀ жєны̀ прїѡбрѧ́щетъ.

Жєны́ ми двѣ̀ разꙋмѣ́й, дꙋшѐ, дѣѧ́нїе и҆ ра́зꙋмъ въ видѣ́нїи: лі́ю ᲂу҆́бѡ дѣѧ́нїе, ꙗ҆́кѡ многоча́днꙋю: рахи́ль же ра́зꙋмъ, ꙗ҆́кѡ многотрꙋ́днꙋю. и҆́бо кромѣ̀ трꙋдѡ́въ, ни дѣѧ́нїе, ни видѣ́нїе ᲂу҆стро́итсѧ.

Сла́ва, трⷪ҇ченъ: Нераздѣ́льное сꙋщество́мъ, несли́тное ли̑цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное: вопїю́ ти пѣ́снь вели́кꙋю, въ вы́шнихъ трикра́тнѡ пѣсносло́вимꙋю.

Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши во ѻ҆бои́хъ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ, неискꙋсомꙋ́жнаѧ. и҆дѣ́же хо́щетъ бг҃ъ, побѣжда́етсѧ є҆стества̀ чи́нъ: твори́тъ бо, є҆ли̑ка хо́щетъ.

Пѣ́снь є҃.

І҆рмо́съ: Ѿ но́щи ᲂу҆́тренююща, чл҃вѣколю́бче, просвѣтѝ, молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ, сп҃се, твори́ти во́лю твою̀.

Въ нощѝ житїѐ моѐ преидо́хъ при́снѡ: тьма́ бо бы́сть мнѣ̀ и҆ глꙋбока̀ мгла̀, но́щь грѣха̀: но ꙗ҆́кѡ сы́на днѐ, сп҃се, покажи́ мѧ.

Рꙋві́мꙋ подража́ѧ, содѣ́ѧхъ ѡ҆каѧ́нный а҆́зъ беззако́нный и҆ законопрестꙋ́пный совѣ́тъ на бг҃а вы́шнѧго, ѡ҆скверни́въ ло́же моѐ, ꙗ҆́кѡже ѻ҆́тчее ѻ҆́нъ.

И҆сповѣ́даюсѧ тебѣ̀, хрⷭ҇тѐ цр҃ю̀: согрѣши́хъ, согрѣши́хъ, ꙗ҆́кѡже пре́жде бра́тїѧ прода́вшїи і҆ѡ́сифа, пло́дъ чистоты̀ и҆ цѣломꙋ́дрїѧ.

Ѿ сро́дникъ пра́веднаѧ дꙋша̀ свѧза́сѧ, прода́сѧ въ ра́бство сла́дкїй, во ѡ҆́бразъ гдⷭ҇нь: ты́ же всѧ̀, дꙋшѐ, продала́сѧ є҆сѝ ѕлы̑мъ твои̑мъ.

І҆ѡ́сифовꙋ пра́ведномꙋ и҆ цѣломꙋ́дренномꙋ ᲂу҆мꙋ̀ подража́й, ѡ҆каѧ́ннаѧ и҆ неискꙋ́снаѧ дꙋшѐ, и҆ не ѡ҆сквернѧ́йсѧ безслове́сными стремле́ньми, при́снѡ беззако́ннꙋющи.

А҆́ще и҆ въ ро́вѣ поживѐ нѣ́когда і҆ѡ́сифъ, но во ѡ҆́бразъ погребе́нїѧ и҆ воскрⷭ҇нїѧ твоегѡ̀, влⷣко гдⷭ҇и: а҆́зъ же что̀ сицево́е тебѣ̀ когда̀ принесꙋ̀;

Сла́ва, трⷪ҇ченъ: Тѧ̀, трⷪ҇це, сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ, ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.

Бг҃оро́диченъ: И҆з̾ тебє̀ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ съ собо́ю человѣ́ческое є҆стество̀.

Пѣ́снь ѕ҃.

І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ жи́знь мою̀ возведѐ ѿ тлѣ̀нїѧ.

Сле́зы ѻ҆́чїю моє́ю и҆ и҆з̾ глꙋбины̀ воздыха̑нїѧ, сп҃се, чи́стѣ приношꙋ̀, вопїю́щꙋ се́рдцꙋ: бж҃е, согрѣши́хъ ти,̀ млⷭ҇тивъ бꙋ́ди мѝ.

Оу҆клони́ласѧ є҆сѝ, дꙋшѐ, ѿ гдⷭ҇а твоегѡ̀, ꙗ҆́коже даѳа́нъ и҆ а҆вїрѡ́нъ: но пощадѝ, воззовѝ и҆з̾ а҆́да преиспо́днѧгѡ, да про́пасть земна́ѧ тебѐ не покры́етъ.

Ꙗ҆́кѡ ю҆́ница разсвирѣ́пѣвшаѧ, дꙋшѐ, ᲂу҆подо́биласѧ є҆сѝ є҆фре́мꙋ: ꙗ҆́кѡ се́рна ѿ тене́тъ спасѝ житїѐ, ѡ҆крили́вшисѧ дѣѧ́нїемъ и҆ ᲂу҆мо́мъ и҆ видѣ́нїемъ.

Рꙋка̀ мѡѷсе́ова да ᲂу҆вѣ́ритъ на́съ, дꙋшѐ, ка́кѡ мо́жетъ бг҃ъ прокаже́нное житїѐ ᲂу҆бѣли́ти и҆ ѡ҆чи́стити: и҆ не ѿча́йсѧ сама̀ себє̀, а҆́ще и҆ прокаже́на є҆сѝ.

Сла́ва, трⷪ҇ченъ: Трⷪ҇ца є҆́мь про́ста, нераздѣ́льна, раздѣ́льна ли́чнѣ, и҆ є҆ди́ница є҆́сть є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.

Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ молѝ, бцⷣе, да мл҃твами твои́ми ѡ҆правди́мсѧ.

Конда́къ.

Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ. воспрѧнѝ ᲂу҆́бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й и҆ всѧ̑ и҆сполнѧ́ѧй.

Пѣ́снь з҃.

І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю, нижѐ соблюдо́хомъ,нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.

Согрѣши́хъ, беззако́нновахъ, и҆ ѿверго́хъ за́повѣдь твою̀: занѐ во грѣсѣ́хъ произведо́хсѧ и҆ приложи́хъ ꙗ҆́звамъ стрꙋ́пы себѣ̀. но са́мъ мѧ̀ поми́лꙋй, ꙗ҆́кѡ бл҃госе́рдъ, ѻ҆тцє́въ бж҃е.

Та̑йны се́рдца моегѡ̀ и҆сповѣ́дахъ тебѣ̀ сꙋдїѝ моемꙋ̀: ви́ждь моѐ смире́нїе, ви́ждь и҆ ско́рбь мою̀, и҆ вонмѝ сꙋдꙋ̀ моемꙋ̀ ны́нѣ, и҆ са́мъ мѧ̀ поми́лꙋй, ꙗ҆́кѡ бл҃госе́рдъ, ѻ҆тцє́въ бж҃е.

Саꙋ́лъ дре́вле, є҆гда̀ погꙋбѝ ѻ҆слѧ̑та ѻ҆тца̀ своегѡ̀, внеза́пꙋ ѡ҆брѣ́те на ца́рство провозглаше́нїе: но ты блюдѝ, дꙋшѐ, не забыва́й себѐ, скѡ́тскїѧ по́хѡти твоѧ̑ произволѧ́ющи па́че црⷭ҇тва хрⷭ҇то́ва.

Дв҃дъ бг҃оѻте́цъ а҆́ще нѣ́когда и҆ согрѣшѝ сꙋгꙋ́бѡ, стрѣло́ю ᲂу҆́бѡ ᲂу҆стрѣле́нъ бы́въ прелюбодѣ́йства, копїе́мъ же плѣне́нъ бы́въ, ᲂу҆бі́йства томле́нїемъ: но ты̀, дꙋшѐ моѧ̀, тѧжча́йшими дѣ́лы недꙋ́гꙋеши, самохо́тными стремле́ньми.

Совокꙋпѝ ᲂу҆́бѡ нѣ́когда дв҃дъ беззако́нїю беззако́нїе, со ᲂу҆бі́йствомъ любодѣ́йство раствори́въ, покаѧ́нїе же сꙋгꙋ́бое показа̀ а҆́бїе: но ты, дꙋшѐ, лꙋка́внѣйшее содѣ́лала є҆сѝ, не пока́ѧвшисѧ бг҃ꙋ.

Дв҃дъ нѣ́когда и҆з̾ѡбразѝ, ꙗ҆́кѡ на і҆кѡ́нѣ, написа́въ пѣ́снь, є҆́юже сверше́нное и҆́мъ дѣѧ́нїе ѡ҆блича́етъ, зовы́й: поми́лꙋй мѧ̀, тебѣ́ бо є҆ди́номꙋ согрѣши́хъ всѣ́хъ бг҃ꙋ, са́мъ ѡ҆чи́сти мѧ̀.

Сла́ва, трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, и҆ є҆ди́ница ст҃а́ѧ, свѣ́тове и҆ свѣ́тъ, и҆ ст҃а трѝ и҆ є҆ди́но ст҃о, пое́тсѧ бг҃ъ трⷪ҇ца. но ты̀, дꙋшѐ, воспо́й, просла́ви жи́знь и҆ жи̑зни, всѣ́хъ бг҃а.

Бг҃оро́диченъ: Воспѣва́емъ тѧ̀, бл҃гослови́мъ тѧ̀, покланѧ́емсѧ тѝ, бг҃ороди́тельнице, ꙗ҆́кѡ є҆ди́наго ѿ нераздѣ́льныѧ трⷪ҇цы породи́ла є҆сѝ сн҃а и҆ бг҃а, и҆ ѿве́рзла є҆сѝ на́мъ сꙋ́щымъ на землѝ нбⷭ҇наѧ.

Пѣ́снь и҃.

І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те и҆ превозноси́те во всѧ̑ вѣ́ки.

Согрѣши́вша мѧ, сп҃се, поми́лꙋй, воздви́гни мо́й ᲂу҆́мъ ко ѡ҆браще́нїю, прїими́ мѧ ка́ющасѧ,ᲂу҆ще́дри вопїю́ща: согрѣши́хъ тѝ, сп҃сѝ, беззако́нновахъ, поми́лꙋй мѧ̀.

Колесни́чникъ и҆лїа̀, на колесни́цꙋ добродѣ́тельми вше́дъ, на нб҃са̀ возноша́шесѧ нѣ́когда ѿ земны́хъ: сегѡ̀ ᲂу҆́бо дꙋшѐ моѧ̀, восхожде́нїе помышлѧ́й.

Є҆лїссе́й нѣ́когда, прїе́мъ ми́лѡть и҆лїинꙋ̀, прїѧ́тъ сꙋгꙋ́бꙋю бл҃года́ть ѿ гдⷭ҇а: ты́ же, ѽ дꙋшѐ моѧ̀, сеѧ̀ бл҃года́ти не причасти́ласѧ є҆сѝ за невоздержа́нїе.

І҆ѻрда́нова стрꙋѧ̀ дре́вле, ми́лѡтїю и҆лїино́ю, чрез̾ є҆лїссе́ѧ, ста̀ сю́дꙋ и҆ сю́дꙋ: ты́ же, ѽ дꙋшѐ моѧ̀, сеѧ̀ бл҃года́ти не причасти́ласѧ є҆сѝ за невоздержа́нїе.

Сѡмані́тѧнынѧ нѣ́когда пра́веднаго ᲂу҆чредѝ, нра́вомъ бл҃ги́мъ: ты́ же, ѽ дꙋшѐ, не ввела̀ є҆сѝ въ до́мъ ни стра́нна, ни пꙋ́тника. тѣ́мже ѿ черто́га и҆зри́нешисѧ во́нъ, рыда́ющи.

Гїезі́евꙋ ра́зꙋмꙋ скве́рномꙋ подража́ла є҆сѝ всегда̀, ѡ҆каѧ́ннаѧ дꙋшѐ, є҆гѡ́же сребролю́бїе ѿве́ржи понѐ на ста́рость: бѣ́гай гее́нскагѡ ѻ҆гнѧ̀, ѿстꙋпи́вши ѿ ѕлы́хъ твои́хъ.

Сла́ва, трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице поми́лꙋй мѧ̀.

Бг҃оро́диченъ: Внꙋ́трь во чре́вѣ твое́мъ, пречтⷭ҇аѧ, мы́сленнаѧ порфѵ́ро є҆мманꙋ́илева, ꙗ҆́кѡ ѿ ѡ҆багре́нїѧ червлени́цы, пло́ть соистка́сѧ: сегѡ̀ ра́ди тѧ̀ бцⷣꙋ вои́стиннꙋ почита́емъ.

Пѣ́снь ѳ҃.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нно є҆́сть, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.

Оу҆́мъ ѡ҆стрꙋпи́сѧ, тѣ́ло ѡ҆болѣ́знисѧ, недꙋ́гꙋетъ дꙋ́хъ, сло́во и҆знемо́же, житїѐ ᲂу҆мертви́сѧ, коне́цъ при две́рехъ. тѣ́мже, моѧ̀ ѡ҆каѧ́ннаѧ дꙋшѐ, что̀ сотвори́ши, є҆гда̀ прїи́детъ сꙋдїѧ̀ и҆спыта́ти твоѧ̑;

Мѡѷсе́ово приведо́хъ тѝ, дꙋшѐ, мїротворе́нїе, и҆ ѿ тогѡ̀ всѐ завѣ́тное писа́нїе, повѣ́дающее тебѣ̀ пра́вєдныѧ и҆ непра́вєдныѧ: ѿ ни́хже вторы̑мъ, ѽ дꙋшѐ, подража́ла є҆сѝ, а҆ не пє́рвымъ, пред̾ бг҃омъ согрѣши́вши.

Зако́нъ и҆знемо́же, пра́здно є҆́сть є҆ѵⷢ҇лїе, писа́нїе же всѐ въ тебѣ̀ небреже́но бы́сть, прⷪ҇ро́цы и҆знемого́ша, и҆ всѧ́кое пра́ведное сло́во: стрꙋ́пи твоѝ, ѽ дꙋшѐ, ᲂу҆мно́жишасѧ, не сꙋ́щꙋ врачꙋ̀ и҆сцѣлѧ́ющꙋ тѧ̀.

Но́вагѡ писа́нїѧ привожꙋ́ ти ᲂу҆каза̑нїѧ, вводѧ̑щаѧ тѧ̀, дꙋшѐ, ко ᲂу҆миле́нїю: пра́вєднымъ ᲂу҆́бо поревнꙋ́й, грѣ́шныхъ же ѿвраща́йсѧ, и҆ ᲂу҆ми́лостиви хрⷭ҇та̀ мл҃твами и҆ поще́ньми, и҆ чистото́ю, и҆ бл҃гоговѣ́нїемъ.

Хрⷭ҇то́съ вочл҃вѣ́чисѧ, призва́въ къ покаѧ́нїю разбо́йники и҆ блꙋдни̑цы: дꙋшѐ, пока́йсѧ, две́рь црⷭ҇твїѧ ѿве́рзесѧ ᲂу҆жѐ, и҆ предвосхища́ютъ є҆̀ фарїсе́є и҆ мытарѝ и҆ прелюбодѣ́и ка́ющїисѧ.

Хрⷭ҇то́съ вочл҃вѣ́чисѧ, пло́тїю прїѻбщи́всѧ мѝ, и҆ всѧ̑, є҆ли̑ка сꙋ́ть є҆стества̀, хотѣ́нїемъ и҆спо́лни, грѣха̀ кромѣ̀, предпоказꙋ́ѧ тебѣ̀, ѽ дꙋшѐ, подо́бїе и҆ ѡ҆́бразъ своегѡ̀ снизхо́жденїѧ.

Хрⷭ҇то́съ волхвы̀ сп҃сѐ, па́стыри созва̀, младе́нєцъ мно́жєства показа̀ мꙋ́ченики, ста́рцы просла́ви, и҆ ста́рꙋю вдови́цꙋ, и҆́хже не поревнова́ла є҆сѝ, дꙋшѐ, ни дѣѧ́нїємъ, ни житїю̀: но го́ре тебѣ̀, є҆гда̀ бꙋ́деши сꙋди́тисѧ.

Пости́всѧ гдⷭ҇ь дні́й четы́редесѧть въ пꙋсты́ни, послѣдѝ взалка̀, показꙋ́ѧ человѣ́ческое: дꙋшѐ, да не ᲂу҆ны́еши, а҆́ще тебѣ̀ приложи́тсѧ вра́гъ, мл҃твою же и҆ посто́мъ ѿ но́гъ твои́хъ да ѿрази́тсѧ.

Сла́ва, трⷪ҇ченъ: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀, ꙗ҆́кѡ свѣ́тꙋ и҆ свѣ́тѡмъ, и҆ жи́зни, и҆ жи́знемъ, животворѧ́щей и҆ просвѣща́ющей концы̀.

Бг҃оро́диченъ: Гра́дъ тво́й сохранѧ́й, бг҃ороди́тельнице пречⷭ҇таѧ, въ тебѣ́ бо се́й вѣ́рнѡ ца́рствꙋѧ, въ тебѣ̀ и҆ ᲂу҆твержда́етсѧ, и҆ тобо́ю побѣжда́ѧ, побѣжда́етъ всѧ́кое и҆скꙋше́нїе, и҆ плѣнѧ́етъ сꙋпоста́ты и҆ ᲂу҆строѧ́етъ владѡ́мыѧ.

Прпⷣне ѻ҆́тче а҆ндре́е, молѝ бг҃а ѡ҆ на́съ.

А҆ндре́е честны́й и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀, да и҆зба́вимсѧ всѝ ѿ гнѣ́ва и҆ ско́рби и҆ тлѣ́нїѧ, и҆ свободи́мсѧ ѿ прегрѣше́нїй, чтꙋ́щїи твою̀ па́мѧть вѣ́рнѡ.

Та́же пое́мъ ѻ҆́ба ли̑ка і҆рмо́съ: Безсѣ́меннагѡ зача́тїѧ:

По сконча́нїи же канѡ́на глаго́лемъ ѱало́мъ д҃: Внегда̀ призва́ти мѝ, ᲂу҆слы́ша мѧ̀: Та́кожде и҆ про́чыѧ ѱалмы̀ повече́рїѧ. На А҆ллилꙋ́їа мета̑нїѧ г҃. И҆ а҆́бїе начина́емъ вторꙋ́ю статїю̀: Къ тебѣ̀, гдⷭ҇и, воздвиго́хъ дꙋ́шꙋ мою̀: И҆ про́чыѧ два̀ ѱалма̑, глаго́люще въ коне́цъ си́хъ: А҆ллилꙋ́їа. И҆ твори́мъ мета̑нїѧ г҃. Та́же начина́етъ ли́къ, прїе́мый ѿ вече́рни нача́ло: Съ на́ми бг҃ъ: И҆ глаго́лемъ сицєвы̑ѧ стїхѝ велегла́снѡ и҆ со сладкопѣ́нїемъ, глаго́лющꙋ є҆ди́номꙋ ли́кꙋ, и҆ ѿвѣща́ющꙋ дрꙋго́мꙋ. Подо́бнѣ и҆: Безпло́тное є҆стество̀: Вѣ́рꙋю же во є҆ди́наго бг҃а: ни́зкимъ гла́сомъ. Та́же наче́ншїй ли́къ: Прест҃а́ѧ влⷣчце бцⷣе, молѝ ѡ҆ на́съ грѣ́шныхъ: И҆ твори́тъ дрꙋгі́й ли́къ покло́нъ. И҆ востаю́щꙋ дрꙋго́мꙋ ли́кꙋ и҆ ѿвѣщава́ющꙋ, твори́тъ пе́рвый ли́къ покло́нъ. Та́кожде и҆ на про́чыѧ моли́тєльныѧ стїхѝ всѧ̑. Є҆гда́ же рече́мъ: Бж҃е, ѡ҆чи́сти на́съ грѣ́шныхъ, пое́мъ ѻ҆́ба ли̑ка ра́внѡ, и҆ покло́ны г҃. Та́же, трист҃о́е без̾ покло́нѡвъ, и҆ глаго́лемъ настоѧ́щыѧ тропарѝ, на гла́съ в҃, ꙗ҆̀же и҆ пое́мъ велегла́снѡ и҆ со сладкопѣ́нїемъ: Просвѣтѝ ѻ҆́чи моѝ, хрⷭ҇тѐ бж҃е: Сла́ва: Застꙋ́пникъ дꙋшѝ моеѧ̀: И҆ ны́нѣ: Ꙗ҆́кѡ не и҆́мамы дерзнове́нїѧ: Сꙋ́ть же и҆ и҆́ны тропарѝ, и҆̀же и҆ пою́тсѧ чрез̾ де́нь, на гла́съ и҃, си́рѣчь во вто́рникъ и҆ четверто́къ ве́чера. Сꙋ́ть же сі́и: Неви́димыхъ вра̑гъ мои́хъ неꙋсыпа́нїе: Сті́хъ: При́зри и҆ ᲂу҆слы́ши мѧ̀, гдⷭ҇и бж҃е мо́й: Ꙗ҆́кѡ стра́шенъ сꙋ́дъ тво́й, гдⷭ҇и: Сла́ва: Сле́зы мѝ да́ждь, бж҃е: И҆ ны́нѣ: Непосты́днꙋю, бцⷣе, наде́ждꙋ твою̀: Гдⷭ҇и, поми́лꙋй, м҃. Сті́хъ: ѿ сщ҃е́нника. И҆ мл҃тва: Гдⷭ҇и, гдⷭ҇и, и҆збавле́й на́съ: Та́же, Прїиди́те, поклони́мсѧ: три́жды. И҆ глаго́лемъ ѱалмы̀: н҃ и҆ р҃а: [Гдⷭ҇и, ᲂу҆слы́ши мл҃твꙋ мою̀:] и҆ Гдⷭ҇и вседержи́телю, бж҃е ѻ҆тє́цъ на́шихъ: Трист҃о́е, и҆ мета̑нїѧ трѝ. Сщ҃е́нникъ: Ꙗ҆́кѡ твоѐ є҆́сть црⷭ҇тво: И҆ по а҆ми́нѣ, глаго́лемъ сїѧ̑ тропарѝ ско́рѡ, на гла́съ ѕ҃: Поми́лꙋй на́съ, гдⷭ҇и: Сла́ва: Гдⷭ҇и, поми́лꙋй на́съ: И҆ ны́нѣ: Милосе́рдїѧ двє́ри ѿве́рзи на́мъ: Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Мл҃твами ст҃ы́хъ ѻ҆тє́цъ на́шихъ: И҆ мл҃тва: Влⷣко бж҃е, ѻ҆́ч҃е вседержи́телю: Прїиди́те, поклони́мсѧ, три́жды: и҆ мета̑нїѧ г҃. Ѱало́мъ ѯ҃ѳ: Бж҃е, въ по́мощь мою̀ вонмѝ: и҆ Ѱало́мъ рм҃в: Гдⷭ҇и, ᲂу҆слы́ши мл҃твꙋ мою̀: и҆: Сла́ва въ вы́шнихъ бг҃ꙋ: Гдⷭ҇и, прибѣ́жище бы́лъ є҆сѝ на́мъ: Сподо́би, гдⷭ҇и, въ но́щь сїю̀: Та́же, трист҃о́е. Прест҃а́ѧ трⷪ҇це, поми́лꙋй на́съ: Ѻ҆́ч҃е на́шъ: Сщ҃е́нникъ: Ꙗ҆́кѡ твоѐ є҆́сть црⷭ҇тво: Та́же пое́мъ велегла́снѡ и҆ ко́снѡ, на гла́съ ѕ҃: Гдⷭ҇и си́лъ, съ на́ми бꙋ́ди: И҆ ѿвѣща́етъ то́жде дрꙋгі́й ли́къ. И҆ глаго́летъ наче́ншїй ли́къ, сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀. И҆ па́ки тропа́рь: Гдⷭ҇и си́лъ, съ на́ми бꙋ́ди: Та́же то́йжде тропа́рь дрꙋгі́й ли́къ на ко́емждо стїхѣ̀. По и҆сполне́нїи же пѧтѝ стїхѡ́въ, глаго́лютъ ѻ҆́ба ли̑ка вкꙋ́пѣ пе́рвый сті́хъ и҆ тропа́рь. Та́же начина́етъ наче́ншїй ли́къ: Сла́ва: Гдⷭ҇и, а҆́ще не бы́хомъ: И҆ ны́нѣ: Мнѡ́гаѧ мно́жєства мои́хъ, бцⷣе, прегрѣше́нїй: Всест҃а́ѧ бцⷣе: Всѐ ᲂу҆пова́нїе моѐ: Гдⷭ҇и, поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче: Сщ҃е́нникъ: Бж҃е, ᲂу҆ще́дри ны̀: И҆ твори́мъ ѕ҃і покло́нѡвъ, ꙗ҆́кѡ ѡ҆бы́чно, съ мл҃твою ст҃а́гѡ є҆фре́ма: и҆ твори́мъ кѡ́сныѧ, за є҆́же ᲂу҆равнѧ́тисѧ всѣ̑мъ. Та́же начина́етъ предстоѧ́тель: Трист҃о́е, и҆ мета̑нїѧ г҃. По Ѻ҆́ч҃е на́шъ: Гдⷭ҇и, поми́лꙋй, в҃і. И҆ глаго́лемъ мл҃твꙋ: Нескве́рнаѧ, небла́знаѧ: и҆: И҆ да́ждь на́мъ, влⷣко:

Подоба́етъ вѣ́дати, ꙗ҆́кѡ вѧ́щшїи ᲂу҆ста́вы и҆ ѡ҆бы̑чаи повелѣва́ютъ, по́слѣ: И҆ да́ждь на́мъ, влⷣко: па́сти всѣ̑мъ на зе́млю, и҆ глаго́лати сщ҃е́нникꙋ велегла́снѡ мл҃твꙋ, ꙗ҆́же въ вели́цѣй вече́рни: Влⷣко многомлⷭ҇тиве, гдⷭ҇и і҆и҃се хрⷭ҇тѐ, бж҃е на́шъ: И҆ та́кѡ сотвори́въ покло́нъ предстоѧ́тель на зе́млю, глаго́летъ бра́тїѧмъ: Бл҃гослови́те, ѻ҆тцы̀ ст҃і́и, прости́те мѝ грѣ́шномꙋ, є҆ли̑ка согрѣши́хъ сло́вомъ, дѣ́ломъ, помышле́нїемъ и҆ всѣ́ми мои́ми чꙋ́вствы. И҆ мы̀ ѿвѣща́емъ: Бг҃ъ да прости́тъ тѝ, ѻ҆́тче ст҃ы́й: И҆ начина́етъ ѿ лѣ́вагѡ ли́ка по чи́нꙋ є҆ди́нъ и҆ є҆ди́нъ твори́ти подо́бнѣ и҆ проси́ти, и҆ прїѧ́ти проще́нїе, до́ндеже сконча́ютсѧ всѝ.

И҆ та́кѡ начина́етъ сщ҃е́нникъ глаго́лати: [Помо́лимсѧ ѡ҆ бл҃гочести́вѣйшемъ, самодержа́внѣйшемъ вели́комъ гдⷭ҇рѣ на́шемъ і҆мпера́торѣ [и҆́мⷬ҇къ], всеѧ̀ рѡссі́и:] Помо́лимсѧ ѡ҆ вели́кѡмъ господи́не и҆ ѻ҆тцѣ̀ на́шемъ ст҃ѣ́йшемъ патрїа́рcѣ моско́встѣмъ и҆ всеѧ̀ рꙋсѝ [и҆́мⷬ҇къ]: и҆ прѡ́чаѧ, ꙗ҆́кѡ въ ве́тхомъ ᲂу҆чине́нїи ᲂу҆ста́висѧ. И҆ по си́хъ, ꙗ҆́кѡ ѡ҆бы́чно, сті́хъ ѿ предстоѧ́телѧ: Мл҃твами ст҃ы́хъ ѻ҆тє́цъ на́шихъ: и҆ къ немꙋ̀ ѿ всѣ́хъ подо́бнѣ покло́нъ, и҆ та́кѡ ѿхо́димъ во своѧ̑ кє́ллїи. Се́й чи́нъ быва́етъ во всю̀ ст҃ꙋ́ю четыредесѧ́тницꙋ въ повече́рїихъ.

Вѣ́домо бꙋ́ди, ꙗ҆́кѡ предстоѧ́телю сті́хъ глаго́лющꙋ, мы̀ ѿвѣща́емъ: Бл҃гословѝ: прїе́мше проще́нїе. Подоба́етъ же є҆кклисїа́рхꙋ и҆ сїѐ смотри́ти прилѣ́жнѡ, да є҆гда̀ повечє́рїѧ ѿпꙋща́ютъ, бы́ти зна́менїю днѐ, си́рѣчь пре́жде сꙋмра́ка. Сѐ ᲂу҆́бо, ꙗ҆́кѡ предписа́сѧ, є҆ди́нъ де́нь ст҃ы́хъ постѡ́въ прилѣ́жнѡ и҆спыта́вше, предложи́хомъ любвѝ ва́шей коли́чество пѣ́нїѧ, и҆ въ не́мъ ᲂу҆ста́влєнныѧ ѿ ст҃ы́хъ ѻ҆тє́цъ покло́ны, ꙗ҆́же нѣ́сть лѣ́по презира́ти нижѐ вели́комꙋ законоположи́телю. Коли́чество же днено́щныхъ быва́емыхъ въ цр҃кви покло́нѡвъ сꙋ́ть т҃, кромѣ̀ полꙋ́нощницы. Прїѧ́хомъ же въ палесті́нѣ и҆ въ свои́хъ ке́ллїихъ коемꙋ́ждо пѣ́ти ѱалти́рь: и҆ могꙋ́щїи ᲂу҆́бѡ соверша́ютъ ю҆̀ днено́щнѡ: ѻ҆́ви же три́жды въ седми́цѣ: ѻ҆́ви же два́жды. Покло́ны же твори́ти, є҆ли̑ки коемꙋ́ждо по свое́й си́лѣ предстоѧ́тель ᲂу҆ста́витъ.