Неделя мясопустная
Недѣ́лѧ мѧсопꙋ́стнаѧ
Въ сꙋббѡ́тꙋ ве́чера,
на вече́рни, по предначина́тельнѣмъ ѱалмѣ̀ ѡ҆бы́чное стїхосло́вїе.
На Гдⷭ҇и воззва́хъ, поста́вимъ стїхѡ́въ і҃. И҆ пое́мъ ѻ҆смогла́сника стїхи̑ры воскрⷭ҇ны г҃, и҆ а҆натѡ́лїевы г҃: и҆ трїѡ́ди днѐ подѡ́бны д҃.
Гла́съ ѕ҃.
Подо́бенъ: Всю̀ ѿложи́вше:
Є҆гда̀ прїи́деши сꙋ́дъ првⷣный сотвори́ти, сꙋдїѐ првⷣнѣйшїй, на прⷭ҇то́лѣ сла́вы твоеѧ̀ сѣдѧ́й, рѣка̀ ѻ҆́гненнаѧ пред̾ твои́мъ сꙋди́лищемъ всѣ́хъ ᲂу҆жаса́ющи потече́тъ, предстоѧ́щымъ тебѣ̀ нбⷭ҇нымъ си́ламъ, человѣ́кѡмъ же сꙋди̑мымъ во стра́сѣ, ꙗ҆́коже кі́йждо содѣ́ла: тогда̀ на́съ пощадѝ, хрⷭ҇тѐ, и҆ ча́сти сп҃са́емыхъ сподо́би, ꙗ҆́кѡ бл҃госе́рдъ, вѣ́рою мо́лимъ тѧ̀.
Кни̑ги разгнꙋ́тсѧ, ꙗ҆влє́на бꙋ́дꙋтъ дѣѧ̑нїѧ человѣ́кѡвъ, пред̾ нестерпи́мымъ сꙋди́лищемъ: возшꙋми́тъ же ю҆до́ль всѧ̀ стра́шнымъ скрежета́нїемъ пла́ча, ви́дѧщи всѧ̑ согрѣши́вшыѧ, въ вѣ́чнꙋющыѧ мꙋ́ки сꙋдо́мъ твои́мъ пра́веднымъ ѿсыла́ємы, и҆ всꙋ́е пла́чꙋщѧ, ще́дре. тѣ́мже мо́лимъ тѧ̀, бл҃же: пощадѝ на́съ пою́щихъ тѧ̀, є҆ди́не многомлⷭ҇тиве.
Возгласѧ́тъ трꙋбы̑, и҆ и҆стоща́тсѧ гро́би, и҆ воскрⷭ҇нетъ человѣ́ческое всѐ є҆стество̀ трепе́щѧ. дѡ́браѧ содѣ́ѧвшїи ра́дꙋютсѧ въ ра́дости, ча́юще мздꙋ̀ воспрїѧ́ти: согрѣши́вшїи же трепе́щꙋтъ, лю́тѣ рыда́юще, въ мꙋ́кꙋ посыла́еми, и҆ ѿ и҆збра́нныхъ разлꙋча́еми. гдⷭ҇и сла́вы, ᲂу҆ще́дри на́съ ꙗ҆́кѡ бл҃гі́й, и҆ сподо́би ча́сти возлюби́вшихъ тѧ̀.
Пла́чꙋ и҆ рыда́ю, є҆гда̀ въ чꙋ́вство прїимꙋ̀ ѻ҆́гнь вѣ́чный, тьмꙋ̀ кромѣ́шнюю и҆ та́ртаръ, лю́тый че́рвь, скре́жетъ же па́ки зꙋбѡ́мъ и҆ непреста́ннꙋю болѣ́знь, и҆мꙋ́щꙋ бы́ти без̾ мѣ́ры согрѣши́вшымъ и҆ тебѐ пребл҃га́го нра́вомъ лꙋка́вымъ прогнѣ́вавшымъ, ѿ ни́хже є҆ди́нъ и҆ пе́рвый є҆́смь а҆́зъ ѡ҆каѧ́нный. но, сꙋдїѐ, млⷭ҇тїю твое́ю сп҃си́ мѧ, ꙗ҆́кѡ бл҃гоꙋсе́рдъ.
Сла́ва, гла́съ и҃:
Є҆гда̀ поста́вѧтсѧ престо́ли и҆ ѿве́рзꙋтсѧ кни̑ги, и҆ бг҃ъ на сꙋдѣ̀ сѧ́детъ, ѽ кі́й стра́хъ тогда̀, а҆́гг҃лѡмъ предстоѧ́щымъ во стра́сѣ, и҆ рѣцѣ̀ ѻ҆́гненнѣй текꙋ́щей! что̀ сотвори́мъ тогда̀, во мно́гихъ грѣсѣ́хъ пови́ннїи человѣ́цы; є҆гда́ же ᲂу҆слы́шимъ є҆го̀, призыва́юща бл҃гословє́нныѧ ѻ҆ц҃а̀ въ црⷭ҇тво, грѣ̑шныѧ же ѿсыла́юща въ мꙋ́кꙋ: кто̀ потерпи́тъ стра́шнагѡ ѻ҆́нагѡ и҆зрече́нїѧ; но, є҆ди́не чл҃вѣколю́бче сп҃се, цр҃ю̀ вѣкѡ́въ, пре́жде да́же кончи́на не приспѣ́етъ, покаѧ́нїемъ ѡ҆брати́въ, поми́лꙋй мѧ̀.
И҆ ны́нѣ, бг҃оро́диченъ а҃-й, гла́са.
Вхо́дъ. Свѣ́те ти́хїй: Прокі́менъ: Гдⷭ҇ь воцр҃и́сѧ: И҆ про́чее.
На лїті́и, Сла́ва, самогла́сенъ, гла́съ з҃:
Гдⷭ҇ни разꙋмѣ́вше за́пѡвѣди, та́кѡ да поживе́мъ: а҆́лчꙋщыѧ напита́имъ, жа́ждꙋщыѧ напои́мъ, нагі̑ѧ ѡ҆блеце́мъ, стра̑нныѧ введе́мъ, болѧ́щыѧ и҆ въ темни́цѣ сꙋ́щыѧ посѣти́мъ. да рече́тъ и҆ къ на́мъ хотѧ́й сꙋди́ти все́й землѝ: прїиди́те, бл҃гослове́ннїи ѻ҆ц҃а̀ моегѡ̀, наслѣ́дꙋйте ᲂу҆гото́ванное ва́мъ црⷭ҇твїе.
И҆ ны́нѣ: Под̾ кро́въ тво́й, влⷣчце, всѝ земноро́днїи прибѣга́юще, вопїе́мъ тѝ: бцⷣе, ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй, и҆ сп҃сѝ дꙋ́шы на́шѧ.
На стїхо́внѣ стїхи̑ры ѻ҆смогла́сника по а҆лфави́тꙋ.
Сла́ва, гла́съ и҃:
Оу҆вы̀ мнѣ̀, мра́чнаѧ дꙋшѐ! доко́лѣ ѿ ѕлы́хъ не ѿрѣва́ешисѧ; доко́лѣ въ лѣ́ности лежи́ши; что̀ не помышлѧ́еши ѡ҆ стра́шнѣмъ часѣ̀ сме́рти; что̀ не трепе́щеши всѧ̀ стра́шнагѡ сꙋди́ща сп҃сова; что̀ ᲂу҆̀бо ѿвѣ́тиши; и҆лѝ что̀ ѿрече́ши; дѣла̀ твоѧ̑ предстоѧ́тъ на ѡ҆бличе́нїе твоѐ, дѣѧ̑нїѧ ѡ҆блича́ютъ ѡ҆сꙋжда̑юща. ны́нѣ, ѽ дꙋшѐ, вре́мѧ наста̀: тецы̀, предварѝ, вѣ́рою возопі́й: согрѣши́хъ, гдⷭ҇и, согрѣши́хъ тѝ: но вѣ́мъ, чл҃вѣколю́бче, бл҃госе́рдїе твоѐ: па́стырю до́брый, да не ѿлꙋчи́ши менѐ ѡ҆деснꙋ́ю тебє̀ предстоѧ́нїѧ, вели́кїѧ ра́ди млⷭ҇ти твоеѧ̀.
И҆ ны́нѣ, бг҃оро́диченъ: Безневѣ́стнаѧ дв҃о:
Ѿпꙋсти́тельный: Бцⷣе дв҃о, ра́дꙋйсѧ: [три́жды.] И҆ про́чее послѣ́дованїе бдѣ́нїѧ. И҆ быва́етъ чте́нїе въ дѣѧ́нїихъ а҆пⷭ҇льских.
На ᲂу҆́трени,
Бг҃ъ гдⷭ҇ь, на гла́съ тропарѧ̀ ѻ҆смогла́сника. Тропа́рь воскрⷭ҇ный, и҆ бг҃оро́диченъ, и҆ ѡ҆бы́чное стїхосло́вїе.
Чте́мъ же и҆ ѡ҆ нищелю́бїи сло́во бг҃осло́ва, на трѝ дѣлє́нїѧ, [є҆гѡ́же нача́ло: Мꙋ́жїе бра́тїе, и҆ соꙋбо́зїи:]
И҆ полѷеле́й. Степе́нны гла́са. Прокі́менъ, и҆ є҆ѵⷢ҇лїе ᲂу҆́треннее рѧдово́е. ѱало́мъ н҃. Сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ, бг҃оро́диченъ: На сп҃се́нїѧ стєзѝ: Та́же, гла́съ ѕ҃: Поми́лꙋй мѧ̀, бж҃е: Мно́жєства содѣ́ѧнныхъ мно́ю лю́тыхъ: [стр. з҃]
И҆ канѡ́нъ воскрⷭ҇нъ, и҆ бцⷣы на ѕ҃: и трїѡ́ди на и҃.
Канѡ́нъ, творе́нїе господи́на ѳео́дѡра стꙋді́та, гла́съ ѕ҃.
Пѣ́снь а҃.
І҆рмо́съ: Помо́щникъ и҆ покрови́тель:
Де́нь стра́шный всенеизглаго́ланнагѡ твоегѡ̀ прише́ствїѧ помышлѧ́ѧ страшꙋ́сѧ: ᲂу҆жаса́ѧсѧ прови́ждꙋ, во́ньже сѧ́деши сꙋди́ти живы̑мъ и҆ мє́ртвымъ, бж҃е мо́й всеси́льне.
Є҆гда̀ прїи́деши, бж҃е, во тьма́хъ и҆ ты́сѧщахъ а҆́гг҃льскихъ нбⷭ҇ныхъ нача́лъ, и҆ менѐ ѡ҆каѧ́ннаго сподо́би срѣ́сти тѧ̀, хрⷭ҇тѐ, на ѡ҆́блацѣхъ.
Грѧдѝ, прїимѝ, дꙋшѐ моѧ̀, то́й ча́съ и҆ де́нь, є҆гда̀ бг҃ъ ꙗ҆́вѣ прїи́детъ: и҆ рыда́й, пла́чи, ѡ҆брѣте́шисѧ чиста̀ въ ча́съ и҆спыта́нїѧ.
Оу҆жаса́етъ мѧ̀ и҆ страши́тъ ѻ҆́гнь негаси́мый гее́нскїй, че́рвь го́рькїй, скре́жетъ зꙋбѡ́въ: но ѡ҆сла́би мѝ, ѡ҆ста́ви, хрⷭ҇тѐ, и҆ стоѧ́нїѧ со и҆збра́нными твои́ми сподо́би мѧ̀.
Вожделѣ́нный тво̀й гла́съ, ст҃ы̑ѧ твоѧ̑ зовꙋ́щїй на ра́дость, да ᲂу҆слы́шꙋ и҆ а҆́зъ ѡ҆каѧ́нный, и҆ ѡ҆брѧ́щꙋ црⷭ҇твїѧ нбⷭ҇нагѡ неизрече́нное наслажде́нїе.
Не вни́ди со мно́ю въ сꙋ́дъ, носѧ́й моѧ̑ дѣѧ̑нїѧ, словеса̀ и҆зыскꙋ́ѧй, и҆ и҆справлѧ́ѧй стремлє́нїѧ, но въ щедро́тахъ твои́хъ презира́ѧ моѧ̑ лю̑таѧ, сп҃сѝ мѧ, всеси́льне.
Сла́ва, трⷪ҇ченъ: Трїѷпоста́снаѧ є҆ди́нице, нача́льнѣйшаѧ гпⷭ҇жѐ всѣ́хъ, совершеннонача́льное пренача́лїе, сама̀ на́съ сп҃сѝ, ѻ҆́ч҃е и҆ сн҃е и҆ дш҃е прест҃ы́й.
Бг҃оро́диченъ: Кто̀ родѝ сн҃а, несѣ́ѧнна ѻ҆́ч҃имъ зако́номъ; сего̀ ᲂу҆́бо ражда́етъ ѻ҆ц҃ъ без̾ ма́тере. пресла́вное чꙋ́до! ты́ бо родила̀ є҆сѝ чтⷭ҇аѧ, бг҃а вкꙋ́пѣ и҆ человѣ́ка.
Катава́сїа: Помо́щникъ и҆ покрови́тель бы́сть мнѣ̀ во сп҃се́нїе се́й мо́й бг҃ъ, и҆ просла́влю є҆го̀: бг҃ъ ѻ҆тца̀ моегѡ, и҆ вознесꙋ̀ є҆го̀: сла́внѡ бо просла́висѧ.
Пѣ́снь г҃.
І҆рмо́съ: Оу҆твердѝ, гдⷭ҇и:
Гдⷭ҇ь грѧде́тъ, и҆ кто̀ стерпи́тъ стра́хъ є҆гѡ̀; кто̀ ꙗ҆ви́тсѧ лицꙋ̀ є҆гѡ̀; но гото́ва бꙋ́ди, ѽ дꙋшѐ, ко срѣ́тенїю.
Предвари́мъ, воспла́чимъ, примири́мсѧ бг҃ꙋ пре́жде конца̀: стра́шно бо сꙋди́ще, на не́мже всѝ ѡ҆бнаже́ни ста́немъ.
Поми́лꙋй, гдⷭ҇и, поми́лꙋй мѧ̀, вопїю́ ти, є҆гда̀ прїи́деши со а҆́гг҃лы твои́ми возда́ти всѣ̑мъ по достоѧ́нїю дѣѧ́нїй.
Нестерпи́мый гнѣ́въ сꙋда̀ твоегѡ̀, гдⷭ҇и, ка́кѡ стерплю̀, преслꙋ́шавъ твоѐ повелѣ́нїе; но пощадѝ, пощадѝ мѧ̀ въ ча́съ сꙋда̀.
Ѡ҆брати́сѧ, воздохнѝ, дꙋшѐ ѡ҆каѧ́ннаѧ, пре́жде да́же торжество̀ житїѧ̀ конца̀ не прїи́метъ, пре́жде да́же двє́ри черто́га не затвори́тъ гдⷭ҇ь.
Согрѣши́хъ, гдⷭ҇и, ꙗ҆́коже и҆ны́й никто́же ѿ человѣ̑къ, прегрѣши́въ па́че человѣ́ка: пре́жде сꙋда̀ млⷭ҇тивъ бꙋ́ди мѝ, чл҃вѣколю́бче.
Сла́ва, трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ ѵ҆поста́сей воспѣва́емое, спаси́ ны, вѣ́рою покланѧ́ющыѧсѧ держа́вѣ твое́й.
Бг҃оро́диченъ: Прозѧбла̀ є҆сѝ, пречⷭ҇таѧ, безсѣ́меннымъ ржⷭ҇тво́мъ живо́е сло́во, воплоще́нное во ᲂу҆тро́бѣ твое́й, непрело́жное: сла́ва, бг҃омт҃и, ржⷭ҇твꙋ̀ твоемꙋ̀.
Катава́сїѧ: Оу҆твердѝ, гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.
Сѣда́ленъ, гла́съ ѕ҃:
Помышлѧ́ю де́нь стра́шный, и҆ пла́чꙋ ѡ҆ дѣѧ́нїихъ мои́хъ лꙋка́выхъ: ка́кѡ ѿвѣща́ти бꙋ́дꙋ безсме́ртномꙋ цр҃ю̀; ко́имъ же дерзнове́нїемъ воззрю̀ на сꙋдїю̀ блꙋ́дный а҆́зъ; бл҃госе́рдый ѻ҆́ч҃е, сн҃е є҆диноро́дный, дш҃е ст҃ы́й, поми́лꙋй мѧ̀.
Сла́ва: Во ю҆до́ли пла́ча, въ мѣ́стѣ є҆́же положи́лъ є҆сѝ, є҆гда̀ сѧ́деши, млⷭ҇тиве, сотвори́ти првⷣный сꙋ́дъ, не ѡ҆б̾ѧвѝ моѧ̑ та̑йнаѧ, нижѐ посрамѝ менѐ пред̾ а҆́гг҃лы: но пощади́ мѧ, бж҃е, и҆ поми́лꙋй мѧ̀.
И҆ ны́нѣ, бг҃оро́диченъ: Оу҆пова́нїе мі́ра, бл҃га́ѧ бцⷣе дв҃о, твоѐ и҆ є҆ди́ное стра́шное предста́тельство молю̀: у҆милосе́рдисѧ на многоꙋтѣснѧ́ємыѧ лю́ди, ᲂу҆молѝ млⷭ҇тиваго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.
Пѣ́снь д҃.
І҆рмо́съ: Оу҆слы́ша прⷪ҇ро́къ:
Наста̀ де́нь, ᲂу҆жѐ при две́рехъ сꙋ́дъ: дꙋшѐ, бо́дрствꙋй. та́мѡ ца́рїе вкꙋ́пѣ и҆ кнѧ́зи, бога́тїи и҆ ᲂу҆бо́зїи собира́ютсѧ: и҆ воспрїи́метъ кі́йждо ѿ человѣ̑къ по достоѧ́нїю содѣ́ѧнныхъ.
Въ чинꙋ̀ свое́мъ, мона́хъ и҆ і҆ера́рхъ, ста́рый и҆ ю҆́ный, ра́бъ и҆ влады́ка и҆спы́тани бꙋ́дꙋтъ, вдови́ца и҆ дѣ́ва и҆стѧ́жꙋтсѧ: и҆ всѣ̑мъ го́ре тогда̀, не и҆мѣ́вшымъ житїѧ̀ непови́ннагѡ.
Нелицепрїѧ́тенъ сꙋ́дъ тво́й, непогрѣши́мо твоѐ сꙋди́ще: нѣ́сть хꙋдо́жество виті́й, кра́дꙋщее хитрослѡ́вїѧ: нѣ́сть мнѣ́нїе свидѣ́телей, ѿража́ющее пра́вдꙋ: въ тебѣ́ бо бз҃ѣ всѣ́хъ сокровє́ннаѧ предстоѧ́тъ.
Да не прїидꙋ̀ въ зе́млю пла́ча, да не ви́ждꙋ мѣ́ста тьмы̀, хрⷭ҇тѐ мо́й сло́ве, нижѐ свѧ̑заны да и҆́мамъ рꙋ́цѣ и҆ но́зѣ, внѣ̀ черто́га твоегѡ̀ и҆зве́рженный, ѡ҆де́ждꙋ нетлѣ́нїѧ ѡ҆скверне́нꙋ и҆мѣ́ѧй всеѡкаѧ́нный.
Внегда̀ ѿлꙋчи́ши грѣ̑шныѧ ѿ првⷣныхъ, сꙋдѧ́й мі́рꙋ, є҆ди́наго ѿ ѻ҆ве́цъ твои́хъ мѧ̀ сотворѝ, ѿ ко́злищъ разлꙋча́ѧ мѧ̀, чл҃вѣколю́бче, ꙗ҆́кѡ да ᲂу҆слы́шꙋ гла́съ ѻ҆́ный тво́й бл҃гослове́нный.
И҆спыта́нїю быва́емꙋ, и҆ кни́гамъ содѣ́ѧнныхъ ѿверза́ємымъ, что̀ сотвори́ши, ѽ дꙋшѐ ѡ҆каѧ́ннаѧ; что̀ ѿвѣща́ти бꙋ́деши на сꙋди́щи, не и҆мꙋ́щи принестѝ плоды̀ пра́вды хрⷭ҇тꙋ̀ и҆ содѣ́телю твоемꙋ̀;
Слы́ша плачє́внаѧ словеса̀ бога́тагѡ во пла́мени мꙋ́ки, пла́чꙋ и҆ рыда́ю ѡ҆каѧ́нный, тогѡ́жде досто́йный ѡ҆сꙋжде́нїѧ, и҆ молю́сѧ: поми́лꙋй мѧ̀, сп҃се мі́ра, во вре́мѧ сꙋда̀.
Сла́ва, трⷪ҇ченъ: Сн҃а и҆ дх҃а ѿ ѻ҆ц҃а̀ сла́влю, ꙗ҆́кѡ ѿ со́лнца свѣ́тъ и҆ лꙋчꙋ̀: ѻ҆́ваго ᲂу҆́бѡ рожде́ственнѣ, занѐ и҆ рожде́нїе, ѻ҆́ваго же происхо́днѣ, занѐ и҆ происхожде́нїе, собезнача́льнꙋю бж҃е́ственнꙋю трⷪ҇цꙋ, покланѧ́емꙋю ѿ всѧ́кїѧ тва́ри.
Бг҃оро́диченъ: Млⷣнца роди́вшаѧ, и҆ чистотꙋ̀ соблю́дшаѧ, дв҃а чтⷭ҇аѧ ты̀ ꙗ҆ви́ласѧ є҆си,̀ бг҃а ро́ждши и҆ человѣ́ка, є҆ди́наго того̀жде во ѻ҆бою̀ зра̑кꙋ: чꙋ́до твоѐ, дв҃о мт҃и, ᲂу҆жаса́етъ всѧ́кїй слꙋ́хъ и҆ помышле́нїе.
Катава́сїѧ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ. сла́ва си́лѣ твое́й, гдⷭ҇и.
Пѣ́снь є҃.
І҆рмо́съ: Ѿ но́щи ᲂу҆́тренююща:
Тре́петъ неизрече́нный и҆ стра́хъ та́мѡ: прїи́детъ бо гдⷭ҇ь, и҆ дѣ́ло съ ни́мъ коегѡ́ждо ѿ человѣ̑къ: и҆ сегѡ̀ ра́ди кто̀ тогда̀ ѡ҆ себѣ̀ не воспла́четъ;
Рѣка̀ ѻ҆́гненнаѧ смꙋща́етъ мѧ̀, и҆стаѧва́етъ мѧ̀: стрꙋ́жетъ мѧ̀ скре́жетъ зꙋбѡ́въ, тьма̀ бе́здны: и҆ ка́кѡ и҆лѝ что̀ содѣ́ѧвъ, бг҃а ᲂу҆ми́лостивлю;
Пощадѝ, пощадѝ, гдⷭ҇и, раба̀ твоего̀, да не когда̀ преда́си менѐ гѡ́рькимъ мꙋчи́телємъ а҆́ггелѡмъ лю̑тымъ: въ ни́хже нѣ́сть мо́щно та́мѡ поко́й ѡ҆брѣстѝ.
Кнѧ́зь и҆ во́ждь та́мѡ вкꙋ́пѣ, бога́тый и҆ безсла́вный, вели́кїй кꙋ́пнѡ и҆ ма́лый и҆стѧзꙋ́етсѧ ра́внѡ: го́ре тогда̀ комꙋ́ждо неꙋгото́вленномꙋ.
Ѡ҆сла́би, ѡ҆ста́ви, гдⷭ҇и, и҆ простѝ, є҆ли̑ка тѝ согрѣши́хъ, и҆ не покажи́ мѧ та́мѡ пред̾ а҆́гг҃лы во ѡ҆сꙋжде́нїи ѻ҆гнѧ̀ и҆ стꙋда̀ неконча́емагѡ.
Пощадѝ, пощадѝ, гдⷭ҇и, созда́нїе твоѐ: согрѣши́хъ, ѡ҆сла́би мѝ, ꙗ҆́кѡ є҆стество́мъ чи́стъ ты̀ є҆сѝ є҆ди́нъ, и҆ и҆́ный ра́звѣ тебє̀ никто́же є҆́сть внѣ̀ скве́рны.
Сла́ва, трⷪ҇ченъ: Є҆ди́ницꙋ є҆стество́мъ тѧ̀, трⷪ҇це, воспѣва́ю, безнача́льнꙋю, непости́жнꙋю, нача́льственное, ца́рское, пресоверше́нное є҆ди́нство, бг҃а, и҆ свѣ́та, и҆ жи́знь, и҆ содѣ́телѧ мі́рꙋ.
Бг҃оро́диченъ: Въ ржⷭ҇твѣ̀ твое́мъ па́че є҆стества̀, чтⷭ҇аѧ, зако́ни є҆стества̀ тебє̀ ра́ди разорѧ́ютсѧ ꙗ҆́вѣ: и҆́бо без̾ сѣ́мене ражда́еши превѣ́чнаго бг҃а, ѿ ѻ҆ц҃а̀ рожде́ннаго.
Катава́сїѧ: Ѿ но́щи ᲂу҆́тренююща, чл҃вѣколю́бче, просвѣтѝ, молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ, сп҃се, твори́ти во́лю твою̀.
Пѣ́снь ѕ҃.
І҆рмо́съ: Возопи́хъ всѣ́мъ се́рдцемъ:
Во стра́шнѣмъ прише́ствїи твое́мъ, хрⷭ҇тѐ, є҆гда̀ ꙗ҆ви́шисѧ съ нб҃сѐ, и҆ поста́вѧтсѧ престо́ли, и҆ кни̑ги разгнꙋ́тсѧ: пощадѝ, пощадѝ тогда̀, сп҃се, созда́нїе твоѐ.
Та́мѡ ничто́же помощѝ мо́жетъ, бг҃ꙋ сꙋ́щꙋ сꙋдїѝ, ни тща́нїе, ни кѡ́зни, ни сла́ва, ни дрꙋ́жба: ра́звѣ ѿ дѣ́лъ крѣ́пость твоѧ̀, ѽ дꙋшѐ моѧ̀!
Та́мѡ вкꙋ́пѣ кнѧ́зь и҆ во́ждь, ни́щїй и҆ бога́тый, дꙋшѐ, ни ѻ҆тє́цъ возмо́жетъ, ни ма́ти помога́ющи, ни бра́тъ и҆збавлѧ́ѧй ѿ ѡ҆сꙋжде́нїѧ.
Стра́шное и҆стѧза́нїе сꙋдїѝ помышлѧ́ющи, дꙋшѐ, ᲂу҆жасни́сѧ си́мъ, ᲂу҆гото́ви сло́во, да не ѡ҆сꙋ́дишисѧ во ᲂу҆́зы вѣ̑чныѧ.
Возьмѝ твоѐ, да не ᲂу҆слы́шꙋ, гдⷭ҇и, ѿсыла́емь ѿ тебє̀: нижѐ, поидѝ во ѻ҆́гнь проклѧ́тыхъ: но возжелѣ́нный гла́съ првⷣныхъ.
Ѿ а҆́дскихъ вра́тъ и҆зба́ви мѧ̀, гдⷭ҇и, ѿ про́пасти, и҆ тьмы̀ несвѣти́мыѧ, ѿ преиспо́днихъ, и҆ ѻ҆гнѧ̀ негаси́магѡ, и҆ всѧ́кїѧ и҆ны́ѧ мꙋ́ки вѣ́чныѧ.
Сла́ва, трⷪ҇ченъ: Трⷪ҇чнагѡ є҆ди́нства бж҃ество̀ пою̀, ѻ҆ц҃а̀ и҆ сн҃а и҆ бж҃е́ственнагѡ дх҃а, є҆ди́нагѡ нача́ла держа́вꙋ, сораздѣлѧ́емагѡ тремѝ начерта́ньми.
Бг҃оро́диченъ: Две́рь ты̀ є҆сѝ, ю҆́же є҆ди́нъ про́йде вше́дый и҆ и҆зше́дый, и҆ ключи̑ дѣ́вства не разрѣши́вый, і҆и҃съ созда́вый а҆да́ма и҆ сн҃ъ тво́й, чи́стаѧ.
Катава́сїѧ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.
Конда́къ, гла́съ а҃:
Є҆гда̀ прїи́деши, бж҃е, на зе́млю со сла́вою, и҆ трепе́щꙋтъ всѧ́чєскаѧ: рѣка́ же ѻ҆́гненнаѧ пред̾ сꙋди́щемъ тече́тъ, и҆ кни̑ги разгиба́ютсѧ, и҆ та̑йнаѧ ꙗ҆влѧ́ютсѧ: тогда̀ и҆зба́ви мѧ̀ ѿ ѻ҆гнѧ̀ неꙋгаси́магѡ, и҆ сподо́би мѧ̀ ѡ҆деснꙋ́ю тебє̀ ста́ти, сꙋдїѐ првⷣнѣйшїй.
І҆ко́съ: Стра́шное сꙋди́ще твоѐ помышлѧ́ѧ, пребл҃гі́й гдⷭ҇и, и҆ де́нь сꙋ́дный, ᲂу҆жаса́юсѧ и҆ бою́сѧ, ѿ со́вѣсти моеѧ̀ блича́емь, є҆гда̀ и҆́маши сѣ́сти на прⷭ҇то́лѣ твое́мъ и҆ твори́ти и҆спыта́нїе: тогда̀ ѿрещи́сѧ грѣхѡ́въ никто́же возмо́жетъ, и҆́стинѣ ѡ҆блича́ющей, и҆ боѧ́зни ѡ҆бдержа́щей: вельмѝ ᲂу҆́бѡ возшꙋми́тъ тогда̀ ѻ҆́гнь гее́нскїй, грѣ̑шницы же возскреже́щꙋтъ. тѣ́мже мѧ̀ поми́лꙋй пре́жде конца̀, и҆ пощади́ мѧ, сꙋдїѐ пра́веднѣйшїй.
Сѷнаѯа́рїй.
Стїхѝ: Є҆гда̀ сѧ́деши сꙋдѧ́й землѝ, сꙋдїе всѣ́хъ,
ѻ҆́нагѡ гла́са: прїиди́те, досто́йна и҆ менѐ присꙋдѝ.
Въ се́й де́нь втора́гѡ и҆ нелицепрїѧ́тнагѡ прише́ствїѧ хрⷭ҇то́ва па́мѧть твори́мъ, ю҆́же сті҃и ѻ҆тцы̀ по двꙋ́хъ при́тчахъ положи́ша, ꙗ҆́кѡ да не кто̀, во ѻ҆́нѣхъ ᲂу҆вѣ́давъ чл҃вѣколю́бїе бж҃їе, лѣ́ностнѡ поживе́тъ глаго́лѧ: чл҃вѣколюби́въ є҆́сть бг҃ъ, и҆ є҆гда̀ грѣха̀ ѿлꙋчꙋ́сѧ, легкѡ̀ могꙋ̀ всѐ соверши́ти. Се́й стра́шный де́нь здѣ̀ ᲂу҆чини́ша, да сме́ртїю и҆ ча́ѧнїемъ бꙋ́дꙋщихъ ѕлы́хъ ᲂу҆страши́вше, лѣ́ностнѡ живꙋ́щыѧ къ добродѣ́тели возведꙋ́тъ, да не то́чїю надѣ́ютсѧ на чл҃вѣколю́бїе, но да взира́ютъ, ꙗ҆́кѡ и҆ првⷣнъ є҆́сть сꙋдїѧ̀ и҆ возда́стъ комꙋ́ждо по дѣлѡ́мъ є҆гѡ̀. И҆́накѡ же, поне́же пе́рвѣе дꙋ́шы ѿидо́ша, подоба́ше прїитѝ и҆ сꙋдїѝ. ѡ҆́бразомъ же нѣ́кїимъ, настоѧ́щїй пра́здникъ полага́етсѧ ны́нѣ и҆ а҆́ки бы коне́цъ всѣ́хъ пра́здникѡвъ, ꙗ҆́коже и҆ де́нь ѻ҆́ный бꙋ́детъ длѧ на́съ коне́чный и҆з̾ всѣ́хъ. Подоба́етъ бо смотри́ти, ꙗ҆́кѡ въ бꙋ́дꙋщꙋю недѣ́лю ст҃і́и ѻ҆тцы̀ положа́тъ нача́ло мі́ра и҆ са́мое паде́нїе а҆да́мово ѿ раѧ̀: настоѧ́щїй же де́нь и҆з̾ѡбража́етъ всѣ́мъ днє́мъ коне́цъ, и҆ мі́рꙋ самомꙋ̀. Въ мѧсопꙋ́стѣ же сїю̀ положи́ша, сокраща́юще, мню̀, пи́щꙋ и҆ ѡ҆б̾ѧде́нїе стра́ха ра́ди пра́здника, и҆ къ ми́лости бли́жнемꙋ на́съ призыва́юще. И҆ и҆́накѡ: поне́же прельсти́вшесѧ снѣ́дїю и҆згна́хомсѧ и҆з̾ є҆де́ма, и҆ под̾ сꙋдо́мъ бы́хомъ и҆ клѧ́твою: посемꙋ̀ настоѧ́щїй пра́здникъ положи́ша здѣ̀, ꙗ҆́кѡ въ бꙋ́дꙋщꙋю недѣ́лю и҆́мамы в лицѣ̀ а҆да́ма а҆́ки бы ѿ є҆де́ма и҆згна́тисѧ, до́ндеже хрⷭ҇то́съ, прише́дъ, па́ки на́съ возведе́тъ въ рай. Второ́е же нарече́сѧ сїѐ прише́ствїе, занѐ и҆ пе́рвѣе пло́тїю къ на́мъ прїи́де, но ти́хѡ и҆ без̾ сла́вы: ны́нѣ же съ преесте́ственными чꙋдесы̀ прїи́детъ съ нб҃съ, и҆ съ превосходѧ́щею свѣ́тлостїю, и҆ съ тѣ́ломъ, ꙗ҆́кѡ да позна́нъ бꙋ́детъ всѣ́ми: ꙗ҆́кѡ се́й є҆́сть и҆ пе́рвѣе прише́дый, и҆ ро́дъ человѣ́чь и҆зба́вивый, и҆ сꙋди́ти па́ки є҆го̀ хотѧ́й, а҆́ще да̑ннаѧ є҆мꙋ̀ до́брѣ соблюдѐ.
Когда̀ ᲂу҆́бѡ бꙋ́детъ сїѐ прише́ствїе, никто́же вѣ́сть: сїе́ бо и҆ гдⷭ҇ь ѿ а҆пⷭ҇лъ сокры̀, но ꙗ҆вѝ, ꙗ҆́кѡ тогда̀ зна́мєнїѧ нѣ̑каѧ и҆́мꙋтъ предвари́ти, ꙗ҆̀же нѣ́цыи ѿ ст҃ы́хъ простра́ннѣе и҆з̾ѧсни́ша. Пре́жде же є҆гѡ̀ прише́ствїѧ прїи́детъ а҆нті́хрїстъ: се́й ходи́ти ᲂу҆́бѡ и҆́мать по хрⷭ҇тꙋ̀ проходѧ̀ жи́тельство, и҆ чꙋдеса̀ соверши́тъ, є҆ли̑ка и҆ хрⷭ҇то́съ дѣ́йствова, и҆ мє́ртвыѧ воскреси́тъ. Ѻ҆ба́че по мечта́нїю всѧ̑ содѣ́етъ, ꙗ҆́коже сказꙋ́етъ а҆пⷭ҇лъ, глаго́лѧ: и҆ тогда̀, ѿкры́етсѧ сы́нъ поги́бели во всѧ́кой си́лѣ и҆ зна́менїихъ и҆ чꙋдесѣ́хъ ло́жныхъ (в҃ Солꙋ́н. в҃: г҃, ѳ҃). Въ реко́момъ же і҆пполѵ́товомъ сло́вѣ пи́шетсѧ, ꙗ҆́кѡ а҆нті́хрїстъ роди́тсѧ, ѿ жены̀ скве́рныѧ и҆ дѣви́цы мни́мыѧ, ѿ є҆врє́й сꙋ́щїѧ ѿ колѣ́на да́на, сы́на і҆а́кѡвлѧ. і҆ѡа́ннъ же дамаски́нъ глаго́летъ, ꙗ҆́кѡ не са́мъ дїа́волъ въ пло́ть претвори́тсѧ, но человѣ́къ ѿ блꙋда̀ роди́всѧ, всѐ сатанино̀ дѣ́йствїе прїи́метъ, и҆ внеза́пꙋ воста́нетъ: та́же бла́гъ и҆ кро́токъ всѣ̑мъ ꙗ҆ви́тсѧ. И҆ гла́дъ тогда̀ ве́лїй бꙋ́детъ: и҆ а҆нті́хрїстъ ᲂу҆годи́тъ лю́демъ, и҆ бж҃е́ствєннаѧ писа̑нїѧ про́йдетъ, и҆ въ постѣ̀ ᲂу҆пражнѧ́тисѧ бꙋ́детъ: и҆ понꙋ́дитсѧ ѿ человѣ̑къ, и҆ ца́рь провозглаше́нъ бꙋ́детъ: и҆ возлю́битъ мно́жае є҆вре́йскїй ро́дъ, и҆ во і҆ерⷭ҇ли́мъ дости́гнетъ, и҆ хра́мъ и҆́хъ воздви́гнетъ. Пре́жде же седми́хъ лѣ́тъ прише́ствїѧ хрⷭ҇то́ва, при нача́тїи послѣ́днїѧ седми́ны, ѡ҆ не́йже проро́чествова данїи́лъ, прїи́дꙋтъ є҆нѡ́хъ и҆ и҆лїа̀ проповѣ́дающе лю́демъ не прїима́ти а҆нті́хрїста: се́й же є҆́мь и҆́хъ ᲂу҆мꙋ́читъ, та́же и҆ главы̑ и҆́хъ ѿсѣче́тъ: благоче́ствовати же и҆зво́лившїи дале́че въ го́ры ѿбѣ́гнꙋтъ, и҆́хже ѡ҆брѣ́тъ, де́монми и҆скꙋ́ситъ: ᲂу҆ма́лѧтсѧ же се́дмь лѣ́тъ ѻ҆́наѧ и҆збра́нныхъ ра́ди. и҆ гла́дъ бꙋ́детъ вели́къ, стїхі́амъ всѣ̑мъ превраща́ємымъ, ꙗ҆́кѡ потреби́тисѧ вма́лѣ ᲂу҆жѐ всѣ̑мъ.
По си́хъ же внеза́пꙋ ꙗ҆́кѡ мо́лнїѧ съ нб҃съ гдⷭ҇не прише́ствїе бꙋ́детъ, пред̾идꙋ́щꙋ чтⷭ҇но́мꙋ є҆гѡ̀ крⷭ҇тꙋ̀: и҆ ѻ҆́гненнаѧ рѣка̀ клоко́щꙋщи пред̾ ни́мъ по́йдетъ, всю̀ зе́млю ѿ скве́рны ѡ҆чища́ющи. Ꙗ҆́тъ же бꙋ́детъ а҆́бїе и҆ а҆нті́хрⷭ҇тъ, и҆ є҆гѡ̀ слꙋги̑, и҆ предадѧ́тсѧ вѣ́чномꙋ ѻ҆гню̀. Вострꙋби́вшымъ же а҆́гг҃лѡмъ, прїи́детъ внеза́пꙋ ѿ конє́цъ землѝ и҆ ѿ всѣ́хъ стїхі́й ве́сь человѣ́ческїй ро́дъ со свои́ми тѣлесы̀ и҆ дꙋша́ми, всѝ въ нетлѣ́нїе возсозда́ни, и҆ є҆ди́нъ и҆мꙋ́ще ви́дъ: и҆ са̑мыѧ стїхі̑и на лꙋ́чшее прїи́мꙋтъ и҆змѣне́нїе. И҆ разлꙋчи́тъ є҆ди́нѣмъ сло́вомъ гдⷭ҇ь пра́вєдныѧ ѿ грѣ́шныхъ. И҆ по́йдꙋтъ благи́хъ дѣ́латели въ вѣ́чнꙋю жи́знь, грѣ́шнїи же въ вѣ́чнꙋю па́ки мꙋ́кꙋ, и҆ никогда́же си́хъ преста́нїе бꙋ́детъ. Вѣ́домо же да бꙋ̀детъ, ꙗ҆́кѡ хрⷭ҇то́съ тогда̀ взы́щетъ не поста̀, и҆лѝ наготы̀, и҆лѝ чꙋде́съ: и҆ сїѧ̑ бо дѡбра́: но взы́щетъ мно́жицею си́хъ лꙋ̑чшаѧ, ꙗ҆́же сꙋ́ть ми́лостынѧ и҆ сострада́нїе. Рече́тъ бо пра́вєднымъ и҆ грѣ̑шнымъ ше́сть нѣ́кихъ за́повѣдей: взалка́хъ бо, и҆ да́сте мѝ ꙗ҆́сти: возжада́хсѧ, и҆ напои́сте мѧ̀: стра́ненъ бѣ́хъ, и҆ введо́сте менѐ: на́гъ, и҆ ѡ҆дѣ́ѧсте мѧ̀: бо́ленъ, и҆ посѣти́сте менѐ: въ темни́цѣ бѣ́хъ, и҆ прїидо́сте ко мнѣ̀: поне́же бо сотвори́сте є҆ди́номꙋ си́хъ ме́ньшихъ, мнѣ̀ сотвори́сте (Матѳ. к҃є: л҃є, л҃ѕ, м҃): ꙗ҆̀же мо́жетъ всѧ́къ сотвори́ти по си́лѣ. Тогда̀ ᲂу҆́бѡ всѧ́къ ѧ҆зы́къ и҆сповѣ́сть, ꙗ҆́кѡ гдⷭ҇ь і҆и҃съ хрⷭ҇то́съ, во сла́вꙋ бг҃а ѻ҆ц҃а̀ (Фїлїп. в҃: а҃і). Мꙋ̑ки же, ꙗ҆̀же сщ҃е́нное є҆ѵⷢ҇лїе предадѐ, сїѧ̑ сꙋ́ть: та́мѡ бꙋ́детъ пла́чь и҆ скре́жетъ зꙋбѡ́мъ (Матѳ. к҃є: л҃): че́рвь и҆́хъ не ᲂу҆мира́етъ, и҆ ѻ҆́гнь и҆́хъ не ᲂу҆га́саетъ (Ма́рк. ѳ҃: м҃д) и: вве́рзите є҆го̀ во тьмꙋ̀ кромѣ́шнюю. Сїѧ̑ всѧ̑ свѣ́тлѡ цр҃ковь бж҃їѧ прїе́млющи мы́слитъ, ꙗ҆́кѡ сла́дость ᲂу҆́бѡ и҆ црⷭ҇твїе нбⷭ҇ное є҆́сть съ бг҃омъ ст҃ы́хъ спребыва́нїе, бꙋ́дꙋщее ѻ҆́ныхъ сїѧ́нїе всегда́шнее и҆ восхожде́нїе: мꙋче́нїе же и҆ тьма̀ и҆ си̑мъ подѡ́бнаѧ сꙋ́ть ѿ бг҃а ᲂу҆дале́нїе и҆ дꙋшъ со́вѣстїю ᲂу҆грызе́нїе ка́кѡ лѣ́ности ра́ди и҆ сла́сти вре́менныѧ бж҃е́ственнагѡ сїѧ́нїѧ лиши́шасѧ.
Неизрече́ннымъ человѣколю́бїемъ твои́мъ, хрⷭ҇тѐ бж҃е, жела́тельнагѡ твоегѡ̀ гла́са на́съ сподо́би, и҆ сꙋ́щымъ ѡ҆деснꙋ́ю тебѐ сопричтѝ, и҆ поми́лꙋй на́съ. а҆ми́нь.
Пѣ́снь з҃.
І҆рмо́съ: Согрѣши́хомъ, беззако́нновахомъ:
Припаде́мъ и҆ воспла́чимъ пре́жде сꙋда̀ ѻ҆́нагѡ вѣ́рнїи, є҆гда̀ нб҃са̀ поги́бнꙋтъ, ѕвѣ́зды спадꙋ́тъ, и҆ всѧ̀ землѧ̀ поколе́блетсѧ, да млⷭ҇тива ѡ҆брѧ́щемъ въ коне́цъ ѻ҆тцє́въ бг҃а.
Неподкꙋ́пно та́мѡ и҆стпыта́нїе, стра́шенъ є҆́сть сꙋ́дъ, и҆дѣ́же сꙋдїѧ̀ непогрѣши́мь є҆́сть, и҆дѣ́же нѣ́сть лицепрїѧ́тїѧ дарѡ́въ ра́ди: тогда̀ пощади́ мѧ, влⷣко, и҆ и҆зба́ви ѿ всѧ́кагѡ гнѣ́ва твоегѡ̀ стра́шнагѡ.
Гдⷭ҇ь грѧде́тъ сꙋди́ти: кто̀ стерпи́тъ видѣ́нїе є҆гѡ̀; вострепещѝ, дꙋшѐ моѧ̀ ѡ҆каѧ́ннаѧ, вострепещѝ, и҆ ᲂу҆гото́ви и҆схо́дищꙋ дѣла̀ твоѧ̑, да млⷭ҇тива и҆ бл҃госе́рда ѡ҆брѧ́щеши є҆го̀, ѻ҆тцє́въ бг҃а.
Негаси́мый ѻ҆́гнь смꙋща́етъ мѧ̀, горча́йшїй скре́жетъ черве́й, а҆́дъ дꙋшетлѣ́нный страши́тъ мѧ̀, бл҃гоꙋми́ленъ же ѿню́дъ не быва́ю. Но, гдⷭ҇и, гдⷭ҇и, пре́жде конца̀ ᲂу҆тверди́ мѧ стра́хомъ твои́мъ.
Припа́даю тѝ, и҆ приношꙋ̀ тебѣ̀ ꙗ҆́коже сле́зы глаго́лы моѧ̑: согрѣши́хъ, ꙗ҆́коже не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри, влⷣко, творе́нїе твоѐ, и҆ призови́ мѧ.
Ѡ҆брати́сѧ, дꙋшѐ, пока́йсѧ, ѿкры́й сокровє́ннаѧ, глаго́ли бг҃ꙋ всѧ̑ вѣ́дꙋщемꙋ: ты̀ вѣ́си моѧ̑ та̑йнаѧ, є҆ди́не сп҃се, но са́мъ мѧ̀ поми́лꙋй, ꙗ҆́коже пое́тъ дв҃дъ, по млⷭ҇ти твое́й.
Сла́ва, трⷪ҇ченъ: Трѝ, є҆ди́но сꙋщество́мъ, є҆ди́но ли̑цы, трѝ пою̀ сїѧ̑: ѻ҆ц҃ъ, сн҃ъ, и҆ ст҃ы́й дх҃ъ, є҆ди́на си́ла, хотѣ́нїе и҆ дѣ́йство, є҆ди́нъ бг҃ъ трист҃ы́й, црⷭ҇тво є҆ди́но є҆динонача́льнѣйшее.
Бг҃оро́диченъ: Происхо́дитъ краснѣ́йшїй ѿ черто́га чре́ва твоегѡ̀ бг҃ъ, ꙗ҆́коже цр҃ь ѡ҆дѣ́ѧнный бг҃отка́нною багрѧни́цею, ѡ҆багре́нїѧ та́йнагѡ пречⷭ҇тыхъ крове́й твои́хъ, безневѣ́стнаѧ, и҆ црⷭ҇твꙋетъ земле́ю.
Катава́сїѧ: Согрѣши́хомъ, беззако́нновахомъ, непра́вдовахомъ пред̾ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.
Пѣ́снь и҃.
І҆рмо́съ: Є҆го́же вѡ́инства нбⷭ҇наѧ:
Стра́шнагѡ втора́гѡ твоегѡ̀, гдⷭ҇и, прише́ствїѧ помышлѧ́ѧ срѣ́тенїе, трепе́щꙋ преще́нїѧ твоегѡ̀, бою́сѧ гнѣ́ва твоегѡ̀: ѿ сегѡ́ часа̀, зовꙋ̀, сп҃сѝ мѧ̀ во вѣ́ки.
Тебѣ̀ бг҃ꙋ сꙋдѧ́щꙋ всѧ́чєскаѧ, кто̀ стерпи́тъ земноро́денъ, сы́й стра́стенъ; тогда̀ бо негаси́мый ѻ҆́гнь, и҆ че́рвь скреже́щѧй вельмѝ, ѡ҆сꙋждє́нныѧ прїи́метъ во вѣ́ки.
Всѧ́кое дыха́нїе є҆гда̀ призове́ши, хрⷭ҇тѐ, разсꙋди́ти вкꙋ́пѣ: вели́кїй стра́хъ тогда̀, ве́лїѧ нꙋ́жда, то́кмѡ дѣѧ́нїємъ помога́ющымъ во вѣ́ки.
Всѣ́хъ сꙋдїѐ бж҃е мо́й и҆ гдⷭ҇и, да ᲂу҆слы́шꙋ тогда̀ гла́съ тво́й вожделѣ́нный, да ᲂу҆ви́ждꙋ свѣ́тъ тво́й вели́кїй, да ᲂу҆зрю̀ селє́нїѧ твоѧ̑, да ᲂу҆зрю̀ сла́вꙋ твою̀, ра́дꙋѧсѧ во вѣ́ки.
Правосꙋ́де сп҃се, поми́лꙋй и҆ и҆зба́ви мѧ̀ ѿ ѻ҆гнѧ̀ и҆ преще́нїѧ, є҆́же и҆́мамъ на сꙋдѣ̀ пра́веднѡ под̾ѧ́ти: ѡ҆сла́би мѝ пре́жде конца̀, добродѣ́тели ра́ди и҆ покаѧ́нїѧ.
Є҆гда̀ сѧ́деши, сꙋдїѐ, ꙗ҆́кѡ бл҃госе́рдъ, и҆ пока́жеши стра́шнꙋю сла́вꙋ твою̀, хрⷭ҇тѐ: ѽ кі́й стра́хъ тогда̀, пе́щи горѧ́щей, и҆ всѣ̑мъ боѧ́щымсѧ нестерпи́магѡ сꙋди́ща твоегѡ̀!
Бл҃гослови́мъ ѻ҆ц҃а̀ и҆ сн҃а, и҆ ст҃а́го дх҃а, гдⷭ҇а.
Є҆ди́наго бг҃а по сꙋществꙋ̀ чтꙋ̀, трѝ ѵ҆пѡста́си пою̀ ѡ҆предѣли́тельнѣ, и҆́ныѧ, но не и҆́накѡвыѧ: поне́же бж҃ество̀ є҆ди́но въ трїе́хъ ли́цахъ: ѻ҆ц҃ъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: И҆з̾ свѣтлѣ́йшагѡ чре́ва твоегѡ̀, чтⷭ҇аѧ, проше́дъ, ꙗ҆́кѡ жени́хъ и҆з̾ черто́га, хрⷭ҇то́съ возсїѧ̀ свѣ́тъ ве́лїй сꙋ́щымъ во тьмѣ̀: и҆́бо пра́вды сл҃нце возблиста́въ, ѡ҆свѣтѝ мі́ръ.
Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
Катава́сїѧ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Безсѣ́меннагѡ зача́тїѧ:
Гдⷭ҇ь грѧде́тъ грѣ̑шныѧ мꙋ́чити, првⷣныѧ же спастѝ: вострепе́щимъ и҆ возрыда́имъ, и҆ прїи́мемъ чꙋ́вство ѡ҆́нагѡ днѐ, во́ньже безвѣ̑стнаѧ и҆ та̑йнаѧ ѿкры́въ, человѣ́кѡмъ ѿда́стъ по достоѧ́нїю.
Пристра́шенъ и҆ тре́петенъ бы́сть мѡѷсе́й, ви́дѣвъ тѧ̀ ѿ за́днихъ: ка́кѡ же постою̀ тогда̀ а҆́зъ ѻ҆каѧ́нный, лицѐ твоѐ ви́дѧ, є҆гда̀ прїи́деши съ нб҃сѐ; но пощади́ мѧ, ще́дре млⷭ҇тивнымъ твои́мъ воззрѣ́нїемъ.
Данїи́лъ ᲂу҆боѧ́сѧ часа̀ и҆спыта́нїѧ: а҆́зъ же ѡ҆каѧ́нный что̀ постраждꙋ̀, гдⷭ҇и, въ то́й прише́дъ стра́шный де́нь; но да́ждь мѝ пре́жде конца̀ бл҃гоꙋго́днѡ тебѣ̀ послꙋжи́ти, и҆ ᲂу҆лꙋчи́ти црⷭ҇твїе твоѐ.
Ѻ҆́гнь гото́витсѧ, и҆ че́рвь ᲂу҆строѧ́етсѧ: весе́лїе, сла́ва, ѡ҆слабле́нїе, свѣ́тъ невече́рнїй, ра́дость првⷣныхъ. и҆ кто̀ бл҃же́нъ ꙗ҆ви́тсѧ, и҆збѣ́гнꙋвъ мꙋче́нїѧ пе́рвыхъ и҆ наслѣ́дивъ втора̑ѧ;
Да не ѿврати́тъ мѧ̀ ѿ лица̀ твоегѡ̀, гдⷭ҇и, ꙗ҆́рость твоегѡ̀ гнѣ́ва: нижѐ да ᲂу҆слы́шꙋ гла́са твоегѡ̀ клѧ́твеннагѡ, во ѻ҆́гнь ѿсыла́ющагѡ, но да вни́дꙋ въ ра́дость нетлѣ́ннагѡ твоегѡ̀ черто́га и҆ а҆́зъ тогда̀ со ст҃ы́ми твои́ми.
Оу҆́мъ ᲂу҆ѧзви́сѧ, тѣ́ло ѡ҆стрꙋпи́сѧ, болѣ́знꙋетъ дꙋ́хъ, сло́во и҆знемо́же, житїѐ ᲂу҆мертви́сѧ, коне́цъ при две́рехъ. тѣ́мже, ѡ҆каѧ́ннаѧ моѧ̀ дꙋшѐ, что̀ сотвори́ши, є҆гда̀ прїи́детъ сꙋдїѧ̀ и҆спыта́ти твоѧ̑;
Сла́ва, трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не свѣ́те, є҆ди́нагѡ свѣ́та сїѧ́нїе: и҆ є҆ди́ный є҆ди́нственнѣ є҆ди́нагѡ бг҃а ст҃ы́й дш҃е, гдⷭ҇а гдⷭ҇ь вои́стиннꙋ сы́й: ѽ трⷪ҇це є҆ди́нице ст҃а́ѧ! сп҃си́ мѧ бг҃осло́вѧща тѧ̀.
Бг҃оро́диченъ: Чꙋ́до рождества̀ твоегѡ̀ ᲂу҆дивлѧ́етъ мѧ̀, всенепоро́чнаѧ: ка́кѡ зачина́еши безсѣ́меннѡ неѡб̾е́млемаго: рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; па́че є҆стества̀ бы́вшее вѣ́рою прїе́мъ, рожде́нномꙋ поклони́сѧ: є҆ли̑ка бо хо́щетъ, и҆ мо́жетъ.
Катава́сїѧ: Безсѣ́меннагѡ зача́тїѧ ржⷭ҇тво̀ несказа́нно є҆́сть, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Є҆ѯапостїла́рїй воскре́сенъ: Та́же настоѧ́щїй.
Подо́бенъ: Со ᲂу҆ч҃нки̑ взы́демъ:
Стра́шный де́нь сꙋда̀, и҆ неизрече́нныѧ твоеѧ̀ сла́вы помышлѧ́ѧ, трепе́щꙋ, гдⷭ҇и, всѧ́кѡ, и҆ трѧсы́йсѧ стра́хомъ вопїю̀: є҆гда̀ прїи́деши на зе́млю со сла́вою, хрⷭ҇тѐ бж҃е, сꙋди́ти всѧ́чєскаѧ, ѿ всѧ́кагѡ мꙋче́нїѧ и҆зба́ви мѧ̀, влⷣко, ѡ҆деснꙋ́ю тебѐ сподо́бивъ мѧ̀ ста́ти.
Дрꙋгі́й: Подо́бенъ: Жєны̀ ᲂу҆слы́шите:
Сѐ де́нь грѧде́тъ гдⷭ҇а вседержи́телѧ, и҆ кто̀ стерпи́тъ стра́хъ прише́ствїѧ ѻ҆́нагѡ; де́нь бо ꙗ҆́рости є҆́сть, и҆ пе́щь горѧ́щаѧ, є҆гда̀ сꙋдїѧ̀ сѧ́детъ, и҆ по достоѧ́нїю дѣѧ́нїй комꙋ́ждо воздаѧ̀.
Бг҃оро́диченъ: Ча́съ и҆спыта́нїѧ и҆ стра́шнагѡ прише́ствїѧ чл҃вѣколю́бца влⷣки помышлѧ́ѧ, ве́сь трепе́щꙋ, и҆ сѣ́тꙋѧ, вопїю́ ти: сꙋдїѐ мо́й првⷣнѣйшїй, и҆ є҆ди́не многомлⷭ҇тиве, ка́ющасѧ прїими́ мѧ, мл҃твами бцⷣы.
На хвали́техъ стїхи̑ры воскрⷭ҇ны ѻ҆смогла́сника д҃: и҆ а҆нато́лїевъ є҆ди́нъ: и҆ трїѡ́ди д҃, Гла́съ ѕ҃. Самогла́сны.
Сті́хъ: Всѧ́кое дыха́нїе:
Помышлѧ́ю де́нь ѻ҆́ный и҆ ча́съ, є҆гда̀ и҆́мамы всѝ, на́зи и҆ ꙗ҆́кѡ ѡ҆сꙋжде́ни, нелицепрїѧ́тномꙋ сꙋдїѝ предста́ти: тогда̀ трꙋба̀ возшꙋми́тъ вельмѝ, и҆ ѡ҆снова̑нїѧ землѝ подви́жатсѧ, и҆ ме́ртвїи ѿ гробѡ́въ воскрⷭ҇нꙋтъ, и҆ въ во́зрастѣ є҆ди́нѣмъ всѝ бꙋ́дꙋтъ: и҆ всѣ́хъ та̑йнаѧ ꙗ҆влє́на предста́нꙋтъ пред̾ тобо́ю и҆ возрыда́ютъ, и҆ воспла́чꙋтъ, и҆ во ѻ҆́гнь кромѣ́шнїй ѿи́дꙋтъ, и҆̀же никогда́же пока́ѧшасѧ: въ ра́дости же и҆ весе́лїи првⷣныхъ ли́къ вни́детъ въ черто́гъ нбⷭ҇ный.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:
Ѽ кі́й ча́съ тогда̀, и҆ де́нь стра́шный, є҆гда̀ сѧ́детъ сꙋдїѧ̀ на престо́лѣ стра́шнѣмъ! кни̑ги разгиба́ютсѧ, и҆ дѣѧ̑нїѧ ѡ҆блича́ютсѧ, и҆ та̑йнаѧ тьмы̀ ꙗ҆влє́на быва́ютъ: а҆́гг҃ли ѡ҆бтека́ютъ, собира́юще всѧ̑ ꙗ҆зы́ки. прїиди́те, ᲂу҆слы́шите, ца́рїе и҆ кнѧ́зи, рабѝ и҆ свобо́днїи, грѣ̑шницы и҆ првⷣницы, бога́тїи и҆ ни́щїи: ꙗ҆́кѡ грѧде́тъ сꙋдїѧ̀, хотѧ́й сꙋди́ти все́й вселе́ннѣй. и҆ кто̀ постои́тъ пред̾ лице́мъ є҆гѡ̀, є҆гда̀ а҆́гг҃ли предста́нꙋтъ ѡ҆блича́юще дѣѧ̑нїѧ, помышлє́нїѧ и҆ мы̑сли, ꙗ҆̀же въ нощѝ и҆ во днѝ; ѽ кі́й ча́съ тогда̀! но пре́жде да́же не приспѣ́етъ кончи́на, потщи́сѧ зовꙋ́щи, дꙋшѐ: бж҃е, ѡ҆брати́въ сп҃си́ мѧ, ꙗ҆́кѡ є҆ди́нъ бл҃госе́рдъ.
Гла́съ и҃: Сті́хъ: Возвеселю́сѧ и҆ возра́дꙋюсѧ ѡ҆ тебѣ̀:
Данїи́лъ прⷪ҇ро́къ, мꙋ́жъ жела́нїй бы́въ, власти́тельство бж҃їе ви́дѣвъ, си́це вопїѧ́ше: сꙋдїѧ̀ сѣ́де, и҆ кни̑ги разгнꙋ́шасѧ. блюдѝ, дꙋшѐ моѧ̀: пости́ши ли сѧ, бли́жнѧгѡ твоегѡ̀ не пре́зри: ѿ бра́шенъ воздержи́ши ли сѧ, бра́та твоегѡ̀ не ѡ҆сꙋжда́й: да не во ѻ҆́гнь ѿсыла́ема сгори́ши ꙗ҆́кѡ во́скъ, но да без̾ поткнове́нїѧ введе́тъ тѧ̀ хрⷭ҇то́съ во црⷭ҇твїе своѐ.
Гла́съ а҃. Сті́хъ: Воскреснѝ, гдⷭ҇и бж҃е мо́й, да вознесе́тсѧ рꙋка̀ твоѧ̀:
Пред̾ѡчи́стимъ себѐ бра́тїе, цари́цею добродѣ́телей: се́ бо прїи́де, бога́тство бл҃ги́хъ на́мъ подаю́щи: страсте́й ᲂу҆толѧ́етъ дмє́нїѧ, и҆ во влⷣкою примирѧ́етъ прегрѣши́вшыѧ. тѣ́мже съ весе́лїемъ сїю̀ прїи́мемъ, вопїю́ще хрⷭ҇тꙋ̀ бг҃ꙋ: воскр҃сы́й и҆з̾ ме́ртвыхъ, неѡсꙋжде́ны на́съ сохранѝ, славосло́вѧщыѧ тѧ̀ є҆ди́наго безгрѣ́шнаго.
Сла́ва, па́ки то́йже сті́хъ.
И҆ ны́нѣ: Пребл҃гослове́нна є҆сѝ: Славосло́вїе вели́кое: и҆ ѿпꙋ́стъ. Та́же, ѡ҆бы́чнаѧ лїті́а въ притво́рѣ, въ не́йже пое́мъ: Сла́ва, и҆ ны́нѣ, стїхи́рꙋ є҆ѵⷢ҇льскꙋю. Присовокꙋплѧ́емъ и ча́съ а҃-й, въ не́мже чте́тсѧ ѡ҆глаше́нїе прпⷣбнагѡ ѻ҆тца̀ на́шегѡ ѳео́дѡра стꙋді́та.
На лїтꙋргі́и и҆з̾ѡбрази́тєльнаѧ. И҆ бл҃жє́нна гла́са, на ѕ҃: и҆ ѿ канѡ́на трїѡ́ди пѣ́снь ѕ҃, на д҃. Прокі́менъ, гла́съ г҃: Ве́лїй гдⷭ҇ь на́шъ: Сті́хъ: Хвали́те гдⷭ҇а, ꙗ҆́кѡ бл҃гъ ѱало́мъ: А҆пⷭ҇лъ къ корі́нѳѧнѡмъ, зача́ло р҃м. А҆ллилꙋ́їа, гла́съ и҃: Прїиди́те возра́дꙋемсѧ гдⷭ҇еви, воскли́кнемъ бг҃ꙋ сп҃си́телю на́шемꙋ. Сті́хъ: Предвари́мъ лицѐ є҆гѡ̀ во и҆сповѣ́данїи, и҆ во ѱалмѣ́хъ воскли́кнемъ є҆мꙋ̀. Є҆ѵⷢ҇лїе ѿ матѳе́а, зача́ло р҃ѕ. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ, првⷣнїи, ѡ҆ гдⷭ҇ѣ: